ادبیات ائوی

09 June 2026 07:55

#اوشاق_ادبیاتی
#زوغال_چیچه‌یی

ساپ- ساری اولور
زوغال چیچه‌یی.
قورخوتمور اونو،
یازین کوله‌یی.
چوخ ائرکن آچیر،
باغا نور ساچیر،
قیش اونو گؤروب،
باغلاردان قاچیر.

#عزیز_موسی
#ادبیات_ائوى

@AdabiyatEvi

ادبیات ائوی

07 June 2026 14:17

#بیلدیریش

«لالا» آدلی حئکایه (رومان) کتابی‌نین آچیلیش تؤره‌نی، خرداد آیی‌نین ۲۱-جی گونونده آخشام ۶-دان ثقه‌الاسلام ائوینده (قاری کؤرپوسو- نظامی آدینا ادب، کولتور قورولتایی) کئچیریله‌جک. بو اثرین یازیچیسی «نساء مقصودی‌فر»دیر. کتاب، آخار نشری واسطه‌سی ایله چاپ اوزو گؤرموشدور.

#ادبیات_ائوی
#لالا

@AdabiyatEvi

ادبیات ائوی

06 June 2026 13:09

#فولکلور_گونوموز
یاغیش ماهنیسی

یاغیش یاغمایاندا، پالچیق یوغوروب و تندیره یاپارلار، پالچیق قوپ-قورو قورویاندان سونرا اونو سویا سالیب و بئله اوخویارلار:

آی جان، آی جان، تورپاغیم
اوددا آز یان تورپاغیم
ایندی یاغیش یاغاجاق
سن دوش ایسلان، تورپاغیم.

یاندی تورپاق قوپ-قورو
سویا سالدیم دوپ دورو
یاغ، یاغیشیم، چوخلو یاغ
چؤل‌لر اولدو قوپ قورو‌.

تورپاق قوروتدوم سنی
بیردن اونوتدوم سنی.
گؤردوم یاغیش یاغماییر
تئز سویا توتدوم سنی.

ایسلاندین، آرزو گتیر
چای‌لارا بول سو گتیر.
قاری‌لارا چوخلو یون
چوبانا قوزو گتیر.

دئییلن‌لره گؤره، بو ماهنی‌دان سونرا یاغیش یاغار.

یازیچی: #جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی
#ادبیات_ائوی

@AdabiyatEvi

ادبیات ائوی

05 June 2026 18:27

#فیلم_تانیتیمی
فیلم آدی: آیریلما (Detachment)
ژانر: درام
رئژیسور: تونی کئی
سناریست: کارل لوند
یازیچی: #احمد_یوسفی
#ادبیات_ائوی

@AdabiyatEvi

ادبیات ائوی

05 June 2026 09:55

میکایی مشفقین دوغوم گونو...

بوگون «میکاییل مشفق»ین (۱۹۰۸-۱۹۳۸) دوغوم گونودور. ۱۹۳۷-جی ایل اوکتیابرین ۳۱-ده «یووئلیان سومباتوو»ون امضالادیغی ادعانامه مشفقین اوزونه اؤلوم یول‌لارین آچدی. سومباتووون ادعانامه‌سیندن ایکی گون سونرا حیات یولداشی دیلبری ده حبس ائتدیلر. دیلبری ایلک استنطاق‌دا آوانئسیان دیندیردی. ایکی آی سونرا موسکودان «نیکیتچئنکو» گلدی، شاعیری محاکمه ائتدی و یانوارین ۵-ده ۲۰ دقیقه داوام ائدن محکمه‌نین حؤکمو ایله مشفق گولله‌لَنیر. ائوله‌ننده مشفقین ۲۵، دیلبرین ۱۸ یاشی وار ایدی‌. میکاییل مشفقین «گوناه»لاریندان بیری ده «حسین جاوید»له دوستلوق ائتمه‌سی ایدی. آرالاریندا ۲۶ ایل یاش فرقی اولسا دا، دوست ایدیلر.

قایناق: آذر توران- «مشفق- آذربایجان ادبیاتی‌نین جاوابسیز سوالی».


#میکاییل_مشفق
#ادبیات_ائوی

@AdabiyatEvi

ادبیات ائوی

03 June 2026 12:34

حکایه: قاردئروب
یازیچی: #اولقا_تاکارچوک
چئویرن: #علی_چاغلا
#ادبیات_ائوی

@AdabiyatEvi

ادبیات ائوی

01 June 2026 09:36

#شعر_گونوموز

لیلا...
تاریخین ان اوزون و قارانلیق گئجه‌سی سن دئییلدین،
بیز ایدیک
ساواش‌لارین اورتاسیندا هوسله‌نن
اؤپوجوک‌لرین ان دادلی‌سی
بوبمالار آلتیندا سئودالانان اورک‌لرین
اضطرابلی یاتاق‌لارین یارالی بالاسی،
بیز ایدیک...
بیزی، روایت‌لر ساواش‌لارینا اؤلوم تانریچاسی یاراتدی یارادان.
اوره‌ییمیز دولو،
الیمیز بوشدور...
بیزی دیندیرمه، دانیشدیرما
زهر قدحینی ایچیب کئفلندیکده
ساغ ایسه سولا بؤلدولر بیزی
ایل‌لر بویو ساغدان- سولا
سولدان- ساغا قاچارکن،
ساغ- سولوموزو ایتیردیک
نه اؤزوموزو تانیدیق!
نه یولوموزو!
سو، چورک، هاوا، گولوش، سئوگی،
یاشام، آزادلیق بالاسی دئییل
هسته‌ای بومبالار، راکئت‌لر، نیابتی‌لر
قوربانلیغی گئتدیک
اؤزگه‌دن ده یئدیک
اؤزوموزدن ده!
باها یاشاییب
اوجوز اؤلدوک!
رؤیالاریمیر خیاواندا گوللـه‌لندی
دوستاق بوجاق‌لاریندا
مدرسه‌لرده
یونیورسیته‌لرده...
قانیمیز گاه وطن قانووْلارینا آخدی
گاه غربت یاتاغینا دولدو،
گاه «دنا» گمی‌سینده بومبالانیب بوغولدوق.
گاه دیکتاتورلار سیگارتینده دارا چکیلدیک.
هئچ بیلمه‌دیک کیمین قیلینجی ایله پارچالاندیق لیلا!
نعشیمیزی خیاوان‌لاردا سورویرکن،
آغلادیق بیر- بیریمیزی
آغلادیق یاشامی،
وطنی
انسانی
جاوان‌لار نعشینه دانس ائدن آنالارین دردینه آغلادیق لیلا...
ایندی قارانلیق سنین یولونموش ساچلاریندان اوزوندور...
قوردون قورخوسوندان ایتی باغریمیزا باسیب سوسموشوق لیلا!
تاریخی واراق‌لا
بیزی اوخو لیلا، اوخو دردلریمیزی، کدرلریمیزی
اوخو قورخونج جنایت‌لرین سوسدوروجو قورخوسونو،
بیزی پؤز، یئنی‌دن یاز
یئنی‌دن یارات لیلا...

#نوریه_لوح
#ادبیات_ائوی

@AdabiyatEvi

ادبیات ائوی

30 May 2026 08:29

#فولکلور_گونوموز
تولکو و چاققال

بیر آریق، ال‌دن دوشموش تولکو مئشه‌نی بوش، کیمسه‌سیز گؤروب، اؤزونو اورانین شاهی اعلان ائدیر. مئشه‌ده گزیر، ایسته‌ییر مملکتینه هر هم‌جینس‌دن چاغیرسین، اونلارا دئسین، منیم شاه‌لیغیمدا هئچ نه‌دن چکینمه‌یین، ایسته‌دییینیز کیمی یاشایین، عؤمور سورون.
بو واخت، بیر چاققالا راست‌لاشیر. باخیر کی، چاققال دا اونون بورایا گلدییی گونده‌دیر- قیچ‌لاری دولاشیر، اونا دئییر: -او آتی بو ساعات داغیدارام، سن ده یئییب کؤکه‌لرسن، آما منه یاخشی فیکیر وئر‌.
تولکو بئله دئییب گؤزلرینی بَرَلدیر، چاققالدان سوروشور:
-گؤزلریم بؤیودومو؟
چاققالدا دا آز اویون یوخ ایمیش، بیلیر کی، تولکو شیر یئریشی گئتمک ایسته‌ییر، هم ده فیکیرلشیر کی، تولکو بورانین پادشاهی‌دیر، کؤنلو مندن نییه قیریق اولسون؟
دئییر: -یامان بؤیودو.
تولکو توک‌لرینی قاباراماغا چالیشیر، آنجاق تک بیر توکو ده بیز دورمور، چاققال‌دان یئنه خبر آلیر: -توک‌لریم بیز-بیز اولدومو؟
چاققال جواب وئریر: -اولدو، یامان اولدو.
تولکو قویروغونو اوخ کیمی دوزَلدیر، خبر آلیر:
-قویروغوم دوپ‌په‌دوز دوزلدی‌می؟
چاققال دئییر: -یامان دوزلدی.
تولکو چاققالا قاباقجادان اورک-دیرک وئریر:
-هئیبتیم سنی قورخوتماسین، بو ساعات آتین جیریمینی چیخارداجام، سن ده دویونجاق یئیه‌جکسن.
تولکو نعره چکنده، چاققالین گولمه‌یی توتور، چونکی همیشه‌کی کیمی ونگگیلده‌ییر، اؤزونو آتین اوستونه آتیر، آت تپیک‌له ووروب اونو اؤلدورور‌. چاققال اونا یاخین‌لاشیب دئییر:
-آی تولکو، ساغلیغیندا سایدیق‌لاری‌نین هامیسی ایندی سنده وار: گؤزلرین بره‌له قالیب، توک‌لرین بیز-بیز اولوب، قویروغون دا دوپ‌په‌دوز دوزه‌لیب. اؤزونو باشقاسینا اوخشادان‌لارین آخیرینی بئله گؤردوم.

یازیچی: #جلیل_عبدالله
کؤچورن: #نرگس_ابراهیمی
قایناق: آذربایجان شفاهی خالق ادبیاتی کلیاتی
#ادبیات_ائوی

@AdabiyatEvi

ادبیات ائوی

29 May 2026 10:50

#فیلم_تانیتیمی
فیلم آدی: یاشاماق (Ikiru)
سئناریست: شینوبو هاشیموتو، آکیرا کوروساوا، هیدئو اوگونی
رئژیسور: آکیرا کوروساوا
چیخیش ایلی: ۱۹۵۲- ژاپون
تانیتیم یازان: #احمد_یوسفی
#ادبیات_ائوی

@AdabiyatEvi

ادبیات ائوی

27 May 2026 16:58

آتاسیندان «سنی بو ایل ائولندیره‌جه‌یم» سؤزو اوندا بؤیومه، اؤزۆنو کیشی بیلمه دویغوسو یاراتمیشدی. قاباقجالار یئریدیکده ایکی الینی توولایا-توولایا گئتدییینی دَییشیب ایندیسه ساغ الینی جیبینه قویاراق، سول الینی ساللایا-ساللایا گئدیردی. باشاردیقجا کندین ایچینده آز قاچیردی. آتاسی‌نین تاپشیردیغینا گؤره اوشاقلاردان اوزاق گزیردی.
میرزاغا پَیه‌ ایله دیب-دیبه حیط-ین بوش قالان یئرینده سوواقدان بیر اوتاق جۆرله‌ییردی.
گۆللو داملاریندان باخاندا میرزاغا گیلین ائولرینی گؤروردو. او اوتاق گۆللونون گلین اوتاغی اولاجاق ایدی.
گۆللو آرتیق کندده باش وئرن اولای‌لارا فیکیر وئرمیردی، دامدان گؤزو بی‌بی‌سی گیلین حیط‌لرینه ساتاشدیقدا قیزیشما توتوردو. دیل-دوداق آلتی دئیینیردی:
«آی گؤروم بو دئییکلی‌لیک دَبین چیخاردانین آتاسی تۆن به تۆن دۆشسون، کاش ائله منی دوغاندا جانیم بوغازیمدان چیخاردی بو گۆنلری گؤرمزدیم، دئین یوخ آخی ائششه‌یین بالاسی سن او قودوغا گئدندن سونرا نه اولاجاق؟ نه او هوش ائله‌ییر آرواد نه‌دی، نه مندن اونا آرواد چیخاجاق، نه‌ ده اوندان منه ار اولاجاق. منیم قوجالیق واختیم اونون لاپ قیزغین واختینا دۆشه‌جک، دوغسام بیر جور اولاجاق، دوغماسام مین جور سؤز چیخاجاق، من یازیق تاروئردینی بؤیوده‌جه‌یم یا اونون اوشاغین؟»
بونلاری اؤز-اؤزونه دئیه-دئیه یئره-گؤیه سؤیوش وئریردی.
آناسی سس‌سیزجه آرخادان گلیب الینی گۆللونون چیگنینه قویاراق دئدی
«گۆللو، آی قیز اولمایا گؤز آلتین وار؟»
گۆللو ائشیتدییی سؤزه اینانا بیلمیردی، گؤزلرینی بَرَلدیب آناسینا باخاراق دئدی
«نمنه؟! گؤز آلتی؟! باخ منه، من سن دئین قیزلاردان دئییلم، منیم ساچیما دن دۆشوب سن منیم گؤز آلتیمین فکرینده‌سن، سن آللاه ال چک قوی من اؤز دردیمله اؤلوم دااا».
«قیز قان ائله‌مه‌دیم کی، دئدیم بلکه بیرینی...».
«الله اکبر هااااا آرواد یئنه اؤز سؤزون دئییر، اده من بیرینی سئوسه‌یدیم ائله جاوانلیغیمدا قوشولوب قاچاردیم دا».
«آنا سنه قوربان اولسون، اولسون چوخ نایراحاند اولما، واللاه تاروئردی ده یاخشی اوغلان‌دی، بیرآز کیچیک‌دی اونو دا کئچینرسیز، قورتارار گئدر.»
«هه بیرآز کیچیکدی، اوغلوم یئرینده»- دئییب گۆللو آیاغا قالخدی.
گؤیچک دالدان سسله‌نیب دئدی:
«باخ توخودوغوموز قالی‌دان آز قالیر بو ایکی-اۆچ گۆنو سحر تئز دۆشوب آخشام گئج چیخساق قورتارار، آتاوا دا دئییب کؤنلون آلمیشام قورتارسین اونو سنه پای وئره‌جه‌یم».
ایکی آی کئچدی، کندین هر یئرنده گۆللو ایله تاروئردی‌نین ائولی‌لیک سؤزو ایدی.
«آللاه ایرضاسی گۆللو یامان قیز ایدی، دده‌سی‌نین سؤزوندن چیخماییب تاروئردی‌یه گئتدی».
«اده به سن نییه تاروئردی‌نی دئمیرسن؟ جاوانلیغین هئچ ائله‌دی، میرزاغا کندده هانکی قیزین اۆستونه ال قویسایدی گؤزو یومولو اونو تاروئردی‌یه وئرردیلر».
«آخی بورا کیمی تاروئردی‌دن گیزلتمیشدیلر، تاروئردی اؤزو ده تزه‌‌جه بیلیب اونا گۆللونو آلاجاقلار. آما دای میرزاغانین اۆزونه دورا بیلمه‌ییب».
«واللاه بیری من بااا حیف کی قیزیم یوخ، یوخسا ائله اؤزوم قیزی آپاریب قویاردیم میرزاغانین ائوینه. تاروئردی‌دن یاخشی اوغلان بو کندده کیمی تاپا بیلرسن؟».
«من ده صف‌قولو دئیه‌نی دئییرم، گۆللو چیخارلی قیز ایدی، وقتینده گۆللویه گؤیوللو اولان چوخ ایدی آنجاق هئچ کیم مردانعلی‌نین قورخوسوندان یاخینا گئده بیلمه‌دی، گۆللو ایسته‌سه‌یدی بیرینه قوشولوب قاچاردی.»
کند اهلی‌نین دانیشیغی قورتاران دئییلدی.
«هله دئییرلر گۆللو دئییب ایسته‌میرم توی توتاسیز ائله جاهاز اۆسته اوغلان ائوینه گئده‌رم».
«هه اوجور ائشیتمیشم».
تاروئردی ائشیتدیک‌لرینه اینانمیردی، او گۆللونو اؤزونه بؤیوک باجی کیمی بیلیردی آنجاق آتاسی‌نین سؤزو اۆسته سؤز دئمک اولمازدی، دب بئله ایدی.
یالنیز بیر دؤنه آناسینا دئمیشدی «من گۆللونو ایسته‌میرم». آناسی دا «اولماز، گرک اونو آلاسان، سن اونون دئییکلیسی‌سن» دئمیشدی.
گۆللونون سؤزلری میرزاغانین قولاغینا کئچمه‌ییب، گۆللو  «توی ایسته‌میرم» دئسه ‌ده، میرزاغا دا «بیر تک اوغلوم وار اونون تویون توتماسام ائل منه گۆلر» دئییب دئدییی سؤزون اۆستونده دایانمیشدی.
گۆز چاغیندان ۱۵ گۆن کئچندن سونرا کنددن توی سسی گلیردی، گۆللونون خونچاسی نئچه گۆن قاباق اوتاغینا آپاریلمیشدی، آل گۆللو قالی یئره سالینیب اوتاغین یاریدان چوخونو دولدورموشدو. گۆللو آغلار گؤزله بخت ائوینه کؤچدو. گۆللو ایلک گۆنلر اؤزونۆ اؤلدورمه‌یه فیکیرله‌شیردی آنجاق ائل ایچینده چیخان سؤزلردن چکینیب بو فیکیرلری باشیندان آتدی.

قادین الینه سوواشان بوزارمیش آل گۆللو قالی‌نین تؤکلوملرینی اووجونا آلیب، الینی کاسادا ایسلاداراق یئنه قالی اۆسته چکدی.


#فرخ_جرایدی
#ادبیات_ائوی

@AdabiyatEvi

ادبیات ائوی

27 May 2026 09:12

#قوربانلیق_قویون‌لار

نه مئهريبان، شيرين- شيرين
باخيرسينيز منه ساری
بونا لاييق دئييلم من
آی آللاهين قويون‌لاری!

چوبان دوروب يانينيزدا
تزه‌له‌دی يارانيزی
گؤزلرينيز باخا- باخا
ييخيب كسدی بالانيزی!

داغ‌لار- داش‌لار مات قالدی، مات
چوبانين داش اور‌ه‌‌يینه
قوزونوزون آل قانينی
يالاتديردی كؤپه‌یينه.

قانيق‌¹ نَرلر بالانيزی
شيشه چكيب، شيش‌ده يئدی‌.
هره‌سی اؤز بالاسی‌نين
ساغليغينا ساغليق دئدی.

آمان آلله، اوزونوزده
قان تؤكنه كين گؤرونمور
سينه‌نيزه چالين- چارپاز
داغ چكنه كين گؤرونمور.

باش كسه‌نين بيچاغيندان
ائيله‌ بيل کی حظّ آليرسيز.
گؤزونوزو قيرپا- قيرپا
اوْنا چپيک چاليرسينيز.

سيزدن گؤزو كؤلگه‌لی‌يم
اوره‌ییمی يانديرير غم
بالانيزين جيیَرين‌دن
بير تيكه ده من يئميشم!

فقط يئنه شيرين- شيرين،
باخيرسينيز منه ساری.
بونا لاييق دئييلم من
آی آللاهين قویون‌لاری!

#شاهمار_اکبرزاده
قانیق: قانا یئریکله‌ین، قانا سوسامیش، قانا حریص اولان آدام.
#ادبیات_ائوى
@AdabiyatEvi

ادبیات ائوی

24 May 2026 23:44

#شعر_گونوموز
#ساخلا_منه

یئنه نیسگیل لَچه‌یین سالدی خزان
آچمامیش غونچه‌لری چالدی خزان
منی ده جایناغینا آلدی خزان
یاشیل احساسلی چمن ساخلا منه.

یالانا دوزلوک اوخو ائتسه اثر،
گول بیتیب غونچه گولوب آچسا سحر
بیرده گؤرکملی اورک گؤرسن اگر،
او اورک‌لرده وطن ساخلا منه.

سؤزلرین سینه‌لره کؤز قالادار
دویغونو توشگولو کؤزدن جالادار
اونداکی سؤز گونشی چالخالادار
سؤزده اولدوز کیمی دَن ساخلا منه

دایاق عنوانلی داغ آواره‌سی‌یم
قارا گون‌لرده آغ آواره‌سی‌یم.
بیر گولوش‌لوک دوداق آواره‌سی‌یم
غم‌لره قارشی گولن ساخلا منه.

دئمیرم خوشلوغا یاد ائت یادا سال،
غم اؤنونده آدیمی فریادا سال.
منی ده غم بؤلوشنده آدا سال،
بیر اورک پایلی محن ساخلا منه...

بیر دایان، زیروه‌یه دیز قوی گلیرم
سانماکی خسته‌یم ایز قوی گلیرم
بیر چاناق سؤزده دنیز قوی گلیرم
بیر دؤیوش مئیدانی چن ساخلا منه

اوجالیق‌لاردا ایزین وار دئیَرَک
چیخارام داغلارا یار- یار دئیرک
گلرم غربت ائوین دار دئیرک
وطن عنوانلی کفن ساخلا منه

#حمیده_رییس_زاده
#ادبیات_ائوی

@adabiyatevi

ادبیات ائوی

16 April 2026 16:06

#بیر_بند_شعر

آییلدیم یوخودان... دئدیم کی، چوخو
نه‌دنسه، اؤنجه‌دن اؤلومو دویموش!
یوخ، یوخو دئییلمیش گؤردویوم یوخو،
منیم یاشادیغیم عؤمور یوخویْموش...

#بختیار_وهابزاده


Ayıldım yuxudan... dedim ki, çoxu
Nədənsə, öncədən ölümü duymuş.
Yox, yuxu deyilmiş gördüyüm yuxu,
Mənim yaşadığım ömür yuxuymuş.

#ادبیات_ائوی

@AdabiyatEvi

ادبیات ائوی

25 February 2026 15:10

اوتاقدا هئچ نه ثابت دئییل. زامان، نفسینی ساخلاییر. ساعات وار- آنجاق تکجه سنی ایزله‌ییر. تیققیلتی‌‌لاری، سکوتون ایچینده اؤزونه قاییدیر!
دیوارلارداکی کؤلگه‌لر فورماسینی آختاریر. گؤزلرینه باخماق ایسته‌میر. وارلیق‌لا یوخلوغون آراسیندا دولاشیر. ایچینده قورخو اؤلچولور.
سس گلیر. مکان اونو داشییا بیلمیر. یوخاریدان دئییل، آشاغیدان دئییل، دوغروسو، اوتاق نفس آلیر. ریتم نفسینی کسیر.
- کیم‌لرله ایلگی‌نیز وار؟
بوشلوغا آتیلان داش. جواب یارانمادان بوغولور. گئجیکمک و یا حرکت ائتمک سوچ ساییلیر. زامان، خط دئییل. آن‌لار یوخو، دوشونجه‌لر خاطیره!
دهلیزلر اوزانیر. اوزونلوق یوخدور. آددیم‌لار بدنینه عائد دئییل. یادداشین دَرین‌لییینه توخونور. یوخوسوزلوق گؤزلرین آلتیندا دئییل، دوشونجه‌نین ایچینه چؤکموش بوشلوقدور. انسان بورادا اؤزونو تک، آدسیز و اؤلچوسوز حس ائدیر.
سانکی بیر آغیرلیق بدنینه هوپور. حرکت ائتمیر و هر آن حس اولونور. بدنینی سیخیر، روحونو سیخیر، نفسینی کسیر.
ماسا. بوشلوق. دفتر. صحیفه‌لر آغ دئییل- قارانلیق‌‌لا دولو. یازی گؤزله‌میر. داشییاجاق بیر شئی آختاریر.
-اؤزون یاز!
بویروق دئییل. پروسه‌دیر. یازماماق پوزونتودور.  وارلیغین انکاری‌دیر.
قلم، الینه قویولور. ال، یاد. بدن، اؤز گؤره‌وینی یادینا سالماغا چالیشیر. کاغاذ یاخینلاشیر. سؤزلر دوغولمور. سیخیلیر، بوغولور.
یازیلیر:
«دوشونجه، قورخو و یادداش‌لار یوغرولور‌. هئچ بیری تامام‌لانمیر. هامیسی یاریمچیق. سوسماق تهلوکه‌لی، دانیشماق دا اؤیله! حرکتسیزلیک ایز بوراخیر. وار اولماق، ایز بوراخماقدیر. قارانلیق، یوخلوغون سیموولو دئییل. او، وارلیغین گوزگوسودور. ایچینده‌کی قورخو، کئچمیش ایزلر- هامیسی اورادا.»
زامان، خط دئییل. آن‌لار اوست-اوسته ییغیلیر. گئجه قاتلانیر. خاطیره‌لر و ایندی اؤتن آن‌لار بیرله‌شیر. هر شئی چوخدان اوز وئریب، آنجاق داوام ائدیر. یازان‌لا یازیلان آیریلمیر. کاغاذ انسانی خاطیرلاییر، انسان کاغاذی! باشقالاری وار. «باشقا» دئییل! سس‌لری آلچاق. حرکت‌لری اؤیره‌نیلمیش. باخیش‌لاردا غضب یوخدور- قورخولودور.
اونلار میسسیا دئییل، مکانیزمدیر. مکان قانون‌لاری ایچینده موجوددور. گئجه کئچیب، ایز یوخدور. یازیلان‌لار ثبوت دئییل. اوخونماق اوچون ده دئییل.
بونلارین شاهیدی یالنیز بیر کؤلگه‌دیر: نئجه ازیلیرسن. زامان قارشی‌سیندا کیچیلیر.
نه واختسا، هر شئی دایانیر. گؤوده‌نه ضربه توخونور‌. آغری یاییلیر. روحون ایسه سیخیلماغا باشلاییر.
آرتیق تکجه روحون سیخیلمیر. سیخیلمانین ایچینده ایز بوراخماق دا سنه نصیب اولموشدور. وارلیق تکجه ایزده یاشانیر. آزادلیق دئییل، شاهیدلیک وار. قارانلیق، گوزگودور. وار اولدوغون، قورخدوغون، کئچمیش ایزلرین- هامیسی اورادا عکس اولونور. انسان تکجه بو ایزده تاپیلیر. وار اولماق، عکس‌صدادیر. ایز اولمادان هئچ کیم اولمامیشدیر.
اوتاقدا هئچ نه ثابت دئییل. زامان قاتلانیر. خاطیره‌‌لر بیر-بیرینه قاریشیر. قارانلیق یوخلوق دئییل؛ وارلیغین اؤزودور!
ایز بوراخماق بلکه ده یئگانه آزادلیق‌دیر!

یازیچی: #شاهین_مرادی
1404/11/03

#ادبیات_ائوی

@AdabiyatEvi

ادبیات ائوی

23 February 2026 20:44

یویولوب دورولسام گؤزیاش‌لاریمدا
سنی سو عؤمروجَن سئوه ده بیللم.
نَه‌ییم وار وئرمه‌لی تَر گؤزلرینه؟
بیر اولان قلبیمی، ایکی پای بؤللم!

اینانمازسان دئسم سیخلاشمالاردا،
آدام‌سیز قویموشدو منی داریخماق!
سن‌سیز بو شَهَرده سورونمکده‌یدیم
گؤزلریم وار ایدی گؤرمزدی آنجاق!

اوغورسوز اؤلکه‌‌مده گومانلانیردیم؛
بیری‌نین چؤره‌یین بلکه اَیمیشم!
منه یاد گلیردی آیدین صاباح‌لار،
من سن‌سیز
نئجه‌ ده پیس گونده‌یمیشم.

منی اؤز قانیمدا قویلایان، آدام!
چیغریب- چیغیریب، دیریله‌جه‌یم...
آدام‌لار دوز کیمی سَپیلیر...، گولوم!
گلیب، یاران اوسته سَریله‌جه‌یم...

واریمدان اولورام باخدیقجا سنه؛
کدر بوغمالاییر سنده گولمه‌یی!
سنه یاشاماغی چوخ گؤرَن تبریز،
سن‌سیز چوخ گؤرموشدو منه اؤلمه‌یی!

پاییزدان قاچاق قیز! بیلمیرسن هَله
پاییز؛ بیرین آلسا، بیرین باغیشلار...
بو گَلَن پاییزین کوله‌یی؛ حسرت!
حسرتین توزلارین یویور یاغیش‌لار...

گؤز یاشین سو دئییل ایچَم گوزوندن،
اورک قانین‌دیر بو! ایچه بیلمیرم.
چوخلو آدام‌لاری سئومک چتین‌دیر،
آللاهین اوزوندن کئچه بیلمیرم!

قانیمیز آخسا دا سئومه‌لی‌ییک بیز،
اوجا داغین چوخ دا دومانی واردیر.
سنه گول دَرمیشم،
اَلیمدن توتما
اَلیمده، آغ‌آپباق گول قانی واردیر!...

شاعیر: #اورمان_گولسوی

#ادبیات_ائوی

@AdabiyatEvi

ادبیات ائوی

08 June 2026 13:03

#شعر_گونوموز

گؤرونتوسو گوزگولرده یانسینمایان بیر اینسان کیمی اؤنونده دایانمیشام                                                             گؤرورسنمی؟ 

وارلیق‌لا یوخلوغون قووْشاغیندا بوشلوق آچیسیندان سنی چاغیریرام
ائشیدیرسنمی؟

بیرآن قانادلارینی قاتلا
سمور دریلی چانتانا قوی
بو آشاغی‌لاردا بیریسی
سنین دویومونلا وارلیغینی اؤلچور
دویورسانمی؟


آیاغینی چیلپاقجا تورپاغا قوی
بیتگی‌لرین توخومو ساریلیق آزاریندان چورویه‌جک
سن یاغماسان!

تانیش اول جانی قارنیندا چوروین تورپاق‌لا،
گؤزلویونون اوستونه قونموش توزلارین آناسی‌دیر تورپاق

و من
پالچیقدان یوغورولموش بیر جان
بویودلاری بولونمامیش بیر دونیادا یاشاییرام.

هئی... ساچلاری رسسام‌لارین سئحیرلی فیرچاسی
ساچلارینین اوجو ایله کؤکسومو اورپَشدیریب  گیزلی ناخیش‌لار سایاق منی قابارد؛
اؤیله کی جانی‌لرین بارماق ایزلری قاباردیلیر نسنه‌لرین اوستونده.

بو جان دامغالانمادان
تاپینمایاجاق هئچ بیر تانری‌یا
دوداقلاری‌نین بویاسینی روحسوز دوداق‌لاریما کؤچور.

آد وئر یاراتدیغینا
آد وئر
بیر باخیشین‌لا
داغینیق حوجئیره‌لری بیر یئره توپلاشان
"وارلیغا".

#زامان_پاشازاده
#ادبیات_ائوی

@AdabiyatEvi

ادبیات ائوی

07 June 2026 09:38

#مقاله

آد قویماق عنعنه‌لری

یازیچی: #الله_وئردی_حاجی_یئف
کؤچورن: #احمد_یوسفی

#ادبیات_ائوی

@AdabiyatEvi

ادبیات ائوی

05 June 2026 18:27

#فیلم_تانیتیمی

بو فیلم سینمانین بؤیوک گوموشلو پرده‌سینه تونی کئی طرفیندن ۲۰۱۱-جی ایل‌‌ده چکیلمیش‌دیر. او، کاراکترلرله بیرگه سناریونو یوخاری سویّه‌ده اویوشدورماغی باجارمیشدیر. آیریجا فیلمین کامئراچیسی‌ دا ائله اؤزو اولدوغو اوچون آتریبیوت سکانس‌لاری دا یارالتمیشدیر. فیلمین فریم‌لری، اونون ایتی‌لییی، هانسی زاماندا هارانی گؤسترمک‌له بوتؤولوکده سناریو ایله اویوشدورولموشدور. بو فیلم IMDb فیلم‌لرین معلومات بازاسی‌نین ایزله‌ییجی‌لری طرفیندن ۷/۷ نمره‌نی ده آلمیش‌دیر. بو نمره فیلم سئورلر آراسیندا بیر رتبه کیمی ساییلیر. عمومیّت‌له فیلمه باخان‌لار بیر فیلمی باخماق قراری وئردییی زامان بو سایتدان اونو آراشدیریرلار. اونا گؤره بو نمره‌نین نه اولدوغونو یاخشی بیلیرلر. باشلیجا فیلمین میزانسئن‌لری هامی‌نین تانیدیغی یئرده کئچیریلیر. بو نوع فیلم‌لرده فیلمین موسیقیسی چوخ گؤزه‌ دَیمیر حالبوکی، اثرین حقیقی یییه‌سی ائله، فیلمین موسیقی میدانی‌دیر. بو اثرین موسیقی‌سینی نیوتن قارداش‌لاری ایشلمیش‌دیر. فیلمین اساس موضوعسو آمریکا بیرلشمیش شیتاتیندا (ABŞ) تمل‌لی تحصیل سیستمی‌نین تنقیدی حساب اولونور. بو فیلمده تحصیلچی‌لرین دپرسیو پیسخولوژی حیاتی حاققیندا بیر چوخ معلوماتی تفرّوفاتی‌ ایله بیرلیکده یئرلشدیریلمیش‌دیر. بو اثر آمریکانین داغینیق اورتا مکتب تحصیلات سیستمیندن بیر ایز اولاراق اورتایا قویولور. بیزیم تدقیقتیمیزا گؤره فیلمین آدی دونیانین نهنگ یازیچی آلبر کامو'نون یازیلاریندان سئچیلمیش‌دیلر. باشیلجا یازیچی‌نین بو سؤزوندن گؤتورولموشدور.(۱)
او دئییر: «هئچ واخت باشقاسی اوچون درین حسّ‌لر کئچیریب، اؤز وارلیغیمدان آیریلیب و هله ده کائناتدا موجود اولا بیلمه‌میشم».
بو اثر یوز دقیقه‌لیک فیلم و اونون ایچینده اولان دئتایل‌لار ایزله‌ییجینی داها بوندان اوّلکی دویغولارینین اولدوغو کیمی بوراخماییر. او ایزله‌ییجی‌نین گؤزلرین آلیب کاراکترلرین حقیقی چیلپاق حیات‌لارینی حتّی اونلارین کمپلکس علاقه‌لری‌نین نه اولدوغونو دا آیدین شکیل‌ده اونلارا گؤستریر. فیلمدن بیر پارچا اولاراق اونون موضوعسونا توخونماق لازیم‌دیر.
عوض‌ائدیجی معلّم، هنری بارتحئس بیر آیلیق وظیفه‌یه گؤره چاغریلیر. او بیر چوخ شاگردین آشاغی درجه‌ده چیخیش ائتدییینی گؤرور. اورتا مکتبده اونا انگلیس دیلی درسی وئرمه‌یه گؤندریلیب. اما هر شئی انسان اولدوغو و اونا سؤیکندییی حالدا ساده صورتده اولماییر. بو فیلمین بوتون سکانس‌لاری بیزیم تحصیلات سیستمیمیزه بیر درس اولاراق گؤسترمه‌لی‌دیر. اثرده، معلّمین نه ائتدییی بیزیم معلّم‌لره بؤیوک بیر گوزگو کیمی حساب اولور. خاوس (آشوب) نظریّه‌سینه گؤره، فیزیکادا (علم فیزیک) سارقاچ‌ین(آونگ‌) هئچ بیر حرکتینی ائرکندن دئمک ممکن اولماییر. گؤرولدویو تک بو سارقاچ‌ین حرکت‌لری‌نین استقامتینده بوتون مقصدلرینی دئمک امکانی یوخدور. بو نوع فیزیکانی انسان بوتون انکشاف ائتدییی علم‌لرده یاییب. کینو عالمی ده بو جرگه‌دن قاچیلمازدیر. قید ائتدبییمیز کیمی فیلمه بو باخیشدان باخاندا اوندا اولان مناسبت‌لر تمامیله خاوس نظریّه‌سینده اولان سارقاچ کیمی اویغون گؤرونور. انسان سؤزونه گلیب چاتاندا ذاتاً هئچ بیر علم ایله اونا یاخین گئتمک اولمور، خصوصی‌له انسانین روحی-اخلاقی سجیّه‌لری‌نین بیزه نه قدر اوزاق و یاخود یاخین اولوب عینی حالدا دا گؤرونمز حالیندا گله بیلدییینی اونوتمالییق. بلکه کامئراچی‌نین کینو آپاراتی ییر-ییر ییرغالانماغین بو اساسدا ترجمه ائتمک اولارمیش.
اتک یازی: فیلمده مِردیت‌ین اوینانمیش رولو، رئژیسورون قیزی بتی کئی‌دیر. بو اثرده اولان آدرین برودی و مارسیا گی هاردن، بوندان اوّل اسکار مکافاتین آلمیش‌لار.
(۱)And never have I felt so deeply at one and the same time so detached from myself and so present in the world.

#احمد_یوسفی
#ادبیات_ائوى

@AdabiyatEvi

ادبیات ائوی

05 June 2026 09:57

#سئوگی_تورکولری

چیچک‌لر مفتونو بیر بولبولم کی
گؤزلریم باخچانیپ گولونه دوشموش.
قهرینی چکدیییم گولون صورتی
خیالیمین ساکیت گؤلونه دوشموش.

اونونچون چیرپینیر قولوم- قانادیم،
اونو یئرده دئییل، گؤی‌ده آرادیم.
گؤر نه بدبختم کی، آخیردا آدیم
خیردا اوشاق‌لارین دیلینه دوشموش.

اوردا-بوردا کئچدی گنجلیک حیاتیم
هر یاندان باغلاندی راهِ نجاتیم.
من‌لیییم، شرفیم، مقدّراتیم
بیر دلی جئیرانین الینه دوشموش.

#میکاییل_مشفق
#ادبیات_ائوى

@AdabiyatEvi

ادبیات ائوی

04 June 2026 11:11

موسیقی گونوموز
ماهنی: #آی_ایشیغیندا
ایفا: #نرمینه_ممدووا
سؤزلری: #زینال_خلیل
موسیقی: #قمبر_حوسئینلی
کامانچا: #امامیار_حسنوف
#ادبیات_ائوى

@AdabiyatEvi

ادبیات ائوی

02 June 2026 08:46

#اوشاق_ادبیاتی

من رنگ‌لری تانیییرام
دئییر ائلمان
سَما ماوی،
یومورتا آغ،
ساپ-ساری‌دیر گونه‌باخان.
قیرمیزی‌دیر گولؤیشه¹ نار
یارپاق یاشیل،
کؤمور قارا،
دنیز گؤیدو،
قیزیلی‌دیر بورانی‌لار...

۱- گولؤیشه: مئی‌خوش (نار نوعودور).
دوست منی یاد ائیله‌دی، بیر گولؤیشه نار ایله (آتالار سؤزو).

#زاهید_خلیل
#ادبیات_ائوی

@AdabiyatEvi

ادبیات ائوی

31 May 2026 09:06

#مقاله
میرزا علی اکبر صابرین حیاتی و یارادیجیلیغی
توپلایان: شاهین مرادی

«میرزا علی اکبر صابر» ۱۸۶۲-جی ایل مای آیی‌نین ۳۰-جو گونونده شاماخی شهرینده آنادان اولموشدور. یئنی عصر دونیا ادبیاتی‌نین شهرت‌لی سیمالاریندان اولان صابر، آذربایجانین بؤیوک خالق شاعیری، وطن‌سئور دوشونورو و اجتماعی خادمی اولموشدور.


#ادبیات_ائوی
#میرزا_علی‌اکبر_صابر
#شاهین_مرادی

@AdabiyatEvi

ادبیات ائوی

29 May 2026 10:51

#فیلم_تانیتیمی
فیلم آدی: یاشاماق (Ikiru)

«یاشاماق» (فارسجادا: زیستن) فیلمی ۱۹۵۲-جی  ایل ژاپون سینماسی‌نین بؤیوک رئژیسورو آکیرا کوروساوا اَلی ایله سینما پرده‌سینه چکیلمیشدیر. بو فیلمین اصلی آدی ژاپون دیلینده "ایکیرو"دیر. آیریجا کوروساوانانین بو ساحه‌ده چالیشدیغی مدّت‌ده ۱۴-جو فیلمی‌ ده ساییلیر. کوروساوانین سینماسیندا ژاپونون ملّی سیموول‌لاری، یئرلی مضمون‌لاری اؤزونه‌مخصوص یئر آلیر. اونون فیلم سناریولاریندا فولکلور، اپیک آختاریش‌لاری، سنتی آیین‌لری خصوصی‌له خالقین یاشاماق اوسلوبو قاباردیلمیش موضوع‌لارداندیر. آنجاق ایکی وضعیّتین تظاهرونو کوروساوانین اثرلرینده داها آرتیق گؤرمک اولا بیلر. اونلار؛ فیلمین تکنیک و روایت‌ آکسیالاری‌دیر. اونون اثرلری‌نین رئاکسیاسی-روایتی پوئما شکلینده‌ ایفاده اولونور. بو تکنیک‌لر، اونون هر بیر اثرلرینده اؤزونو دیرچلدیب گؤزوموزده بیر تابلو کیمی ثبت ائدیر.
باش رولو «تاکاشی شیمورا» اوینادیغی اوچون، بو اثرده «توشیرو میفونه» داها بوندان اوّلکی کیمی قهرمان‌لیق رولونو بو نوع فیلم‌لرده داشیمیر. بیلدیییمیز کیمی، «راشومون» مشهور فیلمیندن سونرا داها بو ایکی بؤیوک صنعت‌کار بیرلشمیشدیلر. آیریجا بو اثر ایکی ایل راشومون فیلمیندن سونرا یارانمیشدیر. تدقیقاتیمیزا گؤره، بو فیلمین سناریوسو لئو تولستوی'یون «ایوان ایلیچین اؤلومو» رومانیندان سیتات اولاراق آلینمیشدیر. گؤروندویو تک، تولستویون بو اثری بیر شئدوردیر. بو فیلمین ایل‌لر اوستوندن کئچمه‌یینه باخمایاراق، تاریخین اَن یاخشی درام فیلیم‌لریندن بیری اولاراق هله‌ ده قالماق اوزرینده‌دیر. اؤلوم، بو فیلمین اساس موضوع‌سودور. فیلم‌ده قهرمان دؤلت مأمورودور. او، اؤز بوروکراتیک وظیفه‌سینی ۳۰ ایل بویونجا حیاتیندا بیر مقصدی اولمادیغی اوچون بیلمه‌دن تکرار ائدیر. بیر گون او، کانسر خسته‌لییینه دوچار اولدوغو و آزیندان ۶ آی عؤمروندن قالدیغینی اؤیره‌نیر. او، ۳۰ ایل همیشه مشغول اولوب اصلینده هئچ نه ائتمه‌دییینی ده آنلاییب دریندن سارسیلیر و حیاتینین قالانینی نه ائده‌جه‌یینی دوشونور. او، اؤز حیاتینی داها اؤنجه‌کی کیمی یوخ، سورغولاماق اوغرونا کئچیر. باشلیجا حیاتینی ایسته‌دییی کیمی یاشاماق اوچون، قادین‌لارا و گئجه کلوب‌لارینا گئدیر، آنجاق ۱۹۱۵-جی ایلین «گوندولا نو اوتا»¹ ماهنیسینی اوخویاراق ایتکیسینی تاپماغا قرار وئریر. قهرمان آنلاییر کی، هر هانسی مقصد انسانین حیاتینا ایشیق سالیب اونا معنا وئریر. بو فیلم ژاپونون بوروکراتیک آلانیندا، بیر تنقید اولاراق تنقیدچی‌لر طرفیندن قید اولونور. کوروساوانین بو فیلمینده اؤلوم سوژئتیندن بیر درام یاراتماق گؤرمک ممکن‌دور. آیریجا کوروساوا ژاپونون اوربانستیکا جمعیّتینه منفی تأثیرلرینی یاراتدیغینی وورغولاییر. باشلیجا، فیلم‌ده خصوصی‌له اونون سناریوسوندا دونیانین بؤیوک یازیچی‌لاریندا بیر ایز اولاراق؛ آلبر کامو و ژان پل سارترین اساس فیکرلرینی عینی‌له گؤرمک ممکن‌دور. واتانابه فیلمین سونوندا قیشین آیاز گئجه‌سینده، ایلنجه‌لی اوشاق اویونجاق اوستونده بیر ماهنی اوخودوغو بخشی، فیلمین اَن سئودیییم سکانسی‌دیر. آنجاق اصلی سوروغو ایندی بیزیمدیر. اگر بیزیم یاشاماق اوچون آز زامانیمیز واردیسا نه ائده بیلردیک؟

۱- گنج قادین‌لار عاشیق اولون حیات قیسادیر.
اتک یازی: فیلم بین الخالق برلین فیلم فستیوالیندا ۱۹۵۳-جو ایلده مکافاتا لاییق گؤرونموشدو. آیریجا، فیلم ۱۹۶۰-جی ایل‌ده بفتا فستیوالیندا خارجی اویونچولار (تاکاشی شیمورا) میدانیندا آدایلانمیشدی.

#احمد_یوسفی
#ادبیات_ائوى

@AdabiyatEvi

ادبیات ائوی

28 May 2026 12:45

#گونلریمیز

۲۳ آیلیق جمهوریتین ۱۰۷ یاشی
آذربایجانین استقلال و استقبال دوشونجه‌لی آیدین‌لاری‌نین خالقیمیزین و عمومی‌لیکده مسلمان شرق دونیاسی‌نین تاریخینه بخش ائتدیک‌لری ایلک جمهوریتین یارانماسیندان ۱۰۷ ایل اؤتور.
۱۹۱۸-جی ایلین ۲۸ مایی ملّی دؤلتچی‌لیک تاریخیمیزین ان شانلی صفحه‌سی‌دیر. بو گونو ۱۰۷ ایل اوّل تاریخیمیزه یازان، یوخ یئرده بیر دؤلت بینا ائدن ایشیقلی، وطن‌سئور و فداکار انسان‌لاری بیر داها منّتدارلیق‌لا یاد ائدیریک.

داها چوخ بیلگی الده ائتمک اوچون اینستادان اوخویا بیلرسینیز

➡️ https://www.instagram.com/p/DY4Qn7vjNlt/?igsh=MXN6cWJ1YXQyb2VodA==

#ادبیات_ائوی

@AdabiyatEvi

ادبیات ائوی

27 May 2026 16:58

#حکایه_گونوموز
#دئییکلی

قادین قیریشمیش الینی بالاجا سولو کاسایا سالیب سونرا بوزارمیش آل گۆللو قالی‌نین اۆستونه چکرک دَرین‌دن بیر آه چکیر. چیمدیگیله قالی‌دان باش چیخاردان تؤکلوملری یاواشجا چکیب بیر یئره ییغیب اووجونا آلیر. تؤکلوملردن قالخان قوخو اونو اللی ایل گئری‌یه آپاریر.
ایلمک سالا-سالا گؤز آلتی آناسینا باخیب دئدی
«بودا سکینه، وئردیک گئتدی».
سونرا باشین آشاغی ساللاییب ایلمک سالماغا باشلادی.
آنا شیشی بویلوقلارین آراسیندان چکرک دئدی
«هه آللاه خوشبخت ائله‌سین، ان‌شاء‌الله زومارلیقدان سونرا دا سنین تویونو ائله‌ریک.»
«منی تاروئردی‌یه وئرسز اؤزومو اؤلدوررم» دئییب الینی ایشدن چکدی.
آنا یوغون آرغاجی دفه‌له‌ییب، سانکی بیر سؤز ائشیتمه‌ییب ایشی‌نین دالیسینی توتدو.
گۆللو، آناسی‌نین قولوندان توتوب دئدی
«آی آرواد سنه دئییرم هااااا، ائشیتدین؟»
«هه ائشیتدیم، نئچه ایلدی ائشیدیرم، نئیله‌ییم؟ آتان سؤز وئریب، سؤزو قایتارماق اولماز.»
«آند اولسون ابلفضه منی تاروئردی‌یه وئرسز پیس گؤررسیز»، دوغروسو اؤزو ده بیلمیردی بونو تاروئردی‌یه وئرسه‌لر نه ائده‌جک.
«یاخجی آی قیز، کس سسینی آتان ائشیتسه باشیوی اۆزر. نه‌ییدی تاروئردی لاپ دا یاخشی اوشاقدی.»
«قودوقدور ائی قودوق بیلدین، من اوندان ۱۹ ایل بؤیوگم، اده به‌نییه سیز قانمیرسیز.»
«قانماز اؤزونسن ائششک کؤپه‌یین قیزی.
بایاقدان سسیم چیخمیر سن ده اوجون آلیب اوجوزلوغا گئدیرسن.»
آتاسی مردانعلی ایدی، هاچاندان گلیب دانیشیقلاری دینله‌ییرمیش آللاه بیلیر.
گۆللو دیکسینیب، آناسی گؤیچک‌له بیرگه ایش اۆستوندن دوروب، آیاغا قالخمیشدیلار. تله‌سیک یایلیغین باشینا چکیب ساچلارین گیزلتدی.
«من سؤز وئرمیشدیم ایلک اوشاغیم باجیم اوشاغیله ائولنه ووردو ایکیز ده قیز اوْلدوز، بو دا آللاهین ایشی ایدی، دای ایندی گئدیب آغ ساققال واختی کند ایچینده تۆپوردویومو یالایا بیلمرم، قاندین؟» .
گۆللو سیچان دلییی آختاریردی اؤزون اورا سوخا، بیلیردی آرتیق دانیشسا آتاسی‌نین الیندن قورتارا بیلمه‌یه‌جک. گؤیچه‌یین سسی چیخمیردی.
یئنه آتاسی‌نین سسی اوتاقدا گومبولدادی
«یایین آخیری تاروئردی اون بئشینه کئچیر آللاه دئین اولسا کندین ایشی قورتاراندان سونرا سنی تاروئردی-یه وئره‌جه‌‌یم گئده‌سن».
گۆللو بیر سؤز دئیه بیلمه‌دن باشینی آشاغی ساللاییب دورموشدو، ایچی تیتره‌ییردی، قهر بوغازینی توتموشسا دا گؤزلریندن یاش چیخارتماغا حاققی یوخ ایدی. انگینی تیتره‌مکدن ساخلاسین دئیه بۆزوشموش دوداقلارینی بیر-بیری اۆسته باسیب دیشله‌ییردی، سسی چیخماییردی.
آتا کۆره‌یین چئویریب ائشییه چیخدیقدان سونرا گۆللو آغلاماغا باشلادی، گؤیچک گۆللونون باشینی باغرینا باساراق
«بی‌بین دؤرد قارین دالبادال قیز دوغماسایدی بئله اولمازدی. ایکینجی، اۆچونجو اوشاغی اوغلان اولسایدی یئنه یاخشی اولاردی»
گۆللونون آغلاماق سسی، گؤیچه‌یین سؤزلرینی کسدی
«نه دئییرسن آی آرواد؟!!
تاروئردی‌نی من بؤیوتموشم، نئچه دؤنه اونو بئلیمه باغلاییب زمی‌ده مرجی درمیشم، ۱۹ ایل مندن خیردادی با، ۱۹ ایل، هئچ او یازیق اؤزو ده بیلمیر باشینا نه گله‌جک».
قیزیشما گۆللونو بۆرویوردو، اۆزو قیپ قیرمیزی اولموشدو، قارا گؤزلری قان چاناغینا دؤنموشدو.
«دور ال اۆزونه بیر سو وور، سنین ده قسمتین بو ایمیش دا، آللاهی نه گؤروبسن بلکه تاروئردی سنی بونلارین هامیسیندان یاخشی ساخلادی.»
«آی قادام بو قسمتین ایچینه، بو ایشدن آللاهین دا خبری یوخ، بو کۆلو سیز منیم ده تاروئردی‌نین ده باشینا اله‌دیز»
«سن تاروئردی‌نی سئویرسن، او دا سنی سئویر...»
«سن آللاه ال چک، دئییرم اونو من بؤیوتموشم بورا کیمی اونا ار گؤزویله باخمامیشام، او گۆن بولاق باشیندان گلنده اوتانا-اوتانا دئییر ' دایی قیزی آللاه سنه ده قسمت ائله‌سین آتام دئییر بو ایل سنی ائولندیره‌جه‌یم ' یازیق اؤزو ده هئچ بیلمیر باشینا نه گله‌جک.»
گؤیچه‌یین دیلی آغزیندا قورودو.
گۆللو ۳۴ یاشینا دولموشدو، دوغروسو تاروئردی اونون اوشاغی یئرینده‌ ایدی آنجاق مردانعلی ایله تاروئردی‌نین آتاسی میرزاغا، گؤیچک‌له زینب بویلو اولارکن اولان اوشاقلاری بیر-بیرینه آداق ائله‌میشدیلر، ایشین پیس گتیردیگیندن گؤیچک اۆچ قارین قیز دوغوب سونرا داها اوشاغی اولمامیشدی، زینب‌ ده دؤرد قیز دوغوب نئچه ایل سونرا تاروئردی‌نی دوغموشدو.
گۆللو آغلار گؤزله ایش اوتاغیندان چیخیب حیطه گلدی. آتاسی ائوده دییلدی، یایلیغین باشیندان آچیب اینجلمیش قارا ساچلارین چیگنینه تؤکوب ال-اۆزونه سو ووردو. گۆنش یاواش-یاواش ال‌ـ‌اته‌یین گؤی اۆزوندن چکیردی.
تاروئردی‌نین دوداغی‌نین اۆستو، یاناقلاری‌نین آلتی بیلینر-بیلینمز قارالیردی، تزه-تزه بوی آتماغا باشلاییردی،  بویو گۆللونون چیگنینه‌دک اولاردی. ساچی، باشی آتاسی میرزاغایا چکمیشدی، قیزیل رنگینه چالیردی، گئت-گئده اۆزونون چوْپورلاری اۆزه چیخیردی.

👇👇👇

ادبیات ائوی

26 May 2026 18:50

#اوشاق_ادبیاتی
#کپه‌نک

منم قانادلی چیچک
آدیم ایسه کپه‌نک.
آل-الوان خال‌لاریم وار،
قیزیل کیمی پاریلدار.
قانادیمی آچارام
بوداق-بوداق اوچارام.
یووام، اوتاغیم آنجاق
اولور یاشیل بیر یارپاق،
منیم دوستومدور هر گول
اینجه تئللی گؤی سونبول‌.
اویناغیمدیر چؤل، چمن
منی توتماق ایسته‌ین.
ای مهربان اوشاق‌لار،
سیز یاشایین بختیار!
منیم ده بو دونیادا
بیر باشقا عالمیم وار...

#عبدالله_شاییق
#ادبیات_ائوی

@AdabiyatEvi

ادبیات ائوی

24 May 2026 23:35

#باش_ساغلیغی

گلیم‌لی_گئدیملی دونیا
سون اوجو اؤلوملو دونیا
اجل آلدی یئر گیزلتدی
فانی دونیا کیمه قالدی (دده قورقود).


آلدیغیمیز آجی خبره گؤره آذربایجانین دَیَرلی شاعیری، حمیده خانیم رئیس‌زاده وفات ائتمیشدیر.
ادبیات ائوی طرفیندن اونون محترم عائله‌سینه و ادبی جامعه‌میزه تسلیت دئییریک.
یئری اوچماق، یولو داواملی اولسون.


نه بیر کسی چاغیرماق ایسته‌ییرم،
نه باغلی باجالاردان باغیرماق.
سئویم‌سیز هاوادا
سولغون یارپاق کیمی
سوسوزام یاغیش طراوتینه سوسوز...
نه توتقون ماوی‌لیک‌لره کؤچمک ایسته‌ییرم،
نه بولودلار آرخاسیندان اوچماق.
یئلکن‌سیز بیر گمی کیمی
سوسوزام دنیز طراوتینه سوسوز..

#حمیده_رییس_زاده (سحر )
#ادبیات_ائوی

@AdabiyatEvi

ادبیات ائوی

26 February 2026 10:37

#گونلریمیز #خوجالی

دونیا دارمی گؤره‌سن؟!
قولاق کارمی گؤره‌سن؟!
آللاه وارمی گؤره‌سن؟!
لای‌لای خوجالیم لای‌لای!!
#زلیمخان_یعقوب

34 ایل ساغالمایان اورک یاراسی. سؤزون بیتدییی، زامانین دوردوغو آن. خوجالی فاجعه‌سی، اینسانلیق تاریخینده هئچ واخت اونودولمایاجاق خاطیره‌دیر!
خوجالی سویقیریمی‌نین گوناهسیز قوربان‌لاری‌نین عزیز خاطیره‌سینی سایغی ایله آنیریق!

#ادبیات_ائوی

@AdabiyatEvi

ادبیات ائوی

25 February 2026 15:07

#حیکایه

قارانلیق
یازیچی: #شاهین_مرادی

#ادبیات_ائوی

@AdabiyatEvi

ادبیات ائوی

23 February 2026 20:43

#شئعیر

پاییز قاچاغی (1403/08/30 خییوو)

شاعیر: #اورمان_گولسوی

#ادبیات_ائوی

@AdabiyatEvi