532
يا نفسُ من بعدِ الحُسينِ هُوني 💔 @alikk1998 🙏 خادمكم
يا بشر يوصف عِظم شأنها
ورحمة الله الواسعه ابنها
هيَ فاطمة وكفى
°°°°
طاعتها مفروضه على الجن والإنس
والكائانات ابحبها طهرَت والنَفِس
وابفَضَا اللاهوت اٌهيه اكبر من شمس
جوهرة خالقها ..
صاغاها من عين ذاته
وانطاها اجمل صفاته، وضل يجلها
وابسماء المعنَى ..
بيها تباهى اعله خلقه
وخلاها ميزان حقّه، ويرضه الها
ولذلك كثر ما يحبها
بساق عرشه من الأزل كتبها
هيَ فاطمة وكفى
••
كوكبٌ دُرِّي نورها غذّه القطب
من عالم الظل وهج في روح الگلب
نورٌ على نورٍ تجلى منهُ حُب
والقرون الاولى ..
دارت على معرفتها
وحارت لَوَن وصفتها، وكلها عجزت
بيها شفنه الخالق ..
والمقامات العظيمه
والفيوضات الرحيمه، الها رمزت
خيرها ليلة قدر لليدرك
العروة الوثقى بفضلها نمسك
هيَ فاطمة وكفى
••
موجودة قبل ادم باسلاف الدهر
حورية في غامض علم رب البشر
بحر النبوة وكل نبي بيها اقر
سيدة كل زلمه ..
ما عدا ابوها وبعلها
ونسل الإمامه ابنسلها، والنبوّه
بس علي كُفؤها ..
من آدم وفمن دونه
محد يحطها بعيونه، فقط هوّه
حجة الله اعله الحجج واميره
والله يعلم اشكثر چبيره
هيَ فاطمة وكفى
••
لولاها ما مخلوق ابوها ولا علي
وتنعدم افلاك الوجود وتنجلي
علّة خلقنا ابخلق فاطم تعتلي
عالبشر سلطانه ..
صارت مَثَل بالتكامل
وقمة اصبحت بالتفاضل، وكلها هيبه
سنخ للقدسيه ..
وكوثر الإله وسبيله
وعدها صراطه ودَليله، وعلم غيبه
حوَت اسرار السمه بگلبها
وابهداوه عالارض تصبها
هيَ فاطمة وكفى
••
اُم عالم الإمكان امي وجنتّي
تُفاحةُ الفِردوسِ والخُلدِ التي
گلها ابوها انتي امي وبضعتي
ام ابيها وروحه ..
وعايش على سر عطرها
وينسر اذا شي يسرها، والها يغضب
شحال لو شايفها ..
مثل الخيال ونحيله
وجبر الضلع ماله حِيله، لو تصوّب
بابها باب الله يل طبگته
ابليس ضل صافن لَمَن حرگته
هيَ فاطمة وكفى
#الخادم_علي_خيري_العبادي
@AliAliAlabady
الاربعاء 2020/12/30
لمولاي السجّاد ص
الشام الشام الشام وكربلاء
•••
يا غربتي
صار الأخو اغله امنياتي
كلها بلاوي ذكرياتي
إگبالي ينچتفن خواتي
يا هضمتي
أحقر بشر بحباله شدني
واتعثّر ومحّد سندني
يا ليتَ امي لم تلدني
والعالم اتشوف
دمنه بالچفوف
جرحتنه الحبال
وبينه العدو ايطوف
••
حيره نوحي
إلكربله لو چي سبونه
لو چي بقينه بلايه عونه
وتاليها يا وسفه ولونه
يا جروحي
واگليبي ذبحو يمّا اهله
وكلساعه ادفن بيدي طفله
واشچم عزيز الشاف ذله
واشگد شفت ويل
من هجمت الخيل
وبالبيده فريت
وما عندي كل حيل
••
آه يعمري
خلصّته بس نوح وبواچي
ما تگظي عالطف المحاچي
وطاح الحچي ابسلب التراچي
آه يصبري
آنه عليل وياذي حالي
عالهزله شيصعّد عيالي
وضل عالترب كافل دلالي
بس ضل بلا هام
و راسه مشه ايام
فوگ الرمح ضال
وبعيونه السهام
••
بالخرايب
نبچي لچن ضحكو علينه
واحدنه ما يمسحها عينه
صعبه لأن امگيدينه
وعالترايب
نگعد وأُهم نامو بالقصور
ومن گد تعبنه باهت النور
وحشه وگلبنه يغفه مكسور
ايگعدونه بصياح
وچم سوط ننلاح
وابچعب السيوف
وننطگ بالرماح
••
ابلا عشيره
طبيّنه للشام ابجرحنه
وي الضوّه رادو فضحنه
ولچمونه لاكن إنذبحنه
ماكو غيره
ايفرحون اذا علويه طاحت
ايطبلون اذا علويه ناحت
ايشتمون اذا علويه صاحت
شتمو الكرار
و رامونه بحجار
كلها علينه
ضليت محتار
#الخادم_علي_خيري_العبادي
/channel/AliAliAlabady
٢٠٢٠/٩/٥ السبت
*مولاتي رقية ص عندما اعطوها الماء، ذهبت الى مولاي سيد الشهداء ص وبعدما وصلت له قالت
بويه بعد گلبي ، شصاير بيك شصاير
بويه بعد گلبي ، حالك يكسر خاطر
•••
بلايه حرگ
فاهي العشگ ما يِعني
جيتك ركض
رغم الارض تلچمني
اميّه جبت
بس شاهدت جسمك بلا راس
ودمّي نشف
ودمك نزف و يبّسني
يا حياتي وبوسه ردت
جوّه نحرك لكن شفت
بوست الحافر والعذاب
ومن أثرهن إتعذبت
ليش امعذبينك يا روحي
ما لمسو إحساسك بيه
ما شافو نظراتك توحي
لله وللحب والحنيّه
بويه بعد گلبي ، هاي آثآر الحافر
بويه بعد گلبي ، شصاير بيك شصاير
••
انتَ رحت
وآنه حرت بل فاتك
ذوله المَله
هجمو عله ابنيّاتك
وعدهم عنف
ما ينوصف بقوّه يضربون
بابا متت
لمّن عفت خيماتك
طشّرونه وصحنه علِي (ع)
كلفه ايتامك تنولي
وگمنه نركض والصحره شوك
والمصيبه طاحو هلي
واسم ألله صارت حل بيكم
وهضموني حين الگالوها
وكل هذا ومن بعد ايديكم
ايدينا من دم سالوها
بويه بعد گلبي ، ودمك يبقى لباچر
بويه بعد گلبي ، شصاير بيك شصاير
••
كلشي ذبل
وعفت الاهل بالهيمه
صرنه ابأسر
وطاح الستر والخيمه
تهنه ابحرب
كلها رعب واليعطش يموت
بعيني مطر
وغاب الگمر بالغيمه
يا شمسنه لتضوي امس
هسّه نايم جوّه الشمس
وراح يگعدونه بالظلام
خايفه ومختنگه احس
انفاسي واحساسي ابخنگه
انفاسي من حرگ اخيامك
واحساسي وضعك ليحرگه
وفيض اجروحي من آلآمك
بويه بعد گلبي ، بگليبك چم عاشر
بويه بعد گلبي ، شصاير بيك شصاير
••
أستودعك
وتبقى معك كلْماتي
وعندي بگه
دمع الشگه وآهآتي
وعندي سبي
وي أجنبي يتفاهم ابسوط
قصدي اتضح
عمري انذبح بالآتي
عالهزل أصعد ماكو فيْ
واستحي لو هزلو علَيْ
والشماته إبكل مكان
يعني اٌموتن إبأدنه حيْ
إشمحلاته إيضحّي اليعشگ
ويم راسك يتناثر صُغري
وآخر كلمه احچيها واشهگ
يا ابَتي مَن أيتم عُمري
بويه بعد گلبي ، ضيمك بيه ايسافر
بويه بعد گلبي ، شصاير بيك شصاير
#الخادم_علي_خيري_العبادي
/channel/AliAliAlabady
٢٠٢٠/٧/٢٦ الاحد
#جزع_ختامية
محبوبي ..
متألم ، متهشّم
متطشّر ، متكسّر
متعذّب ، متسلّب
متغرّب ، مترّب
حُسين
محبوبي ..
ما سالم ، ضل نايم
بالصحره ، يصب نحره
ضل دامي ، ضل ضامي
واجروحه ، مفضوحه
حُسين
محبوبي ..
ابنياته وخيّاته
وايتامه ، گدّامه
رعبوهن ، تعبوهن
ويطيحن ويصيحن
حُسين
محبوبي ..
بلا ناصر ، ضل حاير
عبّاسه ، انشگ راسه
واولاده ، والساده
وكل ربعه ، متگطعه
حُسين
محبوبي ..
ابن الزهره وابصدره
چم حافر والكافر
من شافه ما عافه
گص راسه وهم داسه
حُسين
#الخادم_علي_خيري_العبادي
/channel/AliAliAlabady
#ثگيل #الليلة_الثامنة
مولاي سيد الشهداء ص مع مولاتي السيدة زينب ص عن مولاي القاسم ص
طاح و اذاني
اكبري الثاني
خويه يا أُم عون
بحيره خلاني
•••
شفته بجروحه ، روحه مطروحه
وعينه مفتوحه ، ونايم على الرمال
وينظر على الخيام
كبرت الحيره ، لقاسم الغيره
وبيش تجبيره ، بگلبي انكسر سؤال
واتطشر الكلام
وصارت حنته دمه بالچفوف
جماله منذبح ابني بالسيوف
و راحت كشخته بتراب الطفوف
ليش يتعذّب
المفترض ينحب
خويه يا أُم عون
طاح المرتب
••
ارماحهم خشنه ، و ١٣ سِنّه
حيل عورنّه ، و طغه الألم عليْ
واستنزف الشباب
زرع بحساسي ، جرح بس قاسي
وانحنه راسي ، من ذوبلن ادي
و حيلي صبح سراب
اشفافه امفطره والعطش كتّال
يزينب ودّعي إبن اخو الكفّال
قبل لا ايدچ ايشدوها بحبال
وگبل لا جسمه
حافر يلچمه
خويه يا اُم عون
وينوخذ هدمه
••
من غمض عينه ، موّت احسينه
گضن اسنينه ، وصبري گضه ابسكوت
وما ضل بعد قرار
روحي تتلوه ، و جبته بالگوه
ريحت الخوه ، شلته وبقيت اموت
و صدري اعله صدره صار
المصيبه الموت حگها واكثر يجوز
لحظات وتشوفيْ راسه محزوز
وفوگاها بعد، ع الرمح مغروز
تشوف هم عينچ
منحر احسينچ
خويه يا ام عون
ومحّد ايعينچ
••
شيبقه بافادي ، وخلصو اولادي
والوجع بادي ، وما ينتهي ابدموع
وكل ساعه ابن يطيح
من وگع الاكبر ، ضيمي ضل يكبر
وناري من تسعر ، يعني انطفن شموع
ويعني العرس ذبيح
حور العين تبچي وذبّن اجفون
ومن الحور طلعت روح العيون
چا شيسوّن ابرجعت الميمون
يرجع امدمم
وآنه ما اسلم
خويه يا ام عون
ابقه اتألم
#الخادم_علي_خيري_العبادي
/channel/AliAliAlabady
الثلاثاء ٢٠٢٠/٨/٢٥
بسم حنيّة أم عون لمجلس الدمعه اجي عنّاي
حتى أمشي عالصراط إعيال مولاتي إركضو حفّاي
ضاعو وگوّه تلملم بيهم بالصحره
والتعب بيّن بيها من جرح العثره
والسبي جارحها وإبرفگت عدوها احتارت
عگب عِزها المات ماتت وابهضمها سارت
غصب طلعت بلا خوّان
عافتهم على التربان ، ضحايه وصرعىٰ
ويماشنها بس الروس
بس طخّالها الناموس ، باصوله وفرعه
•••••
عفّت الساده ضعنهم بس على اچفوف ابو فاضل چان
وسفه تالي إيد اُميّه اتطاولت من گطعو الذرعان
وماكو چف يرعه الدلال و ماكو رايه
راية الإحساس بالدمّ تبقى امغطايه
باليسر يغله الفياي والطريق اشطولِه
و بعد عبّاسچ أثر رجلينچ شيزوله
خدر حيدر تشوفه الناس
وابسوط الشمر ينجاس ، وبقه يتعذّب
طبّ لكوفة الكرار
و اتلگّوُ طبل واحجار ، وغريبه زينب
•••••
يهل عالم ابد والله مو لزينب تصح طبْت السوگ
والمصيبه بالنهار و ماكو ساتر على اظهور النوگ
وبله غيره العالم تتفرج تتشمت
وخارجيه صاحو من حسهم ما سلِمت
وتنلچم لو سأل واحد عن اهلها ويسخر
والكلام البي قساوه ما يلوگ لخدّر
وچم احچايه عَبرتها
و تكتم گوّه عَبرتها ، وتضل مخنوگه
إليحاچيها ابرود اعصاب
ما بيها ترد اجواب ، لأن محروگه
•••••
شلون تمشي والدرب بيمن تشوفه وبالنظر دخان
اخيامها احترگن وطاحن وابگلبها صعدت النيران
وبين نار اگليبها وخيمتها چم دمعه
والرزايا هواي حيره المن تبچي وتنعه
بالعويل ايداوي روحه اللي موجّر گلبه
وصوتها مبحوح والچلمات تنزف غربه
بين الوليه بين الجيش
بنت الزهره ذبلت ليش ، يدنيا اشصاير
حبيبة امها تالي ايام
يشتموها طُغاة الشام ، ومشت وي كافر
•••••
ليلها يشتد نحيبه و من يخلّص يبدي شد الاحبال
بله راحه و نومها گوّه وحلمها بلوعة
الاطفال
راحت و ويّاها أيتام بس ابكثره
ورجعت بچم واحد،كلساع تحفر حفره
والبراءه بالخرابه من اندفنت سكته
عالطشت صرخت رُقيّه ولنها طاحت ميته
وچم غالي رجع مذبوح
شيخلّص قصص الجروح ، ونزيف العاشر
بدايات المصايب خيل
هجمن والسوالف ويل ، ولا ضل ناصر
#الخادم_علي_خيري_العبادي
/channel/AliAliAlabady
٢٠٢٠/٩/٣ الخميس
اجه الليل وإمامي محّد ابحاله
محّد شاف ضيمه وبالچذب جاله
غير اُمّه وأبو ياهو التعنّاله
دامي ومنسلب متغيّره احواله
جسمه امجرّح ومجروح دلّاله
لأن ضعنه انجرح چي نزف كفّاله
وتاهو بالفله اطفاله واعياله
والسلمو اجاهم عدو بحباله
والتهضم چتفهم نفسه چتّاله
وما گدرت اخيته اتلملم اوصاله
ما يندره اشگد طشرتّه خيّاله
مو بس هاي اظن وياها جمّاله
وثلث تيام ضل محّد اجه وشاله
#الخادم_علي_خيري_العبادي
/channel/AliAliAlabady
مفضوح العاشگ من عينه
چي يبچي ابحِرگه اعله احسينه
ويعذّب روحه ابدمعاته
يدري ابمحبوبه امعذبينه
المحبوبه غريب ، ما تسكن اجروحه
السالفته نحيب ، كلماته مذبوحه
اليحب الحبيب ، ماتهده ابد روحه
أثغب اعله الماشرب ماي
عالبقه ابهيمه بله افياي
ضل وحيد وضدّه آلآف
ضل بلا ناصر وحمّاي
كربلا كربلا حُسين
•••
تنشف روحيّت ايامي
ويرويها المجلس للضامي
ويتصاعد دمعي من اجزع
چي صعدت خيل اعله إمامي
وبالمجلس اهيم ، مفتاح اجروحي
والزهره تديم ، اهآتي ونوحي
انحب عالرحيم ، والماخذ روحي
كون كل العالم اينوح
لان ابن الزهره مذبوح
ضل ثلث تيام بالگاع
شلون ترهم يبقى مطروح
كربلا كربلا حُسين
•••
كل واحد يحچي ابسالفته
وسالفتي احسين وعايلته
والما فاهمني خل يسكت
خليني ابضيم الما شفته
شفته بالدّموع ، محبوبي متلوّع
مكسور الضلوع ، بخيول متشبّع
خليني الوع ، عالجسمه متوزّع
وضلّو اعياله بالايدين
عگب ما طاحن الچفين
وابو فاضل راسه مرفوع
برمح من ماشه النساوين
كربلا كربلا حُسين
•••
ما أعظم هاي المصيبه
مولاي ايصير احمر شيبه
بالدم يتغسل يا ويلي
وأخته مهضومه وغريبه
متروسه غُبار ، و تمشي بصحاري و بر
وتطلع بالنهار ، وهيّه خدر حيدر
وما عدها قرار ، وبالغصب من تؤمر
وگوه لمّن طبّت الشام
وبالخرابه ضيعت احلام
چم رُقيه ماتت اهناك
وچم يتيمه بحرگ الخيام
كربلا كربلا حُسين
#الخادم_علي_خيري_العبادي
/channel/AliAliAlabady
٢٠٢٠/٨/٢٨ الجمعة