Telegram-канал ml_mahhde - قصائد والحان الرادود مهدي الزينبي: Unsorted

قصائد والحان الرادود مهدي الزينبي

13 Nov 2024 10:18

يمه يا زينب وداعا هاي هيه
والنه باجر ملتقه بالغاضريه
يمه عالتل ننجمع •• يم اخوج المنصرع
ضمي حيلج والبجي الذيج الرزيه

……………………………………………………………

ييمه ابموتي ما همّن . و لا بالضلع والسطره
الحالج مو على حالي . امن اجر الآه والحسره
ييمه العاشر امتانيج . والاصعب في وكت ظهره
اخوج اعل الوجه مگلوب.وشمر من الگفه اينحره

وانا فوگ التل اجيج وماي بيدي
لجن ما لحّگ يزينب على اوليدي
الكه راسه المنرفع •• يمه اخوج المنصرع
ضمي حيلج والبجي الذيج الرزيه

……………………………………………………………

اصبرج لو تصبريني . ابمنظر يعمي الناظر
اعله اخوج اخيولهم غيمات.وتمطر عالجسد حافر
يوصل لينه لحم حسين . صفه اعله الگاع متناثر
اسد اعيونج اسمعين . صوت الضلع متكاسِر

يمه زينب انسي ضلعي وانسي كسره
الخيل تكسر من اخوج ضلوع عشره
وخنصر ايده المنگطع •• يم اخوج المنصرع
ضمي حيلج والبجي لذيج الرزيه

……………………………………………………………

ييمه الحرگ بابي ابنار . باجر يحرگ اخيامج
شتله انحفرت الها الگاع . هيج الجمره بجدامج
يعمي عيونج الدخان . منج ضاعت ايتامج
ومن هسه ولذيج النار . يزينب شدي احزامج

واعتنيلج يمه و نعاون بعضنه
انطفي ثوب ارقيه وي ذيال سكنه
والعليل المنفجع •• يم اخوج المنصرع
ضمي حيلج والبجي لذيج الرزيه

……………………………………………………………

اجيج امحنبه من الباب . ابيميني اعله الضلع الزم
المّن باليسار الشوج . لجنّه اهواي ما يلم
لأنج حافيه تركضين . باثارج يخط الدم
اشد من جوية البسمار . اشوف ابنتي تتألم

مثل جانون الرمل وشلون ابرده
حمره رجلينج تطگ وحده اعله وحده
وانا جن خيط الشمع •• يمج اخوج المنصرع
ضمي حيلج والبجي لذيج الرزيه

……………………………………………………………

يمه السوط اه السوط . بيدي اشگفت ضرباته
ييمه و حار جن بيه نار . ابمتنج تجوي لسعاته
على اعبايتج من ابعيد . اشوفن يمه طبعاته
يظل وياج حد الموت . ما تنسين آهاته

تخاف الاطفال وتجي تلبد ابكترج
والسياط اصير يا يمه اعله ظهرج
عيني الج تهمل دمع •• يم اخوج المنصرع
ضمي حيلج والبجي لذيج الرزيه

……………………………………………………………

ييمه الظلمه مو موتي . ولا تشييعي او نعشه
الظلمه ابهيمه وتباتين . ييمه ابليلة الوحشه
العبايه اصير الج خيمه . التراب ايصير الج فرشه
وحادي السبي وبيده احبال.يجيج ابساعة الغبشه

وياج اروحن للسبي وبگلبي جمره
من اصد اعبايتج مگلوبه حمره
ينلجم مني الضلع •• يم اخوج المنصرع
ضمي حيلج و البجي لذيج الرزيه

……………………………………………………………
✍️ ( سيد خضر الزاملي) /channel/ML_mahhde