a3lei | Unsorted

Telegram-канал a3lei - الشاعر حسن لعيبي الحريشاوي

1638

هذه القناة تتضمن قصائد واشعار ولائية وحسينية في مدح ورثاء ال البيت الاطهار

Subscribe to a channel

الشاعر حسن لعيبي الحريشاوي

نزله  عن علي الاكبر  (وزن الهجري )

چنه عباس بمشيته من توجه للقتال
تمايلت بيده الكتايب. هذا الأكبر بالنزال
★★★★★
أتوجه الأكبر ينادي وينها وين الزلم
أنا من حسين زودي ومن ابوفاضل عزم
تعلمت بالحرب منهم أنا للموت ابتسم
انبنى الدين بعزمنه وللابد ماينهدم
مااهاب من العساكر  ولاعدد هاي الرجال
تمايلت بيده الكتايب. هذا الأكبر بالنزال
★★★★★
علي الاكبر هذا اسمي اليوم اسطر ملحمه
الحومه اگلبها عليهم وحگ جبار السمه
جدي ابوالحملات حيدر  ذاك حماي الحمه
دون ابوي حسين عندي. روحي ترخص والدمه
والحتف لأجله اشحلاته اصفه من ماي الزلال
تمايلت بيده الكتايب هذا الأكبر بالنزال
★★★★★
انا ابن سيف وملاحم ماتهم روحي الصعاب
انا ابن وحي ورساله وأنا ابن حكمه وكتاب
ناذر الديني حياتي وناذر أيام الشباب
سيفي للكافر نهايه وصاعقة وموت وعذاب
مايهز روحي جمعكم لاوحگ جدي محال
تمايلت بيده الكتايب هذا الأكبر بالنزال
★★★★★
هاشمي  وسيفي بيميني   واگطع ارگاب العده
من اجل مهجة أمامي.  روحي والعالم فده
الينصر حسين ويعينه  الفوز باچر موعده
ماينال الجنه  كلمن.   صار للباطل صده
ماتهمني  هلعساكر. ولومطر صب النبال
تمايلت بيده الكتايب.  هذا الأكبر بالنزال
★★★★★
هاي اول روح روحي. للحرب مستقبله
عمري لحسين وحياتي. وروحي ناذرها اله
بزود افعالي تسولف.   راح تشهد كربله
ارگابهم يحصدها سيفي فوگ كل سيف اعتله
لازمن لهل  الصلافه ولاحكم لهل الضلال
تمايلت بيده الكتايب.  هذا الأكبر بالنزال

الشاعر حسن لعيبي الحربشاوي

Читать полностью…

الشاعر حسن لعيبي الحريشاوي

لاستشهاد علي الاكبر عليه السلام
(وزن نصاري )

گال حسين من شافه توذر
على الدنيا العفا بعدك يلاكبر
طحت يازهره الروح 
طحت يوليدي مذبوح
على الدنيا العفا بعدك يلاكبر
★★★★★
لجدي المصطفى من گلبي يشتاگ
نهر وجهك يطفي نار الفراگ
من فرگاك يوليدي الصدر ضاگ
جروحي والمدامع الهن اسباگ
بعد هاي الرزيه
بعد شيصيير بيه
على الدنيا العفا بعدك  يلاكبر
★★★★★
بعد شيصير بيه ياضوه العين
من وكتي شفت بويه الأمرين
جدي چن فگدته اليوم مرتين
ياوجه النبي وشم الرياحين
طحت ياتچوة الحيل 
صرت وي المچاتيل
على الدنيا العفا بعدك يلاكبر
★★★★★
ياسلوة الروح وراحة البال
دمي علثرى لودمك السال
فراگك  مرد چبدي حيل چتال
ايهدم الحيل مني ايعذب الحال
سيف الشر تلگاك 
بكاس الموت رواك
على الدنيا العفا بعدك يلاكبر
★★★★★
علي فراگك يبويه يهدم الحيل
النهار بعيني اصبح مظلم وليل
ويل اهل الغدر من صاحب الويل
ودنيا الچانت الهم ضدهم اتميل
ابث شكوتي وشكواك 
يم المصطفى اهناك
على الدنيا العفا بعدك يلاكبر
★★★★★
أصبر ياعلي يبني يمظلوم
يابدر السمه علگاع مرسوم
يابويه العلينه صار محتوم
وعلى كل حال هاي الدنيا مدوم
اعدانه وين يرحون  خصمهم سيد الكون
على الدنيا العفا بعدك يلاكبر

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

نعي لاستشهاد علي الاكبر رضوان الله عليه

متكدر الحال حسين ابهظم متكدر البال
والدمع همال. لبنه يصد والدمع همال
متغير الحال. الاكبر صفه متغير الحال
وكثر الاهوال. ماهمه جيش وكثر الاهوال
العطش چتال گلبه انفطر والعطش چتال
فَطَّر الدلال.  سهم القدر.فَطَّر الدلال
من الفرس مال  انصاب ابرمح من الفرس مال
من حر الرمال. جسمه انچوه من حر الرمال
ياكتر ينشال. امگطع وصل ياكتر ينشال

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

يارب السمه الوسعه  (وزن الطويل)

الاكبر سالم أترَجَّعَه  يارب السمه الوسعه
وِيَّاه مهجتي وگلبي  حسين ينادي ياربي
        يارب السمه الوسعه
★★★★★
توَجَّه للعده الاكبر  والمخيم صفه ابظهره
ماهاب العده والموت    للباري ترك أمره
دمعاته تهل لحسين  خاف الوادم اتغدره
خايف لاوحيد يصير  لمن تنجلي الغبره
يدعي الأكبر الباري   يدعي والدمع جاري
يدعي ومانشف دمعه  يارب السمه الوسعه
★★★★★
برز وتقدم الاكبر   بسيفه زلزل الميدان
حَيِّرْهُم  مثل حيدر  يوم البارز الفرسان
مرد چبده العطش لمن  رد على الأبو عطشان
گله ارجوك يابويه   گلبي من العطش خلصان
اتمسك بالصبر يبني   يگله والظهر محني
أدعي خالق السبعه يارب السمه الوسعه
★★★★★
للعطشان أجه العطشان  ماي ايريد من عنده
أيهَوِّن الحال علأكبر   حسين ودمعته ابخده
على المكتوب يبني أصبر الصبر يجليها كل شده
يثبت ربك ويمحي     هو ابحكمته وحده
قريبه رحمته منك   يدفع جيشهم عنك
لوفزعو فرد فزعه   يارب السمه الوسعه
★★★★★
منبع من شجاعه وزود  بوجهه من وگف واهم
مثل جده الشطر مرحب جندل سيفه ابن غانم
ياهو البارزه ويرجع  من هول الحرب سالم
هذا مهجة الكرار        مايصبر على الظالم
يدعي حسين والمدمع  يصب وينتظر يرجع
يدعي وروحه منفجعه  يارب السمه الوسعه
★★★★★
الغبره أنجلت والاكبر   چتيل على الثره طايح
شافه مگطع ومذبوح     جسمه بلدمه سابح
العفا يبني على الدنيا    يانور البصر رايح
فلا يرحمهم  الرحمان   لا بالعايل ايسامح
الطفوا  مهجتي وشمعي   عليهم بالجحيم ادعي
وشملهم ما إله جَمِّعَه  يارب السمه الوسعه

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

ياعلي الأكبر دخيلك


ياعلي الأكبر دخيلك
★★★★★
هذا الأكبر يومه
واضحات اعلومه
وصولته المحسومه
من يطب للحومه

صاح كلمن شاف ويلك
ياعلي الأكبر  دخيلك
★★★★★
الجيش صار أگباله 
بحيره مؤسف حاله
وين زود   أبطاله
ارتعبوا من افعاله

احتارت الگاع التشيلك
ياعلي الأكبر دخيلك
★★★★★
مادنو ميدانك  
تراجعوا عدوانك
بعزمك وايمانك  
حَيَّراهُم  شانك

من ابو الحسنين حيلك
ياعلي الأكبر دخيلك
★★★★★
مانفعهم راصد 
ولاخبير وقائد
والطفوف الشاهد
مايهمك واحد

الگوم كلها  لو تجيلك
ياعلي الأكبر دخيلك
★★★★★
حسين ينظر دربه
ونار يسعر   گلبه
گال يبني الغربه
من تروح  وصعبه

الدنيا ماتسوه ابرحيلك
ياعلي الأكبر دخيلك
★★★★★
للشهادة ينادي
دون سبط الهادي
عزمي واستعدادي
مثل عزم أجدادي

ياعلي شمكثر جميلك
ياعلي الأكبر دخيلك

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

خطاب علي الاكبر والقاسم مع زينب سلام الله عليها حينما ارادا الخروج الى القتال

الاكبروجاسم يوضحون النوايا
ودعّوا زينب تعنوا للمنايا
★★★★★
جاسم المهيوب من عمته تشوفه
للحرب گاصد بياحاله تعوفه
ياشمس نورك علي يصعب كسوفه
گلبي خايف لاتچمل بعد خوفه

گلها دون حسين نعشگ هلنهايه
ودعّوا زينب تعنوا للمنايا
★★★★★
طلعوا وزينب بقت تنظر عليهم
اسيوفهم تجدح غضب صارت بديهم
يگطع نياط الگلب شافت مشيهم
وسمعت بطاري الحرب يكثر حچيهم

محد الرد ابكلامه. ويثني رايه
ودعّوا زينب تعنوا للمنايا
★★★★★
گلّها الاكبر والدمع طافح ابعينه
حسين وحده ومااله ناصريعينه
عمه اگلبها العساكر لجل دينه
انا اوجسّام للموت اعتنينه

حتى لاينذبح وعياله سبايه
ودعّوا زينب تعنوا للمنايا
★★★★★
ياشبيه المصطفى زينب تگله
لاتحط بگلب أخوي حسين خلّه
عمه حسرات وقهر بعدك تچمله
علابو افراگ الابن لاتظن سهله

بدمنه گلها تنرفع للدين رايه
ودعّوا زينب تعنوا للمنايا
★★★★★
جاسم العمته يصد يشرح قضيته
گلها ياعمه الحسن هاذي وصيته
حسين لووكت الشدد وحده لگيته
بروحك افدي حسين يبني واهل بيته

وانا دون الاكبر اتعنه الرزايا
ودعّوا زينب تعنوا للمنايا

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

الامام الحسين عليه السلام يخاطب القاسم بن الحسن ان يعود الى المخيم (وزن تجليبه)

ارجع يبن الحسن   ورَّد وياك الظعن
ارجع يبن الغالي   ياعمي ارحم حالي
ارجع يبن الحسن

لهاي الگوم  لاتوصل وتفجعني
بخوي الحسن  يلوجهك يذكرني
ردت منك تغسلني وتچفني
وتلم جسمي    البواتر لو تگطعني
تدريها اموذره   انصاري على الثره
من غيرك يبقالي   ياعم ارحم حالي
ارجع يبن الحسن

الحبيب بلاحبيب ايامه ماتنفع
موسهله من اشوفك للحرب تطلع
ومبروده البواتر  بيها  تتگطع
تزول احزاني ياجسام من ترجع
واجسوم مگطعه   يمي وعلمشرعه
راحت مني اعيالي   ياعم ارحم حالي
ارجع يبن الحسن

ردت عريس اشوفك للفرح تنزف
موتهدي شبابك  للحرب بالطف
بدل ماتعلگ شموع وتحني  الچف
ابجيش الماله عد اليوم تتكلف
لبن الزهره وعلي   شتعذر مبتلي
شلون بدونك تالي  ياعم ارحم حالي
ارجع يبن الحسن

عبدالله انذبح وتگطع الاكبر
وبقه العباس يم المشرعه امطبر
نصير المابقالي ولامحب يحظر
اخاف عليك ياجسام تتوذر
ياهو من كربله   يرجع بالعايله
ظعن ويرجع خالي   ياعمي ارحم حالي
ارجع يبن الحسن

علي يبن الحسن يصعب اودعنك
يهل نور الحسن يمي من اشوفنك
وتريد ارباها امك يابدر  منك
شلون الها بدي مذبوح اردنك
خوفي يصيبك سهم   ارجع صوب الخيم
امسلح ليش اكبالي    ياعمي ارحم حالي
ارجع يبن الحسن

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

نعي لسان حال ام القاسم لولدها

صدگ عفت العرس يمه 
ورحت للحرب شاريها
من الخيمه اطلعت مسرع    
نيتك شنهي ناويها
يجاسم يابعد روحي      
شموعك ذن صوانيها
وحنتك هاي يوليدي      
اچفوفك ردت  احنيها
عرسك ردت بالدنيه    
وعَلَيٌَّ دارت  نواحييها
اتمهل يابعد روحي        
تكابر روحي    مابيها
تريد جروحي تلچمها   
و تريد اضلوعي تحنيها
وتمشي للحرب وحدك      
اتريد اعيوني تعميها
ادري غيرتك نيران       
وغضب محد يطفيها
واجب نصرة الوالي       
ابو السجاد  ادريها
اكبار النايبه تصغر     
لاجل عينه  ورواسيها
ادري بيك تگلبها           
اسفلها على عاليها
هاي الگوم متهمك            
وبسيفك تلاويها
يلي نصرتك لحسين        
يمه انا افتخر بيها
ويم الزهره ما ادنگ    
تشد عزمي من اصد ليها
اعذرني لونحت يبني  
ودموعي عليك اجريها
گلب الوالده وتدري       
افراگ  الابن  ياذيها

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

لسان حال  القاسم بن الحسن يخاطب أمه (وزن هجري)

يمه ذكريني يرملة. من تمر زفة شباب
لموت لجل حسين يحله وبالدمه يحله الخضاب
★★★★★
احله زفه الموت عندي. غير هذا مااريد
اسعد الشبان كلها.    اليوم يايمه. سعيد
من تگول الناس عني   القاسم  توذر شهيد
مايهمني بعد هذا.  لوصرت تحت التراب
★★★★★
زفتي محلاها يمه.  من الحرب ارجع خضيب
النصرة المظلوم عمي  الوگف بالحومه غريب
أَمَرْ مِنْ الَأَمَرْ عندي. من ينادي.     ولامجيب
ايعز عليه من ينادي.   ومالگه الصوته جواب
★★★★★
ماإلي بالدنيا مطلب.      ولاحياة بهلوجود
غايتي نصرة محمد. وأوفي لحسين العهود
نصرته الفوز المؤكد.   يعني معناها. الخلود
ونصرة الباطل خيانه.  الدين طه والكتاب
★★★★★
اتذكري يمه الوصيه.  والدي ايوصي ويعيد
حسين بيه الگوم تغدر.  هذا يوم الموبعيد
القاسم ابني درع لأجله.  بلحرب لوضل وحيد
هذا يوم الچنت اريده.   قربة لله موثواب
★★★★★
اليوم يوم الوفه العمي.  من بعد ذيچ السنين
ابحجره رباني ورعاني. عاطفه وطيب وحنين
عمري وأيامي وشبابي.  فدوه. كلهن للحسين
باب للجنه الوسيعه.  وشافع بيوم الحساب

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

في شجاعة القاسم بن الحسن عليه السلام

زهت بيه الحومه   
من طلع جسامها
ناده وين جيوشها
الحرب وين أزلامها
★★★★★
حسين عمه يشوفه.
على القاسم خوفه
الساحته مكشوفه. 
وبالخطر محفوفه
الصولته معروفة.  
بالصبر موصوفه

المايهاب الصعبه.    ولاغدر ايامها
★★★★★
مايهاب الصعبه. 
شماتصادف دربه
علشجاعه أَتْرَبَّه    
عهد منطي الربه.  
لهل بيت القربه. 
يفدي روحه وگلبه

الحرب جنه يشوفها. عشگ عطر انسامها
★★★★★
سمع عمه ابليله.   
الربه من يشكيله
هلامر تعجيله.       
من تقل الحيله
دنه ودمعه يسيله  
الحاربك ياويله

وفدة الزينب روحي  ومنهو يدنه خيامها
★★★★★
يانبع وجداني.     
بصبر امي اتاني
لبستني اچفاني. 
گبل كل إخواني
اوالدي رباني. 
بنصرتك. وصاني

أشكرت ابوي وامي. الجنه تحت اقدامها
★★★★★
صابر على المحنه.     .
للمنيه اتعنه
من لگاها الجنه.       
للشهاده اتمنه
بالدمه الغطنه.         
بدلاها الحنه

وللمنايا. أَتْصَبَّر    من تخط اقلامها

الشاعر حسن لعيبي الحربشاوي

Читать полностью…

الشاعر حسن لعيبي الحريشاوي

لوفاة ام البنين عليها السلام

ضحت اشبال وگمرها 
وراحة الروح وعمرها
والشهود ايامها
الجنة تحت اقدامها
ام البنين🚩 😭
★★★★★
تضحيات وجود كلها 
من البداية الحد أجلها
رضا الباري كل املها  
غير هذا مايهمها
يشهد التاريخ الها 
يعجز يوصف فضلها

رغم كل آلآمها
الجنة تحت اقدامها
ام البنين
★★★★★
لاحت جروح الخفيه 
ومرت ايام المنيه
تعاني بالدار الخليه  
وفارگت ابن الزچيه
والبدور الهاشميه  
موحشه اعليها المسيه

اعليها تبچي ايتامها
الجنة تحت اقدامها
ام البنين
★★★★★
يافضل عنها نذكره 
الفاضله الطاهره الحره
أبد ماقصرت مره    
تفخر ابخدمة العتره
أتمنت من الولد عشره  
كون كلهم فده الزهره

فده الطيب انسامها
الجنة تحت اقدامها
ام البنين
★★★★★
ابدارها تنحب عليله  
عگب ابو اليمه نحيله
وابو فاضل والعقيله  
ليله أشد من بعد ليله
الراحة صارت مستحيله 
بدت رحلتها الطويله

والقدر گدامها
الجنة تحت اقدامها
ام البنين
★★★★★
بحر من فيض العداله  
وگفت بوجه الضلاله
ورسمت الحق وجماله 
ونالت بهاي البساله
الفوز من رب الجلاله 
الخدمت اعلام الرساله

نفتخر خدامها
الجنة تحت اقدامها
أم البنين

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

حي الله عباس

ماتوگف بوجهه زلم حي الله عباس
من سيفه فاز المنهزم حي الله عباس
حي الله عباس
حي الله عباس
★★★★★
حي الله سبع الگنطره
خله الجيوش امحَيَّرَه
بسيفه المنايا امحَظَّرَه
فرق الثريا على الثره
للموت وجهه مبتسم حي الله عباس
ماتوگف بوجهه زلم حي الله عباس
حي الله عباس
حي الله عباس
★★★★★
للدين واهب مهجته
ودافع الشر بيمنته
ذل الاعادي بصولته
جيوش العده ماهمته
ماينثني راي وعزم حي الله عباس
ماتوگف بوجهه زلم حي الله عباس
حي الله عباس
حي الله عباس
★★★★★
عباس گالوا لوغضب
هذا ابن چتال العرب
چتال سيفه لوضرب
معروف معلوم النسب
معروف ماخافي الاسم حي الله عباس
ماتوگف بوجهه زلم حي الله عباس
حي الله عباس
خي الله عباس
★★★★★
زلزل على الجيش الارض
لمن رفع سيف الرفض
رايات للشر تنخفض
الرادت على الحق تعترض
بالباري والحق معتصم حي الله عباس
ماتوگف بوجهه زلم حي الله عباس
حي الله عباس
حي الله عباس
★★★★★
من نسب طاهر هاشمي
الاصل الشجاعه ينتمي
هذا الحسيني الفاطمي
افنيها گال بصارمي
والنعم منه والنعم وحي الله عباس
ماتوگف بوجهه زلم حي الله عباس
حي الله عباس
حي الله عباس

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

عن لسان أبا الفصل العباس

حرام الماي لوجسته وشربته
واخوي من العطش ذابت مهجته
وحگ حسين وعياله وغربته
                على الماي العفه لوصار زمزم

الشاعر حسن لعيبي الحربشاوي

Читать полностью…

الشاعر حسن لعيبي الحريشاوي

في استشهاد أبا الفضل العباس
عليه السلام (وزن القايزي)

مِنْ كِثْر دمُوعِي . نيران اظلوعِي
مِنْ الْقَهْر شَابٌّ الراس
ابچي وانوح لعَبّاس
نيران ظلوعي
★★★★★
حَيْدَرِي نَهْجَه وَصِفَاتَه وَطَعْم الْإِحْسَاس
مِن الْمَهْد طَبْعَه حُسَيْنِي حَتَّى الْأَنْفَاس
ياعبارات التوصفه . وبيش ينْقاس
تعجَز الْأَوْصَاف . كُلُّهَا . گبال. عَبَّاس

النَّاذِر چفينه. والنبله ابعينه
مخنوگ أَعِيش . الْأَنْفَاس .
ابچي وَنُوح لعَبّاس
نيران ظلوعي
★★★★★
منذبح عطشان وانته . وانته رَوَّاي
الماي مِنْ صَبْرِك تَرَوِّه . يَشْرَب الماي
شگد خَصَايص يابوفاضل عِنْدَك اهواي
امعطَّر ابسيف الشَّجَاعَه. وَقُوَّةُ الرَّأْيِ

بعزمك وايمانك . يَشْهَد ميدانك
خَلّ تَعْلَم . بحزني النَّاس .
ابچي وانوح لِعَبّاس
نيران ظلوعي
★★★★★
يلمهماتك عَظِيمَةٌ . شعنها ينگال
كَافِل الْحُرَّه العقيله وضعن الْعِيَال
انْتَه سگاي العطاشى . وَحَامِي الرِّحَال
وَنَاصِر حسَيْن وعضيده بِيَوْم الْأَهْوَال

عُمُرِك ضحيته . لِلْمَوْت انطيته
للخوه مِن دگ السَّاس .
ابچي وانوح لِعَبّاس
نيران ظلوعي

زينب تنادي يخويه. شوف الرحال
والوكت هدم شملنه وبلعجل مال
مو إلك هلنومه هاي. وهاي الاحوال
سَلَّبَوا ضعني يخويه. وراحة البال

بلطف ضلينه. ياهو يراعينه
مابعد ضلت حرَّاس
أبچي وانوح لعباس
نيران ظلوعي
★★★★★
للضعن انظر يخويه. وشوف الاجناب
بين من يضرب بسوطه. وبين سَلّاب
حرگوا اخيمنه علينه. وزاد المصاب
الحرمه تدري بلاوليها. شلون تنهاب

تنعه وتبچيله. كل يوم وليله
كاس الصبر مر الكاس.
ابچي وانوح لعباس
نيران ظلوعي

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

سكنه تخاطب العباس   شوط كربلائي

سكنه تخاطب العباس  يچوي ابعينها المدمع
يعمي مانريد الماي  ياحامي الظعينه ارجع
★★★★★
العفا علماي من دونك  يعمي الله اليصبرنه
والله مانريده انچان   من شوفتك يحرمنه
اغله من الهوه والماي  تدري شوفتك عدنه
ميهمنه العطش  والحر
وعنه الماي يتأخر
نريدك تدفع اهل الشر
يلماتقبل ابهمنه    يضل وگلوب تتگطع
★★★★★
لتگلي يعمي الماي  الكم راح أجيبنه
وملتمه علينه الگوم  چنها ابثار تطلبنه
ياهو ايحامي ابوالسجاد  ويزيل الكرب عنه
علينه بالغدر والشر
جيش الباطل اتحضر
يعمي كون تتحذر
واخاف من الضهر غفله  عليك اهل الغدر تفزع
★★★★★
العفا علماي ياعمي  لذيذ الماي منريده
الغفله فارگ الغالين  بعد الماي شيفيده
اشوفن جيشهم يرعب يعمي تارس البيده
موسهله عليه اتروح
وانته السند وانت الروح
نهاري چملاني جروح
ادعي الليل لايگضي   ولاشمس الصبح تطلع
★★★★★
يگل السكنه ياعمي  شنهي الجيش وابطاله
وانا ابن الاسد حيدر  المحد يوگف أگباله
لحسين أنذرت عمري  واجيب الماي لعياله
اجيب الماي متعني
هاي الگوم متهمني
اريد الباري يقبلني
وخل فوگ الثرى جسمي  وبالوديان يتوزع
★★★★★
شلون الحال من بعدك  سبايه ابولية الظالم
وضعنه ما إله حماي  بفجوج الفله هايم
وحده  ايضل ابوي حسين  عگبك ياگمر هاشم
ترضه حسين بالشده
ياعمي يضل وحده
اخافن ينمرد چبده
وتتخاطف عليه الگوم ينادي ولابشر يسمع

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

لاستشهاد علي الاكبر عليه السلام.(وزن تجليبه،)

بظهرمحني اجاه حسين يتعثر      
على الدنيا العفا من طحت يلاكبر
★★★★★
خصمهم ياعلي باچر تره المختار
وإلي خاصمه جدك  مصيره النار
گبلك كون بيه الي جره والصار
وجسمي گبل جسمك ياعلي موذر
★★★★★
اذا اشتاگ اشوفن طه  واتمنه
انظر وجهك المايختلف  عنه
يانور وملامح  يابدر  منه
چن طاح النبي گدامي واطَّبَر
★★★★★
ياماي العيون وسلوتي  يبني
ادعي الله على فراگك يصبرني
عشرينك گضن يامن رحت عني
طالت لوعتي وحبل الامل يگصر
★★★★★★
يايوسف زمانك     للعدو مطلوب
گبل العين گلبي من البواچي يذوب
رجع يوسف ورداله النظر يعقوب
وانته على الترايب يصعب المنظر
★★★★★
اذاتشكي العطش هدني العطش مثلك
واذاگبلي تروح   احسبني من بعدك
سلامي على النبي يم العذب جدك
عذب يسگيك لمن توصل الكوثر
★★★★★
قدر مكتوب يبني ماترد سالم
بعد ماگنطرت بالسيف بن غانم
عليك غيوم سوده يابدر هاشم
تمطر بالرماح وبالنبل والشر

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

عن لسان  ام علي الاكبر

چان كل ظني ترد سالم يلاكبر
دامي نحرك ياعلي وجسمك توذر
يوليدي ناديت  ترجع تمنيت
سالم يلاكبر
★★★★★
بيه مامرت مثل هاي الرزيه
يمه مالت الف مره الگاع بيه
گبال عيني يلرحت صوب المنيه
بالعساكر منگطع دربك عليه

الف وصله الگلب يوليدي تگطع
يلرحت درب المنيه شوكت ترجع
ياشمعة البيت    ترجع تمنيت
سالم يلاكبر
★★★★★
دموع عيني چملت گلبي نحيبه
راح الاكبر للعدو  طول الغيبه
ادعيت ربي دعوة الام الغريبه
يرد الاكبر سالم عليه يجيبه

اتعبت اناطر ياعلي وعيوني تربي
بدنيتي اخلافك يظل  مكسور گلبي
من صبري مليت      ترجع تمنيت
سالم يلاكبر
★★★★★
شلون تگدر علعطش يوليدي والحر
من رحت لسيوفهم وحدك يلاكبر
نكسر ظهر حسين وگليبي تفطر
ياهو يگدر على افراگك ياهو يگدر

رحت لهل الغدر ياسلوة زماني
لاتظن عدله اظل بعدك تراني
انتظر ماجيت      ترجع تمنيت
سالم يلاكبر
★★★★★
لاتطول غيبتك يبني دخيلك
خوفي من رد السيوف نهدم حيلك
رد يوجه المصطفى الماكو مثيلك
خوفي عن مهرك رمح غادر يميلك

شلي بالدنيا بعد عينك يغالي
اگضي بالدمعات والحسره الليالي
بربي تنخيت   ترجع تمنيت
سالم يلاكبر
★★★★★
اشبال هاشم جابتك مطبور جسمك
مگطعه اوصالك يصب للگاع دمك
شلون اطلع واعتني يوليدي يمك
ارد انوحن وانتحب وابچي واشمك

العمر مني راح يوم الرحت مني
من السمه للگاع چن الوكت ذبني
وبونتي ظليت     ترجع تمنيت
سالم يلاكبر

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

عن  شجاعة علي الاكبر سلام الله عليه

قضية حسين دربه ومنهجه ومسعاه
ابن زود المعارك لوردت   معناه
شوصف علي الاكبر ياوصف الگاه
(ياچلمه أتوصف شخصيته )

نور من النبي فوگ الأرض ازهر
وشجاعة جده ذاك المرتضى حيدر
نزل يفني الصفوف بصولته الاكبر
(صولات الأكبر معروفه )

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

علي الاكبر
مجد سَطَّر
علي الاكبر
★★★★★
ابوجهه سيل الغيظ بادي
زحزح جيوش الأعادي
عاقبتهم شر ينادي
چنه وجه النبي الهادي
وچنه حيدر
علي الاكبر
★★★★★
العاش بديار الكرامه
ونهل من عذب الامامه
من اجل نصرة إمامه
ما يفكر بالسلامه
أسد زمجر
علي الاكبر
★★★★★
مايهمه الجيش داير
اسهام ورماح وبواتر
البارزه مجبور صابر
منحرج خلاه وحاير
موت الاحمر
علي الاكبر
★★★★★
للحتف مَرجَعْ الظالم
مارجع للگوم سالم
من برز بكر بن غانم
جندلاه بسيف صارم
ماتأخر
علي الأكبر
★★★★★
أبد موزود الكتايب
من تگنطر علترايب
قدر متحتم او واجب
گلبه من العطش ذايب
من تگنطر
علي الاكبر

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

نعي  لاستشهاد علي الاكبر

اجنه امخالفات اشفار السيوف
بجبينه الدم نزل هاطل على الشوف
ياهو الي يمهله  وبيه معروف
               ايودع  والده ساعه يخليه
★★★
اجاه حسين  مغضب وصل يمه
خيول الگوم رضن وسف جسمه
مايلگه كتر سالم   يلمه
            يشيله شلون للخيمه ويرد بيه
★★★
يبويه اشلون اعدلنك واگعدك
وعلى امك ياعلي بياحال اردك
خصمهم بالقيامه اهناك  جدك 
               كلمن گطعَّك  باچر  يجازيه
★★★
باد الحيل مني شلون اشيلك
يحيلي انهدم بويه گبل حيلك
ابدليلي سهم المفطر دليلك
                    شگل لمك اوجهي وين اوديه
★★★
اعتنوا ليه الهواشم   وصل شالوه
جريب على الخيم بالحال  خلوه
عن شوف الحرم بأيزار غطوه
           خاف اتموت امه من تصد ليه
★★★
يويلي شافته زينب امگطع
المثل جده بدر بالكون يسطع
تون بهداي ليلى  خاف تسمع
                    تصيح ومايرد  زينب تحاچيه
★★★
ليلى تنادي الاكبر ياضوه العين
وعدني بهاي ابد ماخالف البين
طحت فوگ التراب وشابح العين
         يحر الگاع جسمك خاف يچويه
★★★
صدگ يمه رحت عني يمهيوب
جم اصواب فوك اصواب مصيوب
رجع مهرك يخط والسرج مگلوب
            امدمه اسهام عدوانك تراميه
★★★
صدگ يمه چتيل وي المچاتيل
صدگ يمه على صدرك داست الخيل
نحل جسمي ييمه ومابقه حيل
                هذا الخفت منه وصار تاليه

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

وحك الدل على ذاته بذاته
وعلى المخلوق  مختلفه صفاته
نذر كلبي العمر كله وحياته
خادم للابد  لابن  الزجيه

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

لاستشهاد القاسم بن الحسن عليه السلام

جسمك طريح ودامي
وتموت بلطف ضامي
بهذا الحال    آه يلقاسم
دمك سال    آه يلقاسم
★★★★★
يبن الحسن ياروح النجابه
الماسد بوجه محتاج بابه
يبن زاچي النسب زود ومهابه
على الطالب علم يرفد جوابه

يبن الامام الثاني
بسهم المنيه اتعاني
بهذا الحال   يلقاسم
دمك سال   يلقاسم
★★★★★
بدليلك سهم ما واحد يزيله
خله حسين متعذب دليله
مهظوم وعجز جسمك يشيله
شالك للخيم منهدم حيله

للخيم شالك تالي
يبن  الحبيب الغالي
بهذا الحال  يلقاسم
دمك سال  يلقاسم
★★★★★
يبن البلكرم خلص حياته
من اطباع الحسن انته وصفاته
عزمه وهيبته وزوده وثباته
علحگ دوم متهاب الشماته

يعينك اليوم الباري
علغبره دمك جاري
بهذا الحال  يلقاسم
دمك سال  يلقاسم
★★★★★
شحال حسين لمن نظر حاله
چن شاف الحسن طايح أگباله
أتذكر چبدته وكل ماجراله
القاسم حيف آخر مابقاله

لجلك يهل الناظر
يبن  الامام الطاهر
بهذا الحال   يلقاسم
دمك سال   يلقاسم
★★★★★
انفاسه اتگطعت لمن يشمك
ياجاسم اتفطر گلب عمك
چن دم الحسن من سال دمك
ومگطع على التربان جسمك

جسمك وذر ياجاسم
ماضل كتر بيه سالم
بهذا الحال   يلقاسم
دمك سال   يلقاسم

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

نعي(وزن نصاري) لسان حال الحسين عليه السلام يخاطب ابن اخيه القاسم

دمعه ايسيل ابو السجاد مهموم
برز شبل الحسن غاير على الگوم
ياعمي يگله الگلب ملچوم
الاكبر راح خله الحيل مهدوم

★★★★★
ياجاسم ردت بوجودك ارتاح
ياشبل العضيد ال من وكت راح
صدگ طايح يعمي بيد ذَبّاح
وجسمك صار تالي مهبط ارماح

★★★★★
يبدر الليل يزهي الليل بضواك
يا جاسم مشيت وجاني فرگاك
متوذر يماي العين الگاك
تراب الگاع يلمهيوب غطاك
★★★★★
على التربان عمي مو وكت نوم
شباب ومن شبابك صرت محروم
شگل لمك چتيل وتنزف ادموم
ودوس الخيل ماخلالك ارسوم
★★★★★
شگل لمك اذا للخيَّم رديت
يعزوتها وضواها التارس البيت
أسكت لو أگلَّها بحيره ضليت
گبل چتلك ردت موتي وتمنيت

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

لشهادة القاسم بن الحسن المجتبى  عليهما السلام على طور (حرم عندي)  لباسم الكربلائي

يصب دمي   لأجل عمي
أمامي وقرة أعيوني
★★★★★
انا ابن النبي المرسول   رحمه وخير للوادم
وابوي المجتبى الطاهر  امام ومن بني هاشم
أصلنه على الارض رحمه  وعالم من بعد عالم
وجدي المرتضى الكرار   وانا الباسل ( القاسم )
أحاربكم   واعرَّفكُم
بنفسي لوتجهلوني
★★★★★
هظمتوا حسين ابواليمه  ومنكم ياخلگ همي
بشهر واحد  نكرتوها  رسايل وصلت العمي
جهل لوماتعرفونه  لولمع الذهب يعمي
انا ابن الحسن روحي  لبواليمه وفداه دمي
إله أسنيني   ونظر عيني
النصرته ماتمنعوني
★★★★★
أنا القاسم اتعنيت  للحومه اواجهكم
أحمي عمي وعياله  وخيام الحرم منكم
شتنكرون بالمحشر  لوتشهد رسايلكم
يلكل رحمه مابيكم   وغير الغدر ماعدكم
العمر ذمه   لبواليمه
حب حسين مضموني
★★★★★
قليله بعيني كثرتهم   شماتكثر عساكرها
الحومه ماتهد عزمي ولاكثرة مخاطرها
بوادم علطمع والمال   مبيوعه ضمايرها
كسروا هيبة الاسلام  ياهو البعد يجبرها
مثل عمي   يضل عزمي
الحرب ماغيرت لوني
★★★★★
رخص عمري لبواليمه  وشبابي وزهرة أيامي
للضل لامعين وناس   ومهموم الگلب ضامي
ومن اسهام تتخاطف  جبينه  للاسف دامي
البواتر ماتألمني        غربته زادت آلامي
يوصوني   ويذكروني
للطف اهلي رَبوُّني

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.

التواصل مع @ahmed_alziwar0

قناة خاصة بتلحين القصائد

/channel/+PZwpTt2HLXcvUQZh

------------------------------------------------------

Читать полностью…

الشاعر حسن لعيبي الحريشاوي

https://youtu.be/1ud1fC8XWxQ?si=hi4_w5eDftsjTSjm

Читать полностью…

الشاعر حسن لعيبي الحريشاوي

في شجاعة أبا الفضل العباس سلام الله عليه (وزن عگيلي )

العسكر تتراجف صوبينه. 
شعامل بيهم عم سكينه
★★★★★
عم سكينه شعامل بيهم
بالحيره الگوم مخليهم
چاوين الگاع توديهم
امركب هلموت ابچفينه
شعامل بيهم عم سكينه
★★★★★
ياهو اليتعنه ويدناله
راحت چاوين الخَيَّالَه
يتمرجل يازلمه اگباله
تجدح نار الغيظ ابعينه
شعامل بيهم عم سكينه
★★★★★
هز العدوان وميدانه
من صد لسكينه الحيرانه
ومن صاحت ياعم عطشانه
وانته من الماي اتروينه
شعامل بيهم عم سكينه
★★★★★
لوتصفه الگوم المنتشره
بگد ذرات رمال الصحره
ميهاب الي ناذر عمره
وبايعهن لحسين اسنينه
شعامل بيهم عم سكينه
★★★★★
الرفع الحگ ودفع الباطل
مجرب سيفك يابو فاضل
تفخر زينب انته الكافل
وحماي الحره امسمينه
شعامل بيهم عم سكينه

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

على وزن يخيمات ( المجرشه ) عن لسان العقيلة زينب تخاطب أبا الفضل العباس عليه السلام

يعباس  ارجع للخيم خويه يعباس
خويه التمت علينه شكثر  ناس
مال وطاح صيواني تره انداس
يعباس
★★★★★
زينب بگت يامن رحت تنظر على خطواتك
رحمه وغضب تحمل سوه چنك علي بصفاتك
ماتقبل يمسني هظم  انا ادري معدن ذاتك
جيش شكثر ينهب اجه وصلوا خيم خواتك
يوفاي   وين نروح من بعدك يوفاي
على الماي   يلي معتني ورايح على الماي
يعناي.    ارجع يلرحت للمي يعناي
يعباس
★★★★★
للمي رحت صوب النهر  ارجع يماي عيوني
جيش التدنه على الخيم ينهب يريد ضعوني
انظر على حالي صفه ارماد وتغير  لوني
لاغيره بالوادم بعد   لتظنهم يرحموني
يعباس   شلون الحال من بعدك يعباس
تره الراس   شيب من وكت خويه تره الراس
بلا ساس  كلبي نهدم چن بعدك بلاساس
يعباس
★★★★★
ماردنه ماي من النهر  سالم تعود  نريدك
لانهر لامية نهر   مايسوه چفك و ايدك
ظهره انكسر يابوالفضل يوم الرحت عضيدك
الماي انچفه من جربتك وسيف الگطع وريدك
بالرماح   عليك التمت الوادم بالرماح
صدگ راح  جيش حسين من بعدك صدگ راح
واسف طاح  چفك والعلم خويه  اسف طاح
يعباس
★★★★★
ماواجهك منهم بطل   عدوانك يهابونك
ختلوا جمع خلف الشجر  من رادوا يغدرونك
اتجادحت موت وغضب  يم الشريعه عيونك
ظموها هجمات الغدر و لوطايح يشوفونك
على حسين   حزنك موعلى روحك  على حسين
بلاعين   لاچف ظلت العندك   ولاعين
على البين ماينفع عتب خويه على البين
يعباس
★★★★★
لايسرتك يابوالفضل      ولاتنوجد  يمينك
ليك اعتنه حسين ولگه  افواج السهام بعينك
خد علخد حط وبچه   من الدم مسح جبينك
ظهره علموتك منكسر   يلماكو  گد حنينك
تعناك   طايح  يلگمر لمن تعناك
بلياك  حسين وي العده وحده بلياك
تلگاك مذبوح النحر  وسفه تلگاك
يعباس

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

يا كربلا

ياكربلا يمچ وصل بعد السفر روح النبي
ابن الحجور الطاهره ابن الزچيه الطالبي
ابن البلاغه والعلم وابن الشجاعه اليعربي
خوفي بأرضچ ينچتل وعياله بالطف تنسبي

ياكربلا خوفي العسر يجري عليه بعد اليسر
وماينجبر كسرچ صعب ادهى وأمر واصعب كسر
مغبر ثراچ ومظلمه ولوعات الچ ماتنذكر
الليله المظلمه تنعرف ساعاتها من العصر

كر وبلا ياكربلا گال ابوالاكبر من وصل
اهنا محط ارحالنا وهنا يداهمنا الاجل
وهنا ابدور التنذبح وجسوم علغبره تضل
والبينه يحصل علارض بالدنيا كلها ماحصل

الشاعر حسن لعيبي الحريشاوي

Читать полностью…

الشاعر حسن لعيبي الحريشاوي

في شجاعة أبا الفضل العباس عليه السلام
على طور قصيدة (انحب حسين اهواي) للرادود محمد الحلفي

ياسيف البَتَّار   خلاهم طشَّار
★★★★★
سيفه امطشر الگوم    ياموت المحتوم
ذل اولهم حد آخرهم   عباس بهليوم
چاوين ايروحون   ومن سيفه يصييرون
خله الگوم بحال الحيره  حاروا شيسوون
يازود  الكرار
خلاهم طشَّار
★★★★★
إعصار ومثل السيل   خله الدنيا اتميل
الشمس التضوي اعليهم چانت صارت مثل الليل
والجيش المرعوب   من سيفه المهيوب
خله العسكر بس يتعثر  بين الميت والمصيوب
يابو الراس الحار
خلاهم طشَّار
★★★★★
ياهو الماخلاه    محتار ابدنياه
بسيف الباتر  يوم العاشر  ماتعبت يمناه
الفر والمجروح    حاير وين يروح
فاز الفر من سيف الكافل  والبارز مذبوح
جيش وظل محتار
خلاهم  طشَّار
★★★★★
يدرون الكَفَّال   من يرعد زلزال
عرفوا عزمه بيوم الحومه  چن حيدر لوصال
والگالوا شجعان    فَرُّوا بالميدان
حيل احرجهم من نازلهم   ماظلوا فرسان
مرعوبه الأنظار
خلاهم طشَّار
★★★★★
من سيف العباس  ناس اتحذر ناس
وبأفعاله  حسين اتباهه     بلطف رفعة راس
گوم الغدارين   ابعباس وبحسين
عدهم خبره  الطعنوا ظهره  علشر متعودين
چم خاين غدار
خلاهم طشار

الشاعر حسن لعيبي الحريشاوي

Читать полностью…
Subscribe to a channel