ليلة مولاتي ام البنين عليها السلام
عفتوني يحسين. دم تهمل العين
هاي المصيبة. بداري غريبه
==========
الهضيمه بداري يايمه عفتوني بگلب مكسور
الم جرح البعد يلجم ييمه والگلب مجمور
الضعن لمن مشه واسره بقافلتك تحيط ابدور
وانا الحسرة تحيط الروح تعرف وضعك بعاشور
يايمه بالروح. شفتك يمذبوح
قصة عجيبه. بداري غريبة
==========
سره بمسراك كل حزني على وجني الدمع سايل
وين اتريد ها يحسين ليش لكربله شايل
يبعد امك يضي عيناي من دم الدمع نازل
يمن افديلك عيوني وفداك اوليدي ابو فاظل
ترخصلك عيون لاتبعد شلون
گلبي ونحيبه. بداري غريبة
==========
ليالي فركتك يحسين كل لحظة بألف حسرة
وتخظر بالهم اسنيني وبلوعه وبعد جمرة
يالگاطع درب عاثور دربك يبني بس صحرة
يشح بالطف عليك الماي تظل بعازة الگطرة
بالطف الألام. وبحرك الاخيام
دمع الحبيبه. بداري غريبة
==========
يساحل همي مايخلص يمد اشراعه باللوعه
ابحر دمع الصبر يحسين غدت تتناثر ادموعه
الصبر محني بعد فگدك ييمه ولازم ظلوعه
شمع عمرك يبعد الروح العمر هم طفوا اشموعه
عايفني بالويل. شيخلص الليل
ابني شيجيبه. بداري غريبة
==========
بعد هيهات ترجعلي وعيني اعل الدرب تنظر
درب ماخذ بياض العين وخاطر مني ظل يكسر
عبر حزني الحزن مرات وظل ابغيبتك يعبر
يسليني الحزن والضيم وجفني لجيتك ينطر
متانيتك اتعود. تفداك الازنود
وجثه سليبة. بداري غريبة
==========
الشاعر علي النائلي
/channel/aabas78
قصائد لكل ايام محرم اشترك بالقناة
نزله للعليله ع
يا جرح بعدك يطيب . وانته رايح يالحبيب
يا ابا عبد الله ...... يا ابا عبدالله
..................................................
خذني وياكم فراشه اتعلّلك بخيط الضوه
لا هوى المر واشمه مو خذت حته الهوى
روحي صارت خيط شمعة وكلبي ذايب وانجوه
الدلة من تحركها جمرة ادموعها اتطيح إكهوّه
بويه رايح وانه اصيح .... يمته اموت واستريح
بيّن براسي المشيب وانته رايح يالحبيب
يا ابا عبد الله ...... يا ابا عبدالله
..................................................
بويه غطيني بعباتك واصل العظمي البرد
واصرخ ومحد سمعني يالمسافر ما ترد
مثل غيمه اتمر عليه من اعاين تبتعد
صبري باد ومن اشده ينگطع من ينعگد
بلا طعم هاي الحياة ......... كل شي صاير ذكريات
شمسي ودعها المغيب وانته رايح يالحبيب
يا ابا عبد الله ...... يا ابا عبدالله
........................................................
ردلي العيون الخذتهن عيوني بفراگك عمن
فصَلّت ثوب بغيابك ثوبي يا بويه الكفن
موطني ﭼنت وحياتي هسه صرت ابلا وطن
الناگه تحسدني بونيني ومنها صرت انه الاحن
تحجي دمعاتي بسكوت ... بويه ارجع راح اموت
لا دوه ايفيد وطبيب وانته رايح يالحبيب
يا ابا عبد الله ...... يا ابا عبدالله
.......................................................
يالخذت عبدالله اخذني ليش تكسر خاطري
ما گلتها بس دمعتي بعيني بويه تنقري
نار يا نار اشكبرها . صرت اگلها اتوجري
كل خواتي وياك راحن. وانه اصد بناظري
يالخذت كل الخوات..... من عفتني اشلون ابات
الفرگه صارت لي نصيب وانته رايح يالحبيب
يا ابا عبد الله ...... يا ابا عبدالله
.......................................................
ادعي كل يوم بصلاتي . بكل صباحي ومغربي
لو مريضه وياك اروحن . حته لو احبي حبي
كون اصير استار خيمه واحترگ مثل العبي
وي خواتي اللي سبوهن. بويه يا ريت انسبي
احلم وياكم مشيت.... افتح اعيوني ولگيت
بس مدامع والنحيب وانته رايح يالحبيب
يا ابا عبد الله ...... يا ابا عبدالله
......................................................
الدنيه ما احسبها دنيه من تروح ونفترگ
ومن اتاني ما اشوفك . يعني ما ترجع صدگ ؟
ﭼـا بعد دلالي المن ينبض بدمه ويد گ
ولا حظن دافي اليلمني . وانه كل ساعة احترگ
هاي دنيه وبيها احير .... بهذا الاوداع الاخير
ابقه وي دهري العجيب وانته رايح يالحبيب
يا ابا عبد الله ...... يا ابا عبدالله
.......................................................
نسالكم الدعاء
علي صادق المجراوي
/channel/aabas78
قصائد لكل ايام محرم اشترك بالقناة
مقدمه
ليلة الثالث من محرم
ثالث مسه ابشهر الدمع
مــن فاطمه يلچم ضلع
هم تدري يحسين
هاي اليله اتعــــــذبت بيهه العليله
عنها ضـــــعنك يالابو اعلن رحيله
افراكم يحنــي الظهر مابيها حيله
عن مرضها ياهو بعــــدك تشتكيله
محــتاره ضلت فاطمه
اتشوف المنازل مظلمه
هم تدري يحسين
°°°°°°°°°°°°°°°°°
والله يوجعها رحيــــــــلك مو مرضها
فراگ حضنك مثل رض الخيل رضها
الچــــــــانت اتصليك غايب يافرضها
ادموعـها الجيت الاهل نذرت تفضها
من خـيم اعليها الحزن
انحنت جن عود بغصن
هم تدري يحسين
°°°°°°°°°°°°°°°°
✍الخادم
كامل السعيدي
/channel/aabas78
قصائد لكل ايام محرم اشترك بالقناة
اليوم ملك الموت سلمهه اله
وكله ياعباس هاذي كربله
انت اطبر ياكمر .. وانه اسطر عالنهر
___
همس عزرائيل وباذن الكمر
كله ياعباس انضـر للنـهـر
كون لون احمر تكلبه يالفخر
وسهله هاذي وابد لامومعضله
__
كله ياعباس احصدهم حصاد
وخلي سيفك يعلن اعليهم جهاد
وخل نريح الدنيه منهم والعباد
وهاي ذكره تبقه عدي امسجله
___
كله اقبض روحهم ياابا الفضل
وانه شغلي اليوم بس بيك احتفل
وراح اسلمك ياكمر هذا السجل
سجـل التطبـره والي اتجـندلـه
___
ابكيفك اتخـير يسبع الكنطره
واكطع الروس التعادي حيدره
واسمه يئسجل انـتـه التسطـره
يطلع ابوجهه الجهنم محفله
___
كـله ذكرهم ببوك وحملته
جنت ما الحك اسجل طبرته
ايزلزل الدنيه والله ابصولته
وانت مثله ياابن عقد الوله
__
كله عونك ياملك رب السماء
امعلم انه عالشجاعه والوفاء
راح اخلي العلكمي يجري دماء
وراح اوفي لبن اطهر منزله
____
كله لترس عينهم من الدمع
وماتهمني اجيوشهم لوتتجمع
والله اخلي روسهم ما تـنرفع
ومااثني وتشهـد اعليه المله
__
كله ياعباس منـك والنـعـم
انه اعرفك شهم لاماتـنهزم
ادري من زغرك امبجيهه الزلم
واسم سبع الكنطره لشخصك حله
الشاعر أبو امين ألفرطوسي
/channel/aabas78
قصائد لكل ايام محرم اشترك بالقناة
موشح
خادم او اتباها بالسر والعلن
خدمتك مـاي الوجـه عبر الزمن
****
يا حُسين بخدمتك يحله العمر
وبطريقك امشي لو فرشو جمر
وخـادم الخدامك ابـقـه للحشر
يالخدمتك مـا يـثـمـنـهـا الثمن
****
كل مـسـه ومصباح ننصبلك عزاء
يـا مـلـكنه او عـرشـك إبطف كربلاء
على مصابك نطبر اونجري الدماء
ومـن دمه التطبير إنخضب الچفن
****
بخدمتك يحسـين وقفت السنين
مــا اعـوفـن خـدمـتـك وام البنين
ويـن ادور مـاكـو مـثـلـك يالحنين
غيرك بهذا الگلب لا ماسكن
****
ياحُسين انت الوطن وانت المصير
واحنه خـدامـك اوانـت اعلينه أمير
والله لـو مــا ثورتك مـات الضمير
وطـالـت اعلينه لـسـن أهــل الفتن
****
وداعت الزهـره الزچيه اوحيدره
خـدمـتـك لا مــا تـبـاع او تشترى
الـثـريـه مــا تـصـيـر اوي الـثـرى
خدمتك تاخذنه إلى جنة عدن
****
ياحُسين الوكت بينه إشما يدور
بخدمتك نقسم نـقـدم هالنحور
وشـرف مابعده شـرف لمن نزور
والدمـع يـوگـع ابـابـك چل المزن
****
مـن گـلـب وألسان نبقه بخدمتك
و مـا نـريـد النعمه لـو مـا نعمتك
الله لا يـحــرمـنـه مــن فيّ خيمتك
خيمتك محترگه بس صارت وطن
**
الشاعر سلم الغزالي
/channel/aabas78
قصائد لكل ايام محرم اشترك بالقناة
قصيده للقاسم ع
احظـر زفّتّك يا گــرة العين
ما چان اعله بالي بالميادين
بيك الگلب هايم
يوليدي يجـاسم
يمه ………… يمه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يوليدي اخاف اعليك حته امنالهوه لو مر
احسبلك چنت لحظات تستاهل تعب واسهر
والعدهه ولد معروف طيب من نسل حيدر
تضمه بنص گلبها اينام وتباري لمن يكبر
يا شبل الحسن عن امك اتروح
عرسك ويـن صار وتالي مذبوح
ردتك ترد سالم
يوليدي يجاسم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يوليدي الفرح وينه كلشي مابقى منه
منهو السامع ابعريس من دم منحره اتحنه
بميدان و نبل و رماح وسيوف اليزفنه
آنه امك يبعد الروح تدري بيه شتمنه
كلشـي محَضّـره لجلك و تاني
يالوجهك طلع چن حسن ثاني
ذبحتي الهضايم
يوليدي يجاسم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عمرك ما وصل عشرين بعدك باجمل اسنينك
يمي ودوم انادي اعليك وينك يالولد وينك
لحظه ما غبت عني وعيني تنظر العينك
اذكر چنت اگللك يمته يزفك احسينك
واطفالك على حضني ينامون
نسخه من جمالك هم يطلعون
كون العمر دايم
يوليدي يجاسم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مرعوبه افز بالليل اترك حجرتي واطلع
ادور من تناديني صوتك بالحلم اسمع
ميت شفتك بعيني لاچن گلبي ما يقنع
منتظرك تدگ الباب ويگلي الولد يرجع
وآنه الشفته راسك فوگ الِرماح
شگلّـه و يقتنـع مـا يـرجـع الراح
جـوه الگـاع نايم
يـوليـدي يجاسم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الرايح ابنه يتمنه ما يبقى ويموت اوياه
الله يعينه ويصبره الفاگد سلوته واضناه
يايمه البچي شيفيد لو دم الدمع صباه
يحّدّب من كثر لهموم وين ايدور ويلگاه
هيچ آنــه عليك الضهـر محني
بس انت الوحيد و رحت يبني
دهري اوياي ظالم
يـوليــدي يجـاسم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ظلت ذكريات هـواي گدامي اشوفنهن
حته هدومك بكل يوم يوليدي اطلعهن
اشم عطر الحسن مولاي والزهره امنشمنهن
حلوه ريحة الطيبين والصدري اضمنهن
هيچ اگضي الوكت يا يمه كل يوم
اشتـــم ابعطـركـــم ظــل بالِهـدوم
يا عطر الهواشم
يوليـدي يجاسم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ابو ياسر المياحي
/channel/aabas78
قصائد لكل ايام محرم اشترك بالقناة
مقدمه اليله الثانيه
هاي الليلة هاي الليلة --- ثاني ليلة من عاشور
"""""""""""""""
هاي الليـــلة ضعــــن حســـين
طب للطف ودار العــــــين
وياه أنصـــــــاره الســــــبعين
خيم بالطف بعـــــــــد رحيله
"""""""""""""""
تعنه ونــــــــزل في كربـــــــــله
وشــــــــيد خــيام العـــــــائلة
بالحزن أهــــــــــله محمـــــــله
والـمــدمع كل لحظة تسيله
"""""""""""""""
خيــم بالطف بس شــــــــلونه
والجيش أتعنــــه يحيطــــــــــونه
بكل صـــــــورة راح يقتـلونه
يحتجـــون عليه بأي حيــــله
"""""""""""""""
شاعر أهل البيت
الشيخ عبد الحسين المنصوري
/channel/aabas78
قصائد لكل ايام محرم اشترك بالقناة
لمولاي الأكبر عليه السلام
يبني يالأكبر ينور عيوني
هيج يبني شلون ويفجعوني
انا أمك يبني يا بعد النظر
شكد تعبت اعليك تعبني السهر
وهسه گلبي اعليك يا يمه انفطر
يبني من همي تغير لوني
يعين الله الفاگده التفگد ولد
بالأخص لو جان بس هو السند
وانت واحد عندي لبيتي عمد
شلون عنك يالولد بعدوني
بيش اصبر گلبي يا بعد الگلب
وانت صاير وذر طايح عالترب
يوم عاشر يبني راواني العجب
ريت وياك العده يذبحوني
شلون طايح عالترب حدر الشمس
وانت من العطش ولسانك يبس
انشد وگوه اجر يمه النفس
وين ابني يا خلگ دلوني
مستحيل انساك يبني مستحيل
خل دموع العين عالخد وتسيل
يمه ومصابك فطر من مني الدليل
كون وياك بگبر دفنوني
الشاعر اسعد الناصري
/channel/aabas78
قصائد لكل ايام محرم اشترك بالقناة
أول مـحـرم هـالليله .. أول مـحـرم هـالليله
لـيـلة حزن ليلة دمع .. و الـرايـه سوده ترتفع
أسـود لبس حته الطفل .. و الـبـلمهد دمعه يهل
نـسـتـقبل الليله بألم .. كـل واحد إبجفه علم
أهـل الـمواكب تستعد .. مـرفوعه رايات الحمد
كـل بيت بيه مأتم صفه .. تـحضر له بنت المصطفه
ثـورة دمـاء و ملحمه .. و الـمـنبر يسل صارمه
لـيلة قدر حته الصبح .. لطم الصدر يشفي الجرح
------------------------------------
الشاعر السيد عبدالخالق المحنّه
/channel/aabas78
قصائد لكل ايام محرم اشترك بالقناة
نزله (وبندريه ﴾
8محرم الحرام
ياجمـالـه من نزل جسام جسام
ياحـلاتـه من زعل. جسام. جسام
_
شع النور وبعـاشور لمن بــرز للحومه
خله الجيش مثل الريش من صولته مهزومه
شمس الله غابت ياناس نوره اليشع بالبيده
وبسيفه بيهم من صال مجد الأهل ويعيده
هلهوله يسمع ياناس والخيمه عنه ابعيده
لمن سـمعها ياويل يضحك يلوح بيــده
والعـدو منه نذهل جسام. جسام
ياحـلاته من زعــل جسام جسام
_
سوه الصار ياستار من هلـهلـن عـماته
شد احزام شد الثام بثوب العرس محلاته
بثوب العرس لمن صال جاسم نزل ميدانه
خله الزلم خله الخيل من صولته فحطانه
وتوسط ع العدوان طاح وهـتف هاذ انـه
خرسه الزلم بالميدان جاسم يدك عنوانه
للحرب طب بغزل جسام جسام
ياحـلاته مـن زعــل جسام جسام
_
بضـرباتـه وصولاته حيدر علي بضرباته
بيده السيف ع الكيف موتهم بخــزراته
ماتت زلمهم بالخوف وعله الزلم يتجوه
حي الله شبل الكرار حي الله راعي النخوه
تشبه عَلينَه الذرغام شمرت يمينه الحلووه
وتخوصر اعله الميدان من الهوى يتهوه
والعزم. بيه أكتمل جسام جسام
ياحلاته مـن زعــل جسام جسام
_
طب الحيد بده يصيد. وين النجر وينادي
صاح بصوت أنه الموت. انه بذبحكم بادي
وبسيفه يذبح بالكوم منه الزلم مهزومه
لمن دخل لمن صال بجة العده والحومه
والحومه مالت بالجيش هاي الكفر مثلومه
حي جاسم حـياه يامـحله هيـج علومـه
ويلي بيهم من حمل جسام جسام
ياحــلاتـه مـن زعـل جسام جسام
____
بيهم صاح صاح وصاح لمن شهرحسامه
كنطر خيل سوه الويل شردت زلم كدامه
شبل الحسن يامحلااه لمن جرف ذرعانه
بجة العده بالميدان ترجف تظل عدوانه
من صولته يا هل ناس كل الكفر تعبانه
حيرانه ضلت بالصار كل العده حيرانه
والأجل. بيده الأجل جسام. جسام
ياحـلاته. مــن زعـل جسام. جسام
_
مرتضى مكطوف الموالي
/channel/aabas78
قصائد لكل ايام محرم اشترك بالقناة
شنهي عذرك يا نهر وانته عطّشت الگمر
باچر ايصير الحساب گلّي شمحضر جواب؟
وانته عطّشت الگمــر
***
باچر ابيوم القيامه .. الباري ينصب محكمه
او تحضر اطراف القضية .. ابفاجعة حرب الضمة
كلمــن امعطشله طفلــه .. بالطفوف الفاطمــــه
يوگف ايحضر جوابــه .. والخصم حامي الحمـه
تنعرض كلها الصور .. جربه وݘفوف اونحر
او يبتدي اهناك العتاب .. گلّي شمحضر جواب
وانته عطّشت الگمــر
*
يا فرات الدنيه تگضي .. او كلشي إله حَدْ او عُمُر
او كل وجود ابهالخليقه .. وگفه اله ابيوم الحشر
او كل نهر ما عنده موقف .. ساهم ابموت البدر
لا شفيع او لا محامــي .. او لا أظن ينفع عذر
محكمه او خصمك حضر .. الداعي ابن فارس مضر
منّك اتحمــل عذاب .. گلّي شمحضر جواب
وانته عطّشت الگمـر
*
يا فرات إنته اتحمل .. نص مصايب كربله
والگمر چم مرّه اجاك .. او ما گمت تستقبله
گالّك وياي تمشي .. انطفّي نار العايله
يا نهر ما بيك فزعه .. ويّه ابن عقد الوله
يمّك اشگد انتظر .. او روجك العالي اعتذر
ما فتح بالشدّه باب .. گلّي شمحضر جواب
وانته عطّشت الگمـــــــر
**
يا فرات إنته مُدان .. إو إنته ظالم بالفعل
لا تگول اترست جوده .. هذا أصلاً مو فضل
او هوّه يا جود اليكفي .. او بالخيم ميّة طِفل
بالدرب نصّه ايتبده .. من كثر رشگ النبل
لا جرف بيك انكسر او للخيم مايك عُبر
هلبت اتخف الصعاب گلّي شمحضر جواب
وانته عطّشت الگمـــــر
***
يا نهر لا خجل مايك .. وانتخى الراعي العلم
او هاج روجك عالشريعه .. او گد شبر منها إنهدم
چا طفت نار العطاشى .. او شربت اطفال اوحرم
او لا هوى العباس ضامي .. او لا شمر يحرگ خِيَم
شاهد اعليك الدهر إنته غضّيت النظر
او شاركت بعظم مصاب گلّي شمحضر جواب
وانته عطّشت الگمــــــر
** خادم أهل البيت (عليهم السلام)
أبو حيدر المجراوي
/channel/aabas78
متعوبه. مضيعه گمر عل مشرعه
والمثلك شلون الزمان يرجعه
ماخذته الجروح ماخذته الجروح
..................
موسهله طيحت كافلي اثرت كلش بينه
ضل الحسين الوحده منبعده منهوايعينه
مكسور ضهره ومنحني وياشوفته اتبچينه
☐
ياخويه ماصدگ رحت ماترجع
وگفت خيمنه وفيهه كلي شتنفع
طيحي عمود الخيمه صوتك اسمع
يازينب حسين الكفيل يودعه
والمثلك شلون الزمان يرجعه
.........
عباس للخوا انخلق گلب الحسين وعمره
من گاله ادركني اخي من ركض حدب ضهره
كل عمري ماشفته انكسر ابعباس بين كسره
راحاله بس لچمه ونفس مايگدر
ضما عله احضانه ولگاه يتعذر
بعينه سهم ضل منكسر ماينجر
ياخويه. سهمك اشلون انطلعه
والمثلك شلون الزمان يرجعه
.............
عباس ياريحت هلي بروحتك شفت الغربه
عطشان ميت عل نهر والماي عفت اشربه
يل طيحتك طيحت سمه موسهله كلش صعبه
مامهتم الجرحك ابد وحزانه
بس تنجرح من تسمع ابعطشانه
من بعدك انضيع ابغرب عباس گوم الگانه
مگطعينه وجسمك اشلون انجمعه
والمثلك شلون الزمان يرجعه
.........
ماريد ماي ولاهنه ياخويه رد لخيامك
اامنيتك اتردللخيم ماتگدر من اسهامك
وي جربتك مات الامل وطشرت احلامك
كلشي صبح بلطف صعب ياروحي
ومن الخيم حدالشيريعه اجروحي
نوحي يزينب يم كفيلچ نوحي
ياخوي بضهرك دلالي امودعه
والمثلك شلون الزمان يرجعه
..........
حرگو خيمنه من متت وحسين طاح اگبالي
محتاره بطفال وحرم وركض صفيت الحالي
من دونكم عفت العمر والعيشه َما اتحلالي
تطحن حوافرهم طحن بحسيني
مذبوح اخيي وطاح شوفت عيني
ماادري دهري الياسبي يوديني
وگبالي الشامت كلامه يسمعه
والمثلك شلون الزمان يرجعه
..............
الشاعر سلام البهادلي
/channel/aabas78
قصائد لكل ايام محرم اشترك بالقناة
دلهمت وشتد غضب عباسها
الحومه مثل الرحه گام وحاسها
هز رسن جيدومه وهتزت عداه
بيده جف الموت ملموم ولواه
تحت جدم الطاويه الجيش وطواه
الحومه كامت ترتعش وبناسها
نزل عم سكينه والموت الحمر
اليوم لهل الشام ما يحصل مفر
فوك روس الجيش والقاده عبر
الزلم تخنس لو دخل خلاسها
چالعرمرم فات بالوادي ودخل
لا عطار يلحگه وحتى زحل
صياح اهل الشام للشام اوصل
والشريعه تقهقرت حراسها
نشمي ومعلم على سوح الحرب
علي چنه ومثل عوده من يطب
غالب اكبار الزلم ما ينغلب
حتارت وضلت تون ارجالها
اخو خيته معدل وما ينهزم
تموت من الخوف لو طبها الشهم
الزلم بالطف ابد ما ضلت زلم
لان كل الحومه شالع ساسها
انت واحد بالحرب مالك شريك
حيل الله وقوته كلهن بديك
ال هاشم كلها معتمده عليك
بيك والغيره تعرف مقياسها
دخيل جفك ابد لا ما يلوي
يا شجاعة حيدره وهيبه علي
بجالك الحره لا لا ما تنولي
لان يا عباس انت احساسها
الشاعر اسعد الناصري
/channel/aabas78
قصائد لكل ايام محرم اشترك بالقناة
استهلاليّه
المهدي ناصـب خيمته..عله التل الزيبني
كل محـــــرم من يُمر..ينتظر ظعن النبي
ينتـــــظر ركب الاباء
المهدي هسه بكربلاء
....................
(عجل الله فرجه) مشبوحه عينه
والملايك عن يسارة وعن يمــينه
محضر خيام الله ينـصبهه بأدينه
كل محرم ينتـــظر ذيج الظـعينه
واگف اعله التل يصد...بلكت يـــشاهد عَلم
ينتــظر عمّه الگــــمر...ينصب وياه الخــيم
كل صباح وكل مساء
المهدي هسه بكربلاء
......................
كل صـلاه لمن تِحِل لِبن الوديعـة
يستمع أذان جــــــــبريل اليذيعة
ينزل ويتــوضة من ماي الشريعة
يم مكان ايصلي بي (كفٌ قطيعة)
لصـــــــــلاه لمن يتم ... وركعتين النافلة
يدعي توصــله الأهل... بالـسلامه لكربلة
يا مجـــــــــيباً لدعاء
المهدي هسه بكربلاء
......................
بس دمـــــع مِنّه الثَـغر لا ما تـبَسَّم
ينتظر راية تجي ورافعهه چَف عَم
من يحن يقرة بدموع الغُربة والهَم
يقـــــــــرة وارث لكن بنُص المخيم
وبورد ارض الجــــنان...زارع الــطف تربته
المهدي لقماش الخيام...مـبخرة من ريحته
وبـعطر عرش السماء
المهـدي هسه بكربلاء
....................
عله التل گاعد على ذيچ الحصيرة
بسبحة الزهراء ياخذ بيهه خــِــيرة
ينتظر مـــــــــلگاهه أقمار العشيرة
شوكت يوصل هودج تركبه أميـرة
حته جبرائيل صاح...سيدي من رخصتك
ارد اطش جنحي ورد...عله هودج عمتك
وارد أگلهه بكل وفاء
المهدي هسه بكريلاء
.........................
گلبه من شوگة ايتفايض بالمـحنّه
غِرگ تل الزيــــــــــنبي بالدمع منّه
بچتفه جِربة عمّه بس تارسهه ونّه
حته عرس القاسم امحضرله حِـنّه
شايل لشبل الحسن...امَلبس ابطعم الدمع
أيد يحمل بيهه ياس...وبيد صِـينية شمع
ويـمه ذكريني النداء
المهدي هسه بكربلاء
..........................
ولو وصل ظعن القداسة الهاشمية
المهدي يتلگا بدمعــــــــة فاطمية
يصير حُضنه بكـُبُر گاع الغاضرية
ورة زينـــــب يمشي وبچفه رقية
ويه ابو فاضل يقــــيم...كل مراســيم الشرف
تحرس انفـاسه الخيم...الچان كل سنينه طف
والله يا مـحله اللقاء
المهدي هسه بكربلاء
الشاعر حاتم صبري الكاظمي
/channel/aabas78
قصائد لكل ايام محرم اشترك بالقناة
سرجو الخيل وحبيب القائد
واعتنو خيمتها جنهم واحد
****"*"
ناده ابن ظاهر يبنت الطاهرين
هاي فرسان الوغه بصوت اليقين
اعتنو خيمتج وصلو طالبين
يجددون العهد يا اخت الحسين
جنود يم بابج واجينه نعاهد
سرجو الخيل وحبيب القائد
*
من وره حجاب المخيم حاجته
عمي ياشيخ الاصحاب نادته
باجر يظل الحسين بغربته
وحيد لا ناصر وياه بجبهته
وانتفض جمع الاصحاب الشاهد
سرجو الخيل وحبيب القائد
*
هلهلت بسيوفه جفوف الزلم
واحد يشد عزم اخوه وبالعزم
يبت حيدر كون كلبج لا يهم
عقولنه بدين ويقين وبالعلم
عن يقيم وعلم احنه نجاهد
سرجو الخيل وحبيب القائد
*
رواحنه كبل الهواشم بالفداء
باجر نعلم الكوان عله الوفاء
نسطر اروع تضحيه بحر الدماء
قصص تبقه تنروي بارض وسماء
عله افعال الزلم تبقه الشاهد
سرجو الخيل وحبيب القائد
*
صباح عاشر نزلو افراد وعدد
دخلو الميدان والجيش ارتعد
الحمله منهم واحد تشوفه مدد
يرتجز بحروف تتهاوه الشدد
مالك الميدان عزم وصامد
سرجو الخيل وحبيب القائد
*
الشاعر حيدر عيسى البديري
/channel/aabas78
قصائد لكل ايام محرم اشترك بالقناة
قصيده نزله للعليله {ع} ابو ادم الحلي
الله ويـــــاك يظعن احـــــــبـابي
لوخذت كل الاهل //// ابياوضع انه اضل /الله وياك يظعن احبابي
يالرحت وامشيت ماخــــــذ كل هلي
لو خــذت احبابـــي منهو ايضل الي
والي تـبـقـه ابـلا اهـل وبـــلا ولــي
يـبـقـه بس النــــــــــوح منها يـعـتـلي
تبقه بونين اوجـل // ابياوضع انه اضل /الله وياك يظعن احبابي
تبقه بالحسرات تـكـضيها السنين
ليل وانهار الدمع تجري هالعين
والي تـفـكـــد للابـــو تبقه ابونين
اشحال لو تـفـكـد ابو مثل الحسين
اشعدهــا بالدنيا تضل /ابياوضع انه اضل /الله وياك يظعن احبابي
من اشوفـــــه جنت احســــن بالامان
وابد مااخافــــــن انا جـــــور الزمان
خيمه ويـلـمـنه ابعطف بـكـلـيـبه جان
انـــه واسكينه ورقـــــيه بكل حنـــــان
ابلمته انـحـس بالامل /ابياوضع انه اضل /الله وياك يظعن احبابي
اشلون لو راح اورحـل عني ابـتـعــد
راح اضل ابدمع عـيــــني للابـــــــــد
منهو اليداريــــنــــــي يـحـظــني بعــــد
شـيـســوه عـمره المايـضل عـنده سنـــد
يـبـقه يـتـمنه الاجــــل //ابياوضع انه اضل /الله وياك يظعن احبابي
يصير الـه اهــون مماتـــــه اويستراح
اولايضل بونين كــلـــبه وبالنـــــــياح
الراح مايـــــرجع بعد هيـــــهات راح
اوخلف ابغـيـبـتـه لوعـــــات اونـيـــاح
اوحزنـــــه من بعده يضل /ابياوضع انه اضل /الله وياك يظعن احبابي
///////////////////////////////////////////////
خادم الحسين {ع} ابو ادم الحلي
/channel/aabas78
قصائد لكل ايام محرم اشترك بالقناة
مقدمه اليله الثالثه
هاي الليلة هاي الليلة --- ثالث ليلة من عاشور
""""""""""""""""
هاي الليلة بهمـها تحــــــــوم
وكلب العليـــــــــــلة الـمالـــــوم
تجـــــــــرع مـرارة وهمـــــــوم
تعاتب هل البين وتشـــكيله
""""""""""""""""
بيـــــها المرض والهــم قســــه
وطيف الأهـل لا منســـــــه
للحـــزن صارت مدرســـــــة
من عافوهـــــا وحيــدة عليلة
""""""""""""""""
ضلت تـتـــانــــــــــي عالـدرب
والمدمـــــــــع يســيل ويصب
منظرهــا يفجـــــــــع كل كلب
خلوها من العلة نحيـــــــــــله
""""""""""""""""
شاعر أهل البيت
الشيخ عبد الحسين المنصوري
/channel/aabas78
قصائد لكل ايام محرم اشترك بالقناة
ها يهلنه ليش ماخذتوني ليش
ها يهلنه بلا هواكم بيش أعيش
هاي دنيه او من تدور إبلا جدل
تخلي اليريد الأهل من غير أهل
ها يهلنه ها يهلنه
*
اكتب على باب الهجر قد حانَ موسم غربتي
والبگـه براسك يالدمــع انــت بعدهم سلوتي
بعد المشوا اطلب طلب اوكون الله يقبل دعوتي
اللهم طــول حسرتـي اللهم عجــل موتـتـي
كون ميته اولا أظل بالبيت وحدي
كون ميته موتت ادموعي اعلى خدي
وين اروحن من بعدكم وين اروح
يهل بيتي تآكل بروحي الجروح
ها يهلنه ها يهلنه
*
طبع التظل ابلا اهل يخزرهــا بعيونه الزمن
ماتنفع الذكـرى إذا شافـت عمرها ابلا وطن
يلچمني إذا هب الهوه اجروح الأهل ماينسن
كلشي اشوفه ابـلا طعم راحن ايام الما يجن
كلشي ماصخ والجرح يلچم جرح
كلشي ماصخ منين اجيبك يالملح
انتو ملح الدنيه يالبيكم أشوف
خايفه اعليكم يهلنه امن السيوف
ها يهلنه ها يهلنه
****
مو دمع يوگع عالوجن يوگع سؤال اعله الاهل
جا يمته ترجع يالابو وتگلي سيري اعله الكفل
راحت الكعده الما تــرد وبدمعي شيعت الأمل
لودرت وجهي الكربله مو ملگه اشم ريحة أجل
گلبي خايف ياهلي يمته ترجعون
گلبي خايف مو هجركم عامي العيون
عيني راحت من هجركم عيني راحت
چم تعالو اوما اجيتو جروحي صاحت
ها يهلنه ها يهلنه
*
أترجه منكم بـس خبـر أسال الرايـح واليـرد
ومن الحزن دمعي جمر والگلب ميت امن البرد
الماعدها بالدنيا اخو تشوف الزمن خنجر حقد
كل طعنه اصرخ يا علي مـن الزمن اشوه اللحد
وحشه بيتي اوهم عليله اوهم غريبه
وحشه بيتي أنسى واذكر يا مصيبه
كل مصايبكم يهلنه براسي تفتر
من هجركم گلبي يحبابي تمرمر
ها يهلنه ها يهلنه
*
من هيه مثل الفارگـت قــران الله ونعمته
وچانت اطير امن الفرح لو إجه وباست يمنته
چانت اتحـب اسوالفه جانت تهيم ابسكتته
بيا حال ظلت فاطمه اتگـوم وتطيح ابفركته
من هجركم طاحت اوي الدمعه عيني
من هجركم ياهو مـن عدكم يجيني
صوتي ناده ياهلي يهل الوفه
عمري مثل الماي وبرمله انچفه
ها يهلنه ها يهلنه
**
امنيتي چانت نلتقي الگلب حيل إلكم ضمي
ونسمي ذاك الملتقى يوم اللقاء الهاشمي
شمدريني گلب البسمله ابسهم المثلث منرمي
شمدريني بالعاشر صبح يوم الحسين العالمي
وداعة الله يالمشيتوا إبلايه رجعه
وداعة الله دوم أظل أعليكم انعه
حزني نجمه اومايضمها الليل لو چل
ما أأيس أبقى دوم أعليكم اسأل
ها يهلنه ها يهلنه
**
الشاعر سليم الغزالي
/channel/aabas78
قصائد لكل ايام محرم اشترك بالقناة
قصائد محرم الحرام (الليله الثالثه)
فزاعيـــــه ( للعليله)
.................................................................
اهلنه الشالوا من الدار ماضنهم يردون
.................................................................
الاحبهم والاودهـــــــــــــم غربوا وين
مشتاگه لابــــــــــــوي الغالي الحسين
صحت يهل المحنه ويـــــــــن ماشين
ابچي انــــــــــه بفگدكم واهمل العين
مــــــــن گـــــــد البچي ذبلانـه العيون
اهلنه الشالوا من الدار ماضنهم يردون
.................................................................
بـــــــــــروحتكم ركض گلبــــي وراكم
العبــــره حيل خنگتنـي بجـــــــــفاكم
هلي تاخـــــــــــرتوا عنــــي شعطلاكم
مااكـــــــــــدر اعيش انـــــــــــه بلاكم
الگلب يرتاح والله من تــــــــــــــردون
اهلنه الشالوا من الدار ماضنهم يردون
.................................................................
كل يوم اليمر اغـــــرگ بالدمـــــــــوع
اون ونــه ثجيله وگلبـــــــــي مشلوع
فـــــــراگ احبابي خله گليبي موجوع
اون ضليت انــــــــه وصوتي مسموع
انادي بكل وكت بــس ماتــــــــسمعون
اهلنه الشالوا من الدار ماضنهم يردون
.................................................................
اهلنه السافـروا ليـــــه شيــــــــــردهم
ذولــــــــــه احباب گلبـــي وانه اودهم
صار هواي انـــــــــــه مــــــــــن عفتهم
روحــــــــــي تعود لومـــــــــره شفتهم
روحـــــــــي تهيد لوبيــــــــــــه يمرون
اهلنه الشالوا من الدار ماضنهم يردون
.................................................................
حملت فـــــــــراگهم غصبن عليــــــــه
واون بغيابهم صبـــــــح ومسيـــــــــه
جفونــــــــي وسافــــــروا اهل الحميه
جـــــــــرح فـــــــــراگهم شيحمله اليه
شوكت اهلــي عليـــه انـــــــــه يحنون
اهلنا الشالوا مــن الدار ماضنهم يردون
.................................................................
الشاعر عماد محمد الدراجي
الجمعه 2024/6/7
/channel/aabas78
قصائد لكل ايام محرم اشترك بالقناة
ليلة 8 محرم الحرام
نزله حماسيه
((حلوه علومه))
أبني طـَٔب للحــومه.
حلوه حــيل علــومـه
___
أبني طب للحـومه وخلسها الزلم
وكشـخ بهـيبـت عمــامك ياشـهم
طبـها جاسـم والعـزم يتـبع عـزم
بسيفــه يكطف بالركاب ولا يـهم
يهـتف وبيــهم يصـول .
حتارت الحومه شتكول
بجبهته المرسومه حلوه حيل علومه
★★★★★★★★
أبني طـب للحومه وصكرها العده
ومن تطـب للحومه بيك مـــعاهده
تكطع اجـفوفه الوصـل يمك بـــده
وضربه من سيفك تراب توســــده
من تــطب أعلـيهم.
بصـولتك بـجيــهم
طير أنته النومه حلوه حـيل علـومه
★★★★★★★★★★
كلهـــــا يمـه أداللي وهاج الـوعد
جفوفي حمره بالدمه وهذا الـعهد
والعـــرس مااريده وأيــام الســعد
ياحـــــلاته مــن زعـل ذاكـه الـولد
من زعــل مـحــلاته.
هـلـــــهلن عمـــــاته
بالزعل مالـومه حلوه حيل علومه
★★★★★★★★★
أكشخ بهيبة علي وكــــت الـحرب
ويـــبن غلااب الــزلم لا تــــنـغلب
من تــطب الحومه يوجعني الكلب
والصـعب فــركاك يمـه شكد صعب
فركتـــك اه وأنيــن
زايد علـــيه الحـنين
أمك المـهظومه حلوه حيل علومه
★★★★★★★★★
يمه اذكري بكل وكت هذا المصاب
من تجـي فرحه وتمــر زفت شباب
كولي أبنــي بعـــرسه نام ع التراب
والله بعـدك ويـلي من جرح العذاب
والفرح راح الفرح
والكلب يمه نجرح
بفرحتك محرومه حلوه حيل علومه
★★★★★★★★
ويلي من باجر يويلي من الصبح
يامصـــيبه أحمل ييمه وياجــرح
ويلي ياويلي ع دمعي المنــفظح
أبني جاسم عل تــراب ومنذبـــح
يمه جاسم يل ضـنه
بفركتك ظهـري نحنه
بفركـتك مالومه حلوه حيل علــومه
_
كلمات الشاعر
الحسيني
مرتضى مكطوف الموالي
/channel/aabas78
قصائد لكل ايام محرم اشترك بالقناة
سفير اهل المناقب ..... رسم لوحت عجايب
وكف وحده .... ابوسط كثره ... يرف بيده العلم
.....1...
اخذ دور البطوله والشهامة
شجاعه ومرجله وغيره وكرامة
وكف وكفت علي ابتاج الزعامه
يلوح ابرايته الخضره وحسامه
ماهم بكثرت عدوانه
تاريخه ايسولف برهانه
فلا هم ابعددهم .... مثل حنطه وحصدهم
شمر عشره ... على عشره .... امير اهل الشيم
...2...
وحيد وحاطته بكثره العساجر
جبل شامخ وكف والكل يناظر
وراه طوعه اوكفت بسمه تفاخر
اجاكم زلمه مترده السواتر
من حيدر ماخذ كل شمره
وينه البيكم بايع عمره
يبارز هل مقاتل .... ابن عمه ابو فاضل
منو المثله .... منو ابكده ... الحرب بيد حسم
....3...
نزل مثل الغضب مسلم رعبهم
جيوش الميمنه ويسره كلبهم
وعليهم بجه كل عين التحبهم
غلبهم رد غلبهم رد غلبهم
بركان وفار اعله الكوفه
المو من سيفه ايموت ابخوفه
صبح ميت يسامع .... تصب عينه المدامع
فلا واحد ...بقى منهم ... يعيش ابلا ندم
4...........
عليهم زغَّر الكوفه بكبرهه
ومقرات العده ابزوده عبرهه
جثثهم عالأرض كلهه نشرهه
وبقى بس الدمه يسولف خبرهه
كاشف وجهه وما متلثم
روه الكاع بدمهم مسلم
عزم غيره ورجوله ..... سفير اهل البطوله
جعل كلشي ... تحت امره ... سبع منه السلم
...5...
بديه صار الامر وبكلشي كيفه
لعب بيهم لعب بالحومه سيفه
ملك موت ونزل ينشاف طيفه
أخذ منهم عمرهم واخذ حيفه
ما خله البيهم يتنفس
حتى الزلمه البيهم خنفس
الكلف بيهم تخربط .... اديه ورجله ربط
قسه اعليهم ... اخذ حيفه ... بطولاته رسم
6..........
عليهم عجل الموت واجاهم
مثل ركضت اسد يركض وراهم
سكَوه كاس العطش والمر سكَاهم
وعلى اعتاب المدينه صطراهم
سواهم فرجه ابصولاته
ما واحد ردهن سطراته
جبل شامخ توصف .... رسم بالكوفه جم طف
ابو الحمله .. نعم منه .... شبه حامي الخيم
........
✍️ كلمات موسى الخادم
/channel/aabas78
قصائد لكل ايام محرم اشترك بالقناة
نزله للعليله ع
بويه الغالي ارحم حالي
طالت غيبتكم يالوالي
****
ما يصبر گلبي ابفرگتکم
عالباب اشگد اتنطركم
مشتاگه اهواي الشوفتكم
واليشتاگ ايحن للتالي
****
ابنيتك يالكاسر خاطرها
بالدار اصوركم انظرها
وگعدات الحلوه اتذكرها
بسمتكم لساها ابالي
****
المجروح ايعيش ابآهاته
يجرحني الليل ابصفناته
وي حسراتي ايجر حسراته
مو بس ليله اتمر اليالي
****
معلوله وعفتوني الوحدي
لا ام ولا والد عندي
بس دمعه التركتولي ابخدي
تچويني الدمعه وتبرالي
****
إرجع يابو اليمه ادخيلك
من هجرك صرت انه اشكيلك
إنشد بابي وخل يحچيلك
عن موت الصاير يدنالي
****
حگها الوالدها امفارگها
شهگت موت اتظل تشهگها
بس الحسرات اتعانگها
وابخدها الدمعات اتلالي
****
الشاعر اياد الديراوي
/channel/aabas78
قصائد لكل ايام محرم اشترك بالقناة
كض جربته والغضب بعيونه
شد رايته الخضره فوك امتونه
شبلك يكرار شبلك يكرار
...............
من لكدها وكض رسنهه
جا شلع من عدها سنهه عرفة الكافل غِضب
ماتشوف الخطوه طفره
خلت اعلى الكاع حفره و الرعب وياها طب
مو صهيل ارعيد جنه
كلها ضمت روس منه وزينهم كام وهرب
جن حاجته شفت حيلي شلونه
شد رايته الخضره فوك امتونه
................
كصد للماي ومشاله
اليوكف بدربه شجراله يموت من الخوفه
كبل يلا ترمش عيونه
ينخطف من وجهه لونه عباس من يشوفه
طاحت من السمه احجاره
فوك روس اهل المعاره السطره من اجفوفه
من خزرته خافو يلاكونه
شد رايته الخضره فوك امتونه
...................
من علي موصيه وصيه
بكربله ينصر اخيه وهو هم انطاه وعد
لو تطيح اثنين اديه
لو تفرهدني المنيه لو يصير اكثر بعد
ما اعوف احسيني لحضه
بشوفته عيوني اتوضه روحي تفديه والجسد
والنصرته ما اعيشن دونه
شد رايته الخضر فوك امتونه
............
ينكت الروس بيمينه
سيفه مره ومره عينه حرثه سوه بجيشهم
يكثرون وطشراهم
فاضت الكاع بدماهم جنها غركت خيلهم
الرماح اتطيح يمه
والسيوف اتصيح بسمه و ترجف من اجفوفهم
هذا منو؟ رادو يعرفونه
شد رايته الخضر فوك امتونه
..............
زينب من الخيمه نضرت
بسم اخوهه بجفهه حيت هله بسبع طفوفهه
والتحيه البذنه وصلت
هم بعد من حيله شدت بمتنه شد احروفهه
مطرت الغيره اعله وجهه
الكاع بالكفار وجهه و ماي بدت خوفهه
ما مسته حيدر بمضمونه
شد رايته الخضر فوك امتونه
............
الشاعر وسام صباح الشويلي
/channel/aabas78
قصائد لكل ايام محرم اشترك بالقناة
مقدمه اول ليله
هاي الليلة هاي الليلة --- أول ليلة من عاشور
"""""""""""""
هاي الليــــــلة هل الهـــــــلال
عاشـــــــــــور ومحزن كل حال
المدمع يجـــــــــري وهمـــــــــال
وأعـــلام الســـــــود نعليــــــله
"""""""""""""
يهـلال بحزنك من تظهــــــــر
دمعـاتي تفيض وتتفجـــــــــــر
يوجــــــــــع جرحك يابو الأكبر
ويدمك كل دمـــــع نســــــيله
"""""""""""""
يهـــــلال مصيبتهم صعـــــبة
بالطف عاش حســـــين الغربه
حســـــين الحق أواضح دربه
نســحكَ عالخوف ونـمشيله
"""""""""""""
شاعر أهل البيت
الشيخ عبد الحسين المنصوري
/channel/aabas78
قصائد لكل ايام محرم اشترك بالقناة
قصائد محرم الحرام(الليله السابعه)
قصيده رئيسيه (للامام العباس )
.................................................................
حـي الله عباس الگمر رايح يجيبلنه النهر
غيره وعزم ماينهزم حـي الله عباس الگمر
.................................................................
زينب هي التندبه ياحلال كل صعبه
گوم انهض يعباس
شيل الجود والرايه وانطي لزينب حچايه
گوم انهض يعباس
الزم يالاخوا جودك ولاختك وفي وعودك
گوم انهض يعباس
طلب طلبيت يالهيبه الماي بجودك تجيبه
گوم انهض يعباس
الحـــــــره لمن نـدبته عباس دگلها الصدر
غيره وعزم ماينهزم حي الله عباس الگمر
.................................................................
يختي الماي اجيبنه العسكر كله اذلنه
يزينب لاتهمين
شنهو الماي يازينب على العباس مايصعب
يزينب لاتهمين
الفرات اليوم اذلنه سحل ياخويه اسحلنه
يزينب لاتهمين
طلب ياخويه طلبيني الچ افديهن عيوني
يزينب لاتهمين
يازينب انه لخاطرچ الجيش اشطرنه شطر
غيره وعــزم ماينهزم حي الله عباس الگمر
.................................................................
انه ادريك يالوفاي مايصعب عليك الماي
تفزعلي من احشمنك
انته الكافل اطفالي انته الحامي لعيالي
تفزعلي من احشمنك
حيدر بيــه موصيك گدها يالگمر يدريك
تفزعلي من احشمنك
بالشدات بس انته يفزع والله لاخته
تفزعلي من احشمنك
عباس كافل زينب ياناس هـــــو مـن الزغر
غيــره وعزم ماينهزم حي الله عباس الگمر
.................................................................
امني ارتاحي بوجودي محد يوصل حدودي
كفيلچ وانه عباس
انا البالعين خليتچ انا البالروح ضميتچ
كفيلچ وانه عباس
واگف دوم گدامچ حارس انه لخيامچ
كفيلچ وانه عباس
اضل للموت ابرالچ انتي وهاي اطفالچ
كفيلچ وانه عباس
خادم الچ يازينب وبخدمتچ انه افتخر
غيره وعزم ماينهزم حي الله عباس الگمر
.................................................................
مجرب مااجربنك اخوي وانه اعرفنك
نعم منك يــوفاي
بس احچيلي حچايه اشوفه لازم الرايه
نعم منك يـــوفاي
طلبته وگال لتهمين امر يازينب تأمرين
نعم منك يـــوفاي
ندبته وگالي هالجاي گتله سكينه تطلب ماي
نعم منك يــوفاي
عباس كل عمره وفـي وبعمره مامره اعتذر
غيره وعزم ماينهزم حي الله عباس الگمر
.................................................................
الشاعر عماد محمد الدراجي
الاحد 2024/4/28
/channel/aabas78
قصائد لكل ايام محرم اشترك بالقناة
بين عاشور وبجانه // وكل واحد سولفلي احزانه
كمت اسال خدام حسين // الهذا الموسم شمحضرين
وكل واحد سولفلي احزانه
***
بديت اويالخطيب وكال باجر اصعد المنبر
كتله بهيده لو ونيت الزهره بمجلسك تحضر
شمحضر بحث لحسين كون اتوضح المصدر
اريدك تذكر امصابه وتذكر كطعت المنحر
سولفلي اعله المحبس وينه // يا عاشك ما دمعت عينه
ذيج البسمه انذبحت وين // الهذا الموسم شمحضرين
**
سألت الشاعر اشعندك قصيده اشكاتب اقرالي
كلي اقرالك اعله حسين والمطلع اجه ابالي
اول ما بده بالبيت كامت دمعته اتلالي
بجه وما كمل المطلع وكال الطف تراوالي
سهران وما نايم ليله // وزينب يتوفق تدعيله
اقلام الكتبت نصرت دين // الهذا الموسم شمحضرين
*
كمت اسال عله الرادود والعبره بوسط صدري
كتله مله سمعني وناري بالكلب تسري
قرالي المستهل بالطور ودموعي بدت تجري
كلي ما اعوف حسين لاخر لحظه من عمري
ذكرني بحمزه واطواره // بكاظم منظور واشعاره
وذكرني بوكفت ياسين // الهذا الموسم شمحضرين
*
التقيت بصاحب الموكب وكتله اشلونها الهمه
السنه كون احسن من العام تصبح رايد الخدمه
كلي الهمه موجوده الورد ما يخدش النسمه
وروحي من اضحيها ما تغله اعله ابو اليمه
من كتله اشكبرك بجيته // حاجاني وطاحت عوجيته
صايرلي بهل الخدمه اسنين // الهذا الموسم شمحضرين
****
كرب عاشور يا شيعه وابو الزنجيل شد احزام
اتهيئه للطم جم شاب وتوشح ابو الدمام
استعرضنه وعلكنه اشموع ومثلنه عرس جسام
احنه ويالحسين اسيوف ونبقه اعله العهد كل عام
هنياله حسين بخدامه // جم عابس هوس جدامه
كلنه بحبك مجنونين // الهذا الموسم شمحضرين
*
نبقه اعله العهد يحسين وما نترك مسيرتنه
شيعه احنه ونضحي ارواح لجل نصرت عقيدتنه
انته مشعل الثوار وبسمك تعله رايتنه
للاجيال ننطي ادروس ونوضح قضيتنه
حاربت الزمره القمعيه // وبسمك تتباها الحريه
انته اقرب من هاي العين // الهذا الموسم شمحضرين
****
تمت
للشاعر #تحسين_الخفاجي
/channel/aabas78
قصائد لكل ايام محرم اشترك بالقناة
#محرم1446هـ
موشح بحق مولاي ابالفظل ع
يانهر اكبر جرم سويته
كًمر هاشم ليه مارديته
٠٠٠٠٠٠٠٠٠٠٠٠٠٠٠٠٠٠٠٠٠٠٠
من اجاك ابشوك ويدفعه الامل
واعد اسكينه يرجع بالعجل
ياسهل وشلون تغدر بالجبل
الدنيه لومالت تكض ساريته
========================
اليغدر الخطار تكبر فشلته
كًمر هاشم جاك شايل جربته
وصته سكينه بمايك وصته
و نته بسهام الرده تلكيته
========================
ولسمه عن شوفتك مابعدته
وعله مايك دوم تارك صورته
بالطفوله وجان اسمك سلوته
اخوي ماناسيك ونته نسيته
٠٠٠٠٠٠٠٠٠٠٠٠٠٠٠٠٠٠٠٠٠٠٠
شكثر يفرح لوجبت طاري نهر
بعده عمره ازغير ماعابر شهر
كًبالي يضحك وانه اموت من القهر
الهذا يومك يانهر ربيته
=======================
عدنه شيمه الضيف مدلل يكون
ونته خابت بيك حسبات الضنون
وعله دربك شابحه وتربي العيون
وكل نضر ينزف قهر خليته
========================
مرت الساعات والكًلب انعصر
والدمع اهات عالخد انحد ر
اطفال تنشد وينه ياعمه الكًمر
اليش مظلم ما ينور ابيته
٠٠٠٠٠٠٠٠٠٠٠٠٠٠٠٠٠٠٠٠٠٠٠
خادم اهل البيت ع
#فلاح_طالب_الماجدي
/channel/aabas78
قصائد لكل ايام محرم اشترك بالقناة
رئيسية عزاء ليلة مولاي علي الأكبر عليه السلام
شلون يالأكبر ارد لخيامي
طاح حيلي وماخذتني اجدامي
بويه يالأكبر متت وطاح گلبي من طحت
==========
للمخيم خطوه لكن بيها الف عام
وصارت عليه بعيده يبني الاخيام
شلون امشي واني كلي انزف آلام
والدك بويه بمماتك گوه من گام
حالتي صعبه يبويه بموتك
شلون ارد واني فاگد صوتك
يبني من ايدي رحت. وطاحت گلبي من طحت
==========
ياعلي ظهري انحئ ظهري كسرته
ميت ومن والدك تسمع حسرته
موقف الكلش صعب ذبحك نظرته
ياعلي بويه تره گلبي فطرته
گلبي وي ظهري انكسر لمصابك
بيش ارد وشرد اگل لحبابك
بهاي حيرة تحيرت. وطاح گلبي من طحت
==========
شلون اشيلك للخيم حيلي تبده
والهوه يعثرني بويه لو تعده
منين جسمك ماالزمه گمت اهده
يلّجمْ جرحك يبويه وبيش اشده
هواي ماتنعد اشوف اجروحك
شلون اصبر روحي طلعت روحك
جروح بجفوفي الزمت. وطاح گلبي من طحت
==========
خيمه البروحي وكع من عدها عامود
وخيمتك بيها گلب يوليدي ممرود
امك وتتنطرك يالأكبر اتعود
جمر دمع الوالده ينزل عالخدود
تسأل وفگدك علي ماذيها
گوم شوف امك يبويه شبيها
علي صاحت شيبت. طاح گلبي من طحت
==========
بعيني كون الله انطفه والدنيا ظلمه
وبيه حسرة فاجد وبيه انه لچمه
عطرك منين انه اجيبه ارد اشمه
منه ماباقيلي ابني فقط هدمه
مگطعه اوصالك علي يالغالي
شاب گلبي وشيبت دلالي
بهل المصاب تألمت. طاح گلبي من طحت
=========
ضاكت الوسعه علي بالغاضريه
راح ابني وبس بقيت اصفگ بديه
بعد گلبي شيحتمل يبني اذيه
بعد گسرة عمك وهاي الرزيه
ظهري مكسور اعل كافل زينب
نار گلبي ماطفت بس تلهب
من المصايب حدبت. طاح گلبي من طحت
==========
الشاعر علي النائلي
/channel/aabas78
قصائد لكل ايام محرم اشترك بالقناة
قصائد محرم الحرام(الليله الثالثه)
قصيده رئيسيه (للعليله)
.................................................................
حمل ضعنهم وابعدوا اهلي الغوالي
وانـــه انتظر منهم اضل كلمه تعالي
عيوني تنضر عالدرب
والانتظار شگد صعب
بويه بويه بويه بويه
.................................................................
عيوني منيوم المشيتوا بويـه ماشافت النوم
امگابله الباب واناطـــر ياهلي منــــكم اعلوم
بگلبي يابويــــــه تـــراني عايشه بس الهموم
من يوم فرگاكم يبويــه تغيرت حتى الرسوم
رحتوا وين ليابلد گلولــــــــي
رحتوا وين ليش ماصحتولي
وحدي عفتوني شعجب
عيونـــــي تنضر عالدرب
.................................................................
اسبوع صار محضرتهن بويه يحسين الثياب
اغراضي كلهن جمعتهن وواگفه ابعتبه الباب
حيل فرحانـــــه يبويـــه ومنك اتنطر جواب
تجي وتگلي يبويـــــــه للسفـــر حان الذهاب
حسين گال ابقي بويه هنانه
ماكـو مجال الچ بويـــه ويانه
حســـــــــــــــــره ضلت بالگلب
عيونـــــــــــــــي تنضر عالدرب
.................................................................
سافروا اهلي واخـــوتي سافروا كل العمام
العتب ماينفـــــــــع بعد وبعد ميفيد الكلام
مشتاگتلكم حيل أنـه وشوگي زايد والهيام
يحسين گلي بغيبتك بياحضن انــــــه انام
حسين راح وراحت وياه الاماني
حسين راح العمــــــره كله دللاني
امناطـــــــــــره جيـــــــــت المحب
عيونـــــــــــــــــــــي تنضر عالدرب
.................................................................
فارگوني اعــــزاز گلبي راحوا احباب العمر
اهلي عافوني وحيــــده ونووا كلهم للسفر
لاطارش الدزولي انـــــه ماوصل منهم خبر
لاابــوي حسين اجاني ولاعلي الاكبر حضر
اشتاگ حيل الكم انــــــه يالاهل
اشتاگ حيل عايشه بطاري الامل
بعــــــــــــــــــــد ميفيـــــــد العتب
عيونــــــــــــــــــــي تنضر عالدرب
.................................................................
للسفر يابويـــه تدري اشكبر چانت فرحتي
ماخـــذتني وياك ليش بالبيت شنهو ضلتي
لومشيت وياكم انه تطيب بويــــــــه علتي
ويانه ماترحين گتلي بگلبي زادت حسرتي
صح عليله لكن اگــــدر عالسفر
صح عليله اتحمل انواع الخطر
فـــــــــــــــرحتي انباگت غصب
عيــــــــــــــــــوني تنضرعالدرب
.................................................................
الشاعر عماد محمد الدراجي
الاربعاء 2024/4/3
/channel/aabas78
قصائد لكل ايام محرم اشترك بالقناة
محرم الحرام 1446 هـ
لمولاي ابا الفضل العباس عليه السلام
ابو فاضل بالــحروب ... من يشد الثــامه
سيفه يتحول غروب ... من دمه الگدامه
ينشلع وجه اليسطره
فارس ومــحد يقهره
من يـــــــشــد الــــــثــــــامــه
لو صعد فوگ المهر ... چنه حيدر من يكر
واليلوحه بسيفه يخلص دمه خوف
بالملاحم يـبتســـم ... فــارك خشوم الزلم
سيفه من ايسلّه ينشاف الخــسوف
امن الوكت لو هــــدّه اسرع عالمناحر سيفه
سيفه صـــــياد بيمــــينه ومن يصـيد بكيفه
واليذب ثوبه امامــــه مايــــذبحـه ايعـــيفه
هذا تربات الـــــفحول ... ياحــلات افعاله
بحومته لمّن يصــــول ... أيتــعب الخيّاله
چنه الاحسين اعله مهره
فارس ومــحد يقــــــهره
من يـــــــشــد الــــــثــــــامــه
1
غضب نازل مايـزل ... خزرته ماتنــحمل
بكربـله ســــوّه العجايب عالفرات
من گصد للمشرعه ... زلم شــاف امگبعه
هاذي ياسبعين الـف بيـــهم ثبات؟
سيفه هُدهُد أبو فـاضل بس خبــــر مايحمل
يحمل الدم من عــدوّه وصـــــاعقه من ينزل
الشرده باب وبيده سده والخصم يمّـه ايِذل
القارعه بـــچف الكفيل ... بالطفوف انشاهد
هذا ابن حامي الدخيل ... طـالع اعله الوالد
ينتهي البطف يخزره
فارس ومحد يــقهره
من يـــــــشــد الــــــثــــــامــه
_2__
راسه حار وســـطرتــه ... بيها حــر گد خزرته
والزلم تــــترادم گــــباله وتطيح
الموت بچفوفه انرسم ... ورفرف بچفه العلم
مايجامل بالحرب كلــش صريح
بالخيم ساقى العــطاشى وقائد اعله الحومه
زلمة حســـــــين المقدس حيـــــدريه اعلومه
بالحرب صياد ماهــــــــر والشهـود اخـصومة
صوته شفرة ذوالفقار ... وسطــوته جبّاره
راسه حار وكلشي حار ... والعــدا محتاره
بالعساكر خلّه كسره
فارس ومحد يقهره
من يـــــــشــد الــــــثــــــامــه
_3__
كربله تــــشهد الــــه ... خطـــــوته كـــالزلزله
الارض مـن يمشي أبو فاضل تميل
مثل الاحسين الكمر ... بيــده كل وادي سقر
الما گدر يشــــرد عِمل روحه قتيل
من دخل ميدانه بالطف سيفه لا مــــا يـــلـــمع
ابكثــر دم المنــاحـر فـــوگه صــــــار امگبــــــع
ينحــر بروس الاعـــــادي والنــــسلْهم يگــــطع
اگباله كل فارس يطيـح ... چـن ورگ صفصافه
بالـچثث ســـــيفه يزيح ... حيـــــدره باوصافه
الشمس يم چفه جمره
فارس ومحد يقــــهره
من يـــــــشــد الــــــثــــــامــه
4__
بكربله سوّه العــــجب ... عالــعدا سيفه شطب
شد لـّـــثامه وهد مــــناحرها الالوف
عالــــــشريعه من نزل ... النـــهر جـــــرفه هدل
براحته جوده ملاه والكل يــــشوف
اثنعش عين لموسى نبـــعن مـن ضرب عالصخره
ومــــــادرو جـود ابو فاضــــل هـوّه اصـل الفكره
وابو فاضل حين يمشي الصــحره تصبح خـضره
النهر سر الحــــــياة ... وجوده سر اخيامه
وهو سر المعجزات ... مــــــــن يهد الثامه
البارزه يمحيله بزره
فارس ومحد يقهره
من يـــــــشــد الــــــثــــــامــه
_5___
ياهــــــو سوّاها وگدر ... بجربته ايشــقِّ النهر
والكتايب سعفه ماخذهـا الرجيف
ماكو مثلــــه وين اكو ... مـثل ابو فاضل كفو
كاسر ظهـور الزلم كــــسر الرغيف
بـــــــخطوته يسحك جمــــاجم ياهو يوصل حده
سيـــــفه هــــــزّه ارگاب وگـعت بالمـــــناحر حدّه
وگلبه يوگع عالـــترايب النــــــوه اعــــــله الـشرده
تنحني اگبالـه الخصوم ... عالي ياهو ايلوحه
الخـايف أگبــاله يگــوم ... بيده يـذبح روحه
ما ينلمح منّه ظهره
فارس ومحد يقهره
من يشد الثامه
ـــــــــــــــــــــ6ـــــــــــــــــــــــــــــــــــــــــ
#احمد_رزاق_الاعرجي
#رزقهم_سلام_الله_عليهم
/channel/aabas78
قصائد لكل ايام محرم اشترك بالقناة
