ميمر للامام السجاد ع
____
حزنك كلف بالدلال
نوح اقتبس من نوحك
****
شفت المصايب والحزن بدموعك
اهات ونك تحني حتى اظلوعك
لچمات دهرك سولفت موضوعك
حمزه الثمالي يلگاك
ليل الحزن بجروحك
**
حزنك اخذ طول العمر بالعبره
وياك چن اسمع نواعي الزهره
خلصته ليلك بالنوايب حسره
ماتنسه يوم المذبوح
نهرك دمع بسفوحك
***
مرت عليك اشكد محن تتگوه
چنك غريب وبالجمر تتچوه
ظهرك اشوفه من الهضم يتلوه
بالطف عشتهه المأساة
دهرك يعذب روحك
**
امضت سنينك بالحزن والمدمع
بعيونك اتشاهد جثث بالمصرع
شفت المأسي حدبت بالمضجع
اعرف ونينك مفجوع
سهم المنيه ايلوحك
***
لان الحديد اعله النبي بشجانك
وانت الصبر جاز وعبر بأحزانك
صرت ابونينك بالبچي عنوانك
خامس الخمسه اليبچون
نقره الكتاب اطروحك
***
دهر المصيبه خيم اعله المحتوم
ترسم محط النايبه اعله المظلوم
ويلاه صحنه امصيبتك يامسموم
تاليته طفك ميشوم
هدم كيان اصروحك
***
موتك نشوفه ابكربله ضي عينك
ونك اشد من السبي عله حسينك
حان السفر هالليله شفنه اجبينك
حضرته دمعك يحسين
جرح الختام ابنوحك
***
تمت بعون الله تعالى الشاعر____يوسف_الفتلاوي
/channel/aabas78
قصائد لكل ايام محرم اشترك بالقناة
انودع الليله امام الساجدين
بالحزن مولانه زين العابدين
1
انودعه وجروحنه تنزف إله
بكل وكت عالشافه في طف كربله
دموعه متبطل وتبقه هامله
عالجره والشافه من الظالمين
2
بصبره يردع جان كل ظالم اجير
وعاش ثوره وقمه بأعماق الضمير
بحكمته اعقول وضماير تستنير
لان فكره من أمير المؤمنين
3
علي السجاد ونعم من هالاسم
قاد ثوره بصبره بحكام وعلم
جان كل طاغي بحجرها ينرجم
لان جانت ثورة الحق المبين
4
بقوة إصراره وعزم فيض الصبر
اكباله أكبر قوه جانت تندحر
مشعل الثوره بقه وحتى النصر
وهالنصر خطه اله العالمين
5
شاف أهوال بحياته والمحن
من جرح طب المنايه وابتدن
شاف عماته وخواته ينسبن
وهو وياهن مشو متيسرين
6
هذا حاله ومشه سلم للقدر
لان محد مثله بالعالم صبر
رغم جرح الفاجعه الكبرى انتصر
بقه اسمه وراح مرفوع الجبين
الشاعر رياض الرسل الجابري
/channel/aabas78
قصائد لكل ايام محرم اشترك بالقناة
استشهاد الامام السجاد ع
لوالدي يا شيعتي زيدوا البكاء
مات مذبوح وغريب بكربلاء
ما بقه ناصر إله
مات محد غسّله
""""""""
علي ابن حسين اني ودمعي بمصابي ايهلي
إبچوا يا شيعة اعله ابويه بالله لا تبچون إلي
يومه لا يوم اليشبهه بكلشي هو مبتلي
ذبحوا ابنه علي الاكبر وذبحوا الاصغر علي
إبچوا عالمذبوح يا شيعتنه دوم
يوم ابو اليمه تره ما مثله يوم
ذبّحوا ناسه وهله
""""""""
فوگ صدر حسين شفته للشمر لمن صعد
وسيفه حط يم راس ابويه وللذبح شفته استعد
منظره وهو ويذبحه والله ما انساه ابد
بعد ذبحه اثنعش طعنة بنحره ظل يضرب بعد
شيلوا راسه برمح شفت الشمر صاح
وراسه ما ينزل اريد امن الرماح
عالرمح راسه اعتله
"""""""""
مات وما خلصان منهم فاجعه تجر فاجعه
فرصة للسلّاب چانت شاف خاتم باصبعه
دنت نفسه على الخاتم والطمع ما ابشعه
گطع صبعه وچان يگدر من اصبعه يطلعه
الميت اكرامه الدفن يا مسلمين
تلث ليالي بلا غسل ظل الحسين
الله يلعن قاتله
"""""""""
من وكت آدم يشيعة وباقية ليوم الحشر
عالمنابر بس مصيبة وغيرهه ما تنذكر
هو بس عطشان واحد وچان ذبّاحه الشمر
وهو بس مذبوح عدنه الخيل داستله الصدر
وصدر ابويه الچانت الزهرة تبوس
بعيني عشر خيول شفت اعليه تدوس
وذرة وذرة بالفله
""""""""
شفت ابويه بعينه دمعة وحاط ايده اعله الظهر
من سألته ما يجاوب بأيده أشر عالنهر
گلي شوف اعله الشريعة منهو گطعوله النحر
گلي هسه انكسر ظهري يا علي مات الگمر
شاف عمي بلا يسار ولا يمين
الان قلت حيلتي صاح الحسين
عگب راعي المرجله
""""""""
للشمر گلتله عمتي حين ركبونه الهزل
لو تصعّد ابن اخويه لو حبل ايده تحل
بصوط يضربهه بمتنهه وسكتي گللهه النذل
وحيل صار بأيد عمتي يشده ويجره الحبل
والحبل حز ايدها والدم يسيل
لعمتي نوحوا ركبوهه اعله الهزيل
وين حامي العايله
""""""
كل ابن امنيته يحضن والده گبل الدفن
وجسمه انه اشما احاول احضنه ما ينحضن
وذرة وذرة صار ابويه ضلوعه طحنوهن طحن
صرت الم جسمه بحصيرة الفاتحة اقراله واون
بالدفن يا شيعتي منظر فجيع
فوگ صدره ادفنت عبد الله الرضيع
دموعي ظلت هامله
انيس الخفاجي الكربلائي
/channel/aabas78
قصائد لكل ايام محرم اشترك بالقناة
با الآهات… والحسرات… الليلة انودع السجاد
زين العابدين اليوم راح اتغيب انواره
واشباح الخطر والموت كلها مخيمه بداره
من نار الخيم لليوم كبره وماطفت ناره
من الطف لحد ما مات دمعة عينه تجاره
با الاحزان.. والاشجان.. الليلة انودع السجاد
__
ما مرت عليه ساعه اذا مو كربله اباله
يذكر والده مذبوح وتسحگ فوگه خياله
والماي انحرم منه ذاك المحد ابحاله
وجسمة من الحوافر ذيچ كلها مگطعه اوصاله
عالمذبوح.. ظل ينوح… الليلة انودع السجاد
_
ابو الباقر حضر بالطف وشاف الفاجعه بعينه
شاف اعله النهر عباس ومگطعيها چفينه
مارد للخيم خجلان منطي احچاية لسكينه
كلها تصيح ياعباس وين الماي تروينه
والرواي… ظل عالماي… اليوم انودع السجاد
___
ننشد ياعلي السجاد وانته بكربله شاهد
من طاحو بني هاشم وماظل للحرم واحد
شلون الاكبر اتگطع ويمه اتمدد الوالد
وليلة من الخيام اتشوف ابنها وعينه اتشاهد
واعله الصار.. گلبك نار.. الليلة انودع السجاد
_
شلون ام جاسم العريس منه گطعت الضنه
من شافت عزيز الروح بفيض ادماهه يتحنه
گالت راح تعب ارباي يبني وايست منه
حگها والمثلها اتصير ما تلام ع الونه
يا ستار… هذا الصار.. الليلة انودع السجاد
__
من صارت حرب وابطال بيها يسولف الميدان
طلعت كل بني هاشم بين ارجال والشبان
بس الطف سمعناهه بيها اتذبحت رضعان
عبد الله اشعليه من دين حته ينذبح عطشان
حزنك بان… ع الرضعان.. الليلة انودع السجاد
_
شنهي موقفك مولاي من هجمو ع المخيم
وانته لا اخو عندك ولا والد ولا ظل عم
والما يشرد من النار من النار مايسلم
وظلت بس حرم وايتام واعليها الرعب خيم
وين تروح.. كلها اجروح.. الليلة انودع السجاد
_
شبت بالمخيم نار ودار اعليكم العسكر
وما بين الزلم والخيل وين يشردن الخدر
وين اطفالكم ضاعت وزينب حافيه بالبر
ذني مخدرات حسين الله عله الخدر يستر
بين النار ..والاخطار.. الليلة انودع السجاد
____
انعادت ذكريات الطف وانت السم اخذ بحشاك
من غيرك يجاوبنه ومصايب كربله وياك
ننعه امصابك اويه حسين يالسجاد لو ننعاك
لو نذكر سبايا الشام وانته السلسله بيمناك
دمك سال.. با الغلال.. الليلة انودع السجاد
____
ايام السبي والشام ابد مافارگت بالك
عليل امگيد اعله النوگ ما واحد رحم حالك
وعينك تنضر الچتال بالذل ماخذ اعيالك
كل موقف يمر اعليك چان الموت اشوالك
همك زاد… جرحك عاد.. الليلة انودع السجاد
____
اصعب موقف المر بيك عماتك تصد ليهن
شلون ايطبن الديوان والتربان بعبيهن
شلون امخدرات حسين غربه اتعاين اعليهن
لو وياهن العباس من يگدر يحاچيهن
بلا كفال.. هذا الحال… الليلة انودع السجاد
___
وداعا سيد العباد الليلة انختمت ايامك
باچر يم رسول الله تحضر تشكي الآمك
للزهره تبث شكواك كلها لحرگت اخيامك
واثار الحبل والگيد لسه امبينه بجدامك
الكل ناداك… الله وياك.. الليلة انودع السجاد
___
الشاعر حيدر الخفاجي
/channel/aabas78
قصائد لكل ايام محرم اشترك بالقناة
حره ودروب اليسر ماتعرفلهه*اوتشوف عله الرمح راس الكفلهه
***
1 كفيلي عله النهرخليته مطروح
كطيعه اجفوف اديه اوراسه مذبوح
تعلك عا لرمح جـد امي ويلوح
عليه كل ما اصدن تطلع الروح
و ا و نن والمـدا مع دم اهلهه
*
2 مشيت اميسـره وابوليت ارجـاس
وشوف عله الرمح راسـك يعباس
انه الطولي كبل ما شا فته الناس
براضي الطف عجيبه احدودي تنداس
الزمن خان اوعليه اسيوفه سلهه
*
3 اروح اويه الغـرب ياخـويه تـرضون
ود يه امجتفا ت اعليكـم ايهـو ن
انه اختـك يابوفاضل وانسبي اشلون
الشمر ترضه الشمريحديهه الضعون
الهضم والله الهضم زينب كتلهه
**
4 الهضم زينب كتلهه الحك ياكفـال
سبا هه الطف يضيغم والحمل مال
تعا ل انضر يخويه اوشا هد الحال
سبيه عله الهزل مجتو فه بحبال
دأ جرد صا رمك وجفو في حلهه
***
5 صحت بسمك يليث الغا ضر يه
دأ جرد صا ر مك والحك عليه
ابعجل خويه ابعجل خلص السبيه
كبل لا طب لعد د يوا ن اميه
تعا ل ا وز لزل ا لشا م ابهلهه
****
6 اذا يو صل خبر عباس اجاني
اويصيح انه الكفل زينب تراني
اذا بيكم زلم بس خل تتا ني
يموت اوتنخطف روحه السباني
الزلم تلزم سره اوتنطر اجلهه
***
الشاعر حكيم الفرطوسي
/channel/aabas78
قصائد لكل ايام محرم اشترك بالقناة
معانات السبي
آه يا نوگ السبي منهن متت
مرمرنّي والشمر بـيهـن يعـت
يا كفيلي ياكفيلي
_
عل هزيله والدرب كلّه اون
الناگه حنت والشمر لا ما يحن
يبو فاضل روحي انسحنت سحن
اعتب اعله الروس واعيوني تكت
يا كفيلي ياكفيلي
_
خويه حداي الضعن مابي رحم
اتگول يطلبني ابطلب مني انتقم
لو گلتله الحبل انزف منه دم
ايشده زايد هيچي حادي ماشفت
يا كفيلي ياكفيلي
_
امن الصبح لـ الليل نمشي اويه الرماح
او لو گلتله اسويعه خلنه نستراح
ابسوطه ايزود جراحي اعله الجراح
امن البواچي ياگمر عيني انعمت
يا كفيلي ياكفيلي
_
لحد باب الشام واحنه امچتفات
حافيات امحرگات امعذبات
الگينه عند الشام عيد او غانيات
او دگت اطبول الذي الچبدي تفت
يا كفيلي ياكفيلي
_
التمت اعلينه الشماته ضاحكين
اولايه ما بيها ابد واحد حنين
كلها تنشد عني وين اخت الحسين
وانه ياخويه ابعباتي چلبت
يا كفيلي ياكفيلي
_
وين اروح الشام ما بيها امان
عصي واحجار انضرب من كل مچان
آخ يا خويه اشلعب بيه الزمان
ريتني ابدالك على الشاطي طحت
يا كفيلي ياكفيلي
_
ابو فاطمة الطائي
/channel/aabas78
قصائد لكل ايام محرم اشترك بالقناة
يالراسك براس الرمح .. يسبوني لو طر الصبح
جابوها هزلـه ناگـتي.. ونزلت هـظيمه دمعـتي
يالراسك براس الرمح
…………………………
يل عالرمح راسك عله .. وجـثتك رميه مفصله
ودم يجري نحرك
جابولي يحسين الهزل .. وباچر يچتفوني بحبل
ويسبـونـه خـدرك
لمن طحت مذبوح بالطف عطشان
بخـيمنه اجـو شبـو يخويه النـيران
وما النه والي بهل عرب بس نسوان
يتمـرجـل علـينه غـده ياهـو الچـان
الچنت اني هيبه وانحشم .. فرجه اصبحت بين الزلم
ياوسفه من عگب اخوتي .. ونزلت هـظيمه دمعـتي
يالراسك براس الرمح
…………………………
عيني التشوفك منصرع .. عاميها يحسين الدمع
واني غريـبه
اني الچنت ام الخدر .. يضحك علي تالي الشمر
والله مصيبه
يبـن امـي دارت والوكـت بـيه انــدار
خـلـوني اركـض حـافـية فـوگ النـار
اخـيالـي مـا شافـه گـبل حـتى الجــار
وتالي انكشف طولي وتصدلي الانظـار
بين الزلم طولي وگـف .. من المستحه وجهي نشف
كـتلـتني خويه حرگـتي .. ونزلت هـظيمه دمعـتي
يالراسك براس الرمح
…………………………
باچر يروحي اطلع سبي .. والشمس تحرگ بالعبي
ابـلايــه هــودج
كـلش طويله رحلـتي .. وهزلـه ونحـيله ناگـتي
ومن تمشي تعرج
الناگـه هزلـه وعـرجـه وتـعـذبـنـي
خـطـوات تمشـي بـيـه وتطيحـني
وما تحـمـل الناگـه نيـاحـي وونـي
وگامت تون وي وني من تسمعني
ياريت يم جسمك متت .. ولا عالهزل خويه اركبت
عالهزله تصعب رحلـتي .. ونزلت هـظيمه دمعـتي
يالراسك براس الرمح
…………………………
وذاك الدرب ما ينحـمل .. مچـتوفـه واني عالهـزل
لـو مالـت اوگــع
بمتوني كل ذاك الضرب .. يشتموني ياخويه الغرب
واسكت من اسمع
الممشه وي غـربه يخويه قاسي
يشتمون امي واني اهبط راسي
واعيوني يجـرن وانظر العباسي
ويغمـض عيونه الكـفل نوماسي
وبعـيونـه اليـه يعـتـذر .. ويهـزلي راسه المنفـطر
ويگـلي شوفي حالتي .. ونزلت هـظيمه دمعـتي
يالراسك براس الرمح
…………………………
وي الشامت الممشه صعب .. شتم وضرب كل الدرب
واني الجليله
والراسك امشي والتفت .. ساعه ومن الناگه طحت
تميل الهزيله
يـاخـويـه عـذبـنـي تــره هـذا الحــال
من الناگـه اوگـع خويـه لو حملي مال
وابرگـبـتـي وبأيـدي مشـدوده احبـال
وحرمه اني خويه امشي ما بين ارجال
ياريت وافـاني الاجـل .. بالطـف ولا هـذا الحصل
ياخويه تهـظم غربتي .. ونزلت هـظيمه دمعـتي
يالراسك براس الرمح
…………………………
اني العفيفه امخدره .. ديوان اطب باچر تره
بين الشماته
ويزيد ينظرلي بفرح .. وحسينچ ايگلي انذبح
وهايه خواته
جايبـهـن بنـص القـصر مچـتوفـات
وذنـي بنـات حسينـكـم مـرعـوبـات
ويگـلي عباسـچ يزينـب هـم مــات
بنص القصر تضحگ علينه الشمات
ويكـتلـني ياخويه القـهر .. من يجلـد بعـوده الـثغـر
وعوفـه اگـله بصرخـتي .. ونزلت هـظيمه دمعـتي
يالراسك براس الرمح
الشاعر عقيل الحسناوي..
/channel/aabas78
قصائد لكل ايام محرم اشترك بالقناة
يابو فاضل غالي انته
راسك اتحاشه نظرته
وجهي عن راسك اديره
لاتشوف اختك اسيره
يابو فاضل
+++++++++
الدرب كل وكت
عليك التفت
اعيونك ماتفارگ عيني لحظه شفت
الوجه موزعل
اديره خجل
ولو مجبوره بس كلفه هزيله اصعدت
كلشي واضح للاسف ماگادره اخفيه
اخفي دمعي بس حبل ايدي اشيغطيه
املزمه حدبة ناگتي طول الدرب ذاك
ماكو هودج وانجبر مگفاها اگض بيه
اچفوفي طبعت بالهزيله
وگعت الحرمه ثجيله
تِعرِف ابعمري چبيره
لاتشوف اختك اسيره
+++++++++
دليلي يدگ
احن واختنگ
عليك وانته عباس الهوى الينشهگ
ابخيالي الِم
واعيشك حلم
ويطشر صفنتي السوط ونرد نفترگ
حته لو وكت الصلا شالوها لحبال
عن يساري يِمِنـِتي ماترضه تنشال
والمشاعر يالگمر تحچيها لچفوف
امجرّحات اتيمم وتلچمها الارمال
وبدعائي ارفع اديه
امن الرمح تنظر عليه
بالحرم اگعد لخيره
لاتشوف اختك اسيره
++++++++++
المسه من يجن
عليكم احن
حرام الچانت اعيون تسلهم جفن
ليالي السفره
ونين وسهر
كل ما لامس الگاع انلچملي متن
اغفه گعده المشكله واتمايل شلون
الا انام امفتّحه ماسدها لعيون
اعليه تلتم الحرم يجمعهن الخوف
والحرس داير مدايرنه يطوفون
اشلون نومتها الحراير
والحرس داير مداير
امنين ماصدلها حيره
لاتشوف اختك اسيره
+++++++++
الفجر من يحل
الاگي ام طفل
الابنها بالهوى اتلولي وبديها الحبل
تجي كل صبح
تهز بالرمح
علت شمس الله يُمه اگعد صباح النبل
انزل انزل يالولد وبحضني اخليك
ضامي بعدك بالدمع يوليدي ارويك
لا فياي اولا منام ولا ضگت زاد
ما فتر وني ابد يمدلل اعليك
كلها تسأل ياهي هايه
الصارت بلون العبايه
من شمس حر الظهيره
وجهي عن راسك اديره
++++++++
گضيت الدرب
وبديت اقترب
مكتض مدخل الشام ابعيون الغرب
لويـن اتجه
وادير الوجه
وآنه بكل جها منها يجيني ضرب
ناگه عن ناگه مسافه مشّوا النوگ
وحده وحده بالاسم دخلونه للسوگ
بيش اصده امچتفه وهواي الاحجار
واكثر الاذّاني ذاك اليرمي من فوگ
اخته صاحو عذبوها
هاكثر تشبه لخوها
ودي التم ابحصيره
لاتشوف اختك اسيره
+++++++
المهم والاهم
واشدهن الم
زادت ناري بالشام اعله نار الخيم
حلم لواعلم
اعله مجلس زلم
افوت وبيده يحرگ گلبي شال العالم
الما قصدني والقصد اذتني الانظار
واحد لواحد همس من اقترب صار
هاذي اسمعهم اخت عباس وحسين
عدله ماماتت قهر وانه اشتعل نار
من اجه شايل عصاته
وراسك ايدير التفاته
بعده راسك كله غيره
وجهي عن راسك اديره
الشاعر ثائر الربيعي
/channel/aabas78
قصائد لكل ايام محرم اشترك بالقناة
حچه السوط بـس الحچي مصيبه
حچه السوط شـمـسـوي بالغريبه
مــاينحسب حـزنها
جروح انترس متنها
حچه السوط
حچه السوط
****
بــديــوان المتون الـسـوط حچاي
وبـدرب الـسـبـايه الـشـمـر حداي
يكول الـسـوط ياهو يسولف اوياي
وأنـا البمتون زينب سـولف اهواي
بالمتون لسه الأثـر يسولف
بالمتون المنچف يـشـاگف
يـنـزف حزن جفنها
جروح انترس متنها
حچه السوط
حچه السوط
****
انا السـوط الچنت بچفوف الأوثان
وطـاحـت بين إديـهـم ضوه القرآن
قليله بحقها لـــو گـلـت أم الأحزان
زينب أم أخـوهــا الـمـات عطشان
بلا اخوان خـدر الـعـلي وغـلاته
بلا اخوان ماترحم الشماته
عيون الحجر بچنها
جروح انترس متنها
حچه السوط
حچه السوط
****
أول ســوط إجــاهــا إبين المتون
والـثـانـي إجــاهـــا إبـيـن العيون
ويـن إخـوتها چــا يـمـتـه يفزعون
هاي أم عــون منهم رادت العون
السياط مـن كل كتر إجتها
السياط مثل الجمر چوتها
ماتت اوعدلت چنها
جـروح انترس متنها
حچه السوط
حچه السوط
****
مـن طــاح الكمر وحسـين يـاناس
مـاظـل سـوط ماطگ اخت عباس
وأنا السوط الچبير المالي مقياس
مـو بـمـتـونـهـا اتـبـديـت عالراس
على الراس اشكد ضَربت الحره
على الراس إچفوفها المنگسره
يـسـجـد الون لونها
جروح انترس متنها
حچه السوط
حچه السوط
****
من الـطـف لقصر الشام شمات
ونـسـوان الهواشم يمشن آهات
وأنا سوط بمتنهن صرت لچمات
أفــز او أغـفـه بـمـتـون السبيات
تره السوط مثل السيوف التلمع
تره السوط يذبح ذبـح من يلسع
تراب الـيـسـر دفنها
جـروح انترس متنها
حچه السوط
حچه السوط
****
تصيح الغوث مـن السوط أم عون
يخوتي شلون عن أم عــون ترحون
خـلـيـتـوني بـيـن الـمـايــرحـمـون
ومـن الـسـوط مـاظلت إلي امتون
يهلها درب اليسر عـذبها
يهلها شمر الخنه دولبها
فر الـدنـيـا بضعنها
جروح انترس متنها
حچه السوط
حچه السوط
****
الـمـوت امـن إجـاهــا تـمـنـت إثنين
يـحـضـر مـــوتـهـا العباس وحســين
غريـبـه أم عــون ظـلـت حـتـه بالبين
اعلى درب إخوتها اشكد شبحت العين
مِن الشام للطف دارت نظرتها
إلى الشام هلبت يجون إخوتها
شيگطعه منهم ظنها
جروح انـتـرس متنها
حچه السوط
حچه السوط
****
الشاعر سليم الغزالي
/channel/aabas78
قصائد لكل ايام محرم اشترك بالقناة
بين ناگه وناگه طايحلي طفل
شلون المهم وانه بجفوفي حبل
حايره بظعن السبايه
الحادي مشانه عله رايه
بين خطوات السبيايه وبين حسرات الزغار
كمت اشوفن جثه ميته وخيمه تلهب بيهه نار
وظعن يمشي بليه والي وما تلمنه بغربه دار
الطايح يجره حبلهم واليموت بلايه ثار
ايتام محتاره نسبينه
وساتره علينه عبينه
وحرم نمشي بلا حمايه
الحادي مشانه عله رايه
بعيني اشوف الناكه تعثر بلجثث طول الدرب
ترفه يجفوف اليتامه منلحبل دم وتصب
واليطيح السوط لاحه ويمشي بلكوه وغصب
حيره محتاره بزماني وحيده مابين الغرب
خلاف خوتي تحيرت
ريت وياهم متت
ولاشفت هاي الرزايه
الحادي مشانه عله رايه
شفت ظحكات الشماته شلون من يبجي طفل
الحرم تصرخ كافي ارحمه الحادي ويجر بلحبل
يصيح يسكت لا اذبحه تعوديتو عله الكتل
عيرانه بامر هين هل الامر كلش سهل
عيرونه بهل امر
مادرو نفدي العمر
ولا نهاب احنه المنايه
الحادي مشانه عله رايه
كمت اباوع علحوافر خاف تسحگ بليطيح
بدمع خلص نهاري بين غربه شلون اصيح
صرنه مثل السعفه تهتز منين ما طكاهه ريح
وعمده ماخلونه نوكف خاف نوكف نستريح
ماكو راحئ من دمع
وگلب بلهم منفجع
والحزن صار انه غايه
الحادي مشانه عله رايه
بعد ابو اليمه وكفيلي تعذبت هذا العذاب
لا لي اول لالي تالي حسين نايم عل تراب
وگظي يومي عله الهزيله ابجي ولهذا المصاب
الطفل لو يعرف حزنه وراسه گبل ايامه شاب
همومنه تشيب الجنين
راح من عدنه الحنين
وهاي صارتلي النهايه
الحادي مشانه عله رايه
ابو سلام الجابري
/channel/aabas78
قصائد لكل ايام محرم اشترك بالقناة
اشحال زينب من عگب وليانهه
الكون كله ما يسع لحزانهه
=========================================
اشگال گلبچ يلعقيله الطاهره
من عله الهزل خذوچ ميسره
وبين حالچ واليتامه محيره
والعبي تتلاهب بنيرانهه
اشحال زينب من عگب وليانهه
=========================================
اشجره بحالج زينب بليل اهدعش
وعالثره تشوفين مرمي اچم نعش
واليتامه اگبالچ اصيح العطش
والوجوهه اتغيرت الوانهه
اشحال زينب من عگب وليانهه
========================================
شلون كملتي المسير بلا ولي
وياجرح اذاچ من صحتي علي
وگامت اچفوفچ مدامع تنملي
وچفة همومج ثگل ميزانهه
اشحال زينب من عگب وليانهه
========================================
شحال گلبج من تذكرين الخيم
والشريعه والچفوف وي العلم
والعمود الصاب هامه والسهم
والاطفال المحترگ صيوانهه
اشحال زينب من عگب وليانهه
========================================
انمرد گلبج من كثر ون النحيب
لاگفيلج ظل ولا ظل الحبيب
ياهو لجروحج يصيرلهن طبيب
والمصايب شرعت بيبانهه
اشحال زينب من عگب وليانهه
=========================================
انتي مكفوله وتكفلتي بضعن
وصار گلبج موگد الكل المحن
والأحزان بخربه وياچ التقن
والدمع واضح صبح عنوانهه
اشحال زينب من عگب وليانهه
========================================
الشاعر احسان الحميداوي
/channel/aabas78
قصائد لكل ايام محرم اشترك بالقناة
شدي حيلج للسبي. يله يابنت النبي
راح عباس يزينـب راح عباس
"""""""""""""""""""""""""""""""""""""""""""""""""""
كلــهه راحــت يالغريبه ومابـگو عـدچ زلم
يرجع العبــاس أيـسي هاذ يــازينب حـلم
شگد هضيمه اطش بناتج والشمربيهن يلم
عالهزل من نينوى. *** للسفر تمشن سوى
ماله مقياس حزنچن ماله ماله مقياس
راح عــــباس يـــزينـب راح عـــــباس
"""""""""""""""""""""""""""""""""""""""""""""""""""
راح أبــو فاضـــل يزينب حضري نفسج للدرب
تبـدي من هسـه الشـماتة اعليج زينب بالضرب
حسين خلصت حربه لاكن أنتي كل عمرج حرب
گومي شدي همتج. **** صعبه زينب سفرتج
تلتم الناس عليچن تلتم الناس
راح عباس يزينـب راح عباس
"""""""""""""""""""""""""""""""""""""""""""""""""""
تبدي قصتج من بعدهم يالغريبه ابلا اهل
شلون تتحملين واحد يشتم بجدج يضل
بيـش تتنخين وحدج راح عــــباس الفحل
حيره والوادم غرب. **** سفره وبعيد الدرب
تشيب الراس مصيبه تشيب الراس
راح عــــباس يزينـب راح عـــــباس
"""""""""""""""""""""""""""""""""""""""""""""""""""
راح يازينب دلالج راحن ايامه وگضن
مدللاتك يالعفتني بنار الخيام اركضن
هم ترد ياخويه ليه انتضر لوماكو ضن
تگلي چنت ادللي. **** خويه يبنيت علي
اعداك حراس يخويه اعداك حراس
راح عـــــباس يزينـب راح عـــباس
"""""""""""""""""""""""""""""""""""""""""""""""""""
صعدوني اع الهزيله ومدري المن هاجرو
الف خاطر بيه كسرو من خذوني وسافرو
كلهم يضـحكون يمي بحال زيـــنب مادرو
ريتك تشوف العده. **** والشمر لمن حده
بيه ضاگت من خذوني خويه الأنفاس
راح عــــباس يزينـــب راح عـــــــباس
"""""""""""""""""""""""""""""""""""""""""""""""""""
خـادِمْ زَيِنَبْ«عَلَيِها السَلام»
الشاعر مســلم السّـرْاي
/channel/aabas78
قصائد لكل ايام محرم اشترك بالقناة
بعد أن ودّعت مولاتي زينب عليها السلام كربلاء قالت :-
ودِّعَتهم وابتدت أحزانها ... فارِگتهم والصبر عنوانها
...........................................................................................
چن قرائين وعلت فوگ الرماح
چم عزيز وغالي من الحرّه راح
راح بدر الگوم وي شمس الصباح
دم بچت حتى السمه وأكوانها
...........................................................................................
يا صبر يوصل صبر أم الصبر
تمحّنت بهموم أيام العسر
بت علي وتنگاد بدروب اليسر
تنسبي ومتغرّبه اعله أوطانها
...........................................................................................
تنسبي وأحـــزان مهـجــتها تزيد
شما تصد بعيونها الراس الشهيد
والكــفـلـها يا طــلــب منّــه تريد
تنوح من يلهج بأسمه السانها
...........................................................................................
اشتطلبْ وفوگ الرمح راس الكفيل
وهيه ما عدها بعد بس العليل
صابره وهَمّ السبي كلش ثگيل
لاح مهجتها وخطف ألوانها
...........................................................................................
زينب الوصلت أميره الكربله
وچانت بعهد الكفاله امدلّــلــه
تروح مسبيّه وچبيره المعضله
والشماته من طبع عدوانها
...........................................................................................
شافت هموم وقهر من الأيام
والدهر لا ما نصف مو عالمَرام
يا جفن عدها بعد يرضه ينام
اتجرّحت من الدمع أجفانها
...........................................................................................
آه من حسراتها وهذا العذاب
بكربله تعوف البواسل عالتراب
يا مصاب الأشد من هذا المصاب
تدعي ربنا يقبل بقربانها
...........................................................................................
خادم الإمام الحسين عليه السلام
عمار هليل الواسطي
/channel/aabas78
قصائد لكل ايام محرم اشترك بالقناة
يالتناشِد عالعقيله اشلونها
اتغيَّر ابطف النوايب لونها
عن وضعهه اتخيَّل ابعين العَقِل
من عگب وليانهه الخلصو چتل
ادموعها اعله حسين والكافل تِهل
وخُوَت من كثر البواچي اعيونها
اشتحسب امن اجروح زينب واشتِعِد
بعدما بالطف گضت أهل المجد
للسبي وذيچ المخاطر تستعد
او وسفه بنت المرتضى يسبونها
آه من درب السبي وضيم اليسر
ابگلب زين اعبادها يسعر جمر
ايشوف عمته اخلاف عباس البدر
تالي ضل يحدي الشمر بضعونها
چلمة البويه وهَله ويَمدَلِّله
هاي كلهه غابت ابطف كربله
ضلَّت ابكيف الشماته العايله
والحچايه التذبح ايسَمعُونها
اتلاثه واثمانين لوعه امن الضِّمَه
والشفاه الصارت ابلون السِّمه
چم مصيبه العَذِّبَت بِت فاطمه
اشصار بيهه الباري كان ابعونها
يكسر الخاطر ضعن بيت الإبَه
ابگاع صَحره والوجوه امترِّبَه
روس اهلهه اعله الرماح امخضِّبه
والشماته عَمداً ايهزُّونها
ابكربله وبالكوفه والشام الجره
خَلَّه نيران الگلوب اموجَّره
نبقى نبچي وننحب البت حيدره
والخَدَم كل مآتم ايواسونها
سيد علي الموسوي
/channel/aabas78
قصائد لكل ايام محرم اشترك بالقناة
وانه مجـتوفه قريت الفاتحه
من رخصـتك ياابوفاضـل رايحـه
———
من رخصتك هاي اول مـره اعـوفـك
من رخصتك هاي اخره مـره اشوفـك
العشره ماگطعوها من گطعو چفوفك
أنـت جرحي وأنه أحـبك - ما أروفـك
الدنيا حلوه وانته يمي البارحه
من رخصتك ياابوفاضل رايـحه
——-
طـشروك اوصله وصله اعليه عينك
كلشي مات وبعده ماميـت حنيـنك
گمت اكضن گلبي لو سألوني وينك
الدنيا ثگلت ياابوفاضل مـد يميـنك
بالمصايب خويه عيني امصابحه
من رخصتك ياابوفاضل رايـحه
الوداع - الوداع
——
غربه خويه اوين اروحن ضمني يمك
حيره الــمن بالـيــتـامـه لـو ألـمـك
حتـه أشدن حيلي خويه أذكر اسمك
ياجبل شو باقي هسه اشويه جسمك
چان راسك غيم يحلم لايـحـه
من رخصتك ياابوفاضل رايـحه
———
انطـونـه ماي ومانريده ابلايه وجهك
ابــلايه راس ولا چفـوف وما أتـيهـك
أنـت واحد مـاكـو بالـدنـيا اليشبهك
الخيل تركض وانت ميت جيت انبـهك
بعيني خوف ودمعه كلش واضحه
من رخصتك ياابوفاضل رايـحـه
الشاعر حيدر العماري
/channel/aabas78
قصائد لكل ايام محرم اشترك بالقناة
مــا بيـــن آيـــــات القـــــرآن
بوَنـَّــت سَجـــــــده .. وحَسـرت ركعــه * السبحه تـواســي التـُربـــه بـــدمعـــــه
وإتــلاطـــم مـوج الإحــــزان
مــا بيـــن آيـــــات القـــــرآن
عـالسجــاد عـالسجــاد * عـالسجــاد عـالسجــاد
ــــــــــــــــــــــــ
سَجــدَت لـيـل إبمجــره المـدمـــع
ودلال إصبــــح للهــــم مَــرتــــع
عالبالطف شـاهَــد ﭽَــم مَصـــرع
بالسَــم ﭼـبــــده اليــــوم إتـﮕطــع
نـــــاح الـديــــن الإجلــــه وشــرعـــه ... السبحه تـواســي التـُربـــه بـــدمعـــــه
وإتـــــوذر ﭼَبــــد التبيـــــــان * مــا بيـــن آيـــــات القـــــرآن
ـــــــــــــــــــــــــ
ركعــة هَــم مـكسـورة خـاطــــر
تبـﭼـي الفــﮕدك يـابـو الــبـاقــــر
منتظـــره الجيتــــك وتنــاطـــــر
يمتـه إلـهـا إتـرد هـا يَمســافــــر
البتــرابــــه إتلـَحـــــد شيــــرجعـــــــه ... السبحه تـواســي التـُربـــه بـــدمعـــــه
السجــاد إفــراشــه التـربـــان * مــا بيـــن آيـــــات القـــــرآن
ـــــــــــــــــــــــــ
سبحــت ﭼــف ينـــزف مَـدمعهــا
راح الـﭼــف إو مــا وَدعهــــــــا
تصـــرخ يـالسَجــــاد إسمعهـــــا
فــــﮕدك مـــولاي إمــروعهــــــا
ملهــوفــه الـهـالـﭼــف والصبعـــــــــه ... السبحه تـواســي التـُربـــه بـــدمعـــــه
يبـن الـراسـه تعـالـى الــــزان * مــا بيـــن آيـــــات القـــــرآن
ـــــــــــــــــــــــــ
والسَجــده إحــــا آ يــالسَجـــــده
ملهـوفــه إعلـه جبينــــه وخـــــده
نــاحــت لمـــن شـافــــت ﭼبــــده
والسَـــم بحشــــا مَـــر وتعَــــــده
حــارت لمـــن شـــافــت وَضعـــــــه ... السبحه تـواســي التـُربـــه بـــدمعـــــه
منتظــــره إيـــــرد وَيِّ لاذان * مــا بيـــن آيـــــات القـــــرآن
ـــــــــــــــــــــــــ
التـربــه تنــوح وتصــرخ وينـــك
يـالـواريـــت بحظنـــي حسينـــــك
مشتــاﮔــــه الإنــــوار جبينـــــــك
مشتــــاﮔــــه اتقُبـــــــل ﭼفينــــــك
يـا مَـــن بيــك العـــــز والــرفعــــــه ... السبحه تـواســي التـُربـــه بـــدمعـــــه
يــا نــور إو وجــه الرحمـــن * مــا بيـــن آيـــــات القـــــرآن
ـــــــــــــــــــــــــ
والسجــــاده إبـدمعــه تنـــاشـــــــد
وينـــك يـالنـــاسِــك والــعــابــــــد
وينـــك يـالــراكــع والســــاجـــــد
رحـــت وما ﭼـــن راح إتعــــــاود
ويــــن النـــــور وذيــــــﭻ الطلعـــــــه ... السبحه تـواســي التـُربـــه بـــدمعـــــه
يـالكلـــك غيــــره وإحســــان * مــا بيـــن آيـــــات القـــــرآن
الشاعر كريم الحاج فليح
/channel/aabas78
قصائد لكل ايام محرم اشترك بالقناة
نعزي حسين بالســجـــاد ومــصابه
عليه للموت دمعة عـــــينه سچـابه
آه اعليك يامظلوم آه اعليك يامظلوم
***
عــــــلي السجاد من بعدك يـبواليمه
هوه احزانك نَفس وبــنوحه يشتمه
ماكفـــــت دمعته وفـــــارگ البسمه
حزينه ارسوم وجهه وحزنه جلبابه
آه اعليك يامظلوم آه اعليك يامظلوم
***
حياته من عگب عاشور صح وحده
بس بــــيهه عـــــوالم منهن السجده
وعــــالَم لهــــــفة الدمعه على خده
يتم فـــــرض الصلا ويبچي محرابه
آه اعليك يامظلوم آه اعليك يامظلوم
صحــــــيفه للدعا دونهـه بچـفوفه
باسمه اتســــمت وللناس معــروفه
ودوّن بالنحيب المعـــــتلي اطفـوفه
والام السبي مـــــــــوجوده بكـتابه
آه اعليك يامظلوم آه اعليك يامظلوم
***
منه ابحسره تسمع چلـــمه آه الشام
سِبت روحه وجروحه اتخيطت بالام
الخدر زينب ينــــــوح ولوعة الأيتام
ورقيه اهــــناك ماتت زادت اصوابه
آه اعليك يامظلوم آه اعليك يامظلوم
***
عله افراش المنــيه وتهمل ادموعه
ألم من صدرك المهشوم بضـــلوعه
وبگلبه الگطِع نحرك ألـــــف لوعه
نــــظرخـــــدك وشيبك فوگ لترابه
آه اعليك يامظلوم آه اعليك يامظلوم
***
چبدته اتگطــعت عگب الهظم بالـسم
وامصــابه عله امصاب الطفوف التم
واشد مــــن جمرة السم نار المْخـيّم
لأن زينب تچـــــــــوّت بيهه واحبابه
آه اعليك يامظلوم آه اعليك يامظلوم
***
تمت بفضل الله وتوفيقه والحمدلله رب العالمين
وصلى الله على محمدٍوال محمدوعَجل فرجهم اللهُمَّ صلِّ على محمدٍوالِ محمدوعَجل فرجهم
حيدركريم جارالله الكربلائي
/channel/aabas78
قصائد لكل ايام محرم اشترك بالقناة
جرّعك سم الحـــــــزن درب السبي
وجــــــــرّح ابگلبك يبن سبط النبي
***
اشگد بچـــــيت ابين عاشور وصفر
او يـــــــوم منهن عندك أيـعادل دهر
يعني گلـــــــبك يالعــليل اشگـد صبر
موغــــــــــريبه صبرك وطـبعك أبي
***
عـــــــاشر ابعاشور بضلوعك رمح
وبالسبي كل خــــطوه چانتلك جرح
وچـــــــــلمت الشمات اشـبه بالملح
ال امـــــيه وبـــــــين اديهــه طالبي
***
عينك اتشـــــوف العــقيله بيـاوضع
وكـــــــــل يتيم اتصدله گلبك ينفجع
لـــــو وگع من ناگته ايرضلك ضلع
وعلــــــــه خدك دمعتك تحبي حبي
***
تشكي من علّه وهـــــــزيله ناگــــتك
هواي صعبه اعله الأرض لوطيحِتك
شالت احزان الــــــدهر من شـــالتك
وبيك يحـــــدي بالـــبـراري الأجـنبي
***
مــــاطحت مـــــــن ناگتك لاماطحـِت
وبـــــيتامه ازغـــــــار يامه حسـبِت
لارقـــــيه اتطيـــــح من هايه خــفِت
بسوطه خـاف ايردهه چف الناصبي
***
ابكــــــــربله حــيلك الف مره انهدم
وچتــــــفك درب السبي بحــبل الألم
وگلـــبك المجــــــروح بالشـام الچم
اشگد صحــت إلهه يروحي اتأهبي
***
تمت بفضل الله وتوفيقه والحمدلله رب العالمين
حيدركريم جارالله الكربلائي
/channel/aabas78
قصائد لكل ايام محرم اشترك بالقناة
عمتنه رايه وتمشي گدام
وما حسستنه بحرگ الخيام
طول الدرب لمن مشينه چن خيمه وتظلل علينه
احنه من نمشي ويه زينب،، لا تسمينه يتامه
هيه امنه وهيه ابونه،، وهيه عباس وحسامه
ادت الدور بجداره،، وخيمه چانت عاالامامه
اسره لكن هيه گدرت،، الاسر تگلب نظامه
رغم الالم وفراگ الحسين،، بس وعلي شالتنه باالعين
ونذهلت احبال البدينه،، چن خيمه وتظلل علينه
تعجبت من هاالاراده،، حته القيود البديهه
والحبل صبح ومسيه،، يصلي ويسلم عليهه
هيه طف ثاني العقيله،، وبتده بساعة سبيهه
من كثر مابيها هيبه،، چنها ابو فاضل وليهه
چنهه علي من هدم الات،،بس هيه حمزه تصير مرات
تسطر عدوها وتطفي عينه چن خيمه وتضلل علينه
مالمسنه الگاع مره هيه شالتنه بچفنهه
واحنه كل معنه الشجاعه والابه تعلمنه منهه
انه الحره هاشميه هاذي نغمتهه ولحنهه
كل دواوين الاميه من حچت ضمت لسنهه
وفايه والكافلهه وفاي كلما عطشنه تحولت ماي
تمطر محنه لو ضمينه چن خيمه وتضلل علينه
خيمه لو گلنه قليله هيه چانت كلشي هيه
چن علي لمرحب تقدم هيچ من طلعت سبيه
هيه عمتنه العظيمه شويه لو گلنه الابيه
الستر يمهه يصلي والشرف ياخذ تحيه
ام العفاف وام الحجاب بيه نفتخر لوسمها ينجاب
عن الاهل لو ناشدينه چن خيمه وتظلل علينه
**
الهوه مرات يوگف يمنه يصفن عاالعنايه
عمره ماشايف سبيه هيچ تعطف عاالسبايه
مره ذوالفقار تصبح مره تصبح هيه رايه
چن کتاب الله العقيله وحفضت اشچم ايه بايه
مادنگت لو هبطت هام رغم المأسي وذيچ الايام
كعبه وعليها اتجمعينه چن خيمه وتظلل علينه
الشاعر سعد العبودي
/channel/aabas78
قصائد لكل ايام محرم اشترك بالقناة
ليل وسبي واحزان........نشوف الرمح قران
قرأ بجرحه........وكتب رمحه
يبقى الحزن عنوان
»»»»»»»»»»»»»»»»»»»»»»»»»»»»»»»
1️⃣
قـصـة تـجرح......من مصايب كربله اقراها
الدمعه تشرح......وكل مسيه انعيش وياها
~~~
طول الـدرب راسـك امان اعـله الرمح
وهنيالي...الغالي...اكبالي...لحد الصبح
~~~
واشواك روحي اتزيد لحظات
واشعر واكول حسين ما مات
~~~
عاش الرمح وياي......بطول المسيره فياي
انكسر حاله.....عله عياله
من ماتت الالوان
»»»»»»»»»»»»»»»»»»»»»»»»»»»»»
2️⃣
رمحه عالي.......وجانت احزان الكلب ديره
يبجي حالي.....راسه كل لحضه بقه يديره
~~~
بعيـنه الحجي ما ينحجي يـطـيح بـدمع
وبراسه...احساسه...انفاسه...شما نستمع
~~~
ونفهم كلامك شنهو مقصود
هـالرمح رايه نرفـعت ابـزود
~~~
راية حرب هلراس..بس ماكو جف عباس
النصر قادم....ابخدر هاشم
وقادة حرب نسوان
»»»»»»»»»»»»»»»»»»»»»»»»»»»»»
3️⃣
الديره ظلمه.....ونكعد ابصف الرمح دمعه
نعيش هضمه....يمنه راسك يشبه الشمعه
~~~
نـشـوفك ضوه ضل يقرا بأيات الـكهف
ويلمنه...بهمنه...ويمنه...وكلشي اختلف
~~~
يهضمنا جرحك والحجي هواي
ومـن يــوم عـاشـر نكـره المـاي
~~
نرض الجسد بالخيل....والدنيا صارت ليل
عله وضعه.....جره دمعه
يا وسفه ضل عريان
»»»»»»»»»»»»»»»»»»»»»»»»»»»»»
4️⃣
الـشوك يكـثر.......كون راسك نكدر انلوحه
جرحي خضر..علگت روحي بطرف روحه
~~~
يديـر الوجه وما غمض اجفونه ويحن
ابجيله...احجيله...اشكيله...بنبرة حزن
~~~
ويـعثر طـفـلنا ويلـزم الـثـوب
ويطمنه صوتك وكت الغروب
~~~
ومن تسكت الأيتام.....وتفرش حزنها تنام
سوه تمشي....سوه كلشي
من تدخل الاوطان
»»»»»»»»»»»»»»»»»»»»»»»»»»»»»
5️⃣
روحي تطلع....امشي مسبيه شكثر صعبه
بنبره اسمع......باقي الحسين وبقت حربه
~~~
رأسه نرفع بس انحسب راية حـرب
منصور..بدوره..بنوره...بطول الدرب
~~~
ما تمحي ذكره وباقي منصور
كل يوم عـدنا انشوفه عـاشور
~~~
عالي الوكت خلاك...فوك الشمس علاك
بقه عالي..........بقه غالي
بعرش الزمن سلطان
»»»»»»»»»»»»»»»»»»»»»»»»»»»»»»»
محمد خشان ✍️.
»»»»»»»»»»»»»»»»»»»»»»»»»»»»»
/channel/aabas78
قصائد لكل ايام محرم اشترك بالقناة
زينب و خزرة علي بعيونها
شلون اصدّكَ وادم يضربونها
==================
زينب المحد وصــــل لترابها
رغم عملة كربــــلا و مصابها
لبوة ضلت والجيوش تهابها
اخت عباس العده يسمونها
==================
هيبة عدها ماوكَع منها الخدر
صح سبوها لكن بكل الستر
ومحد المد ايده ليها باليسر
هية لبــــــوة و كلهم يهابونها
==================
حفظت السجاد بالطف من حضر
واليتامى تلوذ بيها من الخطر
الها جم موقف بقه بطول الدهر
هالمواقف كــــــون ما تنسونها
===================
وكفت ابوجه الرجس بالموزمه
حين راد اسكينة عنده خادمة
وخرست افواه الزلم و الضالمه
ثورة من تحجي تره يعرفونها
==================
اجت قصر الكوفة بيت الضالمين
الخطبة جانت مثل صولات الحسين
هاذي كالوا بت امير المؤمنين
كون اميــــــرة لازم اتنادونها
==================
الها خطبة بمجلس الطاغي يزيد
ما نطخ الراس كالت كالعبيد
بكربلا اعليك انتصر نحر الشهيد
و انه اذلّك جيت يا فرعونها
===================
حسين ياهو الكال ماتت ثورته
حسين فكره و ماتموت بموتته
عكبه زينب هيه شالت رايته
ومثل اخوها ترفض ايذلونها
=================
صح مصيبتها تهد حيل الجبال
صح بجت زينب عكب ذاك الدلال
لون عالحرمه انكتب فرض القتال
تسحك اخشوم الزلم يدرونها
===================
حسن بشير السوداني
/channel/aabas78
قصائد لكل ايام محرم اشترك بالقناة
تنزل الدمعات من اجفونها
شلون أهلها بت علي يخلونها
*--------------------*----------------------*
طلعت بهيبه وعزم وليانها
الكاع ترجف من أثر خوانها
دارت الدنيا وعكس ميزانها
راحو ليوث الوغى اليحمونها
*---------------------*-----------------------*
طاحو اعله الكاع أهل المرجله
وزينب تصيح بدموع الهامله
خويه طش الظعن ما بين الفلا
وين أهلها زينب يلحكونها
*--------------------*-----------------------*
نار شبت بالخيم لهابه
جنود اجت صوب الحرم طلابه
حسين حيرني الدهر بمصابه
زينب تصيح وتدور اظعونها
*----------------------*---------------------*
زينب بليل اهدعش مهضومه
بمحنة العاشر وثكل اهمومه
حسين كل الكون ضج بيومه
واخته ثكل الكون فوك امتونها
*----------------------*----------------------*
جن عليها الليل وتسيل الدموع
ونار تسعر بقت مابين الضلوع
تنوح لخوتها المطاعين وتلوع
بهالوضع وحدها ويتركونها
*----------------------*---------------------*
الشاعر محمد دعبل النوري
/channel/aabas78
قصائد لكل ايام محرم اشترك بالقناة
ايام السبي
يالگطعو راسك والحافر داسك
من فوگ الناگه وودعتك
يالگطعو راسك
والسوط امورّم ظهر اختك
يالگطعو راسك
ــــــــــــــــــــــــــــــــــــــ
وصيتك ماأشـق جيباً .. ولا خداً عليك أخمش
بقيت ابچي ابدمع گلبي .. لحد ما أيست كلش
يحسين اثيابك بيهه ايجر الحافر
ياحافر گتله اسم الله وشنهو الصاير
ليش اتجر بيهن ذني اثياب الطاهر
تعال .. تعال
رجعلياهن بيهن عطر الزهره
خليني اشتمهن وارجع وي الذكره
ليش ايضل عاري احسين وتاكل ظهره
الرمال .. الرمال
ابذيچ الظهريه واتفزع بيه
وآنه اشلون اوصل يم جثتك
يالگطعو راسك
والسوط امورّم ظهر اختك
يالگطعو راسك
ــــــــــــــــــــــــــــــــــــــ
يمظلوم الرمح عالي .. وإديّ ماتگدر تلوحه
وحگ اعيونك اتمنه .. اموت اوياك مذبوحه
خويه وسلابي هذا اشگد متعافي
أذاني وسوطه ياكل لحم اچتافي
مايكسر گلبه حالي وجدمي الحافي
لعين .. لعين
يحسين ادخيلك الحگ زينب آنه
ذباحك سبني انزل گص السانه
امريه وبالغــربه مالي اخوان اهنانه
حسين .. حسين
اوياك شمحلاتي هسه بمئساتي
گوه اخذوني وماعايفتك
يالگطعو راسك
والسوط امورّم ظهر اختك
يالگطعو راسك
ــــــــــــــــــــــــــــــــــــــ
اسولفلك يبواليمه .. سوالف وحده مشتاگه
اذا رمحك لچم نحرك .. دشوف اشسوت الناگه
الحادي ايخوفهه وتعثر واتطيحني
ومن اوگع بالبر جيب اللي يصعدني
وآنه امريتكم والشــــامت ما يلمسني
حرام .. حرام
آنه الينظرني بس انته وعباسي
واقماش الكعبه هوه امحجب راسي
واليندگ بيه يركع جوه امداسي
احترام .. احترام
تالي العلويه صارت مسبيه
وهاي أول مره امفارگتك
يالگطعو راسك
والسوط امورّم ظهر اختك
يالگطعو راسك
ــــــــــــــــــــــــــــــــــــــ
جمعنه الحادي كل احنه .. ابخرابه او وصه حراسه
يگلهم ذاك ابو فاضل .. اضربو بالحجر راسه
جيبولي الرايه وخل نحرگ ريشاته
هذا الدوخنه وأذانه بسطراته
هسه براحتنه نشتم علوياته
يصيح .. يصيح
الچان اشمحلاته وبالغيره ايوصفونه
بالنبله وبالدم خربن هسه اعيونه
چان اسمه الكافل واليوم ايسمونه
ذبيح .. ذبيح
وآنه اتعنيته خويه وناديته
معذور الخيل امتعبتك
يالگطعو راسك
وبالسوط امورّم ظهر اختك
يالگطعو راسك
ــــــــــــــــــــــــــــــــــــــ
على باب القصر يمكن .. سبع ساعات خلونه
وقوفاً والذي يگعد .. يشتمونه ويضربونه
واتخيل حرمه وتدخل قصر الحاكم
حرمه وســووني فرجه العين الوادم
وراسك يبن امي ايضربه بعصته الظالم
يخوي .. يخوي
والطفله اتشبگك واتموت ابهالشبگه
واتگلك بابا ثغرك ياهو الطگه
فك عينك وانظر لخدودي المحترگه
يبوي .. يبوي
تتنفس نحرك واتشم بشعرك
لليوم وضلت شابگتك
يالگطعو راسك
والسوط امورّم ظهر اختك
يالگطعو راسك
الشاعر محمد الجماسي
#اللهم_عجل_لوليك_الفرج
/channel/aabas78
قصائد لكل ايام محرم اشترك بالقناة
مــن بعــد ذاك الدلال
صرت مجتوفه بحبال
وينك بوية .... تالي عمري امشي سبيه
....1....
مشه ضعن الأحزان ... خالي من الأخوان
بس غرب ويانه
تمشي ويانه الروس ... كوه عالكاع اندوس
المستحه غطانه
وين ما دير العين .... ألجثث عالصوبين
يا عظم بلوانه
والحـــرم والأطفال... امكــيديهم بحــبال
الحبل حيل اذانه
منه أدينه امجرحات
ابجرته اطيح البنات
وينك بوية .... تنظر الحالت رقية
...2...
السبي دربه اطويل ... وانه مهدودت حيل
واحنه محد لينه
تعبتني العثرات ... والهضم واللوعات
والشمر حادينه
بالشمس ماكو افياي ... واليتامه ابلا ماي
من بعد والينه
بوية يا داحي الباب ... ما رحمنه السلاب
سوطه يضرب بينه
كل متن من عدنه صار
ازرك اكبار وصغار
وينك بوية ....شفنه انواع الاذية
....3....
علي يا حامي الجار ... المر علينه ما صار
جيت الك شجايه
فكر ما ظلي وراي .. والكفلني الوفاي
ظل عالمسنايه
كطعوله الاجفوف ... والسهم باكَ الشوف
وباك جربة مايه
جيت للكوفه انخاك ... علي بوية بحماك
كوم شيل الرايه
اعليك أمشي ابن البتول
الكسرت اظلوعه الخيول
وينك بوية ... حشميتك رد عليه
.....4...
اشلون جايتني ايام .... من بعد كوفه الشام
راح تأخذ حيلي
حيرة محتاره اشلون ... والشماته ايضحكون
بعد موت اكفيلي
انطي وجهي لا وين .... من بعد موت حسين
صرت اساهر ليلي
ياعلي اجروحي اهواي ... وانت بس انت ادواي
بشده انه ادعيلي
روس اخوتي اعله الرماح
وانه مني الحيل راح
وينك بوية ..... كبرتني الغاضرية
....5....
فوك هزلات النوك ... راح اطب ذاك السوك
والدمه اعله امتوني
خارجية ايصيحون ... والاحجار ايرامون
فوك روس اضعوني
الشام الكه معيدين .... والمدينه امزينين
شلون اصبر اعيوني
بوية وانظر هالناس ... اكبال راس العباس
ابطبل يتلكوني
شامت الشامت يصيح
هاي اخت ذاك الذبيح
وينك بوية .... بساعة المحد الية
......
كلمات : موسى الخادم
/channel/aabas78
قصائد لكل ايام محرم اشترك بالقناة
اليحدي بالناكه يجر بالناكه حيل
يريـد زينب تـوكـع كـبـــال الكـفـيل
تمشي يمه بلا عبايه
هيـج جان اباله غايه
يريـد زينب تـوكـع كـبـــال الكـفـيل~~1
~
اليحدي بالنــاكه يعــالم جـــان همه
عالنهر يسبي العقيـــلة بلايه رحمه
يكلها يا بت فـــاطــمة اي والله زحمه
الالج دك صـدره غرك بدمومه جسمه
يمـــه اخوها تمشي راد بلا حـجاب
حتـــى بينـه وبينــها يطول العتاب
تكله ألك جبت السبابه
هيـج جان اباله غايه
يريـد زينب تـوكـع كـبـــال الكـفـيل~2
~
من وصل للكــافــل تمرجـل علـيـها
رايـــد يسمعــه نواعـيـــها بجـيـها
والاشـد والادهــا حتـى من سبيها
وكعت اعله الكاع ومجتفات اديـها
راد عـــين الكــافل تشوف اليصير
السبوا اختـه بـــلا غيـره وضمير
تشوف كل لحظة المناية
هيـج جان اباله غايه
يريـد زينب تـوكـع كـبـــال الكـفـيل~3
~
من هوت عالكاع مجتوفه العقيـلة
بيده يضربـها النـذل وايـده ثكيلة
كلها ما عندج اخـو علي تشتكيلة
صرتـي يا بت حيـدر بجـفي ذليلة
بعينـــه يخــزرهـــا اذا رادت تكوم
يريدها كبــال الكمر تبجي وتلوم
تشوف جفه بلايه رايه
هيـج جان اباله غايه
يريـد زينب تـوكـع كـبـــال الكـفـيل~4
~
يــدري عـبـــاس الكــمـــر انت سبيه
روحي كليــله الشــمر يـــامر علــيه
كبالك يسبني يــبن حــامي الحمية
بسنسـله ثكيلـــها يريــد يشـد رقيه
بعين وحــده كـافــلج زينب يشـوف
وحده راحـت عـالنـهر ويه الجفوف
تخبـره بشدتـها هايه
هيـج جان اباله غايه
يريـد زينب تـوكـع كـبـــال الكـفـيل~5
~
كصــدت لكـــافـلــها مشتاكه بحراره
تكله يا نعـم الأخــو سـويـــلي جاره
الشــمر يضـربني بيمينـه ويـسـاره
خويه دم متني على ايتامي يتجاره
والله وسـفه يا كـفـيـلي عـلـه الزمان
بس غبت عـن اخـتـك انـبـاك الامان
تبجــي وتـكلـه كـفايه
هيـج جان اباله غايه
يريـد زينب تـوكـع كـبـــال الكـفـيل~~~
خادم زينب حيدر نوري الاسدي
/channel/aabas78
قصائد لكل ايام محرم اشترك بالقناة
الى مولاتي زينب ع
والله دنيه..زينب ابظعـن الـسبايه
والله دنيه..امن الخدرظلت عبايه
ذابـح سنيـن الـعمـر..يحدي بالناگه الشمر
والله دنيه والله دنيه
===============================
الدنيه ليش وياي خنتي وآنه بت اهل الكساء
فـرحـه مـا مـرت عليـه شفـت منچ بـس بـلاء
صابره آنـه اعله المصايب رغم كل هذا العناء
فارگيت اخـواني خمسه مـن أجيت الـكربلاء
ابموت اخوتي..بدت قصت نوحي
ابموت اخوتي..زيـديتي جـروحي
كافلـي ظـل عـالنهـر..يحدي بالناكه الشمر
والله دنيه والله دنيه
===============================
جمَّعيـت أطفالي كلهه والسبينه اتحظريت
ياحميده ويـن أخوتچ أثنين منهم ما لگيت
ساعـة الحرگوا خيمنـه اولاد مسلم ظيعيت
عمه وين انتم وجيكم ابكربله شگد دوريت
گمت اصيحن..ماكو واحد بيه رحم
گمت اصيحن..اطفـال تاهو بـالـهيم
اتفارگينه امن الظهر..يحدي بالناگه الشمر
والله دنيه والله دنيه
===============================
ودعيت اخوانـي خمسه افراگهم حيلي هدم
محتـرگ وشلـون اعظــه أصبعـي مـن الـندم
جيت وأم الخدر أسمي وارجع ابطرگ الهدم
اطفال من الجيش خافت واحد ابواحد ردم
ركظو ابخوف..ادركنه صاحوا ياعلي
ركظو ابخوف.. بعــــــد مــا ردوالــي
عِمَـه الـدخان الـنظر..يحدي بالناگه الشمر
والله دنيه والله دنيه
===============================
ياهـو الـيمـد ايــده الـي اصعــد الـناگـه ردت
وين ابو فاضل كفيلي اعليه چم مره صحت
ياهــو الـينوخ الـناگـه ابكـربلــه والله حــرت
ياعلي صـعدتهـه کلفـه منهه چم مره طحت
اركب اشلون..طحـت مـن فـوگ الهزل
اركب اشلون..اجفوفي مربوطه ابحبل
بالحبل جدمـي عثر..يحدي بالناگه الشمر
والله دنيه والله دنيه
===============================
الـنوگ مـوگـد الـظعينـه وابزمـاني حـايره
الظعن من أمشي سبگني يا هو ليه يأخره
اصعـد اعله الـناگه خافاً تظل بالهيمه مره
مالت الناگه وشفتهه طفله طاحت عالثره
طفله طاحت..والــظعينــه اتـوقفـت
طفله طاحت..وراس الحسين التفت
ميــت وإلــهه نظــر..يحدي بالناگه الشمر
والله دنيه والله دنيه
===============================
مَـن وصنه الكوفه موقف موتي من عنده گرب
شفـت مغتاضيــن گلـش علـه الــنسوان الــعرب
العنده اخت طالَب واخذهه وآنه اعاين عالدرب
هاشمي مـا شفـت منهـم اجـت بـس وادم غرب
ظلن وياي..بـس الـعلاوي بـالظعن
ظلن وياي..نسوان اخوتي مامشن
ماوصل لمحمد خبر..يحدي بالناگه الشمر
والله دنيه والله دنيه
=========================
✍حيدر الشغانبي
/channel/aabas78
قصائد لكل ايام محرم اشترك بالقناة
قصيده درب السبي
حال لسان مولاتي زينب
مشيت ودمعي وياي / غريبه وماكو حداي
اخوتي الراحو اشلون
وبعد ما ظن يردون
غريبه وماكو حداي / غريبه وماكو حداي
ــــــــــــــــــــــــــــــــــــــــــــــــــ
شفت متني وبجيت وياهو اشكيله
ولا ظلالي واحد من تجي العيله
ياهو الراح احشمه وجدمي يمشيله
عفتهم عالفرات وسفرتي اطويله
مشيت وجدمي مهموم
وحيده وگلبي ملجوم
ودليلي مفارك الماي/ غريبه وماكو حداي
ــــــــــــــــــــــــــــــــــــــــــــــــــ
شسولف ياجرح كلهن علي مرن
وشفت نسوان اخوتي بسنسله انجرن
ما بين الغرب بالكوفه من طرن
احس دمعاتي من دم عالوجن خرن
جبيره الناگه ياحسين
واحيرن صعدتي امنين
ولا واحد بقه حذاي / غربه وماكو حداي
ـــــــــــــــــــــــــــــــــــــــــــــــــ
ظعنه ابلايه والي ورايح بهمه
ولو طش الظعن ياهو اليجي ايلمه
كل ساعه واشوفن بالدرب لمه
وتجّمع غرب يم راس ابو اليمه
كبل ما ذبحو انسان
ولا مسبيه نسوان
ولامرت كبل هاي / غريبه وماكو حداي
ـــــــــــــــــــــــــــــــــــــــــــــــــ
انا اجدامي الجمر ياخويه جاويها
وروحي معلعله وياهو اليباريها
ابد ما حسبت تجفي وتخليها
الجبتها امن المدينه ارجوك ردببها
الرمح يمشي وعليه راس
وشفت تتفرج الناس
ودليلي تعذب هواي / غريبه وماكو حداي
ــــــــــــــــــــــــــــــــــــــــــــــــــ
ردت ساعت زمان ارتاح تعبانه
ومن كثر المشي ياخويه نهلانه
بدروب السبي وعيوني سهرانه
وعلى صوركم يخويه هواي عطشانه
اريدن اگعد وياك
وسولفلك على اعداك
نكطع منك يارجواي / غريبه وماكو حداي
ــــــــــــــــــــــــــــــــــــــــــــــــــ
ابو هاجر المجراوي
/channel/aabas78
قصائد لكل ايام محرم اشترك بالقناة
جروح السبي..
ياخويه عالنـوگ .. طبينه للسـوگ
مـن لـمت الناس .. دلالي محـروگ
وبالعـلويات .. كـلهم شمات
………………………
يخويه حسين شحچيلك من دار الوكت بيه
من ذبحـوك يبن امي خـذتـني الناس مسبيه
اني ام الخــدر زيـنب الما شـافـو طـرف لـيه
بيا شـيمـة عـرب يحسين تركب هـزله علويه
بت حامي الجار .. وبيه الوكت دار
وبالهيمه يحسين .. اركض من النار
واشبع طيحات .. كـلهم شمات
………………………
اني ام الخـدر ياحـيـف المـحـد شـاف اليه اخـيال
اني ام الـدلال الچـان العـرب بـي تـضرب الامـثـال
بـين الخـيل بـين النوگ امشي ويـاي غـربه ارجال
وراسك يمـشي عالي وياي بس فوك الرمح ينشال
او ويانه عباس .. هم يمشي بس راس
بـلا رايـه ويـاي .. ولا سيـفـه لا طـاس
الكـافل من مات .. كـلهم شمات
………………………
وطبـيـنـه بـهذيـچ النـوگ ويخـويـه النـاس ملـتمه
مستحـيه واگـول اشلـون هـذا السوگ اطب زحمه
والـتـمشي بضـوه العباس بمـصابـيـح المـدن تعـمه
المتعلمه عله حچي حسين بذنها اترن صفت شتمه
تلـگـونه بطبـول .. ومراگـص اخيول
وغمضنه العـيون .. شنحچي شنگول
ونجر حسرات .. كـلهم شمات
………………………
شحـچـيـلك شـسـولفـلك طبـيـت وذهـيلـه الراي
زلـم نسـوان مـتحضرين يحـسين الشماتـه هواي
الحچي بوجهي الأسمعنه ضعـفين انحچه بمگفاي
شـي بحـجـار طـگـونـه وشـي دارو الحــار المـاي
بنظرات العـيون .. ياخويه يحچـون
بت فاطمه هاي .. واسمع يشـتمـون
صعبه حچايات .. كـلهم شمات
………………………
وحـتى اطفـالهـم خويه نسمـعـهم يشتـمونه
ومن فوگ السطوح هناك ابكلشي يشمرونه
بشوارع ضيگـه مزدحـمه متعـمدين مشونه
مهـضومات مكـسورات كـل الناس شافـونه
ما بيـن الفروع .. مشونه ونلـوع
وراسك عالرماح .. ويانه مرفوع
وبينه الطگات .. كـلهم شمات
………………………
وعگب ذاك الحصل بالسوگ يبن امي ادخلت ديوان
مـتحضريـن الي الشمـات شـفـت كـل القـصر ملـيان
نصارى وعـرب بيه ويـهود بـزلـم مـتروس وبنسوان
واني ابـيـن هـاي النـاس وحـيده ومـا الـيه اخــوان
ربات الخـدور .. طبن للقـصور
ماعدنه وليان .. ذبحها عاشور
وبالمسبيات .. كلهم شمات
الشاعر عقيل الحسناوي..
/channel/aabas78
قصائد لكل ايام محرم اشترك بالقناة
سيدتي ومولاتي زينب عليها السلام بلسان الحال في طريق السبي تقول :
بس العليل اويايه ... لا كافل ولا رايه
..............................................................................................................
زينب أنا وأم الصبــــر عنواني
بالغاضريـــه ضـيّـعـت إخواني
يم كل جسد أبچي دمه تلگاني
والدهر كلشـــــي بكربله راواني
بيّه الجروح اهوايه ... لا كافل ولا رايه
..............................................................................................................
گلبي إنفطر والروح بيت الحسره
شفت الحسين اموذر اعله الغبره
ماظل ضلع صاحي وتهشّم صدره
شمر الخنا بالســـيـــف طبّر نحره
عالگاع ذبحوا آيه ... لا كافل ولا رايه
..............................................................................................................
صوب النهر ألطم بقيت اعله الراس
عباس ما مثلـــه فقط بــــس عباس
گطعوا يمينه ويــســــرته أرذل ناس
لا دين عدهم لا شرف لا نوماس
جوده تطشّر مايه ... لا كافل ولا رايه
..............................................................................................................
ظليت محتاره بزمانــــي ودنـياي
وآني الحرم وايتامي حارت وياي
نار المخيم تشــــبـــه النار احشاي
مكسورت الخاطر ومذهولت راي
مذهول فكري ابْرايه ... لا كافل ولا رايه
..............................................................................................................
غابت شمسنه وحل زمان الظلمه
والگمر فوگ النــهــــر سافح دمه
گلّي علي السجاد ها يا عمّه
درب اليسر محتاج منچ هِمّه
والسبي عدهم غايه ... لا كافل ولا رايه
..............................................................................................................
أجمع بنات حسين وجروحي اجروح
وبكل وجه صــــورة إخويه المذبوح
ذنّي اليتيمات الصـــــدگ شبعن نوح
شافن أبوهن بالمعاره مطروح
وعمهن على امسنّايه ... لا كافل ولا رايه
........................................................................................................
يبدي طريق السبي ويا عين اتنام
وبأُمرت أشباه الزلم والظِلّام
ضـعـن الأرامـــل والثكالـــى وأيتام
من كربله ينوي السبي لأرض الشام
والبقت بس احچايه ... لا كافل ولا رايه
.....................................................
خادم الإمام الحسين عليه السلام
عمار هليل الواسطي
/channel/aabas78
قصائد لكل ايام محرم اشترك بالقناة
