هاي الليلة هاي الليلة --- تاسع ليلة من عاشور
""""""""""""""""""
هـاي الليـــــلة ليلة الأكــبـــــر
أمه تهل المدمــــــــع الأحمـــــر
عالغبره أمسه جسمه موذر
متكدره أمه وتنحب ليـــــله
""""""""""""""""""
شـــاب وفقدته بلا رجعــــــــه
عاشـــــت بين الهــم والدمعــــة
وقفت يـمـــه تنــــوح وتنعــــه
من همــــــــها تنوح وتشـــكيله
""""""""""""""""""
فاضت دمعتــــــــها وما هادت
يوليدي حاجينــــــــــي نادت
ريت أيامـــــــــك يبني عادت
بروحي أتـفـــدة و أحميـــــــله
""""""""""""""""""
شاعر أهل البيت
الشيخ عبد الحسين المنصوري
/channel/aabas78
قصائد لكل ايام محرم اشترك بالقناة
فزاعيه للقاسم صلوات الله عليه
اليوم صاح العباس
جاسم يبنه
الما ايعزب للضيف
موش امن اهلنه
ــــــــــــــــــــــــــــــــــــــ
والنعم من عودك وتربيته
طلعك زلمه كلف من بيته
كامل امكمل مثل شخصيته
كوم لف اعله المتن جفيته
يبن إخوته والصيت
لليفزعلنه
المايعزب للضيف
موش امن اهلنه
ــــــــــــــــــــــــــــــــــــــ
جان ابوك امعزب بديوانه
انبوس اديه وانكله يامولانه
عاش فتره من الزمان اويانه
وانته ياجاسم صرت قربانه
من كريم اهل البيت
عندك محنه
المايعزب للضيف
موش امن اهلنه
ــــــــــــــــــــــــــــــــــــــ
امعوذك إبخت الحسن يهلاله
شيل سيفك واذبح العياله
الساده همه بالحرب خياله
وآنه اريدن ضربتك كتاله
والحسين يناديك
أنته أملنه
المايعزب للضيف
موش امن اهلنه
ــــــــــــــــــــــــــــــــــــــ
اعيوني مشتهيه تشوف أفعالك
كوم غطي كربله بخيالك
من تريد اتموت اموت ابدالك
وآنه لازم ضهرك وابرالك
المات ويانه ابخيت
وانزفه كلنه
المايعزب للضيف
موش امن اهلنه
ــــــــــــــــــــــــــــــــــــــ
يبن اخوي استوه خظر ياسك
أتدنه ليه وخل ابوسن راسك
لاكن ابكد الخيام احساسك
ويسوه كل الجيش شسع امداسك
اليوم جاسم ردناك
تطلع مثلنه
المايعزب للضيف
موش امن اهلنه
ــــــــــــــــــــــــــــــــــــــ
كله عد عيناك امرك واجب
العين ماتعله ابد عالحاجب
استاذي أنته وآنه اصغر طالب
حالف اسحك بيهم اكبر شارب
الماشرد من جسام
بالحومه فنه
المايعزب للضيف
موش امن اهلنه
الشاعر محمد الجماسي
/channel/aabas78
قصائد لكل ايام محرم اشترك بالقناة
(((( نزله للقاسم ))))
يبن الحسن .. دخيلك
يبن الحسن .. دخيلك
//////////////////////////////
لاكاهم مثل ملكه الحواجب
وبين ارموشه حسبالك كواكب
كلف والحومه راواهه العجايب
تحت جدمه سحك روس وشوارب
ظل بالركب .. دليلك
يبن الحسن .. دخيلك
//////////////////////////////
واحد بقه لوحد ضل ينادي
ابن الساده ابد مو بشر عادي
عمره اربعطعش لاجن قيادي
وكل اهله تره خطهم جهادي
من ابتسم .. خليلك
يبن الحسن .. دخيلك
//////////////////////////////
عنودي بالحرب محد يكسره
نبه بالعركه ابد ماينطي ظهره
مثل جده علي ال لاحه يشطره
امتحن بالغيره اخذ عشره اعله عشره
مدنك رجع .. جبيلك
يبن الحسن.. دخيلك
//////////////////////////////
صاحو جاي يحصد لو يقاتل
وارثهه الشجاعه من ابو فاضل
صاح اكبالهم هل من منازل
جم قائد بقه من خوفه خاتل
شايل زعل .. كفيلك
يبن الحسن.. دخيلك
//////////////////////////////
حلم عرسه لغاه وما يريده
صياد ويحب وين البعيده
يدور عالشمر رايد يصيده
طوه الحومه طوي والرايه بيده
لا ماتعب .. يحيلك
يبن الحسن.. دخيلك
//////////////////////////////
لبو اليمه التفت اده التحيه
لعيونك صدك تسوه المنيه
من دم ركبتي حنيت اديه
اريد حسين بس ترضه عليه
الكه جذب .. مثيلك
يبن الحسن.. دخيلك
//////////////////////////////
تمت ____ علاء الزيدي
/channel/aabas78
قصائد لكل ايام محرم اشترك بالقناة
جسام رمله اتحشمه
ضحي يجـــاسم بالدمه
***
هاك يبنـــــي السيـــف واطلع للــحـــرب يبني ياجاسم
ودرع لاتـــــلبس تـــدرّع بالگـــــلـــــب يبني ياجاسم
ظل وحـــــيد احسين عمك بالــــغـــرب يبني ياجاسم
هاليوم يوم الموزمه
ضحي يجاسم بالدمه
*
رخصه اطلب منـــــه وافـرض ما قبــل قبــل اچفوفه
گله ياعــــــــــــم والدي نــاده العجـــل قبل اچفــوفه
ويبني گله اويــــــــــاك يحلالي الأجـل قــبل أچفوفـه
بيك ارد اواسي فاطمه
ضحي يجاسم بالدمه
*
لو رخصلك صول صـــولت حيدره وزلزل الحومه
احمل اعله الميـــــمنه وعلـميســـره وزلزل الحومه
وعيد بالطـــــــتف يبني وقعة خيبره وزلزل الحومه
ذكرهم بحامي الحمه
ضحي يجــاسم بالدمه
**
أخذ من حسين جاســم رخصـــته وبيده بتاره
وطب ميادين الوغى بكل همــته وبيده بتاره
أمه رمــــله للـــــحرايب زفـتـــه وبيده بتاره
يرجزابأرض الملحمه
ضحي يجـــاسم بالدمه
****
أن تنكرونـــــــي فأنا ابـنُ الحسن وماتنكـرونه
سبط ُالنبيِّ المصطفى والمـؤتـمن وماتـنكرونه
هذا حسينٌ كالأسيرِالمــــــرتهـن وماتـنكرونه
هالصرخه تبقه قائمه
ضحي يجاسم بالدمه
***
قاتل وماهـــــاب اشباه الرجــال جاسم ابزوده
عن أبوه المجتبى خاض النزال جاسم ابزوده
شبل حيدرتاقن افنــــون القـتال جاسم ابزوده
ونال السعاده الدائمه
ضحي يجاسم بالدمه
**
تمت بعون الله وتوفيقه والحمدلله رب العالمين وصلى الله على محمدٍوآله الطاهرين
حيدركريم جارالله الكربلائي
/channel/aabas78
قصائد لكل ايام محرم اشترك بالقناة
مقدمه اليله الثامنه
هاي الليلة هاي الليلة --- ثامن ليلة من عاشور
"""""""""""""""""
هاي الليلة مصاب القاســــم
شمعة شبان لكــل هاشــــــــم
بالدمعــــات تنـــــــــوح الوادم
هاي اللية لكل تبجيـــــــــــــله
"""""""""""""""""
تجري وما نشــفت دمعتهـــــا
أم جاسم تســــــعر جمرتــهــــا
كل أم خل تعلك شمعتـــــها
شمعات الزفــــة تضويــــــــــله
"""""""""""""""""
مسكينه رمـــــــــله ومتكـدره
كَعدت يمــــــه تشـــــم بنحره
ظلت تجذب لجله الحســرة
شـــــبان وفركـتـها ثجيـــــله
"""""""""""""""""
شاع أهل البيت
الشيخ عبد الحسين المنصوري
/channel/aabas78
قصائد لكل ايام محرم اشترك بالقناة
موشح للقاسم
جاسم العريس يمشي بهيبته
وآخر النظرات جانت نظرته
آخر وداع وحزن بالعايله
بين رمله وجاسم بطف كربله
اگباله وگفت بالدمع تنظر اله
وسولفن بالطف دمعها ودمعته
جاسم اتعنه وبرز وسط الجمع
والحوافر تسحگ بذاك الضلع
بالمصيبه الليله وانهل الدمع
بالدمه العريس صارت حنته
صارت الحنه بدمع ماي الجفن
وأمه رمله تنحب اعليه وتون
ماتبطل لبست اثياب الحزن
من هوت اعله الگاع ضلت رايته
گبل لا يوگع على الغبره ذبيح
بالدمع جاسم سمع أمه تصيح
گبل عمك ردت بالحومه تطيح
صاح ابشري يمه صاح وسمعته
بعد ماطاح وتخضب بالدمه
بهل مصيبه ناحت املاك السمه
اهنانه صاحت رمله فدوه الفاطمه
شنهي ابني اتهون كل امصيبته
ابد ماقصر بساحات النزال
والجمال ايغار من عنده الجمال
أمه عرفت مايرد جاسم محال
هذا كل المختصر من قصته
لاتنسون والدي ووالدتي وابني عباس من الرحمه والغفران
خادمكم رياض الرسل الجابري
/channel/aabas78
قصائد لكل ايام محرم اشترك بالقناة
أسمع الهوسات أجت صوب الخيم زفوا القاسم اضن اهل الشيم
گومي زينب عمته خلي نحضر زفته
زفوا القاسم اضن اهل الشيم
*
هــــذا التحبيـــــه واليحبج يعمتــــــه
گومي خلنتلگه انـــــه وياج زفتـــــه
زفــــــوا وليدي يزينب گبل حنتــــه
ولا خبر منهم وصلني اعلك شمعته
شلون زفه وبلعجل سووها جفوفه بيمن ياتره حنوها
راح اجيبن حنتّه خلي نحضر زفته
زفوا القاسم اضن اهل الشيم
***
ﭽان جاسم ما ينام الا اعله متنج
خطوه مايخطي اذا مو رخصه منج
لحظه لو غبتي يجي ويسئلني عنج
گومي للزفه يزينب وخفي ونج
اخفي ونج جاسم يزفونه أنتي روحه ومهجته وعيونه
گومي نوصل خيمته خلي نحظر زفته
زفوا القاسم اضن اهل الشيم
***
گلبــــي مدري شبيه يازينب لسبني
اسمع ويلهوسه صوت يصيح يبني
ﭽنه صوت الحسن دوهني وشدهني
دخيل أبو الحسنين خافا راح مني
خاف جاسم راح مني بكربله الله يبعد يبت حيدر كل بله
اليله جاسم فرحته خلي نحضر زفته
زفوا القاسم اضن اهل الشيم
****
شبيج دمعج مانشف ومغرك العين
اني اسولف بلعرس وانتي تونين
جان كل ضني بعرس جاسم تفرحين
امبارك بعرسك يبن رمله تنادين
لفت هالهوسات من الساحه ابن اخوج الحسن هاي افراحه
وي عمامه وصحبته خلي نحضر زفته
زفوا القاسم اضن اهل الشيم
**
وصلت الهوسات جا جسام وينه
ليش مايمشي اعله رجله وشايلينه
بني هاشم لبوا اليمه محاوطينه
أبني شو ﭽنهم عمامه مشيعينه
گلبي ما مرتاح يابت فاطمه ينبض وصوت النبض دك بالسمه
گلبي صاح بجمرته خلي نحضر زفته
زفوا القاسم اضن اهل الشيم
**
هذا ابو اليمه اليشيل ابني يزينب
هاي مو زفت عرس والخيل تلعب
توجهوا بجاسم عليه وكلها تنحب
گومي خل نتلگه عريس التخظب
ابني عريس الشهاده بهالطفوف زفته ارماح ال اميه والسيوف
هالشهيد ومحنته خلي نحضر زفته
زفوا القاسم اضن اهل الشيم
***
الشاعر
السيد كريم دانه الأعرجي
/channel/aabas78
قصائد لكل ايام محرم اشترك بالقناة
نزله للقاسم ع
يا جسام … چنه الحسن ونعومه
يا جسام … يرعب دخل للحومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كل ضنهم ازغير وابد ما يگدر
وشعلمه بهاي الحرب كر و فر
تاليهه ذكـرهـم مـواقـف خيبر
جاسم والنعم … رجفهـه الزلم
لا مــا ينهزم … خـوفها المنايه
الجده حيدره … محـد يگـدره
دنيـه و آخره … عاشگ للولايه
يا جسام … يـا يــوم يشبـه يومه
يا جسام … يرعب دخل للحومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عدوانه رجعو وهوه ظل يتقدم
بچـاهـم اشمحلاتــه مـن يتبسم
راجـل نـزل و بكل عدد ما يهتم
واللي يوصله … بسيفـه يجنـدله
زلـزل كـربلـه … عن عمه يحامي
ما همه العمر … الـزلمـه مـو كُـبُر
گلهــم افتخر … بالنصره الامامي
يا جسام … بالساحه حلوه علومه
يا جسام … يرعـب دخـل للحومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ادخيل الله من سرفنهن ارداناته
عمـره زغيـر ويـرعـب ابصـولاته
تشبــه لبــو فاضـل بعــد خزراته
متلـثم طلــع ... چـم رگـبه گطـع
والكل انفزع … من هاي الشهامه
زلمه الوحّدّه … فگــره العــانــده
كلهه تناشده … يكشف عن لثامه
يا جسام … بيهـم جلاهـا همـومه
يا جسام … يرعب دخل للحومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
حيّـرهم و بچـه الحـرب بفنـونه
شـال اللثـام و كلهـم ايشوفـونه
انت الحسن لـو منهو يتوسلونه
نـــدري بالحســن … ميت مـن زمن
رد يحمي الضعن ...ما يترك خواته
تشبهلـــه و علــي … صوتـك معتلي
مـن شكلك ولـي … ياحامل صفاته
يا جسام … شــايلهـه كــل ارســومـه
يا جسام … يــرعــب نــزل للحــومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
گللهم آنـه ابـن الحسن عرفوني
جسام اسمـي و فنكم اتلاگوني
وحسين مـا عوفنه نور اعيوني
هاذ آنه اكبرت … تلميـــــذه صـــرت
منكم ما خفت … گدهه رافع الراس
لـو واحـد گدر … لخيــامـــه عبـــــر
يتـــــوذر وذر … هيبه وعمي عباس
يا جسام … نـــاذر العمـــه ادمــومـه
يا جسام … يــرعــب نـــزل للحـومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يامـه كتــل بيهــم زغيــر السـاده
مـل الجـنود ودور اعــله القـــاده
يــالَ ثـــار الحسن لمـــن نـــــاده
ظل يطبگ طبگ … هـايــم بالعشگ
و اليهــوه صـدگ … حوطهم عجيبه
اختنگت نينــوه ... مــا بيهـه هـــوه
و اعليهــم نـــوه … مـا يتـرك حبيبه
يا جسام … شايــل الغيــره دومــه
يا جسام … يرعــب دخــل للحومه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الشاعر ابو ياسر المياحي
/channel/aabas78
قصائد لكل ايام محرم اشترك بالقناة
شاط للحومه ونزل... بيده كض سيف الزعل
هلهلتله كربله ... يا هله وميت هله
هذا عباس كفيلي هذا عباس
.....................................................
كتله اريد الماي منك كال يختي ادللي
غاليه ويرخص طلبها امر تامر بت علي
راح اشيل الجود بيدي كومي يختي هلهلي
اكلب الحومه باهلها الساحه تفرغ بس الي
هيج كتله وكال الي ..... يختي يختي ادللي
هذا عباس كفيلي هذا عباس
....................................................
من دخل سوح المعاره بيده رفت رايته
سيف ابوه القلع خيبر طبها شاله بيمنته
جنه حيدر من يضهضب ما يثني بضربته
جنه ملك الموت يمه كباله تعرك كصته
بخوف لا مومن خجل .... سيفه قباض الاجل
هذا عباس كفيلي هذا عباس
....................................................
چنها ايام القيامه وچنها ساعات الحشر
ماكو توبه اليوم بيها وما نفع بيها العذر
لازم ايطب الجهنم منه للرايد يفر
واليريد ايلاوي چفه يموت سكته من الخزر
موعد الساعه اقترب ..... من رفع سيفه وغضب
هذا عباس كفيلي هذا عباس
........................................................
صاح ملك الموت بيها ونفخ صور القارعه
مسرفن الذرعان طبها ورتلتله الواقعه
انكسرت افواج وكتائب والجيوش مضعضعه
يسحگ خشوم ويطرها وحده طب المشرعه
بهيبه يمشي بخطوته ....... بيده شايل جربته
هذا عباس كفيلي هذا عباس
................................................................
زلزلت ارض المعاره ولارض چنها اندحت
چانت سيوف اتلامع بيده ساخت ونمحت
مدخنه ادموم ومطرها روس .. لاچن ما صحت
فارت دموم المعاره وحدر جدمه اتناضحت
الساتر الله لو غضب..... وباسم زينب من ندب
هذا عباس كفيلي هذا عباس
......................................................
بالرگب يتوضه سيفه من كسر فيه الضحى
واذن اذان المنايا من قراها الفاتحه
هوه طبعه السطره بيها عالوجوه الچالحه
وين يالبعتو ذممكم يا عبيد المصلحه
من يرف بيده اللوه ....... ينگطع حته الهوه
هذا عباس كفيلي هذا عباس
الشاعر علي صادق المجراوي
/channel/aabas78
قصائد لكل ايام محرم اشترك بالقناة
(نزال للعباس ع)
لوما جفوف العباس .. كاع الله بلطف مالت
متوازنه ترد الكاع بجفوفه
حجايات زينب بلراس ملفوفه
كلما يصيح العباس
من خزرته وجوه الناس... مخطوفه
عطشانه عيني تشوفج
بلخيمه افتحي اجفوفج
راح اكلب الكاع اهواي
ويتسرسح اعليج الماي.. يازينب
/////
لمن سمع بل صيوان يردونه
فزن صور داحي الباب بعيونه
كلتله زينب بهداي
راح ورجع شايل ماي ... بمتونه
ضهضب وصعدت ناره
عطشان دم بتاره
كاللها اخوج العباس
خله الزلم راس براس .. يازينب
/////
لوحه الجثث فوك الكاع مرسومه
رجفها سيف العباس بلحومه
والكاع صاحت ياويل
الخياله شردت والخيل مهزومه
بلروس يركض سيفه
يختار كام بكيفه
يرجع ميتأخر چان
عباس شايل جنحان .. يازينب
////////////
ونعم منك عباس سويتها
بذرعانك المكطوعات وافيتها
زينب دهر راح تعيش
تضل فاكسه عيون الجيش خليتها
عباس صاير غيمه
من النهر للخيمه
فرحانه چي فعلك زين
زلمه وشلت راس حسين .. بطفوفه
الشاعر علي مخيلف
/channel/aabas78
قصائد لكل ايام محرم اشترك بالقناة
نزله أهوازيه .
بحر طويل .
.......................
طك عرج الزعل واغتاض هدّ وركب ميمونه.
صال وخبط صافي الجيش والمات الف خيعونه.
..............................................
للحومه كَصد عباس وترف رايته الخضره.
كلمن كَابله يرجع فوك امتونه بس نحره.
من كد ماكطع بالروس كاع الطف غدت حمره.
والما لاحه سيفه يموت .خوف بخزرت عيونه .
...............................................
موت ونزل بين الكَوم .يلعب عالركَب سيفه.
بين أجفوفه صار الجيش .ظل يتخير بكيفه..
فرهم مثل فر .اعصار وبصولاته اخذ حيفه .
ناس اتشوفه اجه العباس .ناس الوصي يشوفونه.
..............................................
كفهم كف هوى بشراع.حتى اختنكت الحومه.
جن يوم القيامه صار .يامصعب غضب يومه.
يم عرش السمه وبالكَاع .والله اتنومس اعلومه.
اشوس قسور الشجعان .ابن الوصي يسمونه.
...........................................
موت وحل .نفخ بالصور اسرافيل من طبهم .
مثل .كور. الغزل.بالسيف. حدر اجدامه كوّرهم
كَد ما حصد بالجيمان . خوف يموت شاردهم .
لهسّه المات .ميت خوف يومه شلون ينسونه .
.............................................
عيت هجت اكَباله الخيل وعالزلم ركبت.
من قوة ضرب سيفه .صوارمهم ثلم خلصت.
سد ادروب رجعتهم .جحافل عالنهر جلًت.
سرفن ضهضهب العباس والجربه على أمتونه .
...............................................
تملكها الشريعه بزود .بس ماقبل يتروه
رد بوابة الايثار . والنوماس والنخوه.
شلون اشرب واخوي حسين .كَلبه بنار يتجوه .
للخوه أمتنع. مو خوف مو همه اليمنعونه.
...........................................
✍ أبو منتظر الحجامي. 2024
/channel/aabas78
قصائد لكل ايام محرم اشترك بالقناة
يا عباس ، يلا شد إحزامك ، هي هاي أيامك
مدد مدد يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛
گوم يا ليث الشدايد و الحرب
يلي سيفك يضرب و ما تنضرب
عندك الصعبات ماي و ينشرب
الحومة من تدخلها يدخلها الرعب
يا عباس ، من تسل بتارك ، يعني شبت نارك
مدد مدد يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛؛؛؛؛
سل حسامك حيل يا راعي اللوه
لا تخلي الشمر يشتم الهوه
الجيش يمك هو و الماكو سوه
ضامي ملك الموت بس هسه ارتوه
يا عباس ، ما تمل عالعادة ، تريد جيش زيادة
مدد مدد ، يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
قل هو العباس سبع الگنطرة
مشه كل الزلم مثل المسطرة
و على هالمنوال لزمهم سره
نار سيفه ثم نار الآخرة
يا عباس ، يالجهنم سيفك ، الموت هسه بكيفك
مدد مدد يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
وارث الكرار حيدر و النعم
بالحرب تكفي فخامة الإسم
من يسولف هو تسكت الزلم
الراس من يطيره عن حكمه و علم
يا عباس ، يا وريث الوالي ، عالي صيتك عالي
مدد مدد يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
سكنه طلبت ماي منك و تعرف
من تروح بنيه جفنك ما يرف
الف فارس شنهو خلهم ١٠٠ الف
والله بس بشاربك بس ينحلف
يا عباس ، گوم يا والينه ، تريد ماي سكينه
مدد مدد يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
غير وجهك بالحرب لا ما نشوف
لا فتى إلا أبو فاضل بالطفوف
إنت واحد لكن أكثر من ألوف
وياك ملك الموت و بخصمك يطوف
يا عباس ، بيك هاي الآيه ، فرد بس هوايه
مدد مدد يبو فاضل ، مدد مدد يبو فاضل
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
#مدد
#علي_حسن_الكناني
/channel/aabas78
قصائد لكل ايام محرم اشترك بالقناة
مقدمه 7
ليلة السابع من محرم
سابع مسه ابشهر الدمع
من فاطمه يلچــم ضلع
هم تدري يحسين…
الليله زايـــد بالالم ضــــــلع الوديعه
مـن وگع عبـــاس يم راگ الشــريعه
نصاب سهم ابعينه وچفوفه گطيعه
اوما وصل مايه لبوسكينه ورضيعه
الجربه طراها السهم
والورد ذبل بالخـــيم
هم تدري يحسين
ياحســين ايعينك الله ابهل رزيه
احزام ظهرك راح برض الغاظريه
من رجعت امـــــن النهر للهاشميه
وي عمود الخيمه طگ ضهرك سويه
زايد على الزهره الالم
من وگع شيـــال العلم
هم تدري يحسين
°°°°°°°°°°°°°°°
✍الخادم
كامل السعيدي
/channel/aabas78
قصائد لكل ايام محرم اشترك بالقناة
يا عباس بيمناك شيل الرايه
***
البس درعك وصول ودخل للميادين
وخلي مكاطف الروس يوصل يم الحسين
من طبيت عالماي حارت تشرد امنين
وفوك ضهورها الخيل ضل يطافر الطين
وياخويه شويه الجيش وانته اهوايه
***
طك الكاع بالكاع وكلبها الحرايب
وخلي كربله تروج وسحك عالشوارب
طك عرج البدو بيك بدوي وجاي غاضب
صاحت منك دخيل عباس الكتايب
وين يضم روحه الماي تيه رايه
*
عجت والهوه اندار والعركه ثكيله
وكواك الله عباس صاحتله العقيله
طب الماكو رجال يبرزله دخيله
مو بس ماي بالجود راد الشط يشيله
دخن راسه وبالكوم سوه سوايه
**
امك زامطت بيك وانته بجفك الحل
ومن صديت عالجيش طاح الصف الاول
من تزعل يعباس سيفك وحده يزعل
وشكد بالطف الماي يم رجلك توسل
وبكماطك يا عباس منطي حجايه
***
بيده الجيش شالاه وصم الجيش بيده
وبس الزلمه عباس بالحومه يصيده
ايريد بكربله ايعيد ايام الصميده
ولاخر يوم عباس ما ينطي بعضيده
احتارت فرقة الخيل والرمايه
*
كل العسكر انهار بس خطوه تقدم
هد والخيمة ام عون يوصل رايح الدم
حمزه صاحو بصوت بالرايه تحزم
وتعطش زينب اشلون والعباس زمزم
وفوك امن الشمس غاد دك الثايه
**
تمت
تحسين الخفاجي
/channel/aabas78
قصائد لكل ايام محرم اشترك بالقناة
مقدمه 9
ليلة التاسع من محرم
تاسع مسه ابشهر الدمع
مــن فاطمه يلچــم ضلع
هم تدري يحسين…
ام الاكبـــــــــر تبچي وتنادي يغالي
تروح ليش وبيتي بعدك يبقه خالي
يبني يا غصـــن المحــنه اويا دلالي
اســهرت برباك وضگت تعب اليالي
البيــــه رادت تستــضل
بموته گطع عنها الوصل
هم تدري يحسين…
°°°°°°°°°°°°
يا حســـــــــــــــين الاكـبر الليله تودعه
روحته من الخـــــــــــــيم مابيها رجعه
اســـــيوف اميه بكل حقد ابنك تگطعه
وصوت كسر اضلوعه بالخيمه وتسمعه
الله يصـبرك عالجره
وجهك تغير منضره
هم تدري يحسين
°°°°°°°°°°°°°°°°°°°°°°
✍الخادم
كامل السعيدي
/channel/aabas78
قصائد لكل ايام محرم اشترك بالقناة
موشح للقاسم ع
-------------------
شلون ليله البيها عريس انچتل
بيوم زفته وطاح بچفوف الاجل
------------------
شلون ليله ليلة احزان ومصاب
بيها رمله افگدت عريس وشباب
سهرت اليل اتعتب والچبد ذاب
ليش يبني هلالك اليله افل
--------------------
شلون ليله ليلة افراگ اوحزن
گعدت امه اگباله لمصابه تون
تصيح بالچن يسمع الصوت ويحن
يبني ياجسام بعدك ما اضل
---------------------
شلون ليله امكدره وميشومه
بيها رمله امست ومهضومه
عطر ابنها تشمه بين اهدومه
تاه منها الراي والعقل انذهل
--------------------
شلون ليله الفارگة بيها السعد
تصيح غيرك يولدي شعندي بعد
اگعد وحاچيني دلالي انمرد
ابد ما صدگ يجسام الحصل
------------------
اشلون ليله البيها غاب اهلالها
ضلمه صارت عالخيم بهوالها
زفوا ابن الحسن بيها ابطالها
مخضب العريس ومگطع وصل
-----------------
شلون ليله شلون مصباح وفجر
بيها چتفوا رمله والحاقد يجر
ويشتم ويضربها بالسوط الشمر
وهيه تنحب سكته كاتلها الخجل
--------------------
السيد.
كريم دانه الاعرجي
/channel/aabas78
قصائد لكل ايام محرم اشترك بالقناة
كربــله امتانيتك يجاسم
كربــله امتانيتك يجاسم
ــــــــــــــــــــــــــــــــــــــ
گوم شد الجامها وتِل الرسِن
واطحن بسيفك جماجمهم طحِن
ذوله ولد الگالو لفاطم وإن
ڪون گبل ارگابها اتگص اللسِن
لهاي انه امربيتك يجاسم
كربـــله امتانيتك يجاسم
ــــــــــــــــــــــــــــــــــــــ
گوم يا أبن الحمد و القلهوه
خلَّه فوگ امتونك ايرف اللوه
أگطع اعله الشمر وجيوشه الهوه
مرضى هاي الناس وبسيفك دوه
يلــمراجل صيتك يجاسم
كربـــله امتانيتك يجاسم
ـــــــــــــــــــــــــــــــــــــــــ
غيّم وسجِّيل أمطر علــكفر
واشمر الخياله من فوگ المهـر
يبني حاسبهم گبل يوم الحشر
خلهم ايشوفون نجمات الضهر
رخصه انه المنطيتك يجاسم
كربـــــــــله امتانيتك يجاسم
ــــــــــــــــــــــــــــــــــــــــــــــ
يا أسد فتَّاك صيح ابــزمجره
اليوم اراويكم عذاب الآخـره
يبني علذل گوم لزّمهم سـره
واليمين اگلبها فوگ الميـسره
لم حسن فاديتك يجاسم
كربـــله امتانيتك يجاسم
ـــــــــــــــــــــــــــــــــــــــ
للحرب يمه استعد وانوي الرحال
وعلِّم الـسبعين الف فن القتال
من جثثهم خلي گاع الطف تلال
مستواكم گلهم وشسع النعال
زود انه امغذيــتك يحاسم
كربـــــله امتانيتك يجاسم
ـــــــــــــــــــــــــــــــــــــــــ
گوم يلــمن وجهك اتغار الشمس
واكتب اعله التضخيه ابدمك درس
گلهم احسين اغله عندي امن النفس
والشهاده اُمنيتي مو يوم العرس
بعمك اموصيتك يجاسم
كربــله امتانيتك يجاسم
ــــــــــــــــــــــــــــــــــــــ
صُـول يبني وسطر اعظم ملحمه
واربح اويه احسين حُسن الخاتمه
خلني اشوفك وانته متـخضب دمه
حتى نرضي الله ورسوله وفاطمه
ابلا شمع صينيتك يجاسم
كربـــــله امتانيتك يجاسم
ــــــــــــــــــــــــــــــــــــــ
سيد علي عبدالزهره الناجي
/channel/aabas78
قصائد لكل ايام محرم اشترك بالقناة
قصيدة للقاسم (ع)
طب القاسم للناس
صاحو هذا العباس
………………………………….
لايگ السيف بچفوفه يرتجز بسمه وحروفه
انه جدي داحي خيبر الكل حرب اول نشوفه
مااهم الكل عددكم خلي يبرز ياهو منكم
بل رگب حديته سيفي ويارخص گصت رگبكم
اليعثر لازم ينداس
طب القاسم ياناس
…………………………………
شايل الرايه الثگيله ياهومنهم يعتنيله
انه احامي عن حسينٌ وعن خيم عمتي العقيله
مجتبى ثاني ابكلامه منه شايل چم علامه
سيفه يگسم بل اعادي مايهم الكل سهامه
وگفاتك رفعت راس
طب القاسم ياناس
…………………………………
الاخضر يلوگ عله چتفه والعده صابتهه رجفه
من الحسن ماخذ وگفته مااجته الهيبه صدفه
عمامته الخضره لبسهه بكل فخر بل طف حرسهه
طشرالجيش ابقتاله وكربله بيهم ترسهه
لمعت سيفه ويه الطاس
طب القاسم ياناس
…………………………………….
وگف اگلوب ال ميه ابروحه شايلهه الحميه
امه تدعيله ابنصرته ربي وفقه بكل مسيه
ابكربله القاسم مناره وصيته اكبراشاره
انصراحسين وعياله وبل حرف طبق قراره
حچاياته اغله من الماس
طب القاسم ياناس
……………………………………
امك انته اشگد كريمه بل كرم صارت عضيمه
ربتك لحسين رايه هاي تربات الحليمه
الحسن من ينطي ينطي موفقط بس گهوه يروي
منطي زلمه وخوش زلمه بل حرايب سيفه يچوي
هيبه اشگد شال احساس
طب القاسم يانس
الشاعر سلام البهادلي
/channel/aabas78
قصائد لكل ايام محرم اشترك بالقناة
موشح الليلة الثامنه
جاسم اعليه المدامع جاريات
لحد ما هل روح يغشيها الممات
___
آه يا عريس ما تم له الفرح
شاب واگبال امه عطشان انذبح
ثوب عرسه اعليه دم نحره انسفح
ويلي او ذبلن رسومه الزاهيات
___
ذبلن ارسومه الچان اشمحّلاه
باول اسنينه لچن الطف خذاه
بچّه ابو اليمه او گلب رمله چواه
يا حزنها اعليه هد الراسيات
___
ساعد الله أمه من تبچي او تحن
تنعه. والحلو الجهامه امست تون
لا هي ميته او لاهي عدله او تستچن
فگد جاسم ما ترك شي بل حياة
___
ارد اواسيها واهل مُر الدمع
عله ابنها والطم واخسف ضلع
لا تهنه ابحنه لا ياس او شمع
اترسن صينية دموع النادبات
___
مثل كوكب دري واگع عل تراب
جرع واويلاه الوان العذاب
عطش وارماح او بواتر والنشاب
او شمس من عدها ايغلي ماي الفرات
___
موش مال الآم هاذه ابن الدلال
ليش دم واتراب ضيع هل جمال
اشلون اوصفه والشعر وي دمعي سال
اضلوعي وابيات الشعر متهدمات
___
عله جاسم ما بقگت مهجه وانوح
ريت عمري فدوه لعيونه يروح
جرح جاسم كلف مو مثل الجروح
السمه ونت له او تنوح الراسيات
___
ابو فاطمة الطائي
/channel/aabas78
قصائد لكل ايام محرم اشترك بالقناة
مقدمه 8
ليلة الثامن من محرم
ثامن مسه ابشهر الدمع
مــن فاطمه يلچم ضلع
هم تدري يحسين
اليله ضـــــــخر المجتبى بدمه تحنه
بعده شاب اوماوصـــل عشرين سنه
بحضنك وروحه طلعت يحسين منه
الله يجـــــــــــبر گلبك الينگط محنه
اچـفوفك عليه اتشابگن
هوه البقيه امن الحسن
هم تدري يحسين
°°°°°°°°°°°°°°°°
سالت ادمـــوع العواطف هالمســـيه
ابوســـط صيـــوان النوايب والرزيه
رمله صـــــاحت راح جاسم من اديه
وضـــــاع وي مـوته الامل بالغاظريه
ضـلت تنادي يالولد
ماينتهي حزنك ابد
هم تدري يحسين..
°°°°°°°°°°°°°°°°°°°°°
✍الخادم
كامل السعيدي
/channel/aabas78
قصائد لكل ايام محرم اشترك بالقناة
نزال___ للقاسم ابن الحسن ع
<<<<<<>>>>>>>>>>>>>>>
بيده يعگدهه العده ويفنيهه
شيخ وابن المرجله راعيهه
حي الله جاسم.....حي الله جاسم
***
اتبسم القاسم عليهم بالنزال
سوه بيها الما يصير اروع قتال
يخطف الارواح يگضيهه ارتجال
بيده يگلب كربله وحاديها
***
تذهل الفرسان طب ميدانهه
قاسم العريس شد اعنانهه
جندل الشجعان من فرسانهه
بسيفه دم ارگابهه ايحنييهه
***
صار يوم الزلزله وطب الحرب
شرده بيهم چانت شگد تنحسب
ایميل بركان الغضب بيهم يطب
شوف عزمه ابكربله يگضيهه
***
صارت الجيمان چنهه العنكبوت
وچن يحط بيها الرحه لمن يفوت
اشر ابيده وفرض بيها سكوت
بيده شبل الحسن چن يطويهه
***
شاع واديهه وطواهه كربله
هاي اول حمله يقره البسمله
يشبه العباس يوم الزلزله
صار مصدر للغضب يرويهه
***
دنگت فرسانهه وشاع النزاع
فرت اگباله الزلم فر السباع
صار بالميدان مرعوبه الضباع
فارس الحومه خمد طاريهه
***
ظنوا العباس راجع للقتال
اتفاجئت فرسانهه وصار الجدال
صارت الشرده مثل ماي الزلال
هاي اول حملته يحچيهه
***
تمت بعون الله تعالى
الشاعر___يوسف_الفتلاوي
/channel/aabas78
قصائد لكل ايام محرم اشترك بالقناة
نزلة في القاسم ابن الحسن( ع)
وفـه تـنـضح كَـصته للـمــعــارك زفـتـه
حنته من دمه صارت
يوم عاشور
........................................................
ملـتـزم بيـهه الوصيه الإلـه كاتـبهـه الحــسـن
حسين لوشـفـتـه يبويه احتار وابكَـلبه المــحـن
كون تفزعله وتنصره مــاتـعـوفـه بهــالــزمن
مايأخرك شي يبويه انت التحامي الضعن
وهذا دين ابركَبته للـمـعــارك زفته
حنته من دمه صارت
يوم عاشور
.........................................................
القاسـم ابـن اهل الحميه مارضه ابجور الطغاة
ثـــار وابـــوجه ال اميه ومــايــبـالي بـالمـمات
ألحياة اويــــــه الاعادي والله مـــاتـنــعــد حياة
شلون يرضه الذل وابن من مـِــن زلـم للــذل أبات
ومايبالي ابطيحته للمعارك زفته
حنته من دمه صارت
يوم عاشور
.......................................................
نـــزل للــكَــوم وتمـشه مـشـيــة المـايـمـه كَوم
جان صايم سيفه وافطر بــعــد مـيـلـحكَـ يصوم
اشمال ويمين الاعــادي والاعادي اعليه تحـوم
وابد مايــهـتــم لكثره جيش من كثر الغيوم
اتذوب كلهه ابخزرته للمعارك زفته
حنته من دمه صارت
يوم عاشور
.........................................................
صــولــة الكــرار بـيـهم بــيــده فــقــاره ونـزل
بكل عزم وبكل شجاعـه نـــزل بـيــهـم وارتجل
صـــاح إبـن الحسن آني وجيــش عدوانه انذهل
والمعــاره ابظهر اعوج من ضغُط جدمهه انعدل
صـفــوف تـرهب طبـتـه للمعارك زفته
حنته من دمه صارت
يوم عاشور
.........................................................
وبـغـدر طبـرولـه راسه وطاح مرمي اعله الترب
لـولـه مـــــا بالغدر والله حـلـم يــوكَـع بــــــالحرب
جـــانــت اتهــابه المنايا لـلأعــــــادي مـــن يطب
هـَمــه جـان حسين بعده شـلـون يـبقه اويه الغرب
وهوه جان ابصولته للمعارك زفته
حنته من دمه صارت
يوم عاشور
الشاعر ياسر العارضي
/channel/aabas78
قصائد لكل ايام محرم اشترك بالقناة
القاسم ع
شــوف ياليث النزل للحومة
ابجفه أجـــال الكفرمحتومة
.......
غضب صال وزلزل بوادي الطفوف
عيـــونه عالحسين وبسيفه يشــوف
كبـــال ســيفه دنكــت كــل الــسيوف
يقسم أبعبـــاس مكطـــوع الجفـــوف
الـــيوم يسكي كـــربلة مـن دمـــومة
......
كـــلهـم انـــه القــاسم ونجل الحسن
وانه ابن حـــيدر عــلي الرد الزمــن
مــا تهمني خيـــولــكم خــلهن يـجـن
انـــه مــن عمي تـــرى مـــأخــذ إذن
تنعــرف ضــربــاتي لـــن مختــــومة
.....
مــــا يهــمه الجيــش كــله والشسع
اعـــزل يقــــاتـل ومـــا لابـــس درع
ومــثــل الأكـــبربالحرب مــا ينجرع
أي وحـق حــيدر علي وكسـر الضلع
لــــوحه بيـــده كربــلة ومــرســـومة
......
صاح بيهم قـــاســم وعنده الجـــواب
هــاي ساعة من الــزمن قبل المصاب
بيــدي اراويـكـم انـه فــنــون العــذاب
أيسح دمكم عـالـثرة يرفـــضه التـراب
وانـــه قـــاســم سيـفي هــاذه يـــومة
......
صفــرت الــدنية ونــزل بيهه الظلام
أبعمر جاسم هــاي لحظــات الخــتام
ونـــت ونـــاحت على جسمه الحمام
صاح يـــا عــمـي ألك مــني الــسلام
والوصية من الحسن مضمومة
.....
الشاعر
أياد الفرح التميمي
/channel/aabas78
قصائد لكل ايام محرم اشترك بالقناة
قصائد محرم الحرام (الليله السابعه)
نزله (للامام العباس)
..................................................................
مـــــــن اشد اعنانها
وادخـل لميــــــدانها
الحومه اذل فرسانها
وانـــــــــــــــه عباس
..................................................................
شمرتي شمرت علي
شحده اليوصل ألي
بلــــــوه والله يبتلي
وانه عباس
مـن علي ماخذ عزم
الا ابــچيها الــــــزلم
بالحومــه لا ماانهزم
وانه عباس
غضب طگ بركانها
وغــرگت بطوفانها
الحومه اذل فرسانها
وانه عباس
..................................................................
انـــــــه اخوا ام عصابه
الزلــــــم كلها اتهابــــــه
ويالجيش عندي طلابه
وانه عباس
لووگفت اعلـــى النهر
اشطر العسكــــر شطر
اسحگ بجدمي الخطر
وانه عباس
الزلـــم هالقل شانها
والمفر ضل عنوانها
الحومه اذل فرسانها
وانه عباس
..................................................................
وينـــه وينه وينه
الگرب عم سگينه
الا افگس عينــــه
وانه عباس
مــــــن أسل بتاري
لوحـدي اخــذ ثاري
بگلبــي اطفي ناري
وانه عباس
مــــــن تشب نيرانها
تشـــــــــــرد بوديانها
الحومه اذل فرسانها
وانه عباس
..................................................................
انـــــــه فارس نينوى
انــــــــــه شيال اللوه
حـرميتهم شم الهوى
وانه عباس
انه ملك الساحـــــــه
بالحرب محد لاحـــه
اعداي مامرتاحـــــــه
وانه عباس
الزلـــــــــم كلها هانها
ولبساها اجــــــــفانها
الحومه اذل فرسانها
وانه عباس
..................................................................
ابوفاضل مـــن يهد
الزلـــــم كلها تستعد
واحــــــد بواحد لبد
وانه عباس
انـــــه راعي المرجله
الجيـــش كله مبهذله
لصولاتي تشهد كربله
وانه عباس
اله أهــــــــــد أركانها
وامحـي كل عدوانها
الحومه اذل فرسانها
.......................................................
الشاعر عماد محمد الدراجي
/channel/aabas78
قصائد لكل ايام محرم اشترك بالقناة
كف رِدنَه والجيش .. وصل للكوفه
ــــــــــــــــــــــــ
الجيش گَلّه انطينه عَطوه بسّ دِضُم ازنودك
من بعيد انطينه جودك واحنه نترس جودك
حته جرف المــاي كـلّه إخذه والله ايعودك
وخاف ما يكفيك شطنه من جِرَبنَه انـزودك
اشمر جربتك كلشي يجرالك
شِردت الوادم بس من إخيالك
توصيل ماي وللخيـم عدنـه
لا تِهِــد فــال الله ولا فـالك
( يگضي الماي ولا تگضينه )
كف ردنه والجيش .. وصل للكوفه
ــــــــــــــــــــــــ
عدنه تاريخك الابيض ماكو عندك شارِد
النهروان انطيت حقها وجيش گابل واحد
جندي عد حيدر وكتها وانته هسه القائد
عوف سيفك فقـط چفّك على الوادم زايد
دخيل الله چم اسلاح الك شـايل
السطره وخزرتك كافي ابو فاضل
مالِك إبكُبَره و رِعبِتَــه اعـيونك
بس إلتســودن يمّـــك إيقـــاتل
( والـ يدنالَك بايع روحه )
كف رِدنَه والجيش .. وصل للكوفه
ــــــــــــــــــــــــ
شلون إلمْطَهّم ايشيلك وانته خاسف گاعنه
إنته ريشاتك گضتنه وشرّديت ارجـالنه
انته صفّين وبِدِتها اشلون بالطّف مالنه
يبن قالــع باب خيـبر لا تِشَلْع ابوابنه
هَدّات حـــيدر لا تِهِـــد بينـــه
إشورطنه غلطه وعِطشَت اسكينه
غلطه وغِلَطنَـه وعطش عبدالله
سَرفَنِت رِدنَــك نــاوي تگضينه
( للتّل وصلَتْ روس القاده )
كف رِدنَه والجيش .. وصل للكوفه
ــــــــــــــــــــــــ
عالنَخَل صِعدَت جثثنه وبعد مامش چاره
بيدك الفارس اتگطفه چن گطَفْت إحجاره
انته شِد رايه ونِفُصلَك سيفك إخمِد ناره
شِمِر وَرّطنه وغلَطنَه وهسّه ماكو أخباره
القصر الإماره إشگد زلم وصلت
وقادتنه بطويريـج أضن لِبدَت
من تِشمُر إبرَه ينسـمِع حِسـها
هيّه الطيور الـ بالسمه وشِردَت
( عزرائيل إنطاك إمچانه )
كف رِدنَه والجيش .. وصل للكوفه
ــــــــــــــــــــــــ
احنه جبناها بدينه وجِبنَه هَم تابوتنه
احنه لو ندري انته بالطف چا نِضَل ببيوتنه
حته ما نلحگ وصيّه نكتب و حَل موتنه
احنه بالطف مگبرتنه وما حصل زاتوتنه
إگرابك فرغ واحنه الخَذَانه الدّم
من نـار ســيفك گُبَــل لـ جْهَنّم
أصفر وَجهنَــه والفــرات أحمر
لا ضل أخـو ولاضـل أبو ولا عَمّ
( نَسْلْ الوادم ماضل بيها )
كف رِدنَه والجيش .. وصل للكوفه
ــــــــــــــــــــــــ
الشاعر مهدي التقي
/channel/aabas78
قصائد لكل ايام محرم اشترك بالقناة
ياعبا س ياعباس
****
زينب بحيرة وتنادي وين سبع الگنطــــرة
وين ابو فاضل جفيلي يشوف بعياله أشجره
گوم ياراعي العلم گوم ردني للخيم
ياعباس ياعباس
****
تصيح يابو الغيرة وينك هجمت علينه العده
وسيفك أرگاب الكتايـــب تسجد من تّجرده
يرعد ويمطر قهر وسفه طايح عالنهر
ياعباس ياعباس
***
شلون اصدك ياابو فاضل طايح أعلى المشرعه
وانته يوم البيه تحارب جنّــــه يوم الواقــــــعه
تگلب الدنيه وعلي ترضى بعدك ننولي
ياعباس ياعباس
*
زينب انه وجيت اعاتب والعتب ماينحمــــل
خوية گوم الحك سبوني بطيحتك يابو الفضل
گوم يالكلّك وفه ترضى اروح مجتّفه
ياعباس ياعباس
****
النفس جنت من ارد أجره بسكته عن لاينسمع
بغيبتك سمعوا ونـــــــيني وشافوا بخدي الدمع
مارحم حالي الزمن جمّع بگلبي المحن
ياعباس ياعباس
***
الشاعر وليد العكيلي
/channel/aabas78
قصائد لكل ايام محرم اشترك بالقناة
هاي الليلة هاي الليلة -- سابع ليلة من عاشور
""""""""""""""""""
هاي الليـــــلة ليـــلة الأزهــــــر
عباس الكافـــــل المشـــــــــكر
راوه الجيـش الموت الأحمــــــر
ياحيـــدر جانت ترتيـــــــــــــله
""""""""""""""""""
ملك الموت ونازل بيهــــــــــــم
عباس بجفه مبجيهــــــــــــــــم
أولهم ينخه بتاليهـــــــــــــــــــم
مانفعت وياه كل حيـــــــــله
""""""""""""""""""
ياهو ليثبت جـــــد عيونــــه
يخطف أرواح يشـــــــــــفونه
شلون العدوان يكَربـــــــــونه
وبزندة المعصب والشـــــــــيله
""""""""""""""""""
شاعر أهل البيت
الشيخ عبد الحسين المنصوري
/channel/aabas78
قصائد لكل ايام محرم اشترك بالقناة
حي الله عباس
غضب عباس ودخل للحومه
ظلت اكباله العده مهزومه
مثل حيدر من غزاها بيومه
أنه العباسُ أكرِم وكفى
جعل الميدان قاعا صفصفا
وعلى الاشلاء سيفا وقفا
طب عليها بزوده ياحلاة زنوده
للحرب مشهوده
كفو ياخيالها الما ينغلب
حاسها وخله الظهر فوك الگلب
صعب والعباس ملگاته صعب
عْجبَ القوم بسيفٌ قاطعا
بقتال الشرِ حقاً ابدعا
قوة من حيدرٍ قد جمعا
بيده شايل سيفه منها ماخذ حيفه
بكيفه هي بكيفه
الحومه ما بيها زلم توكف اله
تموج من خزراته ظلت كربله
يا شجاع الوكف يمه وقاتله
أرهبَ الأعداءَ والحقُ يُقال
سيطرَ العباسُ في سوح القتال
ولهُ عزمٌ شموخ كالجبال
من غضب خيالها ترادمت بخيالها
دخيله بيده وشالها
شهم ومخلفك علي يبن الكرام
تموت كلها من طرف نصل الخيام
على رمحه تگوم وبسيفه تنام
قد علا العباسُ ظهر العاديات
وأشقَ الدربُ من صوبِ الفُرات
انا من دونُ حُسينٌ لا حياة
حسين گرة عيني أمي التوصيني
حسين اخوي وديني
بيهس وبيهم ابو فاضل وكف
ما يهمه لو گبل سبعين الف
اخو خيته معتبر وزلمه كلف
كشُداقمْ كهريتً كضبور
عندما يغضبُ بالحرب صبور
انزل الأعداء في حفر القبور
عيت وطباها جن علي الوازاها
بضربته ساواها
الشاعر اسعد الناصري
/channel/aabas78
قصائد لكل ايام محرم اشترك بالقناة
نزله
ليلة 7محرم الحرام جديد
ويـــــــــنه شـــــــيال الـــــوى
كـــــــلفه صــــارت نــيــــنـوى
___
كلفه صارت ياكمرنه الـحومه كـلفـه ياكـمر
وأنتـه خيال المنايــه وأنـتـه خلاسـه الدهر
هـذا جـودي ياكفيلي يالله صول على النهـر
عالي زودك هايخويه من العطش كلبي نفطر
مــن العطـش كلبــي نــجـــوى
كـــــلفــه صــــارت نيـــــنــوى
كلبي عطشان ونخيتك أنته ساكي الضاميه
الحومه من دمهم يخويه حمره خلها وداميه
هالله. هالله يابــو فاظل باالجنود الرامـــيه
صــول بيــهم ها يـخويه وكـطها كط الراعيه
الـضــــــربتك مـــامـــــش دوى
كــــــلفــه صـــــارت نيـــــنــوى
___
أقـسم برب الجــلاله وأله أطـحنهــم طحــن
شـنهو تعـطش بت علـينه وانه رواي البـجن
اليـوم أخلي بآل أمــيه واقـعه بطـول الزمن
تذكر الصوله وخزرتـي مني ضـربات البــدن
على الــــــذبح الزمــــو ســــرى
كـــلـفـــه صـــــارت نيــــــــنوى
سيفي يكطف بالــمناحر والــزلم لامو زلـــم
حتى لو يكثــر عـــددهم أبو فاظل مايهـــم والشـرد بالحومه خويه مــوتته تصير بحلم
الخاطـرج يـختي يزينـب إله أعــدمهم عدم
أكــطــــــع أنـــــفاس الــــهوى
كـــــلفــه صـــــارت نـــــيـنـوى
____
أدري خـويه وبالمــعاره مـا تثني على العــدو
عالي زودك هايـخويه وكفـو مـــنك والكــــفـو
وحـــدك بـــدور الاخــوه .أنته عون ويه الاخـو
مــن انــدبك يابو فاظـــل ماتكول أنته العفـــو
شـــوفـتك تســـوى الـضــوى
كـــــلفه صـــــارت نـــــيـنـوى
راح أجيب النهر يمج يخـتي يختي ام الخدر
شنهو ماي وشنهو ذوله المعـصبج فدوه العمر
والله أذلهم من أطبن وأنفــــي أوراق العـــذر
أملي جودي من نهرهم وأســحك انه ع الكفر
أعــطــــش وســـــــيفي أرتـــوى
كــــــــلفه صــــــارت نـــــيـــنـوى
___
الشاعر الحسيني
مرتضى مكطوف الموالي
/channel/aabas78
قصائد لكل ايام محرم اشترك بالقناة
