للعباس عليه السلام
أصول اليوم عالعسكر
مثل صولة علي بخيبر
ولا يهمچ يبت حيدر
انا العباس
-----------
جيش الي انجمع كله/ مايرجع بعد لهله/ حصاد اليوم
يزينب للخيم روحي/ عطش سيفي عطش روحي/ يريد الگوم
لخلي السيف من دم الرگب يشرب
اصيحن بالخيم للموت من يرغب
اليصل للخيمه مايرجع
روحه ابلا ضرب تطلع
يطيح وصاحبه اليتبع
انا العباس
------------
اقسملچ قسم بالحي/ ارجعلچ وجيب المي / لترتابين
الشوارب بيدي الويها / حرم بالحومه اخليها / المفر لاوين
رايح والمعاره اگبالي ملعب كيف
اليوم السيف گاصد يلعب ويالسيف
عليهم من تشب ناري
لطشرهم على اكتاري
تجيچ ويالهوه اخباري
انا العباس
-------------
اخوچ ورايتي بچفي/ وشوفن والدي بصفي / فزع وياي
العزم بالله لطشرهم / ماخلي بشر منهم / انا الوفاي
جثث افرش طريجي البيه رايح راد
وخلي العاشر بعاشور ماينعاد
افر الجيش من راسه
وشلعه النوب من ساسه
وجيبن ليچ حراسه
انا العباس
-----------
اگعدي بخيمتچ يختي / اجيتي وياي وبختي/ انا الكفال
اگر عينچ وحگ عينچ / قسم مابيني وبينچ / يهز اجبال
مادام النفس بيه يخت عباس
اشحدها وتوصل اخيمچ شرار الناس
وحق حسين والغربه
سهله الهجمه مو صعبه
ابد ماثني بالضربه
انا العباس
-----------
غيره وصعدت براسي/ اشم اعتاب بنفاسي/ عتب احباب
وحگ عون وعلي الاكبر / لخلي العلگمي احمر/ وترسه ارگاب
واليشرد يجي ويجيب راسه وياه
خايف لو رجع وبدربه اتلگاه
ذخرني الوالد الهايه
بأسمي سجل الرايه
وادري كربله الغايه
انا العباس
-----------
وحق المصطفى وحيدر/ ضماچ اليوم يتبخر/ انا الرواي
اجيب العلگمي بجودي/ عهد يازينب بزودي/ اجيب الماي
نويت اليوم هاذا الجيش اطشرنه
لجل عيناچ فوگ الشاطي المنه
اخلي العلگمي اجروفه
بعد للماي متشوفه
وعزيها بعزه الكوفه
انا العباس
-------------
السيد
كريم دانه الاعرجي
---
/channel/aabas78
قصائد لكل ايام محرم اشترك بالقناة
عباس من طب للحرب بركان من عينه يصب
والعسكر احتار
واحدهم الواحد سأل عباس لو حيدر نزل
لو صاحب الغار
هوس العباس عالشاطي وتبختر
انه سبع الكنطره نصبني حيدر
انه العباس انه العباس
....................................................
من نزل للحومه عباس وتعنه المشرعه
الزلم شردت وابوفاضل يرتل القارعه
هلهل بسفه ملك وبكيفه
حتى ملك الموت من عنده اعتذر
بهيبته وعزمه . ويا حلاة أسمه
أخو زينب أسمه عباس الكمر
عباس للشاطي نزل من وجهه يتكاطر خجل
ويعاين الماي
يسمع زينب نادته براسه صعدت غيرت
كله امشي وياي
الشاطي لم الماي بالجود وتحضر
انه سبع الكنطره نصبني حيدر
انه العباس انه العباس
..............................................
مشى وشال الجود بيده وعينه تتجادح غضب
مثله جان السيف ضامي ومن دمه العسكر شرب
بغيرته وعزمه الجيش ما همه
صاح انه العباس راعي الموزمه
اليوصل حدودي لو يمس جودي
الااخلي الحومه نهر امن الدمه
عباس بيهم من بدى عباس سل مهنده
وضل يحصد ركاب
عزريل من شافه أستعد محتار عالشاطي كعد
ومتيه الحساب
كلمن اليوصل كمر هاشم توذر
انه سبع الكنطره نصبني حيدر
انه العباس انه العباس
.............................................
صعدت الغيره وتحده الموت عباس الكمر
درعم بسيفه وكلبها وصاح حي اعله النحر
مايضل واحد والنهر شاهد
الا اوصل الماي يم زينب عهد
صدري دكيته وجودي وصيته
من اموت ايموت ما يخلف وعد
عباس غيرة والده بدماه ضلت خالده
وبالشده معروف
من صغره واتكفل خدر ياويلي لو دك الصدر
يتراجف الخوف
عاين اعله الحره عباس وتبشر
انه سبع الكنطره نصبني حيدر
انه العباس انه العباس
.................................................
من بدت تدوي وبده العسكر يطوف بحضرته
انتفضت الغيره بوريده وراح شايل رايته
وارتفع صوته من وصل موته
ياهلا وكل الهلا بجيتك تعال
ما رجف كلبه يدري موصعبه
معلم امن الصغر عباس النزال
عباس قدم يمنته كطعوها قدم يسرته
وماقدم الجود
حاول يوصلها الخيم والعين مصيوبه بسهم
احساسه موجود
غمض اعيونه ومشه خطوه وتعثر
انه سبع الكنطره نصبني حيدر
انه العباس انه العباس
.............................................
وكع راعي الجود والدنيا بدت تفكد ضوه
شال روحه من سمع زينب تدور عالهوه
خايف تشوفه مكطعه جفوفه
وصاح يا زينب يخويه المعذره
باخر انفاسي ماسلم راسي
والعمود يعيد طبرة حيدره
عباس نايم عالترب يازينب وحاله صعب
والعسكر يدور
بالخيل سحكو جثته بالسيف كطعوا ركبته
والضلع مكسور
زينب العباس من عندج تعذر
انه سبع الكنطره وصاني حيدر
انه العباس انه العباس
........................................
خادم خدمة الحسين
الشاعر
محمد الموالي
/channel/aabas78
قصائد لكل ايام محرم اشترك بالقناة
محرم 1447ه-2025م
قصيدة الليله السابعه (نزله)
عباس أبو الغيره الهاشميه
خلّه الگوم تترادم سويه
؛★★★★★★★★★★★★★
شال جوده ومِن المخيّم طلع
صعد فرسه وعلى العيّاله فزع
هذا يومك زينب تهلهل وراه
يبو الغيره الباشط بچفك لمع
إلى أين المفر يا آل اميه
خلّه الگوم تترادم سويه
؛★★★★★★★★★★★★★
نكّس الرايات اصرار وعزم
الزلم گدامه تره ماهم زلم
منو يوگف ضد يمينه والشمال
يواجهونه هاي عدهم بالحلم
اليلاگي الگمر معناها رميه
خلّه الگوم تترادم سويه
؛★★★★★★★★★★★★★
ها انا العباس ابو فاضل هتف
گبالي اتحده إذا واحد وگَف
صار بيهم رعب من شافوه اجه
والشجاع البيهم من الهم رجف
انا العباس وينه العال بيه
خلّه الگوم تترادم سويه
؛★★★★★★★★★★★★★
طگه وحده گمر هاشم من يطگ
غيرة العباس تحرگهم حرگ
ابو فاضل والنعم لمن نگول
يكض بيده الفارس يشرگه شرگ
سواهم وذر راعي الحميه
خلّه الگوم تترادم سويه
؛★★★★★★★★★★★★★
ضيّگ اعلى انفاسهم حتى الهوه
مجزره سواها شيّال اللوه
الگمر ما يذبح شخص واحد ابد
بضربه كل اثنين يطبگهم سوه
شبع سيفه بدماء الناصبيه
خلّه الگوم تترادم سويه
؛★★★★★★★★★★★★★
حتى جرف الماي بالدم انترس
انصگرو وفارسهم السانه انخرس
الشرد منه يصيده صيّاد الزلم
والوگف ينداس بجدام الفرس
مايتلاگه ابو نفس الأبيه
خلّه الگوم تترادم سويه
؛★★★★★★★★★★★★★
جعفر عطيه البزوني
/channel/aabas78
قصائد لكل ايام محرم اشترك بالقناة
اختك رادت اتشوفك او سمعت طاحن اچفوفك
اجيتك للنهر والناس ما خلوني يا عباس
اختك رادت اتشوفك
*
اجيتك للشريعه او تعثر اجدامي
او عفتها ابنار اميه تسعر اخيامي
اجيتك ردت ازور المنحر الدامي
أو على جسمك اطوف او اعلن إحرامي
او سبع اشواط اطوف اعليك. ابهاي الحاله ما اخليك
اجمع جسمك او يالراس ما خلوني يا عباس
اختك رادت اتشوفك
***
اجيت امشي او حنين الخوه يدفعني
علي صعبه تروح او ما تودعني
لأن انته كفيلي او بالأمر معني
او غيرك ما ردت لهلي يرجعني
اجيت وبالنفس غايه اشوفن قبضة الرايه
وشوفن جربتك والطاس. ما خلوني يا عباس
اختك رادت اتشوفك
***
اجيتك ردت اشوفك يا بعدعمري .وسولفلك سوالف بيها ما تدري
بعدك راح اخوي او ضيعت خدري
او بكت بس اليتامى لايذه ابكتري
يعباس الفواطم هاي. اجنّك للشريعه وياي
لاكن زمرة الارجاس ما خلوني يا عباس
اختك رادت اتشوفك
***
اجيتك يا كفيلي او شارده افكاري
او من حر العطش تحوي الكلب ناري
او چنت مجبوره اجيك او تسمع اسراري او صحتلك من بعد خويه اقبل اعذاري
انادي والظهر محني. ارجعت يا خويه سامحني
العذر عندي يبو النوماس. ماخلوني ياعباس
اختك رادت اتشوفك
****
اجيتك يا گمر بهمومي واحزاني
او عن ذكرك ابد ما بطل الساني
تهت منها الشريعه او گلبي دلاني
لين يا با الفضل منعتني عدواني
يتيهني عدوي ايريد ويگلي الشريعه ابعيد
حطوا عالدرب حراس ماخلوني ياعباس
اختك رادت اشوفك
**
الشاعر ابو حيدر المجراوي
/channel/aabas78
قصائد لكل ايام محرم اشترك بالقناة
قصائد محرم 1447ه-2025م
نزله للانصار ع(هلا بنصاري وهلي)
هلا بنصاري وهلي مدد صاحو يا علي
عابس وجون وحبيب بيهم. الهم ينجلي
___
يا. هلا بهل الحميه. وهلا بشراف العرب
يا هلا بحزام ضهري. وابن ضاهر ليه گرب
گله تبشر يل الحنين اگبالك نرخص الرگب
حسين گلهم ونعم وگف بنصاره وخطب
وأنعم يهل الزود.
هلا. بنصار الولي
_
هلا. بنصاري النشامه و يا هلا بهل العزم
يا. هلا بهل المراجل والله منكم. والنعم
جون لو طب للحرابه گباله ما توگف زلم
وابن ضاهر بل معاره. فارس. وگد ألاسم
عابس ايصيح بصوت
. بلي يل غالي بلي
____
زلم،،،، ساعات، المنيه نزلو السوح الحرب
خلو الفرسان بل طف تيهت. وين. الدرب
هوسو هوسه عراضه وكلبو العسكر گلب
طبگو اليمنه اعليسره وشمال أعلى الغرب
زلم متهاب الموت
وال گربهم يبتلي
___
من زهير ومن برير اتعلمت معنه الوفه
الصدگ وكت ال منيه. للرجال اعضم صفه
حسين من زلم الحميه. ابد. ما شاف. الجفه
الحومه من شدو عليهه . الجيش بل بر اختفه
ووهب للكلفه يفوت
گال. خلوههه الي
____
وگفو، بنص المعاره. . ونعم. يا حر ووهب
ذوله عنوان الطهاره. وذوله من اشرف نسب
من برز حر الريحاي سوه بل حومه العجب
تعب الفرسان كلهه. وهوه نشمي ولا وتعب
العسكر يضل محتار
زينب انتي ادللي
_
خادم الحسين سلام عزيز السعيدي
/channel/aabas78
قصائد لكل ايام محرم اشترك بالقناة
للانصار احمد العگيلي
انت وين وهمه وين .. كلها ضدك يا حسين
بالحچي اخذ التريده بالفعل عنك بعيده
كلها ضدّك يا حسين
ـــــــــــــــــــــــــــــــــــ
كل رسايلهم خديعه بيها والهم غايه
گبل تمحيص المواقف هبّطوها الرايه
ناس ما عدها ضمير شلون عدها احچايه
ورغم الاف التبيعك .. ربعك الوفّايه
قِلّه سبعينك اكيد .. لچن ظلّو ايد بيد
واليمد للباطل ايده بالفعل عنك بعيده
كلها ضدّك يا حسين
ـــــــــــــــــــــــــــــــــــ
خدم گالو احنه لكن هُمّه مو خِدّامك
رگصو اعله جروح گلبك للاسف گِدّامك
تشابهو ويه الحوافر مِن تدوس اعظامك
وسط جسمك ما دروهه شگد عددهه اسهامك
اوعودهم بس باللسان .. ابد ما الهم امان
كل خططــهم مو جديده بالفعل عنك بعيده
كلها ضدّك يا حسين
ـــــــــــــــــــــــــــــــــــــــــــــــــــــ
باعو الدين بدراهم منهم شتترجه
شما ردت تلقي عليهم الف حجّه و حجّه
اليدرس بجامعة حبك گلبه صافي اتخرجه
واليخونك واليعوفك ما اله كل منْجه
ابذله گظوها السنين .. عالخيانه امعلّمين
زمره ما عدهه عقيده بالفعل عنك بعيده
كلها ضدّك يا حسين
ـــــــــــــــــــــــــــــــــــــــــــــــــــ
حسين خسران اليعوفك واليتبعك فايز
واجب ايطيعك ومو شَيْ إختياري وجايز
گبل لا انت تصيحه للمواقف جاهز
بالميادين بعزيمه بين اديك ايبارز
مو تودّيله كتاب .. ويوصلك منّه الجواب
ينقل الـبيعه بريده بالفعل عنك بعيده
كلها ضدّك يا حسين
ــــــــــــــــــــــــــــــــــــــــــــــــــــــ
اهل دنيه تدري بيهم مو اهل للخدمه
هو يخسر بالنهاية اليچفي بيده النعمه
مو ثقة ولا عنده دين الما يصون الكلمه
انت رحمه وهمه جانو كلهم بلا رحمه
كلمن اختار السكوت .. يعيش بالذلة ويموت
وهاي الاطباع العنيده بالفعل عنك بعيده
كلها ضدّك يا حسين
ــــــــــــــــــــــــــــــــــــــــــــــــــــــ
الشاعر احمد العگيلي
/channel/aabas78
قصائد لكل ايام محرم اشترك بالقناة
شيخ الانصار
إبني دوله للشعائر
شيخ الانصار
يا حبيب ابن مظاهر
علم.. بيده عابس
علم ..للمجالس
...
العمر تاليته الاجل مهما العمر طال
وانت راح تظل درس تقراه الاجيال
ارجال توگف بالقتال
وللشعائر هم رجال
الله يخلق كل زمن لحسين ابطال
يخلق انصار
بالكره الارضيه كلها
يخلق انصار
واحسينا مستهلها
خدم كالنوارس
علم للمجالس
...
يا حبيب وشيبتك تبقه علامه
صاحب الشيبه تعلمه اعله الخدامه
يوگف بموكب يصيح
هله بزوار الذبيح
وذلة الخدمه يسميها كرامه
وبمحرم
انت توگف بالحرايب
وبمحرم
هم خدام المواكب
وفه بلا منافس
علم للمجالس
...
يا حبيب وجون شوفه اسود اللون
بعده راح يصير بالخدمه الف جون
الناس بعده تنتبه
خدمتي اتبيض الوجه
وانه احط خدي على خد اليخدمون
والخدمني
هذا اسمه صاحب الحظ
والخدمني
بالقيامه وجهه ابيض
درس للمدارس
علم بالمجالس
...
يا حبيب وعابس اتعرفه الملايين
اجنونه راح يسوي دوله للمجانين
جيل من هذا الجنون
للمجالس قادمون
ناس لطامه وعشگهم ينحسب دين
اعقل الناس
من تسجل عندي خادم
اعقل الناس
من تجنن بالمآتم
أنه اعليها حارس
علم للمجالس
...
يا حبيب وموقف الحُر يبقه مكتوب
بعده چم مذنب يجيني لبابي ويتوب
اليجي تايب من ذنب
من انصاري ينحسب
انه اسمي رحمة الله واوسع البوب
الماله محبوب
مْن آخر الدنيه اجيبه
الماله محبوب
اني يلگاني حبيبه
فعل مو هواجس
علم للمجالس
...
لو گضت انصاري بالطف تنوجد ناس
تنوح لمصابي تظل لآخر انفاس
شيعتي ليوم الظهور
تبچي لگطع النحور
عالصدر تلطم وتذكر صدري الانداس
عندي موعود
ياخذ بثاره السبيه
عندي موعود
ينصره اليبچي عليه
غداً تلگه فارس
علم للمجالس
...
خادم الحسين ( عليه السلام)
كرار حسين الكربلائي
( ابو كميل)
/channel/aabas78
قصائد لكل ايام محرم اشترك بالقناة
اليوم الكــــلافه وانتخت راعيها
حيهه الصحابه والنشامه البيها
***
اليوم الكلافـــــــه اتبيــن الوفايه
زلم المواقف للحـــــــرب عنايه
كضت شواربهه وتهـــز بالرايه
بالغاضريه اندكت الهـــــــم ثايه
كلهــا فوارس والعـــزم غاطيها
حيهه الصحابه والنشــامه البيها
***
نعم وثلتنعام من كــــــــــل واحد
كل فارس المنـــــــهم يعادل قائد
صامد يحشم بالملاحـــــم صامد
وجيش المعاره اليوم منهم شارد
لوهدو ابــــــــدم انترس واديها
حيهه الصحابه والنشـامه البيها
***
كلهم نشامه الشــــاب ويه الشايب
حب الحسين النفس بيهـــــم ذايب
صاحب يحزم كام ظهر الصاحب
بثار الغريب اتصيح كلـهه اطالب
وسط المعاره مرتفـــــــع ساريها
حيهه الصحابه والنشـــــامه البيها
***
كلبو اليسره اعله اليمين بنخــــوه
واحد يكل الثاني حيـــــــــهم تكَوه
طاحو عالعدوان نقمــــــه وبلـــوه
صارمهم الضامي بدمـــاهم يروه
صارت عجاجه واظلــمت ذاريها
حيهه الصحابه والنشــــامه البيها
***
عدهه يقين وعن علـــم فزعــــتهه
دون الخيام وزينـــــب وعيلــــتهه
شنهو النفوس الغاليه وقيمـــــــتهه
ترخصهه لحسين وهله غايـــــتهه
باعو نفســــهم والســـــبط شاريها
حيهه الصحابه والنشــــــامه البيها
***
هجمت اسود النخوه ركضو ركضه
كل واحد بدم الشـــــــــهاده اتوضه
وم الجهاد بهيبـــــه تمــــــم فرضه
عن الحسين بعطفــــه رادو يرضى
همهم رضه حسين الســـــبط واليها
حيهه الصحابه والنشـــــــامه البيها
***
الشاعر ابو علي الركابي
/channel/aabas78
قصائد لكل ايام محرم اشترك بالقناة
عكيليه للانصار
* يحسيـن الدنيـه اشـظل بيـها * يحسيـن الدنيـه اشـظل بيـها
* تحـرص ليش الناس اعليـها * يحسيـن الدنيـه اشـظل بيـها
1- ----------------------------------------------------
نهــجـــك للمـــوت احنـه اتبــاعـــه او هيــه امطاحــن حسبــة ساعــه
كــلـمــن عـــاد ايطـلعـــه اذراعـــه * بالهيــن لا مـا ننـطيـــها * يحسيــن الدنيــه اشـظل بيـها
2 - ----------------------------------------------------
اتريــد انعـوفــك وكـت المحـنــه نـفـرض بــاجــر عنــك رحـنـــه
اشكـد بعـدك راح انعـيش احـنـه * عـود انعـوفـك لا تحجـيها * يحسيـن الدنيـه اشـظل بيـها
3 - --------------------------------------------------
اتـريـد انعــوفـــك يبـن الزهـــره حـتى انعـيـش اخـلافـــك فـتـــره
هــــوه ابنـــادم ضـامـن عـمــره * للمـوت أولـها او تاليها * يحسيـن الدنيه اشظل بـيها
4 -
هـيـــه الدنيــه اشـتســـوه ابدونــك حـــتى الأنــصــار أيــعــوفــونـــــك
وحــــدك بــالطــــف ايخــلـــونـــك * اشتتــوقــع احنــه انسـويـها * يحسيـن الدنيه اشظل بيـها
5 - --------------------------------------------------
جـينـه اويـاك انسجــل مــوقـــف فــوك السـاتــر بـاجــر نـهـتـــف
او تكـتـب كـل كطــرة دم تـنـزف * هـاي اللحظـات انتانيـها * يحسيـن الدنيـه اشـظل بيـها
6 - -------------------------------------------------
عـــود انعــوفــك هـاي ابعـيـــده والمــوت اويــاك احـنـه انريــده
كلمــن شايــل روحــه ابــ أيـــده * واجـيــوش الدنيـه انـلاويـها * يحسيـن الدنيـه اشـظل بـيها
7 - -----------------------------------------------
يــــا مـــشعــــل درب الحـــريــــه ويــــاك امــصـــفـيـــــن النـيـــــه
مـاتســـوه الدنيـــه او مـكـضيـــه * هاليـوم الزهــره انـوفـيــها * يحسيـن الدنيـه اشظل بيـها
خادم أهل البيت (عليهم السلام)
الشاعر أبوحيدر المجراوي
2025 م - 1447 هـــ
/channel/aabas78
قصائد لكل ايام محرم اشترك بالقناة
رئيسية مسلم بن عقيل عليه السلام
هاشمي روح وعقيده. ما يخوّفني بوعيده
لا وحگ دمعة حميده. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
آنه من نسل الهواشم غيره وخلاق وحميه
راسي عالي ويبقه عالي. ما اطخ راسي لأميه
لا يبن مرجانه اسمع ما تخوّفني المنيه
آنه مسلم ما اساوم. عالعقيده الحيدريه
مسلم وثابت ولائي. حب علي يسري بدمائي
ويبقه لحسين انتمائي. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
آنه مبعوث الامامه. خادم حسين وسفيره
حسين ابن جده مُحمّد. ماكو مثله ولا نظيره
ما ابايع غيره واحد. هاشمي وشيخ العشيره
لا تظن ليزيد أخضع فاسق وبايع ضميره
مؤمن وبالله عتصامي. جيت ابلغ عن امامي
اول وآخر كلامي. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠
ندري يهل الكوفه ندري. ما تعوفون الخيانه
ما تريدون اليعزكم. عشتو عالذل والمهانه
لا عهد لا ذمه عدكم. لا كرامه ولا امانه
آخره ودنيه خسرتو. من طعنتونه بگفانه
مسلم تعرفوني كلكم. ما ادنّگ راسي الكم
يالغدرتوني بفعلكم. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لن ابن مرجانه ناده. إلّا يا مسلم اقتلك
لو تبـايع آل اميـه. لو تموت وما امهلك
گلّه مسلم لا يظالم. چف صلح هيهات امدلك
يا حلاة الموت عندي. ولا ابايع طاغي مثلك
الله ينطيها الشهاده. مكرمه لأشرف عباده
من بعد موتي السعاده. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠
آني اول واحد انطي. في سبيل حسين دمي
اسمك وقصرك امسحه. وينذكر بالكوفه اسمي
وَهَم يبن زياد حكمك. يفنه والمايفنه نجمي
لا تظن يرهبني سيفك. لكن عله حسين همي
من يجي تغدرونه ادري. هذا هوه الكسر ظهري
فدوه للمعصوم عمري. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ما اذل لا والخلقني آنه من بيت الامامه
يبقى يبن زياد ذكري. خالد ليوم القيامه
آنه مسلم خاف ناسي. رابي عالعز والشهامه
الدنيا ويّاكم مذلّه. موتي لجل الحق كرامه
ما خنت عهدي وضميري. اعلم واعرف مصيري
قائدي حسين واميري. ما تذلّوني
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
/channel/aabas78
قصائد لكل ايام محرم اشترك بالقناة
نزله
حوار مسلم مع طوعه رض
گومي أستقبلي ياطوعه خطارچ
مسلم بن عقيل الليله يم دارچ
__
مسلم ظل وحيد وحاير أبأمره
مابين الأزقه يجذب الحسره
عطشان ودليله يستعر جمره
لمن شاف طوعه گلها ياحره
أشوفچ حايره وتوزعي أنظارچ
مسلم بن عقيل الليله يم دارچ
__
ياطوعه آنه مسلم ماتعرفيني
مالي أي گرابه أهنانه تدريني
فضل منچ إذا عندچ تضيفيني
گالتله هلا بجيتك يضي عيني
كريمه وماتردين أدري زوارچ
مسلم بن عقيل الليله يم دارچ
__
مو داري يمسلم أحسبه دارك
ومو خطاري انته أني خطارك
وخلي هذا ليلي يضوي بأنوارك
أدخل لا تشع يامسلم أخبارك
ماقصرتي والله إيعلي مقدارچ
مسلم بن عقيل الليله يم دارچ
__
طب الدار طوعه ومنحني الهامه
مايندل حجرته وهيه گدامه
طاحت من خشوعه بيده العمامه
شايل غيره من أسلافه وأعمامه
والتاريخ باچر يذكر أخبارچ
مسلم بن عقيل الليله يم دارچ
__
خوفي عليك لا باچر يچتلونك
بالكوفة وشوارعها يسحبونك
غدارين أهلها وما يرحمونك
ومن قصر الإماره خوفي يرمونك
من دون النسه الله إلي أختارچ
مسلم بن عقيل الليله يم دارچ
__
إلچ ياطوعه هذهِ وصيه أوصيها
أمانه هالوصيه وزين أحفظيها
أوصيچ بحميده من تشوفيها
عني بالنيابه الهامه مسحيها
سلميلي عليها لو تجي أديارچ
مسلم بن عقيل الليله يم دارچ
____
الشاعر ( أسعد قاسم الكريعاوي )
/channel/aabas78
قصائد لكل ايام محرم اشترك بالقناة
ياهلا بطولك يمسلم ياهله
هذا يومك مهد لطف كربله
طوعه بيك اتنخت وشدة عزم
راوي عدونك شنو معنى الزلم
=========================================
للحرب انزل يمسلم عليهم أعلن حملتك
بيد الجموع وعددهه حان موعد ساعتك
ما أريدك تظل حاير لون ربعك عافتك
انت تربات الصميده حيد لبوه الجابتك
يصيح ظل بيك المله
ياهلا بطولك يمسلم ياهله
بغيرة الكرار للكلفه احتزم
راوي عدونك شنو معنى الزلم
=========================================
خلي ياحيدر ندائك من تطب سوح القتال
من تشيل السيف بيدك يمك اذل الرجال
والعده نصين طرهه اليمنه حطها اعله الشمال
لا محال الصعبه تنحل سيفك الهه لا محال
سيفك الهه المعضلة
ياهلا بطولك يمسلم ياهله
ويله ياويله البچفك يلزم
راوي عدونك شنو معنى الزلم
=========================================
احمل اعله اعداك بيدك صول صولة حيدره
اتلزم اعله الموت أريدك كل الييضدك سره
المادره ياهو مسلم باچر ارد اسمع دره
الموت الأحمر صار اسمك يابو ظاهر ينقره
بيك كشخة المرجله
ياهلا بطولك يمسلم ياهله
الجيش اريده اگبال سيفك ينهزم
راوي عدونك شنو معنى الزلم
========================================
عنك التاريخ باچر يكتب ادروس وعبر
ياهو مثلك يبن هاشم وحده بغربه انتصر
الناس گطره اكبال سيفك وانت يامسلم بحر
انت من ينگال عنك باچر احزام الظهر
بسم رب البسمله
ياهلا بطولك يمسلم ياهله
جزم سيفك من تهد يجزم جزم
راوي عدونك شنو معنى الزلم
=========================================
خله فوگ الرگب بصمه للحرب يوم التطب
و الأمثال اعله الشجاعه بيك اريدن تنضرب
كلشي يسهل يابو ظاهر صعب ماعندك صعب
كلهه عدوانك عبيدك وانت سيد للحرب
الجيش اهزمه وقاتله
ياهلا بطولك يمسلم ياهله
بنهج حيدر بالحرب ظل ملتزم
راوي عدونك شنو معنى الزلم
=========================================
الشاعر احسان الحميداوي
٢٤،٦،٢٠٢٥
/channel/aabas78
قصائد لكل ايام محرم اشترك بالقناة
ليلة مسلم عليه السلام
يا حسين بعيني موجات الدمع
بيها يتراوالي مسلم ينصرع
*
يا حسين بهذا دمعي كلشي يتراوالي
موجه ذبحت روحي سكته موجه ذهلت بالي
ليش برسومك سوالف ما تبشر احوالي
گلي شنهي اخبار عندك عن ابوي الغالي
گلبي ما مرتاح من هذا الوضع
بيها يتراوالي مسلم ينصرع
*
يا حسين اعليك امشي كل أئمة ربي
سولف شعندك سوالف لا تعذب گلبي
انت تدري بعد أبويه ما أشوفن دربي
بين موجات المدامع عيني ظلت تربي
النفس يا ريت بعده ينگطع
بيها يتراوالي مسلم ينصرع
*
يا حسين اشلون بيه وين اروح الليله
و الله لو اندل مچانه يا حسين امشيله
كلشي ماعندي يعمي بس اريد اشكيله
بعيني من فركاه مصيبه منها ينهد حيله
عمري بچفوف المصايب ينصفع
بيها يتراوالي مسلم ينصرع
*
يا حسين بعيني دمعه دوهنت ايامي
كبل لا احلم لكيت بعيني ميته احلامي
يا حسين وبعد دمعه تروي گلبي الظامي
بيها اشوفن ابن عمك عنه طوعه اتحامي
يا حسين اتمنه اصيرله درع
بيها يتراوالي مسلم ينصرع
*
يا حسين جروح بيه أكثر امن اهوايه
راية العباس ليش ابدمعته امحنايه
عيني بين ادموع عينك عثرة اعله احچايه
يمكن آنه أول يتيمه في طفوفك هايه
موتي من بعده مثل موت الشمع
بيها يتراوالي مسلم ينصرع
*
آنه لو ادري الرزيه تغفه بين اجفوني
اربع و عشرين ساعه ما أغمض عيوني
وينهم أهل المدامع خلهم ايحضروني
امصيبة الوالد مصيبه شيبتلي اضنوني
صوت محبوبي بعد ما ينسمع
بيها يتراوالي مسلم ينصرع
*
الشاعر سليم الغزالي
/channel/aabas78
قصائد لكل ايام محرم اشترك بالقناة
ليلة مولاي مسلم ابن عقيل عليه السلام
ودعته وكسر ظهري ودعني بدمع يجري
وداعي كاسر حسين وداع ايشيب العين
==========
توادعنه بدمع وابونه وبحسره
وداع اخوه بدموع اتفطر الصخره
شبكني حسين ويلي وخنكته العبره
ومشه خطوه واشوفنه لزم ظهره
لازم ظهره واتحسر واتغير ابو الاكبر
راحت ذيج الإسنين وداع ايشيب العين
==========
وكفنه ابلا حجي ويسولف المدمع
ونين حسين والله بگلبي ظل يشلع
الصبر من هل وداع اللي جره يجزع
ابو السجاد شيبه برمشه ظل يطلع
رمشه من القهر شيب طوله كبالي جن حدب
كاسر گلبه الاونين. وداع ايشيب العين
ودعته وكسر ظهري
==========
هوينه اعل الأرض واحد شبك واحد
يعين الله گلب كلمن اخو فاجد
انكسر ظهري يكلي ودمعتي شاهد
مثل عباس تكسرني اضن رايد
يگلي ويحجي بالكوه. تصعب فرگة الخوه
نار الفركه نارين وداع ايشيب العين
==========
يبو السجاد گتله كفكف ادموعك
فدوه اظلوع مسلم خويه لظلوعك
اليهم مسلم يبو السجاد موضوعك
بالطف اعتذر من يطفن اشموعك
فدوه لعينك اتگطع مااريد بذبحتك اسمع
لذبحك خويه ناوين وداع ايشيب العين
==========
بطلنه دمعنه والحجي اتغير
من حظرت حميده وشافت المنظر
يبويه تكلي شنهو إيّبَجي ابو الاكبر
عمي ليش يبجي ويمك اتحير
حاير بنتي من سئلت سكته ودمعتي هَلّتْ
ناوين اعل السفر وين وداع ايشيب العين
==========
بجت يمي حميده وهدمت حيلي
يبو السجاد خويه افزعلي ياويلي
اخذ مني حميده خويه وادعيلي
بوداع إعزاز گلبي مانمت ليلي
ليل الفركه مانمته گلب اعزازي فاركته
اصفك تالي جفين وداع ايشيب العين
==========
الشاعر علي النائلي
/channel/aabas78
قصائد لكل ايام محرم اشترك بالقناة
طب عباس واهتزت عساكرها
مثل الخيط يكدر كربله يجرها
🔶🔶
گلهم هاي زينب وانه كافلها
يشوف الموت كلمن راد يوصلها
هاي الگاع بالبيرغ ازلزلها
اخلها تميل بيدي وكربله اعدلها
اكسرها اظهور الخيل .. والرايد بينه يعيل
( واليوصلنه يرد اجنازه )
بسيفي الروس حدر الخيل اسطرها
🔶🔶
تصيح الغوث منه و فايضه بدمها
اكبار الجيش ظل بالكاع يردمها
بسيفه الروس بالتوقيع يختمها
الملك الموت يختمها ويسلمها
وبمملكة العباس .. دستور تحفظه الناس
(قانون الدم صار بسيفه )
بدرس الموت خل تحفر مگابرها
🔶🔶🔶
يم الماي واكف ذالهم ذله
ذب الثام وجهه وصوتهم يعله
دخيلك صاح كل الجيش من ظله
يجيب الثار بيده الگالب الدله
ذاك الجيش الجرار .. ظل بالكافل محتار
(وبصدر الطف واكف غيمه)
گلوب الناس وصلت حد حناجرها
🔶🔶
يشگ الجيش ظل بسيفه ويروفه
مثل النيل عصة موسى بجفوفه
حته الماي ظل يسجدله بجروفه
والفرسان من خزراته مخطوفه
صفره وجوه الفرسان .. طك بجفه الطوفان
(طوفان الدم طگ بالحومه )
متيها جنود جف الخوف ساطرها
🔶🔶
ساحة موت بس عباس قاضيها
بالميدان سيفه الشده يگضيها
بيده يدور حاضرها على ماضيها
السبعه تضيك بيهم مثل اراضيها
بيهم يخسفها الگاع .. ولحسين يصير شراع
( وعالشط الزينب هوساته )
والعباس كل الدنيا صاكرها
🔶🔶
علي حسين المنصوري
/channel/aabas78
قصائد لكل ايام محرم اشترك بالقناة
الخيل فزعت ياكفيل اضعوني
الخيل وصلت خويه يم اخيامي
يل جنت اشوفك كل وكت كدامي
اول نهر مذبوح بالطف ضامي
مصيوبه عينك ليش بعد اعيوني
الخيل فزعت وانه المتانيتك
لو ادري هيج يصير ماوديتك
المشرعه اخذت صين خي من صيتك
شلون تقبل توكع ويولوني
عباس زمزم شوفتك يل غالي
ياگمره ليش الليل منك خالي
شيصير بيه من عفتني الحالي
اسياطهم باجر تطك امتوني
عباس ماترضاها يابو الشيمه
باجر سبيه اختك تطرالهيمه
يل خيمه ضلك جان فوك الخيمه
عنك قدر والموت اليبعدوني
الماي شنهي الماي بس ردلينه
لن شوفتك عباس التروينه
ماترضه نزعل بعدك ايبجينه
طولت خابت يل عزيز اضنوني
يانهر طايح عالنهر معقوله
انت البحر محد وصل يم طوله
ريت الايادي الذبحتك مشلوله
ياريت گبلك يل گمرذبحوني
تمت
محمود رحيل
/channel/aabas78
قصائد لكل ايام محرم اشترك بالقناة
نزله 7محرم الحرام
(شردت أشباه الزلم) جديد 1447
شردت أشباه الـزلـم
طبها عبـاس الشهـم
حي الله عباس. حي الله عباس
ــــــــــــــــــــــــــــــــــــــــــــــــــــ
طبها عباس الغضنفر والزلم كامت تميل
شردت الخيل بزلمها وعتلى صوت الصهيل
كلها تصـرخ بالمعاره يادخيلك يادخيل
يبس أكلوب الكتايب والدمه نهر ويسل
يبس أكلوب وجـدم
طبـها عبـاس الشـهم
حي الله عباس حي الله عباس
ـــــــــــــــــــــــــــــــــــــــــــــــــــــ
طبها عباس المعاره والوضُع كله أختلف
طشر الجيش ونظامه ياعلي صاح وهتف
يسحك بخشم اليلزمه وقائد القائد جتف
ولزلم شردت يويلي وصلت أطراف النجف
يسحك وداس الخشم
طبــها عـبـاس الشــهم
حي الله عباس حي الله عباس
ـــــــــــــــــــــــــــــــــــــــــــــــــــــ
اليمنه ع اليسره يطبكهاضلمه ونزاح الـضوه
ويقسم برب الجلاله إليوم افحط نينوه
ضجت الحومه بترابه كاها وتريده الهوه
ماكو بيرغ بالمعاره بس كمر شايل لوه
واقـع أنه ومــو حلم
طبـها عبـاس الشـهم
حي الله عباس. حي الله عباس
ــــــــــــــــــــــــــــــــــــــــــــــــــــ
واقع بزود المنايه اليوم أسوي الواقعه
خيبر وصفين أعيدن رايه أدك ع المشرعه
كربله وكل الكتايب بيها أسوي الفاجـعة
وأخذ الماي على كيفي والجثث متوزعه
سـيفي يثـلمهم ثـلم
طبـها عبـاس الشـهم
حي الله عباس حي الله عباس
ـــــــــــــــــــــــــــــــــــــــــــــــــــــ
كلها نادت بالمعاره الحظه بس خل نستراح
أرحـم أدخيلك يكافل والنهر الجـلك مبـاح
أغرف الماي ع كيفك غصب عنه وموسماح
أملي جودك من عذبنه ولشمر وبصوته صاح
عنده مرفوض السلم
طبـها عبـاس الشـهم.
حي الله عباس حي الله عباس
ـــــــــــــــــــــــــــــــــــــــــــــــــــــ
مايهم بيها الاعادي بالجمع وشما كثر
طبها يمنه وطبها يسره من الكمرأين المفر
موت الأحمـر انــه نــاده إله أراويـكم سقر
والنهر يركض ينادي عطوه أريد من الكمر
والجرف خاف ويهم
طبـها عبـاس الشـهم
حي الله عباس حي الله عباس
ـــــــــــــــــــــــــــــــــــــــــــــــــــــ
كلمات الشاعر الحسيني
مرتضى مكطوف الموالي
/channel/aabas78
قصائد لكل ايام محرم اشترك بالقناة
يحسين اصحابك وفايه
ــــــــــــــــــــ ــــــــــــــــــــ
من اصبيهم حد شايبهم
ركضو بعدك مانادبهم
لزمو لم عون اشواربهم
وشدو يم عباس الرايه
ــــــــــــــــــــ ــــــــــــــــــــ
يمهم يوگف حد الصحبه
بين الرايد شيبه يخضبه
وبين الهايم عگله وگلبه
للموت اصحابك شرايه
ــــــــــــــــــــ ــــــــــــــــــــ
شجعان ومنك هيبتهم
ومن عباس اخذو غيرتهم
لاووها اجيوش اللاگتهم
ودگو بالميدان الثايه
ــــــــــــــــــــ ــــــــــــــــــــ
بين اللي بحبــك جنيته
والعايف عرسه وبجيته
والطايح واعليك اوصيته
والصاح حسين انت الغايه
ــــــــــــــــــــ ــــــــــــــــــــ
يتسابگ شاب اويه الشايب
حتى الشد بعصابه الحاجب
محد يوگفله امن يحــــارب
وايحير اسهام الرمايه
ــــــــــــــــــــ ــــــــــــــــــــ
نصروك ومارادو جنــــــــــه
واحدهم من تنشد عنـــــــه
مو مره يموت الف اتمنـــــه
يگولون امقصرين اهوايه
ــــــــــــــــــــ ــــــــــــــــــــ
عمرو ابن جناده المامثله
فاگد والد بأول حمــــــله
رديته وروح امه اتگــــله
فرحانه بدمه امحنايه
ــــــــــــــــــــ ــــــــــــــــــــ
ياهنياله الجون الاســـــود
بالطف مسك وعنبر يشهد
وخدك خليته اوياه عالخد
ماكو اعظم واشرف من هايه
ــــــــــــــــــــ ــــــــــــــــــــ
واحد جنهم مااعددهـــم
حبك يحسين اموحدهم
الله اويه اخلودك خلدهم
انصار وليك امسمايه
ــــــــــــــــــــ ــــــــــــــــــــ
بجوك اشگد لمن نزفــــــو
صرعه وتشهد ليهم وفـــو
من سمعوك اتحشم زحفو
صحبة موقف موش احجايه
ــــــــــــــــــــ ــــــــــــــــــــ
علي محسن الزيادي
/channel/aabas78
قصائد لكل ايام محرم اشترك بالقناة
ليلة الانصار (رضوان الله عليهم)
حالفين .. والله ما نخلف عهدنه
حالفين .. ما نعز كل غالي عدنه
عن عقيدة وعن يقين
احنه انصار الحسين
"""""""""
احنه انصار ابو اليمه احلفنه دربه انكمله
نعوف كلشي وما نعوفه ارواحنا فدوه إله
بين ايده اللي يستشهد شكبر هاي المنزله
ارزقنا اللهم ندعي الشهادة بكربله
قابلين .. لو يذبحونه اعله حبه
قابلين .. نموت بس منعوف دربه
بهالقضية مؤمنين
"""""""""
احنه للطف انخلقنه نشكر الله ونحمده
جيش من سبعين واحد جيش ربنه مسدده
نحيا ونموت اعله حبه خل يسمعون العده
منا هيهات المذلة وهالشعار انردده
مؤمنين .. للحسين الله خلقنه
مؤمنين .. والشهادة احنه رزقنه
نبقه لله شاكرين
"""""""""
نموت بالغربة رضينه حسين لا يبقه غريب
والسهم لـيصيب گلبه اگلوبنه خله يصيب
وعالترب خل يذبحونه ولا يظل خده تريب
ثيابنه خل يسلبوهه وجسمه لا يبقه سليب
للحسين .. ما نعز دمنه ونحرنه
للحسين .. من على عمره عمرنه
وياه نظل نحلف يمين
"""""""""
هُمه اكثر منه كلشي اسلحة وعدة وعدد
احنه بس من عدهم اكبر بالوفه وبالمعتقد
احنه عاهدنه ابو اليمه بكربله نوفي العهد
والله لاخر نفس بينه ما نعوف حسين ابد
يبقه دين .. يبقه وعد الحر امانه
يبقه دين .. لازم نضحي بدمانه
هالعهد بالرگبة دين
""""""""
جيشنا يقوده ابو فاضل والله ما نرجع شبر
وجيشهم باچر نذله يطيح يمنه وينكسر
المعركة باچر وياهم حين تحمه وتستعر
ينهزم جيش آل امية وجيشنا اللي ينتصر
رابحين .. احنه حق وهُمه باطل
رابحين .. دام قائدنا ابو فاضل
ننتصر متأكدين
"""""""""
لبو اليمه انطينه كلمة نحرس احنه مخيمه
احنه انصار العقيلة وللخيم سور وحمه
نحمي لمخيم بدمنه وما نعز والله الدمه
نگول مولاتي اطمئني وأمني يا بت فاطمه
جاهزين .. للعقيلة انضحي كلنه
جاهزين .. فدوه احنه وكل اهلنه
ما نذل وما نلين
انيس الخفاجي الكربلائي
/channel/aabas78
قصائد لكل ايام محرم اشترك بالقناة
يوم الانصار
____
طبوها اولادك علي طبوها
والصحره حمره من الدمه گلبوها
ترسم دماهم صوره
راية علي منصوره
والصحره حمره من الدمه گلبوها
___
نبدي بسم الله .. الموت يامحلاها ..
اليوم وي حسين كلها ترخص الهامه
الحايه البيض .. بس محنه اتفيض ..
اليوم كلها تروح فدوه لاجل العمامه
نادو بفد صوت .. امسابگ اعلموت ..
الف هنياله اليطيح امدمه گدامه
محلاها ياشيعة علي محلاها
الفاتحة زينب الك تقراها
والحگ يبين نوره
راية علي منصوره
طبوها اولادك علي طبوها
____
اتقدمت شيبة .. هيبة يم هيبة…
نومسوه كدام اخوته حسين قائدهم
وگفو انصاره .. اسيوف بتاره
كلهم ابرهن الاشاره بكيف قائدهم
يبن وجه الخير .. للمنايه انسير
اوياك ربعك بس نعم تسمعها من عدهم
هنياله كلمن عاشرك هنياله
الزهره دنيا واخره تبراله
ارواح الك مذخوره
راية علي منصوره
طبوها اولادك علي طبوها
__
شافها اصحابه .. كلمن اكتابه
وهذا محظوظ الكتابة حسين اليوقعه
منهو يوصله .. ارگاب ترخصله
عيب نادو على يقاتل ينزل بدرعه
هاي زلم الحگ .. تحچي طگ ابطگ
وكلمته تنگط رجوله لمن اتسمعه
مسموعة چلمات البخت مسموعة
وتلگاها راية وي النجم مرفوعة
تلگاها اية بسورة
راية علي منصورة
طبوها اولادك علي طبوها
____
رتل السانه .. بعشگ صحبانه ..
اية الحب والوفاء ابمصحف الخوه
وهما نادوله .. فدوه يرحوله
هاي دنيا ابلايه رسمك كلشي ماتسوه
وردد كلمة .. يابو اليمه
گلوبنه يابن علي بس الك تهوه
ما ردنه غيرك بالگلب ماردنه
ونتفاخر احنه چي صرت سيدنه
وخل تسمع المعموره
راية علي منصوره
طبوها اولادك علي طبوها
__
عالعهد وياك .. خدم عد عيناك
ويبقى اسمك يا امامي منبع الثوره
بحبك اكبر سر .. الحر يتبعه الحر
ولان ضلت تخدمك امتك حره
وگفة الانصار .. درس للاحرار
الما وگف وياك باچر محد يذكره
وياكم احنه اعل العهد وياكم
واريد دنيا واخره بحماكم
ماناسي كلمن دوره
راية علي منصوره
طبوها اولادك علي طبوها
_
الثابت ايمانه .. تلگه عنوانه
حسين اسمك عالخليقه يمشي ويرتله
مثل عابس كون .. عاقل و مجنون
وكون يندلك مثل ما انت تندله
بعالم احزانك .. عايش وملچوم
ولازم اسمك دوم يمّه كون يتخله
خليني يمك سيدي خليني
بمدرسة حبك دوم دمعه بعيني
ونخطها عالصبوره
راية علي منصوره
طبوها اولادك علي طبوها
____
ايوب يوسف الطوگي
/channel/aabas78
قصائد لكل ايام محرم اشترك بالقناة
موشح الانصار
انتو انصار العقيده وشانها
انتو امجاد الوغى وفرسانها
١
يارجال العزه والحق والثبات
يا أسود الغانمه ومعنى الحياة
كل أسم من ينذكر بالصلاوات
لون رادت تشتعل نيرانها
٢
ودارت المعركه بنيران وسهام
والأنصار الحرسو احدود الخيام
قدمو اعمار ومناحر والكلام
ترجمو أهل الوفه وعنوانها
٣
اول الاسماء قاتل بأقتدار
عاصب عيوني نزل والراس حار
والنعم منه برز شيخ الأنصار
ياحبيب الچان عزها وشانها
٤
اتقاتل وعالم فقه يابن خضير
وسيد القراء انته يا برير
بروح وحده تنزل انته وي زهير
والهوه انسد بوسط ميدانها
٥
ومسلم بهمه نزل بن عوسجه
من نزل للزمن گام ايحاججه
محد اتقدم ومن سيفه نجه
من توسطها ارتفع دخانها
٦
دارت المعركه واتفرج تعال
من تقدم بيها نافع بن هلال
والحسين ايشاهد بعينه الرجال
ياهو خان العشره ياهو الصانها
٧
شوذب وجون الرجل يم الرجل
ثابتين بمعركه ودگو رجل
الموت طوقهم مثل طوق الحجل
وشجرة المعركه همه اغصانها
٨
وآخر الانصار نازل مدري وين
مزگ اثيابه وصرخ ياسامعين
انه عابس انه مجنون الحسين
صوتي يوصل للسمه واعنانها
لاتنسون والدي ووالدتي وابني عباس من الرحمه والغفران
خادمكم رياض الرسل الجابري
/channel/aabas78
قصائد لكل ايام محرم اشترك بالقناة
محرم 1447ه-2025م
قصيدة الليله السادسه
الطف راوانه قمّه بالبراعه
شاب وشايب بنفس الشجاعه
؛★★★★★★★★★★★★★★
افتح دفتر الطف واقره صفحات
بيها تخلدت معنى البراعات
بين حسين وانصاره حكايات
ما تگدر تحدهم بضع كلمات
بگلبنه خلّدتهم حرب ساعه
شاب وشايب بنفس الشجاعه
؛★★★★★★★★★★★★★★
عنهم گايل حسين بروايه
اصحابي افضل أصحاب من البرايه
حزام تحزمو صوب المنايه
نصر دين النبي چانت الغايه
اشترو دين النبي والغير باعه
شاب وشايب بنفس الشجاعه
؛★★★★★★★★★★★★★★
شايب واگف بنص المعاره
يگول الموت عالحگ مو خساره
الخساره الما كتب دمه انتصاره
انا اعتبر موتي اجمل بشاره
هاي الطاعه ما توصلها طاعه
شاب وشايب بنفس الشجاعه
؛★★★★★★★★★★★★★★
من الجانب الآخر بالقضيه
اشترو شبان بالدم المنيه
وفّو عهد للزهره الزچيه
اشتروها الجنه والدنيا الأميه
منهم بالحشر نرجو الشفاعه
شاب وشايب بنفس الشجاعه
؛★★★★★★★★★★★★★★
أصحاب الحسين أصحاب مبدأ
واحدهم ذهب ما يوم يصدأ
غلطان العلى حدهم تجرأ
من راسه اليواجههم تبرأ
اسمهم يرهب الكافر سماعه
شاب وشايب بنفس الشجاعه
؛★★★★★★★★★★★★★★
من صحبة حسين ومن عزمهم
ناخذ عبره ونجدد ذكرهم
نطبق لازم اعلينه نهجهم
اسيرن كون كل عمري بدربهم
واحدهم نهج حيدر طباعه
شاب وشايب بنفس الشجاعه
؛★★★★★★★★★★★★★★
جعفر عطيه البزوني
/channel/aabas78
قصائد لكل ايام محرم اشترك بالقناة
#نزلة
لـ مولاي مسلم بن عقيل صلوات الله عليه
اليوم مسلم هل دخل ميدانها
غرگت الكوفة بدمة شجعانها
==========================
عاصفة طبلهم وهمه سعف
ابن ابوه الگابلاه وما رجف
ياعلي مسلم على الكوفة هتف
خطف ارواح الزلم والوانها
==========================
طوعة وتحييلة حي الله الكفو
بن اخو حيدر مايهم ضل للعدو
الاخو صار هناك مايعرف اخوه
من برز راعي الحرب خيالها
===========================
گامو يسألون اصل الحيد وين
لشيخ طايفته نروح امفرعين
طوعة صاحت هذا ابن عم الحسين
هاشم شورطكم وي ارجالها
===========================
چنه حيدر عمه قتال العرب
مايثني الضربة لو هد وغضب
حيد وابن حيود حد سيفه برگب
الكوفة دم انصبغت بحيطانها
==========================
كلمات
الخادم حسن الكريماوي ✍🏻
/channel/aabas78
قصائد لكل ايام محرم اشترك بالقناة
نزله
ليلة سيدي ومولاي مسلم بن عقيل ع
شمحله مسلم من برز بالكوفه ..
ياحلات السيف بين أجفوفه ..
كلمن يشوفه يحير .. كمر هذا لوسفير
ياحلات السيف بين أجفوفه
.......................
تارس الدنيه ضواه و ياجمال أوصافه ..
يكول عباس الغضنفر والله كلمن شافه ..
هيبه شخصيه وقياده وعاليات أجتافه ..
السيف سولف كل كلامه وما نطق بشفافه ..
بس الي يريده يصير .. كمر هذا لو سفير
ياحلات السيف بين أجفوفه
........................
مثل حملات الصميده مسلم وتدرونه ..
على العيله ماينام ولا يغمض أعيونه ..
صال صوله حيدريه وفنهم أيلاكونه ..
خله كل فرسان أميه لابده بدربونه ..
يصيد كل فارس جبير .. كمر هذا لو سفير
ياحلات السيف بين أجفوفه
............................
موت لوسيف بيمينه ياحلات أخباره ..
مايهم كثرة عددهم شن عليهم غاره ..
هذا مسلم لو ابو فاضل لو علي بفقاره ..
ظلت أهل الكوفه كلهه بهالبطل محتاره ..
يابطل هذا اليغير .. كمر هذا لو سفير
ياحلات السيف بين أجفوفه
........................
جفه حار وسيفه يلمع نازل على أركابهم ..
روس مجهوله الهويه وخل يفيد إنكابهم ..
الغدر مو ثوب أهلنه ذوله ياهو الجابهم ..
كالو إقدم للحسين ووجهوله كتابهم ..
أركابهم كامت تطير .. كمر هذا لو سفير
ياحلات السيف بين أجفوفه
...........................
شافت أفعال ابو طاهر طوعه صاحت ياهله ..
مسلم وحي الله مسلم كله زود ومرجله ..
طشر بسيفه العساكرصوته بالكوفه أعتله ..
أنه أبن عم الحسين بدمي تجري كربله ..
مسلم وعمي الأمير .. كمر هذا لو سفير
ياحلات السيف بين أجفوفه
................................
مسلم التاريخ سجّل أسمه بين أسطوره ..
عن بطولاته ووفائه تشهد المعموره ..
ابو الغيره الهاشميه راسم أجمل صوره ..
خله كل أهل الضغائن خايفه ومذعوره ..
بالحرب ماله نظير .. كمر هذا لو سفير
ياحلات السيف بين أجفوفه
.............................
حيدر مطر العبادي
/channel/aabas78
قصائد لكل ايام محرم اشترك بالقناة
صكَار الزلم ... لايك هل ألاسم... يا مسلم عليك
...1...
يا مسلم ... يا ناصر ... دين ال النبي
عدوانك ... كدامك ... ملبسهم عبي
منهو اكبالك يفوت ... بس الرايد ايموت
والفر هذا مبخوت ... من سيفك
يحجيها الاجه وراح ... يمك يعله الاصياح
بيدك خطف الارواح .... وبكيفك
موت احمر تطب... ميدان الحرب ... ياهو اليعتنيك
....2..
بالكوفه ... يشهدلك ... كل حر وعبد
صولاتك ... ما واحد ... قادر أن يرد
سطرت يمنتك حيل ... توجع جنها سجيل
يمكثر المجاتيل ... بالحومه
وين الكابلك وين .... الا اشطره نصين
بيك أتباهه الحسين ... معلومه
يا أول ثقه ... الحسين اطلقه .... هنياله عليك
.....3.....
بفعالك ... يا مسلم .... عجّبت الدهر
كل فارس ... يبرالك ... تكسرله الظهر
وحدك كابلت جيش ... ماهمك شنو وليش
شاري موتتك بيش ... يا مسلم
ما هموك ألالوف .... لا صيحات الاصفوف
سيفك أعلا الاسيوف ... متبسم
تربات الفحل ... متهاب الاجل ... حيدر شوفه بيك
....4....
يم حيدر ... والكافل ... ماخذ جم درس
هوساتك ... بالحومه ... جن زفت عرس
شامخ مثل الاجبال ...عزمك هز الابطال ...
يا مضرب للامثال ... ياغيرة
قائد بالنزالات ... سيد للبطولات ...
اسمك بالسماوات .... تفسيرة
اسمك بالسمه ... تقراه فاطمه ... والكل ترتجيك
....5....
تضحيتك ... لحسينك .... تاريخ انكتب
والباري ... هاديلك ... كَبه من الذهب
ما خاب الكصد ليك ... باب الحاجه يلكيك ..
يمفّرح مواليك ... بالشده
هالليله ندبناك... وبدمعتنه جيناك ...
للمهدي طلبناك .... ظل وحده
بجاهك يالولي ... ندعي الله العلي ... حاجتنه بديك
.....
تمت
.....
موسى الخادم
/channel/aabas78
قصائد لكل ايام محرم اشترك بالقناة
#لشجاعة_مسلم بن عقيل ع
محرم 1447 هـ
هـاشم لـو برز مـن عـدها خـيال
يـتـريس حـربـهه أموّنس الـبـال
حـي الله التخـلـف بس الاسـباع
وين البــاشط المـا رف اذ جــال
الـقـاده و دم بالكـوفان ..
مطبوعه اعله الحيطان ..
مسلم طــبـهـم زعـلان ..
كفو يا صگر الكوفه
تشحط بالـدمه الناس ..
وأكــبـر واحـد انـداس ..
من طب رافــع الـرأس ..
هله والله ابهالشوفه
========ـ
مسلـم ما يطيح احچاية الزين
وارث للفراسه وعـاجب حسين
يـهـواه الـنـزال وما يطـخ راس
ومثـل المرتضى الفقاره حديـن
حار ومن ظهر حار
يا هـو اليلمس النار
مسـلم حيـله قـهـار
مـا يبرد فقاره ..
رد العيله مـن صال
صار ايگلگل اجبال
ما مـش يمــه ريال
ابفنونه القهاره ..
========ـ
صفـاهه العسـاكـر شـد الاحـزام
ما يلـحگ رگبـته الشـافه گــدام
شال الكوفه حيله وهدهه بالگاع
بچفـوفه الـرهيبه المحشر انـقام
گـال اليوم الاصفوف
بيهه أيصوفر الخوف
حالف وآنه مـعـروف
مايفلتهه الصيده ..
كلشي أگبالي ما دام
اليوم امحزم أحـزام
كــر وسـيفي مقـدام
ماطگ سيفي ابهيده ..
========ـ
طوعه اشجعه ومتنومس اهواي
عـمــك حيـدره الـما ضيّـع الـرأي
صاحت طرهه طر العسكر اتعيل
يا حــيّد الـهــواشم وانته حـماي
ذكرني بداحي الدار
گاللـهه وعـلـي صار
عمي ايصير الكـرار
وآنه بنفس الشمره ..
ما تفلت مني الناس
حيــل اشبه للعبـاس
كون امحيهه الارجاس
وحگ ضلع الزهره ..
========ـ
ـ خيري الصفراني ✍️
/channel/aabas78
قصائد لكل ايام محرم اشترك بالقناة
5محرم الحرام (داس الـكفر بجدامه)
مسلم دخلها بهل يوم داس الـكفر بجدامه
_
مسلم دخل ليها الحرب بجفوفه هز بتاره
منه الزلم من كل كتر مرعوبه شو محتاره
ضربت علي وصولت علي حـيدر علي كراره
لا ماجفل لمـن يطب لمن يـشـن ع الغاره
مات زلمهم بالخـوف منه الكفر محتامه
ماتـت زلمهم بالرعب لمـن دخـل مـيدانه.
يجدح غضب لمن يهدترجف تظل عدوانه
وحده دخل وبيمـنته دك ثايـته وعنوانه
وينه اليظل بيها الحرب لمـن يكف ذرعانه
وحده الحرب بيها يطوف ماكو زلم كدامه
وحده الحرب بيها صال وتبختر ع القاده
ذل الزلم ذل الجيش ذل الحكم واسياده
والكوفه ترجف والناس وبيها يدك اوتاده
حي الله مسلم حياه حي الله أبن الساده
والحومه ضل بيها يجول يكطف ركب حسامه
صال ودخل بيها اليوم ترجف زلمها الكوفه
مسلم دخل بيده السيف والضربه ماموصوفه
حاط الكفر من كل صوب بيهم يحط الخوفه
كنطر زلمهم والخيل حمزه وصطر بجفـوفه
مسلم يعيد الصولات حمزه ويعيد أيامه
لمن سمع صوعه تصيح حيهم يمسلم حياك
ذكرني بصولت علي كف الزلم وبــيمناك
يامحله شمرت يمنتك بالضربه والله شمحلاك
عاشـت يمينك ياشهم بالحومه محد
وياك
خله الزلم طاح وطاح والهامه تردم هامه
كلمات
الشاعر الحسيني 👇
مرتضى مكطوف الموالي
/channel/aabas78
قصائد لكل ايام محرم اشترك بالقناة
