عگيلي الليلة الثامنه
الطف ماجت كل اركانه
من جاسم سرفنها اردانه
__
ماجت واختضت من جاها
گاع الطف ترجف خلاها
جاسم مغضب واتعناها
موت احمر بالطف عنوانه
الطف ماجت كل اركانه
__
شبل او من حيدر اطباعه
شحدهم وايلاوون اذراعه
زلزاهم چن يوم الساعه
اعليهم سيفه ايصب نيرانه
الطف ماجت كل اركانه
__
خله الطف ميدانه او هوس
او فوگ الروس افتر او دوّس
جاسم كلشي البيه امقدس
عزمه او تربيته او ايمانه
الطف ماجت كل اركانه
__
من عزمه احتارت هل وادم
عينه او سيفه او قوله الصارم
اگباله اليبرز ما رد سالم
ميت يلگونه اعله امچانه
الطف ماجت كل اركانه
__
يتقدم والجيش اتقهقر
ناس ابناس الكل تتعثر
او جسام اعليهم يتبختر
طوله اشمحلا چن ريحانه
الطف ماجت كل اركانه
__
اشجعهم ما يلزم روحه
اشما يشرد جسام ايلوحه
ما يترك وادم مجروحه
موت ايوزعن چن ذرعانه
الطف ماجت كل اركانه
__
من مثل العريس او يومه
خل الزفه ابنص الحومه
كل واحد حناه بدمومه
گال الزفه اتصير اهنانه
الطف ماجت كل اركانه
__
ابو فاطمة الطائي
/channel/aabas78
قصائد لكل ايام محرم اشترك بالقناة
حنه والياس ورد
نزال ليلة الامام القاسم ع
—————المستهل——————-
حنه واليآس وَرد ... محضره وانتظرك ترد
تربي عيني … يا ونيني
***
سنين اعدّن للعرس طـال انتظاري
وأتنـوع لطـولك چنت ليـلي ونهاري
سهرانه عيني الهالربه جـاسم واباري
معقوله وآخر هالعمر بضلوعي ناري
وآنه احن الشوفتك .. ولَيدي ردّلي مروتك
يا حنيني … يا ونيني
***
ذاخرتك التـالي الـعـمـر الايـام شـيبي
ما ادري ضـيمي بكـربله كـاتب نصيبي
يالـعـايـش بريتي هـوى جاسم حبيبي
مـابـيه اعيشن فـرگـتك يسـعّر لهـيبي
كون اموت بروحتك …تدري كلـفه غيبـتك
ما تجيني … يا ونيني
**
ياحـلـمْ الايــام الـرَحـل راح بـثـواني
ياجـاسـم فـراكـك ترا وليـدي حناني
وشما اعيـش بدنـيتي صـدگـني اتاني
بلكت اكول ولن صدگ جاسم اجاني
انته عيني والنـظر … تدري دلالي نفطر
معَذبيني … يا ونيني
***
عاجنته حـنّـاك اوُردّ وانتظرك بـيـاس
يامحلى طولك والوجه يالچنه عـباس
دونك وليدي اختنك وتضيگ الانفاس
تفجعني بيـك بيـاذنب ما ترحّم الناس
بين اديه وللترب … مگطع ونحرك يصب
مسَلبِيني … يا ونيني
*
عجـزانـه امـك للسـبي ويردوها ترحل
اگـعد يجاسم للسـفر شدّ ألها محمل
تدريها من كثر الهـظم يالغـالي تنسل
وأبغيـبتك تحـني الظهر والعـود يذبل
اتمنى اطيح بطيحتك …ذيچ السيوف الطبرتك
مگيَدِيني … يا ونيني
*
خادم أهل البيت(حــمــزه فـاضـل)
/channel/aabas78
قصائد لكل ايام محرم اشترك بالقناة
للقاسم طور هاعليهم يعمي ها عليهم.
ها عليهم يجاسم ها عليهم
كوم ليهم يجاسم كوم ليهم
**
حسين من ينشد القاسم يبن اخوية يا بطل
شلون طعم الموت عندك لو دنه ليك. الاجل
يجاوبه القاسم يعمي يابعد كل الاهل
الموت دونك يبن حيدر عندي احله من العسل
يا شبل حامي الحمة
اليوم اصنع ملحمة
ها عليهم يجاسم ها عليهم
*
شبول هاشم اجت يمه تريد تحضر زفته
بالصوارم والصكال شبول هاشم حيته
وعمه بالمنحر يشمه وعالوجن هل دمعته
بيك اشوف الحسن يبني بيك اشوفن هيبته
وعمه سبع الكنطرة
كام شمه بمنحره
ها عليهم يجاسم ها عليهم
****
طلب من حسين رخصة ينزل لسوح الجهاد
عالي الهمه شباب وبالنفس عنده اعتداد
كال له ارخصني يعمي يا ابن خير العباد
انه اشوفنك اوحيدك بين اهل هذا السواد
عنك ادفع للخطر
يا شبل فارس مضر
ها عليهم يجاسم ها عليهم
***
نزل للحومة يتبختر عاف عرسه وحوفته
يحمي الاسلام وامامه بصدق صفه نيته
من نزل لارض المعارة كل زلمهم هابته
زلزل الجيش بصموده بعزم نكس رايته
شبل حيدر من نزل
مثل حملاته حمل
ها عليهم يجاسم ها عليهم
***
كالهم ان تنكروني فانا نجل الحسن
والدي شبل الصميدة وسبط طه الموتمن
هذا عمي حسين عدكم كالاسير المرتهن
ويلكم يهل الظلالة ويلكم يهل الفتن
ويلكم يهل الغدر
اليوم ارد وقعة بدر
ها عليهم يجاسم ها عليهم
***
تكول وقعة بدر ردت ردت بوادي الطفوف
حسين ينظر لابن اخيه كام يكلب بالصفوف
ما يهاب الموت جاسم ابد ميهاب الالوف
وكف بالميدان صامد وكف ويشد بالخفوف
هذا ابن عقد الوله
سيفه مثل الزلزلة
ها عليهم يجاسم ها عليهم
****
الحاج عادل جاسم الحميداوي
/channel/aabas78
قصائد لكل ايام محرم اشترك بالقناة
نزله إلى القاسم ابن الإمام الحسن عليه السلام
جســام طب للمعركه ... شمّـرة علـي حيدر
جســام طب للمعركه ... شمّـرة علـي حيدر
**
جســام يا شبل الحسن يا شمره من حيدر
بــركان ثــار أعلى العــده وبعــزمـه يتفجر
يـا موت طــب أعلى الزلم مـن أيده تطشر
هل الشبل من زود الحسن سيفه لضى ويسعر
جسـام من زود الحسن...وسط الحرب كبّر
جسام طب للمعركه ... شمّرة علي حيدر
*
من شاف عمه ابكربله وحده انتفض عزمـه
هاي الشجاعه من الحسن دونه رخص دمه
جيش ابسراياه مجتمـــع وحشوده مـا همه
ســاواه وي شسع النعــل زلمــه وابــن زلمه
جسـام بي هيبة علي ... چنه أسد يزأر
جسام طب للمعركه ... شمّرة علي حيدر
*
يعرف أبدمه لـو جــره بالطف يرف رايه
الديــن چانـت غايتـــه والنعم مــن غايه
أيه أترتــل كـــربله محفـــوظه هل الايه
وكـــل عام تقراها أبفخر لحسين مشايه
جسام والطف يرتجف... خلاه مثل خيبر
جسام طب للمعركه ... شمّـرة علي حيدر
*
الينظــر لهيبت طلعته چنــه الحسن قــادم
نكّسها رايـــات الكفـر مــن جــرد الصــارم
چنه علي وسط الحرب ابن الحسن جاسم
جده علــي ليــث الوغـى عمّـه گمــر هاشم
جسـام واليسأل تره ... منْ هاشم المصدر
جسام طب للمعركه ... شمّـرة علي حيدر
**
كل شخص تحچي أهل العلم يتوارث الجينه
عن وعي وعن فكره هدف حامه لجل دينه
أبــدم الشهــاده أبكل فخــر حنّـاهــا چفينه
طينت محمد طاهــره ويا نعـم هـل الطينه
جسـام ﭽنه بصولته ... حيدر فِنّه العسكر
جسام طب للمعركه ... شمّـرة علـي حيدر
**
أبدمه التفايض عالارض وضح اجــلْ فكره
الينصر الــدين ابمهجته ربــه الذي ينصره
جســام لجل المعتقــد رخص دمِّــه نحــره
أصبح منــار أبكل وكت مو عاطفـه وذكره
جسـام فكـره للبشر ... كل جيل تتجــذر
جسام طب للمعركه ... شمّرة علي حيدر
**
الشاعر
موسى البديري
/channel/aabas78
قصائد لكل ايام محرم اشترك بالقناة
جسام شد الثامه
نزال ليلة الامام القلسم ع
—————-المستهل—————-
جسام شد الثامه..حيل الحسن بحزامه
خيال فوگ الشگره..ليلة عرس گدامه
***
راسـمـهـا بـچـفيـنه….وعالگوم مد بشوفه
واسترخص من عمه….بكلـماته المعروفه
وحچـايه وشـد رايـه….وهل رفت بچفوفه
يا هيبه اعله العسكر….واتـحـير بصفوفه
سجيل بيهم نازل..يمنا ويسار يقاتل
يفدي الحسين بعمره..ويصيحله بيستاهل
***
دارسـهـا ومـاخـذها….شمـراته من الكـافل
هل غيـره الشايـلـها….جـسـام المتكامل
من طوله ومن حيله….بجيوشهم هـل نـازل
عاليـمنه وعاليسـرى….چن حيدر هل حامل
وصفـوفهـم خـلاها..محـتاره بدنيـاها
وتلوگ بيده الشمره..العريس من لاواها
***
مـوصـيـته ويـوفـيـها….لحسيـن نـاذر روحه
بـچـفـيـنـه اليسطرها….وياويـله الي يلوحه
سـاحـگـهـم بالـجـيـه….متعـبهـم بالروحه
وامـرجــف مــيـدانـه….وابطالهم امذبوحه
والـدتـه مـوصيـته..والعـمه امـربيـته
وهل موقف منتظره..منصور جاي البيته
***
شـما ينـزف مـايهتـم….خـيـال بصولاته
عالـهامه المـايخـطي….تـتـربــع طبراته
ذباحـه اعله العسـكر….ترهـبـهـم خـزراته
شما ضگها وتشـهگله….چن حيدر عصراته
نـزلاتـه الراسـمـها..كل موقف حاسمها
وملثم بالخضره..وبچفه امهشمها
***
بجـروحه يشـد حيـله….ودگ ثايه بميـدانه
واتـحيـر عـسـكـرهـم….وارجـاله الحيـرانه
وبــروحــه ايِرويــهــا….وخيامه العطشانه
بدم نحـره الما يگـطع….هـل ثبـت عنـوانه
يتگطع لحسينه..ولخيامه تظل عينه
وراويها بدم نحره..والغيره بچفينه
*****
خادم أهل البيت(حــمــزه فـاضـل)
/channel/aabas78
(نزال للقاسم)
عظم الله اجرك ٠٠ ياابا عبدالله
ــــــــــــــــــــــــــــــــــــــــــــــ
عادة السافر يوصي اهله ابوصيه
والحسن يحسين وصه بالمنيه
گله جاسم موعدك بالغاضريه
من يظل عمّك وحيد ابين اميه
اليوم ذبحو بدرك ٠٠ ياباعبدالله
ــــــــــــــــــــــــــــــــــــــــــــــ
چنت من تشتاگ للغالي عضيدك
تنادي ياجسام يبني اگبالي أريدك
تگله خل اشتم رگبتك والزم ايدك
باچر الدم بالحرب يصبغ وريدك
نفس چان ابصدرك ٠٠ يااباعبدالله
ــــــــــــــــــــــــــــــــــــــــــــــ
طلب منك رخصه والسيف بيمينه
گلبك بيوم الطلع الله يعينه
تجري عينك للوداع وتجࢪي عينه
ياهو منكم صار ابو الروح الحنينه
حيل كاسر ظهرك ٠٠ يااباعبدالله
ــــــــــــــــــــــــــــــــــــــــــــــ
اوداع موت اتوادعيتو ودمعه بالعين
كسر گلبك من وگع جسام یحسین
امحنه من دم النحر وسط الميادين
وامه بالخيمه تنوح اويه النساوين
الليله الله ايصبرك ٠٠ يااباعبدالله
ــــــــــــــــــــــــــــــــــــــــــــــ
ناده ياعمي سمعته ايصيح جسام
المصرعه اتعنيت شفته امطبر الهام
اشبگت جسمه بالرغم غارگ بالسهام
للخيم زفيته زفت موت الاحلام
سلمت كل امرك.. يااباعبدالله
ــــــــــــــــــــــــــــــــــــــــــــــ
اتلگته وگامت تشم نحره العقيله
وامه تلطم والدمع عالخد تسيله
والتراب اتشيله عالهامه وتهيله
اللهُ اكبر هالمصيبه اشگد ثگيله
یاهو یجبر كسرك.. يااباعبدالله
ــــــــــــــــــــــــــــــــــــــــــــــ
حيدر بشار الدراجي
/channel/aabas78
قصائد لكل ايام محرم اشترك بالقناة
نزلة حماسية الى ابي الفضل العباس عليه السلام
اتلاطمت والمفر ضاك اعليها
الروس من عباس حارو بيها
مثل سيل اعلى الحرب لمن عزم
ركضت اكباله الزلم مثل الغنم
تلفلف اذيال الخيانه وتنهزم
ساعة العباس كر اعليها
انني العباس اغدو بالسقا
لا اهاب الموت يوم الملتقى
اهب النفس الى الطهر وقى
موتة العز إذن لاقيها
الروس تطاير وصارت زلزله
والضرب نازل عليهم كالبلا
بضربة العباس صارت نازله
طبك عاليها على واطيها
انه العباس قد جاء يصيح
فينا دين الله والحق صريح
ان يكن جسمي للحق ذبيه
نفسنا للدين لا نبقيها
صاح بيهم صيحت الليث الجسور
الغيور لدينه دوم يضل غيور
منين ماينوون ممنوع العبور
سيفه يلوي الشرذمه ويفريها
محمد دعبل النوري
/channel/aabas78
قصائد لكل ايام محرم اشترك بالقناة
سـيــف أبــو فــاضـل لــمــــع بــيــمــيــنــــه
وصـاح أنــه الــوفـّـــاي يـابـــو أســكـيـنــــه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صـاح أنـه الـوفـــّــاي يـا خـويـه الـولـي ولـمـثـل هـلـيــوم ذاخـــرنــــي عــلـــي
هـالـعـسـاكـر كـون أهـدهـه وتـنـجـلــي الـيــوم أكَـلـب هـالـعــدو صــوبــيــنـــه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يــــوم أبـو فـاضــل لـبـس درع الــحـــرب وأمـتلـه من الـغـيـض عـالـعسكـر غـضـب
شـافـتــه الـعـــدوان صــابــاهــا الـرعـــب مـثـل حـيــدر مـن دخـــــل صــفـّـيــنـــــــه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
زلـزل الـحـومـه أبـن حــامــي الــدخـيــل ورجـفـت الفـرسان من صـوت الـصـلـيـل
خـلّـه دم أركَــــاب عــدوانــه يــســيــــــل غـيـره تـجـري مـن الــزغــر بـجـبـيـنـــه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
طــب عـلـى الـعــدوان راواهــا الأجـــل جـدحـت أعـيـونـه جـمــر يــوم الـزعــل
أربــات أبـو الحـسـنيـن عـباس الـفـحـل مـن دمـه الـشـريــان وافــه أحــسـيـنــه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وفّـه لـحـسـيـن الـسـبـط دم ركَـبـتـــه وهـالـعـسـاكـر مـن أجـت مـا هـزّتــــه
عـلـى شـاطـي الـمـاي طـاحـت رايـتـه مـن بـعــد مــا كَــطـّـعــــو جــفـيـنــــه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
طـاح الـمـشـيّــم وكَـــــع عـالـمـشّـرعــــه ومـن وكَـع راح أبـو الـيـمّـه لـمـصـرعــه
شـافـه يـنـزف والـجـفــوف أمـكَـطـّـعـــــه طـايــح وســهــــم الـمــنــيّـــــه بـعــيــنـه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صـاح يـم راسـه وجـمـر كَـلـبـه أسـتـعـــر بـطـيحـتـك يابـو الـفـظـل ظـهـري أنـكسـر
صـدّعــت كَـلـبـي يـبـن فـــارس مـضـــــر ســهــم الـبـعـيـنـــك يـخـــي عـامـيــنـــــه
الشاعر السيد علاء الحيدري
/channel/aabas78
قصائد لكل ايام محرم اشترك بالقناة
ليلة العباس عليه السلام
أليوم يوم العباس وتبين اللطامة
وين اليطبر عالراس خلي يحظر القامة
………………
بمجلسه شيلو الراية.. حياهم الوفاية
كون الجزع بالسابع.. وللكافل ندگ ثاية
اليوم يوم الظحة بچفوف وعين
اليوم يوم ألي كسر ظهر حسين
زينب تنوح من الخيم عالعباس
ومن البواچي كربلة صارت طين
ويلي شكثر بچة حسين أه ياعمود الهامة
وين اليطبر عالراس خلي يحظر القامة
…………………
اليوم يوم وداعة …خل تلطم الجزاعة
مامش وقار وهيبة.. ماتكفي لطمة ساعة
من اللطم ياكون ماتبقة صدور
من الخيم بالسابع يموت النور
يم العرش من طاح صارت عزيات
وبالجنة گامت تلطم اعليه الحور
وحسين جر گلبي وياه من جر عمود خيامة
وين اليطبر عالراس خلي يحظر القامة
………………
يابعد هاية وهاية.. يم الفرات وماية
طاح الگمر ياويلي .. موذر عالمسناية
رد الحسين وصار بالخيمة أصياح
وگلهة يزينب كافل أضعونچ راح
عالوجه لطمن كلهن العلويات
وحسين وي الخيمة من طاحت طاح
اليوم اللطم للعباس وين اليشد احزامة
وين اليطبر عالراس خلي يحظر القامة
…………………
ماينسي معروفة... للخوة منطي چفوفة
شسوة السهم بعيونة.. مطفية لو مخسوفة
گبل الحسين الگمر مايشرب ماي
وميگلة خوية أيصيحلة يامولاي
يتبدة منة الوفة مثل الشلال
طاح وخواتة ظلن بلايا أڤياي
من جسمة لومن العين ياهو اليطلع أسهامة
وين اليطبر عالراس خلي يحظر القامة
………………………
كل عاشگ وقانونة… وكلمن يبين جنونة
الخاطر عيون الكافل.. خل يلطم اعلة أعيونة
لا مايهمنة شتحچي وتگول الناس
اليسأل مطين ليش ودگ عالراس
گلة بدموعك طاحت الخوة اليوم
اليوم يوم الغيرة يوم العباس
ياأم البنين أترجاچ حسبيني من خدامة
وين اليطبر عالراس خلي يحظر القامة
**
✍::️حسين حمدان الدلفي
/channel/aabas78
قصائد لكل ايام محرم اشترك بالقناة
شد احزامه العباس كام ايطك راس براس
شد احزامه شد احزامه
***
عباس طب للمشرعه وبجفوفه شال الرايه
بالجيش طلع حركته وبالماي سوه اسوايه
صارت اشويه كربله وعباس صار اهوايه
بلعت لسنه اعله النهر من شافته الرمايه
شايل غيره ونوماس كام ايطك راس براس
****
شيخلص اليوم النهر عباس عنده اطلابه
يكلب الدنيه بكربله لو بيده شد انكابه
هذا ابن قتال العرب والكوم كلها اتهابه
مو جربه راح امن النهر جر الفرات وجابه
ادخيل اتصيح الحراس كام ايطك راس براس
**
عباس شيخ المرجله وتذبح ذبح خزراته
لو صال وسط المعركه تشبه علي صولاته
عباس لو شال العلم وترجل اشمحلاته
بالسيف ضل يلعب لعب عباس دك اثباته
والطاح بجدمه انداس كام ايطك راس براس
****
الفرسان كلها تراجعت ونسحبت الخياله
عباس من كد ما رزن حته الفرس ما شاله
وحسين والله بهيج اخو امعدل الف هنياله
مسرع نزل للمشرعه وما واحد ادناله
انحبست كل الانفاس كام ايطك راس براس
***
ام البنين الطاهره ما ادري شمرضعته
عباس من كد الوفه يمشي ويسولف بخته
والرايد ايمس الخيم هذا امه ما جايبته
ذواق حيل وكربله مدري اشكثر عاجبته
اتسولف بفعاله الناس كام ايطك راس براس
**
عالماي ناصب سيطره ومحد يمر من عنده
والنهر من كد ما ذبح بالروس كالو سده
ياهو اليمر بعرضته وعباس جيش الوحده
فن واحد ايجر النفس وهناك راسه ايمده
طبع الحر ما ينقاس كام ايطك راس براس
**
تمت
تحسين الخفاجي
/channel/aabas78
قصائد لكل ايام محرم اشترك بالقناة
اليوم ملك الموت سلمهه اله
وكله ياعباس هاذي كربله
انت اطبر ياكمر .. وانه اسطر عالنهر
___
همس عزرائيل وباذن الكمر
كله ياعباس انضـر للنـهـر
كون لون احمر تكلبه يالفخر
وسهله هاذي وابد لامومعضله
__
كله ياعباس احصدهم حصاد
وخلي سيفك يعلن اعليهم جهاد
وخل نريح الدنيه منهم والعباد
وهاي ذكره تبقه عدي امسجله
___
كله اقبض روحهم ياابا الفضل
وانه شغلي اليوم بس بيك احتفل
وراح اسلمك ياكمر هذا السجل
سجـل التطبـره والي اتجـندلـه
___
ابكيفك اتخـير يسبع الكنطره
واكطع الروس التعادي حيدره
واسمه يئسجل انـتـه التسطـره
يطلع ابوجهه الجهنم محفله
___
كـله ذكرهم ببوك وحملته
جنت ما الحك اسجل طبرته
ايزلزل الدنيه والله ابصولته
وانت مثله ياابن عقد الوله
__
كله عونك ياملك رب السماء
امعلم انه عالشجاعه والوفاء
راح اخلي العلكمي يجري دماء
وراح اوفي لبن اطهر منزله
____
كله لترس عينهم من الدمع
وماتهمني اجيوشهم لوتتجمع
والله اخلي روسهم ما تـنرفع
ومااثني وتشهـد اعليه المله
__
كله ياعباس منـك والنـعـم
انه اعرفك شهم لاماتـنهزم
ادري من زغرك امبجيهه الزلم
واسم سبع الكنطره لشخصك حله
الشاعر أبو امين ألفرطوسي
/channel/aabas78
قصائد لكل ايام محرم اشترك بالقناة
نزااال للإمام العباس
يا ساقي العطاشى وانته حاميها
كل هاي الخدم من جودك اسگيها
ــــــــــــــــــ
يا راعي الكفالة وراعي المروة
بداعة حبك وي حسين والخوة
نخيتك وادري اهلاً انته للنخوة
من ماي العشك خدامك ارويها
ــــــــــــــــــ
يالوحي الشعر بالخوة حيرتة
ولا بيت بقصيدة يوصلك شفتة
ما نتوصف صعبة وانتة ذاك انتة
كلمة خوة يمك صعبة نرثيها
ــــــــــــــــــ
يالجودك بحر ما ينوصف ماية
وكل قطرة بالجربة تعيش أولاية
الله الشاء تعطش انته عن غاية
حتى الدنيا يمك تجي برجليها
ــــــــــــــــــ
تاريخ الوفة وسجلتة بالغيرة
من الخيم حد حسين تفسيرة
يالزارع الطيب واحسن السيرة
من اسمك حرف هالدنيا والبيها
ــــــــــــــــــ
يا باب الحسين وريته وصبرة
عامود الخيم وحزامة البظهرة
من حب الحسين تقدرك الزهرة
بجفوفك تطالب غداً باريها
ــــــــــــــــــ
خدامك يغالي اسقيها من صبرك
بداعة حب اخوك الينبص بصدرك
يالضحيت روح ودمك وعمرك
خدامك يغالي وانظر عليها
ــــــــــــــــــ
الشاعر زين العابدين الشمري
/channel/aabas78
قصائد لكل ايام محرم اشترك بالقناة
طبهه عباس وصفت مگلوبه والجهات الاربعة مرعوبة
ـــــــــــــــــــــــــــــــــــــــــــــ
كاشخ برايــة علـــــي وطـــب للعـدو
والجهات الاربعــــــــة صاحــت شكو
گالوا العباس طـــــــب سوح النــزال
والله من خـــوف الزلم صاحـوا كـفـو
ذاك يشرد هــذا صاح التوبة والجهات الاربعة مرعوبة
ـــــــــــــــــــــــــــــــــــــــــــــ
صاحـــــــت الوادم دخـل مـــن يمنعه
وصفت گدامة الــــرؤوس مفـــــرعة
الماي جيبوا الماي وانطـــوه اشيريد
وهاي ما طـــب للحرب للمشــــرعــة
وصفرة خله وجوهم متعوبه والجهات الاربعة مرعوبة
ــــــــــــــــــــــــــــــــــــــــــــ
مــــــــن يغير أعليهم أتظـــــل السمه
ترعد شما رفـــــع سيفـــــه وصارمه
حـــــــرز البصدره دعـــــاء ام البنين
وكلكــــــــم امجربيـــــن دعوة فاطمة
جيوش ردت بالدعاء مغلوبة والجهات الاربعة مرعوبة
ـــــــــــــــــــــــــــــــــــــــــــــ
لمهم بـــذرعانه جـــــن يـــــوم الحشر
طگـــت ايــــــده بخدهم اطشـــــر جمر
بضربته وسرعة ضـــــواه جان الكفيل
مثل ســـــــــــــــرعة سنه ضـوئية يمر
وهاي يمكن هم غلط محسوبه والجهات الاربعة مرعوبة
ــــــــــــــــــــــــــــــــــــــــــــــــــــ
يشتري العرگــــــــــه الثگيلة لو عرف
الباطل اعلــــه الحگ أخذ دور الشرف
وانته عاد اتخيل بيـــــــــــــوم الطفوف
عرگـــــــه بيهه حسين ابو اليمه طرف
يعني ميــزان الشرف ودروبه والجهات الاربعة مرعوبة
ــــــــــــــــــــــــــــــــــــــــــــــــــــ
بحيلهه نكثهــــــــه الشوارب عا الرمل
دخيلك اتصيح الزلم يــــــــــا ابا الفضل
بگثر ما نگط وفــــــــــه بدرب الحسين
ال هذا يومـــــــــــــك كربلاء بيهه ثگل
منهو مثلــه بوكفته المهيوبة والجهات الاربعة مرعوبة
ـــــــــــــــــــــــــــــــــــــــــــــــــــ
لخادم ابا الفضل العباس
ابو محمد الموالي .....
لا تنسون والدتي من الدعاء جزاكم الله خير
/channel/aabas78
قصائد لكل ايام محرم اشترك بالقناة
نزله للانصار.
.
اليوم بنصارك يبن خير الورى
تفتخر ياحسين دنيا وآخره
.
.
اليوم انصارك يبن حامي الحمه
رفعو الرايات برض الموزمه
خلو الفرسان يجري بالدمه
والهم التاريخ يكتب مأثره
.
.
شاهد الانصار مامنهم مثيل
لا ولا واحد برز ليهم جبيل
عدهم الارواح يفدونك قليل
وي دماك اليوم كل دمهم جره
.
.يلي خدك عالترب دامي وتريب
شلون نحرك سيدي موذر خضيب
من بعد جون وزهير وهم حبيب
صدرك خيول آل اميه اتوذره
.
.
يالشفت لجلك وهب لما وهب
نحره والتربان من دمه اختضب
عرف معنى الدين من مايك شرب
الك وبكل طيب قدم منحره
.
.
يالموالي عاين الارض الطفوف
شوف عابس شنهي سوه بالإلوف
چفه يذبح عالترب نحر السيوف
خضب الميدان روس امشمره.
.
.
شوف عابس سيفه ذهب اعله التراب
نزل يتحداهم وشگ الثياب
آنه مجنون الحسين وما اهاب
ارعب الشجعان ليث الزمجره
.
.
الناس ماشافت بطل وبلا سيوف
ينزل بچفه ويشتتها الصفوف
هالفدائي من نزل سوح الحتوف
منهو يوصل نحره منهو يطبره
.
.
حسن الموالي الفاطمي
/channel/aabas78
قصائد لكل ايام محرم اشترك بالقناة
علي الأكبر من حمل . وبكتايبهم دخل
صوبه عين أمه تصد . تندعي سالم يرد
***
تربي والدمعة أبجفنها أم الأكبر للحرب
ابعد وما رد عليها الغالي وتصد للدرب
بيها نار أغيابه تسعر وبألم عاش الگلب
يا علي وينك تنادي والدمع من دم يصب
هاجت وبيها الحزن . ليله وبلوعة تون
بالثواني أبهم تعد . تندعي سالم يرد
***
بيها نار الحيرة صارت تستعر بين الضلوع
هامت أبهمها وتنادي يبني يالغالي وتلوع
صابرة وتنطر قدومه وبدمه أتسيل الدموع
والإله الرحمة راحت تندعي بحسره وخشوع
صاحت أبجاه النبي . تنصر ابني مطلبي
عزمه بالحومة تشد . تندعي سالم يرد
***
يا ألاهي بحرگه تندب هاذي منك طلبتي
يرجع أوليدي أبسلامه امن المعارة غايتي
بحالتي الصعبة أندبك وب أنيني ودمعتي
بغربة المظلوم أبو أليمه ألاهي وغربتي
سالم أيرد لي الولد . غيره ما عندي بعد
ظافر بگوم الحقد . تندعي سالم يرد
***
طوّح الصدر المعا ره وروحي تأمل رجعته
ناظري يربي أعله طوله من يصول بصولته
خنجر بصدري النوايب لمن ابعد غرسته
كربلاء أم الفواجع عني ابني بعدته
شابح أعليه النظر . والگلب طگ وانفطر
يا علي الأكبر ترد . تندعي سالم يرد
***
غيمه من الغُبره صارت وانگطع عنها الخبر
تستمع بس صوته صارت ما تشاهدها الصور
ها انه ابن حسين يهتف وانه ابن فارس مضر
لگلب ألحومه عليكم واكتب أبصحف الدهر
جيت أناصر مذهبي . وانه شيعي وطالبي
والي ما دوني المجد . تندعي سالم يرد
***
رد الأكبر لامه لاچن شاهد أبعينه الوضع
عنها غاب الوعي ليله من اثر مجرى الدمع
شاهد أمه اگباله ذابت مثل ميذوب الشمع
وادعاها ورجع الأكبر يفدي نفسه للشرع
يمه يحبيبه يگول . مكرمه رايح أنول
للكرامة ابذل جهد . تندعي سالم يرد
***
الشاعر ابو ايمان المجراوي
/channel/aabas78
قصائد لكل ايام محرم اشترك بالقناة
قصيدة نزال بحق القاسم بن الحسن
ليـش ظالم يادهر ويانة
خذت منة اعزازنة بدنيانة
----------------------------------------
شمعة الشبان دمعتها جرت
تاكـــل بخيط العمر بالطف دوت
جاسم العريس شمعاتة طفت
ابـني ادور عليه خالي امچانة
-----------------------------------------
الجمر بالروح ما همني الجــمر
روحي مسبية بفركَتك والهجر
عمري اخذة وياك شلي بالعمر
روحي بــفراكَك تون حزنانة
----------------------------------------
الهلاهل مـوت بسيوف الحرب
وحنتك من وريدك منخضب
كَمت اطش ادموع بديار الغرب
للعرس راح الولد ماجانة
------------------------------------------
يابعد روحي يالبعمر الورد
هاك سيفك والدرع يلله استعد
رسومك الحلوات مردني مــرد
شلون احمل فـركَتك حيرانة
------------------------------------------
هذا حد دنـياي لهنا عيشتي
انه من بعدك غريبة بدنيتي
يمة خذني وياك شنهي ظلتي
بدار وحشة بيها اون سهرانة
------------------------------------------
يا رباي الراح ياتعب السنين
يمة الله وياك رايح يالحنين
نغدي انة وياك فدوة للحُسين
ليش عايش من مشـوا خلانة
----------------------------------------
يمة طب للموت عيش بكربله
للشهيد اتصير اعظم منزله
اخذ كَلبي وياك يا تالي هله
اخلافك ايموت الكَلب بأحزانة
-----------------------------------------
أسالكم الدعاء رائد الاسدي
/channel/aabas78
قصائد لكل ايام محرم اشترك بالقناة
كالو هذا ياهو النزل بالحومه
هذا ابن الحسن وامبينه اعلومه
للحومه عريس ونازل للحومه
*-----------*-----------*-----------*
مثل الشمس وجهه وسيفه بيمينه
شاهد عمه واكف محد يعينه
وصيه من الحسن شايله لحسينه
سولفها يجاسم خلها مفهومه
مفهومه صولت جسام ومفهومه
*-----------*-----------*------------*
هذا ابن الكريم الحومه تحلاله
وصى بدرع ابوه وبالعجل جاله
مايحلاله بس ملبس الخياله
هذا ابن الحسن بالطف حضر يومه
من يومه بالسيف وحاضر من يومه
*------------*---------*-----------*
وصاني ابوي بعمري اضحيله
لو شفت الجيوش بكربلا تجيله
اوكف ويه عمك ساعة الميله
وكول ابن الحسن خل تعلم اخصومه
وخصومه تعلم بافعاله وخصومه
*----------*----------*-------------*
ابوي اموصي وصيته وياكدها
يبني كربله لو حضر موعدها
نفذها الوصيه ومحد يردها
وخل نحرك يبويه تحجي ادمومه
وادمومه بالطف تشهدله وادمومه
*------------*-----------*------------*
القاسم شاف عمه لوحده واكف
ينادي ولا مناصر بس عدو شايف
دارو على احسين وجيشهم زاحف
جاسم صولته خلاها معلومه
معلومه صولاتك جاسم معلومه
*-----------*-----------*-------------*
محمد دعبل النوري
/channel/aabas78
قصائد لكل ايام محرم اشترك بالقناة
نزله للقاسم عليه السلام
وينه اليمس حسين يا آل اميه
وبن الحسن موجود بالغاضريه
.................
ابن الحسن ياناس والقاسم اسمي
ربّاني عالكلفات من عزمه عزمي
وصاني بالطف كون اوگفله عمّي
لازم اوفي اليوم عهد الوصيه
.................
اوگف لبوالسجاد وگفت عضيده
ويله اليمسّه بسوء اگطع وريده
لو ينحجب بالغيم اوصل وصيده
والمايصدگ هاي خل يدنه ليه
..................
آنه الفتى المغوار وينه الينازل
وارث شجاعه وزود منّ ابوفاضل
متهمني لا والله هاي الجحافل
دون الحبيب حسين اهوى المنيه
.............
سيف الحسن معروف لابد تذكروه
بالقاسم ابنه اليوم كلكم تشوفوه
غالي الثمن بالموت لازم تدفعوه
ثار الحسن وحسين يرجع بديه
................
ما همني بالميدان يكثر عددكم
بالسيف احز الروس وسحگ جثثكم
يامن غدرتو حسين حالف اذلكم
قوة علي وعباس موجوده بيه
................
ماعوف ابوالسجاد عمي وامامي
واجب انصره اليوم اوفي بكلامي
ذاخرني ابوي لهاي آخذ وسامي
بالطف اسمعه وياي سلّم عليه
................
للغالي فدوه يروح عمري وشبابي
يايُمّه لا تبچين فرحي بمصابي
آنه النصرت حسين والدم خضابي
وتخلّد اسمي وياه روح الزچيه
#سيد #زيد #الفحام
/channel/aabas78
قصائد لكل ايام محرم اشترك بالقناة
صاح جاسم بالصفوف=انــه رادود الــطــوف
سـرفـن اردانـه اوحمل=يالله احفظوا المستهل
ــــــــــــــــــــــــــــــــــــــــــــــــــــــــــــــــــــــ
هالقصيده اليوم نـزله والحسن كاتبهه الي
يعني راح انزل عليكم نزلت الموت اوعلي
اعد مابيهه القصيده واضح النص اوجلي
اليفلت السانه اويكـلي اعـد بـيـكم يـبـتـلي
عـيـد الي كلي اشيـريـد=اكص راسه من جديد
ابسيفي جم راس انعزل=يالله احفظوا المستهل
ـــــــــــــــــــــــــــــــــــــــــــــــــــــــــــــــــــــــ شور مااقـراء القصيده اومنجبر راح اقراء شور
صعدت الغـيره ابـوريـدي وسمع الـدم ضل يفـور
اوسيفي عطشان اعله دمكم يالله حظروله النحور
ابـغـمده مايـقـبل يـنام اعله الـقـظـيه اشـكد غـيور
سيفي مومـثـل الـسيـوف=عـالـركب يـرغب يطوف
الـله يـستـر لـو زعـــــــل=يالـله احفظو الـمسـتهـل
ــــــــــــــــــــــــــــــــــــــــــــــــــــــــــــــــــــ
جدي جان الي يـطبـره صـوبه ابد مايلتفت
ونـتـم اتـعـرفـون حـيـدر اونه مـنه اتعلمت
مـره ماخايـف حياتي اولا اخاف اولا خفت
منكم اتريدوني اخاف اوزلمه بيكم ماشفت
صــح جـثـيـريـن الـعــدد=زلــمـه مـابـيـكـم ابـد
اقــسـم ابـخـيـر الـعــمـل=يالله احفظو المستهل
ــــــــــــــــــــــــــــــــــــــــــــــــــــــــــــــــــــــــــــ
راح اذب درعي وجيكم وطوي عسكركم طوي
بالــدرع يخجـل يــقـاتـل هــذا طــبـعـه العلوي
اليوم عسكركم ابـيـده ابـقـوت الـبـاري القوي
روس راح استنكي منكم والله وحويهن حوي
روس راح استنكي روس=اوفوكهن بجدامي ادوس
انـه غــيــظ الـله اونــــزل=يـالـله احـفـظو المستهل
ــــــــــــــــــــــــــــــــــــــــــــــــــــــــــــــــــــــــــــــــ
اليوم اشوفكم مـــراجـــل مــال حــمــزه اوحيــره
اليوم اسوي الطف مجازر مجزره ابصف مجزره
وقــلــع الــيــوم السـرايـه ابسيفي قـلـعـت خيـبره
والـله راح اخـطـف وخلي ارواحـكـم تـطلـع تـره
راح امــر مــر الـسـحــاب=بــيــكــم اوافــني الـركاب
خــاف نــاسـيـــن الاجــــل=يـالـله احـفـظـو المستهل
ــــــــــــــــــــــــــــــــــــــــــــــــــــــــــــــــــــ
حكيم الفرطوسي
/channel/aabas78
قصائد لكل ايام محرم اشترك بالقناة
نزله للقاسم...
جسام جسام حــان بالطف يومه
جسام جسام زلزل ارض الحومه
***
لبس درعــه وطاسه والمعسكر داســــه
صاح صوت احساسه حسيني أرفع راسه
يقســـم ابعبـــاسه اليوصل انهي انفـاسه
والسيف والسيف أله اثبت اعلومه
جسام جسام حــان بالطـف يومه
**
ابغضب بيــهم نــاده انــه شبل القــــــاده
الجيش شل اطراده ويوم حيـدر عـــاده
ابسيفه خط امجاده وعاد صيت اجداده
وعداء وعداء امن الحرب مهزومه
جسـام جسـام حـان بالطف يومه
*
هـــذا صگر البيده والمعــــــــارك عيده
رايتــه اترف بيده وحـان بالطف ويده
ثـار ابـوه ايريـــده مـن ال اميه ايعيده
واليوم واليوم أعداء اضل مندومه
جسام جسام حــــان بالطف يومه
*
هـــــذا بذرت طـه ابصيت ابوه يتباهه
الگــوم من طباهه تيهــت ممشـــــاهه
نكسلهه ألــــولاهه ورايته العـــــــلاهه
معروف معروف يگظي الملزومه
جسام جسام حــان بالطف يومه
***
صـاح دون حسيني يـا سيوف اخذيني
لجله فدوه اسنيني هـوه شمعت عيني
اليوم اســـدد ديني وكلشي بينه اوبيني
هاليوم هاليوم اله ازيل اهمومه
جسام جسام حان بالطف يومه
*
الخادم
كامل السعيدي
/channel/aabas78
قصائد لكل ايام محرم اشترك بالقناة
كون اطيح الليله ويشيلوني شيل
ليلـة العبـّـاس يــرّاد الهـا حَيْل
ــــــــــــــــــــــــــ
ليله كلّش تختلف متروســـه هَم
كــون للعبــاس واحد يبچــي دَم
كون فص عيني ألطْمَنَّه ابســـهم
ليل سـابع ما أضن ايشبـهه ليْـل
ليلـة العبــاس يــرّاد الهـا حَيْل
ــــــــــــــــــــــــــ
ليله بيها يصير كسران الظَهَــر
إرجع من المجلس وترسك قهــر
رِد مثــل ما رَدّ أخيّــه من النهـر
عاف يم الماي واحد عطره هَيْل
ليلـة العبــاس يــرّاد الهـا حَيْل
ــــــــــــــــــــــــــ
حيْــل رادلها إبثگل ذاك الصـــواب
الليلة للعبـّـاس يّنشَـــدّ النِگـــاب
وطيحَتْ الجربه نِطِيح اعله التراب
ومثل ماي الجربه اصب ادموعي سِيْل
ليلـة العبــاس يــرّاد الهــــا حَيْل
ــــــــــــــــــــــــــ
ليله كون انطيها حگها من الونين
هاي رادلهـــا بواچـي ام البنــين
كون تنذَب عالنهر بثـوابه عَـيْن
وعالحنين الواحد إيگضّيها ويل
ليلـة العبــاس يــرّاد الهـا حَيْل
ــــــــــــــــــــــــــ
مهدي التقي
#عظّم_الله_أجوركم
/channel/aabas78
قصائد لكل ايام محرم اشترك بالقناة
حي الله عباس اليشيل الرايه
حي الله عباس اليشيل الرايه
***
اليوم يومك يا كمر طب ليها
وكون كل العادتك تكظيها
خويه اريد المشرعه تحميها
والزلم يابو الفضل تفنيها
انته وخوانك صدك وفايه
حي الله عباس اليشيل الرايه
*
حشمت يابو الفضل تحمينه
خويه ماكو غيرك يروينه
الكوم بعدك ياشهم تسبينه
للمدينه برايتك رد بينه
عالنهر جفك يدك الثايه
حي الله عباس اليشيل الرايه
****
صولتك يابو الفضل معروفه
ونته اخوي مجربات جفوفه
كعبه طولك كل صباح نطوفه
ترضه زينب تنسبي للكوفه
وانه اختك عندك موصايه
حي الله عباس اليشيل الرايه
****
النار وصلت يالكمر لجدامي
وراح احيرن بالحرم وخيامي
شلون بعدك راح اعيش ايامي
وكلبي لجلك يابو الفضل ظامي
والشريعه بسمك مسمايه
حي الله عباس اليشيل الرايه
***
راح احلفك بالحسن ودلاله
صول خويه وفحط الخياله
انته زودي وماكو غيري اباله
شيل سيفك رجع العياله
نشفيت الشط ياخويه بمايه
حي الله عباس اليشيل الرايه
*
إلى خادم اهل البيت ع
ابو هاجر المجراوي
/channel/aabas78
قصائد لكل ايام محرم اشترك بالقناة
الحومه ضلت من برز محتاره
ابو فاضل لو علي ابفقاره
.................................
برز ليهه وضيع اعليهه الهوه
ايد بيهه السيف وبأيد اللوه
خوف ماتت من برز ليهه ونوه
بيده رآيه ترفرف وبتاره
...................................
منين ما يدنالهه ما گابلوه
مادرو شمراته من حيدر ابوه
علي ذكرهم اخافنهم نسوه
الچان يحچي حيدره صگاره
...................................
منين مايندار يلگاهه الزلم
تركض وماعدهه غيره ولاعزم
اشما ذبح بالسيف رد ويبتسم
نوه اعليهه وبالحرب شب ناره
...................................
تشبه النار الخليل البيهه وج
وگام يذبح بالرگب وي المهج
كعبه صاير والزلم طافتله حج
يطرد الگدهه ويدوره ادواره
...................................
اذن آذان الطفوف وحل فرض
مثل طيات السجل يطوي الارض
تاه طول المعركه وي الارض
وبعد ماتلحگ عليهه الچاره
.....................................
خنگه طفهه وغيمت من الرعب
حيره والعباس كضلهه الدرب
مو صعب يومه اشد من الصعب
من يلاگيه وزعل بتاره
.......................................
الحومه ضجت خيم عليهه الخطر
وركضاهم عبرو الصوب النهر
هذا يوم الساعه تنعد ابشهر
وللحسين الروس وده ابشاره
خادم اهل البيت علي الزرگاني
/channel/aabas78
قصائد لكل ايام محرم اشترك بالقناة
#شجاعيه_لمولاي_أباالفضل
ـ محرم 1447هـ
شدتت والگمـر مغتاض
مثل الـريح ما ينكض ..
من دگ رأيته اعله الغيم
بيده العسكر اترضرض ..
وصار اعله الفرار انذار
والدم بالمغاره اكتض ..
من گد ما يكسر ارگاب
حته الغيم موش أبيض ..
وگام ايهوس السيف
اليوم انوّنس الضيف
حـي الله الـثـگيـلات
صار الـمـوت عالكيف
========ـ
ضجّت بالطويس الگوم
ؤن الثكله صار الؤن ..
دخّن وشيجيسه الحار
واجراس الفزع رنن ..
تشحط بالدمه الفرسان
گـام ابـذبحه يتفنن ..
شيفـض عـركة العباس
رمحه اعالرگب نيشن ..
يـطـلع كـل الاكتـار
حار ومن ظهر حار
يمـطر صـار سجيل
وخاطف كل الانظار
========ـ
أشرس ما تچهبه أحيّـود
حمحيل الحرب يرهب ..
وأتــلال الجـمـاجـم هـاي
سواهه النـزل مغـضب ..
تـربــاية عـلـي ويا خوف
يدنه امن الگلب ويطب ..
يـذبــح بالـعـده وعـزريل
گاعد يمه بس يحسب ..
ادخيله أبن أم الابنين
يـذبح وأيصد لحسين
شـايـل مايه وايصـول
مغضب وايحد بالعين
========ـ
تخلس رهبته امن ابعيد
بچفوفه العگد والحل ..
ويفـرض رأيـه بالميـدان
ويـأمـر ينـهه المـعـدل ..
يخسفهه ابمشيته الگاع
لـو مـن مهـره يترجل ..
ما يـنــرش وراه الـمــاي
مـوت الاحـمر اتخـيل ..
عركة وطبهه العباس
ايطگ الـرأس بالرأس
ما يتعب ولا ايـهــاب
بوصفه امحير الناس
========ـ
ـ خيري الصفراني ✍️ ـ
/channel/aabas78
قصائد لكل ايام محرم اشترك بالقناة
في شجاعة أبا الفضل العباس سلام الله عليه (وزن عگيلي )
العسكر تتراجف صوبينه.
شعامل بيهم عم سكينه
★★★★★
عم سكينه شعامل بيهم
بالحيره الگوم مخليهم
چاوين الگاع توديهم
امركب هلموت ابچفينه
شعامل بيهم عم سكينه
★★★★★
ياهو اليتعنه ويدناله
راحت چاوين الخَيَّالَه
يتمرجل يازلمه اگباله
تجدح نار الغيظ ابعينه
شعامل بيهم عم سكينه
★★★★★
هز العدوان وميدانه
من صد لسكينه الحيرانه
ومن صاحت ياعم عطشانه
وانته من الماي اتروينه
شعامل بيهم عم سكينه
★★★★★
لوتصفه الگوم المنتشره
بگد ذرات رمال الصحره
ميهاب الي ناذر عمره
وبايعهن لحسين اسنينه
شعامل بيهم عم سكينه
★★★★★
الرفع الحگ ودفع الباطل
مجرب سيفك يابو فاضل
تفخر زينب انته الكافل
وحماي الحره امسمينه
شعامل بيهم عم سكينه
الشاعر حسن لعيبي الحريشاوي
/channel/aabas78
قصائد لكل ايام محرم اشترك بالقناة
يا ابو فاضل من طحت عالمشرعه
يا ابو فاضل بينــه حلـــت فــاجعـه
حرگوا أخيام الستر الخيل داست يا صدر
*----------*----------*----------*
من طحت عالشاطي خويه ظلمه صارت يالگمر
رد اخــوي حسين منــك يمشي مكســور الظهر
خــويه باخــر ساعـه يمكن ادري ما عندك خبر
گاعد الشمر أعلى صدره بسيفه حز منه النحـر
يـــا هضيمه مــن بعد ذاك الذبــح
يــا هضيمه راسه مرفــوع برمح
بگلبي ظل يسعر جمر الخيل داست يا صدر
*----------*----------*----------*
خويه اسولف يا مصيبه من بعد ذاك الجــره
أخيولهم رضتله صــدره والضلــوع مكسـره
الظهره مكســور بغيــابـك هسـه نايم عالثره
والله لــو مـوجـود چفك ياهــو يلمس منحره
يا حسافــه طيحتــك كســرت ظهـر
يا حسافــه أعيوني صاحبها السهر
خويه وبتالي العمر الخيل داست يا صدر
*----------*----------*----------*
خويه وأصعب حاله مرت يا گمر روحي وهلي
بالخيــم نيــران وجــتْ ومــا بگــه ناصــر الي
هجــت الأطفــال بالبــر والنّسـه يـا ابــن الولي
واسمــع العــدوان صاحت هاي زينب بت علي
يــا كفيلـي صعبه زينب تنشتم
يــا كفيلـي والشمــاتــه تبتسم
نــار فگـــدك تستعر الخيل داست يا صدر
*----------*----------*----------*
يا ابو فاضــل خويه صعبـه هسه مچتوفه بحبل
وامشي مسبيه وأسيره وسفه تالي اعلى الهزل
خــويه احتــار بجـوابــي عنــك مــن أرد أنسأل
عمنه يـــا زينب تأخـــر صعبــه شيقنــع الطفـل
يـــا مصابي للجره بطف كربلـه
يــا مصابي يالجثثكــم بالفــــلا
بروحي زين وظل صبر الخيل داست يا صدر
*----------*----------*----------*
خويه يـا عباس حگــه دمــع المعــاتب نـزل
هــاي أول مـره تــدري الليل أجاني بلا أهل
واسمع الشمــات نادت ويــن راح ألي كفـل
شگد تمنيتـك تسمعـه خويــه ويمرلك زعـل
صعبه شامت يمي وبليل الخطر
صعبه شامت بعــد عينك يالگمر
خويه مذهولــة فكر الخيل داست يا صدر
*----------*----------*----------*
موقف شگد صعب اگوله مر عليه ابكربلـه
لا خيّـم ظلــت يخــويــه بالبــراري العــايله
سكنـه عنــك نــاشدتـني والمدامــع ســايله
عمه ماكـو ألي كفلنــه أنتي صيري الكافله
بالبراري خويه أطفال وحـرم
بالبراري من بعد حرگ الخيّم
لله سلمنــا الأمــر الخيل داست يا صدر
*----------*----------*----------*
الشاعر
موسى البديري
/channel/aabas78
قصائد لكل ايام محرم اشترك بالقناة
ابو فـاضل من دخـل ميدانها
سيفة رحه ويطحن بأكوانها
........
ابو فـاضل لـو نزل للحـومة
لوحة بـيدة كـربله مرسومة
من عـلي ماخـذه كل علومة
ضربته وحدة لان محسومة
بالـفخـر مذخـورهـاذه يومة
وكـربلة هـوه رمز عنوانها
.......
بالطفوف الموت صار بكيفه
من عـلي ماخـذ اذن تكـليفه
شمرت الفقار شمرت سيفه
بالركـاب يصير حـد تنظيـفه
من بني سفيـان ياخـذ حيفه
زلزل جيوش ويهد اركانها
.......
تـشرد ابطـال الـزلم كـدامه
سيفة ما يبتر يدور الهـامه
القصاص مطـبقة بأسـلامه
الحرب مقبوله بس احكامه
يحـكم يقـرر ينـفـذ اعـدامه
مايكابل شرط بس فرسانها
.......
سيفة رحه ضربته جن زلزله
شهب لو صعـقة عليهم نازله
سيفه يقبض روح ليحل اجله
بيـدة مـلك الموت سلمهه اله
بسيفه اية عالحـسيـن منـزله
اية بالحـق والعـدل برهـانها
.........
سيفه بالميدان عصة موسىه
كل سحرهم يبطل من يدوسه
يلغـف سيـوف ويكطع روسه
سجدت اركاب الزلم لدروسه
صار بالحـومة يأدي طقوسه
وشعـل بيهم بالذعـر بركانها
......
سيفة قـطعه الجهـنم بالارض
العذاب الهـم بده اصبح فرض
حل قدرهم منو بيهم يعـترض
اليشوف السيف منه ينـقرض
دخل بيهم طول ياكل بالعرض
ويـدخل وبيـدة يـسـد بيـبانها
.......
الشاعر
اياد الفرح التميمي
/channel/aabas78
قصائد لكل ايام محرم اشترك بالقناة
التاريخ: 01/07/2025
قصيدة الى الاصحاب ع
نزله سريعه
الحسين يقول عن اصحابه الى اخيه العباس عليهم السلام
عندما بدو في المبارزه ضد الخصم
&&&&&&&&&&&&&&&&&&&&
زلم ونطو للحسين احجايه
اخذ هجي انصار يا ابو الرايه
&&&&&&&&&&&&&&&&&&
تعل شاهد عابس وجون حبيب
ومسلم ونافع اهل موقف عجيب
زلم نعم الزلم حبهم لي رهيب
ركض عالموت اركضو وفايه
اخذ هجي انصار يا ابو الرايه
&&&&&&&&&&&&&&&&&&
درع صارولي لمن قمت الصلاة
الموت ما همهم الطلگوها الحياة
رتوو مني وشلهم ابماي الفرات
انصاري دنيه واخره ويايه
اخذ هجي انصار يا ابو الرايه
&&&&&&&&&&&&&&&&&&&
راية الانصار حاملها حبيب
يصيح خل ننصر ابو اليمه الغريب
حسين مو عيسى الي يندگ بصليب
أبن ضاهر گال أسمع هايه
اخذ هجي انصار يا ابو الرايه
&&&&&&&&&&&&&&&&&&&&
شوف ابن عوسجه والهمداني شوف
ما يبالو بالعدد لا بالسيوف
الخوف نزعو ثوب بالعاشر الخوف
ولطفوف ازحوف اجو مشايه
اخذ هجي انصار يا ابو الرايه
&&&&&&&&&&&&&&&&&&&
اي وحك القل هوه الله الصمد
غير أبو السجاد ما شافو احد
بيوم لا مال ينفع لا من ولد
فقط بس نصرة حسين الغايه
اخذ هجي انصار يا ابو الرايه
&&&&&&&&&&&&&&&&&&&
امن المسيحي وهب اخذ الغانمه
هوه ومه وزوجته ضحو دمه
المهم يرضو الزجيه فاطمه
شوف دمهم رفع ديني اهوايه
اخذ هجي انصار يا ابو الرايه
&&&&&&&&&&&&&&&&&&&
اليل اتخذو جمل گالو محال
نعوفك بلا ناصر بسوح القتال
گالو احنه بدونك انعيش بضلال
ونندثر ما نرتفع جم بايه
اخذ هجي انصار يا ابو الرايه
&&&&&&&&&&&&&&&&&&&
برزو واحدهم يلاوي الحديد
گالو انموت ونخضر من جديد
يا حلات الموت من دون الشهيد
الشيخ ذب اعمامته والصايه
اخذ هجي انصار يا ابو الرايه
&&&&&&&&&&&&&&&&&&&
اعليهم ابچي لمن ماتو صحبتي
راحو وعافوني وحدي بغربتي
يبو فاضل وأنت يا بگي اخوتي
اطيح يم العلكمي ويم مايه
اخذ هجي انصار يا ابو الرايه
&&&&&&&&&&&&&&&&&&&&
لخادم خدام الحسين عليه السلام
عمار المنصوري
/channel/aabas78
قصائد لكل ايام محرم اشترك بالقناة
موشح إلى انصار الامام الحسين عليه السلام
خطــوا الأنصــار آيـــات الشـــرف
ورخصوا دمهم لجل أقدس هدف
*---------------*---------------*
رخَصّــوا دمهــم لجــل ديــن الإله
والله لحسين السبــط دينــه اجتباه
هــو يحــي الديـن من نحره ودماه
ومثـــل دم حسيــن هم دمهم نزَف
*---------------*---------------*
خطـــوا الأنصـــار آيـــات الــــولاء
يــوم نزفت عالارض ذيــچ الدماء
سجلوا أروع دروس مـن الـــوفاء
نهـــر والضامي عذب حبهم غرَف
*---------------*---------------*
خطوا أســرار المجد أهل الصـمود
يوم لحسين انتمــوا صــارو جنود
همّــه سبعين وتـعنـــوها الحشـود
ولا شخص منهم ابــد گلـبه رجَف
*---------------*---------------*
خطـــوا الأنصـــار بالطـــف انتصـار
مثله ما أظن بالسمه وبالارض صار
الله كــرمهـــم أوي حســين المـــزار
أباب أبـو أليمه الدهـــر الهـم وگـَـف
*---------------*---------------*
خطـــوا الأنصــار أعظـــم ملحمـــه
حيرت أهـــل الأرض وأهل السمــه
وقعوا لحسين مـــن فيـــض الدمه
موقـف أبكل جيل مثله ما أنَوصَف
*---------------*---------------*
خطوا أوي حسين لــوحة كبــريــاء
مــن تفايض دمهم ابطـــف كربــلاء
سجلــوا أنبـــل دروس مــن الآبــاء
وحگه هـــذا الكون بيهم لـــو هَتَف
*---------------*---------------*
خطو آيات الدمـه بـأرض بالطفــوف
ورخصــو ذيــچ المنــاحر للسيـــوف
مثل هاي التضحيه ما أظــن نشـوف
الحب جنـون الهم عبــر حـد الشَغـَف
*---------------*---------------*
الشاعر
موسى البديري
/channel/aabas78
قصائد لكل ايام محرم اشترك بالقناة
