لوفاة القاسم بن الامام الكاظم عليهما السلام
اتهدمت اركان گلبي اتهدمت
اتألمت لمصابه روحي اتألمت
بصحره المواجع هايم
لجل الغريب القاسم
ابن الامام الكاظم
★★★★★
اتهدمت اركان گلبي ونكسر
من كثر نوحي الفرح ماله أثر
للغريب المارحم بيه الدهر
المشه بدروب يحويها الخطر
وياي الحزن متوالم
لجل الغريب القاسم
ابن الامام الكاظم
★★★★★
طلع من داره گصد دار الغرب
تلهب الحسرات ضلت بالكلب
احتار وين يروح ويذبه الدرب
الدنيا وي اهل المجد شنت حرب
ملزوم دمعي ولازم
لجل الغريب القاسم
ابن الامام الكاظم
★★★★★
وصل للغربه المواجع حالته
المنكسر مهدوم ضل ابحيرته
الناس مذهوله الوقاره وهيبته
الديره عمها الخير كلها بجَيَّتَه
ناحت بحسره الوادم
لجل الغريب القاسم
ابن الامام الكاظم
★★★★★
الفاطمه بنته حچه عن فاطمه
عن كسرها وطَبْر حماي الحمه
وچبدة المسموم صورة مؤلمه
وكربلا ونحر انگطع ينزف دمه
چن الزمن مونادم
لجل الغريب القاسم
ابن الامام الكاظم
★★★★★
شرح للوادم قضيته وقصته
وعن دواهي الوكت بيه وغربته
عرفوا اصله منين واهله وديرته
بالبواچي شييعوها اجنازته
ردوا ابنوح الدايم
لجل الغريب القاسم
ابن الامام الكاظم
الشاعر حسن لعيبي الحريشاوي
/channel/aabas78
قصائد لكل ايام محرم اشترك بالقناة
نزله الامام العسكري (ع)
يالعسكري بدمع الحزن نادينه : يمسموم
سامره حزنانه بفگد والينه : يمسموم
نبچي ونون بدمع الحزن
يمسموم
يمسموم
١
هالليله بدموع الحزن ننادي : يمسموم
ابنك چبدته اتوذرت يالهادي : يمسموم
ويگول كل خادم انه اعتقادي : يمسموم
بالمجلس اخذ يالحسن مرادي : يمسموم
ابچي بدمع واكسر ضلع
يمسموم
يمسموم
٢
لجلك بچينه والدموع بحسره : يمسموم
عايش مصابك بالگلوب اشكبره : يمسموم
الليله نحلفك يالحسن بالزهره : يمسموم
للمجلس احنه انريد منك نظره : يمسموم
الهم ينجلي يابن علي
يمسموم
يمسموم
٣
هذا الخبر هالليله من نذيعه : يمسموم
تنحب تنوح اعليك كل الشيعه : يمسموم
ضاگت علينه سيدي الوسيعه : يمسموم
نقسم عليك بأمك الشفيعه : يمسموم
شوف الخدم تبچي بألم
يمسموم
يمسموم
٤
سمّو چبدتك سيدي النواصب : يمسموم
واحنه گلبنه الليله لجلك ذايب : يمسموم
ماتنگـطع تمشيلك المواكب : يمسموم
حضرت الليله بدمك وتطالب : يمسموم
بدم رگبتك و إمحبتك
يمسموم
يمسموم
٥
نكتب عهدنه وبالدمع نادينه : يمسموم
والينه يبقه العسكري والينه : يمسموم
خدام الك تقبلنه يا مهدينه : يمسموم
وسجلينه يالزهره بسجل سجلينه : يمسموم
يم المحن لجل الحسن
يمسموم
يمسموم
لاتنسون والدي ووالدتي وابني عباس من الرحمه والمغفره
خادمكم رياض الرسل الجابري
/channel/aabas78
قصائد لكل ايام محرم اشترك بالقناة
استشهاد الرسول ص
هي لـتفارگ ابوها شلونها
فاطمة الله يكون بـعونها
"""""""""
راح طه وراح مو بس الامان
راح وياه شكو بالدنيا حنان
چان ابوها وچان اخوها وكلشي چان
هاي اول مرة يمشي بدونها
"""""""""
كل ابو لابنيّته خيمة وسند
وابو الزهرة والله ميعوضه احد
فاطمة شلونچ منو يگلها بعد
راح غاليها وسندها وعونها
"""""""""
بچت اهوايه باذنها من همس
رايح لوجه الله لتحزنين بس
انتي بنتي وانتي روحي والنفس
محنة شيّبت راسها وجفونها
""""""""
حچايه گلها اتبسمت ودمعت العين
امن اهلي انتي يمي اولهم تجين
وويه ابوچ ابنيتي باچر تلتقين
حچاية بچّه فاطمة مضمونها
""""""""
يساعد الله فاطمة بهذا الجره
وجه ابوها وضحكته تحت الثره
روحها طلعت بچي بالمگبره
الفرگة صعبة حگها لـتلومونها
"""""""
عينها عالباب تنتظره يعود
راح اعز انسان إلها بهالوجود
ولايام الحلوة ما ترجع اردود
راح طه وغاب عن عيونها
""""""""
الـمات ابوها بجيته تبقه حالمه
شگد صعب احساسها لـميتمه
مات طه مدري ماتت فاطمه
الموت ريته ايخيبلها ظنونها
"""""""""
هاي محنة تبدي من عدها المحن
وينكسر بالباب ضلع ام الحسن
وذبح ابو اليمه وخواته ينسبن
وتستمر ما لا نهاية شجونها
انيس الخفاجي الكربلائي
/channel/aabas78
قصائد لكل ايام محرم اشترك بالقناة
موشح للرسول الكريم (ص)
شلون حال الزهره هسه بيا وضع
عين عالوالد وأيد اعله الضلع
١
المصطفى بآخر نفس واتصد عليه
بالمدامع حايره ولزمت أديه
احجي يابويه تگله وترتجيه
حچه طه بصوت بس ماينسمع
٢
حچه طه وسكت واتعالت اصوات
ناده جبرائيل بين السماوات
الدنيه فالتحزن محمد رحل مات
ولازم الجثمان هسه ينرفع
٣
گبل ماينرفع جثمان الرسول
اتصور انته بيا وضع حال البتول
تبچی تنحب حايره الليله أشتگول
ساكته ومذهوله وتصب الدمع
٤
شمته بصدره وتحس ذابت الروح
حايره الزهره بدمعها والجروح
على الوالد تبچى بالمدمع تنوح
وروحها ذابت تحس مثل الشمع
٥
يمها حيدر عاش لحظات الحزن
اعز ناسه ايفارگ الليله ویون
يدري كلش صعبه ساعات الدفن
دفن روحه وحگه حيدر ينصدع
٦
حمل نعش المصطفى وبالگبر صار
نزله بأيده علي بحيره ومرار
من نظرله جنه مليانه خضار
وجه طه المصطفى نور ويشع
لاتنسون والدي ووالدتي وابني عباس من الرحمه والمغفره
خادمكم رياض الرسل الجابري
/channel/aabas78
قصائد لكل ايام محرم اشترك بالقناة
من بعد يوم السبي..نقيم ماأتم للنبي
يم ابو حسين..يم ابو حسين
&&&
للنجف جينه بعد ذيج المسيه
نقيم ماتم والدج ايا الزجيه
اربعينج كربله ليهسه بيه
دمعي ينزل عالنبي بدمعة رقيه
جيتكم احبي حبي.. نقيم ماأتم للنبي
يم ابو حسين..يم ابو حسين
&&&
دمع باقي بعيني من طف كربله
دموع خازن للنبي وي العايله
رجعت ويانه بحزنها القافله
للنبي تنصب عزاها بهل المله
تشوفها سود العبي.. نقيم ماأتم للنبي
يم ابو حسين..يم ابو حسين
&&&
يارسول الله اجينه وبينه روح
من مصاب حسين وليومك ننوح
للنجف جينه وبينه من الجروح
هوايه يامولاي من عطرك تفوح
انته ديني ومذهبي.. نقيم ماأتم للنبي
يم ابو حسين..يم ابو حسين
&&&
شكثر احزان بينه وبينه داي
للنبي تمشي بخطها وكل مناي
روحي ملهوفه وتنادي وعدها راي
يم علي الكرار ادريها شفاي
رغم جور الناصبي.. نقيم ماأتم للنبي
يم ابو حسين..يم ابو حسين
&&&
التعب هين علينه وكلشي راح
يوم نوكف تحت كبتك نستراح
يمك اتطيب العلل كل الجراح
ياابو الزهراء يالبيك السماح
اعرف انه مطلبي.. نقيم ماأتم للنبي
يم ابو حسين..يم ابو حسين
&&&
بالنجف ننصب عزاك وي السبيه
يانبي الرحمه العلينه ورحمه ليه
يارسول الله نعزي بهل االمسيه
نعزي ابو الحسنين ونعزي البقيه
نعزي كلمن عربي.. نقيم ماأتم للنبي
يم ابو حسين..يم ابو حسين
&&&
خادم اهل البيت
الحاج ابو علي السعيدي
/channel/aabas78
قصائد لكل ايام محرم اشترك بالقناة
اليوم زينب عودت برچابها
جايه بحسره تزور احبابها
**
حيل مشتاگه واجت مستعجله
وباالدرب ماتستراح القافله
طگ گلبها تريد توصل كربله
الشوگ لخوتها الضياغم جابها
**
چان گبل الناگه يسبگها الگلب
باالبواچي خلصت كل الدرب
صعب حال ام الخدر كلش صعب
والحزن ناصبله خيمه أبابها
**
هيه درب الطف نواعي جابته
مساهره واليل أبد مانامته
هذا حاله الجاي لگبور اخوته
للي يسأل هچي چان اجوابها
**
جابها الشوگ واجت للمگبره
ومن على الناگه وهوت فوگ الثره
حگها زينب حيل معذوره تره
صار فتره مرافگه سلابها
**
حضنت اتراب الگبر وعليه هوت
وبچه التل الزينبي لمن بچت
حسين يبن امي عليه تلطم صفت
رغم كلشي ولا ماتسمعه اعتابها
**
تسولف وكل كلمه متروسه هظم
الفاگده باالمگبره تحب الطم
تره افراگ اهل الوفه يدگ باالعظم
حيل ذبلت والافراگ اسبابها
**
راحت الراعي الوفاء وگصدته
إنه ياعباس اجيتك ندبته
علم جابت فوگ گبره وخلته
والعيون ولانشف خنيابها
الشاعر سعد العبودي
/channel/aabas78
قصائد لكل ايام محرم اشترك بالقناة
من عكب هظم وسبي عدوانها
رجعت الليلــة تــزور اخوانهــا
رجعت بيا حال من عكب اليسر
ياجرح تشكي وتسولف ياكسر
حال زينب عكب اهلها ما يسر
يعجز شيحجي شيكول ألسانها
غصبا اعليها الضعن للكوفه راح
روس اهلها امعلكَه بروس الرماح
و العدو جابابهم بســب وصيـاح
التفـــــزع الهم نايمه ابتربانهـــا
على كـبر احسيـن ذبـت روحها
بياجرح تبدي وجثيرة اجروحها
بكربــلا تـطـلـع تـمـنـت روحهـــا
شلهــــا بالدنيــــه عكَب وليانها
يم كَبـــر عباس راحت بالعتاب
نادته خلافك دليلي خويه شاب
اتهنه بالنومه خلص درب العذاب
روحتــك محــــد يسد امجانها
تصيح طر كَبرك يخويه وصد ألي
عالهزل ركبوني وانه بت علي
انته يالبيدك جبتني من هلي
لحالي ناحـت كربلا و وديانها
توجهت لكبور هاشــم معوله
ياهلي رد ضعني ياهو استقبله
جيت هاليــوم و جبتها العايله
شلون هاشٕــم تنسبي نسوانها
تعاتب الحرمة اهلها عدها حكَ
جفني طول الدرب صاحت ماطبكَ
احنه اهل البيت صاحت ياخلكَ
احنه خيرة هاشم و عدنانها
للقصر من طبت ابمجلس رجال
حالها يبجي الحجر وشلون حال
راس اخوها شافته ومدمعها سال
شافته و زادت عليها احزانها
من خلص درب السبي الماله مثيل
خيروها اختارت بسرعه الرحيل
صوب كبر حسين وعضيده الكفيل
اتجـــدد بوادي الطفوف اشجانها
========================
حسن بشير السوداني
/channel/aabas78
قصائد لكل ايام محرم اشترك بالقناة
رجع ظعن السبايه
رجع ما عـنده رايه
يوم الأربعين
»»»»»»»»»»»»»»»»»»»»»»»»»»»»»»»
1️⃣
رجـع ظـعـن السـبايا بـدمـعه سـجابـه
رجع كل خطوه تنعى حسين ومصابه
كـصـد مـوكـبها زيـنـب يا حـزن جـابه
تـراب الحـومـه يـسـأل فـاكـد اغـيابـه
~~~
كصد ظعن العقيله
عـله الناكه الهزيله
يوم الأربعين
»»»»»»»»»»»»»»»»»»»»»»»»»
2️⃣
رجـع والـشـوك عـابر مرحـله وحـرگه
واجت كل وحـده مشتاكه عله الملكه
وعـلـه الأكـبر لـيلى ابشـوكه مخـتنكه
ورمـله اتريـده جـاسـم رادت اتـشبكه
~~~
الورد يـنكـط ترافـه
العطر ينشم مسافه
يوم الأربعين
»»»»»»»»»»»»»»»»»»»»»»»»»
3️⃣
الرباب اتشوفه عبد الله وتشم عطره
وكـعـدت تـشـتـكيلـه الـنايـم ابـكـبره
راحـوا كـلـهـم وصـار الـدمـع جـمـره
تطشر كلشي وسـفه وراحت العشره
~~~
الاهـل حـدر الترايـب
عله عيوني المصايب
يوم الأربعين
»»»»»»»»»»»»»»»»»»»»»»»»»
4️⃣
عله العـباس حـزني الما بـرد لحـضه
جفاني وخالي ظعني ومحد يعوضه
امـشي بهل الدرب مسـبيه ما يـرضه
وصلت الكبره واسـمع دكتـه ونبـضه
~~~
الكلب ينبض يزينب
اموت وباقي انحـب
يوم الأربعين
»»»»»»»»»»»»»»»»»»»»»»»»»
5️⃣
يـم حـسين روحـي راحـت بـسرعه
عله كبره وصـلته وطاحـت الدمـعه
وذكرت ابيـوم شفته حـاير ابوضعه
وصلته وطشره الحـافر منو يجمعه
~~~
ومصابه ابكد بجينه
وله ابحـسره اجـينه
يوم الأربعين
»»»»»»»»»»»»»»»»»»»»»»»»»
6️⃣
شبعنه اشكـد بواجي وعاتبت بيهم
دكـافي مـن العـتب وادري يـأذيـهم
اجينه من السفـر نكعـد نحـاجـيهـم
ونـخلص كـل بجـينه وهـم نخلـيهم
~~~
مشيت ابكلبي حسره
ويموت اليمشي عمره
يوم الأربعين
»»»»»»»»»»»»»»»»»»»»»»»»»»»»»»
محمد خشان ✍️.
»»»»»»»»»»»»»»»»»»»»»»»»»»»»»»»
/channel/aabas78
قصائد لكل ايام محرم اشترك بالقناة
رجوع الضعن في اربعين ولحسين (ع)
رد الضعن باربعين الوالي
وكلهن اجن يبجن اعله الغالي
.............................
من يسر رجعن وكلهن تعب
والعمر من الايام انسلب
مو صبر جن صبح نار وحطب
ينتشر بالدمع مثل اللهب
وعلي الساجد حادي ياحسين اينادي
سيدي اتعنينه من اليسر للوادي
نسوه وبجن واشبقه ابدلالي
وكلهن اجن يبجن اعله الغالي
.............................
مو هوه هب رماد اخيامه
ونينوه لخنصره وابهامه
يادوه والجروح ايتامه
والتوه ظهره يم ازلامه
زينب ويه العيله من بعد توميله
من اليسر مهضومه تكَعد وتحجيله
دار الزمن والدموع اتلالي
وكلهن اجن يبجن اعله الغالي
.............................
جف سبع من بِعِد حياهم
منكَطع بمشرعه اتلّكَاهم
وينسمع هالحديث وياهم
وابدمع عينه من ترعاهم
استقبل اخته بعينه امكَطعه جفينه
للخدر والعيله فدوه كال اسنينه
وزينب تون وينه جا كّفالي
وكلهن اجن يبجن اعله الغالي
.............................
بالترب وسفه زلم الهيبه
والحرب عاليتامه امصيبه
بالرعب والعدو تعذيبه
شكَد صعب وعلي منين اتجيبه
عيد شام اعداهم حيل والله اذاهم
بالشتم عالعيله وسوط يتلكَاهم
وابلا وطن رجعن ابهَم عالي
وكلهن اجن يبجن اعله الغالي
.............................
استقبله جابر الانصاري
بكل هله وبدمع دم جاري
يسأله والعليل اخباري
قافله جاوبه بكل ناري
ها يعمي جابر على اجروحي مكابر
انظر اعله سكينه وكَوه كَلبي صابر
كَلبي انطعن من اشوف اعيالي
وكلهن اجن يبجن اعله الغالي
الشاعر ياسر العارضي
/channel/aabas78
قصائد لكل ايام محرم اشترك بالقناة
نزله للاربعين:
رفعت الرايات شيعة حيدره
وزحفت الالاف لبن الطاهره
زحفت الالالف يوم الاربعين
و گصدت اتواسي العقيله بالحسين
خطوه خطوه ايباري جبريل الامين
و ساقي للمشايه سبع الگنطره
زينب اتلاگي النساء ابكربله
وتبچي من اتجيب طاري حرمله
تذكر اشصار اعلى اهلها بالفله
وتنعي وياهن وتهوه اعلى الثره
علي الاكبر حاضر ابشيمة هله
وگفه لاستقبال مر كل قافله
ياهله ايصيح الاجونه ياهله
والكرم عند ابوالقاسم مصدره
يفرش ادروب المشي سفره الحسن
و المناسف بيد اولاده حلن
محله وگفتهم اسباع امن اوگفن
امعزبين ولاگو اعلى المفخره
كل بني هاشم اجلالا ً للرسول
باَربعين احسين ايقيمون الاصول
ايساندون اليعتني حتى البتول
حيث يحيون الشعيره العابره
احسين من الله سفينه للنجاة
لازم انقدس وجوده للمماة
احسين تربات الزكايه الماجداة
وهوه عنوان الجسور المعبره
احسين حبه ايجنن اعقول الهوّه
مثل عابس جون واحيود الفدوّه
نعم ذيچ المعرفه ابیوم اعرفوّه
ولاگو اسيوف العده ونالو ضره
ـــــــــــــــــــــــــــــــــ
الشاعر هادي الامغيطي(البوغبیش)
/channel/aabas78
قصائد لكل ايام محرم اشترك بالقناة
رِجعت زينب أمن الشام
بنفس الهيبه لخوتها
وياها علي السجاد
والزهره التلگتها
رِِحلة عز واجت منها والظالم عرف حجمه
الگاعد عالعرش مرتاح يم زينب نسه اسمه
شيطان الشكل والروح والإيمان اجه يرجمه
دخلت للقصر حيدر
وگفت وگفت الاكبر
حرب وانتصرت الخدر
علي وبسيفه طب عالگوم كل الناس شافتها
صاحت يا يزيد اصمت اووِگف مجرى النفس عنده
بي خوفه وعلي خلت تذكرها ولد ولده
گبال الهيبه مو طينه( كلمن دمعته بخده )
منها شردت القاده
تشل الراد يتماده
زينب هيبه الساده
يا دولة التسكتها وكل الكاع دولتها
المو رجال يم عباس يم الحره مو رجال
العفه من الله ياهل الناس عَليها مفصله تفصال
اول حرمه بالتاريخ شافتها العِده خيال
بعباية فاطمه الزهره
وگفت بالقصر حضره
وانطت كل شخص قدره
رهبه بالزلم صارت زينب هاي صولتها
مضرب للوفه زينب هاي الماتهبط الرأس
التاريخ انحنى يمها غير اخت الشهم عباس
الحارسها الملك جبريل بس بفاطمه تنقاس
ردت راشده النيه
المرأه الكربلائيه
حضنت گبر ابو الرقيه
وبده سيل الدمع يجري اعله ونها تبچي ناگتها
من گبر لگبر ضلت تمشي ولونها تغير
مثل اشفاف ابو السجاد گلبها بكربله اتفطر
الماعثرت بطبت السوگ يم إخوتها تتعثر
العافت عالارض مذبوح
حگها تنحني وتنوح
احساس الحره ضل مجروح
لان عافت اخو مطشر ويمه الروح خلتها
بعبره نادت اخوتها وداعت الله يخواني
هذا اول عزه يمكم ويم جدي العزه الثاني
وعد ما اگطع الونه واموت من الهجر اني
وعد ما ينگطع نوحي
ولا انساهن اجروحي
لحد ما تنقبض روحي
كل لحظه تموت ام عون بلا اخوان رجعتها
الشاعر عبدالله الشويلي
/channel/aabas78
قصائد لكل ايام محرم اشترك بالقناة
تهتف ....الوفايه
هذا صوت الرايه
........عاشك انه احسيني
معتني مشايه
***
يالله شد الرايه.....وعتني مكصودك
سبح بنفاسك........بالمشي مشهودك
معجزات تشاهد......هذا وافر جودك
كلشي لجل الزهره..قدمت مجهودك
بيها تلكه انفاسك
عابس ابحساسك
........والموالي ينادي
شيعتك عنايه
***
اعمه شفنه بدربك......مايشوف بعينه
بروحه لمن كاصد..بالمشي الله يعينه
كال اشوف بكلبي.....والبصيره بدينه
الوفي بيمانه...كلشي ينطي احسينه
بالمشي انتباها
فاطمه نلكاها
......تمشي والله ويانه
لو نسوي اقرايه
***
فاطمه اتلكينه.......شوفي هاي احبابج
ماتعوف احسينج....نجري دم بمصابج
فدوه لو شمينه............ذره من اترابج
دم نشوف اعيونج......مانشف بهدابج
بالمسيره انواصل
هيه بس تستاهل
........انتي كلشي بروحي
روحي يمج هايه
***
وزعتلك روحي..كلشي لجل انطينه
اشرت دمعاتي.......الكربله اتودينه
بوصلت. احلامي......بدربك ادلينه
والعذر تقصيري......والله ماوفينه
كاتب ابحساسي
حيدري عباسي
.......فاطمي دمعاتي
وانه منطي احچايه
***
كل مسيره انواصل ...بربعينك جينه
اتوزع الزوارك......ماي شفنه سكينه
يم حسن خطارج.......فاطمه تلكينه
والكمر شد واهس.....والعزم منطينه
ياعلي نادينه
ماتهم رجلينه
......كل تعب مابيها
هيه هاي الغايه
****
تمت بعون الله
خادمكم..... يوسف الفتلاوي
/channel/aabas78
قصائد لكل ايام محرم اشترك بالقناة
ويلي على المجتبى
واويلي عالمسموم..واويلي عالمسموم
...
جبده انمرد والسم صعد لعيونه
واخوانه كل ساعه الجهه ايديرونه
بآخر نفس يتشاهد ايسمعونه
ملعونه جعده السمته ملعونه
ياشيعه سابع صفر
يوم الحزن هاليوم..واويلي عالمسوم
...
ريحانة الهادي وعزيزه الزهره
ياكل الطير بخيره لو مد سفره
بالتمن ايحط الذهب للفقره
هذا الامعزب وابوادلال السمره
اصبح مضيف الكرم
من شوفتك محروم ..واويلي عالمسموم
....
الخوان لويتفاركون بساعه
يبقه الكسر طول العمر اوجاعه
احسين اعله أخيه الليله طاح اشراعه
كسرة ضهر والله الحنين اوداعه
واعله الحسن مودمع
زينب بجيهه ادموم..واويلي عالمسموم
....
ابحظنه الحسين امخلي راس الغالي
وايكله ونتك خويه شلة حالي
ابوجهك اباوع وانه سارح بالي
خيمه ورمح يالحسن يتراولي
وياي اريدك سند
لو هاجمتني الكوم..واويلي عالمسموم
...
الطف اجاني وصدري ضل يوجعني
وباجر الخيل ابكربله اتكطعني
تاخذني صوب الخيمه واترجعني
بالطف أضل اومحد ايشيعني
وعالشاطي يبقه الكمر
راسه بعمد مهشوم..واويلي عالمسموم
....
باجر اذكرك واذكر انه ايامك
من توكع ادموعي بعرس جسامك
كون انه ميت يالحسن كدامك
ولا طرن التابوت خويه اسهامك
وصلن اسهام العده
للجسد يامضلوم..واويلي عالمسموم
....
واحنه ابمصابك هم نسوي اقرايه
شيعتك ياابومحمد اووفايه
يمته نشاهد كبتك امضوايه
و لارض البقيع انروحلك مشايه
هالحلم شيحققه
يالمرقدك مهدوم..واويلي عالمسموم
....
الشاعر محمد الجماسي
اللهم عجل لوليك الفرج
/channel/aabas78
قصائد لكل ايام محرم اشترك بالقناة
يا لحسن منعوفك الليلة أحنه ضيوفك
***
يبو محمـــد أحنه شيعـــــــــة وعالعهد وفّايه
بهل مسه كلنه أعـتـنـيـنه وأنت صرت الغايه
مــجــلـــــس الـلـيـــلة نصبنه وللأجر شرّايه
ولجلك أحنه مــــن حضرنه يـــــا دليل وآيه
يا لكريمة جفوفك الليلة أحنه ضيوفك
**
أنت ربّـــــان الــســفــيــنــــة وأنت أول قائد
مـــــن بعـــــد حامي ألحميه المؤتمن والخالد
نـلـتـزم دربــــك وسرنــــه وأبــد لا منباعد
وكلكم أنتوا روح وحــــده وكل علمكم واحد
بنور كل حروفك الليلة أحنه ضيوفك
*
أرواحنه نفديها لجلك يـــــــــــا لحسن منبالي
ونفدي كـــــل اللي نملكه وكـــل ثمين وغالي
نحيي ذكـــــراك الأليمة رغم كـــــــل عذالي
ورغـــــم أنف الناصبية تـبـقـــــه أنت الوالي
ونـنـتـمي لصفوفك الليلة أحنه ضيوفك
***
مــثـــل مـخــدمــنـــــه أخيّك أحنه هم خدّامك
والشــعـيـــرة تــبــقـــــه وحده بيومه وبأيامك
والمصيبة مصيبه وحـــــده وصوّبتنه سهامك
وكل مـوالي الليلة أمسه سيدي مــــــن أيتامك
وسفه هاي ظروفك الليلة أحنه ضيوفك
****
شلون نــنــســـاكم وننسه كل مصيبه عليكم
والجليل بكتبه كلهـــا نصّـــــــــه نازل بيكم
والمودة راد جـــدّك أجره مـــــــــن باريكم
نوالي إلكــــــم أحنه صرنه نعادي ليعاديكم
رسينه يم جروفك الليلة أحنه ضيوفك
**
انجمعت الشيعة بألمها اليوم تحيي مصابك
وتلعن بجعـــــــده ألخبيثة والأمر بصوابك
تواسي أمك هــــل مسيه بالجره وبالصابك
تنوح مالومـــــــه وحزينة والفجعها غيابك
اليوم عدها طفوفك الليلة أحنه ضيوفك
**
نسألــــــه بجاهــــك الليلة للوحيـــــد الدايم
يعجّـــــــــــل لشبل ألزجيه المنتظر والقائم
يزلزل عــروش المعــــاند والظلم والظالم
وديــــــن جــــــدّه يــعــيــده ســـــالم غانم
بجاهك ومعروفك الليلة أحنه ضيوفك
الشاعر
قاسم حتروش البلداوي
خادمكم
أسألكم الدعاء 🤲🤲🤲🤲🤲🤲
غير مبري الذمه كل من يقرأها بطور الغناء
/channel/aabas78
قصائد لكل ايام محرم اشترك بالقناة
ان شاء الله نبني ضريحه . ونعتنيه مشايه
اوموش رايه وحده نطلع . رايه تتبع رايه
......
ننتظر جيَّت المهدي ابن الحسن
ونبني وياه مرقد وكَبه وصحن
لبو محمد شبل حماي الحمه
والعهد باقي لحد طول الزمن
ونعتني من كربله .... مشي بدمعه هامله
كل تعب ميهمنه
بعدد قطرات المطر .... نكَصد الأكرم بشر
كل تعب ميهمنه
راحه ممشانه بطريقه . وتعب ماكو ابهايه
......
وبعدد اهل الكساء نبني القبب
و المناير كد عددهن من ذهب
وابو صالح نفسه يشرف عالعمل
راحه عدنه الخدمه وياه مو تعب
شكَد حلو اويه ابن الحسن ... نبني مرقد للحسن
عاليات اسواره
بخت ما مثله بخت .... الروحه للمهدي اتنخت
وصار تحت انظاره
الخدم وي ابو صالح . هذا بي الكفايه
......
والمدينه اتصير ثاني كربله
والجموع اطبهه طبت العائله
مثل يوم الاربعين ابكل صفر
هيجي اعداد الجموع الهائله
عل جهات الاربعه ... الجموع اموزعه
تمشي يوم امصابه
للحسن كل الخدم ... مشي تطلع عالجدم
وبخدمته احبابه
والعدد يتعده اكبر . نهر جاري ابمايه
....
باجر التاريخ يكتب وبفخر
حاضر ابهاي الزياره المنتظر
وحايطه الزوار بي من كل جهه
ورايته اترف اعله كل واحد حضر
صوره ما الهه وصف ... كلشي بيهه مختلف
منهه ما موجوده
والمواكب عامره ... بسفرت ابن الطاهره
الما يخلص جوده
تشبع الزاير سفرته . ويبقى منهه اهوايه
......
✍ كلمات : موسى الخادم
/channel/aabas78
قصائد لكل ايام محرم اشترك بالقناة
هالليله بأصوات النحيب
نصرخ وداعا يالغريب
واقاسما..واقاسما
...
مثل مانحيي الليالي الفاطميه
ننصب اعله القاسم الليله العزبه
انواسي ابوه المندفن بالكاظميه
وللرضا انقدم تعازي بهالمسيه
ياوسفه اشراف العباد
كل واحد ايموت ابلاد
واقاسما...واقاسما
....
فاطمه المعصومه كون الليله يمه
بآخر انفاسه تواسيه وتشمه
ابشوفة احبابه الغريب ايزول همه
وماتضل الدنيه بين اعيونه ضلمه
معصومه يمه الليله كون
اخت واخوهه يلتقون
واقاسما..واقاسما
...
عنده بس ابنيه ياناس وزغيره
لااهل يمه ولايمه عشيره
بآخر انفاسه بقه الناظر يديره
عله احسين اللمو اضلوعه ابحصيره
هذا الامام اشكد حنين
يبجي وينادي اهلي وين
واقاسما..واقاسما
...
ناس الامضيفينه من شافو يعاني
والعمر ماباقي ينعد بالثواني
ناشدو عن اسمه كال القاسم آني
ابن موسى الكاظم وسيد زماني
بس الوكت بايامي دار
خلاني احن ليل ونهار
واقاسما..واقاسما
....
كلهم اخذو ابنيتي لو رحتو الوطنه
هيه الاتدليكم اعله ابيوت اهلنه
وانتو ماقصرتو يالكلكم محنه
بالحشر ويانه مثواكم الجنه
ومن غمض اعيونه الامام
سووله بالحله مقام
واقاسما..واقاسما
....
كون هاي الليله نلتم بمزاره
نلطم بحركتنه وانون بحراره
بالكلب بانين اله كبه ومناره
يا الهي ارزقنه للقاسم زياره
اخو الرضه وللحاجه باب
هالليله غطوه بالتراب
واقاسما..واقاسما
....
محمد الجماسي
اللهم عجل لوليك الفرج
/channel/aabas78
قصائد لكل ايام محرم اشترك بالقناة
رايتنه مرفوعه
صيحتنه مسموعه
للعسكري .... للعسكري
.........
شيب وشباب امحزمين الليله
اويه المهدي راعي العزه دم نبجيله
امصابه ثجيل ابحاجة الي ايشيله
بالصبر والتعجيل خل ندعيله
ما نشفت ادموعه
صيحتنه مسموعه
للعسكري .... للعسكري
.......
صيحتنه يابو المنتظر صيحتنه
باجر نعليهه ابعلو رايتنه
والشاهد اعلينه تضل دمعتنه
غايتنه مو نحصد اجر غايتنه
واحدنه بي لوعه
صيحتنه مسموعه
للعسكري .... للعسكري
.......
للعسكري واحدنه ذايب شمعه
و ما بطل اعليه الجفن بالدمعه
الهاي المصيبه كلشي بينه ينعه
حتى الكَلب يبجي المصابه انسمعه
كل نبضه مفجوعه
صيحتنه مسموعه
للعسكري .... للعسكري
.......
مثل اربعين حسين اله نتعنه
وننصب مواكبنه بطريق الجنه
للعسكري بَّصمنه بالدم كلنه
يرخصله كلشي المنه واحنه منه
وانضل رهن طوعه
صيحتنه مسموعه
للعسكري .... للعسكري
........
اويه المهدي باجر نعتني بالرايه
من كربله الصحن الحسن مشايه
وفايه نبقه اعله العهد وفايه
ومابينه ابد واحد يبدل رايه
والطحنو اظلوعه
صيحتنه مسموعه
للعسكري .... للعسكري
.........
✍️ كلمات . موسى الخادم
/channel/aabas78
قصائد لكل ايام محرم اشترك بالقناة
(( نزله حماسيه ))
وداعاً يا محمد والدي
وداعاً يا محمد والدي
___
راح اودعنك يبويه وتجري دمعة عيني
بويه لاترحل دخيلك فدوه هاك اسنيني
والله مـن ترحـل يبويه مايهود أونيني
بويه من أنحب ونوحاً يبجي حته حسيني
وداعاً يا محمد والدي
وداعاً يا محمد والدي
___
خذني وياك بمنيتك والله ماريـد العمر
كون اموتاً هسه أنه دمعي مايقبل عذر
سوده صارت كل حياتي يامحمد ياذخر
كلبي مابطل نياحه ومدمعي حد الفجر
وداعاً يا محمد والدي
وداعاً يا محمد والدي
___
بيتي يفرغ من حنانك يالحنين لغالي
خالي من نور الهدايه بيتي بعدك خالي
بويه لا تترك يتيمه وارحم انته بحالي
فكدت بعمر الطفوله أمها وأنته التالي
وداعاً يا محمد والدي
وداعاً يا محمد والدي
___
هذه حيدر وبغيابك خيم عليه الحزن
ظهره محني يامحمد والدمع ذبل جفن
والله يشتاق الكيانك بويه وكلش يحن
الفارك أحبابه يويلي يكره اليل اليجن
وداعاً يا محمد والدي
وداعاً يا محمد والدي
___
وأرد اسولفك يبويه من يطول غيابك
هجمو علينه بحقدهم وعتنو يم بابك
بالشماته يا محمد سحكو على عتابك
الحركو البيت بغيابك همه من أصحابك
وداعاً يا محمد والدي
وداعاً يا محمد والدي
___
فاطم توأن من ضلعها ويلي اه من الكسر
مااسامح بـويه أنه وأبقه اليوم الحشر
أنصب بيوم القيامة محكمه الاهل الكفر
فلان وفلان بجهنم والله مااقبل عذر
وداعاً يا محمد والدي
وداعاً يا محمد والدي
___
كلمات
الشاعر الحسيني
مرتضى مكطوف الموالي
/channel/aabas78
قصائد لكل ايام محرم اشترك بالقناة
يالعفتني...ورده واحلامي سراب
يالعفتني...بويــه موتـني الغيـــاب
ويــنك انته ياهواي....عازتك ذبحت صباي
يالعفتني يالعفتني
....................................................
بويه ويـــنك يــــالخذت ويـــاك كُلشي
من رحت والعين زعلانه اعله رمشي
هــــــــا يروح العافيـــــه لاوين تمشي
ريت بويه ويـــاك كـــون انشال نعشي
يا شمعتي...روحي ما تحمل عذاب
يا شمعتي...فدوه رجــعلي جــــواب
وينك انتـــه ياهواي...عازتك ذبحت صباي
يالعفتني يالعفتني
......................................................
وحشه بويه الدار من يوم الرحت
ويــن مـــا انــدار اشتمك كمـــت
يا محمــد يا علــي يــامـا صحت
أكفياني وبس علـي شفته وطحت
يا فرحتي...وين وداك الزمان
يا فرحتي...فاطمه بعازة حنان
ويـــنك انتـــه يا هواي...عازتك ذبحت صباي
يالعفتني يالعفتني
..............................................................
يالعشت وياك احلــــى ايام عمري
دمعه دمعه خلصت شيبات صبري
ياحلم عمـــري الحلم لحضات تــدري
وانه من يوم الرحت مكسور ضهري
يا حسرتي...ثمنطعش عمري بجفاك
يا حسرتي...شصار لو تدري وراك
وينك انتــــه ياهــواي...عازتك ذبحت صباي
يالعفتني يالعفتني
................................................................
يالعفتني ومن رحت نكروا وصيتك
ما رعوني الجانوا ايلبسون صيتك
عفت كلشي وللكبر اعتب اجيتك
بويه احسبني هوه وتشتمني ريتك
يا فركتك...كطعت احبال الوصال
يا فركتك...الياوكت اصرخ تعال
وينك انته ياهواي...عازتك ذبحت صباي
يالعفتني....يالعفتني
..............................
بويه وحشه الدنيا وافراكك مردني
لون ناوي تروح ماجيت وخذتني
يا حزن عمري بعد المن عفتني
صعبه اعيش وانته بويه فاركتني
يا حياتي...عمري مايسوه بلاك
يا حياتي...موتي مستعجل وراك
وينك انته ياهواي...عازتك ذبحت صباي
يالعفتني يالعفتني
.....................
خادم خدمة الحسين
الشاعر محمد الموالي
/channel/aabas78
قصائد لكل ايام محرم اشترك بالقناة
قصيدة اسشتهاد الرسول الاكرم ص
استأذن الموت وخذاك ــ ويتــم العـــــالم وراك
انته بس ماكو سـواك ــ استأذنه الموت
©©©©©©©©
يمن نزلت آية الباري اعله صدرك
بالأرض لو بالســمه ينحفــر گبرك؟
الأنبياء يمك تجــي لو غاب بدرك؟
لو ملائكت العرش تنزل تحظــرك؟
يا سـراج المهتدين ــ ياضياء الصالحين
ياهو قبلك يا آمين ــ استأذنه الموت
©©©©©©©©
اتيتمو هاليوم حيـــــدر والزچيه
يبو الزهره امصيبتك اعظم رزيه
اتگابلو يم راســـك اونو ســـويه
اوداعـة الله يامحمد هالمســــيه
ادموع حيدر والبتول ــ تجري من دم يالرسول
كاذب الغيــــرك يگول ــ استأذنه الموت
©©©©©©©©
يطــرق البـاب بأدب مثل اليـزورك
استأذنك ميريد ابد يجرح شعورك
گالك رب العرش يطلب حظـــورك
وبان ياطــه على وجهك ســـرورك
وانته لبيت النداء ــ ورفع روحك للسماء
ياهو مــن الانبياء ــ استأذنه الموت
©©©©©©©©
الدعو اصحاب. الجرح عافو نزيفه
الك ما نصــبو عزاء نصـــبو سقيفه
انكـرو عهـدك والاحـاديث الشـريفه
وقبل دفنـــك نصبو منهم خليـــفه
وي علي ماشــــيعوك ــ ابسرعه ياطه نسوك
اوماكو غيرك يعرفوك ــ استأذنه الموت
©©©©©©©©
وي علي الليله تضـــل بس ذكريـاتك
ومنـــك بأيده بقـت سبـحت صـلاتك
نكسر ظهره وتدري عنده شگد غلاتك
اوياه الامــــلاك انزلت تبچي ابمماتك
ارد اسألك يالحنين ــ يانبي قبلك امين
قبل لاتغمضله عين ــ استأذنه الموت
©©©©©©©©
✍الخادم
كامل السعيدي
/channel/aabas78
قصائد لكل ايام محرم اشترك بالقناة
بسرعه خلصن * شهر عاشور وصفر
خوفي ترحـل * ياحبيبي المنتظـر
باقي بس يوم الرســول
خايـف غيابــك يطــول
وين اشوفك * وين اشوفك
ــــــــــــــــــــ
مو لساني يخاطبك گلبي الشجي
خاف مــا عيشن بعد عـام اليجـي
لهالسبب جيت اعله بابك ارتجي
اعليك ضـلع الرضّه حافر اعوجي
العشره الاولى * ندري تگضيها لطم
ولذلــــك * كـل محـرم بــي طـعـم
خاف هالنعــمه تـزول
خايف غيابك يطــول
وين اشوفك * وين اشوفك
ـــــــــــــــــــــ
ويوم عاشر ادري بي تشبع الم
انته گايلها دموعك تجـــري دم
گوه بالركضه تشيل انته الجدم
بعده يخنگ بيك دخان الخيــم
وي ركضتك * خطوه خطوه تضل تعد
ومن ضريحه * يصيحلك عبد الله رد
تأخرت يمته الوصول
خايف غيابك يطــول
وين اشوفك * وين اشوفك
ـــــــــــــــــــــ
ثاني عشره اگضيتها تنوح وتــون
نحت من يوم اهدعش لــم الحزن
وندري يوم اثلطعش بي ممتـحن
احضرت وي زين العباد انته الدفن
وبدفنتـــــه * اضــن ايدك حـاضـره
بصلب جدك * وانته تبچي لخنصره
شگد عليه مرّن خيول
خايف غيابك يطــول
وين اشوفك * وين اشوفك
ــــــــــــــــــــــ
ادري ثالث عشــره وين توجهت
بوسط هاي العشره للغرقد رحت
يم گبر زين العبــاد انتـه گصــدت
بس صحن ماكو لعد وين گعــدت
أرد اسألك * لچــن كاتلـنــي القهـــر
گبره طفته * شلون طفت اعله الصخر؟
انته زرته احنه شــنگول
خايف غيــابك يطــــول
وين اشوفك * وين اشوفك
ــــــــــــــــــــــ
اول العشــره بصفـر لمن يهـــل
موعــدك للشــــام لازم تنـــتقل
يم رقيه تفك اديها من الحــبل
زغيره عمتك عالهجر ما تحتمل
و ابو محمد * يوم سابع ليه ترد
وبالمديــنه * للمآتـــم تســتـعد
وهم تمر اعله عالبتول؟
خايف غيابك يطـــول
يمته اشوفك * يمته اشوفك
ـــــــــــــــــــــــ
وترجع وتلگه المواكب تنّصـب
وتبقى عينك بس تباوع عالدرب
باربعــين حسين عمتك من تطب
تضمها بعيونك عن عيون الغــرب
وانته بيدك * تترس الشارع عبــي
حتـــى زيـنب * تنســى ايام السبي
لأن عمتك بت أصول
خايف غيابك يطــول
وين اشوفك * وين اشوفك
ــــــــــــــــــــــــ
بهذن كلهن جفني صاحي وماغــفه
وشمعي ضل يتاني تحضــر ما طفى
دخيل عندك بس وفاة المصطفى
رايـــدك بـــس هالعــــزاء تشــــرّفه
راح اخلي * عيون گلبي مركـّـزه
بلكي اشوفك * لان هذا آخر عزه
الورد ما يحمل ذبـول
خايف غيابك يطـول
وين اشوفك * وين اشوفك
ـــــــــــــــــــــــــــ
الشاعر مهدي التقي
/channel/aabas78
قصائد لكل ايام محرم اشترك بالقناة
أجيت بهمي وأحزاني كـــــــــوم أكعد تلكاني
آه يحسين آه يحسين
........................................
وصلت الكربله يحسين متعوبه
من الشام آه الشام وأدروبـــــــه
مسبيه مشيت وجيت مسلوبــــه
بسهام الهجر والشوك مصيوبه
بعيوني الدمع زمزم مثل جسمك ولا يلم
آه يحسين آه يحسين
.........................................
دورتك يخويه وعثرت أجدامــي
أهنا عفتك جسد متوسد وضامـي
أهنا جان الشمر يحسين كدامـــي
يحز بكفاك شفته وغابت أحلامي
عطشان وجرى مايك وما واحد أجه وشالك
آه يحسين آه يحسين
.............................................
ركضت أعله النهر وأعيوني جاريها
صحت عباس زينب عاين شبيهـــــــا
أجت محنيه درب الشــــــــــام ماذيها
الكبر حسين كـــــــــــوم أكعد ودليها
أصيح وما يحاجيني جا يا هــــــو اليدليني
آه يحسين آه يحسين
....................................................
طفه شوفي وأجيتك أعثر وكــــوه
وعلى أجناح الأمل يحسين والخوه
طحت يمك وأحس كلبي نبض توه
كعدت وروحي أكلها هوه مو هوه
شلت أترابك أشتمك بعده ناكـــــــع بدمك
آه يحسين آه يحسين
...............................................
صحت أهنا تعالن سون أقرايـــــه
وكل وحده اعله أبنها تصير نعايه
أنصبن جادر وكتبن علـــى الرايه
ألميت شيخ أحزنوا يهل الولايـــــه
وأجفن كمكم أدلاله مضيف وشيع أهلاله
آه يحسين آه يحسين
..................................................
يالنايم ذبيح وسابـــــــح بدمك
يبن أمي أودعك لو أضل يمك
طالت نومتك ما تكعد أنضمك
هلبت ضل نفس يحسين ونشمك
عليك بداعت الزهرة أكعد وأذكر العشرة
آه يحسين آه يحسين
................................................
خادم خدمة الحسين
الشاعر
محمد الموالي
/channel/aabas78
قصائد لكل ايام محرم اشترك بالقناة
موشح ( جابت الروس ) تضمين في البيت الاول لمستهل جينه ننشد كربله مضيعينها
أتجــدد بطــف كـربــلاء مصــابـها
يــوم جابــت روس كــل احبــابها
****
ردت الحــره ودمعــهــا ابعــينــه
عالمصــايب ربــها بــس ايعينها
حجي زاير گــال گبـــل اسنيـنها
جيــنا ننشــد كــربلـه مضيعينها
بيــهــا زينــب گـالــو ميسـرينـها
آه يــا زينــب وعـِـظمْ اصــوابها
****
اتجدد امصــاب العقيله الصــابـره
يـوم شافــت كربله المــدمع جـــره
اتذكرت ﭼــم طــاهر نحـز منحــره
وضدنا بالطــف عــوّدت احــزابهـا
****
اتجدد النــوح ودمـــع عالخـد همـل
عــاد بيـها مصــابها فگــد الاهــــل
اهناك اخوها نذبـح واهنـاك الكفـل
والخيّـم نيـــران وجــها ارهـــابــها
****
ردت بــآلام كـــل الـــذكـــريـات
يوم صدت عينها صــوب الفـرات
اندارت ابطيحت گمرها النـايبات
أوصلــت اخيــول العــده لطنابها
****
صــدّت بآلام لــرمــــاد الخـِـيــام
ذكــرت الكــافل المــا جفنه ينـام
ﭼــان يحرسها الگمــر مــن اللئام
هسه يبــره اويه الضعن ســلاّبها
****
صدت لكتر الي بي صـدره انهشم
من الخيّول ضلوعه ما واحد سلم
صاحــت بــآهـــات يـا خويه وألم
جبــت راســـك يـــا سليل انسابها
****
رجع بيها النوح ونعــاد المصاب
مــنْ لگــت اثـــار من دم الشـباب
ورد ﭼنهــم حيـف ظلوا عالتراب
جســوم ال الـزهره دم اخضـابها
****
اه صــاحــت اه منـــج كـــربــلاء
يوم طاح اعلى النهـر ذاك اللــواء
بالبــراري فـــرت ايتـــام ونســـاء
اقصور اهــل الكفــر دخلـت بابها
****
الشاعر
موسى البديري
/channel/aabas78
قصائد لكل ايام محرم اشترك بالقناة
اليوم وصلت كربله بضعونها
زينب شغير الدمع بعيونها
**
جايتهم من سفر كله قهر
مفارگتهم صار أكثر من شهر
هيه تجري عيونها مثل المطر
وين أهلها هلبت يشوفونها
**
باالصحار گطعت دروب الألم
ركض بيها العمر چن ركضت سهم
تجري دمعتها اذا شافت علم
باالكفيل ورايته يذكرونها
**
لكربله متعنيه اجتهم زايره
چم مدينه وچم خرابه عابره
چم گبر صاح الها نرجو المعذره
على الفرگه زينب يحاچونها
**
من دمعها نگع اتراب الثره
شسوت بزينب هذيچ المگبره
ياخواني جيت اشوفنكم تره
صاحت ورادتهم يسمعونها
**
يهل گلبي تصيح صيحت فاجده
وعله گبر حسين خرت ساجده
جيت اشوفك كلشي أبد مارايده
وانه ادري الخوه انت تصونها
**
الافراگ هوايه اخذ منها عمر
مدلله وتجرعت ضيم وهجر
بكربله اخر مره يمكنها تمر
تموت برض الشام ويدفنونها
**
الشاعر سعد العبودي
/channel/aabas78
قصائد لكل ايام محرم اشترك بالقناة
يا هلا بـزوار ابن حامي الحمه
الــهم الــرايات رفـت بالسمه
نعمة المشايه عدنه اكبر نعم
كرم الله بيهه هيئات الخدم
**
خـادمك يا حسين لخدمه استعد
وزايـرك شــد رايته وگبرك كـصد
بدمه يوصل حضرتك كاتب عهد
يزحف اعله اجدمه ويصيح المدد
زايـرك مـتيقـن بأجره انكتب
وبخطوته حاج بيت الله انحسب
والي ضدك خاب يحسين وندم
نعمة المشايه عدنه اكبر نعم
**
الخيمه والــهيئه الــك نـصبوهه
وخــدمة الــزاير فــرض ادوهـه
ونــافلة فــرض الــعشگ صلوهه
اتــلگوا الــروس الــذي جـابوهه
رايــه بيد الــزاير اترفرف الـك
وهو يمشي افياي سوتله الملك
ومانسوا يحسين زينب والخيم
نعمة المشايه عدنه اكبر نعم
*
زايرك يحسين انوه اعله السفر
من هوه البحري الئ دم النحر
ثوره عدنه صار عشرين بصفر
منهه اخذنه ادروس تضحيه وعبر
فضلك اعليه صبح كلش چبير
واليطب يم حضرتك لامايحير
ادروبك اتـگطر كرامات وقيم
نعمة المشايه عدنه اكبر نعم
**
ما تــمل اجـدامهم طول الزمن
وبالگلوب اخيام يحسين انبنن
اتــلــگوا الـزوار زينب والـضعن
وحضرة وياهم تنوح ام الحسن
والدمع بالحضره ظل من دم يهل
وسجلت زوارك الزهره بسجل
وكصدوا العباس شيال العلم
نعمة المشايه عدنه اكبر نعم
**
قـبلت الاحــرار صـارت كربله
لاجــلك الــزوار عــدنه امدلله
الــمهدي ويــانه يــناديهم هـله
ردت وي الروس شاف الـعايله
الـمهدي والزوار طبوا كربلاء
بـدمعته اتـلگاهم وقام العزاء،،
وطافوا ويحسين قسمولك قسم
نعمة المشايه عدنه اكبر نعم
*'*
الشاعر احسان الحميداوي
/channel/aabas78
قصائد لكل ايام محرم اشترك بالقناة
جيتك اوجبت الراس وياي
واعله الكَبر رشيتلك ماي
اه يعطشان
...1...
جيتك وجبت الماي وياي ارد ارويَّك
مذبوح جبدك بالعطش يا خوية ادريك
ألماي شح اعليه ذاك اليوم انطيك
هسه انه جبته اوياي الك بلكي الله يحييك
عطشان عفتك يوم الاطفوف
ما بيك حيل اترد الاسيوف
وحيل تعبان
...2...
من بعد ضيم الشام اجيتك يابن امي
بالكوه امشي اعله الجدم كايدني همي
جم ليلة مرت وانت غايب ماهو يمي
رديت الك مو زينب، المسبية اسمي
ابنوك الهزيله الشام طبيت
وبسوكهم جم شامت الكيت
امتاني الي جان
.....3.
مر تسعه وتلاثين يوم اعلية غايب
ماشفت طولك يالنمت جوه الترايب
كوم اعله حيلك يالعليك الكَلب ذايب
افراكَك كتلني وعاشت ابروحي النوايب
بعدك يخوية حالي يا حال
وياك راحت راحت البال
والكَلب حزنان
...4...
كبرك وصلته اكعد يخوية اتلكه أخيَّتك
عطشانه تدري الشوفتك وانته ابغربتك
زيح التراب وكوم روايني كشختك
ما ريد اشوف اسهام بيك ولا ذبحتك
مشتاكه اشوفك ببيض الثوب
واكف تصلي فرض الاغروب
حان الاذان
...5...
جبت الدرب وي روحي اسولف يابو الاكبر
هلبت ارد والكاك سالم ما موذر
ويطلع خبر موتك جذب ما لايحك شر
وابعيني اشوفك سالم اعله اخيامي تفتر
وعبدالله فوك امتونك الكاه
شابع ضحك ما شابع اضماه
موش ذبلان
.....6....
جيتك يخويه ابلا نبض كلبك رقية
بذيج الخرابه انه ادفنتهه ابهاي ادية
من جابو ابطشت الذهب راسك اليه
اتلكته بلهفه وشبكَته شبكت منية
ما ودعتني ماتت ابساع
وانه ادفنتهه بدمعة اوداع
جوه تربان
........
✍️ كلمات موسى الخادم
/channel/aabas78
قصائد لكل ايام محرم اشترك بالقناة
نزله حماسيه للمشايه
يمه ويــن الرايه.
طلـعت المــشايه
تمشـي والله وياها الكـــربله منـــواها
للحسين للحسين
_
يمه جهزي الرايه يمه تربه خلي وياها
طلعت الناس بحــزنها الكربله منـواها
وأرد اروح بحزني يمه وزينـب أتلكاها
ردت بناكــه هـزيله وكلبـي هل ينعاها
ديره تـطوي وديره.
رجــعت بـيا حـيره
تنـحب بممشاها الكـربله منــواها
للحسين للحسين
_
يمه هاك الرايه يمـه واطوي انـته البيـده
وارد اوصيك بوصيه وخـذ طـبع الهــيده
بهيده من تنوي المسيره نظره خلي ابعيده
واسي زينب بالمصيبه وحيده هيه وحيده
واسي زينب بالجرح.
رجعت الطف الذبح
مــحد أتلاكــاها الكــربله منـواها
للحسين للحسين
____
يبني أسمع هل وصـيه يبنـي يانبـض الكلب
بالمسـيره من تماشـي كـل خـواتك بالدرب
دنك وامشي بهداوه. هل أمر لا مـو صعب
المهدي حاظر بالمسيره والدمع منه يصب
يبني أسمع هل كلام
بنظرتك تجــرح أمام
المهدي وي مسراها الكــربله منـواها
للحسين للحسين
_
والله سمعاً ع الوصيه بشوكي كاصد كربله
امشي وتراب ع راسي والمـدامع ســايله
طلـعت آلناس بحــزنها قـافله وي قــافلـه
كلها تصرخ كلها تبـجي كلها تنحـب قائـله
كلها تصـرخ ياحـسين
كصدت بلهفه وحنين
ورأيـته عـــلاهـا الكــربله منـواها
للحسين للحسين
___
مرتضى مكطوف الموالي
/channel/aabas78
قصائد لكل ايام محرم اشترك بالقناة
يا لحسن منعوفك الليلة أحنه ضيوفك
***
يبو محمـــد أحنه شيعـــــــــة وعالعهد وفّايه
بهل مسه كلنه أعـتـنـيـنه وأنت صرت الغايه
مــجــلـــــس الـلـيـــلة نصبنه وللأجر شرّايه
ولجلك أحنه مــــن حضرنه يـــــا دليل وآيه
يا لكريمة جفوفك الليلة أحنه ضيوفك
**
أنت ربّـــــان الــســفــيــنــــة وأنت أول قائد
مـــــن بعـــــد حامي ألحميه المؤتمن والخالد
نـلـتـزم دربــــك وسرنــــه وأبــد لا منباعد
وكلكم أنتوا روح وحــــده وكل علمكم واحد
بنور كل حروفك الليلة أحنه ضيوفك
*
أرواحنه نفديها لجلك يـــــــــــا لحسن منبالي
ونفدي كـــــل اللي نملكه وكـــل ثمين وغالي
نحيي ذكـــــراك الأليمة رغم كـــــــل عذالي
ورغـــــم أنف الناصبية تـبـقـــــه أنت الوالي
ونـنـتـمي لصفوفك الليلة أحنه ضيوفك
***
مــثـــل مـخــدمــنـــــه أخيّك أحنه هم خدّامك
والشــعـيـــرة تــبــقـــــه وحده بيومه وبأيامك
والمصيبة مصيبه وحـــــده وصوّبتنه سهامك
وكل مـوالي الليلة أمسه سيدي مــــــن أيتامك
وسفه هاي ظروفك الليلة أحنه ضيوفك
****
شلون نــنــســـاكم وننسه كل مصيبه عليكم
والجليل بكتبه كلهـــا نصّـــــــــه نازل بيكم
والمودة راد جـــدّك أجره مـــــــــن باريكم
نوالي إلكــــــم أحنه صرنه نعادي ليعاديكم
رسينه يم جروفك الليلة أحنه ضيوفك
**
انجمعت الشيعة بألمها اليوم تحيي مصابك
وتلعن بجعـــــــده ألخبيثة والأمر بصوابك
تواسي أمك هــــل مسيه بالجره وبالصابك
تنوح مالومـــــــه وحزينة والفجعها غيابك
اليوم عدها طفوفك الليلة أحنه ضيوفك
**
نسألــــــه بجاهــــك الليلة للوحيـــــد الدايم
يعجّـــــــــــل لشبل ألزجيه المنتظر والقائم
يزلزل عــروش المعــــاند والظلم والظالم
وديــــــن جــــــدّه يــعــيــده ســـــالم غانم
بجاهك ومعروفك الليلة أحنه ضيوفك
الشاعر
قاسم حتروش البلداوي
خادمكم
أسألكم الدعاء 🤲🤲🤲🤲🤲🤲
غير مبري الذمه كل من يقرأها بطور الغناء
/channel/aabas78
قصائد لكل ايام محرم اشترك بالقناة
نزلة // للإمام الحسن المجتبى عليه السلام
يا امامي الثاني
ما نسيتك آني
٠٠٠٠٠٠٠٠٠٠٠٠٠٠٠٠
سيدي يبن الزجية ويا ابن حامي الحمه
حبك عله الأمه كلها فرض من رب السمه
افتخر اني بولائك فايز البيك احتمه
حبك بگلبي مكانه يسري بي مسره الدمه
اسمك عله الساني
ما نسيتك آني
٠٠٠٠٠٠٠٠٠٠٠٠٠٠٠٠
يالحسن مولاي حبك ينجي من موج الخطر
شلون ما اهوى واحبك. وانت اغله امن النظر
الله خصك بالإمامة. فرض واجب عالبشر
اكتمال الدين بيكم واليحبكم ما خسر
منهجي وعنواني
ما نسيتك آني
٠٠٠٠٠٠٠٠٠٠٠٠٠٠٠٠
طالعت سيرة حياتك. يا امامي يالحسن
كلها نور وكلها رحمه وانت للخايف وطن
تهدي للحق والهداية ودرع يحمينه الفتن
للكرم فاتح مضيفك. سيدي بطول الزمن
عايش بوجداني
ما نسيتك آني
٠٠٠٠٠٠٠٠٠٠٠٠٠٠٠٠
شكد جرعت جروح كلفه. گلبك شيحمل ألم
مرّه طعنه من عدوك مرّه من خِلّك سهم
والأشد طعنة خليلك من تخاذل ونهزَم
لو جبل صبرك يغالي. جا تضعضع وتهدم
ذكرك باحزاني
ما نسيتك آني
٠٠٠٠٠٠٠٠٠٠٠٠٠٠٠٠
فوك كل هاي المصايب. آل اميه ظلمتك
ابن ابو سفيان ظالم. انتهك كل حرمتك
غَرر بجَعدَه اللعينه. نفذتله وسمّتك
چبدك بسمها تكطع صايم ومارحمتك
مقتلك بچّاني
ما نسيتك آني
سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
/channel/aabas78
قصائد لكل ايام محرم اشترك بالقناة
بـاجـر يـرد بـيـنـه الـزمـن
ونـزوه كـبـرك يـالـحـسـن
»»»»»»»»»»»»»»»»»»»»»»»»»»»»»»»
1️⃣
تـره اشـواك الـكلب كلش جبـيره
لحسن كبرك اشوفه بعيني حيره
شوكت مـشايه نطلـع ديره ديـره
واجي لحد الـكبر وأشـتم عبـيره
~~~
مـن تـطـفى نيـران الفتن
ونـزوه كـبـرك يـالـحـسـن
»»»»»»»»»»»»»»»»»»»»»»»»
2️⃣
اجيك ابدمعه ما تطفى وحـراره
واشــوف الـكـبه ويـاهـا الـمـناره
ضريحك ملـجى الناس الحـياره
الكلب بمصابك يـعيش انكـساره
~~~
وبمصيبتك كلبي امـتحن
ونـزوه كـبـرك يـالـحـسـن
»»»»»»»»»»»»»»»»»»»»»»»»
3️⃣
اخذني الشوك لأحضان المـدينه
وأريـد اقراله بدمـوعي الحـزينه
الحـسن مـن الـكبر نسمع ونينـه
شـوكت مـشايه نكـصد بأربعينه
~~~
وننصب عزائك بالصـحن
ونـزوه كـبـرك يـالـحـسـن
»»»»»»»»»»»»»»»»»»»»»»»»
4️⃣
مصيبه وعالجـفن عافت علامه
الحسن كضه العمر كله بظلامه
الجبد مسمـوم ما عرفوا مقامه
قرينا جروح من نعشه وسهامه
~~~
والغـربـه صـارتـلك وطـن
ونـزوه كـبـرك يـالـحـسـن
»»»»»»»»»»»»»»»»»»»»»»»»
5️⃣
اذا جـف الظـلام يطـفي شمـعه
اذا صلح الحسن سـويته بـدعه
تره رايـك نرفضـه وما نسـمـعه
حقن دم الشريعه وحامه ربعـه
~~~
ما مـات وبـروحي ندفـن
ونـزوه كـبـرك يـالـحـسـن
»»»»»»»»»»»»»»»»»»»»»»»»
5️⃣
يجينا المهدي شايل سيف بيده
تـره كبـرك ذهـب بـاجـر يـعيده
بضريحك تنقري لقصه لجديده
تـره الـمـا راد دربـك مـا يـريـده
~~~
لـو ردنــا جــنـات الـعـدن
ونـزوه كـبـرك يـالـحـسـن
»»»»»»»»»»»»»»»»»»»»»»»»»»»»»»»
الشاعر محمد خشان ✍️.
»»»»»»»»»»»»»»»»»»»»»»»»»»»»»»»
/channel/aabas78
قصائد لكل ايام محرم اشترك بالقناة
