የስም ዝርዝሮቹ ብዛት ስላላቸው
በቀላል መንገድ ሚፈልጉትን ስም
ለማግኝት search 🔍 የሚለውን
በመጫን ሚፈልጉትን ስም ያስገቡ::
በአፋር ክልል በአብኣላ በኩል እርዳታ ወደ ትግራይ ክልል መጓጓዝ ጀመረ
በዓለም ምግብ ድርጅት አማካይነት 21 ከባድ የጭነት መኪናዎች የእርዳታ እህል በመጫን በአፋር ክልል በአብኣላ በኩል የሰብዓዊ እርዳታ በየብስ ትራንስፖርት ወደ ትግራይ ክልል ማጓጓዝ መጀመሩን የመንግስት ኮሙኒኬሽን አገልግሎት አስታወቀ።
የኢትዮጵያ መንግስት በትግራይ ክልል ውስጥ በአስቸጋሪ ሁኔታ ውስጥ ያሉ ዜጎችን ህይወት ለመታደግ ሁሉንም አማራጮች በመጠቀም የሰብዓዊ እርዳታን ለማቅረብ እንቅስቃሴ መጀመሩ የሚታወስ ነው፡፡
ውሳኔው ከተወሰነበት ቀን ጀምሮ የመድኃኒት፣ የህክምና መሳሪያዎች፣ ገንዘብና አልሚ ምግቦችን ረጂ ድርጅቶች በቻሉት መጠን በአየር ትራንስፖርት በየዕለቱ ማጓጓዝ መጀመራቸውን የመንግስት ኮሙኒኬሽን አገልግሎት ለፋና ብሮድካስቲንግ ኮርፖሬት በላከው መግለጫ አመላክቷል፡፡
በዛሬው ዕለትም በዓለም ምግብ ድርጅት አማካይነት 21 ከባድ የጭነት መኪናዎች የእርዳታ እህል በመጫን በአፋር ክልል በአብኣላ በኩል የሰብዓዊ እርዳታ በየብስ ትራንስፖርት ወደ ትግራይ ክልል ማጓጓዝ መጀመራቸውን ነው ያስታወቀው፡፡
የኢትዮጵያ መንግስት የሰብዓዊ እርዳታ ለሚያስፈልጋቸው ዜጎች የሰብዓዊ ድጋፍ አቅርቦቱን በተሟላ ሁኔታ ለማስኬድ ከተባበሪና ባለድርሻ አካላት ጋር ለመስራት ዛሬም ቁርጠኛ መሆኑንም አጽንኦት ሰጥቷል፡፡
@Addis_Tv
የነዳጅ ስርጭት ችግር የሚፈጥሩ የነዳጅ ማደያዎችን እንደማይታገስ የአዲስ አበባ ንግድ ቢሮ አስታወቀ።
ቢሮው በየጊዜው በሚስተዋለው የነዳጅ እጥረት ዙሪያ በከተማው ካሉ የነዳጅ ማደያ ባላቤቶች ጋር የተወያየ ሲሆን በውይይቱ የነዳጅ አቅርቦት ችግር እንዳሌለ ነገር ግን ከስርጭት ጋር ተያይዞ እጥረት መከሰቱ ተገልጿል፡፡
ሆኖም ከስርጭት ጋር ተያይዞ አንዳንድ ማደያዎች የሚፈጥሩትን እንግልትና አሻጥር ፈር ለማስያዝ ጠበቅ ያለ እርምጃ እንደሚወስድና ብልሹ አሰራርን እንደማይታገስ መግለፁን ከአዲስ አበባ ከንቲባ ፅ/ቤት ያገኘነው መረጃ ያመላክታል፡፡
የቢሮው ሃላፊ አቶ አደም ኑሪ ÷ከስርጭት ጋር ተያይዞ በአንዳንድ ማደያዎች የሚፈጠረው ብልሹ አሰራር የምርት ስርጭት ፈተና መሆናቸውን አብራርተው ፤ያልተገባ ጥቅም በመፈለግ እጥረቱን በሚያባብሱ የነዳጅ ማደያዎች ላይ እርምጃ እንደሚወስድ አስረድተዋል።
ችግሩን በዘላቂነት ለመከላከልም የነዳጅ አቅርቦትን በማሳደግ እና ቁጥጥሩን በማጠናከር ሌሊት ነዳጅ በሚሸጡት ላይ የመጠን ማሻሻያ እንደሚደረግና በዘመናዊ የመረጃ ዘዴ ማደያዎች እለታዊ መረጃን ለቢሮው እንዲያሳውቁ ማድረግ የሚያስችል አሰራር የሚዘረጋ መሆኑንም የጋራ መግባባት ላይ ተደርሷል፡፡
በከተማዋ ከ134 የነዳጅ ማደያዎች 117 ማደያዎች አገልግሎት እየሰጡ የሚገኙ ሲሆን ÷ህገ ወጥ የንግድ እንቅስቃሴ በፈጠሩና በምሽት በበርሜል ነዳጅ ሲሸጡ የተገኙ ሶስት ማደያዎች ላይ ተገቢውን እርምጃ ለመውሰድ መቻሉን አቶ አደም ኑሪ ተናግረዋል፡፡
@Addis_Tv
በጥቆማ የተያዘ 46 ሺሕ ሊትር ዘይት ለኅብረተሰቡ ሊከፋፈል ነው
በኅብረተሰቡ ጥቆማ በህገወጥ መንገድ በመኪና ተጭኖ የተያዘ ከ46 ሺሕ ሊትር በላይ ዘይት በመሰረታዊ ሸማች አማካኝነት ለኅብረተሰቡ ሊከፋፈል መሆኑ ተገለፀ።
በአቃቂ ቃሊቲ ክፍለ ከተማ ወረዳ 4 አስተዳደር በመኪና ጥበቃ ላይ በተሰማሩ ነዋሪዎች ጥቆማ ከ2 ሺሕ 300 ካርቶን በላይ ዘይት ጭኖ የነበረ መኪና በኑሮ ውድነትና ገበያ ማረጋጋት ግብረ ኃይል ተወርሶ በወረዳው መሰረታዊ ሸማች ማኅበር አማካኝነት ለኅብረተሰቡ ሊከፋፈል መወሰኑን ወረዳው አስታውቋል።
በአቃቂ ቃሊቲ ክፍለ ከተማ ወረዳ 4 አስተዳደር ዋና ሥራ አስፈፃሚ ትዝታ ነጋሽ ኅብረተሰቡ መሰል ህገወጥ ተግባራትን ሲመለከት ለሚመለከተው አካል በማሳወቅ የተለመደ ትብብሩን እንዲቀጥል መጠየቃቸውን ከከንቲባ ጽሕፈት ቤት የተገኘው መረጃ ያመለክታል፡፡
@Addis_Tv
ኢትዮጵያውያንና ኤርትራውያን የሚሳተፉበት ‘ኤችአር 6600’ እና ‘ኤስ 3199’ ረቂቅ ሕጎችን የሚቃወም ሰላማዊ ሰልፍ በዋሺንግተን ዲሲ እየተካሄደ ነው።
በአሜሪካ መንግስት መቀመጫ ‘ካፒቶል ሂል’ ፊት ለፊት እየተካሄደ በሚገኘው ሰልፍ ላይ ከአሜሪካ ከሚኖሩ የኢትዮጵያ ዳያስፖራ ማህበረሰብ አባላት በተጨማሪ ኤርትራውያንና የኢትዮጵያ ወዳጆች ተሳትፈዋል።
‘ኤችአር 6600’ እና ‘ኤስ 3199’ ረቂቅ ሕጎች የኢትዮጵያን ሕልውና የሚጎዳ እንዲሁም የኢትዮጵያና አሜሪካ ግንኙነት የሚያበላሽ በመሆኑ ሊሰረዝ ይገባል የሚል መልዕክት በሰልፈኞቹ እየተላለፈ መሆኑ ተገልጿል፡፡
“ማዕቀብ መጣል ለኢትዮጵያ ጉዳትን እንጂ ምንም ጥቅም አያስገኝም ፤ ጎጂ የሆኑት ረቂቅ ሕጎች ውድቅ መደረግ አለባቸው” የሚሉ መፈክሮችም እየተላለፉ ነው።
በአሜሪካ የኮንግረስ አባል ቶም ማሊኖውስኪ (ኒውጀርሲ) ዋና አርቃቂነት፣ በያንግ ኪም (ካሊፎርኒያ)፣ ግሪጎሪ ሚክስ (ኒው ዮርክ)፣ ዴቪድ ሲሲሊን (ሮድ አይላንድስ)፣ ብራድ ሼርማን(ካሊፎርኒያ) እና ማይክል ማካውል (ቴክሳስ) ደጋፊነት የተዘጋጀው ‘ኢትዮጵያ ስታብላይዜሽን ፒስ ኤንድ ዴሞክራሲ አክት’ ወይም ኤችአር 6600 ረቂቅ ሕግ በኮንግረሱ የውጭ ጉዳዮች ኮሚቴ ውይይት እንደተደረገበት የሚታወስ ነው።
የ‘ኤችአር 6600’ ተጓዳኝ ወይም አጋዥ (ኮምፓኒየን ቢል) የሆነው የኢትዮጵያ ፒስ ኤንድ ዴሞክራሲ ፕሮሞሽን አክት ኦፍ 2021’ ወይም ‘ኤስ.3199’ በአሜሪካ ሴናተር ሮበርት ሜኔንዴዝ (ኒው ጀርዚ) ዋና አርቃቂነት፣ በሴናተር ጀምስ ሪስች (ኢዳሆ)፣ በሴናተር ክሪስ ኩንስ (ዴልዌር) እና በሴናተር ቶም ቲሊስ (ኖርዝ ካሮላይና) ደጋፊነት የተዘጋጀ ነው።
የአሜሪካ ሴኔት የውጭ ግንኙነት ኮሚቴ በ‘ኤስ.3199’ ረቂቅ ሕግ ላይ ነገ ውይይት እንደሚያደርግ ኢዜአ ዘግቧል።
@Addis_Tv
የብልፅግና ፓርቲ ህዝቡ ያነሳቸውን ጥያቄዎች የሚመልሱ እቅዶች ተዘጋጅተው እንዲተገበሩ አቅጣጫ አስቀመጠ፡፡
የብልፅግና ፓርቲ በቅርቡ ባካሄደው አንደኛ ጉባዔው ያስተላለፋቸውን ውሳኔዎችና ያስቀመጣቸውን አቅጣጫዎች አስመልክቶ በመላ ሀገሪቱ ከህዝቡ ጋር ሲያደርግ የነበረውን ውይይት አጠናቋል፡፡
የውይይቶቹን መጠናቀቅ ተከትሎም በዛሬው እለት በማእከል ደረጃ የመድረኮቹ አፈፃፀም ላይ ውይይት ተካሂዷል፡፡
የፓርቲው ስራ አስፈፃሚ እና ማዕከላዊ ኮሚቴ አባላት በተገኙበትና የፓርቲው ምክትል ፕሬዝዳንት አቶ አደም ፋራህ በመሩት የዛሬው መድረክ በሁሉም ክልሎችና በሁለቱ የከተማ አስተዳደር መድረኮች የተነሱ ዋና ዋና ሃሳቦች ተገምግመዋል፡፡
በህዝቡ የተነሱትን የህዝብ ጥያቄዎች ለመመለስና ችግሮችን ለመፍታት የሚያስችሉ ዝርዝር እቅዶች ተዘጋጅተው እንዲተገበሩ ከስምምነት ላይ ተደርሷል፡፡
በመሆኑም በአጭር ጊዜ ውስጥ የአጭር፣ የመካከለኛና የረጅም ጊዜ እቅዶች ተዘጋጅተው ወደ ተግባር እንዲገባ ፓርቲው አቅጣጫ ማስቀመጡን ከፓርቲው ያገኘነው መረጃ ያመላክታል፡፡
@Addis_Tv
አትሌት ሙክታር ኢድሪስ በስፔን የ10 ኪሜ የጎዳና ሩጫ የቦታውን ክብረወሰን በማሻሻል አሸነፈ።
አትሌቱ 28:34 በሆነ ሰዓት በመግባት የቦታውን ሪከርድ ጭምር ሰብሮ ውድድሩን ማሸነፉን የኢትዮጵያ አትሌቲክስ ፌዴሬሽን አስታውቋል።
@Addis_Tv
የሚኒስትሮች ምክር ቤት በዛሬው ዕለት ባካሄደው 6ኛ መደበኛ ስብሰባ በተለያዩ ጉዳዮች ላይ ተወያይቶ ውሳኔ አሳልፏል፡፡
1. ምክር ቤቱ በቅድሚያ የተወያየው በሳይንስ፣ ቴክኖሎጂ እና ኢኖቬሽን ረቂቅ ፖሊሲ ላይ ነው፡፡ በ2004 ዓ.ም ትኩረቱን በመካከለኛና ትላልቅ የማምረቻና አገልግሎት መስጫ ተቋማት ቴክኖሎጂን መጠቀም፣ መቅዳትና ማላመድን መሠረት ያደረገ የሳይንስ ቴክኖሎጂ እና ኢኖቬሽን ፖሊሲ በማውጣት የተለያዩ ጥረቶች ሲደረጉ ቆይተዋል፡፡
በፖሊሲው አፈጻጸም ሂደት የተገኙ ውጤቶች ቢኖሩም መሰረታዊ ለውጥ ከማምጣት አንፃር ስኬታማ እንዳልነበር ከተደረጉ ጥናቶች መረዳት ተችሏል፡፡
በመሆኑም ለአገር ውስጥ የቴክኖሎጂ ልማት ልዩ ትኩረት የሚሰጥ፤ የኢንተርፕራይዞችን የቴክኖሎጂ አቅም በማሳደግ ከምርታማነታቸው ጋር ያላቸው ትስስር የሚያጠናክር፤ ለፈጠራ ስራ /Innovation/ ትኩረት የሚሰጥ ፖሊሲ በማስፈለጉ፣ ከግብርና እና ከማኑፋክቸሪንግ በተጨማሪ ቱሪዝም፣ ማዕድን እና አይሲቲ ለአገራዊ ብልጽግና መሰረት ተደርገው በመወሰዳቸው በቴክኖሎጂና ኢኖቬሽን እንዲታገዙ ማድረግ የሚገባ በመሆኑ፣ በአጠቃላይ ለአዳዲስ ለውጦች እና ፍላጎቶች ምላሽ መስጠት የሚችል እና የሳይንስ፣ ቴክኖሎጂና ኢኖቬሽን ልማትን የሚያፋጥን ሁሉአቀፍ ፖሊሲ ማዘጋጀት አስፈላጊ እንደሆነ ታምኖበታል ረቂቅ ፖሊሲ ተዘጋጅቶ ለምክር ቤቱ ቀርቧል፡፡ ምክር ቤቱም በረቂቅ ፖሊሲው ላይ በጥልቀት ተወያይቶ ግብዓቶች በማጽደቅ ስራ ላይ እንዲውል ወስኗል፡፡
2. ምክር ቤቱ በመቀጠል የተወያየው የ11 የአስፈጻሚ ተቋማትን አደረጃጀት፣ ስልጣንና ተግባር ለመወሰን በቀረቡ ረቂቅ ደንቦች ላይ ሲሆን በፌደራል መንግስት አስፈጻሚ አካላትን ስልጣንና ተግባር ለመወሰን በወጣው አዋጅ ቁጥር 1263/2014 መሰረት፡-
• የኢትዮጵያ ቴክኖሎጂ ባለስልጣን፣
• የኢትዮጵያ የስፔስ ሳይንስ እና ጂኦስፓሻል ኢንስቲትዩት፣
• የፌዴራል ሲቪል ሰርቪስ ኮሚሽን፣
• የኢትዮጵያ ግብርና ባለስልጣን፣
• የኢትዮጵያ ደን ልማትን ሥልጣን፣
• የእንስሳት ልማት ኢንስቲትዩት፣
• የእንስሳት ጤና ኢንስቲትዩት፣
• የአምራች ኢንዱስትሪ ልማት ኢንስቲትዩት፣
• የኢትዮጵያ ጂኦሎጂካል ኢንስቲትዩት፣
• የማዕድን ኢንዱስትሪ ልማት ኢንስቲትዩት እና
• የአርቲፊሻል ኢንተለጀንስ ኢንስቲትዩት
አደረጃጀት፣ ስልጣንና ተግባር ለመወሰን በቀረቡ ረቂቅ ደንቦች ላይ ተወያይቶ ግብዓቶችን በማከል ያጸደቀ ሲሆን ደንቦቹ በነጋሪት ጋዜጣ ታትመው ከወጡበት ቀን ጀምሮ ስራ ላይ እንዲውሉ ምክር ቤቱ ወስኗል
@Addis_Tv
ኦፌኮ 2ኛ መደበኛ ጉባኤውን እያካሄደ ነው
የኦሮሞ ፌደራሊስት ኮንግረንስ (ኦፌኮ) 2ኛ መደበኛ ጉባኤውን ማካሄድ ጀምሯል።
ለሁለት ቀናት በሚካሄደው የፓርቲው መደበኛ ጉባኤው ከተለያዩ የኦሮሚያ ዞኖች የተውጣጡ የፓርቲው አባላትና ሃላፊዎች እየተሳተፉበት ይገኛሉ።
@Addis_Tv
ለደህንነት አገልግሎት የሚገጠሙ ካሜራዎችን የሰረቁ እና ንብረቶቹን የገዙ ግለሰቦችን ይዞ ንብረቶቹን ማስመለሱን ፖሊስ አስታወቀ
996 ሺ ብር የሚያወጡ ለደህንነት አገልግሎት የሚገጠሙ ካሜራዎችን የሰረቁ እና ንብረቶቹን የገዙ ግለሰቦችን ይዞ ንብረቶቹን ማስመለሱን የአዲስ አበባ ፖሊስ አስታወቀ፡፡
በቦሌ ለሚ ኢንዱስትሪ ፓርክ ውስጥ ከሚገኘው ሲ.ጀ.ሲ.ኦ.ሲ ኢትዮጵያ ኃላፊነቱ የተወሰነ የግል ኩባንያ 996 ሺ ብር የሚያወጡ 41 ለደህንነት አገልግሎት የሚውሉ ካሜራዎችን እና 36 የካሜራ መደገፊያዎችን የሰረቁት ተጠርጣሪዎችንና ካሜራዎች በ41 ሺ ብር የገዙ ሁለት ተቀባይ ግለሰቦችን ይዞ ምርመራ እያጣራ መሆኑን የአዲስ አበባ ፖሊስ አስታውቋል፡፡
የስርቆት ወንጀሉን የፈፀሙት ሁለት ግለሰቦች ከዚህ ቀደም በድርጅቱ ውስጥ በቀን ሰራተኝነት ሲሰሩ እንደነበር እና የድርጅቱን መግቢያና መውጫ ካጠኑ በኋላ የካቲት 2 ቀን 2014 ዓ/ም ወንጀሉን እንደፈፀሙ በምርመራ መረጋገጡን ፖሊስ አስታውቋል፡፡
ግለሰቦቹ ወንጀሉን በፈጸሙ በአስረኛው ቀን ድርጅቱ ንብረቶቹን መሰረቁን ተገንዝቦ ለፖሊስ ሪፖርት እንዳደረገና ፖሊስ በቴክኖሎጂ በመደገፍ ባደረገው ክትትል የወንጀሉ ሪፖርት በደረሰው በሦስተኛው ቀን ተጠርጣሪዎቹን ይዞ ንብረቶቹን በቦሌ ክፍለ ከተማ ልዩ ስሙ ሮባ ዳቦ ቤት አካባቢ ከሚገኙ ከሁለት ግለሰቦች አስመልሶ ምርመራውን መቀጠሉን የአዲስ አበባ ፖሊስ ገልጿል፡፡
@Addis_Tv
በአዲስ አበባ የመኖሪያ ቤት ኪራይ ዋጋ ጭማሪንና ተከራዮችን ማስወጣትን ለመገደብ የወጣው ደንብ ለሚቀጥሉት ሶስት ወራት መራዘሙ ተገለጸ፡፡
በአዲስ አበባ ከተማ አስተዳደር የዜጎችን ጥያቄና አገራዊ ሁኔታን ከግምት ውስጥ በማስገባት ከዚህ በፊት የመኖሪያ ቤት ተከራዮችን ለማስለቀቅና የመኖሪያ ቤት ኪራይ ጭማሪ ለመገደብ ደንብ ማውጣቱ ይታወቃል፡፡
ደንቡ ላለፉት ሶስት ወራት እንዲራዘም ተደርጎ አንደነበርም አይዘነጋም፡፡
አሁንም ዜጎችን ከተለያዩ ጫናዎች ለመከላከል ሲባል ይህ ደንብ ለሚቀጥሉት ሶስት ወራት እንዲራዘም የከተማው አስተዳደር መወሰኑን ገልጿል፡፡
ስለሆነም በዚሁ መሰረት በሚቀጥሉት ሶስት ወራት ተከራዮችን ማስለቀቅና እና የቤት ኪራይ የዋጋ ጭማሪ ማድረግ የተከለከለ መሆኑን የአዲስ አበባ ከተማ አስተዳደር አስታውቋል፡፡
ከተማ አስተዳደሩ ዜጎች ኢትዮጵያዊ የመተሳሰብና የመተጋገዝ ባህልን በማሳደግ ፈታኝ ሁኔታዎች በጋራ ሆነው እንዲሻገሩ ጥሪ ማቅረቡን ከከንቲባ ጽህፈት ቤት ያገኘነው መረጃ ያመላክታል፡፡
@Addis_Tv
የኢትዮጵያ መንግስት በትግራይ ክልል ለሚገኙ የሰብዓዊ ድጋፍ ለሚያስፈልጋቸው ዜጎች የሰብዓዊ ድጋፍ አቅርቦቱ የተሳለጠ እንዲሆን ግጭት ማቆሙን ገለፀ።
የኢትዮጵያ መንግስት በትግራይ ክልል ለሚገኙ ዜጎች ሰብዓዊ ድጋፍ ሲባል ግጭት ለማቆም መወሰኑን አስመልክቶ በዛሬው ዕለት መግለጫ አውጥቷል፡፡
በመግለጫውም መንግስት በትግራይ ክልል ለሚገኙ የሰብዓዊ ድጋፍ ለሚያስፈልጋቸው ዜጎች የሰብዓዊ ድጋፍ አቅርቦቱ የተሳለጠ እንዲሆን የተለያዩ እርምጃዎችን በመውሰድ ላይ እንደሚገኝ አስታውቋል።
የመግለጫው ሙሉ ቃል እንደሚከተለው ቀርቧል፡-
የኢትዮጵያ መንግስት ለሰብዓዊነት ሲባል ግጭት ለማቆም ሰለመወሰኑ የወጣ መግለጫ
የኢትዮጵያ መንግስት በትግራይ ክልል ለሚገኙ የሰብዓዊ ድጋፍ ለሚያስፈልጋቸው ዜጎች የሰብዓዊ ድጋፍ አቅርቦቱ የተሳለጠ እንዲሆን የተለያዩ እርምጃዎችን በመውሰድ ላይ ይገኛል። በዚህም መሰረት የተባበሩት መንግስታት የሰብዓዊ እርዳታ የአየር በረራዎች ቁጥር እንዲጨምር እንዲሁም ለእርዳታ አቅራቢ ድርጅቶች የነዳጅ እና የጥሬ ገንዘብ የሚቀርብበትን ስርዓት የተሳለጠ እንዲሆን ተደርጓል። ከዚህ ጋር በተያያዘም የአለም አቀፉ የቀይ መስቀል ኮሚቴ፣ የአለም ጤና ድርጅት እና የአውሮፓ ህብረት የሰብዓዊ እርዳታዎችን ማደረስ እንዲችሉ የአየር በረራ ተመቻችቷል። ከዚህ በተጨማሪም የኢትዮጵያ መንግስት በአብአላ-መቀሌ የየብስ ትራንስፖርት መስመር በኩል የሰብዓዊ እርዳታ አቅርቦት መድረስ እንዲችል አስፈላጊውን ሁሉ እያደረገ ይገኛል።
ይሁን እንጂ በአሁኑ ወቅት በሺዎች የሚቆጠሩ የትግራይ ክልል ነዋሪዎች የሰብዓዊ እርዳታን ፍለጋ ወደ አጎራባች ክልሎች እየተጓዙ መሆኑ እየተስተዋለ ነው። በዚህም በትግራይ አጎራባች ክልሎች የሚኖሩ ዜጎች ከትግራይ ክልል የሚመጡ የሰብዓዊ እርዳታ ፈላጊ ዜጎችን ተቀብሎ በማስተናገድ እያሳዩ ያለው በጎ ተግባር በህዝቦች መካከል ያለውን የወንድማማችነት እና የአንድነት መንፈስ የሚያሳይ ነው። መንግስት እነዚህ ዜጎች የሰብዓዊ እርዳታው ከቀያቸው ሳፈናቀሉ ባሉበት እንዲደርሳቸው ቢደረግ እንግልታቸውን እንድሚቀንስ በጽኑ ያምናል።
በመሆኑም መንግስት በከፍተኛ ችግር ውስጥ የሚገኙ ዜጎቹን ችግር በአፋጣኝ የመፍታት ኃላፊነቱ ከምንም ነገር በላይ ቅድሚያ የሚሰጠው መሆኑን በመረዳት የአስቸኳይ የሰብዓዊ አቅርቦቶች ወደ ትግራይ ክልል በበቂ ሁኔታ መድረስ የሚችሉበትን ሁኔታ ለማሳካት የተቻለውን ሁሉ ጥረቶች ለማድረግ ቁርጠኛ መሆኑን ለመግለጽ ይወዳል።
በዚህም መሠረት በከፍተኛ ችግር ውስጥ የሚገኙ ዜጎችን ህይወት ለመታደግ እና የዜጎችን እንግልት ለመቀነስ ይቻል ዘንድ ከተለመደው የተለዩ እርምጃዎችን መውሰድ አስፈላጊ ሆኖ በመገኘቱ መንግስት ይህ ውሳኔ ከወጣበት ሰዓት ጀምሮ ተግባራዊ የሚደረግ ለሰብዓዊነት ሲባል ግጭት የማቆም ውሳኔ አስተላልፏል። በዚህ አጋጣሚ መንግስት ዓለም ዓቀፉ የለጋሾች ማህበረሰብ እያቀረበ ያለውን ድጋፍ እና እርዳታ በከፍተኛ መጠን እንዲጨምር ጥሪ ያቀረባል።
የሰብዓዊ እርዳታ ለሚያስፈልጋቸው ዜጎች የሰብዓዊ ድጋፍ አቅርቦቱ በተሳለጠ ሁኔታ መድረስ እንዲችል ከሚመለከታቸው አካላት ጋር ተባብሮ ለመስራት ያለውን ቁርጠኝነት በድጋሚ ያረጋግጣል። ይህ የመንግስት ጥረት እና ቁርጠኝነት የሰብዓዊ ሁኔታውን በማሻሻል ረገድ የሚኖረው ስኬት የሚረጋገጠው በሌላኛው ወገን የሚገኘው አካል በተመሳሳይ ለዚህ አላማ በሚኖረው ቁርጠኝነት ልክ መሆኑን መንግስት ያምናል። ይህ በመንግስት በኩል የተላለፈው ውሳኔ አላማው የአስቸኳይ የሰብዓዊ ድጋፍ በነጻነት ተጓጉዞ ለእርዳታ ፈላጊ ዜጎች ለመድረስ እንዲችል ነው። በመሆኑም ለሰብኣዊነት ግጭት የማቆም ውሳኔ የተፈለገውን ውጤት ማምጣት እንዲችል መንግስት በትግራይ ክልል የሚገኙ አማጺያን ከማንኛውም የጥቃት እንቅስቃሴ እንዲታቀቡ እና በጉልበት ከያዟቸው የአጎራባች ክልል አካባቢዎች እንዲወጡ ይጠይቃል።
የኢትዮጵያ መንግስት ይህ ለሰብኣዊነት ግጭት የማቆም ውሳኔ በሰሜን ኢትዮጵያ ያለውን የሰብዓዊ ሁኔታ በእጅጉ ሊያሻሽል እንደሚችል ብሎም በቀጣይ ያለተጨማሪ ደም መፋሰስ ለግጭቱ መፍትሔ ሊያመጣ እንደሚችል ተስፋ ያደርጋል።
የመንግስት ኮሙኒኬሽን አገልግሎት
@Addis_Tv
ኢትዮ ቴሌኮም ገመድ አልባ የብሮድባንድ ኢንተርኔት አገልግሎት ለመኖሪያ ቤት አቀረበ
ኢትዮ ቴሌኮም ገመድ አልባ 4ጂ ብሮድባንድ ፈጣን የኢንተርኔት አገልግሎት ለመኖሮያ ቤቶች ማቅረቡን አስታወቀ።የድርጅቱ ሥራ አስፈፃሚ ወይዘሪት ፍሬህይወት ታምሩ በሰጡት መግለጫ፤ የአሁኑ አገልግሎት ከዚህ በፊት በገመድ (ፋይበርና ኮፐር) ሲሰጥ የቆየውን አግልግሎት ፈጣን በሆነና በተሻለ ጥራት ገመድ አልባ በሆነ መልኩ አግልግሎት መስጠት የሚያስችል ነው ብለዋል።
እንደ ዋና ሥራ አስፈፃሚዋ ማብራሪያ፤ አገልግሎቱ ደንበኞች በመኖርያ አካባቢያቸው አልያም በመረጡት ስፍራ 4ጂ የሞባይል ኔትዎርክን በከፍተኛ ፍጥነት የኢንተርኔት አገልግሎት ማግኘት የሚያስችል አማራጭ ነው።ይህ አገልግሎት በተለይም የፋይባር እነ ኮፐር ገመዶች በማይደርሱባቸው የመኖሪያ አካባቢዎች ተመራጭ መሀኑን ወ/ት ፍሬህይወት ገልጸዋል።ኢትዮ ቴሌኮም በአዲስ አበባ ከተማ ብቻ ተገድቦ የነበረውን ድርጅቱ ባደረገው የማስፋፊያ ተግባር የ4ጂ አገልግሎትን 136 ከተሞች አግልግሎት ተጠቃሚ መሆን መቻላቸውን ወይዘሪት ፍሬህይወት ገልፀዋል።
@Addis_Tv
በጉለሌ ክ/ከተማ ወረዳ 5 ያለአግባብ ተከማችቶ የተገኘዉ 341ሺ ሊትር ዘይት ለህብረተሰቡ ማከፋፈል መጀመሩን ከተማ አስተዳደሩ አሰታወቀ።
በጉለሌ ክ/ከተማ ወረዳ 5 አካባቢ ያለአግባብ ተከማችቶ የተገኘዉ 341ሺ ሊትር ዘይት በህብረተሰቡ ጥቆማ ተይዞ እንደነበር ይታወቃል።
በአሁን ሰዓት በጉለሌ ክ/ከተማ ባሉ 12 ሸማች ህብረት ስራ ማህበራት እና በአንድ ዩኒዬን በኩል ባሉ የሸማች ሱቆች በማስገባት ለህብረተሰቡ ማሰራጨት ተጀምሯል።
ከፍተኛ መጠን ያለው የዘይት ክምችት በሁሉም የሸማች ሱቆች ስርጭቱ የጀመረ ሲሆን ህብረተሰቡም በአከባቢዉ ባሉት የሸማች ሱቆች በመሄድ መግዛት እንደሚችል የክ/ከተማው ህብረት ስራ ጽ/ቤት አስታውቋል።
ሌሎች ምርቶችን የሚያከማቹና በቂ መረጃ ማቅረብ ያልቻሉ ግለሰቦችን ፖሊስ በቁጥጥር ስር አዉሎ የምርመራ ስራ እየተሰራ እንደሚገኝ ከከንቲባ ጽ/ቤት መረጃ ያመለክታል።
@Addis_Tv
አቶ ግርማ ዋቄ የኢትዮጵያ አየር መንገድ የስራ አመራር ቦርድ ሰብሳቢ ሆነው ተሾሙ
የኢትዮጵያ አየር መንገድ ዋና ስራ አስፈጻሚ ሆነው ለብዙ ዓመታት ያገለገሉት አቶ ግርማ ዋቄ የአየር መንገዱ የስራ አመራር ቦርድ ሰብሳቢ ሆነው በቅርቡ መሾማቸውን አየር መንገዱ አስታወቀ፡፡
አቶ ግርማ ዋቄ አየር መንገዱን ለሰባት ዓመታት በመምራት ለዕድገት እንዲበቃ መሰረት የጣሉ፣ በአየር ትራንስፖርት ዘርፍ ከፍተኛ የስራ ልምድ ያላቸውና በዘርፉ ስኬታማ መሪ መሆናቸው ተመልክቷል፡፡
አቶ ግርማ ዋቄ የአየር መንገዱ የስራ አመራር ቦርድ ሰብሳቢ ሆነው መሾማቸው አየር መንገዱን ለበለጠ ስኬት ሊያበቁ የሚችሉና ተቋሙ ወደፊት ከሚጠበቅበት የዕደገት ደረጃ ሊያደርሱት እንደሚችሉም የታመነ መሆኑንም አየር መንገዱ አስታውቋል፡፡
በተጨማሪም በሚሰጡት በሳል አመራርና ትክከለኛ ውሳኔ ሰጭነት ውጤታማ መሆናቸውን በተግባር ያረጋገጡ መሆናቸውም ተመልክቷል፡፡
አቶ ግርማ ዋቄ ከወጣትነት ዕድሜያቸው ጀምሮ በኢትዮጵያ አየር መንገድ ተምረውና አድገው በተለያዩ የኃላፊነት ቦታዎች ለ34 ዓመታት አገልግለዋል፡፡
ከዚህ በተጨማሪም አቶ ግርማ በመካከለኛው ምስራቅ የገልፍ አየር መንገድንና ዲኤቾ ኤል ኩባንያንም በኃላፊነት አገልግለዋል፡፡
በአውሮፓውያኑ 2004 የኢትዮጵያ መንግስት ያቀረበላቸውን ጥሪ ተቀብለው አየር መንገዱን ለሰባት ዓመታት ያህል በዋና ስራ አስፈጻሚነት በመምራት ለዕድገት አብቅተውታል፡፡
ከኢትዮጵያ አየር መንገድ ከለቀቁ በኋላም በተለያዩ አገራት የአየር መንገድ ከፍተኛ አመራርና የአየር ትራንስፖርት ጉዳዮች አማካሪ ሆነው አገልግለዋል፡፡
@Addis_Tv
500 ሜትሪክ ቶን አስቸኳይ የሰብዓዊ ድጋፍ ትግራይ ክልል ደረሰ
500 ሜትሪክ ቶን አስቸኳይ የምግብ ድጋፍ በዛሬው እለት ትግራይ ክልል መድረሱን የአለም ምግብ ድርጅት ገለጸ።
ወደ ክልሉ በየብስ የሚደረገው የሰብአዊ ድጋፍ እንቅስቀሴ መጀመሩን ተከትሎ ሰፊ ስትራቴጂካዊ ውጤት እያስገኘ መሆኑን ድርጅቱ አስታውቋል።
በዛሬው እለትም 500 ሜትሪክ ቶን አስቸኳይ የምግብ ድጋፍ በድርጅቱና
አጋር አካላትአማካኝነት ወደ ክልሉ መድረሱን ኢዜአ ዘግቧል፡፡
መንግስት በትግራይ ክልል ያለው የሰብአዊ ድጋፍ በተጠናከረ ሁኔታ እንዲቀጥል የግጭት ማቆም ውሳኔ ማድረጉና በየብስ የሚደረገው ድጋፍም እንዲቀጥል መወሰኑ ይታወቃል።
@Addis_Tv
ከነገ ጀምሮ ለነባር እና ለአዳዲስ የሃይማኖት ቴሌቪዥን አመልካቾች ፈቃድ መስጠት ሊጀመር ነው
ከመጋቢት 23 2014 ዓ.ም ጀምሮ ለነባር እና ለአዳዲስ የሃይማኖት ቴሌቪዥን አመልካቾች ፈቃድ መስጠት እንደሚጀምር የኢትዮጵያ መገናኛ ብዙሃን ባለስልጣን ገለጸ።
ባለስልጣኑ በሃይማኖት ብሮድካስት ረቂቅ መመሪያ ዙሪያ ውይይት እያደረገ ነው።
የባለስልጣኑ ዋና ዳይሬክተር አቶ መሐመድ እድሪስ፥ ቀደም ሲል በነበሩት የኢትዮጵያ የመገናኛ ብዙሃን ፖሊሲ እና ህጎች መሰረት የሃይማኖት ተቋማት የሃይማኖት ብሮድካስት እንዳያቋቁሙ ህጋዊ እውቅና እና ፈቃድ እንዳያገኙ ተከልክለው መቆየታቸውን አንስተዋል፡፡
በህብረተሰቡ ዘንድ የሃይማኖት መርሃ ግብር በቴሌቪዥን ለመከታተል ከነበረው ፍላጎት ጋር በተያያዘ ሃገራዊ ለውጡን ተከትሎ የሃይማኖት ብሮድካስተሮች በህግ ዕውቅና እንዲያገኙ፤ የመገናኛ ብዙሃን ፖሊሲውም ሆነ የአዋጅ ማሻሻያ በመደረጉ ባለስልጣኑ ፈቃድ አውጥተው እንዲንቀሳቀሱ አስፈላጊውን ሁሉ ያደርጋልም ነው ያሉት ።
በመገናኛ ብዙሃን አዋጅ መሰረትም ከመጋቢት 23 2014 ዓ.ም ጀምሮ ለነባርም ሆነ ለአዳዲስ የሃይማኖት ቴሌቪዥን ፈቃድ አመልካቾች ፈቃድ መስጠት የሚጀምር መሆኑን ተናግረዋል።
በተደረገው ጥናት መሰረት በአሁኑ ወቅት በኢትዮጵያ ከ50 በላይ የሃይማኖት ቴሌቪዥን ጣቢያዎች በስርጭት ላይ የሚገኙ ሲሆን ፥ ጣቢያዎቹ ሃይማኖታዊ መልዕክቶችን በማስተላለፍ ለተከታዮቻቸው አማራጭ የመገናኛ ዘዴ በመሆን እያገለገሉ እንደሚገኙ ተመላክቷል፡፡
በአንጻሩ ጥቂት የሚባሉ በሃላፊነት ስሜት እና በጥንቃቄ የማይንቀሳቀሱ የሃይማኖት ሚዲያዎች በመኖራቸው በሚያሰራጯቸው መረጃዎች ከህብረተሰቡ የሚደርሱ ቅሬታዎች ከጊዜ ወደ ጊዜ በመጨመር ላይ እንደሚገኙም አንስተዋል።
ከነዚህ ቅሬታዎች ውስጥም ከሕግ፣ ከሞራል፣ ከጤና ጋር የሚቃረኑ ንግግሮችን የማሰራጨት እና ሌሎች ሃይማኖቶችን የመንቀፍ ተጠቃሽ ናቸው ብለዋል።
በመሆኑም የሃይማኖት መገናኛ ብዙሃን ለሃገር አንድነት፣ ለህዝብ መፈቃቀር ፣ አብሮነት፣ መረዳዳት፣ ሰላም እና መሰል በጎ ሃይማንታዊ ዕሴቶችን በማጠናከር የበኩላቸውን ሚና አጠናክረው እንዲቀጥሉ ሲሉ መልዕክት አስተላልፈዋል።
@Addis_Tv
በኢትዮጵያ በአሰላና ኢተያ አካባቢ የ50 ሜጋ ዋት የእንፋሎት ሀይል ማመንጫ ግንባታ ለማከናወን የ100 ሚሊየን ዶላር ስምምነት ተፈረመ።
ስምምነቱን የተፈራረሙት የቱሉ ሞዬ ሀገር በቀል ድርጅትና ሚትስቡሽ ኮርፖሬሽን ሲሆኑ ፕሮጀክቱ የሚከናወነው ከፈረንሳይ መንግስት በተገኘ ፈንድ ነው ተብሏል።
ከእንፋሎት የሚገኝ የሀይል አማራጭ ከአከባቢ ብክለት የፀዳና ዘላቂ በመሆኑ ተፈላጊነቱ ከፍተኛ መሆኑ የተገለጸ ሲሆን ኢትዮጵያም በዘርፉ እምቅ ሀይል ስላላት ማልማት እንደሚገባ ተመላቷል፡፡
“የእንፋሎት ሀይልን በሀገራችን በስፋት መጠቀም እንፈልጋለን” ያሉት የማዕድን ሚንስትሩ ኢንጂነር ታከለ ኡማ፥ አማራጭ የሀይል ምንጮችን ለማስፋፋት መንግስት ቁርጠኛ ነው ብለዋል።
የበለጸገችና ገናና ሀገር ለመገንባት የሃይል አቅርቦት ወሳኝ መሆኑን ጠቅሰው፥ ለዚህም መንግስት የሚቀጥሉትን 10 አመታት የሚያገለግል ፖሊሲ ቀርፆ ወደ ስራ መግባቱን ተናግረዋል።
ኢንጅነር ታከለ አክለውም በሀይል አቅርቦት ዘርፉ ላይ የግል ዘርፉ እንዲሳተፍ እንደሚፈለግና በዚህም መንግስት ድጋፍ ለማድረግ ቁርጠኛ መሆኑን አስታውቀዋል።
@Addis_Tv
በሀገር ውስጥ የዘረ-መል ምርመራ ከአንድ ወር በኋላ እንደሚጀመር ተገለጸ
በሀገር ውስጥ የዘረ-መል (ዲ ኤን ኤ) ምርመራ ከአንድ ወር በኋላ እንደሚጀመር የኢትዮጵያ ፌዴራል ፖሊስ አስታወቀ።
የኢትዮጵያ ፌዴራል ፖሊስ ኮሚሽነር ጄነራል ደመላሽ ገ/ሚካኤል እንደገለጹት ፥ አዳዲስ የፎረንሲክ ምርመራ ማሽኖችን ተቋሙ ወደ ሀገር አስገብቶ ጥቅም ላይ እያዋለ ነው።
በአስር ዓመቱ ስትራቴጂክ ዕቅዱ ከአፍሪካ ምርጥ አምስት የፖሊስ ተቋማት አንዱ ሊሆን በለውጥ ላይ የሚገኘው የኢትዮጵያ ፌዴራል ፖሊስ አሰራሮቹን በቴክኖሎጂ እያዘመነ መሆኑን አስታውቀዋል፡፡
በዚህም ከዚህ ቀደም ወደ ሌላ ሀገራት ተልኮ ይደረግ የነበረው የዲ ኤንኤ ምርመራ ከአንድ ወር በኋላ በኢትዮጵያ ውስጥ ይደረጋል ብለዋል።
ከቴክኖሎጂ ባለፈ ፖሊስ ውጤታማ ስራ ለመስራት ያስችለው ዘንድ አዳዲስ አደረጃጀቶች ማዋቀሩን ኮሚሽነር ጄነራሉ ገልጸዋል።
አዳዲሶቹ አደረጃጀቶች እያደገ የመጣውን የአየር እና የየብስ ትራንስፖርት ደህንነት ለማስጠበቅ የሚያስችሉ ናቸው ተብሎላቸዋል።
ከዚህ በተጨማሪም ኢንዱስትሪዎችንና ዩኒቨርሲቲዎችን ትኩረት አድርገው መዋቀራቸውን አስታውቀዋል።
አዳዲሶቹ አደረጃጀቶች የአቪየሽን ፖሊስ፣ የምድር ባቡር ፖሊስ፣ የዩኒቨርሲቲ ደህንነት ፖሊስ እንዲሁም በኢንዱስትሪ እና ቱሪዝም ላይ ትኩረት አድርጎ የሚከታተል የፖሊስ ክፍሎች ናቸው።
@Addis_Tv
በአዲስ አበባ የተሰረቁ የተለያዩ ዕቃዎችን እየተቀበሉ በሚሸጡ የንግድ ሱቆች ላይ እርምጃ ተወሰደ
በመዲናዋ የተሰረቁ የተለያዩ የኤሌክትሮኒክስና የመኪና መለዋወጫ ዕቃዎችን በሚቀበሉ የንግድ ሱቆች ላይ እርምጃ መውሰዱን የአዲስ አበባ ፖሊስ ኮሚሽን አስታወቀ፡፡
ኮሚሽኑ ለኢዜአ በላከው መግለጫ እንዳስታወቀው፥ በመዲናዋ ልደታና ንፋስ ስልክ ላፍቶ ክፍለ ከተሞች የተሰረቁ ዕቃዎችን በመግዛት የተጠረጠሩ ግለሰቦችን በቁጥጥር ሥር ያዋለ ሲሆን ፥ የንብረቶቹ ማከማቻ የነበሩ ሱቆች ላይም እርምጃ ተወስዷል።
በልደታ ክፍለ ከተማ ወረዳ 3፣ ወረዳ 4 እና ወረዳ 7 አካባቢ አንዳንድ ሱቆች በስርቆት የሚመጡ የተለያዩ ዕቃዎችን እንደሚቀበሉ ተደርሶባቸዋል።
በመሆኑም ፖሊስ በክፍለ ከተማው መጋቢት 15 እና 16 ቀን 2014 ዓ.ም በተለያዩ ሱቆች ላይ ባደረገው ድንገተኛ ፍተሻ የተሰረቁ የሞባይል ስልኮች፣ የተለያዩ የኤሌክትሮኒክስ ዕቃዎች እና የተሽከርካሪ መለዋወጫዎችን ይዟል።
ፖሊስ በልደታ ክፍለ ከተማ ባደረገው ድንገተኛ ፍተሻ 80 የሞባይል ስልኮች፣ 24 ሲም ካርዶች፣ ሁለት ላፕቶፕ፣ አንድ ህገ-ወጥ ሽጉጥ እና በርካታ የመኪና መለዋወጫ ዕቃዎች ተይዘዋል።
ከተያዙት ዕቃዎች ጋር 11 ተጠርጣሪዎች በቁጥጥር ሥር ውለው ምርመራ እየተደረገባቸው መሆኑን ኮሚሽኑ በመግለጫው አመልክቷል።
በንፋስ ስልክ ላፍቶ ክፍለ ከተማም መጋቢት 15 ቀን 2014 ዓ.ም በተለያዩ አካባቢዎች በንግድ ሱቆች ላይ በተደረገ ድንገተኛ ፍተሻ 618 የሞባይል ስልኮች፣ አምስት ላፕቶፕ ኮምፒውተሮች፣ 45 ሲም ካርዶች እና ሌሎችም የኤሌክትሮኒክስ ዕቃዎች ተይዘዋል።
በተመሳሳይ ከወንጀሉ ጋር ግንኙነት ያላቸው ተጠርጣሪዎችም በቁጥጥር ሥር ውለው ምርመራ እየተካሄደባቸው ይገኛል።
ፖሊስ በቁጥጥር ሥር ያዋላቸው የንብረት ዓይነቶች በተለያየ አጋጣሚ የጠፋባቸውና የተሰረቀባቸው ባለንብረቶች ባስመዘገቡት መሰረት እየተመሳከረ በመረጋገጥ ላይ መሆኑ ታውቋል።
በአዲስ አበባ በስፋት እየተስተዋለ የመጣውን ሌብነትና ዘረፋ ለመቆጣጠር በቀጣይም ቁጥጥሩን በማጠናከር እርምጃ የሚወስድ መሆኑን ፖሊስ ኮሚሽኑ አስታውቋል።
@Addis_Tv
የጂቡቲው ፕሬዚዳንት እስማኤል ዑመር ጊሌ ለይፋዊ የስራ ጉብኝት አዲስ አበባ ገቡ
ፕሬዚዳንቱ ቦሌ ዓለም አቀፍ አውሮፕላን ማረፊያ ሲደርሱ ጠቅላይ ሚኒስትር ዐቢይ አሕመድ አቀባበል አድርገውላቸዋል።
የሁለቱ አገራት መሪዎች በሁለትዮሽ አገራዊና ቀጣናዊ ጉዳዮች ላይ እንደሚመክሩ ይጠበቃል።
ኢትዮጵያና ጂቡቲ ለረጅም ዘመናት የቆየና የጠበቀ ወዳጅነት ያላቸው አገሮች ናቸው።
የሁለቱን አገሮች የትብብር ግንኙነት ይበልጥ ለማጠናከር በተለይም በፖለቲካና ኢኮኖሚ መስኮች ይበልጥ ተቀራርበው በመስራት ላይ ይገኛሉ ሲል ኢዜአ ዘግቧል።
ኢትዮጵያና ጂቡቲ በባቡር፣ በመንገድ፣ በውሃ፣ በቴሌኮም፣ በኤሌክትሪክ ሃይል እና ሌሎችም የልማት መስኮች የጋራ ተጠቃሚነታቸውን ለማረጋገጥ እየሰሩ መሆኑ ይታወቃል።
@Addis_Tv
ከንቲባ አዳነች አቤቤ 82 የተለያዩ የልማት ፕሮጀክቶችን መረቁ
የአዲስ አበባ ከተማ አስተዳደር ከንቲባ አዳነች አቤቤ በልደታ ክፍለ ከተማ የጤና፣ የትምህርት፣ የስፖርት ማዘውተሪያን ጨምሮ ግንባታቸው የተጠናቀቁ 82 የተለያዩ ፕሮጀክቶችን መረቁ።
በክፍለ ከተማው የተመረቁት 82 ፕሮጀክቶች የህብረተሰቡን የልማትና የመልካም አስተዳደር ችግሮች በዘላቂነት ለመፍታትና ተጠቃሚ ለማድረግ የተሰሩ መሆናቸው ተገልጿል።
ግንባታቸው ተጠናቆ ከተመረቁት ፕሮጀክቶች መካከል የጤና ተቋማት፣ የስፖርት ማዘውተሪያ ስፍራዎች፣ ትምህርት ቤቶች፣ የተማሪ ምገባ አዳራሾች፣ የጋራ መፀዳጃ ቤቶች፣ የወጣት ስብዕና መገንቢያ ማዕከላትና ሌሎችም እንደሚገኙበት ኢዜአ ዘግቧል።
ለፕሮጀክቶቹ ግንባታ አጠቃላይ 162 ሚሊዮን ብር ወጪ መደረጉ ታውቋል።
በመሆኑም የፕሮጀክቶቹ ምርቃት ከንቲባዋን ጨምሮ ሌሎች የአስተዳደሩ ከፍተኛ አመራሮች እንዲሁም የክፍለ ከተማው ዋና ስራ አስፈፃሚ በተገኙበት ተከናውኗል።
@Addis_Tv
ኢትዮጵያ እና ጅቡቲ አዳዲስ የአትክልትና ፍራፍሬ ምርቶችን ለጂቡቲ ገበያ ለማቅረብ ተስማሙ
የመጀመሪያው የኢትዮ-ጅቡቲ የአትክልትና ፍራፍሬ ፎረም በአዲስ አበባ ተካሂዷል።
የኢትዮጵያ ፍራፍሬና አትክልት ላኪዎች ከ20 በላይ ጥራት ያላቸውን ምርቶች ለጅቡቲ ገበያ ለማቅረብ ተስማምተዋል።
በኢትዮጵያ ሆርቲካልቸር አምራች ላኪዎች ማኅበር የተዘጋጀው የቢዝነስ ለቢዝነስ ውይይት ክፍተቶችን ለመገምገም እና ወደ ጅቡቲ የሚላኩ የአትክልትና ፍራፍሬ ምርቶችን ለማሻሻል ጠቃሚ መድረክ ሆኖ አገልግሏል።
በጅቡቲ የኢትዮጵያ ኢምባሲ አቶ ቢንያም ኤፍሬም፣ ከጅቡቲ ንግድ ምክር ቤት አቶ ሲያድ አሊ ሀሰን እና አቶ ቴዎድሮስ ዘውዲ የአትክልትና ፍራፍሬ አምራች ላኪዎች ማህበር ወደ ጅቡቲ የሚላከውን ምርት ለማሳደግ የሚያስችሉ አሰራሮችን ላይ ማብራሪያ ሰጥተዋል።
በተለይ አሁን ባለው የአለም የምግብ ቀውስ ወቅት የክልላዊ ንግድን ማጠናከር እንደሚያስፈልግ ተገልጿል።
የጅቡቲ የልዑካን ቡድን በመጪዎቹ በቅርቡ በቢሾፍቱ እና በቆቃ እርሻዎችን ጉብኝት እንደሚያደርግ ይጠበቃል።
@Addis_Tv
የከተማ አስተዳደሩ ቅሬታዎችንና ጥቆማዎችን የሚቀበልበት የስልክ ቁጥሮችን ይፋ አደረገ
የአዲስ አበባ ከተማ አስተዳደር ከህብረተሰቡ የተለያዩ ቅሬታዎችንና ጥቆማዎችን የሚቀበልበት የስልክ ቁጥሮችን ይፋ አድርጓል፡፡
ከተማ አስተዳደሩ ከህብረተሰቡ ጋር ውይይቶችን ሲያካሂድ መቆየቱ ይታወሳል፡፡
በውይይቶቹም በርካታ ጠቃሚ ሃሳቦችንና ግብአቶችን ማሰባሰብ መቻሉን ከከንቲባ ጽ/ቤት ያገኘነው መረጃ ያሳያል፡፡
ሆኖም አሁንም ህብረተሰቡን ለማዳመጥ ተጨማሪ አማራጮችን መዘርጋት አስፈላጊ በመሆኑ ማንኛውም ሰው ካለበት ሆኖ ጥቆማዎችን መስጠት የሚችልበት የስልክ ቁጥሮችን አስተዳደሩ ይፋ አድርጓል፡፡
በዚህም መሰረት ህብረተሰቡ ማንኛውንም ቅሬታና ጥቆማዎችን በነፃነት የሚሰጥባቸው የጥቆማ መስጫ የስልክ ቁጥሮችን ይፋ አድርጓል፡፡
በዚህም መሰረት!
አጭር ቁጥር ፡- 👉 9977
የሞባይል ስልኮች
👉 09-00640830
👉 09-00640789
አስፈላጊ የሰነድ መረጃዎችን በቴሌግራም ለማያያዝ እና ለአጭር መልእክቶች( text messages) የሞባይል ቁጥሮችን መጠቀም እንደሚቻል ተገልጿል።
@Addis_Tv
የአዲስ አበባ ብልጽግና ፓርቲ ወጣቶች ሊግ በህወሓት አሸባሪ ቡድን ለተፈናቀሉ የአማራና አፋር ክልሎች ዜጎች 18 ሚሊየን ብር የሚጠጋ የገንዘብ እና ቁሳቁስ ድጋፍ ማሰባሰቡን አስታወቀ፡፡
ድጋፉም ምግብ፣ የቤት መስሪያ ቁሳቁስ፣ የትምህርት ቁሳቁስ፣ የተለያዩ አልባሳት፣ የሴቶች ንጽህና መጠበቂያ፣ የቤትና የህክምና ቁሳቁስን ያካተተ ነው፡፡
በመርሃ ግብሩ ላይ የአዲስ አበባ ብልጽግና ፓርቲ ጽህፈት ቤት ኃላፊ አቶ መለሰ ዓለሙና የአዲስ አበባ ብልጽግና ፓርቲ ወጣቶች ሊግ ሀላፊ አቶ መለሰ አባተን ጨምሮ የተለያዩ የሊጉ አመራሮች ተገኝተዋል፡፡
አቶ መለሰ ዓለሙ ፥ “ወጣቶች በየዘመኑ የሚሰጣቸው ተልዕኮ አለ፤ የዚህ ዘመን ወጣቶች ተልዕኮ ደግሞ ሀገርን ማዳን ነው” ብለዋል፡፡
“በዚህ ወቅትም ለሀገራችን አለን በማለታችሁ ከፍተኛ ኩራት ይሰማናል” ነው ያሉት፡፡
የገጠሙንን ፈተናዎች በጋራ በመረባረብ እናልፋቸዋለን ያሉት አቶ መለስ ዓለሙ ፥ “ምንም እንኳን ብዙ ፈተናዎች ቢገጥሙንም ከትናንትናው አይብሱም እንሻገራቸዋለን” ነው ያሉት፡፡
“ከወጣቱ ብዙ ይጠበቃል የተጀመረው ተግባር አርዓያ የሚሆን ነው፤ ተጠናክሮ ሊቀጥል ይገባልም” ብለዋል፡፡
የተሰበሰበው ሀብት ከዛሬ ጀምሮ ድጋፉ ለሚያስፈልጋቸው ዜጎች እንደሚሰራጭ ተነግሯል፡፡
@Addis_Tv
ከንቲባ አዳነች በለሚ ኩራ ክ/ከተማ የጓሮ አትክልት ንቅናቄን አስጀመሩ
የአዲስ አበባ ከተማ አስተዳደር ከንቲባ አዳነች አቤቤ በለሚ ኩራ ክፍለ ከተማ "ምግባችን ከጓሮዋችን" በሚል መሪ ቃል የጓሮ አትክልት ልማት ንቅናቄን በይፋ አስጀምረዋል፡፡
ከንቲባዋ በአንድ አርሶ አደር ማሳ በመገኘት የጓሮ አትክልት ንቅናቄውን ባስጀመሩበት ወቅት እንደተናገሩት የከተማ አስተዳደሩ የከተማ ግብርናን ለማስፋፋት ለየት ያለ እቅድ ይዞ እየተንቀሳቀሰ ነው ብለዋል፡፡
የከተማ ግብርና በብዙ ታላላቅ ሃገራት የተለመደ መሆኑን አውስተው በእኛ አገር ደግሞ በብዙ መንገድ የተሸልን በመሆናችን ትንሽ ግብአትና ስልጠና ብናክልበት የከተማ ግብርናን ማስፋፋት እንችላለን ብለዋል።
በተለይም ለአዲስ አበባ አትክልትና ፍራፍሬ ከሩቅ ቦታ እንደምታገኝ አስታውሰው ፤በዚህ ሂደት ከተማ እስኪደርስ ተበላሽቶ ከመድረሱም በላይ ዋጋውን እንደሚያንረው መግለጻቸውን ከከንቲባ ጽህፈት ቤት ያገኘነው መረጃ ያመላክታል፡፡
@Addis_Tv
''ኤችአር 6600 ከፀደቀ የኢትዮጵያና የአሜሪካን ግንኙነት የሚሽር ነው'' ውጭ ጉዳይ ሚኒስቴር
የውጭ ጉዳይ ሚኒስቴር ሳምንታዊ መግለጫ ሰጥቷል፡፡ የውጭ ጉዳይ ሚኒስቴር ቃል ዐቀባይ አምባሳደር ዲና ሙፍቲ በሰጡት መግለጫ የኤች አር 6600 ፍላጎት እስካሁን በኢትዮጵያ የተሠሩ መልካም ተግባራትን ኹሉ የሚክድና የሚሸረሽር ነው ብለዋል።
በሳምንቱ ከኤች አር 6600ና ኤስ 3199 የተባሉ አደገኛ ረቂቅ ሕጎች እንዳይጸድቁ ዳያስፖራው በተቀናጀ የአንደነት ዘመቻ እንዲንቀሳቀስ ምክትል ጠቅላይ ሚኒስትርና የውጭ ጉዳይ ሚኒስትር ደመቀ መኮንን ጥሪ ማቅረባቸውን ተናግረዋል፡፡
ዳያስፖራው በኢትዮጵያ የውጭ ጣልቃ ገብነት በበቃ ወይም No more ዘመቻ እንዳከናወነ ኹሉ ኤች አር 6600ና ኤስ 3199 የተባሉ አደገኛ ረቂቅ ሕጎች መመከት እንዲችሉ ተወያይተዋል ብለዋል።
በፀጥታ ጉዳዮች ዙሪያ ከደቡብ ሱዳን መንግሥት ጋር የኹለትዮሽ ውይይት መደረጉን ገልጸዋል፡፡
"ከዒድ እስከ ዒድ" ታላቁ ጉዞ ወደ ኢትዮጵያ መርኃግብር የተሳካ እንዲኾን በርካታ ሥራዎች እየተከናወኑ ነው ብለዋል።
@Addis_Tv
ከ21 በላይ የሚሆኑ የታሸገ ውኃ አምራች ፋብሪካዎች ስራ ማቆማቸው ተገለጸ።
ውሃ አምራች ፋብሪካዎች ከኢንዱስትሪ ሚኒስቴር፣ ንግድና ቀጠናዊ ትስስር ሚኒስቴር ፣ ጉሙሩክ ኮሚሽን እና አዲስ አበባ ንግድ ቢሮ ጋር ውይይት እያካሄዱ ነው፡፡
በመላ ሀገሪቱ 134 የሚሆኑ የታሸገ ውኃ የሚያመርቱ ፋብሪካዎች የሚገኙ ሲሆን ከእነዚህ ውስጥም በተለያዩ ምክንያቶች 21 የሚሆኑ ፋብሪካዎች ስራ ማቆማቸው ተገልጿል።
የቀሩት ፋብሪካዎችም በሙሉ አቅማቸው እየሰሩ እንዳልሆነ በውይይቱ ወቅት ተነስቷል።
የጥሬ ዕቃ ዋጋ መጨመር እና በሽያጭ ጊዜ ህጋዊ ደረሰኝን አለመጠቀም፣ የጉምሩክ ቀረጥ በኢንቮይስ መሰረት አለመስተናገድ፣ የታሸገ ውኃ መጠጥን እንደ ቅንጦት በመውሰድ አላስፈላጊ የሆነ የኤክሳይስ ታክስ ጫና መፍጠር እና ለአምራቹ የውጭ ምንዛሪ ቅድሚያ አለመስጠት ለስራቸው ተግዳሮት መሆናቸውን ጠቅሰዋል።
በተጨማሪም ቸርቻሪው አምራቹ ከጨመረበት ዋጋ ዉጪ ከሶስት እጥፍ በላይ ዋጋ በመጨመር ለኑሮ መወደድ ዋና ተዋናይ እየሆነ ነው ሲሉም አምራቾቹ ቅሬታ አቅርበዋል።
@Addis_Tv
አቶ መስፍን ጣሰው የኢትዮጵያ አየር መንገድ ዋና ስራ አስፈፃሚ ሆነው ተሾመዋል፡፡
የአየር መንገዱ የቦርድ ሰብሳቢ ሆነው የተሾሙት አቶ ግርማ ዋቄ የኢትዮጵያ አየር መንገድ ስራ አስፈፃሚ አቶ ተወልደ ገብረማርያም በገዛ ፈቃዳቸዉ ስራ መልቀቃቸውንና አዲስ የተመሰረተውን ቦርድ አስመልክተው ዛሬ መግለጫ ሰጥተዋል፡፡
በመግለጫቸውም አቶ ተወልደ ላለፉት 6 ወራት ህክምናቸውን በአሜሪካ ሲከታተሉ መቆየታቸውን ጠቁመው ባቀረቡት ጥያቄ መሰረት ትናንት የተቋቋመው አዲሱ ቦርድ ጥያቄያቸውን ተቀብሎ በምስጋና አሰናብቷቸዋል ብለዋል።
ይህን ተከትሎም ቦርዱ አቶ መስፍን ጣሰውን የኢትዮጵያ አየር መንገድ ስራ አስፈፃሚ አድርጎ መሾሙን ተናግረዋል።
አቶ መስፍን ጣሰው ቀደም ሲል በኢትዮጵያ አየር መንገድ የኢንፎርሜሽን ቴክኖሎጂ መምሪያ፣ የጥገናና ኢንጂነሪንግ፣ እንዲሁም ኦፕሬሽን ዳይሬክተር በመሆን አገልግለዋል።
ከፈረንጆቹ 2019 ጀምሮም የአየር መንገዱ ስራ አመራር ቦርድ ውስጥ ሲያገለግሉ ቆይተዋል።
ከዚያ በመቀጠል የኢትዮጵያ አየር መንገድ 40 በመቶ ድርሻ ያለበትን አስኪ አየር መንገድን ዋና ስራ አስፈፃሚ በመሆን በመምራት ላይ ነበሩ።
ከዚህ ባለፈም እስከትናንት ወዲያ በስራ ላይ ያለው ቦርድ በአዲስ አመራር መተካቱን አቶ ግርማ ዋቄ ተናግረዋል፡፡
በዚህ መሰረትም፡-
** አቶ ተክለወልድ አጥናፍ ፣
** አቶ ተመስገን ጥሩነህ ፣
** ሌተናል ጀነራል ይልማ መርዳሳ፣
** አቶ ታደሰ ጥላሁን እና
ሁሉንም ሰራተኛና ማኔጅመንት የሚወክሉና በሰራተኞች ተመርጠዉ የቦርድ አባላት የሚሆኑት እስከሚተኩ ድረስ
** አቶ ረታ መላኩ
** አቶ አለማየሁ አሰፋ
የአዲሱ ቦርድ አባላት ሆነው ተሰይመዋል።
@Addis_Tv
የኢትዮጵያ አየር መንገድ ዋና ሥራ አስፈፃሚ አቶ ተወልደ ገብረማርያም በፈቃዳቸው ከኃላፊነታቸው ለቀቁ።
አየር መንገዱ ባወጣው መግለጫ አቶ ተወልደ በፈቃዳቸው ከኃላፊነት መልቀቃቸውን አስታውቋል።
አየር መንገዱ ጉዳዩን አስመልክቶ ባወጣው መግለጫ፥ አቶ ተወልደ ላለፉት ስድስት ወራት ህክምናቸውን በአሜሪካ ሲከታተሉ መቆየታቸውን አስታውሷል፡፡
አቶ ተወልደ ገብረማርያም በጤና እክል ምክንያት የአየር መንገዱ ዋና አስፈጻሚ ሆነው መቀጠል እንደማይችሉ በመግለጽ ለስራ አመራር ቦርዱ የስራ መልቀቂያ ጥያቄ ማቅረባቸው ተገልጿል፡፡
በዚህ መሰረት የኢትዮጵያ አየር መንገድ የስራ አመራር ቦርድ በዛሬው ዕለት ባካሄደው ስብሰባው አቶ ተወልደ ያቀረቡትን የስራ መልቀቂያ ጥያቄ መቀበሉን አስታውቋል፡፡
የስራ አመራር ቦርዱ በአቶ ተወልደ ገብረማርያም ምትክ ለአየር መንገዱ ዋና ስራ አስፈጸሚ በቅርቡ እንደሚመድብም ነው የተገለፀው።
አየር መንገዱ በመግለጫው አቶ ተወልደ ከአንድ አስርት ዓመታት በላይ ተቋሙን በመሩበት ወቅት ከፍተኛ ስኬት ያስመዘገቡ መሆናቸውን አመልክቷል።
በእርሳቸው አመራር አየር መንገዱ በሁሉም መለከያ የተለየ ስኬት ማስመዝገቡን በመጠቆም ዓመታዊ ገቢው ከ1 ቢሊየን የአሜሪካ ዶላር ተነስቶ አሁን ላይ ከ4 ነጥብ 5 ቢሊየን ዶላር መብለጡን ጠቁሟል።
33 የነበሩት የአውሮፕላን ቁጥሮችም ወደ 130 ማደጋቸውን እና በዓመት የሚያስተናግደው የመንገደኞች ቁጥር ከ3 ሚሊየን ወደ 12 ሚሊየን ከፍ ማለቱን አስታውቋል።
በአጠቃላይ በእርሳቸው አመራር አየር መንገዱ በአራት እጥፍ አድጓል ያለው መግለጫው፥ 700 ሚሊየን የአሜሪካ ዶላር ዋጋ ያወጡ ቁልፍ መሰረተ ልማቶችን አየር መንገዱ የገነባው በእርሳቸው አመራር መሆኑን በመግለፅም፥ በአፍሪካ ትልቅ የሚባል ሆቴል፣ የካርጎ ተርሚናል፣ የአቭዬሽን አካዳሚ እና የበረራ ሲሙሌተሮች መገንባታቸውን ለአብነት ጠቅሷል።
መግለጫው አክሎም የስራ አመራር ቦርዱ፣ ከፍተኛ አመራሮች እና ሰራተኞች በአጠቃላይ የኢትዮጵያ አየር መንገድ ቤተሰብ ለዚህ አስተዋፅኦዋቸው ከፍ ያለ ምስጋና እንዳላቸው በመግለፅ መልካም ጤናን ተመኝቷል።
@Addis_Tv
