2256
خادمكم ملا علي الشاوي للتواصل ali_20115
للامام الهادي عليه السلام
(موشّح)
من عقائدنا البحت نطريها
الزيارة الجامعة انقر بيها
لو تسائلنا منو الحاجيها ؟
من علي الهادي صدر معناها
من علي الهادي عقديتنا اجت
وكل عقيدة اتخالفه باطل صفت
لمنا والناس التبغضه اتطشرت
ريح صَرصَر هب عليها اهواها
غيرنا تايه غدى بدار الوهم
نقمة صار لغيرنا والنا نِعَم
المايوالي امره بالدنيا انحسم
ما يؤمن المايعيش بجاها
كل سُفن دنيانا ابدت بالغرق
والامام اشراعه بالافق اتلصق
عالخليقة يعطف اعظم ما خلق
الله لاجله السمة طوع ابناها
أوجب الهادي زيارة كربلاء
حتى لو بالشيعة مر اقسى البلاء
الموت هيّن والصعب داء الجفاء
واليجافي حسين جافي طٰه
قطّعوا ايديكم وزورا الحسين
قطعوا ارجلكم زوروا الحسين
كلشي ما بي منفعة التنفع العين
لو جرت لحسين كل مجراها
ناعي للطف صوته ودموعه شعر
حسين كاسرهم كسر ما ينجبر
بعينك تشوف اعتله صدره الشمر
لهل المصيبة السمة دم ابجاها
هاشمي وغيرته ماتسمحله ابد
عمّته مسبية من بلد لبلد
لا محامي الها بقى ولا من ولد
تنخا واعله النهر طاح الواها
مات مسموم وعليه داير اهل
لقّنوه واندفن بعد المُغتسل
هذا كله بكربلة ابداً ما حصل
تغسّل بنزفه وفيوض ادماها
مزك ثوبه الحسن واجزع وانتحب
ولطمت النسوة لحد فيض التعب
بكربله مالطموا الضامي انلسب
التبجي دمعة السوط يتگلاها
لثار دم الهادي ولثار الضعن
غايب الهم لابد ايظهره الزمن
من بعد هالغربة يكسيهم وطن
وترجع الدنيا بإديه مسراها
______________________
كرار رحمن
#نعي
مولاتي فاطمة تنعى ولدها مولاي الهادي
صلوات الله عليهما
علي الهادي ييمه اليوم اجيتك
انصب نايحه يبني بثنيتك
يحلو الطول من فدوه اللحيتك
لكيتك عالترب نايم لكيتك
علي الهادي ييمه عليك صاحن
ضلوع امك يبعد الما ارتاحن
الطفن من البواجي وحيل راحن
اعلى تابوتك افصوص العين طاحن
علي الهادي ييمه يفور دمعي
واحس توه انكسر عالنعش ضلعي
وين الناعيه خل تجي وتنعي
هنا يا روس هاشم حزن فرعي
علي الهادي ييمه الگلب شاجر
اكض وجهك واكولن خاف حافر
ساحك على عيونك لو خناجر
بظهرك نايمه والنحر شاخر
علي الهادي ييمه انمرد جبدك
لجن ماطلع مثل حسين جدك
طلع جبده برمح والخبر عندك
لا. أذيك جيب لحضني خدك
على اخبارك نشدت الراح - وياي
كالوا وسط جبدك لهب - وياي
اجيت وجـبت زينب ليك - وياي
عليها النايحه والون عليه
الشيخ حيدر الحميداوي
#اللهم_عجل_لوليك_الفرج
#نعي
استشهاد الإمام علي الهادي
عليه السلام
بلنوح گاضي الهادي بلنوح
جسمه نحيل و گلبه مجروح
سالت دموعه و طلعت الروح
هليلة مات الهادي يا ويل
سامره صارت گاع غربه
الهادي مات و سكت گلبه
سَمه بدليلة بس يضربه
و الحسن يبچي و فاگد الحيل
العسكري ناح بدمع العيون
و سبع الدجيل اعليه يونون
علهادي بلحسرات يبچون
لعيون تبچي الصبح و الليل
العسكري يبچي لعلي الهادي
بدمعاته يا بوية ينادي
فراگك مصايب على أفادي
و الهظم بس بگلبي يعيل
و ضل الدجيل بدمعت العين
وحده ينوح و حاله مو زين
طر الشمل هل دهر نصين
الفاگد عزيز بحسرته يميل
علي حسين الخفاجي
#اللهم_عجل_لوليك_الفرج
شال هيبتها ورحل حاميهه
اليوم سامره ادفنت واليهه
🇮🇶🇮🇶
صاح ناعي الموت ما سر الرأى
هل علمتم من ترجل وارتقى ؟
انه الهادي الفقيه الناطقا
الليله سامره الحزن غاطيهه
🇮🇶🇮🇶
اليوم شيخ الناس من عدهم رحل
اليوم حل الموت بالديره ونزل
ويلي يلمسموم من حان الاجل
الناس طلعت شيعت راعيهه
🇮🇶🇮🇶
الله كان بعون ابنه العسكري
من يغسل والده بدمعه الجري
شما يجر انفاسه يندب يا علي
هذا ابوي بنص نعش تاليهه
🇮🇶🇮🇶
شيلو بالتشييع علراس النعش
اليوم شيخ الطايفه لگبره غبش
عاشر الاسرار من اصل اثنعش
وفاطمة الزهره وبعد هاديهه
🇮🇶🇮🇶
آه واويلاه يا هذا الخبر
خلى گلب المصطفى اليوم انكسر
اخ من ثالث رجب طاح الگمر
الدنيا ظلمه وبعد شيضويهه
🇮🇶🇮🇶
يا علي الهادي يحاضر بالشدد
شوف تشييعك وصل طارف بلد
اليوم حتى عداك حارت بالعدد
ثوره هايه وبالدمى نرويهه
🇮🇶🇮🇶
دگو حيل صدوركم يا شيعته
هاي طلعت يله شيعو جنازته
وهاي ناس من الدول وتعنته
الله راح برحمته يجازيهه
🇮🇶🇮🇶
اليوم تشييع الامام بهالارض
صار واجب فزعة الوادم فرض
هذا نعش الوالي نركضله ركض
وراية الحگ بالسمى نعليهه
كلمات الخادم / رعد الفريجي
23 / جمادي الاخرة / 1447
ثوابها الى روح والدتي
والليله مات الهادي
*
العسكري ادموعه هامله. والليله مات الهادي
جهز الهادي وغسله. والليله مات الهادي
ابعيدين يا وادم هله. والليله مات الهادي
وبالكبر نعشه نزله. والليله مات الهادي
وبعده الجرح ما بادي
والليله مات الهادي
****
عالنعش ركضت شيعته. والليله مات الهادي
وتنعه وتون لمصيبته. والليله مات الهادي
واهل الظلاله سمته. والليله مات الهادي
ورامي الإمام اعمامته. والليله مات الهادي
وناح الجبل والوادي
والليله مات الهادي
****
لمصابه حزنانه السمه. والليله مات الهادي
وعالراس تلطم فاطمه. والليله مات الهادي
سامره صارت مظلمه. والليله مات الهادي
وحته الصخر ينزف دمه. والليله مات الهادي
وجبريل ضل اينادي
والليله مات الهادي
*****
سامره ضجت بالحزن. والليله مات الهادي
والغربة الهادي تون. والليله مات الهادي
خلص اسنينه بالسجن. والليله مات الهادي
حضرت الزهره للدفن. والليله مات الهادي
راحو تكول أولادي
والليله مات الهادي
****
تبجي اليتامه وتنتظر. والليله مات الهادي
وكل شيعي كلبه منكسر. والليله مات الهادي
وماضل بعد عدنه صبر. والليله مات الهادي
ما يسوه من بعده العمر. والليله مات الهادي
وضل يحدي يمه الحادي
والليله مات الهادي
*
ويلي عله البلسم كضه. والليله مات الهادي
وامصابه تنعه الرافضه. والليله مات الهادي
سممت جبده المبغضه. والليله مات الهادي
وبينه نحس ضاك الفضه. والليله مات الهادي
وهذا الحدث مو عادي
والليله مات الهادي
***
تربي العيون اعله الدرب. والليله مات الهادي
ومصيبوب ياناس الكلب. والليله مات الهادي
كل شيعي دمعاته تصب. والليله مات الهادي
وينادي بديار الغرب. والليله مات الهادي
منك اريد امرادي
والليله مات الهادي
***
تمت
تحسين الخفاجي
استشهاد الامام علي الهادي (عليه السلام)
بــويــه بـعـيــونــي الـدمــع حــاضــن دمـــع
وبـرحـيــلــك عـطـشـــت الــدنــيـــا شـــمــع
نــــاده مـــأجـــور
وانـتـهــى الـنـــور
وبـرحـيــلــك عـطـشـــت الــدنــيـــا شـــمــع
أنه ابنك العسكري....سيف وذبح خاطري....يا بويه فرﮔـﺎك
خليلي حفنة ضـوه....أو من عبيـرك هـوه....يمنحني ملـﮔﺎك
بلـﭽن احس بـويـه العمر...ما غـايــب ابوجهـه البـدر
واشعر أظـل هـذا العطر...يجمعني ويـاك
وانــت تـــــدري بغـيـبـتــك كـســرة ظـهــر
وهـــــذه أول خــطــوه لـســهــــام الــدهـــر
عـبــرت الســـور
وانـتـهــى الـنـــور
وبـرحـيــلــك عـطـشـــت الــدنــيـــا شـــمــع
ــــــــــــــــــــــــــــــــ1ـــــــــــــــــــــــــــــــــ
من فرﮔتك صرت احس...ما بيها نور الشمس....واتغطت بآه
وسـامـره فـﮔـدت وفــه....والطيبه والعاطفه....والبسمه واللـه
وما يفرق الليل وصــبح...كلمن صبَح يحمل جرح
واللوعه والمدمع صرح....وينادن احـاه
بكـلـشــي نصـبــر الــه بُعــدك مـو سهـل
مـنـه أهـــون يـا عـلـي الهـــادي اﻠﭽـتــل
وذبــح الانـحـــور
وانـتـهــى الـنـــور
وبـرحـيــلــك عـطـشـــت الــدنــيـــا شـــمــع
ــــــــــــــــــــــــــــــــ2ـــــــــــــــــــــــــــــــــ
يا بــويــه بيه الآلـم....نار وتعنـت خيـم....وانـه اشعر اعليل
والحيره ﭽن عمتي....فـﮔدك أخذ همتي....وما ظل بعد حيل
وبالسم صرت تشبه نحر....بـﭽـف الظلـم بويه انغدر
وﮔبال اهل بيته احتضـر....والمدمع يسيل
دمـعـــه مـو مـن جــرحــه لا مــــن حـالـتــه
يـــدري أهـــل الظــلــم تـفــجــــع عـيــلــتــه
وهــــوه مـغـــدور
وانـتـهــى الـنـــور
وبـرحـيــلــك عـطـشـــت الــدنــيـــا شـــمــع
ــــــــــــــــــــــــــــــــ3ـــــــــــــــــــــــــــــــــ
كل بسمه منك الي....ترزقني طيبة علي....ويا ذاك الاحساس
قـبـلـي ولا بالدهر....واحد بطعـمه شعر....مـن مجـمع الناس
وهسه امتلك بس الحزن....ودمــوعــي تـلـهـم بالجـفـن
ويا ريتـنـي ويـاك اندفن....واتنفسـك يـاس
واليـعــيـــش ابــلا أبــو ايـحــس بـالهــضــم
وحـتـى مــن عـيـــونـــه يـشــعــر مـنـحــرم
وعمـره عـاشــور
وانـتـهــى الـنـــور
وبـرحـيــلــك عـطـشـــت الــدنــيـــا شـــمــع
ــــــــــــــــــــــــــــــــ4ـــــــــــــــــــــــــــــــــ
بوداعك ادري البـﭽﻲ....بويه ابلغ من الحـﭽﻲ....واشعر بالجروح
متـحزمـه بلوعـتي....واتحنـت بدمعـتي....واتعتلي بالروح
وجـنازتـك لمـن مـشـت...من عندي احس كلشي خَذَت
وبس حسرتي بصدري بقت....متأزره بنوح
وبالـﮔــبـــر ﮔـبـلـــك نـــزل بــويـــه الأمــــل
وكـلـشـــي بـالـدنـيـــا بـعــد عـيـنــــك رحــل
بــدمــع مـنـثــــور
وانـتـهــى الـنـــور
وبـرحـيــلــك عـطـشـــت الــدنــيـــا شـــمــع
ـــــــــــــــــــــــــــــــ5ــــــــــــــــــــــــــــــــــ
أحمد البصراوي العبادي
شيعوا نعش ام البنين الليلة
العنده حاجه الدمع خل يسيله
====================
هذا نعش ام البنين الطاهره
هذا نعش ام الاقمار الزاهره
هذا نعش الكل عمرها محيره
ماتت ابحسرة كَلب وانحيله
====================
بالله يا شيال نعش ام الكمر
انتظر خل يوصل الطف الخبر
بلكت يفزعولها ابهم وقهر
والحمل غير اهله ياهو يشيله
====================
ماتت المهظومه ياللفاجعه
خل نعشها ابليل كون انطلعه
مثل نعش ام الحسين انشيعه
بليل وبخفية التراب انهيله
====================
لو نريد الاذن من اجل الدفن
والي ما عدها ولا عدها ابن
نكصد المذبوح يم كبره نون
نواسي كَلبه و بالدمع نشكيله
====================
شلون نعش ام الوفه تشيلونه
عدها اولاد اربعه يحملونه
حسين يحضر لازم ايتانونه
لو يجي عليها يهدم حيله
====================
ترفض انشيعها بدموع العذاب
وظل ابنها ابلا دفن فوك التراب
رادت تواسي ابنها بهالمصاب
ومأتم ابهذا المسه انسويله
====================
شيعوا نعش الماتت بنار البُعد
شيعوا نعش الضحت بأربع ولد
اليقــــره سيرتها دليله ينمرد
مصابها كـــون بدمه نبجيله
====================
حسن بشير السوداني
#نعي
مجاراة ام الوفاء روحي فداها
___1
الشيخ حيدر الحميداوي
•
يمه حان الموت والموت انتقال
بتسع اصابع غمض عيوني تعال
يمه مشتاكه اشوفك ياحسين
لهفة العطشان للماي الزلال
___2
تحسين الخفاجي
•
يمه حان الموت وانه بحيرتي
وياهو عد راسي يون بموتتي
عالجنازه اتصلي اريدك يبني كون
وانته والعباس تحضر دفنتي
___3
مهدي التقي
•
يُمّه حان الموت وإطبَگْت إلعِيُون
والجنازه إتريد ناس إيشَيّعون
خادِمَكتم و أُمكم و أُمّ البَنين
يا حُسَيْن الليلة ماتَتْ ما تِجُون ؟
___4
سيد محمد البعاج
•
يمه حان الموت شگ گبرك وگوم
وجيب عباس الوفي وطيب العلوم
مِدرِچه والغرب يمي يا حسين
ما يناسب ..اعتب عليكم والوم
___5
علي المشكوري
•
يمه حان الموت وگليبي عتب
يگلي عاده وجاريه عند العرب
بالمنازع تحضر احبابه اليموت
وانتي محد بين عليج اشعجب
___6
علي الشملاوي
•
يمه حان الموت جايمتى تجي
وانتكابل بالنعي ونشبع بجي
وزينب الحالي تنوح بهل مصاب
على طاري ام عون كاتلني الحجي
___7
احمد داوود
•
يمه حان الموت بالموت استراح
وجيب اخوك الشبعن بصدره الرماح
كون افتح عيني يمه بوجه اخوك
ذاك النخسفن على فراكه الصفاح
___8
صفاء الواسطي
•
يمة حان الموت يارية وجبد
كون الك جية تكلي ارد استعد
خلصت الشيله عكد بالانتظار
انة موتي اسبابة اكبرهن فكد
___9
حيدر الوائلي
•
يمه حان الموت وينك يالكفيل
متانيه وماغمضت عيني التسيل
من تجيني تلگه بگليبي جروح
السهم عينك يمه نايم بالدليل
#اللهم_عجل_لوليك_الفرج
انتي بـاب الله ومـلاذ الـحـائرين
وصـرتي عنـوان الكرم يأم البنين
مـضرب الأمـثال خـلاچ الجليل
وخدمتچ لحسين هذا اكبر دليل
اويالهوى صاحب المبدى مايميل
قدوه صرتي بكل عصر للمخلصين
انـتي بـاب الله ومــلاذ الـحـائرين
وكت ما قل الوفه وحيل انحسر
قـدميتي العـين ابـو الاكـبر درر
اچـفـوف الچ تاريخ كتبن عالنهر
هـمـچ وكـل غـايتچ نصرة الـدين
انـتي بـاب الله ومـلاذ الـحـائرين
هـواي فضلچ يتعب الرايد يعد
المجد يوگف من نذكرچ يستعد
ياهـي مـثـلـچ قدمت كل الــولد
وبقت تنشد خاف ولدي مقصرين
انـتي بـاب الله ومـلاذ الـحـائرين
روح مـاتـتوصف ابكـل الكلام
ونت ومنعدها اخـذ ونه الحمام
موعواطف تنعه دين وتنعه امام
هيچ يربطها العشك وي الحسين
انـتي بـاب الله ومـلاذ الـحـائرين
مـعنا للاخلاص والـحب والوفه
شـوگـها لحسين مـحـد يوصـفه
عـن درايـه وعـن تحدي ومعرفه
عن صمود وعن جهاد وعن يقين
انـتي بـاب الله ومـلاذ الـحـائرين
چـانت بـكـل مـغـربيه تنوح اله
اعـذرني مـامـسبـيه وي العائله
چـان حلمي وياك اموت ابكربله
أسف بعدك ضـاله اصفگ بالادين
انـتي بـاب الله ومـلاذ الـحـائرين
هـاني ناصـر السـعـيـدي
(تجليبه)
مــاعندي وفـه لوما بچت عيني
على ام البنين الكــلشي تنطيني
ــــــــــــــــــــــــــــــــــــــــــــــــ
هاي اللي بچت لحسین ومصابه
ارید ابچـي عليها بدمعه سچـابه
بالله شلون اوفي ام الوفه وبابه
للنذرت عمـــــــرهه ناذر اسنيني
ــــــــــــــــــــــــــــــــــــــــــــــــ
ماعندي وفه لـــوما بچيت الهه
التحضر شدتي وتفضها وتحلهه
الوفيه المــــا تقصر لمّن اسألهه
ديـــن الهه ابرگبتي آنه وبنيني
ــــــــــــــــــــــــــــــــــــــــــــــــ
سميّة فاطمه وابچي المصيبتهه
هاي الليله مطـــــروحه جنازتهه
اريدن بالحشر احظى بشفاعتهه
وام عبــاس تحضرني وتنجيني
ــــــــــــــــــــــــــــــــــــــــــــــــ
امغرگني فضلهه وبيش اجازيهه
اشمــا ســــويت ابداً ما اوافيهه
بسـم حسين احلفهه واحاچیهه
من امون اعليهه حاير ماتخليني
ــــــــــــــــــــــــــــــــــــــــــــــــ
ام عباس وام عبد الله وام جعفر
وام عثمـــــان اديهه تشبه الكوثر
امنريد اطلب طلب هيهات تتعذر
مثل عطشان من كوثرهه ترويني
ــــــــــــــــــــــــــــــــــــــــــــــــ
مناجاة الخـدم هالطاهـره صارت
وحرز للي عليه دنيا الغدر جـارت
اشعــاري بوصفها اختلت وحارت
المعروفه بوفاهه قبل تكويني
ــــــــــــــــــــــــــــــــــــــــــــــــ
يمته نشوف گبه ومنبر وحضره
ولطميه بصحنهه نلطم ونقـــره
سلام الله عله اللي خدمت الزهره
اون اعليهه ابد مايخلص اونيني
ــــــــــــــــــــــــــــــــــــــــــــــــ
ندعي الله الفرج للغايب المضطر
كل جمــــعه القدومه بلهفه نتنطر
جرحنه ايطيب يوم المنتظر يظهر
شما طال الهجـــر ناره تچويني
ــــــــــــــــــــــــــــــــــــــــــــــــ
حيدر بشار الدراجي
أم البنين- أم الوفة
ـــــــــــــــــــــ ١ ــــــــــــــــــــــ
دخيل احروفج ــــ يحرة حيدر
ثبت معروفــج ــــ يحرة حيــدر
ظمايه انطــوفج ــــ يحرة حيدر
تروي اجفوفج ــــ يحرة حـــيدر
يزغــــــر الكون والعيون دمعها ابابـــج
يعطش الماي يرجــــواي تفيض اعتابج
ليوصف ايحير ولاشاف خــيوط احجايج
أم البنين- أم الوفة
ــــــــــــــــــــ ٢ ـــــــــــــــــــــــ
زلـــــم ربــيتـي ــــ يا أم الكافل
اونـعم ضحيتي ــــ يا أم الكافل
أثـــر خــليـتــي ــــ يا أم الكافل
بعزم شــديتــي ــــ يا أم الكافل
تضحية اوزود بالحيــود تضحي الحره
بربع اولاد والاحفاد لشـــبل الــــزهره
فدوه لحسين تنادين واحس امقصره
أم البنين - أم الوفة
ــــــــــــــــــــــ ٣ ـــــــــــــــــــــ
وقــف للغالي ــــ نذرتي اسنــينج
لعـمر الوالـي ــــ نذرتي اسنينج
العشگ موخالي ـ نذرتي اسنينج
حسين العالي ــــ نذرتي اسنينج
العدها عباس للانفاس تـشـم بــــــترابه
اوتفرح اهواي وذا ماي يجي يـــــــم بابه
وانتي لحسين نذرتــي اوجميع احبـــــابه
أم البنين — ام الوفة
ــــــــــــــــــــــ ٤ ـــــــــــــــــــــ
عجـيـبة عصرج ـــ مره ماشايف
نذر كل عمرج ــــ مره ماشايف
مراجل عطرج ــــ مره ماشايف
اشيوصف گدرج ــــ مره ماشايف
همج حسين يرد كــون أمير اوسالم
عمرج ايروح بالجروح يحير اللايــــم
وابو السجاد إذا عاد فرحنــه الدايـــم
أم البنين— ام الوفة
ــــــــــــــــــــــ ٥ ـــــــــــــــــــــ
تواسي الزهره ــــ تصيح اوليدي
تنادي امقصره ــــ تصيح اوليدي
بالكلب الجمره ــــ تصيح اوليدي
اوتهمــل العـبره ــــ تصيح اوليدي
يمـــه الولاد يـالــبـعاد دليلي اتــفـــطر
لا تقصـــــرون يالعيون لـكلـب الكــــوثر
ظـــحوا الجفرف بالطفوف اوحته المنحر
أم البنين — ام الوفة
ـــــــــــــــــــــــــــــــــــــــــــ
الشاعر خالد جودي العارضي
نعي لمولاتي ام البنين عليها السلام
...............
كلولهم مربيه عيني
واليل اخلصنه بونيني
اتنطر اولادي التجيني
امهم واطالبهم ابديني
كلولهم تكتل الفركه
حتى النفس مابيه اشهگه
چف التربي ايريد حگه
دنياي احسهه اعليه خنگه
من گربت ليهه المنيه
صدت الصوب الغاضريه
عباس يبني الحك عليه
وسدني بيدك يالشفيه
عندي عله العباس عتبه
شلون الكمر يطيه كلبه
والله يكافل ضعنه صعبه
ضعن امك ايشيعونه غربه
ردتك تمر ويه اليشيعون
تحضر مماتي وتبجي العيون
تدرون بيه اليوم تدرون
مالي ولد ويه الايدفنون
خادم اهل البيت علي الزرگاني
السلام على ٠٠ ام البنين الطاهره
~~
الزاهده ام المكارم والوفه
عدها ويه حسين رتبة معرفه
الحره مانگدر وفاها انوصفه
حبر لو چان البحر هم ماكفه
السلام على ٠٠ نجمة القدس الزاهره
السلام على ٠٠ ام البنين الطاهره
~~
الباري من طين الوفه سوّاها
هالنفس حب الحسين أحياها
الفخر يسجد من يمر طرواها
على گد نيتها الله انطاها
السلام على ٠٠ رمز الكرم والمفخره
السلام على ٠٠ ام البنين الطاهره
~~
يا سلام الله على الجابت گمر
اعني راعي الجود عباس الفخر
صار للعطشان برياجه نهر
بطيحته حسين انكسر منه الظهر
السلام على ٠٠ چفوفه الغدت متبتّره
السلام على ٠٠ ام البنين الطاهره
~~
كون هاي الليله اروحن للبقيع
واجي الگبر الطاهره وحالي فجيع
اقسم اعليها بدمه النحر الگطيع
كون دمعاتي وخدمتي ماتضيع
السلام على ٠٠ باب المراد ومصدره
السلام على ٠٠ ام البنين الطاهره
~~
فاطمه عدها عهد وي فاطمه
للحسين تصير ام وخادمه
كون كل غالي بعمرها تقدمه
فدوه للمظلوم يوم الملحمه
السلام على ٠٠ ام الغياره الصابره
السلام على .. ام البنين الطاهره
~~
شگد كريمه التنطي لحسين اربعه
لون چانو الف هم متبرعه
كتبت بدم الگمر عالمشرعه
انذبح ياليتني كنتُ معه
السلام على ٠٠ الچانت تحس امقصره
السلام على .. ام البنين الطاهره
~~
حيدر بشار الدراجي
يا مهدينا يا مهدينا الله يعينك يا مهدينا
ــــــــــــــــــ
الله يعينك يا رجوانه
من حزنك يا راعي الوانه
تظلم بعيونك دنيانه
يالمهدي وروحك حزنانه
يا غالينا يا غالينا تهمل عينك يا غالينا
ــــــــــــــــــ
الله يعظم اجر مصابك
كل دمعه التنزل بنگابك
من وصلوا يالمهدي عتابك
يالغالي ومن حرگوا بابك
يا ولينا يا ولينا شمأذينك يا والينا
ــــــــــــــــــ
كل العالم بين جفوفك
وهمومك ما ترضى تعوفك
مولاي شگم دعوة تطوفك
يمتى الموعد يمتى نشوفك
يمدارينا يمدارينا أسوة بدينك يمدارينا
ــــــــــــــــــ
ضلع الزهره شسوة بقلبك
مولاي البسمار مصوبك
شيب راسك حيل متعبك
تثقل جدمك خطوة بدربك
جرحك وينه جرحك وينه يمصوبينك جرحك وينه
ــــــــــــــــــ
شيعت الزهرة وي الوالي
بالليل ودارك ظل خالي
جفنك بالدمعات يلالي
يكسر خاطر حال الغالي
حزنك بينه حزنك بينه طول سنينك حزنك بينه
ــــــــــــــــــ
تنظر زينب تجري الدمعة
تخمش قلبك ذيج الصفعة
وحسين بهم لازم ضلعه
وضلوعك تكسرها الدفعة
يا أبو سكينة يا أبو سكينة صوت وونينك يا أبو سكينة
ــــــــــــــــــ
الشاعر زين العابدين الشمري
متىٰ الفرج متىٰ الفرج يا عزيزَ فاطمة
ــــــــــــــــــ
حيل مشتاقين لك يبن الحسن
نار بينه وما طُفت من المِحن
من غيابك سيدي وما ظل وطن
والجرح مالحظة مولاي استچن
بلا وطن بلا وطن كلشي ضاع بنينوه
ـــــــــــــــــ
يا دمع يكفي ويحل المسألة
يا يتيم المثلك مودع هـله
منين تبدي بيا مُصيبة ومُعضلة
تبدي من الزهرة لو من كربلة
من يا جرح من يا جرح نازف ومن يا دمه
ــــــــــــــــــ
سيدي يا جمرة تِسعر بالقلب
ويا فگد يبن الحسن كلش صعُب
يا مسيح الزهرة روحك تنصلُب
بعد موت اهلك صفيت بنص غرُب
بلا أهل بلا أهل ماتوا أهل الغانمة
ــــــــــــــــــ
من البچي عيونك يمولاي انتهت
والجفون من المصيبة تقرحت
كلشي يگضي وبس رزيتك ما گضت
مو لحيتك حتى روحك شيبت
على الفگد على الفگد نفسك انته معلمة
ــــــــــــــــــ
يمتىٰ ثارك يبدي من بعد الصبُر
وِبفقارك سيدي يلوح النصُر
بالقصاص من الظلم وأهل الغدُر
وبيدك ترجع معالم كل قبُر
قبر أم حسن قبر أم حسن فقط انته التِعلمه
ــــــــــــــــــ
منهو مِثلك بالتعب قلبه نجرح
والحزن يا سيدي بعينك ذبح
كلشي غايب بس ألم روحك وضح
ضامي غربة بس دمع عينك طفح
دمِع نِزل دمِع نِزل جِفنك أغيوم السمه
ــــــــــــــــــ
يمتىٰ تظهر تأخذ بثار الضلع
وينتهي موسم جروحك والدمِع
چفك الخير اليغيُر كل وضع
وتسكت الدنيا وحنينك ينسمع
فلا صنم فلا صنم يبقى انته اتهدمة
ــــــــــــــــــ
قلب اليحبك تره بنار انجوة
يا حنين وشوفتك افضل دوه
خنگة يالمهدي وفقط انته الهوه
ظلمة يالمهدي وفقط انته الضوه
يا سيدي يا سيدي دنيا بعدك مظلمة
ــــــــــــــــــ
الشاعر زين العابدين الشمري
نسألكم الدعاء لتعجيل الفرج
بين مولاتي زينب ع والامام الهادي ع
يالهادي يا عمة .. هاك الحرگ شمة .. تارس عباتي
سامرة مو تلة .. الزنزانة مو هزلة .. وعثرت بناتي
——————-
للسجن جيتك يعمة و آنه عطشانة
تذكرت حايط خرابة الطاح فوگانة
عمة حتى الهوة هناكة عاند اويانة
بسندس اخضر ما ينام الذبحو اخوانة
يالهادي اسمع هاية .. فطرت گلبي حچاية
امشي بشور الحادي .. وانه امشي اعله الراية
ذبحوا گمر عيني .. الايده تمشيني .. ومأمنه يمة
صح السجن خنگة .. بس آنه محترگة .. وتحرگني نسمة
——————-
عمة شوف اتراب طفهم بعده بمتوني
عمة لو مگطوع راسي ولا يسبّوني
عمة شفت حسين يشهگ واطبگ جفوني
امن الذبح وحدها ادية ايسدن اعيوني
گطعوا رگبة راسة .. ومحد راح وباسة
وصلت روحي لراسي .. من الحافر داسة
هيچي ايدي عالحاجب .. وشفت البخت ذايب.. جوه الحوافر
ابن امي ما شوفة .. بس طارف اچفوفة .. چنهن مناير
—————-
عمة عباس ابو فاضل عينة ممرودة
ومن حَمار الدم يعمه مغرب اخدودة
گطع شريان الحياة الگطّع ازنودة
شگ سمة الله ولاح گلبي يا سهم جودة
والاصعب من ذني .. يمة وما يندلني
من دخان الخيمة.. زينب ما يشتمني
يالهادي ظل يسأل .. انتي مرة لو تل ؟ .. يمتربه اهواي
لون العباية احمر .. زينب بعيد الشر .. شسوالچ الماي
————————
عمة لون السجن يشبهه خيمة محترگة
والشمر سجان چان و ايدة والطگة
وماكو زلمة اتطگ حميتة يردة ويحگة
وابن الحسين النشبگة بسلسلة مشبگة
سجانك مو مثلة .. مُر امرورة دلة
عين وعمدة يهزها .. بس مو نخلة الهزلة
بدرب السبي الزلمة .. ينشف عرِگ دمة .. واجدامة تذبل
حتى الجبل ينطَر .. لو طفلة تتعثر .. كل عثرة مقتل
——————-
ما سبوها اختك حكيمة ولا يسبّوها
وزينب بچم شام يكتل عمة فروها
وانت ماعندك رقية بنحر كتلوها
وانت ما عندك سكِينة وجربة گطعوها
عمه الهادي اعذرني .. بس جدك كاسرني
محد يهدم زينب .. وحسين امطشرني
يا عمة بچيتّك .. و الوين وديتك .. بس هذا صاير
كل الحچي بصفحة .. بس نشغة الذبحة .. بنص گلبي حافر
—————————
علي هادي الخزعلي
#نعي
لشهادة الامام علي الهادي عليه السلام
وين الذي يطوي البعيده
علريح يعبر بيده بيده
ابگلب يلهب يسبج الريح
لهل الكلايف والشديده
يوگف على حدود المدينه
محروگ گلبة وحمره عينه
للساده حيهم حيهم ايصيح
مسموم هاديكم لگينه
وين اهل بيض ال بلحرايب
وين اهل طالب واهل غالب
اتمدد الهادي وغمظ العين
ومن ذاك سمه الچبد ذايب
حيهم اوين اهل المعالي
المن زودهم كل راس عالي
حاسر اجيت الراس هليوم
چي راسه حاسر علي الهادي
اتعنى للساده ابهل امصاب
ناعي المصيبه ابعتبة الباب
الكلفه عدكم ياال عدنان
باچر الهادي اتشييع الاجناب
امصاب وي حسين ينعاش
ميت الهادي وحدرى الافراش
بدم الجروح اتغسل حسين
وتچفنه ماصح وصلة اقماش
الحسن سد للهادي الاعيون
واعيالة فوگه ابراحه يبچون
وحسين فوگ اجروحه علگاع
مفتوحه عينه وبي يسحگون
غير اليموت اهله يجوله
واجهاز ميت يجهزوله
اكرام اليموت ادفنه العزاز
والگبر اهله اليحفروله
وحسين ثلث ايام عاري
مسلوب وبحر الصحاري
بس الجسد والرس برماح
وي الظعن يمشي ويباري
الشاعر علي الحميداوي الكربلائي
#اللهم_عجل_لوليك_الفرج
يا وجيهاً .. اتيهَن .. واحِير ابدونك
مالي غيرَك .. اعلَه خَيرك .. عِشِت مَمنونك
★★٭٭٭٭★★٭٭٭٭★★٭٭٭٭★★
الدنيا لو ضاگت عليّه والفَرَج سَد بابه
ما ادوّر غير وَجهك لا أَحَسْب احسابه
تسكن اوجاعي بحضرتك والهضُم واتعابه
وحتى لو مصيوب يمّك گلبي ينسه صوابه
يا مَلاذ الجِراحي ،، بسمك الگه ارتياحي
يكفي اگوله الهم يزوله ويمحي كل ضيج وعسر
الطرق كلهه عندي ،، الكربله بس توّدّي
وما عداهه يظل متاهه ولا نفع بي بل يضر
ياشفيعاً .. اضيعَن .. بدون عيونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
آنه شمقدملك آنه بَلّه شمضحيلك
غير ثوب اسود ودمعه وكل سنه أمشيلك
وانتّ المغطيني خيرك بيش اعد وابديلك
يا مْبَدّل سيّئاتي بحَسَنات ادخيلك
ذنوبي والله تِعثّر ،، و جُودك اعليّه يستر
وعن سوادي اللِي بفؤادي بعطفك تغض النظر
دمّي بيك ايتوّضّه ،، وگلبي الاسود تبيضه
روحي تطهر يا بو الاكبر تمحي ذنبي شما كُبَر
والله اعشگك .. واشهگك .. هَوَه لمَجنونك
مالِي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
من زَحام آلامي اغادر من ضجيج العالم
و اجفي كل شي ما يشبهك يا أعَز ابنادم
اتعب من الناس وامشي ارتاح وسْط الماتم
بغير اجواءك يروحي روحي ما تتوالم
من دُخان اليطبخون ،، لو غُبار اللِّي يمشون
ماكو اقرب لَيّه واطيَّب واغله من هذا العطر
يا جنون المشاعر ،، بچلمة اهلاً يزاير
من استمعهه يهل دمعهه عيني فرحانه شكثر
ما أخُونه .. أصُونه .. ملح ماعونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
من صِباي لحَد منيتي انت كل همومي
يا هَويتي ويا قضيتي يا صَلاتي وصَومي
اوياك اخلّص يومي وارجع ابدي بِسمك يومي
اوياك آني بخير عمري اوياك زينه علومي
في منامي ويقضتي ،، في سكوني ونبضتي
بالجوانِح بالجوارِح انتّ حاضر ما تغيب
اويه الدِمه تجري بيّه ،، والله يابو رُقيّه
انت صِيتي وانت بيتي وانه من دونك غريب
انتّ داري .. يداري .. بصدگ مفتونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
وداعتك ما يگضي يومي الإ وانت ابّالي
وما انامن ليلي اذا مو صورتك تبرالي
آني اذا مو انت عندي بدنيتي شيبقالي
(بأبِي أنتّ وأُمّي) وصحبتي وعيالي
بشِفْتي يسجد حنيني ،، وتغرگ بدمعي عيني
من اذكر اسمك وابقه اكلمك يا حبيبي يا حسين
هيّ هايه احلَه جمله ،، يا حبيبي والاحله
(نورَ عَيني) بكل يقيني ذني اصدق كلمتين
يا نهر حُب .. ضوه يصُب .. اعله اليحبونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
شماله ميجِن بيك عگلي وبِيك الِيجِن يكمَل
فطرة الوادم تحبّه السيفه بالعِز ينسَل
يالطِحِت منحور خاطر رايتك ما تنذل
وعالرمح مرفوع راسك آية الله رتّل
مفطّره برمحه شِفته ،، ورتلَت ﴿أم حَسِبْتَ﴾
ماهي عِجبه ولا هي صَعبه قصّة اصحاب الكهف
قصة الطف الاعجب ،، بيهه مسبيه زينب
تروح اميره تعود اسيره وهيّ بِت والي النجف
شما بِچيتك .. ونِعيتك .. اظل مديونك
مالي غيرك .. اعله خيرك .. عشت ممنونك
★★٭٭٭٭★★٭٭٭٭★★٭٭٭٭★★
ياسر حسن
انا لله. مات الهادي
انا لله. كلها اتنادي
بيش ايطلبونه. ليش ايسمونه
**
نعه الناعي بألم والوادم التمت
والشيعه بحزنها اعله النعش ركضت
عكبك ضعنه نادت وبالم ونت
وسامره برحيلك سيدي انفجعت
اتنوح لأيتام وتبجي ابابه
اتنوح الأيتام. لجل امصابه
بدمعه يودعونه. ليش ايسمونه
**
ناح العسكري وتوله تغسيله
وصله اعليه وجروحه تتجيله
يبجي والملائك كلها تبجيله
راح يشيل نعشه ونهدم حيله
من التعذيب. ازرگ جسمه
من التعذيب. ينزف دمه
غمضها عيونه. ليش ايسمونه
****
الهادي بالسجن كضاها كل عمره
ويصلي صلاة الليل بالحفره
ومن الصوط ما يكدر يكض ضهره
امكيد والسلاسل حارت بأمره
سجن الهادي. وسجن الكاظم
سجن الهادي. بامر الظالم
يخضع يردونه. ليش يسمونه
**
اظلم سجنه والسجان فوكه يحوم
وحته من الهوه ومن الشمس محروم
الإمام الهادي يا شيعه اشكثر مظلوم
مثل الكاظم الهادي رحل مسموم
محد يكدر. جان يزوره
محد يكدر. يحجب نوره
وتغير لونه. ليش يسمونه
***
اشلون المعتز اعله الهادي يتعده
وركن الدين كله بفعلته هده
الإمام اسبلها ايده والجفن سده
وبداره كضه نحبه وبقه الوحده
عاش بغربه. ومات بغربه
عاش بغربه. وحسره كلبه
اشلون يظلمونه. ليش يسمونه
***
تمت
تحسين الخفاجي
لجمتني السنين مومثل الحسين
محد حركَ خيماتي ولاركَضن ابنياتي
مومثل الحسين
،،،،،،،،،،،،،،،،،،،،،،
انه علي الهادي عشت كل هاي الاحزان
لوماتت الشجره بعد شيضل بالغصان
انه طحت بس موذبح لاجسمي عريان
ومعروف ماعنده اهل الماعنده دفان
انه جدي طاح عاري وراسه مكَطوع
فوكَ صدره شكَد حوافر تهشم الضلوع
من المكَفه مذبوح . وبجسمه الجروح
وفوك الضعن عماتي ولاركَضن بنياتي
مومثل الحسين
،،،،،،،،،،،،،،،،،،،،،،،،،
مايعرف الضحكه تره الكل عمره ملجوم
اللاچمني موسم الجبد ولا هاي الهموم
لاجمني جدي بنينوى فوكَه العده تحوم
لو ذنبه لازم ينذبح شمسويه الهدوم
شنهي ذنبه الثوب بالله وهيج ينباكَ
هاي لچمه شكَد ثكَيله بطعم الفراكَ
يذبحونه عطشان . وفوكَاها عريان
صار الدمع طعناتي ولاركَضن بنياتي
مومثل الحسين
،،،،،،،،،،،،،،،،،،،،،،،،،،،
انه ابن ذيج الخيم ويالتسمع الصوت
يغسلونه ويلفه الجفن معروفه اليموت
بس اليطيح ابكربله مايلكَه تابوت
وطفاله بين اهل القرى متجتفه تفوت
بيه حسرات عالسبيات بدمعي الهواي
انه عمتي ليش ضلت ابعازت الماي
اتذكر اجروح . من كَلبي متروح
بروحي اطلعت شيباتي ولاركَضن بنياتي
مومثل الحسين
،،،،،،،،،،،،،،،،،،،،،،،،،
حسراتي وحزان الكَلب ماتكَضي بشلون
وشيباتي المغطيه الرمش تاكل بالعيون
جسمي انه من سم الجبد ازركَ يشوفون
جن عمتي من ذاك الحجر الزوركَها المتون
شلون عمتي الشام دخلت وذيج الحجار
شلون تشكف وجان جفها منجوي ابنار
ياحسرت النوكَ . ويالخدها محروكَ
ماتنحصي حسراتي ولاركَضن بنياتي
مومثل الحسين
،،،،،،،،،،،،،،،،،،،،،،،،،،،،
بفراشي متوسد اسف وعرف بالحسين
عريان ومغطي الجسم أرماد الصواوين
والصوط بمتون الحرم تارك نياشين
وبعيونهن صارن دمه مو دمعه بالعين
شاب كَلبي وراح صبري وانه ملجوم
العاش عمره يسيل دمعه يضييع النوم
عميانه العيون . بالغربه تدرون
تعجز بعد جلماتي ولاركَضن بنياتي
مومثل الحسين
ابوفايز الرافضي
انتَ المُعزى سَيدي .. يا أبا الفضل
...
عظم الله اجرك بهاي المسية
البيها نحيي مجلس الطيبة الوفية
الليلة ليلة من ليالي الغاضرية
وبالثرى تُدفن مره گد الثرية
تموت ابحزنها السرمدي .. يا أبا الفضل
انتَ المعزى سَيدي .. يا أبا الفضل
...
الليلة نذكر طاهرة ضحت بنيها
ومو دمع لازم دمة نبچي عليها
من الطم لحسين تعبانه اديها
والله ياعلم ياجروح تعيش بيها
يخلص حزنها ويبتدي .. يا أبا الفضل
انت المعزى سيدي .. يا أبا الفضل
...
ماتت وعاشت على چفوف الحيارة
الله خلاها فرج للماله چارة
وداعتك يا حيد لو عدها منارة
بسمك الها افواج تمشي بكل زيارة
عليها دمعنا يزل نديّ .. يا أبا الفضل
انتَ المعزى سَيدي .. يا أبا الفضل
...
اكرام اليموت التراب عليه نهله
لچن اكرام الغريب ابشوفت اهله
تموت امك واجده واعليك ثكله
واليعيش ابلا اهل بالدنية شله
جرح اليفارگ ابدي .. يا أبا الفضل
انتَ المعزى سَيدي .. يا أبا الفضل
...
ماتت وكلما تصد للماي تنحب
وتركض على الباب لو يمه الهوى هب
ابزينب اتواسي جمرها الچان يلهب
شحالها لمن ترد للشام زينب
يرجعوها لديار الردي .. يا أبا الفضل
انتَ المعزى سَيدي .. يا أبا الفضل
...
كل املها النعش بچفوفك تشيلة
يمن چفك وحده ينقاس ابقبيلة
نختصرها بجملة قصتها الطويلة
هيه ( غير حسين ماعدها وسيلة )
ابهاي الوفية نقتدي .. يا أبا الفضل
انتَ المعزى سَيدي .. يا أبا الفضل
حسن ميثاق الربيعي
السيده ام البنين عليها السلام
يحاديهم صحت تاني مَتانه
يون الگلب وايهوِّد متى أنَّه
يَمُوت الخَذِت كل غالي مَتى آنه
تاخذني واشوف اعزاز اليه
سيد علي الموسوي
الى ام البنين ع
مو بعيد الموت عني ساعه ويچفنوني
نلتقي يم الزچيه يالعميت عيوني
واحسيناه واحسيناه
****
راح اموت وعيني حمره نعمه هاي امن الإلاه
انه مبخوته وبچيتك يبني هذا اعظم بلاء
الزهره من تسالني عينچ ليش متروسه دماء
بكل فخر اوگف وگلها عمت عيني كربلاء
كون حمره دموعي تبقه وابد ميغسلوني
نلتقي يم الزچيه يالعميت عيوني
واحسيناه واحسيناه
****
بكل وكت يحسين انته حچايتي وموضوعي
اي لطمت اهواي بعدك وما هجعلك روعي
لا تظن لجلك يغالي تشفي صدري دموعي
هوه لو جائز وحگك كسريت اضلوعي
انه من اسنين ميته بس بقه يدفنوني
نلتقي يم الزچيه يالعميت عيوني
واحسيناه واحسيناه
****
يبني ما مر ليل بيه اله وانه اعله الترب
خذت من البيت كلشي چا بعد المن اطب
الديره انته الماهو بيها مايها ما ينشرب
لا هواها اليطب ريه ولا يدگ بيها الگلب
سلني حيل افراگك انته إخفيفه لو شيعوني
نلتقي يم الزچيه يالعميت عيوني
واحسيناه واحسيناه
****
حيل اخاف الباب اسده وابد ما سديته
حتى عطرك من يسبگك ما يتيه بيته
اگبال بابي دموعي كلها وچم اثر خليته
ورمش عيني الشاب كله عالارض طشيته
ايست تاليها وادري خيبيت اضنوني
نلتقي يم الزچيه يالعميت عيوني
واحسيناه واحسيناه
****
اهنانه لو بالجنه يبني ابچي الك متعلمه
كلمن بجرحه يسولف انه وامك فاطمه
انه راح الزم قميصك إلبعده يتگاطر دمه
وامك بچفين تلطم عله ضلوع امهشمه
ذني چفين ابو فاضل ابني بي فجعوني
نلتقي يم الزچيه يالعميت عيوني
واحسيناه واحسيناه
****
للخلگ ماكو خفايه اهناكه كلشي يتضح
نلتقي وادري اشوفك توه چنك منذبح
بالحشر كلشي يغالي بيك حتماً ينجرح
شنهو يبني بصدرك الگه سهم لو نابت رمح
بدالك انته يبو اليمه وسف ما ذبحوني
نلتقي يم الزچيه يالعميت عيوني
واحسيناه واحسيناه
****
الشاعر اياد الديراوي
٣١٥- ام الوفاء
آنه ام البنين ودهري ذبني
حگي لو صحت يحسين يبني
فگد الاربعه ايهون ٠٠ وحسين السباني *
ـــــــــــــــــــــــــــــ
مافكِّر بولدي وذيچ الحیود
بس حسين ظل ابالي موجود
صوره بوسط العيون ٠٠ وافراگه دهاني
ـــــــــــــــــــــــــــــ
ربّيت اربعه من اجل الحسين
دين برگبتي وما وفّي هالدين
اشيسوه العمر من دون ٠٠ ظِل زهرة زماني
ـــــــــــــــــــــــــــــ
امامي وسيدي ولازم اطيعه
وامه فاطمه الزهره الشفيعه
وبالمحشر يوقعون ٠٠ منجاي وضماني
ـــــــــــــــــــــــــــــ
ولدي الاربعه ايشبهون ابوهم
مذخوين للطف وي اخوهم
وبدمهم يفسرون ٠٠ اسرار ومعاني
ـــــــــــــــــــــــــــــ
لو ينعاد عشر اضعاف عمري
تبقى دمعتي لحسين تجري
ويبقه بگلبي چانون ٠٠ اصرخ لو چواني
ـــــــــــــــــــــــــــــ
گالولي ذبيح انچتل عثمان
گلتلهم حسین انچتل عطشان
عاري وبي يسحگون ٠٠ وهدم كل كياني
ـــــــــــــــــــــــــــــ
گالو طاح عبد الله اعله وجهه
گلت حسین ما واحد يشبهه
يبچي المذبحه الكون ٠٠ والسبع المثاني
ـــــــــــــــــــــــــــــ
گالو جعفر اتگطع بالرماح
گلت حسین صاعد صدره ذباح
وبراسه يهوسون ٠٠ احس وانه بمچاني
ـــــــــــــــــــــــــــــ
گالولي الگمر مگطوع الچفوف
وگلبي اعله الغريب حسين ملهوف
اعليه ذوّبت الجفون ٠٠ والمدمع عمّاني
ـــــــــــــــــــــــــــــ
عشت اسنين عمري وامنياتي
ابو السجاد يحضرني بوفاتي
ويمشي اويه اليشيعون ٠٠ ابني الماله ثاني
ـــــــــــــــــــــــــــــ
تمنيت النعش هوّه يشيله
واتراب الگبر بيده يهيله
ابن الكون فيكون ٠٠ غاب وما أجاني
ـــــــــــــــــــــــــــــ
فراس المحمداوي
١٢ جمادى الآخرة ١٤٤٧ هـ
* المستهل من التراث للشاعر المرحوم كاظم منظور الكربلائي
(ام البنين عليها السلام)
~
ماتت والخبر ياهو يِشيعه
ونعشها امناطر اليحظر يشيعه
واسو المرتضى الليله يشيعه
وابو فاضل واخوته اهل الحميه
~
خذاها الموت بالغربه وجه الها
وگلب كل شيعي هاليله وج الها
الوفيه الباري وقّرها وجلها
وصفت باب الحوائج للبريه
~
الدمعه الليله أرخّصها وهلها
وعله ام الاربعه حزني وهلها
ماتت والنعش وحده وهلها
بعيدين وبعيده الغاضريه
~
حيدر بشار الدراجي
نعي مفجع
اتــريــد دفـان غــيـر الـتـربـي اتـريــد دفـان
موياهو الچان ايشيل النعش موياهو الچان
العدهه ولـيـان هذا التـريـده العدهـه ولـيـان
بگلبي نـيشـان خلوا يـويـلـي بگلبي نـيشـان
الكلهـم احـنـان بعـدو علـيّـه الكلهـم احـنـان
چنه الاجـل حان چاوينهم چنه الأجـل حـان
اشبول عدنان خلونـي وحـدي اشبول عدنان
لوعندي جنحان للطف رحت لوعندي جنحان
وتخف الاحزان انسـه التعب وتخف الاحزان
وعليه مـاهـان طـال الـبُـعــد وعليه مـاهـان
*------------------------*----------------*
✍خادم ام البنين ع
الشاعر رعد الجريخي
هاي ام الاربعه امشيعينهه
ولبو فاضل جنهه صدت عينهه
.....................................
گرب من عدهه الاجل وعيونهه
تدمع وما تحجي الايحاجونهه
اتريد من ربتهم ايحضرونهه
ام وفه واليوم تطلب دينهه
.....................................
عينهه اتصد للخلك محتاره
والگلب تلهب يوادم ناره
يبني يا عباس شنهي الچاره
اتريدك الضحت عليك اسنينهه
.......................................
گرب منهه الموت والناظر يصب
اتدير عين ام البنين اعله اليطب
ترضه يا عباس الاتشيع غرب
رحتو عنهه وعدمن امخلينهه
.........................................
رحتو عنهه وحيل طولتو السفر
ضلمه دنياهه وتريدك يالگمر
جفك ايوسدهه من حل القدر
چلمة اليمه التزيد اونينهه
.........................................
عينهه غمضت ابساعة موتهه
تحجي لا جن ما تفرزن صوتهه
الموت حل اوشيعو تابوتهه
وللگبر يالكافل امودينهه
......................................
نعش يمشي وماله وادم نايحه
المات غير اولاده ياهو الجارحه
وين ابو فاضل ينصب الفاتحه
وكربله تحضر اله ابصوبينهه
خادم اهل البيت علي الزرگاني
بـت مـحـمـد يلتـريـد اخبارها
أسـال الباب اشعـمل بسمارها
=========================
أسـال الباب ويخـبـرك علجـره
ويا أعظام اهناك تبگه امكسره
منهي يا بـاب العصرتي يا مـره
هاي مصباح الهده من انوارها
=========================
نار شبت واعتلت نـار الحـقـد
واعله دار الطاهـره الوادم تهد
بيت طـــه هـذا يابيت المجد
جازته ألگــــوم اللعينه بنارها
=========================
بيت طه مهبط امـلاك الـسـمـه
بيت تسبيح الوحي وسر فاطمه
شلون باب الـدار يمليها الدمـه
من فعل رجس العرب واشرارها
=========================
شلون خـــدها يلطم بت الرسل
شلون يجراء دفــــع باب النـذل
اصيـح يافـظـه گـرب مني الاجل
سنديني ودمـها حــدر اكتارها
=========================
سگــط محسن منها محـنـيـة ظهر
بشوغه صاحت فظه والگلب انفطر
ياجـمـــر دلالها بـيـهـا اسـتـعـر
جـــرعت بـچـــاس المنيه أمرارها
=========================
ليش حــيـدر مافــزع سـر الجليل
وليش ماخـلــه العده دمـها يسيل
وليش سيفه ما شهر حامي الدخيل
ام ابيها الـزهـــره بـيـهـا اسـرارهـا
=========================
✍️عباس مالك آل عفريت
نسألكم الدعاء
أُمّاه كَلِميني /// أنا حَبيبُكِ الحُسين
//////////////١
الدنيه من دونج طعم ما بيهه يمه
راح اخلصهه بجي وهضمه اعله هضمه
يالمشيتي وعفتي هاي اسنيني ضلمه
بعد ياهو اشكيله همي وياهو اكلمه
أُمّاه كَلِميني /// قَلبي لكِ دامٍ حَزين
أُمّاه كَلِميني /// أنا حَبيبُكِ الحُسين
/////////////////٢
يمه فتحي العين اليه وهودي نوحي
جرح فكَـدج عندي اشد من كل جروحي
اصغير عمري وفاركَـيتج بعد روحي
بيدي لو صح جان كَـتلج لا تروحي
أُمّاه كَلِميني /// لا ترحلي لا ترحلين
أُمّاه كَلِميني /// أنا حَبيبُكِ الحُسين
///////////////////٣
لا تعوفيني اعله بختج يالزجيه
عمري بعدج يخلص ابدمعه جريه
كلشي بيه ايريدج اتضلين اليه
روحي متعوده اعله شوفج مو بديه
أُمّاه كَلِميني /// يبّقى نِداءُ الفَاقِدين
أُمّاه كَلِميني /// أنا حَبيبُكِ الحُسين
///////////////٤
لليتم عفتيني يا زهرة زماني
وشوف منج يمه ما شبعان أني
اشلون اصبر العين يالفكَـدج عماني
ياهو اليعوض مكانج يا حناني
أُمّاه كَلِميني /// لِفقّدكِ يعلو الأنين
أُمّاه كَلِميني /// أنا حَبيبُكِ الحُسين
///////////////////٥
التموت امه بعد شله بحياته
سنينه يكَـضيهه سهر وي نايباته
كلشي منه ما يضل بس ذكرياته
الماتت امه ايموت كل يوم بصلاته
أُمّاه كَلِميني /// يا قِبلةً للعاشقين
أُمّاه كَلِميني /// أنا حَبيبُكِ الحُسين
////////////////٦
حسينج انه ابعازتج يا يمه باجر
من اضل الوحّدي من غير ناصر
رايد اتحضريني بدموع النواضر
اتلملمين اضلوعي من تحت الحوافر
أُمّاه كَلِميني//// لِجمّعَتي هلّ تحّضرين
أُمّاه كَلِميني /// أنا حَبيبُكِ الحُسين
=========____=========
✍️🏻 كلمات #موسى_الخادم ٢٠٢٥
چفوف الدهر لضلوعي لونها
وبلوان الدمه ايامي لونها
مصايب صبت اعلينه لونها
انصبت عالنهار اختلف ضيه
~
حيدر بشار الدراجي