-
✍🏻علي نوري الحلفي في أشعار رثاء ومديح أهل البيت عليهم السلام
مقطع صوتي من ... (لقد عجّل الله الفرج)
Читать полностью…
مقطع صوتي من ... لقد عجّل الله الفرج
Читать полностью…
مقطع صوتي من ... لقد عجّل الله الفرج
Читать полностью…
قصيدة (ملمع) في ذكرى استشهاد الإمام العظيم(محمد الجواد) عليه الصلاة والسلام.. (النصوص من وزن التجليبة)
.
.
مُصَابُ الجَوَادِ .. أدمَىٰ فُؤادِ
وَ قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،
1/
يهل بيت النبوه و مهبط الرحمه
يهل بيت الكتاب ومعدن الحكمه
عدوكم غِيره ما يملك و لا ذمّه
ولا حـرمه يـراعـون النبي الامّه
تَجُورُ الأيَادِي .. بِخَيرِ العِبَادِ
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،،
2/
بحزن وبلوعه جينه انجدد الذكرى
و كل عين ابدمعها للنبي اتخبره
شكثر وصيت بالعتره يبو العتره
لچن ما رحمت الأمة بني الزهره
فالجُرحُ بادِ .. و هُدَّ عِمادِ
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،،،،
3/
انت المعرفه و الكل عِلم منجم
و كـل عالم عـلومه مـنك اتـعلـم
وليك بهاي يشهد يحيى بن أكثم
يوم إلي تخورس هوه و تلعثم
عُلُومُ الرَشَادِ .. وَ لِلحَقِ هَادِي
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،،،
4/
من يوم السـقيفه الفاجعة بـغداد
غدر بأهل النبي ويّه الجواد انعاد
أمة و بالظلم فـاقت ثـمود و عـاد
واليومك نشوف اموارث الاحقاد
مِنْ قَومِ عَادِ .. تَجُورُ الأعَادِي
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،،،
5/
بثلاث امصايب انت شابهت لحسين
ثـلاث أيـام لا تـغسيل لا تـچـفيـن
ومحروم العذب هم يابسه الشفتين
وعشـت الغـربه لكن يالجواد سنين
وَ بَابِ المراد .. تَنْعَىٰ تُنادِي
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،،،
6/
السمه اظلمت عليه وهب عجاج الكون
وحـده بالغـرب يـگـضي الجـواد شلون
هـــاي الأمــة مـو ابــن النـبـي يـدرون
عـجـب للـهادي ذمّـه الأمـه مايـرعون
ويَبقَىٰ حِدادِ .. بِثَوبِ السَوادِ
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،،
7/
طـالـت غـيـبـتـك بـالشـدّه يـالغـايـب
الفـرج يـمـتـه يـا نـاصـر بـنـي غـالـب
يمـته تـجهز اجيـوشك على النـاصـب
و ثارك تنطره اعيون آل أبو طالب
طَالَ التَمَادِي .. بِجَورِ الأعادِي
و قَلبِي يُنادِي
يا للمُصَابْ .. بِعُمرِ الشَبَابْ
،،،،،،،،،،،،،،،،،،،،،،،،،،،،،
✍🏻علي نوري الحلفي
نهنئ الإمام الحجة المهدي عليه السلام والعلماء الأعلام والأمة الإسلامية بذكرى ولادة الإمام الثامن الضامن علي بن موسى الرضا عليه السلام
☀
🌟
ثامن أنوار الجلاله .. نوره عالدنيه تلاله
والشمس خجلانه لمّن شاهدت نوره وجماله
.....................................
١/
نوره من شعشع .. بالعرش يسطع
نورت ارض وسما لوح وقلم من نوره
كوكب اطيوفه .. كلمن ايشوفه
بالجلال الطالبي عين الخلگ مبهوره
و ابخبر عاجل .. كل ملك نازل
و البشاره ابهل ولادة عمّت المعموره
من بزغ لينه هلاله .. عالنبي صلوا و آله
والشمس خجلانه لمّن شاهدت نوره وجماله
.....................................
٢/
انهني للكاظم .. انبارك الفاطم
والنبي وحيدر علي بيه اكتمل افراحه
نوره شع وبان .. يشبه القرآن
وجنة الله بهل مسى بعطر الرضا فواحه
سلسبيل الله .. ياعظيم الجاه
رف علينه بمولده طير السعد بجناحه
والگلب صوته ايتعاله .. یشكر الباري تعالى
والشمس خجلانه لمّن شاهدت نوره وجماله
.....................................
٣/
گلب احبابه .. ناره لهّابه
والمحب من الفرح تارس شمع بدروبه
و اليعذلونه .. ما يهمونه
ما يلومونه الذي ذاب بعشگ محبوبه
يا هلا صحنه .. بضامن الجنه
جنة الله الشيعته بصك الرضا مكتوبه
والكرم أعظم خصاله .. ماحصل واحد مثاله
والشمس خجلانه لمّن شاهدت نوره وجماله
.....................................
٤/
صوبك انظاري .. وبيدي أزهاري
گتله يا طير السعد اخذ الگلب لهناكه
وصّله المشهد .. طوّفه المرقد
واليزور الله جعل خدامه من أملاكه
بحاجتك گلّه .. عالرضا سهله
بالزچیه حلّفه لمّن تكض شباكه
بهالقسَم كلمن اجاله .. الحاجه يگضيها ابعُجاله
والشمس خجلانه لمّن شاهدت نوره وجماله
.....................................
٥/
دعبل الشاعر .. بجيته اتفاخر
و الهديه جُبّتك بيها أفتخر للتالي
و آنه اتنطر .. يا ابن حيدر
هناكه في يوم الحشر من الخطر تبرالي
فاز من والاك .. خاب من عاداك
ابولائك يالرضا يا سيدي هنيالي
ونختتم هاي الرساله .. بتهنئة أشرف سلاله
والشمس خجلانه لمّن شاهدت نوره وجماله
.....................................
✍🏻علي نوري الحلفي
١/ ذي القعدة ... ذكرى ميلاد السيدة العظيمة فاطمة المعصومة عليها السلام 🌹🌸
بسمه بشفاف الگمر مرسومه
بذكرى مولد فاطمه المعصومه
هنوا والدها .. بذكرى مولدها
..............................................
١/
فاطمه المن فاطمه الزهره الزچيه
كل علمها وحته اسمها وكل سجيه
هبّت اعلينا نسايم فاطميه
احلى من عطر الجنان الكوثريه
وهج من نور القداسه البيها
الجنه تزهي بس تصد اعليها
تزهي من عدها .. بذكرى مولدها
..............................................
٢/
شعت ابيت الولايه جذوة النور
وكل جلال الله ابمهدها يطوف ويدور
هنت الكاظم ملايك الله و الحور
ياس و شموع ابإديها وشاعله بخور
خلي نترك كل حزن هالليله
نهني أبوها الكاظم ونمشيله
الداره نگصدها .. بذكرى مولدها
..............................................
٣/
فاطمه المعصومه هيه ونسل الأطياب
مثل زينب أصبحت للعفه محراب
الباري چن ما كوناها من التراب
حتى كل چلمه بحچیها لابسه حجاب
والنعم بنت الزجيه و حيدره
تربية عفه و كرامه و مفخره
الباري أيدها .. بذكرى مولدها
..............................................
٤/
شهر ذي القعده الگلب جمعت فرحته
ذكرى ميلاد الرضا ومعصومه اخته
المشهد و قم الگلب صارت لهفته
جنة الله ويا بخت من زار جنته
الزهره مرقدها الذي ما زاره
البتها خلّي تتجه انظاره
يزهي مرقدها .. بذكرى مولدها
..............................................
٥/
الي ما زار الزجيه وما حظى بنظره
الفاطمه المعصومه خلّي يگصد بعبره
الجواد ايگول عنها و افهم الفكره
(الزار عمتي فاطمه فالجنه أجره)
والصادق ايأكد حديثه ابقوله
للشيعه تشفع فاطمه مجعوله
و بالرضا انشدها .. بذكرى مولدها
..............................................
٦/
فاطمه يا فاطمه يا بنت موسى
المهدي يمته للنصر تشرق شموسه
الباطل بجدم المراجل من ندوسه
تمسي رايات الضلاله بزوده منكوسه
انتي عمته و تعرفين امچانه
وصلي سلام بهالمسه المولانه
الك كل ودها .. بذكرى مولدها
..............................................
تمت القصيدة بحمد الله وتوفيقه
(أحاديث في فضل السيد المعصومة)
عن الإمام الصادق عليه السلام :
«ستدْفنُ فيها – أي: في قم- امرأَةٌ من ولدي تُسمَّى فاطمةَ بنت موسى يدخل الشيعة الجنةبشفاعتها».
وفي رواية أخرى أنّ زيارتها تعادل الجنة
وروي عن الإمام الرضا عليه السلام أنه قال:
«من زارها كمن زارني».
وعنه أيضا: « من زارها فله الجنة ».
وروي عن الإمام الجواد عليه السلام أنّه قال:
« من زار قبر عمتي بقم عارفا بحقها فله الجنة ».
🔮🚩🔮🚩🔮🚩🔮
✍🏻كلمات
علي نوري الحلفي
ذكرى تهديم مراقد أهل البيت عليهم السلام في أرض البقيع الغرقد سنة ١٩٢٥ على يد زمرة ضالة مضلة وحكام ظلمة كانوا ولا زالوا يظلمون اقدس خلق الله.
.
. القصيدة نزلة
يمته نحضركم ..... بالعزه يمكم
ونلتقي بأرض البقيع
نلتقي بأرض البقيع
......................................
١/
كل محب شوگه یتلاهب والگلب يسعر جمر
للمدينه يمتى نگصد نحضر الذاك الگبر
نصبر اشگد يا إلهي و الله تعبنه الهجر
والحسن مهدوم گبره امنين اجيبنه الصبر
ربي سائلته ..... نصبر اليمته
ونلتقي بأرض البقيع
نلتقي بأرض البقيع
......................................
٢/
فرگة الأحباب جمره نصبر عليها صعب
واليفارگ گبر إمامه منه ما يهده الگلب
يمته يا رب بالمدينه هالمآتم تنصب
ردنه مشايه نجيها و المواکب بالدرب
بگلبي الناطق ..... أقره للصادق
ونلتقي بأرض البقيع
نلتقي بأرض البقيع
......................................
٣/
لا ضريح ولا مناره من مكايدهم سلم
وإلي گبره بس حجاره یعني محسوب بعدم
و البقيع الهدموها و إلي حارگها الخيم
هو تاريخك مكرر و الحرگ نفسه الهدم
والحسن گبره ..... نحضر انعمره
ونلتقي بأرض البقيع
نلتقي بأرض البقيع
......................................
٤/
تنادي أم عباس بينه والجفن دم مدمعه
يمته اشوفنكم يشيعه يم ليمه الأربعه
الحسن والباقر چبدهم بالسموم مگطعه
و هذا سجاد الأيمه برگبته هالجامعه
ريته مجلسهم ..... ينصب يمهم
ونلتقي بأرض البقيع
نلتقي بأرض البقيع
......................................
٥/
هاي دنيانه بحقدها ظالمه الكل طالبي
بين مذبوح و حوافر بين آهات السبي
بين جمرات المخيم نار و تاكل بالعبي
والنواصب همه همه ما رعوا آل النبي
الناصبه انگلهم ..... ثار نطلبهم
ونلتقي بأرض البقيع
نلتقي بأرض البقيع
......................................
٦/
من ظلم آل النبوه الناصبه ما ظن ترد
لمن مكة و المدينه بيد مولانه ترد
والزچيه اشتاگتنه يمها مجلس ينعقد
ونذكر العباس ضحّه الزينب ابعين و زند
كافل الحره ...... فاطمه تشكره
ونلتقي بأرض البقيع
نلتقي بأرض البقيع
......................................
٧/
ننتظر مهدينه يومه والوعد كلش قرب
وفدك ترجع للزچیه ويه كل حگ انغصب
و ترتفع أربع مناير بالذهب و أربع قبب
للظلم لابد نهايه والله عالظالم غِضب
بالنصر يحدي ..... موكب المهدي
ونلتقي بأرض البقيع
نلتقي بأرض البقيع
......................................
✍🏻خادم البقيع
علي نوري الحلفي
نبارك للإمام الحجة المهدي عليه السلام والعلماء الاعلام والأمة الإسلامية بذكرى مولد عمه الإمام الحسن الزكي المجتبى عليه السلام.
🌸
🌹
هل ربيع الفرحه يا دنيانه
و الفرح بسم الحسن عنوانه
...............
١/
هل ربيع الفرحه من أرض المدينه
شعت أنوار الولايه من ولينه
المجتبى بنور الجلاله امتوجينه
چنه كوكب دري لمّن هل علينه
و رفّت اطيور السعد بسمانه
و الفرح بسم الحسن عنوانه
...............
٢/
ياحِسن وجه الحَسن شع المسيه
قدّمه الباري هديه للزچیه
أنبياء الله بأمر رب البريه
تحيي هاي الليله يم طه ووصيه
الكل نبي انت أصل وجدانه
و الفرح بسم الحسن عنوانه
...............
٣/
بمنتصف رمضان شعّن لينه بدرين
بالسمه واحد يشع و الثاني للدين
شعّت أنوار الإمامة ع الموالين
صلّوا عالهادي النبي وآله الميامين
صلّوا عالهادي النبي رجوانه
و الفرح بسم الحسن عنوانه
...............
٤/
نزلت أفواج الملايك هيه و الحور
شايله صواني الشموع وشاعله بخور
استأذنت من فاطمه للمجتبى تزور
رايده من نور وجهه تقتبس نور
نورك اهوَ الباري عظّم شانه
و الفرح بسم الحسن عنوانه
...............
٥/
كلمن يشاهد جمال الحسن لحظه
صاح سبحان الخلق جنه إعلى أرضه
جنة الرضوان اسمه من تلفظه
حتى ماي الكوثر ابنوره ايتوضه
سبحان ربنه الكوّنه سبحانه
و الفرح بسم الحسن عنوانه
...............
٦/
الليله نور المجتبى عالدنيه أزهر
يحگ للشيعي بولائك دوم يفخر
خل تأيّس هالعدى اعلينه متگدر
ناقش أسمك سيدي بشرياني الأبهر
وكل محب أنت نبض شريانه
و الفرح بسم الحسن عنوانه
...............
٧/
يمته نحضر للبقيع و نبني سورك
وننظر إعلى الگبّه يسطع بيها نورك
انحلّفه كلمن يجي ليك و يزورك
يدعي يا مهدينا عجّل في ظهورك
طالت أيام البُعد مولانه
و الفرح بسم الحسن عنوانه
...............
✍🏻 علي نوري الحلفي
مقطع صوتي من ... لقد عجّل الله الفرج
Читать полностью…
مقطع صوتي من ... لقد عجّل الله الفرج
Читать полностью…
ذكرى رحيل كافل رسول الله صلى الله عليه وآله عمه ابو طالب عليه السلام.. على طور ((قصيدة..اكطع الكلام)) باسم الكربلائي.. وما تجي بغير طور.
.
.
كافل اليتيم.. ابجوار الهادي منزلته ومقامه
والد العظيم.. حيدر الكرار نبراس الإمامه
و المحمد .. انت مسند
يابو طالب ~~~~~~~~
١/
هالحديث التحفظه كل المسامع
طاها لليكفل يتيم يكون شافع
مجلسه قرب النبي بأعلى المواقع
مثل هاتين وجمع بين الأصابع
و بهل منقبه .. باعلى مرتبه
ويه أهل العبا .. يا أبوطالب
كافل الرسول.. بغضاً ابطاها النبي عادوا كفيله
عمها للبتول.. هوايه منزلتك عظيمة مو قليله
و المحمد .. انت مسند
يابو طالب ~~~~~~~~
٢/
ثابت اسلامك يبو العتره الأماجد
ما ينكرك بس ترى ناصب معاند
بعّدوك و انت و الله أول مجاهد
و خلّوا الحارب نبينه هو قائد
ياوسفه العده .. تبقى حاقده
كل زين تبعّده .. و ليه تحارب
ميت الضمير.. كلمن يعادي الشرف وأهل الحميه
لكن البصير.. ما يهمه شما يگولون آل أميه
و المحمد .. انت مسند
يابو طالب ~~~~~~~~
٣/
ثابت اسلامك يبو العتره الأكارم
و الّي نكروا تضحياتك مو أوادم
نعرف الضدّوك يا سيد الهواشم
همّه اتباع الّي أسلم عالغنائم
ياوالد حيدره .. والضدك ترى
زمره غادره .. بالأطايب
تشوفه مستحيل.. عن أبو سفيان يتوجّه حچیهم
هذا و بدليل.. كل حچیهم بس على كافل نبيهم
و المحمد .. انت مسند
يابو طالب ~~~~~~~~
٤/
چنت بالغار ويه طه لو تعبّد
انت گلبك للنبي خليته مرقد
واجهت زمرة قريش و أنت مفرد
وما وصل جور القبائل ضد محمد
موقف للشرف .. بس بيك انعرف
بالغيره انوصف .. بالمصاعب
بگلبك الجروح.. تدري دار الندوه عالهادي يتآمر
هالغدر يروح.. ما ينفذون بوجودك ما تقرّر
و المحمد .. انت مسند
يابو طالب ~~~~~~~~
٥/
الكتبوا التاريخ ندري كلها ظلّام
يكتبون شما يگلهم حاكم الشام
بعّدوا كافل نبينه وحامي الإسلام
و الّي شردوا بالمعارك همّه حكّام
يا والد علي .. يا نعم الولي
المثلك مبتلي .. بالنواصب
ثابت اليقين.. ما يهمّه كل قلم ضدك يحاول
شما تمر سنين.. عالمنابر نبقى ننشرلك فضائل
و المحمد .. انت مسند
يابو طالب ~~~~~~~~
٦/
چنت تحمي المصطفى من زمرة الشر
ابن اخوك اتنيمه و اعليه تسهر
و لون حسّيت بخطوره تحذر أكثر
و ابفراشه تخلّي جعفر مرّه حيدر
روحك بالوفه .. تنكط عاطفه
لجل المصطفى .. هذا واجب
بگلبك الغيور.. يا محمد گتله لا تهاب الأعادي
دونك النحور.. بزود عمك ما تصل ليك الأيادي
و المحمد .. انت مسند
يابو طالب ~~~~~~~~
٧/
يعلنه عام الحزن طه بمماتك
انت لوما مؤمن شتعني وفاتك
يلّي للدين اوهبت مجمل حياتك
حاشا ننسى يابو طالب تضحياتك
يبقى بكل فكر .. ذكرك ينتشر
وبسمك تفتخر .. هالمناقب
أقسم بالچفوف.. أي لون شمس وقمر ينطوها ليّه
و الله ما اعوف.. يا ابو طالب ذكرك وضلع الزچیه
و المحمد .. انت مسند
يابو طالب ~~~~~~~~
🔸️( عادي الي يشيل الإضافات بين النصوص وما بين الرجوع للمستهل)
مثل/ يبقى بكل فكر .. ذكرك ينتشر ... الخ .
✍🏻 علي نوري الحلفي
اللهم عجّل لوليك الفرج والنصر و آنس وحدته و صِل غربته و أرحم دمعته ..
👑
🌸🌹
كل صباح وكل مسيه .. أرتقب جيتك عليه
عجّل اظهورك يمهدي .. بجاه مولاتي الزچيه
......................................
١/
انطر اهلالك يهل🌙و يلتم وياك الشمل
يبن الوديعه
والهوى لمّن يهب .. منهو وياه ارتقب
حامي الشريعه
بغيبتك يبن الهدى .. اتحكمت بينه العده
وأهل الخديعه
ساوموا گلبي البعض .. گلبي جاوب من رفض
لا ما نبيعه
ما نساوم للمنيه .. مانبيع احنه القضيه
عجّل اظهورك يمهدي .. بجاه مولاتي الزچيه
......................................
٢/
منّك امتاني الامل .. بلهفة الفاگد أهل
يشكي الظليمه
طالت أيام البُعد .. وغايبي لمّن يرد
محفل اقيمه
گلبي بفراگه انفطر .. مثل گاع بلا مطر
واتاني غيمه
لو متت هم ما أهم .. ترد روحي من أشم
هبّة نسيمه
يل چفوفك كوثريه .. يل رحمتك يوسفيه
عجّل اظهورك يمهدي .. بجاه مولاتي الزچيه
......................................
٣/
يوسف انت تُعتبر .. ذب قميصك عالدهر
وانشر عبيره
حتى تنزاح الحُجب .. حتى عميان الگلب
ترجع بصيره
كلشي محتاجك هوه .. الظلمه تحتاجك ضوه
يل ماكو غيره
سيدي يبن الحسن .. بجيتك هذا الزمن
يرجع ضميره
يلّي روحك هاشميه .. كلها رحمه فاطميه
عجّل اظهورك يمهدي .. بجاه مولاتي الزچيه
......................................
٤/
يمته اشوفنك فجر .. تزيح ليلي المستمر
طلعة صباحه
يمته اشوفنك شمس .. تمسح آلام الأمس
تشفي جراحه
يمته اشوفنك علم .. ينهي مأساة الأمم
عدله وصلاحه
يمته اشوفن كل بلد .. تحتفي وطير السعد
رف ابجناحه
يل دولتك عالميه .. و رحمة الله للبريه
عجّل اظهورك يمهدي .. بجاه مولاتي الزچيه
......................................
٥/
مِر علينه لو حلم .. بدونك انعاني اليتم
گلي شيجرعه
بنتظارك هالگلب .. عينه بعيون الدرب
شايله شمعه🕯
كبّر ابجفني الدمع .. شنهو اگله ويقتنع
وبيش اقنعه
الدمه اليفتر بالجسد .. دوَّر اعليك ونشد
والصوت اسمعه
يلّي تحكم بالسويه .. وبالعداله الحيدريه
عجّل اظهورك يمهدي .. بجاه مولاتي الزچيه
......................................
٦/
جمعه جمعه ارتجي .. خبر من عندك يجي
وتحط رحالك
والنبض بيك ارتبط .. بالگلب نزلت فقط
آية جلالك
نورك القدسي انبلج ..گلبي بالفرحه ابتهج
هام بجمالك
زادت الدنيه ألق .. الباري بسمك من نطق
شعشع هلالك
جنة الباري العليّه .. بذكرى ميلادك زهيه
عجّل اظهورك يمهدي .. بجاه مولاتي الزچيه
......................................
مسموح لمن أراد الاختصار
✍🏻علي نوري الحلفي
.
.
مقطع صوتي من ... لقد عجّل الله الفرج
Читать полностью…
(مولانا يا صاحب الزمان )
🌹
🌸
تنطرك.. أحبابك _ أحبابك _ أحبابك
طوّلت.. بغيابك _ بغيابك _ بغيابك
يا مهدي يا مهدي
١/
كل محب هالليله شايل بيده شمعه
ويا إلهي لو دعا مهدينه رجعه
من تمر الجمعه يأمل غير جمعه
يسعى بين الحرمين ابأغلى دمعه
وبالدعا.. يتوسل _ يتأمل _ يتعجّل
هالفرج.. بيد الرب _ والمطلب _ يتقرب
يا مهدي يا مهدي
__
٢/
بيك يالمهدي الگلب ثابت يقينه
والعده طول الدهر محتاره بينه
لكن اغيابك يعز و الله علينه
بلايه سفّان البحر ياذي السفينه
وأنت بس.. نشكيلك _ نحچیلك _ نأويلك
من الزمن.. و أشراره _وأخطاره _ بأحراره
يا مهدي يا مهدي
__
٣/
خمسطعش شعبان يتجدد أملنه
الدنيه ضاگت سيدي وبس انت حلنه
نرتقب كل ساعه ساعه ترجعلنه
دون أنوارك فلا يلتم شملنه
يا ابونه.. الغالي _ و الوالي _ للتالي
انت بس..رجوانه _ ومولانه _ التهوانه
يا مهدي يا مهدي
__
٤/
شما تطوّل مُدتك مولانا نصبر
لابد أنوارك تجي و عالدنيه تِزهر
شمعه شايل كل موالي وليك ينطر
الشمعه تعني عن صِدق حبّه يعبّر
حبي لك.. عالفطره_ بالفكره _امن الزهره
واهدي الك.. أشعاري _ أذكاري _ أزهاري
يا مهدي يا مهدي
__
٥/
بمنتصف شعبان ربنا النورك أشرق
و بالشهاده الثالثه بالسانك أنطق
الليله وعد الباري للهادي ايتحقق
الليله ستر الباطل بنورك تمزق
والوعد.. هالليله _ تأويله _ تنزيله
والباري.. دز جبريله_ يناغليه_ بترتيله
يا مهدي يا مهدي
__
٦/
الليله يم العسكري جموع الملايك
بهل الفرح للهادي وي حيدر تشارك
نزلت الحور المسيه من الأرائك
و بزهور الجنه للزهره تبارك
وبصواني.. الحنه _ من الجنه _ تتعنه
والحفل.. متأسس_يم نرجس_هالمجلس
يا مهدي يا مهدي
__
٧/
امشرّعه هاليوم أبواب السماوات
و المحافل قائمه بكل المجرات
ودّعت دلالي بجناح الفراشات
وأبعث المولاتي نرجس هاي الأبيات
ردت من.. مولاتي_بدعواتي _ حاجاتي
أن تطهّر.. گلبي _ ياربي _ من ذنبي
يا مهدي يا مهدي
__
تمت بحمد الله
✍🏻علي نوري الحلفي
مقطع صوتي من لقد عجّل الله الفرج
Читать полностью…
قصيدة فصيحة لعيد الغدير الأغر عيد الله الأكبر يوم تنصيب مولانا الإمام علي عليه السلام أميراً للمؤمنين. 🌹🌸
.
.
أشرَقَتْ شَمسُ الغَديرِ
حيدر ٌ صار َ أميري
قالَها الرَبُّ العَلي
بايعُوا المَولى عَلي
.....................................
١/
قَالَها اللهُ لخيرِ المُرسَلين
بلِسان ٍ عَربي ٍ و مُبين
بايعُوا الكرارَ من بعدِ النبي
حبُهُ فوزٌ لكم بالنشأتين
هوَ للهادي البشيرِ
حيدرٌ خيرُ وَزيرِي
هو ذَا الحقُ الجَلي
بايُعوا المَولى عَلي
.....................................
٢/
بلِّغِ القومَ ولا تَخشى ارتِياب
بيعةُ الكرارِ للجنَّاتِ بَاب
بلِّغِ الأمرَ وما يُوحَى إليَك
في عليٍ قد أتَى نصُ الكتَاب
مَن أقرَّ بالإمامَه
فازَ حقاً في القيامَه
كلُ كربٍ ينجَلي
بايُعوا المَولى عَلي
.....................................
٣/
مَن أنا مَولىً لهُ فَالمُرتضَى
هوَ المَولى بَعدي واللهُ ارتضَى
ليسَ لي مِن أمرهِ أيُ إختِيار
إنَّما للهِ أمرٌ قَد قَضَى
بايعوه ُ بالوَلايه
حيدرٌ نورُ الهدَايه
رَبي سَّماهُ الوَلي
بايُعوا المَولى عَلي
.....................................
٤/
في عليٍ قالُوا نَصاً هَل أتَى ؟
في عليٍ قُلتُ جائَتْ هَل أتَى ..
خبيرٌ سَلهَا و سَل ما قَبلها
أينَ صوتُ الوَحي صاحَ لافَتَى
لاسِواهُ في الحُروبِ
دافعاً كلَ الكُرُوبِ
صوتُ حقٍ يعتَلي
بايعُوا المَولى عَلي
.....................................
٥/
أُُكملَ الدينُ بتتويجِ الإمَام
فازَ مَن والاهُ فِي خيرِ مُقام
عَشِقَتْ روحُ المُوالي نَهجَهُ
رَبي فَثَبِّتها على نَهجِ الكِرام
فَعَليٌ نبضُ قَلبي
يشهدُ الرحمنُ رَبي
نبضُ قَلبي قالَ لِي
بايُعوا المَولى عَلي
.....................................
٦/
هذهِ شمسُ الولاءَ أشرَقَتْ
بِضياها للوصِي بايَعَتْ
هذهِ الأملاكُ والحورُ مَعاً
بايعتهُ و الجِنانُ ابتسَمَتْ
قُلتُها والكونُ سَامِع
أولٌ لا ليسَ رَابِع
صوتُ كلِ عاقِلي
بايُعوا المَولى عَلي
.....................................
٧/ (بيت شعبي)
ربي وبجاه الوصي ويوم الولاء
ربي زيل من الأرض هذا الوباء
ونسألك يا ربي تعجيل الظهور
بجاه زينب تستجيب الهل دعاء
بالغدير انطينه بيعه
تبقى للمهدي ونطيعه
وبالرغم من عاذلي
بايُعوا المَولى عَلي
.....................................
✍🏻 علي نوري الحلفي
(و سدَّ الأبوابَ إلا بابه) (٢)
الى مولاتي فاطمة العليلة عليها السلام وهي تخاطب أباها بدمع الأسى...
.
.
أدري ما ترجع إليّه
ولا تجي خوله و رقيه
و آنه صارلتي اخت هاي الرزيه
..............................
(١)
جروح وفراگ وألم كتبتلي الأقدار
وعينه ما تغفى الذي دمعاته مدرار
ما يردّون اعرفتهم أهلي الأطهار
وشيردها من تطيح أوراق الأشجار
عمري مايخلص خريفه
شكثر آذتنه السقيفه
لنها من عدها ابتدت بينه الأذيه
و آنه صارلتي اخت هاي الرزيه
..............................
(٢)
بويه طيحني الكدر من ثگل المصاب
مثل طيحت فاطمه يم عتبة الباب
دمعتي صارت وضوئي وجرحي محراب
و على الحيطان استند بفراگ الأطياب
امشي وايدي اعله ضلوعي
و ليلي ما يعرف هجوعي
و گوه اوگف للصلاة بكل مسيه
و آنه صارلتي اخت هاي الرزيه
..............................
(٣)
كل غريبه الّي تظل بلا أبوها
الضيم والهم والزمن يستضعفوها
و آنه أهلي أدري بتهم ما نسوها
لكن الأقدار فرضت يتركوها
بلا إخوتي وحشه بيتي
شيسوه عمري بلا إخوتي
ايخيّم بگلبي الأسى كل مغربيه
و آنه صارلتي اخت هاي الرزيه
..............................
(٤)
هنا رقيه هنا سَكينه هنانه خوله
هنا جماعه حسين ابونه بينه صله
هنانه زينب گعدتي وياها تحله
هنانه عبد الله اناغيله و احمله
هواي عذبني رحيله
و آنه من فرگاه عليله
من خذوه چنهم خذوا روحي من اديه
و آنه صارلتي اخت هاي الرزيه
..............................
(٥)
لمّن القبر النبي اسمعتك تودعه
اعرفت هالسفره روحه بلايه رجعه
والذي يمشي ويحط ايده اعله ضلعه
يعني همه البل گلب صعبه يجرعه
شگد تمنيت آنه يمك
حتى أزيل جروح همك
لأن من تنظرلي تذكر للزچیه
و آنه صارلتي اخت هاي الرزيه
..............................
(٦)
أدري ما ترجع بعد گلبي يگلّي
وجسمي من فرگاك صاير چنه ظلّي
ايسبّح بروحي القهر واحزاني خلّي
غبت يهلالي وصحت يدموعي هلّي
حسين يا نور العوالم
بعدك شيجري اعله فاطم
اليجري ليكم بالغرب يجري عليه
و آنه صارلتي اخت هاي الرزيه
..............................
(٧)
امودّع الله يل مشيت من المدينه
اعليك مسجد النبي اسمع أنينه
بأمر رباني مشيت بهل الضعينه
يحفظك بارينه يلّي احفظت دينه
بويه ادعيلي بصلاتك
بعيني تبقى ذكرياتك
ولآخر أنفاسي الك انصب عزيه
و آنه صارلتي اخت هاي الرزيه
..............................
✍🏻علي نوري الحلفي
ذكرى استشهاد الإمام العظيم محمد الباقر عليه السلام في ٧ / ذي الحجة الحرام ..
🏴
🚩
ساهره بعينك طفوف .. والأجل فوگك يطوف
چم رزيه .. وچم سبيه ..
تذكر بيوم المنيه
.............................
1/
أبد ما يگطع نحيبه كلمن بعينه خيام
امهلني ساعه الموت گتله رايد انحب عالإمام
اذكرت حال اليتامه الفروا و چنهم حمام
وصعب زينب تلگه طفله لمّن ايحل الظلام
سمعت انواعي وونين .. اتجهت الصوب الحسين
اشغلتي بالي .. وكل سؤالي ..
وين انتي يا رقيه
.............................
2/
سيدي ومولاي انشدك عن سياط الظالمين
عن سَكينه بيا رزيه و ظلّت بلايه الحُسين
انت چان زغير عمرك منهو يحميها ويعين
و الخيم نيران تسعر تتجه يا وسفه وين
دارت اعليها الخيول .. روعوا بنت الرسول
بهالسلاسل .. هل الأراذل ..
چتّفوا بنت الزچیه
.............................
3/
سيدي الماي التشوفه شنهو بحساسك يصير
إعلى عمّاتك تعاين لو على احسينك تدير
اتفطّرت چبده و دليله وهو بعياله يحير
وعلى صدره الخيل عشره داسته ابحر الهجير
وانت بهمومك تلوع .. وتستمع طگ الضلوع
ويمه تنحب .. اخته زينب ..
خويه راح أصبح سبيه
.............................
4/
سيدي وموﻻي انشدك عالسبي وعن البلاء
شلون صعدن عالهزايل حرم سيد الأنبياء
لون يسّترن بديهن هذا هم أكبر عناء
لابد ايطيّح اديهن ضرب سوط الأدعياء
آ يزينب والعذاب .. اشسوه بيها هالمصاب ..
وهي كافل .. بالأرامل
و الكفلها ظل رميه
.............................
5/
يا إمامي علمتنه عالرثاء و عالدموع
علمته شلون ننعى و ابد ما نعرف هجوع
آخر أنفاسك توصي وانت مسموم و تلوع
گلت لاتنسون جدي وفاطمه وكسر الضلوع
لمّن المحسن يطيح .. يعني عبد الله ذبيح
والعجيبه .. بهالمصيبه ..
راحت الزهره ضحيه
.............................
✍🏻علي نوري الحلفي
ذكرى استشهاد الإمام (محمد الجواد عليه السلام) المصادف في اخر ذي القعدة الحرام
🏴🏴🏴
يا جـواد العتره يا باب السمـاء
احنه ماننسى مصابك والعـزاء
.....................................
ما نسـينـه ولا ينـسينـه الدهـر
احنه وفّايـه لحـد گطـع النحـر
تشهدنـه حـادثـة ضلـع انكسـر
ما نسينه و رغم ما يجري بلاء
.....................................
نـبـقـى للـزهـراء نـوفـي بـالـعهد
شما بقى الطغيان والظلم استبد
نـبـقـى نـتـوارث عـزاكـم للأبـد
وباقـي بالأجيـال تاريـخ الوفـاء
.....................................
ضحت الأولاد كـلـهـم فـاطـمـه
الهل عقيـده حتـى تبقى قـائـمـه
كل مـوالـي صـدره لـمّـن يلـطـمـه
يواسي عترة طه و الضحوا دماء
.....................................
من علي الكرار و امصاب الحسن
والحُسين اضلوعه كلها اتـهشمـن
و يا نسـاء الهاشميـه إلي نسبـن
ما سـبقـكم يا بنـي هاشـم فـداء
.....................................
ويا جـواد العتره هم ما قصـرت
كـل شبـابـك لجـل دينـك قدمـت
الدين جدك سيدي شگد اخدمت
و شـكثـر هـالأمـه راوتـك عنـاء
.....................................
اخدمت هالدين و بتسعـه العمر
بصـدرك اعلـوم النبوه من الزغر
وابـن أكثـم يسكت أهو مـنجبـر
ما دروا شخصك وريث الأنبياء
.....................................
دروا لـكــن ظــلــوا ابـخبــث النـفـس
بيكم يصب جوره كل طاغي ورجـس
المـعـتـصـم و بـيـا ذنـب للسـم يـدس
و عاونـتـه الظالـمـه بـهـذا الـدهاء
.....................................
مرمي يا مولاي وحدك عالسطـح
و أصبح الإسلام ينزف چم جرح
شابهت جدك احسين المنذبـح
وصـارت أرض الكاظميه كربـلاء
.....................................
صايم و عطشان و السم الجرى
و بـثـلاث تيـام مـرمـي بالعـرى
لچن صدرك باقي سالم عالثـرى
ما أظـن سحگته خيل الأدعياء
.....................................
✍🏻 علي نوري الحلفي
.
.
(١٩/ ٢/ ١٩٩٩.. المصادف ٤/ ذي القعدة إغتيال الشمس)
في ذكرى اغتيال السيد الصدر رحمه الله
.🏴
. 🚩
انتفض صوت العقيده
كلا للطاغي و عبيده
سلك منهج فاطمه
و للشرع ينطي الدمه
انتفض صوت العقيده
........................................
١/
من عگب جور الزمان و ظلم السنين
قرر البعث و زمرته يقضي عالدين
خوف و تنوح الجوامع ع المصلين
وحكمه إعدام الذي يلطم على حسين
لچن صوت ابن الزچیـه
صاح كلا يا أميه
نهج للحق نرسمه
و للشرع ينطي الدمه
انتفض صوت العقيده
........................................
٢/
بلحيته البيضه كأن نوح ابزمانه
ومسجد الكوفه السفينه الها دعانه
عصى موسى بيده من الله أمانه
حتى يفلق كل بحر لاهل الخيانه
چلمة الحگ من نطقها
صاعقة ويرهب برقها
على الزمره الظالمه
و للشرع ينطي الدمه
انتفض صوت العقيده
........................................
٣/
صوت كلا رجّف الطاغي و رجاله
ذكّرانه ابمنطلق عهد الرساله
ارتدى بزود الچفن وبكل بساله
وخطبة الجمعه سلاحه ع الضلاله
وگفته ضد الطواغيت
بكل قصر تزرع توابيت
روحه ع الحگ عازمه
و للشرع ينطي الدمه
انتفض صوت العقيده
........................................
٤/
منبر الجمعه حياه ابكل جراءه
وخلّه روحه ع المحك قرر فداءه
مثل وگفات الحُسين ابكربلاءه
وگفته ذلّت الطاغي و كبرياءه
منتفض لاجل الشريعه
حتماً اتنصره الوديعه
انطتّه حُسن الخاتمه
و للشرع ينطي الدمه
انتفض صوت العقيده
........................................
٥/
الجمعه تتنطر صلاته ساعه ساعه
چن (علي) تتذكّره يأم الجماعه
بغضاً ابمريكا و أصحاب الإشاعه
الكل مراجعنا نقدمها الإطاعه
و الحشد شاهد عَلينه
بكل مراجعنا عِلينه
الحشد نعمه من السمه
و للشرع ينطي الدمه
انتفض صوت العقيده
........................................
تمت بحمد الله
✍🏻علي نوري الحلفي
البيت الي بي (امريكا) ممكن تغيره إلى ..
(( بغضاً بكل العده و أهل الاشاعه )) ولو انا افضل الأول .. لانها🇺🇸رمز الشر العالمي 👋🏼 وتحياتي
في ذكرى استشهاد مولانا الإمام جعفر الصادق عليه السلام ..
.
.
هايه مو أمة نبينه .. آذوا الهادي ابنينه
عالم ومعصوم جعفر بن محمد
ليش بالسم و الغدر چبده تمرّد ؟!
........................................
١/
عالم وعلمه تفايض على الدنيه بكل عصر
و دين طه اعلى ثباته يقدم الجعفر شكر
اعلوم عنده ما بلغها حتى موسى والخضر
والوصل لينه من علومه فقط معشار العشر
بحر مايخلص عطاءه .. نجم أوحد في سماءه
من مفاخر أمة الإسلام ينعد
ليش بالسم والغدر چبده تمرّد ؟!
........................................
٢/
فقه وأخلاق وعقيده وكل علم ثبّت أسس
فلسفه وطب ومعارف بالنحو ينطي درس
من أعدد راح أحدد ومايُحد ضي الشمس
و مالكيه و شافعيه من علومه تقتبس
كل علم ثبت أصوله .. و المذاهب يشهدوله
چان ميدان العلم بس يمّه محتد
ليش بالسم و الغدر چبده تمرّد ؟
........................................
٣/
بحوزته الأسسها جعفر ماتجد موطئ قدم
كثره طلابه و حديثه ينشرونه ع الأمم
عن زراره والمُفضل عن هشام ابن الحكم
وابن حيان اعني جابر صار للعالم عَلم
محد إيجاري فضلهم .. من الصادق كل علمهم
وكل حديث الي یگوله من جده مُسند
ليش بالسم و الغدر چبده تمرّد ؟!
........................................
٤/
لو رجعنه الإسم جعفر شنهو يعني هاللفظ
يعني اسمه نهر جاري المنّه تتروه الأرض
ابدون أهل العلم و الله ماكو أمه تنتهض
واحنه هالأمه تسمهم وتحمل اعليهم بغض
گطّعوا چبده ابعداهم .. إلي رادلهم عُلاهم
من أجل هالأمه ضيم اشگد تكبّد
ليش بالسم و الغدر چبده تمرّد ؟!
........................................
٥/
مو شرط إبليس يغوي إبليس تلگه من البشر
الذي يغدر إمامه هذا شنهو يعتبر ؟
قاتل الصادق نعرفه لون أمعنه النظر
قاتل الزهره الزچيه ابچتلت الصادق أمر
داره حرگوها وقبلها .. باب وخيام الشعلها
چف حقد من السقيفه عالصادق امتد
ليش بالسم و الغدر چبده تمرّد ؟!
........................................
٦/
المثل جعفر بن محمد ينجعل وسط الگلب
مو يعيش بغربه عمره وتالي مدفون بغرب
مرمروا آخر حياته واليشوفه شگد صعب
و بالبقيع الآن گبره ياهو يگدر ليه يطب
هدموا گبره النواصب .. بثاره منهو الي يطالب
هاا يمهدي هالعمل يطلّب الرد
ليش بالسم و الغدر چبده تمرّد ؟!
........................................
٧/
عالشعيره الحسينيه چان للصادق سعي
هواي اكّد ع الشعائر حتى يزداد الوعي
ايگل لبو هارون انعي خلّي اجري مدمعي
ابطريقة حزن اقره وصوت آهات النعي
بالعراقي ايگله اقره .. الطور هذا كله عَبره
وجمرة الطف لايكن فد يوم تبرد
ليش بالسم و الغدر چبده تمرّد ؟!
........................................
_(لماذا أحرقوا بيت الإمام الصادق ؟)_🔥
يااعظم و اعز واشرف .. واجل بيت
الدهر ليش بحقد ناره .. وج البيت🔥
السقيفه شجابت اعليكم.. وجلبيت
وراثة نار من نار الزچيه
✍🏻علي نوري الحلفي
🌹💖🌼💝🌺🦋🦚⚘
🎇🎄✨🎊🎁🎉💫💥
محفل ابجنة عدن ... ذكرى ميلاد الحسن
و ابتهج كل الزمن
يا مولاي ............. يا مولاي
.......................
١/
للسماء السابعه گلبي عرج
شاف ويه الزهره هالكون ابتهج
بمنتصف رمضان شنهو هالوهج
هذا نور المجتبى ضوّه المهج
لا شمال ولا شرق ... يسمو نورك عالأفق
مولدك أحيى السنن
و ابتهج كل الزمن
يا مولاي ............. يا مولاي ~~~
٢/
طلّة إجلالك عظيمه و مُشرقه
يل جمالك قدسي محد سابقه
جنة الباري ابجمالك مُحدقه
مانلوم اعليها لجلك عاشقه
ابنور وجهك هالجنان ... فيها خيراتٌ حِسان
و الحواري يباركن
و ابتهج كل الزمن
يا مولاي ............. يا مولاي ~~~
٣/
حبّك بأنفاسي مولاي انغرس
و لوما حبّك ما يطاوعني النفس
ابوجوده الكون من نورك قبس
ظلمه گلبي ومن ضياءك إلتمس
گلبي منك يستنير ... کونك إعليه تشير
كل جروحي يشتفن
و ابتهج كل الزمن
يا مولاي ............. يا مولاي ~~~
٤/
انت يا نهج النبي و دستوره
تبقى دارك بالكرم معموره
هالدهر و شما يزيد ابجوره
للكرم متلاطمات ابحوره
وينه حاتم و الكرم ... وانت بن سيد الأمم
للفقير انت الوطن
و ابتهج كل الزمن
يا مولاي ............. يا مولاي ~~~
٥/
ربي أدعي بكل خضوع الرحمتك
خلني للموت أتبعهم عترتك
مو طمع لا يا إلهي بجنتك
ردت أحظى بالخدامه الزهرتك
و اليوالي الطاهرين .. ذلكَ الفوز المبين
للگلب حبهم سكن
و ابتهج كل الزمن
يا مولاي ............. يا مولاي ~~~
كلمات
علي نوري الحلفي
مقطع صوتي من ... لقد عجّل الله الفرج
Читать полностью…
١٠/ شهر رمضان/ وفاة السيدة الأولى في الإسلام مولاتنا خديجة روح النبي صلى الله عليه و آله..
.
.
يا ملاذ المصطفى بأصعب ظروفه
وللنبي بكلشي فديتي
ما حصل جرح الگلب واحد يروفه
وين عفتيه و مشيتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
١/
من رحلتي صابت الإسلام ضيجه
مو سهوله تشتفي اجروح الغميجه
و الورد بعدچ فقد طيبة أريجه
اسودّت الدنيه بمحمد يا خديجه
انتي يا درع الشدد لله و رسوله
عفتي بيتچ ما دريتي
الدار عكبچ عالنبي يصعب دخوله
و انتي ويا ما بقيتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
٢/
اگبال افضالچ وجوب اندنگ الهام
اقسم و لوما وجودچ ماكو إسلام
عليچ وسفه مايُسلط زخم الإعلام
و إلي تالي أسلموا سووهم أعلام
ما يذكرونچ لأن أم الزچیه
وللنبي بروحچ حميتي
وما سجدتي لأي صنم بالجاهليه
و فقط للباري دعيتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
٣/
والله كل عثرة جدم بالصعده للغار
تسوه كل واحد اجه من تالي والصار
لسه بتراب الجبل من جدمچ آثار
يلي من أجل الرسالة عشتي الأخطار
شما تخططلچ قريش بكل تآمر
موقفچ ما غيريتي
ومن يعاني المصطفى فقد المناصر
بنصرته ما قصريتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
٤/
خل قريش تقاطعچ واتجاوز الحد
و شكثر گلبچ غدر منهم تكبّد
گلتي چلمه و موقفچ بيها تخلّد
مو مهم گلتي المهم عندي محمد
كل عزيز وغالي يرخص كلشي دونه
وانتي كفّيتي و وفيتي
و اليوافي الدِين ما نوفي ديونه
يلّي بالنفس افتديتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
٥/
انتي مو بس للعقيده ابذلتي أموال
انتي وفّرتي المحمد راحة البال
يلتجئلچ من همومه و قهر الرجال
وصرتي قدوه للنساء بكل الأجيال
بكل حياة الهادي تبقى ذكرياتچ
يلي مالحظه اشتكيتي
و نصرة ً للدين وقّفتي حياتچ
و بالعقول اتخلديتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
٦/
شحال طه من اجت ليچ المنيه
يا شريكة عمره بايام الأذيه
سيدة مكة انتي يا أم الزچيه
انتي ضحيتي بوجودج للقضيه
گلتي يل الهادي تچفنّي بردائك
لون تحضرني منيتي
يالنبي وآخر طلب واعرف وفائك
بفاطمه الزهره وصيتي
وا ويلاه يا أم الزچیه .. وا ويلاه
،،،،،،،،،،،،،،،،،،،،،،،،،،،،،،
(جائز لمن أراد الإختصار)
✍🏻 علي نوري الحلفي
مقطع صوتي من ... لقد عجّل الله الفرج
Читать полностью…
(نهنئ الإمام الحسين عليه السلام) بذكرى ميلاد ابنته (السيدة رقية عليها السلام ).. في ١٧ شعبان المعظم
🚩
🚩
وردة العتره .. تشبه الزهره
نجمة من عرش الله نزلت هالمسيه
بكامل أوصاف الزچيه يا رقيه
.................................
١/
انهني طه المصطفى وآله الميامين
الليله وانخص بالتهاني أمها وحسين
ذكرى ميلادچ رقيه ع الموالين
فاحت اعطور المحبة ع المحبين
هالمسه كلنه .. الفرحه تشملنه
واجب الليله الفرح للجعفريه
نجمة من عرش الله نزلت هالمسيه
..................................
٢/
تشبه الزهره الزچيه ايوصفوها
رحمة الله المُنزله لحسين أبوها
صورة قدسية الملايك يرسموها
سورة من وحي الجلاله رتلوها
اواجب الشيعه .. المحفل اتذيعه
و تنشره عبر الأثير الهل بريه
نجمة من عرش الله نزلت هالمسيه
..................................
٣/
نزلت امن الجنه بجناح الملايك
نزلت وياها الحواري من الأرائك
يحله هاليوم الفرح والكل تشارك
للنبي و حيدر علينه خل نبارك
بذكرى مولدها .. انهني والدها
و تهنئة العمتها زينب و الزچيه
نجمة من عرش الله نزلت هالمسيه
٤/
خلي يم بيت الزچيه محفل انعد
و خلي ننطي هالحفل لمسة تفرد
مو ورد لا كون اطش در و زمرد
و الله تستاهل رقيه نسوي مولد
هذه بت حيدر .. للفخر مصدر
اليوم دنيانه صفت حلوه و زهيه
نجمة من عرش الله نزلت هالمسيه
٥/
چنها مشكاة الجلاله وتزهي بالدار
الشمس لو خلّص ضواها ليها تندار
نسمه هبت بالترافه فوگ الأشجار
من عطر مولدها فاحت كل الأزهار
وكل ملك جنحه .. ينشره ابفرحه
حته بجناح الفراشه الفرحه عذريه
نجمة من عرش الله نزلت هالمسيه
..................................
٦/
الليله في بيت الزچيه لمة أحباب
و جنة الله هالمسيه فاتحه الباب
ياهلا بجيت رقيه ونسل الأطياب
توها اجت للدنيه لكن لابسه حجاب
بالوصف هيه .. وردة جوريه
فاحت بعطر الولاية الحيدريه
نجمة من عرش الله نزلت هالمسيه
..................................
٧/
امطوّگه بعفه وجلاله وهيبه واحساس
اتسبّح الباري و تقدسه بأول أنفاس
مگصد الحاجات هيه السائر الناس
جرب و حلفها مره بعمها عباس
والله بالكافل .. ما ترد سائل
حاشه والله ما ترد چفك خليه
نجمة من عرش الله نزلت هالمسيه
..................................
✍🏻علي نوري الحلفي
مقطع صوتي من ... لقد عجّل الله الفرج
Читать полностью…
مقطع صوتي من ... لقد عجّل الله الفرج
Читать полностью…
نبارك للامام الحجة المهدي عليه السلام
ميلاد مولانا (علي الأكبر) عليه الصلاة والسلام.
💎
🌸
علي الاكبر اشرقت شمسه علينه
نهني طه و فاطمه و حيدر علينه
الكون بوجوده ابتشر .. هذا ابن سيد البشر
.............................................
١/
تزهي من عرش السماء أنواره
و أنبياء الله اجت خطاره
نوره قدسي وما أبد يتجارى
مو گمر تالي الشهر يتوارى
وردة شايل كل ملك لأمه الزچيه
بكل سمه محفل نصب حامي الحميه
حيدر بجيته افتخر .. هذا ابن سيد البشر
.............................................
٢/
بهدعش شعبان هاي الليله
بيها قرآن العشگ تنزيله
للحُسين الباري دز جبريله
حمل من ورد الجنان إكليله
الليله أفراح و مسرات و سعاده
تعتبر عند الله چن ليلة عباده
و النبي لجله حضر .. هذا ابن سيد البشر
.............................................
٣/
بنوره أنظار الخلگ مبهوره
حته يوسف ماهو مثله بنوره
چنه طه المصطفى بالصوره
وزينب ابجيته غدت مسروره
انهني زينب عمّته و نباركلها
و باقة اورود الموالي شايللها
كوكب الزينب ظهر .. هذا ابن سيد البشر
.............................................
٤/
يشرق الكون ابجمال اعيونه
و النسايم ما تهب من دونه
الباري خله الرحمه بي مقرونه
لا تلوموني صرت مجنونه
سبحان ربنه الخالقه بهيبه وجلاله
و زاد من نور النبي لمسة جماله
گمر ثاني يُعتبر .. هذا ابن سيد البشر
.............................................
٥/
والله محتاره البشر بوصافه
ربنه سواه ابحُسن الطافه
ينبهر كلمن نظرله و شافه
والمريض الشافه هم يتعافه
رحمة الله و نازله للعالم أجمع
ولو دعيت ابجاها عند الباري يشفع
للصعوبات انذخر .. هذا ابن سيد البشر
.............................................
٦/
النجمه تسجد من تمر اطيوفه
و الطيور بكل صباح اتطوفه
علي الأكبر لو قرينه حروفه
نذكر الكرار سبع الكوفه
من يطب للمعركه ايعرفونه كلهم
علي هذا چن علي صاگر زلمهم
سيفه مامره اعتذر .. هذا ابن سيد البشر
.............................................
٧/
بالطفوف ابصولته المشهوده
خله أجساد الزلم ممدوده
نطى للإسلام كل مجهوده
واحنه واجب نفرح بمولوده
اسمه بالمحفل جلب خير و مسرات
وبالحرب اسمه جلب لينه انتصارات
والحشد بسمه انتصر .. هذا ابن سيد البشر
.............................................
✍🏻 علي نوري الحلفي
ذكرى مولد مولانا وسيدنا كفيل زينب العظيمة أبا الفضل العباس عليهما السلام.
🌸
🌹
زينب اليوم تجيها ابشاره
الليله عباس تشع انواره ~
١.
الليله عباس تشعشع نوره
وجهه قرآن جميل الصوره
نوره غطى على المعموره
بيه الأملاك صفت مبهوره
فاق الأوصاف عظيمه أسراره
الليله عباس تشع انواره ~
٢.
هلال الأفراح بزغ بسمانه
عطر الأوراد يفح بجنانه
كل الطيور فرحها ويانه
تهني هاليوم علي مولانه
فرحه وأعياد نشوف بداره
الليله عباس تشع انواره ~
٣.
حور و أملاك تفصّل ثوبه
در وياقوت تطش بدروبه
چلمه باللوح صفت مكتوبه
اليفرح اليوم تزول ذنوبه
و الما يشارك عليه كفّاره
الليله عباس تشع انواره ~
٤.
ينظرله حيدر نظر متفائل
يدري چفه يأدب العاذل
ابعمره الزغير يعلمه يقاتل
بِسمه ميصيح يصيحه الكافل
وبسم الحسين نقش بتّاره
الليله عباس تشع انواره ~
٥.
أم البنين تِعلمه بزغره
يمه واجب نوافي الزهره
زينب الدين أصوله وفكره
وانت يبني كفيل الحرّه
انت ليها الجليل اختاره
الليله عباس تشع انواره ~
٦.
بيوم الطفوف أبد ما قصّر
لخته لو راد يجيب الكوثر
اتعرفه الجيوش عليهم لو كر
بيهم ايصير قيامه و محشر
منه الجيوش تفر محتاره
الليله عباس تشع انواره ~
✍🏻 علي نوري الحلفي