1850
مختصّه بنشر جميع القصائد الحسينيه / احنه غير حسين ماعدنه وسيله للتواصل مع الشاعر @a313l1
حسيناً واحسينا حسيناً واحسينا
****
عمري آه تتبعها آه
حزني لابعده أو [ورآه]
من يهل شهر الدموع
حته عرش الله رثاه
اسبل دمعتي اعله الوجن ونصب عليه اقرايه
من مجلس لمجلس اطب وستقبل العزايه
إني إلي محنية ضلع سابيني حزني سبايه
عالنايم بحر الشمس وعالچف أون والرايه
دمعي بكل وكت عالوجنه مسبول
برض الطف گضوا اولادي الشبول
ياهي المثلي أبنها ذِبح مكتول
وبعد ذبحه تسحگه اثگال الخيول
حگي انوح بحسرتي
وتجري عليهم دمعتي
حسيناً واحسينا حسيناً واحسينا
***
تبچي لاچمها الضلع
بهل المجالس تنفجع
تهمل الدمع الذروف
بعينها الشبعت صفع
وين اليساعدني أو أون ويبچي لمصاب حسيني
طور النواعي يرتفع وإني إلطم بچفيني
لو فزت جروح الگلب يمه الضلع ياذيني
وين إلي فاگدله ولد خل يگعد ايواسيني
من بيت الاحزان وجيت اسعي
عالمذبوح اجر حسرات ونعي
إني المنكسر بالباب ضلعي
مثل نهر الفُرات يسيل دمعي
فجعتني يمه امصيبتك
مذبوحه روحي بطيحتك
حسيناً واحسينا حسيناً واحسينا
***
انتچي بحزني وأگوم
يوم مامر مثله يوم
راسك بعالي الرماح
وزينب گبالك تحوم
كل ميت اكرامه الدفن تحضر هله وتبچيله
الماعنده بالديره عرف مكتول ياهو يشيله
چا هوه المگطع وذر شيتغسل بتغسيله
زينب غريبه إبلا وطن والخوف بين ليله
يالرايح طعن بسيوف ورماح
حيل اختك عليك أمن الهظم طاح
عليكم ماانام الليل ورتاح
أمك ونگطع من گلبي سباح
عاشورك يهيج الحزن
احضر مجالسكم وون
حسيناً واحسينا حسيناً واحسينا
***
ليل المفارگ عذاب
جفني . موبس راسي شاب
وين ما أمشي انوح
يلي نايم عالتراب
متبدي حيله أمن العطش ومابيه بعد للگومه
وعيونه اتصد للخيم والغربه ترس رسومه
يتجرع انواع الألم ومسلبات هدومه
بالوادي أسمع ونته واني عليه ملچومه
صوب جبهتك يبني الحجر ليش
متوزع جرح ويحيطك الجيش
هاي الگوم يبني طلبتك بيش
جروح اعزاز گلبي موش بالريش
مايبرد صواب الچبد
امن الخيمه ليك أمشي أو اورد
حسيناً واحسينا حسيناً واحسينا
***
سلهمت عيني اعله نار
ناسهم تطلبنه ثار
أنته رادوك بذبح
يبني ماذنب الصغار
ينطحنن ضلوعه طحن لو داسته الخياله
بالمذبح وعينه تصد لخيامه ولعياله
يحسين ماطاب الجرح عيني تضل هماله
اني الزجيه فاطمه گلبي الحزن يحلاله
أخ إمن الضلع تطلع يمذبوح
وعلگلك روايه فوگ السطوح
اني العاشرتني ذيچ الجروح
مسه ومصباح عن البال متروح
حسيناً واحسينا حسيناً واحسينا
***
علي محسن الفرطوسي
القصيدة ( شور)
.....
شوغة منيه وصوغة عرس .. بالخيم
حلمي الرسمته بعيوني أمس .. أنهدم
بعمر الشباب اتغيب الشمس .. وأنصِدم
مبارك ينور عيوني.. والدمعه شربت لوني.. عگبك صفالي التعب
بدر الهواشم اشوفه.. تغازل هوه الله زلوفه.. تتركني يمه شعجب
نزاح الضلام ابطلعته
گدامي لابس لامته
لوحة جمال بكشخته .. منه النجم غار
خوفي عليه أمن الحسد
يشبه بدر ليلي الولد
بهل الطلعه چن حان الوعد .. بجفوفه بتار
*
لاتنطي فرصه يمر الهوى .. ونفترگ
لجروحي يبني انته الدوه .. ياعشگ
من العطش گلبي انچوه .. ومحترگ
ليل اسود اعله رموشي .وإني الحزن ملبوسي. تعبني ليل الهجر
حر الشمس برسومك . مو وكته جاسم نومك. بهجرك عذاب شكثر
عريس گاصد حومته
بين ألف صارم زفته
مهر الزفاف برگبته .. ويزفه الموت
صينية الغالي متلت
من دمه والدنيه انطفت
بالخيمه عمته هلهلت .. بنبرة حزن صوت
*
لزفتك أضوي العشره شمع .. يالولد
ويه الهلاهل سال الدمع .. عالوعد
حني الهلال احنيله الضلع .. للأبد
نباگ الفرح من داري. صار الحزن خطاري. كلشي أنتهه بغيبتك
ماأگدر اني بدونك. طفهم يغير لونك. بدم النحر حنتك
جنك بياض بشيبتي
بوجهك اشوفن دنيتي
بالدمعه تمت قصتي .. جاسم بعد راح
كل حُب يحليه الدمع
گلبي بغيابك ينشلع
زهرة شبابك تنگطع .. لاتحسب أرتاح
*
حنه وصواني خيل اوحرب .. تجتمع
يل فگدك اصعب من الصعب .. والدمع
نجمه بسماك وهيمه الدرب .. ياشمع
ضاع الأمل يوليدي. حلمي أزفك بيدي . احلامي صارت وهم
جاسم شبابك وينه. للمذبح مقدمينه. بعدك سكوتي ألم
مطشر مثل نجم السمه
من هامته يسيل الدمه
سماعيل كبشه يقدمه .. وإني ابني مطعون
بجروحه متوضي الرمح
مايحمل وليدي الجرح
وي دنيتي مالي صلح .. مشيبات الجفون
*
عدمن عفتني وحيده بكربله .. للغرب
بهاي الطفوف اصرخ لاهله ... ونسلب
چم دوب أضل يبني أمعلعله .. ونضرب
للحومه من زفيته. جسمك وذر خليته. نحرك يحصده الذبح
مالي عرف بالديره. أمك تضل ابحيره. يلچمني طاري الصبح
التمت شفت خيل العده
ويه المنايه موعده
فوگ الورد مات النده .. شمسوي ياماي
هوه الگلب لمن يحب
يتجرع انواع التعب
خليني اروح بهل درب .. وجروحي هواي
*
علي محسن الفرطوسي
زفة منيه وخيل بعدك دمعتي اسيل
شمعة وحلم مذبوح ماضل بعد كل حيل
***
من الخيم ناديت طالع ضوه عيوني
اتهنه ردت اوياه لا لا تفجعوني
بعمر الورد ويروح ذبلهن جفوني
عين العمه ولاشوف منه يحرموني
يبني العطش چتال بيه زماني مال
ليش بعجل وتروح ماضل بعد كل حيل
***
تعبي التعبته اعليك ردتك تجازيني
وكت الكبر والشيب يبني تباريني
من صورتك جسام ليش أحرمت عيني
راح الولد مذبوح وفگده يأذيني
گلبي الينوح اعليك وخوفي العتب ياذيك
بعدك هويت النوح ماضل بعد كل حيل
***
زهرة شبابك ليش يوليدي مذبوحه
المثلي يودع احباب ماتشفه جروحه
الفارك ولد يحتار ويتسله بنوحه
عين التودع احباب دمعتها مفضوحه
فرگه وعذاب ونوح گلبي ترسته جروح
ضل الدمع مسفوح ماضل بعد كل حيل
***
بيه الزمن من دار غيرلي حالي
مسبيه امشي بنوح وترك غوالي
عفت الولد مذبوح وضل دمعي هالي
رحت اعلى ظهر النوگ بس راسي عالي
راسك يصد العين واحنه بيسر ماشين
طاوعني بس النوح ماضل بعد كل حيل
***
ريت الولد عوان يفزع وحشمه
ادري العتب چتال وكل خوفي الچمه
ناديته بدمعت عين وينك ييمه
من غمضت عيناك گلبي تصدمه
عنك رحت بدموع فكدك كسرلي ضلوع
ودمع الحزن مفضوح ماضل بعد كل حيل
***
علي محسن الفرطوسي
أيد ابأيد وفايه .. أطيح اشلون هالرايه
لاخر كلمه وياك .. بالدم بايعناك
****
بسم الله اتوكلنه بسم الحب بايعنه ندوس الصعبات
بايعنه وگصدينه لم عون اتعنينه ترف الرايات
يشهد چف الغيره زينب ليش بحيره مانرجع هيهات
للموت احنه وإياكم هل كلمه اطيناكم ويعيش المات
الطاح يعيش بالموقف .. للساحات غيره أنزف
خالد عرفيناك .. بالدم بايعناك
*
حي الله أهل الشيمه للحب صارو غيمه صارولك سور
ياكوثر غيرتهم ماطاحت رايتهم يشهد عاشور
بالدم كتبوا حبهم كل عاشگ يحسدهم ضحو بنحور
ارجوزات فزعتهم ايوفون غايتهم ياسيد النور
گمر أحسين بسماهم .. بالحب هذا غذاهم
احنه نجوم أسماك .. بالدم بايعناك
*
گاصد يابن ضاهر طاهر والحب طاهر وتقدم دروس
متعصب ابشيباته من ينزل صولاته عالروس يدوس
مسلم يابن عوسج خله الطف كله ارتج غيره وناموس
وهب امضحي أو واهب گلوب العسكر راهب حدك محروس
انصار حسين من هدو .. جيش وخيل ارتعبو
وحدك ماعفناك .. بالدم بايعناك
*
تهتز بينه ارض الطف موقف مايتوصف ياماي العين
ماتبرد غيرتنه من حيدر همتنه ونوفي حسين
بالطف صار المنظر چن حيدر والاشتر نزلو صفين
خيبر عادت بيهم والموت ايحييهم واحنه الباقين
گصب ونار ملتهبه .. وهاي الگوم مرتعبه
قائدنه وحياك .. بالدم بايعناك
*
طشرنه احنه العسكر صگور وبالجو نفتر والصيده العيد
نفزع وانته اتشاهد ساعد يلزم ساعد على جيش أيزيد
ننزع روس إعدانه رف بهيبه الوانه والموت يريد
اعظم يوم المرنه حسين انته قائدنه وهالحب يزيد
من انطيح جبل احنه .. أوياه للموت صاحبنه
ابشر سمعناك .. بالدم بايعناك
*
علي محسن الفرطوسي
راح راح الجان اغله من روحي
راح راح وكثرهن جروحي
بيادمعه اشتكيله طفله اني وعليله
بويه بويه بويه بويه
**
صعبه انسه ردلي ردلي لاتهاجر
يانبض گلبي دخيلك عالمشاعر
ناوي السفر وتريد اصبر بعدكم
شمعه وكلتها النار روحي امنهدكم
من السمه واطيح نجمه بضعنكم
معلوله هاي الروح ساعة سفركم
موت موت فركتهم احبابي
موت موت وحكي ابدي بعتابي
فراكك مالي حيله طفله اني وعليله
**
الموت فرگه واني متعلقه بهواكم
طفله وگلبي نكسر وأركض وراكم
اعثر وصيح بصوت رجعو يهلنه
دمعه بجفنها تموت ام المحنه
لوبيدي اروح وياه واهجر وطنه
اضلم ومابي نور بعدك سلفنه
صار صار بيتي اضلم الليله
صار صار ماواحد اشكيله
دمع الحب مسيله طفله اني وعليله
**
بويه وينك ماتردلي ياحبيبي
مثل المضيعه وطنها وبنحيبي
كلما سمعت الباب اركض بالحزان
كل ضني ضعنك عاد انته اويه الاخوان
بالمغربيه احتار وي صوت الاذان
من الرحت لليوم ضل جفني ذبلان
تعال تعال كافي الهجر وينك
تعال تعال حط عيني بعينك
ماعندي وسيله طفله اني وعليله
**
عيني لوما شافت اهلي شلي بالعين
الدنيا مابيها طعم من دون الحسين
كتلك اخذني وياك شلي بحياتي
انته العمر والروح وكل منياتي
ماخذ هلي وياك وماخذ خواتي
لوجن عليه الليل بس نايباتي
عذاب عذاب يعيش الفكد غالي
عذاب عذاب يلي اشغلت بالي
عشرتنه الجميله طفله اني وعليله
**
لوعة الفاكد حبيبه صعبه تدري
بابا اني بحاجتك ودموعي تجري
مثل الجمر بالروح يسعر دليلي
عاشرت ون ونوح بعدك خليلي
طالت الغيبه هواي يمته تجيلي
بس الصدى بالدار هدالي حيلي
وين وين دليني بضعونك
وين وين يابويه شلونك
بجروحي الثجيله طفله اني وعليله
**
كلبي مامطمئن حاسس بالفجيعه
صدري مخنوك نذبح يمكن رضيعه
اشعر حوافر خيل داستلي صدري
وجمرة عطش بالروح ودموعي تجري
بالطف خذاك الموت لو نفذ صبري
اتنطر بويه اخباري وبحالي تدري
خيل خيل تسحك على صدرك
خيل خيل تلجم الك نحرك
لو اندل وجيله طفله اني وعليله
**
علي محسن الفرطوسي
خلوني بنار الهجر خلوني
نجمه بسماهم ضاويه يشوفني
ناديت يبني هجرك ذبحني
***
شما اتعب الداره اجي جانت زهيه الدار
اولادي راحوا بالسفر حگه الگلب يحتار
جمره ويهب بيه الهوه وناتج جمرهم نار
ضعن الوفه لمن رحل مضلم نهاري صار
من جدمت نوگ السفر يم بابي
كسرة ضهر من ودعوني احبابي
عدمن عفتني هجرك ذبحني
***
افراگ العزيز اكبر جرح ماخله دمعه ابعين
أم البنين إني صحت شال الحبيب حسين
سهريت ليلي بدمعتي وكلبي نفطر نصين
بطرف الجفن دمعي غفه ومعفر الخدين
ماينگطع مجره الدمع بغيابك
يحسين رحت انته وفجعت أحبابك
غيابك فجعني هجرك ذبحني
***
لمتنه ماترجع بعد دنيا وخذتهم مني
يعقوب ردله الفارگه بس اني عشت بحزني
ابيضت عيوني الحزن ويسيل دم بجفني
بصفناتي انته وصورتك يل فركتك كتلتني
ردولي يحباب العمر ردولي
عفتوني ليش بحيرتي عفتوني
يل واعدتني هجرك ذبحني
***
بيتي طفه ومات الحلم من فاركوني احبابي
ونشتلت الدمعه أوصبح بس الحزن يم بابي
أمن انعه ينوح الحجر بس ما اجو غيابي
بنص الگلب ماضي الجرح ماطاب يمه اصوابي
سهم الدهر صوبني بدلالي
الدنيا ماخلت إلي كل غالي
هجرك ذبحني
***
لأني ميته بغيبتك ولا اني رحت اوياك
أم فاركت اربع ولد عشت بجرح فركاك
يحسين منتظره ترد يالغالي اترجاك
اغفه اعله أطوار النعي ليل ونهار انعاك
ايدي اعلى خدي ودمعتي سچابه
يعيش بحزن كلمن تودعه أحبابه
لحسين حزني هجرك ذبحني
***
علي محسن الفرطوسي
هب ريح الموت وهالصوت أمن الكوفه
صك اذن الناس چن عباس هذا اتشوفه
مسلم حياك جله السواك
▪️▪️▪️▪️▪️▪️▪️▪️
اعمامته شدها اعله راسه والغضب بعيونه
عسعس وهز رمحه بيده وفنهم يگربونه
حيدري ولثامه شده ضربته مضمونه
يخطف الأرواح بيده هاشمي يعرفونه
سيفه بيمناه واليدناه يخطف روحه
بده بسم الله صار الجيش تسمع نوحه
عاشت يمناك جله السواك
▪️▪️▪️▪️▪️▪️▪️▪️
بيده هز رمح الحرايب والملاعب عيده
طحنة الرحه طحنهم حنطه صارو بيده
شاعر وسيفه القصيدة الموت حشم عيده
كل شطر زلزال نازل لو صگر غط صيده
يمطر سجيل وأهل الفيل عاشت خوفه
شهم وصنديد روس يريد يملي جفوفه
ما طاح الواك جله السواك
▪️▪️▪️▪️▪️▪️▪️▪️
خيم بجنحه عليهم والطريده العكسر
من نسل قالع البوب بجفه شمرت حيدر
ملك بالميدان واگف لو اسد هاليزئر
گصب بيه النار شبت لو نزل موت أحمر
يمطر بالموت تسمع صوت چفه افناهم
مرسول حسين عين بعين من لاگاهم
سيفاك ناداك جله السواك
▪️▪️▪️▪️▪️▪️▪️▪️
مسلم وهز الملاحم بالسره خلاهم
غنم غطها الذيب غاضب بالحرب بچاهم
سحبه ومشطره العسكر أو رجع لماهم
يسحگ الروس العنيده ابو طاهر جاهم
دم غطه الخيل خيم ليل من ضل سيفه
المهرب لاوين بسم حسين ياخذ حيفه
ربك علاك جله السواك
▪️▪️▪️▪️▪️▪️▪️▪️
بالقصر صوت اعتله من سولف يسمعونه
فقط حب حسين باقي ويقره فن جنونه
والله لو ماغدر منهم فنهم يچتفونه
حيدري وبيه الشهامه وكلهم ايعرفونه
وعد المحبوب كون يذوب عد محبوبه
تره يسوه حسين ماي العين وحلوه دروبه
للموت اوياك جله السواك
▪️▪️▪️▪️▪️▪️▪️▪️
علي محسن الفرطوسي
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------
اخذوني وياكم اترجاكم
*
يماي العين أريد اوياك
أشوفه يحمل ضعونه
طلع كل الرسمته اوهام
المثلي ألمن يخلونه
حلمي چان اوياكم امشي حضرت روحي يبو اليمه وأجيتك
جرحي تدريه اعله گدي حته بعيوني وجع بويه ونخيتك
وداعت الله من گلتلي دمعتك من نزلت تبلل لحيتك
هونك يحادي بالضعون عليه
عافوني الإحباب والدموع جريه
بساعات الوداع اشوف المنيه
اخذوني وياكم اترجاكم
*
خلاني ومشه وضليت
بغيابه اكسر الخاطر
اشم هدومه وابجي
وگلهن مايرد باچر
الله بس وحده إللي يدري ليل الموادع صعب وشلون انامه
حجره حجره دورتهم . واليفارگ . من هله يدور علامه
زين احاچيمن عليكم والطفل لو ينهظم دمعه بكلامه
طفله وعليله عفتني غريبه
چم دوب الجروح وعيش المصيبه
تهجرني وتروح بالضعون عجيبه
اخذوني وياكم اترجاكم
*
العتب شيفيد المضيعه
أبوها وكل اهل بيته
حنين انته وحنينه إنه
المثلك ياخذ بنيته
ياحلم مات اعله جفني وغير المعاتب بعد ماكو وسيله
چلمة البويه ردتها لاتموت أمن البجي بنتك عليله
وينك بكل صوب أناشد واني سالفتي بهجر أهلي طويلة
أگعد على الباب بالدموع أتاني
عالينتظر ليش تموت الثواني
طيفك على البال ولا يوم جزاني
اخذوني وياكم اترجاكم
*
غفت عيني . بحلم شفته
وحيد ودمعه بعيونه
هداك الله يطاري الماي
على اطفاله وعلى ضعونه
مسير اضماك اعله جرحك راح اعيش بحلمي وتحمل مخاطر
امن التعب امشي اعله جرحي اني طفله وموسهل كسر الخواطر
بحلمي عبد الله اشوفه اعله صدرك منذبح وشلون أكابر
مزدحمه الاسيوف الارماح بجروحه
شمس الله بالطيف شفتها مذبوحه
محتار الحسين والعيون مشبوحه
اخذوني وياكم اترجاكم
*
انعم الله هدومك اشتمها
ترد عافيتي بهدومك
ليليه انچوي بنارك
ودور شوفت رسومك
الشوفتك عطشانه روحي اكعد ابابك واحط ايدي اعله خدي
بويه ياهو يسد فراغك يوم الموادع نسوني ابجي وحدي
ضيعوني وضيعتهم وبيهم اضعون الحزن للفرگه تحدي
مخطوفه الالوان والعيون ذبلانه
حضن الورد راح للجروح خلانه
دار الحزن هاي كتبت ابيبانه
اخذوني وياكم اترجاكم
*
علي محسن الفرطوسي
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------
بحاجتي نخيتك
خادمك واجيتك
ياابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
الله خله الخير كله ابابكم
الصعبه تنحل من ازور اعتابكم
الله فرج همه كلمن زاركم
امن الفرح طاير يرد خطاركم
شكراً بدمعتي
لرحمتك جبتني
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
أكصد الباب المراد بدمعتك
موسى إبن جعفر اليگضي حاجتك
يمه لاتحتار يسمع طلبتك
قبل لاتحجيها يعرف كلمتك
خيره غرگاني
بفضله خجلاني
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
هذا دكتور العلل والمستحيل
ابابه من تدعي حزن گلبك يشيل
شما نذرنه الحضرة الكاظم قليل
الحاجه تگضي بعتبته وكل هم يزيل
واگف اعله بابه
والوفه بعتابه
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
لو قرينه الفاتحه ونهديها
واحنه نقره البسمله ويگضيها
روحي تعبها الدهر تدريها
حاجتي يم بابك مخليها
ماتضل صعايب
تنجلي النوايب
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
روحي شدة علگ وبشباچكم
يابو طلبه عشت عمري بجالكم
نضره هاليله بدمع جينالكم
يل گصدتو زيارته هنيالكم
زورو بالنيابه
عني ابمصابه
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
روحي حنت والبُعد ماينحمل
على جناح الشوگ ودموعي تهل
ميت وشباجه ايردني عدل
لو نطوفه الدهر كله مانمل
تدري مالي غيرك
غرگاني خيرك
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
بليلة مصابك دمع عيني يهل
گلب كل شيعي لمصابك منفعل
نعشك اعلى الروس لازم ينحمل
جروحنه من غيبتك ماتندمل
مدمع الغياره
لفگدك يتجاره
يابو طلبه واني اعرفك .. تگضي الحاجه
🔸🔸🔸🔸🔸🔸🔸🔸
علي محسن الفرطوسي
يانور نازل عل أرض هاليله
يانور نازل عل أرض هاليله
......
متصدره أخباره ... من السمه ابشاره
بجوف بيت الله نزل نوره الإهي
انولد حيدرنه ... محفله اليجمعنه
حيدر علي انته الولي ومحله التباهي
نتباهه بحروفه ... ارواحنه اطوفه
يابسملة عشاگ محله إسمه بشفاهي
يامحله هالفرحه ... الهايم ترك جرحه
وملتهي ابالفرحه المثلها مايضاهي
اشواگ عاشگ للحبيب اهديله
يانور نازل عل أرض هاليله
......
طيور الفرح نزلت ... أجمل لحن غنت
علي علي علي علي حيدر يغالي
أبيت ابو طالب ... جاء الفتى الغالب
بالكعبة مولود إو فرح گلب الموالي
اشعار نهديله ... نسهرله هاليله
سهران گاعد للصبح وانته اعله بالي
كل بيت كتبيته ... لحب حيدر اهديته
ياشيخ گلبي وسيدي وهيبة دلالي
يطيور أجمل تهنئه وديله
يانور نازل عل أرض هاليله
......
ياگلبي المجِرح ... بمولد علي افرح
الدنيا كلها انساها إو أمشي الأمامي
ويه الكمر اسهر ... وبحبك اتسمر
ماعندي غيرك سيدي انته غرامي
انثر ورد دربك ... ماجوز من حبك
يابو الحسن انته تصل حبي وهيامي
طير الفرح غنه ... للحضره يتعنه
يابو الحسن أسمك يظل أحلى الأسامي
ياغزل حيدر ياقصيده احجيله
يانور نازل عل أرض هاليله
......
بالبوب دگينه ... ندعو اهالينه
احضر حفلنه يالتحب هيم بهوانه
الخير بوجوده ... يمطر على زنوده
الخير كل الخير بالمولد اجانه
أنولد حيدرنه ... والفرح بالجنه
هالليله أملاك السمه تفرح معانه
كتبو اساميكم ... حيدره اليحميكم
بعونه الله مايوگع يضل عالي لوانه
الليله الموالي لازم يشد حيله
يانور نازل عل أرض هاليله
......
امساهره عيوني ... وماترمش جفوني
اكتب شعر وتغزل بأجمل قصيده
بياعلي مطلعها ... ابياتي تسمعها
ياشيعي افرح والفرح لجل الصميده
اكتب مواويلي ... ويشع بدر ليلي
كل بيت بسمك حيدره لازم اعيده
مجنون أنه بحبك ... من صغري بدربك
بيقضتي وأحلامي عشگ حيدر أريده
وين اليحب حيدر شعر انطيله
يانور نازل عل أرض هاليله
......
علي محسن الفرطوسي
اللهم صل على محمد وال محمد
اللهم عجل لوليك الفرج والعافية والنصر يالله
ولدي اربعتهم .. من قدمتهم
حبيبي حسين حبيبي حسين
اطلب رضاتك .. يبني وغلاتك
حبيبي حسين حبيبي حسين
**
اربعه اولادي اويه ضعنك مقصره اگولن ماوفيت
ياحُسين أقبل قليلي جبت ألك ولدي وأجيت
بخدمتك إني وبنيني عيوني يم ضعنك بچيت
فاتحه يبني اعله روحي ايسهل أمرك هالقريت
بهودج اختهم .. من زورتهم
حبيبي حسين حبيبي حسين
هاي الأميره .. الكلمه الأخيره
حبيبي حسين حبيبي حسين
**
بالضعن راحو حيادر زنودهم تلوي الحديد
ابو فاضل كافل اخته أبني [ذو البأس الشديد]
وجهي بيضه گبال زينب إلها سوي إلي تريد
حسين يامولاي گله وصير إله حامي وعضيد
حچي العيون .. بالحب يكون
حبيبي حسين حبيبي حسين
يوليدي أريد .. نعم العضيد
حبيبي حسين حبيبي حسين
*
مهجتك ياجعفر أبذل وإني اعرفك ماتلين
امشي بضعون الفواطم وعالهوادج صير عين
كلمه خليها اعله بالك انضيع من دون الحُسين
يبني هذا إبن الزجيه خيره المالي الادين
يم الفرات .. هالحب نجاة
حبيبي حسين حبيبي حسين
تروي ضماي .. هالكلمه هاي
حبيبي حسين حبيبي حسين
***
وانته ياعثمان أريدك تحرس اخيام الدلال
كربله بجفك تهزها لو ضعن مر بيه خيال
يبني ياعبد الله جفك يعدل الهودج المال
ولدي ترفعونه راسي وينضرب بيكم مثال
لحظة سكون .. تتكاتفون
حبيبي حسين حبيبي حسين
حامل لواه .. يسند كفاه
حبيبي حسين حبيبي حسين
**
لكربله وعاشرها يجري دمعي جن دجله وفرات
عالنهر ذيج المواقف طعم سوت للحياة
من عگب عينك ييمه العمر بعدك شتات
رضعت ولدي اعله امودك نحور توگع للخوات
نحره يگول .. لبن البتول
حبيبي حسين حبيبي حسين
يطلب رضاه .. يضحي بدماه
حبيبي حسين حبيبي حسين
***
علي محسن الفرطوسي
.....
القصيده لأم البنين عليها السلام
أسمع تونين . من ونتج گلبي انكسر
اسمع تونين
يمنه الحنينه . يمنه الحنينه
***
شلون حبها أنوِصفه أمنه كلها عاطفه
الغاليه هاي
بشيلة أمي البخت روحي بيها اتعلگت
وكت العطش ماي
جلمة اليمه شكثر منها حنينه
المايشوف امه صدك معميه عينه
الصبر من عدها احنه تعلمينه
ياأم الحسين يمج أصيح بعبرتي
ياأم الحسين
يمنه الحنينه . يمنه الحنينه
***
أنتي يل كلج حنان جفوفج التمطر أمان
يمه يمه
ونتج اتفسر الصخر يمه دلالي انفطر
والدنيه ضلمه
گمت أخاف أمن اليتم بسلا تروحين
الدنيا ماترحم أبد ياأم الحسين
يمه حاجيني گبل لاتغمض العين
هذا الولد هذا مكسور يم أمه يون
هذا الولد هذا
يمنه الحنينه . يمنه الحنينه
***
كاسر جناحي الهظم خوفي منج انحرم
وجهج إذا غاب
عيني تنبلعج نهر كلشي ولا هذا الخبر
ايغطيج الاتراب
كون أموت اوياج يل كلج محنه
يمه تكتل ونتج يابعد اهلنه
ليش منج ننحرم واحنه بصغرنه
يابعد العيون تسوين عمري ودنيتي
يابعد العيون
يمنه الحنينه . يمنه الحنينه
***
بعطر جفج دنيتي أمن الصغر كل راحتي
امن أسمع دلل لول
هسه اني أو دمعتي اليتم موت ضحكتي
وثگال الاحمول
جثه سوتني المناحه بوكت موتج
البيت چنه المقبره المابيه صوتج
لاتخليني صحت يمه امروتج
فتحيها العيون غمضتي والدنيا انعمت
فتحيها العيون
يمنه الحنينه . يمنه الحنينه
***
والله حيره حيرتي من أضل بغربتي
باجر بالطفوف
سولفيتيلي شكثر عن حرگ خيمه ونحر
وعن نهر وجفوف
يمه باجر موضلع تتكسر ضهور
الخيل تسحگني واضل عالغبره منحور
يمه اطشر أشلاء بظهر عاشور
باجر غربتي بطف كربله نشوف العجب
باجر غربتي
يمنه الحنينه . يمنه الحنينه
***
ياهو يحضر دفنتي يمه أضل بغربتي
وزينب غريبه
يمه من هسه استعد لطفهم اليذبح ولد
وياخذ سليبه
اليموت بديره غربه يريد العزاز
بكربلاء عاري ييمه وماكو جناز
لكل هلي واخواني بالطف باجر اعتاز
ياكثر الجروح تهدملي حيلي بكربلاء
ياكثر الجروح
يمنه الحنينه . يمنه الحنينه
***
علي محسن الفرطوسي
علي يبني علي يبني
علي راح أو اخذ صبري .. وهدم حيلي
يبني گوم اغفه اعله صدري .. وحشه ليلي
روحتك كسرتلي ظهري .. ياخليلي
العمر بيه اهتز يبويه أعثر امن الخيمه أجيت
نجمه طاحت من سمانه هذا لو أنته الهويت
علي بويه نهدم حيلي وغير جرحي مالگيت
حزني بيني بيش استره يم اليذبحك بچيت
انهظ يبويه ورجع عليه
للحومه رايح من بين اديه
للخيمه نرجع يبني سويه .. علي
ضهري كسرته ودمعاتي تجري
أنته عفتني وعايفني صبري
بعدك اسلم للغربه نحري. ... علي
جرحك عني غطيه
مابي حيل اصد ليه
علي يبني علي يبني
**
ضماك إلي يفت چبدك .. وجرحي جرحين
[على الدنيا العفا بعدك ] .. ياضوه العين
أمن الذبح بويه شيردك .. للصواوين
انتچي اعلى اركان صبري أو امشي خطواتي بألم
مختنگ ويدي اعلى ضهري رجعتك صارت عدم
راح إلاكبر من اديه شلون ارد بيه للخيم
اسنديني يختي زينب وضجت بونها الحرم
بالخميه عمتك زينب غريبه
رايح يغالي وعشت المصيبه
عايفني وحدي يبني عجيبه ... علي
اوكف وطيح وأمسح دمعتي
بعيوني يبني تبين غربتي
خليني اشمك بويه بحسرتي .. علي
أحسب والدك ضاع
بين سيوف ووداع
علي يبني علي يبني
**
ياخذك مهرك يالأكبر .. مايرجعك
نار مستعره اعله صدرك .. يبني اودعك
للذبح مقسوم نحرك .. واني اتبعك
ضوه مطشر يبني اشوفك جرحك يلچمه الثره
التعب والعطش ماخذ حيلك ودمعي جره
بروحتك روحي خذتها والگلب شيصبره
الموت ياخذ أهل بيتي گبال عيني بالسره
ياعيني سيلي بدمعة حسافه
الأكبر اعوفه بعمر الترافه
شفت المنيه بهاي المسافه .. علي
من خيمة أمك جيتك يغالي
اصفك بديه بويه شبقالي
عالخد دمعتي نزلت تلالي .. علي
بدمك ترتوي الگاع
من تروح شبساع
علي يبني علي يبني
**
[مدداه مابين إخوته] .. وسال دمعه
الهواشم كلها موته .. محني ضلعه
واضحه الفرگه اعله صوته .. حسين ينعه
بصدري چم حسره اعله الأكبر والدمع ماينحبس
يبني شوف شسوه فگدك گوه اجرن بالنفس
تعبوك أو تعبوني بخيلهم شابع رفس
خدي خليه اعله خدك باچر تلمحه الشمس
رايدله حيل افراگك يالأكبر
كل لحضه موتي يتقرب أكثر
راسك أشوفه يبني تطبر .. علي
عشت الهظيمه وتعرف غلاتك
بالخيمه گعدن يبجن خواتك
رايح علي وين الگه بصفاتك .. علي
فگدك رايد عيون
وإني لذبحي يردون
علي يبني علي يبني
**
وحدي عفتوني بغربتي .. وماكو ناصر
ياهو يفزعلي لنصرتي .. گلبي حاير
يغفه السيف برگبتي .. بويه باچر
لوصحت هل من مُناصر ياهو عد عينك يگول
تفزع سيوف وسنابك خيل البصدري تجول
ياعلي اوداعة الله القسمه صارت للخيول
نلتقي روس برماح شموس متعلگه بنصول
راسي اويه راسك فوق الرمح
روحي اويه روحه تلاگن جرح
بدور الهواشم كلهم ذبح .. علي
زينب غريبه تروح بيسر
تدخل أميره بذاك القصر
مربيها حيدر ام الخدر ... علي
موتك يكسر ضهور
حگي أمن ابچي معذور
علي يبني علي يبني
**
علي محسن الفرطوسي
گدها انته وگدود بالطف ضحي بزنود
يوليدي يعباس
**
ابسمه حسين يعباس گمر وديتك
ضحي بزنود بالعهود تره وصيتك
وفه وخلاص ينوماس نه غذيتك
شمر جفوف على الجود أنه ناديتك
يستاهل تره حسين يبني ضحي جفين
يوليدي يعباس
.....
من ترحلون للطفوف حيادر كلكم
اربع ابدور للحسين بنين انذركم
صگر ويحوم على الروس تره واحدكم
ليوم الطفوف يالاولاد علي ذاخركم
هدو بالميادين وحموها النساوين
يوليدي يعباس
....
فوگ الضعون يعباس ترف الرايه
گبرت اني للطف زلم وفايه
يا ابو الجود يموعود تضل تچايه
للنهر روح تره اضماك يخوف مائه
من الخيمه مرسوم يصدر للنهر گوم
يوليدي يعباس
...
أشمر زنود أوصيك لجل خدر اختك
راحت أوياك يعباس تلوذ ابختك
هودج النور تحاميه گمر من شفتك
أسد معروف بالحروب فخر سالفتك
ترسم بالخيم ماي تكتب اني وفاي
يوليدي يعباس
.....
ها ينوماس يعباس يرافع راسي
من اصد ليك اناديك هلا بعباسي
من ترحلون بالاحزان اجر أنفاسي
دمعتي هاي للحسين يغالي تواسي
اصرخ يلي ماشين ماتغمض تره العين
يوليدي يعباس
....
علي محسن الفرطوسي
هذا موتي لو وداع
سفر هذا لو ضياع
آخر حچايه صحت
بويه بويه
**
بين أوجاع المرض يابويه وبينك حرت
گبال عيني حمليتو وحدي اضل ماحسبت
حضرت روحي وجيتك ويامن اركب فكرت
ضلتي ألمن يغالي بغربت ضنوني التفت
البيت إذا فارگ حبيب
وحشه يصير وغريب
وداعت عيونك متت
بويه بويه
......
جفني خليته بدمعته وغير جرحي مالگيت
نار هجرك عذبتني اسهرت ليلي وماغفيت
ماترد لمتنه بويه ضاع كلشي من مشيت
البيت إذا مابيه وجودك بعد مايتسمه بيت
لگعدت احبابي احن
راحو وخلوني أون
اغلى وادم ضيعت
بويه بويه
...
صارت العشره سوالف واني ماضل بيه حيل
تعبيتوني بجفاكم لاهله بطاري الرحيل
ماترد لمتنه يهلي بدونكم ليلي ثگيل
طالت الصفنه بدربكم ودمعت عيوني تسيل
بريتي جمره الهوه
ضاع من عيني الضوه
وداعت الله من گلت
بويه بويه
....
تاكل بعمري صفنتي وخضر اعله رموشي شيب
خدي يتروه بدمعتي وعاشرت طور النحيب
كربلاء مني خذتهم الضعن صاير غريب
الماي يجرحني أمن اشربه وصار ألي المدمع نصيب
حافر بصدري عثر
موتي من هذا السفر
غير جرحي ماشفت
بويه بويه
.....
بالحلم شفتك وحيد وما إلك ناصر فزع
سهم المثلث يتعبك من خرز ضهرك طلع
العطش چتال اشوفه بوگعتك كلشي وگع
ياغريب الغاضريه بروحي أحس صار الوجع
سير اعليك الضمه
طفك اترويه دمه
عالرمح تالي نمت
بويه بويه
.....
علي محسن الفرطوسي
لبيك لبيك أبا عبدالله
......
اذن حبيب بخيمته
والنيه تشبه شيبته
گلبه ابيض بهذا العشگ
لحسين قدم رگبته
إذن صوت أمن المنحر .. هالحب تربات أبا ذر
من فاضل الطينه انخلق
عالم فقيه أمن انطلق .. صوب الخيم
حب عن درايه وعن فهم
مو من فراغ اتهب زلم .. كلهم شيم
بذرت عشگ من خضرت
من جربة الكافل روت .. وربت زلم
يحسين اجينه لخدمتك
نطلب رضاك ورأفتك
ابختك نلوذ وخيمتك
لبيك لبيك أبا عبدالله
.....
من الخيم يبدي العمر
گصدينه مانطلب أجر
طلگنه كلشي وجينه ألك
وعذرنه شواي النِحِر
مُر الدنيا اتجرعناه بس حبك اتذوقناه
واهبلك انفاسه وهب
وجون بنجيع الدم كتب .. والحب جنون
الحمدُ لله والشكر
جاعلنه نفدي أم الخدر .. نحور وعيون
ياسيد اقبل هالقليل
عيونك فجر والباقي ليل .. بعدك يكون
قد قامت أيام الوفاء
بينه اشهدي ياكربلاء
شما نبذل شواي الدماء
لبيك لبيك أبا عبدالله
....
فك عينه السيف بزلم
بينه الحرب خل تنصدم
نلبس قلوب اعله الدرع
وبحيدر أنشد العزم
ذول الصفوه مسميهم والعباس ايحيهم
ياابا الفضل منك مدد
وفقنه انقدم بعد .. بحب الحسين
لذنه اعله ناطور الخيم
وتبركينه أمن العلم .. وبسنه إلادين
يامن كفلت اعظم خدر
هواي أنته وشواي العمر .. امقصرين
بيا قطره يتجازه البحر
شواي احنه ونشوفك دهر
من جودك تروه النهر
لبيك لبيك أبا عبدالله
...
اصلب من اطواد الحديد
لحسين الحب بينه يزيد
الدم على السيف انتصر
بهاي الحرب ربك يريد
ايات الحب دمعة عين صل الله اعله الباكين
من خيمة حسين الأمر
هاي المناحر تنتصر .. بطف كربلاء
كل قطره منبر ترتفع
هاي الرؤوس التنگطع .. شيمه وآباء
انخلد اعضم ملحمه
ونكتب على عيون السمه .. يهل العزاء
خضرنه يم التل وفه
مابينه البطف غفه
أنصارك اهل العاطفه
لبيك لبيك أبا عبدالله
.......
علي محسن الفرطوسي
جدمت نوك السفر ويدي اعله خدي
حملو كل أهلي أوخلوني وحدي
ماخذوني بسفرهم ماخذوني
عذبوني من مشو عذبوني
......
شلون بيه وإني بحسابي اروح
ويه ابويه حسين وطيب الجروح
تالي ماتالي أضل وحدي انوح
من مشيتو بعد ماتبقالي روح
ياهلي ومر الصبر .. وأنه عشت أعلى الجمر
أركض إني اعله الضعن ماصعدوني
چني مو بتهم مشو أهلي ونسوني
مارعوني أهل الكرم مارعوني
عذبوني من مشو عذبوني
......
گلبي خايف من حلم شفته وبچيت
يرسم جروحي الهوه من ودعيت
راحو أهلي وغير حزني مالگيت
تفرغ بيوت الأهل ماحسبيت
ماحسبت الدنيتي .. منها تكبر علتي
ساگو اضعون وحدوا من داري الاحباب
ينطي الوان الوجه لو يندگ الباب
حيروني اخوتي حيروني
عذبوني من مشو عذبوني
......
صوت عبد الله اسمعه أمن المهد
راح بالهودج ومايرجع بعد
من كثر نوحي ذبل بويه الجسد
گلبي يرجف ياهلي وراح الولد
والله حيره قصتي . مامثلها بلوتي
جيت الولي للمهد نام الاخو نام
بروحي كاروكك يعبد الله صفه اسهام
عطشوني وسافرو عطشوني
عذبوني من مشو عذبوني
......
الأخو هيبه ويفيي اعله الأخت
وإني من دون اخوتي بحزني متت
كله غيره اعله إخوته ماشفت
وحدي خلاني بحزن روحي التفت
يامصيبة دنيتي . وسط گلبي جمرتي
طفله إني وعليله وهذا قدري
تگضي الدنيا لجن مايگضي صبري
تعبوني يازمن تعبوني
عذبوني من مشو عذبوني
......
نگطعت الضنه وبعد ماضل أمل
ماوصل مكتوب إليه امن الأهل
والجسد من محنتي بويه نحل
لوسمع وني الصبح ذاب الجبل
بصدري مخنوك الهوه . ضاع من عندي الدوه
تعبوني بهل السفر واني شبديه
بيتي خالي ودمعة عيوني جريه
ودعوني إبلا أمل ودعوني
عذبوني من مشو عذبوني
......
علي محسن الفرطوسي
شديتو السفر لبعيد .. شلون أم البنين اتهيد
ترحلون ترحلون .. وعالخد دمعتي اتسيل
...
يهل ماشي تطر بالچول ودروب السفر خطره
يعباس الوصيه اوياك يبني بداعت الزهره
يوليدي الگلب ملچوم اعله زينب خوفي متحيره
ابذل غاية المجهود بجفك وفي الحره
ضحي بزندك وعينك .. لاخر قطره لحسينك
توفون توفون .. وعالخد دمعتي اتسيل
.....
عفتني محيره بعدك وعيني اعله الدرب صدت
ها هلبت ترد للدار زرعت اعله الدرب هلبت
يوليدي الگلب متعوب أو روحي بغيبتك تعبت
اني أربع زلم وديت بيهم كربله ارتجت
كلهم فدوه لعيونك .. يبو اليمه يخدمونك
يفزعون يفزعون .. وعالخد دمعتي اتسيل
.....
حگ ارباي أريدنه يولادي العهد توفون
ضليت أبأمل ملگه بدربك وزعيت عيون
يل اربعه اريدنكم إذا صوب الحرب تمشون
خلوها الزلم ترجف وضحو أرگاب لجل ام عون
من تتلاگه خيل بخيل .. النهار اصير ضلمة ليل
تزعلون تزعلون .. وعالخد دمعتي اتسيل
....
مكسورت گلب ضليت الدار بغيبتك وحشه
افك ريجي بدمع عيناي برساله ياهو انطرشه
يلگد فوگ ضهر الخيل ويهم روحه بالممشه
يوصل للعراق بليل يروي رويحتي العطشه
گلوله الگلب مكسور .. من فارگنه ضعن النور
تبعدون تبعدون .. وعالخد دمعتي اتسيل
...
رمشي ماطبگ باليل بيه اتسله من انعه
هلبت اسمع اخباره دهري لديرته يرجعه
ها ياكربله ابلواج بگلبي نارج امولعه
هد حيلي بسفرته حسين أخذ كل اهله أو ربعه
حشمت شكثر هونك .. شوي ريضلي بضعونك
تحملون تحملون .. وعالخد دمعتي اتسيل
....
إبن حذلم سمعته يگول رد ضعن المجد خالي
من داري أطلعت اركض وحشم حسين يالغالي
صدك مذبوح أبو السجاد وراس اعله الرمح عالي
بعدك شلي ابدنياي ولا هالعيشه تحلالي
مكسورة گلب ضليت .. موحش ضل عليه البيت
تشيلون تشيلون .. وعالخد دمعتي اتسيل
....
علي محسن الفرطوسي
من درت وجهك عليه بنضرتك شفت المنيه
بروحتك گلبي فجعته ياجرح بعدك تركته
▪️▪️▪️▪️▪️▪️▪️▪️
راح أبوي القبل يسندني بوجوده
الدنيا صارت من غيابه كلها سوده
خيمتي چانت يهل الوادم زنوده
لويصح بيدي اتركت كلشي اعله موده
رايح بسفره بعيده وعايف بنيته حميده
مر الموادع جرعته ياجرح بعدك تركته
▪️▪️▪️▪️▪️▪️▪️▪️
دربك اعتاب ونشد عنك مليته
ليل هجرك بويه بالدمعه اسهريته
راح مسلم مني وضل خالي بيته
الحزن والنوح من بعده هويته
من على قصر الاماره يضحي لحسين بقراره
عمري للدمعه نذرته ياجرح بعدك تركته
▪️▪️▪️▪️▪️▪️▪️▪️
غياب وجهك موسهل كاسر خواطر
بدرب الضعون انتظر يرجع مُسافر
يجيب من عندك خبر يحيي المشاعر
بلا وجودك والدي ماريده باجر
عمري گضيته بدمعتي تاكل بعمري صفنتي
گلبي ملچوم بحسرته ياجرح بعدك تركته
▪️▪️▪️▪️▪️▪️▪️▪️
ماشفت من دنيتي غير الاذيه
تختنگ روحي بحزن كل مغربيه
زغير عمري والجرح لايگ عليه
بأغله ناسي ليش صدمتني المنيه
بروحي مايبرد عذابي عشت كل عمري بمصابي
ليل الموادع سهرته ياجرح بعدك تركته
▪️▪️▪️▪️▪️▪️▪️▪️
مسح راسي حسين بيده ومن كلامه
من دمعته افهمت صرنه يتامه
اعرفت كلشي انتهه بلفت لثامه
بويه بعدك أقره عالدنيا السلامه
ارسم همومي بصفنتي بخدي نهران لدمعتي
ثوب الاسود من لبسته ياجرح بعدك تركته
▪️▪️▪️▪️▪️▪️▪️▪️
عميه عين الماتشوفك ياحبيبي
خلاف وجهك صارت الحسره نصيبي
چانت حچاياتك أمن امرض طبيبي
هسه بس دمعاتي وياي ونحيبي
العمر وياك شحلاته والد يحن لبناته
عمري من دونك كرهته ياجرح بعدك تركته
▪️▪️▪️▪️▪️▪️▪️▪️
علي محسن الفرطوسي
واحسيناه واحسيناه
*
طايح والرماح بصدره نيشان
وحگ جدي يصيح حسين عطشان
هيج يصير بيه الماله إخوان
على صدره الخيول مسويه ميدان
گام ورجع طاح / تطشر كل حيله
اخته أمن الخيام /. بالجفوف توميله
محد فزع ليه . / يهل الناس ويشيله
واحسيناه واحسيناه
****
ناس بسيف ناس برمح وحجار
من كثر الطعن ويه الرمل صار
يهل حسين هذا حسين طشار
الحوافر وزعت جسمه اويه الغبار
مسلوب الاثياب / والضلوع مهشومه
ضل جثه عريان / توزع بالحومه
حر الشمس چان / لفح ذيج ارسومه
واحسيناه واحسيناه
*
المصيبه هاي منها اتشيب رضعان
حبيب الله يضل ابغير أكفان
صدره يصير للطعنات ديوان
بدمه السيف يروه وهوه عطشان
ماضل طرف بيه / ماسحگته الخياله
رغم التعب ذاك / يصد عين لعياله
ياغربت حسين / والجفون هماله
واحسيناه واحسيناه
*
إطلعت بنت الحموله امن الصواوين
محتاره وتدور وين الحسين
يخويه منين اجيبن الك جفين
ويرد عباس يحرسها النساوين
ماضلت اخيام / والأطفال مذعوره
بين المچاتيل / تعنيت مجبوره
اشكي المن الحال /. والاخوان منحوره
واحسيناه واحسيناه
*
يبن أمي صفينه بغير حراس
وانته جثتك بالخيل تنداس
ليل الطف صعب ويريد عباس
موسهله طلعتي أبين هالناس
گوم أرجع اوياي. / تناديك يبن امها
بعد الخدر ذاك /. تجي الناس تهضمها
وينك يعباس / ينوماس كلمها
واحسيناه واحسيناه
*
علي محسن الفرطوسي
يمته اكبور البقيع نزورها
تحضر الشيعه وتوسم اصدورها
...
نحضر بيايوم ونسيل الدمع
وعالبقيع اندّوي العشره شمع
اقبور أهل المكرمه نور ويشع
يا كواكب مايغنص نورها
..
يا كواكب نور من رب السمه
اگبور متهدمه ابـ يادي ضالمه
گلبونه أمن الشوگ ليها مورمه
نور رب السمه يحيط بسورها
..
بسورها يحيط البخت والغانمه
گبور ماضاعت مثل نجم السمه
جارت اعليها الزمره الضالمه
ويه ال النبي ضهرت جورها
..
رغم ماجارت عليها أهل الحقد
ورغم ماهدمو گبور أهل المجد
هاي شيعتهم يجي يوم وترد
بعون الله الاضرحه يعمروها
...
إنعمر الاضرحه ونعلي القبب
الذهب مايحله إله اويه الذهب
شوگنه نطفيه وكل گلب التهب
الشيعه لازم يوم تأخذ دورها
...
يجي يوم وناخذ بثاراتنه
بسم طه وعترته راياتنه
ثارهم بعده تره مافاتنه
الدنيه بالمهدي تضوي بدورها
...
يضهر المهدي ومواكب لربعين
بالبقيع تروح تصرخ ياحسين
نلطم ونبجي. تره ترد السنين
هناكه ادلال الحسن انفورها
..
الدلال تفور ولـ مية هلّه
بحلگ مهدينه بحلاته البسمله
نزور وياه ونضيفه عد هله
وفاطمه ندواي بفزعنه كسورها
..
يابو صالح الك كسرات وهضم
اباب فاطم باجر نزيد اللطم
اهواي الك ثارات شنحجي شنضم
وربك بجفك الدنيه يدورها
...
وعله الباقر والحسن تبجي بحنين
وزين العباد وكبر ام البنين
ونسمع أمن الصادق الحن والونين
اهلك انرد ونشيد دّورها
....
علي محسن الفرطوسي
جرحك عني غطيه
مااكدر اصد ليه
إني بروحي حسرات
وبدمعاتي احاجيه
...
يهل الوادم صعب ماينشرح وضعي
اعله والدنه بهضم من انفجر دمعي
يبو اتراب بغيابك انكسر ضلعي
وبقيت اعله الدمع بالليل افز وانعي
يااكلبي شبعد بيك
خليني أكثر اذيك
روحي نتسرت آهات
وبدمعاتي احاجيه
...
مثل جمر الحطب لمن تلوحه الريح
هيج اعليك تسعر مهجتي وتصيح
زينب من بعد عينك تگوم اطيح
اكعد ياعلي ايتامك دمعها يسيح
راحت احلى أيام
بعدك صرنه ايتام
بكلبي شكد جراحات
وبدمعاتي احاجيه
...
رافگدت الدمع والنوح والحسبات
دليلي أمن الهظم ملجوم والحسرات
اول ليله من دونك يبونه نبات
شحسبلك جرعنه أمن الزمن لجمات
أهيم بعالم النوح
كلبي اعليك مجروح
بقت أبالي چلمات
وبدمعاتي احاجيه
...
فگد الأب صعب منه الدليل يذوب
ومن جرت حسرته تعرفه المتعوب
كابرت الجره واصبر بعد جم دوب
الليله ابفگد حيدر خل تذوب گلوب
ياكسرت دليلي
والرايح خليلي
اجر باليل ويلات
وبدمعاتي احاجيه
...
باجر عيد بس ياعيد من دونك
اليتامه وياهم بهل العيد يردونك
مشتاقين بويه لشوفت عيونك
صعب من بين ادينه لو يشيعونك
كل ايامي تابوت
حزني بصدري منحوت
بدمعنه الليله انبات
وبدمعاتي احاجيه
...
علي محسن الفرطوسي
گضه عمري بنوحي .. انعه لمذبوحي
لو طلعت روحي .. بالموت ارتاح
ياگلبي الدامي .. قربت أيامي
خاتمة آلامي .. الهم ينزاح
***
اكثر كلمه جرحتني علي گالو سبيه
غربه ولچمه ايامي بالدموع الجريه
راحوا أخوتي كلهم ولا ردو عليه
المن ضلتي لوحدي هلا بجيت المنيه
أنه الضيعوني أهلي ورحت ويه الشماته
من عالي الرمح ويصدلي المدلل خواته
حته بموتته يحرسني ياناس شغلاته
ارتاح بموتي .. واغفه بتابوتي
وتحضرني اخوتي .. ويرجعلي الراح
يحضرني الضامي .. قربت أيامي
خاتمة آلامي .. الهم ينزاح
***
لذيج الگعده مشتاگه اويه اخوي الكله غيره
صعبه بغربه موتتها تره بنت العشيره
عمري جروح خلصته وبعد هم موتي حيره
رحت اويه الغرب ميته اولا چني الاميره
لو راح الاخو محد يجي يعوض مكانه
چانت چلمة الخويه شكثر حلوه بلسانه
وهسه بموتي احتاج الوجوده و الامانه
جارحني مصابه .. عذبني غيابه
الدمعه السجابه .. لوگلبي الطاح
ريتك گدامي .. قربت أيامي
خاتمة آلامي .. الهم ينزاح
***
غريبه اجنازتي تطلع ولا تفزع حموله
گلبي ياهو إلي يبشره ويگول إخوتها ذوله
للطف عن خبر موتي حچي ماوصلوله
عندي شگد عتب يم الگمر ياهو اليگوله
هاي مدللتكم حته بالموته غريبه
تطلع من مصيبه وتدخل بثاني مصيبه
ماتت زينب ومحد حضرها ياعجيبه
رادت جيتكم .. شكد محتاجتكم
اترف رايتكم .. بدمعه اويه اصياح
يارفعة هامي .. قربت أيامي
خاتمة آلامي .. الهم ينزاح
***
اني الميته بالحسره أني الضيعوني
ضلت كربله ويايه صور إلها بعيوني
ثچيله موتت اخواني بعدهم موتوني
رداني الزمن مسبيه غربه الشيعوني
بعد جم دوب أضل أنحب صعب غيابي يلفون
أموت بغربتي وحدي ولا غمضولي العيون
ردت وكفتهم اويايه ردت الــ نعشي إمتون
گلبي ولجماته .. وحيرة دگاته
اخر ساعاته .. گاطع سباح
ياصوت ايتامي .. قربت أيامي
خاتمة آلامي .. الهم ينزاح
***
ياموتي تره الخوه تضل عازتها عازه
تكسر خاطر الجناز إذا وحشه الجنازه
أسياد البشر اهلي شعجب هيج أنتجازه
موتي بديرة الغربه عليه أشكد توازه
أريد بكربله موتي اندفن مابين الاحباب
أريد اتمدد وياهم يضمني نفس الاتراب
تراني ميته من ضيمي وهجرهم هاي الأسباب
يمهم دفنوني .. يلي إتشيعوني
كون تودوني .. نعش اعله ارماح
آخر أحلامي .. قربت أيامي
خاتمة آلامي .. الهم ينزاح
***
عيني تشوبح لدربك وحن حنة زياره
شوگي ياكل بصدري ألك مثل الشراره
كفالي اعتذر مگطوعه ايمينه ويساره
واني بكل صباح وكل مسه انخه الغياره
يوميه الهج بذكره متت واني بحسرتي
أيامي گضت بس ماگضت بعدك غربتي
أهل الشام جروحني ولا نشفت دمعتي
مگطوعه اخباره .. وماجتني ابشاره
بصدري اتشب ناره .. بدرك مالاح
يوگف ويحامي .. قربت أيامي
خاتمة آلامي .. الهم ينزاح
***
علي محسن الفرطوسي
صبراً جميلاً عالجرح .. ليل وذبح .. ماسلهمت عيني
أني الشفت وجه الصبح .. فوگ الرمح.. بعيونه يحاچيني
شما ابتعد عن كربله تتقرب الآلام
بنوگ الهزل سوط وحبل تتعذب الأيتام
راسك يصدلي أمن الرمح يحچيلي جرح الشام
كل خطوه چانتلي جرح هيمه وهظم ضلام
طبعه الحنين ايموته الفراگ .. گلبي مشتاگ .. ياجرحي
عشرتنه صارت ذكره يحسين .. بيسر ماشين .. ياجرحي
لوبرد جفي گلبي محروگ .. وحنت النوگ .. ياجرحي
شيبرده گلبي الملتهب
زينب وروح اويه الغرب
*
طرينه ياخويه الفله .. بهل القافله .. والتحدي ناس اجناب
تدري برقيه امدلله .. خدها امتله .. بدمعت حزن وتراب
خويه المثلها مدلله موش بسبي تنگاد
چفي اويه چفها بالحبل هالسفره ماتنراد
صعبه المصايب من شفت مگيد علي السجاد
لو تنزل همومي بجبل إبلا شك يصير ارماد
إني الأميره وبنت الأجواد .. صعبه انگاد .. يخواني
سديت آذاني من الاصياح .. يمته ارتاح .. يخواني
المثلي مو مالت دواوين .. خدري يحسين .. يخواني
إني إلي رباني علي
مو بالمجالس أنولي
*
أمشي بدرب كله خطر .. چان السفر .. كل خطوه بيه موتي
بعيني ترك هجرك أثر .. دمعي إنهمر .. ومبحوح ألك صوتي
بچعب الرمح خويه اندفع شگفيت أنه بجفوف
خلونه من بلد لبلد يبن أمي احنه انطوف
نسمع شتم نشبع هظم چم طفله رجفت خوف
ضهر الهزل ماينحمل خويه بعد شنشوف
تعثر الناگه وخوفنه نطيح .. من تهب ريح .. بغيابك
خلصان گلبي خويه خلصان .. هوايه تعبان .. بغيابك
ماشفت بعدك غير الجروح .. تطلع الروح .. بغيابك
عين الدمع لو سلهمت
تفز برعب دمعه رتوت
*
حگي إذا زدت العتب .. بيتي انهب .. ومن الزلم خالي
أم الخدر ذاك اللقب .. اسمي نتسب .. ويه السبي تالي
ثغرك يبو اليمه نضرب بالخيزران شلون
ياحاضر الشده علي أحضر يبويه أم عون
ياحيرت الماعدها أهل تبقه تدير عيون
تترجه اهلها بالشدد وخوتها إيحضرون
دمعات عيني ألك يحسين.. ياضوه العين .. بعيوني
شديت حيلي وضهري مكسور .. وناري تفور .. بعيوني
منين ماباوع على الناس .. ماكو عباس .. بعيوني
آمنين اجيبن كافلي
ويگلي يختي ادللي
*
حته برمش عيني اتضح .. دمعي الرشح .. يكتب جرح ماطاب
من هالبشر گلبي نجرح .. ضعني نزح .. والتحدي موش أحباب
بليل الخرابه عالترب ويه اليتامه نبات
من كربله باقي أثر بجفوفي هالچويات
تلگونه بالشام بفرح صعبه أحنه علويات
شحسب يخويه ياجرح ويامكثر اللچمات
يدرون ضعن حسين عطشان.. تلگتنه نسوان .. شتمونه
بدو الماي اگبال الاطفال .. والدمع سال .. شتمونه
بحجار شمرو ضعني بحجار .. گلبي محتار .. شتمونه
راسك اشوفه عالرمح
بذاك الحجر لچمو جرح
*
علي محسن الفرطوسي
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------
https://youtu.be/r0LJhqkCI_w?si=wQt5YIzraPVoWNeh
Читать полностью…
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------