1850
مختصّه بنشر جميع القصائد الحسينيه / احنه غير حسين ماعدنه وسيله للتواصل مع الشاعر @a313l1
صلاة الطف نحور وﭼـف ركض للمشرعه
قصر صلّن بدمه تحنن زنود مكطعه
النهر يركع الارض تفزع العقيله طالِعِه
تصدقنه بمناحرنه وتراجي مشلعه
اجه الخنصر مُقاتل بلاخاتم ينازل
ابد ماترحم الناس
...
لحظة اوداعك آليمه كلبي حاسس بـالهضيمه
ودعاني وكل خواتي يمه خلصت كل حياتي
***
لحظة التوديع صعبه ونته ناوي اعله الوداع
وبيك كلنه تمسكينه
الدنيه ماهي الدنيه بعدك كلشي بي نبرة ضياع
صعبه لو يطلع ولينه
محسبه حته الريح يجرح من شمر ياخذ طباع
خوفي ايحرك عبينه
الخيمه يحركوها بعدك وحنه نركض بالبقاع
لوصحت ياهو اليجينه
هذه وكثر لو عفتني وحضرت للسوط متني
وياك ضاعت امنياتي يمه خلصت كل حياتي
***
الليل مجهول اليمرني وبضلامه شكد عذاب
ضاع اخونه وحنه ضعنه
من كلتلي وداعة الله من كلمتك كلبي ذاب
ومحنة التوديع محنه
خلي اشم صدرك يخويه وخلي ايدك عالحجاب
بيك اشمن ريحة امنه
خيول ورماح وعساكر تمزج الدم بالتراب
ودمك انته غالي عدنه
من كلت اخر كلامك وحشة صارت كل خيامك
وجم طفل لازم عباتي يمه خلصة كل حياتي
***
لورحت من عدنه خويه گلي بعدك وين اروح
وياملاذ البي اماني
كربلاء صحراء جرده وكلبي غازيته الجروح
وتدري هجرك غيراني
لوتطيح يطيح عرشي وحته عرش الله ينوح
اى يكلبي شكد يعاني
صعبه لو إركب هزيله وعالرمح راسك يلوح
راح اكلك زينب اني
اني يحسين الاميره لاكن إخذوني اسيره
من طحت طاحت غلاتي يمه خلصة كل حياتي
***
من بعيد انضر قتالك واني اعثر بالعباه
وعالوجه صارت وكعتي
شفتك امن المهر طايح وكلبي ماادري شجاه
والحجر هم طر جبهتي
ماشفت طولك يخويه تهت مني ودربي تاه
ياغلاتي وياحسرتي
تنذبح كعبة حياتي حسين قربان اللاه
وصوتك يردد يخيتي
صاير المذبح مكانك واني محتاجه امانك
موتتك يعني مماتي يمه خلصت كل حياتي
***
ودعتني انته اول واني إودعك من بعيد
رايحه بدرب اليسر
قبل جفك فوك جفي وهسه اغلال وحديد
وحادي ضعوني شمر
فـجـر عـاشـر دوهناني مـنـي مـاخذ جم وريد
اخذ مني اغله البشر
تذكرت من جينه للطف وكل اخوتي ايد بيد
وهسه وحدي بالخطر
بالبشر ماكو مثلهم عندي اخوه وافتقدهم
خدري جان اعظم صفاتي يمه خلصت كل حياتي
***
للشاعر علي محسن الفرطوسي
ناده كلبي الضامي ياربيع احلامي
وحته صوت خيامي راح الاكبر
❁❁❁❁❁❁
راح الاكـبـر مني ﭼـن مـاي وتـبـده
ونكـسـر مرتين ضهري من يسنده
نهدم حيلي والصبر خلصته عنده
منحي ودمعاتي نزلت وحده وحده
بينك ومابيني بس ذبح تانيني
بدمه آخضب هامي راح الاكبر
❁❁❁❁❁❁
الدنيه بعيوني صفت ضلمه وكئيبه
بعد مابي حيل اتحمل مصيبه
ونته إگبالي طحت جثه خضيبه
من يساعدني اعله الاكبر حته اجيبه
لوحدّي ولاناصر شلون اردك حاير
مابيه اجر اجدامي راح الاكبر
❁❁❁❁❁❁
للخيم رديت بس اعصر بديه
شراح اكول لسكنه يابويه ورقيه
من يسألني الاكبر ماله جيه
وعمتك وامك يشوفن كسره بيه
منحني واتحسر شكلي حيل تغير
ستقبلتني ايتامي راح الاكبر
❁❁❁❁❁❁
صرخة تدوي ياعلي مابين الاخيام
راجع وحيدي وٱمسح روس الايتام
علي يبني وداعتك گلب امك انضام
بعد عينك ريته عمري لحضه مادام
للحرب راح اطلع وعينك لجلك تدمع
وينسلب هندامي راح الاكبر
❁❁❁❁❁❁
للحرب رديت واني امسح دمعتي
يبني هجرك والعطش فتت ﭼـبتي
ودري بويه بالحجر تنطر جبهتي
وداعت الله ياعلي المن عفتني
كاسر اشجم خاطر دمع ابوك ايگاطر
گربت ايامي راح الاكبر
❁❁❁❁❁❁
ش/ علي محسن الفرطوسي
توجهو صوب الخيم
بجف حبيب يرف علم
يااباعبدالله يااباعبدالله
....
جن ملك وأحدهم شيبه القايدهم
للخيم مگصدهم استمع هوستهم
لباب خيمة زينب تعنو يهالي الغيره
ارقه نوع حسين حبه شكد صعب تفسيره
ام الخدر نفديها كلنه ولاتضل بحيره
شيخهم يمها بتسم
بجف حبيب يرف علم
يااباعبدالله يااباعبدالله
......
من حبيب حجايه يلا شيلو الرايه
بزودنه ندگ ثايه هلا بالوفايه
شيخهم ابن مضاهر للخيم جاباهم
اتفقو اعله حجايه وحده حسين بس مولاهم
گبال زينب هل دمعته وعالخدر وصاهم
بحذر لو حرك قدم
بجف حبيب يرف علم
يااباعبدالله يااباعبدالله
.....
أمني يابت حيدر فدوه الج هالمنحر
بخدمتج نتوذر ونرد هذا العسكر
باجر تصير الحرايب وانتي الي تشوفينه
نروح دون حسين فدوه الشمر نفگس عينه
يا أميرة ال هاشم كلمة الج انطينه
احنه ذوله أهل الشيم
بجف حبيب يرف علم
يااباعبدالله يااباعبدالله
.....
هاي جنها طلابه واحنه كلنه ذيابه
بشري يم عصابه الطف يصير ترابه
نعجن الدم بالتراب وكربلاء تضج باجر
الخيل تعثر على الخيل ومايضل كل كافر
نشيل راسج يالعقيله نسوي الماصاير
الراس بالراس انردم
بجف حبيب يرف علم
يااباعبدالله يااباعبدالله
...
تنكسر رايتهم تنسمع صرختهم
تنهزم قادتهم مانهم كثرتهم
احنه صح سبعين واحد بالعدد شافونه
بس بدينه أعمارهم يابت علي مرهونه
والله ماكدرو علينه ابد ماهزمونه
جيشهم صاير عدم
بجف حبيب يرف علم
يااباعبدالله يااباعبدالله
......
علي محسن الفرطوسي
.....
هاي المواقف للزلم موياهو اجه وگال انه
كون ليضحي من صدگ موبس حجي بالسانه
العاشگ يقدم منحره ويهجر هله وخوانه
السلامُ على سفير الحسين مسلم ابن عقيل
محتاره والمدمع يصب
بعدك يبو الغيره انضرب
عباس هاضمنه اليسر
هاي انه هاي ام الخدر
....
مو حلوه اطلع وِحَدّي لا هودج ولارايه
ياخويه من بعد الخدر زينب سبوها سبايه
مهضومة ياوسفه انسطر لراسك اجي شكايه
زينب يِعت بيها الشمر وسمعني خويه حجايه
لوتبجي دفعوها برمح
وراوها راس المنذبح
ودوني گوه للقصر
هاي انه هاي ام الخدر
...........
ختاروهه عرجه ناگتي حته بمشيها اتعذب
ينزلوني بنص الدرب والصعبه وحدي أمن اركب
يقدمولي ماي ابلا رحم بالسوط رادوني اشرب
يهضمني بفعاله الشمر بلسانه كل ساعه انسب
يشتمني ويسب والدي
يصرخ علينه ويعتدي
وبراس اخونه ننجبر
هاي انه هاي ام الخدر
.....
مانستراح أمن التعب درب اليسر تعبنه
بعد المهابه والخدر ياهو اليجي يضربنه
يتعمد يذلني الشمر بكعب الرمح يدفعنه
اني اميره وماأذل بس الدمع يفضحنه
حاولت اضم خويه الدمع
ولاصوتي يمهم ينسمع
كلما يبجيني الشمر
هاي انه هاي ام الخدر
....
راسك اشوفه اعله الرمح يسولف بعينه ويانه
ضربة عمود بهامتك وباقي السهم بـ مجانه
من جرة حبال الكفر خويه شكثر تعبانه
عباس هايه بيا وكت يدفعوني واعثر انه
راسك اشوفه المنخضب
مثل المطر دمك يصب
كلما اشوفك انقهر
هاي انه هاي ام الخدر
....
اذاني أكثر باليسر وتعبني سوگ الكوفه
تتفرج اعلينه الخلگ واني بحبل مجتوفه
جدامي شتمو فاطمة والقصر دگ دفوفه
ابن ازياد راسك نزله حته اليتامه تشوفه
ويگلي هذه كافلج
جاوينه مايفزع الج
گدامة راداني انكسر
هاي انه هاي ام الخدر
.......
علي محسن الفرطوسي
يمه يجاسم ياضوه العين
يمه يجاسم ياضوه العين
......
طالع شباب أمن الخيم مثل البدر جماله
لايگ عليه درع الحرب سيفه بيمينه شاله
سبحانه رب الصوره ياهيبته وكماله
مثل الفراشة بالخيم وعله الخصم زلزاله
صافن الجيش يروح لاوين
يمه يجاسم ياضوه العين
.....
ماخذ جمال أمن الورد بس بالحرب حسامه
مثل الكمر وكت الحرب يتحول القيامه
بركان غيضه لويطگ ماتنفع الندامه
فدوه اروح لغيرته ويافزعته لعمامه
ناذر حياته فدوه لحسين
يمه يجاسم ياضوه العين
.....
عريس ماهمه العرس شاف الحسين بغربه
متربي بمضيف الحسن من صغره شايل جربه
ومدربه عباس الكمر وحسين كافل گلبه
بعيونه يخزر عالزلم خيال ياهو يگربه
يضرب الزلمه يصير نصين
يمه يجاسم ياضوه العين
...
انضر عليه من الخيم عفيه ابني الذلاهم
مايستقر وضع الحرب مثل الغنم سواهم
اسمع جماجم تنكسر سيف الغضب خذاهم
راواهم نجوم الضهر من هجمته بچاهم
بعيونه ينضرهم نساوين
يمه يجاسم ياضوه العين
...
جسام من طب للحرب حنطة بهوه وذراهه
اصغير العمر لمن طلع لاكن زلم كسراهه
متعني يذل الشمر گد چلمته وسواهه
ياأبن ابوه يبرز إله رگاب ولسن كصاهه
يگص الشوراب والمفر وين
يمه يجاسم ياضوه العين
....
علي محسن الفرطوسي
وحدي عفتوني وأحس دلالي ذايب
حگي من أبدي بعتابي يالحبايب
مالي والي وهذا حالي
بالغرب بالغرب
....
ليلي يبدي واني وحدي
حايره ابأمر اليتامى و الضياع
ودعوني حيروني
ونشلع گلبي شكثر من هالوداع
ديره غربه ابقه صعبه
وصبعه لو اطلع وحيده وهايه گاع
بيها عسكر ومضلم البر
خبر موتك والسبي يبن امي شاع
صعبه اعوفك صعبه امشي بهالمسيره
ناس غربه والوجه لاوين اديره
يادلالي وهذا حالي
بالغرب بالغرب
.....
ماكو خيمه وجم يتيمه
ضاعت وجم وحده داستها الحوافر
منين اجيلك واشتكيلك
وتدري درب المعركة زرعوه نواضر
والنضرني مارحمني
يركض بسوطه ورايه بنص عساكر
صعبه اعثر بالمعسكر
خويه وبعالي الشمس يسبوني باجر
والشمر مابيه رحم حاقد يجيني
يشتم امي فاطمة ويسطرها عيني
لو اجالي وهذا حالي
بالغرب بالغرب
....
بتالي ليلي ماتجيلي
آمنين اجيبن مثلك يحامي بناتك
وين امشي ضاع كلشي
لااشوفن طولك ولاضِلّ عباتك
برمح عالي اعتنالي
راسك المرفوع دور ضايعاتك
من وصلتك خويه شفتك
منطحن من الخيول الدايساتك
ماعرفتك بالرمل جسم توزع
عطرك ايدليني اوناتك اسمع
باليالي وهذا حالي
بالغرب بالغرب
....
طر صباحي اشتد نياحي
بالحبل متعني الذابح ولينه
يللّه اطلعي بسرعه ودعي
ضعنج لقصر الحكومه ماخذينه
شلون اعوفك وين اشوفك
جسمك بطول الأرض اموزعينه
للشريعه خبر ذيعه
راحت اختك والشمر مارحم بينه
كل لبو فاضل مشت زينب وحيده
ماتجي تشگ الارض ضعنك تعيده
دمعي هالي وهذا حالي
بالغرب بالغرب
...
اشتد عطشنه شكد تعبنه
جابو الماي وحرام انجان اضوگه
ماشربنه ولاسكتنه
فيض دمعي يغرگ الحادي أويه نوگه
دخلونه الكوفه اجونه
هالبلد تعبنه ياعباس سوگه
شتمونه بحجر جونه
انگطع ياخويه گلبي من عروگه
اعتب وهذا العتب يجرح دليلك
حسين راسك شاهد اشصار بعليلك
صوت اجالي وهذا حالي
بالغرب بالغرب
،،،،
علي محسن الفرطوسي
طايح عالنهر جيته وحضنته
يحزام الضهر ضهري كسرته
ثق يابالفضل بعيوني غربه
ارجع منهضم للخيمه صعبه
ضهري كسرته
....
عباس رد لخيمتك موتك تره مو وكته
مهضوم ابقه لوِحَدّي موتي بغيابك شفته
مفرع إجيت أمن الخيم الّمن أخيك عفته
اعثر وگوم بحسرتي محتار شي ماكو أنته
اركض والدمع يجري اعله خدي
اصرخ منفجع خلاني وحدي
كاشف كُربتي مرتني كُربه
ارجع منهضم للخيمه صعبه
ضهري كسرته
....
اجدامي مانگلّتني ابد وهالحاله اول مره
اكعد يحماي الخدر زينب الك منتضره
مجروحه اديه أمن الحجر عثريت اشجم عثره
الماعده اخو أبين الغرب چاياهو يسند ضهره
ستوحدني العدو بعدك يعباس
الماعنده اخو تستوحده الناس
لفراگك حِرت يادمع اصبه
ارجع منهضم للخيمه صعبه
ضهري كسرته
...
شفتك تجود بحسرتك وعيونك اعله خيامك
حاجيني يابعد العمر ياهو الـ مطشر هامك
عباس رد لخيمتك اگعد وحامي ايتامك
لاتعتذر يابالفضل الموت موش اولامك
امسح دمك وگوم النه نرجع
گاعد يمك بحسره اويه مدمع
ذابن كالشمع كلبي اويه كلبه
ارجع منهضم للخيمه صعبه
ضهري كسرته
....
لاجود اخوي ولاعلم والسهم نام بعينه
خجلان ترجع للخيم يامن وعدت اسكينه
من هسه الجيش استعد بالنار يوصل لينه
واني ياعباس انذبح باجر شمر يولينه
ياسيف الذبح بعدك يجينه
ليل ابلا صبح باجر علينه
اسمك عالنهر بدموعي اكتبه
ارجع منهضم للخيمه صعبه
ضهري كسرته
.....
روحك ياعباس اطلعت لوروحي هاي الطلعت
مخنوگ راجع للخيم شحجي الحرم لو سئلت
عباس مات اعله النهر يعني الخيام احتركت
زينب أخيج مايرد وللسبي الناس اجتمعت
زينب للسبي حضري اليتامه
لعباس الأبي مفضوخه هامه
مايرجع بعد بجفوفه جربه
ارجع منهضم للخيمه صعبه
ضهري كسرته
...
علي محسن الفرطرسي
وحده ضربته سيفه بيمنته
الاكبر الاكبر، ياشيخ المراجل
*******
طلع من خيمته بمهره وتجدم
صاح ابأعله صوته
اليرشه بماي طبعه يرشه بالدم
ويدنه يمه موته
مثل الموت الأكبر من تقدم
يافوته التفوته
يطشر بالزلم وبكيفه لو لم
جن حيدر غزوته
تصطر خزرته سيفه بيمنته
الاكبر الاكبر، ياشيخ المراجل
*******
علي لو حيدره هذا الي هاجم
تفتر رحه الحومه
بحوافر مهرته يدوس الجماجم
ماواحد يلومه
بسجيل الغضب طالع يِهاجم
يوم الفيل يومه
يگضي الجيش كله اليوم عازم
الشمر ذلّه اويه كومه
فارت غيرته سيفه بيمنته
الاكبر الاكبر، ياشيخ المراجل
*******
حسبهم كم حجاب اگباله واگف
ماكو زلمه بيهم
مابيهم رجل وگت المواقف
شردو لويجيهم
بعيونه يشوف الشمر خايف
الطف ضايگ عليهم
مابيهم كفو گدامه شايف
الزلم لبسو عبيهم
لابس لامته سيفه بيمنته
الاكبر الاكبر، ياشيخ المراجل
*******
ضجت كربلاء والموت حاير
كلشي گباله صافن
جن يوم القيامة بسيفه صاير
جم رجال دافن
اليتقدم للأكبر راسه طاير
الرگب للسيف گامن
واليشرد تدوس اعليه حوافر
اعله روحه ياهو يامن
بالطف وگفته سيفه بيمنته
الاكبر الاكبر، ياشيخ المراجل
*******
فته شُبه النبي طالع عليهم
نوره من محمد
وبهيبة علي لمن يجيهم
علي ثاني تجدد
السمه فوگ الأرض طبگت عليهم
سالم رجع محد
صفو مثل الحرم تسمع بجيهم
الحومه اعليه تشهد
ماخذ رادته سيفه بيمنته
الاكبر الاكبر، ياشيخ المراجل
*******
علي محسن الفرطوسي
على ضعونك سلامي
يبعد اهلي وعمامي
مشو عني وإنه بحزني اناطرهم
.....
هاي انه ام كمر عدنان انه أم البنين انه
مشو ولدي بضعن مهيوب ودليلي حاطته حزانه
نذر كلهم لبو السجاد خدم مابين ذرعانه
وابوفاضل وصيتي أوياه يقدم بيده اخوانه
نذرت أولادي كلهم
وبعد تخدمك امهم
ولو عشرة يبو الأكبر اقدمهم
.....
مشو عني وإنه بحزني بقيت اترجه جيتهم
ضعن ماخذ بني هاشم الكمر يحرس عقيلتهم
اخذ اربع بدور أوياه وركد حيلي اويه مشيتهم
بقيت اتنطر الساعي يبشرني برسالتهم
خبرهم ماوصلني
ولاطارش يمرني
على دروبه اگضي الليل أهم بيهم
....
يكولون الصبر مريود وبعدهم ياصبر اصبر
حزن كلبي بعد عيناك لحزن يعقوب الف يعبر
ييوسف عمري يمته تعود وقميصك بالبشاره يمر
اعيش بعالمك يحسين وبحبك طعم للمر
حلاة سنيني اخدمك
حياتي وموتي يمك
عمر ناذرته للخدمة وخدمنهم
....
على دروبك سهرت الليل مثل الفاگدات انعه
ضعن ماخذ ضوه الله وياه وتأمل الك رجعه
عليكم يعمن عيوني وذوبن ذوبت الشمعه
حيلي أمن الهجر يرخه وموت بعالم الدمعه
ذبل عودي بغيابك
نفزف دمعي اعله بابك
شبح وجهي ونزل دمعي لضعينتهم
.....
بعدني انتضر يحسين ادموع شكثر هليت
عرفت الدنيا غداره ومن بعدك وحش بالبيت
المن حيلي تالي الليل أو يطشر إذا ونيت
هل الشهر الحزن بالنوح لاكن انته ماهليت
جرح ماكو مثيله
اون مثل العليله
ثگل حملي يبعد اهلي بمحاملهم
.....
خالي البيت يهل البيت وماطلعت بعد شمسه
اون اعليك ليل نهار ومن عشرتكم اشأنسه
والمثلي شلون تنام بدمع جفني صبح وامسه
على دروب السفر تانيت مثل المنگطع نفسه
اساهر بالمصيبه
گلب عاشر نحيبه
قرب موتي وشبح لوني شبعد منهم
.....
علي محسن الفرطوسي
قصيدة للعليله
......
گلبي الليله سالفته
راح وما أخذ بنته
ميت گلبي بالهجران
واني عيوني ناطرته
....
اوكف عله طولي حزن وتعثر بحسباتي
خالي صفه بيت الاهل من اخوتي وعماتي
باليل اسولف عالسفر بطول الدرب جلماتي
منتضرتك ترجع الي ومحضره اهديماتي
كلشي يصيحك احضرني
وينك يلي هاجرني
فايض لجله بيه الشوگ
وگلبي الحسرة كاسرته
....
كلبي يسولف عن سفر عن هودج وعن ناگه
والله بغيابك يالرحت الشوفتك مشتاگة
روحي اويه روحه امعلگه مثل الشجر واوراگه
يدرون الي يفارگ أهل ناره تضل حراگه
راحو واني انطرهم
ماردلي خبر منهم
وينك ياحبيب الروح
راح وبعد ماشفته
.....
وكتي صبح يفتر عكس ومن عندي اخذ احبابي
ليل الهجر رايد سهر ورايد عتب وعتابي
فوگ المرض صار الحزن يابويه لازم بابي
كل ضني ماتتركني ابد ومگلوب صار حسابي
عطرك بالهوه اشتمه
صارت دنيتي ضلمة
شنهي الآخرك يحسين
لاانته ولا علي جبته
......
طبع اليفاركله مُحب كل وكته يگضيه ينحب
والي يفاركله اخو بالخيمه جنه مسلب
يالغالي مو گلبي انطعن ونارك بعدهي تلهب
عبدالله مهده من اصد اتمنه وياه العب
صارت عيشتي بدمعي
طفله ومنكسر ضلعي
كلشي بروحي صار يصيح
هجرك هذه مو وكته
...
لاجت رساله ولاخبر مدري شمأخره الساعي
لو غمض بليل الجفن اسمع بصوتي الناعي
فاطمة راحو كل هلج للعتب ماضل داعي
حسينج يرامونه بحجر هالصوت شگ اسماعي
عمري اطشر بليلي
وينك يابعد حيلي
كالو سلبوه حسين
والله ارحملي لو ميته
....
علي محسن الفرطوسي
فاضحني الغرام عاشگ وبهيام
غيرك ياحُسين لو اعشگ حرام
.......
گلبي مفتون بغرامه
وكل حواس الخمسة تعرف انته وين
طاير بعالم هيامه
اعمه واندلّك حبيبي بـلايه عين
أقره عالدنيه السلامة
والعشگ قانونه وحده أمن الـ ثنين
لومهابه لو ندامه
وأنه مهيوب ورفع قدري الحُسين
امشي بديرتي رافع هامتي
ملهوف واجيك أبدي بالسلام
.....
من صغر سالك طريقه
الدنيه جذبه وشاهدت انته الصحيح
مو وهم شفتك حقيقه
تارس العالم حنانك يالذبيح
العطش يبس رحيقه
والارض طهرها من دمه اليسيح
الذبح ياهو اليطيقه
منذبح انته اعله مودي و ماأطيح
من دونك اضيع. يل گلبك وسيع
لو ماأنته بِيه. مايحله الكلام
،،،،،،
اعترف لو ماوجودك
مالي قيمه بهالحياة ولاوجود
الله خالقني اعله مودك
خادمك، عبدك، اسيرك، بيك اذود
علمتني من صمودك
ادبتني، وهذبتني، انته للدنيه العمود
مايحد عشگي حدودك
ياقوافي اتفسر الحب يالودود
اعطش ونته ماي. تبقه سر هواي
بتفسيرك احير. عيني ماتنام
،،،،
مجلب بطارف ثيابك
عايف الدنيه بكفاي ومعتنيك
الگالو اهتم بشبابك
مادرو طعم الحياة أبين اديك
عمري اگضيه اعله بابك
حبي الاول انته ومالك شريك
ماطفت جمرة مُصابك
خيمة شعلني اعله بابك من اجيك
عشقي كربلاء. رايات وعزاء
تخلي بروحي كون. جمره امن الخيام
،،،،
دمك امأسس منابر
عالرمح راسك رسم النه الحياة
كل حدث بالدنيه عابر
وانته باقي للبشر مركب نجاة
منذبح لاكن تكابر
ماتطخ راسك رفعته اعله القناة
منكسر، ولكسري جابر
هالتعب كلّه اعله مودي شهالصفات
متعوب شكثر. صدرك منكسر
رايدني اعيش، دنياي بسلام
،،،،
علي محسن الفرطوسي
خلّيني يحسيني / اوياك اصيرن عابسك
ادبني قربني / اختنگ وتنفسك
هوايه تِعَبني بخدمتك هوايه غِرگني برحمتك
مالي غيرك
&&&&&&&&&&&&&&&&&&&
التعب لجل التحبه شگد حلو يصير التعب
تراب الحسينيه عندي هوايه اغله أمن الذهب
ميت وأصحه لدمعتي لو شهر حزنك گرب
الدمع واللطم لجلك واجب ومو مُستحب
كل عمري وكل فكري / سنيني تگضي بمجلسك
اركضلك وتعبلك / وكل شبابي فدوه الك
جرني جر كوني هجرتك هوايه غرگني برحمتك
&&&&&&&&&&&&&&&&&&&
المايهل دمعه لمصابك هوه والمامش سوه
حسين للمخنوگ يفزع يدخل بريته هوه
هايه دنيانه ضلام وانته للدنيه ضوه
گلبي مخلوق اعله مودك فشله لوغيرك هوه
معشوگي بعروگي / تفتر انته أويل الدمه
حبيتك نضريتك / غيمه وبعينك ضمه
لاذت الروح اعله بختك هوايه غرگني برحمتك
&&&&&&&&&&&&&&&&&&&
الصلاة والصوم واجب والعزاء هم واجب
كلمن يسجل حضوره كون محد غايب
فاطمة تفتح سجل الخدمة والنه تراقب
موقفك بيضه بدمعتك خلّي گلبك ذايب
سجليني. اوكتبيني / حاضر بهاي العزيه
بدمعاتي وحسراتي / اگبالج اوگف يالزجيه
أمن الذهب اغله دمعتك هوايه غرگني برحمتك
&&&&&&&&&&&&&&&&&&&
المُحصل من حضورك راح ترضه الزهره
وإلي ترضه اعليه فاطم الله يرفع قدره
صير صاحب خوش صاحب لاتزيد الكسره
خلي بصدرك مُخيم لاتطفي الجمره
هالجمره وهالعبره / للنجاه تبقه الوسيله
لطماتك صرخاتك / بالوزن باجر ثجيله
تعلي من شأنك عبرتك هوايه غرگني برحمتك
&&&&&&&&&&&&&&&&&&&
دنيه مادامت لواحد بالخدامة اگضيها
إنطي وجهك للحسين وبالضهر خليها
طعم مابيها حياتك هوه المحليها
يبو سكينه الروح فدوه الك اني افديها
يالغالي يالوالي / تدري ماعندي اني غيرك
معليني وتدريني / عاشت الروح اعله خيرك
اهجرت روحي وماهجرتك هوايه غرگني برحمتك
&&&&&&&&&&&&&&&&&&&
#علي_محسن_الفرطوسي
قصيده لستشهاد الامام الكاضم عليه السلام
...
بألم لفراك وهمومه
يبويه انه معصومه
تبده الماي شيلمه
تبده الماي تبده الماي
@@@@@@@@@
بألم وبنوح وكلب مجروح
حمام الدوح يبويه مايون وني
عله الآهات عله الونات
بعد هيهات افارك جرحي وحزني
اجلبنك يليلي والجفن ساهر
وكل اليوم اليمرني انتضر باجر
ولا ادري ببويه اشجره وصاير
عليه دمعاتي تجري والفكر حاير
اهيم بعالم اوجاعي
وحس تتكسر اضلاعي
بشفاهي تعثر الكلمه
تبده الماي تبده الماي
@@@@@@@@@
بسجن محبوس ضوه الفردوس
الگلب متروس شوك وكل نبص ونه
يبويه شلون متى تعودون
يهل المسجون سجنك اخرك ﭼـنه
اكابر والدمع صاير الي سلوه
هجركم جمره وبي كلبي تجوه
تره الفاكد عزيز بليله يتلوه
الاسمها فاطمه ليش بدمع تروه
الحزن والهم لوه شراعي
منك مااجه الساعي
الليالي موحشه وضلمه
تبده الماي تبده الماي
@@@@@@@@@
عليك شلون اغمض عيون
يضل مرهون گلبي بالسجن وياك
اون بهداي بدمع عيناي
سمعت اهواي السجن قاسي ولا رحماك
اجلبنك يليلي ومانمت لحضه
انه معصومه بويه لحالي ماترضه
لصلاتي بمدمعي يالغالي اتوضه
لأن ادري الحديد لجفك يرضه
بسجن هارون متغيب
گلبي وراسي مشيب
السجن ماعنده كل رحمه
تبده الماي تبده الماي
@@@@@@@@@
گلب مجروح حلم مذبوح
عذاب ونوح على موسى إبن جعفر
دمع منثور يغرگ بحور
جنح مكسور على بتك تضل تسهر
بالحسره اهدنه جبل حمرين
وغرك بالدمع بويه بحر قزوين
يشهد الله ماتنشف دموع العين
غريب وعالجسر ومقيد الجفين
ياراهب بني هاشم
اون اعليك يالكاضم
بدر ويشع على الضلمه
تبده الماي تبده الماي
@@@@@@@@@
يهل المسموم يهل المضلوم
يهل مهموم شعوري فاگده وثكلى
حسبت حساب يهل الغياب
الجرح ماطاب وتنوح اهل السمه لجله
عليك ابلا شعور دموعي هماله
وناشد نعش ابويه ياهو الشاله
اريدن راعي ثاره يداعي كتاله
مات بغربته وماشافته عياله
غريبه ودمعتي بخدي
عشة مهمومه بوحدي
اعله گلبي جروحي مزدحمه
تبده الماي تبده الماي
@@@@@@@@@
يمهدي ادعيك سؤالي اعليك
علم مر بيك ابويه بالسجن مضلوم
الهجر كتال الحمل لومال
صعب ينشال إذا ما تنتخيله الگوم
يگرة عين فاطم طالب الثارات
نزل دمع النضر ويرتل الآهات
تعال وجم وتعال وتعبت الجلمات
حزن معصومه مايگضي بعد هيهات
حزينه والگلب ذايب
لطلعتك فاطمة تراقب
تعال أعليك ابو اليمه
تبده الماي تبده الماي
@@@@@@@@@
علي محسن الفرطوسي
تنويه ✿
العلامة الاميني (قدس سره)
كان من عادته أن في ليلتي التاسع والعاشر من شهر محرم الحرام يخرج صدقة باسم صاحب الزمان (عجل الله فرجه) وكان يقول أن في هذه الليالي يكون قلب الحجة معتصرا بالألم والحزن ... إرسل هذه الرسالة إن استطعت لتكثر الصدقات في سلامة قلب صاحب الزمان روحي فداه
الخضره لفها أعمامتك وخــل تحزمـك عمـتك
بحيل ابوفــاضــل علي شد حيلك
00000
لــوح يـلأكبـرظهـريـايـمـه لكحيـله
أنته تربات العلي وشـد حيلك بحيله
عمتـك أتهلهل ألـك وتهـوس أبشيـله
أتحزم بغيـرة علـي والعسكـرأمشيله
وياعلـي لمــن تطب تارس أعيونك غضب
وبس اليكَحمـك ياعلـي تخـويلك
بحيل ابوفــاضــل علي شد حيلك
00000
00000
حيلـك بعبـاس عمـك راعــي الشيمه
سوده وأدخـن أريـدك بلحـرب غيمه
وخلها تجفـل ياعلي من سيفك الجيمه
ومن فرارالجيـش يبني أترس الهيمه
وتجدح أعيـونك شرار وخلـي طشــار الفـرار
وخلــي أركَــاب الزلـــم تحـنيـلك
بحيل ابوفــاضــل علي شد حيلك
00000
00000
لف الأعمامه أعله راسك وانه أنخه
يبني أريـدك بالـزلم بس أنتـه كشخه
لا زمـام المهـره بيـدك يـبـني يـرخه
صيح بيهـم ياعلـي وسمعني صرخه
براس أبن غانم تعال يـبـنـي وذل الرجـال
وخلـي أرجـاس الحـرب تـدويلك
بحيل ابوفــاضــل علي شد حيلك
00000
00000
ورايـة العبـاس عـمـك كشخـه بيـمينك
ويبني أريدك مـن تطب زعلانه عينك
وخله يستئنس علي من تدخل أحسينك
شعــرك الأصفـرجمالك وأحله خدينك
أتغازل أعيون الشمس بالله يبـني منحـرس
ومن تغير أعله المهر وأدعيـلك
بحيل ابوفــاضــل علي شد حيلك
00000
00000
وخلـها تعثـربالجثـث يوليـدي الشكَـره
المايجهبـك ياعلـي بـس عينك أتخزره
أيموت صدكَ يـاعلي مـن أول النظره
واليخـاف أمـن الزلـم ماحاجه وأطبره
بـالـك وتكَـرب رعيع بحـافـرالشكَـره يضيع
وخل تكَـول الجيـمه بس أدخيـلك
بحيل ابوفــاضــل علي شد حيلك
00000
00000
خادمكم
رسول الفرطوسي
مبارك هالعرس ومبارك الحنه
بدمك معتني ومجبل عله الجنه
رايح ييمه رايح ييمه
.........
طلعت المصرعك يبني / فراگك هذا يهضمني
تودعنه وتروح٢
ردت بوجودك اتهنه / واترس جفك بحنه
يالماخذلي روح ٢
گلب عايش على أحلامه / وگولن هايه ايامه
فرح لا مو جروح ٢
اعطشله جنت واركض اشمنه
مبارك هالعرس ومبارك الحنه
رايح ييمه رايح ييمه
...
بعد المن أوج شمعك / بحزنها إمك تودعك
رايح للذبح ٢
مثل جام نكسر كلبي / بعد ماوجدت دربي
بجروحي ملح ٢
تعبت اعليك يوليدي / غفيت اليالي اعله ايدي
واسهر للصبح ٢
اسولف عالوفه من جنت اگمطنه
مبارك هالعرس ومبارك الحنه
رايح ييمه رايح ييمه
......
يوميه احسب بطولك / شمس ياجف الي ينولك
عالي بالسمه ٢
يورده نفتحت بروحي / يروحي واغله من روحي
بوجهك هايمه ٢
جمالك منه ماصاير / مغيرك يبني الحافر
فايض بالدمه ٢
خيول الكوم بالميدان داسنه
مبارك هالعرس ومبارك الحنه
رايح ييمه رايح ييمه
.....
يذبحونك بلا رحمه / لجن فدوه لبو اليمه
تفديه بالنحر٢
مبارك بالدمه محنه / شايف خير عالجنه
ولا منك خبر ٢
حلوه موتتك هايه / لاكن مني حجايه
كلبي انه نكسر٢
الفارگ غالي بعده شلون يتهنه
مبارك هالعرس ومبارك الحنه
رايح ييمه رايح ييمه
......
رافع راسي يوليدي / بدمك خضبت ايدي
وگولن حنته٢
التموت احبابه بالغربه / يموت أمن القهر كلبه
وتقرب موتته٢
روحي ميته من دونك / واحن لجلمة شلونك
صعبه فرگته ٢
اصيحن وين جاسم ابني اريدنه
مبارك هالعرس ومبارك الحنه
رايح ييمه رايح ييمه
......
علي محسن الفرطوسي
شِجعيني يطوعه شِجعيني
....
اليوم اذكرها بعلي و ضربته المعروفه
غنم غطها الذيب طفرت إله اهز الكوفه
ونتي ياطوعه احسبي شكد رگب مگطوفه
روس تردم روس تبقه أمن الركض والخوفه
ذكريني يطوعه ذكريني
....
روس اشوفنها سنابل واني سيفي المنجل
طحن اطحنهم يطوعه فنه اليتمرجل
ملحمه والناس تشهد قصتي تسجل
اليوم ملك الموت اجاهم بالقبض مستعجل
تعرفيني يطوعه تعرفيني
....
انه ابن راعي المضيف وبن شيخ الوادم
إله أخلي الخيل تعثر رادم يگض رادم
طلابه وبسيفي افضهه واليطبهه نادم
بيدي الويها الشوارب ينذبح كل قادم
بطگ يميني يطوعه بطگ يميني
.....
كاعد بصدر المراجل اني هذه امجاني
علي قلاع الأبواب وروس اقلع اني
الزلم خرست اگبالي اليحجي بس لساني
عركة جيب الي فضها وللحرب عنواني
احمي ديني يطوعه احمي ديني
....
الحرب نيران تسعر واني أشعل نارهه
نازل بحيل ابوفاضل الكوفه اهز اكتارهه
طوعه اسمعها تنادي ياهله بسطارهه
علگت بيرغ عمامي وهوسيت بدارهه
شاهديني يطوعه شاهديني
....
علي محسن الفرطوسي
ياعذاب ام البنين يامُصاب ام البنين
......
گلب ام اعله الولد ينزف حنين
وكفت بدرب الخذاهم بالونين
الغربه صعبه وهذا حال ام البنين
محزمه اعله مصابها تنتضر غيابها
مانستهم ساعه الدمع غرگ بابها
واليعوف احبابه مايطيب صوابه
الغالي من اوداعه. نارهم لهابه
.....
طوحت نوگ السفر من الوطن
اعله زينب تنضر وهيبة ضعن
وداعت الله كلتو وعيوني نعمن
ضعن ماخذ روحي مخلي بس جروحي
بيتي مُضلم صاير من عذابي ونوحي
الكمر اموديته بيهم اموصيته
وگلبي ايضل حاير لو دخلت البيته
...
الاربعه واحدهم اتشوفه علي
من تهيج الغبره صوت ادللي
فدوه لعيونك حسين اني وهلي
بالوفه مغذيتهم ولدي اموصيتهم
بالحرب والحومه ترتفع رايتهم
سيدي يصيحونك حرس اعله ضعونك
الگمر ناذر يومه وكلهم يخدمونك
...
بعيني جمره وماطفت من غيبتك
روحي ترجف يبني كلما ذكرتك
اسهر الليل واحاجي بصورتك
حسين يبني شلونك نوخيتك ضعونك
كربله متانيتك باجر يذبحونك
حلفيت الحادي يسولف اعله أولادي
فدووه الخاجيتك ولدي گلبي ينادي
...
روحي مشدودة بضعنك يالحبايب
انتجي أبابك واصيح وكلبي ذايب
خوفي زينب والحرم من الخرايب
مدللتكم زينب يبني من تتسلب
محد يحاميها والمخيم يهلب
من عگب كفالها حايره بعيالها
خوفي كله اعليها صعبه هاي احوالها
...
علي محسن الفرطوسي
گابلته بدمع عيني
ساكت مايحاجيني
علي يبني علي يبني
....
حسبت حساب الك يبني وحسابي طلع مگلوب
تالي الشيب تتركني وشوفك عالترب مصيوب
يلب حشاي حاجيني لبسته اسود ييمه الثوب
انده بيك ماتگعد وجهك بالدمه مخضوب
بشوفت وجهك ارويني
غيابك راح يعميني
علي يبني علي يبني
.....
ماضايع ييمه ارباي ذاخرتك وكت شيبي
يگولون الولد مريود يانسمة هوه عذيبي
تالي العمر مني تروح حگي من اشگ جيبي
اضيع بعالم الدمعات اول وحده ترتيبي
اول وحده تلگيني
ابجي وعالي اونيني
علي يبني علي يبني
.....
اشوفك صعبه عالتربان بسيوف العده موذر
مايرضون أضل اوياك وعوفك يمه ماأگدر
اروحن فدوه لعيونك غيرك مالي ياالأكبر
شبابك يالولد ذبحوه وعليك خيولهم تعثر
منو يايمه يحديني
شمرهم سوطه ياذيني
علي يبني علي يبني
.....
بدمك خضبت شيبي واشمك يبني من نحرك
جمالك ليش متغير ياهو بسيفه الموذرك
يهل عايش وسط هالروح وتنفس فقط عطرك
اتمنه انذبح وياك وحط صدري على صدرك
نحرك عطره يرويني
اعطش وانته تسگيني
علي يبني علي يبني
....
جسمك حيل متغير شبابك خطفو الوانه
حرت اشلون المنك وصيح بروح حزنانه
بـا الأكبر مثلو تمثيل وذر ومطشره اغصانه
يهون اعليك تتركني بعدك ياهو الي انه
بعد المن تخليني
الهضميه الناس تسبيني
علي يبني علي يبني
.......
علي محسن الفرطوسي
ليلة القاسم ابن الحسن
......
بعيوني شايلتك حلم يالتارس عيوني
زهرة شبابك تنذبح بيك اني فجعوني
مذبوح .. مذبوح يازهرة حياتي
.......
أمن اصيارك وهذا العمر ناذرته
لعيونك وماعندي ضل بس انته
فص عيني چنه وبالجفن حاضنته
لساعة زفافه حلمي اعجن حنته
خضبته شيبي بالدمه يوليدي موحنه
رايح برجلك للذبح وتريدني اتهنه
مذبوح .. مذبوح يازهرة حياتي
......
من كد جماله جنت أضمه بگلبي
اتعب وكول ايجازي سهري وتعبي
وگت الكُبر شمعه وتضوي بدربي
حگي أمن ألومك حگي أبدي بعتبي
مقسوم اشوفك بالحرب مذبوحه احلامي
ماكو صواني للعرس واليسر گدامي
مذبوح .. مذبوح يازهرة حياتي
......
نار الهضم نار الذبح بضلوعي
امجانك ييمه فايض أمن دموعي
من الله لايطي الي طفه شموعي
راح اكتب بوجه الزمن موضوعي
يالعايف امك للجرح كل ساعه ملجومه
اصحه وانام اعله الدمع من غابت رسومه
مذبوح .. مذبوح يازهرة حياتي
......
ماعندي غيرك وانته تدري بحالي
يبن الحسن بيك انفجع دلالي
عايش بروحي وراسي بسمك عالي
من بعدك امك والشمر يبرالي
راح الولد من بين ادي وين الگه وليدي
خلاني نجمه ابلاضوه مسبيه وبگيدي
مذبوح .. مذبوح يازهرة حياتي
......
ضلمه العمر من بعدك وماريده
امشي بيسر يوليدي و اگطع بيده
بنوگ الهزل والحادي عِتّ بگيده
المثلك شهم جسام كلنه نريده
بسمك اندهك ماترد ذبحتني هالسكته
وياك أموت المن أضل جاعمري ماخذته
مذبوح .. مذبوح يازهرة حياتي
......
علي محسن الفرطوسي
ليلة الوحشه السيده زينب تخاطب اباها
.....
آمنين الليله اجيبن قالع الباب
علي ياحاضر الشدة يبو اتراب
....
أمير الدنيا كلها وگاضي الكلفات
اليطيح بشده يتنخاك بالشدات
افزع ياعلي واحضر العلويات
بهيمه الليله وحدّي ومابگن خيمات
مارحموا ودايعكم هاالأعراب
من بعد الذبح معركة الاحجاب
،،،،،،
هاي الشدّه ماتشبهه كل شدّه
زينب عـالحراسه ماهي متعوده
چفك ياعلي قرص الشمس رِده
وينك ماتجي اتلم حيلي الـ تبده
سيفك ماتشهره من الگراب
تفزع فزعتك وتشد الأنگاب
،،،،،،،،
تعال لكربله وشوف انته بعينك
مثل نجم السمه مِطشر حسينك
يابو الغوث اغثني ياعلي وينك
قريبه هالمسافه البيني وبينك
ياحيدر گمرنه اعله النهر غاب
احبال اليسر بويه الشمر جاب
،،،،،،،،،
صاحو عالخيم يا والدي فرهود
تَعال احسب يبويه اشكم اثر موجود
كلفه عثرتي بين الشمر وجنود
ضاعت جم يتيمه وجم طفل مفگود
مثل الخيمه گلبي امن الخجل ذاب
للتل من رحت حشمت الاحباب
،،،،،،،،،
وحشه الليل وحنه نبات بالهيمه
گلبي المنهضم. إيقاسي ابضيمه
افزع عـالعطاشه ياعلي غيمه
وين اهل الحرب يابويه والشيمه
ماضلت عشيرة أوين الاصحاب
كلهم عالارض مسلوبه الاثياب
،،،،،،،،،
علي محسن الفرطوسي
طب للحرب عباس
گامت تصرخ الناس
....
نزل عباس وگلب ماعونها
بكربله الوادم تفر بعيونها
جنه ملك الموت خاطف لونها
ناس تردم ناس اتشوفونها
تسمع بس الأنفاس
طب للحرب عباس
.....
شال سيفه وكام يگطف روسها
زلم فوگ الزلم صار يدوسها
جيش آلاف وكسر انفوسها
مايهم بيه الرمح وي قوسها
جيش وصابه وهواس
طب للحرب عباس
.....
كربله هتزت يعم الساده
جم حجاب گباله شاف القاده
ماكو زلمه شحده اليتماده
الشمر طافر لابد بملباده
اليطلع فنه ينداس
طب للحرب عباس
....
بيرغه يرف عالزلم بالهيبه
ابن ابوه اربات شيخ ونيبه
بالحرب أكبر قيادي ايجيبه
سيفه الحط واليطير يصيبه
لابس درعه والطاس
طب للحرب عباس
....
معزب ويذبح طبگ بالحومه
مثل حيدر بالحرايب يومه
الروس بالروس برعب مردومه
دخناها ومطر غيض غيومه
جاهم رافع الراس
طب للحرب عباس
...
علي محسن الفرطوسي
ناوي اعله السفر يوليدي الگمر
توصل كربلاء وديلي خبر
...
طالع بهل الليله ياضعن ومسافر
وياك أخذت أولادي وبقت عيني تساهر
بالهوادج ماخذ الضوه من الناضر
انتضر من عدهم خبر يوصل باجر
وب قيد الامل ضعنك لو وصل
مكتوبه يجي ماكو كل خطر
.....
ابني موصيته وهوه گد اوصيتي
حسين لتعوفونه فدوه اله ذريتي
بالدمه تفدونه عفيه ياتربيتي
الزهره كون ادكلي بالوفه وفيتي
يبني بكربله حامي العايله
لـ تقصر ابد جيبلهم نهر
....
اتاخرت هالغيبه وماعرفت اشصاير
خوفي عالمضلومه حسين يمكن حاير
الحره إذا تامركم كولو صار وحاضر
والقلق ذابحني خوفي من العاشر
أطفال وحرم محروكة الخيم
وانته تنذبح يرمونك حجر
....
الحومه كون اشتدت يبني هاي فنونها
لجل اختكم زينب كربله تگلبونها
العطش لو مرالها زمزم تشربونها
الشمر ذلو جيوشه كله لجل عيونها
واحدكم علي الغبره تنجلي
تذلون الشمر تزرعون الخطر
....
من وصلني الناعي وهالخبر وصلاني
حسين داسه الحافر انكسر خلاني
أبن حذلم سولف بالولد عزاني
كال ولدج طاحو واحد اعله الثاني
آيات الوفه نور وماطفه
رفعو هامتج ضحو بالعمر
.....
علي محسن الفرطوسي
قصيده العليله عليها السلام
....
يمته تعود إلي وتكحل العيون
وصيحن ياهلا بجيت هالضعون
....
حلم اتصوره وماراح عن بالي
هاي اني العليله وحلمي يبرالي
أبد ماأيست من جيت الغالي
حنين حسين ادري ويرحم بحالي
مامتعوده هيجي احبابي يبطون
وصيحن ياهلا بجيت هالضعون
......
ادري بالشمس لو سلمت ترجع
بنهار إجديد وبعالي السمه تلمع
ناضر عيني بدوربك تره توزع
هلبت نور منه بديرتي يطلع
كواكب ال هاشم مايغيبون
وصيحن ياهلا بجيت هالضعون
....
تسبيحة عشگ خل تسمع الوادم
اني فاطمة و گلبي شكثر هايم
عليله ومارحم حالي الوكت ضالم
نعم اعشگ احسين وهالعشگ دايم
عليله ونحسب ويه اليحبون
وصيحن ياهلا بجيت هالضعون
...
يا قرآن عمري واحله ترتيله
هوه حسين فدوه العمر يغديله
للضايع گمر لو جن عليه ليله
متعوده بغيابه دموع اصلَّيله
صلاة النوح واجب كون تدرون
وصيحن ياهلا بجيت هالضعون
.....
تخنگني الحياة واركض اشتمك
عمري شگد حلو لو ينگضي يمك
يمته تعود بويه ولهج إبأسمك
اسولف بيك وأخذ عزمي من عزمك
باء البسملة انته للي يقرون
وصيحن ياهلا بجيت هالضعون
....
تعال أمن السفر ماخِلّصِت السفره
وحگ عينك احن يابويه للعشره
تحرگ ذكرياتك بيه جن جمره
موت الغيمه گطره ابأثره گطره
عيشة بدونك انته تخلص شلون
وصيحن ياهلا بجيت هالضعون
....
علي محسن الفرطوسي
هلا بعاشور بالصدور مُصاب وخيمه
دمع العيون بالجفون مطر چن غيمه
.....
هل الهلال تشوفه عيوني
دمعي نزاف وتغير لوني
صدري مخنوگ جمر بجفوني
الطف الحسين تروح ضنوني
شفت الأطفال والعيال تضيع بهيمه
گلبي محزون بالجفون مطر چن غيمه
...
گلبي ملهوف لعزاء وقرايه
على الگبه الليلة سوده الرايه
تعتني أفواج الك بجايه
ندعي ربنه نصير الك وفايه
خدم لحسين ملايين تعينه بضيمه
واليخدمون بالجفون مطر چن غيمه
....
هل محرم واني أتاني ايامه
ابجي لحسين وادگ عالهامه
بيدي زنجيل ودموع وقامه
وجنها أملاك السمه اللطامه
تنجمع ناس بالحساس أهالي الشيمه
والـ يلطمون بالجفون مطر چن غيمه
...
آه يحسين وشجون امصابه
لجله العيون تضل سجابه
حزني للدوّم أشد انگابه
جمره بالروح الك لهابه
حزني للدوم بالهموم عزاء نقيمه
عمري مرهون بالجفون مطر چن غيمه
...
بأبي انته واهلي وناسي
عطر عاشور فقط بنفاسي
نور العيون يرافع راسي
خدمتك هاي شرف نوماسي
سر دمعتي وحسرتي عذاب ايتيمه
اصبر شلون بالجفون مطر چن غيمه
....
عمري اشوفه وحلاة اسنيني
من اسيلن مدامع عيني
حب الحسين نبع يرويني
تره بعاشور جمر يجويني
شد الحزام يلّطام العزة الله يديمه
اليعشگون بالجفون مطر چن غيمه
....
علي محسن الفرطوسي
مثل كل عام
تجي الخدام
لكن انته مفگود .. يمهدينه يمهدينه
.....
هذا عاشورك اجه بِس انته ماجيت
يمته تضهر عالمواكب ندبه كتبيت
دمعه حمره الليله گلّي وين هليت
هاضمك تل المصيبه وسبي صديت
جرح لازال
دمع همال
تبجي الدمعه حسرات ... يمهدينه يمهدينه
...
هذا جم اهلال بين وانته مفگود
المواكب علگت راياتها السود
ياهلا بشهر المُحرم يقره رادود
رِدّنه يقره ياهلا مهدي يموعود
بهل المواكب
گلب ذايب
نعتب والعتب نار ... يمهدينه يمهدينه
...
يا قصيده وياكلام أكثر يبجيك
اني متأكد الخيمه هوايه تجويك
صعبه حرمة تعثر وجرحك يأذيك
والعليله التنتضر ياما نخت بيك
وينه وينه
مايجينه
يمته يضهر الغاب... يمهدينه يمهدينه
....
آه يحسين ومُصابه وياغيابك
جم گلب هايم مشه الليله اعله بابك
هذا عاشور ودمع فيض ثيابك
طير گلبي ومنكسر وچه بعتابك
گلب مكسور
جرح عاشور
لبسنه ثيابنه السود ... يمهدينه يمهدينه
........
زينب تنادي على تل المصيبه
الحبيبه بكربلاء صارت غريبه
طاحت الخيمه وعساكرهم قريبه
الفاگد أهله ينذبح بس من نحيبه
سبي والام
يدرب الشام
كلشي يصيحك الثار ... يمهدينه يمهدينه
.......
علي محسن الفرطوسي
بالي يمك
من تموت ام الصبر بالله شدگلها
بالي يمك
عل النعش مولاي يادمعة تهلها
جارحك ادري اليسر
تعبان وبگلبك كسر
ياصاحب الزمـان