1850
مختصّه بنشر جميع القصائد الحسينيه / احنه غير حسين ماعدنه وسيله للتواصل مع الشاعر @a313l1
عذابي انتحابي
عايش بروحي الألم
جمر نار الگلب صار
حزني بعيوني انرسم
صرت اعشگ النوح .. گلبي امتله جروح
يالغالي إتروح .. امن اديه
*****
يلي رايح روحتك تجرح دليلي
بالكبر دفنوك انته مدري حيلي
من بعد عينك سهرته بدمعه ليلي
انته رايح واني اترقب تجيلي
بمصابك وغيابك
روحي ترجف بالهوه
بالتراب صدگ غاب
التارس عيوني ضوه
مو وگت الاوداع .. يل تارك اوجاع
طيفك ولا ضاع .. امن اديه
*****
يم مصيبة زينب تهون المصايب
ياكلب عاشر حسرته وجفنه ذايب
الگعده وحشه اتصير من دون الحبايب
احبابي راحو واني من حكي اعاتب
الاحباب بالتراب
شلون اشوفنهم بعد
يرحلون والعيون
روح وتفارگ جسد
صار اضلم الكون .. ماضن يردون
غفله ويروحون .. امن اديه
*****
اتصير وحشه ابيوتنه بكل مغربيه
ذكريات ابالي كعدتنه سويه
الفاكد اهله يموت سكته ابلامنيه
عمري موگد نار . والجمره بديه
بحزنه نهضمنه
البيت صاير مقبره
نكسرنه وتعبنه
الغالي غطاه الثره
اليدفن احباب .. بعيونه المصاب
جمره بهوه الهاب .. امن اديه
*****
دمعه طاحت من جفنها بليل الوداع
احلى ايامي ادفنتها بيدي بالكاع
الجنت اشدن حيلي بيهم راحو ابساع
الدافن احبابه بقبر اتموته الأوجاع
للكبور نجي نزور
وعالكبر نجري الدمع
يغياب الجفن ذاب
نار تاكل بالشمع
حلمي تعودون .. تكحلون العيون
جم غالي مدفون .. امن اديه
*****
الموت خاتمته العمر والعشره راحت
روحي مثل الشمعه بيه النار صاحت
عمري مثل الورگه من اغيابه طاحت
واني ثكلى وفاگده بجروحي ناحت
اذكرتهم افگدتهم
خالي ضل بيت الأهل
بالوداع العمر ضاع
من كم غالي رحل
تخنگي الايام ماتت الاحلام
الغالي بقبر نام .. امن اديه
*****
علي محسن الفرطوسي
رايتك يمشاي رايتك يمشاي
اتسر كلب مهدينه
....
هالملايين للحسين تجي وفايه
جابنه الشوگ يمحبوب الك مشايه
احنه انصار الحسين نخط عالرايه
بأربعينك نجيك بفعل وحجايه
عالوعد يمولاي عالوعد يمولاي
لكربلائك جينه
....
كلها خدام والقلوب الك نبضتها
احلى ايام حياتي الخدم لمتها
هلا بزوار الحسين هلا برايتها
جهزينه المواكب بوعد خدمتها
ياهلا بالزوار ياهلا بالزوار
لافته كتبينه
...
هايه خطوات للحسين طريق الجنه
واحنه كل عام نجيلك عهد عاهدنه
شكد كرامات بمشينه الك شاهدنه
شفنه شايب ينادي لحبيبي اتعنه
كلها تصرخ يحسين كلها تصرخ يحسين
حبك عزم ينطينه
...
العمره تسعين مثل شاب اجاك بهمه
عطر فردوس جنانك يفوح اشتمه
نحمد الله ونشكره اعله هاي النعمه
اليمشي خطوات للحسين تسجل اسمه
نعمه من رب الكون نعمه من رب الكون
شيعة علي نحسبينه
...
بدربك يصير تعبنه نجاة ومعبر
بهل المشي هاذ روايات يشيعة حيدر
الف عمره والف حجه واجرك اكثر
والي عطشان يرويه عذب بالكوثر
دنيا وآخره وياك دنيا وآخره وياك
احسين ميخلينه
...
شوفة الگبه عندي تكحل الناضر
كربلائك وجودي إوجبرت الخاطر
شوگي جنحين اجيك لضريحك طاير
دربك الي جمعنه الخدم والزاير
حبك يوحد گلوب حبك يوحد گلوب
وبدربك اتلاگينه
....
علي محسن الفرطوسي
ودعتهم ودعتهم
وابتده جرح اليسر
.....
كلمة الخويه حنينه
من صغر احنه ربينه
لحظه ماأتفاركينه
دارت الدنيا وبجينه
عفته مهشوم الصدر
..
حلم مصلوب اعله عيني
عالرمح شالو سنيني
الدنيا رجفت من ونيني
فايض الليله حنيني
ونجوه گلبي بهجر
...
اعله ياذمه عذابي
صوابك اكثر لو اصوابي
امن الرمح اسمع جوابي
عيني لضعونج ترابي
راسه ينضر للخدر
...
ديره تاخذني اعله ديره
زينب الحره الاميره
دخلت بمجلس اسيره
ينولي الماله عشيره
سوگهم غثني شكثر
...
دخلت الديوان صعبه
واليسر تعبني دربه
هذا الي مااحسبه
تصد علينه عيون غربه
جفوفي صارتلي الستر
....
ماشفت غير الاذيه
اسمي صار الخارجيه
الكوفه تتفرج عليه
وحبل معگود اعله اديه
وبالحبل شامت يجر
...
كلها تتفرج اجتنه
والي اكثر هاضمتنه
بالحجر وادم رمتنه
وغير ناس الشتمتنه
شكد صعب هذا الأمر
...
عاليتامه عيوني دارت
امن التعب كدامي طاحت
بالضرب جم طفله صاحت
عمه اهلنه وين راحت
اوجوهنه صارت صفر
...
امن السياط تغيرينه
والشمس شمخليه بينه
الحبل داير علينه
ومنه دم تنزف ادينه
امن الجرح دمنه يخر
....
علي محسن الفرطوسي
شعجب ماجيت
رحت واني نخطف لوني بغيابك ضربو متوني
شعجب ماجيت
رقيه تنادي يل كافل وسُكينه بمدمع الهامل
شعجب ماجيت
@@@@@@
بغيابك ماشفت غير الرعب والخوف
اصدن عالنهر خويه بگلب ملهوف
گمرنه الليله عالشاطي وگع مخسوف
يضربوني وحبل داير عالجفوف
الك ناديت
عثر گلبي اعله طرواكم الخيم محتركه بجفاكم
الك ناديت
الضرب حد العظم واصل وسكينه بمدمع الهامل
شعجب ماجيت
@@@@@@
عثرت اگبالهم والشامت يصيح
زينب هاي هسه دگوم واطيح
يجرحني بغيابك حته الريح
حرگو خيمتي وانتم مجاريح
يبو النوماس
شمر يتمرجل اعلينه بعد عينك يوالينه
يبو النوماس
رجفنه والجسم ناحل وسكينه بمدمع الهامل
شعجب ماجيت
@@@@@@
رقيه گبالي من ضربو متنها
اجه السلاب اخذ ترجية اذنها
بعدك ياگمر ازرگ متنها
ومن كثر السطر ينزف جفنها
بدمع وبنوح
غيابك خويه جارحها الضرب غير ملامحها
بدمع وبنوح
دمعها والدمه نازل وسكينه بمدمع الهامل
شعجب ماجيت
@@@@@@
اول مره اصيح ومايجيني
على صوب النهر مشبوحه عيني
لوغاب الأخو تجرح سنيني
انه زينب الما هود ونيني
الكفلني راح
وجرحني بعده غيابه بجيت بدمعه سجابه
الكفلني راح
ولاني بغيبته العاذل. وسكينه بمدمع الهامل
شعجب ماجيت
@@@@@@
تغير لونها وجوه المداليل
اول مره اتحس برعب ليل
ضعنه ابين نار وفزعت الخيل
صار الماهو زلمه بينه يعيل
بضرب وصياح
شماته اتباوع اعلينه بحبل جتفوهن ايدينه
بضرب وصياح
يريد يمته اللوه حامل وسكينه بمدمع الهامل
شعجب ماجيت
@@@@@@
شمرهم حشم جيوشه عليه
وكلها اصيح هاي الهاشميه
واني استر كمت وجهي بديه
شكثر هضمتنه خويه الغاضريه
بسبينه نروح
راسك عالرمح عالي تصدلي وتنضر اطفالي
بسبينه نروح
نروح وهالخبر عاجل وسكينه بمدمع الهامل
شعجب ماجيت
@@@@@@
علي محسن الفرطوسي
القصيده ليلة العباس عليه السلام
الصعبه تنحل لوقرينه الفاتحه اعليها
باب ربنه الواسعه والحاجه تگضيها
انخاها بحسين واربع ابنين
▪️▪️▪️▪️▪️
كل صعبه تنحل لو توجهنه بأسمها
ام كمر هاشم هايه ياناس اشعضمها
الفاتحه اقراها فقط وشاهد كرمها
الحاجه المستعصيه محلوله يمها
هاي ام كمر هاشم
عدها الكرم دايم
خل تسمع الوادم
عدنه احنه بدويه
بالشاره علويه
كل حاجه مگضيه
يالرايد مرادك تعال ام الكمر هايه
من اشرف انساب العرب وفايه وفايه
▪️▪️▪️▪️▪️
الباري خصها بمكرمه باب السماوات
لا مايخيب الي دعه ويقرالج ايات
فاطمه انتي ام البنين امن العضيمات
ربج نطالج معجزه تحلين صعبات
بابه ومنهاجه
گضايت الحاجه
لكل بشر لو ناجه
الربت ابو فاضل
غيره وبخت شايل
بجفها گمر نازل
هاي العضيمه الطاهره بدموعك انخاها
رب السموات السبع للحاجه خلاها
▪️▪️▪️▪️▪️
يل نلتي كل هذا المجد والبيت من نور
دخليتي البيت الكرم ياأم اربع ابدور
ابيوت بيها الرب إذن بيها الوحي يزور
يل جان عمرج للحُسين الغالي منذور
وفيتي للزهره
ضحيتي يالحره
يل صنتي العشره
اربعه انجبتي
لحسين قدمتي
لم عون ام صرتي
اتلقبت ام البنين وهل المجد نالت
وحسين يمه ينادي وزينب بعد نادت
▪️▪️▪️▪️▪️
بكربلاء بصمه الج اربع بنينج
وفايه ياأم الوفه ويشهد حنينج
ماقصريتي بالربه وفيتي دينج
نلتي المكارم والفخر بخدمة حسينج
خدميتي ابو اليمه
ولدج فده لدمه
لمن يمر اسمه
تبجيله بلوعه
من اجله مفجوعه
والونه مسموعه
تنعه وتنوح اعله الذبيح الداسه الحافر
عاشرت دمعتها ومثل جمره الگلب صاير
▪️▪️▪️▪️▪️
اسمج يضل بكل زمن تتناقله الناس
اليگصدلج بوكت الشدد رد رافع الراس
للوفه ولكل تضحيه تبقين مقياس
نرفع ادينه ونندعي بجاه امه عباس
بسمج توجهنه
انأمن حوائجنه
بلا جدل تحضرنه
يل حاير ادعيها
ام عباس تگضيها
الفاتحه اهديها
رايه اسمج وعباسج بطف كربله يشيله
عدنه حوائجه وعتنينه المجلس الليله
▪️▪️▪️▪️▪️
علي محسن الفرطوسي
ميته الليله اتمنه ولا ابن امي اودعنه
لو طر الصبح وتروح الموت بعيني اشوفنه
▪️▪️▪️▪️▪️▪️▪️
عين ومالفاها النوم حيرني الدهر حيره
إوداعك موسهل يحسين منه جروحي اجبيره
يبن امي عسن لاجيت ولاهجرينه الديره
لو باجر خذاك الموت وين امشي يبو الغيره
ابقه بلا اخو بهل الچول بين النار بين خيول
امن اتوجه اعله طور النوح الموت بعيني اشوفنه
▪️▪️▪️▪️▪️▪️▪️
الوادم تتخذ الليل بين مسامر او ونسه
بس اني بقيت بنوح وبروحي حزن خنسه
الموادع صعب يحسين والموت استمع حسه
باجر تنذبحلي اخوان وماترجعلي هالجلسه
عيني بلا ضوه الليله والمثلي ركد حيله
كلبي يخوتي مجروح الموت بعيني اشوفنه
▪️▪️▪️▪️▪️▪️▪️
اتمنه يمرني الموت ولا ودع اعز ناسي
ساعه اصرخ يخويه حسين ساعه اصرخ يعباسي
باجر كلكم تروحون ومحد بيه يواسي
نار الخيم نار اوداع كلهن حرگن انفاسي
مجمر يادليل ام عون ونتم عنها تروحون
لحالي يون حمام الدوح الموت بعيني اشوفنه
▪️▪️▪️▪️▪️▪️▪️
شحسب ياجرح بالروح كثرن خويه جروحي
شيفيد الصبر يحسين ولجلك ماگطع نوحي
باجر لو تسحگك خيل تطلع روحي من روحي
امشي بيسر وي عدوان ويضل عالغبره مذبوحي
صعبه حسين اودعنه خيول العده يدوسنه
لوشفته الضهر مذبوح الموت بعيني اشوفنه
▪️▪️▪️▪️▪️▪️▪️
ياهو اليفزع لزينب لوهجمت علينه الخيل
ليلة اهدعش صعبه اگضيها بعذاب اويل
اتمنه عدل عباس من متني احمول يشيل
هايه كربله والگوم واني بوحدي اگضي الليل
محد يفزع لزينب خيامي يخوتي تلهب
عالشاطي العلم مطروح الموت بعيني اشوفنه
▪️▪️▪️▪️▪️▪️▪️
علي محسن الفرطوسي
گلب من حگه يهيم ... شمس ماضمها الغيم
ينعمه اتمنه اديم... يالولد
**
طلع من المُخيم ... صگر وبجنحه خيم
مثل بدر التمام بنوره شاغلني وجماله
مثل هيبة عمامه ... عليه لايگ لِثامه
نزل ابن الحسن من الحسن ماخذ جلاله
ارتجز هل من مُقاتل ... هله بحلو الشمايل
جمال وهيبه شايل ... يالولد
**
دعيت الله اليحرسك ... ييمه محضره عرسك
شمع يضوي وتروح المن بعد هاي الصواني
حلم عمري ازفك ... أحط حنه أعلى جفك
عشت كل العمر زفه وفرح واجمل اماني
تبخر تالي حلمي ... ردت تبقه انته يمي
سمه وحاضنته نجمي... يالولد
**
اخذ كلبي ودليلي ... گمر ويضوي ليلي
مثل ماي وجرف عشرتنه يايمه الطويله
مثل عين ورمشها ... حمامه وتهوه عشها
مثل ماي ويسير عالشجر هيج اني اجيله
كلب عاش اعله نبضه ... مثل اسمي احفضه
اعيشك لحضه لحضه ... يالولد
**
يروح بهل السهوله ... عمر درته اعله طوله
نفس ومعاشر الريه اموت اني بدونه
الربه وسهر الليالي ... اريدنه يغالي
تعال ولاتروح ادري العطش ذبل عِيونه
جمالك أيه ليه ... شلت بخت الزجيه
شلت غيره وحميه .... يالولد
**
بُرز يوسف زمانه ... مِلَه الدنيه ابأمانه
العساكر گِطعت ايديها لمن اعتناها
سحرهم من جماله ... بدر ليلة كماله
رغم ذالك شجاع ونكس الكوم ولواها
تعج خله التراب ... مطر غيض ومصايب
هله ابزر الغوالب ... يالولد
**
علي محسن الفرطوسي
......
ليلة القاسم ابن الحسن
عاشرت الدمع والنوح والعبره
صفناتي جبيره وروحي منكسره
من دونك اضيع وداعت الزهره
بطور احزاني يوميه عليك اقره
٢٨ | رجب ..
وسارَ الرڪب الحُسيني و المنايا خَلفهُ ! 💔
#علي_محسن_الفرطوسي
بحاجتي نخيتك
خادمك واجيتك
ياابو طلبه واني اعرفك .. تگضي الحاجه
#علي_محسن_الفرطوسي
بحاجتي نخيتك
خادمك واجيتك
ياابو طلبه واني اعرفك .. تگضي الحاجه
....
الله خله الخير كله ابابكم
الصعبه تنحل من ازور اعتابكم
الله فرج همه كلمن زاركم
امن الفرح طاير يرد خطاركم
شكراً بدمعتي .. لرحمتك جبتني
يابو طلبه واني اعرفك .. تگضي الحاجه
....
هذا دكتور العلل والمستحيل
ابابه من تدعي حزن گلبك يشيل
شما نذرنه الحضرت الكاظم قليل
الحاجه تگضي بعتبته وكل هم يزيل
واگف اعله بابه
والوفه بعتابه
يابو طلبه واني اعرفك .. تگضي الحاجه
....
...
لو قرينه الفاتحه ونهديها
واحنه نقره البسمله ويگضيها
روحي تعبها الدهر تدريها
حاجتي يم بابك مخليها
ماتضل صعايب
تنجلي النوايب
يابو طلبه واني اعرفك .. تگضي الحاجه
..
روحي شدة علگ وبشباچكم
يابو طلبه عشت عمري بجالكم
نضره هاليله بدمع جينالكم
يل گصدتو زيارته هنيالكم
زورو بالنيابه
عني ابمصابه
يابو طلبه واني اعرفك .. تگضي الحاجه
....
روحي حنت والبُعد ماينحمل
على جناح الشوگ ودموعي تهل
ميت وشباجه ايردني عدل
لو نطوفه الدهر كله مانمل
تدري مالي غيرك
غرگاني خيرك
يابو طلبه واني اعرفك .. تگضي الحاجه
....
علي محسن الفرطوسي
القصيده للأمام الكاظم عليه السلام
على هالحب باقي وياك
لآخر يوم من عمري
يحسين ابقه امواليك
صوت حساس من صدري
***
تجري اويه الدمه يابن فاطمه
بكل شمة هوه ودكت نبض اسمك لگيته
على طور النعي عايش مسمعي
العاشگ من صدك بالدمعه اتبين قضيته
عافيتي بهواك ماعندي سواك
يل جنك عذب وكت الضمه اركض اجيته
بهل اربع حروف سر الدنيا اشوف
من دمك نزف كل ميت بحبك حييته
يحسين الكل يصيح
حته الماي من يجري
يحسين ابقه امواليك
صوت حساس من صدري
***
جيت امن العدم على باب الخيم
يانبض القلب اني اعتنيت امن البدايه
خادم بين اديك بالحب معتنيك
ماشفتك لجن حبيتك بفطره وروايه
جابر خاطري وياضي ناضري
من جاهل جنت بيك اسمعت اجمل حكايه
بصوت امي اسمعت منها واعرفت
كلمة ياحسين امن المهد وبلا نهايه
عايش اسمك وياي
امن اول يوم وبصغري
يحسين ابقه امواليك
صوت حساس من صدري
***
بهل المنبر ربت روحي تعلقت
من مجلس لعد مجلس عشت بين المجالس
هذا اكبر فخر بيه كلبي نجبر
خادم اسمي صار وللخدامه بيه واهس
اليحجون بكفاي ماغيرولي راي
بدرب محبتك ياسيدي شمحله التنافس
اغله أمن الذهب بدربك هالتعب
عالحب والوفه والتضحيه علمني عابس
غيرك ماكو بهل الروح
كون افديك دم نحري
يحسين ابقه امواليك
صوت حساس من صدري
***
غيرك ماأحب ترتيل القلب
من الذر لكيتك شمسي ونور لوجودي
بدمع امحرمك وانعه بمأتمك
عاشور وصفر وبكل شهر دمعي بخِدودي
هيبة رايتك ونور بكبتك
من الخدمه ماخذ كل قواي وعالي زودي
اتعب وابتسم يحسين الأسم
يا اقدس عشگ بي ثبتت ديني وصمودي
هيهات الذل مولاي
هذا الصوت حد قبري
يحسين ابقه امواليك
صوت حساس من صدري
***
إجزع ونتحب وباقي بهالدرب
مكروه الجزع كالو نعم . گلت الا الحسين
الما مر بجرح الماشايف ذبح
مايفهم ونين المنوجع والگلبه نصين
عايش عالدمع ومكسور الضلع
اني بصغري ومعاشر ونيني ودمعة العين
على طور البجي اتعب وانتچي
ويعرف لوعتي الفاگد والمضيعله غالين
من حگي ابجي بعاشور
يلهب نار ضل جمري
يحسين ابقه امواليك
صوت حساس من صدري
***
نسد عين الشمس بكل خطوه نحس
خادم ابضهر خادم نجيك بكل هممنه
مشايه عتنت والرايه عتلت
اذن ياحبيب الطف نجي نجدد عهدنه
الموكب والخدم وكل نگلة قدم
يحسين ومصابه بهل الدرب بأسمك هتفنه
ياكعبة عشگ على درب الصدگ
خالط دمي ولحمي شفت حبك جمعنه
مشايه ونهتف صوت
دنيه وآخره ذخري
يحسين ابقه امواليك
صوت حساس من صدري
***
علي محسن الفرطوسي
وياك اخر ليله هاي باجر السوط بكفاي
بلامنيه وياك اموت بس جسد يمك افوت
**
خويه توديعك صعب وبيا كلب احمل هجر
مثل نار بعالي ريح ارجف وصيح اوشنتظر
ليلة اوداعك جرحها بروحي
عاشريت الدمعه خويه ونوحي
يفور گلبي وماتطيب جروحي
اختنگ ونته هواي باجر السوط بكفاي
بلامنيه وياك اموت بس جسد يمك افوت
**
ياسواد الليله طول ولاتزول بضي صبح
باجر ايضل ياأمل بيه الأهل من تنذبح
باجر انضر لخوتي مذبوحه
عيون اخوي اعله الخيم مشبوحه
جروحي باجر تكبر اويه جروحه
أعلى الارض توگع سماي باجر السوط بكفاي
بلامنيه وياك اموت بس جسد يمك افوت
**
خالي يردلي المهر وكت الضهر واني انهظم
يوصل خيامي الشمر وام الخدر بين الزلم
وين اروحن والبنات بحيره
وماكو عباس اليردنه الديره
بعد كفالي جروحي اجبيره
عالنهر طايح ضواي باجر السوط بكفاي
بلامنيه وياك اموت بس جسد يمك افوت
**
الاخو حزام وسند وكت الشدد ياوكفته
واني اخوي اعله النهر مارد خبر عن رايته
من يطيح النار وسط الخيمه
يروح عباس البخت والشيمه
بعد عينه انضيع وسط الهيمه
واني اموت بمستحاي باجر السوط بكفاي
بلامنيه وياك اموت بس جسد يمك افوت
**
كلشي بهل الليله راح اويه الصباح اكبر عذاب
ابقه وحدي بكربلاء من هالبلاء كل جسمي ذاب
حسب حسابك يگلبي الباجر
حسين يتوزع ودز بالحافر
لويروحون الأهل شتناطر
جم طفل يطلبني ماي باجر السوط بكفاي
بلامنيه وياك اموت بس جسد يمك افوت
**
علي محسن الفرطوسي
القصيده للوداع
ذايب گلبي امن الشوگ
مسلم غاب عن عيني
يابويه والمحتار
نار فراگ تاذيني
......
تفاركني وتروح واني بلايه روح
بعدك ياصبر ينفع يغالي
الفاگدله حبيب جرحه مايطيب
هاي اني حميده وهذا حالي
بصغري تيتمت بهالدنيا اشفت
غير الدمعه او سهر الليالي
نار بعالي ريح هيج ارجف وصيح
والفاگد ابو يحس اشجرالي
احتاجك اصرخ صوت
وحدي لتخليني
يابويه والمحتار
نار فراگ تاذيني
......
ليل بلافجر بعدك العمر
ياقصر الأماره الي هضمني
من جاني الخبر گلبي اني نكسر
حيرني خبر موتك فجعني
لومات الأبو ماضل شي حلو
يا اكبر جرح فگدك كسرني
ذوبت الصخر من دمعي نفجر
حيلي اطشر ومحد يلمني
بحالي يحس الملچوم
علي راح اونيني
يابويه والمحتار
نار فراگ تاذيني
......
يامسلم عذاب يجرحني الغياب
كل بت من طبعها تريد ابوها
تعيش بحضنه كون طبع الأب حنون
من گالو رحت روحي خذوها
اشعر بالهظم لو گالو يتم
ميته ابلا اجل روحي لگوها
ياخيمة امان يل تمطر حنان
وي جثتك تره روحي رموها
رايح وريد اوياك
بويه ارجوك تانيني
يابويه والمحتار
نار فراگ تاذيني
......
وي ضعن الحُسين للطف معتنين
بكل لحضه التمر بسمك كلامي
ودعني ورحل ضيعت الأمل
شيسوي الي مثلي گلبه دامي
يعيش بحسرته ونوحه وكسرته
بويه لشوفتك ضل جفني ضامي
ياريت العمر مايعرف هجر
حلمي كل هلي اوياي وعمامي
واني شبيدي أعله الموت
غربه ونوح اسنيني
يابويه والمحتار
نار فراگ تاذيني
......
ياضعن الأهل غفله من رحل
وكل غايب اله عذره وضروفه
واني تحيرت بالطف شاهدت
جيوش اتجمعت شام اويه كوفه
راس اعله الرمح يصد ليه بجرح
بعيونه حجي هواي اني اشوفه
بويه شگد صعب من غربه انضرب
الطف بالذبح رحب ضيوفه
من بعد اهلي الوليان
ناس اجناب تحديني
يابويه والمحتار
نار فراگ تاذيني
......
بالكوفه ادخلت حرمه شاهدت
تسأل عني دلوني بحميده
بدمعتها ابتدت عنك سولفت
اسولف طوعه والمشهد تعيده
مسلم ضيفي جان يمطر حب وأمان
لاكن عالعدو مثل الرعيده
واباب القصر كرهيت العمر
من دون اهلي عمري مااريده
جمره وتلهب بالروح
اهل الشام سابيني
يابويه والمحتار
نار فراگ تاذيني
......
علي محسن الفرطوسي
القصيده بين حميده ومسلم عليه السلام
راح راح الجان اغله من روحي
راح راح وكثرهن جروحي
بيادمعه اشتكيله طفله اني وعليله
بويه بويه بويه بويه
**
صعبه انسه ردلي ردلي لاتهاجر
يانبض گلبي دخيلك عالمشاعر
ناوي السفر وتريد اصبر بعدكم
شمعه وكلتها النار روحي امنهدكم
من السمه واطيح نجمه بضعنكم
معلوله هاي الروح ساعة سفركم
موت موت فركتهم احبابي
موت موت وحكي ابدي بعتابي
فراكك مالي حيله طفله اني وعليله
**
الموت فرگه واني متعلقه بهواكم
طفله وگلبي نكسر وأركض وراكم
اعثر وصيح بصوت رجعو يهلنه
دمعه بجفنها تموت ام المحنه
لوبيدي اروح وياه واهجر وطنه
اضلم ومابي نور بعدك سلفنه
صار صار بيتي اضلم الليله
صار صار ماواحد اشكيله
دمع الحب مسيله طفله اني وعليله
**
بويه وينك ماتردلي ياحبيبي
مثل المضيعه وطنها وبنحيبي
كلما سمعت الباب اركض بالحزان
كل ضني ضعنك عاد انته اويه الاخوان
بالمغربيه احتار وي صوت الاذان
من الرحت لليوم ضل جفني ذبلان
تعال تعال كافي الهجر وينك
تعال تعال حط عيني بعينك
ماعندي وسيله طفله اني وعليله
**
عيني لوما شافت اهلي شلي بالعين
الدنيا مابيها طعم من دون الحسين
كتلك اخذني وياك شلي بحياتي
انته العمر والروح وكل منياتي
ماخذ هلي وياك وماخذ خواتي
لوجن عليه الليل بس نايباتي
عذاب عذاب يعيش الفكد غالي
عذاب عذاب يلي اشغلت بالي
عشرتنه الجميله طفله اني وعليله
**
لوعة الفاكد حبيبه صعبه تدري
بابا اني بحاجتك ودموعي تجري
مثل الجمر بالروح يسعر دليلي
عاشرت ون ونوح بعدك خليلي
طالت الغيبه هواي يمته تجيلي
بس الصدى بالدار هدالي حيلي
وين وين دليني بضعونك
وين وين يابويه شلونك
بجروحي الثجيله طفله اني وعليله
**
كلبي مامطمئن حاسس بالفجيعه
صدري مخنوك نذبح يمكن رضيعه
اشعر حوافر خيل داستلي صدري
وجمرة عطش بالروح ودموعي تجري
بالطف خذاك الموت لو نفذ صبري
اتنطر بويه اخباري وبحالي تدري
خيل خيل تسحك على صدرك
خيل خيل تلجم الك نحرك
لو اندل وجيله طفله اني وعليله
**
علي محسن الفرطوسي
عاشور اجه يلا ياخدامه
بلون السواد رفرفت اعلامه
ياشهر الاحزان ياشهر الاحزان
**
من يهل شهر المُحرم الزجيه تبني مأتم
واحنه واجبنه الحضور
گومو علگوها الروايه نستعد من البدايه
بحرگه نلطم عالصدور
ياشهر مذبوحي أهلاً يادموعي يالله هلن
ياگلب بالحسره فور
المنجوي بجمر المُخيم بحالته بس الله يعلم
منذبح مثل النحور
من هالعزاء قربت أيامه
بلون السواد رفرفت اعلامه
**
نلبس هدوم السواد و نعلن اعليك الحداد
ونترس الدنيا دمع
الناعي ينعه عالمنابر صوت حي اعله الشعائر
وننحني حني الضلع
الدمعه اتسولف مشاعر تكحل جفون النواضر
ابحر حبك تنجمع
حسين شمس الله اشوفه كعبه والعاشگ يطوفه
اسمه رايه وترتفع
فدووه العمر لتُراب أقدامه
بلون السواد رفرفت اعلامه
**
الحاول يضدنه بكلامه والي يحجي عالخدامه
بلا جدل ناقص عقل
الماخدم خاسر حياته وبالحشر يخسر نجاته
وماله بالجنه أمل
المواكب هايه جنه الزهره هيه التحضرلنه
وتجمع الدمع اليهل
كل عزاء لازم تحضره تشاهد الي بصدره عبره
واحنه تدري مانمل
تسجل الحضور وجوكة اللطامه
بلون السواد رفرفت اعلامه
**
كربلائك يبو الاكبر بنور وجهك تبقه تزهر
انته ياشمس الوجود
خيمة الخدمه تلمنه واضح اعلينه هضمنه
لخدمتك ندعي نعود
الأجر قدر المشقه واحنه ندعي بدربه نبقه
او لبو صالح جنود
ياگلب ذوب بمحبته خادم حسين بفطرته
كل سنه حبه يزود
ماله سواك كلبي واحلامه
بلون السواد رفرفت اعلامه
**
نعطش ونرتوي بحبك نحيه ونموت أعله دربك
انته ياسر الحياة
سومرت بالغاضريه امن الشمس ولاعوجيه
عشت انته وكلشي مات
راسك اعله الرمح عالي كمر ويضوي الليالي
حسين ياباب النجاة
الماله حسين بحياته صخره مو انسان ذاته
امن الشمر ماخذ صفات
حُب الحُسين بيه اشيل الهامه
بلون السواد رفرفت اعلامه
**
علمتنه الغاضريه مانهاب امن المنيه
نعيش احرار ونموت
جون درسنه المحبه عابس التضحيه دربه
حسين جنني احلى صوت
ومن حبيب ابن مضاهر ناخذ ادروس الشعائر
بزودنه لمن نفوت
لاتهم بلي يضدك ولاحجي الشامت يردك
مثل بيت العنكبوت
بيها الفخر اللطم والقامه
بلون السواد رفرفت اعلامه
**
علي محسن الفرطوسي
شمعة ضواي ماتت يماي
ابني انذبح
..
اجمل ايام بحياتي وكل غلاتي اويه الولد
كلمه اليمه حنينه تعلقينه امن المهد
ضنوتي جاسم لگيته كبريته بهل الوعد
اخدم حسينك ييمه يبقه اسمه مثل الشهد
حسين الأمير وبكل ضمير
حبه اتضح
..
تحجي الناس بجماله عن دلاله اية جمال
مبخر بهيبة عمامه ياغرامه بدر الكمال
امن الحسد وين اضمه ربي سلمه امن الزوال
ويه دمي حبه صاير والنواضر اروع مثال
يمطر حنان حب وامان
كلبي نشرح
...
كبريته اعله المحنه حروفه جنه ونبص الدليل
تعبي او سهر الليالي ها يغالي وليلي ليل
منين اجتني الغاضريه بيا رزيه المدمع يسيل
وردة احلامي شفتها ساحكتها ياويلي خيل
شفتك رميه بالغاضريه
وگلبي انجرح
...
انتچيت اعله المواجع والمدامع يبني تجري
ماعفت طور النواعي بنفجاعي يگضي عمري
افگدت اغله الغوالي هذا حالي وينه صبري
يمه مذبوح بشبابك وبخضابك حنيته شعري
بعمر الشباب اوليدي غاب
وراسه برمح
...
وانه عالناكه اذكرك موتي هجرك يبني اريدك
ماألي والي وغريبه يامصيبه نحز وريدك
باليسر يمه خذوني كيدوني مدلي ايدك
شاهد احبال البديه امك سبيه لودهري يعيدك
سفرة عذاب نوح ومصاب
ماطر صبح
...
علي محسن الفرطوسي
ياهيبة ريشاته والتشهد صولاته
زلزال وهز الكون يالترهب نضراته
*
غيرة علي براسه اكبر خشم داسه
عباس ابو الغيره
من الخيم قادم وتصدله الوادم
جيش وصفه بحيره
مثل الجبل واكف لون الحرب خاطف
والملعب يديره
موت احمر بسيفه منهم اخذ حيفه
الكمر موغيره
واعله الحرب عازم منه الكلب هايم
يدخل وتشوف عيون يالترهرب نضراته
*
من هاجت الغبره وسوح الحرب خطره
طباها ابو فاضل
هذا امه بدويه وكافله علويه
وللمعركه نازل
للعلكمي اتعنه جوده امتله منه
لجرف النهر واصل
تنتضره سكينه عمي الكمر وينه
دمع النضر هامل
عين اتصد عالرايه والعلكمي ومايه
جوده انترس بالماي يالترهرب نضراته
*
راكب على المهره وبكلبه الف جمره
نار الضمه بجبده
رف اللوه بجفه راعيها ابو الكلفه
يوم الحرب عيده
يشبه علي عوده حيل الله بزنوده
وياخذ الي يريده
ماثنه بالضربه يازلمه اليگربه
يفرسها الصيده
خله الجيش بحيره ديره اتكلم ديره
تتناقلها الأجيال يالترهب نضراته
*
يحصد حصد بيهم وبسيفه يكضيهم
تمطر زعل عينه
ماتنطفي ناره وبجفه بتاره
ناده الشمر وينه
اشباه الزلم رجفت مثل الغنم شردت
تشهد ميادينه
فارس سحك فارس الطف جثث تارس
اوسيفه بجفينه
عباس وصولاته والجيش بحسراته
يگطف رگب بالماي يالترهب نضراته
*
صب عالنهر دمه ناداه ابو اليمه
خويه نكسر ضهري
فگد الأبو حيره لمثلك يبو الغيره
دمع النضر يجري
ياخويه حاجيني لا لا تخليني
بعدك نفذ صبري
عمري نتهه بدونك ياخويه وعيونك
يمك خلص عمري
اكعد يابو الرايه عوف المسنايه
ضهري نكسر عباس يالترهب نضراتك
*
للخيمه ارد وحدي حاير وحگ جدي
زينب شحاجيها
منتضره بالخيمه اختك يبو الشيمه
امن بعيد اصد ليها
وسكينه منتضره بالدمعه والحسره
عالوعد تسكيها
عبدالله شيصبره بيه العطش جمره
ورمله او بواجيها
طايح كمر هاشم ضل عالنهر نايم
تعذر مارد وياي يالترهب نضراته
*
علي محسن الفرطوسي
ياغريب وگِضه عمره بالسجن
*
گِضه عمره ابين اغلال او حديد
ياغريب وغربتك ماتنجلي
هذا امام الرافضه اوبجفوفه گِيد
ياولي الشيعه ياابن الولي
عايش بزنزانه ماشاف الضوه
ساقه من كثر السلاسل التوه
جرح البدلاله ماصحله دوه
عله الكاظم حسرتي ** لجله تهمل دمعتي
مااعوف احزاني ** منه طالب حاجتي
ياغريب وگِضه عمره بالسجن
*
الماله بالديره عرف لمن يحير
تكثر جروحه وتكبر غربته
السندي مايرحم ولاعنده ضمير
والسجن مولاي تكتل ضلمته
الغيم طبعه ابد مايحجب شمس
ياسجين العلم الدنيه درس
بالضماير تبقه انته منغرس
نور مايطفه ابد * وياك باقي هالعهد
انته اغله أمن الهوه * نبقه ابد مانبتعد
ياغريب وگِضه عمره بالسجن
*
جمره صاير كلبه من كثر الحزن
عايش احزانه ودمعته دم تهل
بكثر ضرب السوط متورم المتن
عينه تبجي الـزينب وذيج الهزل
الفاگد اهله عيشته تصبح عذاب
كربله بروحه بقت اكبر مُصاب
مثل شمعه الجفن بدموعه ذاب
ياعذابه اوغربته * بروحه تكتل وحشته
عمره من سجن لسجن * لوذكرنه قصته
ياغريب وگِضه عمره بالسجن
*
الكاظميه تبقه شمعه ابكل زمان
والمناير شامخه بعلو النجوم
اليزوره گلبه يشعر بل أمان
ابو طلبه يجلي انواع الهموم
عالقيود انتصرت جفوف السجين
هذه الكاظم ملاذ الحايرين
اسد بغداد ابوجوده امأمنين
العنده حاجه لايحير * ايصير يمه المايصير
اندبه وشوف العجب * يگدر يغير المصير
ياغريب وگِضه عمره بالسجن
*
وي بني الزهره قسه هواي الدهر
فاطمه بكل ديره تلگه الها عزاء
گلب اشرف خلق بارينه انكسر
امن المدينه الدمعه الطف كربلاء
بالنعاوي الفاجده تحني الضلع
لفاطمه هاليله ونه تنسمع
يمته رايه لبو صالح ترتفع
يطلب بثار السجين * وكربله ونحر الحسين
للفرج ندعي بدمع * شيعه اجينه بالونين
ياغريب وگِضه عمره بالسجن
*
علي محسن الفرطوسي
ياموت اخذت احبابي جانو اعز من روحي
لاطارش ايدك بابي واني اعيش بنوحي
©©©©©©©©©©©©©©
اندفنو احبابي بگبر / والفارگ ايمل العمر / بلحضه افگدتهم
واني اختلف عن البشر / احبابي شمس الله وگمر / بروحي ادفنتهم
خوتنه حلوه وانتهت / دنيانه ويانه قست / مني خذتهم
عيني تعيش اعله الدمع / والله الهجر ماينجرع / من ودعتهم
مايبره لچم اصوابي عشت العمر بجروحي
لاطارش ايدك بابي واني اعيش بنوحي
©©©©©©©©©©©©©©
خيمه الأبو صح المثل / فارگته وراح الأمل / عشت المصيبه
بدرب الگبور انضر صور / ذوله اهلي كسرولي ضهر / وشكم حبيبه
تراب الگبر الهم وطن / خلوني وحدي للزمن / وگلبي بنحيبه
خالي بقه امچان الأخو / وماينحمل فگد الأبو / واني غريبه
من حگي ابدي اعتابي وبكربله مذبوحي
لاطارش ايدك بابي واني اعيش بنوحي
©©©©©©©©©©©©©©
فاركت امي من وگت / بعمر الورد وتيتمت / من امي ياناس
شيلتها مليانه بخت / تنزل الرحمه لودعت / وتمطرلي احساس
زينب بقيت بغربتي / كل اهلي راحو واخوتي / حسين اويه عباس
اعيوني تنضر عالدرب / والانتظار اشكد صعب / ومخنوگه الانفاس
عشت العمر بمصابي ياروحي لهلج روحي
لاطارش ايدك بابي واني اعيش بنوحي
©©©©©©©©©©©©©©
خل استراح ابموتتي / المن اضل بدنيتي / شفت الأذيه
وحدي بقيت بهالزمن / رك حيلي وعيوني نعمن / وترجف اديه
شفت الحسين اعله الرمح / وجه الصبح من ينذبح / تحل الرزيه
عكب البواجي والحزن / ياموت خليني اندفن / هاي المسيه
ارتاح بس بترابي ودمعي يغرگ اسفوحي
لاطارش ايدك بابي واني اعيش بنوحي
©©©©©©©©©©©©©©
.....
راحو يزينب كل هلج / متغيره عشتي بوحدج / موتج تقرب
روحي استراحي امن التعب / موعد لقاء اهلج قرب / ارتاحي يزينب
الدنيا مابيها رحم / شفتي شكثر ضيم وألم / وجم خيمه تلهب
طف كربله بيه العجب / زينب خدرها انسلب / وعالهزله تركب
واني انتضر غيابي والموت الهم يوحي
لاطارش ايدك بابي واني اعيش بنوحي
©©©©©©©©©©©©©©
علي محسن الفرطوسي
روحي استراحي امن التعب
موعد لقاء اهلج قرب / ارتاحي يزينب
الدنيا مابيها رحم
شفتي شكثر ضيم وألم / وجم خيمه تلهب
....
السَلامُ على جبل الصبر زينب
#علي_محسن_الفرطوسي
لبوة حرايب بنت الاطايب
زينبنه بنت إكرام سوت عجايب
من دخلت ارض الشام سوت عجايب
°°°°°°°°°°°°°°°°°°°°°
هيبتها من عباس مادنگت الراس
تمطر وفه وحساس .. هاي الأميره
جنها علي الكرار نازل على الكفار
وين المفر يـ شرار .. متروسه غيره
حيدر قلع باب الكفر يوم الهجم بجفوفه
وشفنه الفعل نفس الفعل لاكن حدث بالكوفه
زلزلت جيش ابأكمله بخطبتها المعروفه
ذلت عساكر كسرت مناحر
من عدها ثلث انعام سوت عجايب
من دخلت ارض الشام سوت عجايب
°°°°°°°°°°°°°°°°°°°°°
أدت رسالتها مرفوعه رايتها
امن الشاطي جابتها .. بهيبة ابوفاضل
ياعمت الساده ذليتي القاده
خيبر علي عاده .. ليث الحرب نازل
يل هيبتج هيبة علي من عنده اخذتي هوايه
متوهم الشام اشكثر رادج تصيري احجايه
هزيتي اعروش الحكم ريح وتهز ابرايه
هدمت ضلمهم من جادلتهم
والتشهد الأيام سوت عجايب
من دخلت ارض الشام سوت عجايب
°°°°°°°°°°°°°°°°°°°°°
من دخلت الديوان خلت يزيد انهان
جن العصى وثعبان .. عادة زمن موسى
ماواحد اتكلم منها الحجي اتعلم
بكل مُفرده مُعجم .. ويتعلم ادروسه
نهج الشجاعه تكلمت كل مُفرده اتذل بيهم
لوموسى نازل بالعصى ولأفعى تبلع بيهم
فرعون غرگان ابحر للتهلكه توديهم
هاي الأميره لتضن اسيره
لا ماتطخ الهام سوت عجايب
من دخلت ارض الشام سوت عجايب
°°°°°°°°°°°°°°°°°°°°°
عين الله ترعاها سبحانه خلقاها
زينب ومعناها مُصحف شجاعه
لبوة بني هاشم جفج عسن سالم
ذليتي الضالم وقررتي اوداعه
راوتهم انجوم الظهر من دخلت الديوانه
هاي اني زينب بت علي بت الشرف هاي انه
كد كيدك ايامك عدد رب العرش ويانه
كفالي عباس مادنگ الراس
قصرك قصر اوهام سوت عجايب
من دخلت ارض الشام سوت عجايب
°°°°°°°°°°°°°°°°°°°°°
علي محسن الفرطوسي