1850
مختصّه بنشر جميع القصائد الحسينيه / احنه غير حسين ماعدنه وسيله للتواصل مع الشاعر @a313l1
يمه تعبانه روحي ... دهري زيد جِروحي
بلايه امي كلشي خنگه .. يمه مثلج وين الگه
دهري زيد جروحي
⓪⓪⓪⓪⓪⓪⓪⓪
كافي يادنيانه كافي رحمي بينه
ٳمن النحبهم والغوالي تفارگينه
راحة امنه وبيتنه حركوه علينه
صغار ﭼـنه وصحنه ادرك ياعلينه
ياابو الغوث اغثنه .. ياعلي بويه انهضمنه
الزهره شهگة فرد شهگه .. يمه مثلج وين الگه
⓪⓪⓪⓪⓪⓪⓪⓪
جنت من اشتم عطرها انسه كلشي
وهسه من ٳشتاگ الهه المن امشي
نعشج الشالوج بيه اتمنه نعشي
ٳمي ياحضن المحنه وهيه عشي
بيتنه الدافي اليلمنه ... طاح وتشتت شملنه
الفاگد امه الحسره حگه .. يمه مثلج وين الگه
⓪⓪⓪⓪⓪⓪⓪⓪
كلمة اليمه شكثر حلوه وحنينه
وياج يمه وداع موت توادعينه
الله لاينطي الهجم حاقد علينه
ٳمن اغله انسانه حرمنه تيتمينه
هجموا اعله الحبيبه ... وحنه صرنه بمصيبه
بينه الج حسرات ملگه .. يمه مثلج وين الگه
⓪⓪⓪⓪⓪⓪⓪⓪
بنتج صغيره وﭼـبيرات النوايب
والتموت امهه تغيرها المصايب
يمه كلبي وراسي من عفتيني شايب
عودي الاخضر يبس والدلال ذايب
زيبنج ماهي زينب ناري من الغيبه تلهب
ذابله ﭼـني ورگه ... يمه مثلج وين الگه
⓪⓪⓪⓪⓪⓪⓪⓪
ضاعت احله سنين وماتت ويضحكتي
عايِشَه من بعدج اعله الله ودمعتي
يمه ماشبعانه منج ونتي رحتي
ندفنت بقبرج حياتي وكل فرحتي
خلصة ايام المحنه من دفن حيدر امنه
بالبواجي الحره تبگه.. يمه مثلج وين الگه
⓪⓪⓪⓪⓪⓪⓪⓪
غير دمعه بليل والحسره شبقالي
بعينه تموت السعاده الفگد غالي
اختنگ بهمومي وتغثني الليالي
وإني اشوف البيت من ام حسن خالي
ندفنت وياها السعاده بابها أمن انضر رماده
احترگ يوميه حرگه .. يمه مثلج وين الگه
⓪⓪⓪⓪⓪⓪⓪⓪
للشاعر / علي محسن الفرطوسي
اعيش شلون آنه بدونج اشوف الدنيا بعيونج
اموتن لو يدفنونج يروح الروح
بزوايا الدار الج ذكره كسر بضلوعج وعصره
المصيبه بروحي يالزهره وحلم مذبوح
****
اليفارك أمه بعيونه تشاهد حيرته أو صدمه
حياته بلا طعم لوما . يسمع كلمة اليمه
إنه اتمنى القبر بي باب اجيج وعطرج اشتمه
غفت عيني اعله مدمعها وصحيت جروحي مزدحمه
نعيش بحيره بغيابج ييمه وجمرة امصابج
بعيني من اصد بابج أصيح بصوت
مكانج محد يعوضه بغيابج كلشي بي فوضه
احس كلبي وكف نبضه وجفن مفتوح
****
انشدمن عليج بليل إذا احتار بهمومي
خذاج الموت وغيابج ترك آثاره برسومي
نعاوي الفاجدات انعه أو يخلص بالدمع يومي
القبر بدموعي اتعناه وصيح ابلا وعي كومي
افز وتعثر بحزني الج أحزاني ياخذني
غيابج يمه تعبني وكسر كلبي
أهيم بعالم همومي الهجر ذوبهن رسومي
بدمعتي يبتدي يومي وعذاب جروح
****
ليليه الوجع بالروح لا عافاني لاعفته
بوجودج جان جنه البيت هسه الوحشه حاضنته
العذاب بغيبتج شفته وجرح نص كلبي تاركته
افز ليليله مرعوبه واحس موتي قرب وقته
منضر موتج بعيني بنعش شالوهن سنيني
الصبر ماضن يكفيني وحرام أرتاح
ضلام الليل بعيوني على امي لاتلومني
سحاب ومطر بجفوني وهويت النوح
****
بعدج بيه ضلام البيت وگلبي نگطع سباحه
تنام الناس هاذا الليل واني الما شفت راحه
على باب الحزن كل يوم اوكف واشبع نياحه
فاركنه الفرح بعدج ييمه اوضاع مفتاحه
ضعت حسره اباثر حسره لهيب وتستعر جمره
كسر لبروحي شيجبره بعد هيهات
ابات بكسره ليليه بعد كل حيل مابيه
رحتي وماألج جيه الحنان يروح
****
أصعب لحضه من يروح بشر متربع بروحك
يترك بالكلب لجمات وبعد ماتلتم جروحك
عمر شالوه بالتابوت استلذ ياكلبي بنوحك
البيت ابلايه ام ايصير نار وجمرته تلوحك
احلى ايام من عمري انتهت والشوگ فت صدري
بعدج ماردت عمري حنانج وين
بيت وخالي من امنه بعدها كلشي يهضمنه
يتامه وعالحزن بتنه بدمع مسفوح
****
علي محسن الفرطوسي
❉❉❉❉❉❉❉﷽❉❉❉❉❉❉❉
لسـتة #دعم_مؤسسة_منبريون_الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4 سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 1000 عضو فما فوق
━━━━━━━━━━━━━━━
للإشـــتِـراك 👇🏻.
التواصل مع @ahmed_alziwar0
قناة خاصة بتلحين القصائد
/channel/+PZwpTt2HLXcvUQZh
------------------------------------------------------
رحلة حب ولائيه مواكبنه الحسينيه
بمشينه ندرك الغايه نضل للموت وفايه
الموعد كربلاء بدموع وقرايه
لبو السجاد هل كصدينه مشايه
****
اذن ياحبيب لفرض حب وحساس
خل تتوافد لكربله كل الناس
بخطوات المحبه الأجر ماينقاس
ماضايع تعب يم حضرة العباس
فاتح ألنه بيبانه ابوفاضل تلگانه
وحلوه الهلا بلسانه
ياساقي العطاشا المانشف مايه
لبو السجاد هل كصدينه مشايه
****
لجل حسين عفنه الدار والديره
وگصدنه كربله نهتف يبو الغيره
جننه الحسين بحبه مو غيره
وهذا الحب صعب ياناس تفسيره
حب حسين جننه ابد متطيح رايتنه
گبة حسين كعبتنه
والكعبة عشگنه اليوم عنايه
لبو السجاد هل كصدينه مشايه
****
المواكب مو جماد تعيش حبها وياي
كلشي بهل الوجود يصيح يامولاي
الماي البل درب يختلف عن كل ماي
من جنة عدن والمكرمات هواي
ابجاي الموكب أتهنه هله يل معتني الجنه
على جناح الهوه تعنه
عينك خلها لجل حسين بجايه
لبو السجاد هل كصدينه مشايه
****
يامحله التعب بدروب ابو اليمه
يانعمه ودعيت أدوم هالنعمه
بطريقك يبو الأكبر عايش الرحمه
المشه خطوات فاطم سجلت اسمه
تتلگانه الزهره اتسجل الگصد گبره
لمصابك تضل جمره
مصيبت كربله تضل عايشه ويايه
لبو السجاد هل كصدينه مشايه
****
علي محسن الفرطوسي
مشايه مشايه
لحسين وفايه
كل العراق لكربله تعنه ورفع رايه
****
بسم الله وحيدر علي رايتنه رفت
واهل المواكب والخدم كلها استعدت
كل الهلا بالزاير اعله الباب كتبت
جيوش العشق مشايه صوب حسين طلعت
خطوه بأثر خطوه
حسين التعب يسوه
العطشان يتروه
من كربله
حيدر يشد عزمك
بيده يخط اسمك
والكافل ايكلمك
ميت هلا
....
بحبه أدرك الغايه
لحسين وفايه
كل العراق لكربله تعنه ورفع رايه
****
الخدام موقفها المُشرف بالزياره
سفرتها ممدوده تضل حد المناره
للكرم والخدمه ابد ماتطفه ناره
حي الله انصار الحسين انتم غياره
حيرتو الوادم
هذا الكرم دايم
خادم يشد خادم
ونطو وعد
فزعه ولائيه
الطف كربله النيه
خدمه حسينيه
تضل للأبد
...
أفعال وحجايه
لحسين وفايه
كل العراق لكربله تعنه ورفع رايه
****
نكتب على عيون الدهر هاي الشعائر
ماينتهي هذا المشي وكل سنه زاير
حسين يمشي اويه الدمه ويحيي الضماير
يامحله هالرايه الترف فوگ المناير
كلما يدگ كلبي
بهمه امشي بدربي
يل تسوه كل تعبي
محبوبي انته
طاير اجي بشوگي
يل تجري بعروگي
يحسين معشوگي
بلهفه گصدته
...
الحب عايش ويايه
لحسين وفايه
كل العراق لكربله تعنه ورفع رايه
****
غيري يعيش اعله الهوه واني بخدمتي
لو ماا اروح لكربله ابقه بغربتي
محسوبه ايامي فقط بس بخطوتي
مثل الحمام اتعنه الك جنحي دمعتي
طير اعتني لصحنك
بدموعي اگصدنك
عايش على حزنك
ياسيد الروح
ايامي محسوبه
والخدمه مطلوبه
الخادم لبس ثوبه
بشوگه مذبوح
....
لطميه وقرايه
لحسين وفايه
كل العراق لكربله تعنه ورفع رايه
****
احيه وأموت بهل الدرب مهما يمنعون
مجنون وتباهه بجنوني اتسمه مجنون
لو ما اشوفن گبتك ماريدن عيون
الماعدهم حسين وعشگ حقهم يحسدون
سلطان سواني
بهل العشگ رباني
للخدمه جاباني
حسين الغريب
مغذيني من صغري
ونيرانه بصدري
يل تسوه كل عمري
وانته الحبيب
....
اعطش واجي لمايه
لحسين وفايه
كل العراق لكربله تعنه ورفع رايه
****
علي محسن الفرطوسي
حجايه گالاها النبي طه الأمين
راجع أو اقره حديث الثقلين
****
يانبي الامه عجيبه أمتك
نكرة افضالك وهجرو كلمتك
يارسول الله كلت بوصيتك
تارك انته الثقلين بغيبتك
هاي كلمه نكولها للغافلين
راجع أو اقره حديث الثقلين
****
المصحف تمزگ امن أصحاب الغدر
والالحاد انتشر وافكار الكفر
أصبح القرآن بعدك منهجر
والاعلام اعلينه يوميه بفكر
عقولهم مثل الحجر لا ماتلين
راجع أو اقره حديث الثقلين
****
اهل بيتك يامحمد من رحت
تهجرو وبيوت نور تهدمت
ختلفت الامه . عليها تحشدت
شي قتل بالسيف شي اتسممت
اهل بيتك الها قله الناصرين
راجع أو اقره حديث الثقلين
****
عدنه القرآن خط أحمر تره
باجر نذل الافكار الكافره
مانعوف احنه العتره الطاهره
ثقلينك يامحمد مفخره
نموت نحيه ونبقه الهم خادمين
راجع أو اقره حديث الثقلين
****
نبقه انصارك رغم هاذا الضلال
ماتركنه اوصيتك احنه مُحال
شيعه وحنه اطباعنه مثل الجبال
عدنه المصحف مقدس لايزال
عالوصيه وعالعهد محافضين
راجع أو اقره حديث الثقلين
****
علي محسن الفرطوسي
بدمع العين ياابا الفضل
صاح حسين ياابا الفضل
****
امن المخيم للشريعه حسين يتعثر طلع
كسرة الفاگد أخيه گبالي جم مره وگع
راح اخوي وكلشي راح وبعده دلالي نصدع
حته صوت خيامي اسمعه ابو فاضل مارجع
متحيرين ياابا الفضل
بدمع العين ياابا الفضل
****
آنه زينب ياخو زينب روحتك كسرة ضهر
رايتك والجود خويه ليش ضلت عالنهر
من بعد عين الكفلنه كلشي ينذر للخطر
خويه كسرة عود بعدك واهسي وحيلي نكسر
والجفين ياابا الفضل
بدمع العين يابا الفضل
****
راجع حسينك وحدي بجفه يمسح دمعته
كلي راح الي كفلجن دمه صابغ رايته
يعتذر من العطاشه السهم صوب جربته
عفته الشاطي رميه بلا يساره ويمنته
بجف البين ياابا الفضل
بدمع العين ياابا الفضل
****
يختي اصعب لحظه هايه الأخو امن يفارك اخو
واني وحدي بكربلاء وتفتر جيوش العدو
مالي ناصر لامعين وظهري يسنده منو
راسي باجر عالرماح يشيله الماهو كفو
مسلبين ياابا الفضل
بدمع العين ياابا الفضل
****
الكفلجن طاحت ايده وعينه صوبها السهم
استعدن للمصيبه تحترك باجر خيم
ضعن يطلع عالهزيله ومايرف بيه العلم
يختي اشوفنجن سبابه بيد ناس بلا رحم
رايح وين ياابا الفضل
بدمع العين ياابا الفضل
****
علي محسن الفرطوسي
ترحلون بسفرة منيه
ترحلون للغاضريه
****
اضعون اهلي ارحلت مني
وبقيت بلوعتي او حزني
فايض بالدمع جفني
ابوي اني اليودعني
وحيده بداره عايفني
بقت ذكراه تجرحني
ترحلون يهل الحميه
ترحلون للغاضريه
****
مثل نار اللظه بروحي
يلهب واكثر جروحي
مايهدأ بعد نوحي
اعلگ رايه بسطوحي
كتبت حسين مذبوحي
حسابي دكول الي روحي
ترحلون واني شبديه
ترحلون للغاضريه
****
نبضات الكلب بعدك
حزينه بويه ابفگدك
ذبل من العطش وردك
يبويه اويه الذبح وعدك
غريب بكربلاء وحدك
ولاناصار يضل عندك
ترحلون وزينب سبيه
ترحلون للغاضريه
****
رحت والبيت ضل خالي
بس احزاني أگبالي
منك لاخبر جالي
هموم الغيبه تبرالي
دمعي بغيبتك هالي
ولا تسأل على احوالي
ترحلون بدمعه جريه
ترحلون للغاضريه
****
سمعت الناعيه تنعه
ذبيح ومنكسر ضلعه
اصابع جفه بس تسعه
برمح راسه العدو يرفعه
صوت الشامت نسمعه
فزعت خيلهم فزعه
ترحلون وراسك هويه
ترحلون للغاضريه
****
علي محسن الفرطوسي
بالخدمه محله الأيام ويامحله لمت الخدام
تحييني دمعة عاشور وعايش على الخدمه
***
عاشور الاحزان ابتده والجفن حضر دمعته
وبروحي احزاني
ماعيش لوما خدمتك رف كلبي رفت رايتك
والخدمه عنواني
سود الملابس فصلت لمجلس حسين توجهت
وبيه يلهج لساني
مابارحت حزنك يوم يحسين لجلك ملجوم
دمعاتي بعيوني تفور وعايش على الخدمه
***
محضر دمعتي ولهفتي خطيت باسمك رايتي
اكتب يمحبوبي
برومشي زخرفت الاسم خليني وياك الچم
وسود يضل ثوبي
شفتك حقيقه مو وهم بمحبتك ماكو ندم
يمحلي دروبي
عايش على حب حسين وتسولف وياه العين
يل عالمك عالم نور. وعايش على الخدمه
***
مسويلي قيمه بهالعشگ گلبي على حبك يدگ
بكل نبضه ونبضه
ماريد غيرك سيدي وياك وعدي وموعدي
بغيرك فلا ارضه
شهر المحرم انتضر ريحة عزاء بيه تمر
اذن حزن فرضهِ
قد قامت ايام النوح. أهلاً يشهر المذبوح
قرايه وحزن لطم صدور. وعايش على الخدمه
***
نشرت قميصك فاطمه والنوح من عالي السمه
ويلي يمذبوحي
تحضر مجالسنه وتون يافاطمه يم الحزن
لجلج صدح نوحي
شيعتها ونقيم العزه جرح الدليل نفززه
وماتغفه جروحي
شبه الحطب بالتنور. دلالي مولاتي يفور
بالطف تصد عيني نحور. وعايش على الخدمه
***
كل عام عالموعد نجي بالحسره والهم والبجي
ويلمنه هالمأتم
ماعدنه غيرك سيدي لبيك حزنك موعدي
وبمجلسك نلتم
صوت القرايه بمسمعي. يحسين يهمل مدمعي
بكلبي الحزن خيم
كل عام خليني وياك ماريد لحضه اني انساك
خليني لجلك مكسور وعايش على الخدمه
***
علي محسن الفرطوسي
مسلم ياسبع الحومه تشبه عباس ويومه
ياحياك ياحياك طوعه تحشمك بالكوفه
***
هله يمرجف الخياله . سيفك ياهو الينداله
جم خيال بصف خيال . دحلب والموت گباله
ريح وهب اعله الجمره . نارك ضلت مستعره
هوه عالي اوطگ النفاش . يعني الوادم مطشره
سيفك تركعله ارگبهم . وهاذه حزامك راعبهم
جن الحمزه وصاح بصوت . عالموت بحيله يذبهم
خلاها الناس بحيره يومك يصعب تفسيره
ياحياك ياحياك طوعه تحشمك بالكوفه
***
قائدهم وصه العسكر . يم مسلم ياهو اليگدر
الثابت يگلگ من الخوف . يازلمه يمر بالهزبر
عيونك تتجادح جمره . واليبرز حاير بأمره
يم سيفك مخروسه سيوف . ماثنيت انته الطبره
يذبح والعين اتشوفه . دخلها إنذار الكوفه
نازل بيهم ملك الموت . الوان أعدائك مخطوفه
جنك حيدر من يبرز برگاب الكفار يحز
ياحياك ياحياك طوعه تحشمك بالكوفه
***
تخزر بعيونك بيهم . للموت انته موديهم
يا مسلم هاذا الميدان . كفو منك يمبجيهم
طوعه تهلهل وتحشمك . يل تشبه حيدر عمك
جنك شايل ذو الفقار . والأشتر جنه بظهرك
خورست الوادم كلها . اية موت ترتلها
بجيت عيون العدوان . ارض الكوفه مزلزلها
تذبح وتشمر بيهم جن نسوان مسويهم
ياحياك ياحياك طوعه تحشمك بالكوفه
***
بركان وطگ بالكوفه . دخان وكلها اتشوفه
يل واصل عزمك للغيم . ونجمات السبعه اطوفه
حنطه وجفك يطحنهم بكيفك كون اطشرهم
سيفك منجل والمرواح . والموت اليوم يلمهم
اليشرد بالسيف تلوحه . وجم واحد طلعت روحه
نصهم ماتو من الخوف . خياله أشكد مذبوحه
مرعوبين امن اخيالك حقهم محد يدنالك
ياحياك ياحياك طوعه تحشمك بالكوفه
...
والمايگدرلك يغدر . ومن طبع المؤمن يصبر
حفرولك حفره الإنذال . والفحمه اتغار من الدر
مابيهم واحد زلمه . يمجرعهم جم لجمه
انته الفارس والخيال . مسلم يالكلك همه
دخليت لقصر الكوفه . ياحيف ايدك مجتوفه
يمراويها الموت شلون . اسمك يامحله حروفه
عايش وتضل ويانه المثلك ماتو عدوانه
ياحياك ياحياك طوعه تحشمك بالكوفه
***
علي محسن الفرطوسي
حب حسين يجمعنه انصار وتواعدنه
نموت وياك كل احنه يبو الاكبر
**
عهد بالدم كتبنه . نموت ونحيه كلنه
على دربك يغالي . ومانُبالي . بل أجل
على جروفك رسينه . لبحر حبك اجينه
اليحب طبعه يحن. الكم يبن. خير العمل
حبيب الحب يقدسه . زُهير مضحي نفسه
اذا جون بجنونه . يشاهدونه . امن ارتجل
وهب واهب حياته . أنس موته وحياته
على هالحب تشوفه . وكل طيوفه . انته الأهل
انصارك وفو للموت حي اعلى الحرب ونفوت
وبنص الحرب هالصوت. يبو الأكبر
***
نضحي وما نُبالي . امن اجل عينك يغالي
حبيبي انته وغلاتي . وكل حياتي . والسنين
يحر والحر هيامه . يضحي لجل امامه
سجدلك بالمحبه . ونبضه نبضه . ياحسين
العشگ واضح طريقه . العمر لا مانطيقه
وحلات الحب تعب . ننطي الرگب . ومواعدين
بواترهم شديده . صگر ويغطله صيده
تشوف الشايب يهد . سيفه يرعد . مايلين
الصاحب يوفي للصاحب وكلب الي يحب ذايب
وانته بعينك تراقب. يبو إلاكبر
**
هلا بسيد المشاعر . حييت انته الضماير
عشگ من عالم الذر . بينه يكبر . مايموت
بدمانه نخط ملاحم . ونكسرها الجماجم
جحيم اعله اليضدك . واعله وعدك. يعله صوت
العساكر لو نجيها . برعب ننزل عليها
استمع طگ الجحافل. من نقاتل. من نفوت
نشل حيل الكتايب . نطب اعله الحرايب
الشرد والماشرد. لموته استعد . وتبلعه حوت
هزينه الحرب يحسين عساكرهم رعب ميتين
نگطع روس والجفين . يبو إلاكبر
**
اهازيج بحربنه . نراويهم ضربنه
تحزمنه بعزمنه . وماتعبنه . بالقتال
لهب نار بصدرنه . دخيل الله زعلنه
نصدلهم نثايه . ومو كفايه. ولا رجال
ندوس احنه عليهم . فريسه ونعتنيهم
صحابه ومن هجمنه. مارجعنه. لا محال
نهز رمح المنايه . زلم بينه الكفايه
صبغنه الخيل بالدم . وانته تعلم . بالنزال
رفت راية الغيره نخلي بخصمك الحيره
الملعب جفنه يديره . يبو إلاكبر
**
يبو إلاكبر حربنه . بعشگها تدري ذبنه
فگسنه عيون بالطف . يسطر الجف. بالكفر
ابابيل بضربنه . سيوف الموت احنه
رعيد السيف يلهب . موت وأصعب. من يكر
الهزيمه موطبعنه . الك انصار كلنه
بدمه من وقعينه . وعاهدينه. بهل العمر
ملاحم سجلينه . الجثث تشهد علينه
نطشر جيش كلنه . لو هجمنه . اعله الشمر
غصت بالجثث هالگاع انصارك تره احنه اسباع
من صوت الحرايب شاع . يبو إلاكبر
**
علي محسن الفرطوسي
يبني هاي وصيتي
زين احفظ كلمتي
يمه عباس يمه عباس
***
منطيتك وصيه . لرض الغاضريه
يانبض الگلب
ضحي دم رگبتك . غيره اترس جربتك
وي ماي العذب
وفيهم يغالي . ياسهر الليالي
لو دمك يصب
اگصد للعساكر . جيش او خله حاير
دخلهم رعب
كوم زلزل كربله
ياابن عقد الوله
يمه عباس يمه عباس
***
خلني اسمع طفوفك . وبگطعت جفوفك
وبالعين السهم
ضحي ولاتبالي . يوليدي يغالي
وحاميها الخيم
ادري الغيره طبعك . ربيتك وعرفك
خيال وشهم
جودك يجري مايه . ياساقي الضمايه
بخصمك لاتهم
الماي جيبه للخيم
واسگي أطفال وحرم
يمه عباس يمه عباس
***
اختك هاي امانه . ياشايل لوانه
كفال الخدر
ضحي من أجلها . لويثگل حملها
هاي ام الصبر
ارفع يبني راسي . بوكت المأسي
يابعد العمر
هز الغاضريه . وجيوش ال اميه
وذكرها ابدر
زلزل جيوش الكفر
راوها نجوم الظهر
يمه عباس يمه عباس
***
گصد للشريعه . ورويها الوديعه
من ماي العذب
أطفال ويتامه . فرت جن حمامه
والمدمع يصب
جودك مايه يجري . واني بحالي تدري
لاجمني الگلب
امك بالي يمك . واني ادري تحشمك
زينب بالغرب
وانته كد حجايتك
كوم وانشر رايتك
يمه عباس يمه عباس
***
بلحظات المنيه . اسمع هالوصيه
ضل اعله الجرف
لاتشرب ييمه . كلبك لو تدمه
ورويها بنزف
نادي خويه وينك . وضحيله بيمينك
عفيه ابني الكلف
حسينك من يجيلك . ايحاول يشيلك
بدمعه المنذرف
فدوه الـ ام الخدر
يبني كل هاذا العمر
يمه عباس يمه عباس
***
علي محسن الفرطوسي
ما أعوف ادموعي فاطمه موضوعي
هذا عزائي للأبد مااعوف ادموعي
...
اني ماانسه عزائي هذا كل عنواني
باليالي الفاطميه اتهيج بيه احزاني
العن الجان السبب واتبره من الجاني
الي يسمونه خليفه بهل الفعل اذاني
الباب تشهد ناره عدنه كل اخباره
هذا عزائي للأبد مااعوف ادموعي
...
دمعتي عالخد تسولف من تصب من عيني
فاطمه هاي الكريمه شما ردت تنطيني
بخيرها عايش حياتي وخيرها مغطيني
أبابها صبيت دمعي والضلع ماذيني
جرحي البنص روحي وماتهيد جروحي
هذا عزائي للأبد مااعوف ادموعي
...
الروايات التسولف واضحه بعنوانها
عمر هوه السبب جان وكثراها احزانها
بياسبب ضلع الزجيه إكسرو عدوانها
بعد ماداعي اجامل واخفي الي خانها
امن الطغاة اتبره واني عبد الزهره
هذا عزائي للأبد مااعوف ادموعي
...
بهل الليالي الفاطميه كلبي عاشر نوحه
واني المثلي بحياته اشاف غير جروحه
بت نبي الرحمه الزجيه ورده او مذبوحه
حگه اليبجي عليها دمعته مسموحه
هاي ام العتره شعدنه غير الزهره
هذا عزائي للأبد مااعوف ادموعي
....
الله لاينطي العصرها والسطرها بعينها
هواي مهمومه وحزينه شكثر امبجينها
ايتامها تنوح لفكدها والحسن وحسينها
بليل مضلم بت محمد وسفه مشيعينها
حيدره امشيعها بدمعته امودعها
هذا عزائي للأبد مااعوف ادموعي
...
علي محسن الفرطوسي
اذا ادور ع قصائد وألحان حديثة تفضل اشترك هنا
/channel/kamelAbdullah
شحجي اعله جروح الشام
الماخلن عيني اتنام
روحي المتروسه الآم
واني سبيه
****
عاشت روحي اعله الحسره
وبعد الغالي شلون ارتاح
خوله اني أو احجي جروحي
بعد حسين الغالي الراح
مسبيه أمشي بألآمي
راسك يابويه اعله ارماح
خرت روحي اعله الناگه
وگلبي الفز بجروحه وطاح
ما نامت لحظه العين
واني انضر راس حسين
انذبحت كل الأحلام
بالغاضريه
****
مجتوفه ادخل للكوفه
وادخل مجلس تصعب هاي
عطشانه لنضرة عينك
يحسين وماريدن ماي
بعدك مهضومه بكسري
وأذت كلبي جروح هواي
من بعدك دمعي اليجري
أو . ورم متني سوط اعداي
شتمونه ودمعي ايطيح
بجه حته البجيي الريح
جم لجمه وجم حسرات
فزعت عليه
****
راسك عالرمح العالي
رتل ايات القران
يهتز كلما نتأذه
ويخزر بعيونه العدوان
ماعافانه ولاعفنه
جروحه وناحتله النسوان
ياأخر نبضه بروحي
من غابو مني الوليان
راحو من عندي احباب
گلبي بفركاهم ذاب
ميته بلحظة توديع
قبل المنيه
****
حانت ساعات الموت
ويتلگاني الغالي حسين
بجفوفه يغمض عيني
ويحضرني بساعات البين
لاجن ماتهدأ جروحي
وتغمض بالدمعه العين
اه امن الشام ويومه
اعلينه الوادم ملتمين
كلها اصد لينه الناس
خنگتني اخر انفاس
وترقب وعد الموت
هاي المسيه
***
خوله اني وبس بموتي
ارتاح وانسه اللجمات
تره كلبي اعليك إمجرح
والفاگد جرحه الصفنات
لاكن اخر ايامي
ومانشفت لحظه الدمعات
جرحي المابينه العاذل
سكته امن اصرخ بالحسرات
تشرح دمعات العين
بعده اشكد مجروحين
راح الغالي وماعاد
بسفرة منيه
***
علي محسن الفرطوسي
من عالي الرمح ويصد علينه
راس حسين ماعاف الضعينه
****
على طول الدرب وعيون اخوي اصد عليه
حرورة موت بعيونه وشفت انه المنيه
شلون احضن اخوي او إني احبال اعله اديه
يهتز راسه كلما تنضرب يمه رقيه
نشكيله الهظم واحنه بسبينه
راس حسين ماعاف الضعينه
****
غفت بعيوني دمعه وماتت الضحكه اعله ثغري
اني وياي توم احزاني من ايام صغري
جفوني تعودت عالدمعه واتضل دووم تجري
تالي أصبحت مسبيه وتفرهد خويه خدري
لون همومنه اليشبه عبينه
راس حسين ماعاف الضعينه
****
خيالي الجان يحلم بشر بالدنيه يشوفه
اجتنه كربله منين وسبيه ادخل الكوفه
شمر ياحيف ضعن ال النبي بجيشه يطوفه
وزين العابدين الجامعه تجرح جفوفه
كل من هب ودب ويشتم علينه
راس حسين ماعاف الضعينه
****
موكب السبايه من دخل بيه النساوين
بطبول او فرح وتحشدت الگوم صوبين
تتفرج علينه الناس حيره انطي الوجه وين
ام الخدر زينب وينها اوين الدواوين
بحجار وكلام المو حلو مستقبلينه
راس حسين ماعاف الضعينه
****
اهل الكوفه جرحونه بكلام وشتمونه
جم مره اسمعت من شتمو حيدر ابونه
بسوگ وبين شمات وعواذل وگفونه
خويه حسين عدوانك بعد عينك ولونه
المن نشتكي لو أشتكينه
راس حسين ماعاف الضعينه
****
يا أكبر جرح خلاني محتاره بزماني
واني المثلي ماتغفه ولا تهجع ثواني
زمان الشوم بعد حسين اكثر عذباني
على اللوعات دهري اني الرماني
وين اشبول هاشم ماتجينه
راس حسين ماعاف الضعينه
****
علي محسن الفرطوسي
آمنين الليله اجيبن قالع الباب
علي ياحاضر الشدة يبو اتراب
....
أمير الدنيا كلها وگاضي الكلفات
اليطيح بشده يتنخاك بالشدات
افزع ياعلي واحضر العلويات
بهيمه الليله وحدّي ومابگن خيمات
مارحموا ودايعكم هاالأعراب
من بعد الذبح معركة الاحجاب
،،،،،،
هاي الشدّه ماتشبهه كل شدّه
زينب عـالحراسه ماهي متعوده
چفك ياعلي قرص الشمس رِده
وينك ماتجي اتلم حيلي الـ تبده
سيفك ماتشهره من الگراب
تفزع فزعتك وتشد الأنگاب
،،،،،،،،
تعال لكربله وشوف انته بعينك
مثل نجم السمه مطشر حسينك
يابو الغوث اغثني ياعلي وينك
قريبه هالمسافه البيني وبينك
ياحيدر گمرنه اعله النهر غاب
احبال اليسر بويه الشمر جاب
،،،،،،،،،
صاحو عالخيم يا والدي فرهود
تَعال احسب يبويه اشكم اثر موجود
كلفه عثرتي بين الشمر وجنود
ضاعت جم يتيمه وجم طفل مفگود
مثل الخيمه گلبي امن الخجل ذاب
للتل من رحت حشمت الاحباب
،،،،،،،،،
وحشه الليل وحنه نبات بالهيمه
گلبي المنهضم. إيقاسي ابضيمه
افزع عـالعطاشه ياعلي غيمه
وين اهل الحرب يابويه والشيمه
ماضلت عشيرة أوين الاصحاب
كلهم عالارض مسلوبه الاثياب
،،،،،،،،،
علي محسن الفرطوسي
موعدنه طف كربله
صوت وهتف كربله
بسملة دم النحر صوت وهتف
****
بدمنه نفديك نواسيك يبن حامي الحمه
صوت الگلوب يمحبوب يرتل بالدمه
احنه انصار والأخبار تضج بيها السمه
انصارك وفو بالوعد
وتكاتفو بالوعد
قدمو أروع صور صوت وهتف
****
بدمعة العين يالحسين كصدنه وعالوعد
نفني الكوم يمضلوم ولو نبقه جسد
بين الاخيام الإعلام ترفرف للأبد
بينه العشگ سيدي
مانفترگ سيدي
حُبنه يرتله الدهر صوت وهتف
****
بالحرب هاي يوفاي نبجيها العده
نهتف بصوت اذا نفوت كلام نردده
احنه خدام والاعلام وكلمن موعده
موعد حرب نلتقي
ننشر رعب نلتقي
بالرگب نترك اثر صوت وهتف
****
لو برز جون بالجنون يحير كربله
يمزق الثوب والكلوب غرام ترتله
يلاكي الاسيوف بلا خوف يروح لمقتله
بحبك شهد سيدي
روح وجسد سيدي
دمنه ينبعلك نهر صوت وهتف
****
ضجت الكوم والارسوم مثل نور البدر
والحرب عيد وفه تريد نوفي بالعمر
نلاگي الأعداء والانباء مثل نور الفجر
ثوب الحرب نرتدي
لمن نطب نرتدي
الشهادة اجمل قدر صوت وهتف
****
علي محسن الفرطوسي
خدامك عالوعد تلگانه
خدامك مأتمك ربانه
يامولاي انه خادم
....
كل محرم نستعدله واحنه خدامك
كلبي مفتون بمحبتك تشهد ايامك
بين اهلال المصيبه ورفت اعلامك
كلبي مايبرد تجوه بجمرت خيامك
ابجيلك عيني الك ذبلانه
خدامك مأتمك ربانه
يامولاي انه خادم
....
نلبس هدوم السواد ونبجي لمصابك
شما تمر بيه السنين محسبك حسابك
اني وهلي نروح فدوه حسين لترابك
سجل اسمي ياحبيبي بصفحة كتابك
ابلاخدمه والله ضايع انه
خدامك مأتمك ربانه
يامولاي انه خادم
....
حبك اعله الفطره بينه ونشكر الباري
اهلي نذروني لخدمتك ساعة صياري
ناري متوجره اعله مودك ماطفت ناري
من يمر اسمك عليه اختنك بعباري
من صغري روحي الك حزنانه
خدامك مأتمك ربانه
يامولاي انه خادم
....
مثل كل عام اعتنيلك إبدمعتي وبنوحي
روحي لووماانته بيها والله اكره روحي
انته يا محبوب كلبي وانته يامذبوحي
من اجل عينك يغالي حلوه كل جروحي
يالغالي انته دوم ابالي
خدامك مأتمك ربانه
يامولاي انه خادم
....
بين نبضه ونبضه انته حرف اسمك صاير
الماحضر هاي المجالس بالحشر ضل حاير
بالقيامه عدنه مجلس وانته بيه الحاضر
الماله موقف ويه امك هذا طبعن خاسر
بالمحشر فايز الولانه
خدامك مأتمك ربانه
يامولاي انه خادم
....
تدري بيه مالي غيرك انته يامحبوبي
حسين شمس الله اشوفك يالتضوي دروبي
لايك اعليه السواد وما إبدل ثوبي
انته حبل الله المتين الحب يكفر ذنوبي
يل حبك يجري ويه ادمانه
خدامك مأتمك ربانه
يامولاي انه خادم
....
كلمات علي محسن الفرطوسي
فراكك شكد صعب موتي بيه شفته
ابلا خيم والحرب ابن امي ماخذته
لو يموت الگلب الفرگه كاتلته
المثلك بهل الوضع مايعوف اخته
****
جيت اتعثر وعطرك اتبعه
نتلاگه بعتب والتحجي دمعه
اريد اتنخه يم ابن امي ونعه
خذاه الموت مني ومايرجعه
خويه من غيبتك روحي محتاره
كلبي مثل الخيم ماطفت ناره
لو يموت الأخو موحشه دياره
المثلك بهل الوضع مايعوف اخته
****
ولك ياموت يالماخذ أهلنه
راح الجان خيمتنه او وطنه
افيضك بالعتب لو من دمعنه
يموت استعجلت عالبيه محنه
رجفت المختنگ ورايد أعزازه
كلبي من غيبتك صاير جنازه
يل رحت من وكت عازتك عازه
المثلك بهل الوضع مايعوف اخته
****
قبل لاترحل عيونك حجتلي
حرورة موت وموادع تگلي
فراگ الغالي بالروح شيخلي
جمرة غيبته بدلالي تغلي
رايح بروحتك جم كلب كاسر
حالي من فركتك يكسر الخاطر
دمعي يجوي الجمر بغيبتك صاير
المثلك بهل الوضع مايعوف اخته
****
الدنيا وفركتك كلها اعله ضلعي
ويبجي الصخر ياخويه وضعي
اذا عطشان اشربك ماي دمعي
اريد اوياك اضل لدگول ارجعي
جنها عين وجفن حلوه عشرتنه
بموتتك قررت عن نهايتنه
بعدك المن اضل وحده موتتنه
المثلك بهل الوضع مايعوف اخته
****.
اليودع اهله وحبابه اليودهم
رشة ماي رش حيله بدربهم
وحشه الدنيا من بعد النحبهم
ماكو بدنيتي بطيبة گلبهم
الوحشه اوفركتك خويه شيسدها
غيابك اكبر جرح احلامي فرهدها
تدري غيرك بعد روحي ماعدها
المثلك بهل الوضع مايعوف اخته
****
هاجم بيتي الموت الخذاهم
اني الي جنت اشتم هواهم
صار جنازه كلبي الودعاهم
راحو همه لاجن مانساهم
جنه طير انذبح گلبي المصوب
جفني وشل دمع من كثر ماصب
جيتك بحسرتي يمك اتقرب
المثلك بهل الوضع مايعوف اخته
****
علي محسن الفرطوسي
أمن الخيمه تعنه الماي
وخله الجيش ابلا راي
شايل جوده . وهاي وعوده
كافل زينب وفاي
****
من صوب خيامه اتعنه عباس الحيد
بجفوفه ترف الرايه وللماي يريد
زينب نادتله بدمعه الشاطي بعيد
خوفي من اتروح وتگصد من جيش ايزيد
هاي جيوش العدوان
خاف اتگطع الذرعان
خط حدوده . وهاي وعوده
كافل زينب وفاي
****
خِدر واطفال اتنادي ومشبوحه العين
أتريد الماي امن الشاطي ياروح حسين
اتعاود بالجود اعلينه وهل منتظرين
ياعباس ادخليك تصرخ هالعطشانين
جمرة كلب الطعشان
تلهب مثل النيران
واضح زوده . وهاي وعوده
كافل زينب وفاي
****
كلبي المحتار الليله رايح عباس
يااكبر لجمه امن جروحي لامتنقاس
تصدلك زنيب بالمدمع وتلطم عالراس
وين الجود اوين الرايه الظهرت للناس
اكتب بدموع العين
العسكر هالمحتارين
ذل جنوده . وهاي وعوده
كافل زينب وفاي
****
افراك الخوه اللاجمني وظهري المكسور
اني حسينك جيت اعثر وكلبي المجمور
مدري بياعين امن انضر جفك مبتور
ونيران الهم با الحيره بجلاي اتفور
ارجع ياخويه وياي
غيابك اذاني اهواي
بگطع زنوده . وهاي وعوده
كافل زينب وفاي
****
جيتك ياخويه وشفتك متوسد اتراب
يل كاسر ظهري ولوتدري ودلالي انصاب
لو ماترجع لخيامك زينب ترتاب
باجر تبقه الوحدها مابين اجناب
شيل الرايه اويا الجود
عندك ياخويه اوعود
الطف مريوده . وهاي وعوده
كافل زينب وفاي
****
علي محسن الفرطوسي
دعيت الله بكلب شاجر لهيبه
سالم ابني الأكبر تجيبه
ادعي بدمعتي ادعي بدمعتي
٠٠٠٠
كلب امك يبعد امك جمره بغيبتك يلهب
طالع للحرب يبني وتدري بطلعتك تصعب
على امك يانبض هالروح من جفني الدمع هالصب
شفتك بالدرع رايح ترد سالم دعيت الرب
لابس لامته بدرعه وتقدم
اليرشه بماي طبعه يرشه بالدم
اني وحسرتي ادعي بدمعتي
٠٠٠٠
يل تشبه نبي الأمه وطالع للحرب يبني
وداعك موسهل تدري يالاكبر يمه شيبني
العطش يوليدي امأذيك وجمر اضماك يلسعني
يبني آمنين اجيب الماي صوت حسين ترس اذني
يوليدي العطش ذوب مهجتك
وروحي بهمها مشتعله بطلعتك
ياروحي ذبتي ادعي بدمعتي
٠٠٠٠
يالجنك صگر بالجو وعلى وكر الطريده تحوم
تشبه جدك الكرار من سيفك تخاف الگوم
ماهمك جمعهم هاذ فيضت التراب ادموم
لاجن كلبي يمه اعليك من هاي الحرب ملجوم
فاركتك واحس جمره بدليلي
يبني لو طحت يطيح حيلي
بانت كسرتي ادعي بدمعتي
٠٠٠٠
شفت حسين كام وطاح اتعنه ومنخطف لونه
مثل سعفه بمهب الريح يرجف كلبه تلگونه
عرفت الموت كاصد ليك حسينك غرگت عيونه
يالاكبر ما ألي غيرك كلبي لاتفجعونه
اني الماشفت فرحه بحياتي
ماتت يالولد كل امنياتي
وانته فرحتي ادعي بدمعتي
٠٠٠٠
من جابك ابوك حسين وينعاك انه اسمعنه
اوياك اتمنه اخذني الموت عمري ماريدنه
مدري بياكلب صديت مگطع ابني اشوفنه
اصيحه ومايرد ابني ومنه نگطعت الضنه
ساكت والكلب رايد جوابك
شيب الراس صبغيته بخضابك
طفو شمعتي ادعي بدمعتي
٠٠٠٠
علي محسن الفرطوسي
الكريمه الطاهره ام سبع الگنطره
ام البنين ام البنين
***
انخاها . تلگاها . تفزعلك بوكت الشدد
علويه . بدويه . لليدعي توكفله سند
يل تطيح بمشكله توجه أو انخاها
باب ربنه الواسعه الشافعه تلگاها
دنيه وآخره ام سبع الگنطره
ام البنين ام البنين
***
وفايه . عِطايه . يم الكمر منج مدد
وفقينه . سجلينه . لحسين نبجيله بعد
نريد من عندج مدد لخدمته توفقينه
صحنه ياام البنين مروتج حزمينه
هاي المفخره ام سبع الگنطره
ام البنين ام البنين
***
ندعيها . نلگيها . بس نقره الها الفاتحه
بس گلها . وتحلها . بيبان رحمه مفتحه
يالكريمه الطاهره اتوجهينه الليله
بحسين واصحابه وهله بدموعنه نبجيله
الگلوب موجره ام سبع الگنطره
ام البنين ام البنين
***
بحاجاتنه . ودمعاتنه . ندريها اتحل معظله
سهليها . وحليها . يم الشبول الأربعه
للحوائج نعرفج الصعبه تحلينها
ياغيمه وعيون الفلح من تمطر تبشرينها
فضلها شمكبره ام سبع الگنطره
ام البنين ام البنين
***
بجفوفها . معروفها . مغركتنه وماقصرت
مبشرتنه . مفرحتنه . من خيرها ايدينه نملت
بفاتحه اتسوي العجب بالضيج من نقراها
ولماله حل تلكاله حل بالشده من ينخاها
فضلها ينقره ام سبع الگنطره
ام البنين ام البنين
***
علي محسن الفرطوسي
ليلة القاسم ابن الحسن
..
يوليدي گلبي رجف شفت الورد مذبوح
***
عيوني غيمه بالطفوف اشتد مطرها
الوالده غيابك يبعد امك كسرها
من بعد عينك تحس روحي بخطرها
ليش وردة روحي مااشتم عطرها
جرحك يغالي نزف
من أيدي ابني يروح
***
حلم كل أم تحضر بزفة ولدها
الولد احلامها وخيمة سعدها
يبني بعدك روحي طلعت من جسدها
رمله امك سكنت الدمعه اعله خدها
صوت الموادع هتف
روح وتودع روح
***
امن الحرب للخيمه جابك عمك حسين
هلا بعريس الحرب ليث الميادين
منذبح يوليدي واني بدمعةالعين
ثمر جوف احشاي بالطف خاطفه البين
أگباله لوني انخطف
ياگلبي يامجروح
***
عسن لاطال العمر يالغالي بعدك
خذك من عندي الدهر ماضن يردك
امن العطش والحر ذبل يايمه خدك
سابح بدمك وشوفن ذبل وردك
بالجمره گلبي نوصف
عن بالي ابد متروح
***
من دمع عيني اليصب رويته نحره
ردت موتي بموتته واغفه اعله صدره
جاسم المذبوح مالي الخيمه عطره
گلبي المفارك بعد إشلون اصبره
عمك گبالك وگف
حسينك عليك ينوح
***
علي محسن الفرطوسي
يله صيحو ياناس حي الله درع العباس
°°°°°°
يل وكفتك وكفة جبل والطف يلوذ بكترك
يمخورس حلوك الزلم وصار العذب تحت امرك
الينضر جمالك يرتبك يل منطي كلشي لخدرك
يل ذكرك يشيل الراس حي الله درع العباس
°°°°°°
بيك المراجل تنوصف. وياأخو المثلك وفه
الماي تنزله البشر ومن عنده تاخذ غرفه
ويم الكمر كلشي ختلف الماي قبل جفه
بالوفه مالك مقياس حي الله درع العباس
°°°°°°
مايوصفك كل الحجي شما نحجي بيك مقصرين
مربيته زينب بالمهد. وجان اليناغيه حسين
المفروض لمن تنذكر نشلعله فصوص العين
وتنحبس لأسمه الأنفاس حي الله درع العباس
°°°°°°
عباس غيره ومرجله وياهله بعم الساده
بصولاته تشهد كربله وذاك النهر ميعاده
خيال وضهور الشگر ونارك تضل وگاده
عالنهر ذل الحراس حي الله درع العباس
°°°°°°
جودك يروينه الوفه ولليوم ينبع غيره
الماشافك بعينه العمه اسمك صعب تفسيره
كل خايف وكل مبتلي ناضره اعليك يديره
سيد الحب والإحساس حي الله درع العباس
°°°°°°
علي محسن الفرطوسي