1850
مختصّه بنشر جميع القصائد الحسينيه / احنه غير حسين ماعدنه وسيله للتواصل مع الشاعر @a313l1
بالأمسِ كانوّا مَعي واليَوم قَد رَحلوا 💔
الليله الثالثه من محرم الحرام السلام على فاطمه العليله
حيل الله نازل بيد الكفيل
هيبه ومراجل والطف يميل
نازل بيهم سجيل بالدم غطاها الخيل
**
تصطف يالكافل گدامك افواج افواج الناس
مثل المحشر برض الطف ضاگت بيها الأنفاس
زلزال ونازل بيها بوسط العسكر وهواس
حته الريح تحير بالطف خايف من العباس
طگ الجحافل صوته رعيد
هل من مقاتل يبرز يريد
گاع الله اليوم تميل بالدم غطاها الخيل
**
سيفه يلوح الحط والطاير غضب ويمطر سجيل
بعيون العدوان أتحول ظهر العاشر چن ليل
عسعس ضيغم كر الكره راواه الجيش الويل
خيل ادوس بخيل وتعثر بالقتلى الگاع تميل
أربع جهاته زارعها خوف
تعرف صفاته بيض السيوف
الموت ترتل ترتيل بالدم غطاها الخيل
**
واحد لاذ بواحد يمه ترجف من كثر الخوف
عباس ونازل بتاره ضنوة حيدر معروف
ياكافل زينب يم جودك ماتوصل كل سيوف
لجل حسين ولجل الخدر طاحن عالماي جفوف
عين اعله زينب وعين اعله أخوه
نيرانه تلهب غيره إبن ابوه
رواها اعداه الويل بالدم غطاها الخيل
**
گصب وبيه النار اشتعلت هيج الطف منظر صار
محتاره وضلت تترادم بالجيش ايعاز انذار
يازلمه اليگدر يوصله وبيد الكافل بتار
ملك ويتبختر نازل بجفه يصير الماصار
طشر زلمهم صارو شتات
بسيفه يلمهم وبزوده فات
خيم عالجبش الليل بالدم غطاها الخيل
**
للماي اتعنه بزوده وشايل بجفوفه الجود
كفال اخته ومن يدناله ضامي وجبدك ممرود
تجيب الماي وتسگي اطفالك بالماي انته الموعود
لاكن أمر الباري تحتم اطيح اعله الشاطي زنود
جفوف اويه هامه ومطفي عين
راعي الشهامه يفدي الحسين
دمك عالشاطي يسيل بالدم غطاها الخيل
**
علي محسن الفرطوسي
وحدي لاتخلوني وترحلون
يهلي افراكم يعميها العيون
....
عيني مشبوحه لضعنكم بويه اريد وياكم
طفله محتاره وعليله موحلو فرگاكم
يل تركتوني ومشيتو والله ماانساكم
حمليتوها الهوادج وإنه اضل انعاكم
بويه مو عوايدكم تهجرون
يهلي افراكم يعميها العيون
....
وكت الغروب اختنگ وركض اشم ثيابه
اوكف بدمعة يتيمه كل مسيه ابابه
لاتضن انسه بسهوله شگد ذبحني غيابه
أنته الحنين عفتني المثلك اويه احبابه
عمري بوشفتك يحسين مرهون
يهلي افراكم يعميها العيون
...
مثل البنيات اريدن يمي ابوي الغالي
كل مسه ومصباح يحضر يسأل اعله احوالي
چنها سفرتكم طويله نشغل فكري وبالي
صرت اميلن لويهب يابويه ريح العالي
حملي شگد صعب ماشالته متون
يهلي افراكم يعميها العيون
....
اوگف بدرب الخذاك وانتضر مرسالك
عل أقل طمني عنك شنهو شاغل بالك
افز مرعوبه وحزينه بحلمي اشوف عيالك
جنكم إبلا ماي بويه والعطش جتالك
مخسوفه السمه ومحتركه الضعون
يهلي افراكم يعميها العيون
....
ليل المفارگ سهرته وماتنام عيوني
اعزاز گلبي بهل السفر ماحسبت ينسوني
من كثر سيل المدامع دم نزف بجفوني
بويه موش بخير اني ضيمي هد متوني
أسأل عنكم بدرب اليمرون
يهلي افراكم يعميها العيون
....
مهد عبدالله امن اشوفه اختنگ وبچيله
طبع المفارگ حبيبه ينجرح من ليله
ياهو يگصدله برساله خبر يودليه
يگله موزينه العليله المثلي ينهد حيله
اخبار لهلي وين اليودون
يهلي افراكم يعميها العيون
....
علي محسن الفرطوسي
عيدنه الأكبر وفرحتنه الچبيره
علي مولا مولا
حيدر الأول ومانقبل بغيره
علي مولا مولا
فارس وقائد اومايحصل نضيره
علي مولا مولا
عشگنه الأول غزلنه ترتل
أمير ونقبل
علي مولا مولا
*
أيلوگلك ياحيدره تاج الامامه
فخر حيدر حيدر
رافع ايدك النبي باحله بتسامه
فخر حيدر حيدر
وحنه بايعنه ونضل حد القيامة
فخر حيدر حيدر
غديري وباقي العشگ بعماقي
نكتب بوراقي
فخر حيدر حيدر
*
بلغ أحمد هالرساله بعد حجه
علي أول أول صار
إني ابكل سنه العيد اترجه
علي أول أول صار
بعيده أبو الحسنين صارت ضجه
علي أول أول صار
علي يستاهل بعشگنه انباهل
ويقول القائل
علي أول أول صار
*
لاتخرب فرحتي اسكت يعاذل
بعلي عيدي عيدي
الاول ومابعده نص أله نازل
بعلي عيدي عيدي
هاي فرحته الچبيره يل تسائل
بعلي عيدي عيدي
هلاهل نسمع مواكب تطلع
ضواه لمن شع
بعلي عيدي عيدي
*
كل نبض بالگلب يصرخ ياغرامي
عشگ للموت للموت
حيدر الكرار ياسيد هيامي
عشگ للموت للموت
اسمك كتبته وإشطبت باقي الأسامي
عشگ للموت للموت
فقط بس انته شكبر منزلته
أمامي ردته
عشگ للموت للموت
*
علي محسن الفرطوسي
#غديريه
يامرهم لجروحي ويا قرآن الأحزان
يمهاجر لرض الطف معذب گلبي الهجران
ليش .. ضعنك من دوني يروح
ليش .. إنه امك وانته الروح
-------
بسورة كربلاء البسملة عيونك
بصلاة الحب يبو الأكبر يرتلونك
العطش نازل اشوفه بهودج ضعونك
موديه اربع حيادر يبني يحمونك
معراجك برض الطف رايح ياضعن النور
من دونك شيصبره كلبي البعدك مكسور
راح .. ضعنك جن مركب نوح
ليش .. إنه امك وانته الروح
-------
يبني بكل فرض بدموعي اتوضه
تريد انساك واني گلبي اتشضه
بحسره ادعي الاهي غايبي تحفضه
عسن سالم ترد يحسين إلي أو ارضه
احزاني بغيابك مثل الحطب بتنور
ترجعلي اترجه وافديك اربع انحور
كون .. اترد سالم مامذبوح
ليش .. إنه امك وانته الروح
-------
بدمعتي اقره ييمه بسورة التنزيل
وحي دموعي يزور جروحي إناء الليل
احس بصدري من اشهگ تدوس الخيل
شمس فوگ الرمح ويه الرياح اتميل
بعيوني هالصوره يل كلك إنسانيه
بل العاشر من توگع تطلع زينب مسبيه
أحزان .. عاشوراء اعله اللوح
ليش .. إنه امك وانته الروح
-------
المفارگ تشوف الحيره بعيونه
سيد دمعته وحزنه يسمونه
سرك بالعرش وملاك يقرونه
طفك موعدك جسمك يگطعونه
بالمذبح تنضرلك زينب وحدك محتار
وتنادي بدمعتها شبت بخيامي النار
الخيل .. بالحافر جسمه تلوح
ليش .. إنه امك وانته الروح
-------
جان أصغر مُقاتل خنصرك يحسين
انگطع من شافك مخضب ينور العين
برض الطف يصبن مو نهر نهرين
الفرات ونحرك إلي مفيض الصوبين
من دمك يتروه أتراب الطف يالعطشان
تتفايض بجروحك لاكن جسمك ذبلان
حسين .. يل بالمذبح مطروح
ليش .. إنه امك وانته الروح
-------
رجع مرسول منك بالروايه السود
تلگيته بكلب من الهجر ممرود
سألته وگال ابو فاضل بلايه زنود
وكتله حسين سالم هوه المگصود
ومايرجع مذبوحج بالطف مقتول حسين
والكافل يتعذر طاحن منه الجفين
نار .. يسعر كلبي المجروح
ليش .. إنه امك وانته الروح
-------
علي محسن الفرطوسي
ترف رايات الحرب
الموت احله امن العذب
تنتصر هاي الدماء
....
بالحرب موصعب نفدي دمنه للحبيب
مانهم والزلم عالخيم ماتغيب
نبتدي بياعلي تحزمت شاب ومشيب
نرتجل من نهل اقمار چن اللهيب
والزلم وفت وعد
حجايه تبقه للأبد
تنتصر هاي الدماء
....
ياعذب يا مُحب نرتوي بچاس المجد
مانهم نبتسم نفدي ارواح وجسد
نرتوي ونفتدي الأرض ترجف من نهد
صحبتك نصرتك الموت منه ماترد
سيوف تبشر بل أجل
ويه ابن خير العمل
تنتصر هاي الدماء
....
النصر والفخر يمتزج دمنه بدماك
ماهوه وعتله يا ابو الأكبر لواك
ياحبيب هالمشيب يشبه الگمره ضواك
هالگلب من يدگ حسين بس أنته الهواك
سيد الحب ياحسين
وياك نبقه ومانلين
تنتصر هاي الدماء
....
بالجنون هالفنون جون يكتب قصته
بالغرام والهيام عابس ترف رايته
والصليب للحبيب وهب قدم رگبته
بغيرته وفزعته كل محب ومحبته
تملكت هاي القلوب
بحبك الطاهر تذوب
تنتصر هاي الدماء
....
كربلاء الآباء قبلة احرار البشر
قبتك ورايتك شمس وتضوي الدهر
ياحسين ياحنين دمك الزاكي انتصر
يافجر يابدر بكل زمن ذكرك يمر
ماتموت بكل زمن
ياحسين انته الوطن
تنتصر هاي الدماء
....
علي محسن الفرطوسي
فوگ الرمح وعيونه بعيوني
خلوني احضن راسه خلوني
بدموعي اسهر ليلي أفراكه هادم حيلي
*
صدمت التفگد أخو صدمه چبيره
واني شفت حسين بالنضره الأخيره
طرف عينه اعله الضعن كلما يديره
اشتكيله وحيرت المسبيه حيره
اتمنى اموت ولا هجر غالي
ولا عيني تنظر راسك إگبالي
وياك اموت ادعيلي أفراكه هادم حيلي
*
واضح على جفونه التعب من شاهديته
يغمض عيونه بخجل من عاتبيته
يهتز بعالي الرمح كلما نخيته
عفيه أخوي البل الشدد خيمه لگيته
عيونه تحجي قصة الامه
رغم الذبح ويحن على ايتامه
نضراتك التحجيلي أفراكه هادم حيلي
*
عالناگه ياخذنه التعب وحنه بسبينه
من روحتك يابو علي تدري انولينه
ياخويه من كد الضرب مجروحه ادينه
واليبجي سكته بصفنته وحشت مدينه
وين التفت شو كلها عدواني
حبل اليسر جتفها ذرعاني
حته الحجر يبجيلي أفراكه هادم حيلي
*
بجفوني غيمه أمن الدمع وبكلبي بركان
مثل المخيم يستعر دلالي نيران
اتفارگ اوياكم يخوتي أبالي ماجان
ولا امشي وي ناس الغرب ودخل الديوان
بس انته إلي تارس أفكاري
يحسين تدري ماطفت ناري
كثرت كلمة ويلي أفراكه هادم حيلي
*
أمن بعيد وبعالي الرمح شفتك يغالي
كلما يمر بيه الشمر تبجي اعله حالي
ماادري طايح كلبي لو طايح دلالي
نوخنه بديار الغرب وماعندي والي
بالمجلس ادخل صعبه يخواني
وجتالك بشتم الزجيه هوايه اذاني
فكدك شنو مخليلي أفراكه هادم حيلي
*
راح كلشي بروحتك خويه وغلاتك
بياوكت عين اجنبي تلمح خواتك
لو ادور الدنيا ماإلگه بصفاتك
العطش والخوف من ذبل بناتك
مافارگتنه وتمشي وبأنه
عفيه ابن أبوي الراسه يرعانه
فازع إلي تحاميلي أفراكه هادم حيلي
*
علي محسن الفرطوسي
نباگت اجمل أيام بالطف ماتت احلام
تمنيتك ترد يبني يغالي
طبع الفاگد تموته الليالي
.......
من دمك الحنه .. سالم إنه اتمنه .. يوليدي ذبحوك
حلمي ازفنك .. بالخيمه اشوفنك .. هاشم يهنوك
سيف الذبح تالي .. مني أخذ غالي .. أمن الفرحه حرموك
ضاع العمر كله .. وتجرع العله .. ترجعلي منعوك
جرحي البعده مفتوح شفتك يمه مذبوح
عنك شوگي يوليدي وسؤالي
طبع الفاگد تموته الليالي
.......
يبني ونضر عيني .. عدمن تخليني .. ميته بغيابك
جمره بوسط روحي .. ماتنعد جروحي .. وشتم ثيابك
بالدمعه سالفتي .. ياخيمتي وبختي .. أسمع عتابك
من الهجر اكلف .. طفوها برض الطف .. شمعة شبابك
كلبي جن جمر صار حگي اعليك احتار
لحظه روحتك يمه شبقالي
طبع الفاگد تموته الليالي
.......
ماأگدر بدونك .. وعيوني بعيونك .. ياثمرة حشاي
يااغله كل غالي .. يلي اشغلت بالي .. يبني يوفاي
سهم الهجر يكتل .. ماي اسود وينزل .. يعميها عيناي
ماحسبت يبني .. بالطف تفارگني .. بوليت اعداي
ليل الفرگه چتال يالنايم عالرمال
راسك يلتفلت لي برمح عالي
طبع الفاگد تموته الليالي
.......
مهضومه بغيابك .. دمعاتي بمصابك .. منها رتوت نوگ
بدرب اليسر نرحل .. يوليدي عالهزل .. باجر اطب سوگ
يبن الحسن وينك .. جاسم بعد عينك .. ضل گلبي محروگ
ويه الغرب نطلع .. منهم شتم نسمع .. يوليدي متلوگ
خدر الحره مسلوب ضهري بسوط مضروب
يمدللني محتاجه لدلالي
طبع الفاگد تموته الليالي
.......
للكوفه من ندخل .. عيون الغرب تكتل .. أكثر من السيف
شامت يصد لينه .. ابنج سأل وينه .. اتمنه الحصل طيف
بالدف تلگونه .. هضمونه شتمونه .. ماراعو الضيف
طبع المكر بيهم .. معروفه اساميهم .. اذونه ياحيف
بالدف يبني وحجار ترمي اكبار وزغار
حته الطير ون يبني اعله حالي
طبع الفاگد تموته الليالي
.......
علي محسن الفرطوسي
تبقه احلامي أتلگه الضعينه
وشوف حسين راجع للمدينه
ألهم گلبي مشتاگ
شكد عذبني الفراگ
...
اختنگ والناضر لدربك اديره
بشوفتك يبني دوه روحي الكسيره
حسين ابني السافر وبدر العشيره
واني حيرتي ياناس حيره
منكم لاخبر لاطارش يعود
سنيني اطشرت شيلمهن ردود
شجره وطاحت اوراگ
شكد عذبني الفراگ
...
أوكف ابابي بدمع عيني اليگاطر
عدمن أنشد والكلب يوليدي حاير
بالي مشدوه ونهاري الليل صاير
حالتي تبجي الصخر يهل المشاعر
روحي محيره وحيلي هدمته
درب الي خذك يبني سكنته
كلبي أمن الهظم طاگ
شكد عذبني الفراگ
...
أربع اولادي مشو مارد خبرهم
عالجمر صبح ومسه إني انتضرهم
عيني ذابت شمعه ياناس بدربهم
بياذنب كلبي الجم ودري يحبهم
وينك هالسؤال اشكد حجيته
وجه الغالي لمن ضيعيته
فرحه ومني تنباگ
شكد عذبني الفراگ
...
مثل كل يوم اطب داري حزينه
وصارت مضلمه بعيني المدينه
المثلي أمن الدمع معميه عينه
بس انه وحزن كلبي بقينه
وحشة الدار من بعد الغوالي
مثل الغيمه جفني وهذا خالي
الجمر نص كلبي حراگ
شكد عذبني الفراگ
...
ابن حذلم من رجع ينعه الحبايب
استقبليته بدمعتي ودلالي ذايب
سمعته حسينج ابطف النوايب
خبر موت الغالي لأهل الدار جايب
حسين المنذبح وهله سبايه
طلع ضعن العقيلة بلايه رأيه
هزله الناگه تنساگ
شكد عذبني الفراگ
...
علي محسن الفرطوسي
محرم هلا بشهر الزجيه محرم مدامعنه جريه
لعزائه الكل تحضر نهل الدمع الأحمر
.....
شهر المحرم يبتدي للدمعه اجيت بموعدي
سود الملابس نرتدي حزني لمصابك سرمدي
محرم جمر يغلي بدليلي
محرم شهر نوحي وعويلي
بنينه الدنيا منبر نهل الدمع الأحمر
.....
بالكلب رفت رايتك كل عام تحضر شيعتك
ماتطفه نار مصيبتك مصدرها جمرة خيمتك
محرم كسر كلبي بهلاله
محرم حته الحجر بچاله
هاي المأتم تكبر نهل الدمع الأحمر
...
جمرة مصابك تستعر بگلوبنه باقي الكسر
يحسين يابعد العمر بس ألك نلطم الصدر
محرم ترفرفلك روايه
محرم دمع عين وسبايه
المصاب بگلبي جِمّر نهل الدمع الأحمر
...
عالمنبر الناعي نعه بطور العراقي نسمعه
من گد عظيم الفاجعه گلوب ومهج متشلعه
محرم نون ون الثكالى
محرم حزن گلبي حلاله
بكلب كل شيعي إثِر نهل الدمع الأحمر
...
نواسي الزجيه ام الحسن دموع المحاجر دم جرن
مدمعنه عل الي تيسرن بنوگ العجاف تعذبن
محرم گطع روس وسبايه
محرم بدايه إبلا نهايه
نرسم بالوجه الأسمر نهل الدمع الأحمر
...
علي محسن الفرطوسي
گلبي بفرگتك ذاب بعدك يالولد شاب
يبني ياعلي ياريحة هلي
بعدك يالولد شاب
****
يانبضة گلبي شمعة دربي ولب حشاي
جانت احلامي كل ايامي تضل وياي
الطف اجاني منين فرهد غوالي
جيت بضعن مهيوب تالي شبقالي
ماحِسبت اعوفك مذبوح ابني اشوفك
ماعندي ولي ياريحة هلي
بعدك يالولد شاب
****
يااحلى ايامي وبيك احلامي من اصباك
يالاكبر تدري النار بصدري من فركاك
موسهله يبني تروح وبتالي عمري
جمر الهجر ذباح ودموعي تجري
دمعاتي الجريه يل رحت امن اديه
ونتي تعتلي ياريحة هلي
بعدك يالولد شاب
****
الطف فرهدكم من عطشكم يهل الزود
يالب احشاي تريد الماي جبدك ممرود
امنين اجيب الماي يوليدي منين
رد للحرب عطشان يبني وضوه العين
كلما انضر الكم الطف ذبل وردكم
بفگدك مبتلي ياريحة هلي
بعدك يالولد شاب
****
من كالو طاح بطعن رماح ابنج مذبوح
فزيت بدمعه وجيتك انعه وكلي جروح
الفاكد ولد ياناس من حكه لو ناح
راسك اشوفه شلون رافعته الأرماح
موتك عذباني يازهرة زماني
جرحي الأولي ياريحة هلي
بعدك يالولد شاب
****
طولك انضرله مگطع كله يالمذبوح
فايض من دمك يابعد امك ليش تنوح
من جابوه ابوه حسين بين المجاتيل
حنيته شيب الراس من دمه اليسيل
ياجرحي بغيابك شلون احمل مصابك
تشمت عاذلي ياريحة هلي
بعدك يالولد شاب
****
يادمعي الماجف وجروح الطف ينبي هواي
ابني مگطعينه اشتاق لعينه مو للماي
اشتاگ الك والروح يلهب جمرها
المثلي افگدت أعزاز شينفع صبرها
المر اتجرعيته ابني ضيعيته
بعدك ياهو الي ياريحة هلي
بعدك يالولد شاب
****
علي محسن الفرطوسي
فوگ الرمح وعيونه بعيوني
خلوني احضن راسه خلوني
بدموعي اسهر ليلي أفراكه هادم حيلي
*
صدمت التفگد أخو صدمه چبيره
واني شفت حسين بالنضره الأخيره
طرف عينه اعله الضعن كلما يديره
اشتكيله وحيرت المسبيه حيره
اتمنى اموت ولا هجر غالي
ولا عيني تنظر راسك إگبالي
وياك اموت ادعيلي أفراكه هادم حيلي
*
واضح على جفونه التعب من شاهديته
يغمض عيونه بخجل من عاتبيته
يهتز بعالي الرمح كلما نخيته
عفيه أخوي البل الشدد خيمه لگيته
عيونه تحجي قصة الامه
رغم الذبح ويحن على ايتامه
نضراتك التحجيلي أفراكه هادم حيلي
*
عالناگه ياخذنه التعب وحنه بسبينه
من روحتك يابو علي تدري انولينه
ياخويه من كد الضرب مجروحه ادينه
واليبجي سكته بصفنته وحشت مدينه
وين التفت شو كلها عدواني
حبل اليسر جتفها ذرعاني
حته الحجر يبجيلي أفراكه هادم حيلي
*
بجفوني غيمه أمن الدمع وبكلبي بركان
مثل المخيم يستعر دلالي نيران
اتفارگ اوياكم يخوتي أبالي ماجان
ولا امشي وي ناس الغرب ودخل الديوان
بس انته إلي تارس أفكاري
يحسين تدري ماطفت ناري
كثرت كلمة ويلي أفراكه هادم حيلي
*
أمن بعيد وبعالي الرمح شفتك يغالي
كلما يمر بيه الشمر تبجي اعله حالي
ماادري طايح كلبي لو طايح دلالي
نوخنه بديار الغرب وماعندي والي
بالمجلس ادخل صعبه يخواني
وجتالك بشتم الزجيه هوايه اذاني
فكدك شنو مخليلي أفراكه هادم حيلي
*
راح كلشي بروحتك خويه وغلاتك
بياوكت عين اجنبي تلمح خواتك
لو ادور الدنيا ماإلگه بصفاتك
العطش والخوف من ذبل بناتك
مافارگتنه وتمشي ويانه
عفيه ابن أبوي الراسه يرعانه
فازع إلي تحاميلي أفراكه هادم حيلي
*
علي محسن الفرطوسي
جرحك عني غطيه
مااكدر اصد ليه
إني بروحي حسرات
وبدمعاتي احاجيه
...
يهل الوادم صعب ماينشرح وضعي
اعله والدنه بهضم من انفجر دمعي
يبو اتراب بغيابك انكسر ضلعي
وبقيت اعله الدمع بالليل افز وانعي
يااكلبي شبعد بيك
خليني أكثر اذيك
روحي نتسرت آهات
وبدمعاتي احاجيه
...
مثل جمر الحطب لمن تلوحه الريح
هيج اعليك تسعر مهجتي وتصيح
زينب من بعد عينك تگوم اطيح
اكعد ياعلي ايتامك دمعها يسيح
راحت احلى أيام
بعدك صرنه ايتام
بكلبي شكد جراحات
وبدمعاتي احاجيه
...
رافگدت الدمع والنوح والحسبات
دليلي أمن الهظم ملجوم والحسرات
اول ليله من دونك يبونه نبات
شحسبلك جرعنه أمن الزمن لجمات
أهيم بعالم النوح
كلبي اعليك مجروح
بقت أبالي چلمات
وبدمعاتي احاجيه
...
فگد الأب صعب منه الدليل يذوب
ومن جرت حسرته تعرفه المتعوب
كابرت الجره واصبر بعد جم دوب
الليله ابفگد حيدر خل تذوب گلوب
ياكسرت دليلي
والرايح خليلي
اجر باليل ويلات
وبدمعاتي احاجيه
...
باجر عيد بس ياعيد من دونك
اليتامه وياهم بهل العيد يردونك
مشتاقين بويه لشوفت عيونك
صعب من بين ادينه لو يشيعونك
كل ايامي تابوت
حزني بصدري منحوت
بدمعنه الليله انبات
وبدمعاتي احاجيه
...
علي محسن الفرطوسي
يمسافرين اخذوني
وحدي المن تخلوني
گلبي لچمني وناديت
بفگدك تروح عيوني
.....
موعليله اوياك اخذني المرض لو وحدي أصير
موسهل كسر الخواطر منه يتأذه الصغير
البيت خالي وعمري دمعه وعمر إلي يفارگ گصير
المن مخليني بدموع السهر
غيبتك ياوالدي كسرة ضهر
الموت ترس اضنوني صاير من رحت
من گلتلي ازغيره مو مالت سفر
بأكبر جرح لچموني ... بفگدك تروح عيوني
.....
ضيعوني وضيعتهم بالضعن شو كلشي راح
المثلي اتفارك اهلها بالهجر ماتستراح
موش بس إني بغيابك حته بابك بويه ناح
إني متعوده عليكم ياهلي
حزني بغيابك بعد ماينجلي
هيه موته مدري فرگه بغيبتك
افز مرعوبه اصرخ دخيلك علي
ماأصبر تعرفوني ... بفگدك تروح عيوني
.....
مثل العيون ورمشها جنه ابد مانتفرگ
هسه شو وحدي عفتني وصارت الفرگه صدگ
مثل نار بشمعه بويه تدري ليليه احترگ
اشتم هدومك ترد عافيتي بيك
شلون يابويه اهاجر حته اجيك
امن الصبح اطلع أتاني اعله الدرب
بويه ماسكتت نواعيي عليك
ماتسئلون شلوني ... بفگدك تروح عيوني
.....
ايدي يابويه اعله خدي الشاف وضعي ينكسر
اخ يافرگه حبيبي منين اجيبلها صبر
لاني ميته ولاني عدله حيره حيرني الهجر
اصبر شلون وضعنكم مايرد
من غيابك گلبي بويه ينمرد
ياحلم ترجع اليه امن الغياب
الندى مامر على خدود الورد
بسفرتكم تموتوني ... بفگدك تروح عيوني
.....
من رجع ينعه ابن حذلم اعرفت منه المصير
منذبح يحسين بويه وللسبي ضعنك يسير
راح اموت بدمع عيني منه بعد ما أني احير
الذبح والعطش ماخذ راحتك
الحوافر بويه عشره الداستك
منين اجيب الصبر واني بلايه روح
مات كلشي يالعزيز ابموتتك
من دمعتي يغسلوني ... بفگدك تروح عيوني
.....
علي محسن الفرطوسي
سوح الحرب تمطر رعب
أفواج أفواج الرايات
توكلنه اعله الكلفات
...
امراً وطاعه نگول انصارك احنه
من كل هاي الأوطان حبك يلمنه
دم الغياره يفور ونته وطنه
القائد حبيب يگول أمرك يهمنه
شيخ الحرب لا موصعب
تشوفه ايطشر الحملات
توكلنه اعله الكلفات
...
مثل الحجيج انطوف كعبة هوانه
حسين اغله من الروح يجري بدمانه
عدنه الجنون فنون ويرف لوانه
جننه حب حسين سيد زمانه
بهذا العشگ تلگه الصدگ
يحله الحب بالدمعات
توكلنه اعله الكلفات
...
هاي البواتر هاي تصطف نشاهد
نضحي الرگب والروح لهل الأماجد
هاي الجثث والخيل ضل دمها جامد
المات بطريق حسين شوف اسمه خالد
نخط بالنزيف هالحب شريف
ما تموت الوگفات
توكلنه اعله الكلفات
...
شيبه وشباب اليوم وفت وعدها
تضحي بدماها الدين حبك مجدها
عين الدمع لحسين دايم مددها
لوهدت هاي الخيل بالدم نردها
لا مانلين لجل الحسين
مانتعطل هيهات
توكلنه اعله الكلفات
...
موعدنه سوح الموت نقدمها النحور
مثل الشمس عالگاع من عدنه شع نور
واليوفي للمحبوب كل سعيه مشكور
احنه الغياره أنصار ضل دمنه ايفور
عيون وجفوف نضحي ونطوف
المات بدربك ما مات
توكلنه اعله الكلفات
...
علي محسن الفرطوسي
رسول الله( ﷺ) في خطبة الغدير:
معاشر الناس،
فضلوه فقد فضله الله
واقبلوه فقد نصبه الله
معاشر الناس،
إنه إمام من الله ﴿ولن يتوب الله﴾
على أحد أنكر ولايته، ولن يغفر له.
اميري اميري ياحيدر اميري
غرامي غرامي محبوبي وغرامي
...
تنصب أمامي احلى الأسامي حيدر غرامي
بتاج الإمامه
أبأحلى المشاعر بهاي الضماير ياعلي صاير
لگلبي غرامه
علي علي علي علي ماغيره وآلي
علي علي علي علي حبك حلالي
عيد الأكبر و تقرر
عيد الأكبر بس حيدر
عيد الأكبر خل نفخر
اميري اميري ياحيدر اميري
...
فرحة وتهاني واحلى الاماني هالحب خذاني
لعالم هيامي
عيدي غديري علي اميري تقرر مصيري
شيعي وأمامي
ولي ولي ولي ولي اتوج علينه
ولي ولي ولي ولي واحنه رضينه
محبوبي وتاجك عالي
محبوبي وشاغل بالي
محبوبي اتضل للتالي
اميري اميري ياحيدر اميري
...
بايعنه جينه بحبك رضينه وسيد علينه
ورفضينه غيره
عيد الولايه فرحه وهدايه خطينه رايه
البيعه الچبيره
فخر فخر فخر فخر اسمك يبو اتراب
فخر فخر فخر فخر يااغلى الاحباب
جفوفي الماتقبل غيرك
جفوفي المليانه بخيرك
جفوفي الي تحب تفسيرك
اميري اميري ياحيدر اميري
...
من السماوات رب الكرامات منزلك ايات
اختارك خليفه
حبنه وفخرنه شيعتك صرنه بأسمك مجدنه
مو للسقيفه
عشگ عشگ عشگ عشگ وانته هوانه
عشگ عشگ عشگ عشگ سيد زمانه
يالعاشگ حگك تفخر
يالعاشگ حبنه الأكبر
يالعاشگ نادي بحيدر
اميري اميري ياحيدر اميري
...
أمن الذر هويته وهل بايعيته بگلبي لگيته
سيد شعوري
صومي وصلاتي حبه نجاتي بساعة مماتي
وبقبري نوري
عهد عهد عهد عهد مالحضه اعوفه
عهد عهد عهد عهد كعبه وطوفه
يعسوب الدين اختاره
يعسوب الدين آثاره
يعسوب الدين اخباره
اميري اميري ياحيدر اميري
...
علي محسن الفرطوسي
هل شهر المصيبه زينب ياغريبه
گلبي انه نحيبه عايش عمري غربه
....
من هل شهر الدموع لاجمني بمصابه
زينب . خيمه . ونار چم نحر ابخضابه
ظهري الليله مكسور وتذكر خرابه
سفره وبضهر نوگ طفله تنادي بابه
أبالي هالصور هاي تجرحني تره هواي
ذابحني تره الماي والحافر يعذبه
.....
اكثر من ألف عام واني بجرحه لليوم
روحي جمرة اخيام باقي بناره ملجوم
عاشوراء الأحزان خلت گلبي مهظوم
ابجي بالعزائات دمعي ينزف دموم
ابچيلك يمذبوح مافارگته هالنوح
گلبي هوايه مجروح وأنه ابقه اعله دربه
.....
اعشگ لطم الصدور للي صدره مكسور
لو شرعاٌ تره يصير چاطبرنه النحور
يحسين ومصابه اعشگي باقي هالطور
خليني ابقه وياك ولحد نفخت الصور
للموت ابقه وياك كون بقبري ونعاك
بجمرة گلبي ارثاك عيني جنها جربه
...
البس اسود الثوب وعلنك حدادي
للموت ابقه للموت لابسلك سوادي
حسين الغالي مذبوح بحزاني أمن انادي
وفقني ابقه وياك ياسوري وعمادي
أنته كل الاحلام سيد هاي الايام
طفك كاشخ إسهام وجروحه اعله گلبه
..
عالمنبر هتافات بسمك رددتها
هالخدمه يمولاي لا ما فارگتها
عيني بلا دموع كون عميه وماردتها
هالخدمه نجاتي بدربك شاهدتها
ياعشكي وغرامي انته كل هيامي
محبوبي وأمامي للموت ابقه احبه
.....
علي محسن الفرطوسي
ليل وغربه ووداع باجر ترتوي الگاع
من دم المطاعين وانضر حاير حسين
....
الليل نازل لاچن بهيئة مصيبه
چم غريبه لاذت الليله بغريبه
ياحبيب اليگدر يودع حبيبه
باجر العاشر ذبح والدم يجيبه
ليلي إبلا صبح كون يمي وماترحلون
مانامت تره العين وانضر حاير حسين
....
ياصبح لايقترب فجر الفجيعه
تهيئ الموت اعله الحسين ورضيعه
واني باجر بيه اضيگ الوسيعه
من اشوف السيف ونحور الگطيعه
ياساعات الوداع كل لحظه العمر ضاع
منها گلبي نصين وانضر حاير حسين
....
بين خيمة كافلي وخيمات الأطفال
نهر من جفني على خدود الأرض سال
جرح يغفه وجرح صاحي بروحي لازال
كربلاء أمن الفجر تذبح كل الارجال
جروحي التنزف هموم عشت وگلب ملجوم
اني بروحي جرحين وانضر حاير حسين
....
لاتسلهم ياجفن خليك صاحي
ياجفن شد حيلك لدمعي ونياحي
باجر تموت اخوتي ومضلم صباحي
لو صحت يخواني من يسمع صياحي
يل كلكم مجاتيل وصلت حدنه الخيل
هدن حيلي جفين وانضر حاير حسين
....
صبح عاشر مارحمني فرهداني
لجمه افراگ الاخو من عدها اعاني
مانصفني ضالم ويايه زماني
تالي مسبيه الشمر وسفه خذاني
لو يوگع دلالي انضر رمحه عالي
روس اخواني صفين وانضر حاير حسين
....
علي محسن الفرطوسي
الخضره شدها عمامته هاشمي اترف رايته
مسلم مرجف الزلم كفو منك ياشهم
...
هلا بخيال الأصيله هذا مسلم من زعل
سيفه سجيل المنايه وريح صرصر لو نزل
روس خيل بخيل تردم حان عالكوفه الأجل
هوه يازلمه اليچهبه راسه من جثته نفصل
رايه بالحومه اعتلت الكوفه كلها تحذرت
بحيدر يشد العزم كفو منك ياشهم
...
الزلم ريشه وسيفه ريح گباله ماواحد ثبت
هلهت طوعه وسمعها الغيره بيه اتشرعبت
خله جيش الكوفه يرجف خيلها بدم ارتوت
مسلم وشد العمامه الكوفة كلها تحيرت
دخن الحومه برعب ينذبح كلمن يطب
نزل مسلم مبتسم كفو منك ياشهم
...
خله راس براس يردم نفجر زلزال الأجل
سيفه يذبح بالزلم جنه ابن خير العمل
ابو فاضل هذا نازل مثل شمرات الفحل
لو زعل مسلم عليهم اشجم ألف بيهم قتل
حتارت گباله الألوف بالدمه نصبغت سيوف
كلها منه تنهزم كفو منك ياشهم
...
هلهلت طوعه وسمعها گلها ابشري بفزعتي
مااشوفن زلمه بيهم والملاعب لعبتي
مثل حيدر من افوتن خل ترفرف رايتي
رعب بالميدان نازل وحده بيهم ضربتي
ماثني بالضرب بيهم مبين الرعب
واقع اني وموحلم كفو منك ياشهم
...
القصر انذار داخل والجيوش تحذرت
فزعت الكرار أفزع رايت الحق اعتلت
منين ماافوتن اذلهم حيره بيه تحيرت
عيوني مثل النار تجدح والحميه اتشرعبت
بل القصر ادخل رعب وناري بيه تلتهب
عداي بيه تنصدم كفو منك ياشهم
...
علي محسن الفرطوسي
مسلم نزل بيها وبسيفه يفنيها
***
هاشمي ونازل غضب
صدره نيران التهب
العكسر گباله نرعب
بسيفه راواها العجب
بسم الله باديها وبسيفه يفنيها
***
طوعه بأسمه هلهت
والحميه اتشرعبت
راية الحق اعتلت
گوم گدامه بجت
يسمع بواجيها وبسيفه يفنيها
***
جنه حيدر لو يهد
لايثني ولا يرد
بالحرب جاب المجد
نازل ويرعد رعد
ذيب ويطب ليها وبسيفه يفنيها
***
ياغضنفر بالزعل
علي چنه ورتجل
ياهلا طبها الفحل
امن السمه موت ونزل
جمره ويجويها وبسيفه يفنيها
***
راس بالراس انردم
بغير جفه مارهم
سيفه بالوادم لهم
الكوفه صارت جن عدم
للموت يحديها وبسيفه يفنيها
***
علي محسن الفرطوسي
مسافرين وهل السفر موتي وعذابي
بويه رحتو وضلت الدمعه اعله بابي
سافر ضعنهم واني انتضرهم
....
طالع ضعنكم ياهلي
وحدي بقيت بمنزلي
حزني بعد ماينجلي
كل ساعه اصرخ ياعلي
شلون حالي وبالضعن ماصعدوني
رجف كلبي ومنخطف يابويه لوني
هجرو وطنهم واني انتضرهم
....
ترجعولي يا أهلي شوكت
صغيره يبويه وشيبت
ماشفت راحه تعذبت
ياوالدي بيوم الغبت
احترك ليليه والمدمع اسيله
بيتي خالي أمن الكمر ومن العقيله
تركو حزنهم واني انتضرهم
....
مثل الحمامه بليل أون
شمسوي بعيوني الحزن
مشتاكه من عدكم حضن
ومن اوكع احتاجك متن
منكسر گلبي وشوف البيت هيمه
طفله وضليت عالون والهضيمه
ناسيني چنهم واني انتضرهم
....
بدرب الخذاكم انتضر
خلصته شوغات العمر
وبين عله ضهري الكسر
چايمته يالغالي تمر
القوافل من تجي حلمي اشوفك
ترجع لينه ونقبل جفوفك
ضالم زمنهم واني انتضرهم
....
وحشه المدينة بغيبتك
يمته تهل برجعتك
يابويه هاي ابنيتك
ضلت غريبه بروحتك
وحدي بالغربه بدمعتي الزم الباب
بلكي الحادي يمرني جايب احباب
يلهب جمرهم واني انتضرهم
....
علي محسن الفرطوسي
حب عالفطره يبن الزهره غيرك مايشغل بالي
سر تكويني ودمعة عيني صار الحب فطري وغالي
يامذبوحي
.....
من الذر هويناك بعشگ فطره
يبو اليمه وعليك گلوبنه موجره
محرم لو يهل بالونه والعبره
نجي نلبس سواد نواسي الزهره
تجري بدمي شايل اسمي غالي وتفداك الروح
يا قرآني ياوجداني ودمع عيوني المسفوح
يامذبوحي
....
ألك جمرة مصاب البينه ماتطفه
كل عام ونجيك بحسره وبلهفه
عين الخادم بهل الخدمه ماتغفه
تستاهل تعبنه ياابو الرأفه
شد حزامي ها يالضامي وفقني ابجي اعليك
أحضر مأتم ابجيك بدم والخدام تواسيك
يامذبوحي
...
جمرات الخيم نص گلبي لهابه
أموت واحيه بـاه يحسين ومصابه
عيوني بكل وكت ما تغفه سجابه
محرم جرحي المايشفه اصوابه
ابجي وانعه وسجب دمعه ولطمت صدري بكل عام
بيها اتوسم شهر امحرم ياهنيال الخدام
يامذبوحي
....
رايات العزاء من تنشر يحسين
فصلت السواد وحضريت العين
لصدري حضرت للطمه هالجفين
عمر مايكفي اخدم مفترض عمرين
كل أيامي وقف الضامي يل متملك الانفاس
بلطم الهامه وحزن ايتامه جينه نواسي العباس
يامذبوحي
..
يماي عيوني يانبضة گلب مجروح
حته بموتي الك منذوره هاي الروح
وقف كلي لجنابك فدوه الك انروح
اني ومالي وهلي بخدمة المذبوح
شكراً عاشور جمراتي تفور وماريدن ابرد لحضه
بروحي شعامل بدمعي الهامل مو من الماي اتوضه
....
علي محسن الفرطوسي
صدمة حياتي افگد غلاتي
لمن تروح بروحتك بويه مماتي
****
شلوني لو تسأل عليه أي وحگ عينك متت
صار كلشي اضلم يبويه وغير جرحي ماشفت
بويه هاي إني حميده جمره روحي جمرت
مسلم الكوفه تذبحه الدنيه كلها اتيتمت
دمعة يتيمه تعيش بهظيمه
تجرح دليلي سفرتك بويه مماتي
****
غيبتك يابو حميده تشلع انياط الگلب
لاني ميته ولاني عدله والإفراگ شكد صعب
فوگ راسي حسين يمسح دمعت عيونه تصب
كلشي راح بروحتك بعدك صبح مر العذب
موتي اريده اني حميده
عيني وعمتها مصيبتك بويه بمماتي
****
لااني اندل حته اجيك الكوفه جرحت خاطري
مثل المضيعه دواها ولا اشوف بناضري
جروحي بغيابك قصيده وللمفارك تنقري
حگي اجزع حگي انعه نكتب حزني بدفتري
التفگد أهلها يگرب أجلها
أمن القصر شمرو جثتك بويه بمماتي
****
جانت أيامي بوجودك حلوه وأنه مدلله
من رحت صارت حياتي طفله تبقه معلعله
لاهله بطاري المفارگ صحت بويه لاهله
امن المدينة نروح كلنه نشيل غفله لكربله
فارغ مكانك احتاج امانك
بالضعن ماكو رايتك بويه بمماتي
****
ياگلب عيش بعذابك راحو البيهم تدگ
هاي جانت وين إليه بهل السهوله نفترگ
بنار هجران الحبايب اني يوميه احترگ
ادعي يوميه اموتن بويه تريد الصدگ
بعيوني غيمه والدنيا هيمه
اتمنى أموت وداعتك بويه مماتي
****
علي محسن الفرطوسي
القصيده لستشهاد مسلم إبن عقيل
من تروح مروتك
بويه اخذني بسفرتك
تدري من دونك اموتن يادلالي
......
أنه مو طفله عليله ولا يهمك هالمرض
انته عافيتي وحياتي أو ياك اعيش المُفترض
خل تروح الدنيا كلها حسين بس أنته العوض
شوفت عيونك شفاء وكلبي لعيونك نبض
يموت كلشي بغيبتك
وحك روحي الحبتك
تدري من دونك اموتن يادلالي
......
ضاله المن بالمدينه كلشي من دونك سراب
جهزت كلشي وجيتك لملمت كل الثياب
مهد عبدالله اجيبه وصعد بضعن الرباب
الموت اهون من أشوفك ناوي بدروب الغياب
خوفي عيشني بقلق
چنه حان المفترق
تدري من دونك اموتن يادلالي
......
كلشي ولا أسمع حجايت هلج كلهم مشو
ليش ماواحد رجعلي بهل السفر لمن حدو
چني مو منهم غريبه حبابي كلهم مابقو
البيت تخنكني صفنته والأمل كلمت اجو
خالي ضل بيت الأهل
جفني اعليهم همل
تدري من دونك اموتن يادلالي
......
اوكف بدرب الخذاكم انتضر منكم خبر
الراد والرايح أنشده ناشدت كلمن حضر
كربلاء بويه بعيده چا نويت اعله السفر
بويه عني شعطلاكم وينه ماجاني الگمر
ياهو الي يوصل الكتاب
يگله طولت الغياب
تدري من دونك اموتن يادلالي
......
العين مابطل دمعها وروحي تلهب جن جمر
من بعد أهلي وخوتي ماريدنه العمر
الناس كلها دگول اصبري بعد شيفيد الصبر
واني كسرت عود بعدك روحي أشعر تنكسر
ياهلي الغربه ممات
بعد ماريد الحيات
تدري من دونك اموتن يادلالي
......
علي محسن الفرطوسي
فز گلبي جن فزت طفل من مر خبر موتك
أكبر جرح يا والدي جارحني تابوتك
يابو زينب يابو زينب
****
ياجرح المفارگ إبو يصعب ضماده
رمضان جارح گلبي والناعي إلي ناده
طايح علي بمحرابه ونال الشهاده
واني بدمعتي وحيرتي أطلب وداده
يا أكبر جروحي
يل اغله من روحي
ماينگطع نوحي
ماتحله گعده إبلا أبو ويامحله چلماته
الموت ماخذ ضحكتي وغرگني باهااته
يابو زينب يابو زينب
****
طبرة علي بمحرابه خلتني بعذابي
جبريل ناده بالسمه وهيج مصابي
انهدمت أركان الهدى وعيني اعله بابي
شفتك يحيدر منطبر وحرت بجوابي
ارجف مثل سعفه
والنار ماتطفه
رايح علي وسفه
بعيوني غيمة أمن الدمع وبكلبي الحيره
اصعب خبر موت الأبو حيرني تفسيره
يابو زينب يابو زينب
****
بعيوني حط عينك يبويه وسولف اوياي
ابجي بدمه يابو الوفه لو جفني جف ماي
ما ينتهي حزني يبويه جروحي هواي
ياموت اخذني وي علي جرحتني دنياي
ياكسرتي ابدونك
لمن يدفنونك
متعلقه بعيونك
يالتحفر الحيدر لحد وسعله بلحده
خوفي تلجمون الجرح وكل حيلي يتبده
يابو زينب يابو زينب
****
خلوني أضل اعله القبر ونعه لولينه
وتمدد بطوله ونادي يا علينه
الموت غفله ماخذك من بين ادينه
وبانت ملامح لليتم بعدك علينه
اشتمه اترابك
ونعه على مصابك
مهظومه بغيابك
لوبيدي وياه اندفن وتوسد اذراعه
ماريد دنيا إبلا علي خلوني بس ساعه
يابو زينب يابو زينب
****
البيت صاير مقبره وبيه ينعق البوم
ومن غيبتك گلبي نجرح يابويه ملجوم
الفاركله غالي يعيش كل العمر مهموم
امن عيونه تعرفه الذي بحبابه مصدوم
كلشي انته بعدك
يالرحت شيردك
أكبر جرح فگدك
باجر العيد وغيبتك تذبح فرحتي
والبيت فارغ بويه وطاحت دمعتي
يابو زينب يابو زينب
****
اكعد وسولف وانضر بحسرة لمكانك
اتمنى ايردك الي بويه زمانك
محتاجه وعيونك علي الليله لحنانك
ومشتاقه أسمع كل فجر الصوت اذانك
مليت من وضعي
ينزف صبح دمعي
موتك كسر ضلعي
مذبوحه من اغيابك وشيلمه جرحي
الليل سهرني وبدمع أو ينخگني صبحي
يابو زينب يابو زينب
****
علي محسن الفرطوسي
تم نشر قصائد شهادة الامام الكاظم ع
/channel/+RubvmBuvf30xMmYy