لا يمكننا أن نقنع الجيل الجديد أن التعليم هو مفتاح النجاح، طالما نحن محاطون بخريجين فقراء وأثرياء لصوص.
روبرت موغابي
العلاقات المابيها اخذ وعطاء محكوم عليها بالفشل ، اكو ناس جانت قريبة من گلبي بلحظة صاروا غربة بدون ماتصير بيناتنا اي مشكلة او خلاف
من تشوف نفسك تنطي مشاعر واهتمام وماكو اي مقابل ،من غير ماتحس راح تشوف الشخصيات نفسها قيمتهم تقل بداخلك
ف لتصير واثق بمكانتك العالية عند الناس وتبقى بخيل بالسؤال والتواصل لأن بيوم تشوف نفسك غريب بالنسبة اله.
نجاح البنت يتلخص بغير مجتمعات بشهادتها وعطائها، بمجتمعنا صار الجسد هو الشهادة , حتى لو ماتصير متاحة بس لازم تبرز هذا الشي يلا تكدر تنجح
والفقيرة الشاطرة الحاطة خلفية الموبايل وردة هاي حتى من تصعد بمنشأة محد يكلها تعالي اكعدي
العالم المتأثرة بالواجهة الاجتماعية وتقدير الناس خصوصاً بالمواقع الالكترونية تتلخص حياته برضاهم فتشوفه يستقتل بطرح مواضيع حتى يحافظ عليهم او يزيد من نسبتهم برغم هو مايعرفهم وهم مايعرفوه بالواقع
هذا التأثير سببه ماضي صعب انرفض بي او شخصيته بالواقع غير مقنعة ومقبولة فيحاول يعوض، بنفس الوقت الانسان بطبعه حالم كل واحد يسويله لايك يخلق وياه بداخله قصة وهمية
مثلاً وحده محترمة متابعته يتخيلها بيها مجال او شخص يجامله ينطي ثقة بداخله هو شخص مهم واذا مانزل بوست العالم راح يتوقف علّي
لذلك علاقات انتهت بسبب اهماله للناس المهمين بحياته والركض نحو اوهام متصورها راح يحقق وياهم ماعجز عن تحقيقه
الغرائز من تتحكم بالبشر يصبح خارج طوع ارادته ويصبح شخص ثاني مشوه يكدر يعيش ايام بدون اكل بس يختنك ربع ساعة اذا فصل النت
عندي صديق بالمنطقة اذا يعطس يجي يكلي علاوي تره عطست، كل اسراره يحجيلياهن ، انسان يخبل وگلبه اطيب من خبز التنور ، من رجعت من الشغل شفته ضايج ويدخن جكارة كعدت بصفه كتله خير ؟ كلي الجنت اراقبها اتزوجت وكمل الموضوع ضحك
الموقف هذا ذكرني بديفيد احد ابطال روايات فوكنر
حب وحده من منطقته ويوم من الايام سنحت له فرصة يصارحها بمشاعره
ديفيد راح سلم عليها وسألها على نوع الساعة الي بيديها وراها استأذن وانصرف ، فوكنر يكول ديفيد مايعرف بالضبط ليش سوه هيج
القصة هاي منتشرة بكل الأماكن والمجتمعات وتتكرر بشكل غريب ، شخص يحب وحده بعدين يبقى ساكت ؟! يكتفي بالمشاهده لحد ماتطير
المشكلة الطرف المتضرر مو بس هو الطرف الي حب
المقابيلة يجوز تتضرر بشكل اكبر
انسانة من حقها تعرف اكو شخص يحبها وعنده مشاعر تجاهه ، من حقها تعرف عدها خيار ثاني ممكن يكون بنظرها افضل واكثر سعادة
المأساة هنا راد يصير شي بس ماصار ، تخيل حزين لمساره المحتمل ،لو جانت شجاعته اكبر وتردده اقل هواي من البشر اتغيرت مسارات حياتهم لمجرد قرار اتأخر شوية او كلمة ماانكالت بوكتها
يجي وقت وتنضج ، وتفهم شوكت تترفع وما ترد ، تفهم بأنه رزقك جاي حتى لو جرب أحد يمنعه ، تفهم بأنه أكو أشياء متستاهل التضخيم وتكوم تعرف شلون تمشيها ، تفهم كيف تتخلى بدل متعاتب ، تفهم أنك تفرح لنجاح غيرك وأنه الأرزاق اللي مقسمها الله متتعارض ، تفهم بأنه حياة غيرك ملكهم مثل ما حياتك ملكك ، تنضج وتعرف قيمة وقتك ، وتخلق عالمك اللي تعيش بي وَيَا كم شخص يشبهك وأحلام يشبهوك ، حتى يكون وجودك بهالدنيا راقي ، وتفهم أنك خضت حروب هوايه ، وتستاهل شويه تعيش بسلام.
Читать полностью…
هذا فد يوم صاحبي انضرب بوري اجاني للشغل بالاخير كلي علاوي وصلني للبيت , اتمشينا جان يشوف محل مال شرب جان يبجي , كتله ابو راس غير اول مرة تشرب يلا تبجي
Читать полностью…
الدكتور نصحني بأن اتمشى كثيراً ، اليوم وبعد انتهاء عملي اغلقت باب المحل وبدأت اتمشى في فرع يوجد به الكثير من بيوت الاصدقاء المغتربين والمشغولين والذين اخذتهم دوامة الحياة بعيداً عن ملتقانا اليومي
رأيت بيت احمد علي ، مدافع فريقنا ايام التسعينات ، اطلبه تشيرت لاتسيو الأيطالي طلبه مني آخر مرة التقينا عندما رفض والده خروجه من البيت مما اضطر ان يقفز من فوق السياج ليأخذ مني التشيرت ويرتديه فوق البجامه وبحذاء تك لعب فيه ، بمنتصف الفرع بيت صديقي مروان الذي رأيته اليوم واحتضنته بمبالغة كأننا نلتقي بعمر العاشرة ، اكملت الفرع واكملت طريقي للشارع العام ، رأيت المقهى الذي استلمت ادارته
وجمعتني بعض اللحظات الجميلة مع العمال من مختلف محافظات العراق اردت الدخول هناك لكنني امتنعت بأن تبقى الذكريات محفوظة بعد ان ودعتهم قبل عشرة اعوام وكانوا جميعهم سالمين
اقتربت عند الأشارة وهناك تراءى لي خيال صديقي رامي المسيحي عندما كنا نأتي لنرمي شجرة (النبك) التي اصبحت بمكانها محلات كثيرة بأضوية صاخبة
انعطفت يميناً رأيت محل كبة ابو يونان ومرطبات ديباج وصالة جوزيف للالعاب الالكترونية ويحيى المهندس محبوب المنطقة الذي يطلق النكات للأهالي وهم يضحكون
رأيت اختي الصغيرة التي لديها الان اربعة اطفال وتسكن في بلجيكا وأخي الكبيرذاهب لاصدقائه لتل محمد ، وأبي راجع من العمل بيده علاكة مسواك ونساتل رخيصة يرضينا بها عن امنياتنا الكبيرة التي وعد بتحقيقها
رأيتهم جميعاً ، اهلي واصدقائي وناسي الذين تركتهم آخر مرة هنا
وصلت الى البيت رأيت طفل بملابس قذرة يلهث بكرته في الشارع وفور صيحة مدوية جعلته يدخل الى البيت
ادركت انني سأرى امي، لكن الطفل اغلق الباب
من يغرس شجرة، وهو يعلم يقيناً أنه لن يستطيع أن يجلس يوماً في ظلها، إنما هو إنسان بدأ على الأقل يفهم معنى الحياة. السعادة بسيطة للغاية، لكن من الصعب جداً أن تكون بسيطاً
البيت والعالم، طاغور
الناس ماتبين بالفرح او الحزن
الناس تبين من تتعارض مصالحهم ويه مصالحك.
كلما يكبر وعيك وتزيد ثقافتك حكمك على تصرفات الناس يقل
Читать полностью…
اكو شخص نصيبة اخ حنون،
واكو شخص نصيبة صديق وفي،
واكو شخص نصيبة زوج صالح،
وأكو انسان نصيبة ابن بار،
وغيرة نصيبة ناس زينين.
كل واحد بينا اله نصيب من شي مهم وانحرم من غيره، لأن هاي دنيا مو جنة تاخذ بيها كل شي تتمناه،
انت متدري العنده شي نفسك بي شنحرم من غيره والله عوضه
اتمنى الخير للناس، واتأكد الشي الممكتوبلك متاخذه بالگوة
والشي المكتوبلك متنحرم منه بضعفك بس هاي رحمة الله.
علي بيرهوف.
لاتستطيع البشاعة ان تحمل رداء الجمال لكن يمكن للجمال ان يحمل وجه البشاعة
البشاعة اكثر صدقاً من الجمال
اكثر رواية محلية ارجع اقراها بين فترة وفترة هي رواية سعداوي فرانكشتاين في بغداد
الحلو بالموضوع اخذت جائزة البوكر
الرواية تحجي عن شخص يجمع اشلاء ضحايا العنف والارهاب ببغداد , يلزكها سوه ويصنع منها وحش ذو قوة خارقة حتى ينتقم من القتلة اليتكون جسمه من اشلاء ضحاياهم
المشكلة تبدي من الوحش يبدي يتفكك ويتحلل بعد كل عملية ثأر ناجحة واشلاء الضحايا صارت ماتكفي فيضطرون يرمموه بأي اشلاء يلكوها سواء اشلاء ضحايا او مجرمين ,والنتيجة تتغير تصرفات الوحش ويصبح اكثر شراً ويبدي بقتل الابرياء ويزهق الارواح بشكل عشوائي وراها يقتل كل اتباعه والشخص الصنعه
الرواية رمزية وذكية تتلخص من فكرة المخلّص مثل ماصار بالعراق بالضبط
مجتمع يصنع وحوش على امل يخلصهم من اعدائهم وينتهي بيهم الحال بالسجن او مقتولين بأيد الوحش الصنعوه.
قبل فترة قليلة قررت التقي بس ويه الناس الأحبهم والأرتاح وياهم ، اي مكان مزعج ماكمت اروحله اي مكالمة ترهقني نفسياً ماارد عليها اي رزق ياخذ من طاقتي اتركه مهما جانت المغريات
كل ذني الأمور سويتهن وتبينلي الحياة طلعت اسهل من ما جنت متخيل
دور على راحتك ، راح تلكه سعادتك هناك
اغلب المشاهير الحققوا الشهرة الكافية لأنفسهم فشلوا بأيجاد عائلة مستقرة وسعيدة
الفلوس, واصدقاء الصدفة والطلعات ولبس البراندات والسعي نحو زيادة المتابعين تبين أنُ هذن مو مقياس النجاح, من توكف الكامرات والصور والتعليق على البوستات وتنطفي عيون الناس عليك وتقل المجاملات الي عادة تكون لمصلحة شخصية راح تكتشف ان انجازك الحقيقي رجوعك للبيت كدامك زوجة محترمة واطفال سليمين غير هذا كله هباءاً منثور
مجرد حالة تعيشها فرحان مؤقتا , وتعيش باقي عمرك ندمان على الحب النسيته والبيت الضيعته.
بالخامس ابتدائي مدرسة الرياضيات اسمها ست شيماء الله يذكرها بالخير ، شادة وياية بدون سبب ، ببداية العام الجديد انطوني كتاب رياضيات جديد هي ضاجت لان الشاطر البصفي انطوه كتاب مستعمل ، جان تكلي هذا الكتاب اريدك تغلفه بجلاد بنفسجي وتحافظ عليه
كتلها ست يصير احط ازرك لو احمر عندي هاللونين كالت اله بنفسجي ولتلح راح تلكاه
رجعت للبيت طلعت عندي جلاد قديم مال غير كتاب لونه احمر ومال غير دفتر قديم لونه ازرك ولان هن شفافات حطيت واحد فوك اللاخ صار بنفسجي
رحت الصبح بي للمدرسة شافته كلتلي : شفت لو بس ماتعاند لكيت البنفسجي الكتلك علّي
كتلها صدك ست انتي صح
ومن ساعتها هذا اسلوب تعاملي ويه الجنس البشري
التدين الشكلي بالعراق هي الديانة الاكثر انتشاراً يليها الاسلام والمسيحية
Читать полностью…
ادري لاتعرفون تمثلون لاتعرفون تنطون باص , القصيدة صارت عالقزمة والهجمة بالعكس ترجع ليوره , الكص بالصمونة صار تشريب , الشهره باللايكات والعطاء بالسخافة , التواضع صار ضعف والتصنع يرمز للاعجاب
التبعية مفخرة والانتماء تهمة , ماينصف اذا مايصير لوكي ومايشتغل اذا مايحقر , اطك روحي بحديده 117 مليون مشاهدة وانا وليلى خمس ملايين
علي المنصوري 4 ملايين ونيتشه 2500 , والسني يسمع علي الدلفي
الفونسو ديفيس , لاعب بايرن ميونخ من افضل الاظهره بالعالم ان لم يكن افضلهم
اعلن قبل فترة انفصاله عن حبيبته لاعبة ليون الفرنسي بدون ذكر اي تفاصيل
اليوم قريت بأكثر من موقع هالانسانة الفاضلة خانته ويه لاعب بيبسبول , خانته بعز علاقتهم مو بعد ماعافته
المشكلة المفروض هذا تتدمر مسيرته مثل لاعب اتلانتا اليسيتش بعد مااتعرض للخيانة ومر بحالة اكتئاب خلته يعوف النادي وانهى مسيرته الاحترافية
بس العايش حياة الذل والتشرد الي مثل ديفيس مابين هذا الشي وعرف ان العائلة والناس الصنعوا هم مصدر فرحه , وطبق مقولتنا الشرقية النهايات اخلاق , وبعد هالصدمة كل لعبة يقدمها افضل من السابقة والله عوضه بعروض تخيل نادي مثل الريال يريده
يجب ان تتعلم الاجيال قصة كفاح ونجاح وسلوك هذا الشخص مو من تنضرب بوري تشتري نص ويسكي من المسرح الوطني وتسمع جعفر الغزال.
ماراح تكدر تغير أنسان مؤذي حتى لو قدمتله سنين من الحب والأحترام
Читать полностью…
هذا صديقي يكول امي ٢٤ ساعة ترزلني تكله انت ماعندك مسؤولية عالبيت كتله ليش ماتنطي مصرف كلي والله انطيها تريدني اجيب غاز من البازيخانه ، تعوفه امه يجي ابوه يكله شوكت تصير رجال وتصير عندك مسؤولية وتتزوج ويصير عندك جهال اشوفهم كله يابه والله الوضع هسه مو مال زواج
شافته مجدية انطاها ربع ماعنده صرف كلتله انت ماتحس وتشوف ويايه جهال شسوي بالربع لو ماتعرف معنى المسؤولية ، يكول بقيت صافن شنو السالفة آخر شي كاعد الصبح بشغله موصي على مخلمة باقي منها شوية منطيها لبزونة ماخذتها موديتها لجراوه صغار وكلت واحد وخلصت يكول بقت تباوع عليه
كل الصفات الانسانية كاذبة وبأمكان اي شخص ان يكون طيب ، او خلوق ، او متدين ، بأمكاني ان ادعي الثقافة وأن اسرد لكم قصص وكيف أني ذات يوم نقذت قطة وكلب وأمرأة مسنة ، وحتى لو كنت صادقاً فجميع الاعمال البشرية تنتظر الجزاء الاجتماعي
وحدها البشاعة هي اصدق شعور ، لذلك لاأحد يدعيها او ينتمي اليها سوى اولئك الذين ارادوا ان يكونوا على حقيقتهم ولم يصدقهم احد .
كلش احترم أنسان هو ضحية بس قرر مايبقى ضحية ، شخص اختار يتجاوز ابتلاءه بمجرد ماوعى بيها ومابقى تعيس، ويمكن تشوفه هواي يفشل ويوصل لنص الطريق الا انه دائماً ماكو بقاموسة كلمة يأس وعازم يتجاوز الوضع السيء والعقد والمشاكل النفسية ويشوف اصلاح نفسه من مسؤوليته مو مسؤولية الأذوه ، ماكو شي يسعد الأنسان بالحياة من شخص يشتغل على نفسه ويحاول يحسنها دائماً
تحية كبيرة لكل محارب بمعركته الخاصة ، الي مريت بي مو قليل ، خليك فخور بنفسك .
حتى لو اهلك سببولك صدمة وقصروا بتربيتك فأانت مُلزم تعالج نفسك بمجرد مايصير عندك وعي بمشكلتك، ماراح تكدر تعامل الناس بعقدك ومشاكلك وتريدهم يعذروك
التطبع بالألم والماضي يعيشك بقلق وخوف دائم
الناس مو احسن منك،
عشت المو حلو من الحياة جرب تعيش الحلو البيها،
قرار صادق من داخلك يفعل كل سلوكك الأيجابي.
علي بيرهوف.
تنهار اخلاق الأنسان بالصدمات المتكررة ثم يعاقب الأنسان صحته وجسده كجلد ذاتي لأفعاله.
Читать полностью…
تخيل بيوم القيامة واكف مرتبك بعد ماجنت بحياتك قوي زمانك ، منتظر الحساب حالك حال البقية ،
تشوف واحد يكلك تتذكرني ، انت فد يوم كطعت رزقي وجوعتني اني وجهالي وظلمتني بشي تدري بنفسك آني مامسوي ، تكله اَي اتذكر هناك ماكو إنكار لو واحد عرف يطلعك بفلوس الشاهد بس الله .
يكلك رايد حقي ، تتفاجئ زين وآني ؟
فياخذ من حسناتك الحسناته
واكف وتعيد شريط ذكرياتك ،حسناتك وذنوبك ،الدنيا وافعالك كلها تتلخص كدامك ، تفكر راح تنجح لو تفشل ويجيك غير واحد ، شخص صرت سبب بنهايته ، تتندم وتكله سامحني ،
يجاوبك هناك أسامحك بالدنيا لو بعدني عايش هناك ،هنا وكت استرداد الحقوق
وكل ماتخلص من واحد يجيك غير واحد الحد ماتصفر حسنات يفاجئك يكلك اخذ من سيئاتي
الحوار هذا راح يصير ،
ماكو واحد ظالم يعدي بظلمه ، ماكو جاه وسلطان وفلوس
هناك العملة اعمالك .
لو نفتهم احنه ليش هنا ، وين رايحين ،هواي امور تتغير بحياتنا .
الله يحسن خاتمتنا وينجينا من ظلم الناس وفِتن الدنيا وعذاب الآخرة .
علي بيرهوف.
من تشوف واحد يمر بظروف صعبة ويجي يسألك انصحه وادعيله من گلبك مو اله ترتبط بي
Читать полностью…
