1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
ولادة العباس
انولد عباس يشع نوره وجماله
وزينب اتصيح هله براعي الكفاله
زينب اتصيح زينب اتصيح
زينب اتصيح هله براعي الكفاله
1
شالته العباس ويعاين أبوها
وشمعت الميلاد بالدمعه طفوها
اخذته ومن حقها اذا تاخذ اخوها
دخلو اعليها تشمشم بي لگوها
تحچي وياه وتگله انته بعمري
راح بيديك اسلم خويه خدري
زينب اتصيح زينب اتصيح
زينب اتصيح هله براعي الكفاله
2
امن الگماط اچفوفه طلعها وحضنها
بي اخوها گامت اتحس وابنها
ربت العباس زينب من عبنها
تعرف بعباس يتكفل ضعنها
هله بعباس تنادي الهاشميه
تاج عزي وشرف خدر السبيه
زينب اتصيح زينب اتصيح
زينب اتصيح هله براعي الكفاله
3
اتگله راح احچي واسولفلك عليه
شلون من تكبر تحط ايدك بديه
انصير مضرب مثل بعد الغاضريه
اني وانته وسكنه والدمعه ورقيه
انته عمري يعباس وحياتي
اتعيش بيه جرح من ذكرياتي
زينب اتصيح زينب اتصيح
زينب اتصيح هله براعي الكفاله
4
گام ترسم بالدمع رايه وشريعه
وكتبت اعله گماطه انه اخته الوديعه
اختنگت ومتلمها كل هاي الوسيعه
عاينت لچفوفه واتصورت گطيعه
شلون ميلاد صبح هم واذيه
انريد عالصار تجازينه الزچيه
زينب اتصيح زينب اتصيح
زينب اتصيح هله براعي الكفاله
الشاعر السيد رياض الرسل الجابري
موالين + ابوذيه للامام الهدي (عج)
ليلك أذا تسهــره بفرض ألأله حـجه
ولتدور وتعــتــذر من تنحرج حـجه
كمل افروضك امر واخـتمـهه بالحــجه
مغرب وليل وظهـر صلي الصبح والعصر
ادري شكو ابداخلك وللي يعصرك عصر
بأمر الالـه مـختفي وغـايب امام العصر
تكـدر فقط تـنـدعي ويـظــرلك الـحجه
بيت الله واجب فرض من تلتزم حجه
ولتجامل انته بعمل لا تسطــنـع حجه
ليضيع ليلك هدر لــتــنام أبــــد حجه
ليل العباده درس ظـل للصبح قائم
وگدام عينك يظل كــلشي ألك قائم
باجر بيوم الحشر يـشـفـعــلك القائم
وشلون شافــع الك حـجه وابن حجه
أذا تــگدر البــيــت الله حجه
وبــالـك لا تـدور بـيه حجه
أمامك غايب وعالناس حجه
فرض نزله ربك عالبريه
الشاعر السيد رياض الرسل الجابري
ولادة الحسين (ع)
لتگلي ولاده وتفرح بهل يوم
خل احچيلك اني واطرح الفكره
شنو معنى الولاده فرح لو دمعات
شنو معنى الولاده ضحكه لو جمره
جابوه للرسول وعمره بس لحظات
اول مانظرله اختنگ العبره
ياهو الي گدر ينظر بوجه حسين
وماصبت دمعته العاينه بحسره
حيدر و الرسول احتاروا ينظرون
على وجهه الشريف وحارو بأمره
الرسول ايحاچي حيدر ايدك انته اهنا
خليها اعله صدره وعاين النحره
نحره ينذبح والخيل باچر ويـن
عليه تسحگ عليه واتهشمه الصدره
باچر وحده يبقه وينذبح عطشان
والجثه سليبه وتبقه عالغبره
باچر يبقه وحده والعـده ايحيطوه
ومن عدنه يحيدر محد ايحضره
انگلب مجلس عزاء الفرح بالدمعات
والزهره حزينه بدمعه وتنظره
يبني الزهره صاحت والدمع بالعين
والزهره دمعها ايطيح چالشذره
تسأل يامحمد هذا كله يصير
أي كله يصير واحنه بيه ادره
السمه مطرت دمع والخاطر المولود
ويامولود هذا ؟ الكون ينتظره
حسين اعظم مصيبه بعالم التكوين
لو محسين دمه انطاه وكل عمره
ماظل دين هسه لا صلاه لا صوم
و لا عدنه امام وهسه ننتظره
بس الله مقام حسين راده يصير
عالعالم ذريعه وفاجعه وكبره
ويخلي خليفه ايطالب بهل ثار
من يأذن الباري ايعجل بأمره
ثار الله يغايب و شوكت مولاي
للزهره كسرها باچر اتجبره
مافرحت الزهره بكل ولاده تصير
من يظهر المهدي تفرح الزهره
الشاعر السيد رياض الرسل الجابري
النور من حيدر شعاعه ومصدره
أتـجـسد بعباس سبع الگـنـطـره
علي مالك ثاني نورك الرباني
أتـجسد بعباس سبع الگنـطـره
النور مــن حيـدر تحــول للگـمـر
لان ربــك مـيـــزه ابـيـــن البـشـر
شلون بيت البي تـرعـرع والكـبـر
بيت بي وحي الجلاله البي حـضـر
دره القاصي وداني نورك الرباني
اتجسد بعباس سبع الگـنـطـره
الـنـور من حيدر وصار بجبهـتـه
قبس ربـاني وتـلاله بـطـلعـــتـــه
محــد العــبــاس يشبه خـــوتــــه
والـدليل الصار خطه بــوگـفــتــه
المنذهل خلاني نورك الرباني
اتجسد بعـباس سبع الگـنـطـره
النور من حيدر وحماي الـدخـيل
أتحول بكل شرف وأصبح للكفيل
وهاي ما تحـتاج شاهــد لا دليل
لأن مثـله اثنين ماكو مستحـيــل
صار كل عنواني نورك الرباني
اتجسد بعـباس سبع الگـنـطـره
النور مـن حيدر وبالفــرحه يشع
امن الأصل راح وتحـول للـفــرع
حـنـه وامـلـبـس وصفگات ودمع
خـل نهـل هاليـوم وانضوي شمع
أبد ماينساني نورك الرباني
اتجسد بعـباس سبع الگـنـطـره
ولادة العباس جديده
عباس يعيوني
بحبك يلوموني
يابه الفضل يابه الفضل
١
بمولدك خادم واحضر
لان للجنه انته معبر
الماحضر هالليله يخسر
والحضر يشفعله حيدر
كل واحد اتعنه
يظمنها للجنه
يابه الفضل يابه الفضل
٢
بزغري احضرلك مجالس
وكل مجالسنه مدارس
بحبك وبالخدمه انافس
بخدمتك سموني عابس
مجنونك وتدري
ناذر الك عمري
يابه الفضل يابه الفضل
٣
اغله شي انته بحياتي
يالعشت واسكنت ذاتي
انته قرآني وصلاتي
ابقه احبك والمماتي
حلفتك بحيدر
تشفعلي بالمحشر
يابه الفضل يابه الفضل
٤
بمولدك هاي المسيه
احضر اواجب عليه
الليله رايدلي هديه
بسكنه احلفك وبرقيه
وبداعت الزهره
منك ردت نظره
يابه الفضل يابه الفضل
٥
زينب اتعاين لبوها
وشمته العباس اخوها
تبچي زينب يسمعوها
شابگه أچفوفه لگوها
شبگته ومتعوفه
وتقبل أچفوفه
يابه الفضل يابه الفضل
٦
وبحضن زينب تربه
ومن حضنها ماتذبه
يسري وي دمها وتحبه
واله صارت هيه كعبه
ويطوف كعبتها
ويعرف بقيمتها
يابه الفضل يابه الفضل
الشاعر السيد رياض الرسل الجابري
السيده زينب تذهب الى سجن الامام الكاظم لزيارته ومعها رقيه وحميده بنت مسلم عليهم السلام
تمشي زيـنب والحـزن ينعاهــا
السجن موسى دخلت بممشاها
دخلت بلوعه وحزن
موسى شافت بالسجن
رفـع راسه وكـام يحجي ويــاهـا
1
شاف عمته ودمعته عالخد جريه
ومسح عنها كل تراب الغاضريه
والعبايه امحرگه التلبسها هيه
ونظر طفله مجرحه اعرفها رقيه
شاف اثر لسياط فوگ امتونها
من البواچي حمره شاف اعيونها
وازرگ ايشوف المتن
موسى شافت بالسجن
رفع راسه وگام يحچي وياها
2
گلها عمه اشجابچ وانتي وحيده
شلون اجيتي بهاي الدروب البعيده
جاوبت زينب يعمه ولزمت ايده
الشوفتك ملهوفه بت مسلم حميده
شم حميده وعالصدر خلاها
وايده ترجف من مسح عيناها
والدمع فوگ الوجن
موسى شافت بالسجن
رفع راسه وگام يحچي وياها
3
تنظر الايده ودمعها بخدها سايل
اتگله ياعمه اشثگل هاي السلاسل
ايگلها ياعمه امتحان وبيه قابل
انتي بس شلون من غير ابو فاضل
اهنا بچت زينب ودنگت راسها
موسى من يمها ذكر عباسها
ذكرت ايامه وتحن
موسى شافت بالسجن
رفع راسه وگام يحچي وياها
4
عمه زينب ارد اوصيچ بوصيه
لا تنظرين السلاسل بين اديه
من اشاهد منظرچ يصعب عليه
امچتفيچ بحبل يا عمه وسبيه
ممتصور عمتي ويضربونها
وعالهزل وحدها ويركبونها
ابلا اخو وبلا ابن
موسى شافت بالسجن
رفع راسه وگام يحچي وياها
5
اثنينه اتعذبنه يا عمه بعمرنه
لچن مضرب مثل للعالم صبرنه
خلي للباري نفوض كل امرنه
حتى كعبه ايصير للوادم گبرنه
اتوادعت وياه بفيض ادموعها
عافته ومحنيه كل ضلوعها
بالسجن ظل ممتحن
موسى شافت بالسجن
رفع راسه وگام يحچي وياها
الشاعر السيد رياض الرسل الجابري
شنهي الكاظم ايألمه
بسجن الكاظميه
رغم السجن والظلمه
بس دمعت رقيه
1
چان من يصفن الكاظم يشعر بحيرة وضعها
اتصير گدامه رقيه بكل بواچيها ودمعها
هواي يهواها ويحبها بالسجن تبچي وسمعها
راسمها صوره بالسجن
لمن يشاهدها يون
مو بالسلاسل ممتحن
بالشمر لمن دفعها
من ايغمض عيونه يشعر بيها يمه
من النار تچيها تصيح بصوت عمه
محد ماشغل همه بكل الغاضريه
رغم السجن والظلمه بس دمعت رقيه
2
چان راسم الها صوره صوره من طف النوايب
طفله ماشافت طفوله ازغيره بس الگلب ذايب
مره يرسم عين حمره مره ترچيه وگصايب
يرسمها مره امدلـله
مره سبيه بكربله
يشعر بهاي المسأله
اتزيد همه والمصايب
الكاظم بيها ظل حاير ينضر للسلاسل
يشعر بيها وحدها من غير ابو فاضل
كلها براسه ملتمه وبهاي المسيه
رغم السجن والظلمه بس دمعت رقيه
3
سمع بالصوره تكلمه اتگله اني هواي احبك
ادري راسملي انته صوره وصورتي هوايه تعذبك
اني مريت بمواقف صعبه مايحملها گلبك
من افگدت راعي العلم
اركض واصيح اهل الشيم
حتى الطفل لا ماسلم
من دربنه وهذا دربك
لان كل اهلي عافوني شبعانه بواچي
خفت ايكشفه الراسي انطيته التراچي
وليه ومحد ايكلمه والعيله سبيه
رغم السجن والظلمه بس دمعت رقيه
4
رد عليها بدمعه حمره نازله بلوعة مصابه
الچ راسم اني صوره نايمه بنص الخرابه
وراس فوگ الرمح ينزف صابر وحامل عذابه
كل صوره راسمها بألم
منها اشم حرك الخيم
واشعر بكل واحد هجم
الموقف وكله غرابه
ابوس الصوره واشتمها ودموعي اعله خدي
اشتم ريحتچ بيها ونحر حسين جدي
جدي حسين ابو اليمه كل الريحه بيه
رغم السجن والظلمه بس دمعت رقيه
5
صاح يادمعت الغربه يحچي وبناره السريه
ايعاين الصوره ويشاهد اثــر نار الغاضريه
يشاهد الاطفال لاچن مايشاهــد بس رقـيــه
يشاهد رجلها امجرحه
وبالخيم يسمع نــايحـه
والــزلــم كلها طايحــه
اموسده فــوگ الوطيه
يضربها الشمر وتصيح بدموع المصيبه
شفت عـبـــاس مو يمي عايفني وغريبه
ايدك لو صدگ زلمه مت مدها عـلـيــــه
رغم السجن والظلمه بس دمعت رقيه
المصيبه
هاي قصة سجن موسى خلي تسمعها الضماير
موسى ماننسه مصابه انردد بكل المابر
عاش صابر كل حياته وحتى لمن مات صابر
احبابه خل تبچي وتون
بطامره صابر متحن
ياوسفه من مات بسجن
بكل گلب عايش وحاضر
الشاعر السيد رياض الرسل الجابري
ولادة الإمام علي ( ع )
--------------------------------
ابوذيه
الف هنياله ليعمق صلاته
بآل النبي ومايترك صلاته
الشفاعه اينول من عله صلاته
على المختار وبهاي المسيه
مقطوعه
فاطم بت اسد محتاره وين تروح
وجبرائيل حاضر چان ناطرها
بعث نور الله بيها وخاطر تشوف
وماراد الاله يكسر بخاطرها
اكراماً الحيدر شق جدار البيت
خاطر تدخل وللبيت عبرها
دخلت فاطمه مهيوبه وسط البيت
وجهز ربك الها وكلشي حضرها
ثلث تيام خدام الها حور العين
هي التأمر ومحد اليأمرها
الباري اختارها وخافيها عن الناس
ثلث تيام ضمها بنصره ناصرها
انطاها جنين بكبر هذا الكون
وعليها خفف الآلآم صبرها
حيدر معجزه بأمر الاله وچان
يحدث أمه والغايه يسامرها
ياهو الگبل حيدر منولد بالبيت
وياهو المعجزه وللكعبه فاطرها
--------------------
هوستين
العلي ايحبه العلي مدري اشكثر واشگد
ابگد هاي العوالم لا بعد ازود
لذلك غيره محد منولد محد
بالكعبه والحور اتخدمه
على كل البشر من راد يتباها
بالكعبه الولاده الباري خلاها
ممسويها لاحد اله سواها
شگ بيته واتفضل گله
الشاعر السيد رياض الرسل الجابري
( هوسات علويه )
١
حقي ياعلي لو صرت مجنونك
شما املك يحيدر فـدوه لعـيـونك
شلي بكل حياتي وشسوه من دونك
ها المثلك جاه انطاني وحاير ما اعرف شنطيه
٢
على اعتاب الحقايق انته بس الحق
وعلى كل ناسك انته ياعلي اشفق
ناقوس الخطر والتبرئه لو دق
ها كلها اتمد المنحر ياحيدر و اتچلب بيك
3
ماينفعكم اهناكه علي عوفوه
كلها اتصيح لو صار الحشر تركوه
ماعـدهـم عـقـل حيدره مايدروه
ها هو بكيفه ايحاسب ملاچ وبالجنه اهناك
4
علي نقطت ضعفهم وكت الملاگه
علي الكل فارس اليدعي خناگه
علي رحمه چبيره وعلي المشراگه
ها ايطفي بيوم المحشر من اتگب النار اهناك
5
اذا عفته العلي ياهو البديل ايصير
اتحير اهنانه انته اهناكه هم اتحير
صير انته حكيم ا واسع التفكـيــر
ها شلون اتبدل الدره بيوم المحشر بالفحمات
6
علي رحمه وتفاصيل وحكم واسرار
علي چاسي الفقير وعلي حامي الجار
من يندار حيدر انته هــم اندار
ها يگول بالباري بحقه من يندار الحق وياه
7
علي قانون ثابت واليجهله اشرك
يخسر كلشي عنه اليبتعد وانفك
خلل عنده خلل كلمن بحيدر شك
ها اتشك بطه و ربه من اتشك بداحي الباب
8
علي نفس النبي ويكفي امن اهل بيته
مايخـتـلـف عـنــه ونفس علميته
صهره وابن عمه وعلي تربيته
ها واحد هو وحيدر من يمشون اتشوف اثنين
9
علي نهج البلاغه ومحكم التأويل
علي قرآن ناطق علي والتنزيل
علي صاحب محمد علي وجبرائيل
ها الباري ايحبه الباري وطابو الجنه بأسمه اهناك
الشاعر السيد رياض الرسل الجابري
هوسات لولادة الامام علي (ع)
على كــل البـشر مــن راد يـتــبــاهــا
بالكعــبــه الـولاده الباري خلاهـــــــا
مـمــسـويهــــا لحـــد الــه سـواهــــا
شگ بيته واتفضل گـلـه
العلي ايحبه العلي مدري اشكثر واشگد
ابگـــــــد هاي العــوالــم لا بعــــد ازود
لذلك غـيـــــره محــــــــــد منولد محــد
بالكعـبه والحـور اتخدمه
بــارينه العلي وبكــثــر ماحــبـــــه
احتار يحطه وسط الكعـبــه لو گلبه
قــرر ينولـــــد حيدر وبـالـكـعــبــه
وبكـيـفه يخـتـار الباري
الشاعر السيد رياض الرسل الجابري
قصيده بحق ولادة الامام الجواد (ع)
خل ندك باب المراد
الليله ميلاد الجواد
1
الف هنياله الحفل كلمن يحضره
الليله تاسع نور هل من سمه العتره
الليله نتشرف اذا اسمه نذكره
خلي تفرح بالحفل فاطمه الزهره
الخير نطلب والسداد
الليله ميلاد الجواد
2
الليله من گلبي الك ابعث سلامي
شما اوصف بالوصف يعجز كلامي
ياجواد الخير انته يا امامي
بداعت الزهره تسجلها الاسامي
نظره يارب للعباد
الليله ميلاد الجواد
3
الليله نفرح بيك يا ابن الزچيه
بهل ولاده والحفل ليله وزهيه
يالجواد ونورك ايشع عالبريه
بموسه جدك وانته تضوي الكاظمية
الليله بينه الشوك زاد
الليله ميلاد الجواد
4
بهل الولاده الليله فايض كل حناني
والي ماناسيه ابد لا ما نساني
ارفع اني من الگلب احله الاماني
وللامام المهدي اقدمها التهاني
واحلف بسبع الشداد
الليله ميلاد الجواد
5
بتاسع انوار الولايه الحيدريه
نحتفل هالليله كل احنه سويه
انصيح احنه بالولاده بفرد نيه
تگضي كل حاجاتنا بداعت رقيه
الليله مانلبس سواد
الليله ميلاد الجواد
6
للحفل هاليوم كل احنه اجينه
والك يابو الهادي زاد الشوگ بينه
يالجواد بمولدك عينك علينه
ندري تترسها اذا انمدها الادينه
الشوگ زايد والوداد
الليله ميلاد الجواد
7
على اعناد الناصبي وحاقد وظالم
الك اختم مطلبي والگلب هايم
ارد اصيح بصوت خل تسمع الوادم
يالجواد وكون تقبل بيه خادم
الله قرر والله راد
الليله ميلاد الجواد
الشاعر السيد رياض الرسل الجابري
قصيدة كعديه توعويه
-------------------------------
لا تحچي عالخادم بموزين
خليها كلها بچيس الحسين
اسمعها لحچايه الصحيحه
وخليها بذنك هالنصيحه
خليها كلها بچيس الحسين
1
راح انصحك واخذ مني كل كلام وانته وفسره
الزهره تحضر بالمجالس وهيه بالخدام ادره
لا تزعل دير بالك خادم وتزعل الزهره
بكل خدمتك انطي عهد
للزهره وانطيها وعد
عالغلط لتأكد ابد
كل غلط شوفه واعبره
كل خادم انته ذوب وياه
لو ناده يمك واحسيناه
والسر اخيك لا تبيحه
وخليها بذنك هالنصيحه
خليها كلها بچيس الحسين
2
انته خادم هوه خادم والمجالس كلها وحده
لو شفت خادم وحاضر باب كل العتب سده
ركز امن اتشوفه انته وانظر الدمعه البخده
يمكن دمعته تنقبل
من ينحب ودمعه يهل
بالمجلس الحد والفصل
حسين والتقييم عنده
وحسين ينظر بس للگلوب
شبيها محبه ويمحي الذنوب
وحسين لو رايد تريحه
وخليها بذنك هالنصيحه
خليها كلها بچيس الحسين
3
لو دخل خادم بمجلس لا تعاين على افعاله
التزم بفعالك انته الخادم وخليه بحاله
المجلس بتوفيقه انته حسين من تحضر بجاله
مدرسه المجلس للحضر
يلگه المواعض والعبر
يكفي يحضره المنتظر
يعني بيه اعظم رساله
من تلطم بمجلس ومحتام
بالك تسولف على الخدام
والخدم ذوله افضل شريحه
وخليها بذنك هالنصيحه
خليها كلها بچيس الحسين
4
كون ألف أحساب تحسب گبل لاتحچي اعله خادم
مثل ما بحسين هايم هو هم بحسين هايم
لا تذم خادم بمجلس عيب واتسمعك الوادم
عوف الآنه وحب النفس
والمجلس اعتبره درس
كل خادم وشوفه شمس
لا تعبره وتظل نادم
خادم احسين اتفضله عالناس
واعليك يقبل حتى عباس
احچيها ماضمها وصريحه
وخليها بذنك هالنصيحه
خليها كلها بچيس الحسين
5
لو حضرت بمجلس انته احضر
وعن طيب خاطر
هالمجالس الها ضحت ناس وانطوها المناحر
والاهم المهدي بيها اول اليبچون حاضر
هاي المجالس قائمه
بتوفيق من رب السمه
و لي تجازي فاطمه
بالحشر من تجي باچر
تحضر الزهره اتٱشر اعليك
حاير وصافن ما تخليك
وتطمن النفس الجريحه
وخليها بذنك هالنصيحه
خليها كلها بچيس الحسين
الشاعر السيد رياض الرسل الجابري
قصيده بحق السيدة ام البنين (ع)
ضحت بأربع ولدها
والدمع يحفر بخدها
تشعر امقصره بعدها
ام البنين
1
قدمت اربع ولدها للمنيه
اتگول خاف الزهره ماتقبل عليه
ربت الاقمار وانطتهم هديه
بوجه ابيض باچر اتلاگي الزچيه
قدمتهم دمعه دمعه
للحبيب العدها شمعه
مو عليهم هيه تنعه
ام البنين
2
بعد فاطم حضرت البيت الامامه
هم اسمها فاطم ونالت كرامه
ضحت بأربع بنيها والعلامه
حسين رادت الها يرجع بالسلامه
حچت وياهم يولدي
وي اخوكم اوفو عهدي
حسين منكم اغله عندي
ام البنين
3
من بعد ضيم وعذاب الغاضريه
ظلت ام الاربعه بونه شجيه
ماردتهم ولدي ويرجعون اليه
حسين سالم ردته بس ايرد عليه
مارجع سالم واشوفه
غالي ما أگدر اعوفه
ما شفت گبره واطوفه
ام البنين
4
بعد رحلتها ومصاب الطف عليها
وبعد ماضحت لبو اليمه بنيها
سلمت لامر القدر رفعت اديها
اتسلم اعله حسين واتمنت يجيها
من بعد رحلت صبرها
لان محد ما حضرها
اتمنته يحفر گبرها
ام البنين
5
راحت ام الاربعه الليله بحزنها
محد امن اولادها حاضر دفنها
اتمنته حاضر عزيز الزهره ابنها
چان نزلها الگبره بيده وحضنها
لٱن محد ما وصلها
الفاتحه نقراها الها
الليله بالدمعه ونگلها
ام البنين
الشاعر السيد رياض الرسل الجابري
ام البنين (ع)
مات حسين مات حسين
اتنادي بدمعه مات حسين
تنادي ام البنين بدمعه وبحسره
ابني حسين راح وگلبي شيصبره
فديته بأربعه بس اشعر امقصره
اخافن ما اوفي فاطمه الزهـره
مدري اشصار گلبي احتار
اتنادي بدمعه مات حسين
انه ام البنين ادمــوعي هـمــاله
هسه شلونه ابني اشصاير بحاله
لو ماخذ اعــيــوني بدربه تبراله
مدري اشصار بيه اشصار بعياله
گلبي اينوح ظل مجروح
اتنادي بدمعه مات حسين
ابني حسين راح وخابت اضنوني
اظـل اتأمله والــدمعه بعــيــوني
انطي كلشي انطي لو يخلـــوني
بس لحظه اشوفه ويعمن عيوني
ماوفيت ماوفيت
اتنادي بدمعه مات حسين
نذرت ابنيني لجله وابچي بالدمعه
من حگي اعله ابني لوردت انعه
انه ام البنين وراسي مارفــعــه
احس امقصره وي فاطمه البضعه
واويلاه واويلاه
اتنادي بدمعه مات حسين
تنادي ام البنين بنار لهابه
وتبچي اعيونها والدمعه سچابه
من حست ابنها طول اغـيــابــه
اه يحسين نـــادت اه ومصابه
حست مات حست مات
اتنادي بدمعه مات حسين
ظلت بالدمع والنوح والاحزان
من عرفت ابنها منذبح عطشان
مات حسين ضامي بحومة الميدان
ثلث تيام عاري وجثته عالتربان
بالاحزان بالاحزان
اتنادي بدمعه مات حسين
تظل ام البنين بهاي قصتها
مثال التضحيه ومرفوعه رايتها
مانشفت ابد للموت دمعتها
للحاجات باب الدنيه خلتها
بأخر صوت بأخر صوت
اتنادي بدمعه مات حسين
الشاعر السيد رياض الرسل الجابري
قصيده بحق نعش السيده ام البنين (ع)
نعش ام البنين الطاهره انشيعـه
فوك الروس هاي الليله وانـرفعـه
نعش الطاهره المرفــوع يــا هـالـنــاس
كل احنه ولدها انشيله فــــوگ الــراس
خل نبچي وانشـيــعـــه الخاطر العـبـاس
وخـل انـــوح احنه وعالنـعــش نـنـعــه
خل نحمل نعـشـهـــــا وننحب بـعــبــره
عـــد الله مـقــام الطـاهـــره اشكــبــــره
هـــاي الضحــت الشـبــان لـلــزهــــره
بس حســيـــن رادت سالم اتــرجـعــــه
وحگ طـه النبي أي وحگ معــراجــه
دعـــــاء ام البنين الـيـــــوم نحـتـاجــه
بسم النعش هذا تنگضي الحــاجـــــــه
يالـرايــد الحاجه للنـعــش تــبــعـــــــه
اتبـع هالنعـش يالمحب انتـه ونــــوح
وابچي بصوت عالي وبگلب مجروح
عالخلصت عمرها تبچي عالمــذبـوح
ابچي بصوت خلي العالم ايسـمــعــــه
هــاي ام البنين التحـضــر الشدات
ما ننسه فضلها لا ابـد هــيــهـــات
نعش الطاهره البي تنگي الحاجات
هذا النعش هــذا حالـتــــه ا وضعه
هالليله نعشها ابـــدمعت الـنــاظــر
نشيعه ابلا ولـدهــا ويكسر الخاطر
للضحت بنيها ويشهــــد العاشــــر
هنياله الحضر ويشارك ابــدمـعـه
هنياله الحضر وبدمعه يــرثـيـهــا
هاي ام البنين التنشد اعـلـيــهــــا
والباري الدمعتك يحتفظ بــيــهــــا
ويحول دمعــتــك بالگــبـر شمعه
الشاعر السيد رياض الرسل الجابري
هوسة الامام الحسين (ع)
من غصن النبوه الجاي سر العين
هل بتلاثه من شعبان ساكن وين
ساكن بالگلوب التدگ بسم احسين
(كل دگه بأسمك يحسيني)
هوسة الامام السجاد (ع)
1
يوم الخامس بشعبان شوگي ازداد
انولد رابع امام المكرمه الوقاد
هله وميت هله بنورك علي السجاد
(مزهيه والدنيه بنورك)
2
حسين بمولد السجاد گبل ما يسأل شلونه
راد اوليده يمه يكون گلهم يمي جيبونه
من شافه ابوه حسين هلت دمعت عيونه
هذا الـ وي خوته ايروح والعدوان يسبونه
(هل دمعه من شاف اوليده)
هوسة العباس (ع)
من حيدر فرع شايلها المروه
انولد عباس راعي الجود والخوه
لو هوه نحب لو هوه لو هوه
(بميلاده وانهني الليله)
الشاعر السيد رياض الرسل الجابري
ولادة السجاد (ع)
يارابع امام الغـيــر التاريـخ
مو بالسيف مو بالدرع باقواله
ميــلادك الليله امنـيـلـك ميـلاد
المثلك كون هسه الدنيه تنعاله
من شافك ابوك بلحظة الميلاد
كلها اتغيرت لحسين احواله
حاچاك ويگـلـك ياعلي السجاد
بويه ياعلي ودموعه هماله
حسبالك تعيش وتكبر انته وياي
ماتبقه وي ابوك وتنعم بجاله
لان وياي تمشي الارض بيها انموت
ابوك الباري طف الوحده سواله
وحضر نفسك انته وصيح يا الله
ويجازي الله الرجل وبقدر ماناله
وتدري انته شوراك اشظام التاريخ
يبويه ياعلي والدنيه رحاله
وراك الـغـاضريه والسبي والشام
وراك انته اميه وناس محتاله
ومريض انته مريض شلون گلي هناك
لو باچـر علي وتهجـم الخياله
محد مايضل الروس كلها اتطيح
قـربـان الذبايح اله ولهلاله
وباچر تبقه وحدك ياعلي السجاد
المثلك مايروح الموقف اباله
شتسوي و رقيه الثوبها ايحرگوه
وخدر الهاشميه الشمر يدناله
شتسوي وتشوف الخيم وجت نار
وتشوف اصغر طفل والنار بذياله
شتسوي وتشوف عيال ابوك حسين
تركض كلها تركض فرت عياله
شتسوي وتشوف اختك ابين الناس
هاي اصعب واعظم بويه كل حاله
شتسوي علي ومابيك حيل تگـوم
وتوجع حيل توجع ضربت الفاله
صاحب غيره ادري النار تاكل بيك
المثلـك ياعلي ينـمـرد دلاله
تصبر بويه تصبر هيچ ربنه يريد
والصابر يبويه بهاي هنياله
باچـر تكبـر انته اتكمل المشوار
والرايد ينول المجد يسعاله
صحيفه تصير عندك بيها تهدي الناس
وماينگطع خيرك يبقه شلاله
يموت البشر يفنه ومايضل ايروح
و اذا رايد يضل اتخلده افعاله
الشاعر السيد رياض الرسل الجابري
الولاء لحسين يالتسمع ولاله
بميلاده سطع نوره ولاله
بفخر جبريل هز مهده ولاله
وتشرف من خدم ابن الزجيه
بسمك من اصيح اعضاي يحسين
عليه الباري بيك اليوم يحسين
بميلادك حرت شهديك يحسين
بس روحي واقدمها هديه
انولد هذا اليوم ابن سيد البـريـه
هله بالسجـاد ابو الطلعه البهـيـه
صوت ردد بالسمه
انولد راعي الغانمه
هله بالسجاد ابو الطلعه البهـيـه
اليوم رابــع كـوكــب يشعـشـع بــنـــــوره
بالسمه يـزهي وتجله بــاحـلــه صــــوره
ارد اهني الـعـالــــم ابمـقــــدم حضــــوره
وارد اهـنـي فاطمه الزهـــــره الــزجـيــه
علي السجاد انـولـــــد يامحلــه صبحــــه
شلون فرحه وما مثلها تصيــــر فـرحـــه
اليوم كل مخلص موالي يطيب جـرحــــه
وخل نشارك بالحــفــــــــل كلنا سـويــــه
اتـمـــعــن وانـظــر بــعــنــوان الــــولاده
وشوف من نــوره بـزغ فجــر السعـــاده
ربــك اخـتــاره واله اخـتـــار الــقــيـــاده
من فــرضها وحطم عــــروش آل امـيــه
عمت الـفــرحـــه انــولــــــد عالم زمانــه
وحــصـل اكــبــر مــنــزله وارفــع مكانـه
خـصه بـــارينه الجـلــيــل بكـــل امــانــه
بالصـبـــر وبكل عــلــــوم الــهــاشـمــيـه
بقه نـــــورك يــاعــلــي السجـــاد آيــــه
ومن جــبـيــنك لاحت انوار الهـــدايــــــه
وحـقـقـت غـايـه بوجودك اسمى غــايـــه
من الجـلــيـل الباري بالـغـــــايه وصـيــه
هوسات للمبعث النبوي الشريف
------------------
1
هله بمبعث محمد خاتم الاديان
نزل جبريل جاب البشره والقرآن
الما واله محمد بالبشر خسران
وبأيده سلمها الدنيه
2
ختم رب السمه بهل اليوم نعماته
وبعث للكون حجه بكل سماواته
من نوره بمحمد ختم اياته
غطاها والدنيه بنوره
3
من عطره المحمد خصه كله ونث
وحث كل الملائك تحتفل من حث
الف مبروك يالمصطفى بهل مبعث
هنياله كلمن والاكم
الشاعر السيد رياض الرسل الجابري
الكاظم المسجـون انـظـر لوعـتـه
بوسط طاموره كـضاها الغـربتـه
بدمعــت الاحزان عالكاظم نـــــون
جاب عـمره كله من سجـن السجن
بهـــاي طـامورة الغــربــه ممتحن
وابـــد مانشفــت الكاظـم دمعــتــه
عاش بالغــربـــه حياته وانتـظـــار
ومايـمــيز بالسجـن لـيـل ونهـــــار
عينه عالگـيـــد وتشب بالگلب نـار
يــذكــر السجــاد جــده وحسرتـــه
خل تشوف الناس وتـعـيـد النـظــر
هــاي طــامــورة الكـاظـم يا بشــر
امگـيـديـنــه بگــيــد مامنه مــفــر
الناس كل الـنــاس تسمـع ونـتــه
گاعــد بـطـاموره وبظـلمه وحــيــد
جابه من البـصره ومگـيـده بحـديد
خلي نلعـن احنه هـــارون ويـزيــد
ونلعن بكل وكت گومه وزمـرتـــه
رغم سجنه وغـربتـه الكاظـم يظـل
مصــدر الشيـعـتــه مـفـتـاح الامـل
هــذا ابـن حيدر علي خيــر العمـل
الناس خلي الناس تعــرف قـصته
موسى ابن جعفر عله بصوته وبقه
شامخ وعـالمـله بكل صبره ارتـقـه
حوزه من جوه السجن بس ناطـقـه
والـنــواصـب تالي سمو چـبــدتــه
الله يلـعــن مـــن ظـلــم آل الـنـبــي
والله يلعــن كــل حـقـود ونــاصبـي
الطاغي مــايگــدر يشـوه مذهـبـي
وعالمذاهـب مذهبي اتشع صورته
الشاعر السيد رياض الرسل الجابري
زينب (ع)
على زينب تنوح وتبچي الگلوب
من حگنه ننوح بهل مسيه
شعبت بس هضم ما شبعت اتعيش
قليل الشافته بالغاضريه
سلمت للقدر وبحضن الاحزان
عفيه اعليها ماتحمل أبيه
شلون تعيش ما وياها عباس
ماتت بعد ماشبعت اذيه
ابوذيتين
يربي كل حوايجنه يسرها
بحق زينب الماشافت يسرها
بفگد اخوتها متحملت يسرها
گضت بالشام بت حامي الحميه
زينب من علم حيدر علمها
گلبها اتموت بي حست علمها
زينب طاحت بطيحت علمها
الطاح اعله النهر بالغاضريه
الشاعر السيد رياض الرسل الجابري
ولادة الجواد قصيده (ع)
الليله محتفله السماء
لبن سيد الاوصياء
1
للأمام التاسع انخط الحروف
بالولاده الليله عالمرقد نطوف
ياجواد انصيح وبرغم الضروف
نحتفل هالليله وبعينك تشوف
نخط هالليله الولاء
لبن سيد الاوصياء
2
نكتب آيات الولاء الحضرتك
بالولاده اليوم وترف رايتك
يالجواد بنص گلبنه امحبتك
ولله نسجد من نقبل عتبتك
بشرف هذا الانتماء
لبن سيد الاوصياء
3
الليله احله ايامنه بتاسع امام
نحتفل ونطش فرحنه عالانام
بوصفه محتارين نحچي ياكلام
بالولاده من الگلب نبعث سلام
نحمل الحب والوفاء
لبن سيد الاوصياء
4
من گلبنه بهل ولاده وهل حنين
نحتفل نبقه على مر السنين
لأن باچر بالحشر النه معين
والجواد انحلفه بسم ام البنين
نعرف بهذا العطاء
لبن سيد الاوصياء
5
نحتفل والفرحه تاخذنه بعيد
بالولاده الليله وانردد نشيد
طلب نطلب يا اعز واشرف وليد
نظره منك يالجواد احنه نريد
نبعث بهذا الرجاء
لبن سيد الاوصياء
6
بكل ولاده الزهره تحضر وبسرور
اتشارك الخدام والفرحه تدور
بالمجالس والمحافل تزهي نور
اتسجل بدفترها كل هذا الحضور
سجلي ياخير النساء
لبن سيد الاوصياء
الشاعر السيد رياض الرسل الجابري
ولادة الامام علي (ع)
اسمع مني اسمع واربط وياي
وشوف الباري چان اشعنده غايات
عله الباري عنده وحاسب حساب
علي من انولد مو عن فراغات
عمد للسمه راد وحتى متطيح
ويثب راد كل هاي المجرات
محمد جاب نوره وعلي وياه
وقسم بيناتهم هاي السموات
علي ايحبه العلي ما اعرف اشگد
مو برقام لا يمكن مسافات
بالقرآن خصه و هو قرآن
انطيك الدليل وبي علامات
جبرائيل من أنزل القرآن
ذني مو سور لا هنه كلمات
گبل ما ينزل القرآن عالناس
جمع من نور وجهه و سوه آيات
مو بس كوثر انطاه ربك اهناك
الانس والجن نطاه حتى النباتات
وامكيفين احنه انصلي وانصوم
كل اعمالنه مخصوصه بالذات
ميصعدن ابد للباري ويگول
علي لازم يوقع عالعبادات
الشاعر السيد رياض الرسل الجابري
هوسات لولادة الامام الجواد (ع)
1
بميلاد الجواد انزفها هالبشره
والمحفل الليله بيكم اشكبره
نحلفك يالجواد الليله بالزهره
تگضيها للحاجه الليله
2
بمشاعرنه اجينه انقيم هالمحفل
محفل للجواد ومحفل امعدل
نتمنه الامام المهدي بي يقبل
ويجازي خدام الزهره
2
بسمك يالجواد الليله محتفلين
يامحله الولاده التسر بيها العين
بميلاك اجينه اليوم مجتمعين
وتشارك الزهره ويانه
الشاعر السيد رياض الرسل الجابري
موال لولادة الزهراء (ع)
جبريل هنه النبي بهل المولد وبـي ---- بشر
من شجرة المصطفى والوجه طيب ---- بشر
بنار وجحيم وصقـر كلمن يمسهـــا ---- بشر
فاطم هــديــــه بشرف للمصطفى و ---- لا لا
نور العرش من اجت هـل عالبشر ---- لا لا
الناس صاحت بــشــر اني صحت ----- لا لا
من نور نزلت تره صدگوني ماهي ---- بشر
الشاعر السيد رياض الرسل الجابري
نزله ام البنين (ع)
رابح الوالاها ام البنين
خاسر العاداها ام البنين
1
للوفيه الطاهره انصب الدمع
هواي تستاهل نكسرلها ضلع
هاي ام الاربعه الما ينفجع
گلبه الها عالاقل خل ينصدع
ربك العلاها ام البنين
خاسر العاداها ام البنين
2
العنده حاجه لا يقصر باللطم
باب للحاجات منها والنعم
مره هيه وقدمت اربع زلم
من تمد چفك الك تختم ختم
الحاجه ماتنساها ام البنين
خاسر العاداها ام البنين
3
حاجتك تگضيها بالمجلس تره
من تناديها بدمع يالطاهره
بكل مجالسها تجيك وحاضره
والك تشفع يالمحب بالاخره
حيدره السماها ام البنين
خاسر العاداها ام البنين
4
لا تقصر بالحضور وياها
فرصه هاي اشعندك وانخاها
اشگد كرامات الجليل انطاها
وباب للحاجه الك خلاها
اطلب وانخاها ام البنين
خاسر العاداها ام البنين
5
الها من تحضر الدمعه ابچيها
تفلح بأولها وبتاليها
بالمجالس انته من ترثيها
عهد لأم الاربعه تنطيها
عهدك انته وياها ام البنين
خاسر العاداها ام البنين
6
اختم بدمعك ونوحك عالشهيد
الطاح فوگ الترب محزوز الوريد
ظل ثلث تيام مرمي اعله الصعيد
وصيح يأم البنين شما تريد
اشعندك وانخاها ام البنين
خاسر العاداها ام البنين
الشاعر السيد رياض الرسل الجابري
شوط كربلائي ام البنين
للعاشت تون وأتنوح وتبجي بنار لهابه
خلصت كل عمرها اتصيح آ يحسين ومصابه
هاي ام البنين اتنوح تنوح وشاب منها الراس
هاي الضحتلها اشبول نادت والوفه مقياس
لو سالم يجيني حسين فدوه ايروحله العباس
تضحي بأربـعه دونه
تضحي الخاطر عيونه
المثلها يصير خي عونه
خادم للحسين يصير ويموت ابحرگت اصوابه
ربـت اربـعــه شـبــان لجـــل حسـيــن ربـتـهـــم
ومن در الوفه الصافي امهـم خـوه رضعـتـهـــم
اليوم الطف لأبنها حسين بدمعها الغالي كبرتهم
عمرها خلصته بعــبــره
وتحس ماوفت امقصره
ابيش اتواجه الــزهــره
وشتقدم عــذر لحسين منه وثـلـة اصحـابـــه
عمرها واربعـة شبان كـلـشي قــدمـتـه لجـلـه
ماوفــت تحس تشعــر قـلـيـل شما تـقـدمـلـــه
القليل القدمته لحسين كـــون اتمنت أيـقـبـلــه
رغم ماهــيـه وفــايــه
تحس امقصره هوايه
تگله الحامل الــرايــه
صير انته عبد لحسين صيــر وخـادم ابـابــه
ومن مرت عليهــا ايام عاشت بالحزن عاشت
مــو للاربعه لحسيــن بدمعهـا وبالحزن ناحت
عاشت خادمه لحسـيــن وماتت خادمه مــاتت
من كثر الهضم والنوح
ماتت وبگلبها جــروح
تنادي يبني يالمـذبـوح
ماحملت فراگ حسين وناره ولوعت غيابه
المثل ام البنين يصير خــالــد لا ابــد مـامــات
ويكرمه آله الكـون وباب يصـيــر للحــاجــات
خل نلطم لجلها اليـوم وننحب نسچب العبرات
نبچيهـا بـألـم حســره
وانحلفها بالــزهــــره
منها انريد بس نظره
خدام الابنها انصـيــر احنه واحنه احبابه
الشاعر السيد رياض الرسل الجابري
قصيده بحق ام البنين
الج هـالليله الـونين
والكلب ذايب حنين
نبجي يا ام البنيـن
ابدمع العيون
كلنه هالليله بــدمــع نبچي سويـه
وابـد منـوفـيــچ احــنــه يالــوفيـه
هــواي قــدمـتـي يحره يــالآبيـــه
ردتي بفعالــچ تجازين الــزچــيـه
الچ هــالـليـلــه نـــون
وكل گلب ضل ممتحن
نبچي يــــا أم الحــزن
بدمع العيون
الچ يا ام البنين شما بچــيـنـــــه
نشعر مقصرين وابدن ماوفـينـه
من تحضرين بمجالس يالحنينـه
انادي كلنه بالدمع عينچ عـليـنه
نظره من عندچ نـريــد
انحلفچ بـدم الشهــيـــد
خادمچ يحچي وسعـيـد
بدمع العيون
الليله يم عـباس كل احنه حضرنــه
انريد من عـنـدچ يمهيوبه آجرنـــه
على امحبـتچ والخدامه احنه كبرنه
وبالمجــالس الچ خلصنــه عمرنه
بكل محبه وعاطفـه
وعن يقين ومعرفه
نبچي يا ام الوفــــه
بدمع العيون
الليله احنه انودعچ بــدمع النـدامه
ونشعر مقصرين احنه بالخــدامـــه
الخادم اليخدم يحس انتي ضمانـــه
ولو طلعنه انريج من عندچ علامه
انريد من عندچ قبول
انتي يا ام الفحــــــول
انحلفچ احنه بالبتول
بدمع العيون
على عناد الناصبي وكل العــــواذل
نبقه نبچي اعليچ احنه بدمع هامل
مــاتــرديــن اليـمــد الآيـــــد سائل
بس يحلفچ يالحبيبه بـأبـو فــاضل
يــابعــد روحي وهـلـي
بيــچ احـنــه نعــتــلـي
انحلفچ بــداعــت علي
بدمع العيون
سفره سويـنــه الچ والگلب لايـج
انريد منچ احــنــه هالليله النتايج
كل گلب يم البنين بشـوگــه هايج
بسم الحسين ونـقـدمهـا الحوايج
يلي ماعـنـدچ ضريح
نشتـكـي لله ونصـيـح
ما يصح الا الصحـيح
بدمع العيون
الشاعر السيد رياض الرسل الجابري
لجل الحسين اضحي بكل حياتي
ما اوفــيـه لحد ساعة مـمـاتي
ابنيني من فديته
احس لاما وفـيـتـه
ما اوفــيـــه لحد ساعة مـمـاتي
من مشه عـني والحــزن يكـبــر
الگلب حسيـت نـاره هـالتـسعــر
لـون شاهــدتـه بـاچـــر الحـيـدر
شعـتــذر مـنــه شلـــون ما اگـدر
شرد اقــدم اذا يسأل جــوابــي
دمعة العين الهى تشرح جوابي
الدمع كله بچيتـه
احس لاماوفـيته
ما اوفــيـــه لحد ساعة مـمـاتي
حسبت يـرجـع من مـشه الـغـالي
حسين ابو السجـاد سـلــوة آمالي
من عگب عـيـنه مـنهــو يبـرالي
يجي ايشاهــدني وينظــر الحـالي
بهـمـي ضليت يشاركني ونيني
انه الضحيت اله بـــأربع بنيني
لون روحي نطيته
احس لاماوفـيـتــه
ما اوفــيـــه لحد ساعة مـمـاتي
اربـــع اولادي ويــا يحـرســــونـه
بيهـم امـــضحـيه فـدوه لعـيـونــه
امــوصـيه اولادي مـايخـلـونـــه
وحـــده ويضـحون بالعـمــر دونـه
لجله ربيت بنيني وكبـرتـهـم
حتى يوفون لبو اليمه انذرتهم
اذا بعمري شريته
احس لاماوفـيـتـه
ما اوفــيـــه لحد ساعة مـمـاتي
ابقه مـنـتــظره والحــزن بــالروح
وعالحسين هناك سيوف اميه اتلوح
فــوگ عـالغــبــره گلي ضل مطروح
الناعي خـبـرنـي ابـنچ ومــذبـــوح
عـنـه اســأل وفــاءً للــــوديــعــه
مـايهــمــني الوگع فوگ الشريعه
اون عمري گضيته
احس لاماوفــيــتــه
ما اوفــيـــه لحد ساعة مـمـاتي
انتـظـر ضليت حــايـــره بــأمـري
وحــدي محــتــاره والــدمع يجـــري
شيسوه من بعده شيسوه كل عـمري
نحــره لــو سـالـم وينگـطـع نحــري
بخدمة حسين لون عـمري خسرته
مايهـمــنــــي وانـه اتشرف خدمته
رغم كل الحچيتـه
احس لاماوفـيـته
ما اوفــيـــه لحد ساعة مـمـاتي