1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
تنزف يداحي الباب من طحت بالمحراب
ماكملتهـا السجـدتـك ياعلي وخضبو شيبتك
مــن طـحـت بالمحـراب
جرحـك والفجـر والسيـف والهامـه
اشسون يـاعـلـي بگـلـوب اليـتـامـه
واحـدهـم عـلـيــك اللـيـل مـيـنـامـــه
من شافـوا أمخـضبـه بـدم العـمامـه
دموع اليتامه تسيل ويمهم يون جبريل
والسيف طر اعمامتك
ياعلي وخضبو شيبتك
من طـحـت بالمحــراب
براسك صار جرحك والجـرح بينه
صار اسنين ينزف ماهـده أونيـنـه
باچـر لو ظهـر ياحـيــدر أعـلـيـنـه
ياخـذ ثـار جـرحك بيـده مهـديـنــه
ياخـذ بأيده الثار ابنك يحامي الجار
اشسويت انتـه لأمـتـك
ياعلي وخضبو شيبتك
من طـحـت بالمـحـراب
على مصابك نون والجـرح مايهـده
وشـدتـنـه يحـيـدر شـده مــن شــده
ينزف باقي جـرحـك مانشف بـعــده
لأن بـاب الصـبـر مـانگــدر انســده
باب الصبر مفتوح ينزف مثلنه جروح
والجرح وسم هـامـتك
ياعلي وخضبو شيبتك
من طـحـت بالمـحـراب
مـن سيـف المـرادي بــالغـدر صـابـك
فـزت لمـن طـحـت تـنـزف بمحـرابـك
كلهـا تـنـوح تـبـچـي وتنحـب ابــابــك
وتحس وسط الگـلب ياحيـدر اصوابك
وتصب دموع العين وتنادي يابو حسين
عـالديـن چانت طيحتك
ياعلي وخضبو شيبتك
من طـحـت بالمـحـراب
چنت تعرف بهل ضربه وچنت تعـلـم
أشـقـه الاشقـيـاء ايخـضـبـك بـالـــدم
أنـتـه اول رجـل بـالهــامــه يــتـوسـم
حـتـى الـديــن بـعــدك يـاعـلي يسـلــم
عينك على الاسلام ياحيدر الضرغام
لن هاي چـانت رادتـك
ياعلي وخضبو شيبتك
من طـحـت بالمـحـراب
الشاعر السيد رياض الرسل الجابري
شوط كربلائي للامام علي (ع)
زينب بالدمع والنوح كعدت يمه تتحسر
تعاين مره للعباس ومره اتعاين الحيدر
حــيــدر يمها ويعــايـــن گــوه يلفظ انفاســه
عرفت راح ابوها اليـوم يودع دنيته وناســه
تعاين طبرته وشافت چبيره الطبره البراســه
لبوهــــا حارت بأمره
چبيره شافــت الطبره
اختنگت زينب بعبـره
المنظر قاسي ياهالناس شلون اتحملت المنظر
زينب گــربــت يمـــــه تشمه گــامــت بصــدره
يبويه اتگله احچي وياي اموتن خاف بالحسره
امشي اعليك اعز الناس الحبيبه فاطمه الزهره
صد يابـــويه حاچيني
وارحم كل دمع عيني
بعــذابي لا تخلـيــني
وحيدر گوه شال الراس ولون الوجه صار اصفر
برفيع الصوت حاچاها يگلها يابعـــد روحي
الكلام وياچ يابويه يـــزينب بلسم جــروحي
وگام يعاين العباس ويگلها كل سبب نوحي
راح الوحـدچ اتضلــيــن
وكلشي بعمرچ اتشوفين
اوصيچ واسمعي زيـــن
المصايب من تشوفيها صيري للصبر مصدر
صد حيدر لعد عباس وگام الروحه يسألها
اي عباس بس عباس لعـد زينب كفو الها
واهــنــا كـلــم العــبــاس وگله انته كافلها
رد عــبـــاس خـــادمهــا
أشحـــده الي يكـلـمــهـا
كون الزهره ترضه امها
اصيرن خادم الزينب وتجازي الزهره بالمحشر
زينب بعد ماعرفت اشوصه بيها واليهــا
گامت تنظر العباس وخلت ايده بيديهــــا
كفو اتگله يبعد اختك وحاشه ماتخليهــا
وزينب تنظر ابدمعـــه
لبوها وگامت اتودعه
ياعباس اريــد انعـــه
زينب تنعه والعباس يمها يبچي واتصور
وهنا ودعت زينب ابوها بــدمعه سچابه
والعباس يمها ينوح ويبچي بنار لهابـــه
حيدر غمض عيونه بأخر لحظة امصابـه
وزينب صاحــت بأحساس
بحضني جيب خلي الراس
وخلي انشمه يـــاعــبــاس
هذا اخــر وداع اليوم بعــد للضيم نتحضر
الشاعر السيد رياض الرسل الجابري
الامام الحسن (ع)
اذنـوبـك لـون كـالجـبـل
وتـريـدهـن يـنـمـحـن
ومن تحس انته بعـسـر
و لو جار بيك الـزمن
اگـصـد الارض النجف
ومن تدخل انته الصحن
بشـبـاچـه اطـلـب طـلب
ويــاك اراهـن رهــن
لا مــا يــردك عـلــي
بـمـيــلاد ابـنـه الحـسن
الما عنده الحسن لا يحچي عن الجود
ولا يطلب بعد ويشيل صينيته
الحسن يفرش عباته من يعزب الضيف
و روحه ايمدها سفره اليدخل البيته
حسن شمس الله ذيچه الماتحدها احدود
مضيفه ايشع هله ايعزب بخاچيته
مقهور اعله حاتم وين حاتم وين
مايوصل عشر حاتم اعزوبيته
اريد من الكرم يالحسن نظره اليوم
بحق كلمن نخاك وانته شافيته
دعائي المولدك ضميته هذا اليوم
دعائي بس الك يالحسن ضميته
الك يعلن ولائه الگلب هذا اليوم
والك يرفع الك يالحسن برقيته
الغيرك ما اوافي عهد يامولاي
بس شخصك الغالي ابدمي وافيته
الشاعر السيد رياض الرسل الجابري
((قصيدة مربع))
لولادة الامام الحسن (ع)
بميلاد الحسن لمن بزغ بدره
نهني احنه الرسول وعلي والزهره
1
هله وميت هله من البدر شافه
ظل محتار لمن شاهد اوصافه
البدر يمه نزل حتى السمه عافه
مذهول البدر ظل حاير بأمره
2
هالليله علينه الحسن هل نوره
سبحانه الجليل الصوره بصوره
درر چنه الحسن والدرر منثوره
نور من العرش سبحانه واشكبره
3
هالليله جماله ايشع ضوه واحساس
الملائك تحسده وشحال گلي الناس
من كل شر اعوذ الليله والوسواس
من عين الحسد من عين كل نظره
4
من بيت الوحي نور الحسن طالع
وبگلب الموالي نوره ظل طابع
نظره الهل حفل من الحسن طامع
بي ادري كريم وينطي للفقره
5
طماعين احنه الليله منعوفه
وكل مخلص حضر متأكد ايشوفه
حلفه بضلع امه ويكرم ضيوفه
واتصوره الحسن من يكرم اتصوره
6
اختم بالتهاني والگلب هايم
واتمنه يربي هالحفل دايم
هنيالك الزهره اتسجلك خادم
بميلاد الحسن واتوقع العتره
الشاعر السيد رياض الرسل الجابري
ميمر لولادة الامام الحسن المحتبى (ع)
يالحسن نورك سيدي مـن أزهر
من جدك ومن أمك ومن حيدر
من نور جـدك يالحسن هــذا النـور
حصنـك بـي رب الجـلاله ومنصور
للشيعه تشفع باچـر النه ومـذخـور
من تـوگـف انصارك بـيـوم المحشر
مـن نــور أمـك نـورك الـربــانـي
يل ما الك واحــد ايشبهــك ثــانــي
مـذهــول نــورك يالحسن خـــلاني
محـتـار بـي سبحـان ربي الصـــور
من نور حـيــدر نـورك الشع ولاح
يالحسن هــالـيــله وتعـم الأفـــراح
كل گلب اليحـبـك الـك بالحب صاح
هنياله كـلـمـن يجي الليله ويحـضر
شع نورك بأفـق السمه عـالاكـوان
منهل محبه وعاش وسط الوجدان
المايحضر الليله ويبــارك خسران
ومـن نــور نـورك ياخـذ ويتـعـطـر
هنياله كلمن يحضر بخير اليوم
ريت الفرح ياسيدي الليله ايدوم
بسم الحسن يفرح الليله المهموم
وريت الفرح هاليوم بالحب يكبر
الشاعر السيد رياض الرسل الجابري
ابو طالب جديد
يابو طالب عشت مابين القمم
الدنيه كلها ساريه وانته العلم
عشت قمه ومفخره
يكفي والد حيدره
الدنيه كلها ساريه وانته العلم
1
انگلب التاريخ لازم ونقره احنه انطالعه
بين تاريخ المزور والحقيقه الساطعه
اقرينه تاريخك مشرف والله شخصك رافعه
كرمك وانطاك ربك ولد قمه اربعه
جعفر وطالب عقيل ومعتلي
اتلاثه ذوله وابنك الرابع علي
الدين انته ومصدره
يكفي والد حيدره
الدنيه كلها ساريه وانته العلم
2
نقره بحروف العقيده ونترك اوهام الظلاله
شلونك تاريخك مزيف يكتب ابلايه عداله
وانته عمرك فنه وخلص من اجل وحي الرساله
صعب عنك گدر يحجب كل نضالك والبساله
تبقه ثار وشوكه تعمي الناصبي
الله رادك انته تتكفل نبي
مو مهم المادره
يكفي والد حيدره
الدنيه كلها ساريه وانته العلم
3
اتكفلت انته النبوه ودافعت عنها بحياتك
بزمن چان السيف يحكم ماخفت سطوة ولاتك
دست عالتاريخ قائد وخلدت ذاتك بذاتك
وعشت بين الناس آيه ناصعه وبيضه عباتك
حاولت تسحگ بقايا الانكسار
وتنظر بعين النبوه الازدهار
وتركت چم مأثره
يكفي والد حيدره
الدنيه كلها ساريه وانته العلم
4
شلت ثقل الدين كله تنتظر لحظة رحيلك
واجت هاي اللحظه هسه ابين نار وسهر ليلك
لحظة اموادع حبايب ودعت بيها خليلك
حيدر ابنك والنبوه البيها ضحيت الكفيلك
ودعت دنيه وعشت معنى القيم
ورسمت دمعه على اشفاف الألم
العمر كله ناذره
يكفي والد حيدره
الدنيه كلها ساريه وانته العلم
5
الليله ترحل يابو طالب ترحل ومرفوع راسك
بين صبرك والتسامح وموتك ورقة احساسك
اتموت ثابت عالعقيده بدينك ومبدأ اساسك
عشت ناصر للعداله ومتت بين احضان ناسك
قدمت عمرك لجل دينك ثمن
وأسست وي النبي النه وطن
والمحمد ناصره
يكفي والد حيدره
الدنيه كلها ساريه وانته العلم
الشاعر السيد رياض الرسل الجابري
ابو طالب (ع)
التاريخ اسود ياعلي ما انضفك والشاهد
حاول يشوه سيرتك مايحجي عن الوالد
ما انصفك ياحيدر
لاجن ابــد مايكدر
مايحجي عن الولد
تاريخنه ابيش انكتب
هذا السؤال البي عجب
بأقلام بس مأجوره
حول يشوه صورتك
ويحجب علينه سيرتك
وتضيع ذيچ الصـــــوره
ما انصفك ليش اشعجب
وعن والـــــدك لا ماكتب
ياحــيــدر وانتو الــذهب
والنتو النهــــج دستوره
ضل والدك يالمرتضى عــنوان للحـريـه
والنتو الهوايه ياعلي والناس كلها شويه
التاريخ لمن قــرر
لاچن ابد مايگــدر
مايحچي عن الولد
تاريخنه انباع بثمن
بهذا الزمن وبكل زمن
والوالدك ماراده
لاچن ابوك بهيبته
ضل عالي يا سر هل اته
التاريخ انتــــو اسياده
اعليكم ابـــد محد عله
يا بــاء وسط البسمله
تبقون انتو اعله المله
بكل زمــن انتو القاده
تـاريخـنــه بلمحة بصر تگدر بلحظه اتشطبه
والناس ميته من القهر چي منـولد بالكعـبه
والزمن بيك اتحير
لاچن ابد مايگــدر
مايحچي عن الولد
التاريخ خلي نسئله
ونذكره احنه بمسئله
ياحيدر ونتباها
يسمعني خلي الناصبي
ياهو الكفل اشرف نبي
وبروحه ضحه الطه
احچي الالي والمو الي
السواها ياهــو يالولي
بس انته ياحيـدر علي
والـــوالــد السواهـــا
صفحات دهري امزوره ياحيدر ومعــروفه
التاريخ خان بوالدك وتخون بيك الكوفه
التاريخ رغم امزور
لاچن ابــــد مايگدر
مايحچي عـن الولد
والدك من ضحه امس
بالتضحيه انطانه درس
وي النبي وماقصر
تاريخنه المابي وفه
يغدر بصهر المصطفى
وبــوالـدك يـاحيدر
ماشرفــك بالمعــرفــه
بالعكس انته اتشرفــه
التاريخ لو عنده وفــه
منـــك يجي ويـتـعــذر
والدك ياحيدر علي ساكن وعايش بينـه
للموت ماننساه ابد خـدامـه واتسمـيـنه
التاريخ خل يتحذر
لاچن ابــــد مايگدر
مايحچي عن الولد
الشاعر السيد رياض الرسل الجابري
ابو طالب (ع)
الليله بدموع نبجي اله ونتحـسر
يرحل اليوم اليوم والد حيـدر
اليوم ابو طالب رحل وانه ابچي بحسره
ايساعد الله حيدره الليله حزنه اشكبــره
على عناد المارضه صحت وبكل عبــره
ابــو طــالـب مارحل بالضمايــر گــبــره
كلنه ويـــاه ابــد مانتحـيـــر
يرحل اليوم اليوم والد حيدر
بكل مواقف للنبي ابــو طالب حاضــر
حامه عنه بكل وكت وبدموع الناظــر
باچر يــدور الزمن يـبـو طالب بـاچــر
ونعرف احنه بالحشر منو اليطلع كافر
كافــر شلون وهوه هوه المصدر
يرحل اليــوم الـيــوم والـــد حيدر
انته قمه اعله القمم وانته جاهـك عالي
بروحي ساكن للابد واغله من كل غالي
بصوت صحت وماخفت لا ابــد مابــالي
بروحي واليته وصحت غيره لا ماوالي
بروحي واليت وعنه ما اتعـــذر
يرحل اليـــــوم اليوم والد حيدر
الغيرك انته كل عـهــد لا ابـــد ما رفـعـه
عهد وقـعــتــه الــك وبــدمايه اموقــعــه
روحي ناذرها وصحت واقسمت بالسبعه
غــيــر دربك سيدي لا ابـــد ماتــبــعــــه
الليله مهموم بدمعي جيت وحاضر
يرحل اليــوم اليوم والــد حـيـــدر
على عناد المايحب شخصك وميريـده
صحت باچــر بالحشر انه الــزم أيــده
ابو طالب والحچي احچي بس ماعيده
المايحبـك سيدي كل عمل مـيـفــيــــده
امسجل هناك بالحشر بالدفتـر
يرحل اليـــوم اليوم والد حيدر
الشاعر السيد رياض الرسل الجابري
قصيده بحق ابو طالب (ع) وفاته 7 رمضان
حتى ماتشعر وحيد يا امامي ومذهبي
ياعلي من راح ابوك عوضك الله بنبـي
ياسراط المستقـيــم
حتى ماتشعر يتيم
عوضك الله بنبي
الليله تبدي رحلت هموم المصايب
ياعلي وصبرك تكظمه وما تعـاتـب
عالجرح تصبر وابوك الليله غايب
ياهـو ليعــوض مكانـك يـبـو طالب
ياعلي بغـيـبـت ابــوك اتفكـر انته ياتره
ولازم الله بهل مصاب يعوضك ياحيدره
انطاك جنات ونعيم
حتى ماتشعــر يتيم
عوضك الله بنبي
ابـو طالب دنيه چان بكل حنانه
راح منك ياعلي وخـالي مكانـه
چان ازهد رجل في عالم زمانه
وكتبت الاقلام عنه بكل خيانــه
ابو طالب عنده جاه ماكو داعي انوصفه
لان والـد علي چان هـالكـتـب ما تنصفـه
جاه ابوك اشگد عظيم
حـتى ما تشعــر يتيــم
عوضك الله بنبي
راد الله يعـوضك ياعـلـي بــوالــد
بأخـتـيـاره ياعلي وبارينه رايــد
كون افـضـل منك وعابـد وزاهــد
مالگه بهل دنيه كلها غـيـر واحـد
ياهو ليعوض مكان والدك حيدر منو
بس محمدنه نطاك بمنزلت اخ وابو
عوضك ربنه الرحيم
حـتى ماتشعـر يتـيـم
عوضك الله بنبي
عوضك الله بمحمد وبمقامــه
والتقن دور النبوه والامامــه
لان انته والنبي نفس العلامه
صرتو ياحيدر تحبون اليتامه
جـربــت دور اليتيـم الله الله يســاعـــدك
للنبي اتشوفه اخوك اتشوفه مره والدك
وياك چان اشگد كريم
حـتى ماتشعــــر يتـيـم
عوضك الله بنبي
صعبه لحظات الموادع والاخيره
وچنت محتار النظــر المن تديره
بين ابوك وابن عـمـك والمسيره
قـررت تصبح لأبن عـمـك وزيره
بالدمع تــدفـن ابـوك ياعلي بهــذا الوضع
وعوضك الله بكـريم مسح من عينك دمع
وبمحبته من تهــيــم
حـتى ماتشعـر يتـيـم
عوضك الله بنبي
الشاعر السيد رياض الرسل الجابري
هوسات لولادة السيده رقيه
على طاري الفرح هالليله فرحانين
بالميلاد والفرحه تسر العين
خل انهوس ابميلاد بنت احسين
تستاهل الليله الهوسه
2
حسين اليوم بالميلاد ياهل ناس
سوه اسوايه بس بعاطفه واحساس
حمل بنته رقيه وجابها العباس
واحضنها عباس بصدره
3
رقيه تنظر العباس وتشوفه
گمر ينظر گمر واتمنت اتطوفه
كافلها تعرفها وتنظر اچفوفه
تعرفها چفين الغيره
الشاعر السيد رياض الرسل الجابري
(8) هوسات خاليه من حرف الالف للامام الحسين (ع)
1
قسم نقسم قسم يحسين للزهره
نحبك عن عقيده وجوهر وفكره
كل معشوگ لجلك لون تختبره
(يرخصلك نحره وچفينه)
2
من حُبك نحب دنيتنه ونحبك
ونسير بنهجك بخطوتك وبدربك
بنص گلبك تظمنه وشعظم گلبك
(يحسين وحبك جننه)
3
يمدوخ حرف عبدك بص حرفك
نلگه عيون تبچي بنحرك ونزفك
تشرف كل حرف ينكتب ميشرفك
(يمشرف كل حرف بدمك)
4
عهد نكتبلك بدمنه ونوقعلك
نعرف لو نفكر نتركك نهلك
كلشي بهل عمر يحسين يرخصلك
(وقعنه بدمنه ومنعوفك)
5
شرفنه وكل عمرنه رهن چفينك
ونضحي بروحنه فدوه لجل عينك
وينك يل نحبك ننشدك وينك
(يحسين ومكتوف بدمنه)
6
عشت بينه جرح سچه وحلم معبر
طريق وتضحيه وقصة عشگ منحر
نحرك يبقه نحرك نهر من كوثر
(ينزف يحسين ويروينه)
7
قدمنه عمرنه فدوه لعيونك
وكل معشوگ لجلك صبح مجنونك
ليش بخيلهم بل طف يسحگونك
(ويعرفون بصدرك مصحف)
8
صدرك مو صدر مصحف ويتلونه
مصحف من نحر ينزف ويدرونه
مجبورين من يحسين يقرونه
(مصحف للجنه ويهدينه)
الشاعر السيد رياض الرسل الجابري
ولادة الحجه (عج)
ليلة نصف شعبان
مهدينه انولد
وأمعيده الاكوان
مهدينه انولد
هالليله اعظم ليله والنور انبثق
والباطل ابميلاده هالليله زهق
ليلة نصف شعبان
مهدينه انولد
1
ليلة نصف شعبان للعالم درس
من عدها ناخذ موعضه احنه ونقتبس
نصرخ بعالي الصوت مانحچي بهمس
مهدينا اشرق نوره احله من الشمس
ونادي عالكونين
مهدينه انولد
مولود يملي العين
مهدينه انولد
قد جاءَ ردد مهدي اول مانطق
والباطل ابميلاده هالليله زهق
ليلة نصف شعبان
مهدينه انولد
2
هالليله ليلة فرحه والكون ازدهر
بيها انولد عزنه وشرفنه المنتظر
نادينه ننتظرك يبن فارس مضر
كل احنه عطشانين وچفوفك نهر
وانادي يازهراء
مهدينه انولد
بشعبان ابو الالاء
مهدينه انولد
وبنوره هل عالدنيه مهدينه شرق
والباطل ابميلاده هالليله زهق
ليلة نصف شعبان
مهدينه انولد
3
نرجس وجها بالولاده مبتشر
اشرق عليها النور من بعد الصبر
الهاي الولاده الكون كله ينتظر
من بزغ نوره المهدي كله ينث عطر
والسمه نادت صوت
مهدينه انولد
وامگمط بياقوت
مهدينه انولد
واتحرسه سورة فاطر الطور وفلق
والباطل ابميلاده هالليله زهق
ليلة نصف شعبان
مهدينه انولد
4
من جبهت المولود شع نور وجلي
من العرش هالنور من طه وعلي
ارد انه اصيح وخلي يسمع عاذلي
اسمعني زين اسمعني وافهم مايلي
عالظالم وعالجور
مهدينه انولد
ولدينه والدستور
مهدينه انولد
وبسيرة العتره ونهجهم التحق
والباطل ابميلاده هالليله زهق
ليلة نصف شعبان
مهدينه انولد
5
اختم كلامي و ارد احلفه بالعرج
للباري تشملنه بعطف يبن الحجج
هالليله ميلادك وكل احنه بحرج
لا تنسه خدامك التدعي بالفرج
هاليوم اعظم يوم
مهدينه انولد
ولأجل كل محروم
مهدينه انولد
يمليها عدل الدنيه ولهذا انخلق
والباطل ابميلاده هالليله زهق
ليلة نصف شعبان
مهدينه انولد
الشاعر السيد رياض الرسل الجابري
مقطع من قصيدة دعاء زمن الغيبه
---------------
عرفني اعله نفسك يا آله الكون
حتى اعرف رسولك واحس تلگيني
واذا ما عرفتني بنفسك اني احتار
ما اعرف رسولك دمعتي بعيني
واذا اجهل رسولك سيدي ومولاي
اضيع اني اضيع بهاي تدريني
وعرفني اعله حجتك حتى اعيش بخير
واذا اجهل الحجه يضيع كل ديني
ميتت جاهليه شلون اموت شلون
دخيلك يا آلهي لا تخليني
مثل ما انته گلبي اهديته درب الخير
الولاة امرك اريدك انته تهديني
---------------------------
أَللّهمَّ عرِّفْنِي نَفْسَكَ، فَإِنَّكَ إِنْ لَمْ تُعَرِّفْنِي نَفْسَكَ لَمْ أَعْرِفْ رَسُولَكَ، أَللّهمَّ عَرِّفْنِي رَسُولَكَ فَإِنَّكَ إِنْ لَمْ تُعَرِّفْنِي رَسُولَكَ لَمْ أَعْرِفْ حُجَّتَكَ، أَللّهمَّ عَرِّفْنِي حُجَّتَكَ فَإِنَّكَ إِنْ لَمْ تُعَرِّفْنِي حُجَّتَكَ ضَلَلْتُ عَنْ دِينِي، أَللّهمَّ لاَ تُمِتْنِي مِيتَةً جَاهِلِيَّةً، وَلاَ تُزِغْ قَلْبِي بَعْدَ إِذْ هَدَيْتَنِي، أَللّهمَّ فَكَمَا هَدَيْتَنِي لِوَلاَيَةِ مَنْ فَرَضْتَ عَلَيَّ طَاعَتَهُ مِنْ وُلاَةَ أَمْرِكَ بَعْدَ رَسُولِكَ صَلَوَاتُكَ عَلَيْهِ وَآلِهِ
خادمكم
الشاعر السيد رياض الرسل الجابري
ومضه
مشه زايـر يـزور الكـربـلـه عـنــاي
شايل بيده رايــه وكـاصد الحـضـره
يمشي وي الجموع بنصف من شعبان
كاصد ممشه رايح ماركب مهره
يمشي براحه مره ومره يمشي بحيل
ويگعـد مره ينظر عـيـنه عالفـقـره
يصد رايات يمه وكلها تمشي وياه
يشاهدها ويشوف الملحمه الكبره
وصل ممشه وصل بس راح للعباس
شايل بيده رايه ومحد ينظره
زار وطلع ممشه وراح يم حسين
زاره وشم ضريحه وگلبه چالجمره
ولن صوت بضريح حسين صاح اعليه
وينك يبني وينك انه منتظره
امك انه يالمهدي واجيت اليوم
مثلك هم ازور حسيـن وبعـبـره
ابارك مولدك يالمهدي هذا اليوم
وسجلها اجـتــك امـك الـزهـره
الشاعر السيد رياض الرسل الجابري
((دولة الحق))
بدولة الحق يابشر
الف هنياله الحضر
من علامات الظهور
العالم ايلف ويدور
الدنيه حتى اتشوف نور
ايموت ثلثين البشر
وثلث واحد بالخلود
ينجو من هذا الوجود
والعدل كله يسود
ويظهر النه المنتظر
بعد ميقل الوفاء
الناس يعصفها الوباء
ويعم بالدنيه البلاء
بمرض طاعون وخطر
قله قله المؤمنين
وتالي حال المذنبين
بأمر رب العالمين
ايصير مئواهم سقر
هم عقوبه وهم جزاء
يشمل العالم فناء
اعليهم ايشح الدواء
وين تالي المستقر
ذاك من ذاك السليم
والف هنياله اليقيم
بدولة الحق والنعيم
مكرمه اينول وظفر
من بعد ثلث البقاء
وبعد كل ذاك العناء
صوت يهتف بالسماء
المهدي عالعالم ظهر
يصير عالمنه جديد
لحد مايضهر اكيد
الدنيه كلها اتصير عيد
بدولته المهدي الآغر
الشاعر السيد رياض الرسل الجابري
صوت من السمه كبر دم طاهر نزف حيدر
بالمحراب من انصاب
دم طاهر نزف حيدر
صوت من السماء يصيح وكل العالم ايسمعه
راح الطبق الاسلام بدينه ومنهجه وشرعـــه
وأملاك بسماهـا تنوح وجبريـــل بحزن ينعه
أتهدمت للهدايه أركان والكون أختلف وضعه
حضن محرابه لمن طاح
وبصوت الهـدايه وصاح
فزت والله لچن وياه
دم طاهر نـزف حيدر
من طاح ونزف دمه حيــدر ما رجـف گـلـبـه
بكل ايمانه لمن طاح بمحــرابه حـمــد ربـه
المؤمن دربه هذا يصير وحيدر شرفه الدربه
وصار بكل شرف للدين غايه ومنهج وكعـبه
غـايـة حـيــدر الـقــرآن
ويرضي بغايته الرحمن
علنها وصاح لجن من طاح
دم طاهر نـزف حيدر
بنص محرابه ظل ينزف وأملاك السمه نزلت
أتوضت بالدمه الاملاك من هالفاجعـه وصلت
عـرفـت فــاجعه بالكون من طاح الولي حلت
وداع العاشك الـولهـان ودعـت حيدر وهـلـت
دمعات الحــزن دمعات
من هالفاجعه وجمرات
عـلـيه ناحـت بحـزن صاحت
دم طاهـر نزف حيدر
جــرحه اللي نــزف للــديــن وللعالم رسـم أحلام
من هــذا الجــرح ثـبــت حجه وشـيــد الاســلام
شجاع وبالوصف معروف فارس بالوغه ومقدام
كلهن ذني يـم حـيـدر يضـعــف لـو سمـع أيــتــام
اتنادي وتگصد بهمه
وتـركض تـنجمع يمه
لچـن ياحـيـف غـدر بـالسيـف
دم طاهـر نزف حيدر
بــالمحــراب لمـن طــاح ربــك خـلـده وعـلاه
مــا واحــد مثل حيدر الباري هـالكـرامه انطاه
نور من الجلـيــل النـور سبحان الــذي ســواه
من دمه رســــم عـنـوان خطه وللمحب خــلاه
خـطـه بكل گلب وبعـيـن
وظل خالد ابو الحسنين
نظـل خـدام ولجـل لسلام
دم طاهـر نزف حيدر
الشاعر السيد رياض الرسل الجابري
حوار بين الامام علي وابنته زينب (ع)
ليلة واحـد وعشرين زينب يهل مدمعـها
نادت بـويـه يـابويه وحيدر يمها يسمعها
تگله بحـيـره وبـلـوعــــه لبـوهـا بـنار لـوعـتـهــا
يريت الجـرح البـراســـك بـراسي وتجـر ونـتهـــا
حضنها حـيـدر لـزيـنـــب وكـفـكـف بيده دمعـتهــا
حيـدر حيل من ضمهــــا
ابـوهـا وحگـه لو شمهـا
وتـذكر كـسر ضلع امـهـا
من عـصروها خلف الباب وگام الطـاغي يدفعـهـا
*******
وگامـت زيـنــب تنـشــده يبويه اخبرني عن حالي
اريد اعرف شراح يصير يبويـه وشنهـي يجـرالـي
انــه مخــدرة حــيـــــــدر واخـوتـي ويــاي تبـرالي
شراح يصيـر وشيجره
گلبي اختنگ بالعـبــره
احـلـفـك انـه بالـزهـره
جـاوبـنـي اريــد الـروح الـتـلهـب نــار اقـنـعــهـا
***********
جاوبـهـا ابـوهــا وگــال ودمعاتـه بـوسط عـيـنــه
اريـــد الـتـسـمعـيه مني كل الحـچي تحـفـظـيــنــه
المايخطـر الـچ عـالبـال يـبويـه انتي تـشـوفـيـنـه
راح الكـربـله تـمـشيـن
بـس الـوحـدچ تـبـقـيـن
بلا والي وبلاي معـيـن
وهـنـا سكـت مـاكـمـــل وگام الغـصص يـجـرعـها
وهـنــا نـشـدتـه زيـنـب اخـوتي وگـرت عـيـوني
اذا مهـيـوبـه بحـمـاهـم امشـي مـايـعــوفـــونــي
وحدي بلاي والي شلـون معـقــولـه يـخــــلــــوني
امشي بهـيبه بيـن الناس
واطلع رافعـه اني الراس
بكـفـيـلي والنعـم عـبـاس
وادري غـيـر ابـو فاضل الـزيـنـب مايـطـلـعــهــا
******************
گلهـــا حسـيـن يـازيـنـب يطـيـح ودامي عـالغـبـره
جـثـه امسلـبـه ابلا راس وخـيـل تهـشـم بصـــدره
واخوچ الكافـلچ عـبـاس چـفـوفـه يطيحـن بكـتـره
يطيح امصوب بعـيـنــه
ومنه اتطيـح چـفـيـنـــه
وتضل تتنطـره اسكيـنه
وانتي اميسـره ترحـيـن هـاي القـصه واقـعـهـــا
الشاعر السيد رياض الريل الجابري
ولادة الحسن (ع)
نورك اهلال على اشفاف الكرامه
رسم شلال تهاني بأبتسامه
والدنيه مسروره
بالحسن وبنوره
رسم شلال تهاني بأبتسامه
1
هالليله حيدر اعلن البشره
واعله الفرح معتلي
فرحان حيدر من بعد صبره
خل يستمع عاذلي
هنياله كل واحد على الفطره
بحب الحسن مبتلي
بالحفله نعلن فرحة الزهره
ونهني حيدر علي
بهاي الاقوال نسد حلگ الملامه
يشرح الحال گلبنه وكل هيامه
وانوضح الصوره
بالحسن وبنوره
رسم شلال تهاني بأبتسامه
2
نرسم فرحنه بالسمه العالي
بيوم الحسن مولده
بخمصطعش رمضان للغالي
هذا الحفل موعده
هنيالك انته واني هنيالي
للعهد وانجدده
والباري ندري بالحشر تالي
للحضر ايسدده
من الاهوال يحصنك والسلامه
وراحة البال تحصل بالقيامه
وبجنة اقصوره
بالحسن وبنوره
رسم شلال تهاني بأبتسامه
3
بالأفق فرحه بمولده انشاهد
نور ويهل من ظهر
حتى الملائك بالسمه اتعايد
من سمعت بهل خبر
لمن نزل فوگ الارض ساجد
مو مثل هاي البشر
نرسل تهاني وبگلب واحد
للغايب المنتظر
حتى لو طال نظل نسمع كلامه
نترس اسلال تهاني والعلامه
خدامه مأجوره
بالحسن وبنوره
رسم شلال تهاني بأبتسامه
4
اختم كلامي والگلب هايم
واتوسل بهل حفل
ارد انه احلفك سيدي بفاطم
كون العمل ينقبل
هذا عملنه متصل دايم
وياك حلقة وصل
هنياله كلمن للحسن خادم
اليوم الحشر متصل
والنبي گال قعوده وبقيامه
مثل الجبال يشرفها الامامه
والدنيه معموره
بالحسن وبنوره
رسم شلال تهاني بأبتسامه
الشاعر السيد رياض الرسل الجابري
هوسات الحسن ع
1
الكريم اني الزكي والسبط اسمائي
وكل الناس تعرف كرم انبائي
سمعت اني سمعت بحاتم الطائي
حاتم مايحضر
يمي ولا يگدر
ايشوف ويتعذر
حيدر منطيني
وانطيت حسيني
والتارس عيني
والتارس عيني شايل بخت الزهره
2
صيتك يالحسن بالكرم مامحدود
وياك انولد معنى الكرم والزود
ماشفنه ابد مثلك بروحه ايجود
مثلك ماشفنه
احنه ولعرفنه
بالجود اكشفنه
جودك ماصاير
والشافك حاير
وامضيفك عامر
وامضيفك عامر دوم وفاتح بابه
3
الحسن من انولد خط بيده عالحيطان
انه راعي الكرم والجود والبرهان
مضيفي ما اسده امشرعه البيبان
ماقصر مره
الخطاري بنضره
احلف بالزهره
بخدمة احبابي
الوصلو لعتابي
لا ما سد بابي
لا ماسد بابي بروحي اكرم خطاري
الشاعر السيد رياض الرسل الجابري
ولادة الامام الحسن المجتبى (ع)
أبحر الخير والجود ---- الليله الحسن مولود
انهـني النـبـي وآله ---- من نور الجــلاله
الليله الحسن مولود
*************
نـرفـع للنـبــي ازكى التهــانــي
ونرسم بالفـرح احـلـى الاماني
هـاليـله انـولـد كـوكــب الثـاني
بنوره امـنــور بأعـله الجـناني
مـيـلاد العـداله ---- من نور الجلاله
الليله الحسن مولود
**************
نهني المرتضى حـيـدر عـلينه
بغـرة طـلـعـتــه وغــرة جبينه
ضوه بنوره كل نور المـديـنــه
وشع شع بالفرح من هل علينه
كل ثوبه وفصاله ---- من نور الجلاله
الليله الحسن مولود
***********
نهني فاطمه بعـزهـا وضناهـا
من اشرق عـليها ومن اجاهـا
نور الحسن للزهـره احتـواها
من شاهدها واحـتار بضواهـا
كل نوره وكماله ---- من نور الجلاله
الليله الحسن مولود
***********
نهني العـتـره وبهاي الولاده
بنور الحسن يامحله السعاده
ربــك خـلـده بجــود و أراده
وبيهن نصر حـقـق بالقـيـاده
كل هذا اتصاله ---- من نور الجلاله
الليله الحسن مولود
************
الشاعر السيد رياض الرسل الجابري
عگيلي ابو طالب
هالليله انون ياوالينه
وانواسي بفگدك مهدينه
1
بسابع من رمضان انودعك
ربك قرر راد يرفع
وياك وللموت انتبعك
وامسلمين احنه البارينه
2
ياكافل طه بهل دمعه
نحضر هالليله احنه وننعه
كلمن ناده بصوت اتسمعه
يا والدنه وعايش بينه
3
خدامك يل ماتنسانه
وبأيدك رف عالي الوانه
بيك انحس عايش ويانه
وبأسمك احنه اتسمينه
4
تتكفلنه وهاي الغايه
يا راية عز واشرف رايه
بخيرك وامغرگنه اهوايه
وانعيش بخيرك خلينه
5
تدرينه انحبك عالفطره
بحيدر وانحلفك وبالزهره
للمجلس والحاضر نظره
هالليله الخادم گر عينه
6
نختمها بدمعه ومن نبدي
بينه الحادي بلوعه ويحدي
بيك انواسي الليله المهدي
ويمك اولنا وتالينه
الشاعر السيد رياض الرسل الجابري
موشح بحق ابو طالب وخديجه
عليهم السلام
الليله حزنان النبي ابدمعه ويون
شلون عام ايمر عليه عام الحزن
مثــل هذا العام مامــر مستحيل
عالرسول وشاب شعره والدليل
ابــــو طالب چان اله اب وكفيل
والرسول ايحس اله چان الابن
ابو طالب حامه عن اشرف نبي
حـتى بـالشـــر مايمسه الاجنبي
مخلص الـديـنـه آبي ونعم الآبي
وذني لازم للبشــــر يـتــوضحن
والنبي بعام الحزن هـل دمعـتـه
لأعظم اثنين بحياتــه ودنـيـتـــه
ابو طالب والخــديـجــه مهجـته
والمثلهم حـگـه يشتــاگ ويحن
مدري ينعه عالكفيل بهل مصاب
لو على الخلصت عمرها بالعذاب
والخديجه النبي يشعر گلبـه ذاب
وحگه من يحزن وگـلبـه ينسحن
ياخديجه ينـادي ودمـوعه دمه
لان تستاهل بچـت حتى السمه
ياخديجـه شحـال بنـتـچ فـاطمه
اتمنت وياهـا بگـبـرها تـنـدفـن
ياخديجه ينادي محتار اشيگول
وحاير اشيحچي ويعاين للبتول
الليله الله ايساعده گلب الرسول
الليله بالاحـزان گـلـبــه مرتهن
خلي نتوجه الليله بهـل مـقــــام
وخل ننادي العجل مولاي الامام
يمته يوم الفرج بس بيا كـــــلام
بالدعاء وانصيح كل احنه بسجن
الشاعر السيد رياض الرسل الجابري
ابو طالب (ع) وفاته 7 رمضان
الليله اسألك ياعلي بحالك اشصار
و ابـو طـالب والـدك فـارك الـدار
وانته بالهم مبتلي
شلون حالك ياعلي
و ابـو طالب والدك فارك الدار
الليله اسألك ياعلي بدمع الصبر
شلون لحظات المفارگ من تمر
مشبعت من عنده كل هذا العمر
واخــذ منـك والـدك تالي الگـبـر
هـمـومـك المتنجلي
شلون حالك ياعلي
وابو طالب والدك فارگ الدار
شلون حالك ياعلي ومثلك منـو
فاگد الاب انته واسم الاب حلـو
ابو طالب عافيه ورحمه ودفـو
الدنيه كلها ابد متعوض الابــو
انته والهم مبتلي
شلون حالك ياعلي
وابو طالب والدك فارگ الدار
ابــو طالب والــدك وانـتــه الابــن
وحضن ابوك الدافي مايشبه حضن
الليله من حگك يحيدر مـــن تـون
اليفگـد الاب حگه لـــو حتى يجـن
الليله اسألك يالولي
شلون حالك ياعلي
وابو طالب والدك فارگ الدار
اليفگد الاب يفگد ويــــاه الحنان
وابو طالب دنيه ومعطــر الزمان
ابـــو طالب مـارحـل في كل مكان
بحيدر انشوفه ونحس بيه الامان
واضح واسمه جلي
شلون حالك ياعلي
وابو طالب والدك فارگ الدار
ابو طالب ساكن بنص الضميـر
عاش بالدنيه اميـر ومات اميـر
بسمه كل جنات ربـك والعـبـيـر
يكفي والـد حيدره يعـني چـبـيـر
المثله لازم يعتلي
شلون حالك ياعلي
وابو طالب والدك فارگ الدار
الشاعر السيد رياض الرسل الجابري
قصيده للأمام علي (ع) تجليبه على شكل هوسات تحتوي على اسماء الله الحسنى كلها
اسال الله قبولها :
1
الودود الغني الباعث ربك التواب
المجيد الباسط الخالق الكل اسباب
آله الكون رادك تنزف بمحراب
(ياحيدر ويباهي بدمك)
2
المانع ربك المقسط عليم الحال
القدوس المهيمن والمتين اشگال
حيدر ينطبر والدم يريده وسال
(بالمحراب وينزف دامي)
3
السلام المؤمن الرزاق والجبار
الوهاب المصور عالم الاسرار
من ساق العرش ويعاين الكرار
(من طاح السيف اعله الهامه)
4
الفتاح العزيز البارئ الخافض
اللطيف الرافع الغفار والقابض
اذا قرر قرار اشحده ليعارض
(مشتاگ الحيدر ويريده)
5
المبدئ والشكور النور والرحمن
المقيت العدل اسمه وخالق الاكوان
الحكم والملك هوه وحيدر القرآن
(وبدمه يرتل آياته)
6
الوكيل المحصي والحق الولي الماجد
المتعال الشهيد المذل والشاهد
العلي الكرار راده ينطبر ساجد
(ويباهي بدمه بأكوانه)
7
الضار النافع الواسع كبير الشان
الحفيظ العلي القهار الصبور اشچان
رايد من اراده وانزل القرآن
(يصبح تأويله وتفسيره)
8
المميت المقتدر والعفو المتعالي
الرشيد الوارث المتكبر العالي
حيدر عنده اعز واغله كل غالي
(هو وطه بنفس الرتبه)
9
الواجد والرؤوف الوالي والجامع
القيوم الحكيم بحكمته رافع
علي الكرار الاول ابد مو رابع
(والگايل رابع بجهنم)
10
الهادي المنتقم والآخر الظاهر
المؤخر والحسيب الاول القادر
كلمن مايحبك ياعلي خاسر
(ميشوف الجنه شما صله)
11
المجيب القوي الواحد ذو الجلال البر
الحليم الباطن ايگله العلي ابشر
بيه الما يحبك ياعلي يكفر
(يبشر والنار امتانيته)
12
الخبير الصمد حي ومالك الاملاك
المقدم والبصير أمسخر الافلاك
من نوره وجلاله الباري من سواك
(صاغك ياحيدر وبكيفه)
13
السميع ايظل غفور الهاي كل الناس
الحميد اسمه المعيد وحارس الحراس
قرر ينضرب حيدر بذاك الراس
(المادنگ بس لله براسه)
14
الأحد والبديع اسمه الكريم اهواي
الرحيم ايريده صايم ينطبر مولاي
انطبر حيدر وضجت بالصياح اسماي
(والدين انهدمت اركانه)
15
العظيم الباقي والمحيي الرقيب ارواح
الجليل المغني اسمع حيدره من طاح
وسام براسه طبره ومطمئن من صاح
(فايز صاح ورب الكعبه)
الشاعر السيد رياض الرسل الجابري
ولادة السيده رقيه (ع)
فرحة احساس رقيه بهل قصيده
ترسمها فرحتها
بلحظة ولادتها
فرحة احساس رقيه بهل قصيده
1
ترسم فرحها بحيره واتبعه
مجبوره من الزغر
شافت ابوها وهلت الدمعه
معناها بويه انتظر
لا تشعل الميلادي اي شمعه
كلش قصير العمر
يهمس يروحي الوالد اتسمعه
ودموعه مثل الجمر
ترسم احلام طفولتها الجديده
وتهلها دمعتها
بلحظة ولادتها
فرحة احساس رقيه بهل قصيده
2
حاملها ابوها حسين حاملها
ويخاف من الخطر
والنور يعكس بالافق ظلها
شاف الوجن ماصبر
من خدها ابوها حسين قبلها
من وصل يمها وحضر
والورد يمها وظل يغازلها
لمن عليها نظر
والورد راد يشم خد الوليده
والشمس نادتها
بلحظة ولادتها
فرحة احساس رقيه بهل قصيده
3
طفله رقيه وتشبه الزهره
مولدها غطه الشمس
وحسين ينطر الها وتنظره
والخد شمس من يشع
محفلنه الها الليله وشكبره
والحبها خل يستمع
اليحضر حفلها باچر اتحضره
وهناك ميهل دمع
تحضر اهناك رقيه اي اكيده
تشفع الشيعتها
بلحظة ولادتها
فرحة احساس رقيه بهل قصيده
4
اختم كلامي بهذا مولدها
وبالمحفل انثر ورد
كلمة احبها الليله ارددها
وماريد عنها ابتعد
من عدها رايد اني من عدها
تنظرلي حتى انسعد
اقسم عليها بنحر والدها
تقبلني خادم عبد
بگلبي ياناس تظل هيه الوحيده
نشعلها شمعتها
بلحظة ولادتها
فرحة احساس رقيه بهل قصيده
الشاعر السيد رياض الرسل الجابري
ولادة رقيه
-------------
الليله دمعه وابتسامه
والگلب يفضح غرامه
ياگلب هون عـلـيـه
الليله مولدها رقيه
والگلب يفضح غرامه
-----------------
خل نسولـــف وبهمس
الليله نور من الشمس
صار مولدها
كـل اصـابـعـنـه شمـع
نعـلگ وكلنــه بــدمع
انهني والدها
نطـلـب ابـدمـع اليهـل
كـــون تقبـل بـالحفــل
انريد من عدها
نـورهـا الماينـوصف
والجمال اشگـد ترف
والضوه بخدها
خصهـا باريـنه بكماله
انطاها من نوره وجماله
للحسين اعظم هديه
الليله مولدهـا رقيه
والگلب يفضح غرامه
-------------------
الـهــا بــرقـيـــة وفــه
نكـتـب بكل عــاطفــه
الليه نرفعها
بيها وقـعـنـه العهـــد
وياهــا نبقه للابـــــد
هذا واقعها
شنهدي الها ونرتجي
انجيب ترچيه ونجي
يلا تنفعها
خـفـنـه يمكن تنغـــدر
وخاف بالحفله الشمر
يجي ويگطعها
اشتحمل الطفله العجيبه
ازغيره شافت جم مصيبه
وي الحزن شبت سويه
الليله مولدها رقـيــه
والگلب يفضح غرامه
-------------------
اشگد تـرف خـد الضوه
ايذوب مـن لمسة هـوه
لحظه لو مسها
نور من نــور الــوحي
الگمره گامت تستحي
تجي اتلامسها
بخـــد رقيه الي يشع
نور يــزهي وينجمع
بأمل واهسها
نــزلـت بهيئــة ورد
ابـد لا مـا تنـحـسد
الله حارسها
الله حارسها من العيون
بيها سر الباري مكنون
طفله ما تحمل اذيــه
الليله مولدهــا رقيه
والگلب يفضح غرامه
-------------
بلوعة الحب نعـتنـي
والعـزم مــايـنـثـنـي
للحفل جينه
نحمل ادموع الــوفه
وبينه شوگ الماطفه
من تعـنـينه
الـچ يـانبــع الطهــر
شمي نحمل ياعطـر
ورد بـيـدينه
للحضر والمـاحضر
انحلـفـچ بدم النحر
كلنه سجلينه
جينه يدفعنه هوانه
نظره منج يا رجانه
وذوله خدام الـزجيه
الليله مولدهــا رقيه
والگلب يفضح غرامه
------------------
الشاعر السيد رياض الرسل الجابري
قصيده القائيه للامام المهدي
بي وصه الرسول وصرح اعله الناس
وهذا الخبر سمعوه كلها من ذاعه
بعيون البصيره اتسمعه كل الناس
ماحضر منصه وجاب سماعه
في اخر زمان المهدي ابني يكون
لازم تمتثله واجبه الطاعه
يظهر ابني حتماً والرسول يگول
لو بالدنيه ظلت هاي بس ساعه
محمد عالمله صرح بهذا القول
لتشك بكلامه وتشعر بحيره
صح عقلك ازغير بس كلامه چبير
واليحچيه محمد صعب تفسيره
سيره وخالده ورثها جيل الجيل
ومحمد ظل محمد خالد السيره
انه التابع محمد والاحداث شهود
اعمه من اتبعه وهذا تنظيره
اذا قال محمد قــال رب الكون
من الله محمد هــذا تقـديــره
وينه الي يگول المهدي ماموجود
اگله كل وجودك هذا من خيره
المهدي بكل ضمير يعيش أي موجود
تعال افتح گليبي وشوف تصويره
علمني الصبر والعـفـه والاخلاق
وانطاني الشجاعه الصدق والغيره
خلاني احتـرم اني حقوق الغيـر
يعني النظر هذا بسوء ماديره
بكل خطوه گمت اخطيها احسه وياي
يراقبني واحس بهذا تحذيره
نصيحه الكل ضمير يعيش وبهل كون
يعيد النظـر كون بهذا تفكيـره
يالتسمعني انصحك عوف شكك عوف
وعيد النظر حتى الدربك اتنيره
ولاده اليوم هذا اليوم اعظم يوم
والتابع النهجه ايعرف تدبيره
ولادة خيرنه بالنصف من شعبان
محتار الگلب وبهذا تعبيره
المهدي ينولد ينولد كل الخير
يعني الرحمه هو النزلت اچبيره
صلواعله الرسول بصوت بعله الصوت
للمجلس نريد اليوم تعـطـيــره
مولانـه مولانـه شع نوره مولانـه
هالـيـلـه نــوره يشرح المهجه
وللباري كلنا اللـيـلـه نـتـرجــه
أيتـمـم ظهــور الـقـائـم الحجـه
أعوانـه أعوانـه كل أحنه أعوانـه
هاليله كلنا اللـيـلـه نـنـتـظــره
للبـاري نــدعـي أيعجـل بأمره
بميلاده كون أتصادف البشره
يلگانـه يلگـانـه وفــايــه يلگـانـه
فرحانه هاي الناس محـتـفـله
بساعة قــدومه وبالأمل تعـله
كون اللقاء بمسجــد السهـلـه
بيبانه بيبانه مفتوحه بيبانــه
هاي الجمــوع أتبــارك أتنادي
ويسمع صداها الجبل والوادي
أتهـنـي أبــوك وجــدك الهادي
فرحانه فرحانه هاليله فرحانـه
أبهاي الولاده الكل تجـمعـنــه
واللي يحبنا اللـيـلــه يتبعــنـه
نحـتـفـل كلنا وهـوه يسمعـنـه
ينسانه ينسانه ماضنه ينسانه
الشاعر السيد رياض الرسل الجابري
ولادة علي الاكبر (ع)
انولد هاليوم شبيه النبي الهادي
علي الاكبر ارفعوها الايادي
انولد هاليوم انولد هاليوم
انولد هاليوم شبيه النبي الهادي
1
انولد چنه لؤلؤه والنور ازهر
والگمر يمه نزل شافه وتعطر
بالجمال وبالعذوبه نهر كوثر
العلي الاكبر يشبها بس علي الاكبر
نهر مليان جمال ورقه وحساس
من تشوفه عبالك عمه عباس
انولد هاليوم انولد هاليوم
انولد هاليوم شبيه النبي الهادي
2
نهر اصفه من العسل رقت جماله
من بزغ نوره بأمر رب الجلاله
ارد اوصل يا بشر هاي الرساله
من محمد علي الاكبر كل خصاله
يحچي والصوت محمد من تسمعه
الله منطيه على الشبان رفعه
انولد هاليوم انولد هاليوم
انولد هاليوم شبيه النبي الهادي
3
كرمه الباري ونطا لحسين آيه
وبجبينه يضوي مصباح الهدايه
لأن هيبه من الزغر بالأمر غايه
اگماط ميكفي علي ايگمطوه برايه
امن الزغر چان شديد العزه والباس
علي الاكبر ابد مايشبه الناس
انولد هاليوم انولد هاليوم
انولد هاليوم شبيه النبي الهادي
4
احتفلت الاملاك وبعالي سماها
الزينه والافراح غطاها وكساها
تهتف الاملاك ويردد وراها
صوت من السمه اليوم انولد طه
ردد الصوت محمد يترس العين
علي الاكبر هديه انطا للحسين
انولد هاليوم انولد هاليوم
انولد هاليوم شبيه النبي الهادي
5
اختم الليله فرحتي وبدعائي
لأهل كل بيت النبي دايم ولائي
شما يمر بيه الزمن يبقه انتمائي
حيدري وفاطمي وكربلائي
ابصم اليوم الك يحسين عهدي
وعلى التوقيع يظل شاهد المهدي
انولد هاليوم انولد هاليوم
انولد هاليوم شبيه النبي الهادي
الشاعر السيد رياض الرسل الجابري