1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
نزله للامام علي (ع)
ياحيدر شريتك
وبروحي لگيتك
1
ياحيدر بالدموع احضر بالمجالس
لجلك الطم الراس حيل وعندي واهس
بحزني احضر اليوم اسود ثوبي لابس
ياحيدر ومجنون احضر چني عابس
محبوبي وفديتك
وبروحي لگيتك
2
بالطبره يبو حسين ترحل هالمسيه
وننصبلك بالأحزان هالليله عزيه
لو سألونه شنگول عن حامي الحميه
مات وراسه مطبور سلطان البريه
عنواني هويتك
وبروحي لگيتك
3
طبره براسه ويروح يم عرش الجلاله
هيچ ايطيح ابو حسين عنوان البساله
وزينب تنظر اتشوف حيدر هذا حاله
معقوله علي ايطيح بسيوف الظلاله
يالغالي وفيتك
وبروحي لگيتك
4
زينب تنظر اتشوف متوسد وليها
راسه بوصله معصوب ويعاين عليها
گامت تبچي وتنوح مابطل بچيها
عرفت هاي لحظات واتودع عليها
تتصور نسيتك
وبروحي لگيتك
5
اختملك يبو حسين بدموع المصيبه
وارسم ليلة احزان ياحيدر رهيبه
بالمحراب واتطيح هاي اكبر عجيبه
تنزف دامي مصيوب ومخضبه الشيبه
و توصي وصيتك
وبروحي لگيتك
الشاعر السيد رياض الرسل الجابري
نعي الى جرح الإمام علي (ع)
*************
حـده بصوته يصيح وكـبـر الحـادي
انطبر حيدر يويلي بسيف المـرادي
الحسن وحسين گعدو من أجو يمه
واحـد سند راسه واحــد أيـشـمه
شـافـــو جـرح راسه والـدمـع بالعـيــن
الحسن يبچي يشمه ويمه يبچي حسين
من محـرابه شالـوه والـدمع مدرار
أخـذوه راسه ينـزف وصلوه لـلـدار
زينب شافته وصاحت يبويه اشبيك
يبعـد الـروح احـچـي ياجرح ماذيك
شافت جرح راسه ونظـرت الطبـره
صاحت راح ابويه سمعي يالـزهره
تمسح جرح أبوها وبحظنها الراس
وتنظـر ويـن گامت تنـظـر العـبـاس
اجه يمها أخوهـا الكافـل المهـيـوب
غـدت ويـاه تنحب والـدليـل أيـذوب
ادري انتي أمانـه بشاربي أمودعـه
وينظـر حـيـدر العـبـاس وأيسمـعـه
الشاعر السيد رياض الرسل الجابري
قصيدة علي
دگو بابنه والباب مقفول
يردوك اليتامه بويه شتگول
اطلع لليتامه
بويه امسح الهامه
يردوك اليتامه بويه شتگول
1
ازغار يابويه اليتامه ومايعرفون
جرح البراسك غميج ومايفهمون
كلهم ايصيحون ابونه يعوفنه شلون
اطلعت اسكتهم يبويه ومايسكتون
جابولك لبن يابويه كلهم
اباب الدار بس انته املهم
انطيهم علامه
بويه امسح الهامه
يردوك اليتامه بويه شتگول
2
اطلعت اطمنهم ومحتاره بدمعتين
دمعه عالمطروح ابويه وعالمساكين
واليتامه ابفرد صوت ودمعه بالعين
هاي اول مره يتأخر ابو حسين
ايريد ايشوفنه زينب اسأليه
لبن ويانه جبنه وحتى نسگيه
يدعون بسلامه
بويه امسح الهامه
يردوك اليتامه بويه شتگول
3
رجعت وسألت ابوها بدمع همال
بويه ميصبرون ذوله كلهم اطفال
گلها ما ارضه يشوفوني اعله هالحال
خاف يتأذون گلها والدمع سال
بدموع المصيبه صبر الروح
خي يدخلون بويه واني مطروح
تسمع كل كلامه
بويه امسح الهامه
يردوك اليتامه بويه شتگول
4
دخلو الأيتام يم حيدر يشوفوه
ازغار همه وابد ماگدرو يگعدوه
احتارو شلون اللبن همه يشربوه
للبن ذبوه وگعدو بس يشموه
وحيدر من فرحته نسه الالام
مافكر بحرحه بس بالايتام
يسعدهم مرامه
بويه امسح الهامه
يردوك اليتامه بويه شتگول
5
حضر ملچ الموت لحظات المنيه
والايتام اتنادي بدموع الرزيه
بويه لا تتركنه ياحامي الحميه
انموت كون وياك كل احنه سويه
غمض عينه حيدر سلم امره
وداعاً كلها صاحت يبو الفقره
ضل جرحه وسامه
بويه امسح الهامه
يردوك اليتامه بويه شتگول
الشاعر السيد رياض الرسل الجابري
الليله حزنـانـه وتون حتى السمـه
من طحـت تنزف يحـمـاي الحـمـه
الليله مــدري اشصار بأركان الهـده
اتهـدمت وبطــيحـتــك راحــت ســده
انـتـه حـزنـك يـوصـل الأبـعــد مــده
مـن طحـت الاحـزان بعــدك دايـمــه
اتهـدمـت اركان الهـدايـه بطيحـتـك
لأن يـــاحـيـدر عـجـيـبـه ضربــتــك
من طحت طاحت امخضبه اعمامتك
اعـمـامـتـك والراس متخـضب دمه
طحـت ساجـد ياعـلي بـأشرف مكان
الهـسبب خـالـد بقـيــت بكـل زمــان
ياعـلـي حـبـك هـويـه النـه وضمان
وبـيـك الگـلــوب الـتحـبـك هـايـمـه
طحـت وبسيـف المـرادي يــا لولي
وليش تـدري هـمـومـنـه ماتـنـجلي
اصعــب اتـلاثـه مشـيـتـوا يـاعـلي
المصطـفى وانته مشيـت وفاطـمـه
اليوم نشكي الفاجـعـه الرب المعين
وبـدمـعـنـه انصيح يا حـق يا مبيـن
انصيح كـلـنـه راح اميـر المؤمنين
ومن طحت الاركان كلها امـهـدمـه
عـهـد مـانـنساك لـو جـار الـزمــن
والمصــايـب لـون زادت والـفـتــن
نـبـقـه خـدامـك نـظـل يـا بـالحسـن
وماتهـمـنـه الگـوم هـاي الظالـمه
الشاعر السيد رياض الرسل الجابري
تنزف يداحي الباب من طحت بالمحراب
ماكملتهـا السجـدتـك ياعلي وخضبو شيبتك
مــن طـحـت بالمحـراب
جرحـك والفجـر والسيـف والهامـه
اشسون يـاعـلـي بگـلـوب اليـتـامـه
واحـدهـم عـلـيــك اللـيـل مـيـنـامـــه
من شافـوا أمخـضبـه بـدم العـمامـه
دموع اليتامه تسيل ويمهم يون جبريل
والسيف طر اعمامتك
ياعلي وخضبو شيبتك
من طـحـت بالمحــراب
براسك صار جرحك والجـرح بينه
صار اسنين ينزف ماهـده أونيـنـه
باچـر لو ظهـر ياحـيــدر أعـلـيـنـه
ياخـذ ثـار جـرحك بيـده مهـديـنــه
ياخـذ بأيده الثار ابنك يحامي الجار
اشسويت انتـه لأمـتـك
ياعلي وخضبو شيبتك
من طـحـت بالمـحـراب
على مصابك نون والجـرح مايهـده
وشـدتـنـه يحـيـدر شـده مــن شــده
ينزف باقي جـرحـك مانشف بـعــده
لأن بـاب الصـبـر مـانگــدر انســده
باب الصبر مفتوح ينزف مثلنه جروح
والجرح وسم هـامـتك
ياعلي وخضبو شيبتك
من طـحـت بالمـحـراب
مـن سيـف المـرادي بــالغـدر صـابـك
فـزت لمـن طـحـت تـنـزف بمحـرابـك
كلهـا تـنـوح تـبـچـي وتنحـب ابــابــك
وتحس وسط الگـلب ياحيـدر اصوابك
وتصب دموع العين وتنادي يابو حسين
عـالديـن چانت طيحتك
ياعلي وخضبو شيبتك
من طـحـت بالمـحـراب
چنت تعرف بهل ضربه وچنت تعـلـم
أشـقـه الاشقـيـاء ايخـضـبـك بـالـــدم
أنـتـه اول رجـل بـالهــامــه يــتـوسـم
حـتـى الـديــن بـعــدك يـاعـلي يسـلــم
عينك على الاسلام ياحيدر الضرغام
لن هاي چـانت رادتـك
ياعلي وخضبو شيبتك
من طـحـت بالمـحـراب
الشاعر السيد رياض الرسل الجابري
شوط كربلائي للامام علي (ع)
زينب بالدمع والنوح كعدت يمه تتحسر
تعاين مره للعباس ومره اتعاين الحيدر
حــيــدر يمها ويعــايـــن گــوه يلفظ انفاســه
عرفت راح ابوها اليـوم يودع دنيته وناســه
تعاين طبرته وشافت چبيره الطبره البراســه
لبوهــــا حارت بأمره
چبيره شافــت الطبره
اختنگت زينب بعبـره
المنظر قاسي ياهالناس شلون اتحملت المنظر
زينب گــربــت يمـــــه تشمه گــامــت بصــدره
يبويه اتگله احچي وياي اموتن خاف بالحسره
امشي اعليك اعز الناس الحبيبه فاطمه الزهره
صد يابـــويه حاچيني
وارحم كل دمع عيني
بعــذابي لا تخلـيــني
وحيدر گوه شال الراس ولون الوجه صار اصفر
برفيع الصوت حاچاها يگلها يابعـــد روحي
الكلام وياچ يابويه يـــزينب بلسم جــروحي
وگام يعاين العباس ويگلها كل سبب نوحي
راح الوحـدچ اتضلــيــن
وكلشي بعمرچ اتشوفين
اوصيچ واسمعي زيـــن
المصايب من تشوفيها صيري للصبر مصدر
صد حيدر لعد عباس وگام الروحه يسألها
اي عباس بس عباس لعـد زينب كفو الها
واهــنــا كـلــم العــبــاس وگله انته كافلها
رد عــبـــاس خـــادمهــا
أشحـــده الي يكـلـمــهـا
كون الزهره ترضه امها
اصيرن خادم الزينب وتجازي الزهره بالمحشر
زينب بعد ماعرفت اشوصه بيها واليهــا
گامت تنظر العباس وخلت ايده بيديهــــا
كفو اتگله يبعد اختك وحاشه ماتخليهــا
وزينب تنظر ابدمعـــه
لبوها وگامت اتودعه
ياعباس اريــد انعـــه
زينب تنعه والعباس يمها يبچي واتصور
وهنا ودعت زينب ابوها بــدمعه سچابه
والعباس يمها ينوح ويبچي بنار لهابـــه
حيدر غمض عيونه بأخر لحظة امصابـه
وزينب صاحــت بأحساس
بحضني جيب خلي الراس
وخلي انشمه يـــاعــبــاس
هذا اخــر وداع اليوم بعــد للضيم نتحضر
الشاعر السيد رياض الرسل الجابري
الامام الحسن (ع)
اذنـوبـك لـون كـالجـبـل
وتـريـدهـن يـنـمـحـن
ومن تحس انته بعـسـر
و لو جار بيك الـزمن
اگـصـد الارض النجف
ومن تدخل انته الصحن
بشـبـاچـه اطـلـب طـلب
ويــاك اراهـن رهــن
لا مــا يــردك عـلــي
بـمـيــلاد ابـنـه الحـسن
الما عنده الحسن لا يحچي عن الجود
ولا يطلب بعد ويشيل صينيته
الحسن يفرش عباته من يعزب الضيف
و روحه ايمدها سفره اليدخل البيته
حسن شمس الله ذيچه الماتحدها احدود
مضيفه ايشع هله ايعزب بخاچيته
مقهور اعله حاتم وين حاتم وين
مايوصل عشر حاتم اعزوبيته
اريد من الكرم يالحسن نظره اليوم
بحق كلمن نخاك وانته شافيته
دعائي المولدك ضميته هذا اليوم
دعائي بس الك يالحسن ضميته
الك يعلن ولائه الگلب هذا اليوم
والك يرفع الك يالحسن برقيته
الغيرك ما اوافي عهد يامولاي
بس شخصك الغالي ابدمي وافيته
الشاعر السيد رياض الرسل الجابري
((قصيدة مربع))
لولادة الامام الحسن (ع)
بميلاد الحسن لمن بزغ بدره
نهني احنه الرسول وعلي والزهره
1
هله وميت هله من البدر شافه
ظل محتار لمن شاهد اوصافه
البدر يمه نزل حتى السمه عافه
مذهول البدر ظل حاير بأمره
2
هالليله علينه الحسن هل نوره
سبحانه الجليل الصوره بصوره
درر چنه الحسن والدرر منثوره
نور من العرش سبحانه واشكبره
3
هالليله جماله ايشع ضوه واحساس
الملائك تحسده وشحال گلي الناس
من كل شر اعوذ الليله والوسواس
من عين الحسد من عين كل نظره
4
من بيت الوحي نور الحسن طالع
وبگلب الموالي نوره ظل طابع
نظره الهل حفل من الحسن طامع
بي ادري كريم وينطي للفقره
5
طماعين احنه الليله منعوفه
وكل مخلص حضر متأكد ايشوفه
حلفه بضلع امه ويكرم ضيوفه
واتصوره الحسن من يكرم اتصوره
6
اختم بالتهاني والگلب هايم
واتمنه يربي هالحفل دايم
هنيالك الزهره اتسجلك خادم
بميلاد الحسن واتوقع العتره
الشاعر السيد رياض الرسل الجابري
ميمر لولادة الامام الحسن المحتبى (ع)
يالحسن نورك سيدي مـن أزهر
من جدك ومن أمك ومن حيدر
من نور جـدك يالحسن هــذا النـور
حصنـك بـي رب الجـلاله ومنصور
للشيعه تشفع باچـر النه ومـذخـور
من تـوگـف انصارك بـيـوم المحشر
مـن نــور أمـك نـورك الـربــانـي
يل ما الك واحــد ايشبهــك ثــانــي
مـذهــول نــورك يالحسن خـــلاني
محـتـار بـي سبحـان ربي الصـــور
من نور حـيــدر نـورك الشع ولاح
يالحسن هــالـيــله وتعـم الأفـــراح
كل گلب اليحـبـك الـك بالحب صاح
هنياله كـلـمـن يجي الليله ويحـضر
شع نورك بأفـق السمه عـالاكـوان
منهل محبه وعاش وسط الوجدان
المايحضر الليله ويبــارك خسران
ومـن نــور نـورك ياخـذ ويتـعـطـر
هنياله كلمن يحضر بخير اليوم
ريت الفرح ياسيدي الليله ايدوم
بسم الحسن يفرح الليله المهموم
وريت الفرح هاليوم بالحب يكبر
الشاعر السيد رياض الرسل الجابري
ابو طالب جديد
يابو طالب عشت مابين القمم
الدنيه كلها ساريه وانته العلم
عشت قمه ومفخره
يكفي والد حيدره
الدنيه كلها ساريه وانته العلم
1
انگلب التاريخ لازم ونقره احنه انطالعه
بين تاريخ المزور والحقيقه الساطعه
اقرينه تاريخك مشرف والله شخصك رافعه
كرمك وانطاك ربك ولد قمه اربعه
جعفر وطالب عقيل ومعتلي
اتلاثه ذوله وابنك الرابع علي
الدين انته ومصدره
يكفي والد حيدره
الدنيه كلها ساريه وانته العلم
2
نقره بحروف العقيده ونترك اوهام الظلاله
شلونك تاريخك مزيف يكتب ابلايه عداله
وانته عمرك فنه وخلص من اجل وحي الرساله
صعب عنك گدر يحجب كل نضالك والبساله
تبقه ثار وشوكه تعمي الناصبي
الله رادك انته تتكفل نبي
مو مهم المادره
يكفي والد حيدره
الدنيه كلها ساريه وانته العلم
3
اتكفلت انته النبوه ودافعت عنها بحياتك
بزمن چان السيف يحكم ماخفت سطوة ولاتك
دست عالتاريخ قائد وخلدت ذاتك بذاتك
وعشت بين الناس آيه ناصعه وبيضه عباتك
حاولت تسحگ بقايا الانكسار
وتنظر بعين النبوه الازدهار
وتركت چم مأثره
يكفي والد حيدره
الدنيه كلها ساريه وانته العلم
4
شلت ثقل الدين كله تنتظر لحظة رحيلك
واجت هاي اللحظه هسه ابين نار وسهر ليلك
لحظة اموادع حبايب ودعت بيها خليلك
حيدر ابنك والنبوه البيها ضحيت الكفيلك
ودعت دنيه وعشت معنى القيم
ورسمت دمعه على اشفاف الألم
العمر كله ناذره
يكفي والد حيدره
الدنيه كلها ساريه وانته العلم
5
الليله ترحل يابو طالب ترحل ومرفوع راسك
بين صبرك والتسامح وموتك ورقة احساسك
اتموت ثابت عالعقيده بدينك ومبدأ اساسك
عشت ناصر للعداله ومتت بين احضان ناسك
قدمت عمرك لجل دينك ثمن
وأسست وي النبي النه وطن
والمحمد ناصره
يكفي والد حيدره
الدنيه كلها ساريه وانته العلم
الشاعر السيد رياض الرسل الجابري
ابو طالب (ع)
التاريخ اسود ياعلي ما انضفك والشاهد
حاول يشوه سيرتك مايحجي عن الوالد
ما انصفك ياحيدر
لاجن ابــد مايكدر
مايحجي عن الولد
تاريخنه ابيش انكتب
هذا السؤال البي عجب
بأقلام بس مأجوره
حول يشوه صورتك
ويحجب علينه سيرتك
وتضيع ذيچ الصـــــوره
ما انصفك ليش اشعجب
وعن والـــــدك لا ماكتب
ياحــيــدر وانتو الــذهب
والنتو النهــــج دستوره
ضل والدك يالمرتضى عــنوان للحـريـه
والنتو الهوايه ياعلي والناس كلها شويه
التاريخ لمن قــرر
لاچن ابد مايگــدر
مايحچي عن الولد
تاريخنه انباع بثمن
بهذا الزمن وبكل زمن
والوالدك ماراده
لاچن ابوك بهيبته
ضل عالي يا سر هل اته
التاريخ انتــــو اسياده
اعليكم ابـــد محد عله
يا بــاء وسط البسمله
تبقون انتو اعله المله
بكل زمــن انتو القاده
تـاريخـنــه بلمحة بصر تگدر بلحظه اتشطبه
والناس ميته من القهر چي منـولد بالكعـبه
والزمن بيك اتحير
لاچن ابد مايگــدر
مايحچي عن الولد
التاريخ خلي نسئله
ونذكره احنه بمسئله
ياحيدر ونتباها
يسمعني خلي الناصبي
ياهو الكفل اشرف نبي
وبروحه ضحه الطه
احچي الالي والمو الي
السواها ياهــو يالولي
بس انته ياحيـدر علي
والـــوالــد السواهـــا
صفحات دهري امزوره ياحيدر ومعــروفه
التاريخ خان بوالدك وتخون بيك الكوفه
التاريخ رغم امزور
لاچن ابــــد مايگدر
مايحچي عـن الولد
والدك من ضحه امس
بالتضحيه انطانه درس
وي النبي وماقصر
تاريخنه المابي وفه
يغدر بصهر المصطفى
وبــوالـدك يـاحيدر
ماشرفــك بالمعــرفــه
بالعكس انته اتشرفــه
التاريخ لو عنده وفــه
منـــك يجي ويـتـعــذر
والدك ياحيدر علي ساكن وعايش بينـه
للموت ماننساه ابد خـدامـه واتسمـيـنه
التاريخ خل يتحذر
لاچن ابــــد مايگدر
مايحچي عن الولد
الشاعر السيد رياض الرسل الجابري
ابو طالب (ع)
الليله بدموع نبجي اله ونتحـسر
يرحل اليوم اليوم والد حيـدر
اليوم ابو طالب رحل وانه ابچي بحسره
ايساعد الله حيدره الليله حزنه اشكبــره
على عناد المارضه صحت وبكل عبــره
ابــو طــالـب مارحل بالضمايــر گــبــره
كلنه ويـــاه ابــد مانتحـيـــر
يرحل اليوم اليوم والد حيدر
بكل مواقف للنبي ابــو طالب حاضــر
حامه عنه بكل وكت وبدموع الناظــر
باچر يــدور الزمن يـبـو طالب بـاچــر
ونعرف احنه بالحشر منو اليطلع كافر
كافــر شلون وهوه هوه المصدر
يرحل اليــوم الـيــوم والـــد حيدر
انته قمه اعله القمم وانته جاهـك عالي
بروحي ساكن للابد واغله من كل غالي
بصوت صحت وماخفت لا ابــد مابــالي
بروحي واليته وصحت غيره لا ماوالي
بروحي واليت وعنه ما اتعـــذر
يرحل اليـــــوم اليوم والد حيدر
الغيرك انته كل عـهــد لا ابـــد ما رفـعـه
عهد وقـعــتــه الــك وبــدمايه اموقــعــه
روحي ناذرها وصحت واقسمت بالسبعه
غــيــر دربك سيدي لا ابـــد ماتــبــعــــه
الليله مهموم بدمعي جيت وحاضر
يرحل اليــوم اليوم والــد حـيـــدر
على عناد المايحب شخصك وميريـده
صحت باچــر بالحشر انه الــزم أيــده
ابو طالب والحچي احچي بس ماعيده
المايحبـك سيدي كل عمل مـيـفــيــــده
امسجل هناك بالحشر بالدفتـر
يرحل اليـــوم اليوم والد حيدر
الشاعر السيد رياض الرسل الجابري
قصيده بحق ابو طالب (ع) وفاته 7 رمضان
حتى ماتشعر وحيد يا امامي ومذهبي
ياعلي من راح ابوك عوضك الله بنبـي
ياسراط المستقـيــم
حتى ماتشعر يتيم
عوضك الله بنبي
الليله تبدي رحلت هموم المصايب
ياعلي وصبرك تكظمه وما تعـاتـب
عالجرح تصبر وابوك الليله غايب
ياهـو ليعــوض مكانـك يـبـو طالب
ياعلي بغـيـبـت ابــوك اتفكـر انته ياتره
ولازم الله بهل مصاب يعوضك ياحيدره
انطاك جنات ونعيم
حتى ماتشعــر يتيم
عوضك الله بنبي
ابـو طالب دنيه چان بكل حنانه
راح منك ياعلي وخـالي مكانـه
چان ازهد رجل في عالم زمانه
وكتبت الاقلام عنه بكل خيانــه
ابو طالب عنده جاه ماكو داعي انوصفه
لان والـد علي چان هـالكـتـب ما تنصفـه
جاه ابوك اشگد عظيم
حـتى ما تشعــر يتيــم
عوضك الله بنبي
راد الله يعـوضك ياعـلـي بــوالــد
بأخـتـيـاره ياعلي وبارينه رايــد
كون افـضـل منك وعابـد وزاهــد
مالگه بهل دنيه كلها غـيـر واحـد
ياهو ليعوض مكان والدك حيدر منو
بس محمدنه نطاك بمنزلت اخ وابو
عوضك ربنه الرحيم
حـتى ماتشعـر يتـيـم
عوضك الله بنبي
عوضك الله بمحمد وبمقامــه
والتقن دور النبوه والامامــه
لان انته والنبي نفس العلامه
صرتو ياحيدر تحبون اليتامه
جـربــت دور اليتيـم الله الله يســاعـــدك
للنبي اتشوفه اخوك اتشوفه مره والدك
وياك چان اشگد كريم
حـتى ماتشعــــر يتـيـم
عوضك الله بنبي
صعبه لحظات الموادع والاخيره
وچنت محتار النظــر المن تديره
بين ابوك وابن عـمـك والمسيره
قـررت تصبح لأبن عـمـك وزيره
بالدمع تــدفـن ابـوك ياعلي بهــذا الوضع
وعوضك الله بكـريم مسح من عينك دمع
وبمحبته من تهــيــم
حـتى ماتشعـر يتـيـم
عوضك الله بنبي
الشاعر السيد رياض الرسل الجابري
هوسات لولادة السيده رقيه
على طاري الفرح هالليله فرحانين
بالميلاد والفرحه تسر العين
خل انهوس ابميلاد بنت احسين
تستاهل الليله الهوسه
2
حسين اليوم بالميلاد ياهل ناس
سوه اسوايه بس بعاطفه واحساس
حمل بنته رقيه وجابها العباس
واحضنها عباس بصدره
3
رقيه تنظر العباس وتشوفه
گمر ينظر گمر واتمنت اتطوفه
كافلها تعرفها وتنظر اچفوفه
تعرفها چفين الغيره
الشاعر السيد رياض الرسل الجابري
(8) هوسات خاليه من حرف الالف للامام الحسين (ع)
1
قسم نقسم قسم يحسين للزهره
نحبك عن عقيده وجوهر وفكره
كل معشوگ لجلك لون تختبره
(يرخصلك نحره وچفينه)
2
من حُبك نحب دنيتنه ونحبك
ونسير بنهجك بخطوتك وبدربك
بنص گلبك تظمنه وشعظم گلبك
(يحسين وحبك جننه)
3
يمدوخ حرف عبدك بص حرفك
نلگه عيون تبچي بنحرك ونزفك
تشرف كل حرف ينكتب ميشرفك
(يمشرف كل حرف بدمك)
4
عهد نكتبلك بدمنه ونوقعلك
نعرف لو نفكر نتركك نهلك
كلشي بهل عمر يحسين يرخصلك
(وقعنه بدمنه ومنعوفك)
5
شرفنه وكل عمرنه رهن چفينك
ونضحي بروحنه فدوه لجل عينك
وينك يل نحبك ننشدك وينك
(يحسين ومكتوف بدمنه)
6
عشت بينه جرح سچه وحلم معبر
طريق وتضحيه وقصة عشگ منحر
نحرك يبقه نحرك نهر من كوثر
(ينزف يحسين ويروينه)
7
قدمنه عمرنه فدوه لعيونك
وكل معشوگ لجلك صبح مجنونك
ليش بخيلهم بل طف يسحگونك
(ويعرفون بصدرك مصحف)
8
صدرك مو صدر مصحف ويتلونه
مصحف من نحر ينزف ويدرونه
مجبورين من يحسين يقرونه
(مصحف للجنه ويهدينه)
الشاعر السيد رياض الرسل الجابري
نعي للامام علي (ع)
حـيـدر منطـرح ماظـن بعـد يصحـه
راسه امعـصبيـه ويلوب من جرحه
مسموم الجـرح والجرح بالـهـامــه
وتبچي اعليه وتنحب كل الايـتـامـه
راد يــوصي حـيدر صاح زينب ويــن
وخل عباس يحضر والحسن وحسين
حيـدر يحچي والعـبـاس ظـل يسمع
يگـلـه بشـاربـك زينب ومـن تطـلـع
امانـه اخـتـك وديـعـه امكلف وبيها
اريــد بـروحـك الـزيـنب تحـاميـهــا
هـاي اخـتـك امـانـه امسلمه وبـيـدك
عـن عـينك تغـيـبـن لحـظـه ماريـدك
ماريـدن يمرهـا الخـوف من بعـدي
وانته امكـلـف بناگـتهـا مـن تحـدي
من ارض المدينه بـاچـر أيطلعـون
أطفال وحـرم للمـوت مـن يرحـون
وزينب من تصيـح الناس ياهو ألها
تصيح انته انــه العـبـاس كـافـلـهــا
أهنا گام ونهض عباس دگ صدره
يگلها بشاربي يـوديـعـت الـزهــره
يـبـويـه أبـشر الـزينب انـه خادمها
صاح وداعـتـك محــد يصل يـمـهــا
الشاعر السيد رياض الرسل الجابري
ياحاكم الگبلك ضحه كل عمره
مشيت وماخذت وياك بس طبره
1
ياحاكم الگبلك عينه لسلامه
والناتح هديه طبره بالهامه
المثلك ياعلي احبابه ايتامه
وماصاحب غني بكل عمره بس فقره
2
ياحاكم الگبلك ثوبه امرگع
وبلايه حمايه چان من يطلع
الگبلك چان حاكم چان مايقنع
وعنده اشگد حمايه تحرسه بقصره
3
ياحاكم الگبلك اسمه ابو الايتام
والمثلك يحيدر چان ابد مينام
ماترضه بدولتك اي شخص ينظام
تنظر على الوادم كلها فد نظره
4
ياحاكم الگبلك مثلك امجاده
وبكل الحروب ايقدم اولاده
عاده القتل عدكم سيدي عاده
بس المهم عندك دينك اتنصره
5
ياحاكم الگبلك اسد وسط الغاب
وبكل المعارك حاضر وماغاب
مثلك كون ياحيدر وقالع باب
لكن مالكينه بكثر مانقره
6
ياحاكم الگبلك نهر ماينضب
ومثلك كون مثلك تعب واتعذب
وياهو بوسط محرابه دمه اتخضب
وبسيف المرادي الفاجعه الكبره
7
بس انته يحيدر تبچي والناسك
واحساسك عليهم فايض احساسك
ولهذا طبرتك صارت براسك
وداعاً ياعلي يالحزنك اشكبره
الشاعر السيد رياض الرسل الجابري
زينب تنعه ابوها الامام علي (ع)
تبچي زينب الليله لبوها والگلب مجروح
واملاك السمه وياها تبچي وتنتحب وتنوح
وحيدر منطبر راسه يمها امدد ومطروح
يشاهد باخر الانفاس گدامه المنيه اتلوح
و دموعه التنزل هماله
وحيدر ينظر صوب عياله
زينب تمسح دموعه وتشمه وحيدر يشمها
وهذا المنظر الزينب يأذيها ويألمها
ابوها بأخر انفاسه شبگها الزينب وضمها
واشتم بيها من شمها ريحت فاطمه امها
وتشمه وتنحب مفجوعه
والحيدر تمسحله ادموعه
ودع حيدر عياله بأخر لحظه من عمره
واخذ الآمه وهمومه وياه كلهن الگبره
وزينب نادت بلوعه يبويه ونادت بحسره
انته وجدي عفتوني و امي فاطمه الزهره
محد ظل يمها ايحاميها
عدمن يابويه امخليها
وسلم للقدر حيدر وزينب يمه تبچي ادموم
وعرفت بعد مايرجع نادت وبگلب مهموم
عليك الحزن يابويه مايبطل يظل للدوم
يتيمه عني كلها تگول صارت بت علي الظلوم
من عندك بنتك محرومه
وراح ايسموني المظلومه
الشاعر السيد رياض الرسل الجابري
الك يابا الحـسـن وسط الكلب جـمـره
انطبـرنه وياك كـلـنـا بساعة الطـبـره
السمه ويانه حـزينه وتبچي لمصـابــك
ومحـرابــك يـون من طحت محــرابــك
علينه مـو سهــل يـاحـيــدر اغــيــابــك
صعـب كلش عـلينه اغـيـابـك اشكـبـره
عـلينه اغـيـابـك اشكـبـره يحامي الجار
نـار وتـلـتـهــب وسط الــدلـيــل الـنــار
لـو ما الـغـدر ما طيحـــوا علي الكــرار
وانــتــه بطيـحـتـك راسم الــف فـكــره
رسمت النه الحيـاة بطيـحـتــك مــولاي
يل اسمك دوه وبي نشفه مــن كـل داي
بساعة ضربـتـك گامـت تمــوج اسماي
ونزل جبــريـل ينعـه ومنحـنـي ظـهـره
يـنـعــاك بــشــرف جـبــريــل ويـنـادي
من چـبـد السمـه الحـد اخــر الــوادي
طاح الـمــرتضـى طاح النـبي الـهـادي
لان نفس الـرسول المرتضى اتصوره
طاح المرتضى والـديـن كـلـه انصــاب
من عنه رحـل حـيـدرنـه داحي الـباب
بصـرخات اليتامه وشهگـت المحـراب
شــفـنـه الـديـن ينحــب لايــذ بكــتــره
لاذ الــديــن كـلـه بـسـاعـة الضــربــه
بچـفـك يـبـو حسيـن وخفـفـت تـعــبــه
مـن مثـلـك يحـيــدر مـارجـف گـلــبــه
من هـول المصيبه الــداميه الكـبــــره
الشاعر السيد رياض الرسل الجابري
صوت من السمه كبر دم طاهر نزف حيدر
بالمحراب من انصاب
دم طاهر نزف حيدر
صوت من السماء يصيح وكل العالم ايسمعه
راح الطبق الاسلام بدينه ومنهجه وشرعـــه
وأملاك بسماهـا تنوح وجبريـــل بحزن ينعه
أتهدمت للهدايه أركان والكون أختلف وضعه
حضن محرابه لمن طاح
وبصوت الهـدايه وصاح
فزت والله لچن وياه
دم طاهر نـزف حيدر
من طاح ونزف دمه حيــدر ما رجـف گـلـبـه
بكل ايمانه لمن طاح بمحــرابه حـمــد ربـه
المؤمن دربه هذا يصير وحيدر شرفه الدربه
وصار بكل شرف للدين غايه ومنهج وكعـبه
غـايـة حـيــدر الـقــرآن
ويرضي بغايته الرحمن
علنها وصاح لجن من طاح
دم طاهر نـزف حيدر
بنص محرابه ظل ينزف وأملاك السمه نزلت
أتوضت بالدمه الاملاك من هالفاجعـه وصلت
عـرفـت فــاجعه بالكون من طاح الولي حلت
وداع العاشك الـولهـان ودعـت حيدر وهـلـت
دمعات الحــزن دمعات
من هالفاجعه وجمرات
عـلـيه ناحـت بحـزن صاحت
دم طاهـر نزف حيدر
جــرحه اللي نــزف للــديــن وللعالم رسـم أحلام
من هــذا الجــرح ثـبــت حجه وشـيــد الاســلام
شجاع وبالوصف معروف فارس بالوغه ومقدام
كلهن ذني يـم حـيـدر يضـعــف لـو سمـع أيــتــام
اتنادي وتگصد بهمه
وتـركض تـنجمع يمه
لچـن ياحـيـف غـدر بـالسيـف
دم طاهـر نزف حيدر
بــالمحــراب لمـن طــاح ربــك خـلـده وعـلاه
مــا واحــد مثل حيدر الباري هـالكـرامه انطاه
نور من الجلـيــل النـور سبحان الــذي ســواه
من دمه رســــم عـنـوان خطه وللمحب خــلاه
خـطـه بكل گلب وبعـيـن
وظل خالد ابو الحسنين
نظـل خـدام ولجـل لسلام
دم طاهـر نزف حيدر
الشاعر السيد رياض الرسل الجابري
حوار بين الامام علي وابنته زينب (ع)
ليلة واحـد وعشرين زينب يهل مدمعـها
نادت بـويـه يـابويه وحيدر يمها يسمعها
تگله بحـيـره وبـلـوعــــه لبـوهـا بـنار لـوعـتـهــا
يريت الجـرح البـراســـك بـراسي وتجـر ونـتهـــا
حضنها حـيـدر لـزيـنـــب وكـفـكـف بيده دمعـتهــا
حيـدر حيل من ضمهــــا
ابـوهـا وحگـه لو شمهـا
وتـذكر كـسر ضلع امـهـا
من عـصروها خلف الباب وگام الطـاغي يدفعـهـا
*******
وگامـت زيـنــب تنـشــده يبويه اخبرني عن حالي
اريد اعرف شراح يصير يبويـه وشنهـي يجـرالـي
انــه مخــدرة حــيـــــــدر واخـوتـي ويــاي تبـرالي
شراح يصيـر وشيجره
گلبي اختنگ بالعـبــره
احـلـفـك انـه بالـزهـره
جـاوبـنـي اريــد الـروح الـتـلهـب نــار اقـنـعــهـا
***********
جاوبـهـا ابـوهــا وگــال ودمعاتـه بـوسط عـيـنــه
اريـــد الـتـسـمعـيه مني كل الحـچي تحـفـظـيــنــه
المايخطـر الـچ عـالبـال يـبويـه انتي تـشـوفـيـنـه
راح الكـربـله تـمـشيـن
بـس الـوحـدچ تـبـقـيـن
بلا والي وبلاي معـيـن
وهـنـا سكـت مـاكـمـــل وگام الغـصص يـجـرعـها
وهـنــا نـشـدتـه زيـنـب اخـوتي وگـرت عـيـوني
اذا مهـيـوبـه بحـمـاهـم امشـي مـايـعــوفـــونــي
وحدي بلاي والي شلـون معـقــولـه يـخــــلــــوني
امشي بهـيبه بيـن الناس
واطلع رافعـه اني الراس
بكـفـيـلي والنعـم عـبـاس
وادري غـيـر ابـو فاضل الـزيـنـب مايـطـلـعــهــا
******************
گلهـــا حسـيـن يـازيـنـب يطـيـح ودامي عـالغـبـره
جـثـه امسلـبـه ابلا راس وخـيـل تهـشـم بصـــدره
واخوچ الكافـلچ عـبـاس چـفـوفـه يطيحـن بكـتـره
يطيح امصوب بعـيـنــه
ومنه اتطيـح چـفـيـنـــه
وتضل تتنطـره اسكيـنه
وانتي اميسـره ترحـيـن هـاي القـصه واقـعـهـــا
الشاعر السيد رياض الريل الجابري
ولادة الحسن (ع)
نورك اهلال على اشفاف الكرامه
رسم شلال تهاني بأبتسامه
والدنيه مسروره
بالحسن وبنوره
رسم شلال تهاني بأبتسامه
1
هالليله حيدر اعلن البشره
واعله الفرح معتلي
فرحان حيدر من بعد صبره
خل يستمع عاذلي
هنياله كل واحد على الفطره
بحب الحسن مبتلي
بالحفله نعلن فرحة الزهره
ونهني حيدر علي
بهاي الاقوال نسد حلگ الملامه
يشرح الحال گلبنه وكل هيامه
وانوضح الصوره
بالحسن وبنوره
رسم شلال تهاني بأبتسامه
2
نرسم فرحنه بالسمه العالي
بيوم الحسن مولده
بخمصطعش رمضان للغالي
هذا الحفل موعده
هنيالك انته واني هنيالي
للعهد وانجدده
والباري ندري بالحشر تالي
للحضر ايسدده
من الاهوال يحصنك والسلامه
وراحة البال تحصل بالقيامه
وبجنة اقصوره
بالحسن وبنوره
رسم شلال تهاني بأبتسامه
3
بالأفق فرحه بمولده انشاهد
نور ويهل من ظهر
حتى الملائك بالسمه اتعايد
من سمعت بهل خبر
لمن نزل فوگ الارض ساجد
مو مثل هاي البشر
نرسل تهاني وبگلب واحد
للغايب المنتظر
حتى لو طال نظل نسمع كلامه
نترس اسلال تهاني والعلامه
خدامه مأجوره
بالحسن وبنوره
رسم شلال تهاني بأبتسامه
4
اختم كلامي والگلب هايم
واتوسل بهل حفل
ارد انه احلفك سيدي بفاطم
كون العمل ينقبل
هذا عملنه متصل دايم
وياك حلقة وصل
هنياله كلمن للحسن خادم
اليوم الحشر متصل
والنبي گال قعوده وبقيامه
مثل الجبال يشرفها الامامه
والدنيه معموره
بالحسن وبنوره
رسم شلال تهاني بأبتسامه
الشاعر السيد رياض الرسل الجابري
هوسات الحسن ع
1
الكريم اني الزكي والسبط اسمائي
وكل الناس تعرف كرم انبائي
سمعت اني سمعت بحاتم الطائي
حاتم مايحضر
يمي ولا يگدر
ايشوف ويتعذر
حيدر منطيني
وانطيت حسيني
والتارس عيني
والتارس عيني شايل بخت الزهره
2
صيتك يالحسن بالكرم مامحدود
وياك انولد معنى الكرم والزود
ماشفنه ابد مثلك بروحه ايجود
مثلك ماشفنه
احنه ولعرفنه
بالجود اكشفنه
جودك ماصاير
والشافك حاير
وامضيفك عامر
وامضيفك عامر دوم وفاتح بابه
3
الحسن من انولد خط بيده عالحيطان
انه راعي الكرم والجود والبرهان
مضيفي ما اسده امشرعه البيبان
ماقصر مره
الخطاري بنضره
احلف بالزهره
بخدمة احبابي
الوصلو لعتابي
لا ما سد بابي
لا ماسد بابي بروحي اكرم خطاري
الشاعر السيد رياض الرسل الجابري
ولادة الامام الحسن المجتبى (ع)
أبحر الخير والجود ---- الليله الحسن مولود
انهـني النـبـي وآله ---- من نور الجــلاله
الليله الحسن مولود
*************
نـرفـع للنـبــي ازكى التهــانــي
ونرسم بالفـرح احـلـى الاماني
هـاليـله انـولـد كـوكــب الثـاني
بنوره امـنــور بأعـله الجـناني
مـيـلاد العـداله ---- من نور الجلاله
الليله الحسن مولود
**************
نهني المرتضى حـيـدر عـلينه
بغـرة طـلـعـتــه وغــرة جبينه
ضوه بنوره كل نور المـديـنــه
وشع شع بالفرح من هل علينه
كل ثوبه وفصاله ---- من نور الجلاله
الليله الحسن مولود
***********
نهني فاطمه بعـزهـا وضناهـا
من اشرق عـليها ومن اجاهـا
نور الحسن للزهـره احتـواها
من شاهدها واحـتار بضواهـا
كل نوره وكماله ---- من نور الجلاله
الليله الحسن مولود
***********
نهني العـتـره وبهاي الولاده
بنور الحسن يامحله السعاده
ربــك خـلـده بجــود و أراده
وبيهن نصر حـقـق بالقـيـاده
كل هذا اتصاله ---- من نور الجلاله
الليله الحسن مولود
************
الشاعر السيد رياض الرسل الجابري
عگيلي ابو طالب
هالليله انون ياوالينه
وانواسي بفگدك مهدينه
1
بسابع من رمضان انودعك
ربك قرر راد يرفع
وياك وللموت انتبعك
وامسلمين احنه البارينه
2
ياكافل طه بهل دمعه
نحضر هالليله احنه وننعه
كلمن ناده بصوت اتسمعه
يا والدنه وعايش بينه
3
خدامك يل ماتنسانه
وبأيدك رف عالي الوانه
بيك انحس عايش ويانه
وبأسمك احنه اتسمينه
4
تتكفلنه وهاي الغايه
يا راية عز واشرف رايه
بخيرك وامغرگنه اهوايه
وانعيش بخيرك خلينه
5
تدرينه انحبك عالفطره
بحيدر وانحلفك وبالزهره
للمجلس والحاضر نظره
هالليله الخادم گر عينه
6
نختمها بدمعه ومن نبدي
بينه الحادي بلوعه ويحدي
بيك انواسي الليله المهدي
ويمك اولنا وتالينه
الشاعر السيد رياض الرسل الجابري
موشح بحق ابو طالب وخديجه
عليهم السلام
الليله حزنان النبي ابدمعه ويون
شلون عام ايمر عليه عام الحزن
مثــل هذا العام مامــر مستحيل
عالرسول وشاب شعره والدليل
ابــــو طالب چان اله اب وكفيل
والرسول ايحس اله چان الابن
ابو طالب حامه عن اشرف نبي
حـتى بـالشـــر مايمسه الاجنبي
مخلص الـديـنـه آبي ونعم الآبي
وذني لازم للبشــــر يـتــوضحن
والنبي بعام الحزن هـل دمعـتـه
لأعظم اثنين بحياتــه ودنـيـتـــه
ابو طالب والخــديـجــه مهجـته
والمثلهم حـگـه يشتــاگ ويحن
مدري ينعه عالكفيل بهل مصاب
لو على الخلصت عمرها بالعذاب
والخديجه النبي يشعر گلبـه ذاب
وحگه من يحزن وگـلبـه ينسحن
ياخديجه ينـادي ودمـوعه دمه
لان تستاهل بچـت حتى السمه
ياخديجـه شحـال بنـتـچ فـاطمه
اتمنت وياهـا بگـبـرها تـنـدفـن
ياخديجه ينادي محتار اشيگول
وحاير اشيحچي ويعاين للبتول
الليله الله ايساعده گلب الرسول
الليله بالاحـزان گـلـبــه مرتهن
خلي نتوجه الليله بهـل مـقــــام
وخل ننادي العجل مولاي الامام
يمته يوم الفرج بس بيا كـــــلام
بالدعاء وانصيح كل احنه بسجن
الشاعر السيد رياض الرسل الجابري
ابو طالب (ع) وفاته 7 رمضان
الليله اسألك ياعلي بحالك اشصار
و ابـو طـالب والـدك فـارك الـدار
وانته بالهم مبتلي
شلون حالك ياعلي
و ابـو طالب والدك فارك الدار
الليله اسألك ياعلي بدمع الصبر
شلون لحظات المفارگ من تمر
مشبعت من عنده كل هذا العمر
واخــذ منـك والـدك تالي الگـبـر
هـمـومـك المتنجلي
شلون حالك ياعلي
وابو طالب والدك فارگ الدار
شلون حالك ياعلي ومثلك منـو
فاگد الاب انته واسم الاب حلـو
ابو طالب عافيه ورحمه ودفـو
الدنيه كلها ابد متعوض الابــو
انته والهم مبتلي
شلون حالك ياعلي
وابو طالب والدك فارگ الدار
ابــو طالب والــدك وانـتــه الابــن
وحضن ابوك الدافي مايشبه حضن
الليله من حگك يحيدر مـــن تـون
اليفگـد الاب حگه لـــو حتى يجـن
الليله اسألك يالولي
شلون حالك ياعلي
وابو طالب والدك فارگ الدار
اليفگد الاب يفگد ويــــاه الحنان
وابو طالب دنيه ومعطــر الزمان
ابـــو طالب مـارحـل في كل مكان
بحيدر انشوفه ونحس بيه الامان
واضح واسمه جلي
شلون حالك ياعلي
وابو طالب والدك فارگ الدار
ابو طالب ساكن بنص الضميـر
عاش بالدنيه اميـر ومات اميـر
بسمه كل جنات ربـك والعـبـيـر
يكفي والـد حيدره يعـني چـبـيـر
المثله لازم يعتلي
شلون حالك ياعلي
وابو طالب والدك فارگ الدار
الشاعر السيد رياض الرسل الجابري
قصيده للأمام علي (ع) تجليبه على شكل هوسات تحتوي على اسماء الله الحسنى كلها
اسال الله قبولها :
1
الودود الغني الباعث ربك التواب
المجيد الباسط الخالق الكل اسباب
آله الكون رادك تنزف بمحراب
(ياحيدر ويباهي بدمك)
2
المانع ربك المقسط عليم الحال
القدوس المهيمن والمتين اشگال
حيدر ينطبر والدم يريده وسال
(بالمحراب وينزف دامي)
3
السلام المؤمن الرزاق والجبار
الوهاب المصور عالم الاسرار
من ساق العرش ويعاين الكرار
(من طاح السيف اعله الهامه)
4
الفتاح العزيز البارئ الخافض
اللطيف الرافع الغفار والقابض
اذا قرر قرار اشحده ليعارض
(مشتاگ الحيدر ويريده)
5
المبدئ والشكور النور والرحمن
المقيت العدل اسمه وخالق الاكوان
الحكم والملك هوه وحيدر القرآن
(وبدمه يرتل آياته)
6
الوكيل المحصي والحق الولي الماجد
المتعال الشهيد المذل والشاهد
العلي الكرار راده ينطبر ساجد
(ويباهي بدمه بأكوانه)
7
الضار النافع الواسع كبير الشان
الحفيظ العلي القهار الصبور اشچان
رايد من اراده وانزل القرآن
(يصبح تأويله وتفسيره)
8
المميت المقتدر والعفو المتعالي
الرشيد الوارث المتكبر العالي
حيدر عنده اعز واغله كل غالي
(هو وطه بنفس الرتبه)
9
الواجد والرؤوف الوالي والجامع
القيوم الحكيم بحكمته رافع
علي الكرار الاول ابد مو رابع
(والگايل رابع بجهنم)
10
الهادي المنتقم والآخر الظاهر
المؤخر والحسيب الاول القادر
كلمن مايحبك ياعلي خاسر
(ميشوف الجنه شما صله)
11
المجيب القوي الواحد ذو الجلال البر
الحليم الباطن ايگله العلي ابشر
بيه الما يحبك ياعلي يكفر
(يبشر والنار امتانيته)
12
الخبير الصمد حي ومالك الاملاك
المقدم والبصير أمسخر الافلاك
من نوره وجلاله الباري من سواك
(صاغك ياحيدر وبكيفه)
13
السميع ايظل غفور الهاي كل الناس
الحميد اسمه المعيد وحارس الحراس
قرر ينضرب حيدر بذاك الراس
(المادنگ بس لله براسه)
14
الأحد والبديع اسمه الكريم اهواي
الرحيم ايريده صايم ينطبر مولاي
انطبر حيدر وضجت بالصياح اسماي
(والدين انهدمت اركانه)
15
العظيم الباقي والمحيي الرقيب ارواح
الجليل المغني اسمع حيدره من طاح
وسام براسه طبره ومطمئن من صاح
(فايز صاح ورب الكعبه)
الشاعر السيد رياض الرسل الجابري
ولادة السيده رقيه (ع)
فرحة احساس رقيه بهل قصيده
ترسمها فرحتها
بلحظة ولادتها
فرحة احساس رقيه بهل قصيده
1
ترسم فرحها بحيره واتبعه
مجبوره من الزغر
شافت ابوها وهلت الدمعه
معناها بويه انتظر
لا تشعل الميلادي اي شمعه
كلش قصير العمر
يهمس يروحي الوالد اتسمعه
ودموعه مثل الجمر
ترسم احلام طفولتها الجديده
وتهلها دمعتها
بلحظة ولادتها
فرحة احساس رقيه بهل قصيده
2
حاملها ابوها حسين حاملها
ويخاف من الخطر
والنور يعكس بالافق ظلها
شاف الوجن ماصبر
من خدها ابوها حسين قبلها
من وصل يمها وحضر
والورد يمها وظل يغازلها
لمن عليها نظر
والورد راد يشم خد الوليده
والشمس نادتها
بلحظة ولادتها
فرحة احساس رقيه بهل قصيده
3
طفله رقيه وتشبه الزهره
مولدها غطه الشمس
وحسين ينطر الها وتنظره
والخد شمس من يشع
محفلنه الها الليله وشكبره
والحبها خل يستمع
اليحضر حفلها باچر اتحضره
وهناك ميهل دمع
تحضر اهناك رقيه اي اكيده
تشفع الشيعتها
بلحظة ولادتها
فرحة احساس رقيه بهل قصيده
4
اختم كلامي بهذا مولدها
وبالمحفل انثر ورد
كلمة احبها الليله ارددها
وماريد عنها ابتعد
من عدها رايد اني من عدها
تنظرلي حتى انسعد
اقسم عليها بنحر والدها
تقبلني خادم عبد
بگلبي ياناس تظل هيه الوحيده
نشعلها شمعتها
بلحظة ولادتها
فرحة احساس رقيه بهل قصيده
الشاعر السيد رياض الرسل الجابري
ولادة رقيه
-------------
الليله دمعه وابتسامه
والگلب يفضح غرامه
ياگلب هون عـلـيـه
الليله مولدها رقيه
والگلب يفضح غرامه
-----------------
خل نسولـــف وبهمس
الليله نور من الشمس
صار مولدها
كـل اصـابـعـنـه شمـع
نعـلگ وكلنــه بــدمع
انهني والدها
نطـلـب ابـدمـع اليهـل
كـــون تقبـل بـالحفــل
انريد من عدها
نـورهـا الماينـوصف
والجمال اشگـد ترف
والضوه بخدها
خصهـا باريـنه بكماله
انطاها من نوره وجماله
للحسين اعظم هديه
الليله مولدهـا رقيه
والگلب يفضح غرامه
-------------------
الـهــا بــرقـيـــة وفــه
نكـتـب بكل عــاطفــه
الليه نرفعها
بيها وقـعـنـه العهـــد
وياهــا نبقه للابـــــد
هذا واقعها
شنهدي الها ونرتجي
انجيب ترچيه ونجي
يلا تنفعها
خـفـنـه يمكن تنغـــدر
وخاف بالحفله الشمر
يجي ويگطعها
اشتحمل الطفله العجيبه
ازغيره شافت جم مصيبه
وي الحزن شبت سويه
الليله مولدها رقـيــه
والگلب يفضح غرامه
-------------------
اشگد تـرف خـد الضوه
ايذوب مـن لمسة هـوه
لحظه لو مسها
نور من نــور الــوحي
الگمره گامت تستحي
تجي اتلامسها
بخـــد رقيه الي يشع
نور يــزهي وينجمع
بأمل واهسها
نــزلـت بهيئــة ورد
ابـد لا مـا تنـحـسد
الله حارسها
الله حارسها من العيون
بيها سر الباري مكنون
طفله ما تحمل اذيــه
الليله مولدهــا رقيه
والگلب يفضح غرامه
-------------
بلوعة الحب نعـتنـي
والعـزم مــايـنـثـنـي
للحفل جينه
نحمل ادموع الــوفه
وبينه شوگ الماطفه
من تعـنـينه
الـچ يـانبــع الطهــر
شمي نحمل ياعطـر
ورد بـيـدينه
للحضر والمـاحضر
انحلـفـچ بدم النحر
كلنه سجلينه
جينه يدفعنه هوانه
نظره منج يا رجانه
وذوله خدام الـزجيه
الليله مولدهــا رقيه
والگلب يفضح غرامه
------------------
الشاعر السيد رياض الرسل الجابري