1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
قصيدع لاستشهاد الامام علي (ع)
اليجهل اليوم علي و دوره ومقامه
يعرف هـنــاك علي بيوم القيــامه
اليعاديه للصيميده
اشيسوي مايـفـيده
يعرف هـنـاك علي بيوم القيــامه
اليجهل الكرار شلون بالمحشر
لو يسألونه شيحچي عن حيدر
حـيـدر الاسلام والنبي المصدر
شـلـون يـتجاهـل اله ويـتـنـكـر
الينكر هناك علي وينكر فـعـاله
باچر شلون اذا ايجاوب سؤاله
الك اقـسـم اكـيـده
اشيسوي مايفيده
يعرف هناك علي بيوم القيامه
خل يطالع زين يـدرس ويـقـره
ويـاخــذ التـاريخ كلـه ويفسـره
يلگه من يقراه يم علي العـبره
لأن لجل الدين ضحه كل عمره
بخبزة شعـيـر علي الجنه اشتراها
وشوف غيره بـرخص لمن نطاها
اله الجنه بعـيــده
اشيسوي مايفيده
يعرف هناك علي بيوم القيامه
علي شمس الله مثـتـب وبرهان
كلمن ينكـره يعـيـش بــالخـذلان
امل للشـيـعـــه عـلي والعـنـوان
منهجه اليـقـراه ابـد موخسران
نـهــج طــه اذا نهجـه تـتبـعـه
وبيده حيدر الك صكك يـوقـعه
اليـعـانــد مايريده
اشيسوي مايفيده
يعرف هناك علي بيوم القيامه
حـيـدر الايمان والفضل والجــاه
شتسوه هـالـدنـيه حـيـدر ابلـيـاه
الباري رحمه ونور للبشر خلاه
والمشه بــدربـه فـــاز والوالاه
اليمشي وياه يفوز بهل الهدايه
واليـعـاديـــه بريء من الولايه
اضل حچيه اعيده
اشيسوي مايفيده
يعرف هناك علي بيوم القيامه
علي ليـبـغـضـه ابــد مــايــربــح
واليحبه هـنــاك بــالحشر يـفـلـح
نبقه احنه انعيد بالحچي ونشرح
حـتـى للـعـالــم هـــذا يـتــوضــح
وي علي انموت وابـــد لامــانــعـوفـه
بنص الگـلــوب نحسه احنه ونشوفه
علي المايلزم ايده
اشيسوي مايفيده
يعرف هناك علي بيوم القيامه
لاتنسون والدي وابني عباس من الرحمه والغفران
خادمكم رياض الرسل الجابري
قصيده علي (ع)
تون وتنوح بكلب مجروح
زينب يم علي بحسره
زينب تنظر بدمعات لبــوهــا وتنحــب بعــبـره
تعاين جرح البراسه وتشمه اشويه من صدره
تخاف اتلچمه والمجروح تلچمه حتى بالنظره
لحظات الموادع موت چنها اتودع الــزهــــره
گلبها ايلوب تنون وتذوب
بدمعها زينب تنظره
بين الحيره والحيره تعاين مخـتـلــف وضعه
تسكت تشب بيها النار تحچي لازم بــدمعــــه
ضلت تبچي وتسولف وسوت مجلس وتنعـه
وابوها منطرح ويلوب رادت يحچي وتسمعه
حچه الكرار بدمع مدرار
وحضنها الزينب بعبره
گام اتعـايـن الراسه ينزف والـوجـه اصفـــر
تسأل والدي معــقـول انته هـــــذا ياحــيــدر
الشال بچفه ذاك الباب ويشهدله حصن خيبر
معقوله وعجيبه شلون تريد تگوم ماتگــدر
تون سكته علي انته
الضحه الناسه كل عمره
نايم حــيــدر بـيـاحـال يــنزف والجـــرح دامي
بده يحچي برفيع الصوت يزينب خلصت ايامي
يبويه العــيــد ماشوفه وبعـــد ماكمل اصيامي
لتعوفيني يازينب اگــعــدي وصـيــري گــدامي
انخفض صوته گرب موته
وگام ايوصي بالفقره
يابويه اجانه العــيـد بــدمــوع وحــزن والآم
والايام بعــدك موت بــويــه اشتـنـفـع الايــام
جبنه العمر كله احزان وانخلص العمر صيام
شلون انعيد بياحال اول عـيـد واحـنـه ايتام
اجانه العيد وانته بعيد
مشيت وجرحك اشكبره
يابويه العمر بعــدك من تمشي نخلصه بنوح
عشت مظلوم ياحيدر متت وگلبك انته جروح
شيفيد العمر بعــدك واسيوف المنيه اتـلــوح
بعدك كلنه يابويه من تـروح كـــون انــروح
نودعه اليوم علي المظلوم
ونحمد ربنه وانشكره
لاتنسون والدي وابني عباس من الرحمه والغفران
خادمكم رياض الرسل الجابري
قصيده للأمام علي (ع) شكل هوسات تحتوي على اسماء الله الحسنى
الودود الغني الباعث ربك التواب
المجيد الباسط الخالق الكل اسباب
آله الكون رادك تـنـزف بمحــراب
(ياحيدر ويباهي بدمك)
المانع ربك المقسط عليم الحال
القدوس المهيمن والمتين اشگال
حيـدر ينطبــر والدم يريده وسال
(بالمحراب وينزف دامي)
السلام المؤمن الرزاق والجبار
الوهاب المصور عالم الاسرار
من ساق العرش ويعاين الكرار
(من طاح السيف اعله الهامه)
الفتاح العزيز البارئ الخافض
اللطيف الرافع الغفار والقابض
اذا قرر قـرار اشحده ليعارض
(مشتاگ الحيدر ويريده)
المبدئ والشكور النور والرحمن
المقيت العدل اسمه وخالق الاكوان
الحكم والملك هـوه وحيدر القرآن
(وبدمه يرتل آياته)
الوكيل المحصي والحق الولي الماجد
المتعال الشهــيــد المذل والشاهــد
العلي الكرار راده ينطــبــر ساجــد
(ويباهي بدمه بأكوانه)
الضار النافع الواسع كبير الشان
الحفيظ العلي القهار الصبور اشچان
رايــد من اراده وانــزل القــرآن
(يصبح تأويله وتفسيره)
المميت المقتدر والعفو المتعالي
الرشيد الوارث المتكبر العالي
حيدر عنده اعز واغله كل غالي
(هو وطه بنفس الرتبه)
الواجد والرؤوف الوالي والجامع
القيوم الحكيم بحكمـتــه رافــــع
علي الكرار الاول ابد مو رابـع
(والگايل رابع بجهنم)
الهادي المنتقم والآخر الظاهر
المؤخر والحسيب الاول القادر
كلمن مايحــبــك يــاعلي خاسر
(ميشوف الجنه شما صله)
المجيب القوي الواحد ذو الجلال البر
الحليم الباطن ايگله العـلي ابشـر
تدري الما يحــبــك ياعلي يكــفــر
(ناصب والنار امتانيته)
الخبير الصمد حي ومالك الاملاك
المقدم والبصير أمسخــر الافــلاك
من نوره وجلاله الباري من سواك
(صاغك ياحيدر وبكيفه)
السميع ايظل غفور الهاي كل الناس
الحميد اسمه المعيد وحارس الحراس
قرر ينضرب حــيــدر بــذاك الراس
(المادنگ بس لله براسه)
الأحد والبديع اسمه الكريم اهواي
الرحيم ايريده صايم ينطبر مولاي
انطبر حيدر وضجت بالصياح اسماي
(والدين اتهدمت اركانه)
العظيم الباقي والمحيي الرقيب ارواح
الجليل المغني اسمع حيدره من طاح
وسام براسه طبره ومطمئن من صاح
(فايز صاح ورب الكعبه)
لاتنسون والدي وابني عباس من الرحمه والغفران
خادمكم رياض الرسل الجابري
شوط كربلائي بحق الامام علي (ع)
زينب بالدمع والنوح گعدت يمه تتحسر
تعاين مره للعباس ومره اتعاين الحيدر
١
حيدر يمها ويعاين گوه يلفظ انفاسه
عرفت راح ابوها اليوم يودع دنيته وناسه
تعاين طبرته شافت چبيره الطبره البراسه
لبوها حارت بأمره
چبيره شافت الطبره
اختنگت زينب بعبره
المنظر قاسي ياهالناس شلون اتحملت المنظر
٢
زينب گربت يمه تشمه گامت بصدره
يبويه اتگله احچي وياي اموتن خاف بالحسره
امشي اعليك اعز الناس الحبيبه فاطمه الزهره
صد يابويه حاچيني
وارحم كل دمع عيني
بعذابي لا تخليني
وحيدر گوه شال الراس ولون الوجه صار اصفر
٣
برفيع الصوت حاچاها يگلها يابعد روحي
الكلام وياچ يابويه يزينب بلسم جروحي
وگام يعاين العباس ويگلها كل سبب نوحي
راح الوحدچ اتضلين
وكلشي بعمرچ اتشوفين
اوصيچ واسمعي زين
المصايب من تشوفيها صيري للصبر مصدر
٤
صد حيدر لعد عباس وگام الروحه يسألها
اي عباس بس عباس لعد زينب كفو الها
واهنا كلم العباس وگله انته كافلها
رد عباس خادمها
وشحده اليكلمها
كون الزهره ترضه امها
اصيرن خادم الزينب وتجازي الزهره بالمحشر
٥
زينب بعد ماعرفت اشوصه بيها واليها
گامت تنظر العباس وخلت ايده بيديها
كفو منك بماي العين واختك ماتخليها
وزينب تنظر ابدمعه
لبوها وگامت اتودعه
ياعباس ارد انعه
زينب تنعه والعباس يمها يبچي واتصور
٦
وهنا ودعت زينب ابوها بدمعه سچابه
والعباس يمها ينوح ويبچي بنار لهابه
حيدر غمض عيونه بأخر لحظة امصابه
وزينب صاحت بأحساس
بحضني جيب خلي الراس
وخلي انشمه ياعباس
هذا اخر وداع النه بعد للضيم نتحضر
لاتنسون والدي وأبني عباس من الرحمه والغفران
خادمكم رياض الرسل الجابري
قصيده بحق الامام الحسن (ع)
هاليوم هاليوم فرح گلبي وعلن
هاليوم هاليوم يهل نور الحسن
وبيوم ميلاده
نحتفل بعياده
هاليوم هاليوم يهل نور الحسن
١
شع نوره والصوره ترسم يافجر
تتلاگه بأشواگه والدنيه عمر
من حيدر والزهره نوره ويفتخر
والعاشگ من حگه لو هايم سحر
ميلاد ميلاد ابن اشرف ولي
ميلاد ميلاد ابن حيدر علي
والسيد الساده
نحتفل بعياده
هاليوم هاليوم يهل نور الحسن
٢
هالليله اشواگي بالسر والعلن
تفضحني بالمولد والفرحه ثمن
شافوني سألوني شايل ياشجن
شرد احچي ساحرني ميلاد الحسن
بالروح بالروح شلت حبك ذخر
بالروح بالروح حبيتي وافتخر
هوه الگلب راده
نحتفل بعياده
هاليوم هاليوم يهل نور الحسن
٣
دگ بابه هالليله يطلع چم ضوه
من عطره وانفاسه نشتم الهوه
تغمرنا هالفرحه كل احنه سوه
والعاشگ هالليله دلاله ارتوه
مليان مليان گلب ذايب عشگ
مليان مليان بسم واحد يدگ
للحسن والعاده
نحتفل بعياده
هاليوم هاليوم يهل نور الحسن
٤
اشواگي شايلها ترسم فرحتي
هالليله بالمولد وانظر حالتي
يالتسمع أسمعني وشاهد صفنتي
بالدمعه هالليله أبصم بصمتي
بدموع بدموع الك كاتب عهد
بدموع بدموع واناديلك مدد
والعلي وأولاده
نحتفل بعياده
هاليوم هاليوم يهل نور الحسن
٥
خليني هالليله بالمحفل أحس
انفاسك وبعطرك عالوادم همس
يالسحرك وبنورك غطيت الشمس
هالليله بميلادك ماخذ چم درس
عنوان عنوان بخت أهل الكرم
عنوان عنوان عليت اعله القمم
واناطر أمراده
نحتفل بعياده
هاليوم هاليوم يهل نور الحسن
لاتنسون والدي وأبني عباس من الرحمه والغفران
خادمكم رياض الرسل الجابري
موشح وممكن يقرأ مربع لولادة الحسن (ع)
للحسن جينه بشرف عنايه
١
الليله بالميلاد ملتمه الأحباب
كلها متعنيه وتدگ للفرح باب
الزهره خلي تشوفنه بعد الغياب
نحضر و رايه تلوذ برايه
للحسن جينه بشرف عنايه
٢
بالفرح جينه خدم تدرونه
نشعل اشموع الفرح خلونه
للحسن نحضر وضي اعيونه
بالحفل والمخلصين ويايه
للحسن جينه بشرف عنايه
٣
للحفل جينه شرف أعظم شرف
انوصل المبروك احنه للنجف
بصوت واحد بينه كل خادم هتف
الفاطمه ومنطين احنه احچايه
للحسن جينه بشرف عنايه
٤
للحسن بفراحنا المعتاده
كل سنه نحضر نجي بميلاده
نحلف ومنبطل احنه العاده
نحتفل چم سنه صار اهوايه
للحسن جينه بشرف عنايه
٥
راية الخدام ما ألها مثيل
ترف خفاقه بسم حامي الدخيل
شما نقدم بالحفل احنه قليل
وهاي غايتنه الولاده هايه
للحسن جينه بشرف عنايه
٦
احنه أهل خط العشك والاحتفال
أبد مانگطع أبد هذا الوصال
كلمن ايحب الحسن جيبه تعال
خل يشارك والولاده الغايه
للحسن جينه بشرف عنايه
٧
نقره نختم بالفرح هذا الدعه
للحسن نقره الحمد والقارعه
صوت كل خادم الليله يسمعه
وينعكس صوت الخدامه أمرايه
للحسن جينه بشرف عنايه
لاتنسون والدي وأبني عباس من الرحمه والغفران
خادمكم رياض الرسل الجابري
ابوذيات لوفاة السيده خديجه (ع)
١
رب الكون من رادك وحالك
ظلام الجهل مايرحم وحالك
خديجه اتعوفك الليله وحالك
عليه يبچي العرش وأهل الوطيه
٢
النوايب ابد ماتنراد مره
تشيب الراس لمن تمر مره
محمد عام هذا الحزن مره
واخذ منه خديجه بهل مسيه
٣
خديجه الچانت الطه وساده
الحزن خيم على بيته وساده
جن وأنس حزنانه وساده
على أم الزهره وبهاي الرزيه
٤
حزنك يالمحب طلعه وظهره
الخديجه بكل حزن يومك وظهره
الرسول اعليها ظل محني وظهره
يحس مكسور متلمه الوطيه
٥
حكه الواحد الينحب علامه
(على أمه)
اشعنده الزمن مايرحم علامه
خديجه من مشت تركت علامه
حزنها ورثته الزهره الزچيه
لاتنسون والدي وأبني عباس من الرحمة والغفران
خادمكم رياض الرسل الجابري
ولادة الامام الحسن بن الامام علي (ع)
نورك اهلال على اشفاف الكرامه
رسم شلال تهاني بأبتسامه
والدنيه مسروره
بالحسن وبنوره
رسم شلال تهاني بأبتسامه
1
هالليله حيدر اعلن البشره
واعله الفرح معتلي
فرحان حيدر من بعد صبره
خل يستمع عاذلي
هنياله كل واحد على الفطره
بحب الحسن مبتلي
بالحفله نعلن فرحة الزهره
ونهني حيدر علي
بهاي الاقوال نسد حلگ الملامه
يشرح الحال گلبنه وكل هيامه
وانوضح الصوره
بالحسن وبنوره
رسم شلال تهاني بأبتسامه
2
نرسم فرحنه بالسمه العالي
بيوم الحسن مولده
بخمصطعش رمضان للغالي
هذا الحفل موعده
هنيالك انته واني هنيالي
للعهد وانجدده
والباري ندري بالحشر تالي
للحضر ايسدده
من الاهوال يحصنك والسلامه
وراحة البال تحصل بالقيامه
وبجنة اقصوره
بالحسن وبنوره
رسم شلال تهاني بأبتسامه
3
بالأفق فرحه بمولده انشاهد
نور ويهل من ظهر
حتى الملائك بالسمه اتعايد
من سمعت بهل خبر
لمن نزل فوگ الارض ساجد
مو مثل هاي البشر
نرسل تهاني وبگلب واحد
للغايب المنتظر
حتى لو طال نظل نسمع كلامه
نترس اسلال تهاني والعلامه
خدامه مأجوره
بالحسن وبنوره
رسم شلال تهاني بأبتسامه
4
اختم كلامي والگلب هايم
واتوسل بهل حفل
ارد انه احلفك سيدي بفاطم
كون العمل ينقبل
هذا عملنه متصل دايم
وياك حلقة وصل
هنياله كلمن للحسن خادم
اليوم الحشر متصل
والنبي گال قعوده وبقيامه
مثل الجبال يشرفها الامامه
والدنيه معموره
بالحسن وبنوره
رسم شلال تهاني بأبتسامه
لاتنسون والدي وأبني عباس من الرحمه والغفران
خادمكم رياض الرسل الجابري
ابو طالب ((ع))
الليله اسألك ياعلي بحالك اشصار
و ابـو طـالب والـدك فـارك الـدار
وانته بالهم مبتلي شلون حالك ياعلي
و ابـو طالب والدك فارك الدار
الليله اسألك ياعلي بدمع الصبر
شلون لحظات المفارگ من تمر
مشبعت من عنده كل هذا العمر
واخــذ منـك والـدك تالي الگـبـر
هـمـومـك المتنجلي شلون حالك ياعلي
وابو طالب والدك فارگ الدار
شلون حالك ياعلي ومثلك منـو
فاگد الاب انته واسم الاب حلـو
ابو طالب عافيه ورحمه ودفـو
الدنيه كلها ابد متعوض الابــو
انته والهم مبتلي شلون حالك ياعلي
وابو طالب والدك فارگ الدار
ابــو طالب والــدك وانـتــه الابــن
وحضن ابوك الدافي مايشبه حضن
الليله من حگك يحيدر مـــن تـون
اليفگـد الاب حگه لـــو حتى يجـن
الليله اسألك يالولي شلون حالك ياعلي
وابو طالب والدك فارگ الدار
اليفگد الاب يفگد ويــــاه الحنان
وابو طالب دنيه ومعطــر الزمان
ابـــو طالب مـارحـل في كل مكان
بحيدر انشوفه ونحس بيه الامان
واضح واسمه جلي شلون حالك ياعلي
وابو طالب والدك فارگ الدار
ابو طالب ساكن بنص الضميـر
عاش بالدنيه اميـر ومات اميـر
بسمه كل جنات ربـك والعـبـيـر
يكفي والـد حيدره يعـني چـبـيـر
المثله لازم يعتلي شلون حالك ياعلي
وابو طالب والدك فارگ الدار
لاتنسون والدي وأبني عباس من الرحمه والغفران
خادمكم رياض الرسل الجابري
على الخلص حياته بخدمة العتره
تجازيه عالخدامه فاطمه الزهره
كل خادم خدم لحسين خي عونه
يصير امقدر بعين اليعرفونه
وخادم للحسين الكل يسمونه
وشانه يرتفع والوادم اتقدره
قدره يرتفع مابين كل الناس
كل خادم حقيقي يمشي رافع راس
من زود الحسين و زوده من عباس
ويصبح جاهه عالي عالي واشكبره
جاهه يصير عالي ويرتفعله شان
ويصبحله بشرف هذا الاسم عنوان
خادم وبخدمته ايحسده كل سلطان
لأن محد گدر يحصي عدد أجره
عدد أجر الخدامه ياهو يحصيها
اذا الزهراء هي مكلفه بيها
يل تخدم خدمتك يمها خليها
لأن للخادم الزهره تجي تحضره
لليخدم ابنها الزهره ماتنساه
بكل مجلس تحضره يعني هي وياه
ومن يموت خادم هـي تتلگاه
الزهره بالگبر تتكفل بأمره
هنياله الخدم وبخالص النيه
الدنيه اتردد بأسمه وطاريه
تحضره اللي مشت للشام مسبيه
اكرامـاً لخوها المنگطع نحره
الشاعر السيد رياض الرسل الجابري
موشح خدمه
بخدمتك لو باني يالخادم قصر
الزهره من تزعل ترجعك للصفر
1
دير بالك احذر بكل خطوتك
وانته وي الزهره صفي نيتك
اعليها ما متفضل انته بخدمتك
الزهره متفضله عليك انته اشكثر
2
الخدمه مو بس تحچي وتهل الدمع
شرط بيهـا بكل يقينك مقتنع
حتى مترض انته للزهره ضلع
كون ترضيها بخدمتك واستمر
3
بكل خدمتك لازم اتخلي اعتبار
الخدمه كل خطواتها بيها اختبار
راح الخصلك الخدمه باختصار
ثمن لتخلي بخدمتك لو سعر
4
لا تشوف بخدمتك نفسك چبير
بهاي اوهامك تعيش انته اسير
باچر انته بالحشر صدگ تحير
والسراط اتشوفه بس ما ينعبر
5
لا تخلصها صور بس وحضور
كون بالمجلس تحس بكل شعور
وكون تستحضرها كل ذيچ النحور
الضحت شما تمتلك وانطت عمر
6
اتواضع بخدمتك حتى تضل علم
وماتفرق كون ما بين الخدم
حتى باچر ما يمر بيك الندم
وعالسراط براحتك لمن تمر
7
بكل تواضع اخدم ونول الجزاء
عوف انته الابهـا والكبرياء
الزهره تعرف بيك شمقدم عطاء
والهذا اتجازي هيه بالحشر
8
الزهره من ترضه عليك انته عليت
ولون ماترضه انتهيت انته وهويت
بلحـظه يتهدم شما الها بنيت
وابد ماترتاح انته وتستقر
9
كون يوميه تراجع دفـترك
الزهره شمقدملها شمقدمه الك
غيرك انته بزله وياها هلك
وانشطب اسمه ولا نال الاجر
10
انتبه واحذر وها بالك تطيح
وامشي وي الزهره بالدرب الصحيح
ما اظم اعليك واحچيها صريح
اسم مالك بالمجالس ينذكر
11
صفي نيتك وارجع الدرب الامان
الزهره تتواجد وياك بكل مكان
الزهره باچر بالحشر اكبر ضمان
وهيه بس تحميك هيه من الخطر
الشاعر السيد رياض الرسل الجابري
نزله للعباس ٢
عباس شايل رايته لمن دخل للمشرعه
-----------------
1
زينب تحشمه للگمر
لمن مشه وراح وعبر
بالروس كلها من ظفر
وصوت العقيله يسمعه
2
من صال ابو فاضل هجم
كل جيشهم ذاكه انقسم
من رفرف وبيده العلم
والموت يمشي ويتبعه
3
خله الزلم تلزم سره
عالموت سبع الگنطره
خله الجثث مطشره
والروس كلها امگطعه
4
محد گدر يوصل اله
سواها ظلمه كربله
عباس بس صوته اعتله
وفوگ الجثث لبه وسعه
5
عباس ابو الغيره حضر
حملات حيدر عالنهر
سواها من دگ الخطر
والغيره كلها تدفعه
6
يسمع ونين من الخيم
زينب وسكنه والحرم
من انضرب راسه انهشم
اتذكرهم وهل مدمعه
7
نار العطش مثل الجمر
ويدري برقيه تنتظر
وعباس طاح ويعتذر
لكن بقت متلوعه
8
عامود صابه بهامته
ومابقه ماي بجربته
عباس ضحه الخوته
من وگع صارت فاجعه
الشاعر السيد رياض الرسل الجابري
العليله ام البنين
وين وحدي جده لتخليني
ارد احلفج والـدموع بعيني
بداعت العبـاس لتعوفيني
انه العليله انه العليله
جــــده يــا ام البنين اثنينه نفس الونين
عشنه الرزيه
عشنه ايام المصاب واشكثر راحو احباب
بالغاضريـه
انه وانتي ابلا اهل لا والي
اثنينه لمن نـون عـالغـالي
انتي بس ياجـــده لتسليني
بـداعــت العباس لتعوفيني
انه العليله انه العليله
اتودعيني وبالدمع وانه محنية ضلع
صدي اليه
انتي انتي سلوتي اتنشفيلي دمعـتي
بكل مغـربيه
احنه من نگـعـد نون چنه سوه
اتودعيني شلون اعيش ابلا هوه
مـا اعيــش بغـيــرچ وتدريني
بـداعت العبـاس لتعـوفـيـنـي
انه العليله انه العليله
انتي ياجده الي
دنيتي صرتي وهلي
عشنه سويه
انتي بس انتي الامل
ومن اظل ابلا اهل
صعبه عليه
هسه لو عباس عمي يشوفوني
چان ظل يمي وابد ميعوفنـي
انتي لو رحتي اشتفـيد اسنيني
بـداعت العباس لتعــوفــيني
انه العليله انه العليله
عشنه ايام الحزن
انه وانتي بس ونون
صبح ومسيه
عالمشو لرض الخطر ومارجع منهم خبر
اهل الحميه
بالحزن نتشارك اثـنيـناتـنـه
والدمع نتقاسمه ابـيـنـاتـنـه
روح مابيه وجسد تلگـيـني
بـداعــت العباس لتعـوفيني
انه العليله انه العليله
صعبه لحظات التمر لو مشيتي للگبـر
داري خليه
ما اشم كون الهوه
و ريت تاخذنه سوه
كون المنيه
لا تخـلـيني وحــيده بداري
بين صبري وذكرياتي ونـاري
گبل لتـروحـيـن بس شـوفيني
بـداعــت العـبــاس لتعـوفيني
انه العليله انه العليله
الشاعر السيد رياض الرسل الجابري
قصيده الانصار
احنه الانصار يعرفونه يعرفونه
انضحي لحسين عمرنه فدوه لعيونه
حبنه ماينقاس
نحلف بعـبـاس
انضحي لحسين عمرنه فدوه لعيونه
احنه الانصـار ابد لا ماتوانـينه
كل الارواح رخصنه ولجله ضحينه
مثل ما سوه الحسـين وياه سوينه
بكربله ابين السيوف ويـاه حجينه
انسمع احنه الناس
نحـلـف بعــبـاس
انضحي لحسين عمرنه فدوه لعيونه
احنه الانصار صبرنه مانفذ صبره
لجله منذورين احنه بعالم القدره
بكل شرف واحدنه من ينذر اله بعمره
حتى ترضه اعليه باچر فاطمه الزهره
حسين تاج الراس
نحـلـف بعـبـاس
انضحي لحسين عمرنه فدوه لعيونه
احنه الانصار هويـتنه خـتمناها
بدم الطـفوف عالصدور حملناها
احنه لحسين عهود الحق كتبناها
بعالم الذر هـالنحور نطـيناها
الحومه ماتنداس
نحلف بعـبـاس
انضحي لحسين عمرنه فدوه لعيونه
احنه الانصار عهدنه بس لبو اليمه
اله يتشرف الواحد يرخص بدمه
هالعهد واجب عـلينه واجب وذمه
ننصر المظلوم حتى نرتقي القمه
نسحگ الارجاس
نحـلف بعـباس
انضحي لحسين عمرنه فدوه لعيونه
احنه الانصار عـهدنه والهدف واحد
عالجره وصار نخلي الباري بس شاهد
بكل الاعمار نضحي احنه ونجاهد
حتى باچر اسمنه بالحشر خالد
لأخر الانـفـاس
نحلف بعــباس
انضحي لحسين عمرنه فدوه لعيونه
الشاعر السيد رياض الرسل الجابري
جسام عفتك رميه
جسام بالغاضريه
امك وانـوح انه اعـليك من حگهـا امك تنعه
بصوت الحزن يامذبوح من احچي انته تسمعه
بعـدك گمت بالحسرات للهـم غـصب اجرعه
من ابچي لجلك جسام مـن دم اصب الدمعـه
جسام ابچي المسيه جسام بالغاضــريه
لعيوني اعميها اعليك چي لن بعـد متشوفك
غـصـباً عليه جسام يـايمه راح اعوفك
لو ردت اجيك واحضر كعـبـه واجيك اطـوفك
والحنه اعجنها بدم من عدها احني چفوفك
جسام ومحنيه اديه
جسام بالغاضريه
ماعرست مثـل الناس يايـمه هذا امقدر
راح ابقه ابچـيك دموم ابچي وعـليك اتحسر
مكتوب الك بالمـيدان بين الـعده تـتوذر
وراح ابقه اون انه اعليك ياجـاسم واتصبر
جسام محـد اليه
جسام بالغاضريه
يبن الحسن يامظلوم بعـيـوني شلت ارسومك
ماحسـبت ياجـسام يـايمه هذا يومك
ولا فـكرت اشوفك تسبح بفيض ادمومك
ولهذا راح انه ابقه يايمه اشـيل همومك
جسام اسأل عليه
جسام بالغاضريه
من امك اخر وداع يـاغـايـتـي وآمـالي
يامنيتي وكل الناس يـا اغـله مـن كل غـالي
مجـبوره اعوفك هنا يـبني وثمر دلالي
مسبـيـه امك تروح يـايمه هذا الـتـالي
جسام شفت رزيه
جسام بالغاضريه
فتحت عزه لسان حال الحسين
الدنيه ماصد ليها
والابــو مـا بيـهــا
ياحزنها ياحزنها
بآخر انفاسي والك فـــايض حنيني
ياعـلـي وبالطــف تمنيتــــك تجيني
خطوه چانت من طحت بينك وبيني
من حضنتك تنزف وعـيـنـك بعيني
هسه روحي اشبيها
اتـريــدك اتحاچيهــا
ياحزنها ياحزنها
يـاعـلـي لمن طحـت والــراس دامي
انه مثلك هم طحت بس بويه ضامي
انته محـد سلبك سـلـبــو اخــيــامي
بهذا حالي ياعلي وابـعــث سـلامي
رغـم نــار افـراگــها
روحي هاي اشواگها
ياحزنها ياحزنها
طحت يابويه علي بحيره وندامــه
وتنتظـر ضلت بـيـاحـال اليـتـامـــه
چنت الهم ياعـلـي غــار وحمامـه
من رحت نادو على الدنيه السلامه
والايتامه اتشوفها
الليله انته تعوفها
ياحزنها ياحزنها
لحظة اوداعك احس نيران بـيـه
من اذكرك وانحب بكل معـربيــه
تبچي ردتك تحضر وللغاضريــه
هسه زينب ياعلي تبچي عـلـيـه
تبچي دم عـيـونها
وزينب ايسلبونها
ياحزنها ياحزنها
لاتنسون والدي وابني عباس من الرحمه والغفران
خادمكم رياض الرسل الجابري
تجليبه بحق الامام علي (ع)
الك يابا الحـسـن وسط الكلب جـمـره
انطبـرنه وياك كـلـنـا بساعة الطـبـره
السمه ويانه حـزينه وتبچي لمصـابــك
ومحـرابــك يـون من طحت محــرابــك
علينه مـو سهــل يـاحـيــدر اغــيــابــك
صعـب كلش عـلينه اغـيـابـك اشكـبـره
عـلينه اغـيـابـك اشكـبـره يحامي الجار
نـار وتـلـتـهــب وسط الــدلـيــل الـنــار
لـو ما الـغـدر ما طيحـــوا علي الكــرار
وانــتــه بطيـحـتـك راسم الــف فـكــره
رسمت النه الحيـاة بطيـحـتــك مــولاي
يل اسمك دوه وبي نشفه مــن كـل داي
بساعة ضربـتـك گامـت تمــوج اسماي
ونزل جبــريـل ينعـه ومنحـنـي ظـهـره
يـنـعــاك بــشــرف جـبــريــل ويـنـادي
من چـبـد السمـه الحـد اخــر الــوادي
طاح الـمــرتضـى طاح النـبي الـهـادي
لان نفس الـرسول المرتضى اتصوره
طاح المرتضى والـديـن كـلـه انصــاب
من عنه رحـل حـيـدرنـه داحي الـباب
بصـرخات اليتامه وشهگـت المحـراب
شــفـنـه الـديـن ينحــب لايــذ بكــتــره
لاذ الــديــن كـلـه بـسـاعـة الضــربــه
بچـفـك يـبـو حسيـن وخفـفـت تـعــبــه
مـن مثـلـك يحـيــدر مـارجـف گـلــبــه
من هـول المصيبه الــداميه الكـبــــره
لاتنسون والدي وابني عباس من الرحمه والغفران
خادمكم رياض الرسل الجابري
موشح علي (ع)
الليله نشكي الفاجعه الرب المعين
من رحل حيدر امير المؤمنين
الليله نشكي الفاجعه بدمع الصبر
على الهامه لاحته اچفوف للغدر
بسجده وبمحراب ودع هالعمر
وسال اشرف دم على اشرف جبين
سال اشرف دم لجل هذا الوجود
و دمه سر يبقه من اسرار الخلود
باچر بيوم القيامه من يعود
ايوقع بأيده صكوك العاشقين
ايوقع بأيده الصكوك اعله الخدم
ويمه واگف بالسجل راعي العلم
الياخذ الصك كون بي ريحت خيم
وكون باچي اعله الحسين بكل يقين
كون بي سولة بچي بگد الدمع
وعالاقل من اللطم كاسر ضلع
حتى حيدر من يشوفه يقتنع
وحتى يستاهل جزاء المحسنين
حيدر يجازي على اعمال البشر
بكل عمل انته تعمله وبي اثر
والاعمال امسجله يم المنتظر
والامام المهدي من الشاهدين
المهدي شاهد على اعمالك والفعل
بكيف امامك تنقبل ما تنقبل
وي امامك رابطه خلي وحبل
ولازم يكون الحبل حبل المتين
حتى حيدر بالحشر يشفع الك
باچر من اتدور ويدور الفلك
شما يصلي المايحب حيدر هلك
شما يقدم يصفه من الخاسرين
صيح من گلبك الليله بكل جرح
السيف مايعرف مقامه اشگد وكح
اتجاسر اعله المرتضى بفرض الصبح
ونزف هام المرتضى الدر الثمين
لاتنسون والدي وأبني عباس من الرحمه والغفران
خادمكم رياض الرسل الجابري
گعديه بحق الامام علي (ع)
هالليله انصيح بدمع الاحزان
تنزف شفناها احروف القرآن
ننحب وانوح بحسره
من شفنه براسك طبره
تنزف شفناها احروف القرآن
1
ياعلي من بعد موتك اكتشفنه سر وجودك
انته ميت وانته عايش اثنينهن بيهن خلودك
بمعركه ماراد موتك الباري خلاها بسجودك
راس العقيده ينفتح
بالسجده وبفرض الصبح
ياحيدر وتارك جرح
السيف واتعده حدودك
تختم عمرك ياحيدر مطبور
بهاي وكل ضنهم يخفون النور
شع نورك مثل الگمره
من شفنه براسك طبره
تنزف شفناها احروف القرآن
2
شما يمر الزمن خالد يبقه تاريخ المناضل
ياعلي وانته بخلودك باسل ومن ظهر باسل
وهالبساله الحسن منها حسين وچفوف ابو فاضل
تاريخك الحامل شرف
بالنور والرحمه انعرف
تشهد الك ارض النجف
مو حچي وتحصيل حاصل
رغم الزيف وكل ذيچ الاهوال
محد يحجب تاريخ الابطال
وتاريخك انته أشكبره
من شفنه براسك طبره
تنزف شفناها احروف القرآن
3
عشت عمرك نور ثاقب عالي مابين الكواكب
تنطي ماتاخذ يحيدر وللفقير اتحسبه صاحب
مستحب كل فعل ندري ياعلي وبس انته واجب
ربك بحكمه نزلك
وسلمك احكام الفلك
بيك اليشك حيدر هلك
وينجه كلمن بيك ذايب
بالمحشر ياهو الميشوف النار
بس الشايل صك من الكرار
ياحيدر وانته اتعبره
من شفنه براسك طبره
تنزف شفناها احروف القرآن
4
جرح طبره وراس دامي وليلة الوحشه الرهيبه
من حضن محرابه ينزف علي وبلحظه عصيبه
السمه ماطاحت وظلت عجبه وبهاي المصيبه
المفروض من سال الدمه
بهل فاجعه وهل موزمه
بطيحت علي اتطيح السمه
شلون ماطاحت عجيبه
ماطاحت چان المفروض اتطيح
هاي الدنيه وتتلاشه وي الريح
ربك منطيك القدره
من شفنه براسك طبره
تنزف شفناها احروف القرآن
5
وانتهت رحلت جهادك وانختم عمرك بطبره
يا امير الدنيا كلها شلون من بعدك الفقره
الليله ترحل وانته تارك
بالگلب ياعلي عبره
حزنك ابد ما ينجلي
يا اشرف واطيب ولي
فقره بغيابك ياعلي
ومنك احنه انريد نظره
ضاعت ياحيدر كل الاحلام
من بعدك هسه اشحال الايتام
والليله اتودع الفقره
من شفنه براسك طبره
تنزف شفناها احروف القرآن
المصيبه
غمضت عينك ورايح واتركت بينه المواجع
والاملاك اتنوح لجلك ياعلي بالسمه السابع
والحسن وحسين ينحب
وزينب اتهل المدامع
والكافل ايهل الدمع
وگليبه ذايب منفجع
ياحيدر ومثل الشمع
ولدك الليله عزاهم ومحد ايعوض مكانك
لاتنسون والدي وأبني عباس من الرحمه والغفران
خادمكم رياض الرسل الجابري
https://youtu.be/
كعديه بحق ابو طالب عليه السلام
كلمات رياض الرسل الجابري
الرادود ثائر ابو هوسه الحلي
ولادة الامام الحسن (ع)
يادنيه كل غرامي يادنيه من هيامي
أشواگي ارسمها بشفاف الزمن
وافراحي انثرها بالسر والعلن
نتلاگه بفرحتنه والهمسه وطن
والموعد هالليله ميلاد الحسن
هالليله كل كلامي يادنيه من هيامي
للمحفل هالليله جيت ومستعــد
وبگلبي شايلها باقــات الــورد
بميلادك من احضر اي عندي قصد
بالمحشر اضمنها جنات الخلــــد
بالمحفل اعتصامي يادنيه من هيامي
بعرش الله ميلادك صيته من وصل
بارينه دز وحـيـه عالهـادي نـــزل
بالمحفل من يحضر هذا اعظم عمل
معـنـاهــا لليحضر عــد الله انقـبـــل
ابعثله كل سلامي يادنيه من هيامي
بحروفي اهمسلك واسمعهن حچن
محتاجك مـر بيه والدمـعـه ثـمـن
محبوبي افــراحي يم بابك صفــن
عالدنيه شع نورك يا اجمل حسن
بس لجلك كل قيامي يادنيه من هيامي
مرسومه همساتي بشفاف النده
وگليبي بالفرحه هالليله موعـده
كل حفله مــن الله هـيـه امئـيـده
للغـالي بمـيـلاده خلي انعـاهــده
اهديله احترامي يادنيه من هيامي
اهديله كل عمري واختم بالعهـد
باصمله بـدمايــه وانطيته عهـد
ماعــوفـــه بالخدمه باقي للابــد
بالمحفل ناديته محـبــوبي مـــدد
ماعوفك يا وئامي يادنيه من هيامي
لاتنسون والدي وابني عباس من الرحمه والغفران
خامكم رياض الرسل الجابري
مربع لولادة الامام الحسن (ع)
هله بنور الحسن لمن بزغ بدره
1
هله وميت هله من البدر شافه
ظل محتار لمن شاهد اوصافه
البدر يمه نزل حتى السمه عافه
مذهول البدر ظل حاير بأمره
2
هالليله علينه الحسن هل نوره
سبحانه الجليل الصوره بصوره
درر چنه الحسن والدرر منثوره
من حيدر جماله وفاطمه الزهره
3
هالليله جماله ايشع ضوه واحساس
الملائك تحسده وشحال گلي الناس
من كل شر اعوذ الليله والوسواس
من عين الحسد من عين كل نظره
4
من بيت الوحي نور الحسن طالع
وبگلب الموالي نوره ظل طابع
نظره الهل حفل من الحسن طامع
بي ادري كريم وينطي للفقره
5
طماعين احنه الليله منعوفه
وكل مخلص حضر متأكد ايشوفه
حلفه بضلع امه ويكرم ضيوفه
واتصوره الحسن من يكرم اتصوره
6
اختم بالتهاني والگلب هايم
واتمنه يربي هالحفل دايم
هنيالك الزهره اتسجلك خادم
بميلاد الحسن واتوقع العتره
لاتنسون والدي وأبني عباس من الرحمه والغفران
خادمكم رياض الرسل الجابري
قصيده ولادة الامام الحسن عليه السلام
١٥ رمضان
اول انواره السماويه
من علي شع بمعانيه
للحسن بارينه من راده
نزله بحكمه آلهيه
١
اشرق الليله بجماله والحسن رباني
اغله كل الناس عندي وعايش بوجداني
منهجي وسبحت صلاتي والحسن قرآني
بجده وبنهج الرساله
مكتمل أيماني
مولدك آيه
يبو احچايه
بترافه فاطميه
تبقه محبوبي
ضوه ادروبي
الك روحي هديه
افرح اشگد بيه مابيه
واحمل بنص گلبي حنيه
للحسن والباري ياساده
نزله بحكمه آلهيه
٢
بالسمه وجهك يلالي
وانعكاس بنوره
عالارض يرسم جمالك
تزهي اجمل صوره
يالحسن نورك تجله
يشبه البلوره
روحي من حضرت تشارك حضرت ومسروره
الك اتعنه
عطر جنه
واشمك هالمسيه
ساكن احلامي
ألك ضامي
تظل روحي وفيه
ليله بس بالمنتصف هيه
من شهر رمضان قدسيه
الليله خل اتموت حساده
نزله بحكمه آلهيه
٣
انته عنوان القداسه والجمال الراقي
يالحسن بالروح انته وساكن بأحداقي
الك كل اسنين عمري
والك فيض اشواقي
كلها من الگلب تطلع
وانته وحدك الباقي
عايش وياي
يمولاي
يبو الروح النقيه
وانه ممنون
اذا كون
الك اخذ تحيه
ابصم بروحي الحسينيه
للحسن بصمه ولائيه
بالفرح جبريل من ناده
نزله بحكمه آلهيه
٤
يالحسن عشت بضميري
وبدموع الناظر
ارسم الليله بشجوني وبخيال الشاعر
الك همساتي واحسك
أنته يمي وحاضر
يالحسن تاخذني نصعد عالبراق انسافر
نصعد انحوم
عالنجوم
شرط فوگ الثريه
نرحل ابعيد
احس عيد
اذا تلزم اديه
گلبي ويحقق مساعيه
يمك بأوله وتاليه
للحسن وبفرحة اعياده
نزله بحكمه آلهيه
٥
اختم بصومي وصلاتي وافطر بميلادك
لان بارينه العلينه
اول انته رادك
احتفل واحضر الليله
وافرح بأعيادك
بغيض خلي اتموت كلها
يالحسن حسادك
واليحسدون
يموتون
ولا منهم بقيه
بس الاحباب
عالعتاب
يحضرولك سويه
احضرنه للراضيه المرضيه
ومنها نطلب احنه ليله
نظره منها انريد وزياده
نزله بحكمه آلهيه
لاتنسون والدي وأبني عباس من الرحمه والغفران
خادمكم رياض الرسل الجابري
موشح بحق ابو طالب والسيده خديجه
الليله حزنان النبي ابدمعه ويون
شلون عام ايمر عليه عام الحزن
مثــل هذا العام مامــر مستحيل
عالرسول وشاب شعره والدليل
ابــــو طالب چان اله اب وكفيل
والرسول ايحس اله چان الابن
ابو طالب حامه عن اشرف نبي
حـتى بـالشـــر مايمسه الاجنبي
مخلص الـديـنـه آبي ونعم الآبي
وذني لازم للبشــــر يـتــوضحن
والنبي بعام الحزن هـل دمعـتـه
لأعظم اثنين بحياتــه ودنـيـتـــه
ابو طالب والخــديـجــه مهجـته
والمثلهم حـگـه يشتــاگ ويحن
مدري ينعه عالكفيل بهل مصاب
لو على الخلصت عمرها بالعذاب
والخديجه النبي يشعر گلبـه ذاب
وحگه من يحزن وگـلبـه ينسحن
ياخديجه ينـادي ودمـوعه دمه
لان تستاهل بچـت حتى السمه
ياخديجـه شحـال بنـتـچ فـاطمه
اتمنت وياهـا بگـبـرها تـنـدفـن
ياخديجه ينادي محتار اشيگول
وحاير اشيحچي ويعاين للبتول
الليله الله ايساعده گلب الرسول
الليله بالاحـزان گـلـبــه مرتهن
خلي نتوجه الليله بهـل مـقــــام
وخل ننادي العجل مولاي الامام
يمته يوم الفرج بس بيا كـــــلام
بالدعاء وانصيح كل احنه بسجن
لاتنسون والدي وأبني عباس من الرحمه والغفران
خادمكم رياض الرسل الجابري
ميمر للخدام 2
عهد الخدم واهل الشيم
انكتبه الاخت راعي العلم
يازينب بدمع العين عهد الوفه يكتبونه
1
مسوؤله زينب عالخدم بالمحشر
وشلون توصل الها وبلا معبر
هاي الوفيه اشقدمت تتصور
چفين قدمتلك وعين ومنحر
اتهل الدمع هم مقتنع
الزينب تهشم چم ضلع
والخدم ادري ايصونو للعهد من ينطونه
2
يالخادم الزينب شرف تبچيها
وتشعر امقصر لو عمر تنطيها
حتى تحس مقبول فاير بيها
تاج اعله راسك زينب اتخليها
وكت الشدد زينب سند
لمن تناديها مدد
الخادمها تحضر والله وتعرفه من عيونه
3
بالك تحس متعرفك انته الحره
بكل مجلس الخادم تجي وتحظره
زينب اميره وبالخدم مفتخره
هنيالك وتخدمها بنت الزهره
الخدمه درس وعزة نفس
من عدها كلشي تقتبس
واليخدم اخت المظلوم بين الخدم خي عونه
4
زينب اليخدمها بصدق تندله
من دون كل هاي البشر يتعله
اذن عليها المجد فرضه وصله
معناها للخدام اشرف قبله
شمعة مجد من تتقد
للمدمع اتگلبه ورد
اتريد الشعائر بالروح تبقه وتظل مصيونه
5
بهاي السنه رايه تسابگ رايه
شافوها والعالم عرفها الغايه
بالاربعين چفوفها امحنايه
يحسين الك كل الخدم مشايه
رغم الخطر وكل الحذر
هتفت اجنود المنتظر
صگ الخدامه يحسين بالدم تره يوقعونه
الشاعر السيد رياض الرسل الجابري
نعي للقاسم
ماذا تقول رمله ام القاسم لولدها
تعال اشبر بطولك گبل متروح
على طولك اريد ابگدهن اجروح
ماريدك تجيني بثغر باسم
اريد اجروح كلك يمه جاسم
حتى امك ابگد اجروحك اتنوح
1
اريد ابچي اعله طولك دمعه دمعه
حتى اعجن الحنه وانه انعه
المثلك للعرس متفيده شمعه
لان عمك وحيد وراد فزعه
گوم انهض حبيبي و روح يمه
هنياله ييمه اليفدي عمه
لحسين اليقدم روحه مسموح
2
ما اگدر بعد يمي اخليك
ييمه تنذبح اول وتاليك
اريدن من تجيب الناس طاريك
احس اجروح كلي وانفجع بيك
يسولف گلبي عن لوعت عذابه
واگولن ماتهنه ابني بشبابه
يجاسم يمه بيك امعلگه الروح
3
كبرت وكبرت وياك الاماني
يجاسم يبني وانطيتك حناني
السهام البيك غدرت لو زماني
لأن هسه السهم ماخذ مكاني
تمنيت الجروح البيك بيه
لأن بعدك ازغير عالمنيه
ودمك عالارض يايمه مسفوح
الشاعر السيد رياض الرسل الجابري
نزله للعباس سريعه
يبو فاضل
1
تعنه الحومه شل كل الكتايب
خلسها وبعد ماتحچي الشوارب
تظل العين ماتعله الحواجب
حليب ام البنين بزوده شارب
ترد عايل يبو فاضل
2
دخل للمشرعه وكلها صگرها
يويلي للزلم لمن ظفرها
الزلم كل الزلم بصنع يفرها
ابو فاضل يظل عزها وفخرها
خبر عاجل يبو فاضل
3
حمل حملة علي بزود وعقيده
گلبها المشرعه والرايه بيده
جهنم لو غضب ابن الصميده
صعب عباس متوصفه القصيده
غضب شايل يبو فاضل
4
ردم روس الزلم والموت شافه
تحذر من اجاه يمسح اچتافه
اخذ فوگ النهر نوط الخلافه
رغم كل هذا بس مملي ترافه
لچن قافل يبو فاضل
5
على اجروف النهر راسم علامه
جهنم راسم وكاتب قيامه
يسويهن اجه وشاهر حسامه
هذني من اجل حبه لأمامه
شنو الحاصل يبو فاضل
6
شجاعه ومرجله كلها صفاته
عبد لحسين خلص كل حياته
وفي العباس وبنكران ذاته
يجيب الماي اجه بجوده الخواته
شرف حامل يبو فاضل
7
بعد ماداس بجدامه الضحايه
دخل وسط النهر بس عدنه غايه
ترس جوده وترفرف بيده رايه
نظر للماي بس ماشرب مايه
لأن عاقل يبو فاضل
8
طلع من النهر وبأيده سيفه
نظرهم صاح يحفاد السقيفه
صرخ دلهم وصاح ابلايه خيفه
لأن ناوي يحاسبهم بكيفه
فلا ايجامل يبو فاضل
9
انهشم راسه بعمود وما تأثر
لأن گايل الزينب ما اتأخر
ثبت فوگ النهر تربات حيدر
بخزرته مابقه اتطشر العسكر
بنصر حافل يبو فاضل
10
بعد ماطاح دامي وچان حاير
تبده الجود بس بعده يكابر
انطفت عينه بسهم ذيچ العساكر
لچن باقي وتخلد بالضماير
يهل سائل يبو فاضل
الشاعر السيد رياض الرسل الجابري
قصيده بحق العليله
------------------------
انـاديـك بــدمـعـتـي يبويه انه العليله
تذوب الصخر ونتي يبويه انه العليله
حـرت بـمـري
وانـه بـزغـري
يبويه انه العليله
--------------------
الك اشـكـي الليالي اشسون بحـالـي
بعـد مارحـتـوا عـني وانشـده بـالـي
گمت احسد يـبـويـه كل گـلـب خالـي
گلت اصبر وشوفـن والعـوض تالي
دمعـتي بطرف خدي يبويه انه العليله
اگضي الليل وحـدي يبويه انه العليله
ضعـف صبـري
وانـه بـزغـري
يبويه انه العليله
-------------------------
اگضي الليل وحـدي بـدمـعـي اتصبـر
على الفـرگـه يـبـويه وتدري ما اگـدر
بـالگــوه اصـبــــر روحـي واتـنـطـــر
يجي وياخـذني مو كـتـلي علي الاكبـر
اساهـر وحشه الليل يبويه انه العليله
بعـد مابـيـه كل حيـل يبويه انه العليله
انـشـده فـكـري
وانه بـزغـري
يبويه انه العليله
-----------------
بعـد عـيـنـك يبويـه اتسله بـونيـنـي
لأن راح اليـفــــرحـنـي ويـسلـيـنـي
اناشد گمت روحي وبدمعتي بعـيني
معـقـوله ابـويـه الـغـالـي نـاسـيـنـي
نسيـت الـي تحـبـك يبويه انه العليله
چنت ساكنه بگلبك يبويه انه العليله
الـدمع يـجــري
وانـه بـزغـري
يبويه انه العليله
----------------------
عـلى فـراگ الاهـل يـابـويـه شـتـحـمـل
من ضيمي وعذابي بروحي گمت اسأل
تـرضـه شـلـون ابـقـه الـوحدي وتـقبل
عـلـيـلـه تعـوفـني يـابـويــه مـن تـرحل
صعب اصـبر بلياك يبويه انه العليله
لون ماخـذني وياك يبويه انه العليله
شعـمـل دهـري
وانـه بـزغـري
يبويه انه العليله
---------------------
الك اخـتـم كـلامي ودمعـتــي بخــدي
يمـر وحـشه بغـيـابـك ليلي ويـعـدي
گـمت اشعـر زماني واگـف بـضـدي
لأن خــلاني بـويـه هـالـزمـن وحـدي
انـاطـر تــرد لـيـه يبويه انه العليله
صفت داري خليه يبويه انه العليله
بطـرگ قهـري
وانـه بـزغـري
يبويه انه العليله
--------------------
الشاعر السيد رياض الرسل الجابري
الانصار
انصار وخدم ذوله اهل الشيم
الله اختار السبعين
انصار بحب حسين
ذوله اهل الشيم
1
الباري من يحب انسان يختبره
الشجاعه والابه وبعاطفة صبره
والانصار ضحو للنذر عمره
خاطر ترضه عنهم فاطمه الزهره
ضحوا بالنفس ونطونه درس
الله اختار الطيبين
انصار بحب حسين
ذوله اهل الشيم
2
من دارت رحاها المعركه بأصرار
بيوم الغاضريه انكشفت الاسرار
ياهو اوي الحسين وياهو عنه اندار
محد ماثبت بس ثلة الانصار
حامو عالخدر ضحوله العمر
حملوا حبه انياشين
انصار بحب حسين
ذوله اهل الشيم
3
تقدمو والمنايه اتصيح بالحومه
الرجل لمن يموت بساعته ويومه
وانصار ابو اليمه اسماء معلومه
عبد بيهم وحر والشگگ اهدومه
منهم والنعم بالحومه الزلم
كلهم يملون العين
انصار بحب حسين
ذوله اهل الشيم
4
حب حسين شالوه بالضمير امتاع
اختيار الباري والنعمين ذوله اسباع
سفينه حسين وانصاره بشرف لشراع
هلا بالموت نادو لون صار
اوداع
واحدهم هتف حي اعله الشرف
بدروب العز ماشين
انصار بحب حسين
ذوله اهل الشيم
5
قدموها المناحر لبن داحي الباب
وفتحو للنصر چم معجزه وچم باب
الله راضي عنهم ثلة الاصحاب
نذكرهم الليله والدمع سچاب
صح قلة عدد ماخانو عهد
مذكورين بكل حين
انصار بحب حسين
ذوله اهل الشيم
6
زهير ونافع وجون وبعد فارس
للانصار شيخ ومحد اينافس
حبيب اسمه وبرير وشوذب وعابس
واحدهم صبح لبن النبي حارس
واحدهم علم قمه اعله القمم
بهذا الحب مقتنعين
انصار بحب حسين
ذوله اهل الشيم
الشاعر السيد رياض الرسل الجابري
ابوذيات للعليله
1
يبويه عالضعن عيني ترابي
وغطه عيوني ماوچد ترابي
عليله والگلب باقي ترابي
جرح من فارگت سكنه ورقيه
2
عليله وينسمع واضح تراني
تره أني
اموتن ما اضن ابقه تراني
يبويه هم بعد عينك تراني
واضمك بالدمع بثنين اديه
الشاعر السيد رياض الرسل الجابري