1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
قصيده بحق القاسم بن الحسن (ع)
طاح القاسم
وبالدم راسم
وجه الكون
من طاح بياحاله
من ثغره ويتلاله
وجه الكون
١
امن الخيمه طلع يتلاله وجه النور
لابس لامته يمشي ويحس مسرور
شايل جرح صبره والمنايه اتدور
ترك بصمة غضب سيفه بكلب عاشور
ياخذ حيفه
وراسم سيفه
وجه الكون
وتشوفه الخياله
من ثغره ويتلاله
وجه الكون
٢
وجه نور الحسن لمن طلع ازهر
بوجه القاسم وبالحومه يامنظر
الناس اتشاهد الايمان والكوثر
صورهن الباري بنسخه من حيدر
سحر عيونه
وشايل لونه
وجه الكون
والصاحو هنياله
من ثغره ويتلاله
وجه الكون
٣
مو مالت حرب صاحب وجه شفاف
من حر الشمس لازم عليه ينخاف
المذهوله بجماله وحايره الاوصاف
هسه بمعركه هذا الوجه ينشاف
وبيا صوره
شايل نوره
وجه الكون
نوره ومحد شاله
من ثغره ويتلاله
وجه الكون
٤
طلع بسمة وجه والدنيه متعطره
شايل سيفه يلمع والضوه بثغره
يعاين على الجيش ومستخف بامره
مثل عباس عمه البل وفه اشكبره
شاف العسكر
بنوره وازهر
وجه الكون
والبسمه التحلاله
من ثغره ويتلاله
وجه الكون
٥
طاح وراسم بدمه ورود وياس
الشمس نزلت تبوسه المثله اي ينباس
مو دم ينزف المذبوح من الراس
مشاعر فايضه بوجدانه والاحساس
رقه بموته
وراسم صوته
وجه الكون
حب ينبض دلاله
من ثغره ويتلاله
وجه الكون
لاتنسون والدي وابني عباس من الرحمه والمغفره
خادمكم رياض الرسل الجابري
حميده واولاد مسلم
حميده تنادي بدمـوع المصيـبـه
رجعت من اليسر واشعر غريبه
ولا واحد سمعها
تنادي بكل دمعها
وين اخوتي وين اخوتي
1
بعـد ماراحـو اهـلي ومشـو عـنـي
بقـيـت الــوحــدي ايسـلـيـني وني
بعـد فگــد اخـوتي مـذهـولـه چني
زغـيره ومن مشيت الظهر محني
صحت وانه زغيره وفاگده الراي
حميده انه اشعـجب شو محد وياي
ابد ميسر وضعهــا تنادي بكل دمعها
وين اخوتي
وين اخوتي
2
عـافـوني ومشـو وسط البـراري
ونحروها غصب ذيج الصحاري
يمشون بـرعـب والـدمـع جاري
وانه الـعـايشه بـلـيـل انـتـظـاري
عافـوني ومشو وبـدمعي انادي
اثنين اطفال تاهو بالبـوادي
تحس محني ضلعها تنادي بكل دمعها
وين اخوتي
وين اخوتي
3
اخوتي ازغـار من حقهم يتيهون
غـيـر العـز اخـوتي مـايعـرفــون
من فـرو الـلـيـل بطـولـه يمشون
ولوصار الصبح خـوفـاً ينـامـون
ميسمعوني مهما صحت ناديت
حميـده ولحضـنهم انه حنيت
صده الخوه دفعها تنادي بكل دمعها
وين اخوتي
وين اخوتي
4
گـلبي حس عـلـم بالصار بـيـهـم
اخـوتي ابعـاد ما اگــدر اجـيـهـم
بكل حقده اليضدهم وصل ليـهـم
عـرفهم من بـدو همه بحچـيـهـم
اهنا حقي امن اصيحن لحظة الموت
حتى لو صحت ماينفع الصوت
صده الصوت اشنفعها تنادي بكل دمعها
وين اخوتي
وين اخوتي
5
راد الجايـزه بحـقـده الـزمهـم
ذوله اولاد مسلم من عـرفهـم
اشگد اتوسلـو بيه ماتـركهــم
اخـوتي اثنينهـم بيده ذبحـهـم
اخوتي انذبحو وعـنهم بعـيـده
كون وياهـم انذبـحت حـمـيده
رگبهم من گطعها تنادي بكل دمعها
وين اخوتي
وين اخوتي
لاتنسون والدي وابني عباس من الرحمه والغفران
خادمكم رياض الرسل الجابري
ام البنين وخدمة الحسين
الله شرفني بعلي وبخدمة أولاده
شرف إني أم البنين واخدم الساده
اشعـر بواجب و دين
إني من اخدم حسين
شرف إني أم البنيـن واخدم السـاده
الله شرفـنـي ورفعني بهـيبته وقدره
والي يختاره يكرمـه بعزه ويـنصــره
إني خدامـه جعلـني الـبـاري وبأمـره
أبيت حيدر حتى عني تقـبـل الزهـره
جنت اسهر ليلي كله وابد مانـامـه
ﭽنت إني أبيت حيدر جنت خدامه
عن درايه وعن يقين
إني من اخدم حسين
شرف إني أم البنين واخدم الساده
شرف هاي الخدمه اعرف ترفع الإنسان
والي يخدمهم بعمره ابد مو خسران
أيميزه الباري برحمـته ويرتفع له شان
وتاج يلبس بالخدامه ويعـتـبـر سلطان
واني سلطانه بخدمتي واخدم بعمري
حتى بالمحشر اريدن يرتفع قــدري
فاطمه اتكحل العـيـن
إني من اخدم حسين
شرف إني أم البنين واخدم الساده
الحسن إني من اخدمه الباري يرفعني
الهل مقام السامي واعرف حبه يدفعني
الحسن أغله من حياتي واعرف شأعني
بهل كلام وردت إني الـزهـره تسمعـنـي
للحسن إني من اخدمه إني يالزهره
شلون باﭽر من اشوفچ اشعر امقصره
ارتجـي بـمـد الاديــن
اني من اخدم حسين
شرف إني أم البنيـن واخـدم الساده
الزينب اشعـر بالسعـاده لمن اخدمـهـا
لأن ادري بيها بـاچــر كلهـا تظـلـمـهـــا
شرف للخدامه مثلي اتشمها واتـظمهـا
لان ورثـتهـا المصايب كلهــا مــن أمهـا
من زغرها وانظرلهـا احس مهمومه
چـنت اسألهـا وتگلي اني مظـلـومه
ردت زينب ترضه زين
إني من اخدم حسيـــن
شرف إني أم البنين واخدم السـاده
والحسيـن الخلي اسمي الكل يعرفونه
شلون ماخـدمـه بحياتي واني ممـنـونه
شيسوه عمري خلاف عينه شيسوه من دونه
اشعـر إني بكل خدمتي بيده مـرهونه
عني لو يرضه أبو اليمه الباري يقبلني
وبسجلها الزهره ترضه من تسجلني
الگه هاي الخدمه وين
اني من اخدم حسيـن
شرف إني أم البنين واخدم الساده
لاتنسون والدي وابني عباس من الرحمه والمغفره
خادمكم رياض الرسل الجابري
ام البنين
الج هـالليله الـونين
والكلب ذايب حنين
نبجي يا ام البنيـن
ابدمع العيون
كلنه هالليله بــدمــع نبچي سويـه
وابـد منـوفـيــچ احــنــه يالــوفيـه
هــواي قــدمـتـي يحره يــالآبيـــه
ردتي بفعالــچ تجازين الــزچــيـه
الچ هــالـليـلــه نـــون
وكل گلب ضل ممتحن
نبچي يــــا أم الحــزن
بدمع العيون
الچ يا ام البنين شما بچــيـنـــــه
نشعر مقصرين وابدن ماوفـينـه
من تحضرين بمجالس يالحنينـه
انادي كلنه بالدمع عينچ عـليـنه
نظره من عندچ نـريــد
انحلفچ بـدم الشهــيـــد
خادمچ يحچي وسعـيـد
بدمع العيون
الليله يم عـباس كل احنه حضرنــه
انريد من عـنـدچ يمهيوبه آجرنـــه
على امحبـتچ والخدامه احنه كبرنه
وبالمجــالس الچ خلصنــه عمرنه
بكل محبه وعاطفـه
وعن يقين ومعرفه
نبچي يا ام الوفــــه
بدمع العيون
الليله احنه انسولف بــدمع النـدامه
ونشعر مقصرين احنه بالخــدامـــه
الخادم اليخدم يحس انتي ضمانـــه
ولو طلعنه انريج من عندچ علامه
انريد من عندچ قبول
انتي يا ام الفحــــــول
انحلفچ احنه بالبتول
بدمع العيون
على عناد الناصبي وكل العــــواذل
نبقه نبچي اعليچ احنه بدمع هامل
مــاتــرديــن اليـمــد الآيـــــد سائل
بس يحلفچ يالحبيبه بـأبـو فــاضل
يــابعــد روحي وهـلـي
بيــچ احـنــه نعــتــلـي
انحلفچ بــداعــت علي
بدمع العيون
سفره سويـنــه الچ والگلب لايـج
انريد منچ احــنــه هالليله النتايج
كل گلب يم البنين بشـوگــه هايج
بسم الحسين ونـقـدمهـا الحوايج
يلي ماعـنـدچ ضريح
نشتـكـي للباري ونصـيـح
ما يصح الا الصحـيح
بدمع العيون
لاتنسون والديوابني عباس من الرحمه والغفران
خادمكم رياض الرسل الجابري
موشح الانصار
انتو انصار العقيده وشانها
انتو امجاد الوغى وفرسانها
١
يارجال العزه والحق والثبات
يا أسود الغانمه ومعنى الحياة
كل أسم من ينذكر بالصلاوات
لون رادت تشتعل نيرانها
٢
ودارت المعركه بنيران وسهام
والأنصار الحرسو احدود الخيام
قدمو اعمار ومناحر والكلام
ترجمو أهل الوفه وعنوانها
٣
اول الاسماء قاتل بأقتدار
عاصب عيوني نزل والراس حار
والنعم منه برز شيخ الأنصار
ياحبيب الچان عزها وشانها
٤
اتقاتل وعالم فقه يابن خضير
وسيد القراء انته يا برير
بروح وحده تنزل انته وي زهير
والهوه انسد بوسط ميدانها
٥
ومسلم بهمه نزل بن عوسجه
من نزل للزمن گام ايحاججه
محد اتقدم ومن سيفه نجه
من توسطها ارتفع دخانها
٦
دارت المعركه واتفرج تعال
من تقدم بيها نافع بن هلال
والحسين ايشاهد بعينه الرجال
ياهو خان العشره ياهو الصانها
٧
شوذب وجون الرجل يم الرجل
ثابتين بمعركه ودگو رجل
الموت طوقهم مثل طوق الحجل
وشجرة المعركه همه اغصانها
٨
وآخر الانصار نازل مدري وين
مزگ اثيابه وصرخ ياسامعين
انه عابس انه مجنون الحسين
صوتي يوصل للسمه واعنانها
لاتنسون والدي وابني عباس من الرحمه والغفران
خادمكم رياض الرسل الجابري
الانصار
نفدي الاعمار
احنه الانصار
لحسين وماغيره انعاهد احنه ونختار
على ادروب المنايه ارسمنه لوحتنه
حتى بكل شــــرف تعـله كـرامتـنـــه
انصار الحسـيـن الـدنـيـه سمـتــنـــه
والــزهــراء خـتمـتـهـا الهـويـتــنــه
قدمنه انحـور احنه بعاشور
چنه بظلمه بغير حسين وياه شفنه النور
بذلـنـه الغالي لجله ونشعـر بحسره
اذا قصرنه بـيـش انـواجه الـزهـره
لأن لحسـيـن كلمن ما اجــه ينصره
باچـر بالحشر الــزهــره مـتـعــذره
قـدمـنه الروح من شفنه اتلوح
لسيوف الرادت تشربها ادموم المذبوح
عـرفناها الحـقـيـقه وكلنا بـايعـنـاه
لذلك كل عـزيــز وغالي قــدمــنـاه
رخصناله بعـمرنه من مشينه وياه
و لاخـفـنـه المنايه وكلنا عاهــدناه
لجله مضحين ولهذا الدين
نرخص كل ادمانه ونشعر احنه مقصرين
مشينه بكل عـزمنه الـثـابت بأيمان
ندافع عـن حقوق و ذات كل انسان
المايمشي بنهج دين النبي خسران
يعـني مايـوالـي العـتـره والـقــرآن
واحنه بكل زود صرناله جنود
ودمانه النرخصها بحبه تصير النه شهود
تركنا اعيالنه وصحنه بعلات الصوت
لجل حسين نمشي وعالمنايه نـفــوت
شلناها المحـبـتـــه وبالگلـب منحوت
لذلك مايهـمـنـه ونفتخــر بــالمــــوت
اصبح عـنـــوان حب العطشان
حسين الخله بدمه الطاح تموج الاكـوان
لاتنسون والدي وابني عباس من الرحمه والغفران
خادمكم رياض الرسل الجابري
موشح بحق مسلم بن عقيل
مسلم اتعنه ومشه بحاديها
رايته لمن مشه ايهز بيها
راية الحق حمـل مسلـم رايـته
ترف بـيده والمــلائك شـافـتـه
اتوكل اعله الباري وانوه برحلته
راد يلقي الحجه من يرويها
راح للكوفه وتعــنــه بكـل يقين
ماخذ وياه كتب كتبوها لحسين
من وصل چنه امير المـؤمنين
اچفوفه محد يگدر ايلاويها
وصل للكوفه ولقه اعليهم الصار
ابـن عـم حسين شايـل ذوالفـقـار
كلها وياصارت ولاچـن احتـار
بعد ما بيها انخدع تاليها
گوم ماعـدها ضميـر ولا شرف
انخدع مسلم بيها تالي للأسف
المال والـدينار غـايتها وهــدف
زلم تگدر لو ردت تشريها
راح يم طوعه وطلب من عدها ماي
وطوعه سألت ياغـريب امنين جاي
گلهـا مسـلم والعده كلها وراي
الكوفه غدرت بيه مدري اشبيها
دخل يم طوعه وطلع يحمل غضب
مسلم ايعرفوه ابن سيـد العرب
قاتل وفـنه الــوصل يمـه گـرب
اسوايه سوه المحد امسويها
هذه مسلـم قـاتل بهـمه وثبات
ورسم لوحه بكل مفاهيم الحياة
مثل عـباس الـوگع يم الفـرات
رايته اترفرف يضل ساريها
بسم مسلم نهتـف الليله ونگول
كون تتقبـل عزانـه ام الرسول
فاطمه الزهره ونريد احنه القبول
والحوايج يمها وانخليها
لاتنسون والدي وابني عباس من الرحمه والغفران
خادمكم رياض الرسل الجابري
نعي قصة استشهاد مسلم (ع)
مسلم يدير وجهه فلم يجد احد خلفه في الصلاه
نعي
بصلاتي وياي شو كلمن مشه بدربه
صعبه اهواي يا أهل الشيم صعبه
بعدني بالصلاه ماجايكم طلاب
لجل حسين جيت وكلمن ايحبه
خذلتوني وبقيت اتلفت بمگفاي
عفتوني وحيده بديرة الغربه
ثم يقول مسلم يقول ايها الناس لايوجد مجير يجيرني وانا سفير الحسين
نعي
سفير الكم اجيت وكتب جبت وياي
وداني لحسين وهسه الكم جاي
محد مايجير الگاصد امن بعيد
حسبت حساب اهلي ومادريت اعداي
عليكم ضيف اجيت وعادت الخطار
من بعد الهله يكرموه بطاسة ماي
حسافه من وصلت الكوفه ياهل ناس
بماي الوجه جيت وماشفت شراي
ثم مسلم يقول وهو يدير وجهه صوب المدينه
نعي
الوادم بيه غدرو لاتجي يحسين
ومن ارض المدينه بالك وتطلع
ضل بيها عزيز وبالأهل مهيوب
اخذ الحذر مني انچانك تسمع
لتفكر وتمشي الوادم ايخذلوك
مينصروك أبد لا تطلع وارجع
نعي
مسلم لسان حاله يقول محتار اي باب يطرق وهو غريب في المدينه
محتار بطريق الغربه والخذلان
ياباب اليدگه ويگصد اليا دار
معقوله الجره معقوله هيچ ايصير
مسلم وحده باقي بغربته ومحتار
الوادم غدرته والدمعه وسط العين
المن وين بعد ايوجه الانظار
ثم فجأه يرى نفسه امام باب طوعه
ثم يقول لطوعه
السلام عليك يا امة الله
ثم يقول امة الله انا عطشان فهل لي بشربة ماء
تقول له سمعا وطاعه
نعي
يوصف كيف مسلم عطشان ويطلب الماء من امرأه غريبه
طاسة ماي اطلب واحنه اصل الماي
ديره وللأسف وادمها خذلوني
ادير الوجه المن والوجوه اغراب
ادور ماي اشرب ليش خلوني
وانه جدي النبي المختار ياهل ناس
السمه واهل السمه مسلم ايعرفوني
ثم تجلب طوعه الماء ويشرب مسلم
ثم تدخل للبيت وتخرج مره ثانيه وتقول لمسلم اذهب لأهلك لايحق لك الجلوس على باب داري
ثم تدخل طوعه لبيتها ويبقه مسلم محتار امام باب طوعه
نعي
يوصف حالة مسلم وطوعه تطرده من امام باب دارها
لا تبقه اعله بابي اشربت مايك روح
لهلك ياغريب وحار بضنونه
لا توگف ابابي وحقها هاي الناس
هالواگف غريب ومايعرفونه
بقه حاير وصافن مسلم ومحتار
بيا حاله صفه والدمعه بعيونه
ثم يدخل الى داخل الدار ويكون حوار بينهم لحد
يقول لها سوف يأتون سبايه من كربلاء
ومن بين السبايه طفله اسمها حميده اخبريها بما جرى عليه
نعي
لحال حال طوعه تتكلم مع مسلم حول ابنته حميده
نعي
من يوصل ضعنهم اسأل اعليها
وبعيوني يمسلم انه اخليها
تجي من اليسر تعبانه واجدد كل حزن بيها
واگعد انه وياها واسولف بالدمع ليها
كل الجره وصار اعليك واضل ابچي وابچيها
وعدما يقف مسلم على قصر الامار قبل قطع رأسه يصلي ركعتين
نعي
يوصف حال مسلم قبل الذبح
وداعاً ياحسين من الصبر للموت
ارسلك سلامي بدمعه بعيوني
لاتحضر الوادم تشتغل بالخوف
مابيهم رجه والگوم غدروني
لاتحضر الوادم أبد ما يردوك
چذابه كتبهم للأسف خدعوك
نفس العل قصر خداعه كل الناس
باچر لو اجيت بكربله ايذبحوك
لاتنسون والدي وابني عباس من الرحمه والغفران
خادمكم رياض الرسل الجابري
ميمر مقدمة عزاء
خل نبدي بسم ادموعك التملي العين
لا تسأل اعله مأتـــم امنيـــن اويــن
اول متبدي سلم انته اعـله حسين
احضر بدمع الاخلاص مني وأخذ معلومه
من تحضر المجلس وعندك واهس
سود الملابس احضر انته ولابس
من تلطم اعله حسين انظر عابس
من كثر ما جن يحسين بالحومه شگ اهدومه
للنيه صفيها وعــزائك حضره
وگدام عينك خلي بس الزهره
لتخلي بالك عالأجر والنظـره
كل خطوه تخطيها بخير اتوقع الك مختومه
نعمه المجالس والمجالس رحمه
هـا بالك انته وتچفي هاي النعمه
شتـقـدم انته للي ضحه بــدمـــه
خارطه وبيها الخدام بس للخدم مرسومه
اكتب عهد بدمومك وخط عهدك
شما عندك انته قدم شما عندك
اترك اثــر طيب الك والولدك
ولا تنسه دم المذبوح واذكر بلطمك يومه
اخر وصيه بمجلسك من تنعه
أبچيها من گلبك وطلع الدمعه
وبحافر اذكر من تهشم ضلعه
هاي الضلوع بهل خيل من السحگ مهشومه
لاتنسون والدي وابني عباس من الرحمه والغفران
خادمكم ؤياض الرسل الجابري
قصيده بحب الشعائر الحسينيه والخدمه
من اجل حب الشعائر
نركض بدرب المنيه
احنه تربات المجالس
والعقيده فاطميه
١
عدنه قانون الخدامه يبدي
من وحي الضمائر
نرفض الذل وهوانه ونفدي للمبدأ مناحر
الخادم اتشوفه مجاهد يرتقي صرح المنابر
بالفكر لمن نسولف انقاتل بمدمعنه باچر
عن قناعه وعن درايه نخدم بأشرف قضيه
احنه تربات المجالس
والعقيده فاطميه
٢
بمبدأ الخدمه العظيمه نحمل افكار الهدايه
انقاتل بلطمتنه احنه وهذا مبدئنه كفايه
من فكر اشرف قضيه نقره نحر حسين آيه
البسمله نلگاها باچر انكتبت بدم الضحايه
منهج العزه ندرسه من ضحايه الغاضريه
احنه تربات المجالس
والعقيده فاطميه
٣
احنه علمتنه المجالس منهج التوحيد فكره
حسين وضحها وشرحها من نزف عالغبره نحره
لا تدور بالخدامه وبقضيتك انته شهره
امتحان ولحظه اصفن بيا طريقه انته تعبره
اخلص الهاي الخدامه تستحق حتى الهويه
احنه تربات المجالس
والعقيده فاطميه
٤
خلي للطف كلنه نمشي وننظر بعين البصيره
شلون عابس النه ثبت مبدأً الخدمه الچبيره
نقتدي بنهجه وجنونه احنه وانكمل المسيره
نستحق حتى احنه كلنه ننتمي الهاي العشيره
من يرفعوها الهويه اتوقع اعليها الزچيه
احنه تربات المجالس
والعقيده فاطميه
٥
خدمة المظلوم آيه احنه نقراها بدمعنه
نهتف بهذا عددنه لجله والعالم سمعنه
انجدد احنه كل عهدنه بمجلس العزه طلعنه
حسين درب الخير دربه
ودربه عنه مارجعنه
نحمل المبدأ رساله والرساله حيدريه
احنه تربات المجالس
والعقيده فاطميه
٦
بالمجالس نبچي لوعه كل سنه بمدمعنه نحظر
نعتني المجلس الزهره حتى عند الزهره نكبر
والخدم كلها تعاهد ياعلي واسمع يحيدر
مانعوف احسين احنه
احنه ونقدمله منحر
كل مجالسنه نحسها من نطبها توعويه
احنه تربات المجالس
والعقيده فاطميه
لاتنسون والدي وابني عباس من الرحمه والغفران
خادمكم رياض الرسل الجابري
تجليبه للعليه
عفتني والمرض هد حيلي عالفركه
اتنطـــر و اعــد أيــام للمــلـكـه
الك اشـكـي الليالي اشسون بحـالـي
بعـد مارحـتـوا عـني وانشـده بـالـي
گمت احسد يـبـويـه كل گـلـب خالـي
والمثلي يون من المرض حگــه
اگضي الليل وحـدي بـدمـعـي اتصبـر
على الفـرگـه يـبـويه وتدري ما اگـدر
بـالگــوه اصـبـــر روحـي واتـنـطـــر
معـقـوله ابــويـــه بعــد ما شبگه
بعـد عـيـنـك يبويـه اتسله بـونيـنـي
لأن راح اليـفــــرحـنـي ويـسلـيـنـي
معـقـوله ابـويـه الـغـالـي نـاسـيـنـي
مثل شجره صفيت بحسرة الورگه
عـلى فـراگ الاهـل يـابـويـه شـتـحـمـل
تـرضـه شـلـون ابـقـه الـوحدي وتـقبل
عـلـيـلـه تعـوفـني يـابـويــه مـن تـرحل
گمت اختنگ بويه حتى بالشهگه
عشت بهمومي انحب والدمع مدرار
وظل البيت خالي بــوحشت الخطار
محتاره وافـكــر بيكم انتــو اشصار
دگ بابي الهوه والهوه ماصدگه
الك اخـتـم كـلامي ودمعـتــي بخــدي
يمـر وحـشه بغـيـابـك ليلي ويـعـدي
گـمت اشعـر زماني واگـف بـضـدي
محتاره بدمعتي و لوعت الحرگه
لاتنسون والدي وابني عباس من الرحمه والغفران
خادمكم رياض الرسل الجابري
قصيده بحق فاطمه العليله (ع)
بالحسره والنوح
والگلب مجروح
لا مهجه لا روح
والدمعه بعيوني
١
انظر ابعيد
والمواعيد
ضاعت وگلبي انچوه
عله بالروح
گلبي مجروح
وانطفه بعيني الضوه
انه العليله البل مرض ضليت بس و ونيني
ازغيره بعدني اعله هضم والدمع تارس عيني
من روحي چان اقرب ألي وبشوفته يرويني
هسه بضعن سار ومشه وبعيد صار حسيني
ياوحشة البيت
يرجعلي ياريت
محتاره ظليت
والدمعه بعيوني
٢
ضعن الاكدار
الكربله سار
والامل وين الامل
مايرجعون
ونار الضنون
تاكل بروحي تضل
معقوله خلاني ومشه وحسين غير رايه
يگلي عليله وبالسفر يابويه صعبه اهوايه
هسه انه لو صار المسه وحدي واحير بهايه
وكت الصلاه المن بعد افرشها لمصلايه
وبنار العتاب
منتظره عالباب
ترجع الغياب
والدمعه بعيوني
٣
گلبي موجوع
ونار الضلوع
تچوي بگليبي واحن
على الغياب
وجمر الاحباب
بالهضم ابچي و أون
ياريت اطير وي الهوه مابيه حيل الفرگه
سهرانه احچي وي النجم كاتلني شوگ الملگه
ماجربت ليل الهجر لاجربتها الحرگه
گطعوني ورگه من الغصن والغصن عاف الورگه
محتاره بدموع
وگليبي موجوع
يانار الضلوع
والدمعه بعيوني
٤
وين الاخبار
اسأل الدار
وحشه يادار الأهل
ظلمه بالبيت
كلشي حسيت
ومات بعيوني الأمل
گمت انه اشم ريحت هجر وبعيد صارو ناسي
آيست من ردت هلي بس الشغل احساسي
يمكن اموت بحسرتي والشهگه بين انفاسي
معذبني ياليل الجفه والشيب تارس راسي
ياليل الاحزان
والدمع نهران
بگليبي نيران
والدمعه بعيوني
٥
اسألك وين
بويه يحسين
من وصل يمي الخبر
بطف الاحزان
طحت عطشان
دامي مگطوع النحر
كلشي انتهه ومات الحلم يابويه وابچي بحسره
لمن وصل يمي الخبر بين الألم والعبره
ذبحو ابوچ بكربله والخيل داست صدره
واعله الرمح راسه انرفع واعليچ سلم نحره
جرح السماوات
يهتف صلاوات
أبن النبي مات
والدمعه بعيوني
لاتنسون والدي وابني عباس من الرحمه والغفران
خادمكم رياض الرسل الجابري
هلاليه عكيلي
ياعـاشور تنوح الـزهره
هـلالـك ياعاشور الـدمعــه
بيك الـزهـره تنوح وتنعــه
چم نور اليطفه وچم شمعه
من تحچي اتناديك بعـبره
ياعاشور تنوح الزهره
ياعــاشور بصوت الحادي
نسمع ام حسين تــنــــادي
راح يــذبحــوكـم يـــولادي
تبچي تون بدمعـه وحسره
ياعاشور تنوح الزهره
ياشهر اهـلالك يفجعــنـــا
نصرخ والعالم يسمعــنـــا
كل خادم يخـدم يتبعــنـــــا
بالموكب ويانــه ويقــــره
ياعاشور تنوح الزهره
عـاشور ويـومك بچـانــــه
وانـوح وننحب خـلانــــــه
وكل الناس تنـوح ويـانــه
عـالمذبـوح وحزو نحــره
ياعاشور تنوح الزهره
هـلالك عــاشور يـوحـدنـــه
والــعــالم كله يشاهـــدنــــه
غير المظلوم احنه شعـدنــه
ونخدم بالروح احنه العـتره
ياعاشور تنوح الزهره
أيــامــك بـالــدم نبچــيــهــا
وسـود الــرايـات انعـليــهـا
وانعـزي الزهره انعــزيهــا
بالطايح دامي وعـالغـبـــره
ياعاشور تنوح الزهره
وانعــزي الغايب مهـدينــــه
للحگ قائـــدنه وحاديــنــــه
باچــر من يظهــر والينـــــه
بيده اتــرف الرايه الخضره
ياعاشور تنوح الزهره
لاتنسون والدي وابني عباس من الرحمه والغفران
خادمكم رياض الرسل الجابري
هلاليه تجليبه
ياشهـر الحزن والنوح والحسره
هالليلـه حزنهـا زينب اشكبره
ياشهــر الحزن زينب تهـل العـيـن
من حضرت اميـره والزلم صوبين
تالي للأسف ودعت اخوها احسين
من عافته عاري ودامي عالغـبره
ياشهـر الحـزن والـدمعـه سچابــه
زيـنـب نــادتـــك وبـنــار لهــابــه
بظهر مكسور آه يحسين ومصابه
تاخـذ مني اخويه مهجـت الزهره
ياشهر الحــزن والنوح والاحساس
بيك اشگد بچيت الطمت فوك الراس
فوك اعله الشريعه انطيتك العباس
طايح والعـلـم ظل مرمي وبكـتــره
ياشهـر الحزن عـبـدالله والاكـبـــر
اخذت اثنين مني من هــلالـك طــر
من امشي ظهر محني وگمت اعثر
والمثلي بعــد شيفـيــده كل عمره
ياشهــر الحزن بيك الحـزن دايـم
مــا انسه مصابك والگلب هايــم
بعـد شتريـــد مني انطيتك القاسم
التارك بيه جرحه النوح والعـبره
ياشهـر الحزن ظل الفكـر محتــار
بعـد شنطيــك اكثـر وبـدليلي النار
بعد فگـد الاعزاز انطيتك الانصار
حـزنك بالگلب تـارك الـف جمره
لاتنسون والدي وابني عباس من الرحمه والغفران
خادمكم رياض الرسل الجابري
موشح بحق الامام الباقر (ع)
بحزن ودموع وألم هل عبرتك
وعلى الباقر من دمه صب دمعتك
الك يالباقر نصب كل الدمع
والك ذوبنه العمر مثل الشمع
بصوت كلنا انصيح والكل مقتنع
بكل شرف نبقه ونظل من شيعتك
اعليك يالباقر گلبنه ممتحن
نبچي وانوح ونصب دمع الحزن
كل موالي يصيح وبصوته يون
خسرتـك شيعتك كلها خسرتك
بصوت كلنا أنصيح والمدمع جره
ونار حزنك بالدليل اموجره
چبدتك ولياسبـب متوذره
ياهو يالباقر الوذر چبدتك
ابد ماراودك بعلومك تظل
رادوا أيردون لايام الجهل
وانته ابن حي على خير العمل
شلون هاي الگوم گدرت سمتك
شلون گدرت أيدهم تمتد تطول
مادروا والدك حيدر والبتول
امك الزهراء والجد الرسول
فرض واجب على الناس محبتك
نلطم شما بينه واندگ عالصدر
نبقه لمصابك وملينه الصبر
نفدي هالارواح لجلك والعمر
وابد ماننساها احنه أمصيبتك
لاتنسون والدي وأبني عباس من الرحمه والغفران
خادمكم رياض الرسل الجابري
ضعن الحسين
هل محرم يبو صالح وين ماوين
شحال گلبك من تشاهد ضعن الحسين
هسه وي العايله
اجه وگاصد كربله
ضعن الحسين
1
يبو صالح بالدمع
اتفكر ومحني الضلع
هسه گاعد على اطراف الغاظريه
بعد ماعاف الوطن
الكربله سار الضعن
بي حبيبة گلبك الحره الابيه
يبو صالح تحتمل
بي تشاهد چم طفل
هذا ضعن اولاد حيدر والزچيه
ضعن مهجت فاطمه
الــ عليه تبچي دمه
تگدر اتشاهدها من توصل رقيه
ضعن بي كل الهواشم والنساوين
ضعن تنتظره يجي عيون الملايين
والمسير ايواصله
اجه وگاصد كربله
ضعن الحسين
2
يبو صالح تنتظر
على احر من الجمر
وانت تدري بالضعن ماشي بمسيره
هاي ايامه ويمر
وانته گاعد تنتظر
تنتظر وبگلبك انته شلون حيره
هذا عاشورك يهل
وگلبك اوياه يتصل
تبچي وتنوح وتأديها الشعيره
تنظر وگلبك يدگ
عشگك انته من صدگ
يبو صالح بالعشگ مليان غيره
ادموعك انته من تهلها اتهلها بحساس
لان تدري بالضعن زينب وعباس
العضن بالطف موئله
اجه وگاصد كربله
ضعن الحسين
3
لو شفت ضعن الحرم
يبو صالح تبچي دم
دمعتك يالمهدي بعيونك تلالي
ضعن بي كل الاهل
امن المدينه لو وصل
اتشاهد اهلك روسهم فوگ المعالي
ادري لحظاتك تمر
سيدي مثل الجمر
راح اسألك خايف ايجرحك سؤالي
من يمر هودج حزن
وتسمع بعمتك تون
شلون تتحمل يغالي وابن غالي
حضر ادموعك يمهدي من تمر بيك
ركز الزينب تشاهد عينها اعليك
ضعن شبه القافله
اجه وگاصد كربله
ضعن الحسين
4
گاعد بنص الدرب
تشعر الموقف صعب
من تشاهد علي الاكبر يمه جاسم
بدر گاعد يم بدر
اثنينهم ضحو عمر
الاكبر اتگطعه البواتر والصوارم
وجاسم ايعوف العرس
ويوگع بحر الشمس
هذا حاله ايصير عريس الهواشم
حدهم اهلك للظهر
محد ايضل للعصر
من الاهل محد يضل يالمهدي سالم
ابالك اتدور المواقف والحچي اهواي
وصوت عبدالله تسمعه يصرخ الماي
مرد گلبك حرمله
اجه وگاصد كربله
ضعن الحسين
5
الدمع بعيوك نزل
الضعن من شفته وصل
وصاحب الرايه ترف رايته الخضره
هذا عباس الابي
حامي ضعن الزينبي
والله يعلم حزنك الشايله اشكبره
گلبك اهنانه وگف
يبو صالح بس هتف
هذا جدي حسين وعيونك النحره
هلت ادموعك دمه
وصحت يمه فاطمه
هذا جدي الداست الخيل اعله صدره
وصل ضعنك يبو صالح ضعن الايتام
بعد ميذبحون اهلك يگصد الشام
دمعك ونوحك اله
اجه وگاصد كربله
ضعن الحسين
لاتنسون والدي وابني عباس من الرحمه والمغفره
خادمكم رياض الرسل الجابري
نزله ام البنين (ع)
رابح الوالاها ام البنين
خاسر العاداها ام البنين
1
للوفيه الطاهره انصب الدمع
هواي تستاهل نكسرلها ضلع
هاي ام الاربعه الما ينفجع
گلبه الها عالاقل خل ينصدع
ربك العلاها ام البنين
خاسر العاداها ام البنين
2
العنده حاجه لا يقصر باللطم
باب للحاجات منها والنعم
مره هيه وقدمت اربع زلم
من تمد چفك الك تختم ختم
الحاجه ماتنساها ام البنين
خاسر العاداها ام البنين
3
حاجتك تگضيها بالمجلس تره
من تناديها بدمع يالطاهره
بكل مجالسها تجيك وحاضره
والك تشفع يالمحب بالاخره
حيدره السماها ام البنين
خاسر العاداها ام البنين
4
لا تقصر بالحضور وياها
فرصه هاي اشعندك وانخاها
اشگد كرامات الجليل انطاها
وباب للحاجه الك خلاها
اطلب وانخاها ام البنين
خاسر العاداها ام البنين
5
الها من تحضر الدمعه ابچيها
تفلح بأولها وبتاليها
بالمجالس انته من ترثيها
عهد لأم الاربعه تنطيها
عهدك انته وياها ام البنين
خاسر العاداها ام البنين
6
اختم بدمعك ونوحك عالشهيد
الطاح فوگ الترب محزوز الوريد
ظل ثلث تيام مرمي اعله الصعيد
وصيح يأم البنين شما تريد
اشعندك وانخاها ام البنين
خاسر العاداها ام البنين
لاتنسون والدي وابني عباس من الرحمه والمغفره
خادمكم رياض الرسل الجابري
قثيده بحق ام ابنين
حـوايـجنا حوايـجنا الج نعرض حوايـجنا
يا أم البنين اليـوم الج نعرض حوايـجنا
الچ نـتــوجه بهـل يــوم بگلـبـنـا انــادي وبحسره
لأن عــنــدچ كـرامه وجاه تجـبـرين الگلب كسره
نحلفچ احنه بالكرار بمصابـه ولـوعـة الطــبــــره
ونمشي عليچ نحر حسين وضلع الطاهره الزهره
تخلصينه تخلصينه بفضل جاهچ تخلصنه
ننادي وبگلب مالــوم
الچ نعــرض حوايجنا
اجينه الليله نترجه وشرف من عــدنه نـتـرجـــه
لأن ندري اللي يتمسك بمقـامچ بالحشر يـنـجــه
ولأن للباري نعرف زين مشيتي بشرعه وبنهجه
كـرامه الـثـار أولادچ يطــالــب بــاچـــر الحــجـه
تحفظينه تحفظينه اذا ننخه تحفظينه
بكرامة جاهچ المعلوم
الچ نعـــرض حوايجنا
الچ هاي الگلوب الـيـوم تنخاچ بصدى المـدمــع
بالمجلس حـوايجـنـا تگضي ابلحـظــة الـنـطــلـع
الدمع يتشرف وممنون بحضرتچ كل وكت يركع
لـذلـك احـنــه نتشرف مـنــچ كـل وكــت نـطـمــع
تعـينينه تعـينينه بحوايجنا تعـينـيـنـه
لأن مثل الجبل الهموم
الچ نعـــرض حوايجنا
الحوايچ محنة المظلوم والچ هاللـيـله نعـرضها
الوكت جرد علينه أسيوف علينه وگوه أفرضها
نريد احنه حوايجــنـا بحـضرتــچ كلها ننـفـضها
وكرامه الأسمچ الباري عـلـيـنه ينعـم أيـفـضـها
تسجلينه تسجلينه خدم عندچ تسجلينه
لأن عون انتي للمظلوم
الچ نعــرض حـــوايجنا
الحوايج عـدنه من تصعب نصر وعليها نتحمل
عـليها معـودين احـنـه نـقـره الـفـاتحه وتسهـل
الطلب والحاجه تگضيها ابــد مالحـظـه تـتأجـل
لذلك احـنـه منعــوفـچ ومـنـچ كـلـشـي نـتـقـبـل
تسندينه تسندينه اذا طحنه تسندينه
لأن حبچ فرض مقسوم
الچ نعــرض حوايجـنـا
لاتنسون والدي وابني عباس من الرحمه والغفران
خادمكم رياض الرسل الجابري
ام البنين (ع)
مات حسين مات حسين
اتنادي بدمعه مات حسين
تنادي ام البنين بدمعه وبحسره
ابني حسين راح وگلبي شيصبره
فديته بأربعه بس اشعر امقصره
اخافن ما اوفي فاطمه الزهـره
مدري اشصار گلبي احتار
اتنادي بدمعه مات حسين
انه ام البنين ادمــوعي هـمــاله
هسه شلونه ابني اشصاير بحاله
لو ماخذ اعــيــوني بدربه تبراله
مدري اشصار بيه اشصار بعياله
گلبي اينوح ظل مجروح
اتنادي بدمعه مات حسين
ابني حسين راح وخابت اضنوني
اظـل اتأمله والــدمعه بعــيــوني
انطي كلشي انطي لو يخلـــوني
بس لحظه اشوفه ويعمن عيوني
ماوفيت ماوفيت
اتنادي بدمعه مات حسين
نذرت ابنيني لجله وابچي بالدمعه
من حگي اعله ابني لوردت انعه
انه ام البنين وراسي مارفــعــه
احس امقصره وي فاطمه البضعه
واويلاه واويلاه
اتنادي بدمعه مات حسين
تنادي ام البنين بنار لهابه
وتبچي اعيونها والدمعه سچابه
من حست ابنها طول اغـيــابــه
اه يحسين نـــادت اه ومصابه
حست مات حست مات
اتنادي بدمعه مات حسين
ظلت بالدمع والنوح والاحزان
من عرفت ابنها منذبح عطشان
مات حسين ضامي بحومة الميدان
ثلث تيام عاري وجثته عالتربان
بالاحزان بالاحزان
اتنادي بدمعه مات حسين
تظل ام البنين بهاي قصتها
مثال التضحيه ومرفوعه رايتها
مانشفت ابد للموت دمعتها
للحاجات باب الدنيه خلتها
بأخر صوت بأخر صوت
اتنادي بدمعه مات حسين
لاتنسون والدي وابني عباس من الرحمه والغفران
خادمكم رياض الرسل الجابري
انصار الحسين
ينصار بالطف من سعيتوا سعيكم لله
لحسين بدمــاكـم وفيتـوا سعيكم لله
والنعــم منكـم ماتـقــصــرون
ويــن المثـلـكــم من يــوفـون
شلتوا لحسين بنص العـيـون
والنبي منكـم حـيــل مـمنــون
فوگ المنيه امن ارتقيتوا سعيكم لله
لحسين بدماكم وفيتـــــوا سعيكم لله
والنعــم منـكــم هــا يالانصار
فـرحـتـوا گلب النبي المختــار
بالطف ثبتوا نـعــم الاخــيـــار
بغيره وعزيمه ومجد واصرار
ناوين بالطف من طلعتوا
سيعكم لله
لحسين بدماكم وفيــتــوا سعيكم لله
والنعـم منكــم هــا يطـيـبــيــن
بالطف طلعـتـوا النصرة الدين
محـــد مثـلـكــم بــالمـيـاديـــن
ضحيتوا بالطف دون الحسين
جبريل من ناده سمعتوا سعيكم لله
لحسين بدماكم وفيتـــوا سعيكم لله
والنعــم مـنكـــم ثـلـث تـنـعــام
خــدام چـنـتــوا ونـعــم خـــدام
مـن اجـل رايــة حـفــظ السلام
ضحيتوا بالطف صرتوا اعلام
بحسين وباسمه عليتوا سعيكم لله
لحسين بدماكم وفيتــوا سعيكم لله
سيعـكــم هــذا وماتـقــدمــوه
بالحشر بـاچــر كله تـلـگــوه
بنص الضميـر حسين شلتوه
ولهذا بالــدم مـن نصـرتــوه
بأسمه المراتب من سميتوا سعيكم لله
لحسين بــدماكـم وفـيـتـــوا سعيكم لله
لاتنسون والدي وابني عباس من الرحمه والغفران
خادمكم رياض الرسل الجابري
قصيده للأنصار
انصار وخدم ذوله اهل الشيم
الله اختار السبعين
انصار بحب حسين
ذوله اهل الشيم
الباري من يحب انسان يختبره
الشجاعه والابه وبعاطفة صبره
والانصار ضحو للنذر عمره
خاطر ترضه عنهم فاطمه الزهره
ضحوا بالنفس ونطونه درس
الله اختار الطيبين
انصار بحب حسين
ذوله اهل الشيم
من دارت رحاها المعركه بأصرار
بيوم الغاضريه انكشفت الاسرار
ياهو اوي الحسين وياهو عنه اندار
محد ماثبت بس ثلة الانصار
حامو عالخدر
ضحوله العمر
حملوا حبه انياشين
انصار بحب حسين
ذوله اهل الشيم
تقدمو والمنايه اتصيح بالحومه
الرجل لمن يموت بساعته ويومه
وانصار ابو اليمه اسماء معلومه
عبد بيهم وحر والشگگ اهدومه
منهم والنعم
بالحومه الزلم
كلهم يملون العين
انصار بحب حسين
ذوله اهل الشيم
حب حسين شالوه بالضمير امتاع
اختيار الباري والنعمين ذوله اسباع
سفينه حسين وانصاره بشرف لشراع
هلا بالموت نادو لون صار اوداع
واحدهم هتف
حي اعله الشرف
بدروب العز ماشين
انصار بحب حسين
ذوله اهل الشيم
قدموها المناحر لبن داحي الباب
وفتحو للنصر چم معجزه وچم باب
الله راضي عنهم ثلة الاصحاب
نذكرهم الليله والدمع سچاب
صح قلة عدد
ماخانو عهد
مذكورين بكل حين
انصار بحب حسين
ذوله اهل الشيم
زهير ونافع وجون وبعد فارس
للانصار شيخ ومحد اينافس
حبيب اسمه وبرير وشوذب وعابس
واحدهم صبح لبن النبي حارس
واحدهم علم
قمه اعله القمم
بهذا الحب مقتنعين
انصار بحب حسين
ذوله اهل الشيم
لاتنسون والدي وابني عباس من الرحمه والغفران
خادمكم رياض الرسل الجابري
مسلم ووداع ابنته حميده
المستهل
مسلم لبنيته بدمع ايودعها
مخنوكه بعبره تحجي ويسمعها
ياحميده كافي دمعج كلبج وكلبي انجوه
ليل الموادع محنه مايجي بشهكت هوه
مايجي بشهكت هوه
١
يسولف مسلم بدمعه ويحاجيهـــا
ويصبرها بكلامه من يصد ليهـــــا
عليها يخاف ابوها ولازم ايديهــــا
انكسر كلبه عليها من بواجيهــــــا
شلون يصبرها محتار وياها
طفله وماتقنع عدمن خلاها
روحي يم زينب حميده بالضعن انتو سوه
ليل الموادع محنه مايجي بشهكت هـــوه
مايجي بشهكت هوه
٢
ودعها ومشه وبحيرة ضنونــــه
ضل ساكت بقه والدمعه بعيونه
لو راح الابو حست يغــدرونــــه
ما تكدر حميده تعيش من دونه
محتاره اتعاين ضلت بالدمعه
واتعنه الموته مسلم شيرجعه
قــرر وحدد مصيره مسلم الــوالــد نوه
ليل الموادع محنه مايجي بشهكت هوه
مايجي بشهكت هوه
٣
بقت محتاره تنظــر والدمع بالعــيـن
ابوها اتعنه راح ويمشي يعرف وين
حميده ومسلم احجايه حجاها البين
والعــنــوان دم مسلم ودم حسـيـن
والقصه بدمعه مسلم يرويها
مجبوره ابنيه راح يخليها
طفله مجروحه حميده وشوفت الوالد دوه
ليل الموادع محنه مايجي بشهكت هـــوه
مايجي بشهكت هوه
٤
مشه ضعن الفواطم والجــرح يبدي
وحميده تكول امشي بالحزن وحدي
انه اول يـتـيـمــه والضعــن يحــدي
بــيــه والــدمـع مافــاركه الخــــدي
من صاح اعليه حسيته ايواسي
عمي وناداني ضل يمسح راسي
من مسح راسي احسه كلبي بالدمعه ارتوه
ليل المــوادع محنه مايجي بشهكت هـــوه
مايجي بشهكت هوه
٥
ردت من يسرها بــدمعــت الحيــره
حميده اعله هضم ماتحمل ازغيره
ومسلم ضل علامه وخالـد السيره
بكلوب الخدم ينزف يضل غـيـــره
مسبيه و ردت ياكبر اتشوفه
ومسلم والدها ميت بالكوفه
جنه مسلم كبره صاير للحوايج شع ضوه
ليل الموادع محنه مايجي بشهكت هــــوه
مايجي بشهكت هوه
لاتنسون والدي وابني عباس من الرحمه والغفران
خادمكم رياض الرسل الجابري
ابوذيات الى مسلم (ع)
النفس تبقه النفس بالشر اماره
ومسلم راح مارايد اماره
شعجب يرموه من گصر الاماره
وينكثون العهد لبن الزچيه
------------
دليلك بس على الطيبات طوعه
ومسلم چان كل الحرب طوعه
تعب هده التعب يم بيت طوعه
وتلگه بصدره طعنات المنيه
-----------
صفات الرجل كون اتضل حميده
و دومه الباري عالباطل حميده
بعد مسلم يتيمه اتضل حميده
وتصب دمع الحزن صبح ومسيه
لاتنسون والدي وأبني عباس من الرحمه والغفران
خادمكم رياض الرسل الجابري
ميمر للخدمه
بالخدمه خليلك ساس لتصير كاعك هشه
١
بالخدمه اخدم والخدامه اتفيدك
بالخير مدها من تمدها الايدك
لاتعتب وكــف العتب شيفيدك
والرشك بقيل وقال بماي الورد لترشه
٢
الخدمه بحياتك فرصه هاي الخدمه
وانطاك ربك نعمه صون النعمه
بالك تضيع وتهوه انته بچلمه
وبساط خيرك للناس بكل وكت انته اتفرشه
٣
شما تعله هــا بالك تغرك شهره
گدام عينك خلي بس الزهره
وحسين امشي بطاعته وبامره
تخسر الخدمه ودنياك لحسين من اتغشه
٤
هذا الدرب درب العلم والارشاد
توصله من اتصيح يابو السجاد
بالخدمه لو رايد تصير انته استاد
اثبت بگاع المخدوم واتأكد من الممشه
٥
عيش بحياتك فرصه وتواضع زين
واختار وحده بخدمتك من اثنين
درب المهالك تهوه لو درب حسين
لتخلي كل البنيان بساعة غضب وتفلشه
٦
كلمن يعوف حسين نادم خسران
والعاش خادم هذا اعظم أنسان
اخدم احسين وحتى تصبح سلطان
درب الزعل بين الناس من تمشي بي لتنبشه
لاتنسون والدي وابني عباس من الرحمه والغفران
خادمكم رياض الرسل الجابري
قصيده بحق الخدمه
بالخدامه ياحسين بخدمتك عمري كضيتـه
بالخدامه / دربك شما بي خطر لجلك مشيته
ارد اخلصها حياتي
وياك محلاها مماتي
بالخدامه
بالخدامه
بالمجالس من اخـدمـك چـنت انافس
ياحسـيــن بخــدمـتــك مليان واهس
چانو ينادوني مــن ادخــل مجــالس
اجه المجنون وهـله بمجنون عابس
بالخدامه / شما اقدم خدمتي اشعر قليله
بالخدامه / كون تقبلني احلفك بالعقيلــه
بالمجـالس ذكـرياتي
وياك محلاها مماتي
بالخدامه
بالخدامه
خلصت يحسيـن عـمـري بهـل خدامه
بصدري وبـراسي تشاهــد چم علامه
خـادمــك يحسـيــن باچــر بالـقـيـامـه
الله مـــن دون البشر يــرفــع مـقـامـه
بالخدامه / الف هنياله اليخلص لطم عمره
بالخدامه / الجنه يظمنها اذا تقبله الزهـره
اني اعظم امنياتي
وياك محلاها مماتي
بالخدامه
بالخدامه
رغم چان المنع بس ماچـنت افـكـــر
للمجالس احضر وبالخفـيـه اطــبـــر
وچنت عالكاسيت من اگـعــد احضـر
القامه بيدي واسمع الحمزه الزغـير
بالخدامه / خلصت عمري وابـد محـد منعني
بالخدامه / من ضميري اخدم الدافع دفـعني
ياحسين اسكنت ذاتي
وياك محـلاها مماتي
بالخدامه
بالخدامه
بالمجالس لــون گام الناعي يـنـعــه
ابچي گبل الناس من صوته اسمعـه
بالبچي ايعرفوني من صوتي ارفعـه
وچانو يسموني خادم وابو الــدمعـه
بالخدامه / جنت اصرخ وانه اصيح بكل مصيبه
بالخدامه / هواي جنت اقراهـا زينب ياغـريـبـه
بكل مجالس نايباتي
وياك محلاها مماتي
بالخدامه
بالخدامه
لو متت خلي اوصي هـل وصيـه
ما اريــد احــد ابــد يبـچـي عـليـه
لان خادم بالگــبــر تحـضـر الـيـه
الزهره تعـقـد مجلس وتنعه عليه
بالخدامه / الزهـره تحضر بالكبـر هذا يقيني
بالخدامه / شايله القاروره بيها ادموع عـيني
لان بالخدمه نجاتي
وياك محلاها مماتي
بالخدامه
بالخدامه
لاتنسون والدي وابني عباس من الرحمه والغفران
خادمكم رياض الرسل الجابري
موشح العليله
فاطمه اتسولف وتحچي احزانها
ياعليله اتشابه بنيرانها
١
طفله وازغيره تشاهد يا مصاب
بالمرض عافوها وبنار الغياب
گاعده ابيت الحزن تنظر الباب
بلكي واحد يحضر من اخوانها
٢
ماخذاها حسين وبنار الدمع
طفله ذابت بالحزن مثل الشمع
ايد تمسح دمعه ايد اعله الضلع
ضلت وتتخاطف بألوانها
٣
سولفت وي الهوه بدمعت ونين
انه اشوفك يالهوه مثلي حزين
شنهي ماسامع خبر عن الحسين
وكربله ماتعرف بعنوانها
٤
فاطمه واتسولف بدمع الهجر
وعايشه بنار المدامع والصبر
لشوكت يحسين ابقه انتظر
خبر وديلي يعزها وشانها
٥
خبر وديلي اذا شح الكلام
وخاف ماتگدر ألي ودي سلام
وي الهوه اليوصلني يابويه وانام
وباقيه ابنيتك بنفس امچانها
٦
گلبي لاچمني يبويه اعله البعد
خاف ما ترجع أليه وماترد
ابقه انوح وابچي بويه اعله الورد
وفاطمه الما تنتهي اشجانها
٧
خبر موتك وصل يا بويه ألي
بالعمر يحسين من بعدك شلي
انه اموت بموتتك يابو علي
ياصلاة الروح ياقرآنها
لاتنسون والدي وابني عباس من الرحمه والغفران
خادمكم رياض الرسل الجابري
قصيده بحق العليله
طـفـلـه وعليله محـــد اليه
كل اهلي راحو للغاضريـه
وحدي وانادي يادمعتي
يادمعتي يادمعتي
طفله وعليله بغربتي تركوني والمـــدمع يكــــت
محد اليه بهذا العمر من اهلي كلشي ماشفــــــت
اسمع بصوت اهلي صدى ما ادري لمن التــفـت
فوگ المرض فوگ الحزن يا اهلي حيل اتغيرت
بالغربه وحدي ياهــو اشتكيله
عافوني اهلي وحـدي وعليله
ياهو اليجيني يادمعتي يادمعتي يادمعتي
اسهر الليل وي النجم بس الله يدري بحـــــالي
غير العذاب اشحصلت من راح ابــويــه الغالي
عشت بألم والفاجعه تعــصــــر عــصــر دلالي
طفله اشبديه اعله الجره من راح عني الوالي
وحدي بعذابي وبعيني دمعه
وابعد ضعنهم وشلون اتبعه
ما اگدر امشي يادمعتي يادمعتي يادمعتي
ظليت اون بحسرتي بس دمعــتـــي اتسليني
طفله اشبديه اعله الهضم مابيه حيل اونيني
محد بقالي من هلي وبشوفـتــــه يـــــرويني
عاشرت ليلي والسهر والدمع عــاشر عيني
گمت انه احسب ليلي ونهاري
وبهذا زغــــري ماتطفه ناري
راح ابقه اعاني يادمعتي يادمعتي يادمعتي
دمعي وعذابي والقهر والحيره وسط ضنوني
معقوله اسأل يادهـــر اهــــلي صدگ عافوني
طفله وبعدني عالهضم وازغـيره من تركوني
مانمت ليلي من السهر تشهـــــد عليه عيوني
اسهر واتاني واللوعه بيه
اصرخ وانادي يهل الحميه
بالحسره ابقه يادمعتي يادمعتي يادمعتي
وتأكـدت بعـــد السهــر والمــرض يــاكل بــيـــه
اهلي ضحايه بكــربــلــه مابعـــــد بيهــــم جيــه
شلي بحياتي ودنـيــتــــي لا اهـــــل لا حــنــيــه
واسمعت عمتي اعله الهزل راحت مشت مسبيه
راحــو اخوتي واهلي وعمامي
وحسين ابويه عــالغبــره دامي
كل اهلي راحو يادمعتي يادمعتي يادمعتي
لاتنسون والدي وابني عباس من الرحمه والغفران
خادمكم رياض الرسل الجابري
موشح هلالي
أستقبلت شهر الدمع بحزانها
زينب وأم الصبـر عنـوانـهـا
استقبلت أم الحزن هاي الايام
بالـدمع والنـوح بـس بيا كلام
بفاجعه العاشتها وبنار الخيام
حين طاحو عالارض خوانها
استقبلت بالصبر وبدمعت العين
شهر مطلوبتله من ازمان دين
وفت الهذا الشهر نحر الحسين
وطاح راعي العايله وصيوانها
استقبلت زينب ابدمعات النظر
هلال فجرك يامحرم بالخطـر
اتذكرت راية العباس الگـمـر
اتخاطفت من الحزن الوانها
هــذا شهر الفاجعه وشهر الدمع
بحافر الخيل وتهشم بي ضلــــــع
ضلع قرآن الشرع وأصل الشرع
وزينب التلتهب بي نيرانها
شهر بي مفجوعه كل العايلـه
شهر بي كل المدامع هاملــــه
شهر بي احزان دمعت كربلــه
شهر بي طاح الوحي وقرآنها
زينب اتعيش بحزنها الفاجعـــه
وجسدتها اعله الارض هالواقعه
التل يعيش ابالها والمشرعــــه
والاثنين الضلن بوجـــــــدانها
بـــعــد أيــام المصـيـبــه تتـضـح
بلوعت الاحزان واتعيش الجرح
راسه اخوها اگبالها ايحمله رمح
والحسين العاش عزها وشانها
باچر اتعيش المصيبه الراتــبــه
وللــزمــن زينب تـــرد اتعاتــبــه
اينول ياهو انشوف حسن العاقبه
باچــر ويــاهــو الذي خسرانها
لاتنسون والدي وابني عباس من الرحمه والغفران
خادمكم رياض الرسل الجابري
ابوذيات الى مسلم (ع)
النفس تبقه النفس بالشر اماره
ومسلم راح مارايد اماره
شعجب يرموه من گصر الاماره
وينكثون العهد لبن الزچيه
------------
دليلك بس على الطيبات طوعه
ومسلم چان كل الحرب طوعه
تعب هده التعب يم بيت طوعه
وتلگه بصدره طعنات المنيه
-----------
صفات الرجل كون اتضل حميده
و دومه الباري عالباطل حميده
بعد مسلم يتيمه اتضل حميده
وتصب دمع الحزن صبح ومسيه
لاتنسون والدي وأبني عباس من الرحمه والغفران
خادمكم رياض الرسل الجابري
قصيدة الامام الباقر وذكرياته مع رقيه
مجروح
يشرح قصته بدمع النواضر
مجروح
ويسولف اشصار بيوم عاشر
بيها حاضر
انه الباقر
انه الباقر
طفل لمن چنت شبت نار بيه
بعيني شفت احداثها للغاضريه
حاير امنين الكم ابدي هالمسيه
راح ابدي بذكرياتي وي رقيه
بدموع
راح ارويها الكم ذكرياتي
بدموع
واروي شلون ماتت امنياتي
بيها صابر
انه الباقر
انه الباقر
من وصلنه الكربله ومن شاهدوها
من على الناگه اميره نزلوها
بعين چانت تنظر برقه لأبوها
وعين چانت تنظر العبد الله اخوها
بدموع
تگله انه احس ماتبقه وياي
بدموع
تشوف اشفايفه ذبلانه عالماي
بس اكابر
انه الباقر
انه الباقر
وراح اشرح بعد ما هجمو علينه
اطفال احنه وگمنه نتستر بدينه
من مشه العباس وحسين انولينه
بعمتي زينب و ابويه احنه احتمينه
بدموع
اروي قصة الطف العجيبه
بدموع
احجي افجع واكبر مصيبه
جنت حاضر
انه الباقر
انه الباقر
وبعد اشرح موقف بطيحت الرايه
الخيم من حرگوهـا حرﮔو چم عبايه
النار من اركض احس تركض ورايه
وكلنه من چتفونه اخذونه سبايه
بدموع
كلنه انصيح ماتحظر يكافل
بدموع
وينك عمي وينك يبو فاضل
ماتناضر
انه الباقر
انه الباقر
من وصلنه الشام واحنه امأسرينه
امچتفينه بحبل كلنه امچتفينه
بعد ماعرفونه واحد صاح بينه
هاي زينب اسـأل العباس وينه
بدموع
عمتي دنگت لمن سألنه
بدموع
حقه مادره وينه الكفلنه
بصدره حافر
انه الباقر
انه الباقر
لاتنسون والدي وأبني عباس من الرحمه والغفران
خادمكم رياض الرسل الجابري