1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
ليلة الوداع بين الحسين وزينب
اموادع بين حسين واخته
بالخيمه وبالمدمع سكته
شلون اموادع
تحچي ويسمع
بالخيمه وبالمدمع سكته
١
بآخر ليله والتوديع بالنظره
بين حسين واخته زينب الكبره
محتاره وتعاين گامت النحره
صدگ ينذبح ضامي ويبقه عالغبره
يمها حسين وهسه بخيمه
باچر يصفون بيا هيمه
خافت يطلع
تحچي ويسمع
بالخيمه وبالمدمع سكته
٢
گبل الموت رادت زينب اتودعه
تگله احچي يخويه واختلف وضعه
سمعت صوت اخوها زينب وتنعه
معقوله بعد هالصوت ماسمعه
واتگربت زينب من يمه
احتارت مدري امنين اتشمه
اتشمه وتشبع
تحچي ويسمع
بالخيمه وبالمدمع سكته
٣
تگله شلون باچر يصبح المنظر
من ابقه وحيده امحاوطه بعسكر
لا عباس يمي ولا علي الاكبر
مجبوره يخويه بعدك اتصبر
اصبر لو حرگو صيوانك
يحسين وتنظر عدوانك
بعد اشينفع
تحچي ويسمع
بالخيمه وبالمدمع سكته
٤
باچر كلشي غالي ايروح ماشوفه
عبدالله الگمر عباس وجفوفه
سهله اشگد أذا مشوني مچتوفه
والاصعب عليه طبتي للكوفه
باجر هذا يصير ويايه
وفوگايه مترف الرايه
السم تتجرع
تحچي ويسمع
بالخيمه وبالمدمع سكته
٥
آخر نظرة اموادع ابين اثنين
بين العيله هالليله وبين حسين
زينب شبگته ونادت بدمع العين
باچر ياخذك يحسين سيف البين
مهيوبه بجالك يوميه
باچر راح امشي ومسبيه
صعبه واقنع
تحچي ويسمع
بالخيمه وبالمدمع سكته
لاتنسون والدي وابني عباس من الرحمه والمغفره
خادمكم رياض الرسل الجابري
ميمر بحق عبدالله الرضيع ع
يبني السهم لا مارحم
من صابك بكلبي الألم
حسيته وشعرت ابآه يبني ويضي عيوني
سهم المنيه يالولد صابك وين
عبدالله يبني واحضنت صدر حسين
ازغير ييمه وصوبك سهم البين
ماتحتمل ذاك النبل
ياسلوتي وبعدك طفل
من احضنت سهم اعداك لا يبني مارحموني
لمن اجتك نبلته المسمومه
انت وابوك اثنينكم بالحومه
ماحسبوا امك تضل مالومه
ما حسبت واتصورت
عطشان يايمه ومتت
مذهوله ما اعرف وين انطي الوجه خلوني
¬¬¬¬¬¬¬¬¬¬¬
نحرك زغير وماحملته السهمك
دمك صعد للباري ينحب دمك
مافكروا ياحال بعدك امك
من المهد دمك صعد
ماينزل وكاتب عهد
ولهذا فجعوا لحسين وببني الطفل فجعوني
عبدالله لو باقي ييمه وياي
چان اعصرتلك عيني وانطيك الماي
معقوله ماشوفك يروحي ودنياي
بيك انفجع اي وانصدع
بعدك ومكسورة ضلع
ام الرضيع العطشان والوادم ايسموني
ابچي العمر كله عليك وانحب
والموقف الاثر عليه واصعب
من شفت حاضنتك وتنحب زينب
بذاك الخدر ام الصبر
حاضنتك وتاه الفكر
امك وچان المفروض ميته والك يلگوني
راح ابقه يوليدي انوح وانعه
وشتنفع الدمعه عليك الدمعه
عبدالله شمعه وانطفت هالشمعه
بدمع الحزن ابچي وانون
وگليبي يبقه ممتحن
محد يعوضك والله لو دنيتي ينطوني
آخر وداع وياك من ودعتك
مذبوح يم زينب ييمه عفتك
لو ادري بعيوني ابد ماشفتك
بدمع النظر شفت الخطر
عطشان بس يمك نهر
بس ماسگوك العدوان وبيك انه مانصفوني
لاتنسون والدي وابني عباس من الرحمه والفغران
خادمكم رياض الرسل الجابري
قصيده بحق عبدالله الرضيع (ع)
أبني وسلوتي عبد الله لب أحشاي
من نحره سگـوه بالطف بدال الماي
عليك اشكثـر انحب والدمع مسفــوح
ولا يبطل ييمه اعـلـيـك هــذا النــوح
شنو السويته يمه وبالنحـر مذبـــوح
طفل بعـدك يعـبد الله ونظـر عيناي
طفـل بعـدك يعـبـد الله واجـاك البـين
خذاك بساع مني ومن ابـــوك حسين
شسوي بعيني من بعدك يضي العين
اذا متـشــوف وجهـك ياحـلـم دنـيـاي
صدگ يايمه متـشـوفـك بعــد عـيـني
وحـال الـمـوت مابـيـنــك ومابـيـنــي
شلي بعمري وحياتي وشلي بسنيني
مدامك مابقيت وعـشـت انته ويـاي
يظل گلبي الـيون اعليك شيصبـره
يازهــرة شـبـابي وراحـت الـزهــره
راح ابقـه انــوح واسچـب العــبــره
لأن مـشبعـت بعـدك من لذيذ ارباي
اظـل انحـب عـلـيـك ولاتـظـن انساك
يسباح الگلب وبـروحي كون افــداك
ييمه من رحـت تـاخذني كون ويـاك
عـفـتـني للهـضم والحـيـرتي وبلواي
عـفـتـني والـدمع دمعه بـأثـر دمـعــه
الولي بالمهــد خـالـي وعـليك انـعـــه
بعـد بيش انه اصبر روحي والوسعه
علي ضاگت يعبد الله الأرض وسماي
لاتنسون والدي وابني عباس من الرحمه والمغفره
خادمكم رياض الرسل الجابري
العباس
صال ودخلها بزوده عباس
١
فوگ الشريعه بزوده من صاح
ماهمته لسيوف وأرماح
يدرون بيه خطاف الارواح
هذا ابو فاضل سمعو ياناس
٢
هذا اخو زينب والحچي اهواي
شيخ اعله ماي العلگمي و راي
غيرته اتمنعه وماشرف ماي
وبرجله فوگ اعله النهر داس
٣
كلها تعرفه وتعرف اشراد
لمن دخل للمشرعه اعناد
ماهمته كل ذيچ الاعداد
تسمعني خلي كل الارجاس
٤
طالع لبوه عباس شيريد
حيدر علي وامبين الحيد
صنديد ومخلفله صنديد
ماهمته اعله النهر حراس
٥
مو كل رجل يمليها للعين
مو زين بيهم بيهم الزين
وعباس بالطف شمعت حسين
لمن تذكره ارفع الراس
٦
راعي الشرف والغيره والجاه
فوگ الشريعه ايرفرف الواه
لمن وگع عالگاع ويلاه
نهر الأخوه الكله نوماس
٧
لمن وگع والسهم بالعين
ناده يخويه ادركني يحسين
محني الظهر لمن وصل وين
يم النهر يتفايض احساس
٨
دارت الدنيه وكل الايام
واليوم اجينه اندگ على الهام
تقبلنه ياعباس خدام
وانحلفك بزينب ينبراس
لاتنسون والدي وابني عباس من الرحمه والمغفره
خادمكم رياض الرسل الجابري
نزله للعباس
يبو فاضل يبو فاضل
1
تعنه الحومه شل كل الكتايب
خلسها وبعد ماتحچي الشوارب
تظل العين ماتعله الحواجب
حليب ام البنين بزوده شارب
ترد عايل يبو فاضل
2
دخل للمشرعه وكلها صگرها
اويلي للزلم لمن ظفرها
الزلم كل الزلم بصنع يفرها
ابو فاضل يظل عزها وفخرها
خبر عاجل يبو فاضل
3
حمل حملة علي بزود وعقيده
گلبها المشرعه والرايه بيده
جهنم لو غضب ابن الصميده
صعب عباس متوصفه القصيده
غضب شايل يبو فاضل
4
ردم روس الزلم والموت شافه
تحذر من اجاه يمسح اچتافه
اخذ فوگ النهر نوط الخلافه
رغم كل هذا بس مملي ترافه
لچن قافل يبو فاضل
5
على اجروف النهر راسم علامه
جهنم راسم وكاتب قيامه
يسويهن اجه وشاهر حسامه
هذني من اجل حبه لأمامه
شنو الحاصل يبو فاضل
6
شجاعه ومرجله كلها صفاته
عبد لحسين خلص كل حياته
وفي العباس وبنكران ذاته
يجيب الماي اجه بجوده لخواته
شرف حامل يبو فاضل
7
انهشم راسه بعمود وما تأثر
لأن گايل الزينب ما اتأخر
ثبت فوگ النهر تربات حيدر
بخزرته مابقه اتطشر العسكر
بنصر حافل يبو فاضل
لاتنسون والدي وابني عباس من الرحمه والمغفره
خادمكم رياض الرسل الجابري
نزله بحق العباس
يعباس كوم شيل الرايه
امك وتنخاك يبني عــزهــا يـا نوماسهــــا
تبقه كل دنياها تبقه وشرف عزها وناسها
وانته ياعـباس تبـقه انته رفعـت راسهــــا
حگها امــك يبـو فاضل تنتخي بعـباسهــــا
يعباس فوگ المسنايه
يعباس كوم شيل الرايه
امك ام عــبــاس گـامـــو كلهم ايسمونها
بيك ياعباس تفــرح امك وخي عــونهــا
من كثر ذيچ المعــزه شالـتــك بعـيـونهـا
عالوفه الشايله بروحك گامو يحسدونها
يعباس انته انته الغايه
يعباس كوم شيل الرايه
انته ابني ونظــر عيني دنيتي وكل ناسي
يالحليبك وفه صافي صافي من احساسي
عايش بروحي وخيالي وساكــن بأنفاسي
باچر اگبــال الــزچــيــه انته شيلت راسي
يعباس چفوفك الوفايه
يعباس كوم شيل الرايه
ملك عالشاطي اعرفك ملك شايل سيفـك
وانته تخـتار التـريده يبني انته بكـيـفــك
والعـده الداست حدودك منها تاخذ حيفك
مايفارگني خـيـالـك بـيــه عــايش طيفـك
يعباس ترهب الرمايه
يعباس كوم شيل الرايه
خاطـري مسرور منك يبني ياضي عـيني
لأن ضحيت بحيــاتــك راضيه تــدريـــني
احچايه راح احچيها يبني ابدمعتي خليني
تدري انته الاعز منك عندي بس حسيني
يعباس بگلبي هاي احچايه
يعباس كوم شيل الرايه
لاتنسون والدي وابني عباس من الرحمه والغفران
خادمكم رياض الرسل الجابري
شوط كربلائي للعباس
زيـنـب تـنـتخي بـعباس وتحشـم يواليهـا
مـن غـيـرك يجـيب المـاي للعايله ويرويهـا
گـوم ارويـنه يـاعــبـاس زيـنـب اخته وتحشـمه
اخـويــه والـنـعــم مـنـك اسـمع زينب اتـكـلـمـه
نريد الماي خـويه الماي والاطــــفــال مـلــتـمـه
شاف المـنـظـر العـبـاس المنـظـر قاسي ويألـمه
يـرجـف والعـزم باسه
رافـع لـلـنـجــم راسـه
فايض غيره بحساسه
شال الـرايه شال الجـود لـلـمـشـرعـه وصد ليهـا
صعـــدت غـيـرة العـبـاس وشال السـيــف والرايه
وصاح الـرگـبـه يـازيـنب لـجـلـچ يـخـتـي وفــايـه
شنهي الزلم شنهي الخيل شنهي العـلگمي ومايــه
لـو ردتـي الـنــهـــر والله اجـيــب الـنـهــر ويـايــه
شال السيف بيده وصال
ونــاده والـدمـع هـمــال
واجيب الماي للاطـفــال
واسگي اطفالچ بجـودي وياهـو الغـيـري يسگيها
و تـوكــل وشــال السـيـف راح وغــيـرتـه بـصدره
گـاصـــــد للـنـهـر عـبـاس واخـته بـعـيـنها اتـنظره
بـالطـف صـبـره ضل آيات ومـا واحـد مـثـل صبـره
اصـبـح للـوفـه مـيــــــزان ومـيزان الـوفه اشكبـره
واعـد اخـتـه يـرعاها
ويبقه خــادم ويــاهـا
شرادت زينب انطنها
من يـنـطي وعــــد عـباس وعـود بشرف يـنـطـيها
راح ويـنـظـر الـزيـنـب وزيـنب تنظـر اتـشوفه
وقـصة زينب وعـبـاس بـيـن الـناس معـروفـه
قـصة كـافـل ومكـفــول قـصة عـيـنه وچـفـوفه
بيها اسرار لكن شوف ما محجـوبه مكـشـوفه
اسرار ونعــم اسرار
بيها اخيام بيها ونار
بس هذا الزمن دوار
كـل اسرارهـم بالـطـف غـيـر الـوفـه ما بـيـهـا
وصل يـم الـنهــرعـبــــاس وثـبـت رايـتـه الخـضره
وشال بأيــده چـف المــاي وگلبه من العطش جمره
بدال الماي صوره ايشوف حـايـر و انـذهـل بـأمــره
شلون امنين اجــت بالماي صورة فـاطـمـه الـزهـره
ما اشــرب وابــرد احشاي
ابن حيـدر علي الــوفـــاي
شاف الصوره وسط الماي
ذب الماي حـس خـجـلان وگـام الـروحـه يـنـهـيها
بـروحـه يـنـهـي ويـفـكـر بـالاطــفــال وسكــيــنــه
ويـنـه اللي مثـل عـبـاس بـكـل هـاي الـزلـم ويـنه
وانـدارت الگوم اعـلـيـه وصابـوا بالسهـم عـيـنه
وجاد بـروحه لجل الدين وضحه وانـطـه چـفـيـنه
العسكـر بعــد ميشوفه
ولازم جوده ميعـوفــه
ولمن طاحـت أچـفـوفه
ضلن عالـنـهــر عـنـوان لهـل الـوفـه امـخــلـيـهـا
لاتنسون والدي وابني عباس من الرحمه والغفران
خادمكم رياض الرسل الجابري
عباس انته الغايه
عالكوم سيف ورايه
على اجروف النهر راية عشگ شايل
وغيرة حيدره من الزغر حامل
ياراعي الكفاله وانته تستاهل
لقب ساقي العطاشه وعالاسم قافل
يمناك هايه وهايه
عالگوم سيف ورايه
شفتك عالنهر صمصامك اترفعه
سديت الهوه وصوت الوحي اتسمعه
عباس بضربتك ماجت السبعه
چن حيدر علي باب الحصن قلعه
لحسين منطي احجايه
عالگوم سيف ورايه
من حيدر علي هالغيره مغروسه
دگيت الخطر عباس ناقوسه
ماتارسها ماي الجربه بالهوسه
فوگ اعله النهر بس روس متروسه
شفناك بالطف مايه
عالگوم سيف ورايه
ريشة خوذتك فوگ النهر آيه
وچفوفك التسطر وفه امحنايه
انته وجودك اعله النهر والرايه
خالد تبقه خالد والحچي اهوايه
شنگول تبقه اهوايه
عالگوم سيف ورايه
ركعت الزلم والحومه تلهب نار
والعسكر صفه من الردم طشار
تحتار الزلم بس انته ماتحتار
لن تحمل الغيره من علي الكرار
سويت انته اسوايه
عالگوم سيف ورايه
اسوايه اعله النهر سويتها بزودك
ومحد ما گدر يوصلها لحدودك
انته بطرگ رايه وسيفك وجودك
هديت بصلابه وثابته اعهودك
روحك تضل وفايه
عالگوم سيف ورايه
يالچفك بخت والطاير اتصيبه
يالراضع وفه عباس يالهيبه
مانلگه محال ومثلك انجيبه
يانعم الاخوه يالتملك الطيبه
للطيب انته امرايه
عالگوم سيف ورايه
لاتنسون والدي وابني عباس من الرحمه والغفران
خادمكم رياض الرسل الجابري
نزله علي الاكبر (ع)
شيگول شيگول الاكبر من نزل
١
خل يسمع الجيش اذا ادخل وطب
انه ابن الحسين تره اگلبها گلب
بالحومه نيران اخليها تشب
وانه اشعر الموت احله من العذب
والناس يدرون ابن خير العمل
شيگول شيگول الاكبر من نزل
٢
مرعب الشجعان يعرفوني بلي
واسياد هالكون اضل انه وهلي
بالحومه صولات تظل تشهد ألي
سماني لحسين بسم جدي علي
فوگ النجم فوگ وصل صيتي وصل
شيگول شيگول الاكبر من نزل
٣
ما دنگت راس نزلت بهيبتي
بعلو السماوات ترفرف رايتي
والملعب اليوم اطبه براحتي
لو صحت لبيك يبويه وقدوتي
والعسكر الصوت يسمعه وانذهل
شيگول شيگول الاكبر من نزل
٤
شيوصفه هيهات صعب من ينوصف
بنوره وجماله نزل چنه ترف
والگاع بيهم جعلها تنخسف
مامقتنع صاح شنو السبعين الف
حين التوسط جمعهم من دخل
شيگول شيگول الاكبر من نزل
٥
من عمه عباس نزل بيده ختم
شايل حرز چان الاكبر طلسم
لو دخل ميدان ينادي بهل أسم
بزهراء زهراء يگص راس الزلم
تعويذة الموت ينادي ويرتجل
شيگول شيگول الاكبر من نزل
٦
بخزرات العيون علي شايل نده
وخطاف الارواح يسموه لو بده
يحصد الفرسان يگص روس العده
كل هذا وحسين يشاهد والده
وبعين خزرات على الجيش وزعل
شيگول شيگول الاكبر من نزل
٧
الفارس يلاكيه يضربه بثنعش
ماتعب حاشاه ولا همه العطش
والعسكر احتار يشاهد واندهش
سجادة الموت يصلي من فرش
بجروحه لله مشه الاكبر رحل
شيگول شيگول الاكبر من نزل
لا تنسون والدي وابني عباس من الرحمه والغفران
خادمكم رياض الرسل الجابري
موشح للعريس
جاسم العريس يمشي بهيبته
وآخر النظرات جانت نظرته
آخــر وداع وحــزن بالعـايـلـه
بين رمله وجاسم بطف كربلـه
اگباله وگفت بالدمع تنظر الـه
وسولفن بالطف دمعها ودمعته
جاسم اتعنه وبرز وسط الجمع
والحوافر تسحگ بذاك الضلع
بالمصيبه الليله وانهل الدمع
بالدمه العـريس صارت حنته
صارت الحنه بدمع ماي الجفن
وأمه رمله تنحب اعليه وتون
ماتبطل لبست اثياب الحزن
من هوت اعله الگاع ضلت رايته
گبل لا يوگع على الغبره ذبيح
بالدمع جاسم سمع أمه تصيح
گبل عمك ردت بالحومه تطيح
صاح ابشري يمه صاح وسمعته
بعد ماطاح وتخضب بالدمه
بهل مصيبه ناحت املاك السمه
اهنانه صاحت رمله فدوه الفاطمه
شنهي ابني اتهون كل امصيبته
ابد ماقصر بساحات النزال
والجمال ايغار من عنده الجمال
أمه عرفت مايرد جاسم محال
هذا كل المختصر من قصته
لاتنسون والدي وابني عباس من الرحمه والغفران
خادمكم رياض الرسل الجابري
نعي للقاسم
ماذا تقول رمله ام القاسم لولدها
تعال اشبر بطولك گبل متروح
على طولك اريد ابگدهن اجروح
ماريدك تجيني بثغر باسم
اريد اجروح كلك يمه جاسم
حتى امك ابگد اجروحك اتنوح
اريد ابچي اعله طولك دمعه دمعه
حتى اعجن الحنه وانه انعه
المثلك للعرس متفيده شمعه
لان عمك وحيد وراد فزعه
گوم انهض حبيبي و روح يمه
هنياله ييمه اليفدي عمه
لحسين اليقدم روحه مسموح
ما اگــدر بعــد يمي اخليك
ييمه تنذبح اول وتاليك
اريدن من تجيب الناس طاريك
احس اجروح كلي وانفجع بيك
يسولف گلبي عن لوعت عذابه
واگولن ماتهنه ابني بشبابه
يجاسم يمه بيك امعلگه الروح
كبرت وكبرت وياك الاماني
يجاسم يبني وانطيتك حناني
السهام البيك غدرت لو زماني
لأن هسه السهم ماخذ مكاني
تمنيت الجروح البيك بيه
لأن بعدك ازغير عالمنيه
ودمك عالارض يايمه مسفوح
لاتنسون والدي وابني عباس من الرحمه والغفران
خادمكم رياض الرسل الجابري
ضعن الحسين
هل محرم يبو صالح وين ماوين
شحال گلبك من تشاهد ضعن الحسين
هسه وي العايله
اجه وگاصد كربله
ضعن الحسين
1
يبو صالح بالدمع
اتفكر ومحني الضلع
هسه گاعد على اطراف الغاظريه
بعد ماعاف الوطن
الكربله سار الضعن
بي حبيبة گلبك الحره الابيه
يبو صالح تحتمل
بي تشاهد چم طفل
هذا ضعن اولاد حيدر والزچيه
ضعن مهجت فاطمه
الــ عليه تبچي دمه
تگدر اتشاهدها من توصل رقيه
ضعن بي كل الهواشم والنساوين
ضعن تنتظره يجي عيون الملايين
والمسير ايواصله
اجه وگاصد كربله
ضعن الحسين
2
يبو صالح تنتظر
على احر من الجمر
وانت تدري بالضعن ماشي بمسيره
هاي ايامه ويمر
وانته گاعد تنتظر
تنتظر وبگلبك انته شلون حيره
هذا عاشورك يهل
وگلبك اوياه يتصل
تبچي وتنوح وتأديها الشعيره
تنظر وگلبك يدگ
عشگك انته من صدگ
يبو صالح بالعشگ مليان غيره
ادموعك انته من تهلها اتهلها بحساس
لان تدري بالضعن زينب وعباس
العضن بالطف موئله
اجه وگاصد كربله
ضعن الحسين
3
لو شفت ضعن الحرم
يبو صالح تبچي دم
دمعتك يالمهدي بعيونك تلالي
ضعن بي كل الاهل
امن المدينه لو وصل
اتشاهد اهلك روسهم فوگ المعالي
ادري لحظاتك تمر
سيدي مثل الجمر
راح اسألك خايف ايجرحك سؤالي
من يمر هودج حزن
وتسمع بعمتك تون
شلون تتحمل يغالي وابن غالي
حضر ادموعك يمهدي من تمر بيك
ركز الزينب تشاهد عينها اعليك
ضعن شبه القافله
اجه وگاصد كربله
ضعن الحسين
4
گاعد بنص الدرب
تشعر الموقف صعب
من تشاهد علي الاكبر يمه جاسم
بدر گاعد يم بدر
اثنينهم ضحو عمر
الاكبر اتگطعه البواتر والصوارم
وجاسم ايعوف العرس
ويوگع بحر الشمس
هذا حاله ايصير عريس الهواشم
حدهم اهلك للظهر
محد ايضل للعصر
من الاهل محد يضل يالمهدي سالم
ابالك اتدور المواقف والحچي اهواي
وصوت عبدالله تسمعه يصرخ الماي
مرد گلبك حرمله
اجه وگاصد كربله
ضعن الحسين
5
الدمع بعيوك نزل
الضعن من شفته وصل
وصاحب الرايه ترف رايته الخضره
هذا عباس الابي
حامي ضعن الزينبي
والله يعلم حزنك الشايله اشكبره
گلبك اهنانه وگف
يبو صالح بس هتف
هذا جدي حسين وعيونك النحره
هلت ادموعك دمه
وصحت يمه فاطمه
هذا جدي الداست الخيل اعله صدره
وصل ضعنك يبو صالح ضعن الايتام
بعد ميذبحون اهلك يگصد الشام
دمعك ونوحك اله
اجه وگاصد كربله
ضعن الحسين
لاتنسون والدي وابني عباس من الرحمه والمغفره
خادمكم رياض الرسل الجابري
نزله ام البنين (ع)
رابح الوالاها ام البنين
خاسر العاداها ام البنين
1
للوفيه الطاهره انصب الدمع
هواي تستاهل نكسرلها ضلع
هاي ام الاربعه الما ينفجع
گلبه الها عالاقل خل ينصدع
ربك العلاها ام البنين
خاسر العاداها ام البنين
2
العنده حاجه لا يقصر باللطم
باب للحاجات منها والنعم
مره هيه وقدمت اربع زلم
من تمد چفك الك تختم ختم
الحاجه ماتنساها ام البنين
خاسر العاداها ام البنين
3
حاجتك تگضيها بالمجلس تره
من تناديها بدمع يالطاهره
بكل مجالسها تجيك وحاضره
والك تشفع يالمحب بالاخره
حيدره السماها ام البنين
خاسر العاداها ام البنين
4
لا تقصر بالحضور وياها
فرصه هاي اشعندك وانخاها
اشگد كرامات الجليل انطاها
وباب للحاجه الك خلاها
اطلب وانخاها ام البنين
خاسر العاداها ام البنين
5
الها من تحضر الدمعه ابچيها
تفلح بأولها وبتاليها
بالمجالس انته من ترثيها
عهد لأم الاربعه تنطيها
عهدك انته وياها ام البنين
خاسر العاداها ام البنين
6
اختم بدمعك ونوحك عالشهيد
الطاح فوگ الترب محزوز الوريد
ظل ثلث تيام مرمي اعله الصعيد
وصيح يأم البنين شما تريد
اشعندك وانخاها ام البنين
خاسر العاداها ام البنين
لاتنسون والدي وابني عباس من الرحمه والمغفره
خادمكم رياض الرسل الجابري
قثيده بحق ام ابنين
حـوايـجنا حوايـجنا الج نعرض حوايـجنا
يا أم البنين اليـوم الج نعرض حوايـجنا
الچ نـتــوجه بهـل يــوم بگلـبـنـا انــادي وبحسره
لأن عــنــدچ كـرامه وجاه تجـبـرين الگلب كسره
نحلفچ احنه بالكرار بمصابـه ولـوعـة الطــبــــره
ونمشي عليچ نحر حسين وضلع الطاهره الزهره
تخلصينه تخلصينه بفضل جاهچ تخلصنه
ننادي وبگلب مالــوم
الچ نعــرض حوايجنا
اجينه الليله نترجه وشرف من عــدنه نـتـرجـــه
لأن ندري اللي يتمسك بمقـامچ بالحشر يـنـجــه
ولأن للباري نعرف زين مشيتي بشرعه وبنهجه
كـرامه الـثـار أولادچ يطــالــب بــاچـــر الحــجـه
تحفظينه تحفظينه اذا ننخه تحفظينه
بكرامة جاهچ المعلوم
الچ نعـــرض حوايجنا
الچ هاي الگلوب الـيـوم تنخاچ بصدى المـدمــع
بالمجلس حـوايجـنـا تگضي ابلحـظــة الـنـطــلـع
الدمع يتشرف وممنون بحضرتچ كل وكت يركع
لـذلـك احـنــه نتشرف مـنــچ كـل وكــت نـطـمــع
تعـينينه تعـينينه بحوايجنا تعـينـيـنـه
لأن مثل الجبل الهموم
الچ نعـــرض حوايجنا
الحوايچ محنة المظلوم والچ هاللـيـله نعـرضها
الوكت جرد علينه أسيوف علينه وگوه أفرضها
نريد احنه حوايجــنـا بحـضرتــچ كلها ننـفـضها
وكرامه الأسمچ الباري عـلـيـنه ينعـم أيـفـضـها
تسجلينه تسجلينه خدم عندچ تسجلينه
لأن عون انتي للمظلوم
الچ نعــرض حـــوايجنا
الحوايج عـدنه من تصعب نصر وعليها نتحمل
عـليها معـودين احـنـه نـقـره الـفـاتحه وتسهـل
الطلب والحاجه تگضيها ابــد مالحـظـه تـتأجـل
لذلك احـنـه منعــوفـچ ومـنـچ كـلـشـي نـتـقـبـل
تسندينه تسندينه اذا طحنه تسندينه
لأن حبچ فرض مقسوم
الچ نعــرض حوايجـنـا
لاتنسون والدي وابني عباس من الرحمه والغفران
خادمكم رياض الرسل الجابري
ام البنين (ع)
مات حسين مات حسين
اتنادي بدمعه مات حسين
تنادي ام البنين بدمعه وبحسره
ابني حسين راح وگلبي شيصبره
فديته بأربعه بس اشعر امقصره
اخافن ما اوفي فاطمه الزهـره
مدري اشصار گلبي احتار
اتنادي بدمعه مات حسين
انه ام البنين ادمــوعي هـمــاله
هسه شلونه ابني اشصاير بحاله
لو ماخذ اعــيــوني بدربه تبراله
مدري اشصار بيه اشصار بعياله
گلبي اينوح ظل مجروح
اتنادي بدمعه مات حسين
ابني حسين راح وخابت اضنوني
اظـل اتأمله والــدمعه بعــيــوني
انطي كلشي انطي لو يخلـــوني
بس لحظه اشوفه ويعمن عيوني
ماوفيت ماوفيت
اتنادي بدمعه مات حسين
نذرت ابنيني لجله وابچي بالدمعه
من حگي اعله ابني لوردت انعه
انه ام البنين وراسي مارفــعــه
احس امقصره وي فاطمه البضعه
واويلاه واويلاه
اتنادي بدمعه مات حسين
تنادي ام البنين بنار لهابه
وتبچي اعيونها والدمعه سچابه
من حست ابنها طول اغـيــابــه
اه يحسين نـــادت اه ومصابه
حست مات حست مات
اتنادي بدمعه مات حسين
ظلت بالدمع والنوح والاحزان
من عرفت ابنها منذبح عطشان
مات حسين ضامي بحومة الميدان
ثلث تيام عاري وجثته عالتربان
بالاحزان بالاحزان
اتنادي بدمعه مات حسين
تظل ام البنين بهاي قصتها
مثال التضحيه ومرفوعه رايتها
مانشفت ابد للموت دمعتها
للحاجات باب الدنيه خلتها
بأخر صوت بأخر صوت
اتنادي بدمعه مات حسين
لاتنسون والدي وابني عباس من الرحمه والغفران
خادمكم رياض الرسل الجابري
ام عبد الله الرضيع كانت تهز بالمهد وتقول
من جنت اهز بالمهد حسبالي نام الولد
يكـعـد و تــانيتـه
مذبوح مدريـتــه
حسبالي نام الولد
عـبـد الله ماحـسبت من بين اديه يـروح
وبعـد اگضي العـمـر آهات بس وجروح
ما ادري ليش القـدر بسهامه گام ايلوح
مايدري ويـاه انه متعـلگه روح بــروح
ماحـسبت بسمـتي تـتـبــدل بــدمـعـتـي
ما ادري حاچيته
مذبـــوح مدريته
حسبالي نام الولد
مره انظر اعـله المهد مره انظر الحالي
وبروحي اسأل گمت ليش المهــد خالي
عـبـد الله كل دنـيـتـي وسـلـوتي وآمالي
وموغالي چان الطفل غالي وابن غالي
بالگلب من الخـطــر وعن عين كل البشر
لو ادري ضميته
مذبـــوح مدريته
حسبالي نام الولد
حسبالي نام وهـده والعـطـش نـام وياه
ماحسبت بالمهــــد لو ردتــه مـا الگـاه
معـقوله ابني انذبح معـقـوله راح انعاه
معـقـوله اعـيش العـمر انه اگـدر ابلياه
عـفـتـه واذا انسـأل بالمهـد چان الطـفل
نايم ونـاسيتـه
مذبوح مدريته
حسبالي نام الولد
گلب اليـدگ عـالـولـد من امه شيصبـره
مو طفـل تنظـر اله تنظـر اله اشكـبـره
وانه ابني من العطش گلبه التهب جمره
ردت انه اگعد الولد وبگلبي الف حسره
صديت صوب المهد بس مالگـيـت الـولـد
ثاري انه وديته
مذبـوح مدريته
حسبالي نام الولد
يحسين هاك الولد شوف الولد عطشان
راح واخذ مهجتي والساحة المـيـــدان
مابين سيف ونبل ومابين هالعــــدوان
من شافو ابني بـرز اتعجبت الفـرسان
قطعو نزاع الطفل وانذبح ابني بنبل
للاسف تاليتـــه
مذبوح مدريتـه
حسبالي نام الولد
لاتنسون والدي وابني عباس من الرحمه والغفران
خادمكم رياض الرسل الجابري
عبد الله الرضيع (ع)
يعبـد الله ييمـه أنظـر لـحـالـي
شلون تعوفـني ما جانت أبـالـي
امـد أيـدي وتفــز الــروح مـــا الگــاك
شلون اگـدر واصبـر من عگب فرگاك
ييمه مـن رحـت تاخــذنـي كون ويــاك
عـفـتـني الـوحـدي والحــزن يـبــرالي
اعـايـن عالمهـد والـدمـعـه بعــيــوني
يــبعـد امـك يـيـمـه وخابت ظـنــونــي
عـنـك شــرد اجـاوب مــن يسألــونــي
يعـبـد الله يــغـالـي واغـلـه كـل غـالي
گلب أمـك يغالي شـلـون شـيـصـبــره
اخــاف بـهـاي رايـد أنـتـه تخـتــبــره
مــا بـيـه يـيـمـه أفــراگـك اشكــبـــره
مــايحـمـل فـرگـتـك صــعــب دلالـــي
مـا تـرجـع بعــد راح اگـطع الـظــنــه
وعـمـري يـنگـضي ونـه بـأثـر ونــه
اسأل روحي بعــدك گـمت واتـمــنـــه
هــم تـرجع واشـوفـك تلعــب اگـبـالي
ما تـرجـع بعــد و امــك عـليك أتنوح
يـل أبسهـم المنيه وبـالنحـر مـذبـوح
الروح اتروح يبني لـو غبت وتـروح
وبعـد عـيـنـك ييمه الحـزن يصفــالي
بحـضن الـوالـده تـتـربـه مـا خـلـــوك
يبني اعــداك لـمـن بالمهــد صـابــوك
بسهم مسموم صابوا نحرك وفطموك
وأنه بهـاي الشهـاده الــف هـنـيـالـي
لاتنسون والدي وابني عباس من الرحمه والغفران
خادمكم رياض الرسل الجابري
نزله للعباس والرباطات هوسه
الليله الليله الليله
الكافل صاح الليله
1
عباس صال بصولته وطلابته اطلابه
عباس ابن حيدر علي والوادم اتهابه
سبعين الف ماهمته وامحسب احسابه
يگضيهم ابسيفه ويرد واتنوخ ارچابه
الرباط
فوگ اعله النهر يگضيهم ابسيفه
2
عباس لو اغضب غضب محد يصل حده
حتى الهوه وبراحته لو رايد ايسده
الفرسانهم لمن مشه الهم خبر وده
فوگ الشريعه اتظل حلم يهل العده الشرده
الرباط
واليطلع الي هذا أمه متريده
3
عباس من حيدر علي ماخذ الف شمره
وامعلمه افنون الحرب واحتارو بأمره
طب وتوسط بالنهر والقائد اشكبره
يحلف بأسم المرتضى والحسن والزهره
الرباط
فوگ اعله النهر يگضيهم الليله
4
عباس بالرايه لعب والشمره من حيدر
محد يكضه اعله النهر لو اغضب وزمجر
خله الجثث فوگ الجثث بالمعركه تعثر
بيهم لعب حد التعب وبصارمه يفتر
الرباط
تل من الجثث عالنهر خلاها
5
عباس منطيها وعد يرجع ويسگيها
گلها يسكنه ادللي وياعمي سمعيها
روس الزلم بالمعركه بالجربه اخليها
عباس لو كلمه نطه للكلمه يوفيها
الرباط
يوفي لو وعد عباس الحچايه
6
عباس ملاچ واله سوح الحرب هايه
عالنهر داس اعله الزلم واترفرف الرايه
بالماي غايه من وصل وامحقق الغايه
يا آيه رتلها وبرز خل نسمع الآيه
الرباط
بسم الله وبلله عالنهر ناده
لاتنسون والدي وابني عباس من الرحمه والمغفره
خادمكم رياض الرسل الجابري
هوسات للعباس
١
نزل عباس واحتارو جميع الناس
شي گالت علي وامحزم بنوماس
لأن سد الهوه لمن برز عباس
والجيش احتارو بفعاله
٢
هذا البزغر وامگطع اگماطه
من حيدر يضل كل زوده وازماطه
للحومه نزل والهوسه رباطه
ماعوفن خدرچ يازينب
٣
عالشاطي جثث خلاها تتطشر
وبخزرت اعيونه احتارو العسكر
برز مابرز كله اشويه من حيدر
والعسكر ما مالي اعيونه
٤
شال الماي بيده ورفض مايشرب
ذب الماي من أيده زعل وأغضب
من الخيمه حس تنظر عليه زينب
ما أشرب يا نفسي وهوني
لاتنسون والدي وابني عباس من الرحمه والمغفره
خادمكم رياض الرسل الجابري
يبو فاضل يعباس
يبو فاضل يعباس
١
يامن على الشاطي صحت
والجيش داخل انذار
يبو فاضل يعباس
يبو فاضل يعباس
والسيف يحصد بالزلم
والروس حدرك طشار
يبو فاضل يعباس
يبو فاضل يعباس
بركان شي گالت أجه
عالمشرعه شي أعصار
يبو فاضل يعباس
يبو فاضل يعباس
عالنهر رفت رايته
عباس أبن الكرار
يبو فاضل يعباس
يبو فاضل يعباس
٢
عباس سد عين الشمس
وبسيفه سوه الماصار
يبو فاضل يعباس
يبو فاضل يعباس
ماخذها شمره من علي
وبمعركه مايندار
يبو فاضل يعباس
يبو فاضل يعباس
ويلكط بروس الزلم
وبكيفه لمن يختار
يبو فاضل يعباس
يبو فاضل يعباس
ماخذ الرايه من علي
وامسلمه ذوالفقار
يبو فاضل يعباس
يبو فاضل يعباس
٣
لمن وصل صوب النهر
والجيش ينظر محتار
يبو فاضل يعباس
يبو فاضل يعباس
حط رجله فوك المشرعه
واكبال كل الأشرار
يبو فاضل يعباس
يبو فاضل يعباس
صاح انه أبن حيدر علي
طلسم واحمل اسرار
يبو فاضل يعباس
يبو فاضل يعباس
والجيش سمعو صيحته
صاحو دخيل وستار
يبو فاضل يعباس
يبو فاضل يعباس
لاتنسون والدي وابني عباس من الرحمه والمغفره
خادمكم رياض الرسل الجابري
نزله للعباس
ياحي ابو فاضل يوم الغاضريه
وسكينه تنتظره و تحشمه رقيه
راح وعـزم لمـن هجـم شاف الكـتايـب
خله الــزلم تــردم ردم والموت واجـب
دگ الخـطر فوگ النهر شوفو العجايب
من حيـدره ماخــذ تره فـن الحـــرايـب
لو شافه عزرائيل ياخذله تحيه
وسكينه تنتظره وتحشمه رقيه
هجمو عليه سبعيـن الف لتگـلي بـدعـه
عباس ابــن حيـــدر علي والكل تتـبـعــه
من حشمته اسكينه ونزل كلها تسمعـه
لمن نــــزل جيش الكفـر فـرهم باصبعه
صاح انه كل زودي من حامي الحميه
وسكينه تنتظـــره و تحشمه رقـيــه
عـبـاس انـــه ولجل السبط ارخص دمائي
مـــن المهـــد كاتب عهــــد لجله انتمــائي
كــاتــب انـــه بسيف المجد هـــــذا انتمائي
ولهل السبب دمــي بــقــه وضل كربلائي
حتى اوافيهـــا بــاجـر للزجيه
وسكينه تنتظره وتحشمه رقيه
لمـن بـــــرز رغــم العـدد وبخزرت العين
صاح بغضب يهل الحـقــد وين المفر وين
لا مــاشـبــع يهوه الـرگب وبسيفي حـدين
منذور انـــه من الــزغــر خــادم للحسيـن
والخادم العباس خل تسمع اميه
وسكينه تنتظره و تحشمه رقيـه
لمـن وگـع لجـل الخـدر والكل تشوفـه
حيدر اجـه يمـه گـعـــد ينعه ويطوفـه
فوگ النهر گاعـد بـقـه لا مايعــوفـــه
هـذا الـذي من الزغـر قبل چـفــوفـه
معقوله ياعباس نايم عالوطيه
وسكينه تنتظره وتحشمه رقيه
لاتنسون والدي وابني عباس من الرحمه والغفران
خادمكمرياض الرسل الجابري
موشح العباس
صال ابو فاضل وطب ميدانها
وشبت بروس الزلم نيرانـهـا
صال ابو فاضل وخلصها الزلم
وگام روس بروس يردمها ردم
عالشريعه صارت الشرده حلم
هذا ابن حيدر وعزها وشانها
الصاده بالگصه ختم يختم اله
وحاشه مايغدر ابن عقد الوله
ماي ماحـط بجـربـتــه بكربله
بيها حط روس امن ابن سفيانها
الروس لبن ازياد اغلبها بـعــث
وعالشريعه چم الف مدري الجثث
ابو فاضل من علي كلشي ورث
وسجل بأسمه الاخوه وصانها
عالشريعــه الزلم ضلت حايــره
هذا ياهو الفارس وشنهي الجره
صاح واحد هذا سبع الگـنـطــره
الضحه روحه الها وابد ماخانها
چنه حيدر بالحرب والموزمه
عالنهر سواها اكـبـــر ملحمه
ايده مدها وماشرب رغم الضمه
يانفس هوني كتب عنوانها
ترس جوده واتجه صوب الخيم
وعينه تربي من مشه صوب الحرم
اتبده ماي الجود وانصاب بسهم
وروحه هاجت بالزفير احزانها
مارجع بالماي وانصابت العين
والحسين ايعاين العباس وـين
من وگع حس انكسر ظهره الحسين
يدري شيعوض فخر عدنانها
عالنهر من طاح چن طيحت جبل
ومن وگع عباس عسكرهم وصل
لعد خيمت زينب وماضل امل
وزينب اهنا ودعت خوانها
لاتنسون والدي وابني عباس من الرحمه والغفران
خادمكم رياض الرسل الجابري
موشح للاكبر
علي الاكبر من طلع هز رايته
والجيوش اتبسمرت من شافته
١
جنه حيدر من طلع وسط الجمع
والسبع من عادته ايخلف سبع
كل مزايه المصطفى بي تنجمع
صوته واطباعه وكلامه ومشيته
٢
اتوكل اعله الباري وبعزمه نزل
والجيوش اتشوف بعيونه الزعل
على الحق ناده عليهم من وصل
ناده ضل اينادي كلها وسمعته
٣
احنه اهل الحق ينادي بكل يقين
نمشي احنه بنهج سيد المرسلين
حسين ابويه وجدي امير المؤمنين
صاح كل هذا الكلام بطلعته
٤
الحومه بيده وراد يكلبها كلب
وخله كل فرسانها اتيه الدرب
الكاع حدر الزلم كامت تلتهب
ادخيل ياستار كلها نادته
٥
صارت الحومه ظلام ابلا ضوه
وشبع سيفه من الدمه حد مرتوه
علي الاكبر من نزل سد الهوه
وتيهت المشراد كلها بصولته
٦
ضحه بالروح وفدائي الدينه جان
علي الاكبر يعرف الصار امتحان
بكل مكان احنه نكول وكل زمان
الله يلعن ال اميه الذبحته
لاتنسون والدي وابني عباس من الرحمه والمغفره
خادمكم رياض الرسل الجابري
قصيده بحق علي الاكبر (ع)
من الخيمه طلع فخر الهاشميه
وبنور الوجه ضوه الغاضريه
الوادم شافته
نور بطلعته
ضوه الغاضريه
١
علي الاكبر جمال وروح واترف من هوه النسمه
طلع من سمع ناده حسين هل من ناصر بهمه
وكف واكباله نور ونور نعمه امكابله النعمه
وصد بطارف عيونه للخيمه ونظر أمه
ليله بيا وضع نادت يا دلاله
ماهمني الذبح مشغوله بجماله
شمحله وكفته
نور بطلعته
ضوه الغاضريه
٢
ليله اعله البعد تنظر وهيه بخيمة الاحزان
شاغلها جمال البيه تعاين زهرة الشبان
يطلع نور من وجهه ابنها بحومة الميدان
بخده تشوف نور الكون رغم جان الولد عطشان
مو مالت حرب نوره وكل حلاته
بالحومه ابتدت صورة ذكرياته
ترسم بسمته
نور بطلعته
ضوه الغاضريه
٣
مشه الاكبر المصرع موت بس هوه بدلال ايروح
يدري اسهام تنتظره وعيون المنيه اتلوح
بعقيده اتقدم اعله الموت بعد اشويه لن مذبوح
يدري شراح بعده اصير ويدري بأمه بعده اتنوح
صله بيا فرض من قدم حياته
فرض الحب عطر شايل امنياته
فارض هيبته
نور بطلعته
ضوه الغاضريه
٤
تعنه وراح للميدان ونظرات الموادع موت
بين حسين والاكبر مات الحجي ومات الصوت
وداع الابن مثل الطيف من ياخذ عمر بسكوت
وانطه حسين بالميدان ابنه اليشبه الياقوت
قدم مهجته بنيران المدامع
لو دمعه سكت شيسكت المواجع
الباري ورادته
نور بطلعته
ضوه الغاضريه
٥
رسم بالدم معاني هواي بين الحركه والدمعه
من طاح وهوه اعله الكاع ابوه مالحك ايودعه
اجاه مكسور ظهره وطاح يمه واختلف وضعه
على الدنيه العفه من صاح كعد واعله ولد ينعه
بدمعات الالم وبنار الفجيعه
ضاكت عالابو كل هاي الوسيعه
يعاين جبهته
نور بطلعته
ضوه الغاضريه
لاتنسون والدي وابني عباس من الرحمه والمغفره
خادمكم رياض الرسل الجابري
القاسم
شعجب مادام
عرس جسام
بشبابه وعمره متهنه
بصراع الطف دخل جسام من شاهــد ابــو الأحـرار
وحـده بحـومـــة الميـدان عـمـه وما بـقـوا أنصــار
تـقــدم عـن حمه الاســــلام يـدافع حـتـى ما يـنـهـار
حمل سيفه وتخطه الموت نـور ومن صلب أنــــوار
أجه بهمه
وگصد عمه
مشه بهيبه وأسد چنه
طلب جسام من عـمه يعـمي أرخـصني وأتـرجـــاك
أريدن دمي هـذا اليوم أخـلطـه لـو طحـت بــدمـــاك
شسوي بعـمـري من بعـدك مايحله العـمـــر لـولاك
لأن رحـمه يعـمـي ألـنـه البـاري مــن امـر خــلاك
يضي عيناي
حلم دنياي
يعـمي بـدمي أتحـنه
نطاه أذن الحسين وراح يصيح بصوته شوفـوني
بروحي ومن أجل هالدين أدافع وانتوا تـدروني
تعـرفــوني وأكـيـد أنتـوا ولا ظـن ما تعـرفـوني
أبــويــه الجود وأبن الجـود أنـي وما تـنـكـروني
بشرف عازم
انـه القاسم
الموت ولا مفـر منه
مشه ويتخـطـه فوگ النار يـرعـد والعـزم باسه
لبس ثـوب الكـرامــه وراح مادنگ أبـــد راســه
ينادي الـتـاج بـالمـيــدان يـنـادي يـريــد لـبـاسـه
وصل جسام يـم الـتـاج طـلـع هـالـتـاج مقـيـاسـه
ملك سلطان
عـلى الشبـان
صار ومن زغـر سنه
رسـم بالطـف نصـر عـزه تعـله والمجـد شـانــــه
تقـدم عـالشبـاب وصار قـدوه ويـزهي عـنـوانـــه
مثل جسام يا عـريس الحـومه اتصيـر صيوانــه
راد بكل شرف جـسام الـزفــه بـوســط مـيــدانــه
على جروحه
رسم لـوحه
بيها أشموعه والحنه
لاتنسون والدي وابني عباس من الرحمه والغفران
خادمكم رياض الرسل الجابري
قصيده بحق القاسم بن الحسن (ع)
طاح القاسم
وبالدم راسم
وجه الكون
من طاح بياحاله
من ثغره ويتلاله
وجه الكون
١
امن الخيمه طلع يتلاله وجه النور
لابس لامته يمشي ويحس مسرور
شايل جرح صبره والمنايه اتدور
ترك بصمة غضب سيفه بكلب عاشور
ياخذ حيفه
وراسم سيفه
وجه الكون
وتشوفه الخياله
من ثغره ويتلاله
وجه الكون
٢
وجه نور الحسن لمن طلع ازهر
بوجه القاسم وبالحومه يامنظر
الناس اتشاهد الايمان والكوثر
صورهن الباري بنسخه من حيدر
سحر عيونه
وشايل لونه
وجه الكون
والصاحو هنياله
من ثغره ويتلاله
وجه الكون
٣
مو مالت حرب صاحب وجه شفاف
من حر الشمس لازم عليه ينخاف
المذهوله بجماله وحايره الاوصاف
هسه بمعركه هذا الوجه ينشاف
وبيا صوره
شايل نوره
وجه الكون
نوره ومحد شاله
من ثغره ويتلاله
وجه الكون
٤
طلع بسمة وجه والدنيه متعطره
شايل سيفه يلمع والضوه بثغره
يعاين على الجيش ومستخف بامره
مثل عباس عمه البل وفه اشكبره
شاف العسكر
بنوره وازهر
وجه الكون
والبسمه التحلاله
من ثغره ويتلاله
وجه الكون
٥
طاح وراسم بدمه ورود وياس
الشمس نزلت تبوسه المثله اي ينباس
مو دم ينزف المذبوح من الراس
مشاعر فايضه بوجدانه والاحساس
رقه بموته
وراسم صوته
وجه الكون
حب ينبض دلاله
من ثغره ويتلاله
وجه الكون
لاتنسون والدي وابني عباس من الرحمه والمغفره
خادمكم رياض الرسل الجابري
حميده واولاد مسلم
حميده تنادي بدمـوع المصيـبـه
رجعت من اليسر واشعر غريبه
ولا واحد سمعها
تنادي بكل دمعها
وين اخوتي وين اخوتي
1
بعـد ماراحـو اهـلي ومشـو عـنـي
بقـيـت الــوحــدي ايسـلـيـني وني
بعـد فگــد اخـوتي مـذهـولـه چني
زغـيره ومن مشيت الظهر محني
صحت وانه زغيره وفاگده الراي
حميده انه اشعـجب شو محد وياي
ابد ميسر وضعهــا تنادي بكل دمعها
وين اخوتي
وين اخوتي
2
عـافـوني ومشـو وسط البـراري
ونحروها غصب ذيج الصحاري
يمشون بـرعـب والـدمـع جاري
وانه الـعـايشه بـلـيـل انـتـظـاري
عافـوني ومشو وبـدمعي انادي
اثنين اطفال تاهو بالبـوادي
تحس محني ضلعها تنادي بكل دمعها
وين اخوتي
وين اخوتي
3
اخوتي ازغـار من حقهم يتيهون
غـيـر العـز اخـوتي مـايعـرفــون
من فـرو الـلـيـل بطـولـه يمشون
ولوصار الصبح خـوفـاً ينـامـون
ميسمعوني مهما صحت ناديت
حميـده ولحضـنهم انه حنيت
صده الخوه دفعها تنادي بكل دمعها
وين اخوتي
وين اخوتي
4
گـلبي حس عـلـم بالصار بـيـهـم
اخـوتي ابعـاد ما اگــدر اجـيـهـم
بكل حقده اليضدهم وصل ليـهـم
عـرفهم من بـدو همه بحچـيـهـم
اهنا حقي امن اصيحن لحظة الموت
حتى لو صحت ماينفع الصوت
صده الصوت اشنفعها تنادي بكل دمعها
وين اخوتي
وين اخوتي
5
راد الجايـزه بحـقـده الـزمهـم
ذوله اولاد مسلم من عـرفهـم
اشگد اتوسلـو بيه ماتـركهــم
اخـوتي اثنينهـم بيده ذبحـهـم
اخوتي انذبحو وعـنهم بعـيـده
كون وياهـم انذبـحت حـمـيده
رگبهم من گطعها تنادي بكل دمعها
وين اخوتي
وين اخوتي
لاتنسون والدي وابني عباس من الرحمه والغفران
خادمكم رياض الرسل الجابري
ام البنين وخدمة الحسين
الله شرفني بعلي وبخدمة أولاده
شرف إني أم البنين واخدم الساده
اشعـر بواجب و دين
إني من اخدم حسين
شرف إني أم البنيـن واخدم السـاده
الله شرفـنـي ورفعني بهـيبته وقدره
والي يختاره يكرمـه بعزه ويـنصــره
إني خدامـه جعلـني الـبـاري وبأمـره
أبيت حيدر حتى عني تقـبـل الزهـره
جنت اسهر ليلي كله وابد مانـامـه
ﭽنت إني أبيت حيدر جنت خدامه
عن درايه وعن يقين
إني من اخدم حسين
شرف إني أم البنين واخدم الساده
شرف هاي الخدمه اعرف ترفع الإنسان
والي يخدمهم بعمره ابد مو خسران
أيميزه الباري برحمـته ويرتفع له شان
وتاج يلبس بالخدامه ويعـتـبـر سلطان
واني سلطانه بخدمتي واخدم بعمري
حتى بالمحشر اريدن يرتفع قــدري
فاطمه اتكحل العـيـن
إني من اخدم حسين
شرف إني أم البنين واخدم الساده
الحسن إني من اخدمه الباري يرفعني
الهل مقام السامي واعرف حبه يدفعني
الحسن أغله من حياتي واعرف شأعني
بهل كلام وردت إني الـزهـره تسمعـنـي
للحسن إني من اخدمه إني يالزهره
شلون باﭽر من اشوفچ اشعر امقصره
ارتجـي بـمـد الاديــن
اني من اخدم حسين
شرف إني أم البنيـن واخـدم الساده
الزينب اشعـر بالسعـاده لمن اخدمـهـا
لأن ادري بيها بـاچــر كلهـا تظـلـمـهـــا
شرف للخدامه مثلي اتشمها واتـظمهـا
لان ورثـتهـا المصايب كلهــا مــن أمهـا
من زغرها وانظرلهـا احس مهمومه
چـنت اسألهـا وتگلي اني مظـلـومه
ردت زينب ترضه زين
إني من اخدم حسيـــن
شرف إني أم البنين واخدم السـاده
والحسيـن الخلي اسمي الكل يعرفونه
شلون ماخـدمـه بحياتي واني ممـنـونه
شيسوه عمري خلاف عينه شيسوه من دونه
اشعـر إني بكل خدمتي بيده مـرهونه
عني لو يرضه أبو اليمه الباري يقبلني
وبسجلها الزهره ترضه من تسجلني
الگه هاي الخدمه وين
اني من اخدم حسيـن
شرف إني أم البنين واخدم الساده
لاتنسون والدي وابني عباس من الرحمه والمغفره
خادمكم رياض الرسل الجابري
ام البنين
الج هـالليله الـونين
والكلب ذايب حنين
نبجي يا ام البنيـن
ابدمع العيون
كلنه هالليله بــدمــع نبچي سويـه
وابـد منـوفـيــچ احــنــه يالــوفيـه
هــواي قــدمـتـي يحره يــالآبيـــه
ردتي بفعالــچ تجازين الــزچــيـه
الچ هــالـليـلــه نـــون
وكل گلب ضل ممتحن
نبچي يــــا أم الحــزن
بدمع العيون
الچ يا ام البنين شما بچــيـنـــــه
نشعر مقصرين وابدن ماوفـينـه
من تحضرين بمجالس يالحنينـه
انادي كلنه بالدمع عينچ عـليـنه
نظره من عندچ نـريــد
انحلفچ بـدم الشهــيـــد
خادمچ يحچي وسعـيـد
بدمع العيون
الليله يم عـباس كل احنه حضرنــه
انريد من عـنـدچ يمهيوبه آجرنـــه
على امحبـتچ والخدامه احنه كبرنه
وبالمجــالس الچ خلصنــه عمرنه
بكل محبه وعاطفـه
وعن يقين ومعرفه
نبچي يا ام الوفــــه
بدمع العيون
الليله احنه انسولف بــدمع النـدامه
ونشعر مقصرين احنه بالخــدامـــه
الخادم اليخدم يحس انتي ضمانـــه
ولو طلعنه انريج من عندچ علامه
انريد من عندچ قبول
انتي يا ام الفحــــــول
انحلفچ احنه بالبتول
بدمع العيون
على عناد الناصبي وكل العــــواذل
نبقه نبچي اعليچ احنه بدمع هامل
مــاتــرديــن اليـمــد الآيـــــد سائل
بس يحلفچ يالحبيبه بـأبـو فــاضل
يــابعــد روحي وهـلـي
بيــچ احـنــه نعــتــلـي
انحلفچ بــداعــت علي
بدمع العيون
سفره سويـنــه الچ والگلب لايـج
انريد منچ احــنــه هالليله النتايج
كل گلب يم البنين بشـوگــه هايج
بسم الحسين ونـقـدمهـا الحوايج
يلي ماعـنـدچ ضريح
نشتـكـي للباري ونصـيـح
ما يصح الا الصحـيح
بدمع العيون
لاتنسون والديوابني عباس من الرحمه والغفران
خادمكم رياض الرسل الجابري
موشح الانصار
انتو انصار العقيده وشانها
انتو امجاد الوغى وفرسانها
١
يارجال العزه والحق والثبات
يا أسود الغانمه ومعنى الحياة
كل أسم من ينذكر بالصلاوات
لون رادت تشتعل نيرانها
٢
ودارت المعركه بنيران وسهام
والأنصار الحرسو احدود الخيام
قدمو اعمار ومناحر والكلام
ترجمو أهل الوفه وعنوانها
٣
اول الاسماء قاتل بأقتدار
عاصب عيوني نزل والراس حار
والنعم منه برز شيخ الأنصار
ياحبيب الچان عزها وشانها
٤
اتقاتل وعالم فقه يابن خضير
وسيد القراء انته يا برير
بروح وحده تنزل انته وي زهير
والهوه انسد بوسط ميدانها
٥
ومسلم بهمه نزل بن عوسجه
من نزل للزمن گام ايحاججه
محد اتقدم ومن سيفه نجه
من توسطها ارتفع دخانها
٦
دارت المعركه واتفرج تعال
من تقدم بيها نافع بن هلال
والحسين ايشاهد بعينه الرجال
ياهو خان العشره ياهو الصانها
٧
شوذب وجون الرجل يم الرجل
ثابتين بمعركه ودگو رجل
الموت طوقهم مثل طوق الحجل
وشجرة المعركه همه اغصانها
٨
وآخر الانصار نازل مدري وين
مزگ اثيابه وصرخ ياسامعين
انه عابس انه مجنون الحسين
صوتي يوصل للسمه واعنانها
لاتنسون والدي وابني عباس من الرحمه والغفران
خادمكم رياض الرسل الجابري