1472
قناة خاصه للقصائد الشعريه احزان وافراح اهل البيت ع واخبار عن مجالسي الحسينيه للتواصل انقر على هذا الرابط واكون بخدمتك ثواب عمل هذه القناة لتعجيل فرج مولاي صاحب الزمان عج @Rere_1961
مربع لولادة الامام الحسن (ع)
هله بنور الحسن لمن بزغ بدره
1
هله وميت هله من البدر شافه
ظل محتار لمن شاهد اوصافه
البدر يمه نزل حتى السمه عافه
مذهول البدر ظل حاير بأمره
2
هالليله علينه الحسن هل نوره
سبحانه الجليل الصوره بصوره
درر چنه الحسن والدرر منثوره
من حيدر جماله وفاطمه الزهره
3
هالليله جماله ايشع ضوه واحساس
الملائك تحسده وشحال گلي الناس
من كل شر اعوذ الليله والوسواس
من عين الحسد من عين كل نظره
4
من بيت الوحي نور الحسن طالع
وبگلب الموالي نوره ظل طابع
نظره الهل حفل من الحسن طامع
بي ادري كريم وينطي للفقره
5
طماعين احنه الليله منعوفه
وكل مخلص حضر متأكد ايشوفه
حلفه بضلع امه ويكرم ضيوفه
واتصوره الحسن من يكرم اتصوره
6
اختم بالتهاني والگلب هايم
واتمنه يربي هالحفل دايم
هنيالك الزهره اتسجلك خادم
بميلاد الحسن واتوقع العتره
لاتنسون والدي وأبني عباس من الرحمه والغفران
خادمكم رياض الرسل الجابري
قصيده ولادة الامام الحسن عليه السلام
١٥ رمضان
اول انواره السماويه
من علي شع بمعانيه
للحسن بارينه من راده
نزله بحكمه آلهيه
١
اشرق الليله بجماله والحسن رباني
اغله كل الناس عندي وعايش بوجداني
منهجي وسبحت صلاتي والحسن قرآني
بجده وبنهج الرساله
مكتمل أيماني
مولدك آيه
يبو احچايه
بترافه فاطميه
تبقه محبوبي
ضوه ادروبي
الك روحي هديه
افرح اشگد بيه مابيه
واحمل بنص گلبي حنيه
للحسن والباري ياساده
نزله بحكمه آلهيه
٢
بالسمه وجهك يلالي
وانعكاس بنوره
عالارض يرسم جمالك
تزهي اجمل صوره
يالحسن نورك تجله
يشبه البلوره
روحي من حضرت تشارك حضرت ومسروره
الك اتعنه
عطر جنه
واشمك هالمسيه
ساكن احلامي
ألك ضامي
تظل روحي وفيه
ليله بس بالمنتصف هيه
من شهر رمضان قدسيه
الليله خل اتموت حساده
نزله بحكمه آلهيه
٣
انته عنوان القداسه والجمال الراقي
يالحسن بالروح انته وساكن بأحداقي
الك كل اسنين عمري
والك فيض اشواقي
كلها من الگلب تطلع
وانته وحدك الباقي
عايش وياي
يمولاي
يبو الروح النقيه
وانه ممنون
اذا كون
الك اخذ تحيه
ابصم بروحي الحسينيه
للحسن بصمه ولائيه
بالفرح جبريل من ناده
نزله بحكمه آلهيه
٤
يالحسن عشت بضميري
وبدموع الناظر
ارسم الليله بشجوني وبخيال الشاعر
الك همساتي واحسك
أنته يمي وحاضر
يالحسن تاخذني نصعد عالبراق انسافر
نصعد انحوم
عالنجوم
شرط فوگ الثريه
نرحل ابعيد
احس عيد
اذا تلزم اديه
گلبي ويحقق مساعيه
يمك بأوله وتاليه
للحسن وبفرحة اعياده
نزله بحكمه آلهيه
٥
اختم بصومي وصلاتي وافطر بميلادك
لان بارينه العلينه
اول انته رادك
احتفل واحضر الليله
وافرح بأعيادك
بغيض خلي اتموت كلها
يالحسن حسادك
واليحسدون
يموتون
ولا منهم بقيه
بس الاحباب
عالعتاب
يحضرولك سويه
احضرنه للراضيه المرضيه
ومنها نطلب احنه ليله
نظره منها انريد وزياده
نزله بحكمه آلهيه
لاتنسون والدي وأبني عباس من الرحمه والغفران
خادمكم رياض الرسل الجابري
موشح بحق ابو طالب والسيده خديجه
الليله حزنان النبي ابدمعه ويون
شلون عام ايمر عليه عام الحزن
مثــل هذا العام مامــر مستحيل
عالرسول وشاب شعره والدليل
ابــــو طالب چان اله اب وكفيل
والرسول ايحس اله چان الابن
ابو طالب حامه عن اشرف نبي
حـتى بـالشـــر مايمسه الاجنبي
مخلص الـديـنـه آبي ونعم الآبي
وذني لازم للبشــــر يـتــوضحن
والنبي بعام الحزن هـل دمعـتـه
لأعظم اثنين بحياتــه ودنـيـتـــه
ابو طالب والخــديـجــه مهجـته
والمثلهم حـگـه يشتــاگ ويحن
مدري ينعه عالكفيل بهل مصاب
لو على الخلصت عمرها بالعذاب
والخديجه النبي يشعر گلبـه ذاب
وحگه من يحزن وگـلبـه ينسحن
ياخديجه ينـادي ودمـوعه دمه
لان تستاهل بچـت حتى السمه
ياخديجـه شحـال بنـتـچ فـاطمه
اتمنت وياهـا بگـبـرها تـنـدفـن
ياخديجه ينادي محتار اشيگول
وحاير اشيحچي ويعاين للبتول
الليله الله ايساعده گلب الرسول
الليله بالاحـزان گـلـبــه مرتهن
خلي نتوجه الليله بهـل مـقــــام
وخل ننادي العجل مولاي الامام
يمته يوم الفرج بس بيا كـــــلام
بالدعاء وانصيح كل احنه بسجن
لاتنسون والدي وأبني عباس من الرحمه والغفران
خادمكم رياض الرسل الجابري
ميمر للخدام 2
عهد الخدم واهل الشيم
انكتبه الاخت راعي العلم
يازينب بدمع العين عهد الوفه يكتبونه
1
مسوؤله زينب عالخدم بالمحشر
وشلون توصل الها وبلا معبر
هاي الوفيه اشقدمت تتصور
چفين قدمتلك وعين ومنحر
اتهل الدمع هم مقتنع
الزينب تهشم چم ضلع
والخدم ادري ايصونو للعهد من ينطونه
2
يالخادم الزينب شرف تبچيها
وتشعر امقصر لو عمر تنطيها
حتى تحس مقبول فاير بيها
تاج اعله راسك زينب اتخليها
وكت الشدد زينب سند
لمن تناديها مدد
الخادمها تحضر والله وتعرفه من عيونه
3
بالك تحس متعرفك انته الحره
بكل مجلس الخادم تجي وتحظره
زينب اميره وبالخدم مفتخره
هنيالك وتخدمها بنت الزهره
الخدمه درس وعزة نفس
من عدها كلشي تقتبس
واليخدم اخت المظلوم بين الخدم خي عونه
4
زينب اليخدمها بصدق تندله
من دون كل هاي البشر يتعله
اذن عليها المجد فرضه وصله
معناها للخدام اشرف قبله
شمعة مجد من تتقد
للمدمع اتگلبه ورد
اتريد الشعائر بالروح تبقه وتظل مصيونه
5
بهاي السنه رايه تسابگ رايه
شافوها والعالم عرفها الغايه
بالاربعين چفوفها امحنايه
يحسين الك كل الخدم مشايه
رغم الخطر وكل الحذر
هتفت اجنود المنتظر
صگ الخدامه يحسين بالدم تره يوقعونه
الشاعر السيد رياض الرسل الجابري
نعي للقاسم
ماذا تقول رمله ام القاسم لولدها
تعال اشبر بطولك گبل متروح
على طولك اريد ابگدهن اجروح
ماريدك تجيني بثغر باسم
اريد اجروح كلك يمه جاسم
حتى امك ابگد اجروحك اتنوح
1
اريد ابچي اعله طولك دمعه دمعه
حتى اعجن الحنه وانه انعه
المثلك للعرس متفيده شمعه
لان عمك وحيد وراد فزعه
گوم انهض حبيبي و روح يمه
هنياله ييمه اليفدي عمه
لحسين اليقدم روحه مسموح
2
ما اگدر بعد يمي اخليك
ييمه تنذبح اول وتاليك
اريدن من تجيب الناس طاريك
احس اجروح كلي وانفجع بيك
يسولف گلبي عن لوعت عذابه
واگولن ماتهنه ابني بشبابه
يجاسم يمه بيك امعلگه الروح
3
كبرت وكبرت وياك الاماني
يجاسم يبني وانطيتك حناني
السهام البيك غدرت لو زماني
لأن هسه السهم ماخذ مكاني
تمنيت الجروح البيك بيه
لأن بعدك ازغير عالمنيه
ودمك عالارض يايمه مسفوح
الشاعر السيد رياض الرسل الجابري
نزله للعباس سريعه
يبو فاضل
1
تعنه الحومه شل كل الكتايب
خلسها وبعد ماتحچي الشوارب
تظل العين ماتعله الحواجب
حليب ام البنين بزوده شارب
ترد عايل يبو فاضل
2
دخل للمشرعه وكلها صگرها
يويلي للزلم لمن ظفرها
الزلم كل الزلم بصنع يفرها
ابو فاضل يظل عزها وفخرها
خبر عاجل يبو فاضل
3
حمل حملة علي بزود وعقيده
گلبها المشرعه والرايه بيده
جهنم لو غضب ابن الصميده
صعب عباس متوصفه القصيده
غضب شايل يبو فاضل
4
ردم روس الزلم والموت شافه
تحذر من اجاه يمسح اچتافه
اخذ فوگ النهر نوط الخلافه
رغم كل هذا بس مملي ترافه
لچن قافل يبو فاضل
5
على اجروف النهر راسم علامه
جهنم راسم وكاتب قيامه
يسويهن اجه وشاهر حسامه
هذني من اجل حبه لأمامه
شنو الحاصل يبو فاضل
6
شجاعه ومرجله كلها صفاته
عبد لحسين خلص كل حياته
وفي العباس وبنكران ذاته
يجيب الماي اجه بجوده الخواته
شرف حامل يبو فاضل
7
بعد ماداس بجدامه الضحايه
دخل وسط النهر بس عدنه غايه
ترس جوده وترفرف بيده رايه
نظر للماي بس ماشرب مايه
لأن عاقل يبو فاضل
8
طلع من النهر وبأيده سيفه
نظرهم صاح يحفاد السقيفه
صرخ دلهم وصاح ابلايه خيفه
لأن ناوي يحاسبهم بكيفه
فلا ايجامل يبو فاضل
9
انهشم راسه بعمود وما تأثر
لأن گايل الزينب ما اتأخر
ثبت فوگ النهر تربات حيدر
بخزرته مابقه اتطشر العسكر
بنصر حافل يبو فاضل
10
بعد ماطاح دامي وچان حاير
تبده الجود بس بعده يكابر
انطفت عينه بسهم ذيچ العساكر
لچن باقي وتخلد بالضماير
يهل سائل يبو فاضل
الشاعر السيد رياض الرسل الجابري
قصيده بحق العليله
------------------------
انـاديـك بــدمـعـتـي يبويه انه العليله
تذوب الصخر ونتي يبويه انه العليله
حـرت بـمـري
وانـه بـزغـري
يبويه انه العليله
--------------------
الك اشـكـي الليالي اشسون بحـالـي
بعـد مارحـتـوا عـني وانشـده بـالـي
گمت احسد يـبـويـه كل گـلـب خالـي
گلت اصبر وشوفـن والعـوض تالي
دمعـتي بطرف خدي يبويه انه العليله
اگضي الليل وحـدي يبويه انه العليله
ضعـف صبـري
وانـه بـزغـري
يبويه انه العليله
-------------------------
اگضي الليل وحـدي بـدمـعـي اتصبـر
على الفـرگـه يـبـويه وتدري ما اگـدر
بـالگــوه اصـبــــر روحـي واتـنـطـــر
يجي وياخـذني مو كـتـلي علي الاكبـر
اساهـر وحشه الليل يبويه انه العليله
بعـد مابـيـه كل حيـل يبويه انه العليله
انـشـده فـكـري
وانه بـزغـري
يبويه انه العليله
-----------------
بعـد عـيـنـك يبويـه اتسله بـونيـنـي
لأن راح اليـفــــرحـنـي ويـسلـيـنـي
اناشد گمت روحي وبدمعتي بعـيني
معـقـوله ابـويـه الـغـالـي نـاسـيـنـي
نسيـت الـي تحـبـك يبويه انه العليله
چنت ساكنه بگلبك يبويه انه العليله
الـدمع يـجــري
وانـه بـزغـري
يبويه انه العليله
----------------------
عـلى فـراگ الاهـل يـابـويـه شـتـحـمـل
من ضيمي وعذابي بروحي گمت اسأل
تـرضـه شـلـون ابـقـه الـوحدي وتـقبل
عـلـيـلـه تعـوفـني يـابـويــه مـن تـرحل
صعب اصـبر بلياك يبويه انه العليله
لون ماخـذني وياك يبويه انه العليله
شعـمـل دهـري
وانـه بـزغـري
يبويه انه العليله
---------------------
الك اخـتـم كـلامي ودمعـتــي بخــدي
يمـر وحـشه بغـيـابـك ليلي ويـعـدي
گـمت اشعـر زماني واگـف بـضـدي
لأن خــلاني بـويـه هـالـزمـن وحـدي
انـاطـر تــرد لـيـه يبويه انه العليله
صفت داري خليه يبويه انه العليله
بطـرگ قهـري
وانـه بـزغـري
يبويه انه العليله
--------------------
الشاعر السيد رياض الرسل الجابري
الانصار
انصار وخدم ذوله اهل الشيم
الله اختار السبعين
انصار بحب حسين
ذوله اهل الشيم
1
الباري من يحب انسان يختبره
الشجاعه والابه وبعاطفة صبره
والانصار ضحو للنذر عمره
خاطر ترضه عنهم فاطمه الزهره
ضحوا بالنفس ونطونه درس
الله اختار الطيبين
انصار بحب حسين
ذوله اهل الشيم
2
من دارت رحاها المعركه بأصرار
بيوم الغاضريه انكشفت الاسرار
ياهو اوي الحسين وياهو عنه اندار
محد ماثبت بس ثلة الانصار
حامو عالخدر ضحوله العمر
حملوا حبه انياشين
انصار بحب حسين
ذوله اهل الشيم
3
تقدمو والمنايه اتصيح بالحومه
الرجل لمن يموت بساعته ويومه
وانصار ابو اليمه اسماء معلومه
عبد بيهم وحر والشگگ اهدومه
منهم والنعم بالحومه الزلم
كلهم يملون العين
انصار بحب حسين
ذوله اهل الشيم
4
حب حسين شالوه بالضمير امتاع
اختيار الباري والنعمين ذوله اسباع
سفينه حسين وانصاره بشرف لشراع
هلا بالموت نادو لون صار
اوداع
واحدهم هتف حي اعله الشرف
بدروب العز ماشين
انصار بحب حسين
ذوله اهل الشيم
5
قدموها المناحر لبن داحي الباب
وفتحو للنصر چم معجزه وچم باب
الله راضي عنهم ثلة الاصحاب
نذكرهم الليله والدمع سچاب
صح قلة عدد ماخانو عهد
مذكورين بكل حين
انصار بحب حسين
ذوله اهل الشيم
6
زهير ونافع وجون وبعد فارس
للانصار شيخ ومحد اينافس
حبيب اسمه وبرير وشوذب وعابس
واحدهم صبح لبن النبي حارس
واحدهم علم قمه اعله القمم
بهذا الحب مقتنعين
انصار بحب حسين
ذوله اهل الشيم
الشاعر السيد رياض الرسل الجابري
ابوذيات للعليله
1
يبويه عالضعن عيني ترابي
وغطه عيوني ماوچد ترابي
عليله والگلب باقي ترابي
جرح من فارگت سكنه ورقيه
2
عليله وينسمع واضح تراني
تره أني
اموتن ما اضن ابقه تراني
يبويه هم بعد عينك تراني
واضمك بالدمع بثنين اديه
الشاعر السيد رياض الرسل الجابري
قصيده هلاليه
عـسى لاجـاي محـرم عسى لاجـاي
كل الاطـفـال تـنـادي تصـرخ المـاي
هذا حـال العايـله
من اجتي الكربـله
عسى لاجـاي محـرم عسى لاجـاي
من بزغ فجرك محرم اتوكل حسين وعزم
وصلو الطف المنايه ويحدي عباس الحرم
وزينب مخـدره وصلت يرف فـوگاها العلم
وابو فاضل قسم لأخـته والنعم من هالقسم
انـه احـامـيـچ يـزينب انـه احـامـيـچ
بروحي افديچ يخيتي بروحي افديچ
للـخــــدر متـكـفـلـه
من اجـتـي الكـربله
عسى لاجاي محرم عسى لاجاي
زينب مخدرة حيدر من اجـتي من الوطن
ماخطر عالبال الها تشوف اهوال ومحن
لاچن الايــام بيهـا انـدارت و دار الـزمـن
من اجت للغـاضريـه دفـعـت اخوتها ثمن
بگلب مخطوف اجتي بگـلب مخطوف
شافت ارماح عساكـر شافـت اسيـوف
بصوت صاحت لاهله
من اجـتـي الكـربـلـه
عسى لاجاي محرم عسى لاجاي
وصلوا بضعـن الفواطم للطـفوف بيا وضع
وهـمه اصل الدين همه واهـل قرآن وشرع
هـالمشاهـد بالضمايـر غـصب گامت تنطبع
لأن بيها الـروس كلها بكل مـحـرم تنگـطـع
بالـضـمـايـر نـشـاهـد هـالمـشــاهـد
عالجره وصار نخلي الباري شاهـد
الضعن هذا الصار اله
من اجـتـي الكـربـلـــه
عسى لاجاي محرم عسى لاجاي
حسين جـمـع اهـل بيته وبـلـغ بـهــذا الامــر
لجل دين الله ورسوله انضحي بالطف العمر
واليضحي بطيب خـاطـر باچر بيوم الحـشـر
يظمـن ينول الشـفـاعـه مـن محـمـد والاجـر
صار عنوان محرم صـار عـنـوان
للوگـع بالغاضريـه وطاح عطشان
والمـدامـع هـامـلـه
من اجـتي الكربـلـه
عسى لاجاي محرم عسى لاجاي
شماتمر وتـمرعلينه اسنين ماننسه الجره
هـذا شهـر الحزن هـذا نـاره بينه اموجره
خل نعزي الكون كله والجموع الحـاضـره
حتى باچر تشفع النه باچـر النه الطاهـره
عهد للموت ننادي عـهــد للـمــــوت
نبقــه خــدام وابـد مايسكت الصوت
الخدمه هاي مسجله
من اجـتي الكـربـلـه
عسى لاجاي محرم عسى لاجاي
الشاعر السيد رياض الرسل الجابري
ولادة السيده فاطمه المعصومه (ع)
معصومه
هالليله سجليها الاسامي
1
معصومه لحظة مولدج
اتنظرين جان ومقصدج
يعني تعال الوالدج
خليني بحضانك
يابويه خل اشتم عطر
صدرك وخليني ابتشر
احضني ماضلي صبر
معصومه قربانك
بميلادي واعيادي خليني اضمك
يالغالي وآمالي من صدرك اضمك
انظرلك
هم والد انته وهم امامي
معصومه
هالليله سجليها الاسامي
2
باب الحوايج صرت الي
معصومه ياجنة هلي
ارد انه احلفج بعلي
كل حاجه تگضيها
يالحبج احله من الشهد
معصومه كاتبلج عهد
ماعوفج انه وللابد
والخدمه قبليها
معصومه مرسومه هالفرحه علينه
هالليله حاجتنه ناخذها بدينه
ابعثلج
يالغاليه شوگي وسلامي
معصومه
هالليله سجليها الاسامي
3
باب الحوايج للبشر
معصومه صرتي بكل فخر
واليوم من عندج اثر
نطلب يمعصومه
ترضين عن هاي الخدم
أنحلفج ابراعي العلم
عباس وبذيج الخيم
والمشت مظلومه
عباسج انفاسج بجفوفه نحلفج
معصومه للحاجه تگضيها نعرفج
والمثلي
متأكد وتسمع كلامي
معصومه
هالليله سجليها الاسامي
4
معصومه مولدها انتشر
عالعالم وطش الخبر
مولدج سر المنتظر
والفرحه بشفافه
ياربي عجل للولي
بجاهك يحيدر يا علي
ياريت انه وكل هلي
يشملنه بلطافه
بشفافه والطافه يشملنه بحنانه
والفرحه من يظهر ويرفرف لوانه
للمولى
ارد ارسل اشواگي وهيامي
معصومه
هالليله سجليها الاسامي
شاعر اهل البيت (ع)
رياض الرسل الجابري
يـاجـعـفـر يـاصوت الشيعه
ما نـخـلـف امرك وانطيعه
لجلك احنه
انردد صحنه
ما نـخـلـف امرك وانطيعه
صوتك ظل عايش ياجعفر صرخه وعاش بكل وجدان
لـن صوتك اثبت للعـالم صوت الحــق صــوت الايمان
والمجـد الشـيـدتـه بصبــرك منه اتـولــد چــم انـسـان
وعـيـون الـتـاريخ اتشاهــد وتـبـرهـن للحـق بـرهـان
انته الحجه الـعـاشت بـيـنه
والـثـبـت اركـانـه الــديــنــه
سبط الهادي
كلها اتنادي
ما نخلف امرك وانطيعه
ياجعـفــر نهجك ظـل حـجـه والاســلام أيـدور أيــدور
ناضلت بـمـذهـب للـعـالم ردتـه ايشوف النـور النـور
فـكـرك مثـل السيـف أيـقـاتـل ويكمل منهـج عـاشـور
ضحـيت انته بكل ما تملك قـدمـت الــروح ومـسـرور
واحنه على المنهج ممشانه
ويـبـارك ربــك مـسـعــانـــه
بصافي المرضع
نحچي وتسمع
ما نخلف امرك ونطيعه
يالعـايش بالروح وثابـت يالحـبـك يسري وي ادمانه
نـتـمـسك بـالمـنـهج كلـنـا يـاجـعــفــر حـبــك خـلانـه
وانته الصوت الهــز العـالـم وللـديـن مثبت اركانــه
بـرهـانـك بـالـدم طبـقـتـه بـرهـانـك واضح بـرهـانه
لجل الدين امضحي بروحك
وما تـنـعـد والله اجـروحـك
صوت احبابك
يصيح ابابك
ما نخلف امرك ونطيعه
ثـابـت أيـمانـك والـعـالـم يـشـهـدلـك وبحـبـك ذايـب
واحنه انطبق نهجك احنه وانطيعـك ياجعـفر واجب
من عاشور اللوعه بگلبك وتمهد للمهدي وحاسب
يـاخـذ ثـار العـتـره بسيفـه من ربـك يـأذن للغـايـب
باچـر والغايب من يظـهــر
ايطبق كل نهجـك ياجعـفـر
احنه انسمعك
وكلنا أنتبعك
مانخلف امرك وانطيعه
هــذا اليوم انعـيش امصابك وتجـدد لـوعات العـتره
وانعـزي ابفگدك ياجعـفـر كـل الكون بهاي الـذكـره
والگلب اليـتـنـفـس حبـك گلي وياجعـفـر شيصبـره
خل نـتوجه كلنا انـواسي بمصابـك فاطمة الـزهـره
بدموع الـزهـره انـواسيها
وانـجــدد احــزان الـبـيـهـا
بعبره ودمعه
الصوت اتسمعه
ما نخلف امرك وانطيعه
بدموع وهم نجري العبره ومن نبچيلك نبچي ادموم
وشلون اتـفـارگـنـه الليله وتـرحـل ياجعـفـر مسموم
والاصعـب والهـز العالم والحـمـلنا اهـمـوم اهـمـوم
والخلانه انعـيـش بحسره مسمـوم وگـبـرك مهـدوم
بـاچــر نـتـعـنـالـك مـمـشـه
ميخـوفنا الطاغي وعـرشه
احنه اجنودك
انصيح ابزودك
ما نخلف امرك وانطيعه
الامام الصادق
يبو الكاظم بس الك احچيها
الحاجه يمك رايد وتگضيها
1
جعفر الصادق يبن خير الانام
روحي تاهت سيدي ابين الظلام
اليوم الك متوجه اني بهل كلام
ويمك الحاجه تره امخليها
2
قاصدك هاليوم اني وممتحن
بحاجتي المستعصيه وگلبي يون
منهو غيرك سيدي اعليه ويحن
وانت لو ما انته ما احچيها
3
غير بابك لا ابد ما ادگ باب
انت بابك جنه والباقي سراب
رايد اتخلصني من هذا العذاب
و لوعتي اتخففها وتهم بيها
4
بحاجتي ضاگت احس هاي الارض
والك متعني لان حبك فرض
الصعبه لو تصعب احس يمك تفض
ولهذا بأسمك امسميها
5
حاجتي هي القبول الخدمتي
الك اكتبها وحبرها دمعتي
فرض حبك ياصلاتي وقبلتي
روحي بيدك وانته بس واليها
6
انته والي نعمتي وقاضي الاصول
والمشاكل يمك وكل الحلول
يبو الكاظم ريت تشملني بقبول
بنظره منك سهله واتسويها
شاعر اهل البيت (ع)
رياض الرسل الجابري
الزهراء والبقيع
نمشي للبقيع بلوعه وبجمره
نشاهدها تنوح وتنحب الزهره
1
نمشي للبقيع انشاهد المنظر
اگبور امهدمه ومحاوطه بعسكر
والزهره تنوح تنادي ياحيدر
وبحرگه تنادي وتسچب العبره
2
تنادي بحرگه والدمعات تجريها
على اگبور البقيع وتنتحب ليها
ليش لياسبب تسأل امهدميها
وليش ابلا صحن لا گبه لا حضره
3
مشت لأول گبر وبنار لهابه
تنادي يالحسن والدمعه سچابه
ويلي اعليك يبني وتشم بترابه
وتدعي من الگلب عالهدموا گبره
4
گامت راحت وجرح الگلب ماهاد
يم گبر الامام و زينة العباد
تنادي ويلي يمه ياعلي السجاد
وگلب الملتهب باللوعه شيصبره
5
محنيه الضلع بالدمعه واتكابر
السمه تنحب عليها وتكسر الخاطر
نادت وين ابني محمد الباقر
من شافت احجار الگبر وتنظره
6
ونادت على الصادق يا بعد روحي
مابطل عليك احزاني لا نوحي
شفت الگبر يمه وهاجت جروحي
وشيطيب جروحي التنزف بحسره
7
الزهره بهل فجيعه شما تمر بيها
تجدد تظل احزانها اعليها
وينه اليحضر وبالعزه ايواسيها
اليحضر الها باچر فاطمه اتحضره
الشاعر رياض الرسل الجابري
ياشيعه بحـزن عـالـراح ونـوا بكل وكـت ونـه
سادس نور بـالاكـــوان هـالـيـلـه رحل عـنـه
ونـوا بـكـل وكـت ونــوا وهـلـوا من الگلـب دمـعـه
وخــلــوا الـعـالم بـكـبــره يــاخــذ مـنـكــم ويــنــعــه
الصادق بالسمه عـنــوان وثـابـت بـالعــرش فـرعـه
بمصاب الصادق المسموم
صبوا الدمع لجله ادمـوم
بهـل ليله حــزن وهـمــوم
الـيـواسي بمصابه اليــوم يـواسي ويظـمـن الجـنـه
0000000000000000000000000000000
بدمعـات الحـزن عـالــراح واجـب وبلهــيــب الـنـار
بمصاب الصادق أتواسون طه المصطفى المخــتــار
واتـواسون ابـو العــتـــره حـيـدرنـه عـلـي الكــرار
بجعـفـر سادس العـتــره
واسوا وبعـظـم صـبـره
كـل الـعـالــم بـأســــــره
امن الصادق عـلـم ياخــذ يـاخـذ كل وكــت مــنــه
0000000000000000000000000000000
يـاشيـعـه بـدموع العــيــن غـرگـوا الـعـالـم بـأسره
ودگوا اعله الصدور اليوم او واسوا فاطمه الزهره
مسمـوم ورحـل هـالـيــوم عـنـكـم سـادس العــتـره
الصادق صادق الأحـكـام
منهــج شــرع للإســـلام
خل يسمع الخاص وعام
واجب من دمه اعله الراح الچـف الـيـوم يـتـحـنــه
0000000000000000000000000000000
على أمصابه بگلب مجروح خل تنـزف دماها العـيـن
الصادق مـثـله مامــوجــود ولاجـابـت الـدنيا اثـنـيـن
يكـفـــي لـو عـلـيـه گـالــوا هذا أبن الشهيـد حسـيـن
حسين المنذبح عطشان
وحـده بحـومة المـيـدان
بــالـك يـاخــذك نسـيـان
وتنسه امصيـبـة المـذبـوح منها وتگـطـع الضـنـه
0000000000000000000000000000000000
لـتـقــصـــرون لـلـصــادق ونـوا بـلـوعـة أحـزانـه
لأن الـزهــره بالـمـجـلـس اللـيـله حـاضـره ويـانـه
عــزوهــا بـأبـنـهـا الـشـال نهـج الـديــن وأركـانـه
عـزوا الزهـره عـزوهـا
وعـنـكـم تـرضه خلـوهـا
برضاها الجنه ظـمـنوهـا
والـتـرضه عـلـيـه حـتـمـاً الـزهـره بعـمــره يـتهـنـه
0000000000000000000000000000000
ولادة الامام الحسن بن الامام علي (ع)
نورك اهلال على اشفاف الكرامه
رسم شلال تهاني بأبتسامه
والدنيه مسروره
بالحسن وبنوره
رسم شلال تهاني بأبتسامه
1
هالليله حيدر اعلن البشره
واعله الفرح معتلي
فرحان حيدر من بعد صبره
خل يستمع عاذلي
هنياله كل واحد على الفطره
بحب الحسن مبتلي
بالحفله نعلن فرحة الزهره
ونهني حيدر علي
بهاي الاقوال نسد حلگ الملامه
يشرح الحال گلبنه وكل هيامه
وانوضح الصوره
بالحسن وبنوره
رسم شلال تهاني بأبتسامه
2
نرسم فرحنه بالسمه العالي
بيوم الحسن مولده
بخمصطعش رمضان للغالي
هذا الحفل موعده
هنيالك انته واني هنيالي
للعهد وانجدده
والباري ندري بالحشر تالي
للحضر ايسدده
من الاهوال يحصنك والسلامه
وراحة البال تحصل بالقيامه
وبجنة اقصوره
بالحسن وبنوره
رسم شلال تهاني بأبتسامه
3
بالأفق فرحه بمولده انشاهد
نور ويهل من ظهر
حتى الملائك بالسمه اتعايد
من سمعت بهل خبر
لمن نزل فوگ الارض ساجد
مو مثل هاي البشر
نرسل تهاني وبگلب واحد
للغايب المنتظر
حتى لو طال نظل نسمع كلامه
نترس اسلال تهاني والعلامه
خدامه مأجوره
بالحسن وبنوره
رسم شلال تهاني بأبتسامه
4
اختم كلامي والگلب هايم
واتوسل بهل حفل
ارد انه احلفك سيدي بفاطم
كون العمل ينقبل
هذا عملنه متصل دايم
وياك حلقة وصل
هنياله كلمن للحسن خادم
اليوم الحشر متصل
والنبي گال قعوده وبقيامه
مثل الجبال يشرفها الامامه
والدنيه معموره
بالحسن وبنوره
رسم شلال تهاني بأبتسامه
لاتنسون والدي وأبني عباس من الرحمه والغفران
خادمكم رياض الرسل الجابري
ابو طالب ((ع))
الليله اسألك ياعلي بحالك اشصار
و ابـو طـالب والـدك فـارك الـدار
وانته بالهم مبتلي شلون حالك ياعلي
و ابـو طالب والدك فارك الدار
الليله اسألك ياعلي بدمع الصبر
شلون لحظات المفارگ من تمر
مشبعت من عنده كل هذا العمر
واخــذ منـك والـدك تالي الگـبـر
هـمـومـك المتنجلي شلون حالك ياعلي
وابو طالب والدك فارگ الدار
شلون حالك ياعلي ومثلك منـو
فاگد الاب انته واسم الاب حلـو
ابو طالب عافيه ورحمه ودفـو
الدنيه كلها ابد متعوض الابــو
انته والهم مبتلي شلون حالك ياعلي
وابو طالب والدك فارگ الدار
ابــو طالب والــدك وانـتــه الابــن
وحضن ابوك الدافي مايشبه حضن
الليله من حگك يحيدر مـــن تـون
اليفگـد الاب حگه لـــو حتى يجـن
الليله اسألك يالولي شلون حالك ياعلي
وابو طالب والدك فارگ الدار
اليفگد الاب يفگد ويــــاه الحنان
وابو طالب دنيه ومعطــر الزمان
ابـــو طالب مـارحـل في كل مكان
بحيدر انشوفه ونحس بيه الامان
واضح واسمه جلي شلون حالك ياعلي
وابو طالب والدك فارگ الدار
ابو طالب ساكن بنص الضميـر
عاش بالدنيه اميـر ومات اميـر
بسمه كل جنات ربـك والعـبـيـر
يكفي والـد حيدره يعـني چـبـيـر
المثله لازم يعتلي شلون حالك ياعلي
وابو طالب والدك فارگ الدار
لاتنسون والدي وأبني عباس من الرحمه والغفران
خادمكم رياض الرسل الجابري
على الخلص حياته بخدمة العتره
تجازيه عالخدامه فاطمه الزهره
كل خادم خدم لحسين خي عونه
يصير امقدر بعين اليعرفونه
وخادم للحسين الكل يسمونه
وشانه يرتفع والوادم اتقدره
قدره يرتفع مابين كل الناس
كل خادم حقيقي يمشي رافع راس
من زود الحسين و زوده من عباس
ويصبح جاهه عالي عالي واشكبره
جاهه يصير عالي ويرتفعله شان
ويصبحله بشرف هذا الاسم عنوان
خادم وبخدمته ايحسده كل سلطان
لأن محد گدر يحصي عدد أجره
عدد أجر الخدامه ياهو يحصيها
اذا الزهراء هي مكلفه بيها
يل تخدم خدمتك يمها خليها
لأن للخادم الزهره تجي تحضره
لليخدم ابنها الزهره ماتنساه
بكل مجلس تحضره يعني هي وياه
ومن يموت خادم هـي تتلگاه
الزهره بالگبر تتكفل بأمره
هنياله الخدم وبخالص النيه
الدنيه اتردد بأسمه وطاريه
تحضره اللي مشت للشام مسبيه
اكرامـاً لخوها المنگطع نحره
الشاعر السيد رياض الرسل الجابري
موشح خدمه
بخدمتك لو باني يالخادم قصر
الزهره من تزعل ترجعك للصفر
1
دير بالك احذر بكل خطوتك
وانته وي الزهره صفي نيتك
اعليها ما متفضل انته بخدمتك
الزهره متفضله عليك انته اشكثر
2
الخدمه مو بس تحچي وتهل الدمع
شرط بيهـا بكل يقينك مقتنع
حتى مترض انته للزهره ضلع
كون ترضيها بخدمتك واستمر
3
بكل خدمتك لازم اتخلي اعتبار
الخدمه كل خطواتها بيها اختبار
راح الخصلك الخدمه باختصار
ثمن لتخلي بخدمتك لو سعر
4
لا تشوف بخدمتك نفسك چبير
بهاي اوهامك تعيش انته اسير
باچر انته بالحشر صدگ تحير
والسراط اتشوفه بس ما ينعبر
5
لا تخلصها صور بس وحضور
كون بالمجلس تحس بكل شعور
وكون تستحضرها كل ذيچ النحور
الضحت شما تمتلك وانطت عمر
6
اتواضع بخدمتك حتى تضل علم
وماتفرق كون ما بين الخدم
حتى باچر ما يمر بيك الندم
وعالسراط براحتك لمن تمر
7
بكل تواضع اخدم ونول الجزاء
عوف انته الابهـا والكبرياء
الزهره تعرف بيك شمقدم عطاء
والهذا اتجازي هيه بالحشر
8
الزهره من ترضه عليك انته عليت
ولون ماترضه انتهيت انته وهويت
بلحـظه يتهدم شما الها بنيت
وابد ماترتاح انته وتستقر
9
كون يوميه تراجع دفـترك
الزهره شمقدملها شمقدمه الك
غيرك انته بزله وياها هلك
وانشطب اسمه ولا نال الاجر
10
انتبه واحذر وها بالك تطيح
وامشي وي الزهره بالدرب الصحيح
ما اظم اعليك واحچيها صريح
اسم مالك بالمجالس ينذكر
11
صفي نيتك وارجع الدرب الامان
الزهره تتواجد وياك بكل مكان
الزهره باچر بالحشر اكبر ضمان
وهيه بس تحميك هيه من الخطر
الشاعر السيد رياض الرسل الجابري
نزله للعباس ٢
عباس شايل رايته لمن دخل للمشرعه
-----------------
1
زينب تحشمه للگمر
لمن مشه وراح وعبر
بالروس كلها من ظفر
وصوت العقيله يسمعه
2
من صال ابو فاضل هجم
كل جيشهم ذاكه انقسم
من رفرف وبيده العلم
والموت يمشي ويتبعه
3
خله الزلم تلزم سره
عالموت سبع الگنطره
خله الجثث مطشره
والروس كلها امگطعه
4
محد گدر يوصل اله
سواها ظلمه كربله
عباس بس صوته اعتله
وفوگ الجثث لبه وسعه
5
عباس ابو الغيره حضر
حملات حيدر عالنهر
سواها من دگ الخطر
والغيره كلها تدفعه
6
يسمع ونين من الخيم
زينب وسكنه والحرم
من انضرب راسه انهشم
اتذكرهم وهل مدمعه
7
نار العطش مثل الجمر
ويدري برقيه تنتظر
وعباس طاح ويعتذر
لكن بقت متلوعه
8
عامود صابه بهامته
ومابقه ماي بجربته
عباس ضحه الخوته
من وگع صارت فاجعه
الشاعر السيد رياض الرسل الجابري
العليله ام البنين
وين وحدي جده لتخليني
ارد احلفج والـدموع بعيني
بداعت العبـاس لتعوفيني
انه العليله انه العليله
جــــده يــا ام البنين اثنينه نفس الونين
عشنه الرزيه
عشنه ايام المصاب واشكثر راحو احباب
بالغاضريـه
انه وانتي ابلا اهل لا والي
اثنينه لمن نـون عـالغـالي
انتي بس ياجـــده لتسليني
بـداعــت العباس لتعوفيني
انه العليله انه العليله
اتودعيني وبالدمع وانه محنية ضلع
صدي اليه
انتي انتي سلوتي اتنشفيلي دمعـتي
بكل مغـربيه
احنه من نگـعـد نون چنه سوه
اتودعيني شلون اعيش ابلا هوه
مـا اعيــش بغـيــرچ وتدريني
بـداعت العبـاس لتعـوفـيـنـي
انه العليله انه العليله
انتي ياجده الي
دنيتي صرتي وهلي
عشنه سويه
انتي بس انتي الامل
ومن اظل ابلا اهل
صعبه عليه
هسه لو عباس عمي يشوفوني
چان ظل يمي وابد ميعوفنـي
انتي لو رحتي اشتفـيد اسنيني
بـداعت العباس لتعــوفــيني
انه العليله انه العليله
عشنه ايام الحزن
انه وانتي بس ونون
صبح ومسيه
عالمشو لرض الخطر ومارجع منهم خبر
اهل الحميه
بالحزن نتشارك اثـنيـناتـنـه
والدمع نتقاسمه ابـيـنـاتـنـه
روح مابيه وجسد تلگـيـني
بـداعــت العباس لتعـوفيني
انه العليله انه العليله
صعبه لحظات التمر لو مشيتي للگبـر
داري خليه
ما اشم كون الهوه
و ريت تاخذنه سوه
كون المنيه
لا تخـلـيني وحــيده بداري
بين صبري وذكرياتي ونـاري
گبل لتـروحـيـن بس شـوفيني
بـداعــت العـبــاس لتعـوفيني
انه العليله انه العليله
الشاعر السيد رياض الرسل الجابري
قصيده الانصار
احنه الانصار يعرفونه يعرفونه
انضحي لحسين عمرنه فدوه لعيونه
حبنه ماينقاس
نحلف بعـبـاس
انضحي لحسين عمرنه فدوه لعيونه
احنه الانصـار ابد لا ماتوانـينه
كل الارواح رخصنه ولجله ضحينه
مثل ما سوه الحسـين وياه سوينه
بكربله ابين السيوف ويـاه حجينه
انسمع احنه الناس
نحـلـف بعــبـاس
انضحي لحسين عمرنه فدوه لعيونه
احنه الانصار صبرنه مانفذ صبره
لجله منذورين احنه بعالم القدره
بكل شرف واحدنه من ينذر اله بعمره
حتى ترضه اعليه باچر فاطمه الزهره
حسين تاج الراس
نحـلـف بعـبـاس
انضحي لحسين عمرنه فدوه لعيونه
احنه الانصار هويـتنه خـتمناها
بدم الطـفوف عالصدور حملناها
احنه لحسين عهود الحق كتبناها
بعالم الذر هـالنحور نطـيناها
الحومه ماتنداس
نحلف بعـبـاس
انضحي لحسين عمرنه فدوه لعيونه
احنه الانصار عهدنه بس لبو اليمه
اله يتشرف الواحد يرخص بدمه
هالعهد واجب عـلينه واجب وذمه
ننصر المظلوم حتى نرتقي القمه
نسحگ الارجاس
نحـلف بعـباس
انضحي لحسين عمرنه فدوه لعيونه
احنه الانصار عـهدنه والهدف واحد
عالجره وصار نخلي الباري بس شاهد
بكل الاعمار نضحي احنه ونجاهد
حتى باچر اسمنه بالحشر خالد
لأخر الانـفـاس
نحلف بعــباس
انضحي لحسين عمرنه فدوه لعيونه
الشاعر السيد رياض الرسل الجابري
جسام عفتك رميه
جسام بالغاضريه
امك وانـوح انه اعـليك من حگهـا امك تنعه
بصوت الحزن يامذبوح من احچي انته تسمعه
بعـدك گمت بالحسرات للهـم غـصب اجرعه
من ابچي لجلك جسام مـن دم اصب الدمعـه
جسام ابچي المسيه جسام بالغاضــريه
لعيوني اعميها اعليك چي لن بعـد متشوفك
غـصـباً عليه جسام يـايمه راح اعوفك
لو ردت اجيك واحضر كعـبـه واجيك اطـوفك
والحنه اعجنها بدم من عدها احني چفوفك
جسام ومحنيه اديه
جسام بالغاضريه
ماعرست مثـل الناس يايـمه هذا امقدر
راح ابقه ابچـيك دموم ابچي وعـليك اتحسر
مكتوب الك بالمـيدان بين الـعده تـتوذر
وراح ابقه اون انه اعليك ياجـاسم واتصبر
جسام محـد اليه
جسام بالغاضريه
يبن الحسن يامظلوم بعـيـوني شلت ارسومك
ماحسـبت ياجـسام يـايمه هذا يومك
ولا فـكرت اشوفك تسبح بفيض ادمومك
ولهذا راح انه ابقه يايمه اشـيل همومك
جسام اسأل عليه
جسام بالغاضريه
من امك اخر وداع يـاغـايـتـي وآمـالي
يامنيتي وكل الناس يـا اغـله مـن كل غـالي
مجـبوره اعوفك هنا يـبني وثمر دلالي
مسبـيـه امك تروح يـايمه هذا الـتـالي
جسام شفت رزيه
جسام بالغاضريه
قصيده هلاليه ممكن تقرأ نفس طريقه يالميمون
لسان حال السيده زينب (ع)
هل شهر عاشور وقدمتله ابدور
وبي اخويه حسين عالترب منحور
1
جيت يبن امي بحيرتي وهمي
لرض المنيه
بحمه الكافلني بهيبتي بضعني
للغاضريه
وياي ابو الغيره وحيرتي حيره
صعبه عليه
بصحبة الوالي ويايه اطفالي
سكنه و رقيه
وانخطف لوني وتهمل عيوني
هل شهر عاشور
2
ياشهر شتريد والهموم اتزيد
مايسر حالي
للطفوف اليوم جيت بس بهموم
وانشغل بالي
وياي لو ضدي خاف من عندي
تاخذ الوالي
انه مرعوبه وخاف مكتوبه
افگد الغـالي
حايره بامري شلون يادهري
هل شهر عاشور
3
گلبي شيصبره حسرتي حسره
وبعيني دمعه
يا شهر تسمع بجمرة المدمع
والگلب ينعه
رماح شفت سيوف والگلب مخطوف
واختلف وضعه
راح تفجعني يا شهر يعني
عمري ادفعه
بين حيره ونار والفكر محتار
هل شهر عاشور
4
يا شهر گلي هم شفت مثلي
حرمه وغريبه
من وصلت وجيت بالگلب حسيت
شاجر لهيبه
شلون بيه بهاي لو ولتني اعداي
والله عجيبه
من يعرفوني لو يشوفوني
بهاي المصيبه
شلون ياروحي وهاجت جروحي
هل شهر عاشور
5
راح اعود الروح عالبچي والنوح
يا شهر حزني
دمعي يتجاره وبلهب ناره
من كثر وني
لو بقيت شلون لا سند لا عون
وابعدوا عني
اهلي واخواني ابقه بأحزاني ويخيب ضني
بالامل ضليت لا اهـل لا بيت
هل شهر عاشور
الشاعر السيد رياض الرسل الجابري
ابوذيات هلاليه
لسان حال زينب (ع)
1
يشهر الحزن ليش بساع هليت
انه زينب ودمع العين هليت
فوگ الراس انه اتراب هليت
بعد فگد اخوتي بالغاضريه
2
يشهر الحزن دگه وياي دگيت
شفت اهلالك وعالراس دگيت
الك ياشهر خوش اوتاد دگيت
اخوتي الودعتهم عالوطيه
3
يشهر الحزن بس تركض ورايه
اشعندك عالفگد شوفه ورايه
خذت چفين من عندي ورايه
ونطيتك نحر برض الغاضريه
الشاعر السيد رياض الرسل الجابري
هوسات معصومه
1
اذا تشعر بضيج وروح مالومه
بس ارفع ايديك وصيح معصومه
يگضيلك الحاجه بساعته ويومه
بارينه ميأخر الحاجه
2
بت الكاظم المهيوبه تدريها
هاي اخت الرضا الحاجات تگضيها
معصومه بديك الحاجه تنطيها
حلفها بچفوف الكافل
3
للحاجات باب والله اوجدها
متأخر الحاجه وابد متردها
معصومه بخيته ومثل والدها
والدها علمها الشمره
4
اگصدها بطلب والعين خل تدمع
لتگلي بعيده وخاف ماتسمع
اطلبها للحاجه وتاخذ مربع
تگضيها للحاجه وتفرح
ابوذيتان
1
بخت عالي اكو يوجد بخت هم
الكاظم واهله بالقمه بختهم
احلف الرضا والقاسم بختهم
الشفاعه وعالسراط انمر سويه
الف هنياله ليعمق صلاته
بآل النبي ومايترك صلاته
الشفاعه اينول من عله صلاته
على المختار وبهاي المسيه
شاعر اهل البيت (ع)
رياض الرسل الجابري
جعفر الصادق يضل باب للشيعه وامل
من ننادي يصادق
لآن علمنه المبادئ لازم احنه انطــيـعـه
جعفر الصادق املنه اله انجدد بــيــعـــه
خبر والعالم سمعنه اليوم احنه انذيــعـه
بمذهبه نتشرف احنه احنه احنه الشيعه
جعفر الصادق جبل باب للشيعه وامل
من ننادي يصادق
نهج اهل البيت ندرس جعـفر الخلانه
جاه مابين المذاهب هــو هــو انطانـه
صيت صارلنه ونناقش جعفر وعلانه
لان شيعه وجعــفــريـه ابد ماينسانــه
باچر بيوم الاجل باب للشيعه وامل
من ننادي يصادق
احنه مقياس المذاهب لمن ايقيسونـه
ننتمي الجعفر الصادق كلهم ايعرفونه
جعـفـريه جعـفريه الوادم ايسمــونــه
عالهويه الناس گامــو كلهم ايعادونه
وانته ياخير العمل باب للشيعه وامل
من ننادي يصادق
الليله بالدمعه نودعك وبگلبنـه الهايم
الله يلعن من بداها سيدي وكـــل ظالم
الك يتشرف الواحد من يصيرن خادم
هاي ارواح التحبك فدوه يابو الكاظم
الشيعي لو صابه وجل باب للشيعه وامل
من ننادي يصادق
الليله بــدمــوع المصيبه شيعــتـه الوفايه
تنادي ياجعــفــر الصادق انته انتـه الغايه
شوكت يظهر ابو صالح بيده سيف ورايه
حتى كل الشيعه تحضر للگــبـــر مشايــه
موكب الشيعه وصل باب للشيعه وامل
من ننادي يصادق
شاعر اهل البيت (ع)
رياض الرسل الجابري
گعديه للأمام الصادق (ع)
عالصادق دمعنا
ننحب وانفجعنا
گلب المحب محتار
الليله بحرگت الدار
ننحب وانفجعنا
1
الليله هاي الليله اصعب ليله عالصادق رهيبه
بحرگ داره وچان ينظر على اعياله بهل مصيبه
ادموعه نزلت من ذكرها قصة الطف العجيبه
قصة الدار المحترگ
قصة الم قصة عشگ
يذكرها وگليبه يدگ
زينب الحره الغريبه
الزينب هل الدموع
وگلبه الليله مفجوع
وين ابفكره يندار
الليله بحرگت الدار
ننحب وانفجعنا
2
احترگت الدار ويعاين تركض وخايفه اطفاله
وگام ينظرها المشاهد وراح للطف بخياله
اتذكر عيال ابو اليمه شلون من فرت اعياله
شاهد اطفاله من الألم
مذعوره فرت وانصدم
ناح وبچه الحرگ الخيم
الصادق وعذبته الحاله
الصادق شاف نارين
وگامت تدمع العين
احتار ايطفي يا نار
الليله بحرگت الدار
ننحب وانفجعنا
3
الموقف الشاهده الصادق موقف ايهز الضماير
ابيته نار وحار بيها اتهون گال وانه حاضر
شلون حرگ الخيم بالطف ومعركه ودوست حوافر
ما بين نار البل گلب
اطفال وامضيعه الدرب
والمنظر ايحسه صعب
منظر ويكسر الخاطر
ظل صافن عليها
النار وحار بيها
وهاجت كل الافكار
الليله بحرگت الدار
ننحب وانفجعنا
4
وازغر ابنيه يشاهد من بناته بهل رزيه
النار من تركض وراها تنادي بويه الحگ عليه
لحگ اعليها ولزمها الصادق بذيچ المسيه
أمنت وبحضنه غفت
بس طفله لا ما أمنت
وبخيمه محترگه بقت
وأيدها امچويه رقيه
مابين العساكر
تركض والحوافر
وهل الدمع مدرار
الليله بحرگت الدار
ننحب وانفجعنا
5
عاش مابين المصيبه الصادق ودنيه المواجع
ما يأمن چان بيها وغيره بيها چان طامع
من علي جده عرفها وزين بيها هوه سامع
هالدنيه يل عندك علم
تدري شوكت هاك افتهم
من صعدت اشباه الزلم
والعلي خلته الرابع
الدنيه عدها وجهين
الطلگها ابو حسين
هذا الي جره وصار
الليله بحرگت الدار
ننحب وانفجعنا
المصيبه
الليله ننحب على الصادق الودع آخر امنياته
اهل بيته وهو ينظر بعينه يتفگد بناته
بالحزن سمو چبدته وانگضت رحلت حياته
خلي نهل لجله الدمع
بهذا المصاب وننفجع
بالمحشر اوياه ننجمع
كلشي يتحقق وندري الخادم وهاي امنياته
شاعر اهل البيت (ع)
رياض الرسل الجابري
قصيدة بحق الامام الحسين (ع)
احنه لحسين على الفطره عـشگـناه
بضمايـرنـه حملناه
ننادي و احسيـناه
بــالـمــهـــد غـذتـنــا امـنـا بهـل محـبـه
ومـــن كـبـرنـا ويـانـه زاد وكـبـر حـبـه
اعـرفنه درب الخير والاصلاح دربـــــه
وگـبـره للـرايــد يحـج يـصـيـــر كـعــبـه
بدمعت العين اســم خــالــد كـتـبــنــاه
ابـد لا مــانـسـيـنــاه
ننادي واحسيـناه
حـسـيـن اسمـه اتـردده كل الـمــنـــابـــر
لأن بـس اتــدركــه وتـحسه الضمــايـــر
هـو مــو ياهــــو اليجي ويگـول ثــائـــر
لازم اتحـسـه وتشـوفـــه ويــاك حـاضـر
تدري بي وين بالگلوب احـنـه شفنـاه
عـلى عـناد الميهـواه
ننادي واحسيـناه
من مشينه بـدربـه شفـنـاهـا العـقـيـده
شامخه وبي ثـابـتـه ورسخـت اكـيــده
نـبتعـد عـن دربــه متصـيــر وبعـيــده
شلون و النه حسين ضحه بدم وريـده
بدربه ماشين طريق الحق عرفناه
مـشـيـنـه كـلنه ويـاه
ننادي واحسيـناه
نرتفع احنه بخـدمـتـه من نخــدمـــه
ونرتقي الصرح المعالي بعـله قـمــه
لو نـقــدم اروحـنــا مـنــوافي دمــــه
لكن احـنه نرتجي من الـزهـره امــه
نشعـر بدين عمرنه لو نـطـيـنـاه
نضل لـلـمــوت والله
ننادي واحسيـناه
هذا صوت الشيـعـه يهـتـف للمنـيــه
انموت احنه ومانعـوف ابن الزچـيـه
لأن لمـن طـاح بـرض الـغـاضـريـــه
انطانه من دمه النزف اشرف هـويه
هالعـناويـن نطتنه العزه والجاه
بخـتـم حبه خـتمـنـاه
ننادي واحسيـناه
گعديه للامام علي (ع)
هالليله انصيح بدمع الاحزان
تنزف شفناها احروف القرآن
ننحب وانوح بحسره
من شفنه براسك طبره
تنزف شفناها احروف القرآن
1
ياعلي من بعد موتك اكتشفنه سر وجودك
انته ميت وانته عايش اثنينهن بيهن خلودك
بمعركه ماراد موتك الباري خلاها بسجودك
راس العقيده ينفتح
بالسجده وبفرض الصبح
ياحيدر وتارك جرح
السيف واتعده حدودك
تختم عمرك ياحيدر مطبور
بهاي وكل ضنهم يخفون النور
شع نورك مثل الگمره
من شفنه براسك طبره
تنزف شفناها احروف القرآن
2
شما يمر الزمن خالد يبقه تاريخ المناضل
ياعلي وانته بخلودك باسل ومن ظهر باسل
وهالبساله الحسن منها حسين وچفوف ابو فاضل
تاريخك الحامل شرف
بالنور والرحمه انعرف
تشهد الك ارض النجف
مو حچي وتحصيل حاصل
رغم الزيف وكل ذيچ الاهوال
محد يحجب تاريخ الابطال
وتاريخك انته أشكبره
من شفنه براسك طبره
تنزف شفناها احروف القرآن
3
عشت عمرك نور ثاقب عالي مابين الكواكب
تنطي ماتاخذ يحيدر وللفقير اتحسبه صاحب
مستحب كل فعل ندري ياعلي وبس انته واجب
ربك بحكمه نزلك
وسلمك احكام الفلك
بيك اليشك حيدر هلك
وينجه كلمن بيك ذايب
بالمحشر ياهو الميشوف النار
بس الشايل صك من الكرار
ياحيدر وانته اتعبره
من شفنه براسك طبره
تنزف شفناها احروف القرآن
4
جرح طبره وراس دامي وليلة الوحشه الرهيبه
من حضن محرابه ينزف علي وبلحظه عصيبه
السمه ماطاحت وظلت عجبه وبهاي المصيبه
المفروض من سال الدمه
بهل فاجعه وهل موزمه
بطيحت علي اتطيح السمه
شلون ماطاحت عجيبه
ماطاحت چان المفروض اتطيح
هاي الدنيه وتتلاشه وي الريح
ربك منطيك القدره
من شفنه براسك طبره
تنزف شفناها احروف القرآن
5
وانتهت رحلت جهادك وانختم عمرك بطبره
يا امير الدنيا كلها شلون من بعدك الفقره
الليله ترحل وانته تارك
بالگلب ياعلي عبره
حزنك ابد ما ينجلي
يا اشرف واطيب ولي
فقره بغيابك ياعلي
ومنك احنه انريد نظره
ضاعت ياحيدر كل الاحلام
من بعدك هسه اشحال الايتام
والليله اتودع الفقره
من شفنه براسك طبره
تنزف شفناها احروف القرآن
المصيبه
غمضت عينك ورايح واتركت بينه المواجع
والاملاك اتنوح لجلك ياعلي بالسمه السابع
والحسن وحسين ينحب
وزينب اتهل المدامع
والكافل ايهل الدمع
وگليبه ذايب منفجع
ياحيدر ومثل الشمع
ولدك الليله عزاهم ومحد ايعوض مكانك
الشاعر السيد رياض الرسل الجابري