1081
کاناڵی تایبەتی بەرهەمەکانی ئەمین گەردیگلانی
📚📕
من کتێبم کتێبم
پێم بڵێن هاوڕێی کێ بم
لە تەنیایی بێزارم
هەتا کەی چاوەڕێ بم
پڕ لە پاکی و وشیاریم
من سەرچاوەی زانیاریم
هاوڕێی منداڵ و گەورەم
دژی نەخوێندەواریم
دڵم منداڵانەیە
جێگەم کتێبخانەیە
لاپەڕە و دێڕ و ڕستەم
پڕ لە پەند و وانەیە
کانگای پەندی شیرینم
سەرچاوەی ڕوونی ژینم
کاتێک هاوڕێی منداڵم
دنیا جوانتر ئەبینم
📚با مناڵەکانمان بە کتێب خوێندنەوە ڕابێنین و هەوڵ بدەین فێریان بکەین کە لەگەڵ کتێب هاوڕێیەکی باش بن!
لینکی تێلێگرام:👇
/channel/yakamhawrekan_baneh
لینکی ئینستاگرام:👇
https://www.instagram.com/yakamhawrekan_bane?igsh=NDAwcW1qdDFxNml4
بە بۆنەی کۆچی دوایی نووسەری گەورەی کورد مامۆستا فەتاح ئەمیری سەرەخۆشی لە بنەماڵەی بەڕێزی و هەموو نووسەران و ئەدیبان و خەڵکی کوردستان دەکەم و خۆم بە شەرێکی خەمتان دەزانم.
ڕۆحی شاد و یادی هەرمان
ئەمین گەردیگلانی
تان و پۆ
خۆر کە دیتت ڕۆژ و شەو بێ ئۆقرە ھاتوچۆیەتی
تاسەباری شیلەماچێکی دەمی ئاسۆیەتی
گوڵ لە گڵ دەڕوێت و عەتری پێشکەشی شەوبا دەکا
تیشکی خۆر و ئەشکی بارانیشە ڕەنگ و بۆیەتی
گوێ لە ھاژە و ویرەویری ڕۆحی بەفراو ڕاگری
تێدەگەی بۆ ھاتوچۆ بێھوودەکەی ڕۆڕۆیەتی
ژینی کورت و پیرە دنیا ڕۆژی ڕەش کردین، کەچی
گیانی پڕ ھیوا بە ھیوای مانەوەی ئەمڕۆیەتی
ئەو گڵەی وا دەم لە ژینا سەد دڵی بۆ کردە خوێن
لاشەخۆری ھەردەمە و ناخی ڕەشی گڵکۆیەتی
گیان کە ناسکتر لە داوی وردی جاڵجاڵووکەیە
«تان»ەکەی ئاوات و ھیوا و خۆشەویستی «پۆ»یەتی
تۆ منی من تۆم لە قوڕگی کانییێکیش ھەڵقوڵاین
گیانی ناسازت کەچی ھەر من من و تۆ تۆیەتی
بۆ لە دووی ھۆکاری وێرانی مرۆ دەخولێتەوە،
دەغڵ و دان و ئاور و خەرمانەکەش ھەر خۆیەتی؟!
دێی بە شلکی و ھەژگەڵی کاتێ لە دنیا دەردەچی
دەبیە گرپە و دوا پشووشت دووکەڵ و بۆسۆیەتی!
🔹🔸🔹🔸🔹🔸🔹🔸
🆔 @amingardiglani
زەلکاوی زەمان
ئەمین گەردیگلانی
با دڵی شەو لە تکەی ئەشکی بەیان هەڵکێشین
خۆ لە کانیاوی بزەی سەوزی ژیان هەڵکێشین
با لە سەر کێش و هەوای زەردەخەنەی بووکی غەزەل
هەست و ئەندێشە لە ڕووباری زمان هەڵکێشین
وەرە! با کاتێ چرۆی چاوی بەیانی پشکووت
دڵ لە ئاونگی بەرۆی خونچە گوڵان هەڵکێشین
با لە سەر ڕوومەت و برژانگی تەڕی ئەستێرە
ڕۆحی سڕمان لە هەناوی پەرییان هەڵکێشین
با بەدەم سروەوە بشنێتەوە سەروی سەرمان
تاکوو کەنگێی لە قوڕی قین و گومان هەڵکێشین؟
شاری داپۆشی تەمی زەردی هەناسەی تاعوون
بۆ تەوێڵیشی لە قیلی شەوەژان هەڵکێشین؟
ماڵ و کۆڵان گڕی مردن لە دەماری دەگەڕێ
بۆچی ئەم ژینە لە تاڵاوی نەمان هەڵکێشین؟
شۆستە جەستەی هەموو خووساوە بەخوێناوی گەڵا
بۆ شەقامیشی لە دوودەی خەمی نان هەڵکێشین؟!
گووگلێنەین، دەگلێنین شەو و ڕۆژ تۆپی ژیان
تاکوو ئەم خاکە لە زەلکاوی زەمان هەڵکێشین
گیان‌کەنشتی شەو ئەبینین ئەگە تێکڕا دڵمان،
لە شەتاوی قژی زێڕینی بەیان هەڵکێشین
🔹🔸🔹🔸🔹🔸🔹🔸
🆔 @amingardiglani
🔹ناکامی🔹
🔸ئەمین گەردیگلانی🔸
لە دنیای عاشقیدا کەس وەکوو من چاوەڕێ نەکرا
دڵی هیچ کەس بە قەد من دەرد و داخی بۆ بەڕێ نەکرا
وتت: ڕۆژێکی دێم بسکم لە ئەستۆت توند دەکەم، شێتی!
سپی بوو چاوی ئەم شێتە و بە دەستی تۆ تەمێ نەکرا
لە ڕێتا کەوتبووم و پێم نەگیرا چاکی داوێنت
لەبەر بێ هێزی دەستم چاوەڕێی چقڵێکی لێ نەکرا
لە سەر تۆ بوو بە قوڕگمدا کرا زووخاوی گشت داخێ
بەڵام دەفری دڵم چۆڕێ شەڕابی عەشقی تێ‌نەکرا
ژیانم سروەیەک بوو هات و چوو، لێی جێ نەما تۆزێ
تەمەن ڕابرد و ڕۆحم مرد ، ئەوەی بۆ دڵ دەبێ نەکرا
دەرمهێنا گلێنەم، چاوی خۆم جووت کرد لەبەر پێتا
سەرم تۆزی لە سەر نیشت و چەلێ چاوم لە پێ نەکرا!
کە ڕووتم دی بزەم هاتێ بەڵام لێوت نەپشکووتن
بزەم سەیرە لە سەر هەستت وەکوو باوێشکی پێ‌نەکرا!
وشک بووم و لە چاوەڕوانییا ڕۆیی هەموو ژینم
لە دنیای عاشقیدا کەس وەکوو من چاوەڕێ نەکرا
🔸🔹🔸🔹🔸🔹🔸🔹
🆔 @amingardiglani
📚پێشانگەی پەرتووکی کوردیی منداڵانە
🌹هاتنتان، پاڵپشت و هاندەری ڕێبازمانە
کرانەوەی پێشانگەی پەرتووکی کوردیی منداڵانە
لە فێرگەی سەربەخۆ
ڕۆژی شەممە(١٠ی خەرمانانی٢٧٢۴)
بۆکان، مەجبووراوا، شەقامی ۵۵، کاوانی ١، فێرگەی سەربەخۆ
🧮داشکانی ٣٠٪ تا ۵٠٪
⏰بۆ ماوەی حەوتەیەک
بەیانان: ٩ تا ١٣
دوانیوەڕۆژان: ١۶ تا ٢١
#بڵاوگەی_کوردیبۆک
+989141805495
Instagram:
@fergey_serbexo
@kurdi_book
@kurdi_book1
@kurdi.online
@susen_hz
@kurdi_book
خوناوکەی گوڵ
شێعر ئەمین گەردیگلانی
خوێندنەوە: کەژاڵ فەرهادی
ڕاسا دڵی دەریاییم، شێتانە بەجێی ھێشتم
تێکەڵ بە شەپۆلێ بوو، مەستانە بەجێی ھێشتم
ڕسکا لە دەمارمدا ئەشقێک و بە لەز ھەڵچوو
ڕووی کردە چەمم، دیتم گریانە، بەجێی ھێشتم
دیم لێوی دڵۆپێ مەی زەردەی ڕەزی تێزاوە
دەیگوت: گوڵی لێوم، چش پەیمانە بەجێی ھێشتم
ئەشقی حەز و تاسەم بوو، خۆی ڕۆح و ھەناسەم بوو
بێ ڕەحمە کە نەیزانی تاوانە، بەجێی ھێشتم
تک تک کە خوناوکەی گوڵ دەتکا لە ملی شیرین
پرچی دەشەکا دەیگوت: بارانە بەجێی ھێشتم
ئەو گەردنە بێگەردەی ماری دەمی پەت مژتی
دەیگوت بە بەرۆکی گوڵ: گەردانە بەجێی ھێشتم
لەم بەندە فڕی ڕۆحی، بۆ تەشقی ئەوین ڕۆیی
خۆی خستە مەکۆی تیشک و لێرانە بەجێی ھێشتم
@amingardiglani
🔸دووبەیتی🔸
ئەوین ڕێگەی دڵی زۆر پێ بڕیوم
گوڵاڵەی سووری ماچی پێ چنیوم
پشووم ئەو کاتەیە بۆ ماچی لێوت
بە کێوی بەژنی تۆدا هەڵزنیوم
🔹ئەمین گەردیگلانی🔹
🆔 @amingardiglani
دووبەیتی
لە دووریی تۆ دڵم پڕ ژان و سۆیە
نەماوم، گەر بڵێن ماوی درۆیە
بە وێنەی پیرەدارێ سیس و تینوو
گوڵم، چاوم لە ڕێژنەی عەشقی تۆیە
ئەمین گەردیگلانی
🔹🔸🔹🔸🔹🔸🔹🔸
🆔 @amingardiglani
🔸ژیانەوە🔸
🔹ئەمین گەردیگلانی🔹
خۆزگا لە باخی لێوتا واژەی ئەوین دەڕسکا!
پڕ بە شەوی نیازت، پڕشنگی ژین دەڕسکا،
بۆ وردە پێلی تاسەم، عیشقت دەبوو بە ڕێباز
لە سەر نیگای زوڵاڵی، سەد پێکەنین دەڕسکا
شانەی دەکرد هەناسەم، چینی شەپۆلی کەزیەت
ئەو دەم لە کانی دەمتا، ماچی بەتین دەڕسکا!
پێسیری ئاوەڵای گوڵ، ژوانگەی دڵی پەپوولەن
ئەوین نەبا گوڵاڵە، بۆ هەڵوەرین دەڕسکا
دڕکی کەسەر نەهاڵێ ڕیشەی لە ڕۆحی باخان،
گوڵباخی زەردەخەندە کوا بێ برین دەڕسکا؟
عەرزی سەری لە دەوری چاوی هەتاو نەگێڕێ،
کەی باخی پڕ هەسارەی ئاسمانی شین دەڕسکا؟!
ودمی ژیان لە بۆنی قژیا نەبا گەنم، کوا
بەژنی زراو و شلکی بۆ سەر بڕین دەڕسکا
کۆڵانی چۆڵی شەو کوێر بەیانی تێ‌نەزایە
شەو، هەر گوڵی سەهۆڵی لە سەر سەرین دەڕسکا!
🔹🔸🔹🔸🔹🔸🔹🔸
🆔 @amingardiglani
🔸ڕێی خەیاڵ🔸
شێعر: ئەمین گەردیگلانی
گۆرانیبێژ: ڕابەر کوردستانی
کە دووری لێم، بەیادی تۆ بە شەودا ڕێی خەیاڵ دەبڕم!
بە ناڵەی دڵ خەوی شیرین لە چاوی مانگەشەو دەزڕم
دەبێ خۆڵی خەمی گشت دڵشکاوان من بە سەرما کەم
دڵ و جەرگم بە خەنجێری خەم و دەردی ژیان ببڕم
وەرە با ئەشکی شادی دەشتی وشکی دڵ بخووسێنێ!
بە پەلکی نەرمی گوڵخونچەی ئەوینت تۆزی دڵ بسڕم
🔸ڕووناکی🔸
🔹ئەمین گەردیگلانی🔹
تا دڵی ئێمە لە سایەی هونەرێ ڕووناکە
شەوی ئاواتی هەموو خەم‌لەبەرێ ڕووناکە
وەشەوارەی دەکەوێ چاوی زەمان زۆر بێ نوور
تا ژیان پڕ لە شەوە و چەرمەسەرێ، ڕووناکە
تاکوو باخی گوڵەهیوایە هەبێ و تینوو بێ
چاوی ئەسرینی هەموو دەربەدەرێ ڕووناکە
بەسیە ڕەشبینی تەمی خەم لە دڵت دەرباوێ
کانی فرمێسکی لە قوڕ دێتەدەرێ، ڕووناکە
دەنکە بارانە لە نێو ڕۆحی ڕەشی هەورایە
بۆخەمی پیرەزەوی دادەوەرێ، ڕووناکە
خۆر کە بۆماچی زەوی دانەگەڕێ ناشلوێ
ماچی ئەستێرە بکا هەر لە سەرێ، ڕووناکە
مانگی ڕووت جووتە لە بن دوو پەڵە هەوری ڕەشدا
بە نیگای خۆری مە هەریەک لە بەرێ ڕووناکە
چاو لە من داگری چاوت بە گەشی هەڵدێنی
تاکوو ئەستێرە مژۆڵی دەلەرێ، ڕووناکە
🔸🔸🔸🔸🔸🔸🔸🔸
🆔 @amingardiglani
دایە گیان ئەم ماڵە بێ تۆ بۆنی مەرگی لێوەدێ
تک‌تکەی فرمێسکی چاوم خوێنی جەرگی پێوەدێ
تۆ بەجێت‌هێشتم بە داخ و مەینەت و دەردانەوە
ڕۆیی سۆمای چاوەکەم لە سوێت بەدەم گریانەوە
◾️◾️◾️◾️◾️◾️◾️
کۆچی دوایی یەکەم مامۆستای قوتابخانەم و دایکی شیرینم (عەزیزە خانم خادەمی) جەرگی بە کوچکەوە دام.
دایکی شیرینم ماڵاوا
وەرە گوێ بگرە لە قرچەی دڵی ڕووبار و چیا
وەرە فرمێسکی دڵت داکە وەکوو بارانە
بێ نیگات زەردە سروشت و غەزەلی دووری دەڵێ
باخی خەم گەستوو دڵی تەنگی بەرەو ژاکانە
"ئەمین گەردیگلانی"
کەسێک کە بە کۆچی ناوەختی سروشتی بێکەس و هەتیو کرد، کەس نەبوو جگە لە مامۆستا (سەید ڕەحیم بدەوی) باوکی ژینگە.
بە بۆنەی چوارەمین ساڵوەگەڕی کۆچی دوایی ئەو خۆشەویستەوە لەگەڵ سروشتی جوانی کوردستان پەیمان تازە دەکەینەوە و ڕێبواری ڕێگا سەوزەکەی سەید ڕەحیم دەبین و یاد و بیرەوەریی ئەو ئازیزەمان ئاوێتەی کانی و گوڵ و چیا و سەوزەڵانی دەکەین و دەڵێین باوکی ژینگە نەمردووە و لە نێو دڵی هەمووماندایە و ئێستاش لە چاوی ئێمەوە دەڕوانێتە دیمەنی ڕازاوەی وڵاتەکەی و دڵی لەگەڵ دڵی ئێمە بۆ ژینگە و سروشتی نیشتمان لێدەدا.
برین
تاکوو چەک بیکەن لە کوردستانەکەم گێرەی برین
پڕ دەبێ ئاسمانەکەم بێ شک لە ئەستێرەی برین
گولـلە تا زیاتر ڕەگاژۆ کەن لە گۆشت و ئێسکما
گەشتر و چڕتر دەبێ ئەم پیرە زەنوێرەی برین
خوێن دەڵێنن دەشت و شاخ و ماڵ و کۆڵان و شەقام
بست بە بست دەڕوێن لە سەر ئەم خاکە شللێرەی برین
تاکوو دەریا لووشەری جەستەم بێ ویشکەسوێ‌ترە
جەرگی دەبڕم بەو کفارەی ڕۆندکە سوێرەی برین
بۆیە چێشکەی شلکی وەک «ئایلان»ی پێ قووت نادرێ
قوڕگی گرت خوێناوی خەستی پڕ کەف و لێرەی برین
گڕ دەھاوێژێ قەمۆچکەی گڕپژێنی دژ ڕەوێن
مێشک و سینگی شەو پەرست ئامانجە بۆ سێرەی برین
غیرەتی شەنگال و کۆبانیی لە دڵدا کۆوەبوون
گشت جیھانی ڕاپەڕاندن زایەڵەی چوێرەی برین
تاکوو قووڵتر بێ برینم پڕ وزە و ئاشقترم
با لە سەر سینگم چەکی دنیا بکەن گێرەی برین
فەرهەنۆگۆک:
وشکەسوێ: زۆر تینوو، سیوشکە. عطش.
کفارە:فوارە
ڕۆندک: فرمێسک، ئەسرین.اشک.
چێشکە: چێشتە، طعمه.
لێرە: زنچکاو. زردابەی زخم.
قەمۆچکە: زارکی گڕپژێن. دهانەی آتشفشان.
چوێرە: قیژە و هەرا، هاواروگریان. جیغ و فریاد.
@amingardiglani
🔹یەلدا🔹
🔸ئەمین گەردیگلانی🔸
کۆنە ڕێبواری ڕچەی سەخت و چڕی یەلدا منم
بادەوەی دەم باتەزووی سەرد و سڕی یەلدا منم
شەو دەپێوم شەو هەتا کاتی لە دایک بوونی خۆر
شێتە چاوەڕوانەکەی ڕێگەی چڕی یەلدا منم
سۆڵەسۆڵی چاوی ئەستێرەی بەیان بانگم دەکا
چونکە سووتاوی چزە و شۆڵەی گڕی یەلدا منم
ڕۆحی پاییزم گەڵا فرمێسکی چاوانی منن
قەترە ئاونگی تەزیوی دڵپڕی یەلدا منم
بەڕ بەڕۆچکەش خەونە بۆ کۆرپەی کەسیرەی ئارەزووم
ڕووتەڵۆکی بێ پەسیوی جل شڕی یەلدا منم
🔹🔹🔹🔹🔹🔹🔹🔹
🆔 @amingardiglani
"پاڕادۆکس"
ئەمین گەردیگلانی
گشت زمانن زوورەیە و زوو زوو قسەی ناسک دەکەین
بۆ فریوی یەک، دەم و ڕوو دیڵی ژێر ماسک دەکەین
فێری چاڵ و کەندەڵان و بوودڕ و گۆڕی ڕەشین
دەم کە دەبزێوین کەچی باسی چیا و باسک دەکەین
نێر و مێمان زگ پڕی قین و تەماحن بۆیە وا
دەوروبەرمان پڕ وچەی داخە و لە پەستا سک دەکەین
ئێمە دیلی دەستی گێژ و فەرتەنەین و دوورە ڕۆخ
پشت و پێمان لێی‌بڕا هێز و مەلەی باسک دەکەین
ڕێ، لە ڕوومان شەرمەزارە و چۆکی ناسیوین زەوی
کیسەڵ‌ئاسا ڕێدەکەین، هاوڕێیەتیی ئاسک دەکەین
داری قرچۆکین و دەستەملانی هاژەی باگەڕین
ماڵی دڵمان شووشەیە و یاری بە قەڵماسک دەکەین
گەردەلوولی سەرکەشین و لافی شیبا لێدەدەین
خونچە گوڵ پەڕپەڕ دەکەین، لای‌لایە بۆ لاسک دەکەین
باوی ئەمڕۆن دوو زمانی و فێڵ و دووڕوویی و درۆ
گشت زمانن زوورەیە و زووزوو قسەی ناسک دەکەین
🔹🔸🔹🔸🔹🔸🔹🔸
🆔@amingardiglani
🔹باوەشی باران🔹
🔸ئەمین گەردیگلانی🔸
خەم دڵی خستوومە جەغزی ئاگری ژانێکەوە
هەر شەوەی دەخزێمە ڕۆحی سەوزی گریانێکەوە
بۆیە شەو، ئەشکم دەبێتە گوڵوشەی شێعری ئەوین
ڕۆژ، نیگام دەدرووم بە تیشکی نیو نیگای جوانێکەوە
گوندی ژینم بۆتە جاڕی خوێن و فرمێسک و برین
بۆنی مەرگە و دێ لە نێو هەر ماڵ و کۆڵانێکەوە
ڕۆژ فەڵای بیرم، لە مەزرای دڵ، دەچێنێ تۆوی ژین
هەر کە شەو دێ، وێڵە بە دوای ڕەنگ و بۆی نانێکەوە
پێ لە هەر جێگایە دانێم، تیغ و پشکۆ و ئاگرە
بۆ پشوودان بچمە ژێر کەپری چ ئاسمانێکەوە؟
ئەو مەلانەی ساڵەهایە لەم هەرێمە کۆچ ئەکەن
ئێستە چوونە نێو ڕکەی قینی چ یەزدانێکەوە؟!
زایەڵەی هاواری شێعری دڵ بەژانی ئەمشەوم
چۆتە شمشاڵی دڵی خنکاوی چ شوانێکەوە؟
دڵ، ڕەگی تینووی درەختی ئەشقی ژینە، بۆیە من
سەر دەنێمە باوەشی گشت قەترە بارانێکەوە
🔹🔸🔹🔸🔹🔸🔹🔸
🆔 @amingardiglani
دیاریی هونەرمەندی پەنجە زێڕین
کاک لوقمان نادری
چەن ساڵە بە دووی ھیچەوە وێڵیت و ھیچ
ئەم ھیچە بە ھیچە جێدەھێڵیت و ھیچ
سەد ساڵی تریش لە باوەشی ھیچا بی
ھیچیت و زەوی بە ھیچ ئەکێڵیت و ھیچ
🔸ئەمین گەردیگلانی🔸
🔸🔹🔸🔹🔸🔹🔸🔹
🆔 @amingardiglani
🔸خۆکرد🔸
🔹ئەمین گەردیگلانی🔹
بە دەستی خۆت بە فیڕۆ بۆ دەدەی ژین و ژیانی خۆت؟
شەقامی ڕەش ببینە و تێپەڕینی ساتەکانی خۆت!
بە سەر شان و ملتدا ناسەپێ ئازار و ڕەشبەختی
هەتا خۆت حەز نەکەیت و تاوەکوو هەڵنەگرێ شانی خۆت!
بە دەست خۆتە لە دنیا دیتنی کابووس و خەونی خۆش
ئیتر بۆچی بە دەستی خۆت لە دۆزەخ داوی گیانی خۆت؟
ژیان بوومی سپی و دنیا هەموو ڕەنگێکی تێدایە
لە دەست خۆت دایە فڵچە و وێنەگەر هەر خۆتی، مانی خۆت!
لەبەر چی هێندە لاڕێی و بەرەو تاریکی خۆدەکوتی؟
ئەوەی پێی ڕەش دەبێ دڵ، چاوی ڕەشبینە، دەزانی خۆت
بە لێوی ویشکەوە کەوتوویە ڕێ، دەخوشێی بەرەو مردن
سەرت هەڵگرتووە و دەشزانی توونی خۆتی، کانی خۆت
لە ئەشکەوتی سەرتدا ئاوی ژین قوڵپە و کەفوکوڵیە
خودا هەرخۆتی، ڕوح خۆتی، ژیان و خزری سانی خۆت!
🔸🔸🔸🔸🔸🔸🔸🔸
🆔 @amingardiglani
🔸برووسکەی خەم🔸
بۆ یادی سەوزی مامۆستا ئاوات
🔹ئەمین گەردیگلانی🔹
ناوی تۆ "ئاوات"ەکەم کاتێ وەبیرم دێتەوە
زامی کۆنی دڵ هەمیسان دێتە سۆ دەکوڵێتەوە
بەرقی خەم دیسان لە هەوری دڵ دەدات و دێتەکوڵ
کوێرە کانیی وشک‌هەڵاتووی چاوەکەم دەژیێتەوە
ڕوو بە شادی پێوەدەدرێ پەنجەرەی هیوای دڵم
ڕوو بە داخ و مەینەت و دەرد و کەسەر دەکرێتەوە
کورپەکەی هەستم گوڕووی بۆ نوقڵی لێوت گرتووە
ڕۆژ و شەو دەگرێ بەهانە و دەگری، نالاوێتەوە
بێرەوە و شێعرێ بڵێ با دامرێ کڵپەی دەروون
مۆمی ژینم چاوەکەم، با کەم بە خەم بتوێتەوە
خۆشەویستم بێرەوە و بڕوانە شاگردت "ئەمین"
چۆن بە واژەی کوردی ملوانکەی شێعر دەگرێتەوە
بەهاری 1369 گیلانی ڕۆژاوا
🔸🔹🔸🔹🔸🔹🔸🔹
🆔 @amingardiglani
زایەڵەی شاخ و قیژەی گوڵەباخ
🔹ئەمین گەردیگلانی🔹
بەڕێوەم و دەگەڕێم تا سنووری ئەم خاکە
لە چاوم ھەڵدەوەرێ ئەسری سووری ئەم خاکە
لە ناخم ھەڵدەقوڵێ زایەڵەی بە تینی شاخ
دڵم بووە بە ھەناوی تەنووری ئەم خاکە
خەزەڵوەرێنە نیگای باخ و، گوڵ وەری پەلکی
ژەنینی دارە لە سەر نۆتی شووری ئەم خاکە
لەگەڵ ھەنیسکی گوڵ و کانیی دڵ بە خەم، گریان
چڕینی باخە بە قوڕگی تەمووری ئەم خاکە
گلارە شەونمی سەر پەلکی گوڵ لە قوڕ وەربوون
لە دووکەڵا ونە کوڵمەی بلووری ئەم خاکە
بە قیژەقیژ و زریکەی گوڵووک و وردەچرۆ
چیا دڵی بە گڕە و بۆتە «توور»ی ئەم خاکە
لە دووریی تیشکە، غەور گرتی چاوی ئاوێنە
وەریوە باڵی شنەی سەوز و سووری ئەم خاکە
وەنەوشە سەر بە ھەشە و خۆ دەڕنن گوڵباخی
بەقەد خودایە، خودایە سەبووری ئەم خاکە
🔹🔹🔹🔹🔹🔹🔹🔹
🆔 @amingardiglani
🔸کەنی🔸
شێعر و خوێندنەوە:
ئەمین گەردیگلانی
🔸🔸🔸🔸🔸🔸🔸🔸
🆔 @amingardiglani
🔸گڕی شەڕ🔸
🔹ئەمین گەردیگلانی🔹
من خاکی بێ بەهارم، کەوتوومە بەر گڕی شەڕ
جەستەم وەها تەزیوە، دۆزخ دەکەم بە سەڕسەڕ
نەکوژاوە ژیلەمۆکەی ئاورگی سووری نەورۆز
سیس هەڵگەڕا گوڵانم وەک بسکی زەردی پووشپەڕ
عەشقی فڕین لە سەرما سەد باڵی لێ‌ڕواندووم
باڵم نەسوو لە هەور و گشت هەڵوەرین پەل و پەڕ
ژین کورتە تاکوو هاتم چاوێ بە دڵ لە گوڵ کەم
دیتم لە سەر مەزارم ڕسکا شلێر و شەشپەڕ
کەوتوومە دووی شەبەنگی خۆرێکی زەردی بێ تین
داماو و کۆڵەکوتراو، کوێر و شەل و خول و کەڕ
ناسیویە ماری ڕێگا پێی پڕ بلۆق و زامم
برژاومەوە بە ئارەق، داومی لە عەرزی باپەڕ
لەم کەند و لەندی ژینە ئاتاجی دەسگرم خۆم
بابردەڵەم بە سەر چووم، کەوتوومە چنگی باگەڕ
من خۆم لە ڕێگە هەتڵەم، عەشقم دەکەن بە ڕێباز؟!
کێوم لە پێ دەبەستن؟ بیرم دەکەن بە باوەڕ؟!
ئەی شلکە خەڵفی پاراو بڕوانە جەرگی چوومەت
ماچی ڕەشت نەدیوە لە لێوی ئاوری تەڕ
دەیبینی شایی سووری ماچ و گوڵ و قوڕ و خوێن
لەم چۆڵگەیە کە بلوێ ژوانی گورگ لەگەڵ مەڕ
دەنگێ لە ناخی شەودا چڕژاندی بەردی مت بوون
دەیگوت بە گڕ بنووسە، ڕازی گوڵانی پەڕپەڕ
هەرچەندە نووتەکیش بێ شەوگاری ناهومێدی
خۆرێکی تر دەڕسکێ ڕادا شەوی ڕەشی شەڕ
کتێبێک سەبارەت بە کێش و وەزنی شێعری کوردی
بە پێشەکی مامۆستا ئەمین گەردیگلانی
نووسەر: مستەفا هوشیار
شوێنی بڵاوبوونەوە: بۆکان، فەلەکەی مادەر( مجسمە مادر)، کتێبخانەی ئازادی
🍀ئاڵا🍀
شێعر: ئەمین گەردیگلانی
خوێندنەوە: بەیان پەسەند
کاتێ شەپۆلی پەرچەمت گڕ بەسەری شەوا دەکەن
شەو دەڕەوێ زەوی و سەما، گوڵ لەبەری هەوا دەکەن
دەشت و چیا دەبن بە گڕ، باڵی بزەت کە دەرکەوێ
چاو زمان و دڵ هەموو، پێکەوە یا خودا دەکەن
تۆ کە بە نیو نیگایەکت گڕ لە جیهانێ بەردەدەی تاوی بزە و شەبەنگی ڕووت، چی لە دڵی چیا دەکەن
دێی کە بە کۆیە نوورەوە، شەو دەخزێتە ژوورەوە گیانە لە خەو دەڕاسن و دەرکی دڵ ئاوەڵا دەکەن
دەردەکەوێ لەگەڵ بەیان کاتێ گزنگی ڕووی گەشت
شەونم و سەوزە ناوەکەت، پڕ بە گەر و هەرا دەکەن
تاکو خەیاڵی تۆ لەگەڵ ئەم دڵە عاشقەی منە بووکی وشە و پەریی شیعر، دێن لەگەڵم سەما دەکەن
دەردەکەوێ کە تیشکی ڕووت شەو لە پەساری ئەشقەوە
بەرد و گوڵ و کوڵۆ بەرەو پیری دەڕۆن و ڕادەکەن
با بشەکێ بە نەرمەبا، بەژنە زراو و بەرزەکەت
ئەو دەم ئەبینی دەشت و کۆ چۆن خەم و تەم بە با دەکەن
شەو دەڕەوێت و تیشکی ڕووت پڕ لە ئەوین دەکا بەیان
شاخ و قەڵەم لە باوەشی جاڕە گوڵا سەفا دەکەن
🆔 @amingardiglani
شاری پیتەکان|فێرکاری ئەلفبێی کوردی| گۆرانی بۆ منداڵان|کاناڵی بابەدیدی|ba...
https://youtube.com/watch?v=2k-rHcTj6ko&feature=shared
لە ڕاستەوە: ڕامان سۆفی سوڵتانی، دکتۆر شەماڵ ئیسماعیل‌پوور، ئەمین گەردیگلانی، حسێن ئەندان(کوردە)
سەردەراباد، 1403/2/28