178
الإبنَة الأوفى لبلدِها الأم🇱🇾. . •Bibliophile :متلازمة
فلسفة الرقم واحد في كل شيء ديما دايرة فرزة.
اول إمتحان جامعي/النص الاول من 2023✨
فصل من القصة انتهى، كسبنا منه علم، وعشنا بين سطوره ليالي ألم، تأرشفت في دهاليز عقولنا ذكريات، وشهدت ليبيا بإننا كنا أبطال حتى في أبشع الأوقات، لم تحبط المآسي عزيمتنا، ولم تنال (وزارة الكهرباء) من قوتنا،حاولنا وتحايلنا، تعثرنا وبلطف من رب العبّاد واصلنا، كنا في الموعد ديما، ومكناش قدام كل ورقة امتحان إلا جنود بواسل شعارهم النصر.
قال عليه الصلاة والسلام:"من سلك طريقًا يبتغي به علمًا؛ سهل الله طريقه إلى الجنة".
تصفيقة لكل الحُلوات البطلات.
الحمدلله على شعور الأمل المتجدد فينا، على فكرة إن ديما بكرا حيرضينا مهما بلغت قسوة اليوم، على عناد أرواحنا بإننا أبطال رغم بشاعة الظروف، وإيمان أصحابنا بإنه( مينخافش علينا) حتى لما فاضلنا الحد الثابت بالخطأ.
صباح الخير للحياة، لليبيا، وليكم طبعًا♥️.
مع تسارع وتيرة الأحداث، وزحمة الأوقات، بين الكتب والشيتات؛ ماتغفلوش عن إنكم تخنبوا دقائق تضحكوا فيها قدّام المرايات، وأذكروا أرواحكم بـقداشكم حُلوات.
صباح الخير بس لينا-إحني البنات.
مافيش مادة بطبطب على كتافنا وبتقول: عندكم حق أمس درجة الحرارة العالية، مافيش ورقة إمتحان بتلتمسلنا أعذار، مافيش منهج بيعفينا من قرايته.
عليه:
مانقدروش نحطّوا الصيف سبب، وهروب الضيء تبرير، نعلقوا كسلنا على شماعة(بلاد خاربة)، ونبرّوا ذمتنا-دروحه- قدام ضميرنا بإنه مش بإيدينا.
لإن
(لايُكَلفُ اللّهُ نَفْسًا إِلاّ وُسْعهَا).
تاريخ مرت عليه السنين؛ عالق ومحفور، يتعاود بالشعور نفسه بالخنقة نفسها بالدموع نفسهم، كبرني وصغّر الدنيا بيا، كسرني وبكاني عليا؛ لإنه وسط وحشية العالم برا ماعنديش حضن ندس روحي فيه لما نخش حوشنا، نبكي فيه لو ماجاوبتش في إمتحان، نهرب ليه لما نقلق مني، يوسعني لما نتضايق، يطمني لما نخاف، نتوسده نهاية الأيام العصيبة ونرجع بنية ماتعرفش شيء عن وجع الدنيا.
تاريخ حزني السرمدي، ٤/٤من كل عام.
الفاتحة والرحمة على فقيدتي الطاهرة.
اسعى لإشباع رغبتك وتحقيق غايتك، دِير اللي أنت تشوفه مُناسب وفعّل خاصية التجَاهل لإنك حتحتاجها للتعامل مع النماذج السلبيةٌ، أمسح التوتر من قاموس حياتك، وعَلي معدل الحماس، أصنع لنفسك كيان ثابت متين غير قابل للتصدع، أفرح وفرّح حِب ذاتك ودللها، إنطلق للعَالم ووثّق بصمتك فيه، ربي عطاك فرصة جديدة حاول تستغلها بالشكل المطلوب، وتأكد أنه النجاح اللي ماتكونش أنت حليفه؛ عَبث.
صبح فيه المطر ضيفة/َربيع مارس.
(بطريقة أخرى أعد الكرة وحاول مرة أخرى).
كلمات بلحن حماسي سمعتها وأني في طريقي لإمتحان أمس، وقعدت طول الوقت تتردد في بالي، بفضول الصغار أول ماروحت بحثت عليها ولقيت أن ليها سنة نازله من أعمال حمود الخضر وتبدأ بـِ : ماذا بعد وما قد صار؟.. سوى أن تكمل المشوار.
تعالوا نجوا نهدرزوا فيها شويه.. مثلا مثلا شني اللي ممكن يصير لحد مننا بحيث أن يخلي مساره يتعوق؟، وشغفه يضيع؟ قوته تخور ونيته تنعدم؟، شني اللي ممكن يوقف قدام العزيمة وشني اللي ممكن يقطع مسار الهدف؟، شني المُسببات اللي تخلينا احني نفسنا مش عارفين أسباب اللي فات كله.
(أسئلة من محور ثاني)
هل أصحاب المعدل العالي حياتهم وردية؟ هل الاشخاص اللي وصلوا للقمر بعلمهم تركيبة عقولهم خارقة؟ هل للمتوفقين عالم موازي خالي من المساوي؟.
فكرت بعقلي وسرحت بخيالي ناقشت نفسي وللأمانة ماوصلتش لجواب؛ ولكن وصلت لنقطة ربما تكون الفيصل في القضية كلها اللي هيا: الإيمان.
(أمنوا بنور أرواحكم حتى في مراحل العمر القاتمة؛ بس هكي)
كل التوفيق..
أني لما نسكت معناها زعلانه، غير هكي ديما نرغي..
(في هالسطر شعور مانحبش نحسه)
صباح الـ يارب خير؛ لإن اليوم خصيصًا متمنياته يكون هكي.
تمنولي التوفيق.
حتى لو مكانش المعدل فل، ومكانتش النتيجة في المستوى المطلوب، حتى لو قرينا وفي لحظه توتر تخلطت علينا الأمور ومجاوبناش، ولو تعبنا وماتوفقناش، مداما تحايلنا وحاولنا للنجاح نوصلوا؛ فإحني لازم نسلمّوا في حقيقة أننا ديما ناجحين.
الحمدلله..
صفعتني الحياة، طعنت من إيدين كنت خايفة عليها من الخدش، حطتني الأيام أمام خيارات الحلو فيهم مر، جبرت لما كنت مانبيش، ومشيت وقت كل شي فيا يقول: خلاص انهي، مضغتني الظروف وطمست جمال ملامحي، وإجتاحني الخوف من أنه يجي وقت نقول فيه: ياريت، خضت ملاحم في قمع السيء مني، وعشت حروب نفسية بلطف ربي مشت، تخبطت وتذمرت عيطت بحس وبكيت ليالي بان أثرها عليا بلا جهد، خارت قوتي وانعدم شغفي تضببت رؤيتي وتساوى البياض بالسواد في نظري، لكن بقدرة من مُدبر شؤون العباد ماعرفتش إلا نكون شخص نظيف، كيان واعِي وشخصية على مدى العمر لو صحلّك تقابلها؛ حتكون ممنون ونقطة.
Читать полностью…
فخورةٌ بالطيحة قبل الوقفَة، بالفشل قبل النجاح، بالخطوة الأولى قبل الأخيرة الّي للمبتغى وصلتني، بكل شي عافرت عليه قبل الشي اللي بالساهل جانِي، فخورة بأني شخص قادر يصنع من الظلام ضي، ويخلق من العدم حَياة، لمسته باهرة، حضوره بلا جهد مميز، وبصمته وين ماتكون واضحة، ولإن اللي مايعرفش قيمة نفسه مايعرفش قيمة شي في الدنيا، أني قدامكم نبي نشكر نفسي على كل شي تقدم فيه اليوم بيش تكون نسخه أفضل غدوة❤.
Читать полностью…
أطمس صوت الحروب وعلّي صوت حُبنا... بمشوار سيارة تحت ليلها مافيهاش قمر
(ببساطة لإن القمر مقعمز جنبك)
(أووو من وين كل هالثقة؟)
(من حُبك واضحة يعني)
(ديما ذاهبة شيرتي)
(لإنك تحبني)
(واقع،
لكن شن دخل؟)
(قالت جُمان فريد: الحب ذهاب شيرة)
(اممممم ..)
معضد الكعبي:(عليها عيون فداها الكون ...)
(بالمُناسبة نحب عيونِك راه)
(وأني نحبك أنتَ)
(بالرسمي حالفة على ذهاب شيرتي)
(هههههه الحب قلنالك معش تعاود الدوه. أنهي خلاص)
(شني اللي بننهيه؟)
(النص النص)
(نص شني؟)
(منعرفش المهم نص زي كل مرة يعني، نرتب في أفكاره بنروح بنكتبه)
(باهي شني نقول؟ نقول نحبك؟)
(اي اي قولها نحب نسمعها)
(ديما نحبك)
(أحلى ختام)
شارع ما/وطن حنون.
طول المشوار خلّى هذه السنة خصيصًا جزء من روحِي، على الرغم من ثقل الظروف، ووطأة المعارك؛ إلا أني فعليًا حاسة بشعور (الفراق) يتضاعف فيا.
فالحمد لله الذي وفقنا إلى يومنا هذا حمدًا طيبًا مُباركا فيه.
(واحد من المواقف اللي فيها الشعور أبلغ من الكلام).
صباح الخير، إنطلقوا وإثبتوا للعالم بإنكم قدها.
صَباح الأمل المرتبطٌ إرتباطٌ وطِيد مع بدايةٌ كل صبحٌ، صبَاح النية الصافِية والنفوس الطِيبة أصحاب التقاسيم البشوشةٌ واللسان المعبّي لطفٌ.
جَاهد بكل ماتقدر إنك تكون نفر من هالشوية-للأسفٌ- في مجتمعنَا اليوم، لإن صدقني مافيش أحلى من أنه يكون أسمك محفوف بكل شي يشرّف وسيرتك تنجَاب في كل حاجه باهية، طهّر قلبك من دَنس الحقد والحسد وأفتحله صفحة جديدةٌ طاهرة ونظيفةٌ، متخليش عِداد أيامك يمشي وأنت قاعد واقِف لـفلان على موقفٌ وتراجِي في علان على هفوةٌ، إلتفت لحياتك وعبي الفراغات فيها بحيث إنك متلقاش وقت فاضي تمارس فيه كل هالأفعال المُقيتَة المُشينة للإنسانِيةٌ.
عِيش لنفسك زكّيها وأخدم عليها، فكر شوية ..وتخَيل بس قداش الدنيا حتكون مُريحةٌ لو كل إنسان عَاش حياته وسَيّرها على هالمِنوال.
صَباحكم راحةٌ، بالتوفيقٌ♥️.
(معارك بطولية.. استبسال لا نظير له)
لإن هالأيام حتزيد من رصيد بطولتي، حترفع من معدل عزيمتي، حتثبت مدى قوتي صبري وجدارتي، لإنّي جازمة بأنه على قيس المجهود حتكون النتيجة، ولإن هذه الليالي نعم الشاهد، وهذه الدموع خير الدليل، ؛ أني راضية ومستحمدة.
تمنوا لنا التوفيق لُطفا.
تحت كل الحروب المناخِية والنفسية والحياتية، ماعرفناش نكونوا إلا أبطال؛ ببساطة لإننا خُلقنا لننتصر.
5:02ص
فجر شاهد على إحدى الملاحم.
تمشي الأيام، تتعاود السيناريوهات، احني نكبروا، نعقلوا، نستوعبوا أننا قاعدين مزال على محك التجربة والإثبات ولإن بالحق ماعنديش نية نفسّر، ولإن أصلاً مافيش وقت للتفسيرات، على قولت خوتنا: ذاكر وأنت بتعيط.
اول إمتحان فترة ثانية/ اليوم الثالث من يوم ميلادي.
تمنّوا لنا التوفيق..
الحمدلله أنه عارف النوايا، أدرى بالنفوس، أعلم بخبايا الأرواح، شايف المجهود وسامع الدعاء، الحمدلله على لطفه وعفوه، على كرمه وعطاياه التي لاتعد ولاتحصى، على نعمه ومنّه وهُداه، على قدرته في نقلنا بخفة من بين طيّات القلق إلى رحابة اليسر، على رحمته التي تتولى عجزنا وتجبر كسرنا، فاللهم لك حمداً طيبًا ترضاه.
أستغفروا لِنواياكم؛ فعليها ترزقون.
هانت..
(شعار العمر، وكلمة الأوقات العصيبة)
هونوها تهون يا رفاق.
صباح الخير وموفقين يارب.
لإن الفشل بداية طريق النجاح، ولإن التعب الوجه الثاني للراحة، لإن الدموع نتيجة مُسبقة لضحكات جايه، ولإن القلق أولى ملامح الرواق، لإن الزعل إنذار للفرحة، ولإن غدوة صنيعة أفعال اليوم؛ جاهدوا بأنكم تخلوه يليق بمستوى ذواتكم.
كل الحُب والتوفيق..
مارس الحب في مَارس..
ومارس الأولى هنا نقصد بيها فعل(الممارسة)، أما الثانية فهي اسم شهر يبدأ بيه الربيع، ولهذا السبب فيه الزايد عندي، أما الحب فهو حاجة معنوية بالنسبة ليا منقدرش نبخل بيها ولا نكبح جماحها.
بمُناسبة الربيع، نتمنى من كل قلبي أن يعم قلوبكم خضاره، ويوصل اللون الأحمر من الفرولة-محصول ربيعي- لخدودكم؛ نتيجة لشعور النجاح بعد التعب.
كل التوفيق والحُب..
صباح الخير لليبيا اللي أبداًمش حنبخل عَليها بيه، لأول أمتحانِ بعد طول إنقطاع، لأبلة المَادة اللي قد مانشكرهها حنكون مقصرة قدام سخاء عطاءها ، صباح الخير للأصحاب والزملاء اللي يَاما تشاركنا توتر هاللحظات مِن قبل.
أبدوا يومكم بلإستغفار وأستودعوا ربي اللي قريتوه، أبتسموا في وجه كل من يقابلكم وأصدحوا للعالم بصباح الخير، شدوا الهِمة وأتبثوا للكل بإنكم قدها.
صباح الجِد♥️.
بعد عقد وعامٍ على إنتفاضة الجماهير، والمضي نحو تحرير وطن أبى شيبه وشبابه الصمت أكثر.
بعد ما هب الأشاوس وثار المناضلون؛ لتحقيق القيم وبلوغ القمم.
ها نحن اليوم نجدد العهد بأن لا إنحياز إلا للتضحيات، ولا تبجيل إلا للوطن، ولا ثورة إلا فبراير السابع عشر.
لم ولن نندم🇱🇾.
ياريت لو نقدروا نعاودوا تفاصيل الأيام اللي فيها فرحنا، ومن وسط خاطرنا ضحكنا، لو نقدروا نعيشوا للفناء في ليلة تحت ضي قمرها سمعنا: نحبك لأول مرة، لو من خيالنا ملامح الواقع تنرسم، وبلا جهد القلوب تلتَحمٌ، لو القريب على القلب كان قريب حتى على العين، لو ماكانتش النهايات موجوده، وماكانش الفراق حاضر، لو الحظ كان ديما في صفنَا وديما صاحبنا، لو بين طيّات الأيام يجمعنا شارع نعزموا المَارّة فيه على قهوة، وتحكيلهم قداش تحِب الحياة؛ ببساطة لإن أني المرادف والمعنَى.
Читать полностью…
قلبين
على قساوة الدنيا قادرين
ومُرها محليين ...
في قلوب بعضهم عايشيين؛
وببعضهم مكتفيين
بشئ واحد مقتنعين:
أن الحياة مش حتقدملهم إلا الزين
مادامهم مع بعضهم ديما قاعدين.
(حلوة وبتحلّي أي مكان وتنوره، والله ماتلاقوا زيها لفوا الدنيا ودوروا)
بلا تكلف حضورها باين تأثيره، وبالفطرة رونق شخصيتها واخد من كل مفاتن الكون حصة، بهاء روحها مداير هالة دافية واصل مفعولها للكل، مخلية كل من تحسس لذه هالقرب يسأل نفسه: هو فيه منها اثنين؟
(دي جمالها معدي، واللي يشوفه بيقدره)
وحدة من حقائق المجتمعات أن جمال التقاسيم مُقدس عند العامة.نقطة مقدرتش نكمل معرفتش شن نكتب.
(مابتدلعشي مهي دلوعة لوحدها، الرقة ياناس رباني)
كشخص كامل الاوصاف(الكمال لله) أكيد هي مش محتاجة تتلبس وتحلق خارج هويتها، ولقوة التأثير زي ماقلت فوق مخلية مرة ثانية الكُل يجزم على أن الدلال والرقة سمات فطرية فيها.
(أنا مش حتكلم، أنا رافع إيدي مسلّم، القدي ياناس يدرس، منو الغزلان تتعلم).
بالضبط هكي، إمرأة بهذا الكيان صعب تنصفها اللغة وتوصفها الحُروف، ولهذا السبب حتى أني حطيت القلم ورفعت إيدي.
(كلام بلا وجهة).
(غزل مع حماقي).
شخص حُضوره طاغي، وقع تأثيره على النفوس ديما آخاذ، شساعة روحه عالم ثاني وسط هالعالم؛ كل من قرر يغوص في عُمق معالمه ويبحث في ثنايا تضاريسه حيتكتشف نوع فريد من الفن، حيحس الدفي وحيستشعر رقة القلب، حتبانله القوة وحيوقف مذهول قدام حبكة هالتوازن. شخص خفيف الظل، ليّن العِشرة، باذخ اللطافة، نقي السريرة، معاه وجنبه حتجزم بإنصاف الدنيا وحتشكرها على إهدائها ليك شَخص قادِر تكون في قربه حقيقي؛ وهذه الحقيقة.
Читать полностью…