Telegram-канал asrsulduz - عصر سولدوز: Unsorted

عصر سولدوز

27 Jan 2024 20:58

▫️ عشقده «صاباح» یوخدور، سئوگیلی!

عشق بو دونیانین اؤلچولری‌یله آچیقلانا بیلمز، سئوگیلی!
او ازَلی بیر آجی‌دیر. غریبه بیر آغری‌دیر. گلر و ایچیمیزده‌کی او چوخ اسکی بیر شئیه توخونار.
سونرا بیر پرده آچیلار و یولجولوق باشلار.
بو یولجولوقدا آرتیق پول، تعرفه‌لر، گؤزلَنتی‌لر، قرارلاشمالار، تقسیط‌لر، ایش، آنالار و قورخولار یوخدور.
عشقین اؤز گئرچکلیگی واردیر، سئوگیلی! اینسان بیر باشقا ایشیغا تسلیم اولور.

عشقده صاباح یوخدور، سئوگیلی!
زامان ایره‌لی دوغرو دئییل؛ ایچَری، اورک‌لره، درین‌لره دوغرو ایشله‌مه‌یه باشلار، بیلگه‌لشر، هئچ بیلمه‌دیگی حیسلری‌یله گؤروشَر. یوکو چوخ آغیردیر، اؤزویله گؤروشموشدور؛ هم قیراغیندادیر دونیانین، هم ده اورتاسیندا.
هیندوستان'دا «گانگ نهری»نین قیییسیندا یاندیریلان یوخسول آدامین حیسّ ائتدیکلری ده اونونلادیر، ایتیردیکلری ده. نیویورک'دا، بیر کوچه‌ده، او کارتوندان کولبه‌سینده یاشایان قادینین چیپلاق یالنیزلیغی دا.
هر شئی اونونلادیر، اونا امانت‌دیر سانکی. آما او، دلی ائدیجی بیر یالنیزلیق ایچینده‌دیر یئنه ده.

عشقین کولتورلو اولماق‌لا، بیلگیلی اولماق‌لا دا ایلگیسی یوخدور، سئوگیلی!
قانیمیزا قاریشان ازَلی آجی، او غریبه آغری‌یلا هئچ بیر کیتابین یازمادیغی حقیقت‌لره داها یاخینیق، اینان!
کیم دئمیشدی خاطیرلامیرام، عشق وارلیغین دئییل، یوخلوغون آجیسی‌دیر دئیه؟
بلکه ده بو اوزدن ایلک، گنجلیگیمده، او چوخ عاشیق اولدوغوم ایللرده، گؤزومه یوخو گیرمز، دوداغیمدا بیر فیت‌له بوتون گئجه شهری، او قارانلیق، او حوزونلو کوچه‌لری دولاشیب اینسانلاری یوخولاریندان اویاندیرماق ایستردیم.‌ اویانیب، ایچیمده درین بیر سیزیلتی‌یلا اویانان او درین سانجینین آجیسینا اورتاق اولسونلار دئیه.

عشق چوخ اسکی بیر شئی‌دیر، سئوگیلی!
اونون ایچیندن او دردلی اوشاقلیغیمیز کئچر، سئودیگیمیز اینسانلارین اوشاقلیق‌لاری‌ دا.
اورادان اؤگئی آنالار، اکسیک بابالار، پولسوز پانسیونلولار کئچر.
و سونرا عشق بوتون بونلاری آلار، داها دا اسکی‌لره گئدر، هپ او ازَلی آجییا، او غریبه آغرییا.

اینسان بعضاً ندنسیز یئره اومیدسیزلیگه قاپیلار. کیمسه‌لره وئرمز سئوگیسینی، کیمسه‌لره اؤزونو آنلادا بیلمز، ائولره قاپانار.

بعضاً دنیزلر، قییی‌لار چکر اینسانی، اینسان بو قاپیلماغی آنلایا بیلمز. اویسا، چوخ اسکی بیر یئرده یاشانماسیندان قورخولوب وازکئچیلمز عشقلرین سیزیلتیسی‌دیر بو. بو سیزیلتی، بو یئنیلگی مؤوسوم‌لرله، ایللرله بوراخیلار باشقا اینسانلارا. بیر اینسانین ائتدیگی بیر خاطانین بوتون اینسانلارا یاییلماسی کیمی.

ایشده، ایندی بیز ده، سئوگیلی! یا گؤزلَنیلمز زامانلاردا اومیدسیزلیگه قاپیلیب دینجلیگیمیزی ائولرده آلاجاغیق؛ یا دا دنیزلر، قییی‌لار چکه‌جک بیزی.
نئجه بیز باشقالارینین قورخاقلیغینی داشیییریق‌سا، باشقالاری دا بیزیم قورخاقلیغیمیزی، یئنیلگیمیزی، اومیدسیزلیگیمیزی داشییاجاق.

بیرآزدان صاباح اولاجاق.
پول، تعرفه‌لر، گؤزلَنتی‌لر، قرارلاشمالار، تقسیط‌لر، ایش، آنالار و قورخولار باشلایاجاق.
بونلار وارسا و بیزیم اوچون کئچرلی‌یسه، عشق یوخدور و هئچ اولمامیشدیر، سئوگیلی! بیر-بیریمیزی آلداتمایاق!

هایدی، گونه حاضیرلان! یاشادیقلاریمیزی اونوتماغا چالیش! عشق بیزه گووه‌نیب وئردیگی اووسونونو، سیرلرینی، جسارتینی، بیلگه‌لیگینی و او ازَلی، او غریبه آغریسینی گئری آلاجاق. بونلار اولارکن ایچیمیز بیر آن چوخ اوشویه‌جک، سونرا کئچه‌جک.

هایدی، یوباتما! بیرآزدان صاباح اولاجاق.
عشقده صاباح یوخدور، سئوگیلی!

جزمی ارسوی

🌐 @asrsulduz
🌐 instagram.com/asresulduz