آتیلا حاجی زاده

27 Nov 2024 22:38

#یئنی_غزل
#آتیلا_حاجیزاده

تاپانچانین اوجونو آرخادان قویور باشیما
آتام همیشه دئیه‌ردی اوغول سیلاح داشیما

-باشین بدنده آغیرلیق ائدیر جاوان دئیه‌سن
سورو تک آرخادان-اؤندن تؤکولدولر باشیما

دالان-بوروق کوچه‌ده گولله‌لر قوواندا بیزی
بیری قابیرقاما ده‌یدی اوبیرسی قارداشیما

جانیم دوداقدا،
ده‌لینمیش،
ییخیلمیشام قاپی‌دا...
هله آنام نیگران‌دی ضرر گله قاشیما

خوروز یومورتا قویان یئرده کیم گؤروردو منی
حئییفلنیردی قوجا سئوگیمه، جاوان یاشیما

باشین بدنده آغیرلیق ائدیر دئیه‌ن کارآگاه
اؤبور طرف‌ده سؤیوش یاغدیریردی یولداشیما

کؤتهله‌نیب، جانا گلدیم؛
دانیشمادیم
و اولار-
گؤزوم اؤنونده نئچه دامجی تؤکدولر آشیما

کیم آد وئریب آخی سسلندیم؛
آرخایینجا دئدی
نه فرقی وار بیزی کیم ساتدی؛
اوستونو قاشیما...



ـــــــــــــــــــــــــــــــــــــــــــــــــــــــ
#آتیلا_حاجیزاده
@Atilla_hacizade
@Atilla_hacizade

#پاراگراف
@paragraph
@paragraph

ـــــــــــــــــــــــــــــــــــــــــــــــــــــــ

آتیلا حاجی زاده

24 Oct 2024 14:58

نشست صدوهشتم انجمن قرار با موضوع حبیب ساهر و شعر نو آذربایجان

این نشست با حضور شاعران و علاقه مندان روز یکشنبه بیست و نهم مهرماه در سالن جلسات خانه جوان اورمیه برگزار شد.
کارشناس جلسه حمید واحدی و کارشناس مهمان محمد صبحدل در مورد ساهر ، تاثیر او در ادبیات ترکی و جریان شعر نو ترکی به سخنرانی و گفتگو پرداختند.
در ادامه تعدادی از شاعران حاضر در جلسه شعرخوانی کرده و برخی از آثار نقد شد.


#قرار_شعر_اورمیه
#یکشنبه‌های_شعر_اورمیه
#ارومیه #شعر #ادبیات

@gharar_poet

آتیلا حاجی زاده

24 Oct 2024 14:24

.

قرار درنه‌یینین ۱۰۸-اینجی نؤوبه‌سین‌دن قیسسا راپور/بیراینجی بؤلوم

حبیب ساهیر حاققیندا قورولان اوتوروم‌دا/محمد صوبحدئل:
ساهیر تئوریک آلقیلارینی آذربایجانلاشدیریب، یئره‌ل ورژن سونوردو.
#آتیلا_حاجیزاده


قرار درنه‌یینده، آذربایجان دیوان ادبیاتی‌، چاغداش میفولوژی، آذربایجان شعرین‌ده تجددود و... کیمی قونولار محوریتی ایله حکیم محمد فضولی، ماللا پناه واقیف ایله بولود قاراچؤرلو-یا حصر اولان اوتوروملار سونراسی بوگون سیرا حبیب ساهیره چاتدی. آذربایجان مودئرئن ادبیاتین سیمکه‌سی اولموش ساهیر، آذربایجان، تورکیه ادبییاتی، عوثمانلی ادبییاتی، عرب همده فرانسیز ادبییاتین درین‌دن اوخویوب ائتگی گؤتوره‌رک، «عوریان واردات» ایله یوخ بلکه آذربایجانلاشدیریب، یئره‌ل ورژن سونماقلا، سننت ایله مدرنیته‌نی تلفیق ائدیردی ائله‌کی بو اکت بیر پست مودئرن خصیصه و داورانیش ساییلیر.(البته بو بیر اثر یا شاعیر «پست مودئرئن» دیر دئمک آنلامینا گلمیر آنجاق ایستر عمد اوزرین‌دن ایستر «آلت بیلینج» ائتگیسینده، یو قاورامین اونون خصیصه‌لرینی داشییر.)

علاقه‌دن دولایی معللیم‌لییه اوز توتان ساهیر، داها بیر دئموراتیک سوسیالیست کیمی اورتایا چیخدی ائلجه تکجه اؤز خالقینی یوخ بلکه ایران‌دا یاشایان «غئیر-ی فارس» ائتنیک‌لره قارشی اولوسال باسقیلاری تانییب ائلئشدیریردی؛ «عشیرت، قوم-قبیله‌، ارباب-رعییت» کیمیی موناسیبت‌لرین ایستیتمار آرتی‌سی صینیفسال همده سوسیال عداالتسیزلیک‌لره ندن اولوب؛ همان سبب‌دن آیدینلاتمانی میللی حاقلار ایله صینیفسال «طبقاتی» کیملیک حاققیندا آیدینلیق یاراتماغی ان موثثیر ائلجه درین آکتیویته اولدوغونو ساوونوردو، بو طارز اؤزللیکجه «تالانچی‌لار» حیکایه توپلوسوندا آیدینجا گؤزه ده‌ییر.

قرار-دا آذربایجان محور قونولارین توپلانتیسیندا سونوم زحمتینی قبول ائدیب صؤحبتین‌دن جیددی بیلگی‌لر ساچان جناب محمد صوبحدئل، حبیب ساهیرین هانسی ادبی توپلوما عایید اولوب، و تمثیل ائتدیینی آچیقلادی، آردیجا شهریار، سهند و ساهیری بیر آرایا گتیره‌رک، شهریارین فارس شعری  و مذهبی دوشونجه مئحورییتینده، سهندین صمد وورغون و واقیف عنعنه‌سی  و آشیق ادبیاتی ایله اوسطوره‌لردن تأثیر آلماسی؛ ائله‌جه ساهیری مودئرن تورکییه ادبیاتیندان، فرانسیز ادبیاتیندان و دؤنم‌ده یارانان آوانگارد ادبیات بیچیمین‌دن ائتگیلندییینی وورغولادی و مشروطه چاغلاری و اینقیلاب سونراسی یارانان یئنیچیلی‌یه چاتان یولون دوغال سونوچو اولدوغونو آچیقلادی.

راپورون دوامی، بیر آشاغی تئکست‌ده پایلاشیلیب
ـــــــــــــــــــــــــــــــــــــــــــــــــــــــــ
@Atilla_hacizade
@Atilla_hacizade
#پاراگراف
@paragraph
@paragraph

قرار درنه‌یی
@gharar_poet
@gharar_poet

تحکیه درنه‌یی
@tahkie
@tahkie

آتیلا حاجی زاده

15 Jun 2024 22:31

.
داغیلمیشام مله‌ییم داغلارین بولاق‌لاری‌تک
دونن طوفان داغیدان دفترین واراقلاری‌تک

گونش دومانلی شهردن کوسوب گئدن چاغ‌دان
لال اولموشام شهرین سس‌لری، سوراقلاری‌تک

توکه‌نمیشم قاداسی، قالماییب گلیب-گئده‌نیم
کاسیب محلله‌لرین کؤلگه‌سیز دوراق‌لاری‌تک

باخاندا گؤزلریمیز گؤینه‌ییر، یانیر؛
قاماشیر
یاغیش‌دا ساحیلی‌نین چیرپینان چیراق‌لاری تک

کوته‌لمیشم دئیه‌سن، یوخ داها کاریم-کسه‌ریم
یالانچی اینقیلابین پاسلانان اوراقلاری‌تک

یادیندا ولوله‌لی شاللاق اؤلدورودو منی
دابانلی باشماغی‌نین تاق-تاراق، تاراقلاری تک

ائهئی سیزه یازیرام ساختاکار تومانچاق‌لار
قوخوز گلیر بازارین چیهلی موستاراق‌لاری

باش آغری ژئست‌لریز قوسدورورب وئریر یوخویا
بیزیم بو مرکزین آدسیز-اوجوز آراقلاری‌تک

#آتیلا_حاجیزاده

آ.ی: قرار درنه‌یینین ۱۰۰-اونجو اوتورومو موناسیبتی ایله قورولموش تؤره‌ن‌ده ایشتیراکچی اولدوم؛ بو ویدیو دا یؤنه‌تیجی‌لرین محبتی ایله ایلگی علامتی‌دی، میننت‌دارام دوستلار.

_
@Atilla_hacizade
@Atilla_hacizade

آتیلا حاجی زاده

19 May 2024 09:35

.
گئجه یاری، سحر ائرکن یا هر بیر هانسی ساعات
قارانقولوقدو،
گونش فیکرینی باشین‌دان آت
بو زهریمار حالیما بیر گیله اؤزون‌دن قات
هئچ اولماسا اؤزونو باغریما سیغیندیر یات

کاسیب محلله‌لرینده گئجه هله قالاجاق
سن اولماسان منی کیم اوخشاییب، اوووندوراجاق‌

دومان، دومان و دومان، اؤرتولوب کوچه-باجایا
گونش کوسوبدو شهردن، گومان قالیب‌دیر آیا
ایتیرمیشم اؤزومو، دوشموشم اوتای-بوتایا
کیم آختاریر منی هئی...؟ «من» دونن ییخیلدی چایا

اینان؛ بولار ایتیریب ‌لر آداملیغی، شرفی
شهر چاییندا آخان قان آلیب‌دیر هرطرفی

باخیش باخیشلاریما،‌
-کیم چاغیردی بیرده منی...
ال آت گؤتور آیاق آلتینداکی قارا کفنی
آپاردیلار منی ۳-گون قاباق بوگون‌ده سنی
نه آختاریرسان آخی؛
-گل بوراخ بو ایش-پئشه‌نی؛

بوراخما اللریمی گل هله بیراز دینله
تاراق، تاراق، تاتاتاق، تاق، گلن-گئدن، گولله

دئدیم بیزیم قایالار سیندی‌لار، اه‌ییلمه‌دیلر
اؤلوم موجادیله‌سین یئندی‌لر، یئنیلمه‌دیلر
نقدری آغلادیم-آنلاتدیم آمما بیلمه‌دیلر
آپاردیلار منی ۳-گون قاباق، گتیرمه‌دیلر

دایان-دایان قاچیرام گئتمه قول-قیچیم یوخدو
داغیتما، ییخما، تلسمه هله زامان چوخدو

لال اولموشام،
یالاواج ایتلره پای اولدو دیلیم
و ۱۰۰-یاشیندا قوجالمیش کیمین سینیب‌دی بئلیم؛
قارانقولوق کوچه‌لرده اوزولدو سندن الیم
اؤلوم دوروبدو اؤنومده، دایان بیرازجا گلیم

شهرده قورد-قوشا دولموش،
کسیبدیلر یانیمی...
گلین، گلین، سوزولوب گؤزلرین آلیر جانیمی

تاراق، تاراق، تاتاتاق تاق، گلن گئدن، گولله
دوزولدو قارشیمیزا بیر سورو کسیک کلله
آمان‌دی دینمه، دانیشما، یئنه تپیک، سیلله
دا بس‌دی قورتار اه‌هَح، آز داوار کیمین اینله

گلیردیلر سسیمه نم ندنسه قویمادینیز...
ندن بو قدری گؤزل‌سیز، نه دیر سیزین آدینیز؟

ندن بو قدری گؤزل‌سیز؟ ندیر سیزین آدینیز؟
منم، اونوتمادیغیز سئوگی، ایتگین ائولادینیز
بیراز باخین اوزومه، بلکه سونرالار تانیدیز
نقدری آغلادیم-آنلاتدیم آمما قانمادینیز

و سویدولار دریمی بوکدولر قارا کفنه
گونش کوسوبدو شهردن گومان قالیب‌دی سنه

دولاندیریب‌دی، یوروب، یولدا قویدوغون ایزلر
سیزیلداییب گئجه-گوندوزلریمده عکیزلر
اوتانمادیق، یئنه‌ده هئچ اوتانماریق بیزلر
دولوبدو دؤرد یانیمیز، هرگلن بیزی ایزلر

بوراخما اللریمی بیر داها، آمان گونودور
و تاریخین گؤزه گؤرسنمه‌ین یامان گونودور

#آتیلا_حاجیزاده

آ.ی: ۹۸-ده یازیلیب پایلاشیلمامیش بو مرکب، جیددی ائدیت و پالاییش سونراسی قوللوغونوزا سونولور؛ ائلجه آرتیرمالییام، حرفه‌ای تفقید-دن ایستیقبال ائدیرم.

_______
@Atilla_hacizade
@Atilla_hacizade

آتیلا حاجی زاده

17 Dec 2023 09:45

و هر گؤزوندن آسیلمیش گیله، گیله گیلانار
باخیشلاریندا ایتیردیم بو دونیانین نه‌یی وار

بیزیم وطن‌ده حرامی‌لرین الینده توفنگ
بیزیم وطن‌ده دوروب آددیمین باشیندا دووار

بیزیم وطن‌ گئجه‌لشمیش‌دی یوخلاییب هرکس
یاواش باغیر قارا گؤزلوم تئز اویانلار اویانار

بیزیم وطن چورودوب‌دو سنی منیم کیمی هه
دانیشسان هرنه وارین‌دی توتوب الین‌دن آلار

اولوب-قالان داغیلارکن بیتیشدی من لریمیز
بو دونیادان قیریلیب عاصی‌لر یولوندادیلار

بو سئوگی‌نین اوتاغی گون به گون سیجاقلاشاجاق
بو سئوگینین آلاوو ساده‌جه اؤلومله یاتار

گؤزون وطن کیمی‌دی، قاپ قارا قارانلیق‌دی
گؤوزون دریندی باخان، باتلاق اولموشوندا باتار

خانیم بو عاشیقینیزدی، دلی، روانی بیری
گؤروش یوبانسا اه‌یر ایتلنر و شهری قاپار

دوغوم گونون‌دو بویون،
هن...
دوغوم گونومدو یانی
دوغوم گونونده دوغولدوم کی آی گونش‌دن اولار

.

بیر آیری دونیا اولورسا اؤلوم صاباحلی، یئنه
بو سئوگی قاتقی‌سی مطلق ایلیکلریمده قالار

#آتیلا_حاجیزاده
_
@Atilla_hacizade
@Atilla_hacizade

آتیلا حاجی زاده

13 Dec 2023 18:36

.
قارانقولوق‌ سریلیب‌دیر و قان آلیب شهری
قارانقولوق دئیه‌سن پیس گونه سالیب شهری

بوران‌دی شاختادی، قاردی، دومان‌‌لاشیب هر یئر
له‌له کؤچوب‌دو بو ائل‌دن وئران قالیب شهری

دونن باهار خانیمین شاختا کسدی دؤشلرینی
بویون‌ باهار خانیمین قیش‌لارا دالیب شهری

سئحیرلییب‌لر اینان بیزلری بو ساهیره‌لر
ایلان‌لاری دولاشیب بوینونا، چالیب شهری

.

بو ظلمتین سحرینده گونش گلر گؤره‌سن؟
ایشیق قارانقولوغون باغرینی ده‌لر گؤره‌سن؟

یئنه گلرمی باهار شاختا چؤکدورن وطنه؟
بولودلاری شهره سئوگی‌سین چیله‌ر گؤره‌سن؟

زامان بو قیشلاغی یایلاقلادارمی بیرده گؤرن؟
مارال لارین کؤچو بو یوردادا گلر گؤره‌سن؟

واراقلانار بو قارانلیق بو قار بو شاختا، یئنه‌-
یووا قورار دامیمیز اوسته سئرچه‌لر گؤره‌سن؟

قارا چکیب‌لر آیا-اولدوزا یوز ایللردیر
آیی ایله اولدوزو آغ اؤرپه‌یه بله‌ر گؤره‌سن؟

.

اؤلوم توزو سپیلرکن توکندی عصیانیمیز
آخیب کسیک‌لریمیزدن دؤنوب گؤله قانیمیز

کلبچه‌لر وورولوب، باغلانیب‌دی ال-قولوموز
حاصارلانیب دولاشیق نرده‌لرله دورد یانیمیز

سارالدی رنگیمیز آه قورخو ساردی کؤکسوموزو
فقط فصیل‌لریمیز یوخ خزان‌دی هر آنیمیز

و چیخمیشیق اؤزوموزدن قاییتماغا یول یوخ
زیان‌خور حئیوانا دؤنموش شرفلی اینسانیمیز

.
بو ظلمتین سحرینده گونش گلر گؤره‌سن؟
ایشیق، قارانقولوغون باغرینی ده‌لر گؤره‌سن؟

گلن-گئدن، تارا-تاق-تاق، اؤلوم سسی دویولور
یاخین صاباح‌دا سوسار قانلی گولله‌لر گؤره‌سن؟

اؤلوم مین‌ ایل‌دی بیزی یوخلادیب‌دی یولداش‌لار
حایات گلیب بیزی سون‌دفعه سیلکه‌لر گؤره‌سن؟

یئنه اوچار گؤیوموزده آزادلیق ائلچی‌‌لری
بیزیم‌ده شهرین آزادلیق پایین اله‌ر گؤره‌سن؟

ظولوم حؤکومداری‌نین چؤکدوررمی بایراغینی
آیاق‌لار آلتینا بیرکزده سئلبه‌لر گؤره‌سن؟

و سونرا صحنه دئییشدی:
اوتوردو بیر شاعر؛ قیچینی دیزینه آشیریب چاخماغینی چاخدی....
دودوقلارینا یاخینلادیب سیگاراسینی آلیشدیردی.


#آتیلا_حاجیزاده
#مرکب_غزل
_
@Atilla_hacizade
@Atilla_hacizade

آتیلا حاجی زاده

29 Jul 2023 08:04

گئجه‌نین بوز چاغی‌دیر،‌ گئت-گئده ایتلر اولاشیر
قوجامان دونیا گؤزومده اه‌رییب، خیردالاشیر

الی باغلی، دیلی باغلی خیاواندا گزیریک
نه یازیق کی هره بیر جور سینه‌سیندن آلیشیر

گئجه‌نین خان چاغی‌دیر، گؤی دئمه دئ قان چاناغی
قاپ-قارانلیقدا اؤلوم کؤلگه‌میز ایله ساریشیر

لئش یئیه‌ن‌لر شهرین هندورینده ییغیشیب
ایچکی چاققیشدیراراق ایت‌ ایله چاققال باریشیر

قورخولوقلار دیکیلیب‌دیر خیاوانلار بویوجا
قاپی‌دان، پنجره‌دن ائولره دئولر یاناشیر

تاریخین ان کؤمئدیک واقتینا دعوتلیسینیز
شاهلا، شیخین بو تؤرن‌ده آراسی یاخجیلاشیر

کوچه‌لرده، خییاوانلاردا نئجه جان آلینیر
بئله میدان‌داکی ویجدانلی‌لارین عاغلی چاشیر

هاواسین قان-قوخو آلدی بو وطن آدلی یئرین
الیم هر بیر طرفه ده‌یسه کثافت بولاشیر

گولله‌لر ییخدی یئره عصریمیزین عاصی‌لرین
اوخشاما قایناییر ائوده، دامیمیزدان قان آشیر

قاتی ساللاخ‌خانایا دؤندو بو اؤلکه ائله کی
هر اوباشدان‌ وده‌سی بوینوموزا ایپ دولاشیر

الینی وئر الیمه، دوش یولا، سیل اوز-گؤزونو
او قدر آغلامیشیق گؤز یاشیمیز آرخا داشیر

سؤزون ان قیساسی سئوگیم سن اؤزون سال-چیخ ائله
ان جاوان چاغدا آخی ساچلاریما دن یاراشیر؟

#آتیلا_حاجیزاده
__
@Atilla_hacizade
@Atilla_hacizade

آتیلا حاجی زاده

19 Apr 2021 22:00

آدامی دئییلم، الیم‌دن گلمز
#آتیلا_حاجیزاده

دونموشام بوز باخیشلاریندا، اؤلورسم خبرین اولسون، بیر سیغارا آلیشدیریب اه‌میشمه‌یه باشلادیم، قاچماغا آیاغیم اوچماغا قانادیم یوخ، اولورسادا گئتمزدیم اینانماسان‌دا بیلیرسن بونو؛ ایتمیشم اؤزومده آختارانیم یوخ، اؤلموشم اؤزومده سن آغلا باری آغلایانیم یوخ، ال-آیاق چالیرام دونن‌دن بری آچیق پنجره‌نی باغلایا بیلرسن؟ چوخ بتر قورخورام کاش آنلایاسان.

ال ساخلا دومانا باخ دونموشام توستونون گؤز گؤرمزینده،بوغولور گؤزلریم، ایچریم گؤینه‌ییر، ائشییم یانیر بیر قورتوم نفسین‌دن وئره بیلرسن؟ سسیمی ائشیتمه‌سن آرخانی دؤنمه، قانادیم یاندی، یاندی قانادیم، قاچدیم، ییخیلدیم، قاچدیم، ییخیلدیم، آیاغا دورا بیلمه‌دیم، بیلمه‌دیم یئنه، سورونه بیلمه‌دیم یئنه قاپی‌یا قدر پنجره‌نی آچ...

سیغارانی دوداغیم‌دان آییردیم کیمی اؤلدورموشم؟ اؤلدورموشم هه، اؤلدورمه‌میشم، اؤلدوره‌رم یئنه باخما گؤزومه ایچیمی سؤندور شهره اود سالان سن دئییلدین می؟ دونن‌دن گلمیشم ال چک یاخامدان آخماغین بیری کیم دئییر سؤندورمه‌رم اؤلدور ایچیمی، قانادیم سینیب‌دی آچیل باشیم‌دان اوچارام یئنه‌ده گله بیلمزسن.

سن دئییرسن اولماز بیر دیقه دایان ال-آیاق چالیرام دونن‌دن بری، قانادیمی قایتار، قانادیمی قایتار سورونه بیلمیرم یاخجی ایش دئییل؛ جینقیریمی چکمه‌دیم او قیشقیریردی، پنجره‌نی آچدیم دینمه چیغیردیم قایتار قانادیمی آیاغیم سینیب سورونه بیلمیرم، اوچارام یانین‌دان گله بیلنزسن، شعر اوخو بیرازجا سفهلییب‌سن؟

آرخاما دؤندوم سنی گؤرمه‌دیم آما، من گئدرم دئدیم سن نیه گئتدین؟ ایچریم گوینه‌ییر، ائشییم یانیر بیر قورتوم نفسین‌دن آلا بیلرم؟ پنجره‌نی باغلاما یانیمدا اوتور قالسین سورایا، آغلییم قورتولوم سونرا گئدرسن، نفس وئر، نفس وئر آلیشانمیرام، نیه آغلییرسان اوچورام هله، کیمی اؤلدورموشم؟ اؤلدورره‌م یئنه باخما گؤزومه، بیر قورتوم نفسین‌دن وئرمه‌دین منه بیرآزجا شعر اوخو، شعر اوخو منه کیم دئییر گئتمرم؟ هه گئدنمرم.

آغلاما اوچورام اینتیحار دئییل، آدامی دئییلم الیم‌دن گلمز، سورونه بیلمزدیم کی آخی آغلاما گلیرم، اوچماغیم قورتولسون قاییدیب باغلارسان وورما اؤزونو، یانینا قونورام بیرآزجا چکیل، نیه آغلییرسان؟ قونورام‌دا من، ۱۱-مرتبه‌نی قاییدانمارام، سانیردین قانادیم یوخ چاتا بیلمرم؟ یانینا قونورام بیرآزجا چکیل؛ آچیل پنجره‌نی چیخیب باغلارسان.

#نثر
#حیکایه
#ریوایت
#سیال_ذهن
#سورئالیزم
______________________________________
@Atilla_hajizade
@Atilla_hajizade

آتیلا حاجی زاده

17 Apr 2021 21:27

اؤلولر دیریلمز سن اؤل دئدی
#آتیلا_حاجیزاده

من سؤزومو دئییرم و سن قانمیرسان؛ گل دانیشمایالیم هئچ، آنلاماز، آنلانیلماز، آنلاشیلمازام، باخیشالیم باری گل، گؤزلرین‌دن چؤزوم بلکه هه، گؤزلرین‌دن چؤزوم، باخیش من ایله، منه ایله باخیش، منه باخیش هه منه باخیش، باخیشین‌دان چؤزوم بلکه یاری اؤلو، یاری اؤلوم‌دن قاییتمیش حیصصه‌می...

اؤلومه اوچارکن گئری قاچدیم هه، اؤز آرامیزدا قالسین آما قورخونج‌لاردان قورخدوغوم، قورخوم‌ اؤز آرامیزدا قالسین، ائهئی قورخوم‌ هئی اؤز آرامیزدا قالسین قورخوم، قورخوم گؤزلرین‌دن، قارانقولوق‌دو قورخوم، قارانقولوق‌دو قارانقولوق، قارانلیق دئییل‌سه ایشیق‌دا دئییل بو گیزلی قبرستانلیق.

قاپی‌دان ایچری کئچدیم، قدیم حیطیمیزده‌کی قیرمیزی آلچا آغاجی‌نین آلتین‌دان سسه قاچدیم، حیط‌دن دهلیزه، دهلیزدن یئنی آچیلان قاپی‌یا قاچدیم، یئنی آچیلان قاپی‌‌دی قورخوم؛ بیردن-دوققوزا ساییب ائندیم، دوققوزدان اونا چاتمایان پیلله‌دن‌دی قورخوم.

دوققوز پالیچیق یاریم سیلیندیریک دیکیلدی اؤنوم‌ده، ال آتیپ دسته‌یه صاندیغی چکدیم؛ آچدیم قاپی‌نی قوخلادیم، یئنی آچیلان قاپی‌دی قورخوم، دوققوزدان اونا چاتمایان قاپی‌دان قورخدوم. دانیش‌دی اؤلن حیصصه‌م، قانمادی اؤلوم‌دن قاییدانیم، نه‌دیر سوروشدوم، بو نملی قبریستانلیق نه‌دیر؟-آغاران قارا گؤزلرینه باخدیم، باخیشدیم سن ایله، باخدیم، باخیشین دئییل قورخوم، گؤزون‌دن قورخمادیغیم‌دان قورخدوم.

اؤلولر دیریلمز سن اؤل قیشقیریر، قورخونج‌لاردان قورخوم، اؤلومه اوچارکن قاییدیب سسه قاچدیم، سس‌دن قدیم حیطیمیزه، دهلیزدن سسه قاچدیم،  یئنی آچیلان قاپی‌لاردان اؤلومه قورخوم، اؤلوم‌دن قاییدانیما، دیریم‌دن اوله‌نیمه قورخوم.

اؤزوم چکیشیر، بره‌کیشیر منیم، اؤلوم اؤل دئییر؛ دیریم، دیریلسن یاشاریق، من سؤزومو دئییرم و سن قانمیرسان گل دانیشمایالیم هئچ، باخیشالیم. اؤل دئیه‌نیمه یاشا، دیریمه اؤل میزیلدادین، دیسکیندیم باغریتینا، بوزاران گؤزلرینه دیسکیندیم. ساعاتیم اونا چاتدی، دوققوزوم سنه، آنلاتدی باخیشین قانمادی اؤلوم‌دن قاییدانیم، قاندیرماغا چالیشدی اؤلوم، راضی‌لاشمادی دیریم، سن منی سئویرسن اؤل دئدین، سنی منی سئویرسن دیریل دئدی، چئوریلدی گؤزلرین اؤلولر دیریلمز سن اؤل دئدی...

#نثر
#ریوایت
#سیال_ذهن
__________________________________
@Atilla_hajizade
@Atilla_hajizade

آتیلا حاجی زاده

20 Feb 2021 18:48

سن منی بوراخیب، دوشنده یولا
نه گونش قارالدی، نه یاغیش یاغدی
چاخماغیم بیر سیغار آلیشدیرارکن
قهریم دیرماشیب، گؤزومو ساغدی

سئوگیلی گونلرین خاطیره‌سینی
نه راحات بوراخدین آی آغرین آلیم
نه ارکن اونوتدون، نه ارته داندین
یادیندا دئییل‌می یادینا سالیم:

"خیامین داریشلیق کوچه‌لرنده
باخیشلار بیر بیرین قوجاقلادیلار
او قدر اؤپوشدوک دال کوچه‌سینده
کؤوره‌لیب دوداقلار قان آغلادیلار"

ایشیق‌لار سؤنرکن، سانکی بورویور
ساحیلی پارکی‌نی، کدرلی آنلار
نئچه ایل برابر آددیملاساق‌دا
بیزی تئز اونوتدو بو خیاوانلار

بو شهر آلچاق‌دیر، دئمیشدیم سنه
نه قالیب‌سا بیزدن، اوزوندن سیلر
کوچه‌سی گیزله‌در، اؤپوش‌لریمی
سئوگیمی سوپورر، سوپورگچی‌لر

سانیردیق پای وئریب بیزی بیر-بیره
توپوروم بو شهرین سئوگی پایینا
منه سندن قالان بیر اوزوک‌-اولدو
اودا قیسمت اولدو، شهر چایینا

آه ندن گؤرمه‌دی گؤز یاشلاریمی
بیلمیرم بو شهر سارساخ‌می، کورمو...
یازین تابلولاردا بورانین آدین:
یاریم سئوگی‌لرین شهری اورمو

شعر: #آتیلا_حاجیزاده
سس: #جابیر_پورباقری
_______________________________
@Atilla_hajizade
@Atilla_hajizade
@Raviyik
@Raviyik

آتیلا حاجی زاده

17 Nov 2020 19:38

‍ کور اولموشام دئیه‌سن کؤلگه‌می زوران گؤرورم
نقدری گؤز تیکیرم چئوره‌ده دومان گؤرورم

یئنیلمیشیک گئجه‌نین قاپ-قارا قارانلیغینا
بو ظولمتین سحره وارماغین گومان گؤرورم

دئشیک-دئشیک دئشیلیب‌دیر الیم، قولوم، آیاغیم
یولون قاریش-قاریشین‌‌دا سیریق تیکان گؤرورم

بو یئرده تاپماییرام سیز دئیه‌ن ملک‌لردن
بیاض گئییم‌لر ایچینده اورانقوتان گؤرورم

دئدیز وطن گتیریب‌سیز بو دوستاق ایچره آما،
اؤنومده آچدیغینیز توربادا سیچان گؤرورم

دئدیز سحر، دئدینیز گون، باغیردیز آزادلیق
سیزین آزادلیغیزی بیر تزه پالان گؤرورم

آیا؟ گونه؟ سحره؟ آخ... کیمه گوونملی‌یم
باخینجا دسته‌ییم ایچره قارا ایلان گؤرورم

ائهی کوچه، خیاواندا آزادلیغین باغیران
دوورلارین سینه‌سینده ندن‌‌دی قان گؤرورم؟

گئری دونوب دئیه‌سن تاریخین واراق‌ واراغی
باخینجا نیزه باشین‌دا یئنه قوران گؤرورم

قیفیل‌لادیز بیزی آلچاق دوشونجه‌لر کولونا
بوتون کیتابلاریزین ساغ-سولون یالان گورورم

بیراز کناردا گزین هر زامان‌ گؤرنده سیزی
اؤنومده شاعیر یوخ بیر دابان سوران گؤرورم

بیراز کناردا گزین آلچاق اوغلو آلچاق‌لار
آغیز دولو قوسورام سیزلری هرآن گؤرورم

بیراز کناردا گزین آخ... بیر ایش چیخارداجاغام
یاواش-یاواش قیلیغیزی اویان-بویان گؤرورم

◼

چوخ ایچمیشم دئیه سن کئفلی‌یم باغیشلایاسیز
اؤنومده‌کی کاغاذین خط‌لرین زوران گؤرورم

#آتیلا_حاجیزاده
#قانلی_آبان
قیش-۹۶
__________________________________
@Atilla_hajizade
@Atilla_hajizade

آتیلا حاجی زاده

11 Oct 2020 10:16

غزل:

سحر چاغی شهرین باغری سانکی قاندی باجی
قاریش-قاریش کوچه‌میز مینلر آغلایاندی باجی

بوغازلارا ساریلان ایستی مرمیلر قاطاری
بوغازدان آیریلانان ایستی قاندی، جاندی باجی

دومان بوروندو بیزه، سنگری ییخیب یاخدی
عکیزلرین یئرده...
یوخ...
الیم ده یاندی باجی

ّ سحر چاغی اؤلومو گوللـه‌لر اویاندیردی
دئشیک-دئشیک دئشیلن کؤکسوموز تالاندی باجی

اؤلوم آخیردی بیزی آلتینا چکیب ییخسین
ییخیلدی دوسلاریمیز صبریمیز جالاندی باجی

الیمده سولمادی آه... وئردیین قیزیل گوللر
آیاقلار آلتینا دوشدوکده تاپدالاندی باجی

نه قول قالار نه آیاق گؤوده‌میز ایتیب بیته‌جک
گلن صاباحلارا تک بیر پیلاک قالان‌دی باجی

اولوب-قالان دیکیلیب دیر، بیتن زامان‌دی باجی
الیم قولوم قورویوب گؤزلریم دومان‌دی باجی

#آتیلا_حاجیزاده
پاییز-۹۵

پ.ن: شهید عسکر «علی بیرامی»-نین باجی‌سی ایله چکدیردی‌یی شکیل.
پ.ن: اوتانیم یئرینه آی اوتانمایان
______________________________
@Atilla_hajizade
@Atilla_hajizade

آتیلا حاجی زاده

28 May 2020 19:02

آدینی سئچمه‌دییم حیکایه‌دن بیر ائپیزود
#آتیلا_حاجیزاده

اوزریمه دوشن ایشیق‌دان قاچیردیم، آنجاق او پئشیمی بوراخان دئییل‌دی. صحنه‌ده یالنیز دایانان آرتیستین اوزرینده گزن وکتور کیمی آرخامجا گلیردی. آنجاق بو "منم" نه بئینیم‌دن کئچن مونولوقوم نه‌ده دیالوق قوراسی کیمسه‌م یوخ قارشیمدا. اوزاق‌دان چکیجی اولسام‌دا، یاخین‌لاشدیغیندا، باشقا زیبیل‌لرله فرقیم اولمادیغینی گؤره بیلرسن.

ایشیغی‌دا، قارانلیغی‌دا منم دئدی صاندیق‌داکی اؤلو، آمما سن‌کیم‌سن؟ اووجومو سویا دولدوروب اوزومو ووردوق‌دان سونرا باشیمی قالدیردیم.

-گؤزله، گؤزله

ترمز، ماشینین لاستیک‌لری‌نین یئر اوسته چکیلمه‌سی‌نین قیژیلدی‌سسی قولاغیمدا، خیاوان اورتاسینداکی آغ خط‌لرین قیرمیزا بویانماسی گؤزلریمده دونوب....

-گؤزله، گؤزله
یئنه....

منده سنین کیمین اؤلمه‌یه بیلردیم آنجاق اؤلمه‌میشدن اؤلومو یاشاییم دئدیم ان آزی بیر دؤنه.
-آما ساری‌شین صیفتی بوزاران صاندیق‌داکی اؤلو
-یاهمالاما بسدی
-بو آینادی یا شکیل؟
صاندیق‌داکی اؤلونون گؤزلرین کیم چیزدی بورا؟
دالیم دووار، اؤنوم دووار، ساغ-سولو کیم باغلادی؟ قدیم حیطیمیزده‌‌کی قیرمیزی آلچا آغاجی بار گتیریب، بو آینادی یا شکیل؟ سنی کیم چیزدی بورا؟

زیبیل اولساندا فرقلی زیبیل اول باری سسلندی صاندیق‌داکی اؤلو. تاختا قاپی‌نی کیمسه آچا بیلرمی؟ قیرمیزی آلچالاری کیم آیاقلاییب؟ ساری‌شین سنی کیم چیزدی بورا؟ بو اؤلودو یا دیری؟

ایشیغا دئه چکیر یا چکیم یئرین‌دن قوپاردیم؟ ایشیغا دئه چکسین. دئه چکیل‌سین، اوز به اوز دن گلیر. او چکمیر سن چکیل ایشیق‌دان.

-گؤزله، گؤزله
یئنه....

__________________________________

@Atilla_hajizade
@Atilla_hajizade

آتیلا حاجی زاده

25 Oct 2019 21:06

هله‌لیک بیلمیرم نه ائتملی‌یم
اوزریمده پاییز داریخماسی وار
یئل اسیب اوینادیر سوموک‌لریمی
بئینیمی دولدوروبدو بوشلوق‌لار

بو حیات یوخلوغون گؤرونتوسودو
من‌‌سه بو یوخلوغون وار حیصصه‌سی‌یم
اصلینه باخسانیز بو هئچ بو هدر
منده بیتمیش من‌ ایله‌ده باشلار

هئچ تانیش گلمیرم اؤزوم، اؤزومه
چیخیرام یوللاری، قاچام من‌دن
قاچیرام دوشمه‌سین گؤزوم اؤزومه
آینالار چئوره‌مه چکنده حاصار

...آینالار چئوره‌مه چکنده حاصار
قاچاجاق یول تاپانمادیم اورادان
یوللارین‌دا یالانلیغین بیلسم
بیلمه‌دیم آینا، آینادیر یا دیوار

...آینالار چئوره‌مه چکنده حاصار
اؤزومون قارشی‌سیندا دورموشدوم
و باخیردیم او آن اؤزوم، اؤزومه
گؤزلریمده بولود، ساچیمدا قار

چیخمیشیدیم اؤزوم‌دن، آنجاق‌کی
اؤزومون قارشیسیندا دورموشدوم
یالواریردیم او آن-اؤزوم اؤزومه
منی اؤلدور یا بیر تهر قورتار

ال-آیاق ایله سیندیریب تؤکدوم
پنجره‌دن تولازدیم ائشییه
خیاوان‌لار من ایله دولدو بیرآن
سحر اولجاق، شهر بونو آنلار

...سحر اولجاق، شهر بونو آنلار
بیری‌سی منلییین سپیب‌دی چؤله
و صاباح بیر شهر قاچار من‌دن
و صاباح بیر شهر منی دانلار

هله‌لیک بیلمیرک نه‌یم نه‌چی‌یم
کئفلی بیر ساوچی‌تک ساییقلاییرام
بو سحر کابوس-ون بیریز بیتیرین
منی کیم گؤرسه بیر جونونلو سانار

ییخیلیر عقربه چؤکور، گئجه‌نین،
خئیری بیتمیش‌ایکن قالیب شرری
اوتاغیم‌دان آذان چکیلدی بایاق
و بیراز سونرادا خوروز بانلار

.



صاباح اولموش، ایتیرمیشم اؤزومو
هله‌لیک بیلمیرم نه‌یم، نه‌چی‌یم
اوستومه گلمه‌یین آ یولداش‌لار
هله‌لیک بیلمیرم نه ائتملی‌یم

ائوده قالمیش آیاقلاریم، آنجاق
گؤزلریم سومسونور کوچه-باجانی
اللریمی ایتیردیییم گون‌دن
قولاغیمدا بیری دئییر منی سار...


#آتیلا_حاجیزاده
#یئنی_غزل_چارپارا
#غزل_چارپارا
______________________________
@Atilla_hajizade
@Atilla_hajizade

آتیلا حاجی زاده

06 Nov 2024 15:22

گئجه‌نین بوز چاغی‌دیر،‌ گئت-گئده ایتلر اولاشیر
قوجامان دونیا گؤزومده اه‌رییب، خیردالاشیر

الی باغلی، دیلی باغلی خیاواندا گزیریم
نه یازیق کی هره بیر جور سینه‌سیندن آلیشیر

گئجه‌نین خان چاغی‌دیر، گؤی دئمه دئ قان چاناغی
قاپ-قارانلیقدا اؤلوم کؤلگه‌میز ایله ساریشیر

لئش یئیه‌ن‌لر شهرین هندورینده ییغیشیب
ایچکی چاققیشدیراراق ایت‌ ایله چاققال باریشیر

قورخولوقلار دیکیلیب‌دیر خیاوانلار بویوجا
قاپی‌دان، پنجره‌دن ائولره دئولر یاناشیر

هاواسین قان-قوخو آلدی بو وطن آدلی یئرین
الیم هر بیر طرفه ده‌یسه کثافت بولاشیر

گولله‌لر ییخدی یئره عصریمیزین عاصی‌لرین
اوخشاما قایناییر، عیصیان کوچه‌دن شهْره آشیر

قاتی ساللاخ‌خانایا دؤندو بو اؤلکه ائله کی
هر اوباشدان‌ وده‌سی بوینوموزا ایپ دولاشیر

الینی وئر الیمه، دوش یولا، سیل اوز-گؤزونو
او قدر آغلامیشیق گؤز یاشیمیز آرخا داشیر

سؤزون ان قیساسی دوستوم سن اؤزون سال-چیخ ائله
ان جاوان چاغدا آخی ساچلاریما دن یاراشیر؟

#آتیلا_حاجیزاده
@Atilla_hacizade
@Atilla_hacizade
______
پاراگراف
@paragraph
@paragraph

آتیلا حاجی زاده

24 Oct 2024 14:24

قرار درنه‌یینین ۱۰۸-اینجی نؤوبه‌سین‌دن قیسسا راپور/ایکینجی بؤلوم

حبیب ساهیر حاققیندا قورولان اوتوروم‌دا/محمد صوبحدئل:
ساهیر تئوریک آلقیلارینی آذربایجانلاشدیریب، یئره‌ل ورژن سونوردو.
#آتیلا_حاجیزاده

نیه‌کی ساهیر، آذربایجانین آز تانینمیش شاعیر-تئوریسیینی «میرزا تقی رفعت»-ین چئوره‌سینده قورولان «فارسجا و تورکجه یئنی شئعر» قاورامینی داشایان پلاتفورم‌‌دا، ائییتیلمیشدیر‌.

میرزا رفعت-ین ائتگیسینده اولان حبیب ساهیر سونرالار ایستانبول‌دا تحصیل آلیب، تورکجه ادبیاتین آنادولو حیصصه‌سینی‌ده، آذربایجانین، هم دیوان ادبیاتی همده آشیق ادبیاتینی درین‌دن اوخودوغو کیمین موطالیعه ائتده‌رک، تورکیه ائله‌جه دونیا ادبیاتیندان گتیردییی دیل ایجراسین، سؤزجوک آلانی، فورم ایله تکنیک‌لری «آذربایجانلاشدیریب» اثرلرینده سونموشدور.

میللی حؤکومت سونراسی اونون میراثینی منیمسه‌یه‌ن حبیب ساهیرین یارادیجیلیغینا «حسرت» پرسوناژی آرتیلیب، داهاجا آذربایجانلاشماغی وورغولادی؛ ائله‌جه دیل قاورامی باره‌سینده فرقلی جیددییت گؤستریب، ۱۹۷۹-اونجو ایلده آنا دیلی حاققیندا چاپ اولان اثری، آذربایجان ادبیاتینا درین باخیشی همده «شعر دن حیکایه‌یه، تئوری دن پراتیک ایجرایا» قدر یارادیب سوندوغو اثرلرین کناریندا  اونون آذربایجانین دیل، کولتور، مدنیتینه قارشی اوره‌تیلن دهشت آتموسفئرده پئشه‌کار آرتیست قامتینده هونه‌ر یارادیب، آذربایجانلی مودئرن ادبیاتی سیمگه‌لییب ساووندوغو، ساهیری داها یئترلی تانیماق اوچون سایقین اؤرنکلر ساییلیرلار.

حبیب ساهیر دوشونجه آلانین‌دا‌ مودئرنلشمه‌نی اؤنریب، مشروطیت‌ دن میللی حؤکومته قدر دوام ائدن موجادیله‌ ائتگیسین‌ آنلاییب، آکتیو  تاریخین باشلانیشینی راکئد ادبیاتین سونو آلقیلاییب وورغولاییردی.

سون سؤز اولاراق یئنی گنج دئکلمه‌تور «یاسمین بخشی»-نین حبیب ساهیردن ایفا ائتدییی شعرین سون بئیتی تکرارلایاراق راپورو بیتیریرم:
یالتاق شاعیر یولون آزسین
تکجه فارسی غزل یازسین



۱) حبیب ساهر (۱۹۰۳/۱۲۸۲ - ۱۳۶۴-۱۹۸۵) تباری میانالی، تبریزده دونیایا گلمیش شاعیر، یازیچی و چئویرن. حبیب ساهر آذربایجان تۆرکجه‌سینین یئنی شعری‌نین آتاسیدیر . اوْ بوتون ایراندا اوْلان دیللرینده‌ده یئنی شعر آتاسی کیمی ساییلیر.


پ.ن: حبیب ساهیرین اؤلومون‌دن ۴۴-۴۵ ایل کئچدیینه رغما آدی، اثری همده دوشونجه‌سی آذربایجان میللتلشمسینده درین ائتگی بوراخدیغی اوچون سلطنت طلب‌لرین فرقلی چئشیدلرینین (ایرانشهری، پان فارس، پان ایرانیست، نایاک ایله ساییر...) آراسیندا اؤرگوتله‌شن فاشیست‌لر هله‌ده ساهیرین آدین دویدوقدا قاشینما توتوب، گؤتلرین میخ ده‌لیرمیش کیمی صاندال‌دا ویرنیخمالارینا ندن اولور؛ بو لمپن پوروواکاتورلار اوتوروم سونراسی سوسیال مئدیا‌دا اوشاقلیق عوقده‌لرین بوشالتماغا جهد ائدیرلر؛ یازیقلار..‌.

ـــــــــــــــــــــــــــــــــــــــــــــــــــــــــ
@Atilla_hacizade
@Atilla_hacizade
#پاراگراف
@paragraph
@paragraph

قرار درنه‌یی
@gharar_poet
@gharar_poet

تحکیه درنه‌یی
@tahkie
@tahkie

آتیلا حاجی زاده

16 Sep 2024 22:34

.
صاباح تحکیه درنه‌ییمیزده (سعادت آختاریشیندا) آدلی یئنی حیکایه‌م جمعی اوخونوش سونراسی صؤحبته قویولاجاق، بو ائلان واسیطه‌سی ایله یولداشلاریم‌دان دعوت ائدیرم بو اوتوروم‌دا ایشتیراک ائتمک ایله باخیشلار و تنقیدلرینی اسیرگه‌مییب، یاردیما گتیرسینلر.

_

🔹تحکییه ادبی درنه‌یی(473-جو جلسه)
🔹اوخونان اثر:
🔹 سعادت آختاریشیندا – آتیلا حاجی‌زاده
🔹ایران(تورک) ادبییاتی
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 27 شهریورماه 1403
🔹ساعت:17-19:30

#ادبییات #آذربایجان_تورکجه_سی #آذربایجان_چاغداش_نثری #داستان #مودئرن_نثر #تحکییه #اورمو #آتیلا_حاجیزاده #ایران_تورک_نثری #حئکایه #تورک_نثری
__
@Atilla_hacizade
@paragraph
@tahkie

آتیلا حاجی زاده

28 May 2024 21:30

.
‍ کور اولموشام دئیه‌سن کؤلگه‌می زوران گؤرورم
نقدری گؤز تیکیرم چئوره‌ده دومان گؤرورم

یئنیلمیشم گئجه‌نین قاپ-قارا قارانلیغینا
بو ظولمتین سحره چاتماغین گومان گؤرورم

دئشیک-دئشیک دئشیلیب‌دیر الیم، قولوم، آیاغیم
یولون قاریش-قاریشین‌‌دا سیریق تیکان گؤرورم

بو یئرده تاپماییرام سیز دئیه‌ن ملک‌لردن
بیاض گئییم‌لر ایچینده اورانقوتان گؤرورم

دئدیز وطن گتیریب‌سیز بو زیندان ایچره؛
آما
بولار پیشیک دئیه‌نی من نیه سیچان گؤرورم؟

آیا؟
گونه؟
سحره؟
هانسینا گوونملی‌یم...
باخینجا دسته‌ییم ایچره قارا ایلان گؤرورم

بیراز کناردا گزین زهله‌کار قوماربازلار
آغیز دولو قوسورام سیزلری هرآن گؤرورم

دونوب گئری دئیه‌سن تاریخین واراق‌ واراغی
باخینجا نیزه باشین‌دا یئنه قوران گؤرورم

گئجه،
گونوز،
خیاواندا آزادلیغین باغیران
دوورلارین سینه‌سینده ندن‌‌دی قان گؤرورم؟

بیراز کناردا گزین
آخ...
بیر ایش چیخارداجاغام
یاواش-یاواش گؤزومه چوخ اویان-بویان گلیسیز...

◼

چوخ ایچمیشم دئیه سن کئفلی‌یم باغیشلایاسیز
اؤنومده‌کی کاغاذین خط‌لرین زوران گؤرورم

#آتیلا_حاجیزاده

آ.ی: بو غزل ۹۶-دا یازیلیب بوگون جیددی بیر ائدیت، پالاییش، حذفییات‌دان سونرا، قوللوغونوزا سونولور.
________
@Atilla_hacizade
@Atilla_hacizade

آتیلا حاجی زاده

03 May 2024 17:52

.
داغیلمیشام مله‌ییم داغلارین بولاق‌لاری‌تک
دونن طوفان داغیدان دفترین واراقلاری‌تک

گونش دومانلی شهردن کوسوب گئدن چاغ‌دان
لال اولموشام شهرین سس‌لری، سوراقلاری‌تک

توکه‌نمیشم قاداسی، قالماییب گلیب-گئده‌نیم
کاسیب محلله‌لرین کؤلگه‌سیز دوراق‌لاری‌تک

باخاندا گؤزلریمیز گؤینه‌ییر، یانیر؛
قاماشیر
یاغیش‌دا ساحیلی‌نین چیرپینان چیراق‌لاری تک

کوته‌لمیشم دئیه‌سن، یوخ داها کاریم-کسه‌ریم
یالانچی اینقیلابین پاسلانان اوراقلاری‌تک

یادیندا ولوله‌لی شاللاق اؤلدورودو منی
دابانلی باشماغی‌نین تاق-تاراق، تاراقلاری تک

ائهئی سیزه یازیرام ساختاکار تومانچاق‌لار
قوخوز گلیر بازارین چیهلی موستاراق‌لاری

باش آغری ژئست‌لریز قوسدورورب وئریر یوخویا
بیزیم بو مرکزین آدسیز-اوجوز آراقلاری‌تک

#آتیلا_حاجیزاده


آ.ی: ۹۷ ده یازیلیب آنجاق پایلاشیلمامیش بو غزلی، یئنی ائدیت و جیددی پالاییش‌دن سونرا حوضورونوزا سونورام.

ساحیلی: اورمونون شهرچاییندا یئر توتان پارک آدی.

مرکز: اورمونون مرکز مئیدانی و بازار آغزی ائلجه خیلاف‌ دان ثوابا، عاقلینیزا گلن هرتورلو ایشین یاپیلدیغی بیر یئر.

___
@Atilla_hacizade
@Atilla_hacizade

آتیلا حاجی زاده

15 Dec 2023 19:38

.
کئچمیش دیلک‌لرین آراسین‌دان بوشالمیشام
ییرتیق-یاماقلی، آج-یالاواج یولدا قالمیشام

آرتیق الیمده‌دیر داها آغ تئللرین سایی
تئز-تئز گتیرمه‌یین اوزومه کی قوجالمیشام

واللاه نقدری آختاریرام گونده،
بئینیمه-
گلمیر قولومداکی گوجومو هاردا سالمیشام

بیر کیمسه‌لردن آتدامیشام، یولدا قویموشام
نم کیمسه‌سین آیاقلامیشام ، هن؛ یاهالمیشام

داغ‌دان قاچیرلار اوستومه بیر کلمه کسمه‌دن
بیلمم کی هانسی‌نین نه‌یینی ال‌دن آلمیشام

بو شاعیری ایتلر یئتیریب‌دیر بو گؤرکمه
زیندان قارانقولوقلاری قدری قارالمیشام

بیر باخ؛ بو اؤلکه‌ده خیاوانلار کیلیدلی دیر
گؤر کیملرین محاصره‌سین‌دن دارالمیشام

آنجاق یئریمده‌یم، آما آرتیق یئریم‌ده‌یم
هر یئرده اولموشام، وارام هاردان قوولموشام

کیمدن نه دویدون اویما، ائشیتدین اینانما کی
عاصی‌‌لرین یولوندان آزیب، عاقیل اولموشام
.

نه قاچمیشام ساواش قاباغین‌دان نه قورخموشام
یالنیز سیزین مجادیله‌لردن یورولموشام

#آتیلا_حاجیزاده
__
@Atilla_hacizade
@Atilla_hacizade

آتیلا حاجی زاده

01 Aug 2023 21:11

ایت صاحابین تانیمایان یئرده
بیر یوخ
مین پیغمبر دوغولدو گؤتو گئنلر طایفاسین‌دان
اوستومه ایت اسنه‌دی
گلمز دئییردیم، گلدی آما
گیرمه منه سسلدیم گیرمه‌ییم سنه
یوخ
گیرمه منه گیردیریم سنه
حیان یوخ دئدی گؤزلرینی سوزدورن قانجیق

آلنینین قیریشلارینی سوسدور
قاچماق، تنهالیق و اؤلوم‌دن سونرا
اولولرله دلی‌لردن آزار گلمز باغیردیم
خیلقتین گوناهین یویا بیلرسن دئدی گؤزلری‌نین قوراسینی سیخانلاردان بیری،
اؤلومله قومار اویناییب قازانسان اه‌یر

الی قولاغیندا قاچیردی دلی‌
کیمدی سنی بورا آزدیران سوروشدوم
دده‌سینین اهلت داشینا نهلت،
هله مین نهلت دئدی
بیزیم یئرده کؤرپه‌لر آنادان یاشلی دوغولور،
ایت ایییه‌سین قاپان یئرده حیاتا اؤلوم
قورد چؤره‌یه هورن یئرده ایسه اؤلومه حیات
همده دوغولان اویناشلی دوغولور
گل بیرازدا اؤلوم یاشاما عیناد
گل شیطانا سجده قیل
تانری‌یا داش آت
قارقیشا قار یاغماز اینان
نامازا یاغیش
دوداغین قورویوبسا گؤزومو ایسلات
تانریلان؛
دارالسین گؤتو گئن ساوچی


قاچماق، تنهالیق و اؤلوم‌دن سونرا
کئچیلمز اولدوقلارینا شوکوره گلمیشدی‌لر
بئلی سینان کؤرپولر
الی قولاغیندا اویان بویانا قاچیردی دلی‌لردن بیری
اویان-بویانا
قوی ووروم قانا بویانا
قویسام وورانمازسان دئدی دوستوم
ووردوم بویاندی آما

ایلک سنی سئودیم؛ ایت صاحابین تانیمایان یئرده
سونرا سنی
یئنه سونوندا سنی؛ اؤزومده آختارماغا نه گرک؟
آزار گلمز دئییردیم؛
گلدی آما سن قایتار باری
جانیم‌دان تکجه بیر جاناوار قالدی
یارالی
ائوین‌دن دیدرگین
جیلدیم‌دن آرالی
خاطیرلادی منی چؤره‌یه هورمه‌ین
سو یئرینه قورخو آخیر سسلندی
قومارا یوبانماسایدیم
اودوزسایدیم بئله، قانا قالمازدیم دئدیم...

#آتیلا_حاجیزاده
____
@Atilla_hacizade
@Atilla_hacizade

آتیلا حاجی زاده

20 Apr 2021 21:17

.
کوچه‌ده ایلدیریم چاخیر، گئجه‌دیر
گون چیخان‌دان بیراز ساعات اؤتوشوب
نئچه ایت گولله‌لندیلر قاپی‌دا
بیری‌نین نعشی پیلله اوسته دوشوب

نئچه ایت گولله‌لندیلر منده
قانلاری گؤزلریم‌ده فیشقیردی
اوباشین‌دان محله‌نین بیر آنا
ساچلارین یولدو، سونرا قیشقیردی

گؤزلرین یومدو، گؤزلرین آچدی
جاناوارلاندی گؤزلریم بیرآن
ساحیره هامی‌یا قنیملندی
مئشه‌یه دؤندو قاپ-قارا خیاوان

قارقالار دیمدیک آتدیلار بلکه
باغلییب‌لار دونن ساری کفنین
سنه دؤندوم‌ده، کئشکه دؤنمزدیم
ساری‌شین، گؤزلرین نه اولدو سنین؟

چیغیریردیم بیری منی تاپسین
دون گئجه ایتمیشم قوجا شَهَری
من ایتیلمیشدیم آمما سن گؤردون
هارا یاغدی بولودلارین قَهَری

گؤزلری اوتقونوردو گؤزلریمی
اللری خط سالیردیلار اوزومه
بوغازیم دیشلرینده دوستاقکن
نه اولوب؟
سسلنیردیم اؤز-اؤزومه

دئدی‌لر توپلانین سحر باشینا
جاناوارلار دیلک‌لرین دیله‌سین
سونو گلمز قارانقولوق گؤزلوم
هاردا سالدین او گؤزلرین گیله‌سین

قارقالار دیم-دیک آت‌دیلار بلکه
آتلاری سویدولار گون اورتا چاغی
لئش‌لری تؤکدولر قازانچالارا
قاینادی قاینادی سپیلدی یاغی

آرخلار ایچره پوخ-پوسور قوخوسو
لئش یئه‌ن‌لر اوچوردولار یوخاری
تانری هانسی قادین‌لا باش-باشا دیر
تانری‌نین هارداسا ایتیب چیخاری

ایت‌لرین نعشی پیلله اوسته دوشوب
تؤلکولر ائولری دئشیر-داغیدیر
بئنیمه قان دولوب، قارالتی دولوب
قورخودان رنگیمیز آغ-آپباغی‌دیر

کوچه‌ده ایلدیریم چاخیر، گئجه‌دیر
گون چیخان‌دان بیراز ساعات اؤتوشوب
اویاغام، آمما قاتمیشام یوخومو
جاناوار نعشی تاختیم اوسته دوشوب

کوچه‌دن بیر نئچه ساعات اؤتوشوب
سونو بیتمز قارانقولوق گیله‌لر-
دوشوب آسفاتین اوستونه،
ییغیشیب
قارقالار بیر یئره
منه گوله‌لر

قارقالار گولدولر منه ساری‌شین
تولکولر سویدولار منی ساریشین
جاناوارلار دولوشدولار اوتاغا
ال آتیب دؤیدولر سنی ساریشین

گئجه‌نی تؤکدولر شهرچایینا
سؤکدولر قیرجانان دانین گیله سسن
یاهالیب بئینیمین قاریش-قاریشی
قوردلار آغلار قویوب چَنین لله‌سین

ساچلارین یولدو، سونرا قیشقیردی
یاخاسی دئولرین الینده‌یدی
بیری‌سی ال آتیب چیخاردی گؤزون
دیش‌لری بوینومون دیبینده‌یدی

تانری‌نین هارداسا ایتیب چیخاری
بؤلوشنده اؤلوم دوشوب پایینا
هر سحر پیلله‌دن ائنیر یوخاری
اوجالاردان قوسور شهر چایینا

اوجالاردان قوسور شهرچایینا
ائولره آخدی چایلارین آخاری
موندارا چکدی‌لر کوچه باجانی
تانریمیز پیلله‌دن ائنیر یوخاری

ایت‌لرین لئش‌لری دوشوب جانیما
جانیم ایتلری دیدیر داغیدیر
قالدیریملار چکیشدیر منی هئی
گئجه‌نین تقویمینده قان چاغی‌دیر

بیر قادین قیشقیریردی بئینیم‌ده
گؤزو قان، آغزی قان، دوداقلاری قان
بئینیمه قان دولوب، قارالتی دولوب
قولاغیمدا بیری دئییردی اویان

اویاغام، آمما قاتمیشام یوخومو
گون چیخان‌دان بیراز ساعات اؤتوشوب
کوچه‌ده ایلدیریم چاخیر، گئجه‌دیر
گؤزلرین تاختیمین دیبینده دوشوب

#آتیلا_حاجیزاده
#چارپارا
#عروض
__________________________________
@Atilla_hajizade
@Atilla_hajizade

آتیلا حاجی زاده

18 Apr 2021 21:29

ناری ائله سویمازلار دئیه‌ردی آنام
#آتیلا_حاجیزاده

ناری ائله سویمازلار دئیه‌ردی آنام، جییه‌رینی سؤکوب قانینی تؤکمه‌یین بالا؛ قانی گؤزلریمده گزیر آما اللریمه باخ، ایلک اؤپوشون نشه‌سین‌دن قیرمیزی‌لایان اوتانجاغیم ایلک گوناهیم سسلیه‌ردین هه؛یاغیش یاغدی سادجه هئچ نه باش وئرمه‌دن آما تیترک چنه‌مله سئویرم دئدیم، تیته‌رک اللرینله گئدیرم دئدین، اؤلمه‌دیم آما...

گونون گون اورتاسیندا اؤلوم گؤزونه؛ ناری ائله سویمازلار دئیه‌ردی آنام، هئچ نه باش وئرمه‌دی نه بیله‌یدیم آما هئی کؤهنله‌ن درین یارام؛ گلمزسن دئشیب دوزلایاجاغام هر گئجه-سحر دئدیم اینانمادان کیم چیغیردی کیم سسله‌دی باخمادین اونا.

ناریم سسله‌یر قارا گؤزلوم اؤلوم گؤزونه ناری اینجیتمزلر آما، جیه‌ریمی سؤکوب تؤکمه قانیمی اؤلورسم بئله اوزولمه یاراما، قانیما اینان دئدیم باخمادین نیه؟ اؤزومو تاپدادیم باخمادین دئیه؛ دؤنوم-دولانیم شهری اؤلوم سسینه، سسینه اؤلوم بیرده سسله ناریمی، بیرده سسله دؤنوم گؤزون قاپ-قاراسینا.

قانی گؤزلریمده‌ گزیر اللریمه باخ، بو سحر اللرینی سیخیردیم یئنه قارا دنیزینده بوغولان آنیمدا ساچلارینی قوخلاماق، اؤلوم سسینه بیرده سسله ناریمی، بیرده سسله آسیلیب ساچیندان اؤلمه‌ییم نیه؟ اؤلمه‌ییم نیه؟ نفسین‌دن نفس آلماییم نیه؟ بیر گوناه کیمین سئویرم دئدین، گوناهکن تانرینی سؤیمه‌ییم گلیر، سن یئنه تانریم اول، تانریم اول سئومه‌ییم گلیر صاباحین سحری اؤلوم سسینه، گونون اورتاسیندا اؤلوم سسینه، بیرده سسله ناریمی بیرده سسله گئجه‌دن گونوزه اؤلوم سسینه.

جنت دنه‌سی گیزله‌نیب ایچریسینده؛ ناری ائله سویمازلار دئیه‌ردی آنام، جییه‌رینی سؤکوب قانینی تؤکمه‌یین بالا، قوتسال‌دی ایناندیم اینجتمزلر دئیه، ناریم سسله‌ینده اوچماغیم گلیر اوندان دیر ائله، تانریم‌سان دئدییم اوندان دیر ائله، ناریمی بیرده سسله، بیرده سسله دؤنوم گؤزونه اوندان دیر ائله.

یاغیش یاغیر سادجه هئچ نه باش وئرمه‌ییر آما، بو اولای‌سیزلارین سون دایاسی‌دی نه بیله‌یدیم؟ قان یاغیر گؤیوم‌دن نه اولور اوزولمه گون چیخانا بیر آددیم وار هله، نفسین‌دن بیر ایچیم وئر هله سونرانی سونرایا بوراخماق اولمور هرگئجه هر گونوز آغلادیغیما اوزولمه اؤلورسم بئله، اؤلورسم بئله کیم بیلیر باشقا بیر دونیا اولدو بلکه‌ده، ناریمی سسله، سسله ناریمی اؤلوم سسینه، سسینه اؤلوم، صاباحین سحری، گون اورتاسیندا اؤلوم، بیرده سسله ناریمی، سسله بیرده گئجه‌دن سحره اؤلوم سسینه.

#نثر
#ریوایت
#سیال_ذهن
______________________________________
@Atilla_hajizade
@Atilla_hajizade

آتیلا حاجی زاده

21 Feb 2021 19:31

کارناوال
شعر و سس: #آتیلا_حاجیزاده

آذ آنتولوژی-یه بو لینک‌دن قوشولا بیلرسیز:
https://instagram.com/azantoloji?igshid=m0ninicjf9tx
_________________________________
@Atilla_hajizade
@Atilla_hajizade

آتیلا حاجی زاده

14 Feb 2021 19:30

سحرین اوستونه چیخیب‌دی گئجه
گؤزلریم‌ده بیراز دومان واردی
قان-قوخو قایناشیب‌دی دام‌-دووارا
قالدیریم‌دا اؤلو سیچان واردی

قارا باسدی دوشوب بوگون شهره
قارقالار چئینه‌ییر قولاقلاریمی
آرخادان بوینوما ایلان دولاشیر
قارا قیزلار سورور دوداقلاریمی

قالدیریم‌دا اؤلو سیچان واردی
آددیم-آددیم قارا ایلان سورونور
دام-دووار دیرماشیر قاریشقالارا
باخیرام؛ هرطرف‌ده قان گؤرونور

بوغازیم گؤینه‌ییر؛ قاریشقالاری
گؤزلریم‌دن بیری چؤله تؤکسون
دیرناغین گؤستریر قارا چاققال
ال آتیر بلکه کؤکسومو سؤکسون

قاپی‌دان کارناوال گیریر شهره
یاری چاققال، یاری آدام، یاری ایت
بیری‌سی گؤزلرین تیکیر گؤزومه
اوجادان سسله‌نیر گؤزوم‌دن ایت

شهری ساغ-سولا سفحلنیرم
دؤرد یانیم قویلانیب‌دی قال-ماقالا
لئش‌لری گؤستریب دئییر بیری‌سی
قان یالا، قان یالا، چکیلمه دالا

قان-قوخو قایناشیب‌دی دام دووارا
آیاق آلتیندا پارتلاییر لئش‌لر
قورخولوق‌لار قاراتدیلار شهری
پنجره‌مده تیکیلدی کرپیش‌لر

ال‌لریم میخلانیب آیاقلاریما
دیرناغین آتدی کؤکسومو سؤکدو
بوغازیم گؤینه‌ییر، یانیر، آلیشیر
آغزیما کیمسه قورقوشوم تؤکدو

کوچه‌لر اوسکورور قارانقولوغو
قان قوسور چؤل‌ده هرکسی گؤرورم
لئش‌لرین گؤزلرین قاریشقا دئشیر
قارا قیز سسله‌ییر اؤلوم هؤرورم

ایستکان-ایستکان سوزور مندن
شور دنیز اووجوما دولور قاداسی
باخیرام؛ هر طرف‌ده قورشون وار
قیرجانیر گؤزلریمده قان آداسی

قاپی‌دان کارناوال گیریر شهره
هامی‌دان اؤنده بیر دونوز واردی
تاختین اوستون‌ده بیر قارا چاققال
دیرناغین آتدی کؤکسومو یاردی

نفسیم دار گلیر، بوغونتودایام
هر آغاج‌دان نئچه جسد آسیلیب
نفسیم گلمه‌ییر هوره‌نمییرم
شهرین آغزینا تیکان باسیلیب

سنی یاندیردیلار بیراز اؤنجه
خیاوانلار ایتیب‌دی توستون‌ده
هر قاریش یوللارا اؤلوم سریلیب
قورقوشوم قایناییر گول اوستونده

مله‌ییر موندار اولدولار گئچی‌لر
هورورم گؤزلریمده قان واردی
اولاییر اود-دا یاندی‌لار قوزولار
گؤزلریمده بیراز دومان واردی

بیرینیز قورتارین منی نه اولور؟
بوغازیم گؤینه‌ییر هورنمه‌ییرم
گؤزلریم اوتقونور قارانقولوغو
اؤلورم، هئی اؤلوب، اؤلنمه‌ییرم

هامی‌دان اؤنده بیر دونوز دایانیب
بیر لئشین قورساغین چکیر دیشینه
یاری چاققال، یاری آدام، یاری ایت
بیر اوزون کارناوال سالیب پئشینه

گؤزلریم چئینه‌نیر قاریشقالارا
دیلیمه قان یالاتدی کافتارلار
آرخادان بوینوما ایلان دولاشیب
قالدیریم‌دا اؤلو سیچانلار وار

یومروغون دورمادان دؤیور باشیما
بو قارانلیق‌دا گؤزلریم قارالیر
آیی‌لار هئی آیاقلاییر سینمی
دارلیر هئی؛ نفس یولوم دارالیر

اوزالی قالمیشام یول اوستونده
بوز قابانلار تپیکله‌ییر اوزومو
چئوره‌می آلدی تولکولر سوروسو
قالدیریم‌دا چیخاتدی‌لار گؤزومو

گؤزلریم یالواریر آیاقلاریزا
نفسیم گلمه‌ییر، دیننمه‌ییرم
بیرینیز ال آتیب، آلین جانیمی
اؤلورم، هئی اولوب، اؤلنمه‌ییرم


#آتیلا_حاجیزاده
#یئنی_چارپارا
______________________________
@Atilla_hajizade
@Atilla_hajizade

آتیلا حاجی زاده

03 Nov 2020 20:03

گئجه‌نین نم‌نواختی‌دیر قاداسی
کوچه‌ده یئل اسیر، قارانلیق اسیر
و قارانقوش‌لارین داریخماسینی
شهره یایماغا یامان تله‌سیر

گئجه‌نین نم نواختی‌دیر قاداسی
جاناوارلار هورور، دوغوز اوخویور
بیلمیرم هاردا دورموشوق، آنجاق
شهرین کؤینه‌یی پاییز قوخویور

آددیم-آددیم واراقلانیر خیابان
آددیم-آددیم یولا خزل تؤکولور
گئجه‌لر بیتمه‌ییر آی اوزلوم آما
شهرین گؤزلرینده دان سؤکولور

پاییزین کؤینه‌یی دوشوب شهره
شهرین کؤینه‌یی پاییز قوخویور
قوجا بایقوش اوولداییر هردن
توراتانلار بیزه اؤلوم توخویور

دیل آچیردیم داریخمامی باغیرام
بیری‌سی سسله‌دی؛ دا بسدیر سوس
منی‌ده قورخویا سالیر هردن
شهرین گؤزلرینده‌کی کابوس

شهرین گؤزلرینده‌کی کابوس
گئت-گئده گرچه‌یه دؤنور دئیه‌سن
گؤزلریم قارشی‌سیندا اؤلدوزلار
بیرآن ایچره، اؤلور...
سؤنور دئیه‌سن

بوز ایشیقلار قاماشدیریر گؤزومو
گئت-گئده هریانی دومان گؤتورور
بیر قوجا گؤی اوزونده دوستاق‌دیر
اوسکورور، اوسکورور سورا توپورور

گل گئدک سئوملی قارانقولوغوم
هرکوچه، هرباجا اؤلوم قوخویور
بیر قولاق وئر بو سس‌لره،
باخ بیر؛
جاناوارلار هؤرور، دوغوز اوخویور

کیریخیب آتمیشام زیبیل قابینا
توالت‌لرده قوسموشام شهری
اوزریم‌دن سویونموشام اؤزومو
اوز-اوزوم‌له کیریخمیشام شهری

و قارانقوش‌لارین داریخماسینی
دون گئجه قویلادیم قولاقلاریما
شهره دون گئجه جسد یاغدی
گئجه‌لر لئش دوشور یاناقلاریما

جاناوارلار هورور، دوغوز اوخویور
کوچه‌ده قورخو، قان یئرین‌ده آخیر
گل اؤلک سئوملی قارانقولوغوم
لئش یئه‌ن‌لر بیزه تامارزی باخیر

آددیم-آددیم واراقلانیر خیاوان
آددیم-آددیم یولا جسد تؤکولور
جاناوارلار بؤلوشدورور شهری
پاییزین کؤکسو ییرتیلیر، سوکولور

گؤزلریم هوردو، گؤزلریم هوردو
اؤزومو داشلادیم، اؤزوم هوردو
پاییزین کؤینه‌یی الیمده قالیب
هامی گؤردو منی، هامی گؤردو

شهرین اورتاسیندا اوزلشدیک
بوغازین چئینه‌دیم دیدیشدیردیم
قانین ایچیدیم جانین چکیب سونرا
جسدین چارمیخا ایلیشدیردیم

اؤزومو آتمیشام زیبیل قابینا
لوت قالیب اه‌ینیمه دوغوز گئیدیم
ال آتیب تانرینی یئره سالدیم
اؤزوم ایله اونو ده‌ییشدیردیم

ایچیمی سپمیشم دونن شهره
اؤلو یاغدیرمیشام یاغیش یئرینه
تانرینی دوستاغا سالیب، سونرا
۱۰-گئجه ۱۰-گونوز قان ایشدیردیم

جاناواردا منم، دوغوزدا منم
گؤیه من سرمیشم قارانقولوغو
بیلمه‌دن اولدو بیلمه‌دن اولدو
پاییزی چارمیخا ایلیشدیردیم

بیلمه‌دن اولدو بیلمه‌دن اولدو
من اه‌یر قوشلاری دئییندیردیم
پاییز اؤلموشدو آمما کؤینه‌یینی
شهرین اه‌ینینه گئییندیردیم

#آتیلا_حاجیزاده
#عروض_چارپارا
__________________________________
@Atilla_hajizade
@Atilla_hajizade

آتیلا حاجی زاده

14 Jun 2020 22:33

بیردلی شاختا دونداریر جانیمی
دامیر آسفالتا کوکسوموزدن قان
اللریم، جئب‌لریمده دوستاق‌دیر
آرخادان گؤز تیکیب منه خییاوان

هده‌دی؟ قورخودو؟ سؤیوش‌دو؟ ندی؟
بئینیمی دولدوران غریب سسلر
بو قارانلیق سیغیشماییر ایچیمه
سانکی یوزمین ساعات دوروبدو زامان

کارا گلمزلره دولوب بئینیم
داماریم‌دا قارا بولود دولانیر
باخیرام؛
آمما گؤز-گؤزو گؤرمور
باخیرام؛
هئی دومان، دومان و دومان

و سکوت ایچره سیچرایان فرکانس
دولمایان بوشلوغا دامیر سانکی
بیر پری سسله‌ییر منی دئیه‌سن
ساچلاریندا گئجه، گؤزونده دان

کوچه‌ده ایت بوغوشدورور بیری‌سی
گؤرورم...
ایتله‌نیر یئنه روحوم
یئنه‌ده جینلریم چیخیر باشیما
قولاغیمدا پیچیلداییر شیطان

کوچه‌ده ایلدیریم چاخیر هردن
منده‌کی قورخو قاپساییب کوچه‌نی
بیر دلی بیر دووار دالیندا دئییر...
تانری یوخکن کیمین الینده آمان؟

تانری سانکی محبتین ایتمیش
تانری نیفرت سپیر یاغیش یئرینه
تانری باخما منه چئویر اوزونو
باخیشین‌ یاغدیریر زهرلی تیکان

منی دیندیرمه‌یین بیرآزجا نولور
کیمی گؤرجک دیدیشدیریم دئییرم
جاناوارلیق یؤنوم چیخیب‌دی اوزه
جاناوار اوزلویم اه‌یر باخسان

اینتیحار فیکری، اینقیلاب فیکری
ایکی‌یه بؤلدولر منی آخشام
گزیرم یوللاری نه کؤک‌ده آما...
بیر الیمده کوفور، بیرینده قوران

اینقیلاب فیکری، اینتیحار فیکری
بئینیمی ساغ-سولا چکیر یئنه‌ده
منده بیر پارتلاییش یاشانماق‌دا
دالی چک آی جانین سئوه‌ن اینسان

.

اینقیلاب، اینتیحار گؤروندو بیزه
اینتحار، اینقیلاب اولار ساندیق
دون گئجه پنجره‌مدن آتلاندیم
پارتلایارکن نه‌ ائیله‌مز اینسان...

#آتیلا_حاجیزاده
#غزل_چاراپارا

________________________________
@Atilla_hajizade
@Atilla_hajizade

آتیلا حاجی زاده

13 Mar 2020 18:59

علیرضا نابدل (اوختای)ین قیزیل رویالارینا سونولور:

ال-اله دویمه‌لری قیر دوداغین‌دان آرزو
باخ یاخین دیر سحره، باخ...
آچیلیر دان آرزو

سنی تاپشیردی گؤیون باغرینا سس‌سیز-گیزلین
دان چیخاندا آسیلارکن نئچه اینسان آرزو

ال-اله سسلدی بیر گون گئدیریک آرزو گیله
گولله‌لر ییخدی اونو، تاپمادی ایمکان آرزو

ال-اله بو شهرین دوشلرینه گول اکدیک
جان آتیر سولدورا آه... گوللری زیندان آرزو

کور ائله شیرلری ائوده، بیر ایچیم ایچمه داها
قاتیلیب بیر نئچه واقت دیر سولارا قان آرزو

سن کی قورخمازلارا قورآن سایاغی ازبرسن
سن ندن هر گئجه‌دن قورخولانیرسان آرزو

قویما 20اینجی لرین دهشتی قالسین دیلده
ال-اله دویمه لری قیر دوداغین دان آرزو

#آتیلا_حاجیزاده

پ.ن: ۲۲اسفند علیرضا نابدل-ین اعدام گونو.

__________________________________

@Atilla_hajizade
@Atilla_hajizade

آتیلا حاجی زاده

14 Jun 2019 19:48

کور اولموشام دئیه‌سن کؤلگه‌می زوران گؤرورم
نقدری گؤز تیکیرم چئوره‌ده دومان گؤرورم

یئنیلمیشیک گئجه‌نین قاپ-قارا قارانلیغینا
بو ظولمتین سحره وارماغین گومان گؤرورم

دئشیک-دئشیک دئشیلیب‌دیر الیم، قولوم، آیاغیم
یولون قاریش-قاریشین‌‌دا سیریق تیکان گؤرورم

بو یئرده تاپماییرام سیز دئیه‌ن ملک‌لردن
بیاض گئییم‌لر ایچینده اورانقوتان گؤرورم

دئدیز وطن گتیریب‌سیز بو دوستاق ایچره آما،
اؤنومده آچدیغینیز توربادا سیچان گؤرورم

دئدیز سحر، دئدینیز گون، باغیردیز آزادلیق
سیزین آزادلیغیزی بیر تزه پالان گؤرورم

آیا؟ گونه؟ سحره؟ آخ... کیمه گوونملی‌یم
باخینجا دسته‌ییم ایچره قارا ایلان گؤرورم

ائهی کوچه، خیاواندا آزادلیغین باغیران
دوورلارین سینه‌سینده ندن‌‌دی قان گؤرورم؟

گئری دونوب دئیه‌سن تاریخین واراق‌ واراغی
باخینجا نیزه باشین‌دا یئنه قوران گؤرورم

قیفیل‌لادیز بیزی آلچاق دوشونجه‌لر کولونا
بوتون کیتابلاریزین ساغ-سولون یالان گورورم

بیراز کناردا گزین هر زامان‌ گؤرنده سیزی
اؤنومده شاعیر یوخ بیر دابان سوران گؤرورم

بیراز کناردا گزین آلچاق اوغلو آلچاق‌لار
آغیز دولو قوسورام سیزلری هرآن گؤرورم

بیراز کناردا گزین آخ... بیر ایش چیخارداجاغام
یاواش-یاواش قیلیغیزی اویان-بویان گؤرورم

◼

چوخ ایچمیشم دئیه سن کئفلی‌یم باغیشلایاسیز
اؤنومده‌کی کاغاذین خط‌لرین زوران گؤرورم

#آتیلا_حاجیزاده
#یئنی_غزل
#اعتراض
#دیوانگی

@Atilla_hajizade