Telegram-канал bahja214 - بهجه💜🦩: Unsorted

بهجه💜🦩

25 Jul 2022 02:19

وانا في ثانوي كان عندي حلم، كنت عاوز ابقي طيار، وكنت مجهز نفسي على كده ومتعرف على كمية طيارين ماليين الصفحة الشخصية عندي لدرجة ان في ناس اجانب فكرت اني طيار من كتر وجودي وسط الفئة دي، كنت عايش حلم جميل اوي لمدة تجاوزت ال ٧ سنوات .. مكنتش بحب اقول أحلامي دي لحد، بس من جوايا كنت فاكر اني هموت لو مدخلتش الحاجة دي

في شهر ٢ في سنة الثانوية العامة بتاعتي حسيت اني بصدع كتير، نظري ملغوش كتير، ف قلت إرهاق عادي وغبت من الدروس اسبوع كده ارتاح، بس لما رجعت لقيت نظري برضو ملغوش! صوت جوايا عمال يقولي لا متقلقش انت تمام، يعم لا انت كويس .. عدي اسبوع .. اتنين .. تلاتة .. وانا من سيئ لأسوأ، ف رحت كشفت ف شهر ٣ وكانت الصدمة .. نظري ضِعِف! مش عين واحدة، لا، الاتنين!
فضلت قاعد قدام الدكتور مبلّم كده اللي هو "ببساطة كده؟ نظري ضعف؟ بس ازاي يدكتور ده انا مفيش حد في عيلتي كلها لابس نضارة أساسًا! ازاي؟"

كانت صدمة مفجعة بالنسبالي، حسيت اني خسرت كل حاجة حقيقي، وقتها من جوايا كنت متدمر بس مكنتش ببين، وقررت اذاكر وخلاص وأأجل حزني لحد ما اخلص وزي ما تيجي تيجي، مذاكرة بجد، هموت نفسي، وقد كان .. جه وقت الامتحان ومكنتش مهتم، اصل حلمي اللي كنت بحلم بيه انتهى من أربع شهور يعني ف اشطا مش فارقة، لدرجة اني كنت بروح اصلي تهجد وانا عندي امتحان الصبح ومبنامش ومش مهتم اوي، وعدت الامتحانات، طلعت النتيجة لقيتني جايب 98%! تعرف؟ مفرحتش، آه والله محستش بأي حاجة،
مش عشان انا بتبطر، لكن عشان انا مكنش ده حلمي ولا هدفي .. كنت مطفي بمعنى أصح

اول ما التنسيق نزل، مكنتش لسه عارف هدخل ايه، لدرجة اني كنت بلف ع الأكبر مني ف كليات اسألهم واخد رأيهم، كنت محتار بين أسنان وصيدلة، وكله بالنسبالي كان حلو، مش فارقة معايا اصلا .. وليا صديق، هو صاحب عمري، فارس، خاله قال "هتدخلو طب ومفيش نقاش"
طبعا انا وقتها لااااا انا مش عاوز، انا عاوز ابدأ حياتي بدري والطب طويل وبتاع، وخناقات بقى ف بيتي وأخوالي ويبني متضيعش مجموعك وحوارات كبيرة كده، بس انا فعلا كنت رافض الفكرة من قبل ما تتعرض، ويشاء ربك اكتبها رغبة أولى "متسألش ازاي لاني والله والله والله معرفش ده حصل ازاي " ودخلت طب الزقازيق!

بكلمك وانا مريت بعد ثانوي بأسوأ ايام عمري، لاني كنت مأجل زعلي لحد ما أخلص السنة .. ومن سذاجتي وقتها ارتكبت أخطاء افدح وزاد حزني اكتر وحياتي ضلمت اكتر، بس بكلمك دلوقت وقد ايه انا مبسوط اني خسرت كل ده واني اكتئبت بتاع ٦ شهور لحد ما بدأت اتقبل الحياة تاني ورجعت لنفسي، النهارده بكلمك وانا كلي رضا اني اتاخدت من حلم عشته طول ٧ سنين، بنام وبصحي اتخيل نفسي فيه، حلم في لحظة اتبخر قدامي ..

واول ما دخلت الكلية مكنتش فرحان اوي زي الناس، عادي
بس مع الوقت .. بدأت الرؤية تكون أوضح، بدأت افهم انا هنا ليه، اتعرفت على ناس معينة، بدأت اتماشي مع الكلية، وبدأت مداركي تتفتح، وبعدها فكرت في البيدج دي، اللي انت بتقري من عليها البوست ده، وفعلا بدأت، وبدأت اتعلم عن ديني اكتر، اتعرف ع ناس اكتر، دايرة معارفي بتزيد، حاسس اني بعمل حاجة، بعدها بدأت أدرك انا عاوز ابقي ايه!
متستغربش، لأن كتير مننا "حقيقة" مش عارف هو عاوز يبقى ايه، لكن أنا لقيت نفسي فعلا وعرفت انا جاي هنا ليه، جاي للحياة ليه، دوري هنا ايه، ويمكن ده أكبر إنجاز وصلت ليه، اني عرفت انا عاوز ابقي ايه

شوفت اللفة دي كلها والسنين دي كلها والحزن وضياع الأحلام ده كله؟ ده كله عشان ربنا يحطني في المكان المناسب .. مكاني!
ده كله عشان هو رحيم، وانا كنت غبي وفاكر انه ظلمني عشان خد مني حلمي اللي كنت ليل نهار بدعيه يحققهولي، كنت مقهور بيني وبينك، بس دلوقت، والله ثم والله ثم والله اني ابكي من رحمة هذا الرب .. من حكمته .. من لطفه!
خد مني أغلى حاجة كانت معايا .. حلمي وقلبي
عشان يديني درس ويوجهني لمكان لو كنت فضلت سنين ودفعت كل ما أملك مكنتش عمري هعرف طريقه ..

بكتب الكلام ده دلوقت عشان اقولك انه الحياة بتدار بحكمة انت مش هتقدر تفهمها، ممكن تعيش عمرك كله وبرضو متعرفش الحكمة من كل اللي حصل ده ايه، مش مهم تعرف! المهم بس تبقى عارف انه بيحبك .. ويريد ليك اليسر والخير، واللي مش بالضرورة يتحقق ف أحلامك، وانك مش لازم تبقى زي حد او ظروفك شبه حد او تحقق نفس إنجازه
ربنا رحيم ومطلبش منك انك تحقق إنجاز معين في حياتك، ومحملكش فوق طاقتك، ومقالكش انه لو مجبتش المجموع الفلاني مش هرزقك ولا هرفع قدرك! ومقالكش أنه بيظلم، حاشاه يظلمك سبحانه .. ف انت محمّل نفسك فوق طاقتك ليه؟ مش انت ذاكرت واجتهدت وخدت بالأسباب؟
طيب بقي قلقان ليه؟ ده ربنا رحيم اوي يبني والله، رحيم وكريم وبيسبب الأسباب عشان يرزقك والله وعشان يوهبك من كرمه ويوديك للخير اللي عمرك ما كنت هتعرف طريقه لوحدك مهما حاولت ..