Behzod Fazliddin

03 Jun 2025 09:22

#Кайфият #Лаҳзалар

***
Ҳадемай ёришиб кетади осмон,
Тим қора булутлар чекинар бирдан.
Мен ахир бошқа бир дунёнинг хасми,
Бош олиб кетаман бу малъун ердан.

Юрак тилга кирса, сўзламас ёлғон –
Ҳали кунлар келар – ёруғдан-ёруғ.
Бир олий маслакда бирлашар осон
Айро тушиб қолган Вужуд ила Руҳ.

Бошимда айланиб-ўргилар само,
Кўксимда нимадир ярқ этар шу тоб.
Ердан бир фатвога ўхшаган дуо:
Юлдузингни қидир, юлдузингни топ!

Фалакка қоришиб кетарман охир...
Ҳақиқат тонгига уйғун тушларим.
Ҳеч кимга, ҳеч кимга ботмайди оғир
Толеъ юлдузимнинг жилмайишлари...

© Беҳзод Фазлиддин @Behzod_Fazliddin

Behzod Fazliddin

01 Jun 2025 05:35

Қўйчивон кўп бўлса, қўй ҳаром ўлар.

Мақол.

@Behzod_Fazliddin

Behzod Fazliddin

31 May 2025 08:24

Болаликда бола бўлмаганлар, бўлолмаганлар бор...

***
Болалар яхшиликни унутмайди. (Ёмонликни ҳам.)

***
Бола хотирасига муҳрлангани умрбод қолади. Болаларга яхши гаплар, тўғри ишларни ўргатайлик.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

30 May 2025 11:28

Беҳзод Фазлиддин 1983 йил 20 сентябрда туғилган.

2005 йили Ўзбекистон давлат жаҳон тиллари университетининг халқаро журналистика факультети бакалаврлик босқичини, 2007 йили Жаҳон иқтисодиёти ва дипломатия университети магистратура бўлимини тамомлаган.

Ўзбекистон Фанлар академиясида илмий тадқиқот олиб борган. Филология фанлари бўйича фалсафа доктори (PhD).

“Муқаддас замин” (1999), “Боғларингдан кетмасин баҳор” (2000), “Онамнинг кўнглига кетамиз” (2003), “Сен қачон гуллайсан” (2008), “Кутмаган кунларим, кутган кунларим” (2012), “Тушларингдан чиқиб келдим” (2017) номли шеърий китоблари, қатор бадиий-публицистик, илмий-адабий мақолалари чоп этилган. Асарлари бир неча тилларга таржима қилинган.

Беҳзод Фазлиддин ижодини интернетда қуйидаги манзилларда кузатиб бориш мумкин:

Website: http://behzodfazliddin.uz/

Ижтимоий тармоқларда:
https://www.facebook.com/behzod.fazliddin

https://www.facebook.com/behzodfazliddin.uz

/channel/Behzod_Fazliddin

https://twitter.com/BehzodFazliddin

YouTube: Behzod_Fazliddin" rel="nofollow">https://www.youtube.com/@Behzod_Fazliddin

Ушбу саҳифаларда Беҳзод Фазлиддин битиклари билан бирга ўзбек ҳамда жаҳон адабиётидан намуналар, жамият, маънавият, ижод ва эътиқод борасида фикр-мулоҳазалар, суҳбатлар, ҳикматли сўзлар ва бошқалар бериб борилади.

Эслатма:
Интернетда Беҳзод Фазлиддин номи билан эълон қилинаётган барча шеърлар ва бошқа ижодий материалларнинг муаллифлик ҳуқуқи ҳимояланган. Улардан фойдаланиш муаллиф розилиги билан амалга оширилади ва рухсатсиз тегиниш қонунга кўра тақиқланади.

Шеърлар ва бошқа муаллифлик асарларидан фойдаланишдан олдин биз билан боғланишингизни сўраймиз.

Боғланиш учун:
@Behzod_Fazliddin_bot

http://behzodfazliddin.uz/muallif-haqida/

Behzod Fazliddin

29 May 2025 07:37

Ҳамма нарсани охирига олиб бориб тақаш одатимиз қачон қоларкин?

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

28 May 2025 06:19

Эшик очилди-ю, “Мумкинми?” дея
Салом бериб ўзи кириб келди Бахт...

© Беҳзод Фазлиддин @Behzod_Fazliddin

#Йўл_йўлакай #Таҳрирсиз_хаёллар

Behzod Fazliddin

26 May 2025 15:08

Биз ўзи саводи чатоқ авлод эдик. Кейингилар биздан-да бадтар чиқди.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

25 May 2025 15:47

Тузумни олқишланг, замонага таҳсин ўқинг – сизни ўзлари тарғиб қилишади.

Иймонни улуғланг, инсонни куйланг – Яратганнинг Ўзи йўлингизни очади.

Танлаш ихтиёри – ўзингизда!

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

24 May 2025 15:38

Ёлғон шоир керак эмас Ватанга,
Шоир керак эмас ёлғон ватанга...

#Йўл_йўлакай #Таҳрирсиз_хаёллар

© Беҳзод Фазлиддин @Behzod_Fazliddin

Behzod Fazliddin

23 May 2025 12:55

JONIM

O‘t ichida yashash osonmi, Jonim,
Nechuksiz? Joningiz omonmi, Jonim?
Ayirib qo‘yishdi yo‘llarimizni,
Odamlar shunchalik yomonmi, Jonim?

Ko‘ngilning yurtidan ketib bo‘lmaydi.
Sinovsiz manzilga yetib bo‘lmaydi.
Axir muhabbatning ko‘chalaridan
Yurakka tosh solib o‘tib bo‘lmaydi.

Yer, Samo biz bilan, qisinmaydilar,
O‘tkinchi kuchlarga bo‘ysunmaydilar.
Tushunib turibdi Xudoyim bizni,
Nega bandalari tushunmaydilar?!

Odamlar shunchalik yomonmi, Jonim...

2004-yil

© Behzod Fazliddin @Behzod_Fazliddin

#Eski_daftardan
#Tushlaringdan_chiqib_keldim kitobidan.

Behzod Fazliddin

22 May 2025 07:18

***
Bir menmi oʻzini yoʻlga qantarib
Ikki oʻt ichida qovrilayotgan?
Har nafas imkondan imkon axtarib
Bor-yoʻgʻi havoga sovrilayotgan?

Ohlarim ohorli kuy kabi quyma,
Umrimdan taralgan ohanglar chinmi?
Bir menmi yuragi qiyma-yu qiyma,
Yashaganday boʻlib yurgan bir menmi?..

2010-yil

© Behzod Fazliddin @Behzod_Fazliddin

#Kutmagan_kunlarim_kutgan_kunlarim kitobidan.

Behzod Fazliddin

21 May 2025 06:22

Men sendan xafaman, so‘nggi qo‘ng‘iroq!

#Kayfiyat #Eski_daftardan #Badiha

***
Firoq isi kelar ko‘zyoshlarimdan,
Yana vujudimni bosmoqda titroq.
Ajralgim kelmaydi sinfdoshlarimdan,
Men sendan xafaman, so‘nggi qo‘ng‘iroq.

Do‘stlar diydoriga to‘yolganim yo‘q,
Baxt hissin yaxshiroq tuyolganim yo‘q,
Kimgadir sevaman deyolganim yo‘q,
Men sendan xafaman, so‘nggi qo‘ng‘iroq.

Ustozlar bag‘ridan ketgim kelmaydi,
Ayriliq qo‘shig‘in aytgim kelmaydi,
Sog‘inch dunyosiga qaytgim kelmaydi,
Men sendan xafaman, so‘nggi qo‘ng‘iroq.

Jonimni tanimdan uzib olguday,
Ana, chalinishga turibsan-ku shay,
Qara, yig‘layapman bugun uyalmay,
Men sendan xafaman, so‘nggi qo‘ng‘iroq.

Bir oz chalinmay tur, senga gapim bor,
Har qadamda bizni etib tur hushyor,
Hayot yo‘llarida bo‘lsang bizga yor,
Men sendan roziman, so‘nggi qo‘ng‘iroq!

2001-yil, may

© Behzod Fazliddin @Behzod_Fazliddin

#Tushlaringdan_chiqib_keldim kitobidan.

Behzod Fazliddin

20 May 2025 06:30

#Иқтибос

Дурдоналар бизга муносиб эканини намойиш этишдан олдин биз ўзимизнинг уларга муносиб эканимизни намоён этмоғимиз зарур.

Ҳерманн Ҳессе. Мутолаа ҳақида (Hermann Hesse. Über das Lesen)

@Behzod_Fazliddin

#Ижод_ва_эътиқод #Тавсия

Behzod Fazliddin

19 May 2025 06:51

Cизлар юксак савияда ёзишга ҳаракат қилишингиз керак, ўртамиёналикни ўзимиз ҳам эплаб турибмиз.

(Устоз ижодкорнинг ёшларга маслаҳатидан.)

#Йўл_йўлакай #Ижод_ва_эътиқод

@Behzod_Fazliddin

Behzod Fazliddin

18 May 2025 06:36

– Нега бунча сифатсиз бозор?
– Арзонга ўч доим харидор...

#Йўл_йўлакай #Таҳрирсиз_хаёллар

Беҳзод Фазлиддин @Behzod_Fazliddin

Behzod Fazliddin

02 Jun 2025 08:29

Бўлиндим, бўлиндим, мингга бўлиндим,
Битта қиёфага жамлаб бер мени...

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

31 May 2025 15:30

***
Юрак ёнмай қўйган анчадан бери,
Кўпдан буён руҳнинг ҳарорати паст.
Ўксинганим сари, куйганим сари
Армонлар жонимга қилаверар қасд.

Тим қора тунларим, тиниқ тонгларим –
Ўзимдай ўйга ўч, сўзимдай ғариб.
Нечун бирдан бари кетмас ўнгланиб,
Не учун тобора бемаъни бари?

“Қўлингдан келганча ўйна, ўйнаб қол!” –
Қўшилмам дунёнинг эски нақлига.
Ҳали бебурд ҳислар этмасдан ишғол,
Дуолар қилурман Ҳаёт ҳаққига.

Ахир кўнгил кўзи очилур ҳали,
Куртаклар кўзида умид яширин.
Гўдаклар кулгуси бергай тасалли,
Ҳали сийқа эмас поклик қўшиғи...

© Беҳзод Фазлиддин @Behzod_Fazliddin

Behzod Fazliddin

30 May 2025 17:25

***
Кўксим оғригани оғриган, ё Раб,
Юрак оҳ дегани оҳ деган, ё Раб,
Виждон йиғлагани йиғлаган, ё Раб,
Найлай?

Тийилмаган ҳислар, тийилган кўзлар,
Айтилмаган сўзлар, дейилган сўзлар,
Бўғзим қафасида бир булбул бўзлар,
Найлай?

Кимлар деб кимларга бошимни эгдим,
Жафолар устига жафолар чекдим,
О, ўзим ўзимнинг жонимга тегдим,
Найлай?

Олислаб боради орзу елкани,
Аламлар қилади бир хас эканинг,
Яшайман деганим – ўлдим деганим...
Найлай?!

***
Жимгил, ғойибдан бир садо келадур,
Сўз ортидан хатар, хато келадур.
Сукутга айланиб тафаккур этсанг,
Ҳар зарра қаъридан Худо келадур.

© Беҳзод Фазлиддин @Behzod_Fazliddin

Behzod Fazliddin

29 May 2025 13:23

***
Ҳали дунё сутдай оқ эди,
Боғлар гўзал, осмон ложувард.
Қуёш ерга яқинроқ эди,
Ой юзида кўринмасди гард.

Тебранарди майсалар сокин,
Кўкдан ёғиб майин наволар.
Борлиқ узра Бахт эди ҳоким,
Жонга ҳузур тоза ҳаволар!..

Сезмай қолдим, қалб қандай қотди,
Қачон армон ёзолди куртак?
Тушларим ҳам ўзгариб кетди,
Энди бари олис бир эртак.

Қани кунлар – менга аталган,
Лойларгами ё ботиб қўйдим?
Ҳар заррадан чирой ахтарган
Кўзларимни йўқотиб қўйдим...

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

28 May 2025 17:30

Бандаси тўқиган фармон не ўзи,
Раббимиз энг одил Хон-ку, Азроил!

© Беҳзод Фазлиддин @Behzod_Fazliddin

#Эски_дафтардан #Онамнинг_кўнглига_кетамиз

https://www.facebook.com/100003319579634/posts/993303167456993/

Behzod Fazliddin

27 May 2025 06:21

РОЛЬ

Қайси шамол қаддимни эгди?
Қачон булут тўсди офтобим?
Биров бўлиш жонимга тегди,
Ечиб отгум манфур ниқобим.

Бу курсижон, бу телефонхон –
Кўриб қўйсин, мана, юзимни.
Тил учида сақлаб юрдим жон,
Ҳар қолипга солдим ўзимни.

Пуч сўз сотиб даромад қилдим,
Рандаланган гапларим силлиқ.
Кесакларга хушомад қилдим,
Деворларга айладим қуллуқ.

Юрагимни ёлғон ўқидим,
Ўз-ўзимга қилмадим инсоф.
Ишқсизларча чўпчак тўқидим,
Бахтлиман, деб уриб келдим лоф.

Бу жараён борар жар аён,
Кўзларимга тўлиб келар қум.
Ич-ичимда тинмас ғалаён,
Лабларимда аччиқ табассум.

Нима берар кичик танаффус?
Қўллар чапак чалиб толганлар.
Афсус, улар учун ҳам афсус...
Афсус, мени севиб қолганлар!

2008

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

26 May 2025 09:08

Bundespressekonferenz

2009. Berlin.

@Behzod_Fazliddin

#Кайфият #Лаҳзалар

Behzod Fazliddin

25 May 2025 09:26

Ёрдам бергим келар маҳбус сўзларга,
Гаплар осмондадир, пойгакларда Шеър...

© Беҳзод Фазлиддин @Behzod_Fazliddin

#Кайфият #Шеърлавҳа

https://www.youtube.com/watch?v=lkdneNy0zUQ

Behzod Fazliddin

24 May 2025 10:56

Муттаҳам доим бир қадам олдинда. Унга тенглашиб бўлмайди. У шунинг учун ҳам муттаҳам.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

23 May 2025 07:38

Хорижда юрган ҳар киши ватангадо бўлмаганидек, ўз юртида яшаётган ҳар кас ҳам ватанпарвар эмас.

#Йўл_йўлакай #Таҳрирсиз_хаёллар

@Behzod_Fazliddin

Behzod Fazliddin

21 May 2025 15:34

#Иқтибос

Нафсоний истак устун бўлган жойда муҳаббат ҳалокатга яқинлашади. Й.Эккерманнинг “Гёте билан суҳбатлар” китобида қизиқ воқеа нақл этилган. Гётенинг котиби ёш бир шоиранинг шеърларини келтириб, унинг ғоят истеъдодли эканини айтади. Суҳбатда улуғ шоирнинг табиби ҳам бор эди. Шеърлар ўқиб чиқилгач, “Бу қиз эрга теккач, шеър ёзишни ташлайди”, дейишади. “Нега?” дейилганда, қизнинг ишқий шеърларида нафсоний – эҳтиросли истаклар кучли экани, у муродига етгач, шеърга эҳтиёж қолмаслиги айтилади. Демак, нафснинг муродга етиши севгигагина эмас, истеъдодга ҳам салбий таъсир қилиши англашилмоқда. Албатта, чин муҳаббат билан боғланган умрлар бундан мустаснодир...

Мирзо Кенжабекнинг “Жон ва жонон сирлари” мақоласидан.

#Ижод_ва_эътиқод

@Behzod_Fazliddin

Behzod Fazliddin

20 May 2025 13:54

***
то ҳануз жумбоққа ўхшайди умрим
то ҳануз улгуриб бўлмас яшашга
то ҳануз кўзимда эзғиланар қум
то ҳануз нўноқман ўзни асрашга

наҳотки ҳаёт шу, тириклик шудир
наҳотки умрбод ўртанмак – қисмат
наҳотки мўъжиза бўлмайди содир
наҳотки тоабад чўзилгай ҳижрат

билмайман, бу бошда яна не савдо
билмайман, не жиндир жонда рақс тушган
билмайман, билишдан надир муддао
билмайман, руҳ қуши қаёққа учган

то ҳануз…
наҳотки…
билмайман…

2012

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

19 May 2025 15:51

...Сени Сенсизлардан излаганим рост,
Мункир туйғулар-ла бўзлаганим рост.
Нима қилсам қилдим, не бўлсам бўлдим,
Вале Сендан умид узмаганим рост...

© Беҳзод Фазлиддин @Behzod_Fazliddin

Behzod Fazliddin

18 May 2025 15:28

#Кайфият #Лаҳзалар

УЗУН ОРЗУ

Бирдан қанот ўсиб чиқса елкамдан,
Учсам. Ҳаммасини унутсам. Кетсам.
Асар ҳам қолмаса шум кўланкамдан,
Армон етолмаган манзилга етсам.

Қувиб тутолмаса ортимдан лаъин,
Бу дунё ўртада бўлмаса даллол.
Худди шу энг мақбул, тўғри йўлдайин –
Учишим ҳеч кимга келмаса малол.

© Беҳзод Фазлиддин @Behzod_Fazliddin

#Кутмаган_кунларим_кутган_кунларим

Behzod Fazliddin

17 May 2025 15:21

***
Тушунган тушунди, уқмаган уқмас,
О, бу сўзлар деб нақ ақлимдан оздим.
Юракнинг буйруғи доим ҳам ҳақмас,
Раҳмон не буюрса, ўшани ёздим.

2012

© Беҳзод Фазлиддин @Behzod_Fazliddin

#Кутмаган_кунларим_кутган_кунларим