Беларускія аўдыякнігі (audiobooks.by)

28 Jun 2024 15:13

💥 Слухаем «Люцыян Таполя» Максіма Танка ад праекта «Беларуская літаратура»!

👀 Новая агучка класічнага твора — вельмі раім паслухаць, нават калі вы добра знаёмыя з тэкстам.

Прыкладам, вы малюеце. Альбо пішаце вершы. Альбо ствараеце новае адзенне, выразаеце з дрэва, спяваеце так, як вам падабаецца. А тут прыходзіць нехта і кажа: будзеш рабіць так, як я табе скажу, альбо ніяк. І забараняе вашую творчасць. Альбо сыпле двойкі ў журнал. Ці нават рве сшытак ці альбом. Гісторыя старая, як свет. Люцыян Таполя, герой паэмы Максіма Танка, трапіў якраз вось у гэткі пераплёт. І – адпомсціў.

🎧 Агучыла каманда праекта «Беларуская літаратура», а знайсці і паслухаць можна проста зараз на YouTube-канале праекта і нашым сайце! 

Беларускія аўдыякнігі (audiobooks.by)

26 Jun 2024 14:45

💫 Падрыхтавалі для вас падрабязны расклад літаратурнай сцэны, а хутка апублікуем такія ж і для іншых пляцовак Hučna Fest.

Таксама хутка падзелімся падрабязнымі інструкцыямі як максімальна весяла і карысна правесці час на нашым фестывалі. Заставайцеся на сувязі!

Пабачымся 29 чэрвеня з 13:00 да 22:00 на беразе Віслы каля варшаўскага Музея Сучаснага Мастацтва (Wybrzeże Kościuszkowskie 22).

Што вас чакае на Hučna Fest у гэтым годзе

Беларускія аўдыякнігі (audiobooks.by)

26 Jun 2024 12:54

✨ Слухаем «Чарадзейны крышталь, або Нечаканы госць» Вольгі Шчукінай!

❤️ Маляваныч на «Кніжным Возе»

Казка пра Мараша, маленькага ведуна з суседняга сусвету, і пра дзесяцігадовых Светку і Віцьку з Менска.Светка дужа самастойная дзяўчынка, захапляецца дэльтапланамі. Віцька – ейны сябрук з двара. Аднойчы ў пакоі Светкі рассоўваецца сцяна і з’яўляецца маленькі хлопчык з кацінымі вусамі. З’яўляецца ён каб адшукаць чарадзейны крышталь, які ён сам і згубіў у нашым свеце. Было гэта ажно 25 год таму. Завуць нечаканага госця Мараш, ён найважнейшы чалавек у сваёй краіне, якая завецца Нінавія. І без чарадзейнага крышталя яна ў бядзе.

🎧 Агучыў Аляксандр Ждановіч, а паслухаць можна проста зараз на «Кніжным возе»!

Беларускія аўдыякнігі (audiobooks.by)

21 Jun 2024 15:48

🔥  Слухаем «Краявід зь кінакамэрай» Уладзіміра Халіпа!

🤝 Працягваем выкладаць кнігі серыі «Бібліятэка Свабоды».

Радыё Свабода прадстаўляе аўдыёзапіс успамінаў сцэнарыста і літаратара Ўладзімера Халіпа «Краявід зь кінакамэрай».

🎧 Чытае Уладзімір Халіп, а знайсці і паслухаць можна проста зараз на любой зручнай вам пляцоўцы. 

Беларускія аўдыякнігі (audiobooks.by)

19 Jun 2024 17:06

❤️ 100 гадоў з дня нараджэння Васіля Быкава: падборка цытат класіка ад audiobooks.by

1. Свабода — найбольшая маральна-фізычная каштоўнасьць, дадзеная кожнай жывой істоце фактам яе нараджэньня. Усё жывое і карыстаецца тою каштоўнасьцю, наколькі гэта мажліва ў складаным, заблытаным сьвеце арганічнага існаваньня. Апроч хіба чалавека, якому мала прыроджанай свабоды. Каб у поўнай меры спазнаць і адчуць яе неабходнасьць, яму наканавана прайсьці праз хітрасплецены лябірынт жыцьця, а то і застацца ў адным зь яго тупікоў. I там прызвычаіцца, змарнець, страціць прыроджаны дар свабоды, адаптавацца дзеля элемэнтарнае мэты біялягічнага існаваньня. Зрабіцца часткай натоўпу, грамадзтва, электарату — такім, як усе.

«Доўгая дарога дадому»  

2. Пры ўсёй сваёй неверагоднай магутнасці над прыродай чалавек, напэўна, доўга яшчэ астанецца ўсё такім жа абмежаваным у сваіх фізічных магчымасцях, калі самага маленькага кавалачка металу даволі на тое, каб назаўсёды адабраць адзінае і такое дарагое для кожнага жыццё.

«Сотнікаў»
 
3. Найгорш у жыцці няпэўнасць: яна адбірае волю да дзеяння.

«Мёртвым не баліць» 

4. Зло не можа спарадзіць нічога, апроч зла, на іншае яно не здольна. Але бяда ў тым, што людская дабрыня перад злом бяссільна, зло лічыцца толькі з сілай і баіцца адно толькі кары. Толькі непазбежнасць адплаты можа прыцішыць драпежны ягоны нораў, прымусіць задумацца. Інакш на зямлі запануе пекла, аб якім гаворыцца ў Бібліі.

«Знак бяды» 

Беларускія аўдыякнігі (audiobooks.by)

16 Jun 2024 11:47

🔥  Слухаем «На высьпе ўспамінаў» Валянціна Тараса!

🤝 Працягваем выкладаць кнігі серыі «Бібліятэка Свабоды».

У сваіх мэмуарах, поўных важкіх дэталяў і трапных апісаньняў, пісьменьнік запрашае нас у прастору, дзе жылі Якуб Колас, Уладзімер Караткевіч, Васіль Быкаў, Яўгенія Янішчыц... Гэта ўнікальны летапіс быцьця душы, што праходзіць праз вайну і мір, жыцьцё і сьмерць, сяброўства і здраду, напісаны паўзьверх старонак гісторыі СССР, Эўропы, Беларусі...

📻 З архіваў «Радыё Свабода» 2002-2005гг.

🎧 Чытае Валянцін Тарас, а знайсці і паслухаць можна проста зараз на любой зручнай вам пляцоўцы.

Беларускія аўдыякнігі (audiobooks.by)

12 Jun 2024 16:45

🌸Топ аўдыякніг вясны з audiobooks.by!

Вясна — гэта час абнаўлення і новых адкрыццяў. Спадзяёмся, мінулыя тры месяцы прынеслі вам шмат новых эмоцый і ўражанняў — а таксама маем надзею, што дапамаглі камусьці з вас зрабіць персанальныя аўдыякніжныя адкрыцці. Дзелімся топам таго, што слухалі карыстальнікі audibooks.by гэтай вясной!

1 Уладзімір Мацкевіч, «Свабода і Мысленне: эсэ пра грамадзянскую супольнасць»

Што такое грамадзянская супольнасць?
- Як яна можа ўплываць на працэсы, якія адбываюцца ў краіне?
- Ці здольныя мы аб'ядноўвацца для агульных спраў?
- Якія якасці нам патрэбныя, каб супрацьстаяць сучасным пагрозам і адказваць на выклікі?

2 Уладзімір Караткевіч, «Дзікае паляванне караля Стаха»
Гэтая аповесць мае нешта адметнае, нейкую ўласцівую ёй таямніцу-загадку, якую нават цяжка растлумачыць, а можна хіба адчуць. Беларуская мінуўшчына, у якую нас пагружае аўтар, трывожыць наша сэрца і прыводзіць да думак пра сёняшняе. Твор — сапраўдная літаратурная класіка, актуальны і прывабны ва ўсе часы.
3 Васіль Быкаў, «Альпійская балада»
«Альпійская балада» — самая рамантычная і загадкавая аповесць Васіля Быкава і самая не быкаўская, бо расказвае не столькі пра вайну, сколькі пра каханне. Каханне беларуса Івана і італьянкі Джуліі. Прачытаўшы аповесць, Пімен Панчанка — галоўны рэдактар «Маладосці», дзе ўпершыню была надрукавана «Альпійская балада», — сказаў: «Канешне, усё тое — няпраўда, а верыцца. Значыць, гэта — мастацтва».
4 Алесь Краўцэвіч, «Кароткая гісторыя Беларусі»
Глыбінныя працэсы, найважнейшыя з’явы і падзеі беларускай гісторыі пераказаныя літаратурнай мовай. Асобныя з’явы, падзеі, героі і антыгероі існуюць самыя па сабе, адасоблена, адарваныя ад агульнага гістарычнага кантэксту. Гэтая аўдыякніга якраз прэзентуе гісторыю краіны ў лагічнай сістэмнай і храналагічнай паслядоўнасці.

5 Рыгор Барадулін, «Дуліна ад Барадуліна»
Показкі, эпіграмы, міні-оды «Свабодзе» ды іншыя бессаромныя жэсты, у т. л. эсэ «Як беларусы сэксам займаюцца».
Бо праўды не заглушыш. Чытае аўтар.

6 Юрась Бушлякоў, «Жывая мова»
«Жывая мова» — калекцыя практычных эсэ пра тое, як гаварыць па-беларуску правільна і прыгожа. На працягу сваёй рэдактарскай працы на Радыё Свабода аўтар выяўляў складаныя, спрэчныя ці памылковыя моманты ў жывой мове, аналізаваў іх і даваў парады, якія склалі цыкль радыёперадачаў і ляглі ў аснову гэтай кнігі. Чытае аўтар.

7 Васіль Быкаў, «Знак бяды»
Сюжэтныя вузлы аповесці сцягнуты да той мяжы, калі развязаць іх немагчыма — можна толькі рассячы. Ідэалагічная тэмпература чалавечых страсцей даведзена да крытычнага пункта, калі ствараецца ўражанне, што на хутары Яхімоўшчына (дзе і адбываюцца падзеі «Знака бяды») разыгрываецца драма сусветнага значэння. І ад таго, як павядуць сябе героі, Сцепаніда і Пятрок Багацькі, будзе залежаць, перамогуць ці не сілы глабальнага дабра і святла. Нарэшце, канчатковы прысуд крытыкі: на старонках «Знака бяды» Быкаў у мікракосмасе аднаго чалавека паказаў макракосмас нацыі. 

8 Ева Вежнавец, «Шлях дробнай сволачы»
У зборніку апавяданняў 2008 года Ева Вежнавец вывела галерэю нетыповых жаночых вобразаў. Яе моцныя, трывалыя гераіні шукаюць саміх сябе, спрабуюць выжыць у краіне «дробнай сволачы» і гатовыя на выпрабаванні. 

9 Святлана Алексіевіч, «Чарнобыльская малітва»
«Супалі дзве катастрофы: касмічная – Чарнобыль, і сацыяльная – сышоў пад ваду велізарны сацыялістычны мацярык. І гэтае, другое крушэнне, зацямніла касмічнае, таму што яно нам было больш блізкае і зразумелае. Тое, што здарылася ў Чарнобылі, – упершыню на зямлі, і мы – першыя людзі, якія перажылі гэта».

Беларускія аўдыякнігі (audiobooks.by)

09 Jun 2024 11:39

🔥  Слухаем «Трэба рызыкаваць» Міхаіла Дубянецкага!

🤝 Працягваем выкладаць кнігі серыі «Бібліятэка Свабоды».

Cучасныя мемуары Міхаіла Дубянецкага  пісьменніка, перакладчыка і легендарнага дарэктара выдавецтва «Мастацкая літаратура». Менавіта ён абараняў найлепшых пісьменнікаў таго часу ад савецкай цэнзуры — так, дзякуючы ягоным высілкам, свет пабачыла забароненая ЦК КПСС аповесць Васіля Быкава «Мёртвым не баліць».

📻 З архіваў «Радыё Свабода» 2002-2005гг.

🎧 Чытае Сяргей Законнікаў, а знайсці і паслухаць можна проста зараз на любой зручнай вам пляцоўцы.

Беларускія аўдыякнігі (audiobooks.by)

05 Jun 2024 16:26

💔 Беларуская турэмная літаратура: летапіс супольнай рэчаіснасці

Серыя аўдыякніг пяці беларускіх палітвязняў, чацвёра з якіх і сёння знаходзяцца за кратамі: актывісты Ігар Аліневіч і Мікола Дзядок, праваабаронца Алесь Бяляцкі і палітык Павел Севярынец.


Напісаныя ў зняволенні кнігі складаюць важную частку сучаснага беларускага літаратурнага працэсу і, на жаль, з’яўляюцца сапраўдным сімвалам стану беларускай літаратуры цяпер і зараз.

Сачыце за навінамі, каб не прапусціць — у хуткім часе серыя з’явіцца на пляцоўках.

Беларускія аўдыякнігі (audiobooks.by)

02 Jun 2024 17:21

✨ Слухаем аўдыяверсію серыі вершаў Андрэя Скурко «Стукі-грукі – што за гукі»!

🤝 Падарунак дзеткам ад «Кніжнага Воза» , Gutenberg Publisher і «Бэйбуса»!

Чаму зайцам забаранілі праносіць у рэйсавыя аўтобусы адкруткі? Кот схапіўся за дрыль: што ён задумаў? Падсілкаваўшыся кашай, перакусваем жалезны дрот! Гісторыі пра інструменты і іх магчымасці. 

🎧 Агучылі Крысціна Дробыш і Алег Гарбуз, а паслухаць можна проста зараз на «Кніжным возе»!

Беларускія аўдыякнігі (audiobooks.by)

01 Jun 2024 14:26

🔥  Слухаем «Баранавічы, Капэнгаген, Парыж, Мадрыд і Атава» Івонкі Сурвілы у аўтарскай агучцы!

🤝 Працягваем выкладаць кнігі серыі «Бібліятэка Свабоды».

Cучасныя мемуары старшыні Рады Беларускай Народнай Рэспублікі ў выгнанні. Кніга ўзнаўляе жыццёвы шлях Івонкі Сурвілы: дзяцінства, выгнанне, вучоба, каханне, грамадска-палітычная дзейнасць і цесна пераплеценыя лёсы беларусаў на чужыне.

📻 З архіваў «Радыё Свабода» 2002-2005гг.

🎧 Чытае аўтарка, а знайсці і паслухаць можна проста зараз на любой зручнай вам пляцоўцы.

Беларускія аўдыякнігі (audiobooks.by)

30 May 2024 16:35

Працягваем нашую эпапею са штучным інтэлектам! Раней мы выклалі рылз, у якім прапаноўвалі здагадацца, хто начытвае тэкст: актор агучкі ці ШІ. Большасць з вас ставіла на апошні варыянт, аднак пазаўчора мы раскрылі таямніцу: насамрэч тэкст начытала Крысціна Дробыш. Але на гэтым загадкі не скончыліся.
Так, як выявілася, штучны інтэлект зусім не дае рады ў справе агучкі беларускіх аўдыякніг. А як наконт напісання мастацкіх тэкстаў? Давайце праверым. Сёння мы падзелімся з вамі некалькімі цытатамі з твора, які начытала Крысціна. Пачынаем!

1 Плакалі ўсе. Румзаў былы менскі рэжысёр, а цяпер варшаўскі разносчык піцы. Ён падышоў і прыкусіў куток гіганцкага олдскульнага дывана, што вісеў на сценцы. Прыкусіў, як пірат, што правярае залатую манету на зуб.

2 У аўтобусе панавала далікатная ціша. Людзі ўтаропіліся ў мабільнікі. Толькі недзе ля кампостара напаўголаса перакідваліся словамі кітайскія студэнты, гэтыя бесстароннія сведкі беларускай драмы. На гумовым борціку шыбы нехта ў гуманітарных мэтах пакінуў наступным пасажырам свой прабіты талончык.

3 Яна прапускае – дакументы, грошы, рэліквіі. Тавары і кантрабанду – не. Ну, хіба адзіны вынятак: туды – глазураваныя сыркі Бярозаўскага малаказавода.

4 На сценах віселі зробленыя на спецзамову шпалеры з назвамі англасаксонскіх і расійскіх гуртоў. Назвы N.R.M. ці Akute на іх не сустракаліся. Штомесяц у міністэрстве інфармацыі выходзілі чорныя спісы з айчыннымі гуртамі, якія запісваліся ў «экстрэмісцкія» і «дэструктыўныя калектывы». Дык хто ведае, хто патрапіць туды заўтра?

Дзяліцеся сваімі ўражаннямі і меркаваннямі — і, як заўсёды, сачыце за развіццём падзей у нашых сацсетках: хутка мы распавядзём пра гэтую незвычайную кнігу больш!

Беларускія аўдыякнігі (audiobooks.by)

29 May 2024 13:55

Слухаем навінку ад «Кніжнага Воза»: «Франкенштайн» Мэры Шэлі!

❗ Аўдыторыя рамана — 12+

«Франкенштайн, ці Сучасны Праметэй» Мэры Шэлі (1797–1851) – адзін з найлепшых узораў готыкі і першы навукова-фантастычны раман, які быў апублікаваны ў 1818 годзе.

✍️ Упершыню беларускі пераклад аповесці, зроблены Марынай Дзергачовай, выйшаў у 2016 годзе ў выдавецтве «Кнігазбор» (Бібліятэка Саюза беларускіх пісьменнікаў «Кнігарня пісьменніка»; Бібліятэка часопіса «ПрайдзіСвет» «PostScriptum»).

🎧 Агучыў Ісай Свістулькін, а паслухаць можна проста зараз на «Кніжным возе»!

Беларускія аўдыякнігі (audiobooks.by)

28 May 2024 16:54

💥Слухаем вершы Венанцыя Бутрыма!

💗 Аўдыякніга-прыклад беларускай салідарнасці: запіс арганізавалі землякі баранавіцкага паэта. Шануйма сваё разам!

Мастак, паэт і празаік Венанцы Вікенцевіч Бутрым нарадзіўся і жыў у горадзе Баранавічы. Скончыў Мінскае мастацкае вучылішча. Працаваў у творчых майстэрнях мастацкага фонду. Пісаў вершы і прозу, якія друкаваліся ў часопісах «Маладосць», «Нёман»,«Полымя», на старонках беларускіх газет і альманахаў.

🎧Чытае Валянцін Салаўёў, а знайсці і паслухаць бясплатна можна па спасылцы на нашым сайце.

Беларускія аўдыякнігі (audiobooks.by)

26 May 2024 18:40

Вы ўжо чулі пра тое, што ШІ можа пісаць тэксты, маляваць карціны і нават ствараць музыку. А як наконт аўдыякніг? Ці можа праграма не толькі напісаць мастацкі тэкст, але і агучыць такім чынам, каб не адрознівацца ад сапраўдных актораў?

Мы зладзілі экперымент і закінулі тэкст ШІ. Што выйшла?

Давайце праверым. Здагадайцеся, хто чытае гэты тэкст: чалавек ці штучны інтэлект? 🤔

Беларускія аўдыякнігі (audiobooks.by)

27 Jun 2024 15:05

📚 Бэстсэлеры вясны на audiobooks.by

Сабралі для вас самыя папулярныя кнігі вясны па прадажах! Даведайцеся, якія кнігі сталі сапраўднымі бэстсэлерамі і абавязкова дадайце іх у свой спіс для праслухоўвання.

1 «Плошча Перамогі», Альгерд Бахарэвіч

Раман «Плошча Перамогі» – авантурная прыпавесць пра ўладу і нацыю, пра цану слова і славы.

Аўтар пра кнігу: «Не пытайся, дзе і калі ўсё гэта адбылося, папярэджвае гэтая кніга. Раман-прыпавесьць, які толькі прыкідваецца гістарычным — а насамрэч выводзіць чытача са свайго «ніколі і нідзе» наўпрост у ХХІ стагодзьдзе зь ягоным новым успрыманьнем праўды, хлусьні, інфармацыі і ўлады. А адначасова — у тую Беларусь, што адчула нарэшце подых Вялікай Гісторыі».
Паслухаць

2 «Пасажыры карабля Тэсея», Сцяпан Стурэйка

Аповесці даследчыка культурнай спадчыны Сцяпана Стурэйкі складаюцца з парадаксальных ідэй, чорнага гумару і цікавостак з падарожжаў. Героі заўсёды шукаюць праўду, а знаходзяць толькі сапраўдных сябе. Галоўная думка ўсіх твораў — мы губім тое, што любім.

Усё апісанае ў кнізе заснавана на рэальных гісторыях.
Паслухаць 

3 «Шлях дробнай сволачы», Ева Вежнавец

У зборніку апавяданняў 2008 года Ева Вежнавец вывела галерэю нетыповых жаночых вобразаў. Яе моцныя, трывалыя гераіні шукаюць саміх сябе, спрабуюць выжыць у краіне «дробнай сволачы» і гатовыя на выпрабаванні.

На думку Андрэя Дынько, у творах адлюстраваная драма цэлага пакалення трыццацігадовых беларусаў, якія былі вартыя годнага жыцця, але не змаглі яго дамагчыся. Прадстаўнікі гэтага пакалення, падкрэсліў Андрэй Дынько, нават у сённяшніх умовах, калі беларуская культура апынулася пад забаронай, ствараюць сапраўдныя якасныя мастацкія творы.
Паслухаць 

4 «Вяртанне Ліліт», Юлія Шарова

Добрыя дзяўчынкі трапляюць у рай, а кепскія – у Беларусь. Як зрабіцца гаспадыняй уласнага лёсу і стаць шчаслівай там, дзе за цябе ўсё вырашылі на цэлую вечнасць наперад?
Ліліт, першая жонка Адама, пакінула рай і не прыжылася ў пекле. За гэта Бог і Д’ябал змусілі яе падпісаць угоду, паводле якой Ліліт мусіць бясконца ўвасабляцца ў зямных жанчын і жыць сярод людзей.
Паслухаць 

5 «Мая школа», Ганна Севярынец

«Мушу папярэдзіць маіх шаноўных чытачоў. Перад вамі — не ўспаміны, не настаўніцкі дзённік, не блог у «Фэйсбуку», а мастацкі твор з усімі адпаведнымі атрыбутамі, і найперш — мастацкай выдумкай. Героі, сітуацыі, школы і горад у гэтай кнізе альбо прыдуманыя, альбо моцна пераасэнсаваныя мной з гледжанага ў жыцці. Таму прашу мець на ўвазе: амаль усе імёны ў кнізе «Мая школа» несапраўдныя, усе супадзенні — выпадковыя»
Паслухаць 

6 «Самота, што жыла ў пакоі насупраць», Вольга Гапеева

Ці звязаная схільнасць да меланхоліі са здольнасцю адчуваць прыгажосць і эмпатыю? Чаму самота — вырак сапраўды чалавечнага чалавека? Адсутнасць спачування да жывёл, адмаўленне жанчынам і рабам у правах — як ўсё гэта дзіўным чынам жыве ў адной душы і не знаходзіць месца ў іншай? Персанажы рамана Вольгі Гапеевай шукаюць адказу на пытанні, падарожнічаюць, уступаюць у стасункі, даследуюць паралельныя сусветы людзей, жывёлаў і вулканаў.
Паслухаць
7 «Аўтамат з газіроўкай з сіропам і без», Уладзімір Някляеў

Раман Уладзіміра Някляева, па яго ўласным прызнанні, — удзячнасць Менску і ўсім тым, хто разам з ім увайшоў у жыццё аўтара. Гэтая кніга, шмат у чым аўтабіяграфічная, — пра фарміраванне ідэалаў някляеўскага пакалення ў часы хрушчоўскай адлігі. У яе падмурку рэальныя падзеі 1960-х і 2010-х гг.: існаванне ў Менску стыляг, якія слухалі Акуджаву, захапляліся радыёаматарствам і пераследаваліся брыгадміламі; «раскрыццё» КДБ «змовы антысавецкай групоўкі» філосафа-дысідэнта Кіма Хадзеева; прыезд у Менск Мікіты Хрушчова ды іншыя.
Паслухаць 

Беларускія аўдыякнігі (audiobooks.by)

26 Jun 2024 14:45

Мы прыйдзем на Hučna Fest а вы?

Беларускія аўдыякнігі (audiobooks.by)

24 Jun 2024 17:08

💔  Слухаем «Еду ў Магадан» Ігара Аліневіча

📓 Гэтая кніга — частка серыі «Турэмная літаратура»

Рукапіс дзённіка напісаны ў турме КДБ і перададзены на волю. У кнізе аўтар апісвае сучасную карную сістэму, дзеліцца практычнымі парадамі, перасцерагае, выказвае ўласныя погляды.

Упершыню Ігар Аліневіч быў выкрадзены спецслужбамі ў Маскве 28 ліставада 2010 года. Яго перавезлі ў Мінск і змясцілі ў так званую «амерыканку». Быў абвінавачаны ва ўдзеле ў акцыях анархістаў, за што быў асуджаны да 8 гадоў калоніі ўзмоцненага рэжыму. Віну не прызнаў. Выйшаў на волю праз 5 год згодна з указам аб памілаванні.

Пасля вызвалення Ігар Аліневіч з’ехаў з Беларусі, але ў 2020 годзе вярнуўся. У тым жа годзе яго затрымалі на мяжы з Украінай і абвінавацілі ў здзяйсненні крымінальных злачынстваў. Прысуд – 20 гадоў калоніі ўзмоцненага рэжыму. Палітвязень пераведзены на турэмны рэжым і адбывае зняволенне ў Следчай турме № 8 Жодзіна

🎧 Чытае Стась Дадэрка, а знайсці і паслухаць можна проста зараз на любой зручнай вам пляцоўцы. 

Беларускія аўдыякнігі (audiobooks.by)

20 Jun 2024 15:19

💥 Слухаем «Незагойную рану» Василя Быкава ад праекта «Беларуская літаратура»!

❤️ Рэліз да 100-годдзя беларускага класіка ад цудоўнай каманды

Так, вам будзе няпроста слухаць гэтае апавяданне. У ім шмат болю, хаця і няма ані бітваў, ані забойстваў, ані крыві. Ніякага геройства, рамантычных подзвігаў альбо захапляльных боек. Простая гісторыя жанчыны, якая чакае сына з вайны, а вайна даўно скончылася. Якая вайна – няважна, бо любая вайна нясе з сабой адно і тое ж. Вам будзе няпроста, але ж такія тэксты – пэўна, адзінае, што можа ўратаваць нас ад новых войнаў. Яны ўсё яшчэ ідуць, і гэта таму, што мы не хочам пра іх чуць і чытаць.

🎧 Агучыла каманда праекта «Беларуская літаратура», а знайсці і паслухаць можна проста зараз на YouTube-канале праекта і нашым сайце!

Беларускія аўдыякнігі (audiobooks.by)

17 Jun 2024 10:27

🎧 Беларускія літаратурныя падкасты

Сёння мы падрыхтавалі для вас нешта асаблівае — падборку найлепшых беларускіх літаратурных падкастаў, якія варта паслухаць кожнаму, хто любіць чытаць і цікавіцца беларускай літаратурай. Ад класікі да сучаснасці, ад вершаў да прозы — захоўвайце сабе, каб не згубіць.

1 Тры падкасты ад litradio
Серыя падкастаў Літрадыё «Адкуль бяруцца кнігі» — падкаст, у якім пісьменнікі і пісьменніцы дзеляцца жыццёвымі гісторыямі ды прыадкрываюць таемную механіку творчасці. «Супердудко» — самы суб'ектыўны аўтарскі падкаст пра беларускую літаратуру. Татальная густаўшчына і лепшыя суразмоўцы на гэтай/той палове Беларусі. «Каля літаратуры» — размовы пра літаратуру і не толькі.

Паслухаць ⬅️ 

2 «Спіс на лета» — новы падкаст ад wir.by
У першым выпуску выкладчыца Марына Казлоўская і паэтка Даша Бялькевіч абмяркоўваюць самыя важныя п'есы Купалы, які паказаў усім, як трэба пісаць вусцішныя камедыі і як смяяцца падчас катастроф, і хочуць перачытаць «Раскіданае гняздо» з прафесійным псіхолагам. А яшчэ разважаюць пра дом, крыху кпяць са шляхецкага гонару і тлумачаць, пры чым тут батлейка.

Паслухаць ⬅️ 

3 «Bellit»
Першы беларускамоўны падкаст пра літаратуру. Навінкі і класіка, беларуская і сусветная літаратура, цікавыя літаратурныя факты.

Паслухаць ⬅️ 

4 «Белліт пад піва»
Тры дзяўчыны абмяркоўваюць нетыповыя творы з беларускай літаратуры, жартуюць і п'юць піва. 

Паслухаць ⬅️ 

Беларускія аўдыякнігі (audiobooks.by)

14 Jun 2024 14:35

💥Слухаем «У капцюрох ГПУ» Францішка Аляхновіча ад «Камуніката»!

7 год у ГУЛагу за 7 гадзін.

📖 «У капцюрох ГПУ» — аповесць Францішка Аляхновіча, адразу па выданні ў 1934 г. перакладзеная на розныя мовы свету. Беларускі літаратар з Вільні задоўга да Салжаніцына ды Шаламава апісаў канцлагерную сістэму ў Савецкім Саюзе, якую зведаў знутры. Аляхновіч звяртаецца да чытача, як да суразмоўцы, цягам усяго падарожжа з Вільні, праз Менск і Віцебск, на Салаўкі ў Белым моры і назад дадому. 

У працы над аўдыяверсіяй давялося параўнаць розныя рэдакцыі тэксту з захаваннем асаблівасцяў аўтарскай мовы, удакладніць карэльскую тапаграфію, звярнуцца да кінахронікі і біяграфій згаданых у сюжэце постацяў. Галоўны персанаж «Попутчік», пад маскай якога пачаткова хаваецца аўтар, праходзячы праз пякельныя выпрабаванні, не выстаўляе сябе героем, але волю здабывае фактычна сілай уласнай думкі.

🎧 Агучыў Віктар Сямашка, а знайсці і паслухаць бясплатна можна па спасылцы на нашым сайце.  

Беларускія аўдыякнігі (audiobooks.by)

10 Jun 2024 15:36

💔  Слухаем «Турэмныя сшыткі» Алеся Бяляцкага

📓 Гэтая кніга — частка серыі «Турэмная літаратура»

Праваабаронца, лаўрэат Нобелеўскай прэміі міру Алесь Бяляцкі ў сакавіку 2023 года пакараны 10-цю гадамі пазбаўлення волі. Гэта ўжо другое зняволенне кіраўніка Праваабарончага цэнтру «Вясна» за ажыццяўленне ім грамадскай дзейнасці, за дапамогу ахвярам парушэння правоў чалавека ў Беларусі.

Першы раз Алесь Бяляцкі быў асуджаны ў 2011-м на 4 з паловай гады калоніі ва ўмовах узмоцненага рэжыму з канфіскацыяй маёмасці і спагнаннем нанесенай шкоды дзяржаве. Пакаранне адбываў у ПК № 2 г. Бабруйска, працаваў упакоўшчыкам у швейным цэху. Той свой турэмны досвед праваабаронца, літаратуразнаўца, эсэіст занатоўваў у розных сшытках, пасля вызвалення яны і склалі дакументальную кнігу «Турэмныя сшыткі».

🎧 Чытае Зьміцер Бартосік, а знайсці і паслухаць можна проста зараз на любой зручнай вам пляцоўцы.

Беларускія аўдыякнігі (audiobooks.by)

06 Jun 2024 19:17

💥«Забойства на вуліцы Макаёнка» Клёка Штучнага — хутка на пляцоўках!

🤫 Эксклюзіў ад audiobooks.by: гэты твор (зрэшты, як і інфармацыю пра аўтара) немагчыма знайсці ані ў кніжных крамах і бібліятэках, ані ў сеціве. 

😏 Заінтрыгаваныя? Сачыце за нашымі сацсеткамі, каб не прапусціць загадкавую навінку!

Беларускія аўдыякнігі (audiobooks.by)

04 Jun 2024 14:19

🤝 Дабрыдзень, даражэнькія!

Па традыцыі распачынаем чэрвень тым, што падводзім вынікі траўня. Што адбывалася ў беларускай аўдыякніжнай прасторы ў мінулым месяцы?:

📗 На Кніжным возе выйшла фэнтэзі-казка Надзеі Ясмінскай «Якуб – срэбраны чуб», а таксама «Франкенштайн» Мэры Шэлі — класіка гатычнай літаратуры.

📖 На канале «Беларускай літаратуры» цяпер можна паслухаць «Тараса на Парнасе» Канстанціна Вераніцына і апавяданне Івана Навуменкі «Жуль Верн».

📕 На старонцы беларускай інтэрнэт-бібліятэкі Камунікат з’явіўся зборнік Уладзіміра Сцяпана «Адна капейка», а таксама два творы Барыса Пятровіча: аповесць «Пуціна» і трыпціх «Стах».

🫂 Землякі баранавіцкага паэта Венанцыя Бутрыма арганізавалі запіс кнігі ягоных вершаў — цяпер яе таксама можна знайсці на нашым сайце.

🤝 У межах нашай супрацы з Радыё Свабода на лічбавых пляцоўках з’явілася аўдыяверсыя серыі мініэссэ Ўладзіміра Арлова «Імёны Свабоды», сучасныя мемуары калішняй дыктаркі беларускага тэлебачання Зінаіды Бандарэнка «Свой голас», збор выступаў Васіля Быкава «Быкаў на свабодзе», мемуары беларускай паэтэсы і пісьменніцы Дануты Бічэль «Каго помню і люблю».
📚 Для нашай каманды месяц выдаўся надзвычай прадуктыўным: мы выпусцілі «Пасажыраў карабля Тэсея» Сцяпана Стурэйкі — аповесці, якія атрымалі другое месца на Прэміі Гедройця-2023. А яшчэ мы выклалі «Плошчу Перамогі» Альгерда Бахарэвіча — авантурную прыпавесць пра ўладу і нацыю, пра цану слова і славы. Акрамя таго, на пляцоўках цяпер можна паслухаць нашумеўшы раман Аляксандра Чарнухі «Свінні».

🔥 Нашая каманда павялічылася на аднаго чалавека: прадстаўніцай audiobooks.by стала Крысціна Дробыш.
❤️ Дзякуем, што застаяцеся з намі, даражэнькія. Сачыце за навінамі — працягваем запісваць, выпускаць і слухаць сваё!

Беларускія аўдыякнігі (audiobooks.by)

01 Jun 2024 18:00

👋 Вітанкі, даражэнькія! Надышоў час адкрыць таямніцу нашай пятай аўдыякнігі-неспадзяванкі.

У траўні вы слухалі «Шлях дробнай сволачы» Евы Вежнавец — зборнік апавяданняў 2008 года, у якім аўтарка вывела галерэю нетыповых жаночых вобразаў. Яе моцныя, трывалыя гераіні шукаюць саміх сябе, спрабуюць выжыць у краіне «дробнай сволачы» і гатовыя на выпрабаванні. Дарэчы, зараз з гэтым тэкстам можна азнаёміцца толькі ў аўдыя фармаце — таму калі не паспелі паслухаць, пераходзьце па спасылцы 

А тым часам новая аўдыякніга-неспадзяванка ўжо на нашым ютуб-канале!

Нагадваем умовы: раз на месяц мы выкладаем адну платную аўдыякнігу на ютуб без назвы і аўтара. Вы слухаеце — і тым самым кідаеце выклік самім сабе: ці гатовыя вы прысвяціць некалькі гадзін свайго жыцця невядомаму тэксту? Ці даверыцеся лёсу?

Ніякіх папярэдніх стэрэатыпаў ці чаканняў. Проста аўдыякніга і вы. 

🎧 Шукайце спасылку на новую кнігу ў нашых сторыс, а таксама ў ютубе!

Беларускія аўдыякнігі (audiobooks.by)

31 May 2024 13:12

✨Слухаем «Стах» Барыса Пятровіча ад «Камуніката»!

Трыпціх «Стах», напісаны ў 90-я гады, чытаецца, як быццам быў напісаны зусім нядаўна. Вось толькі тэмы, што хвалявалі ў 90-я толькі невялікую частку беларускага грамадства, зараз закранулі большасць беларусаў. Адвечныя беларускія пытанні пададзеныя пісьменнікам у яркай форме калейдаскопа падзей, якія адбываюцца з галоўным героем. Успаміны вясковага дзяцінства, страта цноты, пошукі праўды ў палітычных спрэчках, з'яўленне «чорнага чалавека», які абвяшчае дату смерці. 

Цікава, калі б Вам абвясьцілі дакладны час сыходу, што б Вы рабілі ў апошнія дні жыцця...? Герой Барыса Пятровіча прымае свой рок мужна і... Зрэшты, ня будзем спойлерыць. Паслухайце - не пашкадуеце.

🎧 Агучыў Зьміцер Бартосік, а знайсці і паслухаць бясплатна можна па спасылцы на нашым сайце. 

Беларускія аўдыякнігі (audiobooks.by)

30 May 2024 16:12

💥 Слухаем апавяданне «Жуль Верн» Івана Навуменкі ад праекта «Беларуская літаратура»!

👀 Новая агучка класічнага твора — вельмі раім паслухаць, нават калі вы добра знаёмыя з тэкстам.

Шмат што ў гэтым апавяданні падасца вам фантастычным. Прыкладам, у ім школьнікі крадуць кнігі дзеля таго, каб іх чытаць. Ці вандруюць па свеце, не сыходзячы з месца – і гэта пры адсутнасці сучасных тэхналогій. Але нешта падасца вельмі знаёмым. Як у класе ўсе кпяць з аднаго. Як аднаму ўдаецца пераламіць крыўдную сітуацыю на сваю карысць. Як сябруюць ворагі і як варагуюць сябры…

🎧 Агучыла каманда праекта «Беларуская літаратура», а знайсці і паслухаць можна проста зараз на YouTube-канале праекта і нашым сайце!

Беларускія аўдыякнігі (audiobooks.by)

28 May 2024 18:42

👋Вітанкі, даражэнькія!

Надоечы мы выклалі відэа, у якім прапанавалі вам здагадацца, хто начытвае тэкст: актор агучкі ці штучны інтэлект.

Мы вельмі здзівіліся, але большасць з вас ставіла на ШІ

Здзівіліся, бо ведалі: беларускія тэксты, агучаныя ШІ, гучаць вось так
(а напрыканцы відэа можна ўбачыць, хто ж усё ж такі агучыў урывак такім чынам)

Але на гэтым сканчаем раскрываць свае карты: назву кнігі, як і іншыя цікавосткі пра яе, мы распавядзём троху пасля. Сачыце за навінамі, каб не прапусціць 😉

Беларускія аўдыякнігі (audiobooks.by)

27 May 2024 12:58

✨Слухаем аповесць Барыса Пятровіча «Пуціна» ад «Камуніката»!

Аповесьць «Пуціна» Барыса Пятровіча — гэта захапляльнае падарожжа студэнта-журналіста на экзатычныя для беларусаў (і еўрапейцаў увогуле) Сахалін ды Курылы ў васьмідзясятыя гады мінулага стагоддзя.

Плынь сьвядомасьці, паводле якой аповесьць напісана адным сказам і без асноўнага знаку прыпынку — кропкі, дазваляе аўтару свабодна рэфлексаваць наконт ідэнтычнасьці беларусаў у сьвеце ў параўнаньні з японцамі, шведамі, расейцамі і ныраць у глыбіні спазьнаньня сябе, навакольнай прыроды і каханьня.

🎧 Агучыў Зьміцер Бартосік, а знайсці і паслухаць бясплатна можна па спасылцы на нашым сайце.

А гэта спасылка адкрыецца ў Беларусі без VPN

Беларускія аўдыякнігі (audiobooks.by)

24 May 2024 12:26

💥 «Свінні» Аляксандра Чарнухі ў беларускім перакладзе Алеся Плоткі ўжо даступныя на пляцоўках!

Гэта было б вельмі смешна, калі б не было праўдай. Смех праз слёзы альбо слёзы праз смех — менавіта такія эмоцыі выклікае раман. Слухайце на любімых пляцоўках — поўны спіс будзе даступны неўзабаве.