Беларускія аўдыякнігі (audiobooks.by)

19 Oct 2024 08:16

Закулісьсе выданьня Марсіяніна па-беларуску 🕵🏻

Хочаце даведацца, як АБА набыла правы на пераклад Марсіяніна, колькі гэта каштавала, і чаму перакладчык, актор агучкі і рэдактар засталіся ананімнымі?
Глядзіце гутарку з сябрам АБА і заснавальнікам аўдыёвыдавецтва Audiobooks.by Мікітам Белаглазавым

https://youtu.be/jHgUXAlqeXE?feature=shared

Беларускія аўдыякнігі (audiobooks.by)

17 Oct 2024 17:30

💥 Слухаем «Уладар і Сумленне» Конрада Жывойты ад Вольнага тэатра «Чатыры сольда»!

Гэта не проста аўдыякніга, а сапраўдны аўдыяспектакль, цалкам створаны вольным тэатрам «Чатыры сольда». Створаны ў цікавых і няпростых умовах, што робіць яго яшчэ больш каштоўным. А таксама — філасофская прытча, якая падымае пытанні, актуальныя для беларусаў як сто гадоў таму, так і зараз.

Адкуль бяруцца злодзеі? Ці можна знішчыць цемру? Як дасягнуць дабрабыту? Што рабіць на раздарожжы?.. Пра гэта і не толькі распавядае філасофская паэма-прытча. «Уладар і Сумленне». Свет і цемра, дабро і зло, вернасць і здрада, розум і вар’яцтва, неба і бездань, а пасярэдзіне — чалавек на скрыжаванні свайго лёсу. Які выбар ён зробіць і чаму?

🎧 Агучылі Конрад Жывойта, Эмілія, Партызан і Паўліна, а знайсці і набыць можна па спасылцы на нашым сайце. 

Беларускія аўдыякнігі (audiobooks.by)

14 Oct 2024 14:39

👋 Дабрыдзень, даражэнькія! Сёння хочам падзяліцца з вамі неверагоднай навіной: наш збор сродкаў на стварэнне аўдыяверсіі «Зэкамерона» Максіма Знака пераваліў адзнаку ў 1200 еўра!

🫂 Вельмі ўдзячныя вам за тое, што дапамагаеце нам рабіць важную справу.
 
Калі ў вас ёсць жаданне і магчымасць далучыцца да збору, зрабіць гэта можна па спасылцы. 

Беларускія аўдыякнігі (audiobooks.by)

13 Oct 2024 18:41

💥 Слухаем «Пра смелага ваяку Мішку» Міхася Лынькова ад праекта «Беларуская літаратура» @bielaruskajalitaratura!

🐻 Новая агучка класічнага твора — вельмі раім паслухаць, нават калі вы добра знаёмыя з тэкстам.

Ці даўно вы адчувалі сябе мядзведзем? Даўнавата? Але ж гэта непарадак! Вы павінны памятаць, што жыццё ў мядзведзя – маліна. Ну не кожны, канешне, дзень, але з большага гэта даволі прыемнае жыццё, поўнае прыгодаў, мамчынай пяшчоты, лясных сяброў, а яшчэ – раптоўных пераменаў, нечаканых паваротаў лёсу, боек, трывог, перамог і сапраўдных баявых таварышоў.

🎧 Агучыла каманда праекта «Беларуская літаратура», а знайсці і паслухаць можна проста зараз на YouTube-канале праекта і нашым сайце! 

Беларускія аўдыякнігі (audiobooks.by)

10 Oct 2024 14:32

📖 «Зэкамерон» Максіма Знака: што за кніга, на аўдыяверсію якой мы збіраем сродкі?

«Зэкамерон. Вершы. Гутаркі» —  гэта апошняе дапоўненае беларускамоўнае выданне кнігі Максіма Знака, якое сёлета выйшла ў выдавецтве «Полацкія лабірынты». Дагэтуль твор можна было прачытаць толькі па-руску, а вершы і гутаркі, якія таксама ўвайшлі ў склад выдання, былі надрукаваныя ўпершыню. Кніга стала своеасаблівым дзённікам, які Максім вёў падчас першага года знаходжання ў СІЗА, калі яшчэ меў магчымасць пісаць і перадаваць свае рукапісы на волю.

Цяпер Максім — палітзняволены, які ўжо больш за паўтары гады застаецца без права ліставання і спаткання са сваякамі і абаронцамі. Насуперак абставінам, у цеснай камеры і цяжкіх умовах, Максім захаваў сілу духу і творчую свабоду, якія дазвалялі яму сягаць праз краты на шырокі прастор, спалучаючы іранічнае і сур’ёзнае, лёгкае і глыбокае, лірычнае і штодзённае.

І — насуперак абставінам — чытач ці слухач гэтай кнігі можа стаць нібы ўдзельнікам гутарак з Максімам, наведаць яго ў камеры і там за кубачкам гарбаты пажартаваць пра сумнае ці паспрачацца пра высокае. Або проста прачытаць тэксты і праспяваць песні на словы Максіма, даючы ім голас, якога яны на сёння пазбаўлены.

Далучайцеся да збору па спасылцы на галоўнай старонцы нашага сайта — няхай голас Максіма Знака будзе чутны!

Беларускія аўдыякнігі (audiobooks.by)

08 Oct 2024 13:32

🔥 Слухаем «Воўчую зграю» Васіля Быкава!

Нечаканая навінка ад audiobooks.by: шостая кніга беларускага класіка, запісаная нашай камандай.

📔 Адвечная тэма выбару ў складаных умовах акупаванай тэрыторыі і партызанскай барацьбы. Гісторыя пра чалавечыя лёсы, пра жыццёвы выбар, пра выратаванне маленькага чалавека.

Галоўны герой аповесці падчас ваенных дзеянняў вырываецца з акружэння і застаецца сам на сам з новароджаным дзіцёнкам-сіратой на руках. Прайшоўшы пекла, ён аддае дзіця, спадзеючыся, што трапіць яно ў добрыя рукі.

Сюжэт аповесці базуецца на ўспамінах былога партызана, які праз трыццаць гадоў пасля сканчэння вайны шукае таго, каму некалі выратаваў жыццё. Шукае, каб распавесці гісторыю ягонай сям’і, бацькоў, гісторыю першых дзён ягонага жыцця. Шукае, але ці знаходзіць?

🎧 Чытае Лявон Шматок, а знайсці і паслухаць можна проста зараз на нашым сайце!
 

Беларускія аўдыякнігі (audiobooks.by)

05 Oct 2024 09:10

🤝 Дабрыдзень, даражэнькія!

🍂 Падсумоўваем вынікі першага месяца восені. Што адбывалася ў нас і нашых калег у верасні?

📙 Праект «Беларуская літаратура» выпусціў аўдыяверсію рамантычнай аповесці Уладзіміра Караткевіча «Чазенія», а таксама першую частку «Людзей на балоце» Івана Мележа.

📘 А нашыя калегі з «Кніжнага воза» у дзень сваіх народзінаў выклалі «Скрозь люстэрка, і што ўбачыла там Аліса» Льюіса Кэрала.

📗 На старонцы беларускай інтэрнэт-бібліятэкі Камунікат з’явіліся тры апавяданні Змітра Дзядзенкі і раман Людмілы Рублеўскай «Забіць нягодніка, альбо Гульня ў Альбарутэнію».

📕 Разам з Асацыяцыяй Беларусаў у Амэрыцы і выдавецтвам Gutenberg Publisher мы выпусцілі «Марсіяніна» Эндзі Ўіра — культавы твор амерыканскай літаратуры, які з'явіўся адначасова ў папяровым, электронным і аўдыяфарматах.

❤️ Дзякуем, што застаяцеся з намі, даражэнькія. Сачыце за навінамі — працягваем запісваць і слухаць сваё!

Беларускія аўдыякнігі (audiobooks.by)

04 Oct 2024 13:37

👋 Вітанкі, даражэнькія! Нарэшце і надышоў час адкрыць таямніцу нашай восьмай аўдыякнігі-неспадзяванкі. 

У верасні мы вярнуліся да беларускай літаратуры: у першы восеньскі месяц вы слухалі «Шклатару» Артура Клінава — раман, назву якому дала рэальная кропка на мапе беларускай сталіцы, былы пункт прыёму шклатары, а цяпер — нонканфармісцкая галерэя, выдавецтва і кнігарня.

Як вам?

Беларускія аўдыякнігі (audiobooks.by)

26 Sep 2024 16:33

💥 Слухаем «Забіць нягодніка, альбо Гульня ў Альбарутэнію» Людмілы Рублеўскай ад «Камуніката»

Кніга «Забіць нягодніка, альбо Гульня ў Альбарутэнію» гэта вельмі ўдалы сінтаз «лёгкага чытва», кнігі для моладзі, фантастыкі, гістарычнага рамана і гуманістычнай літаратуры, якая ўздымае цяжкія, але патрэбныя для грамадства тэмы.

💬 «Мне падаецца, — гаворыць Кацярына Ваданосава, якая агучвае кнігі для Kamunikat.org, — што аўтарка зрабіла ўнікальную рэч: яна знітавала балючую, пакутлівую для беларусаў тэму сталінскіх рэпрэсій з сучасным будзённым жыццём звычайных маладых людзей, зрабіла сюжэт настолькі дынамічным, захапляльным і блізкім чытачу, што, занураючыся ў яго, мы можам ператрываць увесь жах падзеяў 1930-х гадоў. Мы не страчваем цікавасць, не адштурхоўваемся ў жаху, не маючы сілаў прапускаць у свядомасць падзеі, якія чорнай плямай ляглі на нашай гісторыі. А таксама мы пазнаем у персанажах сябе і сваіх блізкіх…»

🎧 Агучыла Кацярына Ваданосава, а знайсці і паслухаць бясплатна можна па спасылцы на нашым сайце. 

А яшчэ нагадваем, што гэтую кнігу таксама можна паслухаць у агучцы Сняжаны Дыяментавай ад нашай каманды ❤️

Беларускія аўдыякнігі (audiobooks.by)

20 Sep 2024 17:15

Ён ужо тут! 🎉 “Марсіянін” афіцыйна прызямліўся ў Гародні АБА! 🌕

Дзякуючы супрацы Асацыяцыі Беларусаў у Амэрыцы @aba_together , выдавецтва Gutenberg Publisher @gutenbergpublisher і праекта Audiobooks.by @audiobooks.by пераклад і выданьне бэстсэлера сусьветнай фантастыкі ад Эндзі Ўіра стаў магчымым.

🚀 Пагружайцеся ў неверагодныя прыгоды выжываньня на Марсе па-беларуску – цяпер у папяровым, электронным і аўдыёфарматах!
Хочаце прачытаць з тэлефона, паслухаць, або патрымаць у руках – выбар за вамі.

🔗 Набывайце кнігу на gutenbergpublisher.eu, litarka.com або па спасылцы ў профілі.
Электронную версію можна знайсці на kobo.com, а аўдыёверсію — на audiobooks.by.

Дзяліцеся сваімі ўражаньнямі пасля падарожжа на Марс у каментарах ніжэй!

#gutenbergpublisher #themartian #марсіянін #чытаемпабеларуску #чытаемразам #кнігінабеларускаймове #проза #кніжныклуб

Беларускія аўдыякнігі (audiobooks.by)

16 Sep 2024 17:01

Гатовы дасьледаваць Марс па-беларуску? 🌍🚀

Захапляльная гісторыя выжываньня на Чырвонай плянэце цяпер на роднай мове! 📚

Мы з радасьцю анансуем, што дзякуючы супрацы Асацыяцыі Беларусаў у Амэрыцы, выдавецтва Gutenberg Publisher і праекта Audiobooks.by “Марсіяніна” Эндзі Ўіра можна будзе набыць у папяровым, электронным і аўдыёфарматах!

🔴 Дата рэлізу: 20 верасьня! 🔴

У незалежнасьці ад таго, ці любіце вы адчуваць папяровую кнігу ў руках, ці аддаеце перавагу чытаць на гаджэтах, або паглыбляцца ў гісторыю праз аўдыё, гэта падарожжа, якое вы не можаце прапусьціць!

Беларускія аўдыякнігі (audiobooks.by)

05 Sep 2024 11:22

✨Аўдыякніга-неспадзяванка верасня ўжо на нашым ютуб-канале!

Нагадваем умовы: раз на месяц мы выкладаем адну платную аўдыякнігу на ютуб без назвы і аўтара. Вы слухаеце — і тым самым кідаеце выклік самім сабе: ці гатовыя вы прысвяціць некалькі гадзін свайго жыцця невядомаму тэксту? Ці даверыцеся лёсу?

Ніякіх папярэдніх стэрэатыпаў ці чаканняў. Проста аўдыякніга і вы. 

🎧 Шукайце спасылку на новую кнігу ў нашых сторыс, а таксама ў тэлеграме і ютубе!

Беларускія аўдыякнігі (audiobooks.by)

04 Sep 2024 10:46

🤝 Дабрыдзень, даражэнькія!

☀️ Падсумоўваем вынікі апошняга месяца лета. Што адбывалася ў нас і нашых калег у жніўні?

📙 Праект «Беларуская літаратура» выпусціў аўдыяверсію прытчы Змітрака Бядулі «Бондар».

📓 Серыя «Турэмная літаратура» завяршылася выхадам «Фарбаў паралельнага свету» — зборніка апавяданняў і эсэ журналіста, актывіста і палітвязня Міколы Дзядка. На жаль, пятая кніга серыі пакуль не можа пабачыць свет, але мы спадзяёмся, што хутка сітуацыя зменіцца. 

📗 На старонцы беларускай інтэрнэт-бібліятэкі Камунікат з’явіўся твор праваабаронцы,  лаўрэата Нобелеўскай прэміі па літаратуры і палітычнага вязня Алеся Бяляцкага «Асьвечаныя беларушчынай», апавяданні Алега Дашкевіча «З вышыні птушынага палёту» і раман Людмілы Рублеўскай «Сутарэнні Ромула».

🤝 У межах нашай супрацы з Радыё Свабода на лічбавых пляцоўках з’явіліся «Дзе пачую талаку, туды ногі валаку» Сяргея Вітушкі і «Былі, ёсьць, будзем» Алеся Белакоза — апошнія кнігі серыі «Бібліятэка Свабоды», якія на працягу года з’яўляліся на нашым сайце.
.
📕 А нашая каманда выпусціла ажно дзве навінкі: «Забойства на вуліцы Макаёнка» Клёка Штучнага — незвычайная кніга незвычайнага аўтара, апублікаваная ўпершыню і эксклюзіўна ў аўдыёфармаце. І, канечне, культавая «Дарога» Кормака Макарці — адзін з найлепшых твораў амерыканскай літаратуры XXI стагоддзя, кніга-лаўрэат Пулітцэраўскай прэміі.

❤️ Дзякуем, што застаяцеся з намі, даражэнькія. Сачыце за навінамі — працягваем запісваць і слухаць сваё!

Беларускія аўдыякнігі (audiobooks.by)

01 Sep 2024 17:38

🌞 Топ аўдыякнігі лета ад audiobooks.by!

Даражэнькія, у першы дзень восені дзелімся з вамі найбольш папулярнымі кнігамі гэтага лета - у нашым Instagram. Ці вашыя летнія успаміны таксама павязаныя з гэтымі творамі?

Беларускія аўдыякнігі (audiobooks.by)

27 Aug 2024 16:57

💔 Беларуская турэмная літаратура ўжо на пляцоўках

Першапачаткова гэта павінна была быць серыя аўдыякніг пяці беларускіх палітвязняў, чацвёра з якіх і сёння знаходзяцца за кратамі. Кнігі Ігара Аліневіча, Міколы Дзядка і Алеся Бяляцкага можна паслухаць ужо цяпер — аднак на дадзены момант мы вымушаныя скончыць серыю без «Каменнага сэрца» Паўла Севярынца. Мы верым, што хутка настане час, калі публікацыя гэтай кнігі не будзе несці пагрозу як яе аўтару, так і чытачам — таму прытрымаем яе да лепшых часоў. Чакаем разам, даражэнькія.

Астатнія 4 аўдыякнігі серыі вы можаце паслухаць проста зараз:
“Турэмныя сшыткі” Алесь Бяляцкі
“Еду ў Магадан” Ігар Аліневіч
“Бунт батанікаў” Зміцер Дрозд
“Фарбы паралельнага свету” Мікола Дзядок

Беларускія аўдыякнігі (audiobooks.by)

18 Oct 2024 17:13

📚 Слухаем дзве навінкі ад «Камуніката»!

✉️ «Пасланне ў іншасвет, альбо Развагі максімаліста» Васіля Жуковіча ў агучцы Васіля Калача

Аповесць Васіля Жуковіча «Пасланне ў іншасвет, альбо Развагі максімаліста» — твор складаны і спрэчны. Падсумаванне і пераасэнсаванне жыцця і досведу. Аповесць сустрэла чытача, калі пісменнік перакрочыў мяжу ў 75 год. Тут пераплецены рэфлексіі Другой Сусветнае Вайны, рэпрэсій савецкіх часоў, вясковага жыцця і віру палітычных падзей пачатку ХХІ стагодзя. Амаль пяць гістарычных эпох стварылі сваеасаблівы хаос на старонках аповесці. Тут і спроба 75-гадовага аўтара зразумець 20-гадовага героя, спроба перанесці гэтае асэнсаванне на падзеі вайны і акупацыі. Мэтанакіраванае спрашчэнне формы і сюжэта. Сумбур сэнсаў і наратываў. Аднак пры гэтым — шчыры і чысты анатамічны зрэз сваёй свядомасці. Хочаш разумець эпоху — занурысь у гэты тэкст, але не грэбуй ратавальнай камізэлькай асэнсавання!


🛣️ «Пуцявіна» Барыса Пятровіча ў агучцы Змітра Бартосіка

Аповесць пісалася амаль праз трыццаць гадоў пасля той памятнай паездкі праз увесь СССР з Усходу на Захад. Аўтар не стаў перагрувашч­ваць тэкст краязнаўчымі ды іншымі турыстычнымі звесткамі, а ўзяў за аснову асабістае ўспрыманне таго часу, той краіны, людзей, якія ў ёй жылі, і запрашае вас нібы на машыне часу перамясціцца на адзін месяц у другую палову кастрычніка і пачатак лістапада 1983 года. Вярнуцца ў СССР, акунуцца ў жыццё некалі аграмаднай краіны з яе даўно забытымі клопатамі і праблемамі, а, магчыма, і радасцямі... Аўтар не меў жадання паказаць жахі савецкага жыцця ці прыхарошыць яго, а толькі паспрабаваў сказаць праўду пра той час.

🎧 Знайсці навінкі можна на нашым сайце, а паслухаць — на любой зручнай вам пляцоўцы!

Беларускія аўдыякнігі (audiobooks.by)

16 Oct 2024 11:38

🎁 Падтрымай збор — атрымай падарунак! 

Працягваем збіраць сродкі на агучку «Зэкамерона» Максіма Знака!

Мы створым сапраўдны аўдыяспектакль, у якім загучаць галасы акцёраў легендарнага Купалаўскага тэатра. Для гэтага нам вельмі патрэбна вашая дапамога — а каб аддзячыць за яе, мы падрыхтавалі адмысловыя ўзнагароды для кожнага, хто далучыцца да збору.

10 еўра — згадка ў аўдыяверсіі

Ваш унёсак важны, і мы хочам падзякаваць асабіста! Калі вы ахвяруеце 10 еўра, ваша імя прагучыць у фінальных тытулах аўдыяверсіі. Гэта маленькі, але значны спосаб стаць часткай гісторыі і падтрымаць вялікую справу. 

20 еўра — стыкерпак

Ахвяруючы 20 еўра, вы атрымаеце эксклюзіўны стыкерпак, распрацаваны спецыяльна для нашага праекта.

50 еўра — падпісаная Купалаўцамі папяровая версія кнігі

За ваш данат у 50 еўра вы атрымаеце папяровую версію кнігі, падпісаную акцёрамі, якія працуюць над аўдыяспектаклем.

60 еўра — кубачак ручной работы з цытатай Максіма Знака

Падтрымліваючы праект на 60 еўра, вы атрымаеце ўнікальны кубачак ручной работы з адной з цытат Максіма Знака. Дарэчы, гэтыя кубачкі робіць сястра Максіма Ірына — прыклады вырабаў вы можаце пабачыць тут.

70 еўра — квіток на спектакль Купалаўцаў «Зэкамерон» +  праход за кулісы і праграмка з падзякай ад акцёраў

Калі ахвяруеце 70 еўра, вы атрымаеце квіток на спектакль Купалаўцаў і магчымасць патрапіць за кулісы, а таксама праграмку з асабістай падзякай ад акцёраў, якая застанецца прыемным напамінам пра гэты вечар.

200 еўра — экскурсія на студыю гуказапісу ў Варшаве з кававым пачастункам

Ахвяруючы 200 еўра, вы атрымліваеце магчымасць наведаць студыю гуказапісу ў Варшаве! Вас чакае экскурсія па студыі, дзе вы зможаце паглядзець, як ствараюцца аўдыякнігі, а таксама кава і прыемная размова.

І, канечне, да кожнага лота — наша вялікая падзяка за ваш уклад у гэты праект ❤️ Разам мы зробім так, каб голас Максіма Знака загучаў для ўсіх!

Далучайцеся па спасылцы

Беларускія аўдыякнігі (audiobooks.by)

14 Oct 2024 14:33

💥 Слухаем «Трэба ўявіць Сізіфа шчаслівым» Валянціна Акудовіча ад «Камуніката»

💬 «Гэтая кніга шмат пра што і пра каго, але найперш яна пра стваральнікаў… Пра тых хто дабрахоць падняў з поду і ўскінуў сабе на плечы цяжар, які ён называе “мая краіна”. З дня ў дзень яны рушаць з гэтым цяжарам усё вышэй і вышэй, каб аднойчы ўбачыць, як камень з грукатам зноў скоціцца долу. А значыць трэба яшчэ раз вяртацца да пачатку пачаткаў… І мы вяртаемся!» — Валянцін Акудовіч.

🎧 Агучыў Зміцер Бартосік, а знайсці і паслухаць бясплатна можна па спасылцы на нашым сайце.  

Беларускія аўдыякнігі (audiobooks.by)

13 Oct 2024 09:30

👥 Аўдыяспектакль паводле «Зэкамерона» Максіма Знака: хто працуе над праектам?

Усё пачалося з таго, што нашая каманда даўно марыла зрабіць аўдыяверсію гэтай кнігі. А потым мы даведаліся, што сёлета купалаўцы Сяргей Чуб і Алег Гарбуз разам з музыкам Уладзімірам Пугачом і рэжысёрам Войтэкам Урбаньскім прэзентавалі спектакль паводле «Зэкамерона». І тут мы падумалі: чаму б нам не аб’яднацца? 

Такім чынам, Алег Гарбуз, Сяргей Чуб і Уладзімір Пугач будуць працаваць над агучкай і музыкай. Са свайго боку, наша каманда ўзялася за ўсю «закадравую» працу: мы арганізавалі збор сродкаў, рыхтуем візуальны кантэнт, пішам для вас гэтыя тэксты і робім усё магчымае, каб увасобіць праект у жыццё!

😉 Далучайцеся да праекта і вы — зрабіць свой унёсак можна па спасылцы на галоўнай старонцы нашага сайта!

Беларускія аўдыякнігі (audiobooks.by)

09 Oct 2024 15:30

📣 Запускаем збор сродкаў на запіс кнігі Максіма Знака «Зэкамерон»!

Мы, каманда audiobooks.by у супрацы з Вольнымі Купалаўцамі, распачынаем збор сродкаў на ўнікальны праект — стварэнне аўдыякнігі паводле апошняга беларускамоўнага выдання кнігі юрыста, адваката і палітвязня Максіма Знака.

Гэта будзе сапраўдны аўдыяспектакль, героі якога будуць размаўляць добра вядомымі вам галасамі актораў легендарнага Купалаўскага тэатра. Мы аб’ядналіся, каб даць магчымасць голасу Максіма Знака прагучаць паўсюль, дзе можа быць уключаны аўдыязапіс. Але без вашай дапамогі нам не даць рады.

Далучайцеся да збору па спасылцы — робім важную справу разам! 

А таксама сачыце за абнаўленнямі ў нашых сацсетках — бліжэйшымі днямі і будзем распавядаць пра праект больш падрабязна. А калі вам карціць даведацца больш ужо зараз — глядзіце інфармацыю пра збор на платформе http://gronka.org!

Беларускія аўдыякнігі (audiobooks.by)

06 Oct 2024 13:23

👀 Ці вы ўжо бачылі сёлетні кароткі спіс прэміі Гедройця?

А мы да вас з ачуменнай навіной: нашая каманда ўжо пачала запісваць адну з кніг, якія ў хуткім часе пазмагаюцца за галоўную літаратурную ўзнагароду года!

🤔 Ці здагадаецеся па ўрыўку, якую?

Беларускія аўдыякнігі (audiobooks.by)

04 Oct 2024 13:38

✨Аўдыякніга-неспадзяванка кастрычніка ўжо на нашым ютуб-канале!

Нагадваем умовы: раз на месяц мы выкладаем адну платную аўдыякнігу на ютуб без назвы і аўтара. Вы слухаеце — і тым самым кідаеце выклік самім сабе: ці гатовыя вы прысвяціць некалькі гадзін свайго жыцця невядомаму тэксту? Ці даверыцеся лёсу?

Ніякіх папярэдніх стэрэатыпаў ці чаканняў. Проста аўдыякніга і вы. 

🎧 Шукайце спасылку на новую кнігу ў нашых сторыс, а таксама ў тэлеграме і ютубе!

Беларускія аўдыякнігі (audiobooks.by)

02 Oct 2024 12:46

👀 Як з’явілася ідэя выдаць «Марсіяніна» па-беларуску?

Вось так пра гэта распавядае @racyja Мікіта Белаглазаў, прадзюсар праекта і кіраўнік audiobooks.by:

– Ідэя праекта з’явілася таму, што я далучыўся да Асацыяцыі Беларусаў у Амерыцы, і як чалец Асацыяцыі я вырашыў, што было б класна, каб мы зрабілі нешта для беларускай культуры, для беларускіх кніг з боку амерыканскіх беларусаў. 

І таму з’явілася ідэя, што давайце паспрабуем перакласці на беларускую мову і выдаць штосьці з амерыканскіх кніг. І хацелася перакласці не класічную, а нейкую сучасную кнігу, якая выйшла цягам апошніх дзесяці гадоў.

Беларускія аўдыякнігі (audiobooks.by)

25 Sep 2024 11:01

📚 Слухаем ажно тры навінкі ад «Камуніката»!

Тры апавяданні Змітра Дзядзенкі ў агучцы Змітра Бартосіка: абірайце, якое вам больш даспадобы!

📙 «Гісторыі ў прыцемках: Вуаерыст»

«Вуаерыст» гэта дэтэктыўны трылер у жанры «нуар», у якім падзеі часоў станаўлення БНР пачынаюць самым драматычным чынам уплываць на нашыя часы.

📗«Гісторыі ў прыцемках: Яйкі птушкі Рух»

«Яйкі птушкі Рух» гэта апавяданне Змітра Дзядзенкі, поўнае таямнічай містыкі. Гісторыя, у якой стары заклён, знойдзены ў судовых дакументах часоў росквіту ВКЛ, пачынае ўплываць на лёсы сучаснікаў.

📘«Гісторыі ў прыцемках: Голем з Малой Мар’ямпольскай»

«Голем з Малой Мар’ямпольскай» гэта дэтэктыўная аповесць, дзея якой разгортваецца ў Воршы часоў пашырэння БССР. У старасвецкім доме знакамітага на ўвесь горад хірурга адбываецца забойства маладой жанчыны, сястры гаспадара дому. Але сляды забойства вядуць... у Прагу часоў Францыска Скарыны.

🎧 Знайсці кнігі можна на нашым сайце, а паслухаць — на сайце Камуніката!

Беларускія аўдыякнігі (audiobooks.by)

17 Sep 2024 09:11

💥 Слухаем першую частку «Людзей на балоце» Івана Мележа ад праекта «Беларуская літаратура» @bielaruskajalitaratura!

👀 Новая агучка класічнага твора — вельмі раім паслухаць, нават калі вы добра знаёмыя з тэкстам.

Ну што ж, набярыце паветра ў лёгкіе — перад вамі беларускі мастхэв, эпапея і панарама, энцыклапедыя і самы поўны зборнік беларускіх мемаў. Крыўдаваць ці не, калі нехта назаве вас Васілём Дзятлікам, ці прынясе вам шчасце характар Ганны Чарнушкі, ці лёгка быць Яўхімам і ці складана — Хадоскай, усе гэтыя пытанні, хочам мы таго ці не, беларусам даводзіцца вырашаць усё жыццё.

🔔 Гэта першая частка твора, а каб не прапусціць другую, раім націснуць на званочак на ютуб-канале «Беларускай літаратуры»

🎧 Агучыла каманда праекта «Беларуская літаратура», а знайсці і паслухаць можна проста зараз на YouTube-канале праекта і нашым сайце!

Беларускія аўдыякнігі (audiobooks.by)

06 Sep 2024 16:42

💥 Слухаем навінку ад «Кніжнага Воза» @knizhnyvoz: «Скрозь люстэрка, і што ўбачыла там Аліса» Льюіса Кэрала!

🎁 Віншуем калег з днём народзінаў і цудоўным рэлізам!

Адна з самых загадкавых гісторый класічнай літаратуры Вялікай Брытаніі. Кніга, выдадзеная яшчэ ў 1871 годзе вабіць і зачароўвае не толькі дзяцей, але і дарослых. Дзяўчынка Аліса прайшла скрозь люстэрка і апынулася ў свеце, які ўяўляе сабой вялікую шахматную дошку. Гаваркія кветкі і лес, у якім зніклі ўсе імёны. Паядынак паміж Львом і Аднарогам, рыцары ды каралевы. Блізнят Гу-та-та і Гу-ля-ля ды круглае яйка, якое ператвараецца ў Жаўтуна-Баўтуна.

🎧 Агучыла Крысціна Дробыш, а паслухаць можна проста зараз на «Кніжным возе»

🎥 А таксама глядзіце анімаваную казку з ілюстрацыямі Кацярыны Дубовік і анімацыяй Насты Кветкі на YouTube-канале аўдыявыдавецтва!

Беларускія аўдыякнігі (audiobooks.by)

05 Sep 2024 11:21

👋 Вітанкі, даражэнькія!

Вось і надышоў час адкрыць таямніцу нашай восьмай аўдыякнігі-неспадзяванкі. 

Гэтым разам мы абралі твор замежнай літаратуры. У жніўні вы слухалі «І ўзыходзіць сонца» Эрнэста Хэмінгуэя — раман, які шмат хто лічыць найлепшым творам амерыканскага пісьменніка. 

Як вам?

Беларускія аўдыякнігі (audiobooks.by)

03 Sep 2024 09:25

💥 Слухаем «Чазенію» Уладзіміра Караткевіча ад праекта «Беларуская літаратура»

👀 Новая агучка класічнага твора — вельмі раім паслухаць, нават калі вы добра знаёмыя з тэкстам.

Хутчэй за ўсё, гэта найлепшая гісторыя кахання ў нашай літаратуры. Так, вам давядзецца прабірацца да яе звярынымі сцежкамі праз ціхаакіянскую тайгу, далучыцца да праблем ядзернай фізікі і эвалюцыйнай біялогіі, але з якой лёгкасцю вы пройдзеце ўсе гэтыя сцежкі за руку з найлепшым апавядальнікам беларускай літаратуры!

🎧 Агучыла каманда праекта «Беларуская літаратура», а знайсці і паслухаць можна проста зараз на YouTube-канале праекта і нашым сайце!

Беларускія аўдыякнігі (audiobooks.by)

30 Aug 2024 15:49

💥Слухаем «Сутарэнні Ромула» Людмілы Рублеўскай ад «Камуніката»

💬 «Бываюць кнігі, агучванне якіх даецца мне цяжка — гаворыць Кацярына Ваданосава, якая агучвае кнігі для Kamunikat.org — З напругай я пераадольваю кожную старонку, збегі зычных муляюць, манатоннасць сюжэта спрабуе закрасціся ў голас, які міжволі страчвае фарбы ды інтанацыі... «Сутарэнні Ромула» - поўная супрацьлегласць такім кнігам. Раман вельмі дынамічны, насычаны сюжэтнымі ніткамі, іх перапляценнямі, повязямі... Гэта напраўду цікавая кніга. Калі я чытала яе, мне падавалася, што я нагбом п'ю шклянку халоднай вады ў спякотны дзень: хутка, прагна, з азартам. Розныя гістарычныя эпохі, блізкія і далёкія адначасова, яскрава прапісаныя героі, якім мы спачуваем, якіх разумеем, з якімі смяемся і плачам, ненавідзім ды кахаем... 

🎧 Агучыла Кацярына Ваданосава, а знайсці і паслухаць бясплатна можна па спасылцы на нашым сайце.  

Беларускія аўдыякнігі (audiobooks.by)

22 Aug 2024 10:05

💥Слухаем «З вышыні птушынага палёту» Алега Дашкевіча ад «Камуніката»

Апавяданні Алега Дашкевіча друкаваліся ў розных перыядычных выданнях Беларусі на працягу больш як дваццаці гадоў, але сабраныя разам у кнігу ўпершыню. 

Гэта своеасаблівыя замалёўкі-рэпартажы з мінулага і нашага стагоддзя (тысячагоддзя!), у якіх дакладна, сур’ёзна і з гумарам перададзены той час, падзеі і надзеі беларусаў, а праўдзівей — само нашае жыццё.

🎧 Агучыў Зьміцер Бартосік, а знайсці і паслухаць бясплатна можна па спасылцы на нашым сайце.