64545
قناة لنشر كتاباتي في مختلف المجالات
الذكاء الصناعي
*️⃣ حكومة أبو ظبي أعلنت عن خطة تستثمر فيها 13 مليار درهم عشان تتحول في 2027 لتصبح أول حكومة تعتمد الذكاء الصناعي في العالم.
*️⃣ ترامبو اعلن عن مشروع ستارجيت للذكاء الصناعي بقيمة 500 مليار دولار.
*️⃣ السعودية ستعلن قريباً عن مشروع ضخم ب 100 مليار دولار في مجال الذكاء الصناعي؛ وبتخطط السعودية بحلول 2030 تبقي استثماراتها السنوية في الذكاء الصناعي 70 مليار دولار.
*️⃣ شركة بايت دانس المالكة لتطبيق تيك توك الشهير أعلنت إنها هتصرف 12 مليار دولار السنة دي 2025 في الذكاء الصناعي.
*️⃣ الصين اعلنت عن صندوق (جديد) للاستثمار في للذكاء الصناعي برأس مال 8.2 مليار دولار... دا مجرد استثمار جديد اعلن من يومين
*️⃣ محدش يقولي مصر فين؛ روح اختم الورقة دي من الدور الثالث وبعدين تعالي كلمني 😁 بهزر طبعا أكيد عندنا خطة بس مش عاوزين حد يبوظها لنا فشغالين في السر عشان نبهرهم؛ فاكرني بهزر او بتريق 🤔؛ احنا خلاص خلصنا الإصدار الأول من استراتيجية الذكاء الصناعي المصري اللي بداناها في مايو 2021.
⬅️ إمبارح مصر كشفت عن الإصدار الثاني من استراتيجية الذكاء الاصطناعي وهي تعتمد على 6 محاور أساسية وهي محور الحوكمة ومحور للتكنولوجيا ومحور البيانات ومحور البنية التحتية ومحور النظام البيئي ومحور المهارات. آخر 3 محاور هي تبع الاصدار الثاني؛ الاصدار الأول كان حوكمة وتكنولوجيا وبيانات. ضيفنا 3 محاور في الاصدار الثاني. ولسه في اصدارات قادمة جديدة يمكن سنة 27 او 28 كده.
عارفين العدوان الثلاثي؛ هو مين اللي كسب في العدوان الثلاثي؟
*️⃣ خساير مصر كام؟ طبعاً الارقام بتختلف حسب المصادر بس مصر خسرت ما بين 2500-3000 شهيد... نبص العدو بقي؛ فرنسا عندنا 10؛ ايوا 10 مستغرب الرقم ليه؛ انجلترا خسائرها أكبر وصلت ل 22 يعني خساير انجلترا وفرنسا معا 32... وصراحة في مصادر بتقول العدد 80-90 وانجلترا وفرنسا خبوا... وولاد المبقعة عندهم خساير كبيرة وصلت ل 172.
*️⃣ لما بييجي اي حد يكتب عن الحرب دي بيقول ايه؟ انتصار عسكري لدول العدوان الثلاثي؛ وانتصار سياسي لمصر.
*️⃣ انتصار عسكري ليهم يعني مدخلوش في معركة واتهزموا؛ سحقوا مصر كليا؛ شايف ارقام الخساير فوق؟ المصابين بقي يقال مصر عندها 5000 مصاب و 6000 أسير... الفرنسيين عندهم 33 مصاب وانجلترا 97 مصاب 😔 وحتي ولاد ال... اللي وصلوا ل 800 مصاب.
*️⃣ دا مصر من ضمن خسائرها مدمرة حربية تدعي إبراهيم الأول اتأسرت واسرائيل اخدتها وعدلتها وبقت سفينة حربية تبعهم وهجموا علينا بيها في حرب 1967... دا تم إجبار مصر على الغاء قرار الملك فاروق باغلاق مضيق تيران ومنع الملاحة العسكرية للعدو وتفتيش أي سفينة مدنية تعدي حتي لو امريكية او انجليزية ولو شايلة سلع مصر حاظرة دخلوها لميناء إيلات كانت السفينة بترجع.. واستمر القرار تفتيش السفن من 1949 لغاية الغاءه في 1957.
*️⃣ فعسكرياً انتا اتسحقت؛ لكن مصر انتصرت؛ العدو جه مصر أهدافهم محددة؛ القضاء علي النظام الناصري وفشلوا؛ واستعادة قناة السويس وفشلوا وايقاف دعم مصر للثورة الجزائرية وفشلوا... بل امعاناً في الفشل بعد الحرب حكوماتهم سقطت.
*️⃣ انجلترا يوم 22 ديسمبر غادر اخر جندي إنجليزي؛ يوم 9 يناير انهارت حكومة إيدن وانتهي مستقبله السياسي فمن 1957 لغاية ما مات سنة 1977 ممسكش اي منصب تاني ولا حتي عضو برلمان؛ تقاعد وقعد عالكنبة ولبس الجلابية الانجليزي.
*️⃣ فرنسا بقي كانت حكومي (كوتي) وأصلا كانت غرقانه في المشاكل الداخلية والثورة الجزائرية مطلعه عينهم؛ ضحي كوتي في يونيو 57 ب (موليه) رئيس الوزراء وممسكش تاني باقي حياته ولا حتي وزير ري وان كان فضل عضو برطمان... لكن في النهاية في 1959 انهارت الجمهورية الرابعة الفرنسية وقعدوا كلهم في البيت.
*️⃣ ولاد المبقعة بقي وضعهم احسن؛ فضلوا قاعدين في سيناء لمارس 1957 واخدوا فك حصار مصر البحري عليهم وتشغيل ميناء إيلات فالحكومة كملت ورباعي بن جوريون وجولدا مائير وشيمون بيريز وموشيه ديان بعد كده وضعهم بقي أفضل.
*️⃣ فهنا ييجي السؤال؛ انتا خسرت ولا كسبت في حرب 56؟ خسائرك 10 اضعاف العدو؛ اتدمرت مدينة بورسعيد واتضربت القاهرة وإسكندرية بالطيران... وتم اجبارك علي فك الحصار البحري؛ وتم اجبارك علي دفع تعويضات وشراء قناة السويس لدرجة ان مصر اخدت قروض من السوفيت عشان تبني السد العالي لان ايراد القناة رايح لسداد سعرها.
*️⃣ لكن بسبي عدم تحقيق العدو لاهدافه بتتكتب كده في الكتب... حرب 1956 تسببت في انتصار عسكري لجيش الثلاثي وانتصار دبلوماسي سياسي لمصر... اسمها بقي يتردد في كل مكان وبقت رمز للصمود حول العالم. وللتذكير انا ضد عبد الناصر والفكر الناصري ككل لكن للأمانة بس بسبب الحرب دي بقي هو الرمز في العالم الثالث؛ بقي يعتبر UnderDog للكوكب.
*️⃣ فرؤيتك الفلسطنيين كسبوا ولا خسروا؛ هي زي حرب 56 لو شايف مصر خسرت فغزة خسرت؛ لو شايفنا كسبنا فبرضك هما كسبوا. بالمناسبة هما قتلوا واصابوا من ولاد الكلب 10 اضعاف اللي احنا عملناه... بل اللي اصابوه منهم يفوق اللي جيوش مصر وسوريا المدعومين من كوريا الشمالية وكوبا والعراق والمغرب والاردن والسعودية اصابوه للعدو في حرب 73... فبلاش تقلل من مجهود الآخرين...
⬅️ بالنسبة لي احنا اللي انتصرنا في 56 رغم الخسارة العسكرية والتنازلات
بالرخم إني بعتبر نفسي شخص أرشيفي لكن نادر ما بتصور؛ عندي صور وداتا كثير قوي عن تفاصيل كثير... بس صور شخصية ليا دا نادر؛ عشان كده قعدت أدور كثير على صورة ليا مع أحمد أبو زيد 😔.
*️⃣ أنا مكنتش في الظروف العادية بتكلم مع أحمد كثير؛ وغالباً هو بيحرم يكلمني 🤣؛ يبعت يسألني في موضوع أرد عليه برسايل صوتية نص ساعة وكده؛ عارف صاحبك اللي تقوله صباح الخير يرد عليك 100 رسالة؛ تخاف تقوله صباح الخير 😁 ... بالمناسبة البودكاست الأخير أصلاً حصل كده.
*️⃣ أحمد بعت يسألني في موضوع في رسالة؛ رديت عليه بعدد مهول من الرسايل هسيب صورة للشات في التعليقات دا 😁 بعت له 23 رسالة صوتية بمجموعة 56 دقيقة و 13 ثانية (خليت ChatGPT يجمع لي المدد)؛ أحمد قالي انتا عملت بودكاست في الواتس لا احنا نصور واحد تاني تقول الكلام دا فيه ايه رأيك؟ قولت له ماشي بس عاوز لحمة محمرة مش مسلوقة 🤣...
*️⃣ اه أومال ايه تقمصت هنيدي في فيلم فول الصين العظيم لما قال عاوز فول بقوطة ومحدش ياكل معايا 😁؛ هو كده الموضوع بسيط وأحمد بسيط قوي والكلام بيكون على طبيعتنا عادي؛ البودكاستات متصورة واحنا حافيين 😁.
⬅️ ربنا يفك كربك يا أحمد النهاردة إن شاء الله
توضيح بخصوص بوست إمبارح الصبح لما قولت عودة قناة السويس تعني 6 مليار دولار مفقوده وكذا حد اعترض وقال مبالغ فيه
*️⃣ دا ميزان المدفوعات الخاص الربع الثالث السنوي 2023 و 2024
*️⃣ هتلاقي قناة السويس حققت ال 3 شهور قبل الطوفان 2.399 مليار دولار؛ وال 3 شهور المماثلة من 24 حققت 931 مليون دولار يعني الفارق 1468 مليون دولار يعني متوسط شهري 489 مليون نقول 500 مليون دولار شهري يعني 6 مليار دولار سنوي اللي كنت قولتها
⬅️⬅️ وبشكل عام دا احدث ميزان مدفوعات لمصر لو حد حابب يعرف دخل الدولة الدولاري ككل وانفاقها في الربع
مبروك لأخواتنا؛ هانت 3 أيام والغمة تنزاح فاضل خميس وجمعة وسبت وطبعاً الكلاب هيسعوا خلال 3 أيام دول يعملوا أخر خبطات قذرة وأكبر عدد ممكن... تعالوا نبص تأثير نهاية على الاقتصاد.
الاقتصاد العالمي
قناة السويس
الشاحنات
إعادة الإعمار
الهوت ماني
أسئلة محيراني
*️⃣ هو فين انستاباي للشركات اللي المركزي قال هيتم قبل نهاية 2024. يعني البنوك عمالة تحذر في العملاء اياكم تستخدموا الحساب الشخصي لتحويلات الشغل؛ في نفس الوقت مش فاتح انستاباي للشركات 🤔.
*️⃣ طيب هو فين دعم المزيد من البنوك ل Apple Pay؛ ايه خلاص كده الثلاثي دا بس؟
*️⃣ طيب هو جوجل Wallet هتشتغل امتي بقينا نص يناير. جوجل من طرفها وفرت البرنامج في الاستور المصري؛ ايه بقي؟؟؟
*️⃣ طيب هو منظومة التحويل الفورية IPN بتسمح للبنوك بتحويلات ضخمة عادي وبنك مصر وبنك اسكندرية دامجينها في برامجها ب ليميت 500 ألف يومي و5 مليون شهري... هتفضل لغاية امتي انستاباي سامحه بتحويل حد اقصي 70 بالعملية 120 باليوم 400 بالشهر.
*️⃣ طيب هو ازاي انتا فتحت للمصريين بالخارج تحويلات فورية وحاطط لهم ليميت انستاباي التقليدي 😁 ليا صديق بيحول من يومين لمصر بالتحويلات الفوري الجديد قالي مش عارف احول اكثر من 5 الاف ريال؛ قولت له عشان متعديش ال 70 الف جنية 🤔. مصر بتحافظ علي فلوسك مش عاوزاك تحول كثير 😁.
*️⃣ طيب منظومة تحديث الفلوس للبلاستيك وقفت كده علي 20 جنية خلاص واخدنا اللقطة... أنا مش بحب أصلا الورق البلاستيك دا لكن ايه جبنا مطبعة عشان نطبع ورقة 10 و 20 وخلاص 😁.
*️⃣ طيب مفيش فئة 500 و 1000 زي الخليج ليه؟ مهو لا سامح بتحويلات فورية كبيرة ولا سامح بورق كبير؛ انتا بتشل النشاط التجاري في مصر ليه؟ لما صدرت ورقة 200 جنية سنة 2007 كانت قيمتها 35 دولار كنت تفكها فلوووس... دلوقتي بقت متجبش 4 دولار... قيمتها الدولارية سنة 2007 تساوي 1800 جنية... ادينا ورقة ب 500 او 1000 بقي سهل شوية شيل الورق.
أسئلة مش لاقي لها اجابة وربنا يكرم وتتحل في القطاع ال Slow Motion المصري... تقريبا الفيلم المفضل للقطاع المصرفي هو زوتوبيا وشخصية فلاش الموظف الحكومي للي شاف الفيلم 😁😁😁
أنا اللي لفت نظري أكثر في حرائق أمريكا؛ مش موضوع الشماته وأحسن ولعوا عقال ربنا؛ ولا الممثلين اللي خسروا منازلهم ولا المليارات اللي اتبخرت ووو
*️⃣ اللي لفت نظري 10 وفيات؛ يا جدعان كارثة بالحجم دا حصل فيها 10 وفيات؛ دا في مصر لو عربيتين خبطوا بعض بيموت 50 واحز... نتريق عليهم يولعوا بجاز بس واخدين بالكم من الجانب الثاني؛ السيستم بتاع الطوارئ والانذار المبكر والإخلاء.
*️⃣ دا إحنا في مصر رسايل الانذار المبكر المدعومة في أجهزة iOS والأندرويد منعرفش حاجة عنها؛ اللي هي بس تقول للناس خد بالك في حادثة هنا؛ خد بالك في أمطار في اعصار في أي ابن لذينا
*️⃣ من نعم ربنا على مصر؛ إننا بلد لا عندها أعاصير ولا زلازل ولا براكين ولا عواصف ولا رياح ولا أمطار ولا حرارة مرتفعة... الكوارث الطبيعية اللي بتطول معظم الكوكب معندناش منها؛ ربنا عالم بينا لو حصل لنا حاجة هيتباد مدن كاملة بسكانها؛ الحمد لله مصر محروسة وكفاية اللي فيها عليها. عاشت مصر أمان ♥️.
التضخم نزل ل 24.1% في ديسمبر
*️⃣ تضخم يناير ينزل له مثلا 22% وبعدين تضخم فبراير ينزل ل 18-19%
*️⃣ فعشان كده المركزي يوم 20 فبراير هيهبد الفايدة 3% لان مش منطقي الفايدة تبقي 27.25% والتضخم 18% كده فايدة حقيقية كما يسموها قرابة 10% ودي كده هتبقي من اعلي المعدلات بالعالم.
*️⃣ كمان توقعات خفض الفايدة هتخلي البنوك تسبق وتوقف الشهادات المرتفعة العائد قبل اجتماع المركزي أصلاً
*️⃣ تخفيض الفايدة البنكية بيكون حلو للاقتصاد؛ فايدة عالية يعني المستهلك صاحب الفلوس يفضل يشيل فلوسه مش يشتري؛ وتخلي صاحب الشركة عليه فايدة قروض عالية يبقي محتاج يرفع أسعار السلع عشان تعوض له رسوم الفايدة.
*️⃣ كمان الممول لما يكون البنك بيدي 27% معفيين من الضرايب ليه يقرف في شغل؛ هيبقي عاوزه لو شغل فلوسه يحقق له 40% ودا شبه مستحيل في سوق بيعاني من ركود تضخمي.
*️⃣ خبر كويس وفي انتظار البنك المركزي يعلن التضخم الأساسي اللي كان 23.7% فهينزل تحت 23%.
*️⃣ للتذكير انخفاض الفايدة لا يعني انخفاض الأسعار بل يعني نسبة ارتفاع الاسعار بتقل؛ هنزل بالليل ميني بوست اشرح المقصود ان شاء الله
وزير التربية والتعليم أعلن من شوية إن الثانوية العامة خلاص اتلغت وهيبقي اسمها (شهادة البكالوريا المصرية) وتطبق علي اللي في 3 اعدادي دلوقتي.
*️⃣ قبل ما تسألني أنا حاولت افهم وفشلت فهنقل لكم شوية نقاط كوبي بيست واللي يفهم يفهمنا 😁. اللي جاي كوبي بيست؛ انا بس عملت شوية مونتاج ونقاط بدل ما الكلام لوكشة واحدة...
⬅️ استهل وزير التربية والتعليم والتعليم الفني عرضه بالفلسفة والمنطلقات لشهادة البكالوريا المصرية وهي كالتالي:
*️⃣ البكالوريا تعتمد على تنمية المهارات الفكرية والنقدية بديلاً عن الحفظ والتلقين.
*️⃣ البكالوريا تتميز بالتعلم متعدد التخصصات بدمج المواد العلمية والأدبية والفنية.
*️⃣ التقييم المستمر وتقسيم المواد على عامين على الأقل.
*️⃣ الاعتراف الدولي والفرص المتعددة من خلال جلستي امتحان سنوياً.
⬅️ الامتحانات تتاح بفرصتين في كل عام دراسي في شهري مايو ويوليو لمواد الصف الثاني الثانوي وشهري يونيو وأغسطس لمواد الصف الثالث الثانوي.
*️⃣ دخول الامتحان للمرة الأولي يكون مجاناً وبعد ذلك بمقابل لكل امتحان قدره 500 جنيه رسم امتحان.
*️⃣ تحتسب درجة كل مادة من مواد الثانوية السبع من 100 درجة ويكون المجموع النهائي للطالب بجمع الدرجات الحاصل عليها لكل مادة.
*️⃣ بالنسبة للمحاولات المتعددة فإنه تحتسب للطالب كل المحاولات التي تقدم لها وترصد كافة درجات محاولاته ويحدد العام الدراسي الذي تقدم فيه الطالب لكل محاولة وترسل قاعدة البيانات بشكل كامل لمكتب التنسيق لإعمال شأنه بها.
*️⃣ الحد الأقصى لعدد سنوات الدراسة للمرحلة الرئيسية 4 سنوات بخلاف الصف الأول الثانوي.
*️⃣ بس كده وكل سنة وانتم طيبين؛ كويس إن عيالي لسه صغيرين 8 و 3 سنين فعلي ما يوصلوا ثانوي يكون سيادة البكباشي وسيادة الصاغ وسيادة القائمقام راحوا عند البيه الأميرلالي واجتمعوا عند حضرة أفندينا ولي النعم وقالوا له يا باشا الفلاحين في الوسية رافضين البكالوريا.
الجدير بالذكر إن مصر من 3 أيام كانت بتناقش عودة الكتاتيب 😁😁
صديق جه من إنجلترا إمبارح؛ الجمارك وقفته انتا معاك Drone؛ لا والله دي نظارة أبل Apple vision أهي؛ لا دي مش نظارة دي طيارة؛ لا نظارة؛ لا طيارة دي فيها كاميرات... فزهق منهم قالهم خلاص طيارة خد طيرها وريني 🤣🤣🤣.
*️⃣ من ساعة ما قالي وأنا عمال أضحك؛ هو متعود وطبيعي مستحيل يكونوا عارفين كل منتجات الدنيا؛ بس مش لدرجة شايفين النظارة بتاعة أبل إنها طيارة 🤣🤣🤣
⬅️ أبل تشعر بالفشخرة الآن 💪💪 أنا بتاعة طيارات ✈️✈️✈️
يا بن سامي إنتا بتقفل لنا السنة ليه ما تدي الناس أمل في بكره؛ دي رسالة وتعليق جالي كثير ومن هذا المنطلق فكرت؛ توقع المستقبل دايماً بيكون ليه 3 سيناريو عالأقل؛ متفائل؛ عادي؛ متشائم... أنا ليه بمسك المتشائم أو العادي... ليه مش بتكلم عالمتفائل... وبناء عليه البوست دا عن السيناريو المتفائل لعام 2025 طبقاً للمعطيات الحالية وتصريحات بالمسئولين.
1️⃣
الدولار
الديون
سعر الفايدة
الشهادات البنكية
الرواتب
التضخم
سعر البنزين
الكهرباء
قطع الكهرباء
شوية رغي وخواطر
*️⃣ يناير 2024 كانت رحلة مارثونية لسعر الدولار بالسوق؛ السعر كان بيزيد بشكل غريب وبدأنا الشهر ب 53 وفضلنا نطلع لغاية 70+ وفي نص المارثون دا وتحديداً يوم 14 يناير 2024 كتبت البوست التالي عالفيسبوك
------
غالباً أنا الوحيد اللي متوقع إن ختام 2024 هيبقي أحسن بشكل واضح من بدايته؛ اقتصادياً يعني.
ملحوظة
أقصد اقتصادياً للدولة؛ لكن المواطن؛ اتسحق في 22 واتفرم في 23 وهيتسفلت في 24... فأنا بتكلم عالدولة؛ المواطن كده كده هيتفحت.
------
*️⃣ كان من أقصر البوستات إللي كتبتها في سنة 2024؛ ختمنا السنة والوضع بالنسبة للدولة أفضل بكثير؛ الدولار أقل فعلياً وشبه مفيش سوق سوداء وإن وجدت هتبقي فارق طفيف قروش.... ورغم كل ما سبق وضع المواطن أسوء؛ دايماً بنكرر متتخدعش بالدولار؛ سعر الدولار أهو قل؛ هااا ايه اخبار سعر السلع يناير 25 مقارنة ب يناير 24 🤔🤔... ركز مع التضخم وسعر السلع.
*️⃣ مشكلة معظمنا وساعات بتحصل معايا شخصياً وهي إننا بنتكلم بالعاطفة؛ هدفنا نغيظ بعض بغض النظر عن إيه الصح وإيه الغلط.
*️⃣ لما حصل التعويم قولنا المولد اتفض؛ طلعوا قالوا لالا استني شوف بعد رمضان؛ استني الصيف؛ استني عودة الدراسة؛ استني نهاية السنة وهتشوف سعر مش عارف ايه.
*️⃣ دي دورة تقليدية؛ سعر صرف مش مستقر لفترة X ثم السيطرة؛ هوت ماني وفلوس كثير تدخل؛ السعر يستقر لفترة Y وبعدين يفلت تاني وهكذا.... فكرة انه هيفضل طالع متوالي دي أمنيات ناس عاوزة تغيظ بعض...
*️⃣ سنة 1991 كان الدولار ب 80 قرش وسنة 1993 بقي 340 قرش وبعدين استقر؛ تخيل الناس سنة 1994 تقولك استني هيبقي ب 5 جنية هيبقي ب 10 جنية... استقر لغاية 2003 وبعدين اتحرك تاني لقرابة ال 7 جنية ثم تراجع واستقر واتحرك تاني بعد الثورة ثم 2016 تعويم ونروح ناحية 20 ثم تراجع واستقرار ثم 2022 يتحرك ويستقر في 2024 وكام سنة ويفلت وهكذا؛ يستقر دي لا تعني ثبات تام؛ الحركة دلوقتي ال 1 جنية تساوي 2% يعني من 10 سنين وقت الدولار ب 8 جنية كانت تساوي 16 قروش... تخيل وقتها الدولار تحرك من 8 ل 8.16 حد هيقول يالهوي؛ لا خالص؛ دلوقتي ال 51 ل 52 هي هي ال 8 الي 8.16... الأرقام بتقاس ك نسبة مئوية مش رقم مجرد.
*️⃣ زي النهاردة من سنة نزلت شهادة 27% لما طلع الدولار من 54 بداية الشهر ل 70 الناس فضلت تشير وتقولك العبط اللي اشتروا شهادات هتديهم 27% في سنة اهو الدولار زاد 29% لو كنتم اشتريتم دولار كان أحسن لكم عشان تعرفوا انه يمحق الله الربا... وقتها دخلت خناقات؛ يا جدعان عاوز تقول لحد حرام قوله حرام والأدلة كذا مش تحسبها له اقتصاد ومكسب وخسارة... ادينا يا عم اهو يناير 2024 اثنين معاهم 54 الف جنية... واحد اشتري 1000 دولار والثاني اشتري شهادة... الأولاني فلوسه تساوي 50800 جنية والثاني فلوسه 68580 جنية... ها ايه بقي الوضع؟
*️⃣ هتقولي مهو لو كان اشتري ذهب؛ هقولك ماشي النهاردة كان بكام من سنة؟ كان الجرام 24 ب 3650 والنهاردة ب 4260 يعني زاد 17% في حين هو فلوسه شهادات زادت 27%... طبعا دي حسابات يوم 2 يناير 24 و 25 لان الذهب وصل ل 4500 و 4600 وقتها هيبقي خسران للنهاردة.
*️⃣ فالناس متقعدش تقنع الاخرين بالبنوك من منطلق بيزنس ومكسب وخسارة؛ هيظبط معاك المثال في سنين الانفلات المالي زي 22 و 23 وزي 2015 و 2016 وكده لكن مش هتظبط في الباقي... شوف اسعار الذهب 2017 مقارنة ب 2018 و 2019 هتلاقي نفس الحدودته...
*️⃣ فدايماً يؤسفني لما أشوف ناس عاوزة تمنطق الدين بالحسابات؛ اتكلم دين.. هتشوفوا بوستات بتسخر من الناس اللي هتشتري شهادات جديدة وتقولهم متعلموش الدرس؛ مع ان اخر مرة طلعوا هما اللي كسبانين مقابل الذهب والدولار. وغالبا بعد سنة برضك هيطلعوا كسبانين بحسابات الأرقام... زيادة 27% في سنة تعني دولار 64.5 وسعر جرام ذهب 24 ب 5410 جنية والاثنين صعب حدوثهم الا في تغيرات وخلافات سياسية ترد في الاقتصاد.
*️⃣ فمن فضلكم العبوها دين بعيد عن الحسابات؛ ومتروحش تاخد سكرين شوت من سنوات محدد تلاقيه اختار سعر الذهب 2015 عشان هو أقل سعر حصل في من عصر مبارك وبفترض لو كنت اشتريت في اقل سعر دا وكان معاك لغاية اكتوبر 2024 اللي هو اعلي سعر وروحت بعت هتحقق مكسب مش عارف كام... بلاش الحركات القرعة دي عشان عيب تطلع من حد بيتكلم في الدين... شوف فتاوي شوف أحكام دينية الخ الخ وبلاش تلاعب بالأرقام والمكسب والخسارة لإن اللي هيطبق دين هيطبقه بغض النظر كسبان او خسران كام.
دا كان بوست دردشة؛ فوقت من دور البرد والرشح المفاجئ اللي هجم فقولت اكتب بوست عالسريع من الموبايل كالعادة 😁
تم الاعلان رسمياً عن تفاصيل منظومة الهواتف الجديدة؛ وفيها ان ال 3 شهور القادمين كل مسافر ليه تليفون معفي من الجمارك للاستخدام الشخصي. وبكرر دي للمسافرين القادمين من الخارج وهتكون عن طريق الباسبور واثبات السفر.
*️⃣ بالمناسبة الموقع برضك اشتغل وكتبوا فيه ان لو شريحة شغالة وشريحة عليها رسوم لا تقلق مش هتدفع حاجة
telephony.gov.eg
لو مكانش وصلكم الخبر وأنا نايم يعني؛ فبرنامج NTRA الخاص بفحص ال IMEI نزل
*️⃣ بتنزل البرنامج وليك 5 فحص بدون تسجيل دخول؛ وتقدر تسجل دخول بحسابك في مصر الرقمية.
*️⃣ الخبر الكويس اني جربت الاي فون اللي معايا وقرأ إنه 2 شريحة IMEI مسجلين وأنا مفعلتش ال eSIM فيه؛ دا معناه انه ربط ال 2 ببعض بطريقة ما... حلو قوي فلتنا.
*️⃣ ومن شهرين جبت تليفون لمراتي وقال البرنامج إنه تمام الدار أمان ومسجلين خلاص معانا.
*️⃣ لينك البرنامج أهو وجربوا وافحصوا وشاركوني الصور لو حد البرنامج قاله فلوس يقولنا ايه وكام وكده.
https://apps.apple.com/eg/app/telephony/id6739450752
ولينك الاندرويد
https://play.google.com/store/apps/details?id=com.ntra.citizen&pcampaignid=web_share
⬅️ اسف ببعت خبر في الوقت دا؛ بس كنت تعبان شوية ونمت قبل 10 بالليل ولسه صاحي عطشان فشوفت الخبر والبوستات فقولت اكتب بوست وارجع انام؛ تصبحون على خير
تحديث بخصوص البوست اللي فات فقولت زي ما نشرت بوست اكتب توضيح بوست واضيفه... كذا صديق وشخص بعت لي بخصوصه فوجب التصحيح
*️⃣ ال Esim بتشتغل بنفس ال IMEI بتاع الشريحة العادية ملهاش رقم مستقل؛ يعني كده اخرك 3 شهور لكل شريحة سواء استخدمتهم حقيقي او افتراضي.
*️⃣ لو معاك تليفون اندرويد فيه 2 شريحة عاديين فمش محتاج تفعل Esim خلاص الدار أمان لو مشغلهم فعلي.
*️⃣ لو معاك اي فون لازم تشغل Esim لان الشبكة متعرفوش.
و3 حاجات علي جنب بالمرة
1️⃣ لو معاك تليفون حالي شغال في مصر لا تقلق...
2️⃣ الشبكات في التجوال حسب ما تم إبلاغ مش بتشارك بعضها بيانات IMEI لكن فقط المكالمات والرسايل الصادرة والواردة؛ يعني لو جبت موبايل وانتا بره وحطيت شريحة فمش هتبلغ مثلا شبكة Du الشبكات المصرية برقم IMEI بتاعك.
3️⃣ اتمني يتم تأجيل تنفيذ القرار عشان اللي اشتروا كميات موبايل كبيرة وخزنوها بهدف تحقيق ربح مضاعف... ولا يتم اعلان موعد التنفيذ بل يتنفذ فجأة لإن اللي حصل آخر 72 ساعة في السوق غريب وأجهزة اختفت بغض النظر عن سعرها كام؛ اتشالت. فكده واضح ان ناس من خارج المجال دخلوا يصطادوا ويعملوا سبوبة فيه.
⬅️⬅️⬅️ شغال علي بوستات بخصوص سنة 2025 ايه الظروف والتوقعات عالميا وبعدها محليا.
أنا كنت بقول إن الحد الأدني للأجور هيتغير ل 7500 الشهر القادم؛ وبعدين الجرايد كانت كاتبه 7000 جنية التوقع؛ فأنا قولت مفروض نقسم البلد نصين؛ المهم من إمبارح والأخبار بقت تقول التوقع 7200 يعني زيادة 20% هتعلن في فبراير والتنفيذ في مرتبات مارس عشان الناس تعيد بالزيادة 😁.
*️⃣ اللي مهتم قوي بيه هو حد الإعفاء الضريبي؛ يعني حالياً الرواتب 6000 جنية يعني سنوي 72 الف؛ وحد الإعفاء الضريبي 60 ألف للموظفين؛ يعني اللي خاضع للضريبة 12 ألف بس. (حد الاعفاء 40 الف وفي 20 الف فوقهم شخصي للموظفين فقط)
*️⃣ دلوقتي هيبقي 7200 يعني سنوي 86.4 ألف فمفروض حد الإعفاء يزيد ل 75 ألف؛ أصل لو سبناه 40+20 كما هو فكده في 26.4 بقوا خاضعين للضريبة.
عامة ادينا هنشوف الدنيا هتمشي إزاي.
البوست خلص 😁 ايوا خلص اصلي مشغول فمش فاضي اكتب وقولت مسبش الناس كده بدون بوستات جديدة احسن ينسوني؛ البعيد عن البوست بعيد عن القلب 😁 قلش رخيص 🙄
لولي النهاردة راحت راحت أول امتحان ليها رسمي في حياتها؛ هي لسه 8 سنين لكن فجأة قرروا إن 2 ابتدائي تمتحن (عارف اسمها Grade 2 بس أنا من بتوع ابتدائي مش Grade معلش)...
*️⃣ واضح إن يوم 20 يناير عنده إصرار إنه يبقي في ذاكرتي؛ أنا والدتي توفت يوم 19 يناير 2022؛ إمبارح كانت ذكرى 3 سنين؛ بس اللي في ذاكرتي أكثر حاجة صباح يوم 20 يناير 2022 وصباح يوم 26 فبراير 2006 اللي هما اليومين اللي بعد وفاة ماما وبابا.
*️⃣ نفس السيناريو بصحي من النوم ولمدة كام ثانية اقف كده واقول هو دا كان كابوس صح؛ يعني دا كان حلم طويل وبابا موجود او ماما موجودة. مش هعرف اشرحها مظبوط بس مخك بيكون مش فاهم شوية أو حالة نكران وبرمجك في المرتين اللي في فارق بينهم 16 سنة ان دا حلم مش أكثر.
*️⃣ الله يرحمك يا أمي ويا أبي وكان الله في عونك يا لولي؛ بكرهه أيام الامتحانات بالرغم إني كنت شاطر وأنا طفل؛ طفل بس.
من شوية صندوق النقد نزل تحديثه الدوري لتوقعات الاقتصاد العالمي؛ الصندوق بيعمل توقعات كل 3 شهور وبيطلعها للدول؛ التقرير صغير 10 صفحات لو حد حابب هبقي اسيب رابط في التعليقات؛ عامة دا ملخص توقعات النمو للدول مقارنة مع توقعاته في أكتوبر.
*️⃣ كل اللي جاي دا كان يكفي سكرين شوت بداله بس وقتها كان هيتقالي مش اشرح؛ فقولت انقل الارقام من الاسكرين شوت... طبعا عارف هيتقال ليه؛ دا موضوع تاني 😁... خلصت لكم الأسئلة اهي 😁؛ اه صحيح هيتقال فين باقي الدول؛ لا هو الصندوق اللي طلع فهو لتوقعاته ل 30 اقتصاد عالمي ومعرفش اشمعني (هما الاكبر أصلاً).
*️⃣ للتذكير بس لو قولنا عندي اقتصاد ضخم قيمته مثلا 2000 مليار دولار عمل نمو ب 2% فكده يعني 40 مليار دولار.. بينما لو اقتصاد دولة تانية قيمته 200 مليار دولار حقق نمو 5% فدا يعني 10 مليار دولار... كده وضح بس ليه الدول الصغيرة بتحقق نمو عالي؛ لإنها الصغير سهل ينمو لكن الكبير مفيش مكان خلاص 🤣.
*️⃣ طبعاً في دول كبيرة زي الصين والهند كبار أصلاً وبيعرفوا يعملوا نمو كبير؛ ملناش دعوة بيهم دول ناس جاحدة 🤣 تخيل الصين اقتصادها اد مصر 50 ولا 60 مرة وهتعمل نمو أكبر من مصر؛ يعني نموها في 2025 ممكن يبقي 3 اضعاف حجم مصر؛ النمو بس 😁 عامة دا ملخص التقرير.
*️⃣ منطقتنا اللي هي MENA الشرق الأوسط وشمال أفريقيا
1️⃣ مصر توقع نمو في 2025 ب 3.6% وفي 2026 ب 4.1.
2️⃣ السعودية توقع نمو في 2025 ب 3.3% وفي 2026 ب 4.1%
3️⃣ تركيا توقع نمو 2.6% في 2025 وفي 2026 ب 3.2%
4️⃣ إيران توقع نمو 3.1% في 2025 وفي 2026 ب 2.8%
⬅️⬅️⬅️⬅️ توقعات سنة 2025 النمو الاقتصادي:
*️⃣ أعلي نمو اقتصادي متوقع
الهند 6.5%
الفلبين 6.1%
كازخستان 5.5%
اندونيسيا 5.1%
الأرجنتين 5.0%
*️⃣ اقل نمو اقتصادي متوقع
ألمانيا 0.3%
ايطاليا 0.7%
فرنسا 0.8%
اليابان 1.1%
روسيا 1.4%
*️⃣ أكبر الدول انخفاض مقارنة بالتوقع السابق يعني التوقع الجديد أقل من القديم بالنسب التالية:
السعودية 1.3%
مصر 0.5%
ألمانيا 0.5%
كندا 0.4%
فرنسا 0.3%
*️⃣ أكبر الدول تحسن في التوقعات مقارنة بتوقع اكتوبر 2024:
كازخستان 0.9%
أمريكا 0.5%
اسبانيا 0.2%
الصين 0.1%
روسيا 0.1%
⬅️⬅️⬅️⬅️ سنة 2026
*️⃣ أعلي نمو اقتصادي متوقع وهما هما بس شيلنا كازخستان:
الهند 6.5%
الفلبين 6.3%
اندونيسيا 5.1%
الارجنتين 5.0%
*️⃣ اقل نمو اقتصادي متوقع
اليابان 0.8%
ايطاليا 0.9%
فرنسا 1.1%
ألمانيا 1.1%
*️⃣ أكبر الدول انخفاض مقارنة بالتوقع السابق يعني التوقع الجديد اقل من القديم بالنسب التالية:
مصر 1.0%
المانيا 0.3%
السعودية 0.3%
*️⃣ أكبر الدول تحسن في التوقعات مقارنة بتوقع اكتوبر 2024
كازخستان 0.6%
الصين 0.4%
الارجنتين 0.3%
لينك التقرير بالعربي 😁 بالعربي أهووو يعني تقدر تقراه عربي؛ شوفت المفاجأة دي؛ مهو الصندوق بينزل تقاريره بالعربي برضك.
https://www.imf.org/ar/Publications/WEO/Issues/2025/01/17/world-economic-outlook-update-january-2025
بيان محامي أحمد أبو زيد في قضية الأموال اللي متهم فيها
https://www.facebook.com/share/v/14gRWPqnfT/
معلش هي أبل بتقول خدمتها مدعومة في مصر من دول
البنك الاهلي ومصر والتجاري الدولي
و
S.A.E
مين دا؟
هو مفروض SAE
ترمز لشركة مساهمة مصرية
مين بقي دي؟
معلوماتي هنا صفر مش عارف؛ محدش يعرف كل حاجة؛ فهل حد يعرف ايه دا ومين SAE دي 🤔🤔
سوريا عندهم حاجة اقتصادية غريبة الفترة دي؛ سعر صرف الدولار قصاد الليرة السورية في البنك يساوي 13 الف ليرة؛ بينما لو راحوا السوق السوداء السعر هيقل ويوصل ل 11 و 10 آلاف كمان.. وهنا ييجي السؤال ما تغيروا في البنك يا عم.
*️⃣ المشكلة هي إن البنوك السورية معندناش ليرة 🤣 أنا لما قريت الخبر دا بقيت مش فاهم؛ يعني ايه مفيش ليرة؛ هي المطبعة فين؛ هو اه سوريا كانت بتطبع في النمسا وبعدين قبرص وبعدين روسيا بس أكيد في مطبعة عندكم في دمشق؛ شغلوها.
*️⃣ يعني الناس بقت تروح تغير في السوق عشان البنك مش معاه ليرة؛ يا حلاوة... تخيل كده تخش البنك في مصر تقوله الدولار اهو هات جنية يقولك مفيش جنية؛ تخرج الشارع حد يقولك نغير لك علي 45 جنية بدل 50.5 بتاعة البنك 😁 وتقبل مضرا عشان مفيش بديل.
*️⃣ اه طبعاً في دولرة عالية هناك والدولار عملة متداوله فعلياً لكن الدولار بينزل قصاد الليرة. يعني قبل الاطاحة ببشار الدولار كان 15 و 17 الف ليرة بالسوق السودا؛ دلوقتي ب 10-11 ألف ليرة... فإنتا شايل دولار بيقل قيمته فعاوز ليرة؛ سوري مفيش ليرة 🤣.
*️⃣ محافظة البنك المركزي السوري الجديدة قالت إنهم بيسعوا لتجنب طباعة الليرة عشان السيطرة على التضخم؛ ووضحت إن البنوك معاها ليرة تكفي رواتب موظفي الدولة اللي طلع قرار من الإدارة الجديدة انها تزيد 4 أضعاف من فبراير... طيب سيادتك في فلوس لمرتبات الناس؛ طيب باقي الدولة ايه الوضع؟ عامة هي قالت هتسعى لعمل سياسات تطمن المواطن ناحية القطاع البنكي وكمان هتسعى لنشر الصيرفة والبنوك الإسلامية في سوريا لتوفير خيارات أكثر للمواطن.
*️⃣ من الأمور اللي بتخلي الوضع صعب بنكيا في سوريا العقوبات الأمريكية الأوروبية؛ يعني تعرف ك مصري إن معندهمش كروت فيزا وماستر كارد؛ شركتي فيزا وماستر مش موجودين؛ عندهم فقط كروت محلية؛ يعني أكن كل الشعب معاه كروت ميزة... تطلع بره سوريا مفيش كارت شغال معاك لإنها كروت محلية؛ فلازم يبقي معاك كاااش.
*️⃣ كمان البنوك في سوريا العقوبات عليها بتخوف أي بنك خارجي يتعامل بسهولة؛ أمريكا غشيمة... حالياً قللوا العقوبات شوية وأوروبا قالت هتقلل العقوبات لكن مش هتشيلها غير لما تتطمن على حقوق الإنسان وحقوق المرأة وعدم تهميش الأقليات والكلام الملزق بتاع أوروبا اللي بنسمعه حتي عندنا هنا في مصر لما بيتكلموا 😁 شعارات أوروبية بتطلع علينا بس واخواتنا بيموتوا وهناك القطة بلعت لسانهم؛ قال حروق الإنسان قال.
*️⃣ عامة عندي فضول أشوف بناء دولة من الصفر بيتم إزاي؛ أصلي ياما قريت علي دول بعد الحروب وتضخم رهيب ووو اتبنت لكن المرة دي أدينا هنشوف لايف بقى مع إن المرة دي الدولة عندنا وفي الغرب مش بيسمحوا قوي لدولة عندنا تكبر.أدينا هنشوف لعبة الشطرنج دي مكملة لغاية فين...
⬅️⬅️ هذا البوست يتحدث عن المنظومة والبنوك السورية... فهو بوست اقتصادي بلاش يتحول ل سياسي...
يوم 10 من كل شهر مصر بتعلن التضخم سواء العام أو الأساسي والنهاردة الجهاز المركزي أعلن التضخم وإنه انخفض وبرضك البنك المركزي هو كمان أعلن انخفاض التضخم قبل قليل ل 23.2%. ومتوقع في تضخم فبراير "يعلن في مارس" يحصل انخفاض كبير وهننزل تحت 20% بل ومؤسسة زي سي آي كابيتال توقعته 14% نظراً لتغيير سنة الأساس... وتعالوا هنا نشرح النقطة دي.
*️⃣ أي حد يسمع انخفاض التضخم يروح رايح يكتب "كذب الأسعار لم تنخفض" مع إن كلمة تضخم يعني ارتفاع الأسعار؛ فتعالى كده نشوف ايه موضوع سنة الأساس.
*️⃣ التضخم بيقيس ارتفاع السلع والخدمات في دولة ما بين فترتين... يعني لما نقول التضخم الشهري يبقى بنقارن شهر بالشهر السابق له؛ ديسمبر ب نوفمبر... لكن الطبيعي هو التضخم السنوي؛ يعني نقيس شهر ديسمبر 2024 ب شهر ديسمبر 2023... وعشان يوضح لك نقطة سنة الأساس تعالى نتخيل سوى سلعة سعرها 100 جنية ونتخيل إنها بتزيد 50 جنية سنوي.
سنة 2021 سعرها 100 جنية
سنة 2022 سعرها 150 جنية
سنة 2023 سعرها 200 جنية
سنة 2024 سعرها 250 جنية
سنة 2025 سعرها 300 جنية.
⬅️ نيجي بقى نحسب التضخم سوى
سنة 2022 نقول دي بقت 150 وكانت 100 يبقى التضخم 50%
سنة 2023 نقول دي بقت 200 وكانت 150 يبقى التضخم 33.3%
سنة 2024 نقول دي بقت 250 وكانت 200 يبقى التضخم 25%
سنة 2025 نقول دي بقت 300 وكانت 250 يبقى التضخم 20%
*️⃣ أخدت بالك من اللي حصل؛ إنتا ك مواطن كل سنة السلعة عليك بتزيد 50 جنية الموضوع مستمر مفيش تغيير؛ بس لما تفتح الأخبار تلاقيها كل سنة تقولك انخفاض التضخم؛ فأنتا عندك حق الأسعار بتزيد؛ وهما برضك مش كذابين لإن النسبة المئوية بتقل؛ ركز هما مقالوش الأسعار بتقل؛ قالوا نسبة الزيادة هي اللي بتقل.
*️⃣ طيب أقولك على شيء أكبر... أجمع كده الأرقام اللي فوق دي... 50+33.3+25+20 هتلاقيها جت معاك 128.3%... بس لما تقيس البداية 100 النهاية 300 فدي زيادة 200% ....طبعاً دي بديهيات رقمية بس بتخدع كثير منا؛ قوة المضاعفات.
*️⃣ فإحنا لما نيجي نقول من فبراير التضخم هيقل ك نسبة مئوية مش معناها إن الأسعار هتقل... التضخم لو بقى 1% يبقى سعر السلع زاد برضك بس زاد 1%. لو الأسعار مش بتزيد يبقى كده تضخم 0% وعشان تقول الأسعار بترخص كده يبقى تضخم بالسالب ودي لعنة ربنا يبعدنا عنها.
*️⃣ هيبقى في سلسلة بوستات وفيديوهات عن التضخم وشرحه؛ لكن دلوقتي اعرف إن الجهاز المركزي بيقيس 1000 سلعة وخدمة بشكل شهري منهم 333 سلعة استهلاكية معظمهم خضروات وفاكهة ومنتجات غذائية وحسب الجهاز فهو عنده 15 ألف مصدر في 8 مناطق جغرافية.
*️⃣ هتقولي طيب دا رقم كذب هقولك ساعات الكذب بيحصل بدون تزوير؛ يعني أنتا متخيل إن عشان يزور نتيجة هيروح مدخل الأرقام غلط؛ هقولك مش شرط ممكن يدخل أرقام سليمة وبرضك يطلع اللي نفسه فيه عبر التلاعب بالوزن النسبي؛ يعني أد ايه الرقم دا بيأثر في التضخم؛ لإن مش معنى إن التضخم 23.2% مثلاً يبقى كل السلع زادت كده؛ خالص هتلاقي أقسام زادت 10% وأقسام 20% وحاجات 30% وحاجات 60% وحاجات رخصت برضك وكل شيء له وزن نسبي بس دا موضوع تاني في بوست تاني.
حزمة اجتماعية قريب؛ اللي هي رفع الحد الادني للاجور والمعاشات وتكافل وكرامة وووو... وبعدها بشهر شوية اصلاح اقتصادي كده.
لو مش فاهم راجع بوست إمبارح؛ هيحصل زيادة اجور قريب وبعدها شوية مرونة في سعر الصرف بسيط كده في مارس أبريل يصاحبهم رفع سعر البنزين و
و ايه هو أنا بحكي لضيوف ما كلنا مصريين
⬅️⬅️ مفيش تعويم عشان الناس هتقول يعني في تعويم 🫣 قولت اسبق واقول مفيش
تصبحون علي خير
البنك المركزي أعلن عن حجم سيولة 11.34 ترليون جنية بالقطاع المصرفي نهاية نوفمبر 2024 مقابل 8.877 ترليون في نهاية ديسمبر 23 يعني زاد في 11 شهر ب 2.464 ترليون جنية يعني ممكن نقول السيولة زادت 30% على أساس سنوي.
*️⃣ مش هدخل الحته اللي الناس بتحب تخشها لما تذكر دا وحجم طباعة والتضخم ووو... بس حابب بس ألفت النظر لفكرة إن في شهادات بتنتهي ب 880 مليار جنية؛ فالناس كل يناير لما ييجي وقت الشهادات دي تقولك هتنزل وهتعمل تضخم ووو... أيوا هو المبلغ ضخم اه بس فعليا يساوي أقل من 8% من حجم السيولة في القطاع المصرفي فمش هيدمر الدنيا ودا لو أصلاً نزل السوق ودا مستحيل مهو الناس مش هتاخد فلوس ادخار تحطها في سلع ولا استثمار... المستثمر غير المدخر؛ فرقوا بينهم. غالبية المصريين مدخرين.
*️⃣ فبلاش قلق و إشاعات واستنوا الفلوس لما تنزل وهتشوفوا صعود دولار وصعود ذهب والعقارات وصعود جبنة رومي والجو دا... ففعليا الناس اللي بتشتري شهادات هتشتري شهادات وملهاش في الاستثمار... ولما يحصل تخفيض الفايدة الشهر القادم هيشتروا... فبلاش تعشموا ناس عالفاضي.
*️⃣ السنة الماضية المضللين طلعوا قالوا للناس اسحبوا فلوسكم من البنك أحسن هيحجزوا عليها زي لبنان ومش عارف إيه... وفي ناس صدقت التخلف دا وراحت سحبت الفلوس الخاصة بيها وصديق عزيز عليا منهم وتعرض لأذي وضرر رهيب بسبب إنه صدق التخلف دا... طبعاً مش هينفع أذكر إيه حصل لصديقي عشان التعليقات لما تسأل بس أنا بلوم اللي طلعوا الهبل دا وقعدوا يرددوه.
*️⃣ برضك لومت نفسي إني كنت بكتفي بالرد في تعليقات وأوضح لهم فارق بين مصر ولبنان وإن الدول بتتخلف عن سداد ديونها ولا انها تقرب من الحسابات عشان متدمرش القطاع المصرفي... يعني متسددش ديونك أسهل؛ بس كان في تعليقات يشوفها عدد محدود؛ لكن بعد كده مش هيكون في تعليقات؛ هكتب بوستات.
*️⃣ البوستات دي هتزعل قطاع من المتابعين؛ لإن في قطاع بيتابعني هو معارض سياسي للدولة وبيحب بوستاتي عشان بطلع لهم القطط الفطسانة ساعات... فبوستات تبوظ لهم الشغل على مشاعر الناس اللي بيعملوه هيتضايقوا مني... لكني كنت ولازلت مش بكتب عشان تيار فكري؛ لكني بكتب اللي مقتنع إنه صح من وجهة نظري؛ خدم التيار دا أو دا مش بتاعتي.
*️⃣ حتى البوست بتاع إمبارح اللي كنت بقول توقعات 2025 المتفائلة؛ سعيت فيه إني مكتبش حاجة غير وأنا مقتنع إن في احتمالية حدوثها؛ احتمالية بقي 1% احتمالية 99% مش هتفرق؛ بس طالما في فرصة... لكن اللي يخضع لبند المستحيل مكتبتوش؛ أنا فقط كنت بجيب بند وأقول فكر لو مشي كويس بدون خوازيق إيه يحصل وكتبت..
صباح الفل؛ بوست غريب بس مش كله اقتصاد لازم شوية فضفضة بشرية
المعطيات دي تقول إن مفروض مفيش إنقطاع الكهرباء في الأيام العادية؛ والأيام اللي الحرارة 40+ ممكن تخفيف أحمال محدود ساعة أو نقلل الضخ الغاز للمصانع ونوديه للكهرباء ومنطقعش عن البيوت.... كل ما سبق بناء عالمعطيات الحالية وإن كله تمام يعني ميجيش ولاد ال... يغدروا بينا ويقولوا صيانة للخطوط هنوقف ضخ ولا الحركات دي لإنهم بيمثلوا 15-20% من استهلاك مصر.
🔟
الذهب
صفقات كبرى
مرة كمان
*️⃣ دخل الحكومة في الموازنة الحالية هو 2625 مليار جنية؛ وعندها خدمة دين داخلي أصل وفوايد يقارب 2600 مليار؛ ايوا كل دخل مصر رايح لخدمة الدين المحلي... لسه فاضل بقي دين خارجي ولسه فاضل الدولة... دخل الدولة 2625 مليار جنية ومصروفاتها (جهات الموازنة + فوايد دين داخلي وخارجي + أصل الدين) يساوي كااام؟ مبلغ 5541 مليار جنية.
*️⃣ طبعاً كلنا عارفين الديون مكملة يبقي الحل تنمية الإيرادات... طيب الإيرادات ايه؟ قولنا 2625 مليار جنية دول عبارة عن إيه؟ مبلغ 2022 مليار ضرايب و 603 أخرى... يبقي نكبر الضرايب.
*️⃣ الحل في الضرايب ثلاثي... بنود ضريبية جديدة؛ ناس متهربين فتدفع ضرايب؛ بنود مفيش عليها ضرايب يتحط عليها الضريبة.
*️⃣ الأولي صعبة؛ تقريباً كل حاجة معمول لها بند؛ وزيادة البند يعني 10% نخليه 15% وهكذا مضر جداً ودا مش وقته... الحل الثالث بتاع حاجات معفاة من الضريبة يتحط عليها هو حل كارثي؛ المعفي في مصر بنود زي لبن الأطفال واللحمة والخضار والفاكهة والكتب والكشاكيل ومكرونات وأسماك وأدوية والماية والكهرباء وخدمة دفن الموتي والذهب (دا عليه دمغة مش قيمة مضافة 14%) وخدمان التعليم وكده باقي 58 بند... تحب تضيف على مين فيهم 14% عيش والخيارة ليك؛ هنا حرفيا خيارة 🫣🫣.
*️⃣ يبقي الحل اللي فاضل ايه؟ الجهات المتهربة تدفع؛ فحالياً في خطة مهولة الدولة شغالة عليها؛ الموبايلات دي البداية بس دا سوق بيوصل ل 100 مليار جنية يعني ضرايبة 30-40 مليار جنية حلوين دول... لسه في برضك المحلات وتراخيصها ولسه في بيع العقارات والأرباح الرأسمالية (دي صندوق النقد طالبها من مصر من 2016).
*️⃣ ايه الارباح الرأسمالية دي تعالي احكي لك فيلم رعب مؤجل؛ دي يا عم تحقيق ربح من ملكية حاجة؛ يعني اشتريت شقة ب 1 مليون وبعتها ب 3 مليون كده كسبت 2 مليون تدفع عليهم ضرايب... الكلام دا موجود في عشرات الدول مش افتكاسه وبقول الصندوق طالبها من مصر من 2016 عشان اللي هيقولوا انتا بتديهم أفكار.
الدول بره بتقولك اشتريت عقار وبعته نشوفك شاريه امتي وبعته بكام؛ وتختلف حسب الدولة لكن كفكرة عامة بيكون 3 او 4 درجات.
*️⃣ اشتريت العقار مدة تحت السنة؛ يبقي فارق الشراء والبيع يخش دخل ضريبي يتضاف لدخلك من وظيفتك ونشوفك في انهي شريحة ضريبية ونحاسبك.
*️⃣ عقار مدة قصيرة 1-3 سنين تدفع ضريبة قطعية ليكن 10% او 15% او 20% علي حسب قوانين الدولة.
*️⃣ احتفظت ب العقار مدة متوسطة 3-10 سنين هنا تدفع ضريبة مخفضة؛ يعني لو المدة القصيرة بتدفع 20% فالمدة المتوسطة بتبقي 10% مثلاً.
*️⃣ مدة طويلة يعني 10 سنين وطالع (فرنسا عندها 22 سنة) هنا بتعفي مفيش ضرايب عليك.
*️⃣ فدا مثال على نوعية ضرايب في الدرج في المالية؛ لسه في الدرج لأسباب سياسية مش اقتصادية؛ وبلاش فزلكة بتاعة هنسجل هنبيع ب 1 مليون ونسجله 200 الف؛ عشان في عقود تانية غيرك واللي يتقفش بيدفع ضعف الضريبة.
*️⃣ عاوزك تاخد الضريبة دي وتفكر فيها بالعربيات؛ اشتريت عربية ب 500 الف وبعتها ب مليون مستعملة؛ يلا انجوي ضرايب عال 500 الف دي.
⬅️⬅️ وبكرر وبكرر مصر معندهاش نية لفرض ضرايب ارباح رأس مالية عالأقل مش في خطة 2025.. انا بس بحكي لك ايه في الدرج للمستقبل لو اتزنقوا خالص والخواجة لما يفلس يدور في ادراجه اقصد دفاتره القديمة.
*️⃣ فبلاش نعيش في ال لالا لاند ونقول ايه دا ضريبة موبايلات؛ حضرتك انتا بتغير الموبايل كل 3 سنين؛ في حاجات تانية هتعورك بجد.
*️⃣ طبعاً اخواتنا قاطني سويسرا اللي هيقولك ليه ميفرضوش ضرايب علي الجهات XYZ اللي عارفينها... حاضر عنيا حبيبي روحلهم انتا قولهم عشان انا مليش في عالم سمسم والأحلام دا...
*️⃣ اه واجابة سؤال أخير وهو الديون ايه اللي خلاها كده؛ الاجابة الحكومة خلتها كده؛ ها ليك شوق في حاجة؛ عندك اعتراض قوله اتفضل متتكسفش دا حقك ليك أمنية أخيرة قولها بحرية 🤣.
*️⃣فحوار الموبايلات وحاجات تانية قادمة كلها لنفس السبب؛ مفيش فلوس خلصت شطبنا؛ حتى السلف مبقناش عارفين... شهر ديسمبر كان عندنا اذون خزينة مستحقة ب 789مليار وكل اللي عرفنا نبيعه 562 مليار جديد. فحتى سلف الجنية مش عارفين؛ فمفيش غير الضرايب خلاص فريح نفسك.
والحل ايه؛ اهرب؛ ابقي مصري في الخارج ومن مصادر الدخل الدولاري... لكن تبقي قاعد في مصر وعمال تتفاجئ من كل قرار يطلع 🤣🤣.
نظراً لإني تعبت من الرد على نفس الأسئلة فقررت أجمع كل الأسئلة المتكررة في بوست واحد ودي أهم النقاط ودي اللي فهمته من المقالات ومن موقع الخدمة. هتلاقي السؤال بالسهم ⬅️⬅️ والإجابة *️⃣ فممكن السؤال اللي مش بيهمك تروح للي بعده
⬅️ البرنامج مش شغال معايا وأنا بره مصر أعمل ايه؟
*️⃣ لسبب مجهول الحكومة عاملة البرنامج محلي يعني عشان تفتحه لازم تبقى في مصر أو تشغل VPN مصري. متقوليش رشح برنامج؛ دور واسأل أنا معرفش.
⬅️ عندي شريحة اشتغلت وبتقول مفيش رسوم وشريحة بتقولي عليا رسوم أعمل ايه؟
*️⃣ الحكومة قالت إن وصلها الشكاوى دي ووضحت إن لو في حد شريحة مقبولة وشريحة لا فميقلقش مش هيدفع شيء وهتتحل المشكلة دي قريب.
⬅️ أنا معايا موبايل وجوا مصر بقالي فترة X فهل كده هدفع؟
*️⃣ الإجابة لا مش هتدفع شيء وكل الموبايلات في مصر خلاص مفروض براءة مش هيدفع.
⬅️ أنا شاري تليفون صنع في مصر / تليفون من الوكيل وظاهر لي إن عليه فلوس إزاي؟
*️⃣ دا هيكون إما خطأ تقني أو الوكيل/المصنع مبعتش الأرقام للشركة؛ ومن شهرين انتشر إيميل مبعوت من NTRA ينتبه على الشركات إنهم يبعتوا له الأرقام. ففي كل الأحوال لا تقلق تليفونك معاك وفاتورتك معاك وهتقدر تشتكي.
⬅️ عاوز اقدم شكوى أعمل ايه؟
*️⃣ خش موقع telephony هتلاقي طريقة التواصل معاهم بالإيميل أو الواتس آب أو رقمهم 15380 ابعت اسألهم.
⬅️ أنا سائح/غير مصري/مصري عايش بره وهنزل مصر فهل لازم أدفع للموبايل بتاعي؟
*️⃣ لو انتا هتنزل مصر تجوال بخطك الأجنبي فهو شغال ومش هيقف سواء قعد شهر أو 6 شهور. لكن لو حطيت شريحة مصرية هتشتغل 90 يوم بس وبعدين تقف.
⬅️ يعني أنا ليا 90 يوم في العمر ولا ليا ايه؟
*️⃣ غير معلن بس المتعارف عليه هو 90 يوم في السنة عشان السياح الأجانب زي العرب اللي بينزلوا مصر في الصيف وفي نص السنة والمصريين في الخارج اللي بينزلوا شهرين ثلاثة بتوع الصيف وهكذا. فالمنطقي 90 يوم في السنة.
⬅️ أنا جيت مصر السنة اللي فاتت فهل لو جيت تاني هدفع؟
*️⃣ لو جيت مصر السنة الماضية وهتيجي تاني السنة دي بنفس التليفون فمفروض تليفونك خلاص بقى معروف للشبكة المصرية فمش هتدفع
⬅️ أنا بره مصر دلوقتي ومعايا تليفون جديد أعمل ايه؟
*️⃣ نظرياً مفيش شيء تعمله بس عاوز تجرب تحط شريحة مصرية وتعمل مكالمة وبعدين تشوف البرنامج هيعمل ايه عيش. مش هتخسر شيء جرب.
⬅️ أنا مصري في الخارج وراجع نهائي هعمل ايه؟
*️⃣ حتى الآن مش واضح وغالباً هتتجمرك زي باقي الشعب عادي.
⬅️ هل موضوع لينا كمصريين في الخارج تليفون كل سنتين ثلاثة بدون جمارك صحيح؟
*️⃣ حتى الآن مفيش أي حاجة تدل إن في اعفاء لحد؛ حتى التصريح اليوم "فترة انتقالية 3 شهور" أنا فهمته إن ال 3 شهور القادمة المسافرين معفيين من دفع رسوم تليفون شخصي؛ والآخرين فهموه إنه هي ال 90 يوم السماح التقليدية وهو بيقولها بصيغة مختلفة. ايه الوضع معرفش.
⬅️ يعني لو داخل مصر بكره ومعايا 3 تليفونات الجمارك مش هتوقفني؟
*️⃣ نظرياً اه مفروض متوقفكش بس فعلياً هتقف عشان هي دي مصر وهذا ما وجدنا عليه آباءنا.
⬅️ لو عدى 90 يوم ومدفعتش ايه هيحصل؟
*️⃣ الشبكة هتفصل يعني اعتبر نفسك مش حاطط شريحة في التليفون؛ ممكن تجيب MiFi وتعمل هوت سبوت وتكمل استخدام التليفون أو تجيب موبايل تاني تستخدمه منه.
⬅️ هو ال 90 يوم محسوبة متصلة ولا منفصلة؟
*️⃣ الله أعلم هيحسبوهم 90 يوم متصلة ولا منفصلة؛ المنطقي منفصلة تخيل حد جه مصر شهر يناير اسبوع وسافر وجه تاني في الصيف يلاقي موبايله مش شغال؛ بس احنا اتعودنا إن المنطق لو ماشي يمين فالتنفيذ هيكون شمال
المنطق ➡️➡️➡️ والتنفيذ ⬅️⬅️⬅️.
⬅️ تليفوني مش عاوز يتفعل أعمل ايه؟
*️⃣ جرب غير الشريحة وجرب خش عالإنترنت واتصل واستقبل وابعت رسالة؛ متفعلش برضك كلمهم على الداتا اللي قولتها فوق
⬅️ ليه الحكومة عملت الضريبية الجديدة دي؟
*️⃣ مفيش ضريبة جديدة واللي متابعني من زمان فأنا كتبت عنها يوليو 2020؛ الفكرة بس إن التهريب كان سهل فكله بيهرب لدرجة إن تهريب الهواتف بيسبب في فقدان الدولة 30-50 مليار جنية بسبب التهريب دا وعشان تتخيل حجم الرقم فميزانية التعليم في مصر (بعد خصم بند رواتب الموظفين وبناء المدارس) تساوي 30 مليار جنية
⬅️ هيقبضوكم كام عشان بتدافع عنهم؟
*️⃣ انا بدافع؟ لا حول ولا قوة إلا بالله... أهو السؤال المتكرر دا بيعرفنا إن مفيش فلوس بتتصرف عالتعليم في مصر؛ ربنا يكرم ويكون في زيك كثير فأنا كده في أمان. أنا لا بقبض منهم ولا منكم ولا بيطلع لي مليم حتى الآن يخليني استحمل حرقة الدم والخناقات في التعليقات وأنا راجل مريض ضغط. ربنا يكرم وأقبض من حد حاجة... أنا حتي مش شغال في الموبايلات لا دولي ولا محلي ولا يفرق معايا الموضوع كلياً.
⬅️⬅️⬅️ دي كل الأسئلة والأجوبة اللي عندي فمظنش عندي شيء تاني يتقال
صباح الخير
*️⃣ نكمل ازعاج صباحي زي نص الليل؛ بس في رسايل كثير وصلت من ناس لقت الشريحة الثانية بتاعتها عليها رسوم؛ لكن في تعليقات شوفتها عندي وكذلك عند أصدقاء انهم لما جربوا يشغلوها اشتغلت واتشالت الرسوم.
*️⃣ يعني بالبلدي كده لسه متقفلش الباب؛ شكلهم ادونا يوم 31 ديسمبر فرصة؛ فلو لقيت شريحتك الثانية عليها رسوم؛ جرب شغل فيها خط مصري؛ لو eSIM ضحي ب 350 جنية وحط فيها شريحة؛ ممكن تنقذك من 10-20 الف جنية رسوم.
*️⃣ الشريحة اللي تحطها اعمل كل الاستخدامات الممكنة لعل وعسي الشبكة تشوفها؛ هو دا كلام مش علمي لإن الشبكة بتلقط رقم IMEI بمجرد الاتصال؛ بس ممكن يكونوا حاطين ليفيل فلترة عشان يضربوا بيه الناس اللي كانت شغالة تحط شريحة تعمل الموبايل ON وتشيل الشريحة وكده تم؛ فحطوا ليفيل فلترة وهو استخدام بحيث يضمنوا.
*️⃣ فانتا جرب حط شريحة واعمل اتصال وابعت رسالة ولو تعرف نت كمان... مش معاك شريحة ثانية عادي انقل شريحتك الأساسية من المنفذ اللي خلاص معلهوش فلوس حطها في المنفذ الثاني اللي عليه.
⬅️ الناس اللي شاريه موبايل رسمي من وكيل في مصر وطلع عليها رسوم؛ دي غالبا تخريف سيستم شوية وهيتحل؛ واحتياطياً ابدأ دور علي فاتورتك الضريبية واكيد اكيد هيبقي في طريقة شكاوى.
*️⃣ أنا قرأت الشروط والأحكام في البرنامج مفيهاش أي معلومة مفيدة وأقرب ل Disclaimer ومفيش FAQ في البرنامج والموقع مش شغال ولسه في ألغاز كثير زي مثلاً:
⬅️1️⃣ تقديم الشكاوي إزاي يتم لو في غلطة اني شاري من توكيل محلي بل في حد قال شاري صنع في مصر وعليه رسوم.
⬅️2️⃣ لو تليفوني شريحة مقبولة وشريحة لا نعمل ايه.
⬅️3️⃣ مكتوب في داتا البرنامج إنه بيشمل خاصية مسح الباسبور؛ يعني كده فيه أوبشن تسجل تليفون بالباسبور بتاعك؛ يبقي مفهوم التليفون اللي بدون رسوم للمصريين في الخارج أو المسافرين كل 2-3 سنة موجود؛ طيب ايه الآلية مش موضحين... ايه موضوع مسح الباسبور دا يتم ليه وإزاي والفائدة منه.
⬅️⬅️⬅️ الخلاصة لازم بيان رسمي ومؤتمر صحفي للشرح للناس؛ محدش يستعجل ويدفع رسوم؛ لسه اصبروا لغاية ما الدنيا توضح
⬅️⬅️⬅️ زي النهاردة 31 ديسمبر سنة 2008 روحت فرع فودافون اللي في كورنيش المعادي واشتريت الآي فون 3G كان سعره 4500 جنية وكان عندي خصومات نقاط فأخدته ب 3900 جنية 🤣🤣 ... افتكرت دي وأنا بشوف الرسوم اللي الناس بعتتها. بالمناسبة 4500 جنية سنة 2008 سعرهم بالدولار يوازي دلوقتي 41 ألف جنية 😁.
بالمناسبة أول دولة عربية دخلها الآي فون رسمي من أبل مع اطلاق الاي فون عالمياً مع 3G كانت مصر ثم الخليج؛ زمان كانت مصر أولاً.
من الحاجات اللي دولنا لازم تفكر فيها مع انتشار العربيات الكهرباء هو مفهوم ال Kill switch ولو مش فاهم قصدي فالعربيات الكهرباء فيها إمكانية إن الشركة الأم تقفلها لك.
*️⃣ العربية البنزين دا موتور صريح بيحرق بنزين ب شموع اشتغال (بوجيهات)؛ لكن عربيات الكهرباء هي كومبيوتر أو موبايل؛ تخيل لو أبل مسحت لك الاكونت هتعرف تنزل برامج؟ وهكذا بقى فالعربيات الكهرباء الشركات بتقدر عن بعد تدوس زرار تخليها متشتغلش.
*️⃣ الكلام دا حصل بالفعل مع رئيس الشيشان قادريوف اللي اتهم إيلون ماسك إنه قفل له عربيته السيابر تراك عشان بعتها أوكرانيا... ولو متابع الكونجرس والغرب عامة فهناك في خناقات عالموضوع دا بقالها سنين... تيار مع منع المفهوم دا كلياً؛ وتيار تاني شايفه عادي بس حاطط شرط السيرفرات والتحكم ميخرجش بره الدولة... وتيار ثالث شايف تطوير النظام دا.
*️⃣ اه في تيار قالك ما نطور النظام دا بحيث العربية مثلا تستخدم الكاميرات والذكاء الصناعي ولو رصدت السائق سكران متشتغلش؛ روح فوق يا بيه الأول 😁... كمان يكون مع الشرطة إمكانية وصول للزر دا بحيث يعطلوا سيارات المجرمين والعصابات او حتي كل السيارات في نطاق معين؛ وطبعاً دي كده تخش حته سوء الاستخدام.
*️⃣ هنا ييجي السؤال؛ في العالم الرقمي القادم علينا زي الصاروخ هل الدولة مركزة في الموضوع دا؟ السعودية مثلاً طلعت قوانين لمنع نقل بيانات المواطنين لخارج الدولة (البداية مع البيانات الحكومية) وأوروبا وأمريكا والصين بقوا مانعين البيانات بتاع مواطنهم تتسجل في سيرفرات بره دولهم.
*️⃣ الدول بتفكر لقدام؛ إنتا دلوقتي علاقتك زبادي خلاط مع أمريكا والصين؛ طيب لو في يوم زعلت حد فيهم؛ دخلت حرب... يدوسوا زرار يقفلوا كل عربيات دولتك تخيل بقي يشلوا الدولة بزرار وبدون صاروخ واحد.
*️⃣ فالدول بتفكر في كده؛ افرض مثلاً اتغضب عليا ومبقتش عالحجر بتاع ماما أمريكا ودخلوني ال Naughty Corner فهل أنا مستعد للسيناريو دا أم لا... اللي مخلي الصين وروسيا لسه عايشين إنهم استعدوا لدا ورغم كده تضرروا جامد؛ فتخيل لو مش مستعد أصلاً... هتتسفلت
⬅️ (((المعلومات المذكورة في البوست غير دقيقة وكتبت بوست تصحيحي بعده... الموبايلات فيها 2-IMEI فقط)))
طيب اقولكم حاجة كمان بخصوص ال IMEI
*️⃣ تليفون زي S24 الترا بيدعم 2 شريحة فعلي و 2 شريحة الكترونية يعني ليه 4 من IMEI
*️⃣ يعني لو حد بيستخدم شريحة واحدة؛ بستخدمها فعلي في المنفذ الأول؛ بعد 3 شهور تقف ينقلها للمنفذ الثاني بعد 3 شهور تقف؛ يروح ينقلها Esim-1 وبعد 3 شهور ينقلها Esim-2
*️⃣ هتقولي وبعد كده؛ هقولك 3*4=12... السنة خلصت يا برنس يلف تاني.
*️⃣ شغلانة مملة اه بس توفر عليك 20-30 الف جنية 😁😁 وربنا يقدرنا على فعل الخير 🤣💪