64545
قناة لنشر كتاباتي في مختلف المجالات
وأدي التضخم انهار من 24% ل 12.8%؛ انا كانت توقعاتي 18% بس الرقم عنيف قوي
*️⃣ كده يا حسن بيك عندك المركزي التركي خفض والتضخم نزل
*️⃣ السيناريو اللي كنا حافظينه ومتوقعينه وكان مفروض يحركك بدري لانك بطيء.
*️⃣ مبروك مصر الآن تقدم أعلى فايدة حقيقية في كوكب الأرض 😔 ولسه في انخفاض جديد هيعلن يوم 10 أبريل؛ وييجي المركزي يوم 17 أبريل يخفض 2% عشان يحافظ على لقب الأعلي عالمياً
الفايدة الحقيقية للي مش فاهم ايه مقصود بيها هي الفايدة بالدولة بتاعة الدولة 27.25% - التضخم 12.8% = 14.45% 😁
تركيا عندها فايدة 42.5% - التضخم 39.05% = 3.45%
⬅️⬅️⬅️⬅️⬅️ صندوق النقد النهاردة بالليل هيجتمع لصرف الدفعة الرابعة لمصر + اقرار قرض جديد يسمى الصلابة والاستدامة ومدته 18 شهر بقيمة 1.3 مليار دولار يصرفوا علي 4 دفعات.
⬅️⬅️⬅️ للي بيسألوا؛ انخفاض التضخم خبر كويس؛ انخفاض التضخم يعني نسبة ارتفاع الاسعار قلت؛ نسبة الارتفاع؛ يعني كده كده في ارتفاع؛ الاسعار تنخفض يعني الرقم يبقي بالسالب ودا مستحيل يحصل عندنا.
*️⃣ تخيل سلعة ب 100 بقت ب 150 كده زادت 50%
بعدين بقت من 150 ل 200 فكده رغم انها نفس 50 جنية بس كده 200/150 = الزيادة 33.3%
بعدين زادت كمات 50 جنية من 200 ل 250 فتحسبها تلاقي الزيادة 25%
⬅️ فانتا شايف السلعة بتزيد كل سنة 50 جنية؛ بس الخبر بيطلع انخفاض التضخم اهو من 50% ⬅️ 33.3% ⬅️ 25%
كده وضح يعني ايه انخفاض التضخم؟
الرئيس الأمريكي قال إن السعودية هتكون وجهته الأولى الخارجية بعد ما وافقت السعودية على استثمار ترليون دولار في أمريكا.
*️⃣ مش معتاد أكتب بوست توضيحي خاصة لجهات تمتلك جيوش الكترونية؛ لكن جالي سؤال ايه رأيي في ان السعودية هتدي أمريكا ترليون دولار. فحابب اشرح ازاي بيتم دفع الفلوس دي.
*️⃣ الفلوس دي مش بتكون تبرع؛ يعني السعودية هتشتري سلع وخدمات وشركات في أمريكا ب ترليون دولار؛ لكن فعلياً شايف دا مستحيل يتم خلال 4 سنين؛ الفلوس دي بتكون رايحة لشراء حاجات من أمريكا؛ مثلاً رباعي الطيران السعوديين (الرياض - السعودية - فلاي ناس - فلاي أديل) عاوزين طيارات مثلاً كبيرة فإما يشتروا من AirBus الأوروبية عيلة A350 أو من بوينج الأمريكية B787 ولو عاوزين طيارات صغيرة فدايماً بيروحوا للطيارة الاشهر عالمياً A321neo الأوروبية لكن ترامب يخلي الخيار هو B737 Max مثلاً وهكذا.
*️⃣ يعني من الآخر كده انتا رايح تشتري حاجة وقدامك انجليزي وفرنساوي وأمريكي؛ لا خليها أمريكي... عاوز سلاح في الطيران بما اننا بنتكلم عليها هات من لوكيد مارتن أو بوينج وبلاش تايفون الأوروبية والرافال الفرنسية وهكذا.
*️⃣ عاوزين تحطوا فلوس في شركات؛ ماشي اشتروا اسهم في فيسبوك وجوجل وتسلا وو؛ اشتروا اراضي ابنوا مشاريع ومولات... مش انتم بتشتروا اندية زي نيوكاسل الانجليزي؛ شوفوا اندية امريكية واشتروها.
*️⃣ يعني من الآخر حولوا الاستثمارات من أوروبا ودول العالم الأول لتصبح في أمريكا؛ هتشتروا خدمات تعالوا برضك. لكن السؤال بقى أمريكا عندها حاجة تتباع ب ترليون؟
*️⃣ لو رجعنا لنفس مثال الطيران؛ شركة بوينج العتيقة عندها أزمة ومش عارفه تسلم الطيارات في موعدها؛ طيران الرياض قاعد مستني صفقته اللي عملها ب 37 مليار دولار مع اخوه الطيران السعودي عشان يشتغل...
*️⃣ ترامبو بقى عارف دا إن الشركات الأمريكية عندها مشاكل ومتأخره وبقى المشتري يفضل الأوروبي عنها؛ وهو نفسه قال مش بنشوف عربيتنا في اوروبا بس بنشوف عربيات الأوروبيين عندنا. فالموضوع مش بس طيران متأخر لكن فعليا مجالات كثير كده... التبادل التجاري بين أمريكا وأوروبا لصالح أوروبا؛ بيصدروا لأمريكا ب 600 مليار ويستوردوا منها ب 370 مليار. طبعاً اللي لسه شايل أمريكا قطاع الخدمات والتكنولوجيا فأمريكا ليها تفوق واضح لسه.
*️⃣ هو دا باختصار الفكر الاقتصادي بتاع ترامبو؛ عاوز يجيب زباين للشركات الأمريكية؛ أو يا سيدي تعالى اعمل شركتك الأوروبية في أمريكا؛ المهم تعالوا.
*️⃣ فتخيل بقي قارة اوروبا بتشتري من امريكا ب 370 مليار دولار... دلوقتي السعودية هتشتري ايه بترليون... خلاص نقول لترامب اللي عاوز يسمعه وناخده علي اد عقله... وبعدين تعالوا نعمل لجان منبثقة وفرعية تقعد تشوف هنشتري ايه...
*️⃣ كان علي عيني سلمنا الطيارات المتأخرة هنشتري غيرها؛ سلمنا السلاح اللي تعاقدنا عليه؛ التأخير اصلا هيحصل من أمريكا وشركاتها.
*️⃣ تقريباً دي بقت سياسة الجميع مع ترامب؛ خدوه علي اد عقله يا عم وخلوا ال 4 سنين يعدوا؛ قولوا له حاضر وأبشر 🤣 وهو هيفرح قوي يفتكر أبشر دي يعني خلاص تم.
⬅️ التوضيح الروتيني: البوست دا مش تأييد أكيد لترامب ولا للسعودية؛ أنا كالعادة بشرح اللي بيحصل يعني ايه؛ زي ما بشرح قرار فايدة أو بنك او قرض حكومي أو أو... بشرح دا معناه ايه.
ساعات في تصرفات بنقدم بيها هدية للملاحدة يضربونا بيها.
*️⃣ لولي في رمضان قالت تصوم معانا وبالفعل صامت يوم وبعدين ثاني يوم بالمدرسة تعبت في حصة الألعاب اللي بقى اسمها حصة PE وفطرت... عادي يعني دول أطفال 8 سنين.
*️⃣ المهم لقينا لولي مصرة تصوم بعد كده؛ خناقة بقي وحوارات ونقاش قعد ساعتين؛ قوم بعد كده نكتشف ايه بقى.
*️⃣ في مدرسة عبقرية بالمدرسة بتخلي العيال اللي مش صايمين (أطفال لسه مجابوش 8 سنين) يروحوا آخر الفصل ويبصوا للحيطة وظهرهم للفصل وياكلوا؛ وهي تقعد مع الطلبة اللي صايمين قدام... معاكم أكل روحوا كلوه في الفصل من ورا وظهركم للفصل ووشكم للحيطة.
*️⃣ تصرف كده يخلي الطفل اللي مش صايم يحس انه متعاقب؛ وطبعاً الطفل الصايم يبدأ يتنمر عالفاطر؛ يا فاطر رمضان يا مخاصم دينك؛ دا حصل بالفعل.
*️⃣ فبنتي لولي طبعاً رافضة انها تتحط في الموقف دا؛ وللتذكر دول أطفال لسه بيتموا 8 سنين... ف هي قررت انها تصوم حتي لو هتتعب عشان متتعاقبش كده وحد يتريق عليها...
*️⃣ زوجتي طبعاً راحت المدرسة وقدمت شكوى ولو المدرسة دي كررتها مع بنتي فالحل مع أمثالها هو شكوى تتبعت لجهات معينة تشرح تصرفات المدرسة الدينية دي وهي وحظها بقى تتفهم الشكوى صح تتفهم غلط انها تتبع تيارات معينة لنشر افكار معينة؛ هي ورزقها بقى وكلنا فاهمين الطريق دا ابسط حاجة فيه الفصل النهائي...
*️⃣ أنا بعرف أكتب الكلام إللي يتفهم ب 2 معنى وبعرف أذي؛ مش بحب دا بس لو حد أذى عيالي فهعرف أرد لك الأذى 10 أضعاف ؛ بس قولت لمراتي تروح المدرسة وتقدم شكوى ضد المدرسة وتقولهم كده؛ اه تقول للمعلمة كده صراحة الشكوى هتبقي فيها بالطريق دا.
*️⃣ المشكلة لما تبعت عيالك المدرسة عشان يتربوا وبعدين تكتشف انك محتاج تعلم المعلم ازاي يعلم...
*️⃣ أمثال المدرسة دي هي اللي بتقدم لخالد منتصر وفاطمة نعوت وغيرهم هدية على طبق من ذهب عشان يقولوا شايفين الاسلام عامل إزاي.
⬅️⬅️ تحديث للتوضيح؛ انا لا نفذت حاجة ولا قدمت شكوى رسمي؛ انا بقول هددت بس من اجل الردع؛ حاجة زي الردع النووي؛ السلام النووي؛ عندك سلاح نووي دوره يعقل أي حد يهجم عليك؛ بس كده؛ محدش قال اني ضربت النووي؛ لكن أكيد لو حصل هجوم هضرب... كده اتفهمت... لم يتم عمل أي شيد حتى الآن.
خام برنت والبترول واخد غطس وشكلنا هننزل تحت ال 70 ونشوف اقل اسعار من 2021 للبترول؛. دا خبر حلو لمصر بصفتنا بنستورد او بندفع للشريك الاجنبي قرابة 500 الف برميل يومي بالسعر العالمي؛ فالغطس دا حلو؛ تخيل نفسك بتشتري شهريا بتاع 15 مليون برميل فكل دولار 1 ينزل يوفر معاك 15 مليون دولار علي اساس سنوي... الموازنة محسوبة علي سعر 82 دولار البرميل... شكل الزيادة بتاعة البنزين اللي بعد عيد الفطر هتكون حاجة صغيرة مش ال 1.5 جنية المتوقعة.
*️⃣ والغاز الطبيعي المسال برضك بصفتنا دولة مستوردة كبير للغاز فهو برضك بيريح هو كمان؛ ومصر مستهدفة تستورد 160 سفينة غاز في 2025 بتكلفة تصل الي 8 مليار دولار... فنزول الاسعار دا مفيد لمصر برضك جداً.
*️⃣ العالم لو تصالح مع روسيا فدا وحش لأوروبا بس حلو لينا 😁... وعامة حتى لو زعلانين مع روسيا وهي في اوكرانيا فبرضك في مصلحة لينا بناخد قمح مخفض 😁🫣🫣.
كده كسبان وكده كسبان؛ شوفوا انتم هتعملوا ايه 🤣
هو مفروض النهاردة القمة العربية بس متحسش خالص إن في قمة؛ متلاقيش الجرايد المصرية عاملة تغطية وتوقعات والفيسبوك شغال في حوار ابو تريكة ومعاوية وافتكاسات رمضان.
*️⃣ أنا افتكرت إني غلطان في التوقيت وإنها 8 مارس مش 4؛ لكن دورت في الأخبار وطلعت النهاردة وسكاي نيوز العربية الإماراتية نشرت عن مصادر البيان الختامي.
*️⃣ البيان الختامي بيرفض كل أشكال التهجير وينص على إعادة الإعمار بشكل سريع وعاجل بدون تهجير... وهيتم نشر قوات دولية في قطاع غزة لحفظ الأمن؛ وهيكون القطاع تحت اشراف لجنة فلسطينية تحت مظلة السلطة الفلسطينية ومحمود عباس زي الضفة الغربية كده... ودي لفترة مؤقته حتى الانتهاء من إجراءات عودة فتح والسلطة لحكم قطاع غزة مع الضفة.
*️⃣ عامة ننتظر ونشوف ايه هيحصل وخاصة مفيش كلمة بخصوص المقاومة وحماس ايه وضعهم؛ خلونا نشوف.
من عيوب العقل البشري إنه غير قادر على التركيز مع معطيات ومتغيرات كثير في نفس الوقت؛ عشان كده ربنا منح الإنسان ميزة التخمين؛ حاجة شبه الإكمال التلقائي Auto complete.. يشوف مشهد ويبدأ يخمن اااه اه يبقي يقصد كذا أو بيلمح لكذا؛ خلاص مخه يفصل ويبدأ التخمين.
*️⃣ ميزة الإكمال التلقائي مهمة لحياة الإنسان؛ مهو مش هيقعد يفكر في كل موقف وكل حاجة؛ مخه يفتح ملفات الذاكرة ويختار موقف مشابهه ويطبق عليها؛ بحيث يقدر المخ ياخد براح يفكر في النقاط القليلة اللي قادر يركز عليها 5-7 أمور... الموضوع ودا أد ما هو مفيد لكنه يعيبه التنميط Stereotyping.
*️⃣ بنبدأ نعمل قوالب نحط فيها؛ كلنا بنعمل كده؛ كلنا دي تشملني أحسن تفتكروا بنظر عالناس وأنا بريء. لا عادي نفس الموضوع معايا ودا مش عيب بشكله العادي؛ المشكلة بس لما الموضوع يزيد ويبقي التنميط هو الأساس؛ كله في قوالب متوقعه؛ فلما يحصل وتقابل حاجة مختلفة عم التنميط هنا الإنسان بيهنج ويبقي مش عارف يعمل ايه.
*️⃣ من مشاكل الساسة مع ترامبو إنه بيحب يعمل خلاف التوقعات؛ سياسة إنتا مش هتعرف تعملي قالب تتوقعني بيه؛ بس هو اللي فاكر كده لان في قوالب برضك للي زيه 🤣؛ نمط لل لا نمط.
*️⃣ إمبارح لما نزلت بوست قولت فيه ودائع الناس زادت بالبنوك؛ هنا كل قارئ للبوست طلع النمط اللي اول ما يقرأ سطر يوقف تفكير ويكمل بال Autopilot بتاعه؛ بتقول شهادات يعني عاوز الناس ترابي؛ يلا نعمل كوبي للأيه ونحطهاله وندعي عليه 🤣... طيب يا عم دا في 100 بوست فيه بقول يا رب الفايدة تتهبد والشهادات دي تتلغي؛ يعني أنا مش من تيار الشهادات دي... لا برضك هو أنا هفكر؛ خلاص ال Auto بتاعي اشتغل ونمطتك.
*️⃣ بعدين بقول الناس اللي اشترت الشهادة جددتها عشان لقت ان اخر سنة الذهب مكسبش والدولار خسر فطبيعي يكملوا؛ يعني حتي اللي حسبها برضك هيقرر يكمل.
*️⃣ الفريق التنميطي الثاني ظهر؛ ابقي انا نفس الشخص من أسبوع قولت في بوست علي تليجرام (نسيت احطه في الفيسبوك) بقول فيه الجنية الذهب اللي حاليا ب 33 ألف هيبقي ب 100 ألف بحلول 2030... يعني أنا مش معادي للذهب بغشامة؛ وحتى إمبارح عملت لايف ساعة قبل الفطار عاليوتيوب قولت فيه فوق ال 10 مرات أي حد هيشيل لسنين يبقي ذهب بلا تفكير.
*️⃣ ملناش فيه هنقولبك إنك معادي لعملة الرب ومؤيد للربا واديله هجوم... وبالمرة ناس تقولك انتا قررت تقارن بين يناير 24 ويناير 25 عشان تثبت وجهة نظرك؛ الحركة اللي بيعملها عادة الاسلاميين وكتبت عنها بوستات كثير سابقه بتاعة اللي اشتري ذهب في تاريخ كذا كان زمانه كسبان كذا في مدة كذا... طيب هو اختار التاريخين دول ليه؛ عشان هو كده عاوز يثبت وجهة نظره. فهوبا يعملوا معايا الحركة دي.
*️⃣ تبقي بتتكلم عن شهادات صدرت يناير 24 وخلصت يناير 25؛ وبتتكلم عن الودائع يناير 25؛ فييجي يقولك ليه اخترت سعر الذهب يناير 24 مع يناير 25 🤣... أومال احنا بنتكلم عن ايه؟ شهادة صدرت يوم 4 يناير 24 لمدة 1 سنة؛ يبقي في سبب اهو لاختيار التاريخين.
*️⃣ فاحنا طبيعي نبص اما 4 يناير او 15 يناير او 31 يناير؛ المهم نقارن فترة يناير؛ الشهادة صدرت 4 يناير والتقرير بتاع الودايع بيرصد حتي 31 يناير.
*️⃣ لو احنا جينا نحسب 31 يناير فهنلاقي السعر كان مبالغ فيه نظرا لان الدولار بالسوق السوداء كان 72 جنية؛ ومش منطقي نحسب عليه بالرغم من إنهم عملوها؛ يعني نهاية يناير 24 كان نفس الاشخاص بيتريقوا علي بتوع الشهادات ويقولوا لهم هاها عبيط دا الذهب زاد في اسبوعين اكثر من اللي الشهادة هتدهولك في 6 شهور... فهل نعمل زيهم.
*️⃣ لو عملنا زيهم وقولنا 31 يناير 24 كان جرام الذهب عيار 24 ب 4625 جنية والدولار 72 جنية... وفي 31 يناير 25 جرام الذهب 4450 والدولار 50.3 يعني خسران 4% ذهب و 30% دولار... نضيفه عليهم الفوايد يبقي كده خسران 25% عالذهب و 45% عالدولار ايه رأيكم في التضليل دا؟ شبهم صح؟
*️⃣ ولو قولنا نص الشهر 15 يناير 24 كان الذهب 3850 والدولار ب 57 جنية مقابل 15 يناير السنة دي الذهب 4300 والدولار 50.6... فكده الذهب زاد والدولار خسران؛ بحسب الفوايد بقي 13% عالذهب و 30%. ولو حسبت يوم صدورها بنفس الحسبة (الفرصة البديلة اي الفوايد) هتلاقي فلوسك خسران 7% ذهب خسران 25% دولار... ولو بتاريخ النهاردة (سنة وشهرين) خسران 4% ذهب و 29% دولار.
*️⃣ وضحت بقي الناس حسبوها ازاي؛ واخدت بالك بقول ايه؛ حسبوها؛ أنا مش عاوز شهادات؛ انا عاوز الفايدة تنزل النص؛ انتم نسيتم اخر بوست طويل كتبته كنت بقول فيه عاوز الشهادات دي تتلغي اصلا؛ الشهادات دي مضرة للاقتصاد والتجارة... انا من محبي الفايدة المنخفضة عشان دا الافضل للسوق والتجارة.
البنك المركزي أعلن إن شهر يناير اللي هو الشهر اللي فيه الشهادات المرتفعة ال 27% تبدأ تسترد فيه... طبعاً مفيش حد مشافش بوستات ألحقوا هيحصل تعويم جديد أصل الفلوس دي هتنزل تعمل مش عارف ايه في السوق وهتضرب التضخم ووو.
*️⃣ الكلام الشعبوي مفيش أسهل منه؛ كلام كده بيدغدغ المشاعر بغض النظر هو عقلاني أم لا... جو كده بيشوف الناس حاسه بإيه ويلعب لهم عالإحساس بتاعهم.
*️⃣ البنك المركزي قال ايه بقى؟ قالك شهر يناير اللي الشهادات خلصت فيه زادت ودائع الأفراد فيه ب 193.3 مليار جنية... يعني مش بس الناس جددت الشهادات لا وكمان زودوا فوقهم 193.3 مليار جنية.
*️⃣ بالمناسبة كده ودائع الأفراد وصلت ل 6.27 ترليون جنية.. واخد بالك من الرقم ترليون جنية؛ فالكلام الشعبوي كل مرة يقولك ألحق في شهادات هتخلص ب 0.3 ترليون ب 0.5 ترليون فهتولع البلد؛ ايه الرقم دا حضرتك دا السيولة بالبنوك حوالي 12 ترليون... ودائع الأفراد فوق ال 6 ترليون... هو عشان الرقم كبير بالنسبة لك يبقى كبير بالنسبة للدولة والاقتصاد؟
*️⃣ شهر يناير الماضي الحكومة اقترضت أذون وسندات ب 617 مليار جنية وفبراير ب 313 مليار جنية (محسبتش ال 54 مليار بتوع يوم الخميس) وشهر مارس الحالي في اذون وسندات هتخلص ب +800 مليار جنية... مصر دولة كبيرة والأرقام بالمليارات كثيرة.
*️⃣ بحاول قدر الإمكان ابعد عن الشعبوية في البوستات بتاعتي؛ بحاول أشرح للناس ايه هيحصل؛ لما كتبت وقولت الناس هتجدد الشهادات لقيت فريق قال حرام؛ وفريق قال محدش هيضحك عليهم تاني... طيب النتيجة أهي الناس جددت وزودت قرابة 200 مليار فوقهم... ادفس راسك في الرمل وقول لا مش هيحصل؛ إنجوي
*️⃣ قولت لكم الناس اللي راحت يناير الماضي اشترت ذهب وناس اشترت دولار وناس اشترت شهادات... بتاع الذهب كسب صفر من يناير 24 ل يناير 25... وبتاع الدولار اشتراه ب 55 متوسط ودلوقتي 50... بتاع الشهادات كسب 27%؛ فالناس هتشتري تاني... طبعاً اتبعت لي شتيمة وإني بشجع الناس تشتري شهادات.. مع إني كنت بشرح ايه هيحصل.
*️⃣ الناس بتحسبها البنك هيديني 27% يعني مفروض دا يوازي الدولار يبقى 64 جنية والذهب 24 يبقى 5800 الجرام؛ كده وضحت.
*️⃣ بقولكم ايه ما تيجوا لايف يوتيوب بعد شوية... على 4 وربع كده ونخلص على 5 وربع... جت في بالي كده وانا فعلياً في الشغل فهشوف حاجة اثبت بيها الموبايل وندردش مع بعض... نفع نفع منفعش نبقى نرتب لايف تاني
هيبقى في اللينك دا
https://www.youtube.com/live/pIe10addTpI?si=QPAvV4hj5v3TdXq8
الزيادة اعتبارا من شهر يوليو للحكومة
وشهر مارس للقطاع الخاص
صباح الخير
*️⃣ النهاردة اجتماع البنك المركزي اللي بيحدد فيه سعر الفايدة؛ دا أول اجتماع في 2025 ومتوقع جداً يتم تخفيض الفايدة اليوم وشخصياً متوقع انخفاض 2% ليصبح فايدة 25.25% ايداع و 26.25% إقراض بمتوسط 25.75%. وخلال 2025 متوقع متوسط الفايدة تنخفض لتصبح في رينج من 18-20%.
*️⃣ لو قرر المركزي نهاية عصر الفايدة المرتفعة اليوم وبداية سلسلة التخفيض فمتوقع ان بنكي الأهلي ومصر ينهوا الشهادات المرتفعة وهي تحديداً شهادة 3 سنين (30/25/20) وشهادة السنة (27% سنوي /23.5 شهري/ 23% يومي) وشهادة ال 3 سنين ذات العائد 27.5% صرف ربعي... ونبدأ نشوف شهادات أقل وتدريجي مع كل تخفيض قادم.
*️⃣ اللي هيساعد المركزي عالقرار دا ان التضخم القادم (يعلن 10 مارس) متوقع 19-20% ثم 10 أبريل مزيد من الانخفاض ل 16-17% ثم مايو رينج 15%.
*️⃣ كمان من اللي يساعد الدولة هو انخفاض فائدة اقراض الحكومة؛ يعني شهر ديسمبر كانت الدولة بتقترض صافي (بعد خصم 20% ضرايب) بفايدة 25% أصبحت 22% متوسط ال 3 أسابيع الماضية ودا للاقتراض القصير 3 شهور... والآجل سنة بقى 20% كمتوسط صافي ضرايب.
تخفيض الفايدة بيكون شيء إيجابي عالاقتصاد لعدة أسباب:
1️⃣ تقليل عبئ الدين عالدولة:
2️⃣ تقليل العبئ عالشركات:
3️⃣ حركة سلع والسوق:
الفوايد دائماً تذكر سنوي
الرواتب والبنزين والتضخم
مش من تخفيض واحد
زي النهاردة من 8 سنين كنت منزل بوست عالفيسبوك بقول للناس تخيلوا القيمة السوقية لأبل بقت ما يوازي 12 مليون مليون جنية 😁 وقاعد احسبها مع ميزانيات الدول العربية والبنتاجون وروسيا.
*️⃣ ايييييه دنيا؛ دلوقتي القيمة السوقية لأبل مبقتش 12 مليون مليون جنية؛ بقت 185 مليون مليون جنية 🤣🤣🤣
*️⃣ لا وايه كنت في 2017 كاتب المتوفي الجنية المصري؛ معتبره وقتها 16.5 جنية كده متوفي 🤣🤣🤣
*️⃣ اييييه ربنا عالم في 2030 هكتب البوست دا وأقول 400 مليون مليون جنية ولا نص مليون مليون مليون جنية 😁
شكل تغير الفايدة علي أذون الخزينة الحكومة (صافي بعد خصم 20% الضرائب) وهيبان ليه بنقول المركزي هيقلل الفايدة
دلوقتي متوسط الفايدة 27.75% والبنوك كل يوم ثلاثاء بتحظ وديعة اسبوع (عمليات السوق المفتوح) بيها في المركزي صافي... فواضح قوي انخفاض الفايدة
الصور دول 4 صور للاذون (قروض الحكومة) بعد خصم الضرايب ؛ والمدة 3 شهور و 6 شهور و 9 شهور وسنة لو مش واضحة يعني
الصور داتا من موقع المركزي وانتاج ChatGPT اديته الشيت وهو عمل الصور
طول ال 3 سنين الماضية كانت لولي بتحب قوي تروح المدرسة اليابانية بتاعتها في التجمع هنا؛ لدرجة كنا ساعات بنصحي الصبح مكسلين؛ طيب يا لولي نامي خدي النهاردة إجازة تقولنا لا عاوزة تروح المدرسة.
*️⃣ بعدين يحصل الصراع التقليدي في المدرسة بين التيار الإصلاحي اللي هما غالبيتهم راحوا اليابان تدريب وبين التيار التقليدي اللي جاي من مدارس الحكومة؛ وطبعاً النتيجة محسومة مين المنتصر؛ وهنا المدرسة تتغير.
*️⃣ طول التيرم الأول لولي مش حابه المدرسة بس بتروح عشان خايفه من مدرسة معينة عاملة لهم رعب؛ وما صدقت نقولها الترم الأول كفاية كده مدرسة قالت اه كفاية.
*️⃣ النهاردة أهو 2 يوم في الترم الثاني روحت لقيت لولي قالت لمامتها إنها خلاص مش حابه تكمل تعليم ومدارس؛ وهي عاوزة تاخد كورسات ودورات تدريبية بس خلاص كفاية مدرسة لغاية كده.
*️⃣ أيوا كده كنت مستغرب إزاي التجربة هتنجح؛ عيب كده ما إحنا عارفين إنها سبوبة بتتعمل عالحكومة اليابانية عشان تطلع قرشين وأهو بند ناخد بيه دولار ونصرف بالجنية... لكن تقولي تعليم وتوكاتسو ومش عارف ايه... كلام فارغ...
*️⃣ عاش التاتش التعليمي المصري؛ وطبعاً هتلاقي تعليقات تقولك روح اشتكي الموظف الحكومي المصري للموظف الحكومي مديره 🤣 سويسرا احنا ياض منك له 🤣🤣 بنبهر قوي بالناس اللي لسه عايشين في ماية اللفت وتقولك روح قدم شكوى 🤣 ماية لفت ولالا لاند ومفروض نمنع عنهم التليفزيون عشان الاعراض متتطورش والدارونيين يلاقوا الحلقة المفقودة.
⬅️⬅️ تحديث
*️⃣ لما البوست نزل شافته والدة زميل ل لولي في الفصل وقالت لمراتي إن ابنها قال نفس الكلام برضك وانه برضك مبقاش حابب يروح المدرسة.
اونصة الذهب ب 2900 دولار... شكله هيكسفني كنت بقول علي نص السنة هنشوف ال 3 الاف دولار؛ كده شكلنا هنشوفها الشهر القادم 🤣🤣🤣
Читать полностью…
بنك CIB خفض الفايدة النهاردة 3% وبنك QNB خفضها 1% وكان بنك EG خفض الفايدة 1.5%
*️⃣ ايه يا بنك اهلي انتا وبنك مصر؛ يلا بقي الغوا شهادات 27% و 30/25/20 دول وانزول بالفايدة؛ ولا هو لازم ننتظر لغاية يوم 20 فبراير لما المركزي يخفض الفايدة 2-3% عشان تتحركوا وتلغوا الشهادات دي.
*️⃣ عامة يوم الاثنين بعد بكره هيعلنوا انخفاض التضخم ثم بعده ب 10 أيام المركزي هيخفض الفايدة 2% وربما بكون شجاع ويخفض 3%... وبعدين يوم 10 مارس نعلن التخضم تحت 20% لاول مرة ثم 10 ابريل ينخفض كمان ويروح المركزي مخفض 2% كمان زي بتوع فبراير في 17 أبريل.
زمن الشهادات المرتفعة والفايدة العالية خلاص كده... يلا بقي خلوا السوق يصحي وتكلفة الفرصة البديلة تقع
لما تيجي تبص على المهاجرين والعمالة الأجنبية أو زي ما بنسميهم في مصر اللاجئين في العالم كله، تلاقي موجة عنصرية عالمية ضدهم... مع إن الكل مستفيد منهم أصلاً.
*️⃣ بداية من أمريكا، تلاقيهم بيستغلوا اللاتينيين والمكسيكيين ويشغلوهم برخص التراب وفي مهن صعبة أو محتاجة مجهود، زي الزراعة والبناء؛ ويا سلام ده لو هربان وورقه مش قانوني، يشتغل أرخص.
*️⃣ تروح أوروبا تلاقي نفس الحوار بالضبط؛ دول منتشر فيهم الغير رسميين ويشتغلوا بمبالغ زهيدة، وفي دول زي ألمانيا وإنجلترا بتستفيد من عجز قطاعاتها، زي الطب مثلاً، عبر جذب الأطباء الشباب من تركيا والشرق الأوسط... بدونهم قطاعات كاملة تنهار.
*️⃣ في الخليج مش محتاجين نتكلم عن 5 جنسيات شايلة الخليج؛ الهنود ثم المصريين ثم الباكستانيين ثم الفلبينيين ثم البنغلاديشيين. بتلاقي عنصرية ضدهم برضه، لكن أقل بكثير ولا مقارنة مع الأوروبيين. تفتكر الخليج كان هيتبني بالشكل ده بدون أجانب؟
*️⃣ يا أخي، حتى في مصر بنعنصر ضد السودانيين والأفارقة اللي ورقهم مش رسمي، وبعدين تروح تلاقي في نفس الوقت شركات صغيرة وحاجات زي الورش ومغاسل السيارات تستغل الناس دي وتشغلهم برواتب قليلة جداً.
*️⃣ من الآخر، الكوكب ده قاعد يجيب الأجنبي يشغله في مهن يرفض ابن البلد يشتغلها أو محتاج راتب كبير، ولو لقى الأجنبي ده ورقه مش سليم؛ يا سلااااام، فرصة وجت لغاية عندي، اسحقه وأشغله أرخص، ده معهوش إقامة وهربان من المكسيك أو كاسر فيزا في الخليج أو لاجئ هربان من حرب.
*️⃣ تشغيل الناس دي بيخليك تاخد منه شغل قيمته X وتدفع له ربع X، فبيزود دخل أصحاب الأعمال والاقتصاد، تخيل كده شركة في الخليج 100% من عمالتها مواطنين، هل تقدر تستحمل التكلفة؟ نفس الحكاية في أوروبا وفي أمريكا.
*️⃣ فالدول بتستفيد منهم وترمي لهم الفتات، حتى اللي شغالين رسمي نادراً ما بياخدوا رواتب زي ابن البلد، وبعد ما ترمي لهم الفتات تستغلهم بقى سياسياً في خصومات، وتلاقي ترامب في أمريكا وأحزاب اليمين في أوروبا، وحتى حصلت دعوات ضد المصريين برضه في بعض دول الخليج من عنصريين زي (تصحيح صفاء الهاشم) زمان في الكويت...
*️⃣ مع إن الأجانب دول إما مستثمر جاي بفلوسه فمفيد للدولة، أو ذو مهارة فمفيد زي المصريين في أوروبا، وخاصة الأطباء مفيدين للدول هناك، وحتى المهاجر غير الشرعي هتستفيد منه شغل ببلاش، ولو بقى ليه صفة لاجئ وأخذ الكارنيه الأصفر، هيدخل للدولة ملايين ومليارات الدولارات مساعدات على حس اللاجئين فيها.
*️⃣ فبقعد أشوف ترامب وهو بيقولك "ارحلهم"، والأحزاب اليمينية في أوروبا نفس الكلام؛ إيه يا ولاد التيت؟ ما اقتصادكم أصلاً معتمد عليهم، ومش عاوز أقول إن الناس دول مجوش أصلاً عندكم غير عشان دولهم مدمرة، وغالباً أنتم يا أوروبا وأمريكا ليكم دور كبير في الشكل والفقر اللي وصلت له دول الناس دي...
*️⃣ سرقتوا مواردهم ومولتوا حروب في دولهم عشان تخدم مصالحكم، وبعدين الناس هربت وجت عندكم، استغلتوهم وشغلتوهم بالفتات، وبعدين سخرتم منهم وبتهاجموهم وتعنصروا ضدهم... أما جنس أبيض غربي عنده مبادئ تيت صحيح.
محبي الصيف والعرق والتسلخات؛ يلا خلاص الشتاء خلص واجهزوا لموجة الحر نهاية الاسبوع دا وبداية القادم 😔😔
درجة الحرارة المتوقعة بالقاهرة السبت القادم تفوق الدرجة المتوقعة في دبي والرياض وحتي الكويت 😢😢
عرق كثير الفترة اللي جايه
تحديث 2:
الاشتراكات اتوقفت 😔 قفشونا
تحديث:
واضح ان الكمية المخصصة للعرض خلصت
البوست الأصلي:
مهم جداً الصراحة سنة اشتراك مجاني في perplexity pro لو حد مهتم بالبحث بالذكاء الصناعي بدل بحث جوجل التقليدي
بالمناسبة شريف عبد المنعم دا بيكتب حاجات جميلة في الذكاء الصناعي
https://www.facebook.com/share/v/1EUS8ZpGH6/
فاكرين لما قولت لكم في بوست الفايدة في مصر من اسبوعين؛ ان المركزي في مصر ممكن مينزلش الفايدة ويستني المركزي التركي يخفض الفايدة الأول وبعدين تقرير التضخم بتاع 10 مارس ينزل
*️⃣ ادي المركزي التركي خفض الفايدة؛ واستنوا يوم الاثنين تقرير التضخم ونزوله تحت 20%
*️⃣ ممل قوي المركزي المصري دا؛ روتيني جداً
*️⃣ نشوف تقرير التضخم 10 مارس ثم 10 أبريل وبعدين 17 أبريل قلبه يجمد وينزل الفايدة بقي في مصر
*️⃣ اخر البوست لازم نقول يخرب بيت الفايدة علي اللي بيحبوها عشان ميحصلش عليا حرب تعليقات واني من مشجعي البنوك والقروض وكده 🤣🤣🤣
فاكرين يوم 16 يناير لما كتبت وقولت اعادة الإعمار هتدخل للاقتصاد المصري ما بين 0.5 الي 1 مليار دولار شهرياً
اهي الارقام طلعت بعد شهرين انها متوسط 1 مليار دولار اعادة الاعمار... والطبيعي النص او الثلثين هيكونوا في مصر هنا بصفتك ع الحدود والمشتريات غالبيتها منك.
العيب اللي كان مضايقنا ان في حرب علي حدودنا؛ اهي هتضخ عالاقل 25-30 مليار دولار عالأقل في اقتصادنا؛ لو مكناش عالحدود كانوا هيروحوا لدول تانية.
⬅️⬅️⬅️ اللي اقصده بس ان تقديراتي اللي عملتها طلعت شبه تقديرات الدول العربية والبنك الدولي
*️⃣ لما بكتب عن الحكومة بكتب هي بتفكر ازاي وبتحسبها إزاي؛ مش أنا... لما بكتب عن المواطن فنفس الفكرة هو بيفكر إزاي... بشرح لك هما بيفكروا إزاي مش بقولك دا تصرف حلو... ودايماً بقول رأيي او بلمح ليه؛ البعض عاوزني أجاهر بقي واتخانق؛ عايش في سويسرا؛ ولو جرالي حاجة 🚓🚓 هيمصمص شفايفة ويقول مسم كان طيب؛ يلا لما نشوف حد تاني نلبسه... لا حضرتك أنا مش هخش خناقة مش بتاعتى؛ أنا مش هخش خناقة أصلاً...
⬅️ لما تكتب حاجة على صفحتك وبيتابعك 100 غير 100 الف غير مليون؛ القانون المصري أصلا بينص على إن أي صفحة فوق 5000 شخص يمكن محاسبة صاحبها باعتباره منصة اعلامية... يعني حتى مش محتاجين نفتكس لك حاجة؛ لا خالص دا القانون موجود 🤣 اسمه قانون تنظيم الصحافة والإعلام وبينص علي إن أي صفحة يتابعها فوق 5000 شخص فهي تخضع لقانون الإعلام.
يلا نرغي لايف
https://www.youtube.com/live/pIe10addTpI?si=QPAvV4hj5v3TdXq8
صندوق النقد يدرج مصر علي جدول الاجتماعات من أجل عودة برنامج الصندوق وصرف الدفعة الرابعة وتحديد موعد المراجعة الخامسة؛ والأهم من دا كله بداية القرض او التسهيل الجديد اللي اسمه (الصلابة والاستدامة 🫣) ولمؤاخذة هو اسمه كده.
حد واخد باله من
Requests for Waivers of Nonobservance and Modification of Performance Criteria
*️⃣ اللي هو طلب مصر إن بعض البنود سماح المرة دي يا كبير ونشوفها لفات قادمة بقى.
*️⃣ عامة هننتظر بعد الاجتماع التقرير بتاع الصندوق اللي هو أهم حاجة أصلاً وفي التفاصيل والتعديلات وكله.
سعيد بالرسايل والناس إللي بعتت لي تطمن عليا وليه بقالي أكثر من 10 أيام نزلت بوست واحد بس يعتبر.
*️⃣ أنا كويس الحمد لله؛ مشغول بس بأمور خاصة بشغلي فمش ملاحق ومرهق ذهنياً ونفسياً بشكل كبير.
*️⃣ النقطة والخلل الدائم إن الكتابة هواية مش وظيفة؛ فدا ميزته إني بكتب بمزاج؛ لكن عيبه إني مجرد شغلي الأساسي انضغط فيه بنسى الكتابة ومش بفضى لها ومش هخصص لها جزء من وقتي... فربنا يكرم ويبقي ليا دخل منها فممكن الواحد يخصص لها جزء من حياته باعتبارها شغل.
*️⃣ أنا مش بهتم قوي بفكرة لازم تنزل بوستات يومياً عشان الريتش ميقعش منك؛ عادي يقع ألف سلامة عليه؛ أنا بكتب For Fun والفيسبوك مفيهوش ريتش أصلاً وتليجرام عندي هو الأساس.
*️⃣ فكرت أروح رامي بوستات صغيرة من بتاعة إثارة الجدل والشير؛ يعني مثلاً شايف الجنية الذهب أبو 33 ألف جنية مصري دا؟ توقعي إنه في 2030 هيجيب ال 100 ألف جنية 😁. دا بجد توقعي للذهب إنه مقابل الجنية هيوصل كده والناس وقتها تقولك الحق جرام الذهب كسر ال 10 الاف جنية 😩😩 يا تري أمتي نشوفه ب 20 الف جنية 💸💸فاخش أعلي في التعليقات وأقول 5️⃣3️⃣0️⃣2️⃣ 😁.
*️⃣ أو بقى كان ممكن أرمي دي بدون توضيح وأسيب ناس تقول لا في 2028 والبعض يقولك إنتا قابض من مجلس الصاغة العالمي 😁 ووو فالبوست يعمل ريتش... بس أنا مش بهتم بالنوع دا من الإنتشار.
*️⃣ معنديش حاجة أقولها يبقي اقعد ساكت؛ هتتكلم عشان مفروض تتكلم يبقي هتغلط وتعك...
*️⃣ أخيراً النهاردة ذكرى وفاة والدي؛ الفترة اللي عشتها بدونه تفوق اللي معاه نظريا لكون فترة الرضاعة لا تحسب... ربنا يرحمك يا بابا ودعواتكم
*️⃣ المهم أنا بخير؛ وان شاء يوم الخميس الساعة 8 م أعمل لايف إن شاء الله؛ مفيش ماتشات؛ أصل كل ما أشوف معاد يطلع ماتش للأهلي لا للزمالك؛ او ليفربول او مان سيتي؛ فقولت لا بقي هختار الخميس... طلع ماتش الزمالك و Zed خلاص معلش اتفقنا خلاص.
بيعجبني إننا بنحاول نعمل ويكأن عندنا الحاجة في مصر:
1️⃣ ال Apple Pay : شغلناها مع 3 بنوك وخلاص كده جبرت خلاص؛ بحيث يقال خدمة Apple Pay شغالة في مصر أهو زي الدول الطبيعية 😁... أومال إنتا فاكر ايه. ومش عاوز أحبطكم وأقولكم إن الدفع ب جوجل فركش؛ انسوه في 2025 😢.
2️⃣ ال Wifi Calling برضك قالوا شغالة خلاص؛ طيب الشركات شغلتها بجد؟ لسه معظمها مدعمش كل التليفونات أو كل العملاء يعني مثلا اتصالات وأورانج يقولوا سوري لسن مش بندعم سامسونج 😁؛ واللي حتي دعم فهو مدعمش برضك ويأكنها ظهرت بس؛ معندناش واي فاي كولنج فعليا بس إيه رأيك في الشو 🤔.
3️⃣ ال 5G : قالك المصرية للاتصالات أخدت ترخيص وبعدين ال 3 شبكات الأخري دفعت 600 مليون دولار وأخدوا ترخيص؛ وفي ناس موبايلاتها تقرأ وهمي 5G بس فعلي دي عادي LTE... طيب ايه يا ابني ال 5G امتي؟ ان شاء الله وألف ألف مبروك؛ إحنا كنا مزنوقين في قرشين أخدناهم من شركات الاتصالات وادينهاهم ترخيص؛ شغلوا مشغلوش واحنا مالنا.
4️⃣ إنساباي الشركات: البنك المركزي قال إنه قبل نهاية 2024 هيبقي في انستاباي للشركات؛ هانت يا جماعة احنا في فبراير 25 اهو بعده هييجي يناير 25 ثم نروح ديسمبر 24 هاااانت.
*️⃣ وطبعاً هيطلع لك فلوطة القلوطة يقولك مش شايف الظروف الاقليمية؛ أصل شركة الاتصالات مينفعش تشتغل عشان ترامبو عاوز يرحل الفلسطنيين؛ والبنك المركزي مش بيشتغل عشان ترامب هيغير اسم خليج المكسيك الي خليج أمريكا... عادي مهو زمان تقول لحد محتاجين شغل في الزراعة في مصر يقولك بنحارب الارهاب في سيناء؛ علي اساس وزير الزراعة بيضربهم بطيارات السماد 😁... اهي هبل في الجبل.
احنا معندناش الخدمات بس ايه رأيك في التصريحات؛ هنطلع تصريحات عن الخدمة وييجي فلوطة يسقف وخلاص اخدنا اللقطة.
⬅️⬅️⬅️ تحديث للناس اللي مش فاهمه قصدي... توفر الخدمة يعني توفرها لكل الناس في كل مكان وكل الشبكات وكل ال مستخدمين وكل الاجهزة... ما مثلا اقدر اقولك عندي سرعة انترنت في بيتي 70 ميجا مثلا... هل اي حد الشبكة عنده هتدعم دا ونقول ان العادي في مصر سرعة 70 ميجا؟ لا... البوست كله بيقولك ان الخدمات متاحة لبعض الناس وخلاص صورنا واخدنا اللقطة ونقول خلاص بقت موجودة؛ فكون انك دخلت تقول الخدمة كذا شغالة معايا يبقي اثبت كلامي وهو ان البعض شغالة معاه مش الكل... هل ينفع حد يقول عندي ماية في الحنفية؛ لا عشان دا الطبيعي؛ فلو الشيء منتشر ومتوفر للجميع وطبيعي مش هتحتاج تقوله... كده وضحت
خواطر ودردشة بصوت عالي
*️⃣ في أغنية زهرة المدائن الشهيرة قالت فيروز (حين هوت مدينة القدس؛ تراجع الحب وفى قلوب الدنيا استوطنت الحرب) وقبلها كانت قالت (استشهد السلام فى وطن السلام وسقط العدل على المداخل) بالرغم إن مفيش علاقة بالأغنية وزمنها بالحاضر بس الاغنية دي عمالة ترن في ودني؛ بحس العالم مع الوقت هيقتنع بإن السلام دي خرافة؛ وفي قلوب الدنيا استوطن الحرب.
*️⃣ بعد الحرب العالمية الثانية بدأت شعوب العالم الثالث بالتحرر الشكلي من الاستعمار؛ في حد عرف يلعب في عقول الشعوب وقتها وقالهم في خرافة اسمها السلام؛ هدفكم السلام.. والشعوب صدقت من وسط آسيا لأفريقيا لأمريكا الجنوبية.
*️⃣ اشتروا وهم اسمه السلام؛ واشتروا معاه سلاح كثير من الغرب؛ وعشان يحموا نفسهم ادوا الغرب نفس نفوذه اللي كان واخده وهو محتل... والغرب بقي ييجي لك؛ أيوا بص هحميك وهوفر لك السلام بس معلش هناخد السرير عندك من الأوضة مقابل حمايتي؛ معلش هناخد الكنبة؛ معلش السفرة؛ معلش السجادة؛ وكل شوية دول العالم الثالث تصدق وتديله عشان هي عاوزة السلام.
*️⃣ بعد عقود خلاص بقى العالم الثالث قاعد ع الأرض محلتوش حاجة؛ فالغرب بقى يروحله يقوله ماشي هديك السلام بس انتا مش معاك حاجة؛ خلاص انتا عندك عيال كثير هاخد واحد قربان يشتغل عبد عندي وهسيبك لك الباقي تعيش بسلام... وبرضك وافقت الشعوب.
*️⃣ من سنة رئيس فرنسا ماكرون في زيارة لأفريقيا يتريق علي فقر القارة؛ وانهم عالة على فرنسا؛ مهما خلاص بقوا عالبلاط وعيالهم جم فرنسا مواطنين درجة 3... بعد ما سرقوا الشقة بيسخروا من فقرك.
*️⃣ العالم الثالث بيقدم لسه تنازلات للعالم الأول؛ بس المرة دي معندوش لا عفش بيت ولا حتي عيال؛ فدلوقتي جه الدور انهم ياخدوا مراته لفة؛ خلصت التنازلات في الفلوس؛ جه وقت التنازلات في الشرف.
*️⃣ المضحك انهم ضحكوا علينا وقالوا دينا قال كده؛ لإنه قال (وإن جنحوا للسلم فاجنح لها وتوكل على الله) مع إن الأيه بتقول عكس ما اشتريناها؛ الآيه بتتفهم إنك في حالة حرب لكن لو هما طلبوا السلام فأوكي سلام لكن مش عاوزين خلاص نرجع لل default mode وهو الحرب.. هما اللي يطلبوا السلام مش إحنا؛ هما اللي ان جنحوا مش إحنا.
*️⃣ لا ويقولك لازم السلام عشان الحرب بتدمر والسلام رخاء؛ صح والله واضح كده رخاء دول العالم الثالث اللي عايشين فيه؛ورينا كده عالم ثالث وحال مواطنيه؛ كلمني عن أمريكا الجنوبية؛ طيب افريقيا؛ طيب وسط وجنوب شرق آسيا... طيب ورينا الأشرار اللي في حروب أمريكا انجلترا فرنسا روسيا الخ الخ؛ أكيد مواطنيهم ماتوا من الجوع أصل الحرب بتدمر.
⬅️ فلا من دول العالم الثالث عاشت برخاء ولا هي ماتت بكرامة مرفوعة الرأس؛ لإن ببساطة السلام اللي تديه هتحصل على سلام قصاده؛ لكن السلام اللي تطلبه من الآخر هتحصل على ذل قصاده.
هي المعونة الأمريكية دي يعني هتضايقنا قوي؟
*️⃣ طبعاً انتم عارفين إني بتجنب أي حديث عن السياسة لأسباب معروفة للجميع بس تعالوا استثناء نقرب شوية في سطرين ونبص هي المعونة الأمريكية اللي بيلمحوا بيها دي تضلعنا يعني؟
*️⃣ عارفين دخل مصر الدولاري الطبيعي كام؟ جمع معايا كده 40 صادرات + 32 تحويلات مصريين + 15 سياحة + 5 تعهيد + 10 قناة السويس (في الظروف الطبيعية) + 7 أخرى زي استثمارات = نقول 100-110 مليار دولار.
*️⃣ طيب مصروفات مصر الدولارية كام؟ الاستيراد 80-90 مليار دولار + سفر وعمرة وحج 2-3 مليار دولار + خدمة دين 30 مليار دولار مثلاً + 5 تحويلات أرباح = 115-120 مليار دولار تقريباً.
*️⃣ الحسابات دي الحسابات بالحب كده البلدي تقرب المعنى كده... فاحنا نقول كده احنا دولة بيدخلها 105 مليار وبتصرف 120 مليار كل سنة... عارفين بقى المعونة الأمريكية كام؟ 1.5 مليار دولار.
*️⃣ اه بجد السنة اللي فاتت كانت 1.44 مليار دولار... احنا السنة الماضية فقدنا 5-6 مليار دولار من دخل قناة السويس بسبب المشاكل اللي في المنطقة... فالرقم مش معضل خالص... مصر بند الطاقة بتاع استيراد الغاز هنجيب 160 شحنة غاز مسال في 2025 دول لوحدهم 8-9 مليار دولار... دول مثلاً عشان نفك اسالتهم مأجرين 3 سفن ب 500 ألف دولار يومياً إيجارهم بس بدون الغاز.
*️⃣ الرقم ك رقم مش هيضرك في أي شيء لكن مش معنى دا إنهم مش هيفرق معانا.
*️⃣ الفكرة في المعونة الأمريكية وزيها برضك اتفاق صندوق النقد؛ إنهم بيقولوا إن بلطجي الكوكب راضي عني أو عالأقل مش زعلان معايا. دا بيطمن الهوت ماني وبعض المستثمرين فييجوا. هنا بقى الخوف؛ مش على ال 1.5 مليار بتوع أمريكا؛ لكن على ماذا يعني إنك مغضوب عليك.
*️⃣ لو بقى إنتا قدرت تقنع المستثمرين إنك زي الفل ومظبط أمورك... فهنا بقى المليار وشوية دا يلفوهم وخد يا ترامبو... لكن عامة أمريكا هتدفع؛ دي أمور تبع اتفاقية السلام ولازم تتدفع؛ هما مستفيدين منها أكثر مننا ومش من مصلحتهم يضحوا بيها.
⬅️ فمن الآخر انتا وشطارتك بقى في ترتيب أمورك.
🙄🙄🙄
المجلس قرر الحد الادني للعمالة المؤقته (باليومية) بحد ادني 28 جنية في الساعة صافي
يعني 8 ساعات شغل ب 224 جنية في اليوم حد ادني للعمالة المؤقته
⬅️⬅️⬅️⬅️
الناس اللي عمالة تدوس Ban؛ انا زهقت مسح البان وانتم بتعملوا ريبورت ليا فيا
هديكم بان 😈
خطوة حلوه جداً
*️⃣ جهاز تنظيم الاتصالات هيستغل منظومة IMEI وهيقفل التليفونات اللي بتستخدم في التسويق العقاري بدون التسجيل في الجهاز.
*️⃣ دا عشان المسوقين بقوا يغيروا الشرايح اللي بيعملوا المكالمات منها؛ ميعرفوش ان المكالمة بيتسجل الرقم و IMEI بتاع الجهاز اللي طالعه منه. فكده الجهاز هيقفل لهم الموبايل دا أصلا؛ يغيروا شريحة ويغيروا موبايل بقي.
*️⃣ الجهاز قال إن في 35 ألف رقم تليفون اتسجلوا عنده ك مسوق عقاري... وبكده بقى لو حد اتصل بيجي لك رسالة توضح ان دا دعاية فعاوز متردش يبقي متردش.
*️⃣ لو متعرفش إزاي تبلغ فنزل ابلكيشن MyNTRA وقدم بلاغ منه لو جالك مكالمة دعائية ومظهرش ان دي دعاية (ظهر في التليفون مش ترو كولر) اشتكيهم... وممكن تشتكي من الموقع بتاع الجهاز برضك.
*️⃣ وحاجة علي جنب؛ احنا عندنا دلوقتي 35 ألف رقم مسجل ك نشاط تجاري مسوق عقاري غير الالاف انشطة أخرى؛ تخيل بقي تخيل الأرقام دي تروح لجهة بنحبها كلنا يتابع معاهم؛ انتا بتمارس نشاط تجاري؛ فين اقرارك الضريبي عن النشاط دا 😁... أنا بقولك تخيل يا عم تخيل مبقولش دا هيحصل 🫣.
*️⃣ تخيل كده الضرايب بييجي لها داتا عنك من التليفون؛ ومن الكهرباء ووو وبعدين تقولهم مش شغالين... وكنت بتعمل المكالمات دي وبتستهلك كهرباء وماية وغاز ووو لمقر الشركة بدون عمل لسنوات 🤔🤔 بتعذب الموظفين وبتكهربهم وبتدفع لهم رواتب صدقة. وكل دا بقولك تخيل مبقولش خالص إن الداتا دي بتتجمع حالياً... دا تخيل 😢😢.
كنت مرة قولت إن مصر فيها قانون رد ضريبة القيمة المضافة بس مخبينه سر؛ بس واضح ان بيحصل تطورات في المطار لدرجة أنهم حاطين يافطة توضيحية تكشف الأسرار 😁... عامة دي اللوائح والقوانين التنظيمية لموضوع رد ضريبة القيمة المضاف للمسافرين
أكيد مش هتسألوني أنا لإني مصري يعني مش هتترد لي؛ الكلام دا لو حد جاي سائح يقدر يرد ال 14% اللي دفعها؛ دا بفرض إنه اخد فاتورة أصلا ضريبية 😁 بل إيصال إلكتروني وفيه رقم الباسبور 😁😁
لكن اهو القانون موجود