-
𝔻𝕖𝕡𝕣𝕖𝕤𝕤𝕚𝕧 𝕞𝕖𝕕𝕦𝕫𝕒 Шеърлар ва ижод намуналари муаллифи Абдулазизхон Акрамов👇 @mister_tardid
Ёғду.
менинг дилим ангишвонамас,
қайдан бунча наштару талаб?
кулгингизнинг оралиғидан-
менсимаслик турар мўралаб.
бокира бир интиқом билан-
таҳайюлга юборинг мужда.
қаранг-
хатто гулим художўй,
кафтингизда қилади сажда...
лабимизни тишлаган уят,
исёнимиз навбат кутади.
сиз ҳавога отган қўлимиз-
ҳақиқатга ойна тутади.
нозларингиз бунча қиморбоз,
соғинчсираб куяр киприклар.
биз дайрдан фано қилдик ҳўб,
дийдорлансин барча кўприклар...
ё раб не тонг,
киприклар чигал,
жаннат ўзлигини унутди.
ҳажр сомон қилган юзимдан-
нафасингиз сояси ўтди...
2014 йил, Фарғона.
@cabbalah
Хажр
Деразадан қўлим чиқарсам-
Аёз бармоқларим синдирди.
Бошқа унга ёзма деб мактуб.
Елкам узра ҳаволаб қушлар
Чўқилади гавҳарларимни-
Боқма дея суратларига.
Нафасимни ўғирлар бўшлиқ,
Аксимнида парчинлар афруз.
Ўзлигингда яшар У дерлар
Ғусса мени этар талаффуз.
Томиримни қирқди ёлғизлик,
Деворларга сачради қоним...
Қоним - исминг шаклида эди...
2014 йил Фарғона
@cabbalah
***
У қалтираб турди стулдан,
Ўнғайсизлик журатни еди.
Бошлиқ унга туфук сачратиб-
Ўшқирди ва Тўнкасан! деди...
Уйга яна яёв қайтди у.
Итоаткор оёқлар чида!
Сал егилган боши билан сўнг
Ўйлаб келди тўнка ҳақида.
Тўнка асли - кесилган дараҳт,
Исёнлари тугаган қайғу.
Демак ҳозир кесилган. Аммо-
Қачонлардир дараҳт бўлган у!!!
Энди фақат илдизла суҳбат
Қилиб яшар. Шундай мискинтаб.
Зичлигини синар қумурсқа,
Чиримоқлик ўйнини ўйнаб.
Мевалар ҳам ўзин йўлига,
Энди унга тегмайди нафи.
Болталарда ҳамма ҳокимят-
Унда еса ёрилиш хавфи...
Хориб уҳлар. Тушида қайтиб
Яна дараҳт каби улғайди.
Томирлари ерни ғижимлар
Бақувват шох само суяйди...
Ҳаёт мушти - энг мустаҳкам мушт,
Исёнларинг мудом тўлғоқда.
Ана қаранг ишга пиёда-
Енгилган бир тўнка кетмоқда..
2014 йил Андижон.
@cabbalah
қурб.
Санғиган чўп. Шикаста ҳаво
Шивирлаган кукун. Қирқ унсур.
Кекирдакдан тикилган маво
Сўз айтишда минг битта қусур.
Қирғий титган бад мускулинг- ғам
Эй Шеьр-
Мени қонимга белар.
Тилимда чўғ. Куяди тилим-
Оғриқлардан туфлагим келар...
Қағиллаган дағал товушнинг-
Орасидан бир куй симирдим.
Бақириқни йўниб арралаб-
Тиканини баттар емирдим.
Кўзни боссам гавҳар қилса ҳўл,
Қоғозимни. Қолмас қизиғи.
Сўз қийналар- етмай манзилга
Сирот бўлди дафтар чизиғи.
Қайсар ўсдим.
Зулм этмоғим шарт!
Сени кутиб тешилди кўзим.
Соғинчимни кўтарар аранг-
Оёқлари қонаган сўзим...
Кел!
Сенсизлик истасин фано.
Терс қаради кўзгумдаги акс.
Сен келгунча Худо олдида-
Руҳим тушар самандарий рақс...
2015 йил сентябрь.
@cabbalah
13 ламалар.
1.
кўзгуларда думалар гавхар,
энди кулгим хаёдан кечиб-
кўчаларда қилиб юрар фахш.
висол - ўлим қофиядошдек,
аросатлар мустахзодида-
сенга етиб - сенга кечикдим.
кечаги кун бахтлироқ эди..
қадим рухнинг тош адирида
ғизол каби тойғонар ақлинг.
тақвимларни санаган бахтсиз-
ўзингдан кеч.
ёлғизлик махал.
Яшаш учун қолмаса сабаб-
Тирил!
Ўлмоқ учун мукаммал!..
2.
соддалашиб боради мавсум,
энди кулган момақаймоқни-
янчмоқ мумкин дилхираликсиз.
Журъат учун пуфланган хаво
хиқилдоқнинг овлоқларида
ғурур билан қолади тунаб..
сиғмасликми, сиғинмасликми?
бир фожеа юз бермоғи шарт-
севгисизлик ташқарисида..
Жилмайишга кўтарилган лаб,
асл ўзи ғуссамнинг эни.
Ғамгин қушим
гар севмай қўйсам-
юрагингга кўмиб қўй мени..
2008 йил Яйпан.
@cabbalah
Сўз. ( янус )
Қўзим ухла, оғрима ортиқ
кузлар сочар ғам андухини.
оловланган тизимдан чиқиб
тополмайди тоза рухимни.
Раво кўрдим мухаббат озроқ,
Қалбим ичра исён хавоза.
Гулни бурни қонаб хушбўйдир
хаёт берар созланиб ноза.
Сабрим тугар.. Шафаққа боқдим.
тўзиб кетма, шаффоф кўзимдан.
Мен енгилдим..
муаллақ нафас..
Қайга қочай энди ўзимдан..?
2018 йил Тошкент.
P/s Иккинчи шеър з харфи ўрнига л қўйиб ўқилади.
@cabbalah
Лабланмади журъатсиз сўзим,
Хажр узра сабр сийғониб.
Минг йил шуъла қидириб толдинг -
Аёзларга дўндинг уйғониб.
Тинмай суздим жунун бағрида-
Ё Раб, васлинг - рухдир туфроққа.
Ишқ улғайди дилда..
Юрагим-
тайёрмисан бахор бўлмоққа?..
2012 йил, Яйпан
Туб
қай макондин ушбу ҳалажлик?
жон ютқуни илкимга асо.
жудолиқнинг айши авжида,
аммо ҳануз яшадим расо.
сол ташладим баҳру чашмингга,
адаштирди юлқиб елканим.
бизим қисмат ёруғлик кўрмас,
бизим тақдир фараҳга ғаним.
ё дилимдан ризвон кечурди,
қанотини ечди самандар.
ирфон истаб чиқдик саҳрога,
либосимиз ҳирқа, қаландар.
ёнишимиз турфа эй рақиб,
сабримизнинг олис қирғоғи.
ҳатомизни тинглар мунг билан-
ер остида дўзаҳ қулоғи...
таваккулга якто суяндик,
қўл узатдик муштлаб ҳавони.
кавсарларни лойқалатган қўл-
тикиб берди бизга мавони.
йиқилмадик. шароб ичмадик,
маст қилурди бизимни висол.
ё ҳақ дея ҳайқирдик баттар,
манглайимиз қиблага тимсол.
аста секин чиқиб зинадан,
пойимизга йиқилди гуноҳ.
истиғнога еткан онимиз-
ўзимизни кўрдик баногоҳ..
ғайб илмида учқур отимиз,
иймонимиз унданда ўжар.
ўзимизга келиб рўбарў-
аста суқдик энг ўткир ҳанжар...
шунда...
э воҳ!
синиб моддият,
биз юксалдик. таралди овоз.
исрофилнинг найи чангида-
оёғимиз этурди парвоз...
тош ғажиди сажда қилмаган,
азозилнинг минг бир лашкари.
нурни кўрдик.. нурга интилдик...
юриб бордик ёруғлик сари...
мен кимдирман?
кимдир кимланган?
менланганлар сенсирар очун.
мумкинликнинг атрофи тўла,
имконландим фақат сен учун.
эй боримни этгучи борлиқ,
эй йўғимдин бино қилгучи.
эй дилимни баҳтларга кўмиб,
эй дардимни хино қилғучи.
эй манзилга айланган оҳир,
бизни чорла!
ғамни ёрайлик.
ўзингдирсан қалб мусаввирим...
ишқ ато қил!
ишққа борайлик....
2017 йил Тошкент.
@cabbalah
Гул парвози.
Нега парвозимни ҳоҳлайсан?
Истакларинг сиғмайди ҳушга.
Юксакликни кўрсатдинг дадил-
Қўниш илмин билмаган қушга.
Ва қўлларим қанотланди боз
Ерда қолди ҳонаки жаранг.
Қовурғамга урулар...
Юрак-
Қисқа масофали бумеранг.
Учдим. Учдим. Ҳаволаб баттар
Парвозимнинг якуни афзал.
Мен тушундим
Ҳар қандай парвоз
қонли якун топмоғи гўзал...
Қандай гўзал...
Дайди ўқ или-
Қушдан қизил гулга дўнмоқлик.
Энг ёмони
Гулсиз,
Парвозсиз-
Гўзал бўлмоқликка кўнмоқлик...
2017 йил Тошкент
@cabbalah
***
Хамма қалбни ушлаб кўрганда,
Қўлим қаваришин ўйладим...
Ғазаб керак хозир
кучсизроқ,
Оғриғимдан бўлсин кўйлагим.
Кечаларни эхсон қиламан-
Уйқуларга
мурувват - бедор.
Сипқоришим мумкин ҳозироқ-
Сенсизликни, дадил, телбавор..
Маюс тортма табассумимдан,
Вафо бўлсин - яширган сиринг.
Бугун истак СЎЗга айланмоқ-
Қўрқоқ тиллар мени гапиринг..
2013 йил, Андижон.
@cabbalah
Бешкайфият.
1.
Саҳро ташна. Келар ҳаллослаб-
Мен салқинлаб булоқ бўйида
Кузатаман ҳаракатини.
Судралгиси келар дафатан
Саробланган тароват ила-
Нафас олар юзимга қараб...
Сен Худога ибодат қилдинг-
Жойнамозинг бир бурчагида-
Илон кулча бўлиб уҳлади.
2.
семиз ҳаво инқиллар.
хона.
кафтинг терлаб беҳол уфлайсан.
оз аксингни кўрсатгани чун-
тошойнага қаттиқ туфлайсан.
шер ёзмайман!
лабларинг қурир..
бармоқларинг сочингга илдиз.
ярим тунда туйқус уйгониб,
Ғамбурчакда чўк тушасан, тиз.
..суғурдинггу, отдинг юракни!
гўё икки тамон болди тан.
сен бир ҳиссиз вужудда қолдинг-
...шоир чиқиб кетди хонадан...
3.
даҳрий каби юз бурди шакл,
икки қирғоқ аро саросар-
кезиб юрар мажнуний фасл.
кўз соққангни ботир алвонга,
тиззанг синган, туролмайсан тик.
миниб олган сени бўйнингга -
номуси топталган озодлик...
фоний бўлдинг.
мен эса синдим.
юрак- зиндон. деворлари тош.
зиндон тола қора суяклар,
суякланиб боради кўз ёш...
4.
Бу эшик дараҳтдан ясалган-
Шу дараҳтнинг илдизларида
Чириб ётган қотил калласи.
Бугун уриб олдим эшикка
Пешонамни.
Қон сизди равон...
Ёки дарахт соғинди бошни
Ёки уни таниди бирдан...
5.
у қутбда эврилар соя,
қибласирар муҳожир вужуд.
титроқларинг кулгулашади,
нафасларинг исмсиз бир дуд.
уйқу юбор унга Худоим!
аҳир унинг вужуди кўзку.
ютуб юборади ҳонамни-
Деворимга илинган кўзгу...
2015 йил. Фарғона.
@cabbalah
Саккизламалар.
1.
Орзу этагига гул тикдинг,
Вазнсиздир бунда бесаслик.
Андозасиз сездим тўсатдан-
Рўпарангда илғор лохаслик.
Талаффуздан сал берироқда-
Тил таянди журат кучига.
Аммо битта сўз ҳам кирмади-
Хаво жасадининг ичига...
2.
Масхарадан зохидга дўндик-
Илдизсирар эзгуларимиз.
Қўрқув соясида тамшанди-
Ўғирлаган кўзгуларимиз.
Майимизни жаннатга бердик,
Эргашмангиз бизга авом, кас.
Бизга қадах жарангги керак-
Бўш қадахни уруштирсак бас..
3.
Ўлимчил бу бармоқлар ихраб-
Ёзмоқликни истайди чоғи
Тахайюлда узоқ судралиб-
Тугамайди сўзнинг тўлғоғи.
Бехуш битта қофия сурди
Қаламимни бехуда сиқтаб.
Тонгга қадар қоғозга ёзди
Фақат нуқта-
Ниқталган нуқта..
2014 йил Фарғона
@cabbalah
✍ Китоб тавсияси
Ёқутхон Акрам - Ёмғиркуй.
Аёлона хислар жунбуши, латиф оғриқлар товланиши, изтироб рангларини теран хис қилишни истаганлар учун ушбу мўжаз аммо салмоқли ижод махсулини тавсия этаман.
Мансуралар сатрларида рух ялонғоч оёқлари билан аста намчил йўлакларда кезади. Тасаввур қирғоқларига тошиб кирган хаёжон туфайли баъзан юрак тезлашади. Насрий сочмалар анча пишиқ ва таъсирчан қилиб ёзилганлиги туфайли эмоция гулдаста сингари чирой очади.
Ижодкорлар учун ҳам ушбу мўжаз китоб машъал бўлиши эхтимоли катта. Насрий мансуралар ичида паузаларни қандай хосил қилиш, ритмни қандай ушлаш ва пунктуатив чизиқни таранглаштириш каби нозик бадиий санъатларни ҳам зийраклик билан илғаб олиш мумкин.
Китоб икки қисмга бўлинган бўлиб, ҳар икки фаслада янги либос киясиз.
📚Китоб камроқ тиражда чоп этилгани туфайли топиш мушкулроқ бўлиши мумкин.
@cabbalah
Китоб тавсияси
Стефан Цвейг Амок
Инсон онгини қўзғатувчи кучли туйғулар ичида қудратлиси бу айбдорлик хиссидир. Кўпгина инсонларни ўз йўриғига юрдирувчи манипуляторлар айнан қарама қарши тарафда айбдорлик хиссини уйғотишади. Натижада қийналган виждон инсонни хар қандай тасаввур мушкул бўлган ишларга ҳам бошлайди.
Амок бу малайзия тилида инсонни ўзидан чиқиб кетиши, қутуриши ва кучли жазава таъсирида бир неча хафталар ўзида бўлмаслигини англатади. Сюжет ва бадиий тасвир устаси Цвейг айнан мана шу холатни радикал сюжет орқали усталик билан ёритган. Асар қахрамони гўзал ва иффати топталган хонимнинг шаънини асраш учун айнан Амок холатида харакат қилади. Бу холат шаклланишига эса айнан айбдорлик ҳисси дастлабки қадамни ташлаб беради.
Асарни ўқир экансиз гўёки кучли тўфон остидаги кичкина қайиқда қолгандек хис этасиз ўзингизги. Яна камига бу қайиқ тешилгани учун хар лахзада чўкиб кетиш хавфи сизни юрагингизни хаёжонга тўлдиради.
Амок бу бизнинг онгимиз тубида яширинган механизм. У кўпинча ишқ туфайли қўзғалади. Аммо Цвейг бу механизмни мутлақо мухаббатсиз ҳам қандай махорат билан ишга тушира олишини асарни ўқибгина гувох бўласиз.
Анчадан бери юрагингизни майда хислар тебратмай қўйган бўлса бу асар айнан сиз учун.
Цвейг дунёсига ошуфта бўлишга тайёрмисиз?
@cabbalah
Китоб тавсияси
Ги де Мопассан Азизим
⚡️Адабий завқ бағоят латиф хиссиёт бўлгани сабаб уни тўғри уйғота билиш ва ўқувчини долғали рухият рақсларида турлаш ҳар адибнинг ҳам қўлидан келавермайди. Айнан мана шу сифат сабаб махоратли адиблар сараланади.
Мопассаннинг Азизим асарини менинг наздимда 3 та ракурсдан ўқиб латиф бир хулосаю завқ ола билмоқ мумкин.
1. Роман бир қарашда енгил ва ишқий маиший мавзуда бўлгани туфайли хаётнинг оғир зарбаларию синовларидан толиққан рух учун ором ва чалғитувчи малхам бўлиб хизмат қилади. Асар бош қахрамони Дюранинг карера чўққиларини эгаллаш мақсадида аёлларнинг ишққа талабнок ожиз қалбларидан қандай усталик ила фойдаланишию мухаббат қийноқларига сола билиши ўқувчини ажиб завққа бошлайди.
2. Бадиий кўзойнаги борлар учун эса асар инсон рухиятини қайта кашф қилиши мумкин. Мисол учун Дюра бир зиёфатда 10 лаб кишилар билан оддийгина қўл сиқишиб уларнинг унга хайрихох ёки душманлигини билиб олади. Ўқувчи Азизим романи замиридаги психологик бир неча ажойиб ва хилма хил усулларни ўзлаштириб олиши ва хаётда бемалол ишлатиши мумкин. Мопассаннинг психологик ишланмалари жуда пишиқ ва пухта эканлигини хар бир қахрамон қиёфаси қурилишида сезмоқ мумкин.
3. Севгани йўқ ва хаётни энди бошлаётган, айниқса вафодор жуфт ахтараётганлар учун ажойиб харита бу китоб. Дюранинг устакорлиги туфайли унинг ошиқлари хатто унинг тимсолида ва ишқининг оловида ошиқ юзида Худонинг тажаллийсини кўриш даражасида жазавага сола билишини кўриш мумкин. Аёл қалбига қандай йўл топиш, уни мухаббатини қозониш усуллари эса бонусга.
Дарвоқеа аёл қизларимиз бу китобдан манфаатпараст ошиқларнинг манфур қалбини ва ўй хаёлларини билиб олишлари ва хаётда дастури амал қилиб фойдаланишлари мумкин.
Китобни бугундан ўқишга киришсангиз эртага сиз Мопассан дунёсининг асирига айланасиз
@cabbalah
Қурб. (постмодерн)
1.
Ўлик қушнинг кўзига қараб
Кулмоқликни машқ қилдим бирдан.
Кейин хаёл сурдим тик туриб-
Эшик ушлагичим ҳақида.
Менинг қўлларимдан безган у
Бошқа бармоқ истайди ҳар кун.
Бошқа куч ўлчамин ҳоҳлайди...
Бошқа...бошқаликни ноуйғун.
2.
буғуларнинг шохлари синар,
бойўғлилар қалби бўлар зиқ.
Қайдан келар менинг оғзимга-
бу ялонғоч, улкаан бақириқ?
совуқ қотма, жунжикма сира,
лабларимдан чиқмайсан сизиб.
чиқараман сени оламга-
ҳаво кўйлагини кийгазиб...
3.
қон ялаган итдайин бахтли-
қалам.
ориқ вароқ қоралаб.
қоним сачраб гуллар чизади
дахо жилмайиши оралаб.
кўзларингни шимар яхшилаб,
эътиқодни яламасин ўй.
шовқинингни... ўзинг биласан...
сукутингни тоза жойга қўй..
4.
дахрий нигохингда енгади
саволимни жавобим эзиб.
Худо сенинг венанг ичида..
ишонмасанг очиб кўр кесиб.
ташбеҳ тош отади кўчадан,
синиб қолар тасаввур - вазанг...
... бугун осмон хар қачонгидан-
очилмаган венадай гўзал...
2015 йил Фарғона.
@cabbalah
***
анбар тутаб, аттор адашди,
қалтироқлар томир бузади.
пешонамдан варақ йиртиб ол-
типратикон сурат чизади.
турна исмим чиқар ҳижжалаб,
капалакнинг ҳартуми- гўшак,
вақт кемирар тирноқларимни-
осмон енди - ёпинчиқ, тўшак.
борлиқ бугун менинг илдизим,
Ғорни суванг!
беркитинг нурни.
нафасини сезиб куламан-
елкамдаги иккита ҳурни...
2012 йил, Андижон
@cabbalah
Аборт.
менинг йиғим оддий йиғидир,
соддалашган ва яна енгил.
шундай енгил
ижро қилган он-
қилт этмайди қаттиқлашган дил.
бир йиғи бор, буюк бир йиғи
эшитилмас, мислсиз қайғу
бачадоннинг сассиз ичида-
қатл сабаб туғилгандир у.
совуқ қайчи кучига хатто
қилолмайди қаршилик, шунда.
қаршиликни пайдо қилгувчи-
мия бурма ҳали йўқ унда.
ким хал қилар унинг тақдирин?
шавқат туйғу қаерга кетган?
нур кўрмасдан ўлишга махкум-
вужудчага кучингиз етган.
ожиз қочар аборт қайчидан..
бу оғриқлар тугашин истар.
тугашини истар ва йиғлар
йиғлар, йиғлар, қонланиб йиғлар..
унинг доди бесас, бешакл,
учбурчакли, сиғмас ақлга
ижро қилиб бўлмас, куч етмас..
бўғизга ноқулай шаклда.
қўлчалари майдаланажак,
оёқлари майдаланажак.
у кимнидир кутган орзуси-
ва кўз ёши, армони бешак.
унга муштоқ тирноқсиз қанча,
тунни кунга улабла яшар.
унинг йиғи, жаннат хидига-
неча димоқ зор бўлиб қақшар.
сизей кимсиз? инсонмисиз сиз?
фикр қилиб жони қасдида.
тинчландизми? Ором олдизми?
шу йиғисиз ўлимчасидан?..
менинг йиғим оддий йиғидир,
соддалашган ва яна ноқис.
шундай енгил
унинг олдида-
жуда ожиз, жуда бир жўн хис...
2021 йил Тошкент.
@cabbalah
Вергул сояси
Нуқтани қамчила, охангни қутқар-
сатр қафасида нафаси заиф.
вергул соясида абадийлик бор..
Вергул соясида тириклик латиф.
Овозсиз ўқилар жумлани чертар-
хаттот бармоқларнинг дили зиқлиги.
тасдиқлаш хавфлидир айролиқларни-
серхашам ишора ноаниқлиги...
тавба қоясига тирмашар гунох,
бу кун тиконларим - ниқобланган гул.
иблис шивиридан нуқта ясайман..
Худони севаман- қўяман вергул..
2016 йил Фарғона
@cabbalah
Хаёжон пульси.( мансура)
Лабларинг бирлашмас, орасида хосил бўлар шиша. Эътиқод негизида гул чизасан шишага. Гулки алвон..
афсун ўқир томирларингга беркинган иблис сояси. Шивирларга кўмасан қоғоз нигохларини.
тушлар сочларини ўриб ўтирар кўзинг бўйида. Узооқ.
Худо ичингдан кузатар дунёни. Ичинг тевараги яшилланади Худо нигохларидан. фақат жодуланган зирхинг дастидан тубанлашар рухинг хавозалари.
тириклик важидан бўғзингга қафас экасан. Униб чиқар куттирмай қафас. Нафасли қафас. Қафасли нафас..
Мумкинмаслик лаб бўёғини, суртгинг келар висол юзига. Хажр қуши инидан ташлаб юборар
тўсатдан - боқилмаган полопон кўзни.
Хавво қувиларкан жаннатдан, чинқириғин эни семирар. Ва бу семизликда афсуслар - балоғатга етар эриниб.
Ланг очиқдир дўзах эшиги, берк эшикдир жаннат одати. Беркикликда интилиш парвоз..
Гавхарингга илдизлаб хайрат, хаёжонлар ёниқ сўйласин. Ва иқрор бўл, иқрорсизликда..
Таъқиқ - бу Тангрининг хийласи.
2019 йил. Тошкент.
@cabbalah
***
Кел эртага баҳтли бўламиз?
Кел эртага баҳтли бўламиз?
Бугунларга сиғмас баҳтимиз...
Жоним! Ҳуркма, кўзингдан ўпай,
Жилмай. Кўрай дандонларингни.
Костюмимни сотиб бўлса ҳам-
Тўлдираман гулдонларингни...
Неча вақтки меҳримни бермай,
Сабр дедим, кўзинг қорайса.
Майли дейсан, кулиб юзимга,
Деразадан йиғлаб қарайсан...
Юким оғир. Манзилим чигал,
Юкинаман урунган сайин.
Ғусса тамға босган юзимга-
Қўлларингни босиб йиғлайин...
Мени юпат.
Мени ўпиб қўй.
Самимий кўп сўзларингни айт.
Меҳринг сезиб исинсин қалбим
Синиб кетсин йиғлоқи у най.
Қара қушлар иқлимдан чўчиб
Илиқликни истайди ҳисса.
Ҳали кўклам тараф борамиз...
Кетмайсана бироз совусам?...
Қара мағлуб дараҳтлар оҳир
Қишга қараб борар яроғсиз.
Бирам ожиз, бирам енгилган...
Кетмайсана қолсам япроқсиз?..
Кетма! Бўлгин вужудли соям,
Эшитайин хандонларингни.
Бор йўғимни сотиб бўлса ҳам
Тўлдираман гулдонларингни...
Кел эртага баҳтли бўламиз?
Кел эртага баҳтли бўламиз?
Бугунларга сиғмас баҳтимиз...
2015 йил 8 март
Тушкайфият.
анжир барги шилганми юзинг?
ҳотиралар қайта тирилар.
бунёдини кутган қафасда-
ҳамон қасос бесар ириллар.
баҳт- гўдакда нима аҳир айб?
дард ўтмайди ҳиқилдоғидан.
бармоғимни сўриб турганда-
ҳанжар суқдим лиқилдоғидан..
2012 йил
@cabbalah
Соясираш.( mansura)
Чироқ соясидан қайтар таажжуб. Холсизман.
Ташбехимнинг венасига туша олмай оғриқ уйғотаман янгроқ. Тўлғонар, тишларини ғижирлатар. Ташбехим венасида шеърларим оқар..
Орзуманд мезон нафасида - япроқ васияти. Кўкламни қўмсар чирик бандини қўшқўллаб. Дарахтда қолса, кўкламда яшилланишига ишонар қайта. Телбаларча..
Октябрь ёмғирсиз хунук. Хунуклаша борар тун туйнуклари. Узуккун оқарар соям, қалтирар. Ялтирар.
Ташбехнинг қон қочган юзи.
Холбуки.
Тун ораласа соям иккимиз. Юзма юз ўтириб бўм бўш хонада-
Ким хақиқий соялигин
Аниқлолмаймиз.
Аниқлолмаслик фоже холбуки.
Тун аро ғуссалар уйқусирайди, уйқусираб турар ёлғизлик хисси.
ёмғир ёғса уйғот.
Соялар аро-
шояд нурга етар, бегона қисмим...
2019 йил Тошкент. Октябрь
@cabbalah
Зердаст
Онгимга ин солди тўқима,
Вахший илхом қуши чўқилар.
Қушни тўхтат фақат ўқ билан-
Шаклсирар хозир қоида..
Фикринг хуркар лабинг четидан,
Бир парча уз журъат этидан,
Бир оз сирпан, сепкил бетидан-
Кулгу-
Тўхтаб қолмас бир жойда.
Менинг ярмим - гулламаган боғ,
Юрагимда силжим турар доғ,
Махкамроқ сиқ,
Ўлим - бўйинбоғ
Хозир нафас олмоқлиқ фойда.
Ниқобларим тўкилар қуриб,
Йиғлашим шарт хажр билдириб,
Аршда мендан ишқни қидириб-
Худо тутар рухимга ойна...
2010 йил Яйпан
@cabbalah
***
Талаффузда сўз тановвули
лаб найида ундош пуфланган.
-дорбоз
дейман десам ўқчидим,
дор-
ташқари тараф туфланган.
-боз ичимда қолиб синггиди
решаларда чайқалди илхақ.
дилим топиб,
унга битишди
дилбоз бўлдим, кўнгилбоз мутлақ.
оху кўзлар, суман кокиллар
муаттарлар сайёд ўлжаси.
изхорларни қалаб исиндим,
қизиқтирмас кўнгил кўчаси.
майсадилим сенга еткунча
неча дилни авради тилим.
шу авроқлар ичра бир куни-
халок бўлди ўзимнинг дилим.
Аммо қоним ичида хануз
исён қилар энди -боз сўзи.
тинмай талаб қилар ярмини
менинг кўзим - у сўзнинг кўзи.
Майсадилим мендан ранжима,
қоним тўла -бозланган ғубор.
нафас олсам битта сўз чиқар
нафас чиқарсам хам
битта-
ДОР!
2014 йил Яйпан.
@cabbalah
Кимдир хақида шеър.
1.
От ўлганда кўзига боқма..
Эй қиёфам - мендан улоқма,
Дард қўзғолса лабин бармоқла
Жимлик - баланд жимланган жимдир.
Тушиб кетдим тушим ичига,
Туш ичида хушим ичига
Бориб етсам ичи ичига-
Кимдир нафас оляпти, кимдир..
2.
Нобуд бўлди масхара циркда,
Айниб қолди қолган креми..
Хамма йиғлаб, кўмдилар уни-
Тураверди юзда грими..
Гўр ёпилгач, чўкди сукунат-
Қимир этмай ётар эди тан.
Қоп қоронғу қоронғуликда-
Кимдир кулиб юборди бирдан..
3.
Хукм қатъий. Бошини қуйи-
Эгганича эшитди қотил.
Ахир жонни махв этмоқ учун-
Фақатгина одамзот қодир.
Дор тикдилар. Қутирди омма-
Тош ғижимлаб бир сафга турди.
Тошбўрон хўп авжга минганда-
Кимдир унга гул улоқтирди...
2017 йил декабрь
@cabbalah
***
Сизсиз қолдим.
Сизсиз яшадим.
Шамол тўқиб берди пайпоғим.
Энди яна қачон тегасиз-
лабларимга момақаймоғим...
Кўз ёш тўкдим сиздан олдинда-
салқин бўлсин йўлакларингиз.
Мендан кучли оддий лаб бўёқ.
Мендан баҳтли кўйлакларингиз...
Бирам майин ўтли бу нигоҳ,
Фироқ билмас ҳеч ниҳояни.
Мен туфроқда ётмайман!
Ўлсам-
бағрингизга кўминг Сояни...
2008 йил.
📚 Соясиз мехр дан
@cabbalah
менсираган ғуссага боқдим-
ётди сатрим устига мазмун.
лайли ҳаёлини унутиб,
сув сўради саҳродан мажнун...
ёй ҳавони кесди мўътадил.
ҳисга етдим айланиб охир.
зуҳро васлин кўрмаслик учун-
сандиғини тешади тоҳир.
қоғозимда қора жованмард-
нуқтамгача қолдиради ранг.
бурқа ёпган ширин устига-
тоғдан фарҳод улоқтирар санг.
муҳаббат- ҳас!
сенга муҳтожман...
жимликларда додлайди оҳим.
Ҳаққа қадар севган осийман-
мени ташлаб кетма гуноҳим...
2012 йил Андижон
📚 Талбисдан
@cabbalah
Китоб тавсияси
Франсуаза Саган - Кўлмакда акс этган қуёш жилваси
⚡️20 аср адабиётини оёққа қўйган буюк мунаққид ва таржимон Озод Шарафиддиновни зийрак нигохига ва эътиборига тушган ушбу асар унинг ўзи томонидан таржима қилинган. Инсон рухиятининг мураккаб йўлакларидаги қоронғулик ва ёруғлик алмашинувлари, бахт ва бахтсизликнинг қирғоғини теран кўрсата олувчи мазкур мўжаз роман сизни қайғуга солади.
Тушкунлик таъмини хис этмоқчи бўлсангиз, унинг оғриқларини сезимларингиз қўллари билан пайпасламоқчи бўлсангиз ушбу асар сиз учун. Бош қахрамон Жил Лантенинг рухиятидаги чўкиндилар аста секин сизнинг рухингизга кўчади. Тушкунликдан қутулиш учун манзилини ўзгартирган Жил хаётига мухаббат ёлқинлари ила Натали кириб келади...
Жилни тушкунлик домидан ўзининг ёрқин мухаббати балан тортиб олган Наталининг қиёфаси ортида аёл қалбининг қанчалик мехр мухаббат билан суғорилса мўжизалар ярата олишини кўра билиш мумкин.
Аммо Дарахт томирини қурт узоқ кемирса дарахт шу қуртни севиб қолганидек бош қахрамон кунлардан бир куни мухаббатдан тўяди. Ундан кейинги воқеалар ривожи жуда шиддатли кечади..
Асар воқеалари шундай рухингизни қаттиқ силкитадики йиғлайсиз, тушкунликка тушасиз ва севасиз..
Таъсирчан қалблар учун тавсия қилинмайди. Сабаби анча вақтгача шу асар таъсирида юришингиз мумкин.
Франсуаза Саган дунёсига хуш келибсиз.
@cabbalah