118
ياحسين عاهدتك ما عوفك وابصملك بالعشره
شفت الموت بعيوني عله بابج
وبوجودي الدخان اصبح حجابج
احترك كلبي عله وضعج
انكسر ظهري عله ظلعج
اغمض واسمع ادموعج وره الباب او ونينج
الوصيه مجتفه جفيني والا اني اعينج
العذر لله من اشوفنهن يتبدن سنينج
بهذيج الهوسه واسمعته صده السطره عله عينج
النبي بس واكف بعيني اووصيته
وحكج سيفي جان ايذيع صيته
نزل شلال دمعج
انكسر ظهري عله ضلعج
وبوجودي الدخان اصبح حجابج
وره الباب اشعر بوضعج واحس بالموت الاحمر
واحس بكلبي يتكسر وكلت شنهو التكسر
بكد ما عاشرت روحج روحج بيه تفتر
افرزن طكت ظلوعج واصيحن لا غده الشر
صوت السوط باذني من اسمعه
جلد متنج بكل ضربه يشلعه
الرمح كعبه ويوكعج
انكسر ظهري عله ظلعج
وبوجودي الدخان اصبح حجابج
يفضه صحتي لحكيلي ولا صحتي علي الحك
يفاطم فزعت كلبي الج بس راسي دنك
وحكج طك ظهر عمري احس ظلعج لمن طك
وشفتها انكلبت الدنيه على خدج لمن انطك
عله الحايط بلا رحمه اندفعتي
ومثل خيمه فرد وكعه وكعتي
دره بيج اليدفعج
انكسر ظهري عله ظلعج
وبوجودي الدخان اصبح حجابج
شفت بيت الله بي وجت نار وبابه يلهب
ورسول الله عكب موته سمعت ابيته ينسب
كبل كلشي النبي يدري حقوق الزهره تسلب
ويدري الدار بغيابه بلا استأذان تنطب
من الدخان ما بين اثرها
وعد الله كلت فاطم خبرها
وصحت عدله ارد اسمعج
انكسر ظهري عله ظلعج
وبوجودي الدخان اصبح حجابج
اشوفن كلشي واتغاظى ولاجن الامر صار
المصيبه شلون ماافزعلج او اني حمه الجار
شتسوين محتاره وتعرفيني اني محتار
ما تردين تنخيني ولا تردين الاعذار
اول مره ما طايح بديه
اكفلج واني حماي الحميه
اموت ولا اودعج
انكسر ظهري عله ظلعج
وبوجودي الدخان اصبح حجابج
رغم كل شي الستر محفوظ خلف الباب منظم
دفاعج عن حجابج جان واضح والله يعلم
شبقه بحيلج لمن عصروج نخيتي ومحد اهتم
وشفت الغيره بالدخان من طحتي انتي خيم
من شافج وكعتي من اليعصرون
كام بروحه ظمج عن العيون
غيوره بكلشي طبعج
انكسر ظهري عله ظلعج
وبوجودي الدخان اصبح حجابج
خادم فاطمة الزهراء ( عليها السلام)
حسين الخزعلي
قصيده شور للامام الحسين عليه السلام
على الشيب دم راسك نزل ياحيف
على شفاك اثار لهجير الصيف
يمولاي رمل الطف يغازل بيك
السهم جاي ويحشم عليك السيف
الجسد ماي وانطش والسيوف تركع
على جروح روحك يمولاي تفزع
الجلد ثوب وانشك والخيول تسحك
عله صدرك كامت تروح وترجع
بكثر ما بخيول الصدر ينداس
وصل صوت شهكاتك لحد عباس
بالسيوف متكطع غصن ريحان
انثر فوك الكاع الورد والياس
صرت كاع صحره الضمه عليك اثر
من التراب خدك ذبل و اتفطر
و اليدورونك صعب يلكونك
وبياض اوصافك اختلف صار احمر
للخيام كل بالك سمعت اصياح
ولاجن يم راسك كعد ذباح
شفت نار واطفالك تصيح حسين
بلاحيل والحيل ويه عباس راح
تحاول تنهض رغم كل تعبك
ولكن صعبه وسهم لاح كلبك
تكوم وتعثر وكمت تتحسر
على وضع اطفالك دعيت لربك
يمولاي بعيالك تشوف الصار
يركضون من خوف الضرب والنار
اليطيح ايدوسونه بحوافر خيل
العطش هم مايرحم عليهم دار
الاطفال تشرد و الخيول بلوه
من الخيام ليكم الدرب صار خطوه
الحرم مفجوعه وخذتها اللوعه
بجمر صيوانك جدمها تجوه
السياط اعله اعيالك تصير اسباع
تحشم من زينب ولا فزاع
والعيون تتلفت يمين ايسار
و جثثكم ماخلت شبر بالكاع
على الكاع جنكم سور مطشره
العقيله تدور وبالوجوه تقره
المضيعتكم لمن شافتكم
الرسوم ضاعت بطعن وبطبره
✍ الخادم حسين الخزعلي
حدي للاربعين
اكعد يبو فاضل اجت زينب اختنه لكربله
ردت تراهي من اليسر هالليله يمنه نازله
وياي اريدن وكفتك ضعن الخدر نستقبله
تعبانه اختنه من السبي وجماله حمل العايله
ملهوفه مشتاكه تره سمعها لو كلمة هله
عباس اشوف من القهر زينب اجت متبدله
راحت ورجعها الزمن عتاب ودموع محمله
شكد شالت وزينب مره فحول الزلم ماتحمله
ويانه زينب من اجت ورده بجفوف مدلله
بليانه زينب هم اجت لاكن اسيره بقافله
ياخذها ويردها الهوه من التعب متعلعله
شباقي باختنه من القهر وشيبقه بالفاكد هله
عالهزل اتبده العمر ويه الدموع السايله
زين وكلب زينب يدك عفيه كلب كلشي متله
كلت اني زينب ماتضل وراسي عل الرماح اعتله
كلساعه تشهك عالهزل وراسك حزينه اتصدله
دار الوكت بيها واجت عنك وعني ساءله
عدها حجي بلايه زعل عدها كمر تشكي اله
اعذرها اختك لو شكت هم بكلبها شايله
بواهسنه خل تنسه التعب بيناتنه يزول البله
نتذكر ايام المضن ويرد شملنه لاوله
كعدة غوالي نجتمع زينبنه ماهي مطوله
جم سالفه بكلب الاخت تحجيها يمنه وراحله
من توصل وتلكه اخو يعاينها وتعاين اله
ما تحجي بسياط المتن ولا تبقه دمعه هامله
✍ الخادم حسين الخزعلي @ch2Hs
قصيده الامام الحسين يخاطب العباس عليهما السلام عن رجوع السيده زينب عليها السلام الى كربلاء في الاربعين يقول :
شمحظر لزينب حجي يا وفاي
تحجيلها بشوك البعد لو بالماي
لو وصلت وشافت كبر تسولف جرح لو تعتذر
عباس خبرنه الهوه عن زينب وذاع الخبر
كال استعدو الطف رجع بس بالعكس بادي بسفر
شد ظهرك او ارجع عدل واشلع سهم من النظر
واحجيلي شمحظر تره زينب اجتك للنهر
تشرح كطع جف ونحر ملكه اسهام
لو نيتك تسالها عن جرح الشام
ياهي العله بالك تمر تسولف جرح لو تعتذر
كلشي قريبا ينتهي مر السبي ودار الزمن
روحة شمس ردت شمس راح الضعن رد الضعن
كالو اجت وانه كلت رد الوطن لارض الوطن
وانه عله جرح المستحه البعيونك اعيوني جرن
اتنفس الكون اختنك لا تحتار
ما تعتب وجيتها جيت خطار
بملكه الهله يموت الهجر تسولف جرح لو تعتذر
يمغيمه ارسومك خجل يالحيرتك ماتنوصف
يمفارك الدنيه دهر لا مو شهر هجرك كلف
يالحيرتك حيرة هذاك البلغرب حاطوه الف
يالغيرتك منبع نهر فاض و جبينك ما يجف
يالشوفتك صارت شمس وكت اغروب
زينب اجت تسمع حجي يشفي اكلوب
اهلا وسهلا بالخدر تسولف جرح لو تعتذر
من توصلك ما تلكه اخو تلكه ارض ضمت بخت
ما تلكه طولك من جنت حاضر تكلها لو نخت
من الشوك التحمله الك ناكتها اضن ما نوخت
بكد ما نخيت انته علي باسمك يبو الغيره انتخت
شجم مره صاحت ياعلي فوك النوك
اتخيل اختك حرمه واتطب السوك
واتفكر انته وتنتظر تسولف جرح لو تعتذر
لهسه اختك بحرب العطش ردتلك من الطف تهم
نفرض اذا امر العطش نيتها يمك ينحسم
مو ماي ادري المسالة ردت تسولف للشهم
كلب الاخو يعلم احس تشكيلك اشسمعت شتم
مبين تره من اعيونه ذاك العطشان
هالمره زينب ردت تشوف اخوان
هذا الحجي الما ينعبر تسولف جرح لو تعتذر
شتسولف و حجي الدرب سوط وضرب ما ينحمل
و كل هذا اهون من ركوب اختك عله ظهر الهزل
سلم عله اعتاب الاخت لو عاتبت يا با الفضل
و قدم اعتذارك واطمأن عن كل ورد ما تنسال
لا تهتم وبالك يضل يم الجود
لو بيد زينب جان تنطيك ازنود
وجان اطتك زينب عمر تسولف جرح لو تعتذر
حسين الخزعلي
قصيده للأمام الحسن بن علي عليه السلام
لا تعيش بهم بيه لا تهتم
فكر بيومك يومك الاعظم
ينتظرني الموت واكف واني ما مهتمله
اهتمامي بحال كلبك والمصيبه سهله
رحمة الله و انته يمي اتديرني عله القبله
انته ياهوه اليوجهك والهواشم قتله
تسند بروحك وتشبك اجروحك
وتختفي رسومك والبحر يلتم
لا تهم وضعي اني اسهل انته وضعك اصعب
اهون السم من اشوفك تبجي انه اتعذب
خير من الله وثيابي عليه ما تتسلب
عيسى ابن مريم تصير وعالعوالي تصلب
ساعه ما ينزل راسك يرتل
تسلب هدومك وتنستر بالدم
خويه دهري الخان بيه وما اعيش الطفك
الدنيه ما دامتلي اصيرن مسند اسند جتفك
وانته اكرم مني قطعا بالكرم ما وصفك
من يجيك السيف جايع تنطي خنصر جفك
من كثر نزفك محد يعرفك
تصبح اعلومك بس عطر ينشم
لا جرح مجروح ونزف بس احس بلجمه
والفض انفاسي وخيالي كربلاء برسمه
خلتي يسدها ابني جاسم واني كايل لمه
خل يشوف الحسن بالطف ابنه ينصر عمه
فدوته وليدي وسالم عضيدي
مثل ابو دومك لا م يتيتم
لا تون اعليك زينب قطعتها الجبدي
اصعب من السم عليه خويه لمن تحدي
الحمدلله عله اخوتي بموتي موش الوحدي
اشحالك وزينب تجي وتاشرلها ردي
حرمه وتشوفك وعالستر خوفك
هناك مقسومك كلشي يتهشم
اعيوني اغمظها بامان وراسي يمك بارد
موتي باحظانك يغالي سهل والله شاهد
اشحالك او وين اليكرهك من طحت متواجد
والمصيبه الكبرى تلكه الشمر يمك كاعد
يقتحم صدرك يلعب بنحرك
وتكثر همومك بحرك المخيم
✍الخادم حسين الخزعلي
قصيده للاربعين
لصوب النهر ليش درت الضعينه
تدري يعباس لملكاك اجينه
✺✺✺✺✺✺✺✺✺✺✺✺✺✺✺✺
جنت امشي بالنور تدري يغالي
خاف امشي بالظل وافكد خيالي
انته و شهر لا وعشرة ليالي
تالي هالتراب صاير دفينه
✺✺✺✺✺✺✺✺✺✺✺✺✺✺✺✺
مكيفه وسمه الله لا ما تلمني
بالي امر جان هوه اليهمني
يلزمن عباس بس ما لزمني
ياوسفه ياحيف ماهنه ادينه
✺✺✺✺✺✺✺✺✺✺✺✺✺✺✺✺
اسرع من الريح عباس اجيتك
لكيت انه التراب بس ما لكيتك
بطول الشريعه ها دوريتك
مسير علحسين معقوله وينه
✺✺✺✺✺✺✺✺✺✺✺✺✺✺✺✺
كمت اسأل الماي وشفته تغير
حاجاني مهضوم باللون الاحمر
صاح بعلو الصوت الله اكبر
يازينب هناك نايم ولينه
✺✺✺✺✺✺✺✺✺✺✺✺✺✺✺✺
وخر يالتراب خليني اشمه
لا عني ارجوك لا لا تضمه
بس ارد اشوفه شويه اكلمه
مشتاكه اسمع حجايه حنينه
✺✺✺✺✺✺✺✺✺✺✺✺✺✺✺✺
كل القصد جان من هالمسيره
نتلاكه ونلم شمل العشيره
ماشفنه لوجوه بس شفنه غيره
من جوه التراب سلم علينه
✺✺✺✺✺✺✺✺✺✺✺✺✺✺✺✺
خادم العباس (ع)
حسين الخزعلي
قصيده لاستشهاد السجاد عليه السلام
عله طاري الحزن.... يعيش شچم جفن
و يدمعات العليل ..... المسيه تندفن
******************
عاشت الدمعه عله جفنك تاكل ابايامك
ذكريات الطف خناجر تجرحك باحلامك
تعيش..... كربلاء بعينك
تعيش..... ونتك لحسينك
تعيش..... يالشفت سبعينك ...من تموت
سالفة عمرك نهر.... يجري هم يجري قهر
جرف صبرك طويل ..... المسيه تندفن
******************
المات بالطف مستراح والف هنياله اندفن
ولا يعيش العشته انته نايم بگلبك ضعن
تصيح..... يا منيه اخذيني
تصيح..... يا سهام ارميني
تصيح..... يا قدر غطيني ...... ما اريد
عيشة الفاگد ابو.... ومنكسر كسرة اخو
عله اخيه تبده حيل...... المسيه تندفن
******************
انته ميت من زمان و ذابحين اسنينك
چانت اسباب الوفاة الخيل فوگ حسينك
يخيل.... من صحت يالطاهر
يخيل..... هوه عايز حافر
يخيل..... دستي بيه الخاطر..وانه اشوف
الدنيه مناك انتهت.....ورحلة الونه بدت
شكثر دمعك يسيل..... المسيه تندفن
عله طاري جروح ابوك العاشت بنص روحك
تبچي يعگوب عله يوسف وشيسكت جروحك
ينوح..... حد بياض عيونه
ينوح..... لاكن يبشرونه
ينوح..... حسين اليسلبونه....... الثياب
الشبه فوگ انكتب.... المختلف ثوبه انسلب
يدفان الخليل......... المسيه تندفن
******************
خدك الشابع دموع الليله يروي ترابك
يالچنت تدعي المنيه تلاگه وي احبابك
تجيك..... العمرك متانيها
تجيك..... وتشكر الله عليها
تجيك..... و تلتقي تاليها...... بالاهل
يالصبرت عله الزمن... خلصت اسنين المحن
و لقائك بالرحيل........ المسيه تندفن
✍الخادم حسين الخزعلي
عكب عز ودلال لسبي تنحل
زينب من دواهي الشام تنحل
مشكلت الغريبه اشلون تنحل
وابو فاظل ميت اعله اذراع اخيه
جسه السوط اعله متن الحرم مالن
الى ان من شكف لسياط مالن
حرمكم ويه ميل النوك مالن
ومن يعثر جمل توكع سبيه
الخادم حسين الخزعلي
لمولاتي رقيه عليها السلام
ماتكدر رقيه تنام بهالمسيه
انتهى الطف وانتهى كلشي بعمرها
واجه الليل اعله المضيعه كمرها
تنام اشلون المورم نظرها
شاهودلها حرت وازرك ظهرها
يلجمنها اديه ما تكدر رقيه
*
الركض بالهيمه والفر عطشنها
ولعب سوط الشمر جوله بمتنها
ومن سلبو تراجيها من اذنها
ركضت ركض المضيعه ابنها
تعبانه خطيه ماتكدر رقيه
*
بجفه اجروح الحسين ومصابه
ورقيه بجفه وتحن الغيابه
كبرني دهر ليل الخرابه
اكلها نامي عمه تكلي بابه
جيبي عمه اليه ماتكدر رقيه
****
كلت من التعب تغفه الحنينه
عله واهسنه تنام بصف سكينه
ما تشكي الجوي وحركت عبينه
عليه تلح تكلي بابه وينه
مشتاكتله هيه ما تكدر رقيه
*
ابد ما تقنع الا تريد ابوها
العزيزه اتريد الاخوه الدللوها
كلتلها زلمنا ذبحوها
ونشدتني عله عبدالله اخوها
ظل بالغاظريه ماتكدر رقيه
**
كوه قبلت ونامت ثواني
وفزت والدي تكلي اجاني
توه رد تراجيي ال اذاني
ولزمني وكلشي مابيه خذاني
تشابكنه سويه ما تكدر رقيه
الخادم حسين الخزعلي
قصيده للامام العباس عليه السلام
اني ادري بي خدك ترف وادري الرمل قاسي
يابو الفضل منك كفو ما ريدك تواسي
دخيلك والرمل حار وكلف
دخيلك ياذي لولاح النزف
******************
يابو فاضل فدوتك فدوه اروح لخوتك خلي راسك يستقر مابين اديه
يا عضيدي مروتك رمال تچوي وچوتك سومرت وجناتك الجانت زهيه
يالتزهي جانت شوفتك من اگبل عليك
من الشمس جن شاهدت كلشي اختلف بيك
وحر التراب مغير هواي بمعانيك
اسمحلي خويه بطيحتك رايد اواسيك
باخر ثواني سنينك ارد اتامل احساسي
يابو الفضل منك كفو ماريدك تواسي
برحيلك يابو فاضل اختلف
دخيلك ياذي جرحك والنزف
******************
يالنمت فوك الثره وحضني كاسر خاطره يالمكانك بالسمه نايم عله الگاع
خويه ما اقبل تره لا تگول المعذره انه اريدك تطمأن لو صار الوداع
ياخويه جيتك تارك بضهري المسافات
من اعتلت لمخيمي منك هتافات
جيتك اصيح بحيلي ابوفاضل سلامات
ماتت سلاماتي لمن شفت الترابات
خدك يغازل بالترابه يابعد ناسي
يابو الفضل منك كفو ما ريدك تواسي
لخليلك مايصح بعدك جتف
دخيلك ياذي جرحك والنزف
*********************
اقبل ولا تعترض خل ارفعه من الارض حاسب احسابك يبوفاضل تراني
ما اجبرك عالفرض يالمكانك بالنبض ارتاح واني اتركني ياخويه لزماني
يالجازي مقياس الوفه وگفاتك هواي
يالجاملتني بدمك وعمرك يوفاي
مادامني خويه عدل صايرلك فياي
و لتفكر بحالي تره انه الله وياي
غالي على گلبك ياگمر اني ادري بي راسي
يابو الفضل منك كفو ما ريدك تواسي
مسيلك والدمع ما ضن يجف
دخيلك ياذي جرحك والنزف
******************
ها يشيال العلم جيتك وتارك خيم عزت عليه يبو فاضل جفوفك
شويه اصبر عالالم خل اشيلنه السهم يطيح بعيوني السهم كلما اشوفك
صديتلك واستغربت موذيج العيون
يتلولح بعينك سهم متحمل شلون
كل ضني اصافح جفك وصدكت الضنون
حسبالي تشبگني وتحط جفك عالمتون
يالنايم بطولك جبل وبنومتك راسي
يابو الفضل منك كفو ما ريدك تواسي
يويلك راسك شبي منخسف
دخيلك ياذي جرحك والنزف
******************
بغيرتك اني طمع مو اخوي انته الضلع انته واهس عيشتي مو بس عضيدي
فرصتي بهذا الوضع اوفي الك لو بس ربع حگ سهم عينك سهم يگطع وريدي
ما اوفي الك حد ما احس بكسر العضام
ما اطمأن وارتاح اذا ما احس بالاسهام
حد ما سيوف النايبه بالمنحر تنام
خاطر اگول لخاطرك عايشت الالام
ذاك الوكت راح اذكرك ياخويه ماناسي
يابو الفضل منك كفو ما ريدك تواسي
من اجيلك بالتسعميه والف
دخيلك ياذي جرحك والنزف
*********************
حسين الخزعلي
قصيده لام البنين....... عليها السلام
وهي توصي اولادها لنصرة الحسين ....عليه السلام
ها يولدي اتكربو كلكم عليه
انه امكم وارد اوصيكم وصيه
بإسم الحسين بإسم الحسين
&&&&&&&&&
هايولدي كربو ليه وحفظو كلمات الوداع
شايله بكلبي وصيه ومنكم ارجوالاستماع
ادري خلفة حيدر انتم ادري تربات السباع
رايدتكم بالسفينه اعلام لحسين وشراع
سمعو مني حجاية أمكم بيها غايه
بكد عددكم أربعه حروف البدايه
بإسم الحسين بإسم الحسين
&&&&&&&&&&
حسين عنوان الوصيه هوه الأول والأخير
وباجر الطف كلشي ممكن وحتمن الممكن يصير
رفعو راسي اكبال اخوكم ما اريد أسمع يحير
وكفو خدام اربعتكم فدوه لحسين الامير
كون تقبل زينب وترضه عليكم
كلشي هين يصبح .وباجر حجيكم
بإسم الحسين بإسم الحسين
$$$$$$
كربله واقعها ادري صعبه بي كل الامور
صيرو تجايه لاخوكم وكلمن يأديله دور
طيبو خاطر كلب زينب وخلو غيرتكم تفور
مايشوف الشر اخوكم والنفس بيكم يدور
صيرو كل واحد علي وبيده فقار
وخلي يهتف كل شخص من ولدي غار
بإسم الحسين بإسم الحسين
&&&&&&
صح كلت صعبه الطفوف شلون ما ادري اعتذر
وانتم اشهد جاب عمره الهوه من عدكم حذر
عالخيم كلكم حمايه اليمها يكرب ينحر
الساكي عباس انته دورك باجر وحامي الخدر
لوتشم ريحة عطش جيب النهر
وكعتك احذر تره تكسر ظهر
بإسم الحسين بإسم الحسين
&&&&&&
المحتوه اختصره بعبارة "حرمه و بعهدة كفيل
تلوك ياعباس لاختك حامي وترد اليعيل
ودام بيكم روح عدله حسين ما توصله خيل
ولا تمر نار بمخيم وينجوي بيها العليل
ولا بنات حسين بالهيمه تفر
ويلي مو سهله الكلب من ينكسر
بإسم الحسين بإسم الحسين
&&&&&
شوفو ياولدي دربكم وانه اظل اعله النشد
اني بالطف ادري وادري باليرد والمايرد
باجر الطارش يجيني ويبقه بالاسما يعد
هايبن حذلم اساله حسين رد عوف الولد
اني اوصي وعالمه بكل القضيه
من البدايه لحد ما تُدفن رقيه
بإسم الحسين بإسم الحسين
خادم ام البنين عليها السلام
حسين الخزعلي
قصيده لفاطمه العليله عليها السلام
ياهوه اشتميتك مو عذب لكيتك
خالي من ريحة هلي وعطر عبدالله وعلي
مو عذب لكيتك
*****
ياهوه المابي عطر من الاهل ماشمه
وكلبي ما ريده يحظنه ولا اريد يضمه
تعودت من الزغر صدري شرط عالنسمه
لازم تقبل نحر مهدي وتمر من يمه
ياهوه الهويتك بعلتي اشتريتك
يادوه ردتك الي وعطر عبد الله وعلي
موعذب لكيتك
*****
بالشهيق الماردت اشعر عذاب احبابي
ومختلف حته الهوه حسيته شال احجابي
شعندك بلايه رحم كتله تدك ابابي
بانت ادموعه بترابه وهذا كلت مصابي
العشره شابكتهن براسي ما شلتهن
احس فارغ منزلي وعطر عبدالله وعلي
موعذب لكيتك
*****
انه احس بيك انت مو انت بغياب حسيني
ساعة الراح وتركني اشعر اتاذيني
كبل جان بجسمي عله واعرف انه شبيني
هسه صار اصعب عليه احزر الماذيني
جروحي ما اعدها واعرفت ظمدها
رجعة اخوان الولي وعطرعبدالله وعلي
مو عذب لكيتك
*****
ياهوه اليتنفسك من عادته يتهنه
اني عكس الوادم اني اتغذه منك ونه
مو عجيبه اتعودت اشتم عطر ما منه
عطر مستنكيه محمد من رحيق الجنه
بريحة النبوه طفحت الاخوه
ومنها اترس منهلي وعطر عبد الله وعلي
مو عذب لكيتك
*****
*****
لا تدك بابي وتجيني لازم تمر بيهم
واحدن واحد اخوتي وعمتي او واليهم
اهلي كلهم واحد او واحد يفيي اعليهم
عمي ابو فاضل الخيمه والحلف يحميهم
خيمة الظهيره وكمرة العشيره
هذا بي غيرة علي وعطر عبدالله وعلي
موعذب لكيتك
الشاعر : حسين الخزعلي
قصيده لاستشهاد مسلم بن عقيل عليه السلام
بالدمع خطيت الرساله
للجنت غامرني بدلاله
والكلب مكسور عله حاله
&&&&&
رحت وانه صرت للناس سالوفه
وبده جفي عله بالي يسطر حروفه
اليشتم الهوه مايكدر يعوفه
احنلك بويه من دياري للكوفه
مو مهم شكد عنك بعيده
يا نفس مافارك حميده
مانسه ودلالي اعتناله
&&&&&
حن كلبي يغالي لشوفت عيونك
اوديمن حرت و يشوفك شلونك
بنص ديرة هلي ومستاحشه بدونك
بشهكات النفس انه انتخي بعونك
بلا عتب يوصلك حنيني
بغيبتك مايسكن ونيني
واليحب شيصير بخياله
&&&
احسد كل بنات الديره البكدي
ابوهن عدهن وبس اني ما عندي
اقنع روحي اكولن شده وتعدي
تركني الماتركني مساهره الوحدي
يازمن بدياري وغريبه
انترك وهاي انه الحبيبه
انذكر معقوله عله باله
$$$$$
رسالة شوك خطيت بدمعتي
تشرحلك يبو بنيتك غربتي
الوطن ميت تره وتجري دمعتي
وشبه خرسه صرت واسمك كلمتي
من رحت ذبلت المدينه
ياهوه ومجافي الحنينه
مبتعد ونشك بوصاله
$$$$$
سواد الدنيه صارت والله بعيوني
زغيره وشايله هجرك عله امتوني
يبويه الناس ما اهجع يخلوني
الرايح واليرد عنك يسألوني
وين ابوج اتسبب عذابي
انهظم والمدمع جوابي
وانكسر لو كرر سؤاله
$$$$$$
اخاف من المسه وناتي مسموعه
يبويه الليل ما يرحمله مفجوعه
يظل بس الفكد ساهر عله دموعه
اليه الليل يابويه والك طوعه
الهجر والفركه نصيبي
والغدر مقسوم لحبيبي
والطعن مايرحم جماله
حسين الخزعلي
قصيده لمولاتي فاطمه العليله عليها السلام
يابوي بالقافله اني الاصعد الاول
شتريد خادمتك اني و انته تتدلل
بلياك تدري العمر يابويه مو ينمل
★★★★★★★★★★★★★★★★★★★★
حضرت روحي لسفركم بويه اروح وياكم
لملمت كلشي باديه و انتظر ممشاكم
المن ابقه اخذوني احسن عالاقل ارعاكم
ضلتي بويه شتفيد و روحي تتخطاكم
لو روح لو يشهد الله ازعل تخليني
و لتگول يبنيتي الحنينه أذكريني
ماعيش يابوي اموتن لورحت تقبل
★★★★★★★★★★★★★★★★★★ ★★
بويه لا تحتار بيه و علتي انساها
توكل عله الله و اخذني صحبتك محلاها
اعرف بيا هودج اصعد و گعده الاتمناها
بهودج ا بنيتك رقيه اگعد اني و ياها
لتخاف وين اگعد و لتفكر بهايه
ا رتاح ما أثر عليكم تره هوايه
شتگول اتمنه منك بويه تتقبل
★★★★★★★★★★★★★★★★★★★★
وياك اروحن بالضعينه و لا اضل بديارك
انذبح كلساعه ذبحه من يمر خطارك
الموت اهون من حياتي متانيه اخبارك
مشكلة عمري لوحيده عايشه عله انضارك
ارجوك اسمحلي اباري بدربي عبدلله
ونصيح لو عمتي زينب تعثر اسم الله
بس گول كلمة (نعم)حته الامر يسهل
★★★★★★★★★★★★★★★★★★ ★★
من تگلي ابدارج ابقي گلي شنهي اسبابك
كلهم احبابك خذتهم و اني من احبابك
ادري سفرتكم طويله هواي ادري اتعابك
خذني اخدم كل اخوتي وبيدي الم اثيابك
من تروح بالعتبه اسكن ما اطب داري
و الله لا ليلي ليل و لاني بنهاري
بدنياي كلشي بغيابك و الله يتبدل
★★★★★★★★★★★★★★★★★★ ★★
ليش تجبرني اقره خاطر عمتي المكسوره
بويه خوفتكم عليه تكشف المستوره
يرسم احساسي صوركم والجثث منحوره
وعمي بو فاضل يطيح وعمتي تاخذ دوره
حسيت والساتر الله بضني وحساسي
ياريت سيف اليطيح براسك براسي
ما ريد طفك يغالي بروحي يتأول
★★★★★★★★★★★★★★★★★★ ★★
وين يالناوي برحيلك شمعتي اتطفيها
عيشتي مره بهجركم و كل طعم ما بيها
بويه اشتاگ السوالف عمتي و طاريها
و ذيجه لمتنه الچبيره بعد وين الگيها
ترحون و الروحه روحه وما ترد ليه
لليوم لبي زينبك ترجعلي مسبيه
ويصيح ناعي المدينه راح المعدل
★★★★★★★★★★★★★★★★★★ ★★
خادم ...الحسين (ع)
حسين...الخزعلي
قصيده ل علي الاكبر عليه السلام
يم الولد عندچ علم........رايح وليدچ مبتسم
حاولت أرد بي للخيم........خفت عله گلبچ ينصدم
✺✺✺✺✺✺✺✺✺✺✺✺✺✺✺✺✺✺✺✺✺✺
واللة حيره.......حيرتي يم جسم الاكبر يا كبرها
والله حيره.......و لازم احچيلج معاناته و خبرها
والله حيره.......وليدي ميت و ابتساماته نثرها
والله حيره.......اضن شاف الجنه بعيونه وصورها
اني ادري ليصرعه الاجل.....بعيونه ينشاف الزعل
بس ابنچ ابحضن القدر.......بوجهه البشاره تنرسم
✺✺✺✺✺✺✺✺✺✺✺✺✺✺✺✺✺✺✺✺✺✺
شدي حيلچ......و الله يا ليله الحچي گلبچ يصدعه
شدي حيلچ......وسمعي اخبار التسألين عله وضعه
شدي حيلچ......تصوري شگد حاولت للخيمه ارجعه
شدي حيلچ......من الدمه ماميزت جفه من اصبعه
رغم الجروح النازفه......بس كل جرح شفته شفه
وي موته يتغازل علي.........ما چنه لميته بهدم
✺✺✺✺✺✺✺✺✺✺✺✺✺✺✺✺✺✺✺✺✺✺
ادري بيها.......الابتسامه و شنهي مغزاها بمماته
ادري بيها.......اتيقنت يمه النبي حاضر وفاته
ادري بيها......اليشبه اوصاف النبي بمعظم صفاته
ادري بيها......بچف محمد تنطفي جمرة لهاته
ما تبقه اثار الضمه.......و الكوثر بچف فاطمه
طاح النده بحضن الورد....وانه بعطرهم گمت اشم
✺✺✺✺✺✺✺✺✺✺✺✺✺✺✺✺✺✺✺✺✺✺
ها يليله........انه اعرفنچ گلب ام و حزينه
ها يليله........هذا امر الله تره و احنه شبدينه
ها يليله........استقري و املي گلبچ بالسكينه
ها يليله........و لا يهمچ حته لو گطعو وتينه
مقسومه الچ فرگة علي.......وما ارجع اني المنزلي
يصير الحزن ثوب الدهر......وليلچ سهر ويه النجم
✺✺✺✺✺✺✺✺✺✺✺✺✺✺✺✺✺✺✺✺✺✺
انه وانتي.........حسبي الله وحسبچ بهاي المصيبه
انه وانتي.........خل نظم بگلوبنه جمرة لهيبه
انه وانتي.........منين يا ليله الصبر نگدر نجيبه
انه وانتي.........نصيح دنيانه علي صارت كئيبه
بعدك عله الدنيه العفه........يالبدرك الليله اختفه
رحلة عمرنه تنتهي........لو عمر ألاكبر ينختم
✺✺✺✺✺✺✺✺✺✺✺✺✺✺✺✺✺✺✺✺✺✺
خادم..... الحسين(ع)
حسين.....الخزعلي
قصيدة لمولاتي " فاطمه الزهراء " عليها السلام
لا تعتذر ياحيدره عاذرتك ما ريدك اتحس فاطمه كاسرتك
ابقه علي البي ينحلف يصنديد
لا تنكسر لا ترتجف الك ايد
انته الاسد يا سيد المواعيد
تحس بجرح وقع المصيبه ماريد
اهده اطمأن ما كو عتب تره بعيد
بكلبك عشت ما تبقه ياعلي وحيد
انه نفس ريتك فلا هاجرتك ماريدك تحس فاطمه كاسرتك
جبير الكسر بس ياعلي انته اجبير
ظمه الجرح بس لا تظم اعله البير
الحادث صعب وامكيد وبيه تحير
بنية ثأر سوح الحرب ناس تغير
لا تنحني وخل كل شي بالزهره ايصير
ابخير اني اذا انته يبو حسين بخير
عمرك ولا شلت ايدك لخاصرتك ماريدك تحس فاطمه كاسرتك
غالي واذا دمعك نزل انه احتار
بدموعك ولجم الظلع والبسمار
لون التعب لا ينرسم عالكرار
ذاك ال اله شمس الله حكها تندار
عندي المهم راسك يظل فوك الصار
ما داعي تتعذر الك فدوه الدار
شامخ تظل وانه جبل ناظرتك ماريدك تحس فاطمه كاسرتك
عينك تصد وانه اندفع صعب هاي
مو هين وتسمع نحيبي وابجاي
فقار اكو بجف دوم اعرفه حماي
احتار بوصيه وما طلع علي براي
مجتف لجن اشعر وجودك وياي
صح مرتهن بس تبقه ذاك بسماي
اعرف صلابة روحك معاشرتك ماريدك تحس فاطمه كاسرتك
طحت وكلت فدوه الك سنيني
وصدر الارض مني اخذ جنيني
ما ادري ياهوه السطرلي عيني
وما ردتك بذاك الوضع تجيني
اني اعتذر خاف اسمعت ونيني
بس لايهمك ياعلي حنيني
انه عله بالك عايشه بذاكرتك ما ريدك تحس فاطمه كاسرتك
سهله تطيح على الارض حمامه
لكن صعب لو طاحت العمامه
الزهره ادري بثغرك ابتسامه
ودعني بس لا تشعر بملامه
كلشي انتهى وعمري أقترب ختامه
ودعتك الله ونلتكي بسلامه
مو انته خاسرني انه الخاسرتك ما ريدك تحس فاطمه كاسرتك
خادم الزهراء عليها السلام
حسين الخزعلي
قصيده لوفاة الرسول (ص)
وداعا يارسول الله عله كلبج فاطمه اسم الله
يتيمه ودمعتج مولاتي سبحه
وعلي راسج بحنيته يمسحه
وداعا ياللي وي جبريل متسالم
وسف ثوب اليتم ما يرهم لفاطم
نبي الرحمه الاهك وصفك راحم
انترس كلبك وجع والضيم متزاحم
يالملاكي العرش ملكه تكتل فاطمه الفركه
وبيت الله انذبح ياناس صبحه
وعلي راسج بحنيته يمسحه
بشر جنك مثل بعض البشر عدهم
ولا جنك نبي ونازل توحدهم
طحت بصحبه لجلك صحبه منعدهم
نيت السوء عدهم غيرها اشعدهم
كمنه بصحبتك نحسب ثلث ارباعهم مذنب
نفرد بس علي العاش ويه جرحه
وعلي راسج بحنيته يمسحه
يبو كلب الجبير العالاذى تصبر
همك بينك وبين النفس ظل سر
خيرك يا محمد بالسمه مغزر
جف الرحمه كد ما شايله مأثر
دعائك بالسمه ميتم لذلك تبجي لجلك دم
ويوميه بدمع مولاتنه مصبحه
وعلي راسج بحنيته يمسحه
يالتوصي بعلي وزهرة علي تشاهد
شهكه شهكه عنها تشوفك تباعد
بلا ام النبي وصارتلك ام والد
لاتوصي علي وتدري الوكت حاقد
ست اشهر وره اغيابك جريمه تحدث ابابك
بذاك اليوم تهجر فاطمه الرحه
وعلي راسج بحنيته يمسحه
حيل الزهره يمك ماي وتبده
وحيده تعوفها وحيدر بكه الوحده
ابوها وعدها شمت ريحتك ورده
ما دام الشمل واتعايش الوحده
يالمغطيها بعيونك تدري بحالها بدونك
روح ام فاكده وما تعرف الفرحه
وعلي راسج بحنيته يمسحه
✍الخادم حسين الخزعلي @ch2Hs
حدي للاربعين
اه وجرح كلبي كبر ما شايفتكم من شهر
عاشور ينعاد بصفر وتخضر جروحي صور
يا خوتي جيت الكربله دمعاتي الكم نازله
كلولي يازينب هله تعبانه من درب السفر
من اوصلتكم يخوتي من كد حنيني ولهفتي
ما نوختها ناكتي جسمي عله الكبور انشمر
يحسين اجيت لشوفتك وشلون اكابل حضرتك
و يايه ماهي بنيتك اتعذرك و احجي الخبر
متروسه قصتها حزن تدري برقيه من تحن
من ايست ماكوحضن شبكت يالحسين النحر
ياخويه من سار الضعن و عفناكم بهذا الوطن
متون اليساره اتورمن ما تنرد اسياط الشمر
ما يخلص اهواي الالم شوغة رمح شوغة سهم
وشهكاتي يم حرك الخيم وافراك اخونه عله النهر
ارد اعتني بالنايحه عباس اعرفنه صحه
انده تراني امسامحه ياخويه قلب اختك عذر
ما ريد اسولف بالوعد ما ريد اجرحنك بعد
بريحتكم الخاطر برد بين اخوتي يطوف النظر
الخادم حسين الخزعلي @ch2Hs
قصيده للأربعين
خويه من كتلي وداعن ايست و ايامي ضاعن
هنه الايام اربعين جنهن الاف السنين
خويه من كتلي وداعا
✯✯✯✯✯✯✯✯✯✯✯✯✯✯✯✯✯✯✯✯✯✯✯
صار تسع ايام يا خويه و شهر
من كلت زينب وداعا عالنهر
شكد حسبت ايام و ايام الصفر
اليوم يتلاكه النحر ويه النحر
جيتك بنفس العبايه خاف تسأل منهي هايه
و بيها نيشان الادين جنهن الاف السنين
خويه من كتلي وداعا
✯✯✯✯✯✯✯✯✯✯✯✯✯✯✯✯✯✯✯✯✯✯✯
خلصت انجوم السمه بكد ما اعد
هذا حالي و فاركت عطر الورد
طويله صارت خويه ايام البعد
وما اضن تتلاكه الوجوه و نرد
خويه مو نوم العوافي باللحد شو هسه غافي
جان كتلي لا تجين جنهن الاف السنين
خويه من كتلي وداعا
✯✯✯✯✯✯✯✯✯✯✯✯✯✯✯✯✯✯✯✯✯✯✯
ايست و ايامي غطاها الحزن
و ذكريات المشرعه بروحي ترن
بغيبتك مو دنيه عشت اني بسجن
ما كو ساعه الما تجي ابالي و احن
خويه حجيت الليالي وضلت تون عله حالي
عايشت دور السجين جنهن الاف السنين
خويه من كتلي وداعا
✯✯✯✯✯✯✯✯✯✯✯✯✯✯✯✯✯✯✯✯✯✯✯
جيتك بهيأه و شكل صح مختلف
لاكن ادري بكافلي يميز العرف
خويه ما ظل يا وجه لسه ترف
وانه بخدودي دمع هجرك يجف
غيرت شكلي المدامع وانترس عمري مواجع
ونترس شوك وحنين جنهن الاف السنين
خويه من كتلي وداعا
✯✯✯✯✯✯✯✯✯✯✯✯✯✯✯✯✯✯✯✯✯✯✯
خويه من كتلي يزينبنه الوداع
واهسي من الدنيه يا عباس ضاع
كافي كلبي لشوفتك حسيته جاع
لكربلائك خويه شديت المتاع
خويه لو احنه التقينه ارد اسولفلك سبينه
من السياط مورمين جنهن الاف السنين
خويه من كتلي وداعا
✯✯✯✯✯✯✯✯✯✯✯✯✯✯✯✯✯✯✯✯✯✯✯
خادم زينب (ع)
حسين الخزعلي
قصيده نزله لمولاي السجاد عليه السلام
بعد الفرض يا سيدي أسال
تدعي جنت لو تقره بالمقتل
عن سيرة حياتك اقره شانكتب
ابحث عن تفاصيل دمعك والسبب
بأثناء الفرض دوم ذكر الطف وجب
شتقره ازيارة حسين لو مقتل وهب
بفترة سجودك ونتك تطول
تدعي جنت لو تقره بالمقتل
كل عمرك يمولاي عايش بالجرح
صورتهم بالعيون لا ما تنمسح
كلما ترفع ايديك تتخيل ذبح
وجدامك قناديل مرفوعه برمح
ويه الفروض الخمسه تتخيل
تدعي جنت لو تقره بالمقتل
الكاسر كلبك وجان لازم ينذكر
باذنك تسمع اخيول تكسر ياصدر
نص عمرك خلص نوح بدروب اليسر
وي زينب عله النوك كل ساعه بكتر
راعي الوطن عن الوطن ترحل
تدعي جنت لو تقره بالمقتل
تسبيحك دمع صار خاتمت الفرض
بموقف حرك الخيام روحك تنقبض
تطول سجدتك ليش لازم نفترض
تشتم عطر الحسين تارس هالارض
شمت عطرهم والله ما تنمل
تدعي جنت لوتقره بالمقتل
ترفع جفك اتكوم ودموعك تهل
بعيون السمه تشوف منظر تنذهل
مولاي الامر جان واضح مو سهل
ترسملك بالدموم عبد الله ونبل
ضامي طفلكم يا علي يقتل
تدعي جنت لو تقره بالمقتل
كل ليلك سهر يوم واحد ينحسب
ليل وكلها نسوان وبديرة غرب
موقف كبرك جيل مولاي وصعب
تحرس ساهرت خاف واحد ينضرب
ضلمه وعليل و لا كمركم هل
تدعي جنت لو تقره بالمقتل
✍الخادم حسين الخزعلي @ch2Hs
خويه عباس ادعي لو ترجع عدل
خويه عباس وشفت جابو حبل
خويه عباس انه مو مالت هزل
جابو النوك واجونه والحرم لزمن سره
جتفوهن وحده وحده وركبن الهزل تره
من وصل دوري نخيتك ها يسبع الكنطره
شلون اصعد عالهزيله وانه ياخويه مره
خويه عباس اصعد الناكه صعب
خويه عباس اختك بايد الغرب
خويه عباس وحجي الشامت نبل
اتذكرت من ركبتني بهودجي واتحسرت
وين جنت اويه ابو فاظل وهسه وين انه صرت
وين الحجايه الثكيله التلجم اجروحي اسمعت
اه يادنيه العقيله تنسبي والله وكت
خويه عباس انه دورتك ستر
خويه عباس وعله الناكه الخدر
خويه عباس وعليكم انسإل
طحنه خويه بين ناس الغيره بكصصههم تشح
منين اجيبك يبو فاضل وانته راسك عالرمح
انه ماشفت بحياتي وما عرف شنهي الذبح
الاعرفه وجوه ترفه وسالفه تنكط ملح
خويه عباس اختلف حجي الزمن
خويه عباس الوطن غير الوطن
خويه عباس او تفاركنه بجتل
صعبه جتالك يخويه صاير علينه حرس
وعلي ياعباس ميته وكوه اجرنه النفس
وسفه ميت يابو فاضل والشمر صاعد فرس
خويه مترهي ويسولف الجان لو شافك خرس
خويه عباس انه اول تالي
خويه عباس ابقه وبلا والي
خويه عباس وكلت بلكت تهل
ردنه ما نصعد هزلهم بس صعب تدري العناد
مثل سيف الحز وريدك شمر خويه لسانه حاد
ماكو واحد حن علينه ولا بجي ويه اعدانه فاد
الصاح وينك يابو فاضل منه ضربو عالجياد
خويه عباس العطش غطه الحرم
خويه عباس اعتذر انته الاهم
خويه عباس الهظم ما ينحمل
مو عطش اثر علينه خويه ذبلنه الشتم
ميته امنه وشتموها وحيدره ينسب ظلم
ما شفت بيهم غيور ولا شفت بيهم زلم
عيونهم طلعت علينه وسوطهم لاح العظم
خويه عباس الالم ماينوصف
خويه عباس اختك باسرة الف
خويه عباس احظر وكلشي سهل
✍خادم كفي ابا الفضل ع
حسين الخزعلي
قصيده للسبي
صبحنه بدموع العين ما شفنه وجهك يحسين
من غبشة الله عله السبي صبحنه بوجوه الشر
و ما نمنه حته نفز لان يمنه الشمر ضل يفتر
كلت لبناتي من الصبح صبحجن الله بمنحر
و لمن وضعجن بالعجل عالسوط لا نتاخر
كالن نعم متحظرين ماشفنه وجهك يحسين
****
طر وجهك براس الرمح ماشفنه بس صبغ الدم
لا لحيه لا دورت وجه ضيعنه ذاك المبسم
حرنه بملامح حظرتك وجهك نشوفه مثلم
معقوله وجهك يالنبي سيف العدو بي مهتم
من شوفتك شمخلين ما شفنه وجهك يحسين
****
للسيف حصته من الطعن بخدك نشاهد جم خط
نحسبهن وتاه العدد كل خط دماه يترس شط
يابو المحنه من البجي يمك نطيح ونفحط
وصلت محنتك للخلق ونورس عله متونك حط
وياك نمشي مامنين ما شفنه وجهك يحسين
شفنه السلب شفنه النهب شفنه الشتم شفنه الطك
تهمونا بالباطل لان يدرونه احنه اهل الحك
بجفوفنه نشاكف حذر كون العبي ما تنشك
ندري الستر واجب ابد ماصحنه يحسين الحك
طول الدرب مستورين ماشفنه وجهك يحسين
*
عالنوك راح امشي بدرب ياخويه ما يتامن
كلما اطب ديره غرب راح اقره ايه امن
راح اني اكلن للحرم امشن سوه والتمن
من هسه السياط ابتدن بيا متن حرمه سمن
ما ادري راح اوصل وين ما شفنه وجهك يحسين
**
الحاك ظربات العدو محد يحطلهن حد
خو ما اكلك عالشمر خلاف الكمر ما ينرد
هسه اني محتاره بعد جا ظهري بيمن ينشد
الما صبح بوجه الاهل كلبه جمر ما يبرد
بيكم كبل متحزمين ما شفنه وجهك يحسين
الشاعر حسين الخزعلي
قصيده لمولاي عبدالله الرضيع عليه السلام
من المهد كوكب طلع بس للاسف نحره انكطع
مد ايده راد الماي اله وصار السهم يستقبله
روه السمه وضامي رجع
كوكب يشع من المخيم ظهر
بحظن السمه برحلة عطش للنهر
بعين السهم رغم الطفوله كبر
اعمه النبل بس ركز عله النحر
ماتستحي النبله وتحس تتجرأ تلوح الشمس
عبدالله ماتستاهله وصار السهم يستقبله
روه السمه وضامي رجع
$$$$$$$
جنه عله جف الجنه والطف حقد
وطبع الخناجر ما تحب الورد
تحت الرداء يضمه لا ينحسد
براس السهم تالي النحر ينمرد
خايف عليه من الاثر ما ترحم عيون البشر
بس ناسي نبلة حرمله وصار السهم يستقبله
روه السمه وضامي رجع
&&&&&
جف الثغر واتفطر من الضمه
والراوي واكف مستعد يالمه
طير الترافه بحظن ابوه انرمه
ورادت تطيح ودمه شال السمه
حار عله عبد الله السهم دار وحرك جو الخيم
بلا رحمه سدد قاتله وصار السهم يستقبله
روه السمه وضامي رجع
&&&&&&
وضع الحرم عاصف صبح من رجع
دوي النعي بعرش السماء انسمع
موكب طيور الجنه يلطم فزع
ظل ياكلب ما منكسر وانفجع
بدورت حسن وجه تهل ميت يروح امه عدل
وردة ربيعه ذابله وصار السهم يستقبله
روه السمه وضامي رجع
&&
ما وصلت ايامه حدود السنه
نايم عله راحة ابوه بالهنه
غالي عله كلب اهله وعزيز الضنه
الدنيه عله عبد الله ظهرها انحنه
الماي عله شفته ما يمر ياالطلعته نجمه بظهر
ازغر شهيد بكربله وصار السهم يستقبله
روه السمه وضامي رجع
&&&&
بوكت الظهر من هبت العاصفه
اهنا اعتقد تتحرك العاطفه
وحسين كلبه محترك ماطفه
ولجمت رياح الطف ضوه المعرفه
لا يا هجير الطف تهب هذا طفل ماله ذنب
شايل براءه وبسمله وصار السهم يستقبله
روه السمه وضامي رجع
الخادم حسين الخزعلي
قصيده نزله لاصحاب الحسين عليهم السلام
من دم المناحر عهدنه كتبناه
وبدمع الخواطر هتفنه حسيناه
*******
مو حبر بل من دمه عهد المحبه انكتبه
حته نثبتها الصداقه و نفتخر بالصحبه
ماي عدنه الموت والله ما نهم وانشربه
بيا وجه نلكه علي لو ما ننصرك صعبه
منهاب المقابر شعارا رفعناه
وبدمع الخواطر هتفنه حسيناه
*******
مسلم اول تضحيه و احنه حلفنه نتبعه
الشهرسيفه عله الصنم ابن اللعين وربعه
لو قلب عاليها سافل والسمه اعله السبعه
ما نعوف الما تركنه والكتاب و شرعه
سلينه البواتر شمرهم اجيناه
وبدمع الخواطر هتفنه حسيناه
*******
*******
شوفنه وقدر عزمنه واحكم اعله انصارك
صدرك وظهرك نحرسه ويمنتك وايسارك
اتربع بعرشك يحاكم و انظر ابانظارك
سجل احكامك علينه و لو تهفنه ابنارك
من الغالي المخاطر سلاما حسبناه
و بدمع الخواطر هتفنه حسيناه
*******
كلمه من تنطي الزلم ما ترجع بهالكلمه
هذا قانون اليخالف ينحسب مو زلمه
شلون لو ابن النبي سيد شباب الامه
احتاج انصار وعلي نفسه يزيد انعدمه
نثبت احنه باجر كلام الحجيناه
وبدمع الخواطر هتفنه حسيناه
*******
*******
من سمعنه بزينبك خافت نعوف اخوتها
حته نقطعها الشكوك او من اصل نبتتها
قبل لا نكصد خيامك رحنه عد خيمتها
خطت ابجفها الوثيقه ام الخدر ختمتها
دمع العلنواظر بدينه مسحناه
وبدمع الخواطر هتفنه حسيناه
*******
الشاعر حسين الخزعلي
قصيده لفاطمه العليله عليها السلام
دارك شلون اكدر ادخل ليها
وانت يا بويه وهلي مو بيها
*
ذكرياتك بيها و ايام ا لمضن
عشنه انه وياك كل ذاك الزمن
هم تردلي ونسكن بهذا الوطن
لو تروح و بتك تخليها
*
مثل ما شجره بارض مرتبطه بيك
كل شعوري و الحنان ابين اديك
ظلمه دارك صارت و تبجي عليك
تنتظر جيتك شمس تضويها
*
احجي ويه الدار بغياب الاهل
ليش راعي الدار هاجرها ورحل
لو رحل راعيها جا ياهو اليضل
بس مكانك خالي يا راعيها
*
صدك تتركني يبويه بهالعمر
طفله ما احمل غيابك والهجر
الزم الباب برحيلك و انتظر
ترجع و نار البعد تطفيها
*
يالنويت اعله الرحيل بهالوكت
ليه ترجع انته لو عني رحت
كل هلي ماخذهم اووحدي صرت
وساعة اوداعك صعب تدريها
*
وداعت الله وهاي اخر جلمتي
روح وانه ابقه يبويه بغربتي
بس اريدن منك اني طلبتي
لا تطول الفركه يا واليها
خادم العليله : حسين الخزعلي
قصيده للقاسم عليه السلام
روح روح يالنيتك ترحل
روح روح يوليدي ما ازعل
بطيفك اليجيني.......................راح اواسي عيني
************************************ من اودعك ادري اضيعك وادري اضيع كل تعب عمري التعبته
بس اشجعك واني اسمعك روح فدوه العمك و فدوه الغربته
خل يصير بخاطري.....................وابجيلك عيوني
خلافك اتحمل جري.....................وينضربن امتوني
لروحي اگلها اتصبري.................... باچر يبشروني
اه اه يالفرگتك مره
اه اه بگلبي تضل حسره
عليك اجر ونيني........................... راح اواسي عيني
************************************
انه رمله و عمري كله انتظر يوليدي ازفنك بديه
ارد اگله يبني سهله؟ رايح و شيب الكبر بين عليه
حيلي مو مالت هجر.....................ما بيه للفرگه
عودت كلبي يسر.....................يوليدي بالشبگه
خل اعيش و انتظر.....................و اتأمل الملگه
نام نام و بحلمك أتهنه
نام نام تنتظرك الجنه
أنتظر حنيني...............................راح اواسي عيني
************************************
يا فرحتي ويا ضحكتي بغبشة الله انته الهوه الريتي تشمه
يا غربتي و يا دمعتي منين اسمعها الصبح كلمة ييمه
يالچنت بمسامرك......................ما أشعر بليلي
عيشتها بخاطرك......................يا يمه ادعيلي
گلبي اسأله شكاسرك...................واني ادري ياويلي
راح راح وانه اسأل بروحي
راح راح و التمن اجروحي
ما يرد يقيني...............................راح اواسي عيني
************************************ أعتذرلك بس أسألك مالي خاطر عندك تخليني اتاني
عاتبتلك من اصدلك بحظن موتك نايم و عايف حناني
اه يالعمرك نده .................فوك الرمل غافي
جثتك متفرهده ................وعندي حظن دافي
اتهوس عليك العده ..............وانه اركضت حافي
ليش ليش يا سلوة ايامي
ليش ليش تتلاشى احلامي
گتلي سامحيني...............................راح اواسي عيني
************************************
هذا حالي بلايه غالي ذكرياتك تاكل سنيني بغيابك
و الليالي يبني تالي عايشتها اتحلم بشمعة شبابك
تترك اثارك جمر........................نيراني ما تطفه
راح اعيشنه العمر.......................و بحسرة الزفه
تدري امانينه شكثر....................و لفرحتك لهفه
وين وين ألگاها فرحتنه
وين وين ولدنيه جرحتنه
اصفگ ابأديني..................................راح اواسي عيني
************************************
شباقي بيه وهاي اديه شوفت عيونك صفت منك خليه
و المنيه بلكي اليه تعتنيلي وعمري وي عمرك سويه
اني بعد الفاجعه.....................بالعيشه ما أرضه
خلافك ابقه ضايعه...................والجفن شيغمضه
تبقه بأذني مربعه......................يا رمله شيعوضه
دوم دوم ابقه الهج اباسمك
دوم دوم ابالي يظل رسمك
ما عشت سنيني................................راح اواسي عيني
************************************
خادم الحسين(ع)
حسين الخزعلي
نزله لأصحاب الحسين عليهم السلام
للخيم يروحون بالنظر يكتبون اطمأني يم عون
وصلت اخبار لحبيب من الخيم
زينب اتسولف للحسين بالم
كالهم ها يالزلم صاحو نعم
وكلهم التمو على هيئة علم
اهتزت الهم الكاع ليها راحو ابساع هاج ماي العيون
شيخهم انطه الكلام المختصر
والبيان الان من عدهم صدر
مانريد الشك يظل نمحي الاثر
ولو بدينه نضحي نبدي من النحر
والله عدهم انفوس بيها نرفع الروس ماتضل الضنون
لايغرج شكلي يازينب كهل
اني شايب صح يقينا بالشكل
راح اغير حكمج وأصبح مثل
هلال امان بخيمتج مولاتي اهل
ابالج ادري الحساب شايب اني مو شاب الجوهر اصل الفنون
الشيب جدامج يبت حيدر يطيح
الواهس البينه وصل حته المسيح
عدنه عاده بالمعارك نستريح
وبالحرب لبيك يازينب نصيح
والله بس بالجفوف نطوي وادي الطفوف عدنه سهله وتهون
من بعد اذن الكمر عدنه أمر
نريد كلنه نصير كفالة خدر
ندري بالطف بي الوف من الشمر
اختصاص احنه كطع روس وشمر
احنه سور الخيام مأمنه زينب تنام و بالوفه تشهدون
خادم الحسين عليه السلام
حسين الخزعلي