Telegram-канал davodtahmoresi - ⬛️اشعار عتیق⬛️: Unsorted

⬛️اشعار عتیق⬛️

20 Aug 2023 00:01

@davodTahmoresi

#حضرت_رقیه_س

نَدندی دونموری چرخ سپهر مینانی
خراب اولیدی گوروم یکسره بو دنیانی

همیشه ظالمه میدان آچوب ویره جولان
ولیک تنگه سالوب دائم اهل تقوانی

نه خاطره بولَنه بولمییَن اولور غالب
بولوری سرّینی تنها خدایِ رحمانی

یاتور خرابه ده مظلوم ،کاخیده ظالم
خیالِ خامیله اِیلور هوای سلطانی

خرابه منزل اِیدوب مرغ روحیمه رخنه
گزوری طائر روحیم اودور او ماوانی

یازوبلا چوخلی مقاتیلده واضح و روشن
یتوبدی عرشه او یردن رقیه افغانی

دیردی جانیمی جانانه ویرمرم عمه
زیارت اِیلمَمیش من ولیِ سبحانی

آپارمارام اورگیم آرزوسینی قبره
گرگدی درک اِیدم آرام جان جانانی

وصال یاره نَدن من گرگ چَکم حسرت
اوزون خرابه ده دور حلّ اِیله معمانی

ساچوی آل اَلیوه بیر منی دعا ایله
حزّین سَسیله چاغیر داده حی منّانی

دِنن خدا بو قیزا بیرده بیر عنایت ایله
قبول قیل من دلخسته دن تمنانی

یتور بو بلبل مهجوری گلستاندا گوله
وصاله ایله مبدل بو شام هجرانی

غریبه عالمیمیش نصف شب خرابه مکان
توکردی عارضه عترت سرشک غلطانی

غرض نوای حرم شامه ولوله سالدی
گتیردی تنگه او سَس اهل شام ویرانی

علاوه اولدی هراسان شهرین اهلی تمام
هراسه سالدی او ناله یزید نادانی

دیدی نه سَسدی بو سَس اولمیا قیامتدی
جواب ویردی اونا لاجرم نگهبانی

که ای امیر دیّوللَر خرابه ده بیر قیز
توکوری عارضینه غصّه دن جگر قانی

گوروب آتاسینی گویا دیّوله رویاده
انیسی گوز یاشیدی آز قالور چیخا جانی

دیدی خرابیه گوندر بو باشی الساعه
سحر اولونجا یئته باشه تا قضایانی

یارالی باشی نگهبان قویوب طبق اوسته
خرابه سمتینه گوندردی شاهِ بطحانی

غرض خرابیه راهی اولوبلا آهسته
که بلکه اولمیا فاش اول رموز پنهانی

نه گوردی اهل حرم راس شاه مظلومان
گلور خرابه مکانه او لیل ظلمانی

ملائک متقرب گلوب زیارتینه
قالوبدی عالم و آدم او راسین حیرانی

رواندی باطن ظاهرده طمطراقیله
ولیک صورت ظاهرده وار پریشانی

یتنده منزل ویرانیه شه کونین
بنات یکسره پیشواز اِیدوب او مهمانی

رقیه نین اَیاقی گَلمدی اِیده پیشواز
تاپوبدی سینه پر دردی حال ویرانی

دیدی یارالی باشی ویر قوجاقیمه عمه
دیوم او باشه باشیمدا اولان بلایانی

یارالی باشی گوتوردی علی قیزی زینب
گلوب تکلمه عرض اِیتدی ای سخا کانی

غریبه وقتیده گلدون هرایمه یِتدون
غریبه وقتیده اِیتدون بو لطف و احسانی

گَلوبسن ایندی که آل بو امانتی مندن
بالان آتوبدی باشیندان هوای دنیانی

تاپوپ زبس که بلالی باشی بو یرده بلا
معاینه گورونور دلده نار سوزانی

غرض ویروب گولی گلشنده بلبل زاره
اگر چه دویمادی عطریندن اول وفا کانی

رقیه جان کیمی بیر باسدی باغرینا او باشی
دیدی که سَندن اوتور گزمیشم من هریانی

خدا بولور که نه چَکدیم غم فراقیندان
نه ابتداسی عیاندور نه حد پایانی

یارالی باشیوه جانا فدا اولا جانیم
نًدن کسوفه دوشوب آفتاب رخشانی

یتیشمَمیشدی هلّه باشه درد دل، ناگه
رقیه یومدی او غمدن دو چشم گریانی

گوتوردی باغرینا باسدی رقیه نی زینب
مخاطب ایتدی او دمده رباب نالانی

دیدی کی مشتریم اوخشاما دِیسن اِیندی
بالا غمینده نه چون چوخ یانار آنا جانی

رباب نوحه اِیدوب آغلادی حرم اهلی
دوباره یاندی او ماتمده قلب بریانی

قویاندا قبره دیدی زینبا اَلون ساخلا
بالام گوزوندن آتوب اَیندی که بو دنیانی

اجازه ویرسن اگر بیر سفارشیم واردور
دیوم بهشتیده گورسه او طفل عطشانی

دِئسین غریب آناوی یاخشی در به در ایتدون
اورکده غملرینون یوخدی حد پایانی

علاجیم اولمادی سو اوسته باغلادیم اَلینی
بو فعلیمون واریدی بیر دلیل وبرهانی

نه تک بوسینه ی سوزانیمی خراش اِیتدی
گتیردی تنگه نواسی او چولده سقانی

خجالتیندن اودور گلمدی خیامه طرف
که چیخدی نهر فرات اوسته تشنه لب جانی

(عتیق) نوحه یاز آغلا نه قدری عمرون وار
شفیع اولا سنه تا خسرو شهیدانی

التماس دعا🙏

@davodTahmoresi