داود عبدی (Taymaz)

23 Dec 2020 17:38

سویو گؤینه‌دییینیز یئره تؤکون

ایللر اؤنجه آدینی اونوتدوغوم بیر کیتابدا، بئله بیر سؤز اوخوموشدوم؛
کیچیک دۆشونجه‌لی اینسانلار؛ واختلارینی باشقا اینسانلارا توهین ائتمک هابئله ساتاشماقلارلا کورلایارلار
اورتا سوییه‌‌ دۆشونجه‌لی اینسانلار اونلارا ائدیلن توهین‌لرله، دَیَرسیز سؤزلره قارشی دورماقلا باشلارینی قاتارلار.
آنجاق بؤیوک اینسانلار واختلارینی بوشونا هدر ائتمک یئرینه، تکجه اوغور قازانماغا دوغرو، آددیم آتارلار.

سون گۆنلرده پیروزی تیمی‌نین آسییانین شامپییونلار لیگینده حاکیم‌لرله فئدراسییونون یاردیمیندان اؤگسوز قالدیغیندان آسیلی، فینالدا اودوزماغی، بو اؤلکه‌نین ورزیش آلانیندا چالیشان دلقک‌لرینی برک گؤینه‌ده‌رک؛ VAR سیستمی‌ندن توت گلسین قطرلی حاکیم، هاوا دورومو، قارغالارین قاریلتیسی و... یامان ـ سؤگوشه ‌توتوب یئر ـ گؤیو قارغی‌لایاندان سونرا، بو دؤنه اؤفکه‌لرینی، اصلی و ایلک دۆشمانلاری ساییلان تۆرک‌لر و اونلارین دستک‌له‌دییی "تیراختور"دان چیخارتماغا باشلاییبلار.
بو اؤلکه‌ده تۆرک‌لره قارشی بوجور حاقسیز داورانیشلارین ایلکی دییل، سونو دا اولمایاجاق.
آنجاق بو آرادا اونلار تیراختورا حاشییه یاراتماغی پیلانلایارکن، یئری ـ گؤیو قارشیمیزا ایتیلدرکن، تیراختور فوتبالی سونوجلاریندان قیراق، تۆرک خالقی‌نین بیرلیک سیمگه‌سینه چئوریله‌رک گۆنو ـ گۆندن داها آرتیق سئویلیر.

ایللر اؤنجه حمیدرضا صدر، ایرانین فوتبال‌تانییان آداملاریندان بیری، عادیل‌ین 90 آدلی وئریلیشینده بئله بیر سؤز دئدی؛بیر تیم‌ین سئوه‌نلری‌ایله ایسته‌ین‌لری‌نین سایی‌سینی اس.‌ام.اس تئکست‌لری‌نین ساییسی‌لا یوخ، ایستادییومو دولدوران آزارکئش‌لرین[هوادارلارین] سایی‌سیندان بیلمک اولار.
بو گۆن ده بو سؤزه دایاناراق پیروزی اؤلکه‌نین ان چوخ سئویلن تیمی ایددعاسینا تی.وی ده یاییملایان بوش وئریلیشلرله اونلاری دولاندیرانلارین سؤزلرینه دییل، AFC آمارلارینا باخیلمالی....

ائله شب یلدانی آیین میترایی بیلدییینیز کیمی، اونون فال حافیظ‌له ننه‌سرمایلا ایلگی‌لرین باستانگرایی‌لرینیزده آختاردیغینیز آن، آنسیزجاسینا ناردوغان بایرامی یۆنئسکو طرفیندن قوزئی آذربایجان‌ین میللی بایراملاریندان اولاراق ثبته یئتیریلدی....
سیزلر هله یازی‌مین ایلکینده گتیردیییم کیمی باشقالارینا توهین ائتمکده اولون، آذربایجانلی‌لار باجاریقلا ـ اوغور زیروه‌لرین فتح ائتمه‌یه دوغرو ایره‌لی‌له‌ییرلر.

بیر شئیی ده هئچ‌واخت اونوتمایین تۆرک‌لرین ذاتیندا اؤنه باخماق وار
کیچیک و اؤنم‌سیز شئی‌لرله اوغراشماق یوخ.

داودعبدی
@davud_ebdi

داود عبدی (Taymaz)

16 Dec 2020 13:29

قوشاچای‌‌ین ۲۶‌ـ‌آذر اولایلاری

آذرین ۲۶ ـ سینی موعاصیر تاریخیمیزین ان قارا گۆنو آدلاندیرساق یانیلمامیشیق،
بلکه ۱۳۲۵‌ـ‌جی ایلین او سویوق گۆنلرینده مینلرجه فدایی‌میز محکمه گؤرمه‌دن کؤکسلریندن ۲۱ ـ آذر میدال‌لاری قورپاریلیب یئرینه قیزیل قورشونلار تاخیلدی،
قیزیل قانلاری چیلپاق گؤوده‌لرینی(بدن‌لرینی) بزه‌ین کفن‌لری اولدو، و آیاقلارینا مسیمارلار دؤشه‌نیلدی و مین‌لرجه جینایت، آذربایجان‌ین قورتاریشی آدینا بؤلگه‌میزده تؤره‌دیلدی، آنجاق هئچ بیریسی شهرلرین اصلی مئیدان‌لاریندا و اوخول‌لاریندا تۆرکجه کیتابلارینی اودا چکمکدن آغیر و غئیرـ‌ی اینسانی دییلمیش.
کیتابلار بیر میللتین دانیشان دیلی و گله‌جه‌یه آچیلان آیدین‌لیق کؤرپولری ساییلار آنجاق اونلاری داش اۆره‌کلی پهلوی جلّادلاری اودا چکمک‌له تۆرک دیلینه چیرکین اۆره‌کلرینده‌کی نفرت و کینه‌نی بیر داها بللی ائتدیلر.
[ ائله میللی حوکومتین اؤلکه‌نین باشقا ائتنیکلی(غئیر‌ـ‌ی تۆرک) میللتلر طرفیندن بایکوتونون عامیللریندن بیری ده، فیرقه‌نین تۆرکجه‌یه وئردیگی دَیَرایدی؛
تۆرک‌ دیلی پیشه‌وری و فیرقه‌نین ان اؤنملی شوعارینا چئوریلدیگی حالدا،ایران خالقی‌نین چوخونون ذهنین‌ده هابئله سییاسی‌ آداملارلا آیدین باخیشلارین نظرلرینده اؤلکه‌دن آیریلماق و تجزیه‌نی خاطیرلادیردی،
میللی حوکومتین تئهراندا اولان حامی درگی‌لری‌نین بۆتونو، فیرقه‌نین اؤزگورلوک و دئموکراسی آماج‌لی ایلکین(اولیه)شوعارلارینی ساووندوقلاری حالدا، تۆرکجه‌یه وئریلن اؤنم و دَیَری گؤردوکلرینده اعتیراض ائدیردیلر، «ایران ما» و باشقا درگی‌لر، اؤز اعتیراضلارینی آچیقجاسینا بیان ائتمیشدیلر،
علی مرادی مراغه‌ای، از زندان رضاخان تا صدر فرقه دموکرات آذربایجان،نشراوحدی،ص: ۴۳۰]

کیتابلارین یاندیریلماسی تکجه تبریزده یوخ، آذربایجانین چوخلو شهرلرینده بو فاجیعه اۆز وئرمیشدی.
قوشاچای‌دا ۲۶‌ـ ‌آذر گۆنونده ۲ یئرده کیتابلار اودا چکیلمیشدی.
رحمتلیک یوسف احمدزاده^ (فیرقه‌نین عسگرلریندن‌ بئله دئییردی: تبریزده قان آخماغا باشلادیغیندا بیزه دئدیلر قاچین جانینیزی قورتارین، ۳ گۆن اؤنجه تبریزدن تقی‌آبادا قاچیب گیزلندیم،۲۶‌ـ‌جی گۆن حسن‌آلی(حسنعلی) آدلی یولداشیم گلیب منی سسله‌دی، دئدی دئییرلر عفو گلیب، اون مئیدانینا ساری گئتدیک، فیرقه‌نین دفتری داغیلمیشدی، خالیصه باغینا گلدیک، قارا توستو‌یله دومان آغاج‌لارین آراسینا دولموشدو، بو گۆنکو کیتابخانا و موزه‌نین یئرینده ۵‌ـ‌۱۰ دنه الی سیلاحلی ژاندارم و تبریز تالانیندان باشلاری آچیلان جمشیدخان اسفندیاری‌نین ۲۰ دن چوخ تۆفنگچیسی‌له الی چوماقلی آدامی بؤیوک بیر تونقال قالاتدیراراق بیر نئچه دسته اوشاق اللرینده کیتابلاری اودا آتیردیلار،... بیز اوندا بیراز آرالی‌دان باخدیغیمیز اۆچون بیلمه‌دیک او کیتابلار نه‌ایدیلر، سونرا قاچاراق کنده قاییتماق ایسته‌دیگیمیزده مبللت قندکرخاناسینا طرف قاچیردی، بیز ده کؤرپونو آدلاییب کرخانین اۆزبه‌اۆز مدرسه‌سینی بؤیوک بیر توستو دومان آلمیشدی،بیر نئچه الی سیلاحلی ژاندارم‌لا بیرلیکده ایکی کیراواتلی آدام کؤزه‌ریلن کیتابلارلا کاغیذلارین باشیندا دوراراق اللرینده‌کی دفترده بیر شئیلر یازیردیلار، کالبا بشیر بشیری ده اونلارین یانیندا دایانمیشدی، اونو تانیییردیم]
بو خاطیره‌نی معللیم پارکدا بیر قوجا عینا نقل ائدیردی و موزه‌نین یئرینده آلاوی قوواقلاردان اوجا اولان بیر اودون آچیلماسینی دئییردی ـ ساسان نقی‌زاده ده اوگۆن بو قوجایلا دانیشدیغیمیزدا اوردایدی.
آنجاق تاسسوفلر او دهشتلی فاجیعه‌دن
[ان آزی بیزیم الیمیزده] بیر شکیل اولمادیغی اۆچون تکجه شفاهی سندلره دایانیب و تانیق‌لارین(شاهیدلرین)‌ سؤزلرینی قلمه آلیریق.

^. بو دانیشیق ۸۳‌ ـ جۆ ایل، تقی‌آبادین ۱۳۲۴ ایلینده عسگر گئدن ۴ فدایی‌سی‌ایله آپاریلمیشدی.

داودعبدی
21/آذر/1398
@davud_ebdi

داود عبدی (Taymaz)

07 Dec 2020 23:28

پنجره‌دن بری باخ

علیرضا بی فرشی‌نی چوخداندیر تانییارام، اؤزویله یاخین دوسلوغوموز اولماسا دا، میللتیمیز اۆچون گؤردوگو ایشلری‌ایله اونو سئویرم.
ساندیغیم قدر میللی حرکت ایچره، بۆتون طئیف‌لر سایغی‌لا فرشی جنابلارینا باخیرلار و کندلریمیزده تۆرک دیلینده کیتابلار یایماق هابئله کیتاب‌ائولرینی یاراتماق اونا اولان دۆشگونلوگومو داها دا آرتدی....

سون گۆنلر، علیرضا بی، آذربایجان‌ین خالق ماهنی‌لاریندان اولان؛ "پنجره‌دن داش گلیر آی‌بری‌باخ بری‌باخ" ماهنی‌سینی فرقلی سؤزلرله سسلندیره‌رک، بو ایشینه گؤره چئشیدلی نظرلرله باخیشلارین یاییلماغینا سبب اولدو.
بیر سیرالاری بو ایشی بینمه‌ییرلر، بیر سیرالاری هئچ بیر نظرلری یوخدور، بیر سیرالاری‌ایسه بو ایشینی چوخ سئویرلر.
پنجره‌دن داش گلیر ماهنیسی خالق ماهنیسی اولموش اولسا دا، ۱۹۰۸ ـ جی ایل، ایستالین‌ باکی‌نین بایلوف توتساق‌خاناسیندا، دوستاق(توتساق) اولدوغو ایل، ائشیکده اولان یولداشلاری طرفیندن بو ماهنی‌نی ائشیتدیگی آن، پنجره‌دن داشا باغلانیلیب ایچری‌یه آتیلان مکتوبون‌[توتساق ائویندن قاچیریلما پیلانی] گله‌جگیندن خبری اولورموش.
باشقا توتساقلار داشا باغلانمیش مکتوبون پنجره‌دن ایچری‌یه آتیلدیغی چاغ اوجا سسله پنجره‌دن داش گلیر ماهنی‌سینی سسلندیرمکله قوروجولارین دیققتلرینی داغیلداراق، اؤز آماجلارینا چاتیرمیشلار،
بو گۆن علیرضا فرشی‌نین ائوین زیندانیندان آی‌بری‌باخ ماهنی‌سینی ائشیتدیگیمده، ایستر ـ ایسته‌مز، او تاریخی اولای گؤزومون اؤنونده جانلاندی، فرشی اۆرک سؤزلرینی هابئله اۆستونده هزینه وئردیگی اینانجلارینی ماهنی ریتمینده سؤیله‌یه‌رک اؤز یۆکسک روحییه‌سینی تصویره چکمکله سئون‌لرینی سئویندیریب، دۆشمانلارینی سینسیتدی.
گۆر سسینی ائشیتدیگیمده روحییه آلیب داها دا آرتیق سئودیم فرشی جنابلارینی.
آنجاق ماهنی‌نین سونوندا دئدیگی سؤز اۆره‌ییمی اوتانج دولو بیر کدره چولغالادی
"علیرضا ائوینده‌دی
هرکس اؤز ایشینده‌دی.... "
آنجاق تکجه فرشی بی یوخ، لیسانی بی، نادارلی بی، منافی بی و... و... و... بۆتون فدایی‌لریمیزه باش ایه‌رک اونلارا نه‌قدر بورجلو اولدوغوموزو‌ اونوتماییریق،
ایستالین ۱۹۳۸ ـ جی ایل شوروی‌ده قورولموش اولان؛ باکی‌نین کۆلتورل هفته‌سینده، اۆزئییر حاجی‌بیگلی اورکئستریندن پنجره‌دن داش گلیر ماهنیسی‌نی نئجه ائشیدیب او گۆنلری خاطیرلایاراق، دوداقلارینا گۆلوش قونموشدورسا، اینانیریق فرشی بی و بۆتون فدایی‌لریمیز گله‌جکده اؤزگۆرلوک‌ گۆنلرینده، سئودیکلری ماهنی‌لاری ائشیتدیکلری آن دوداقلارینا گۆلوش قوناجاق
اؤزگورلوک دادی وئرن پنجره‌لردن ایچری گلن بیر گۆلوش...

داودعبدی
@davud_ebdi

داود عبدی (Taymaz)

01 Dec 2020 15:14

آچین پنجره‌لری آچین....
ماهنی قوخویور وطنیمین بولاقلاری
یئنی‌دن چیچک‌لنسین قیش گۆنونده
باغچامیزین قوجا چیناری‌نین بوداقلاری
آچین پنجره‌نی.... موشتولوق گتیرن گؤیرچین‌لر گلسین
دوداقلارا گۆلوش، شنلیک، ظفر نغمه‌سی اَنسین
آچین پنجره‌لری وطن قوخوسو گلیر یاغیشلی گۆنلرده
و من کئفلنیرم تورپاغیمیزین وطن قوخوسونو اییلیینده
نه گؤزل اولوب
سانکی بایراغیمیزدیر ساچین
باخ!
وطن اییسی، یاغیش سسی، گؤیرچین نفسی
هامیسی موشتولوق ایسته‌ییر
اؤزگۆر اولوب سئویملی "لاچین"

داودعبدی
@davud_ebdi

داود عبدی (Taymaz)

08 Nov 2020 10:37

شوشا یالنیز بیر شهر دییل
شوشا تورپاق دییل
شوشا آنادیر
شوشا وارلیق‌دیر
مدنییت‌دیر، قوجا تۆرکون اویغارلیق سیمگه‌سی‌دیر
شوشا اؤزئییردیر، واقیف‌دیر، ناتوان‌دیر
شوشا قالالار قالاسی
نیسگیلی کؤنلومده تونقال قالاسی
شوشا....
شوشا، گؤز یاشی‌دیر
سئوینجین اؤزودور
بایراغین آنلامی
شوشا حاجی‌بابا حوسئینوف‌دور
اشهد ان قاراباغ شیکسته‌سی‌دیر
آذربایجان آرزی‌لار مئشه‌سی اولسا
شوشا سئوگی‌لر مئشه‌سی‌دیر
و بیزلر دۆنیانین ان موتلو آذربایجانلی‌لاری‌ییق شوشانین اؤزگۆرلویونو ده گؤردوک
گؤزون آیدین وطن، گؤزون آیدین وطنی سئون
آرتیق: شوشا بیزده.....
قولاق آس، دینله، جاببار قاریاغدی‌نین سسی گلیر
شوشا بیزده.....

@davud_ebdi

داود عبدی (Taymaz)

20 Oct 2020 15:19

زنگیلانیما

ایللر اؤنجه اسیر اولموش یوردا دؤنمک‌
سانکی شاعیر بیر قیزی سئومک
ان دوغروسو سئوگی تورونا دۆشمک
اونونلا یاشاییب، اونونلا اؤلمک
هر گۆلمه‌لی سؤزونه آغلاییب
آغلامالی سوزلره گۆلمک...
چووووخ چتیندیر شاعیر بیر قیزی،سئومک
و ان چتینی؛ شئعرینی ـ سؤزونو بیلمک
گاهدان گؤزله‌ییر بالیق اولاسان،
شئعر دنیزینده اۆزوب، سؤزلری‌نین درین‌لیگینه دالاسان
یا دا دۆزدویو اینجی‌لره،اینجی دۆزوب، بوینونا تاخاسان
اوخو شاعیر - اوخو
توخو شاعیر - توخو
وطن اینینه کتان کؤینک
سئوه‌جه‌یم او کؤینه‌یی
ایلمک ـ ایلمک
توخو شاعیر - توخو ...
زنگیلان بویدا، گؤی، قیرمیز، یاشیل بیر کؤینک
آدینی دئییم؛
"وطن کؤینک
ائدیم اونو کفن کؤینک."

داودعبدی
۹۹، ۷، ۲۹
@davud_ebdi

داود عبدی (Taymaz)

11 Oct 2020 15:30

وطن اۆچون آغلاماق سنین پایینا دۆشدو

خوداحافیظ ائی آنام باجیم.....
بو گۆنلر بو نوحه‌نی ائشیتدیگیمیزده، نه اولای اۆز وئردیگینی، خبری‌نین یاییلماسیندان اؤنجه آنلاماق اولار؛
وطن باشین ساغ اولسون ـ شهیدیمیز وار....
ایستر وحشی‌جه‌سینه غصب اولونموش تورپاقلاریمیزین آزادلیغی اوغروندا، قیزیل قانینا بویانان قاراباغ شهیدلری، ایستر آذربایجانین گۆنئی‌ینده تئرورچو کۆردلر الی‌ایله، قان خیناسی‌نا بویانان ایگیدلریمیز....
هرحالتده اوتایدا سئیید طالئع‌ین حزینی سسی، بوتایدا دا منصوری‌نین یانیقلی سسی‌نی، هر ایکی بوغازدان ائشیتدیگیمیزده سینه‌لریمیز داغلانیر.... لعنت اوخویوروق تئرورا ـ تئرورچولوغا و اونو دستکله‌ینلره.
بو آرادا بیر نئچه دسته ده بو لعنتدن اوزاق قالمیرلار:
ایکی اۆزلولرله اؤلکه‌نین هۆنردن آنلامایان هۆنرمندلری، اؤز خالقیمیزین هر ایشینه [ تیراختور شامپیونلوغو سئوینجینه کورونا وار دئیه، ایراد توتانلار، قاراباغدان دستک و حیمایته چیخان گنج‌لری دانلاماق و ۳۰ مین تۆمنلیک دولاردان سؤز آچانلار، آیدین باخیش ژئستی توتوب، شجریان لارا شام یاندیریب اؤزلرینی ییرتانلار.... و
بو گنج‌لر [ علی بیرامی‌لر، ساسان امیرخانی‌لر و... ] سیزلرین گۆوه‌نلیگی اۆچون، جانلاریندان کئچدیلر، ان آزی بیر تسلیت و باش‌ساغلیغی دئیردیز، ان آزی مرغ‌سحر، مرغ بعدازظهر ا یاس ساخلاماق یئرینه، اؤز خالقینیزین حالینا آغلایاردیز و.. و.... و...

و بیر شئیی ده بو آرادا اونودولوماسین؛
بو اؤلکه‌ده یاشایان تۆرکلر چوخ ـ چوخداندیر یوللارینی فارس خالقیندان آییریبلار و سیزلر بو ایشلرینیزله تکجه اؤزونوزو اونلارا یاپیشماز بیر یاماق کیمی گؤستریب، گۆنو ـ گۆنوندن آرتیق اؤز خالقینیز آراسیندان دا قووولوب، تک قالاجاقسینیز.

داودعبدی
@davud_ebdi

داود عبدی (Taymaz)

06 Oct 2020 20:25

او بیرگۆن گلمیش‌ایدی

[۱]
هرگۆن، گۆن‌اورتادان قاباق، قاپیمیزین زنگی چالیناردی، رحمتلیک به‌ییم ننه‌م بالا دور قاچ، بۆلبۆل گئنه اوخودو، دئمه‌یی‌ایله قاپی‌یا ساری قاچاردیم
حیه‌طین اورتاسینا یئتیشنده، قاپی‌میزین سینیق طلق‌لری‌نین دالیسیندان، کیشی گؤوده‌لی هئیکلی گؤزومه دَیَردی.
قاپینی آچدیغیمدا، قیرمیز سله‌سینی یئره قویوب، منی باغرینا باساردی.
بۆتون قوجالار ایچره، تکجه "قالسین خالا" منیم بیرینه اؤپوش وئرمکدن خوشلانمامادیغیما سایغی گؤزویله باخیب، منی اؤپمزدی، او اۆزدن اونو اۆره‌کدن سئوردیم.
مشهدی قالسین، بابامین خالاسی‌ایدی، یاشی ۷۰ ـ دن چوخ اولدوغونا باخمایاراق گؤزه‌للیگی هله ده یئرینده‌ایدی، ائولری شهردن ۱۷ کیلومئتر آرالی اولسا دا، کۆره‌یی یانمیش صدام‌ین طیّاره‌لری، موخابیراتی ووران گۆن، کنددن بیزیم ائوه کیمی، آیاق یالین قاچمیشدی.
او گۆنلر بیز کنده داییم‌گیله داشینمیشدیق... یازیق آرواد کندلرینده موخابیراتین وورولدوغون ائشیتدیگینده، آز قالا اؤدو پارتلامیشدی، کیمه یالوارمیشدیرسا، اونو شهره گتیرمه‌میشدیلر، او دا نییاران ـ نییاران آیاق یالین شهره کیمی قاچیب بیزه باش چکمیشدی[ائویمیز موخابیراتین دالیسیندا اولاردی].
.... او گۆن یئنه گلدی، هامی‌لا خوش ـ بئش ائدیب، ننه‌مین دؤشکجه‌سی اۆستونده اوتوروب، آنام گتیردیگی چایی گؤتوروب، چایین ایچینه باخیب، محمّدیم ده بو ایستیکانلاردا چایی سئوردی، دئییب، لئچه‌گی‌نین اوجویلا گؤزونون یاشینی سیلدی
آنام خالا فیکر ائله‌مه اینشاللاه گلر
خالاجانی بۆگئجه یوخودا گؤردوم، دئدی ننه گلیرم تویوما خینا ایسلات،دئدیگینده بؤیوک ننه‌م اوجادان هؤنکورتمه چکیب، ذلیل اولسون صدامی دئییب، آیاغا قالخدی.
خالا دئدی به‌ییم باجی گله‌جک ها، ننه‌م دولموش گؤزلرینی سیلیب، هانی او آللاه دئییب،هرگۆنه تای ایکی قوجا فرمانداری اؤنونه گئتدیلر....
آخشام چاغی، قاش قارالان چاغ، ننه‌م قاش‌‌‌ ـ‌ قاباغی یئرله سۆرونه‌رک حیه‌طه کئچیب، شالوارینی دیزینه قدَر چیرمالاییب قیچلارینی حؤووضده یووماغا باشلادی،آنجاق دیلی‌نین آلتیندا نه‌سه بیر شئیلر دئییردی.
آتام؛ ننه مین یول دئمیشم گل ایچری‌ده یو، زۆیوب ییخیلارسان، منه ننه دئمه باخ، دۆز دئییرسن خالا‌اوغلوندان بیزه بیر خبر گتیر، آللاه قویسا پاسیبانسان دئییب، ننه‌م اۆزونو منه چئویردی، من ده الیندن توتوب ایچری کئچدیک.
ائویمیزی قریبه بیر سوسقونلوق بۆروموشدو، بیردن ننه‌م دئدی اوغول باشینا دولانیم دور گئت موخابیراتا اویان ـ بویانا زنگ آچ، بلکه محمد گلیب، دۆنن گئجه یازیق خالانین یوخوسونا گلمیشدی، بابام باشینی توولایاراق ننه‌مه یاخینلاشیب قادان منه سن دیلخور اولما، گؤزوم اۆسته..
آنجاق او یازیق آروادا دا دئنن گۆنده ـ گۆنده گلمه‌سین، محمد گلسه هامی‌دان قاباق من بیله‌جه‌یم، اؤزوم موشتولوق آلماغا گئده‌جه‌یم خالام گیله، واللاه یوللاردا چۆرویه‌جک ها....
ننه‌م بیردن گؤزلرینی برلده‌رک باباما ساری باخیب؛ ننه دییلسن کی بیله‌سن نه چکیر، اۆره‌یی دؤزمور دا.... هئچ ایسته‌مز خبر توتما، دئییب دوروب اوتاغینا کئچدی.
[۲]
آرتیق ۲ هفته‌ کئچمیشدی، فرمانداری‌نین دامیندان آدلاری اوخویان کیشی ده یورولموشدو، تکجه قالسین خالا، ایلک گۆنکو گۆجویله گۆن قاباغیندا دایانیب دولموش گؤزلرله قولاغی کیشی‌نین آغزیندا اولسایدی دا اۆره‌یینده آللاها یالواریردی...
هرگۆن گله‌جک خالا، گله‌جک... دئییب شهره گلردی، آخشام چاغی دا گۆن‌باتاندا کندلرینه قاییداردی، هرنه‌قدر یالوارسایدیق دا قالمازدی، دئیردی محمدیمین اوتاغی‌نین چیراغینی یاندیرمامیشام، بیردن گلیب ـ گؤرر اۆره‌یینه گلر، مندن کۆسر.
بیر گۆن من ده خالایا قوشولوب فرمانداری فلکه‌سینه گئتدیک،
چوخ قالابالیق‌ایدی، اوگۆن قرارایدی ۷ نفر شهریمیزه گلسین، چال‌پاپاقلی قوجالار چوبوقلارینا زور گله‌رک،نییاران گؤزلو آنالار قوجاغیندا دینجه‌لن بالالارین شکیل‌لرینه باخیب آه چکیردیلر،
خالامین گؤزلری نییاران حالدا، بیلندقودایدی
بیر زیل اوغولتو آردیندان، همن کیشی باغیردی، محمد احمدی،،، بیرآن خالامین آز قالدی اۆره‌یی دایانسین، بیردن الینی چیینیمه قویاراق یوخ ننه، محمدیم احمدزاده‌دیر هئی، دئییب یئره اوتوردو.
بو آن‌دا بیر کیشی یانینداکی قوجالاری قوجاقلاییب دریندن باغیردی، محمدیم گلدی.... میللت یول آچدیلار
بیر آزدان محمد، تانیش‌لاری چیینینده سالام ـ صالاوات‌لا فلکه‌یه گتیریلدی، آتاسی‌نین آیاقلارینا دۆشوب، کیمیسی آغلاییب، کیمیسی سئوینجدن دیلی توتولموشدو، آنجاق بو سئوینج چوخ دا اوزون سۆرمه‌‌دی، محمد آناسی‌نی سوروشدوغوندا قوجا کیشی اوجادان هؤنکورتمه ووروب آغلادیغیندا،... بالا دؤزه بیلمه‌دی یوخلوغونا... آنان گئتدی دئدیگینده محمدین آغلاماغی، فلکه‌نی عاشورا گۆنو شبئح مئیدانلارینا بنزه‌تدی، بۆتون میللت اوجا سسله آغلاشماغا باشلادیلار....

آردی‌وار.....

داودعبدی
@davud_ebdi

داود عبدی (Taymaz)

17 Sep 2020 10:59

شهرییار کیم‌ایدی؟

چوخلاری بو سورغونون جاوابیندا؛
آدی محمدحسین بحجت تبریزی، سونرا یاشامی هابئله یارادیجیلیغی‌لا باغلی بیر نئچه سؤز دئییب، سونوندا مقبره‌الشعراء دا تورپاغا وئریلدیگی‌ایله سؤزلرینی بیتیره‌جکلر.

منجه شهرییار بونلارین هئچ بیریسی دییلدی،
شهرییار؛ دیلی تاپدالانیب، کیملیگی دانیلان بیر خالقین دۆشمان اوردوسوندا ائلچیسی‌ایدی،
او بیر خالقین اؤزونه دؤنوش پروسه‌سینده عوصیان سیمگه‌سی‌ایدی.
بعضا ایتی قلمی و آجی سؤزویله خالقینا اولان حقارتلره یازیلان جاواب‌لارایدی.
۱۳۲۵ جی ایلین، آذرین ۲۶ سیندا کین اودوندا اودلانمیش کیتابلارین کؤزوندن جۆجرن یئنی بیر فیدان‌ایدی، بؤیوک و داللی ـ بوداقلی بیر آغاجا دؤنن فیدان.
شهرییار، حئیدبابایدی
هر بئیتینی اوخودوقدا آتامین دوداغیندا اینجه گۆلوشلرین قوناقلانماسی، آنامین گؤزلری دولوق حالدا خان‌ننه سؤزویله کربلا آدینی ائشیتدیکلری آن.
گنج دایی‌مین؛ آداخلی قیز، بَی جورابین توخوردو ـ بئیتی‌نی اوخویوب شال ساللاماغا گئتمه‌سی‌ایدی
بایرام گۆنو اوشاقلارین جووقالار قوروب بادام اویناماسی
و ائللری گزیب ـ قادینلاریمیزی گؤزل ـ گؤزل ناقیشلی پارچالارلا بزه‌ین چرچی‌لرایدی.
شهرییارین سئویلمه‌گی و اثری‌نین قالارغی اولماغی دا ائله ساده‌ دیل‌ایله، قوندارما و توخومالی سؤزلردن اوزاق، تۆرک خالقی‌نین یاشادیغی آن‌لارلا ـ یاشام اورتاملارینی(فضانی) تصویره چکمک‌ایدی،
شهرییارین حئیدرباباسی، بیزی هر ایلدیریمین شاخماسیندا، هر قارین یاغماسیندا، هر تویا گئتدیگیمیزده اونو خاطیرلادیردان بیر جانلی کیتاب‌ایدی،
"اونون هر گوشه‌سی بیر جانلی کیتاب"
سهندییه‌ده یئتگین‌لیگی‌نین سونویدو و بولود‌‌لا باشلانان بیر سئوگی‌نین اوزون حیکایه‌سی.

بیله‌سینی گؤرمه‌دن حئیرانی اولان اوتایلی قارداشلاری‌نین سئوگیلیسی‌ایدی

قوی سؤیله‌ییم اۆره‌ییمین سؤزونو
بیر کره ده گؤرمه‌میشم اۆزونو
نییارانام یئتیر منه اؤزونو
محبّتین باغریمدادیر شهرییار
منیم اۆرک آغریمدادیر شهرییار.....
گل باکی‌یا باغیم ـ باغچام گۆلنده
بیرجه اوووج تورپاق گتیر گلنده
دوسلار قاتسین تورپاغیما اؤلنده
بلکه اوندا کاما چاتام شهرییار
سون منزیلده راحات یاتام شهرییار
سولئیمان رۆستم

سؤزون سونو و لاپ دوغروسو شهرییار قیلقامیش ایدی، و اونون ائنکیدوسو؛ حئیدرباباسی‌ایدی، زمانه‌سی‌نین خومبابالاری‌لا ساواشا گیردی و ساواشین سونوجو اثری‌نین اؤلومسوزلوگو ـ قالارغی‌لیغی و دیلی یاساقلانمیش بیر خالقا، سئوینج و قورتولوشلاری‌نین آچاری اولان اؤزلۆکلرینه قاییدیش، موشتلوغو.

داودعبدی
۱۳۹۹، ۶، ۲۷
@davud_ebdi

داود عبدی (Taymaz)

09 Sep 2020 13:15

بوکان شهری‌نین کۆرد نماینده‌سی‌نین یئنی افاضاتی

ائولرینی ایجاره‌یه وئرن اینسانلار، هر دؤنه مستاجرلری ائولرینی بوشالتدیقدا، آلدیقلاری ایجاره‌نین ان آزی اوندان بیرینی ائوین اونارماغی و تعمیرینه خرجله‌مه‌لی‌دیرلر، و ائو یییه‌لری آراسیندا بئله بیر سؤز وار؛ ائوینی ایکی گؤزونه ده تاپشیرسان گئنه ده خاراب قویاجاق، بو سؤز بیراز اینصافدان اوزاق اولموش اولسادا، چوخ واختلار یئرسیز ده دییل، اؤزه‌للیکله ده بیر سیرا مستاجرلر بئله دۆشونورلر؛ بیز، بیر ـ ایکی ایل بورداییق، دده‌مین مالی دییل، بیزدن سونرا آللاهیمداندیر بورا باتیب خاراب قالسین.
بو دۆشونجه ماشین‌ شوفئرلری [ اؤزه‌للیکله یۆک داشییان آراجلارین شوفئرلری‌نین بیر قیسمی‌نین آراسیندا دا وار ]. جامعه‌شناسی باخیمیندان اینسان هرنه‌یه مالکیت حیسسی اولماسا، اونا باغلی‌لیغی اولمایاجاق و اونو آردان آپارماغا جهد گؤسترمه‌سه ده قوروماغینا دا جان آتمایاجاقدیر. [ تفاوت‌سوزلوق دویغوسو ]
بو مساله تورپاق و یوردلارا دا شامیل اولور، باتی آذربایجانین تاریخین اوخودوغوموزدا، بو تورپاقلاردا بوگۆنلر یئرلشمیش اولان کۆردلری، بورانین ازلی و یئرلی اولمادیقلارینی گؤرمک اولور، بو سؤزه قانیت و بلگه(سند)، اونلارین دانیشدیقلاری دیلدن گئیدیکلری پالتارلارا کیمی [ هامیسی اونلارین ایستی اقلیمه آیید اولدوغونو وورغولاییر ] نظرده توتماق اولار.
اؤرنک اۆچون؛ ایستی اقلیملی یئرلرده یاشایان اینسانلار، چالیشارلار دانیشارکن سس‌لری بوغازلاریندان چیخاردیب و بدنین ایستی‌سین ائشیگه وئرسینلر«عربلر کیمی، ح ـ خ و.. سسلری‌نین تلفوظو لاپ آیدین قانیت‌دیر»، کۆردلر ده عربلر کیمی چوخ سسلری بوغازدان چیخاردیرلار و اوجور دانیشیرلار، آنجاق سویوق اقلیم‌ده یاشاماقلاری تناقضدیر، گئییم‌لری ده گئن پالتارلار و اینجه پارچالاردان اولوشاراق، سویوق اقلیمده یاشایانلارین گئییملرینه هئچ ده بنزه‌مه‌ییر،
هر حال بونلاردان قیراق، ان اؤنملی نه‌دن، بوگۆن یاشادیقلاری تورپاغا اۆرکدن باغلی‌ اولماماقلاری‌دیر.
بیر خالق، بیر تورپاغا باغلی‌لیغی اولورسا، او تورپاقلاری آتا ـ بابالیق یوردو بیلیرسه، یاشادیغی یوردو سئویب ـ منیمسه‌یه‌جک و اورانین داغی، داشی، چایی، بولاغی، گؤلو و هرنه‌یین اؤزونه آیید بیله‌جک، آنجاق کۆردلرین بو تورپاقلارین آرادان گئتمه‌سی ـ داغیلماسی، اؤزه‌للیکله ده اورمو گؤلونون قوروماسینا بی‌خییال اولماقلاری، حتی اورانین قوروماغیندان سئوینمه‌کلری بللی ائدیر بو تورپاقلار کیمین دده ـ بابا یوردودور و کیملر مستاجردیرلر.
هرحال سؤزو چوخ اوزالتمادان سایین انور حبیب‌زاده، بوکانین یئنی میللت وکیلی، مجلیسده تاتائو اۆزره یئنی باراژ(سد) ووردورماق و اورمو گؤلونون قورولدورماسینا پیلان تؤکمک یئرینه، بیله‌‌نیزی آدای سئچیب، مجلیسه گؤنده‌ردیگی خالقین زار حالینا بیر چاره قیلیب، قاچاقچی‌لیغین یئنی‌ آدی‌ایلا، جاوانلاریمیزی شهید ائدن کۆلبرلرینیزی ییغیشدیریب و باتی آذربایجاندا یئدیگینیز بیر تیکه چؤره‌یین باشیندان چالمایین.

داودعبدی
@davud_ebdi

داود عبدی (Taymaz)

10 Aug 2020 14:47

ساده‌‌ایدی و گؤزل بیر سالام کیمی

بهمن‌له تانیشلیغیمیز چوخ چوخدانلارا قاییدیر،اۆستوندن نئچه ایل کئچدیگینی خاطیرلایانماییرام، آنجاق اؤزو دئمیشکن بی اۆتوره‌جکسن باخ، تانیش اولوب دوست قالدیق.
بهمن‌ی هر گؤردۆیۆمده، زنگانلی ماشاللاه رزمی‌نین شئعر کیتابی‌نین آدی گؤزومون قاباغیندا دایاناردی؛ "ساده‌سن و گؤزل، بیر سلام کیمی"
بهمن ده ساده‌ و گؤزه‌للیگی اساسدا، هئچ کسین اۆره‌یینه توخانماییب، کیمسه‌دن ده اینجیمزدی،
آنجاق ساده‌لیکلرله دولو اولان یاشامی، نه قدر گؤزل اولسایدی دا، واختسیز اۆلومو هئچ ده گؤزل دییلدی، تانیشلاری‌نین اۆره‌کلرینی داغلادی.
داها هر دؤنه تبریزدن قوشاچایا گئتدیگیمده آراز آدلی تابلولاری گؤردویومده اۆره‌ییم سیخیلاجاق، داریخاجاق گۆلۆشلری اۆچون، ساده‌لیگی، سئویملی‌لیگی و... ائله لاپ اؤزو اۆچون.
بیر زامانلار اینسان اؤزۆنۆ آلداتماقلا خوش اولار، و من هله ده اؤزۆمۆ آلدادیرام، دئییرم بو خبر یالان اولا کاش.... بینابا گئتمه‌ییم گلمه‌دی بوگۆن، لاپ دوغروسو آیاغیم اولمادی گئدیب بهمن‌ین یاس تؤره‌نینه قاتیلام، بیلیرم چوخلاری منی دانلایاجاق ـ مین بیر جۆره سؤز قوشاجاقلار آرخامجا، آنجاق گئده بیلمه‌دیم ۳ دؤنه قارا کؤینه‌گیمی گئیینیب یئنی‌دن چیخارتدیم، آخی بهمن شاد رنگلری سئوه‌ردی، بهمن‌ه قارا گئیمک نه دئمک.
سؤزون دوغروسو یازا بیلمه‌ییرم ده هئچ، بیلمه‌ییرم ده نه یازیرام آنجاق اؤزۆمۆ بوشالدیرام کاش گئده بیلردیم تورپاغا تاپشیرما تؤره‌نینه، کاش... آنجاق گئده‌نمه‌دیم، اینانماییرام هله و هله ده اینانمایاجاغام
دینج یات بهمن قارداش

۱۳۹۹، ۵، ۲۰
بهمن‌ین تورپاغا تاپشیریلان ساعاتلار،

داودعبدی
@davud_ebdi

داود عبدی (Taymaz)

29 May 2020 14:40

آلازلانماق

ـ تۆرک خالقی ایچره، آل سؤزو؛ قوتسال‌لیق، اوجالیق، یۆکسلیش و یوخاری‌یا گئتمک آنلاملارینی داشیییر
آل سؤزو؛ فرقلی اک‌لر آلدیغیندا فرقلی آنلاملار وئریر
ـ آل+باس: یاخشی‌لیق و خئیرخواه‌لیق و باغیشلاییجی‌لیق سیمگه‌سی
ـ آل+بیس: پیسلیک و شر سیمگه‌سی.
ائله او اۆزدن آلتای داغلاری و یئنی‌سئی چایی‌نین قیراغیندا یاشایان تۆرک خالقلاری‌نین قام ـ شامان‌لاری آمین سؤزونون یئرینه "آلاس"سؤزونو دئییرلر.
آلاس سؤزو مورککب سؤز اولاراق
آل+آس سؤزلری‌نین بیرلشمه‌سیندن یارانیبدیر
آلاس(آلاز) سؤزو اوجالیغا ساری گئتمک[گۆنشه دوغرو یۆکسلیش] آنلامینی وئریر.
آلازلانماق سؤزو ایسه آلاولانماق[آلیشماق] و یانماق آنلامیندادیر
آذربایجان تۆرکلری ایچره، بو سؤز اود سؤزویله ایلگی‌ده
آل+آز+لانماق
آلاس/آلاز: آریدلیق، تمیزلیک و بؤیوکلوک آنلامینی وئریر.
سیبری‌ده یاشایان تۆرک خالقلاری آووا(اووا: شیکارا) چیخمادان اؤنجه، یاراقلاری و سیلاحلارینی اودا توتوب و بو ایشه آلاس، آل‌یاس دئییرلر.
اونلار آلاس دئمک‌له سیلاحلارینی پیس‌لیک‌لردن آریندیریب و گۆج باغیشلانماسینی طلب ائدرمیشلر.
اود و گۆنش، پیس‌لیک‌لری آریندیریرمیش و او اۆزدن اونلار آل، آلاس(آلاز)‌ـ‌ین اودلا اولان ایلگیسی‌نی قوتسال بیلیب و اود ـ‌ اوجاق تانریسی‌نی پرستش ائدیرمیشلر
[قام‌ـ‌شامان، میرعلی‌سیداوف، مترجم صمدچایلی،اختر نشری، ۱۳۸۱،صص: ۵۱ ـ ۵۰]

پروفسور عبدالقادیر اینان‌ین‌ آراشدیرمالارینا گؤره:
شامانیزم اینانجیندا، اود هرنه‌یی آریندیریب، پیس و کؤتو روحلاری اوزاقلاشدیرار.
تۆرک خاقانلاری‌نین گؤروشونه گلن باشقا خالقلارین ائلچی‌لرینی [ پیس و خبیث و کؤتو روحلاری اوزاقلاشدیرماق اۆچون ] اود ایچیندن کئچیردیب، خاقانا یانینا آپارارمیشلار،
موغول خاقانلاری‌نین سارای‌لاریندا دا بو ایش گؤرولوردو.
بوزقوردلار و قازاق‌لار بیر تیکه کؤهنه‌ پارچانی یاغا بولاشدیریب و اودا ووراراق؛ آلاس ـ آلاس دئییب نوخوشون[آلازین] باشینا دولاندیریرلار، بو ایشه آلاسلاما دئییرلر.
آلازلاما سؤزو، بو گۆنه کیمی آنادولو و آذربایجان‌ین بیر سیرا یئرلرینده اؤز وارلیغینی قورویوب و اود واسیطه‌سی‌ایله تمیزلمک و آریدماق آنلامی وئریر.
یاکوت تۆرکلری‌نین قام‌لاری کؤتو روح‌لاری اودلا قووارکن؛ آلاس ‌ـ‌ آلاس دئییب، باغیرارلار.
یاقوت[یاکوت] تۆرکجه‌سینده کؤتو و پیس روحلارین کؤهنه پارچانی اودلاییب قووماق تؤره‌نینه آلی‌آستیا[ آلازلاما] دئییلر. [شمنیزم عبدالقادیر اینان،چئویرمن محبوبه هریسچیان،دنیزچین نشرییاتی،تبریز، ۱۳۹۵،
صص: ۸۸ ـ ۸۹].
بونلاردان قیراق؛
ـ‌آلاز: تۆرکییه‌ده یالاز
شؤعله، آلوو،
آلازلانماق: شعله‌ور شدن
سو سپردی آلازلانیب یاناندا من [نادیر پاشا\سازیم گئتدی شئعری]
یالاز ـــ یالماق
[دیل دنیز، اسماعیل هادی، اختر نشرییاتی، ص: ۷۸]
آلاز: آشفته، وخیم
آلیز: بد، ناخوشایند، وخیم، نفسی
بدطمع(هر یئمه‌گه هوس ائدیب، یئریکله‌ین آدام)
نوخوشون حالی آلیزدیر: وخیم‌دیر
آلازلاشماق: به وخامت گراییدن
آلاز ـ آلاز: آشفته، درهم [تاراما سؤزلویو]
آلازلانماق: آشفته‌حال شدن،
کزاز [تاراما]
آذربایجان تۆرکجه‌سینده؛
آلاز ـــ» آلیز اولاراق، آلیزلاماق یارانیب.
ـ آلازلاماق: سرخ‌کردن(زغال)، مشتعل‌‌کردن، ملتهب‌کردن
[بهزادی سؤزلوگو، نشر فرهنگ‌معاصر، ۱۳۸۲ص: ۱۱۵]
ـ آلاقشماق: آشوب، بلوا، درهم‌آمیختن، اینقیلاب(دئوریم)
آلاقماق: بیر بیرینه دَیمَک
[فرهنگ جغتایی‌ـ‌فارسی،شیخ‌ سلیمان افندی اۆزبکی،
ترجمه: حسن اوموداوغلو، ص: ۳۷]
ـ آلیس:اوزاق
آلیک: ایکی رنگلی
آلاو: شؤعله
[سنگلاخ، میرزامهدی‌خان استرآبادی،تصحیح حسین دۆزگون، اختر نشرییاتی،صص: ۱۲۳ـ۱۲۴]
ـ‌آلار:شفق، سرخ، طلایی،صبح‌کاذب، زردی
آلارماق: سرخ‌شدن
آلاز: شعله، نام خدای آتش درمیان شمنها
آلاز ـ آلاز: آشفته
آلاز داغ: شعله‌ی کوهستان
آلازلاما: گرمایش، سرخی
آلازلاماق: سرخ‌کردن نان، به‌شعله‌درآوردن زغال، مشتعل‌کردن
آلازلانماق:شعله‌کشیدن،
نیمه‌سوختن
آلاس: نام خدای آتش در میان شمنها
[پرویز زارع شاهمرسی، نشراختر،ص: ۱۱۷]
ـ‌آلاز: آلاو، اود یاللاری، قیزآدی،
آلاس، آلاش [یال، یالاو، یالاز، آلاز]
ـ آلازـ‌آلاز: آلاجاـ‌بولاجا، آلاوـ‌آلاو
ـ آلازلاما: ایلانجیق خسته‌لیگی
ـ آلازلاماق: آلاولاماق،
بیر ـ ‌بیرینی توتماق و وورماق: مشتعل‌کردن
ـ‌ آلاس: شامانیست گله‌نگینده: اود تانریسی
ـ آلاش: آچیق قیرمیزی
[ارک سؤزلوگو، اسماعیل جعفرزاده، احرار نشرییاتی، ۱ـ جی جیلد، صص: ۱۳۸، ۱۳۹]
ـ بو آنلاملاردان قیراق قوشاچای‌دا آلازلانماق ایکی قاورامدا ایشلنمکده‌دیر؛
۱ـ اود لا آزاجیق یانماغا آلازلانماق دئییلر
اؤرنک اۆچون قوللاری اود اۆستونه توتاندا بیلک‌لرین تۆکلری آلازلانار و آزاجیق یانار.
۲ـ پیس دورومدا دؤیولمک
ـ سنی کیم آلازلاییب، دؤیوب.

ـ بیرینجی آنلاما باخدیغیمیزدا، آلازلاماق سؤزو، اؤز وارلیغینی قورویوب و اودلا باغلی اولان، اوسطوره‌وی دۆشونجه‌لر‌له ایلگی‌ده‌دیر.

داودعبدی
@davud_ebdi

داود عبدی (Taymaz)

25 Apr 2020 00:37

بو داغ‌لار اولو داغ‌لار
چئشمه‌لی، سولو داغ‌لار
بوردا بیر ایگید اؤلوب
گؤی کیشنر، بولود آغلار

نئچه آی اؤنجه،شهید حامیدمحمودی آدلی ایگیدیمیز، پژاک تئرورچولاری‌نین الی‌ایله شهید اولان چاغ بیر یازی یازیب پایلاشدیم
او یازی‌نین بیر نئچه سطرینی بوگۆن باشقا بیر ایگیدیمیزین "امیر سلیمانی"‌نین شهید اولدوغو گۆن یئنی‌دن پایلاشیرام؛
ـ‌بوگون آذربایجان‌یمیز، نئچه جیبهه ده ساواش حالیندادیر؛
باتی بؤلگه‌لرده کورد تئرورویلا - عمومییتله فارس شؤونیزمی‌له و ان گۆجلو دوشمانی; اؤز بالالاری‌نین قانینا قنیم اولان میللتی‌ایله،
بوگۆن ایگیدلریمیزین قاتیلی پژاک قورشونلاری یوخ،کومونیست و فاشیست سیمگه‌سی‌ اولان چین اؤلکه‌سی‌نین بانا و کۆردوستان شهرینده ساتیلان کئیفییت‌سیز LCDـLED تئلویزیونلار‌لا،‌گازی کولئرلردیرلر.
آنجاق میللتیمیز بیر شئیی اونوتمامالی‌دیرلار؛
بوگۆن کۆردلردن، یۆزمین تۆمن اوجوزا آلینان هر بیر نسنه(شئی)، یوز قورشونون پولودور و هر قورشون،هله ۲۰ یاشلارینا چاتمامیش حامید،امیر و مینلرجه حامیدلرله، امیرلریمیزین قاتیلی.

- هله بو آرادا، وطنم پاره‌ی تنم دئییب قاچاقچی کۆردون بیر قاتیری‌نین اؤلمه‌سی اۆستونده اؤزلرینی ییرتانلار: سسینیز دۆنیانی بۆرومک یئرینه،هاردا باتیبدیر؟
ناموسونوزو قورویان بیر ایگید شهید اولوب - اؤزو ده تۆرک ایگیدی، بونون خبرینی یایماغینیز جئبینیزده قالسین ان آزی بیر باش ساغلیغی وئرردینیز اینسانلیق آدینا....
اینسانلیقدان اگر آنلاسایدینیز دا،

بو یازی تیکراری اولسا دا؛ میللتیمیز ایشینه داوام ائتدیکجه، یوردوموزون هر بیر اوووج تورپاغی‌ بیر ایگیدیمیزین قیزیل قانی‌نین باهاسینا باخاجاق و.... بیز ده تکجه آذربایجان باشین ساغ‌اولسون دئییب، تیکراری سؤزلری یایاجاغیق.

داودعبدی
@davud_ebdi

داود عبدی (Taymaz)

31 Mar 2020 23:45

بو یازی، اسکی اینانج‌لارا داییر پروتوتۆرکلرین اوسطوره‌وی دۆشونجه‌لرینی دۆنیانین یارانیشی و گئدیشی اساسدا ‌اولان باخیشلارینی عکس ائتدیریر.

چاغ اولمایان چاغ
(in illo tempore)
کئچمیش اینسانین اینانج و بیلدیکلری اساسدا ۱۲۰۰۰ ایل بیر بۆتون یارانیش دؤورو ساییلیردی هر دؤوردن سونرا یئرین داغیلماسینا اینانیردیلار ائله او اۆزدن هر بیر آیی مین ایلین سیمگه‌سی اولاراق نظرده توتوب و ۱۲ آی(مین ایللیک سمبولو) بیتدییینده بیر ایل باشا چاتیردی(بیر دؤور بۆتون‌لشیردی)
ائله بو بؤلمه‌لردن قاتلار(گاه‌لار) بؤلومو آرایا گلیب یعنی هر ۱۲۰۰۰ ایل ۴ قاتا بؤلونوب و هر قات ۳۰۰۰ ایل ساییلیبدیر.

فصیل‌لرین یارانیش فلسفه‌سی؛

بیرینجی قات؛
یارانیش مینوی- دۆشونجه‌سیز- ترپنیش‌سیز
(ساکین)- موجررد- ال‌له ‌لمس اولونمویان.

ایکینجی قات؛
ماددی یارانیش باشلانیر
ایشیقلار دۆنیاسی سونسوز اولاراق یارانیر
بیرگه اینک(بوغا) یارانیشین آناسی، ۶ اساس کؤک {گۆنش- آی-اولدوز-گؤی-سو(دنیز)ـ‌ یئر} یارادیلیر
اصلی کرم و اوغوزنامه ده بئله گلیبدیر؛ بیرگه اینک و ایلک آدام(باسات) چاغداش اولاراق قیزیل آلمادان یارانیبلار
بو قیزیل آلما سونرالار[هیسپیریدین قیزیل آلمالارینین کؤکو اولا بیلر]
هر گۆنده بیر کؤک یارانیر و یئددینجی گونده هئچ بیر یارانیش یوخدور( یئددیلیک= هفته)
بوگۆن اینگیلیز و باشقا دیللرده هفته گونلرینین آدلارینا باخاندا مات قالیریق
اوغوزون ۶ اوغلو ؛
گون خان(sun day)
آی خان(mon day)
اولدوزخان ( satur day)
داغ خان=و...
{بایاتی اوسطوره باخیمیندان، میرعلی سیدسلامت}

قارانلیق لار اؤلکه سی سونسوز اولاراق (ساواشجیل دئولر)
سونرا اوت و بیتگی و حئیوانلارین یارانیشی

دئمک بیرینجی و ایکینجی قاتلار یارانیش قاتلاری ساییلیر

اوچونجو قات؛
ساواش و دیره‌نیش قاتی
قارانلیقلار اگه‌مه‌نی(حاکیمی) باسقی یاپیر بیرگه اینک‌له بیرینجی آدامی اؤلدورور.
قوتسال آغاج و یئنی اوسطوره وی آلپ لار یارانیر
اؤلرگی تانری‌لار بحثلری آرایا گلیر

دؤردونجو قات؛
ساواشلار اوز وئریر
باشلانیشدا قارا ملیک( قارا خان) قارانلیقلار حاکیمی اولاراق، باسقی یاپیر و دوه، آو(آهو)،اینک و گۆنش(گون‌خان) توتوقلانیرلار
آت تانریچاسینین یۆروشو اساسدا قارانلیق‌لار حاکیمی‌ایله ساواشیب دوه و آهو تانریچیلارینی قورتارارکن باشقا توتساقلار ۱۶ ایل دوستاقدا قالیرلار.
۱۶ ایلدن سونرا اینک تانریچاسی قاچارکن اؤز اسکی آداخلی‌سی‌لا یئنیدن آداخلانیب و گۆنش تانریچاسینی قورتارماغا حاضیرلانیرلار.
سونوجدا ایشیق لار اؤلکه‌سی قارانلیقلار اؤلکه‌سینه قالیب گلیر
و بوگۆن یازا چیخماق گۆل ـ چیچه‌یین آچیلماسی قیش (قارانلیقدان) چیخماق دئمکدیر.

ایندی بیراز اوسطوره‌دن آیریلیب بو گۆنکو فارسجا ۱۳ بدر؟؟؟ دئییلن دبی آراشدیریریق

دئدیک ایلکین بشرین اینانجی اساسدا یئر کۆره‌سی ۱۲۰۰۰ ایلدن سونرا داغیلاجاق آمما بونون مبدأسی و یئرین نئچه یاشلی اولدغونو بیلمه‌دیکلرینه گؤره،
بایرامین[‌ایل بایرامی‌نین] صاباحیسی گۆندن هر بیر گۆنو ۱۰۰۰ ایلین سمبولو اولاراق نظرده توتوب، ۱۲ گۆن گؤروشلردن سونرا(بو گؤروشلرین نه‌دنی؛ بیرـ‌بیرلرینین ساغ ـ ساغلام قالماقلارینی بیلمک‌ایمیش)
اون‌اۆچونجو گون یئرین داغیلماسیندان قورخاراق ماغارا و کؤهوللر و عمومیتله تاوانلی
(مسقف) یئرلردن چؤل باییرا چیخیب اؤزلری ایله گؤیه‌ردیکلری گؤیلری ائشییه آپاراردیلار(اگر یئر داغیلیب بۆتون بیتگی‌لر آرادان گئتسه یئنیدن گؤیه‌ردیب بئجه‌رمه‌یه شیتیل و بیتگیلری اولسون) سونرا بۆتون تار تانیش‌لا بیر یئره ییغیلدیقلاری اۆچون هله او زامانا دک بیر اولای اوز وئرمه‌دییینه گؤره شنلیک ائدیب و بایرام سوفراسیندان نه قالمیشدیرسا او گۆن اؤزلریله چؤله آپاریب یئیه‌ردیلر.
ایگیدلر ایسه یئرین آچیلماسی و یاریلماسی‌نین قاباغین آلماق اۆچون اوتوردوقلاری آلانین چئوره‌سینده گؤیه‌رن اوت ـ بیتگیلری،یئرین جیریلیب آچیلماسینین قاباغین آلماق اوچون بیرـ‌بیرینه باغلاییب دۆیونله‌یردیلر.
حال بو گون میللتیمیز بیلمه‌دن دئییرلر ۱۳ نحس گوندو ائوده قالمایین
چؤل ـ باییرا قوهوملارلا بیرلیکده چیخیب، شنلیک ائدیرلر و سونرا سوبای قیزلار بقول فارسلار سبزه گره میزنند تا بختلری آچیلسین؟!!!!! و سونوندا بایرام گؤی‌لرین چؤله آتیب قاییدیرلار آنجاق بونو بیلمه‌ییرلر اونلار آتا ـ‌بابالاریمیزدان قالان گؤزل دبلری آزاجیق فرقلنمیش اولسا دا، یئرینه یئتیریرلر.
و بو دبی ده باشقا گؤزل دبلریمیز کیمی بوتون قونشو خالقلارا دا پای وئرمیشیک

داودعبدی
@davud_ebdi

داود عبدی (Taymaz)

22 Mar 2020 11:10

شئعرله یاشایان میللت

21- مارت آشیق وئیسل‌ین دۆنیاسینی دییشدیگی گۆندور، اونون دۆنیایا گؤز یومماسی دونیاسال شئعر گؤنویله گۆندش(گۆن‌داش) اولماسی چوخ ایلگینج و ماراقلی دیر،

"اوزون اینجه بیر یولداییم
گئدییوروم گۆندوز گئجه..."
آذربایجانین دیلی یاساق شاعیرلری‌نین حالی دئمک دیر.
دونیادا شاعیرلر‌ شئعر دئییب اؤدول آلیرلار
بیزیم شاعیرلری ایسه ائوین‌ه سالیرلار

آنجاق اونلار بیلمه‌ییر: شئعر و موسیقی بو خالقین یاشاملاری‌نین آیریلماز بیر پارچاسی‌ و حیسسه‌سی‌دیر.
۷۰۰۰ ایللیک سومئر اوزانلاریندان توت گلسین، دده قورقوددان چاغداش شاعیرلریمیزه
شئعر دیلی و سؤزلری او چاغ باشا دۆشولمه‌ین ساحیردن
اوخ‌لارا تای اوختای‌لاریمیزا
۱۳۲۵ -جی ایلین آذرینده شئعرلریله بیرگه اودلانان شاعیرلریمیزه (مدینه لریمیز ،
بی‌ریالاریمیز و بالاش آذراوغلولارلا مینلرجه آدی ایتگین قهرمانلاریمیزا تای آدی یاساق شاعیرلریمیزه).

بوگۆنو [شئعر گۆنونو] دۆنیادا
ان چوخ بیزیم خالقا قوتلاماق گرک.
سیبری نین سویوق اوتاقلاریندا شئعریمیزی-دیلیمیزی یاشادان زهتابی‌لری اولان میللته
درددن طنزه سیغینان صابیرلی میللته
و ... و.... و..
کیان لارا - دیبسیز اوکیانلارا
آتیلایا - سحره - و اونودولمایان شهریارا،
باریش سیمگه‌سی اولان باریشمازا،
آنجاق ان چووووخ سئودیگیم سهنده...

یازماغا گلمه‌ییر
ساناماغا گلمه‌ییر
ساده دیل‌له دئسه‌م
نیسگیللی لای‌لالار شاعیرلری ساییلان بۆتون آنالاریمیزا
و دیللری آلتیندا زمانه قهریندن "فلک گل ثابیت ائیله هانسی گۆنوم خوش کئچدی"‌لری میزیلدایان آتالاریمیزا
و اوزون سؤزون قیساسی
دیلیمیزی یاساق سؤزجوکلرله یاشادان خالقیمیزا
شئعرله دوغولوب - شئعرله بؤیویوب- شئعرله دۆنیاسینی دییشن میللته

یوردوموزون قهرمان شاعیرلری گۆنونوز قوتلو

داود عبدی
@davud_ebdi
۱۳۹۹/۱/۲

داود عبدی (Taymaz)

19 Dec 2020 16:31

چیلله، بؤیوک ساواش خبرچیسی

قیش دؤنمی، سویوق ایقلیم‌لی یئرلرده چتینلیکلرین باشلانیشی دئمکدیر
آذربایجاندا اسکی چاغلار، آغیر قارلار یاغماق اساسدا،داغ-دره، چول-باییر اَینینه آغ دون گئیینه‌رک،هاوانین سویوماسی‌لا، قورخولو اورتام یاراناردی.

اوسطوره‌وی و میفیک باخیمیندان قیش‌ین باشلانیشی گۆنشین اسارتی‌دیر.
ـ چیلله، قیشین باشلانیشی
چاووشو[چوووشو] و خبرچیسی‌دیر.
سویوق هاوا، قار ـ کۆلک و چتینلیکلرین گلمه‌سینیدن خبر وئریر.
ـ تۆرکلر‌ هر ساواشدان (دوغایلا ساواش یا باشقا ساواشلار) اؤنجه و سونرا سیفرالار سالیب، توی[‌قوناقلیق] -شنلیک ائده‌رمیشلر.
قیش ین گلمه‌یی‌ایله آتاـ‌بابامیز دوغایلا جیرناق-جیرناق اولاراق، اؤلوم‌ـ‌‌دیریم ساواشی سۆردورمه‌یه باشلاییردیلار.
او اۆزدن چیلله گئجه‌سی گنج‌لر و بۆتونلوکجه ائل ‌ـ قوهوم، ائلین و طایفانین بؤیوگونون ائوینه، چادیرینا، ماغاراسینا ییغیشاراق اونلار اؤز بیلدیکلری و اسکی تجروبه‌لرینی پایلاشاراق، نئجه قازانماغین( قیشی سووماغین) یوللارینی اؤیره‌درمیشلر.
بویالار(رنگ‌لر) باخیمیندان؛
قیرمیز و آل بویاسی قازانج و اوغور سیمگه‌سی و بویالاری‌دیرلار
او اۆزدن بو گئجه‌ده اولدوقجا قیرمیز بویالی مئیوه‌لر و یئمیشلر ایگده(اییده)، سامان ایچینده ساخلانیلمیش قیرمیز آلمالار،
اود و قیرمیزی‌لیق سیمگه‌سی اولان قاوورغا(قووورقا)
سونرالار ایسه نار و قارپیز دا چیلله‌نین کۆرسو اۆستو سیرفاسی‌ندا یئرلشدیلر.
( آل و قیرمیز شال و مندیل و دستمال و اؤرتوکلر بو گۆنه کیمی، گلین‌لره پای یوللانان خونلاردا وارلیغینی قورویوب)
بایاتی‌لار بؤلگه‌میزده بو گۆنکو فال‌لارین یئرینه اوخوناردی و بایاتی‌لارلا بیرگه، آغ ساققال‌لار اسکی ایگیدلیک و حیماسی ناغیل‌لارلا گنج‌لره مورال(روحییه) وئریب قیشی باشا چاتدیرماغا یول یؤندم گؤستررمیشلر.
اوسطوره‌وی باخیمدان بو ساواشی دا دده‌قورقود و باشقا کیتابلاردا دا گؤرمک اولور.

اوچونجو قاتدا( فصلده):
(پاییزدا-گۆز ده)
ساواش و دیره نیش باشلانیر
قارانلیقلار اگه منی(حاکیمی)،
قارا ملیک(دده قورقوددا) باسقین یاپیر، بیرینجی آدامی و قوتسال اینه‌گی اؤلدورور
بونلارین اؤلمه‌ییندن، اوشاقلاری و باشقا یارادیلیشلار اورتایا چیخیر، اوددان تؤره‌نن قوش(قوققنوس)
اؤلرگی تانرینین اؤلومو، و قورتولوشو.
قوتسال آغاج و یئنی اوسطوره وی آلپلارین‌ و قهرمانلارین یارانیشی

دؤردونجو قات:
(قیش فصلی) ساواش واردیر
دده قورقورد کیتابیندا;
قارا خان باسقین ائدیب:
دَوه،گۆن خان، آو (آهو)، اینک ، تانریچالارین توتوقلاییر
آت تانریچاسی (قازان خان) نین یۆروشو اساسدا، قارانلیقلا ساواشیب، دَوه و آهو تانریچالاری قورتولور
باشقا توتوقلانانلار 16 ایل دوستاق قالیرلار
اینک تانریچاسی (اوروز) دوستاقخانادان قاچیب اؤز آداخلیسی‌لا ائولنیر.
گۆنش تانریچاسین قورتارماغا حاضیرلانیر،و ساواشلار باشلانیر
سوندا، ایشیق لیق دونیاسی، قارانلیقلاری یئنیر و ایشیقلیق دونیانی بورویور
قیش باشا چاتیر و بایرام اولور.
گۆنشین اسارتدن قورتولوشو، یئرین ایسینمه‌گی و قارلارین اریمه‌سی و قیشین سونو دئمکدیر.

چیلله‌نین سون گئجه‌سی {بؤیوک و خیردا چیلله‌ قورتولاندان سونرا} ـ تونقال‌لار قالانیب، اود یاندیریب، قیشین خبرچیسی اولان چیلله‌نی قووارلار‌[چیلله قوودو] و بو ساواشی باشا یئتیرمه‌گی قوتسال اولان اود و گۆنش سیمگه‌سی اولان ایشیق‌لیق قایناقلاری‌لا قوتلایارلار.
[بو قونودا آرتیق بیلگی‌لر اۆچون؛ مقدمه‌ای بر بررسی کیتاب دده‌قورقود، میرعلی سیدسلامت‌]

بو گۆنلر سانالدا سایین منظوری‌نین آراشدیرمالاری سونوجوندا چیلله‌نین آنلامی { اوخ یایی‌نین نهایت چکیلمه‌گی و... آچیقلانیر} آنجاق بؤیوکلر ائوینه توپلانماغین نه‌دن‌لری دئییلمه‌ییر
ـ بو یازی‌دان آماج بو نه‌دنی آچیقلاماق‌ایدی، البتته اولا بیلر باشقا یولبیرلر فرقلی آچی‌دان باخیب یئنی بیلگی‌لر وئرسینلر.

داودعبدی
۱۳۹۷،۹، ۲۹
@davud_ebdi

داود عبدی (Taymaz)

10 Dec 2020 17:54

تیکرارلانان تاریخ‌......

۷۵ ایل بوندان قاباق، ائله همن بوگۆنلر، آذربایجان تورپاقلاری آزادلیغین دادینی دادیب، میللت بؤیوک میللی بایراما حاضیرلانیردی.
کئچمیش گۆنلر شرق‌دۆنیاسی‌نین جننتی ساییلان یورد، پهلوی‌لرین ایرقچی‌لیق سییاستلری سونوجوندا خارابالیغا چئوریلمیش محو اولماقدایکن آذر‌ـ‌ین سویوق گۆنلرینده اؤز ایتیریلمیش ووقارینی یئنی‌دن قازاناراق، ایگید ائولادلارینا آرخالانیب پارلاق گۆنلرین گلمه‌یی‌ندن خبر وئردی،
ائله میللی حوکومتین بیر ایللیک حاکمیتی‌نین اولوملو اثرلری‌نین ائتکیسی بو گۆنوموزه دک داوام ائتمکده‌دیر.
بو گۆن باکی‌‌دا ظفر پاراردیندا[رئژه‌سینده] عسگرلرین هر آیاق دؤیوب، یئرلرین تیتره‌ییشینده، گؤیلرین کۆکرییشینده، ائرمنی وانداللاری‌نین وحشی‌لیکلری سونوجوندا خارابالیغا چئوریلن قاراباغین یئنی‌دن آبادلاشما وعده‌سی‌نین موشتولوق سسی گلیردی،
"ظفر بایراملاریمیز دا بیر زامانا دۆشور"
بلکه گۆنئی‌ین ۱۳۲۴ ده باشلانان میللی آزادلیغی قدار پهلوی‌لرین کین اودوندا قوربان گئتدی، آنجاق اولو اؤندر محمدامین رسولزاده دئمیشکن، بیر کره قالخان بایراق بیر داها یئره یئنمز.
منجه پریزدئنت اردوغانین رئژه‌ده موحتشم چیخیشیندا؛" من سندن آیریلمازدیم زورایلا آیریدیلار"، سؤزونون اۆستوندن راحات دا کئچمه‌مه‌لی‌ییک.
قوزئیلی قارداشلاریمیزین بیر زامان روس اوردوسونا گۆجلری چاتماغیندان آسیلی، تورپاقلاریمیزی ایللر بویو ایشقالدان سونرا نهایت اؤزگورلویه بوراخدیقلاری کیمی، بیزلرین ده او گۆنلر پهلوی قدارلارینا گۆجوموز یئتمه‌سه ده آتابابا دئمیشکن؛
بیر آرخدان بیر یول سو گلسه، بیر داها سویون گلمه‌یینه اومود وار.

داودعبدی
۱۳۹۹، ۹، ۲۰

@davud_ebdi

داود عبدی (Taymaz)

03 Dec 2020 22:40

۲۷۸۳ بیلیرسن می نه‌دیر؟

۲۷۸۳ گؤزو یاشلی آنا‌نین، لای ـ لای یورغون بالام لای اوخشاماسی‌
۲۷۸۳ سئوگیلی‌نین، سئوگیلی‌لر گۆنو گؤزله‌نیلن تبریک مئساژی
۲۷۸۳ جاوابسیز مکتوب
۲۷۸۳ آتانین قارانلیق گئجه‌لرده گیزلی‌جه هؤنکورتمه‌سی
۲۷۸۳ قاریش وطن تورپاغی
۲۷۸۳ گۆلون سولماسی، اۆر‌ک‌لرین دولماسی....
ساواش بودور سئوگیلیم،
سانالدا گؤردویوموزدن داها چتین ـ داها قورخونج و.... داها اۆزونتولو
ساواشین بیر اۆزو سئوینج‌دیرسه، باشقا اۆزو کدردیر
حسرتدیر، آغری‌دیر، درددیر
ساواش؛ وطنین هر قاریشیندا ۱۸ یاشلی بیر قیزین تورپاغا گؤمولن اومودودور
قیزیل قانلارلا
دالغانان آل بایراقلاردیر
۲۷۸۳ آددیر: ایگید، موباریز، تبریز، پولاد، آسلان
کؤکس‌لرین گۆللـه‌لره ائتدیلر قالخان
۲۷۸۳ بیلیرسن می نه دئمک....
هر سئوگیلی‌لر گۆنو شهیدلر خییاوانیندا وطنی سئوگیلی سئچن‌لره سئوگیلیم گۆنون قوتلو دئمک....


۲۷۸۳ تکجه بیر عدد دییل
بورجدور
وطن بوینوندا، قانلاری باهاسینا اؤزگورلوک سئوینجینی بیزلره دادیزدیرانلارین بورجو....

داودعبدی
@davud_ebdi

داود عبدی (Taymaz)

11 Nov 2020 12:36

قارا.... باغ.... بی... زیم...اولدو‌ مو؟

شوشانین اؤزگۆرلویو یاخینلاشدیقجا، هیجاندان‌ نفسیم کسیلمک اۆزره‌ایدی.
شوشانین قایتاریلماسیندان آرخایین اولدوغوموز حالدا، او هیجان اؤز الیمده دییلدی،
شوشا اؤزگۆرلویونه قوووشدوغوندا آغلار گؤزلرله دئدیم کسین قاراباغین اؤزگۆرلوک خبرینی آلدیغیمدا، قلبیم دایاناجاق.
آنجاق او آنلاشما.... هرنه‌یی پوزدو، [بو سطیرلر منیم اؤزل باخیشیمدیر، اومودوم یانلیش دۆشوندویومه‌دیر]
هر حال، ایبهاملارلا ـ کور دۆیونلرله دولو بیر آنلاشما.
و مینلرجه جاوابی بللی اولمایان سورغو....
گؤره‌سن؛
قازانان آذربایجان اولدو مو؟ ائرمنیستان؟ یوخسا روسییه؟
تۆرکییه چیخارلاری هاردا یئر آلدی؟
ائرمنی‌لر غصب ائتدیکلری تورپاقلاردا تؤره‌تدیکلری جنایتلره گؤره سوچلانمادان گئری چکیلیب [آتا بابالیق‌جا ایستکلری اولان قاراباغا راحاتجاسینا گئت ـ گل‌لری روس عسگرلری طرفیندن ساوونولدوقلاری‌ایلا بیرگه]، ایستکلرینه چاتدیرلار می؟
۳۰ نئچه ایلدن سونرا راحاتجاسینا تورپاقلاریمیزدا روس بایراغی‌نین دالغالانماسی نئجه؟
کریدورلار ـ دهلیزلری قوروماق آماجی‌لا ائرمنی تویوغونو کیشه‌له‌مه‌یه گۆجو یئتمه‌ین یازیق یئرلی‌لرین تکلیفی نه اولاجاق؟
خوجالی سوی‌قیریمی اونودولاجاق؟
چال ـ اوینا گۆلوم.....
قاراباغ آذربایجاندیر دئینلر، قاراباغ تکجه شوشادیر می؟
خانکندی؟ خوجاوند؟ خوجالی؟ عسگران و... تکلیفلری نئجه اولاجاق؟
خالقیمیزین سئوینجینه زهر قاتماق ایسته‌مه‌ییرم آنجاق، من اۆره‌کدن سئوینه بیلمه‌ییرم.
بختییار واهابزاده ایللر اؤنجه، تۆرکییه جومهوریتینه بئله بیر سؤزله سسلنمیشدی:
تۆرکییه آوروپا بیرلیگی قویروغوندا سۆرونمکدنسه، تۆرک بیرلیگی‌نین اؤنونده حرکت ائتمه‌لی‌دیر،
ائله ایلهام‌ین دا باخیشینی کیریملین سارایی‌نین قاپیسیندان، ساواش مئیدانلاریندان گلن خبرلره چئویرسه‌یدی، بوگۆن خانکندی‌نین اؤزگورلوک شیرنی‌سینی پایلاییردیق،
روس دؤولتینه، نه ائرمنی ـ نه آذربایجان، نه ده قاراباغ کیمین حاکمیتی آلتیندا اولماغی اؤنم داشیییر، اونلارا تکجه قافقازدا نفوذلارینی چوخالتماق و باتی‌یا اؤز چئویرمیش ـ پولسوز ائرمنیستان یئرینه، گلیری یاخشی اولان آذربایجاندا یئنی‌دن پایگاهلار قورماغی پیلانلاییردیلار و اؤز ایستکلرینه ده چاتدیلار....
چوخلاری روس گۆجلودور ـ گۆجلودور دئییب بو آنلاشمانی توجیح ائتدیکلری حالدا، نه‌قدر ده گۆجلو اولسایدی، بو گۆنکو دوروملاردان آسیلی خانکندی و... آلینسایدی دا هئچ بیر ایش گؤره بیلمزدی، دئییب درین دۆشونورم.
اونوتمایاق بو گۆن روسلار گۆرجوستاندا آبخازیا و اۆستیایا گیریبلر و اونلاری هئچ بیر گۆج ائشیگه اؤتوره بیلمه‌ییر و قورخوم همن اویونون صۆلح عسگرلری آدی‌لا باشیمیزا آچیلماسینداندیر.
ایچیمده نییارانچیلیق و یۆزلرله جاوابسیز قالان سورغو‌لارلا، یئنی‌جه آذربایجانلا ـ روسییه آراسیندا ایمضالانان آنلاشما فیکریمی قاتیب، کور دۆیونلر نئجه آچیلاجاق و ساواشلا قازانجین تام ایچینده اولدوغوموز حالدا..... گئری چکیلمه‌یین آنلامی نه؟
ـ کسین بو جاوابلار، منیم و بوگۆن خییالی نخجیوان دهلیزیندن سئویننلرین ساوادیندان و بیلدیکلریندن داها گیزلی بیر قضییه‌نین اولدوغون بیلیب، هرنه‌یی زامانین آخیمینا تاپشیریب ـ دۆشوندوکلریمین یانلیش اولماغینی اومود ائدیرم.

داودعبدی
@davud_ebdi

داود عبدی (Taymaz)

23 Oct 2020 11:35

وطن سؤزونونو آنلامایانلار

پیسیخولوژی اوزمانلاری، شیت اوشاقلارین ائییتیمی اۆچون؛ اونلاری سایمامازلیق‌ و ایشلرینی گؤرمه‌مزلیکدن گلمه‌یی اؤنه‌ریرلر.
اونلارین باخیشینا گؤره بیر اوشاغین داورانیشلاری اونون ایچ دویغولاری‌نین دیش گؤرونتوسودور و چوخ حاللاردا اوشاقلار آتا ـ آنالاری و باشقالاری‌نین باخیشلاری‌ایلا دیققتلرینی اؤزلرینه چکمک اۆچون، بیر سیرا منطیق‌سیز هابئله
آ ـ نورمال ایشلره ال ووروب، اؤز دیلیمیزجه شیت‌لنیرلر، بالاجا اوشاقلارین بو ایشلرینی ترک‌ائتمه‌سی اۆچون؛ تپکی گؤسترمک تام عکس سونوج وئره بیلر.
بو باشلیقلا؛ یوردوموزون گرگین حاللار داشیدیغی گۆنلر ـ قاراباغین اؤزگورلوک ساواشی‌نین تام قیزغین حاللاریندا ـ حدادعادل جنابلاری‌نین یئنی افاضاتی!!!؟؟ خالقیمیز اۆچون نه‌قدر دیرسیز اولدوغو بللی اولدو.
آذربایجان خالقی و عمومیتله اؤلکه‌‌ده یاشایان تۆرکلر، میللی شعورلاری یئتگین‌لیک درجه‌سینه چاتدیقجا، داها فارس دیلی فرهنگستیزستان اۆیه‌لری‌نین هر چئرتلمه‌سی و شیت‌لنمه‌یینه تپکی گؤسترمه‌یرک، او ایشین داها، اؤنم داشیمامادیغی و ان آزی تۆرکلر ایچره، اونلارین طرفیندن یئنی‌‌جه اورتایا قویولان مساله‌دن، داها اؤنملی دغدغه‌لری‌نین اولدوغونو وورغولادی.
قاراباغ‌یمیزین آنا وطن قوینونا قاییتدیغینی صبیرسیزجه‌سینه ایزله‌ییب گؤزله‌ین میللته، داها حداد‌ین سن‌ایچ مئیوه سویونون آدینا گیر وئریب ـ وئرمه‌مه‌یی، فیلیم‌لرین و ایش‌یئرلری و... آدلاری‌نین هر دیلده یازیلماسی تصویب اولونماسی هئچ وئجلرینه ده دییل.
دولارین باهالاشیب ـ اوجوزلاشماسی، بورسون مقطعی یاشیل گئیینیب، سونرا آل قانینا بلنمه‌سی، ماشین‌ین قیمتی دورنالاردان اوجالاردا سئیر ائتمه‌سی و.... بوگۆنلر بو میللته سونونجو اولویّتده یئر آلیر [ آتا تۆرک دئدییی کیمی: سؤز قونوسو وطن‌دیرسه، گئریسی تفرّوعات‌دیر].
بو خالق اوردوسون ظفر خبرلری‌ایله باشی قال‌دیر و داها فیکیرلرینی قاراباغدان باشقا یؤنلره داغیلتماق اۆچون یئنی پیشیک‌بزه‌مه‌لرینیزین اویدوروشونا اویماییرلار.
بو آرادا بیر شئی ده اونودولمامالی؛ بیر زامانلار ایشغالچی‌لار طرفیندن قاراباغ‌ین گؤزل شهرلری‌نین تۆرکجه آدلاری دا ائرمنی‌یه چئوریلمیشدی، آنجاق زامان گلدییینده خانکندی‌نه استپاناکرت دئینلر، پئشمان و باشی آشاغی حالدا، "قاراباغ آذربایجان‌دیر"، سؤزونو تیکرارلاماق مجبورییتینده قالدیقلاری کیمی، بوگۆن تۆرکجه آدلارین یاساقلانماسینا بخشنامه‌لر تصویب ائدنلر، صاباح یوردوموزو گزمه‌گه پاسپورتلا گلدیگینیز آن، آذربایجان‌ خالقی‌نین ازلی و ابدی دیلی تۆرکجه اولوب ـ تۆرکجه ده قالاجاقدیر دئدیینیزده، بو گۆنلر نه‌اۆچون شیت‌لنمه‌‌یینیز و یئنی اویونبازلیغی‌نیز قارشیسیندا بیخییال داوراندیغیمیزین نه‌دنینی داها گؤزل آنلایاجاقسیز، چوخ درسلرله ـ اولایلاری، قاراباغ ساواشیندان آنلادیغینیز کیمی.

داودعبدی
@davud_ebdi

داود عبدی (Taymaz)

19 Oct 2020 11:19

بلکه ده بو گۆنه‌ایمیش....

چئچئن خالقی‌نین لیدئرلریندن‌ اولان؛ جوهر دودایئف‌ین بئله بیر سؤزو وار؛
"روسلارلا یاپیلان آنلاشیلما، سویا یازیلان یازی کیمی‌دیر."
بلکه جوهر دودایئف روسلارین، چئچئنلی‌لره ائتدیکلری خییانتلره گؤره بو سؤزو دئییب، آنجاق او سؤز روس‌لارا تام یاراشان بیر آچیقلاما‌دیر.
وارلیق‌لارینی تۆرکلره مدیون اولان بو آند ایچمیش دۆشمانلاریمیز، تاریخ بویو هر جۆر خییانت، ایکی‌اۆزلولوک، یالانچی‌لیق، اویون بزه‌مه‌لر و... دن چکینمه‌یرک، یئر اۆزونون ان سئویلمه‌ین میللت‌لریندن ساییلیرلار.
بو آرادا اونلارین اویونجاقلاری اولان ائرمنی خالقی اونلاردان دا لاپ بتر.
باشی بلالی یوردوموزون تاریخی‌نین هر صفحه‌سینده ائرمنی آدی‌نین آرخاسیندا یۆزلر و مینلرجه گۆناهسیزین آخیدیلمیش قانی گؤزه دییر،
آنادولودا عوثمانلی ایمپیراطورلوغونون ییخیلماسیندان، قورتولوش ساواشلاریندا تۆرکلره ائتدیکلری خییانتلردن توت گلسین، خوی، اورمو، سالماس، قوشچو، سولدوز و... جیلولوق فاجیعه‌لری‌نین تؤره‌دیلمه‌سیندن، مشروطه دؤنمی ستتارخانین تئرورو[ ائرمنی یئپرم‌ین خییانتی‌ایله]، ۱۹۲۰ ـ جی ایل محمّدامین رسولزادن‌نین قوردوغو ایلک آذربایجان جومهوریتی‌نین ییخیلماسی اوغروندا ائتدیکلری خییانتلرله، جینایتلر و ان سون ایللر تئرورچو تشکیلاتلاری‌نین[ آسالا، داشناک و...] تؤرتدیکلری جنایتلرله قاراباغیمیزی بیر قارا یارایا چئویریب، اۆره‌کلریمیزی داغلامالاری... و.. و... و...

ایللر کئچدی و گۆن؛ روس سؤزونه اینانمایان ستتارخانین دوغوم گۆنو گلیب چاتدی[روس سفیری؛لییاخونوفون آغ بایراغینی رد ائده‌رک، جناب قونسول من ایسته‌ییرم یئددی دؤولت امیرالمومنین بایراغی آلتدا یاشاسین دئمکله، عابباس میرزانین آنی لارینی بیر داها جانلاندیردی].

ستتارخان آذربایجان نشریه‌سی‌نین ایلک نومره‌سینی گؤردویونده گؤزوندن یاش آخدیغی حالدا، بو گۆن خالقیمیزین بایرامی‌دیر دئسه ده، بو گۆن سئوینجدن گؤز یاشلاریمیز آخا ـ آخا، خودافرین‌ین حسرت کؤرپولرینه بایراغیمیزین آسیلیب اسمه‌گینی گؤردویوموزده، ستتارخانین او چاغکی موتلو حالینی داها دریندن حیسس ائدیب بو بایرامین سئوینجینی یاشاماغا سئوینیب،
یئر اۆزوندن ‌تۆرک دۆشمانلاری‌نین سیلینمه‌سی و ایشغال آلتیندا اولان بۆتون تورپاقلاریمیزین قورتولوش بایراملارینی گؤرمک اومودونو یاشاییریق.

"بوگۆن صاباح‌خودافرین قورولور
دلی کؤنول آی ـ اولدوزا وورولور.."

داودعبدی
@davud_ebdi

داود عبدی (Taymaz)

06 Oct 2020 20:26

او بیر گۆن گلمیش‌ایدی
یازیسی‌نین آردی.....

او گۆن خالامین کنده گئتمه‌یی گلمیردی، دئییردی ائله بیل محمد‌‌ـ‌یم گلیب
آنجاق او گنجلرین وطنه قاییتماقلاری، باشقا گؤزو یولدا اولانلاری دا اومودلاندیردی،
بیر هفته ایچره، ۱۹ نفر داها گلیب گؤزله‌ینلریندن چوخ خالامین گؤزلرینی ایشیقلاندیردیلار.
بیر گۆن آتام ایشدن تئز قاییدیب، آناما دئدی گئجه خالام گیله گئده‌جه‌ییک، آنام نییاران گؤزله آتاما باخاراق، بابام دئدی؛ محمددن بیر عکس گلیب، آپاریرام خالاما وئرم، آنام سئوینجدن آغلاماغا باشلادی...
گئجه خالام‌گیله گئتدیک، خالام سئوینجیندن قوشولوب بیزه گلدی.
هرگئجه منه گؤزل ناغیل‌لار دئییب، سونرا نامازا باشلاییب، گؤز یاشی تؤکوب، آللاها یالواریردی.... من‌ایسه یورغانین آلتیندان خالاما باخیب یوخویا گئدیردیم.
[۳]
هر آخشام، قاش ‌قارالاندا، ناخیرچی‌لارلا چوبانلار، مال ـ داوار سۆرولرینی کنده قایتاردیقلاریندا، حئیوانلارین دیرناقلاریندان قالخان توز بولودلاری، یئره چؤکدوکدن سونرا، بیر الی اییلمیش بئلینده، بیر الی‌ایله ده یاشماغی‌نین اوجویلا محمد‌ـ‌ی‌نین شکلینه قونان توز ـ تورپاقلاری سیلن و گۆنو‌ـ‌گۆنوندن آرتیق اری‌ین بیر هئیکل گؤزه گؤرونوردو.
گؤزلری یورولمادان، کندین جیغیر یولونون توزـ‌تورپاغینی، گؤزلرینه سۆرمه ائدن بیر خالا.....

بۆتون اوشاقلارین سئویملی خالاسی

و بۆتون ایگیدلری ایتگین گئدیب قاییتمایان،گؤزلری‌ایله یوللاری یوران آنالارین آناسی....

داودعبدی
@davud_ebdi

داود عبدی (Taymaz)

21 Sep 2020 19:56

نه موتلو تۆرکلرسینیز

ایران اؤلکه‌سینده، بیلیم‌یورد ساییسی چؤره‌کچی‌خانا، یئمک تۆکانی و... برابرلیک ائدیر، اؤلکه‌نین ان‌ اوزاق کندیندن توت گلسین بؤیوک شهرلرینه کیمی،
آنجاق بیلیم‌یوردلارین سای‌جا چوخونلوغو و آکادئمیک تحصیل، ایش بازاری‌ و اونون ایستک‌لری‌ایله هئچ ده اویغون دییل و بیلیم‌یوردا گئدیب مدرک آلماق، بیر عادت و آلیشقانلیغا چئوریلیب.
بیر نئچه اؤزل ریشته‌دن سونرا، باشقا ریشته‌لرده تحصیل آلانلارا گله‌جکده اوخودوقلاری ریشته‌ایله ایلگیلی هئچ بیر ایش گۆوه‌نلیگی ساغلانماییر.
بو باشلیقلا، تبریز بیلیم‌یوردونون ایلک تۆرک دیل و ادبییاتی اۆزره لیسانس آلان سئویملی دیلداشلاریما دؤنورم
دؤرد ایل اؤنجه، بو کد ـ ریشته‌نین دفترچه‌لرده گؤرونمه‌سی‌ایله بیرلیکده، دیلیمیزین دۆشمانلاری [ اؤزوموزونکولری دئییرم هله ] و اددعالاری یئر ـ گؤیو توتان آغالار، نظر وئرمگه باشلادیلار، بو ریشته‌نی اوخویانلارا هئچ بیر ایش گله‌جکده تضمین دییل و.... [دئیه‌سن باشقا ریشته‌ اوخوسایدیلار ایشلری باشلاری اۆستونده، اونلاری گۆدوردو؟؟ ]
آنجاق او ۱۸ ـ ۱۹ یاشلی گنج‌لر سئوگی‌لری‌نین آردیجا گئدیب و سئودیکلری دیلی اوخوماغا باشلادیلار.
اونلار میرزاحسن رشدیه‌نین وطن‌دیلی کیتابلاری اولدولار، میللی حوکومتین ۲۶ آذر ده اودا چکیلن آنادیلی کیتابلاری، زهتابی‌نین سس ـ صرف‌ایله، نحوی، بیر گۆن‌ اینجی دیلیم اولوب، صاباحیسی گۆن فرزانه‌نین مبانی دستور زبان‌ کیتابلارینا چئوریلدیلر، بیر گۆن دیلیمیزین ایضاحلی لوغت قیلیغینا گیریب، بیر گۆن ده کاشغارا گئدیب لغات‌التۆرک‌دیوان‌‌ینا چئوریلدیلر.
لاپ دوغروسو، اونلار؛ یوردوموزون ان اوزاق کندینده بو دیلی یاشادان آغ بیرچکلی آنالار ـ‌ آغ ساققاللی آتالار اولدولار، هر بیری بیر بایراق اولدولار بو دیلی یاشاتماغا، بو دیلین اؤلومسوزلوک دامغاسی، بو دیلین یاشاماق سیمگه‌سی و تحقیرلری، توهین‌لری، لوغازلاری سایمادان تکجه آنادیللرینی دۆشوندولر،
اونلار تیراختورون هر اویونوندا بوش ـ بوشونا، یالاندان تۆرک‌دیلینده مدرسه باغیرانلار یوخ، تۆرک‌دیلینده مدرسه‌لرین لاپ اؤزو اولدولار.
لاپ دوغروسو فرشی، شیخی، نادارلی و آزاد اولدولار
هرنه‌دن آزاد.... بیر اینسان.
اونلاری آدلا تانیماسام دا ، اللریندن لاپ بئله آیاقلاریندان دا اؤپوب، تبریزین هر آذر آیی‌نین سویوقلاریندا یانان کیتابلاری دیریلتمه‌یه آتدیقلاری هر بیر آددیملارینا عشق اولسون دئییرم.
اونلار یولا دۆشوب بو قاتاری یولا سالدیلار، ایلک آتیلان داشلار اونلارا توخاندی آنجاق سینمادیلار و بوگۆن تۆرکجه یازیلان دیپلوم‌لارینی گؤردویومده گؤزلریم دولو حالدا، نه موتلو تۆرکلرسینیز دئییب ...... یوموروغومو اووجومدا سیخارکن دریندن راحاتجاسینا بیر نفس چکدیم، نییارانچیلیغیم اونلارین یورولماغی و یاریدا بوراخماقلاریندان‌ایدی آنجاق پولاد ایراده‌لی گنج‌لریمیز بونو دا باشاردیلار.....
و یاشاسین تۆرک‌دیلینی یئرینه اوتورداراق، سونای گۆنونده دۆنیانین ان گؤزل پایینی بیزلره سوندولار.

داودعبدی
1399.6.31
@davud_ebdi

داود عبدی (Taymaz)

11 Sep 2020 10:04

بیزیم ـ سیزلرله آللاهیمیز دا بیر دییل

"گذشته چراغ راه آینده است" کیتابی‌نین ۳۴۱‌ـ‌جی صفحه‌سینده میللی حوکومت‌ین اصلاحاتلاریلا باغلی، بئله یازیلیب؛
میللتین یاشام خرجلری‌نین آشاغی گتیریلمه‌سی هابئله شهری اصلاحات و گۆوه‌نلیگین ساغلاملانماسی اوغروندا؛ احتکار ائدیب، رۆشوه آلان‌ آداملاری، اوغرولاری و تجاوز ائدن‌لرین گۆنلرینی قارالتماق اۆچون، بیر سیرا تمللی ایشلر باشلاندی.
بو قارشی دورماق و آردیجیل چالیشمالار اساسیندا؛ ارزاق ـ یئمک بوللانیب ـ راحات تاپیلاراق، تایسیز اولان بیر عمومی گۆوه‌نلیک آذربایجانین باشا ـ باشینی بۆرودو.
بو سییاستین آردیندا؛ عباسعلی پنبه‌ای، ۱۳۲۴/۱۰/۸ ده، قورولان دادگاهدا، ۴ نفری اعداما محکوم ائتدی:
۱ـ رحیم دباغی
سوچ: زورلا بیر ائوه گیریب، ۱۴ یاشلی بیر قیزا تجاوز ائتمک
۲ـ اصلان فرید
سوچ: ۱۶ یاشیندا بیر قیزی قاچیرداراق، اونا تجاوز ائتمک
۳ـ کاظم خوشباور [ قارنی ییرتیق کاظیم ]
سوچ: سایی‌سیزجا اوغرولوق ائتمک، خالقی اینجیتمک،...
۴ـ عزیز یوسیف‌اوغلو
اۆچونجو سیرایلا سوچداش[ اوغرولوق ائتمک،شرارت و.... ]

دادگاهین وئردیگی حؤکم، تئزلیکله یئرینه یئتیریلیب و بو ایش خالق ایچره آلقیشلانیلدی.
آدلاری آپاریلان ۴ نفر، تبریزین آلاقاپی مئیدانیندا آسیلارکن میللت یاشاسین عدالت دئیه باغیریب، عادیل بیر حوکومتین قورولماغیندان سئوینیردیلر.

آنجاق همیشه‌کی کیمی، تئهرانین ارتجاع قوللوغوندا اولان قازئته‌لرله، درگی‌لر صاباحیسی گۆن بو خبرلری ترس یایدیلار.
اؤرنک اۆچون؛ باختر گۆنده‌لیگی بئله یازمیشدی:
شنبه گۆنو: رحیم‌دباغ، اصلان، عزیزیوسف و کاظیم ـ‌ی تبریزده شهربانی اؤنونده، آلا قاپی مئیدانیندا آسدیلار، آنجاق تبریز خالقینی بؤیوک بیر اۆزونتو و غم بۆرۆموشدو و وحشی‌لیک سیمگه‌سی اولان بو ایشی قیناییردیلار.
ـ یازی‌نین آردیندا چالیشیلمیشدی، اعدام اولونانلار «شاه‌سئور، وطن‌سئور و... » آداملار تانیدیلیب و سوچلاری،تکجه یاشاسین شاهنشاه و کئچن ایل ایران عسگرلرینه قوربانلیق کسمک بیلدیریلسین،
حالبوکی تبریزین بؤیوگوندن ـ کیچیگینه[یاش باخیمیندان] کیمی، بو آداملاری تانیییردیلار و نه اۆچون آسیلدیقلارینی دا، یاخشی بیلیردیلر.

ـ فارس مئدیالاری‌نین بو چیرکین و غئیر‌ـ‌ی اینسانی باخیش و داورانیشلاری، بو گۆنه کیمی ایلکین آماجلاری و وارلیقلارینی قورویاراق، تۆرکلر و آذربایجانلا باغلی اولان خبرلری‌؛ بایکوت ائتمک، گیزلتمک ـ دانماق، و ترس یایماقلا،چیرکین اۆزلری‌ و یالانچی آماجلی اولدوقلارینی بللی ائدیبلر.
بو آرادا بو مئدیالارین فرقی یوخدور، سؤز قونوسا آذربایجان اولونجا، اوپوزوسییونلاریندان توت گلسین دؤولته لاپ یاخین و باغلی اولان مئدییالار دا بو ایشی گؤرورلر.
اؤرنک اۆچون سون گۆنلر، تیراختورون شامپییونلوغویلا باغلی اولان تپکی‌لر، بیزیم اونلارلا نئچه ـ نئچه اولدوغوموزو بیر داها بللی ائتدی.
بی.بی.سی خبر آژانسی‌نین لیورپولون قهرمان اولدوغو گۆن؛ "لیورپولون گؤیو قیرمیزا بویانان گئجه" باشلیقلی خبرین قارشیسیندا تیراختورچولارین شامپیونلوق سئوینجلرینی قیناریاراق، تۆرکلره خور باخیشلارینی گیزله‌ده بیلمه‌دیلر.
ائله ایچری رادیو ـ تی.وی کاناللاریندا اولان تپکی‌لر، اونلارینکیندان دا دالی قالان دییلدی.
تیراختورون شامپییونلوغونو تبریک دئمه‌ییب، بو قازانجی دَیَرسیز گؤسترمگه چالیشاراق، فرقلی وئریلیش‌لرین آپاریجی‌لاری‌نین بوش ـ بوشونا نظر وئرمکلری و لاپ دوغروسو گؤینلتی‌لرینی گیزله‌ده بیلمه‌دیکلری، تکجه بیر سؤزو خاطیرلادیر:
"بیزیم اونلارلا آللاهیمیز دا بیر دییل".

داودعبدی
@davud_ebdi

داود عبدی (Taymaz)

04 Sep 2020 15:38

فوتبال، فوتبال گئنه ده فوتبال

فوتبال کلوپ‌لاری‌نین مودورلری چالیشیرلار دئسینلر، کلوپلاری سییاسی بیر جریان یوخ، تکجه فوتبال کلوپودور، اویونچولار دا چالیشیرلار تیم‌لری آیید اولدوغو بؤلگه‌نین سییاسی جریانلاریندان قیراق قالسینلار، آنجاق اونلارین دۆشوندوکلری چوخ دا اؤنملی دییل، بیر کلوپ هوادارلاری‌نین دۆشونجه‌سی‌ایله آنلام تاپیر [فوتبال علیه دشمن،سایمون کوپر، ترجمه عادل فردوسی‌پور،ص: ۱۶۱].
اسپانیا دا بئله بیر سؤز وار؛
هر بیر فوتبال سئور اسپانیالی، هم ده سییاست آدامی‌دیر.
اسپانیانین فوتبالی، او اؤلکه‌ده یاشایان میللت‌لرین میللی کیملیکلری‌ایله دۆیونله‌نیبدیر.
بو گۆن اسپانیا فوتبالی اِل‌ـ‌کلاسیکو [ رئال ـ بارسا ] چکیشمه‌لری‌ایله خاطیرلانسا دا، بو اؤلکه‌ده فوتبال ایلک باشلانان گۆندن سییاسی دۆشونجه‌لرین سرگی‌له‌مه و گؤستری آلانینا چئوریلیب.
آیریمچی باسک‌لی‌لارین اینگیلیس تیمی‌نی اسپانییانی حذف ائتدیکدن سونرا آلقیشلاماقلاریندان، و اتلئتیکوبیلبائونون تکجه باسک‌دا دوغولموش اویونچولار اویناتماغینا و اوسکادی(باسک) ین میللی تیمی آدی‌لا قورولماسینا دک.
آنجاق ژنرال فرانکو دیکتارتورلوغونون اوغور قازانماغی هرنه‌یی دییشدی.
رویال: سلطنتی؛ لقبی، مادریدین تیمی‌‌نه بیر داها وئریلدی و رئال مادرید، حوکومتین سئوگیلی تیمینه چئوریلدی.
بو آرادا کاتالان‌لار اؤز میللی ایستکلرینی بارسا اویونلارینا و نیوکمپ ایستادییومونا داشیدیلار، بارسلون تیمی‌نین لقبی:
« Məs que un club»
بیر باشگاهدان داها یۆکسک شئی، سئچیله‌رک، کاتالانلارین میللی ایستکلرینی داوام ائتدیرمگه باشلادی،
۱۹۴۰ـ‌جی ایلدن ۱۹۷۰ کیمی، رئال حوکومتین گؤزونون ایشیغی آدلاندی، او رئالی رژیم‌ین تیمی و فرانکونون سئوگیلیسی تانیییردیلار،
آنجاق دیکتاتور فرانکونون رئال‌ا اولوب محبّتلری، بارسانی اونلارین قارشیسیندا بیر دۆشمان کیمی یاراتدی، آنجاق او ایللرین اولایلارینی گؤزدن کئچیردیگیمیزده، چوخو بوگۆنکو فوتبالیمیزدا یاشانانلارلا بیردیر.
اؤرنک اۆچون؛
دی ائستافانونون فرانکو دخالتی‌ایله [بارسایلا قرارداد باغلادیغی حالدا] رئالا گئتمه‌ییندن، اویونلارین سونوجلاری مئیدان‌دان ائشیکده بللی اولدوغوندان، کمیته انضباطی‌لرین بیر طرفلی قضاوت و حاقسیزلیق‌لاری و..... هامیسی تیراختور و وزیرین تیملری[ ایستیقلال، پیروزی ] ساواشینی خاطیرلادیرلار.
دفعه‌لرجه دئمیشیک تیراختور‌ون فوتبالی باخیمدان قازاندیغی جام و کاپ‌لار، داشیدیغی ماهیت و خالقیمیزین اویانیشیندا اولان رولوندان چوخ دیرسیزدیر، آنجاق بو دؤنه بو بیرینجی‌لیک دوغرودان دا برک یاپیشدی؛
و بیر ائشیتسیز ساواشی قازاندیق؛
بیر یاندان‌: ایدمان باخانی، فوتبال فئدراسییونو، داورلر کومیته‌سی، صدا ـ سیما و ایدمان باخانلیغی‌نین ایکینجی تیمینه جام قازاندیرماق ایسته‌ینلر و قارشی طرفده؛ تکجه خالقی‌نین وارلیغینا آرخالانان تیراختور.
کاغیذ اۆزره چوخلاری جامین تئهرانا گئتمه‌ییندن آرخایین‌ایدیلار، آنجاق میلیونلارجا تۆرکون اۆرک بیرلیگی آدلارین آپاردیغیمیز کیمسه‌لر و نهادلارا اۆستون گلیب، اویونچولارین غئیره‌تی‌ایله هرنه ترسینه چئوریلدی و تئهراندان کرجه، کرج‌دن زنگانا و زنگاندان بۆتون تۆرکلر و آذربایجانا یاییلان سئوینج و قازانجین فخری اساسدا، خییاوانلار بیزیم اولوب، "یاشاسین آذربایجان" و "آذربایجان وار اولسون، دۆشمانلاری خوار اولسون" شوعارلاری هر یانی بۆرودو، همیشه‌کی‌لر کیمی.
آنجاق اسپانیادا گۆن بولودون آرخاسیندان چیخیب و بارسانین هم فوتبالی هم ده اصلی گؤره‌وی، کاتالانلارین گۆجلو اعتیراض تیریبونونا چئوریلمه‌گی کیمی، بو اؤلکه‌ده ده ائله تیراختور بارسا اولماغا ساری گئدیر.

داودعبدی
@davud_ebdi

داود عبدی (Taymaz)

15 Jun 2020 10:43

ان داریخدیغیم زامان‌لار
شئعر یازا بیلمه‌دیییم او آن‌لار
بیلیرم شاعیر اولا بیلمه‌یه‌جه‌یم
بکله هئچ شئعر ده دییل یازدیقلاریم
سؤز ـ سؤزو گتیرر
و گؤروشمک محبّت
آخی گؤزده یاشاییر محبّت
سوچلوسو دییلم آرتیق
نه بیلیم آخی، یازدیقلاریم....
نه داریخماغیمی داغیدیب
نه ده محبّتی چوخالدیر
یالنیز......
ایچیمده بیر سئوگی یاشادیر
و بو سئوگی‌نین تکجه سئوگیلیسی
هئچ شئعره بنزه‌مه‌ین شئعرلریم

داودعبدی
@davud_ebdi

داود عبدی (Taymaz)

14 May 2020 16:01

شرف چوخ داها باها دییلمیش

گولن آی ین(اوردیبئهئشتین) ۲۵-ی تکجه ایدمانیمیز یوخ، یوردوموزون قارا لکه لی گونلریندن بیریسی اولدو،
باشی اوجا آذربایجان میللتی، اؤز یاشامی بویوندا، آغ-قارا، آجی-شیرین گونلری چوخ گؤروب آنجاق ۹۴/۲/۲۵ فرقلی
ایللر بویو تئهرانین سوروملولاری نین سئوگیلی سی اولان ایستیقلال-پیروزی و یاتیریملار قایناغی اولان ایصفاهان و فولاد تیملری نین کؤلگه لری نین آلتیندان باش قالدیرمیش اولان نئچه میلیون تورکون ایچ ایسته گی و گوونج هارایی اولان تیراختورون باشینی کسدیلر
گؤزوموزون اؤنونده
کئچن ایللر تورکی کیمی تولکی لر (داور اولاراق)
بو دؤنه ده فغانی کیمی لر....
بو اؤلکه ده نه فاشیستی باخیش قورویوب آرادان گئدیب نه ده شرفلرینی بئش قیرانا ساتانلار...
آنجاق او گون تکجه آذربایجان ین قارا گونو یوخ- اینسانییت-شرف- کیشی لیک و.... ین قارا لکه لره بویاندیغی گون ساییلدی.
هیند اینگیلیزلی لره سومورگه(موستعمیره) اولان چاغ- بیر کیریکئت اوینوندا، اینگیلیزلی سرهنگ(رابئرت فیل شایئر)، اویونون سونوندا هیندلی لرین ان باجاریقلی اویونچوسونو گولله ایله ووردو- و گولمسه ییب اویون بیتدی دئدی
او گون ده آذربایجانین اومودو - تئهران تورکلرینین اؤزلرینه و اؤزلوکلرینه قاییدیش سیمگه سینی اوخلادیلار،اؤزو ده نامردجه سینه
آنجاق او گونون و او گونه تای گونلرین قارا لکه سی اوزه رینیزدن سیلینمه یه جک و اینتیقام اودو گونو گونوندن چوخ آلاولانماقدا

نه قدر واردی قانیم آخاجاق یازاجاق آذربایجان
نه قدر واردی جانیم باغیریب دئیه جک آذربایجان

و نه گؤزل دئمیش رحمتلیک بولود قاراچورلو;
اسیر بیر میللته محکوم بیر ائله قایغی چکن کیمدیر آغلایان کیمدیر.
و اوگوندن بو شوعارین داها دا دوز اولدوغونو بیلدیم
فئدراسییون ایران
دشمن آذربایجان

@davud_ebdi

داود عبدی (Taymaz)

20 Apr 2020 15:32

و(v) سسی و محمل‌الضمّه‌لیک اؤزه‌للیگی

سس‌سیز حرفلر دیلیمیزده فرقلی بؤلوملرده یئر آلیرلار و بو بؤلوملرین ان اؤنملی‌لریندن کار ـ جینگیلتیلی بؤلومودور.

وـ سسی، جینگیلتیلی سس اولاراق، آلت دوداغین اۆست دیشلره یاپیشماغیندان یاراناراق دیش ـ دوداق سسلریندن ساییلیر بو سسین باشقا بیر اؤزه‌للیگی ده واردیر.

آنادیلیمیزین قیرامئری و یازی ـ پوزو قوراللاری‌لا ایلگیلی کیتابلاری اوخودوغوموزدا؛
سسلی‌لر بؤلومونده [ e, o, ö ] سسلرینین تکجه بیرینجی هیجادا گله بیلدیکلرین گؤروروک،
آنجاق بیر سیرا سؤزجوکلرده بو یاسا پوزولور و o - ö سسلری بعضاً ایکینجی و یا سون هیجادا دا گؤرونور
اؤرنک اۆچون:
آلوو، قاشوو[ قشوو]، خییوو، چالپوو [ آلا چالپوو یاغماق «قارلا یاغمیرین بیرلیکده یاغیشی»]
بیزوو، بۆتؤو،.... کیمی سؤزجوکلرده، اؤ و اۏ سسلری ایکینجی هیجادا گؤرونور.
دیلیمیز دۆنیانین قیرامئر باخیمیندان ان گۆجلو دیللریندن اولاراق، او یاسا نه‌دن پوزولور؟
گؤروندویو کیمی بو سؤزجوکلرین بۆتونون سونوندا و ـ v سسی، گؤرونمکده‌دیر
و بو دا v سسی‌نین محمل‌الضمّه‌لیک اؤزه‌للیگیندن آسیلی‌دیر.
محمل‌الضمّه یاساسی نه دئمکدیر؟
بو اساسدا، v سسی، اؤزوندن ‌اؤنجه گلن a الیف، سسینی، o - ö سسینه چئویره‌رک، او ـ اؤ سسلرینین ایکینجی و یا سون هیجادا گلمه‌سینه نه‌دن اولور.
ـ عربجه نحوی قایناقلاری آراشدیردیغیمیزدا، سیبویه و ابن‌جنّی‌نین کیتابلاریندا، ۱۶ حالدا اعلال اۆز وئرر،
و بو ۱۶ موردین بیرینده بئله یازیلیب:
الیف‌دن اؤنجه، بیر ضمّه گلیرسه او الیف، واو سسینه قلب(تبدیل)‌ اولار.
اؤرنک: شُاهد ــــ» شُوهد
و ائله بو اعلال یاساسیندان بلکه v سسی‌نین محمل‌الضمّه‌لیک اؤزه‌للیگی آچیقلانا بیلر، آنجاق تۆرکجه‌میزین دیل و قیرامئر یاسالاری و قورولوشو عربجه‌ایله فرقلی اولدوغو اۆچون، بو یاسا دا فرقلی‌دیر.
آنجاق آغیزدا و دئمکده بیزوو، آلوو دئسک ده یازارکن بیزاو و آلاو یازمالی‌ییق
Bızov --- bızav
Alov ---- alav
Qəşov ---- qəşav (qaşav)
Bütöv ---- bitəv
کؤکو بیتن و سنگلاخ‌دا گلن بۆتون سؤزویله ایلگی‌ده‌دیر.

ـ اؤلکه‌میزده یاییملانان دیلچی‌لیک و قیرامئرله باغلی هئچ بیر کیتابدا بو اؤزه‌للیک آچیقلانماییب.

تکجه اوستاد فرزانه، مبانی دستور زبان آذربایجانی کیتابی‌نین بیرینجی جیلدی‌نین ۴۷‌ـ‌جی صفحه‌سینده بئله یازیبدیر؛
او ـ o مصوتی، بیر سیرا یئرلرده v صامتی‌ایله بیرلیکده، بیر سیرا سؤزجوکلرین ایکینجی هیجاسیندا گلیر و بو بیر سس آرتیشیمیندان آسیلی‌دیر.
و بو قیسا آچیقلامادان قیراق[هئچ بیر نه‌دن و دلیل یازیلماییب] هئچ کیتابدا، v سسی‌نین بو اؤزه‌للیگی‌ایله ایلگیلی هئچ بیر آچیقلاما الده یوخدور.
[ ان آزی من تاپا بیلمه‌دیم ‌‌]


داودعبدی
@davud_ebdi

داود عبدی (Taymaz)

28 Mar 2020 16:15

شئعرله بوی آتان فیدانلار

افلاطون، یونان اوتوپییاسیندا (ایتگین اؤلکه; مدینه فاضله-آرمانشهر) شئعر و شاعیرلره دگرلی یئر آییرماییب بئله دئییر;
شئعر جاوانلارین اخلاغینی پوزوب، روح دوشگونلوگو گتیره بیلر.
آنجاق اونون باخیشی گرچکچی و ایدئیایا دایاناقلی بیر باخیشدیر، او تصور و خولیایا یول وئرمه ییر، آنجاق شاعیر گرچک لیکله ایلگی لنمه ییر، یاراتدیغی بیر کؤلگه و قارالتی اولاراق، اینسانین دوشگون دیلکلری نی قاباردیب اویالدیر،

افلاطون جومهورییت کیتابی نین، اوچونجو بؤلومونده بئله یازیر; شئعر ایله فلسفه اسکی چاغلاردان بیر-بیریله ساواشدادیرلار.

آنجاق مارتین هایدیگئر، شاعیرلرله-دوشونرلری(متفکرلری)، دیلین تمل و اصلی(ایلکه) قوروقچولاری بیلدیریر.

هایدیگئر
Letter on humanism
اینسانلیغا گؤره مکتوب، آدلی یازیسیندا دئییر;
وارلیق هر شئیدن اؤنجه واردیر.
وارلیق دوشونجه ده دیللنمه گه باشلاییر; دیل وارلیغین ائوی دیر.
اینسان، دیلین یوردوندا یاشاییر، و شاعیرلرله-دوشونرلر بو یوردون قوروقچولاری.

سوقراط ایسه، هومئر (یونان شاعیرینی) ملکوت شاعیری آدلاندیریر.
شئعری تانری وئرگیسی آدلاندیریر.
اونون فیکریجه، تانری، عاغیل و آییق لیغی شاعیرلردن آلیر.
{شئعر وارلیغین ائوی دیر/ائیواز طاها/پینار یاییم ائوی/اوچونجو باسقی ; ص;۷۲۴-۲۴۶}

اوچ بؤیوک فیلسوفون باخیشینی شئعر اوچون گؤردوک،
من ده هایدیگئره قاتیلیب، دئییرم شاعیرلریمیز بو دیلین قوروقچولاری دیرلار، ایستر ان اسکی اوزان لاردان توت گلسین
شامان لاردان دده قورقودا، یا دا بوگونکو مودئرن شئعریمیزی یاساق سؤزجوکلرله فیکیرلره سوردورن گنج شاعیرلریمیز.
آنجاق بو دیلین قوروقچولاری بوگون هرنه دن واجیب اولان آنا دیلیمیزین قایدالارین، دوغرو-دوزگون اؤیره نیب-اؤیره تمکله قوروقچولوق گؤره ولرینی تام دوزگون یئرینه گتیره بیلرلر.
-شئعر بیر یاپی(بینا-ساختیمان) کیمی ایکی اوزو وار;
ائشیک(دیش;dış) گؤرونتو، ایچ گؤرونتو
ایچ گؤرونتوسو شاعیرین دویغولاریلا هابئله شئعرییت گوجونه باغلیدیر (یارادیجیلیق و باجاریغیندان آسیلی)
آنجاق هرنه دن اؤنملی اولان شئعرلرین، دیش گؤرونتوسودور، بیر شاعیر شئعری قیرامئر و یازی-پوزو آخساقلیغی داشیییرسا، یانی اؤزو یازدیقلاری سؤزلره اینانماییر و بیر سؤزون آرخاسیندا اینانج اولماسا اونا واخت قویماق منجه بوش بیر ایشدیر،

داود عبدی
1396/12/12


@davud_ebdi

داود عبدی (Taymaz)

20 Mar 2020 07:30

بایرام گئجه سی

بایرام گئجه سی
شهرین آشاغی لا یوخاری محلله سی
سانکی ایکی بؤلموش بونلاری یئر کوره سی
خوش گئییشیکلی اوشاقلار
پیریل-پیریل پیریلدایان چیراقلار
آپاریلیر ائولره
بول-بول شیرنی قوتولاریلا
گؤزل بالیق لار شوشه سی
بورویوب محلله نی گولمکله-سئوینج سسی

یاشانیر اؤته کی یاندا
سوکوت-سس سیزلیک و دینمزلیگه بورونن بوروق-بوروق آرزیلار کوچه سی
نه یانیر چیراقلار
نه بزه نیب اوتاقلار
آتالارین کؤنلونده بوللو نیسگیل شله سی
و گؤزو دولموش آنالار خیالیندا قیزلاری نین خینا گئجه سی
بیردن-بیره
قالخیر; های-کوی
سسله نیر اوشاقلاردان بیری
دوستلار;
صاباح بایرامدیر
ایش تعطیل دیر
اویانمایاجاغیق سحر ائرته سی
بوتون اوشاقلار سئوینیب
دئییرلر
هورررراااا.....یاشاسین
نه گؤزل، گئجه دیر بایرام گئجه سی

نه قریب گئجه دیر بایرام گئجه سی

داودعبدی

۱۳۹۶/۱۲/۲۸



@davud_ebdi