205
چلمه لــ وينگ دليل تلم شگو بنادم بعيد @Hasan_Qasim
ردت أعرفك
وگعدت وي روحي اسولف
وأسأل وانطر جواب
راضي عني ذنوبي ثگلت
وانه ماعندي عذر يمسح ذنوبي
شلون ابرد گلبي من هذا العذاب
شكثر بيبان لرحمتك
وانه خايف من تسامحني ارد وكسرلي باب
انه صاحب تجربة بكل الذنوب
ليش من ادعيك اشوفك تستجاب …
الخ …..
بعد ذاك المعاتب والحچي يولي
بديت أنساك لا تشتاگ وتگلي
سلة مصلحة العمر الگظيته وياك
من كل غصن چنت تجيب وتخلي
رايك مو الك وتشوف نفسك راي
أعرفك مو نجم چا ليش متعلي
ولا مرة لگيتك ضعت دمعة بماي
ضيعتك بعد لا تظن توصلي
اجيتك وانه خايف بالدرب صوبين
واحد گل للاخر كون يدخلي
اجيتك بـ المواقف ما الك عنوان
اجيتك بـ الوناسة بنادم تسلي
اجيتك بـ الصدگ رديتني خسران
اجيتك بـ الچذب ولگيتك تهلي
السجدة بلايه موعد بيها جلمة راس
مو بس بـ الفرائض توكف تصلي
عرفتك مو ستر من ساومتني عليك
من ظليت تحسب ذنبي بالملي
من كتلك غطاي عليك ما ندمان
چان ابالي اجربك بالغطه شلي
حسن قاسم
#شگلت_للماي
أريد اسمع ولو مرة
لمن بچفوفك اتبده
شگلت للماي ،
متلهوج وخايف لا طعم لا لون
لا بي ريحة منك لا عگل لا راي
شحاجيته يخو حسين
ولهسه النهر رايح ،، جاي
شحاچيته ،،
ولهسه الگمر بالنهران
متمدد بكل امچان
يمشي بمشتهاته على النهر عطشان !
يا عطشان ،،
ذيچ الگنطرة تشبهك
يـ المعبرنه يـ الذبلان
ذيچ الگنطرة المحد عبر منها …
عبرناها !
ولگينه طيور ديرتنه
على چفك واكفه تغني
يـالبچفك شگد أغصان،،
چفوفك خضرة ملگه وهلا للناس
واحنه الناس
من توگف الدنيا نصيح … ياعباس
من يكبر ذنبنه نصيح …. ياعباس
من نستحي من الله نصيح .. ياعباس
يا عباس …
يا أول حچاية بمجلس الهيهات
ويا أول رفض بمزاحم الخذلان
بس انت وكفت والزمن حدرك فات !
واحنه العاشگينك مانعرف شصار ؟
ضامي على الرمل يا نبتت الصبار
عبرنه على الشمس مرة
ولگيناك شكثر صابر
نبي ومعجزتك الثوار …
حسن قاسم
#الرسالة_الاولى
يلوموني عليك من اخر الدنيا
وكبر حملي ولگيتك يا حسين چتاف
لگيتك مو نعاوي بموسم وتنعاف
ولا خطوة بجدم عابر
ولا مجلس يموت وياك بالعاشر
ولا تاجر …
هذاك انت نهر من كل كتر تنباس
شجرة عاشگين انت ولا مرة لگيتك فاس
لچن لليريدك ثوب ماتنجاس …
ماتنجاس ؟
دورت بحچيهم ماشفت فيك
حسين حچيلهم عنك
وگلهم هذا موش حسين
هاي وهامكم مو انه هالمسكين
وگلهم ليش سديتو الحلوگ العرفت الهيهات
وليش انشال فوگ رماحكم ثارات
هذاك انه شمس تشرين
ماتلگوني اذا ماتنزل الرايات !!
ولا تلگوني صاحب من يطيح الدم
لجل الوطن … والتيجان تتبسم ؟
انه حسين المضحين
مو هذا البدم الوادم تعمم !
حسن قاسم
گالولي هلي ماتكتب شبيك
عن (حيدر) عجب مالك قصيده
عاينت بوكاحه بغضب بعتاب
وگلتلهم (علي) ماعرف أجيده
(علي) اقربلي من كل المحبين
واقرب للبنادم من وريده
يانديم الكاس دير
وارسم أقفاص الفراگ اعله التراب
وغني لاول نسمة تفزعلك وطير
هذا للثوار صوت
قبل ليلة مشخص بيا چف يموت !
وصاح يهل الوطن سمعوا ،،
حللت دمنه الفتاوي ونزلت بينه شعار
(دم الثمنمية فاسد هذا دم وادم أحرار)
يا اطراف الوطن سمعوا
الطرف الاول … عراقي
والطرف الاخر … سياسي
وثالث الأطراف ماخلوا يكمل فتحوا بجمجمته نار
موتت الثوار عند الله انكسار
تكسر ضهور الشمس
من تنطفي بعز النهار
اجيتك بالمواقف ما الك عنوان
اجيتك بالنفاهة بنادم تسلي ''
اجيتك بالصدگ رديتني خسران
اجيتك بالچذب ولگيتك تهلي ،،
حسن قاسم
من شفنه الشمس معروضه للتجار
خفنه يقل سعرها وتنقهر وطيح
تجار صاروا بيك تجار
مانثق بيهم ماهم احرار
باعوا قضيتك بالدنانير
وتقاسموا دينار دينار
حتى اليحبك خايف يروح
يحضر مجالس وادم اشرار
وحتى الحمام اليلتم عليك
مدري شسمع من شافهم طار
رادوك تكبر مدري يردون
يكبر ذكرهم ذول الاگصار !!
شوهو بيك بكثر الاسهام
واكثر بعد شوهو الافكار
حسن قاسم
#الرسالة_الثانية
من الطف رسمت الموت معبر
وركضت ركض الريح بـ البر ؟
أتبع اثارك والدرب طين
وبدمعي ما أوصلك اعثر
بويه عتنيتك وأنه مهضوم
خليني اسولف سري مضطر
مرات اكتبك واستحي اقراك
خايف من اختك تنسبي اكثر
ومرات اگولك والرفض صوت
والماله صوت يعيش مجبر
شنهي انه وانت تريدني الگاك
ونطيت لجل عيوني منحر
هذا الغموض الشامخ البيك
صاير مواسم ناس تفتر
تفسرت موسم عطش ودموع
مو ثائر …. تحولت متجر !
وذيج الحقيقة نصاغة اوهام
ونباع دمك يـ ابو الاكبر
علمني كلشي الدمع بس لا
مو انت ..
هذا حسين منبر ؟
تلاگينه
ونشدته العمر يبدي منين ؟
گال العمر يبدي من اخر سنينه !
وبچت عينه …
وتمنيت انگلب منديل يم عينه
ولك غرگان … مد جفگ
خذانه الروج
بسك دمع تبچينه
ولك ذاك البقى اعله الراگ ماضينه !!
بعد ياهو اليدلينه
كضت ذيج الدروب التلتقي صدفة
وگضت ذيج الجروف العاشگه الضفة
وگضيت انه … وگضيت انته
ولك ماضلت حچايه صفينه رماد للسكته
شبعد ويخضر بفينك الماشفته
اشو كثرت وجوه الناس
بس وجهك الضيعته ؟
حسن قاسم
تعايدنه ...
وحجينه شكد
لحد ذيج السنين المارضت تبرد
گلتله ... وگالي اتهده
يتعبي وداعت البيبان
مامش للعمر رده
حسن قاسم
باچر اكبر
واشتكي اعله النظرة الأولى
الـ طيحتني بين اديك
وباجر اكبر ،،
وعلى باب الله افرع واشتكيك
يا إلهي …
عثرة بصحوة ضمير
يا إلهي …
الماله جنحان وگرب موسم الصيد
بيمن يحافظ على سنينه ويطير
حسن قاسم
هذاك انت
الفرات المانشف ريك
نهر من كل كتر تنباس
شجرة عاشگين انت
ولا مرة لگيتك فاس
لچن لليريدك ثوب ماتنجاس …
حسن قاسم
#أرقام
(للذكريات حزن عميق ودموع لاتجف ابدا
اختزل بعض المشاهد من تلك الأيام …)
(مشهد من تشرين)
دم الثمنمية حار
وبعده بينه يفور ويصيح أنتصار
مات واحد
حسبوا وياي اليظل ابلا احساب
حتى رقمه يموت من قيد الأعمار
مات ثاني
واحنه نحسب بالأعداد
نغذي نشرات الأخبار
مات ثالث
هذا ميت بـ انتفاضة وبرد دمه
وهم رجع ياخذله ثار
مات رابع
هذا للثوار صوت
قبل ليلة مشخص بيا چف يموت !
وصاح يهل الوطن سمعوا ،،
حللت دمنه الفتاوي ونزلت بينه شعار
(دم الثمنمية فاسد هذا دم وادم أحرار)
يا اطراف الوطن سمعوا
الطرف الاول … عراقي
والطرف الاخر … سياسي
وثالث الأطراف ماخلوا يكمل فتحوا بجمجمته نار
موتت الثوار عند الله انكسار
تكسر ضهور الشمس من تنطفي بعز النهار
وقبل لا نغفه اتفقنه
نخلي يم كل خيمة حارس
نغفه ويفززنه خاف يموت خامس
وصاح گعدو الوطن نام
گعدو ياشبان كافيكم أحلام
بردت الگاع وطفت نار الخيام !
گعدو مو هيج اتفقنه منين اجيبلكم أرقام
گعدو خل احسب عددكم
واحسب أشجم علم🇮🇶 عدكم
ولكم شكد مهنة توجع مهنة اليحسب أعلام
حسن قاسم