7934
لنشر قصائد مناسبات اهل البيت
وليُ النعمه فداء الأسمه
اللهم ارزقني الخدمه
وحب الحسين
***
عبد وبسـوگ النخـــاسه مــن لگاني
حسين خلف الله عليه من اشتراني
چنت وين وهسه انــي انسـان ثاني
خــاف يـعتــقني وارد انــوب اعاني
اشيدور غيره اليعيش بخيره
يتفايض حنيه ورحمه
گلبه الحنين
اللهم ارزقني الخدمه وحب الحسين
***
گالو حسين اشنطاك اتحـبه هالگد
گلت خير امن الله افضاله ومتنعد
شنو قيمــه لطمتي وثـوبي الأسود
بالمقابل جســمه بالحــافر تـفــرهد
درب للحافر حبيبي صاير
ومحزوز بكل قسوه
منه الوتين
اللهم ارزقني الخدمه وحب الحسين
***
عايش بــعالم خدمـــته وصـــافي بالي
وبالـــهمـــوم المـــو بـــحبـــه ما ابـــالي
خادم حــسين البــشـر تنـــظـرله عــالي
اليمشي ويه الغالي يصبح سـومه غالي
اليعيش اجروحه رحمته اتلوحه
وكون اتعلم هذا السر
امن ام البنين
اللهم ارزقني الخدمه وحب الحسين
***
ارزقــني يارب عافيــه ما گــول هالعام
ارزقني يارب جمره من جمرات الخيام
بلكي احــس بجروح واحد مـن الايتام
ارد اشــوفن كــربله شگــــد بيـــها الأم
الظهر كون احمر بســياط العسكر
وكون امن ادموعي الهماله
تعميلي عين
اللهم ارزقني الخدمه وحب الحسين
***
حسـين احـَن من امي يــالوادم عليه
شلــون ما بردانــــه اكــَـمـش للمــنيه
مـــاردت مــنــه جـــزاء ولا عـــطــيه
ردت بس يرزقني شوغه امن السبيه
امن امرن بالتل اعيــش المـقتل
وعبدالزهره الكعبي براسي
طول السنين
اللهم ارزقني الخدمه وحب الحسين
***
حسين اذا هــد ايدي يتقرر ضياعي
عمري من غير أبو اليــمه ماله داعي
ارزقني ياربــي اعيش اويه النواعي
لحد ما من اللــطـم اهــشم اضلاعي
ونيــني دائم الظهور القائم
ديني حسين الغالي وغيره
ماعندي دين
اللهم ارزقني الخدمه وحب الحسين
*
حيدر تركي الكربلائي
محبين .. عوابس
مجانين .. مجالس
ويســمونه خـــام حســـين
***
حــي الله ارباب المجـــالس والحــزن والدگ
حي الله وادم بالبـــچي اعله حسـينها تشهگ
حبينه والعاشگ صــدگ مفضوح من يعــشگ
تــعتگ الدنيا ويبقـه حـــب احســين مايعتگ
بالحسين .. ننافس
مجانين .. مجالس
ويسمونه خدام حسين
*
الديــن الـــمجالس نتبـــع لحــد يــوازينه
گالوها أصـحاب العقــل كل واحــد ودينه
الشــعب الحــسيني يامن اتدور عنــاوينه
عاصــمة حبنـه كربله وريسـنه أبو سكينه
اهل دين .. مدارس
مجانــين .. مجالس
ويســمونه خــدام حسين
*
الرايـــد يـــشوه هالدرب بفكـــار مســمومه
هـــالفــكر لا مناقـــشه القـضــيه محســومه
الشگگ اهدومه امن العشگ لا واحد ايلومه
عابـس قبلنــه بكــربله هـــم شـگگ اهدومه
المضدين .. نعاكس
مجانيـن .. مجالس
ويسمونه خدام حسين
*
لحسين ماضينه نعم وحسين حاضرنه
ننطي رگـــبنه مـن اجل تعلــه شعائرنه
دولة المهدي من تجي تجبـر خواطرنه
بيـها النشيد الوطني حسين بضمايرنه
للـونيــن .. نؤانس
مجانين .. مجالس
ويسمونه خدام حسين
*
احـــنه عقـيدتــنه البــچي والنوح والدمعه
مابيها شي يامن تضـد كل واحــد اوضـعه
طبعه الذي ايحب من صدگ ميغيره طبعه
هيچ أبو اليمه اهل الـهوى ايعـدونهم ربعه
ملمـين .. بهوى الحس
مجانين .. مـجـــــالس
ويسمونه خدام حسين
*
جــننه حــب المنــذبـح أي نــعم جـــننه
مجلــسه الجنه وياهو يگدر يترك الجنه
ناس احنه نهوه القامه واللطمات والونه
لا مــانـــزل وهـالفـــكر يانـــاس نتـــبنه
مبغضين .. التقاعس
مجانيــن .. مجـالس
ويسمونه خدام حسين
*
حيدر تركي الكربلائي
قبــلت عنــي لـــو ماقبــلت الوادم
المهم يحسين بعيونك اضل خادم
***
المهم رايك وغيرك مومهـم رايه
يالمــرايه الــذي مامــثلك مرايه
عــن لا نـبتعد وتـطول الحچايه
المالازم خدمــتك كلشي مالازم
*
ما طب بالعمق لكـن رؤوس أقلام
بس انــته الوحــيد اتقيم الـخدام
التقبله مو شرط معروف بالاعلام
المهم معروف عند الطاهره فاطم
*
اليخدمك مو شرط آن يرتقي المنبر
يـجوز اليكنس بمجلسك حضه اكبر
هـــنيئــاً لليـــعرفك ياابــــو الأكـــبر
واليــوصل الـــهاي الـمـــرحله عـالم
*
اليوصل مرحله بحبك تـقـلده الناس
واكيد ايوقع ابصك خـدمتـه العباس
العدل ويــاك يمشي وما يطخ الراس
وحـــق حمــزه الزغيــر هـذا ما نادم
*
مايندم الگـــلبه بخدمتـــك نـابـض
القابض عالخــدامه عالـجمر قابض
الماحـافظ محبتك دينـــه ماحافظ
واليفـــتهم حـــبك يــُعـتـبر فــاهم
*
والــيفتهم حـــبك يفتـــهـم عــاشور
اليحس بوگفة التل خاطـره مكسور
اليفتر عالمـجـــالـس فـــرة النــاعور
تحسبه احساب الأكبر ابنك وجاسم
*
العايش عمره كله ايســولف بطرواك
حشه تنسى الذي كل عمره ماينساك
يبــو السجـاد تــــدري تــايه ابــلايك
من تعـــوفني تدرينــي اضـــل هايم
*
عليك ابـــداعــة السلـــبو تراچيها
اسلب كلشــي بس الخدمه خليها
وجــمرتك بيـــه فــدوه لا تطفيها
وي جــمرة احــزانك انا مــتراهم
*
حيدر تركي الكربلائي
يــا اول واخــــر عــشگ
شو بـس الك گلبي يدگ
حســين بــس الك عاطفتي
حســين يامـــلح ســالفــتي
حســين يــا ابـا عـــــبدالله
***
حبـــتك ويـدري الله شـگد حبـي يابــواليمه
الحد ما وصلت المرحله الوادم يگلولي اعمه
ماشــوف غيـــرك ســيدي والحــمدلله نـعمه
هــوه اليعيـــش ابعالـمك مــيريد ايــد تلزمه
عيــشـــنـي مــولاي بــولـع
خليني احس معنى الجزع
حــسين ولا ماتفارگ شفتي
حــسين ياملــح ســالفـــتي
حــسين يـــاابــا عـــــبدالله
***
اتنفـــسك باللـــحـظات واتلــــذذ ابأنــــفاسي
نص ســاعه اذا ماارثيك اعتبر روحي قاسي
انسه امي صَدگ مرات وشخصك ابد ماناسي
غـــيرك وحـــق العباس مــحد يعيــش براسي
يالمنتشلني امن العدم
اغزلني بخيوط الخيم
حسين وكثر بمـعرفتي
حسين ياملح ســالفتي
حسين يـــاابا عـبدالله
***
عطشان بس مو للماي عــطشان للــون والنوح
محتاجـلك يامـــولاي يالمــجلسك يروي الروح
بهالحاله وانته اعله الگاع وللدنيا چفك مفتوح
مذبوح وتــلم الناس اشحال انــته لو مامذبوح
بين الحوافر والرمل
وتوزع اثـياب الطفل
حسين يابعـد طايفتي
حسين ياملح سـالفتي
حسين يــا ابا عبـدالله
***
يقــرون گـدامي أســماء وما يرف جفني اعليها
وحاء اسمك امن يذكرون يفز گلبي من طاريها
كـــلمة احـــبك والله ثـــق بـس الـك حاچـــيها
الـماشـافتك نــور ونـــار ياابــو علـــي اعمـــيها
ارزقني مـــن نــارك لهب
ونطيني توفيق ام وهب
حسين بهذي انته التفتي
حسين يامـــلح سالــفتي
حسين يـــا ابـــا عبـدالله
***
يالماخذ اگلوب الناس ارحمني ياابو ارقيه
مجنــونك وما اخفــيك مــولاي تعلـــم بيه
الالــف وتســعمية جرح بــيهــن امــر ليليه
ودمعة عيوني سيدي بخـدي احس مسبيه
يالراســك بــراس الرمح
الدمعه عله مصابك ربح
حسين الروحي اگول اشفتي
حسين يــاملـــــح سالــــفتي
حسين يـــاابــــا عـبـــــدالله
***
حيدر تركي الكربلائي
للبقبع
.
.
.
مـــنـــارات.. الــمــزارات .. الســماوات
بچت من دم عليها
_____________
لأن علــويه البقــيع وتعـتبـر قـــدسيه
ابلاتــردد شمــر قـرر يسـبي هالعلويه
والمثل هالگـاع زحـمه تنـوخذ مسبيه
ولـسه ماردت اسيـره عنــد ابن تيميه
جراحات .. الــمــزارات .. الســماوات
بچت من دم عليها
_____________
اللجمه الاولى ام البنين اتعنو ايهدموها
چيف من كربـله ثــار امــربع ايطلبـوها
بغضــاً ابعباس هــمه بالــثـره ســـاووها
فـرصه ثارات البقــيـع ولازم يــوفـــوها
رويـــات .. الــمــزارات .. الســماوات
بچت من دم عليها
_____________
من هــوت هاي المــناير هـوت چن السبعه
اعيونها مــن البــواچي بيــها ماضـل دمعه
ظلمه هسه وابو صالح يـحترچ چن شمعه
على كسر اظلوع گــبر الحسن كاسر ظلعه
معـــانات .. الــمــزارات .. الســماوات
بچت من دم عليها
_____________
مهــبط الاملاك گــصدو بابــها ايحــرگونه
وبالصــبر بعــل البـقيع امــگــيد ايعـرفونه
امن الدمع گبر ابو الزهره مغورگات عيونه
حـقه كــودا شــاف خدها لــمن يسـطرونه
ويلچمات .. الــمــزارات .. الســماوات
بچت من دم عليها
_____________
زمـــره للتــخريـب جايــه وللــذبح عـــنايه
اتغيــضهم فوگ البـقيـع العـلي تخفگ رايه
تــره بالتاربخ محــد ســوه هيــچ اســـوايه
اگبور اهل البيت وسفه اويه الثره مساويه
اعله رايات.. الــمــزارات .. الســماوات
بچت من دم عليها
_____________
فكرو بامر البقيــع شـلون تخفي انفاسه
گــام واحـد گال منهم كون نگـطع راسه
حتى لاواحد يــزوره اولاتگــصده نـاسه
اتهدم اول ما شمرهم عله صدره وداسه
نهــايـات.. الــمــزارات .. الســماوات
بچت من دم عليها
_____________
حيدر تركي الكربلائي
يهدى ثواب هذه القصيده
لروح خادم الحسين العم ابو عباس الجبوري
للبقيع
.
.
.
انته يالجرحك وسيع .. نـدري ثـارك مايضيع
يمته يالمهدي تصيح
يالــثـارات الــبـقيــع
__________________
يمــتــه يالـغايـب تجـيـنه يـالغـيابك عـجـبه
صــار كل جمـعه البقـيع اويـانه يقره الـندبه
لشـوكت نـبقـه الغيابـك يــوم يـوم انحـسبه
شـوگـنـه يالـمهـدي زاد وعـالـنـجـوم انكــتبه
وندعي يارب ياسميع .. نـدري ثـارك مايضيع
يمته يالمهدي تصيح
يالــثـارات الــبـقيــع
__________________
الحاكم الـموعد ظهورك ظـل يعد انـفاسه
وخـل يفيدونه الحمايه وزمـرته وحراسه
كلــمن اتعــنه وتعـده عالبــقيــع وجــاسه
الـهــدم طابـوكه تـهـَدم كون باچــر راسـه
عالجسـَر ردك سريع .. ندري ثارك مايضيع
يمته يالمهدي تصيح
يالــثـارات الــبـقيــع
__________________
الگال اهدمها المراقد على الشيعه وخاوه
هـذا بطـران اليريد اويــه الجــبل يـتلاوه
جـبل احــنه وهمه تــل وابــد ما نتــساوه
اعروشهم هشه يمهدي ومن تجي تتهاوه
تهوه تيجان الجميع .. ندري ثارك مايضيع
يمته يالمهدي تصيح
يالــثـارات الــبـقيــع
__________________
البقيع امـتاني شخـصك والظـهور ايريده
عيده من تظهر يغايب وانته تدري بعيده
انشــالله اتــرد بالسلامه والبــناء اتعــيده
والـيمد ايده اعله مرقـد انــته تكسر ايده
وللحكم سيفك يذيع .. ندري ثارك مايضيع
يمته يالمهدي تصيح
يالــثـارات الــبـقيــع
__________________
إلبقــيـع اعــليهــا سيــطر زمــره وهــابيه
يمــته يامهـدينه تصـبح هـالارض شيعيه
واليــجي زايــر يشوف اقــبابها الذهبــيه
هـيه علويــه وجريمـه تنــسبـي العـــلويه
گلبك اعليها فجيع .. ندري ثارك مايضيع
يمته يالمهدي تصيح
يالثارات البقيع
_______________
حيدر تركي الكربلائي
شهادة امير المؤمنين
بس حاچيني وخفف همي يابو حسين
راسك لوگلــبـي المتــدمي يابو حسين
نيران السكـــتــه اتچــويني
الخاطر ظلع امي اتحاچيني
راسك لوگلبــي المتـــدمي يابو حسين
-------
يالچنك هـــوه الــريه .. علامـــك ماتــمر بيه
يالــتتـــبده حنــيـــه
تعـال
شو يابالحسن سكته .. مو طبع السكوت انته
چا يمته الحچي وكته
سؤال
احسبني وحده من الايتام
الراسي امســح قبل متنام
انته اكثـــر شخــص تدري
اشضــامتلي بــويــه الايام
من تغفه اعيونك يعيوني يابو حسين
الوادم بالطف ايســلبوني يابو حسين
ايذبحون الچــان ايحامينـي
الخاطر ظلع امي اتحـاچيني
راسك لو گلبــي المتدمي يابو حسيـن
----------
انچان امن الحچي تتعب .. گلي حــتلو زينب
تـطفي ابداخلــي التلهب
عليك
حرگت نـــارك اضلوعي .. وما أذاك مـوضوعي
امن الون وصلت ادموعي
لديك
يوجــع المـلـچـــوم هالليـل
وتــدري بيــه مابقــه حــيل
بعــد منــتظــرتني الطفـوف
اهناك خدري اتفرهده الخيل
ماجاسـت گلبــك وناتي يابو حسين
اگعد گوم امسح دمعاتي يابو حسين
من متـــجاوبنـــي اتــأذيني
الخاطر ظلع امي اتحاچيني
راسك لو گلبي المتدمي يابو حسين
----------
يالداخل حصن خيبر .. ويمسوي الزلم معبر
امسبل ايديك ياحيدر
عجيب
گلبي اتســله من نارك .. لامــتطــمن اخبارك
مامعـــقوله عـــن دارك
تغيب
انته روحـي ولمــن اتــروح
تنــحسب زينــب بــلا روح
بگد جرح راسك يبو حسين
گمـت احـس دلالي مجروح
ماتنسه ادريك وماناسي يابو حسين
ياليــوميه اتقــبل راسي يابو حسين
شو هــاي الـمــره مخلــيني
الخاطر ظلع امي اتحاچيني
راسك لو گلبي المتدمي يابو حسين
---------
يبو سالوفة العذبه .. گلبي تقبل اتعذبه
يامن روحتك صعبه
وعذاب
زينب انته غالــيها .. هيچ ايصير تاليها
اتروه مــن بواچيها
التراب
حالي بعدك والله مـــو حال
اهموم هجرك كلـــش اثگال
البيـت وحشه ياخذ الحــيل
عمري عگبك كــونـه ماطال
بس فك اعيونك وانصفني يابو حسين
متــأكــده لا ما تـــعـــرفني يابو حسين
مصابك مو انــي مســويني
الخاطر ظلع امي اتحاچيني
راسك لو گلبي المتــدمي يابو حسين
-------
يالتارس ضوه ايامي .. گبالي وگلبي الك ضامي
شحالي وانطر احلامي
بعيد
مامتعـــوده ماشــوفك .. كمـــل بــويه مـعروفك
تمش اخدودي بچفوفك
اريد
مايضل لي باچــر احبــاب
وتدري ما اتحمــل اغيــاب
اشلون بيه اهناك اذا شوف
ابكربله اخــوانـي عالتـراب
اقســـملك جفـــني ماينـشـــف يابو حسين
اشلون اسكت ومتانيني الطف يابو حسين
الــموت ابكـــبره مينســيني
الخاطر ظلع امي اتحاچيني
راسك لو گلبي المتدمي يابو حسين
-------
حيدر تركي الكربلائي
لسان حال يتيم
وداعـــاً يــاعــلـي وداعـــاً يــاعــلـي
________________________
يتـيم انه وحياتي اورود مــغروسه
اولـو مابيــها انتـه اهموم متـروسه
يـفـرح بــاب بـيــتي لــمن اتــدوسه
واحـس ابقيمتي من راسي اتبوسه
أبو انته إلي وداعاً ياعلي
___________
الك يومين الي شـو ما اجـيـت انته
والـِتـكفــلتـه لا مــاينــعـقل عــفــتـه
وتره اعليك ابصلاتي الباري ناشدته
ابــكـل تسبيـحه اسمـك انــي دورته
دليلي مبتلي** وداعاً ياعلي
___________
فـقير انـه واحبك چـيه تحــب فقري
تـابــوتك لمــن شــفتـه كــسر ظـهري
اتلــت تــيام هـيه الــفاتحـه وتــدري
وراح انصبها الك بعيوني كـل عـمري
انه بحاجة ولي** وداعاً ياعلي
__________
اشـگد مابيه هـم لــن الـيتم قاسي
اصير اسعد بشر من تمسح ابراسي
أســمحلي اگــلــك يـــا اعـــز نـاسي
العيشه اوياك حلوه والهـا مانــاسي
علي وانته هلي** وداعاً ياعلي
___________
اغلـط باليتم مــن احسب احـسابي
چي ماعندي شي تركوني اصحابي
وچفـك چــان حيدر مـن يـدگ بابي
احس بالدنيه كــلها صارت احـبابي
نحيبي يعتلي** وداعاً ياعلي
___________
اليـتــم ويـــاك ماحـس ابمــأسـيه
عـليك اتعـودت تطـرگنــي يـوميه
چـنت اتـگــودني وتنطــيني حنيه
عـطر چـفك يحيدر لـــسه بيــديه
ولهسه ابمنزلي** وداعاً ياعلي
___________
الـناس اتـشـَيـَعك وانــه اعـتـله نوحي
واحس يابا الحسن چن شيعت روحي
جـرح بـــيه وحيد وهـــَدم اصــروحي
بيــه اشلون هــسـه وزادت اجــروحي
ودليلي منملي وداعاً ياعلي
_______________
دفــانك نظــرلي وانــه حــاچيته
يـبـويــه ياعلــي يـامــا تـرجــيته
يــريت اويــاك يــدفنــي تمــنيته
بدونك عمري لا مايـسوه حسيته
الحزن ماينجلي وداعاً ياعلي
___________
حيدر تركي الكربلائي
لشهادة امير المؤمنين ع
.
.
.
كافـي مـوكـسرتي الظلوع
بـويه زينب بـسـچ ادمـوع
دمعتچ چنها نـهـر .. خلـت ابخـدچ أثــر
بـويـه زينــب
_____________
اشـبيـچ يابـويـه يـزينـب ليـش عيـنـچ حـمره
ليش كل هذي البواچي ابراسي بس هالطبره
شلـون لـو شفتـي اخـوچ حسين فوگ الغبره
وبذنـچ اتسـمعين مـن الـخيل تطـحن صـدره
گلبچ ابهالساعه شـيگول
لـَمن اتشـوفين الخــيول
اتساوي صدره اويه الظهر .. خلـت ابخـدچ أثـر
بويه زينب
_____________
ليـش كل هـذي البواچي وانـه يمـچ گـاعد
آلمـتـني ادمـوع عيـنچ بـويـه الله الـشـاهد
ارد انصحچ بويه زينب ابچي بس الـواحد
الشمر لوشفتيه يبويه فـوگ صـدره صاعد
حتــى لـو تعــمين العــيون
للحـسين اعـيـونـچ اتهــون
ادري دمعات النظر .. خلـت ابـخــدچ أثـر
بويه زينب
_____________
جرحي بس واحـد يزينب بـويه لا مو ميه
وحرگت اخدودچ دموعچ بالبواچي اعليه
اشلون اخوچ اتشـوفه عينچ جثته مرميه
من يصـيح الشـمر بسمـچ يالله يالمـسبـيه
وانتـي مـوبـيـدچ تظـلين
اويه الشمر لازم تـروحين
اتمَوت اجروح الدهر .. خـلـت ابـخـدچ أثـر
بويه زينب
_____________
انــه للــعبــاس گتــلــه بـويــه لـَـتخلـــيها
اختك امن اتريد ماي امن العيون ارويها
بـويـه زينب والـشريعـه بالـچ اتگـصديها
رايحـه العباس اگـعـده فــدوه لتـگـوليها
يستحي مگطوع الچـفوف
عالشريعه طـولچ ايــشوف
وظهره الحسين انكسر .. خلــت ابخـدچ أثـر
بويه زينب
_____________
جرحي بس من صوب واحد ينزف اتشوفينه
ولجـل جـرحي دمــع عـينچ من دمــه اتهلـينه
حســـين باچــر عالتــراب امطــبر اتعــوفـينه
اچفــوفــچ امـربطه بويـه وبـيمـن اتــداوينه
عـلى جسـمه من تمـرين
مــا الومــچ لوتمــوتــين
الظعن من ابجسمه مر .. خــلـت ابخـدچ أثـر
بويه زينب
_____________
اخوانچ ومن تغفه عيني جسمي ميتركونه
ابـچـي عالـيـبقه ثــلاث ايــام ميــدفــنـونه
عــادت الميـت يبــويــه بـچــفــن ايلـــفونه
وبـس الحسين ابحــصيـره لـَمـن ايچفنونه
يختلف عالمـوته الحسين
لاغـسل وبـلايه تچـــفين
ابدفنته جاچ الخبر .. خــلت ابخــدچ أثـر
بويه زينب
______________
تمت والحمد لله في ١٤ / ٦ / ٢٠١٧
حيدر تركي الكربلائي
قصيده گعده
.
.
.
لا اسلام عدنه اولانبي عاش
لو ما ياعـلي بايــت بالفراش
تضحيتك يبو حسين
عد الله اشكبرها
----------
يوم اظلم چان مــنه اتـــفوح رائحــة الــنذاله
اجتمــعو الكــفار رادو تنــوئـد روح الــــرساله
وبتـت بفراش الرسول بكل عزيمه وكل بساله
في حينها الــوي النبي .. بالغار يرجف چن صبي
الحسبوه علينا صاحبي .. چان خايف من خياله
امكان الهادي رادو يكشفونه
فلان بكثر متطگطگ اسنونه
الباذل روحه للدين
عد الله اشكبرها
_
لاقريش او لازلمها المصطفى چــانت تخيفه
وموش ياهـو الجان يگدر طه بفراشه يعيفه
المغزه حتى ايبن النه ياهو من بعده الخليفه
فوگاك من جان الخطر .. لازيد جان اولاعمر
چانو يعبدون الحجر .. ومنها صعدو للسقيفه
الدنيه شــلون دنــيه ابـلايه انصاف
اليجيها اخلاف يركب فوگ الچتاف
لكن وگفة الزين
عد الله اشكبرها
-------------
يلعب الاعـــلام دور اچبــير بروقة السياسه
المشكله ابنادم اليوم ابكرسي يتقيم قياسه
تلگه واحـــد هوه فارغ لكــن مكــبرته ناسه
للفخفخه لامانــهــم .. مـو رابع انته اول اسم
شنسوي للمايفتهم .. خل يطخ بالطوف راسه
لو ما يمنـــتك يا ابـــو الحسنــين
شعـــيط معيط ماصارو سلاطين
يالضارب بسيفين
عد الله اشكبرها
__
يلي وگفاتك اهوايه ياعلي والله اشكثرها
اي يمن تاريخك ابيض نفتخر كل مانمرها
روسنه چا گرعوها لــون عد غيرك عشرها
يالسيفك امطلگ الغـمد .. گــول وفعــل لمــن تهد
بيدك جبت راس ابن ود .. الچانت وياك اشعذرها
خلف الله اعله چفك يا ابو اترب
يالرجعت مـــاي اوجوه الاصحاب
تالي الماوفه الدين
عد الله اشكبرها
-----------
شلت دين الله اعله متنك واحملت شتى الاذيه
يامن افضالك چثـــيره لاهـي وحده ولاهي ميه
لـــوحچيــنه بيهــا گالــــو ماشـبـــعتو طــــائفيه
ابهذا الوتر وادم تدگ .. مـارادو اليحچي الصدگ
خلونه گلــنه نحترگ .. بحب علي حامي الحميه
الهوس ياعلي الغــيرك يريــدوه
واليحچي بمديحك شو يكرهوه
وحچايتنه بعدين
عد الله اشكبرها
--------
حيدر تركي الكربلائي
مولد الامام الحسن ع
.
.
.
هله هله .. هله هله .. كــل الوجود اتغنه
هله هله .. هله هله .. بسيد شباب الجنه
------
صوت السماء الليــله أذن .. مليــون اهـــلا وســهلن
واليسئل اعله الفرحه ليش..وجه السماحه انگله بين
وجه الحسن شعشع ضياءه .. وبارينه زينها السماءه
خـذ ياعلي حتـى تشـاء .. واسجد شكر لله وعطاءه
هله هله .. هله هله .. وحقك لون تتهنه
هله هله .. هله هله .. بسيد شباب الجنه
-------
صدت على اعيونه الوسيعه .. وتبسمت امه الوديعه
وتصيح سبحان الجليل .. يشبه على حامي الشريعه
عم الفرح بيــت الرساله .. وجـــه الـحسن لمن تلاله
من وجنته الجوري يغار .. ويتــغزل بحسنه وجماله
هله هله ..هله هله .. ايگله العلــيه يتدنه
هله هله .. هله هله .. بسـيد شباب الجنه
--------
بعده بحظن امه العفيفه .. واســس ابو محمد مضيفه
هــنا الكرم هنا العطاء .. مكتوب في گصته الشريفه
صاح الوصي الكرار حيدر .. اليوم الكرم للدنيه اسفر
وكل ما اشيلــن هالــوليد .. الصوب الدلال ابعينه اشر
هله هله .. هله هله .. باسـه ويسولف عنه
هله هله .. هله هله .. بسيد شــباب الجنه
--------
شمس الله هيه ومو سواها .. من وجنته اخذت ضواها
هوه الحسن قابــل قليـل .. الدنـيا بعوالمها احتواها
ابطن السماوات العليه .. فرحــه ويزفــها الله النبيه
ويصيح جبريل الامـــين .. الله بعـثـــلك هــالهــديه
هله هله .. هله هله .. وجــه ابو الزهره چنه
هله هله .. هله هله .. بسيــد شبــاب الجـنه
-------
نسل النبــوه والامـامـــه .. وتلوگله مبينه الزعامه
الوالده حيدر شي اكيد .. متروس تلگاه بالشهامه
غيرته غــيره هاشـــميه .. وخزرات عينه حيدريه
وجها مثل طـه الرسول .. شايل صفاته الاحمديه
هله هله .. هله هله .. لعــيون ليحسدنه
هله هله .. هله هله .. بسيد شباب الجنه
------
يمشـي الكرم هــوه بوريده .. وفاتــح لكل الــناس ايده
البيت اهله اذا خطار يلفون .. يفرح وچـن اليـوم عيده
كــله كــرم وايــام عمــره .. شيسوي ابو محـمد بكبره
طاري الكرم لو مر اكــيد .. اسم الحســن لازم نذكره
هله هله .. هله هله .. واشفافنه ايــرتلنه
هله هله .. هله هله .. بسيد شباب الجنه
--------
حيدر تركي الكربلائي
لميلاد الامام الحسن ع
.
.
.
انه محبوبي .. محبوبي .. محبوبي الحسن
انه محبوبي .. محبوبي .. محبوبي الحسن
__________
اعليه اسئلو الوادم .. امسودن انه وهايم
واليـريـد ايـشوفني .. ايـصـير مثلـي لازم
مثلـي كـون افعـاله .. الحسـن ساكـن بـاله
المــامجـرب روحـه .. لايـــگـــول اشـمـاله
هواي گالولي .. گالـولي .. گــالــولــي لـمن
انه محبوبي .. محبوبي .. محبوبي الحسن
__________
الله يدري بغايـتي .. من حچيت احچايتي
البعض صـَدگ بيـه .. چـيـف بيـضه رايـتي
أكـو ميــصـدگـوني .. الحـجة الله اجـنوني
حچو عني اهـوايه .. كـــوداً ايــكــرهــوني
ولليحبوني .. اچفوفي .. اچـفوفي انـدعن
انه محبوبي .. محبوبي .. محبوبي الحسن
__________
بالحـسن محـبـوبي .. المـايعـجـبه اسلـوبي
انــه اريــد اعـلنــها .. لايــــگـــرب صـــوبي
أبتــعــد گــالـــولي .. وانـــه ادري ابـــذولي
واعــرف ابنـيتــهم .. همــه مــن حلــفــولي
ظنهـم اتنازل .. اتـــنــازل .. اتـــنــــازل لان
انه محبوبي .. محبوبي .. محبوبي الحسن
__________
بعـيني اشوفـن أيه .. وبسـمــه امـسـمايه
المــاقـبــل لايـقــبل .. كل شخـص وبرايه
المـاعــرف معــناها .. گـــَلــي لاتــقــــراها
خـوفــي لافــسرها .. ومنـه يـزعــل طاها
دومـي اقراها .. اقــراها .. اقــراهـا بشجن
انه محبوبي .. محبوبي .. محبوبي الحسن
__________
امجدي جـاي ابــابه .. انـــي مـثـل احـبابه
والحــســن ادريـــبه .. مــــايــــرد طــــلابه
چــفي مـــن مـديته .. خــالــي مــــارديـته
بيدي صـك انطــاني .. وبي شفاعه اقريته
اعرفته يشفعلي .. يشفعلي .. يشفعلي اذن
انه محبوبي .. محـبوبي .. محبوبي الحسن
__________
الماوصـل لـي ابحـبه .. هــــذا هــــوه وربه
لايــشــــهـــر بـــيــــه .. السمعه جدا صعبه
ناصــبي اليبــغضني .. وابـــد لاميـــحـبني
عـلى اقــل احـچايه .. اجبـال بيــها يــبني
رايــد اعلنــها .. اعلـنهـا .. اعــلــن للــزمـــن
انه محبوبي .. محبوبي .. محبوبي
حيدر تركي الكربلائي
لمولد الامام الحسن ع
.
.
.
مولاي .. ياكــريم اهــل البـــيت
ياكريم اهل البيت
_______________
هايــم بــيــك والله اليــدري .. يالحبك مخزون بصدري
مايوفيلك اعرف شعري .. يامولاي
الاحلامك عطشانه اعيوني .. ومجنونك خلي ايسموني
اغلب هالناس ايأيدوني .. يامولاي
فــرض امحبــتك من صليته .. دلالــي ابحــبك وضيته
يا اكــرم واحـد حبيته .. يامولاي
دعواي .. ودعوتي من ناديت
ياكريم اهل البيت
__________
البيتك من انه اتعنيته .. بابــك اول مــادگـــيته
خيرك گدامي بديته .. يابو الخير
مايرجع خالي اليـتعنه .. كلمــن يــم بابــك يتدنه
يالخيرك من خير الجنه .. يابو الخير
موعجبه المثلك يتخلد .. ولاعجبه المثلك يتمجد
يابو محمد يابو محمد .. يابو الخير
رجواي .. وحقي من اترجيت
ياكريم اهل البيت
_____________
يلي استوطنت ابنظراتي .. يا اعذب واجمل كلماتي
احروفك يالمجتبى اياتي .. ياقران
اسمك غافي بطرف الساني .. ودوم ابذكرك الهج اني
هادينه ابحبك وصاني .. ياقران
حبك غايه واجمل غايه .. رأيــي وكلمن يمشي برايه
الميعجبه لايمشي اويايه .. ياقران
نجواي .. وافتخر من ناجيت
ياكريم اهل البيت
_________________
احلـــف دلالي ســديـــته .. وبــيه وحدك انتـه الخليته
مايعـشگ غيرك وصيته .. بهذا الكون
يالتارس عطرك انفاسي .. وبسمك سمتني اغلب ناسي
اختاريتك تاج انته الراسي .. بهذا الكون
خط احمر غيرك ماعندي .. بكل ما املك شخصك افدي
انــي واهلي ومــالي اولدي .. بهذا الكون
مسعاي .. والرضاك انه اسعيت
ياكريم اهل البيت
________________
اليمي اتعنه ورايد يسئل .. خل يتحملني ولايزعل
گتله الشخص ابگلبي الاول .. مثل النور
مثل النور اعيوني اتشوفه .. اتغــزل رايد بحروفه
اعمه وتـشافيني اطـيوفه .. مثل النور
عـن حــبي ظنه ايــبدلني .. وگد الشـعره ميزلزلني
گتله الحبــيته ايعاملني .. مثل النور
وهواي .. ابهالادله انه انطيت
ياكريم اهل البيت
_______________
مشتاگك يالشوگك جمره .. ويمك يايوم اوصل واقره
ازياره واگعد وسط الحظره .. بس يايوم
والقبــه اتــلالي الـزوارك .. والمهدي ايضيف خطارك
ويــرد زاهي وعـــامـر دارك .. بس يايوم
بس تفرج صدگ ما تاني .. ويم بابــك خادم تلگاني
عــنواني يــمــك عــنواني .. بس يايوم
سلواي .. وصدگ انه اتمنيت
ياكريم اهل البيت
__________
حيدر تركي الكربلائي
ميلاد الامام الحجه عج
.
.
.
والـيـنه .. مهدينه .. تـدريـنه
مشتاگين
_______
يشـهد الليـل ونـهـاره .. صرنه من شوگك حياره
المنتظر ماتطـفي ناره
يابو صالح
الجَيتك نحسب ثواني .. احنه من شوگك نعاني
ايساعـده الله اليــتاني
يابو صالح
وينك .. الشامت اهوايه سئل
وينك .. مــابقــه عــدنــه امل
وينك .. يـامـه ناديـنه العـجل
وينك
حاچينه .. مهدينه .. تـدريـنه
مشتاكين
_______
أذنت بيـنه الضماير .. وحـَركت كل المشاعر
احنه كل جمعه نناطر
ترجع النه
يامه الك ندبه قرينه .. وگالو ادعو وندعينه
اشوكت بالله ياولينه
ترجع النه
غايب .. انــته يـــامــاي الــسمه
غايب .. الوجهك انحس بالضمه
غايب .. ليـش يــوسـف فــاطمه
غايب
اتروينه .. مهدينه .. تـدريـنه
مشتاكين
_______
اشگد الك احنه انتظرنه .. منتـظــرنه منـتظــرنه
ياهو اليطفي جمرنه
وانته غايب
گلنه بعد العسري يسري .. بشوگنه بس الله يدري
بينه نار الشوگ تسري
وانته غايب
صحنه .. يمـته تـرجـع يالمحب
صحنه .. اعليك ذايب چم گلب
صحنه .. الهجر يالغايـب صعب
صحنه
تحيينه .. مهدينه .. تـدريـنه
_______
يلي ذكرك عاش بينه .. امروتك بس مر علينه
سيدي يمته تجينه
يا املنه
ابجيتك يابو المحنه .. الدنيه كلها اتصير جنه
الگمـر ويـانـه تمـنه
يا املنه
ترجع .. كلــشي ينــتظـرك تره
ترجع .. للــگلـــوب الحـــايــره
ترجع .. انحلفك ابحق حيدره
ترجع
مر بينه .. مهدينه .. تـدريـنه
مشتاكين
_______
رددت هــاي الحناجـر .. يمتـه تجــبر هالخـواطر
ابدربك ازرعنه النواظر
وانته ماجيت
ودي ويه الغيمه صوره .. وجهك احتاجينه نوره
كل محب يهتف شعوره
وانته ماجيت
يمته .. بوجهك انكحل النظر
يمته .. ترجع النه امن السفر
يمته .. يمتــه هــايـالمنــتطر
يمته
اتمنينه .. مهدينه .. تـدريـنه
مشتاكين
_______
نذر النه لمن اتعود .. دربك انفرشه بالورود
انته بس جرب يموعود
هاي الاحباب
مابقه عدنه عـلامه .. ردنـه ياروح الامامه
ابوجهك اتشوف ابتسامه
هاي الاحباب
فرحه .. انته يـوم الي نجي
فرحه .. تحت ضلك نلتجي
فرحه .. اتصيح هذا مهجي
فرحه
امتانينه .. مهدينه .. تدرينه
مشتاگين
_________
تمت والحمد لله في ٢٤ / ٤ / ٢٠١٨
حيدر تركي الكربلائي
اقسم وحق القل هوه .. محتاجلك مثل الهوه
محتاجلك مثل الهوه
يابو صالح
-----------
ياحبيبي اوداعة اعيونك .. مجنونك .. تدريني تدريني
گلبي من گد فرگتك ذايب .. يالغايب .. ياذيـني تدريني
يمته ترجعلي واسولفلـك ضماي
إي يــماي الله الـذي مامثله ماي
الغيمتك يالمهدي محتاجه سماي
دلالي عگبك ماروه .. محتاجلك مثل الهوه
محتاجلك مثل الهوه
يابو صالح
--------
يامامي ومالك احساسي .. وانفـاسي .. يالــوالي يالــوالي
بدنيتي بس انته يالمهدي .. وماعندي .. كل غالي يالوالي
انته كل ما املكه بهاي الحياة
يانجاتي وغيرك امنين النجاة
الماتمســك بيك ايامــه شتات
وعليك دلالي انطوه .. محتلجلك مثل للهوه
محتلجلك مثل الهوه
يابو صالح
---------
گالو اترد يمته ترجعــلي .. ياخلـــي .. المنتظره المنتظره
ابگد عدد ايامك اجروحي .. وروحي .. منكسره المنتظره
خلصات ايام عـــمري ابأنتــــظار
الناس مثل الثلج وانه گليبي نار
يمته اشوفك يا امامي بأختصار
المايرهم الجرحه دوه .. محتاجلك مثل الهوه
محتاجلك مثل الهوه
يابو صالح
--------
شيب امن امناطرك رمشي .. وكلشي .. يتامل يتأمل
والي مابيــه ينتــظر صعبه .. گــــلبه .. يتحمل يتامل
ارحم الدلاله متـــفــطر عليــك
انچان لا مابيك جيه انه اجيك
امنية عمري اقبل كــون اديـك
المن شوگك ابگلبه انچوه .. محتاجلك مثل الهوه
محتاجلك مثل الهوه
يابو صالح
---------
كل خليه ابجسمي تتأهب.. وتترقب..اخبارك اخبارك
جرح هجرك حيل اذاني .. وخلاني .. اتشارك اخبارك
انته شغلي الشاغل البيــك التهيت
إي يـسالفـــتي ولاغــــيرك حچيت
انسه امي واهلي واسمك مانسيت
يمته يرف بيدك لوه .. محتاجلك مثل الهوه
محتاجلك مثل الهوه
يابو صالح
---------
الــدولة العـــدل الالهــيه .. ليــلـــــيه .. اتنطر اتنطر
امنياتي ناظري ايشوفك. ولچفوفك .. اتحسر اتنطر
ريـت كون ابدولتــك خادم اصير
وكون اشوفك وين ماناظري ادير
الشاف وجهك سيدي حظه چبير
هنياله من شافك ضوه .. محتاجلك مثل الهوه
محتاجلك مثل الهوه
يابو صالح
--------
حيدر تركي الكربلائي
أنا أتشارك 'قبلة عني لو ماقبلة عني الوادم تجليبه' معك
Читать полностью…
للبقيع
.
.
.
يابو صالح .. بينه لوعه وبينه نار
يابو صالح .. عـالزيـاره وعالـمزار
لامـنـايــر لاقــبــاب
والبقيع اصبح تراب
يابو صالح
_____________
مـن كـثر ماشوگ بينه نارنه يالمهدي تلهب
الله يشهد بينه وجت چنها نار اخيام زينب
المـراقد سـيدي مـن هـدمـوها
اظلوع احسين چنهم كسروها
البقـيع استـفردو بيـهـا اولـوها
مثل عمتك يمـهدي مـن سبوها
يابو صالح .. والشـمر رد من جديد
يابو صالح .. امتونها ايـزورگ يريد
جايب ابسوطه عذاب
والبقـيـع اصـبح تـراب
يابو صالح
_____________
مظلمه اگبور البقيع وچنها ليلة وحشه بيها
وراح تـذكر حـال عمتك انته من اتمر عليها
يشبــه حـال زيـنــب والنـساوين
مـن ظـلت وحيـده وتهـمل العين
اتصيح ويرتفع من عدها الونين
لاعـبــاس يــبـرال ولا احــســين
يابو صالح .. صوت اذا تسمع حنين
يابو صالح .. هـذا صـوت ام البـنين
تبچي بس عدها عتاب
والبقـيع اصـبح تــراب
يابو صالح
_____________
اي وحق ادمـوع قبــة زيـنب ودمعـات ناسك
شيبت روس المراقد مثل ماشاب انته راسك
اعيونك سيدي من البچي راحن
مـنارات البقــيع ابيــوم طــاحن
مـنارات الحسين اويـاك نــاحن
عجـل طلعتك يالـمهـدي صاحن
يابو صالح .. صحن ابو اليمه يصيح
يابو صالح .. بالبقيـع ابــنـي ظــريح
قبته ابعلـو السحاب
والبقيع اصـبح تراب
يابو صالح
_____________
اتبـَلل اتـراب البـقيع ابكـثر مـادمعـك تـهله
وحزنك اعله اگبور اهلك سيدي وياك صله
مـايـوگـف ابـد الـهـم بكـائك
اوياهم مسـتمر انته ابلقـائك
نحلفـك يالحـبيـب ابكـربلائك
من اتـزور اذكـرنـه ابـدعـائك
يابو صالح .. اذكرنه يمهم يالحبيب
يابو صالح .. الــك الله يـستــجـيب
يالدعائك مستجاب
والبقيع اصبح تراب
يابو صالح
_____________
يامن ايـدك بـاب الله يمـته باب الله نـقبَله
يمته يامهـدينه تظـهر لاتـظن الغـيبه سهله
على اغـيابك يمـهـدي الله شـاهد
اگلوب الشيعه چن صارت مواگد
يــايـوم وتــحـت ظـلـك نــجــاهد
ونبنـي بالبـقيــع احـنـه الــمـراقد
يابو صالح .. ونبني گبه الفاطمه
يابو صالح .. گـبه تـوصل للـسمه
يمته يخلص هالغياب
والبقـيع اصبـح تـراب
يابو صالح
_____________
حيدر تركي الكربلائي
مقدمة
.
.
.
اشــهدُ ان علــياً .. حجة الله علي
نــور الله علي
اسم الله علي
__________
علي مستقبل حــياتي وحــاظر وماضيها
دنــيتي ابـــلـياه اصــلاً دنيـــه ماســـميها
احچايتي ومابيها هوه مستحيل احچيها
السالفه مملوحه حـيل العلي حــاظر بيها
وما ابــالغ من اگــولن .. رحمة الله علي
نــور الله علي
اسم الله علي
___________________
علي بسـمات اليـتامه وكلـشـي اليمــلكونه
علي مـن گــد ماعــزيز العــافيه ايســمونه
علي شايل رحمة الله وكون تحچي متونه
تشبـع الوادم الفــقره بـس تشـوف اعيونه
الهالسبب روحي تحبه .. غيرة الله علي
نــور الله علي
اسم الله علي
___________________
الفقره بس حــيدر ابوهــم واني واحد منهم
وبس علي بالدنــيه كلــها هــوه يســال عنهم
گبـــل ميونون همـــه عـــلي ايـــون الـــونهم
ابچاله احس الفقره والله ملوك صارو چنهم
يهـوه باب الفقره هــوه .. باب الله علي
نــور الله علي
اسم الله علي
___________________
علــي بعد الله ونبـــيه علـــي هـــوه الاعــلم
علي من بطن امه مسلم موش شايب واسلم
اعليه احسـن بـي رحيم وعلي من امي ارحم
مــا اوافــي علــي انـــه شكـــثـــر ما اتــكــلم
انه شــموصلني واحـــچي .. سر الله علي
نــور الله علي
اسم الله علي
___________________
علي مدري ياهــو سمــاه البطين الانزع
كلــشي سامــع عنـه لكن ماسمعته يشبع
علي ماكو اقوه منه علي هــوه الاشــجع
لچن من ينظر يــتيم ابساع عــينه تدمع
ولهــذا انــه اهــوه .. لطف الله علي
نــور الله علي
اسم الله علي
___________________
ابلا علي مسكين اشعر واكسـر انـه الخاطر
بدنيــتي مــالي مـعـين ولا الــي كــل ناصر
خاطري مكسور اجيت وعلي وحده ايجابر
المثلي ينطي وجـها وين اوين يگصد باچر
تايه الماعنده حيدر .. وجهة الله علي
نــور الله علي
اسم الله علي
___________________
حيدر تركي الكربلائي
موشح للامير
.
.
.
الليله وحشه الليله مدري شلونها
ابلا عــلي الوادم انخـطفت لونها
-----
موحشه وتخنگ الروح اشهالامر
الليله چن الليله الاولى البــالگبر
رايدلها صــبر واحــنه ابلا صــبر
اخلاف حيــدر منچـفي ماعونها
… ..
اخلاف حيدر سالفــه وماتنحچي
ابچينه والمكسور شيفيده البچي
المـــاله بالدنيــا ظهــر لاينتـــچي
الشيعه عگـبه اعليــمن ايتچونها
__… .
علي رقه وعاطفه وطيبه وعفو
علي وحــچاياته متــروسه دفو
علي بس هوه كــفو وماكو كفو
علي الدنيـــا شـــالته بعـــيونها
-------
على وبلايـــه علي انضيــــع الـطريج
راكبين بمــركب وشـــب بيه حـــريج
انضل نموت . انطيح ياخذنه الغريج
وبــين هــــاي وهـــاي شـــتحـــلونها
-------
بـين هـــاي وهـــاي عيشـــتنه تعــب
الفرح من اوجـــوهنا اخلافـه انسلب
الماي اذا شح عالخصار اصبح حطب
الـــنار بيـــنه وماكــــو اليطـــفـــونها
-------
نار هجــر افراگ حيــدر ماتهيد
العيد راح ولحد ايسولف ابعيد
بالعرب تايـــه الماعنــده عجيد
الطايفه ابلا شيــخ شيسـمونها
____
اليتم چان ابضنــتي بـــس للـــزغار
الزيـــن ثــاري لو مــشه ايتـم الكبار
الدنيه صفره اليوم مدفون الخضار
احبابه بالــنوح وبچــي ايگــضونها
-------
احبابه بالدمعات والون والنحيب
موغريــبه المات حــزناً عالحبيب
مالنه بالزين يــــاوســفه نصــيب
شـــمعته وسفه العـــده ايطفونها
-----
حيدر تركي الكربلائي
تعديل👇👇
اعمال ليلة القدر
.
.
اول الاعـــمـــال هــاي اللـــيله
الحيدر اهشم هالصدر وابچيله
الليــله اعمال الــقدر
تبــتدي بلطم الصدر
هالليله
______
ليـــلـة اعمـــال وتهـــجد تــبتـــدي بالــنيه
وانـــي اللـهــم نــاوي ابـــتــدي بلــطـــميه
اغتـسل بدمـوع عيـني عيـني چيه شيعيه
ابثوب الاسود لازم اگصد لقرب احسينيه
قبل متشيل المصاحف ناسي
كــون بالقـامــه اطــَبر راسي
الليله ماعندي عذر
تبـتدي بلطم الصدر
هالليله
______
( انـا انـزلـناهُ ) لازم اقـــره هــاي الـسوره
وسورة القدرِ احـسها مثلي چـن مكسوره
كــوداً الـقران طـاح وهــامــته مـطــبوره
الليله قـران الله ويـنه ويـن غايــب نوره
استغفرت بس روحي احسها ابحيره
صـدري چــن مخنــوگ بالتـكـــبيـــره
ابروحي الهموم اشگثر
تبـتـدي بلــطم الصدر
هالليله
______
الليله اريده صدري كـون امن اللطم يتكسر
وگبل ماون على روحي العلي اون واتحسر
شلــي بالاعــمال وانـي مابچـــيت الحــيدر
ابـلا ادموعي العلي هايه اعمــالي ماتـتقدر
ادموعي لو بخدودي مايتبدن
ابـد ما اقــره دعـاء الجــوشن
وادري دعوات العمر
تبـتدي بلطم الصدر
هالليله
______
هـامـت الـكرار مصـحف هالـبشر يدروها
وفـاتـحـة قـران حـيدر زيـنـب ايسـموها
ولــذلــك ال امــيه هــامـــته طـــبــروها
حـــتى باچـر بنته زينب عالهزل يسبوها
كــل قصدهم تـنربط ذرعانها
ومحـد ايحاميها من اخوانها
وعالجــثث لمـن تمر
تبـتدي بلطم الصدر
هالليله
______
شـلون ما احـزن الليـله وزينــب ابحـسرتها
اتشوف ابوها الموت يمه وتشتعل جمرتها
بالله باچــر ويــن تخــفي بكــربله عــبرتها
مــن تحـَول عالــشريـعه وللـگـمـر نـظرتها
شــلون لــو نــادته يـــا كــفالي
من يحل عگبك يخويه احبالي
هيـــه لــمن تنــكسر
تبـتدي بلطم الصدر
هالليله
______
حيدر تركي الكربلائي
شهادة امير المؤمنين
.
.
.
الغامرني بحنانه .. دلوني بمكانه
علي وين .. علي وين
_____
الولا مــره تأخـر .. إله يوميـن ومامر
اتـأخــر والـســوالــف تاكــل بــروحي
ابو روح الحنيــنه .. اذكره من يجينه
يشــمني ومن يشمني تخمد اجروحي
امامي / نســاني اليتـم ذله
امامي / مدلل عايـش بضله
امامي / تردلي روحي لوگله
علي
محتاج الامانه .. دلوني بمكانه
علي وين .. علي وين
_____
جبيني من يلــوحـه .. احس بيده ملوحه
بزمـــن كلشــي اشــوفــه ماصــخ اگــبالي
لمن شح كلشي طيب .. بقالي هالحبـَيب
بــس بحظــنه احــسن راســي شــو عالي
احسه / رحمه شگد علي شايل
احسه / كلــش الخاطــري باذل
احسه / ايحبني بگد ابو فاضل
علي
البس هوه بزمانه .. دلوني بمكانه
علي وين علي وين
______
گبل ما افتح ايدي ..بشليلي ايخلي عيدي
اليتـــم مــــر وعلـــي حـــلاهـــن ايــــامه
اليتيم المايذكروه .. بزمن حيدر يحسدوه
اشـگد چـــان ابــو الحمـلـه مــدلل ايـتامه
حياتي / ابلياه تخلص اتمنه
حياتي / چانت وي علي جنه
حياتي / المــن عــگبه اتعــنه
علي
الچان الحب كيانه .. دلوني بمكانه
علي وين .. علي وين
--------------
علـــي هــــوه العشــــيره .. الشكو وادم فقيـره
شــــيــــخ الفــقـــره اسمعـــهـــــم يســـــمـــونه
الدليل الشوفته طگ .. الرمش من البچي انشگ
المــــثلي بــــس عـــلي الــي يمـــسح اعــــيونه
احبه / المخلوق امن الحنيه
احبه / مــعروفه امـــغزر بيه
احبه / اشهگ لو مـــر طاريه
علي
البس الله بلسانه .. دلوني بمكانه
علي وين علي وين
_______
صرت من گد مصابي..اشم كل لحظه بابي
عطــــر چــــفــه لهـــــسه ابابـــنه طــــابع
احس چــفي توفـــه .. ينــاس ابلايه چفه
ومــثل چـــفي احسه استشـــهد الجـــامع
اتاني / والحســـبات اتدولـــبني
اتاني / وادري اغيـــابه ايعذبني
اتاني / لأعظم شخصيه اتحبني
علي
والحامي حمانه .. دلوني بمكانه
علي وين علي وين
---------
يل الوجوه الحزينه.. علي گلولي وينه
يتيـــم وحــــقي انـــشد عــــلّي رباني
ابو چفوف السخيه .. اشو مــامر عليه
مابــــيه يــــناس احمــــل يتــــم ثاني
سؤالي/ يا هل وادم حاچوني
سؤالي / عالبيه رحــمه دلوني
سؤالي / ابلياه ميـت تدروني
علي
مشتاگ الاذانه .. دلوني بمكانه
علي وين علي وين
---------
حيدر تركي الكربلائي
أنا أتشارك 'هله هله مول الامام الحسن' معك
Читать полностью…
ميلاد الامام الحسن ع
نجمات السماء .. احتفلت هالمساء
وي خير النساء
بميلاد الحسن
----------------
بالمبارك .. كلشي ايصيح ابهالبشره
بالمبارك .. شُـــبر عطـــرنه بعـــطره
بالمبارك .. سبـــحـانه الــــذي اسرى
بالمبارك .. مــن حيـدر الـــى الزهره
وكل الانبيـــاء .. احتفلت هالمساء
وي خير النساء
بميلاد الحسن
-----------------
ضوه اعيونه .. جل الخـــالق سبــحانه
ضوه اعيونه .. گــال الهادي الصـحبانه
ضوه اعيونه .. وي ما اقبـــل ضـــوانه
ضوه اعيونه .. شگد بي فاطم فرحانه
وخيوط الضياء .. احتفلت هالمساء
وي خير النساء
بميلاد الحسن
----------------
تهانينه .. انرسلت من نجمه النجمه
تهانينه .. انولدت للعــصـمه عـصمه
تهانينه .. والله وگــــرة عــيــن امه
تهانينه .. حقهــا وتتــباها ابــرسمه
ابميلاد العطاء .. احتفلت هالمساء
وي خير النساء
بميلاد الحسن
----------------
معانيه .. قــرأنـــيـه وتـــتـــوقد
معانيه .. ممزوجه بريحـة احمد
معانيه .. بيه بيــت الزهــرا عيد
معانيه .. بـماشـاء الله تتــجسد
الجيته الاوصياء .. احتفلت هالمساء
وي خير النساء
بميلاد الحسن
----------------
الى الزهره .. امن النفحات القدسيه
الى الزهره .. وصــلـت اول حـــوريه
الى الزهراء .. الاعظم حوراء انسيه
الى الزهره .. تحمــل هـاي الجــوريه
بعطر الازكياء .. احتفلت هالمساء
وي خير النساء
بميلاد الحسن
----------------
علي بيته .. من هالميلاد اسـتبشر
علي بيته .. وي صوت الزهرا كبر
علي بيته .. الـهذا المـولود اتنطـر
علي بيته .. صاح امبارك ياحـيدر
طيبـــه وكربلاء .. احتفلت هالمساء
وي خير النساء
بميلاد الحسن
----------------
حيدر تركي الكربلائي
لولادة الامام الحسن ع
.
.
.
نـوره من نـور الاله .. ما احب احد سواه
مولاي الحسن مولاي الحسن
__
قضيتي . وهديتي .. الحسن عاش ابسجيتي
عشگته . وعــرفته .. تــنــجـــيــني محـــبـــته
ابدليلي . وخليلي .. اذا انـــــدب يــجـــيــلي
وفـــائي . ونـدائــي .. يـضل يجـري ابــدمائي
الهالسبب گلبي احتواه .. ما احب احد سواه
مولاي الحسن مولاي الحسن
__
الراد يحفظ ماي وجهه خل يروح البابه
الخيــر هــوه الخيـر كله والكرم واسبابه
خالـيات اچفــوفه ابــدن مايـــرد طـلابه
خير من الله يــرد الچان خــالي احسابه
اشيمتلك هوه نطاه .. ما احب احد سواه
مولاي الحسن مولاي الحسن
__
امامي . وهيامـي .. اذا اظــهــر غـــرامـي
طبيعي . ربـيعـي .. الدم البـعروگي شيعي
هوايه . وضوايه .. الحسن يجري ابدمايه
احتويته . ولگيته .. امامــي ابگــلبي بيته
انَعمي ابلايه ضواه .. ما احب احد سواه
مولاي الحسن مولاي الحسن
__
الناصي من يگصد الداره بالعجل يتعله
ابــو محــمد عالفقــير ابيــوم مايــتخله
ابيــوتها اتــيه الـــوادم والحــسن تندله
وبمضيفه امـن الگهوچي ماتطيح الدله
كل الي ايملكه هداه .. ما احب احد سواه
مولاي الحسن مولاي الحسن
__
حــناني . وامـــاني .. هتــف كلشـي ابكياني
يروحي . وصروحي .. التهت بسمك جروحي
مـــنـاري . وقـــراري .. ابــدليــلي هــوه داري
اطــوفه . واشـوفه .. رحــت فدوه الحروفه
من رحت فده السناه .. ما احب احد سواه
مولاي الحسن مولاي الحسن
__
جــدمي والله بغــير دربــه ابــد لاميدوسه
والعطايه من ابو محمد واضحه وملموسه
الرحمه والــعاطفه كلهـا بالحـسن مغروسه
انــه كل مامدله ايــدي اتــرد الي متروسه
حقها تتحير عداه .. ما احب احد سواه
مولاي الحسن مولاي الحسن
__
حيدر تركي الكربلائي
نزلة الليله الثانيه
.
.
.
كربله ياكربله .. جننتني كربله
بيها ابن عقد الوله
***
روحي
عايشه بطــرواها .. مــگــدر ابليـــاها
مستحيل انســاها .. وبيــهـا المحبوب
روحي
بالقبب مشدوده .. وبالصحن موجوده
ابيـرغه معكوده .. وبــذكــــره اتـذوب
انه عاشك والعشك يجري بدمائي
الكربلا وافتخـــر لو صــار انتمائي
هــوه جبـــرائيل يتـــمنه يســموه
الــكربلائي الــكربلائي الكـربلائي
جنه من رب العله .. جنــنتني كربله
بيها ابن عقد الوله
***
شوگي
الكربله مايبرد .. بيها حــبـي الاوحد
والعلـيها اتـعود .. اصـــبح مـــجـنون
شوگي
عابسي يسمونه .. والعشــگ مضمونه
الرادو ينـسبونه .. ينــســبونه الجــون
حسين وانه بظهر ابوي يعيش بيه
ولــذلك اهــــوه كـلمــة غـاضـــريه
الجاذبيــــه ابهالارض الله خلـــقها
وصار ابو السجاد اساس الجاذبيه
الها اعظم منزله .. جننــتني كربله
بيها ابن عقد الوله
***
شايل
حبها اجمل خصله .. وكاتبه اعله المقله
اهـــوى باب القبله .. وصحــن العبــاس
شايل
بالگلب كل معلم .. مــن اشـــوفه اتـــألم
وبالاخص لمخيم .. بـــيت اطـــهر ناس
امن الله شو كربله تفرق عن سواها
كلشـــي بيها يختـــلف حتـى هواها
الظلمه ما الها وجــود بگاع الحسين
كربلــه مـن الگـــمر تـــاخذ ضواها
گاع ابو اليمه وهله .. جننـــتني كــربله
بيها ابن عقد الوله
***
حاير
ابقه كل ما ارحل .. انـه ادور واسئل
عالمــخيم والتـــل .. بيـــن الدمــعات
حاير
عايش بنص عيني .. حائره ايبجيني
منبعد اعله حسيني .. اشـــبع أهــات
حسين موطن دمعتي وموطن غرامي
وعندي بــين الحـرمين احلى الاسامي
ضامي وانـه بكــربله الهــاي المـكانات
لان بيــها مـــنذبــــح ضـــامي امامي
وهذا حل المسأله .. جننــــتني كربله
بيها ابن عقد الوله
***
ليلي
بلايه نور الحضره .. ليلي اخلصه بحسره
أي وحـق الزهــره .. ام الســبـــــطــــــين
ليلي
بيها اخلصه اتمــنه .. چنـــه ليــل الجــــنة
وبـضــــواها اتهنـه .. چــــيه بــيها حسـين
بكربلاء احجي الحقـــيقه وما اغالي
والكـــلامه الينــــتقدنــي مــا ابــالي
المحبس الغالي غلاته بشذرته تصير
والمكـــان البيه غالي يـصـــير غالي
ابفضل ابواليمه غله جـننتـــني كربله
بيها ابن عقد الوله
***
حزني
بكربلا متــجذر .. والگلــب متوجر
عالذي مــتوذر .. فوگ الرمضــاء
حزني
عالتهل ادمومه .. مسلبات اهدومه
جـبدته مــثلومه .. بسهـــم الاعداء
هالارض چيه بيها دم حسين سايل
قـــبله صارت للشـــجاعه وللمراجل
ناس صعـدت ناس نزلت والنتيجه
عاصـمه تبقــى على كـــل المراحل
هيه مصحف ونتله .. جننتــــنـي كربله
بيها ابن عقد الوله
***
حيدر تركي الكربلائي
لمولد الحجه المنتظر عج
.
.
.
يامالك احلامي .. وأيامي .. وسنين العمر
يامالك احلامي .. وايامي .. وسنين العمر
يامهدي .. يامهدي
_____
عبــدك انـه سيدي وتـدريــني اريــدك
وافتـخـر لــو تعــتبرنــي مــن عبيــدك
عـندي بيـت امن الشعر بـي ارد ازيدك
عاشت ايدك يابو صـالح عاشـت ايدك
يابلسم اجروحي .. ياروحي .. يايوم وتمر
يامالك احـلامي .. وايامي .. وسنين العمر
يامهدي .. يامهدي
_____
انـي كـل جمـعه انـتـظر يـا اغـلـى نـاسي
بلكي هالجمعه الـتجي تمـسـح لي راسي
انـتـه تـدري بــالـزمـن يـالمــهـدي قـاسي
ولاتـظن فـد يـوم الــك يـاروحـي نـاسي
ساكن وسط عيني .. وتدريني .. اهواك اشكثر
يامــالك احــلامي .. وايــامـي .. وســنين العمر
يامهدي .. يامهدي
_____
نورك امـن الكوفه يطلع يمـته اشوفه
وإلـك يالمهدي جعلـت اعيـوني كوفه
تـعبـونــي الــوادم وگــالــولي عـــوفه
مـا اجاك التلـهــج اسنــين ابحـــروفه
صحت ابگلب ذايب .. يالغايب .. راح ابقه انتظر
يامــالك احــلامي .. وايـــامي .. وســـنين العــمر
يامهدي ..يامهدي
_____
روحي بسمك ذايـبه يالـمهـدي تـدري
ومـا اجـامـل لـو گلــتلك انــته عـمري
يـوصـلــك ياسـيدي يالــيــتَ شــعري
حتى تعرف ياحبـيبي اشـوگ صدري
صدري الك ضامي .. وگدامي .. مايك ينهمر
يامالـك احــلامي .. وايـامي .. وسنين العمر
يامهدي .. يامهدي
_____
بابــي محـد دگـه يالـغـايـب واجـاني
والـوحيد انتـه الـذي تــنـدل مــكاني
تـره مـن غــيرك عـدم يالمـهــدي اني
الــف شــكرا الــك ياصـاحب زمــاني
لو احچي بفضالك .. لفعالك .. ميكفي الشكر
يامـالـك احــلامي .. وايـامي .. وسنين العمر
يامهدي .. يامهدي
_____
گلـبي مسجـون بـهـواك وهـذي راحـه
امـروتـك يــالمهـدي لاتـطـلق صـراحه
اتـعودت ويــاك دوم احچـي ابصراحه
ابگاع حـبـي استحـوذت اكـبر مساحه
يالشاغل افكاري .. اسـراري .. يمـك تـنذكر
يامالك احلامي .. وايــامي .. وسنين العمر
يامهدي .. يامهدي
_____
انتــه ياقــران حــبي امــن الــبدايه
وبيــك يــومــيــه ارتــل ايـــه ايـــه
حــبي الــك لالـه بــدايه اولانهـــايه
وهـذا هـوه مـختـصر كـل هالـروايه
من اقره كلماتك .. واياتك .. بالحب انغمر
يامالك احلامي .. وايـامي .. وسنين العمر
يامهدي ..يامهدي
_____
حيدر تركي الكربلائي