7934
لنشر قصائد مناسبات اهل البيت
يالدافن گمر .. يم النهر .. گبر الضوه وين
مشتاگه اله .. بگد كربله .. ياعـمه هالعين
مخنوگه العبره بصدري
وديــني الكـافل خدري
يالسجاد
----------
ارد اسـولفله الجرالي من مشـيت اميـسره
بس احس بيها چبيره خاف اكـسر خاطره
زحمه اگله الشمر سوطه عظم متني كسره
خاف الچم عين اخويه الدمع منها لو جره
غيرة كافلي .. غيره علي .. وادريبه حساس
خافن من اون .. يمه واحن .. يــتاذه عـباس
لاسـولفله اولا يـدري
وديني الكافل خدري
يالسجاد
------
چنت اتنفـس كفاله ومـن هوه الرايه اشم
الوادم يعرفون حيدر عده بت بس بالاسم
الكوفه چـان خـيالي بيها عمه للنسوه حلم
شلون اگـله الكله غــيره رحت مابين الزلم
قطعا بنجرح .. وجه الصبح .. يازيــن العـباد
لو گتله الخدر .. بيد الشمر .. من عگبه ينگاد
زحمه امن ايحس بگسري
ودينـــي الـكافل خـــدري
يالسجاد
__
يــم گبر عباس اسولف رايده وخــاف اختنگ
خاف انسه روحي يمه وللكفل احجي الصدگ
الحز وريدك زحـمه اگله متـــوني خلاهن زرگ
اظـــن مــن الغيره گلــبه وهــوه ميت يحترگ
وحجاب السمه .. بت فاطمه .. تحديدها الاجناب
يــتزلزل زعــل .. گلب الكــفل .. ويبـــَچي التــراب
بلكي ولن يطفي جمري
وديـني الـكافل خدري
يالسجاد
-------
الشام يوجعــني واخاف الـشام طاريه ينفتخ
وعمت عيني اجروحه كثره والحچي كله ملح
بـسوگهم من طــببوني چــانت الــدنيا الصبح
واحد بســوطه يطـگني واحد ابچعب الرمح
طاري زينبه .. مـــتســـلبه .. كلـــش يــأذيه
لامايحتمل .. طاري الحبل .. كــفـالي أدريه
خل بس المدمع يجري
رديني الـكافل خـدري
يالسجاد
---------
راح اروح ويمه اگعـد واكتفي بــس بالدمع
ولوسـئلني عــلى دمـعي ما اسولفله الوضع
اصواب راسه ادري يوجع بعد مابيه ينفجع
خـــاف اگــله گيـدوني وينكــسر مــنه ظلع
خــل يغفه ألم .. راعي العلـم .. لاجرحه يفزع
حچايات السبي .. اتموت نبي .. لو بيها يسمع
احچيهن تالي الدهري
وديني الكافل خدري
يالسجاد
------------
تمت
حيدر تركي الكربلائي
للسبي
.
.
.
اكــبر جــرح بعيـون ابوصالح
ظـعن الفـواطم للســبي رايح
العــمـاته .. لچماته
وماتنشف .. دمعاته
***
صــباحــا ومــســاء .. بــكاء الـكـــربلاء
حياة المهدي ابوصالح عــباره عن عزاء
معانات وجـــراح .. بــدت فـوگ الرماح
ويه الروس الي نشالت ظعن عماته راح
جلالة ســـتر ال البـــيــت مگــيودات اديـهن
المصيبه الذبح عبــاس هــوه الــيحدي بيهن
لو هده ونــهن من يطـــب ديره
بالسوط يضرب راس ابو الغيره
مأساته .. وجمراته
وماتنشف .. دمعاته
***
الحنت ظهر الامـــام .. وتخـــلـــي مــايـنام
العلــويات اخـــذوهـــن بـدون أي احـــترام
بعرض حامي الدخيل .. الغـرب گامت تعيل
شــماته ولان شـــافوهن نـــساء ابـــلا كفيل
ظعن مو للسبي لا كون ينحـط بين الاحداق
يطاف بظعن ال البيــت وسفه بين الأسواق
ال الله العفــاف مفـــصله الظلهن
المايســوى واليــسوى يـصد الهن
ولوعاته .. وحسراته
ماتنشف .. دمــعــاته
***
على الهــزل يـــسيــر .. جـــرح گلبه الچبير
ويسمع صوت عمـــته ام عون لمن تستجير
تصد يسـره ويـمـــين .. تــــدور عـــالحسين
نخت والـشمر گال الها اگطعت بيدي الوتين
ايسي مايرد حسين زينـب لاتحشمين
هذاك العالرمح راسه چنج ماتشوفين
شافت اخوها عاري ومسلب
من حقها لـمن تنــعمي زينب
احچاياته .. اوناته
ماتنشف .. دمعاته
***
الامام المهدي شاف .. امــيرات العفاف
بحالة مزريه عالنوگ من كلــشي تخاف
الناس اخذت قرار .. تشــامرهن احجار
المثلهن زحمه يتــشامر وحــدتـهن مزار
وادم مـــن اســــطوح الدور نار تــذب عـليهن
وقسم من عدهم يضحكون چي ذبحو وليهن
الچانت حمايه تطلع اوياهن
صاحوا سبايه هسه جبناهن
حچاياته .. اوناته
ماتنشف .. دمعاته
***
الف موته يموت .. ابوصــالح سكوت
كلما شاهد بعيــنه ظـعن زينب يفوت
ظعن للســبي سار .. ظــعن كـله مرار
اذا لكبــار سابـيهن شــنو ذنـب الزغار
شنو ذنب الأطفال تروح بله بظـعن الاحزان
اديهم كلــش ازغيـرات وحبال السبي امتان
بالشام مــن دخــلو خـرايبهم
فوگ الســبي زادت مصايبهم
وغـصاته .. ولهفاته
ماتنشـف .. دمعـاته
***
حيدر تركي الكربلائي
للاربعين
.
.
.
هاج الحنين بروحي .. سولفلي يامذبوحي
احچيلي عن جرح الرمح
وانه احچي عن اجروحي
----------------------------
يالنابت ابـراسك رمـح .. شلونك يبعـد اعيوني
لونك احسه امن التعب .. يشبه امن الحر لوني
متاذي گلي امن الرمح .. لومن حچي الگادوني
بعيونك الذبلانه احس .. نظـرة الـــم لمتـــوني
كل هذا وتحس بيه .. يالمــنترس حــنيه
گلــبك اليه منفتح
وانه احچي عن اجروحي
-----------------
البيه وحقك مو جرح .. واحــد ولاهـــن مـيه
الف وتسع ميــه الذي .. يحــسين صـارن بـيه
بالرايه مأساتي بـدت .. مــن طاحــت الحـنيه
ونختمت ابشام الحزن .. من غفت عين ارقيه
ابنــادم المايحــملـــهن .. طاحن على اختك كلهن
وحدتهن اتگول الملح
وانه احچي عن اجروحي
-----------------
خويه الشفتهن بالدرب .. ماينحچن يالغالي
ياهي الاسولـفها الك .. وياهي التضل ابالي
زينب يبو اليمه تطب .. ديــــوان اول تـالي
وتصور ابنــص الزلم .. حرمـه بلايـــه والي
ثق مقتلك حسيته .. الديون من طبيته
واستوعبتها منذبح
وانه احچي عن اجروحي
-------------------
رمحــك يـخويه بالارض .. لو گعـــدو اينبتــونه
ايذبحوني كل ما ريضو .. راسك امن ايحركونه
چم مره من عدهم وگع .. ياخــويه ويــشـيلونه
يتعـــمدون ابهالـــفعل .. گلب اختك ايحرگونه
شحچيلك وشحچيلك .. ومن ياهي خويه اشكيلك
والصار لاماينصلح
وانه احچي عن اجروحي
-----------------
كلما اســولف عالسبي .. ابصدري الحچي يتكسر
وليش الملامــح يالاخــو .. ابوجهك احس تتغير
بس وحده اسولفها وبعد .. ما احچي يابو الاكبر
خــويه خــذوني للســـبي .. بنــاگه تــگوم وتعـثر
كل ماتهل اعيوني .. ايضربوها ويضربوني
لاليلي ليل اولا صبح
وانه احچي عن اجروحي
_
حيدر تركي الكربلائي
قصيدة گعده
فـــي اخـــر الــزمــان .. ياشيعــة الــزهره
القابض على الحسين .. كالقـابض الجمره
خلـونه ويـه احسين
مثل الرمـش والعين
ياشيــعـــة الــزهـره
__
ايها الشـــعب الحـــسيني يالـِتــبنـــيتـو القـــضــيه
كونو زينا عالحـــسين و مـــوش زيــن الاال امــيه
خــيط خل انصير وبره انـــروف جــرح الــغاظريه
حتى الحسين انوقره .. وموشخص عادي انصوره
غرتنه ليــش الكامـره .. وعــفـــنه كامــرة الــزچيه
وين احنه چنه اوين هســه احنه اصبحه
حــسين بضـــمايرنه بس بالحچي صحنه
المفروض متيـقـنين
مثل الرمش والعين
ياشيــعة الـــزهــره
-----------
اهنا يأصحاب العــقول الواعـــيه واهــل الدرايه
ينذبح منبرنه ليش ونـسكت اعــله اهـل الجنايه
اتلفلـــفت وادم علينه وصـعدت بطــاري السبايه
امن اليوتيوب اخذو اجر .. وعافو اجر ام الخدر
منهم اكو عــدنه اشكــثر .. التاجرو بسم العبايه
لا مومهم احسين بعبون چـــم منشد
كون المهم ايصير بــهاي الزياره ترند
مو چـانو الماضــين
مثل الرمش والعين
ياشيعــة الــــزهره
-----------
حسين ديـن الله الحنيــف المــنزل الاهل البصــاير
حسين شوكه بعين كلـــمن رايد ايسقـط الشعـــائر
حسين اكـو وادم تخـــدمه واكــو وادم بيه تـتاجر
صفي السريره ابهالنــفق .. وعوف الورق لهل الورق
اويه احسين ضل لاخر رمق .. بالقيامه اتفــوز باچر
يامن تريد ايعيش في داخلك عاشور
قلد علـي السجــاد لتقــلد الــمشــهور
وابكــي مع الباكين
مثل الرمش والعين
ياشيعــة الزهـــره
------------
حسين مشكــاة الطــريق المظـــلم بـــدرب الجهــاله
حسيـــن رايـــد جـــيل واعـي جيـل بدموعه رساله
ومــثل ماحافظ عليـنه كون هــــم نحفـــظ اعيــاله
من نحچي عن جرح السبي .. ياريـت منشگگ عبي
زحمه تره امــن ابن النبـي .. نسولف بعرضه فشاله
واجب على الجميع بالحچـــي تتادب
ونتبــره مـنه كون اليهتك خدر زينب
ونرفض شكو شي شين
مـــثل الرمــش والعيــن
ياشيعة الزهره
----------
يـلي عايـشتو محرم عوفـــو سالـــفة المـــصالح
اليخدم احسين بضـميره الدنيـــا والاخــره رابح
ســلف صــالح چـــان عدنه لايــعامــل لايگـــابح
عرفو طريق ام الحسن .. وخلود زمن يتبع زمن
عبد الرضه وحمزه اوطن .. مثل للاجيال واضح
لو وي يزيد تصــــير لو انته ويه احسين
حظرة جنـابك ليش تلعب على الحبلين
فازو المــتمــسكين
مثل الرمش والعين
ياشيعة الزهره
---------
حيدر تركي الكربلائي
من البحرِ الى النحرِ .. فراتك بالعكس يجري
سـيلُ الاوفياء
گاصد كربلاء
من البحرِ الى النحرِ
---------
يا اول واخــــر كـــلمه .. لو گـــبرك يم النجـمه
نمـشــيلك يابــو الـــيـمه .. واحــنـــه الممـــنونين
لو شباچـــــك عنـــوانه .. مجــــاور درب التبانه
نگصـــدلك يارجــــوانه .. ونــحــس مقـــصـرين
غير انته احسين الشمعه .. الماينطي ابناسه وربعه
عـــهدك بالـــدم نـــوقعه .. ونشــــعر مديـــونيـــن
اليحجلك هالسنه ينوي يحج العالم العلوي
بهيئه وكبرياء
گاصد كربلاء
من البحر الى النحر
-------
يالـــتتفايض حـــنـيه .. ويـارمز الانـــسانيه
بحبك عدنه امكــانيه .. تـريـد انموت انموت
چانت تهمـه المشـــايه .. اليمشي وشايله رايه
ايوصي اهله كون بهايه .. يحظـروله التابوت
وماچلينــه وملـــيــنه .. وعـــيونك يابو سكينه
عـــن گبرك متخلــينه .. من چـــانت بــسكوت
بوكت چان اليلزمونه اليجي ممشه يعدمونه
نهـر الشهداء
گاصد كربلاء
من البحر الى النحر
_____
گالو نـشوه وينســـوها .. يوم اثنـــين ايملوها
جـاوبنـــاهم شــوفوها .. المشــايه بهــالعـــام
بحيل الكافل متحزمه .. وتگول برسم الخدنه
بقوة العباس وعزمه .. بدربـــك نمـشي ايام
إي خادم منهم سئله .. حزامك يايــوم اتحله
ايگلك يم باب القبله .. تــرد روح الــخـدام
اليشاهد قبتك التلمع دمعته بوجنته تركع
المتبدي عطاء
گاصد كربلاء
من البحر الى النحر
---------
روح وريحان واكــثر .. بدروبــك يــابو الاكبر
ليش اليمــشيلك يكبــر .. صيتــه ابـــين النـــاس
اليمشيلك خطوه تكبره .. وتوفقه وتشرح صدره
وتسجل اســمه الزهره .. بچـــفـــوف الـعبـــاس
عن گبـرك مانتـــخلف .. نتعـــنالك لـــو نزحف
نبـعد ويقـــربنه الطـف .. طفــــك رفعـــة راس
عصارة هالعشگ هيه الزياره الاربعيــنيه
حبنه ابلا فناء
گاصد كربلاء
من البحر الى النحر
-------
ياحبنه المايتـكرر .. وياصاحب اطهر منحر
عن هالحب مانتغير .. يحــسين اشــما صار
عاشورك ماناسينه .. وجمراته التسعر بينه
مروتك بس لتطـفينه .. نـــارك ابـرد نــــار
من نستشعر آلامك .. نستشعر نار خيامك
تعلم زين بخــدامك .. تتــــفايــض ايثــــار
غرامك بالسمه نكتبه اليوم وباچر وعگبه
وعنوان السخاء
گاصــد كـربلا
من البحر الى النحر
--------
حيدر تركي الكربلائي
للامام الحسن ع
.
.
.
اتـذكـرت مصابه .. وانــه بــالخــرابه
مـانســيته
ابــو محــمد اخــوي
_____________
قصــتي كلــمن سمــعها يبچــي مــن عنـوانها
والخـرابه امـن اسمـعتني اتفــطرت حيـطانها
أبــد مــو سهـــله بــواچــي الــفاگده خــوانها
العدها مثل اخواني موته خل تحظر اجفانها
واليـسر تـركـته .. الحسن من ذكرته
ودم بچيته
ابــو محــمد اخــوي
_____________
المــات لا مــامات حــزنه والحزن مايعــتگ
الظيعت مثلي اخــوها حــگهـا بالهــم تـغرگ
رغـم ذنـي احبال اديـه ورغـم متـني الازرگ
الحـسن مـن ايـمـر مصابــه يـهالوادم اشـهگ
شهـگـة الشماته .. الشاهدت خواته
من نخيته
ابو محمد اخوي
______________
للحــسن ونــيـت واهــل الشام سمـعو بــيه
وگــفـو ابــاب الخــرابه ايــبـاوعــون اعـليه
بســچ امــن النــوح گــالو كــافي يالمـسبيه
اليبچي يوم اثنين خـوب البـچـي مويوميه
للحرس شكوني .. وبالعجـل اجـوني
ويمي ريته
ابو محمد اخوي
___________
امن البواچي على اخوتي تشتعل جمـراتي
ذاكـره جـرحي الچـبــير الـرافگ احچاياتي
للحـسن سويـت مـاتـم رغــم كــل مأساتي
وبــثـــوابه عاليــتـامــه وزعـــت دمــعـاتي
للحـسن ثـوابي .. دمعتي ومصابي
وماوفيته
ابو محمد اخوي
______________
مثل ما لحسـين ابچـي وحــزنه كـاسر ظهري
الحسن نفـس الشي احسه همه تارس صدري
وحـق چبده الي اتگـطع ابقـه اون كـل عمـري
ومـا ابطل النــوح ابــدن حــتى وانــه بگـبري
والخــرابــه تشـهد .. امن البچي حيلي انهد
الخد سگيته
ابو محمد اخوي
___________
غفت عيني لحظه وحده وبالحلم چن شفته
ماعــرفني حـقـه هـــوه لــكن انـــي اعــرفته
گـتله هـيچ ايصير بـيها كلمــن ايـعوف اخته
لاتــروح اويـــاي ابـقـــه وبـالــدمع حـــلـفته
گتله والاميره .. اصبحت اسيره
ومالگيته
ابو محمد اخوي
___________
تمت والحمد لله
حيدر تركي الكربلائي
شهادة الامام الحسن ع
.
.
.
كسرتك كلش چبيره .. چني فاگدلي عشيره
ومن دفنتك يالحسن
چـن بقــت ابلا وطن
يخويه
-----
يخمتـنـه الچبيــره البيهـا ملتـمـين
خويه اخلاف عينك مثل المتيهين
يالمبعـد دهــر هـم فكرت بحـسين
زحمه ظهر اخيك ينــكسر مــرتين
الدنــيـته كلها شمــاته .. الماله اخو ماتت حياته
ومن كسر ظهري الزمن
چــن بقــيت ابـلا وطن
يخويه
-------
الگاع ابلا اخـو جواي احـس رخوه
يتچوه ومن رحت ماضل الي تچوه
مايبـــچي الـــذي مامــچوي بالخوه
وشيـــصبره الـذي دافـــن اخـو توه
جروح هجرك خويه بيه .. چنــهن الف وتسع ميه
ولمن اعيــونك غفن
چن بقيت ابلا وطن
يخويه
--------
اخيك مولحت من البچي اخدوده
چبدتي موچـبدتك خـويه ممروده
تراها حسين عگبك دنيتــه سوده
اعمه وداعتـــك والوادم اتگـــوده
حالي لاموذاكه حالي .. هدلت امتوني الليالي
اعليه من هنه انچفن
چن بقيـت ابلا وطن
يخويه
-------
يشيخ الـطايفه التبچيلك الـسبعه
كل لحظه اعله گبرك انچفي دمعه
يبو الفزعات اخوك بحاجة الفزعه
مكسـور الظــهر مايــحمـل الوگعه
الماله اخو ياخويه باچر .. تطحن اظلوعه الحوافر
بكربله حســيت اذن
چن بقيت ابلا وطن
يخويه
__
يسئلوني عــليك ومـن يسـئلوني
وحقك چـن الف ذبحه يذبحوني
صعبه ابلا اخو الوادم يشوفوني
بالطف باجر اهـــناك اشيراووني
حسين بالطف لو تمدد .. تنسلب نسوة محمد
اتصيح اختك بالضعن
چــن بقيت ابلا وطن
يخويه
-------
حيدر تركي الكربلائي
شهادة رقيه ع
.
.
.
باچــر يارقيــه احنـــه ماشـين
ونامي بـكربله شگد ماتگـدرين
لتنــاميــن بالشــام
اخافن من الاحلام
ايموت اليحلم اهنانه بالحسين
***
تعبانه .. من حقچ طريق الشام مو هين
تعبانه .. وبـــوچهـچ يعمـه كــلش مـبين
مكانج عمه حظن حسين الكله عاطفه ورحمه
حظن بي لمن تحلــمين تگـعدين انتي متبسمه
باچر عمــه راح نــروح وغفي بحظن أبو اليمه
راسج عـلى ايـده من تخــلين
أصابع چفه الأيـمن لاتحسبين
عـــن لتـزيد الألم
اخافن من الاحلام
يموت اليحلم اهنانه بالحسين
***
نعسانه .. يالطـول الدرب ماغمــضت عـينچ
نعسانه .. على الناگه بحبل مربوطه جفينچ
الحادي شما طبگتي العين يـجر الحبل ويوعيچ
اديج احبالهن خشـنات وانتــي مجرحات ايديچ
سهـــرانه الــدرب كلــه نـعم متــقصــد ايخــليچ
حتى بالخــرابه انتي تغفين
النتيجه رايدج عمه تحلمين
جفنــچ عمه لو نام
اخافن من الاحلام
يموت اليحلم اهنانه بالحسين
***
مكسوره .. انروح الكـربله وهناك اشكيله
مكسوره .. وشســوه الشمر ياعمه گوليله
شگد ماعندچ حچايات وياچ الكربله اخذيهن
يالمن البـچي منــعوچ ادموعچ يــمـه بديــهن
بـس وحده رقيـه ارجــوچ متـونچ لاتـراويهن
اذا لحسين عمه شاف المتون
البالطف مـن بواچــيه يفزون
ويفز ارماد الخيام
اخافن من الاحلام
يموت اليحلم اهنانه بالحسين
***
أتمنى .. ترتاحين لكـن ما اكــو راحه
أتمنى .. تحلمين ابــابو مايمه ذباحه
يعمـــه الــحلم هاليومين حــاله حــال أي ذباح
وبيـــچ حسيــن وصــانــي لمــن يارقــــيه راح
وبس لا عودج الأخــضر بسيف الذبح هم يلاح
مو گلتيلي مشتاكه اله هواي
واخذله يعـــمه مــن ارد ماي
ترى منتضرچ أيام
اخافن من الاحلام
يموت اليحلم اهنانه بالحسين
***
يرقيه.. الخرابه تراب وانتي شيوخهم اهلج
يرقيه.. السبي بـكبره وعظـمتــه عمه ماذلج
قـــدر المســـتطاع انتـــي لتغـمــضينه عــيونچ
عــدهم عـــيد اذا تحلــــمين غايـــتهم يــأذونچ
الطشـــت خافن يجيـــبونه ياعـمه ويمـــوتونچ
لو فزيتـي مرعوبه وتنوحين
وراس الغالي ياعمه تشوفين
ذولــه ناس ظلام
اخافن من الاحلام
يموت اليحلم اهنانه بالحسين
***
حيدر تركي الكربلائي
شهادة السيده رقيه ع
.
.
.
اباب الخرابه والحچي اهواي .. اسئل عليك الراح والجاي
وصفتك الهم چن صبح
گالولي ذاك اعلـه الرمح
والحچي هواي
-------
من بده الشوگ . بالخــرابه . اتبدت اعيوني حچي
شوگ الزغار . يختلف حيل . ايتـرجمه بس البچي
اگعدت يم باب الخرابه بويه مـن صـار النهار
لن بنات الشام سئــلن شــنو اســمچ باختصار
بس گلـــت الهـــن رقـــيه شامـــرني بالحـجار
لاحت اذاني وحده منهن .. رحمه يبويه ماكو عدهن
احچايات اهـلهن چالملح
گالـولي ذاك اعــله الرمح
والحچي هواي
---------
الچنها ورده . بضل وجودك . وبالتـــرافه تنلمس
الــدللـــتــها . عگب عينك . ذَبلت خدها الشمس
خاف ماتعرف رقيـــه من تــرد امــن السفر
بشامهم بس اني وحـدي بخدي للسطره اثر
بويه عنواني الخــرابه فوگ مـن قصر القهر
ولو تيهت تعرفني بالحال .. بيــديه اثر شدات الحبال
بالناس اوصي وانجرح
گالولي ذاك اعله الرمح
والحچي هواي
-------
وادم الشام . اعيون صلفه . تضحك وانه احترگ
امن اسئلتهم . هـمه گـــالو . صدر ابيـچ منسحگ
شامي منهم گال ايسي حسين جثه اعله الثره
شـــمر الجـــابچ ســـبيـــه هوه گـــاطع منحره
بويه صـــح هذا كـــلامه لــو اظــــل متــنطره
سديت اذاني من حچي الناس ..من گد حچيهم شيب الراس
وكل لحـظه مــنهم انذبح
گالـولي ذاك اعـــله الرمح
والحچي هواي
--------
بويه بالشام . الماله والــي . الناس شو تستزغره
والشماته . اعلـــيه بــــويه . بالـدرب لــومو سره
وانه بين اركبي راسي حاطـه امـن المستحه
حچي اهل الشام شفره وگـلب بنــتك جرحه
اسمع الضحكات بذني وگلبي چن بيه فاتحه
ماشايفه كل عمري ظلام .. مثل الشــفتهم بويه بالشام
وهالطـاري كلـــسا ينفتح
گالولي ذاك اعـــله الرمح
والحجي اهواي
---------
يمته ترجع . ارد احاچــيك . البيـــه ماينظم بعد
تبطي لو لا . ياحــيـــــاتي . گـــلي يــايوم الوعد
انـچان تتـــاخر يبويه بطيـــف بردلــي الگلب
انته مو طبعك تهجـره كلمن الشخـصك يحب
الصعب مو لمن سبـوني بويه هجرانك صعب
مشتاگه اشبگك يالابو كون .. ومشتاگه ابوسك بين العيون
وكل ما اسولف بالجرح
گالولي ذاك اعـله الرمح
والحچي هواي
------
حيدر تركي الكربلائي
شهادة السيده رقيه
.
.
.
رقيه / يگلب وروح الحسين
رقيه / اخــافن عمــه تـغفين
رقيه / وياخــذ عـمرچ البين
يعــمه
****
زغيره وحساسچ ترف .. والوكت كلش صلف
البالطشت من ينكشف
تطلع جروح
جروحــچ بگـــد السمه .. جنــــچ امـي فاطمه
الوالدچ كلــچ ضمه
وهوه مذبوح
الحجي مالح وادري عمه الحچي يلچم منحره
لاتگلـــيله حــبلــــهم عـــظـــم اديــــه كــــسره
رقيه / اعله كيفچ من تنوحين
رقيه / اخافـــن عمــــه تغفين
رقيه / وياخـــذ عمرچ البــين
يعمه
****
ادري متروسه حچي .. والحچي يولد بچي
اعليه ياعمه انتچي
وسولفي البيچ
لاتگـــليله الشـــمر .. اذه خدي امن السطر
گلبه تدريه ينفطر
خاصه اعليچ
اشتمي ياعمه بلحيته براحتچ بس بحذر
وجبهته لاتلزميـها يــنلچـــم جرح الحجر
رقيه / المدمع من تــذرفين
رقيه / اخــافن عمـه تغفين
رقيه / وياخذ عــمرج البين
يعــمه
****
اشفتي عمه بالحلم .. وهيـچ گلبچ منثلم
صاحي صدره . منهشم ؟
نور العيون
بعده ظهره منكسر .. وشهگته گوه يجر
اليوجعــنه ابيـــا كـــتر
وحالته شلون
عالحصير حسين شفتي عمه لو فوگ الترب
على ظــهـره نام لـــو لا على وجهه مــنگلب
رقيه / ابـيا مـوضـع تقبلين
رقيه / اخـافن عــمه تغفين
رقيه / وياخذ عـمرج البين
يعمه
****
بعيـــنچ اسوالف سلف .. من نظرتيــله بشغـف
حيــلچ بكبـره رجف
وطحتي عالگاع
البالطشت چنه عرف .. بعطره معروف الكلف
مومشي رحتي زحف
لجـــل الـــوداع
حسين تدرينه رؤوف وگلبه يتفايض حنان
عمه لاتحچيــن يــمـه عالتراچــي وعالاذان
رقيه / مــاوصيـچ تــدرين
رقيه / اخافــن عمه تغفين
رقيه / وياخذ عـمرج البين
يعمه
****
چــان ياعمه زمان .. شــفته تنگط حنان
وهسه من الخيزران
مورمه ياحيف
الراسه تردين اللجوء .. قبليه بس بهدوء
لايفز وجه الوضوء
ويخرب الطيف
اليوجـعنه هــواي عمه لايــفز خل يستريح
سولفي وياه على كـيف النوم راحه للذبيح
رقيه / بعد عيوني الاثنين
رقيه / اخافـن عمـه تغفين
رقيه / وياخذ عمرج البين
يعمه
****
احچيله بس موعالحريق .. ولا على ذاك الطريق
البس عدو مابي صديق
وطبت الشام
لاتگــــليله الـــــزغـــار .. شامــروني بالاحجار
بگلبه خاف ايهــيج نار
شيحمل آلام
حسين الــف وتسعميه جرح بي فوگ الجرح
وهالحـچي عمه وصيه يمــه بــس لا ينــفتح
رقيه / ادريبـچ تحرصــين
رقيه / اخافن عمــه تغفين
رقيه / وياخذ عمرچ البين
يعمه
حيدر تركي الكربلائي
للسبي
.
.
.
اميره ابضعنكم بضعنهم اســيره
چبـــيره عـــليه يبــدر العشــيره
ياخويه اعله بختك
تقـبل زينــب اختك
اســـيره
-------
مـــا اعاتــب لا وحـقـــك يالكـــفـــيل
بس حچي خوه وحچي الخوه ثگيل
زينــب التحلم تشــاهدهـــا الــنســاء
ابلايه محـمــل راكـــبه فــوگ الهزيل
بنواظـــرهــم .. يجـــرحـوني
الزلم صــعـبه .. يشـــوفــوني
وحچي الوادم .. على الحرمه
يبـــو فــاضـل .. تـــره زحـمه
يگــيدون شرفكم وسبيناچ يصيحون
ويردون يشتمون وبالحـجار يــرامون
نهــر غيـره عرفتك
تقـبل زينـب اختك
اسيره
__
كلشي طاح بطيحة اچفـوفك يحيد
وسيق اهــلك يــابو فاضـل كالعـبيد
ايدي عگب السبحه وايـدك والحنان
صفدوها وداعتــك خـــويه بـحديد
ســـلاســـلهم .. كلت ايدي
امن اون گالو .. بعـد زيدي
ولـمن اسكـت .. يعــذبوني
واذا ابـچــــي .. يظـربوني
تروع الحچيهم دليلــي وتشلع
تگطع يگولــون كفيلچ ميرجع
سكت كلشي ابسكتك
تــقبل زينــــب اختك
اسيره
-------
غافي صح راسك لچن مامستراح
عالرماح وتسمـع الســب والصياح
انظر الوجهك واحس ابمستــحاك
اتفز اذا سوط الشمر بمتوني طاح
الكسر گــلبي .. وجرح ناســك
الشمر هــوس .. برمــح راسك
وتـرس اذنـي .. حچه الشامت
سبيـنه اختك .. واشــو ساكت
عليه ثـگـــيله .. يگولون سبيه
الرزيه يخلون .. هالحبال بديه
نبع للغــيره گصتك
تقبــل زينب اختك
اسيره
-------
الدرب خويه الخالي بيه يستعجلون
ومن نطــب ابديــره عـــمداً يوگفون
مــو قصــدهم يســتراحون الطــغات
حـتى طول اخـتك يشـوفنـه العيون
ابـــــأزقتـــهــم .. يفـــروني
امن امر يمهـم .. يظــربوني
صرخ واحـد .. وحقد شايل
شعجب عافچ .. ابـو فاضل
جوابي بدموعي يترجم مصابي
عذابــي التبـــده تجاوز حـسابي
أقسمت ابنخوتك
تقبل زينب اختك
اسيره
------
البيه هنه اهواي خـويه ياحــماي
الغربه اول تالــي گدامـــي اوراي
والله لو ادري يخــويه باليـــصير
چان ماخليتــك انته تجـيب ماي
صبح فرجه ..الخدر وسفه
وعليك ادري .. يـخي كلفه
ولا اعتـــب .. وفيــت انته
ابــو غــيره .. الخدر صنته
بدلالي منو ايعيل لون ضال يغالي
سؤالي شـــسوي ومـــنو الي بقالي
بالـخـــوه سئــلك
تقبل زينب اختك
اسيره
------
حيدر تركي الكربلائي
سولفتها وعقلي ماشايلها
طالـعه زيـنب بــلا كـافلها
-----
زينب التتـــبده من گـــد مستحاها
تمشي والعباس مـن تمــشي وراها
الدنيـه گـلولي يهـــل وادم شجاها
ابن جوشن صدگ مسـبــيه خذاها
ياهو منكم يالخدم عاقلها؟
طالعه زينـــب بــلا كافلها
__
العفه اذا مرت تمــر زينـــب على البال
شرف الله امن الله شو بس الها تنگال
شـلون راحــت لليـســر من غــير كفال
الحيــره ياهو الگيــد ايــديها بالحـبال
زين يدري احسين المدللها؟
طالعــه زينــب بلا كافلــها
____
زينب وســتر الوجـــود احـــتار بيها
بصاية الله وصـــاية الــكافــل وليها
على الناگه اشعجب مگيودات اديها
احــجار ليــش الوادم اتشـامر عليها
ياهو اليصعدها واينزلها؟
طالعـه زينـب بلا كافلها
__
الحرمه زحمه تنــوخذ لليسـر هيه
اشحال اذا والــدها حمـاي الحميه
اعيون صلفه الگاعده بديون اميه
شلون تدخل زينب اعليـهم سبيه
الي هاي الفكره شيوصلها
طالعــه زينــب بلا كافـلها
__
الچان اخوها الهوه مايسمح يمرها
اگــباله فـن واحد اذا يطري ذكرها
زينب الحادي عگب عـيــنه يجرها
وين ماكو سوگ بيه زحمــه يمرها
الحادي فعله كلش ايألمها
طالــعه زينــب بلا كافلها
__
ابلايه محمل تمشي وبلايه حمايه
حيل مســتغربها عـقــلي هالروايه
شــنو معــناها عليــها مـــاكو رايه
أذن زينـب حاسـبيها اعله السبايه
فكري حد هاللحظه ماقابلها
طالــعه زينــــب بــلا كافلها
__
حيدر تركي الكربلائي
للسبي
راس الگمر يحچي الراس الحسين
زينــب وينــهـــا اويــن الـــدواوين
وَنـو فــــوگ الرماح
ودمع اعيونهم طاح
على زينب
_
مـن فوگ الــرماح وهــاجـت الخوه
والمروه ابألــمــها اتـحاچـــي المروه
زينــب ويــن ذيـــچ ايـامهــا الحلوه
امحدبه امن المأسي وتمشي بالگوه
بنــص العيون .. وحادي الضعون
شكــو وادم شـماته ايــمر عـــليهم
يحچـــي للناس .. ابـــلايه عـباس
جــبناها وبــده امشامر حـچـــيهم
نص يشمرون .. ونص يضحكون
والبـــاقيـــن مــايرحـــم حچـــيهم
ومن قرر الحادي يدخل السوگ
من گـــد مستحاها عـثرة النوگ
من اتعاله الصياح
دمع اعيونهم طاح
على زينب
____
الساده الـچانـو ايحكـمون بالكوفه
هواشم وبگصصهم غــيره معروفه
عرضهم زحمه والله الوادم تشوفه
اول تالي اخـتهم تمـشي مچــتوفه
وادم الـــشـام .. تحسـب ايـام
حتـى ايشاهدوها ابلايه اخوها
ابلايه كفـــال .. والــشمـر گـــال
لــمو احچار حتــى اتگاطــفوها
مـــــايـــردون .. لاتــخـــافــــون
مــو عــدلين اهلــها ومايــجوها
گال وبيـدي بالطــف گاطـــع الروس
وحوافر خيلنه اعله اخوانها اتدوس
اعلــيها اشــر الذباح
ودمع اعيونهم طاح
على زينب
___
صاح الحادي وحچاياته سم بيهن
يشايل روس اهلها الروس دنـيهن
خيشــوفـون اديــها مـــن ندميهن
النـوب اگبــالها هــالروس نرميهن
هــيه شتــصير .. والــمن اتــدير
نظرها والكفلها تشوفه بس راس
مهبــطه الهــام .. وكــــلـــها آلام
والـغــربه عگــب خــوتها حراس
صاحو ابصوت .. فــــزز المــوت
كـفلــنها عــگب عينـــك يعـباس
شامي صاح عندي اطفــال غافين
لتگـــعديهم انتـــي كــافي تـبچين
سكتت حتى يرتاح
ودمع اعيونهم طاح
على زينب
___
زينب بت علي وحامي الحمه وجاره
اسـمها عفـــة الله وعـــرضه واسـراه
مــعقـــوله تطــــب ديــــوان خـــماره
وراس احســين ظـلت ترجـف اكتاره
زحـمه الحجاب .. اهــنانه ينــجاب
يـــم وادم بـــلا غـــيـــره وحـــميه
زينـــب اشـلون .. وياها يحــچون
الغـــربه وبـــدواويـن ال امــــــيه
مــصدر الدين .. واخــت الحسين
وســـف صــاحولهــا يالــخارجيه
الجبرائيل يخجل يحچي بيها
شمــر ياوسفه يتـــامر عــليها
الخدر البالسـمه انلاح
ودمــع اعيونهم طاح
على زينب
_
كلـــش حـار ولــــد المرتضى دمهم
من فوگ الرماح وعرگت اگصصهم
الذبـــح ماهامهم بس السبي همهم
والصــاير بخــتـــهم حــيـــل المهم
عــفـــة الكـون .. مــــن يظـــربون
غيـض الـــروس يظهر عالمـــلامح
صــعبه زينـــب .. والله تنـــســــب
وحچي اهل الشام كلش چان مالح
ماكـــو خـــوان .. ولاكــو ولـــــيان
بالطـــف ظـــلو اهـــناكـــه ذبـــايح
حرمه والدرب متــروس شمات
المن تتـــجه والـــي كــفل مات
كــل البالضـعــن ناح
ودمع اعيونهم طاح
على زينب
-------
حيدر تركي الكربلائي
الوحشه
.
.
.
هـــلله هـــلله يــازمـــان اويـــاها
زينـــب اللــيله افگــدت ولـــياها
اه يازينب
***
زينب ابهالليــله مـــو زيــنب امس
من مصايب كربله انتــرست تـرس
حسين مرمي شـافته بحر الشمس
والخيــول اخــتارتـــه المـمـــشاها
اه يازينب
***
اختارته الممشاها متعمده الحصن
حتـى صدر حسينها اطحنه طحن
شلون گـلـي المــثل زينب تستچن
بـذبح اخــوها الـــوكت مـن لاوها
اه يازينب
***
الوكت عگب اخوانها وذاك الستر
وعگب مامنها الخــدر ياخذ خدر
امسـت وخيمــتها يحرسها الشمر
شــلون عــباس الشــهم يـرضاها
اه يازينب
***
امست وليل اهــدعش يامــصعبه
يـهل زينب جـفـن زينـــب شيــبه
حرمه هــم مفجـوعه هـم امسلبه
الوكت فوگ اخــوانـهـــا اتــولاها
اه يازينب
***
فوگ ذبح اخــوانها ونار الگــلب
اخت ابوفاضل عجـيبه تنـضرب
صعـب لا والله اكثـر مـن صعب
مگــيده يــــسراها وي يمنـــاها
اه يازينب
***
زينب اول تالـــي مگــيوده الادين
زينب اول تالي ملطــومت العــين
زينب وعگـب ابوفاضل والحسين
اليســـوه المايسـوه شــو حاچـاها
اه يازينب
***
دموعه اعله اخـدودها انـهــر تسيل
والشـــماته بالحــچي گامـــت تعيل
التفتـــت ولا أبـــو اليــمه ولا كفيل
ايــرد لســن نــاس الـحقـد شرواها
اه يازينب
***
ناس بس هالــناس لاذمه وضــمير
المـثل زينــب تنــسبي عدها يصير
وأبو اليــمه مگــطع وفـوگ الهجير
المهـم يـرضه ايزيد عــن طــرواها
اه يازينب
***
حيدر تركي الكربلائي
ليلة الوداع
.
.
.
وداعاً .. وداعاً .. يالحسين وداعاً
------------
وداعاً هـيـه صح يــحسـين كـلمه
وراح تـخلي عمري يصـير ظــلمه
اول ماتـــعـَـتـب بــــاب الخـــيام
اخــــتك يعــني مامـعـــنها تــعمه
وداعا .. وداعا .. يالحسين وداعا
---------------
وداعــا من گلــتلك مــطــرت ادمــوع
واحس من جوه گلبي اهواي موجوع
باچـــر ادري مـــن اتـــروح يحـــسين
ابأذني راح اســمع كـــسر الظــــــلوع
وداعا.. وداعا .. يالحسين وداعا
------------
وداعا ياهوه الله وبـيـه شهــگه
باچر دنية الله اتــصيــر خنــگه
الملگه وين يالـماترجـع ادريــك
بس لا عالتـراب اوصـالك الــگه
وداعا.. وداعا .. يالحسين وداعا
------------
وداعــا يالوداعــك جمــره بــيه
شسوي الخيمه من اتــوج عليه
اطفي اعبايـتي البيها تشب نار
يـبو الســجاد لو طــفي رقـــيه
وداعا.. وداعا .. يالحسين وداعا
------------
وداعــا والحــچي رايــدلـه ايام
مــنا لربعيـــنك راح مــــا نــــام
خـافن للســبي من احنــه ننگاد
من النوگ خويه اتطـيح الايتام
وداعا.. وداعا .. يالحسين وداعا
------------
وداعـــا راح اروح ابــلايــــه كـــفال
على امتوني السياط وبيدي الحبال
الهم الراح اشــيله خـــويه يـحسين
والله وداعـــتك مــتشــيله الــجبال
وداعا.. وداعا .. يالحسين وداعا
------------
حيدر تركي الكربلائي
القصيده الرئيسيه اليله الاولى
.
.
.
رادونـي اخـــتار ابيــن اثنين
گالولي الجنة وگـــلت حسين
الجنة وكل ماتحويها
يـم باب القبلة الكيها
كلـمه ومابـالـغ بـيـها
گلت حسين
***
روحي حسين واحساسي ..وبس حبه الترس راسي
الهوه المامـر على قبـــته .. ماتتــــقـــبلـى انــفاسي
گلبي چـــن علگ اخضر .. انـشــد اباب ابـــو الاكبر
مـــلوحـــة ايـــــد زواره .. حنــين بـداخلــي غـــزر
الگــال اتـــبالغ بهـــــايه .. مامســـتنــــشــــق الرايه
والرايد هــــوى الـــجـنه .. خــلـي يمـــشي مـــشايه
والراضع غيره مــن عاشور
يشعر بحســاسي من ايزور
الجنه الـ الله المسويها
يم باب القــبلة الگيها
كلـــمه ومــابالـغ بيها
گلت حسين
***
اباب الـقبلـــه والقبلـه .. اعلــيها من اترك القبلة
للفردوس چـــن ادخل .. صحن حسين اذا طبله
بجنة حسين اكو كوثر .. يـــروي الداخـــله جمر
مكان الكوثــر بصحنه .. بـــيـــن الراس والمنحر
والهالحــــاله اتـمـــنه .. اگـــضــي ايامي بالجنة
واذا وناتي احس خفت .. الـــسيد جاســـم اتعنه
ومن ينعى السيد روحي اتهيج
وتوصــل ونــاتـــي لطـــويريج
والدمعات الاجــريها
يم باب القبلة الكيها
كلمــه ومــابالغ بيها
گلت حسين
***
جـــروحي كربلائـــيه .. ودمعــــاتي حسـينـيه
المامتـــصل بالــخدمه .. خــــل لايـتصـــل بيه
يشـــهد الله مذبوحـي .. جمرة خيمـته بروحي
والالــف وتسعمـــيـــه .. اشـعر كلثـهن جروحي
كلشــي تعلــــق بكبره .. احبه وداعــة الـزهره
السدره چي عليه فيت .. احبن كلمــة السدره
ولدان الجــنه وحــور العين
يحلمون بشوفة گبر حسين
والاراء البــــــديـــها
يم باب القبلة الكيها
كلمه ومابــــالغ بيها
كلت حسين
***
الجنه الي يطـب الها .. مو صاحي الذي يملهه
وجنة حسين ابو اليمه .. بمكــــه مـــا ابدلــهه
حسين وكــل تفاصيله .. حلـــم مجهول تأويله
لذلك غير ابوالسجــاد .. عقلي يرفـــض يشيله
جنة المـــؤوى بالحاير .. والهــــذا السبب حاير
شنو معنــاتهه الاملاك .. كامــت تحــسد الزاير
معـــناها جنــــات الرحمـــن
تتجسد في صحن العطشان
ومن احتام الطاريـها
يم باب القبـلة الكيها
كلمــه ومابالغ بــيـها
گلت حسين
***
الظامي الاسمه ابو اليمه .. اعتـبره ولي النعمه
والــــهذا السبـــب انـــي .. اشعـــر راحتي يمه
العـــلوياته مــن انحـــب .. وشمـا بالبچي اتعب
فدوه اعيوني ودموعي .. الدمع ام الخدر زينب
ولو تطشـــــر اعـــيوني .. وكل ناسي يعـوفوني
يكفــــي حســـين ويايه .. الــــوادم مايهمـــوني
واليعمي بحـبه شنهو الناس
ياخذ بچـفوفه چــف عباس
الضاعت مني وناسيها
يم باب القبــلة الگــيها
كلمـــه ومـــابالغ بيها
گلت حسين
***
حيدر تركي الكربلائي
للاربعين
.
.
.
عطشانه اهـواي .. بـس مـو للـماي
الوجهك يحسين
عطـشانه اهـواي
_____________
صــار اچــم يـوم امفـارگني
وخدي امن المدمع يحرگني
اســئــل عــنــك يـامـاي الله
يـالوجــهـك چـان امــغرگني
محــروگــه ابــدلالي الـخيمه
وگـلــي اســئل عـنك ياغيمه
يـامــاي اعيــوني الشـيــلمك
يـالمــتبدي بحظــن الـهــيمه
اشتاگت عيناي .. بـس مـو للـماي
الوجهك يحسين
عطـشانه اهـواي
_____________
ميته امن الشوگ امخليني
مـن عذبك يمــته اتـرويني
حارگني افــراگـك حارگني
ومحـد ياخــويه ايطـفيني
شمـات اهــواي الـشـافوني
وعنـك كـل ساع ايسئلوني
يابس حسيته امن اغيابك
يابو اليمه السان اعيــوني
ثــق يارجـواي .. بـس مـو للـماي
الوجهك يحسين
عطـشانه اهـواي
_____________
احتاجيتك بــدروب الــغربه
چــتالــك من مـتنـي ايظربه
دورت اعــلــيـك ابأشــيــائي
المــاضلت منهن بــس تــربه
سلبـوهن كـلهــن مــن عنـدي
وضلت بس دمـعاتي ابخدي
اشعر كل دمعه امـن افـراگك
يمـكن يابــو اليــمــه ابگــدي
احچـيلك هاي .. بس مو للماي
الوجهك يحسين
عطشانه اهواي
_____________
بحچايـاتــك جــاي اتــذكر
وافـرك بچفـوفي واتحـسر
من سمعت حسراتي الناگه
شـو گامـت تمشي وتتـعثر
شــوگك موتنــي وتدريني
راح اغـفـه وبلـكت تلفـيني
اول مــاغمــضت اعــيوني
لن سوط ابمـتني ايوعيني
هـمــي وبلـواي .. بـس مـو للـماي
الوجهك يحسين
عطـشانه اهـواي
_____________
اشتاگيــتك ياروحــي وعــمري
وشوگك مدري اشسوه بصدري
اعلــه افــراگـك لا مـامتــعـوده
وكلــش زيــن ابـزيــنب تــدري
ابهجـرك مــدري اشـصاير بــيه
اختــك بخـــلافــــك مــعـــميه
مــن يـوم الشـفــتك عالغـــبـره
اتطــشــر وانـــلـــم يــــومـــيه
ملهوفه اعظاي .. بـس مـو للـماي
الوجهك يحسين
عطـشانه اهـواي
_____________
تعــبنـــي افراگــك تـعــبني
شمـعه وهجــرانـك ذوبــني
احلــم ترجع واگـعـد والـگه
راس گــدامــي ايــعـــذبـني
راسك من ابـچي ايضــمونه
ومن اسكت همه ايطــلعونه
ماكفــاهـم جــرح امــتوني
رادو دلالـــي ايجـــرحــونه
نوحي ومبچاي .. بـس مـو للـماي
الوجهك يحسين
عطـشانه اهـواي
_____________
تمت والحمد لله
حيدر تركي الكربلائ
للامام الحسن
.
.
.
البالگـبر دافــن أخــيه .. هذا وحده اليدري بيه
انكسر ظهري عالحسن
ويمكن اعيوني عـمـن
من الدموع
_________
حرامات .. ضوه اعيوني بالگــبر حطيته
حرامات .. وســفه بيدي بالترب غطـيته
حرامات .. وياي اخويه ابكــربله اتمنيته
حرامات .. هسه ظــهري منكـسر حسيته
الشال بالتابوت صبحه .. لاتسألونه اعله جرحه
ابشيلته اضلوعي انحنن
ويـمكـن اعيــوني عـمـن
من الدموع
_________
بالتراب .. ذكـرياتــي اتطـشــرن وامــالي
بالتراب .. ايروح كلشي ويبقه هوه ابالي
بالتراب .. اليـوم ياهالنـاس دافــن غـالي
بالتراب .. النــوم ويــاه باللــحد يحـلالي
اليبچي لجل احزام ظهره .. هذا بس الله اليصبره
الهالسبب لجـله جرن
ويمكن اعيوني عـمـن
من الدموع
_________
يعباس .. انحنه ظهري وشوف انته ابعينك
يعباس .. والحــچي ياخـويه بيــني وبيــنك
يعباس .. مــن تطــيح اعلــه النهــر چفــينك
يعباس .. ابطيحــتك ينكسر ظهـر احسـينك
الماكشخ بخوانه مكسور .. هذا حالي بعشره عاشور
راح اعتــب عالـــزمن
ويمكن اعيوني عـمـن
من الدموع
_________
تره العين .. امــن البواچي للاخــو اعميها
تره العين .. شلـي بيـهــا والحـسن مابــيها
تره العين .. بــقـه بـس المــدمــع ايســليها
تره العين .. ذابــله چــيـه بالگــبــر راعـيها
اجنازته من نزلتها .. روحي بيديه ادفنتها
جسمي وي جسمه اندفن
ويمــكن اعيـــوني عـمـن
من الدموع
_________
تمنيت .. من اطيح اعله التراب امخضب
تمنيت .. زينـــب ام الـخــدر ماتـتـــســلب
تمنيت .. الحسـن يمها وفنه واحـد يگـرب
تمنيت .. ماكو واحـــد يوصل الحـد زينب
حتى زينب تبقه اميره .. وحتى ماتمشي اسيره
بالله شحچي اويه المحن
ويمكــن اعــيونــي عـمـن
من الدموع
_________
تمت والحمد لله في ٢٦/ ١٠ /٢٠١٧
حيدر تركي الكربلائي
شهادة الحسن ع
.
.
جبل يالماتطـخ الراس اول مـــره ياعـــباس
تبچي
شو محني الـظهر جاي
مبيــن فــاگــد اهــواي
يابو فاضل
---------
عــباس ترسانة حـرب .. عباس ماكــــو بكبرك
طاريك ايرجــف الزلم .. يامحـنه هاي اتكسرك
شخيرك تگوم وتنچفي .. وعطـر المقابر عطرك
الرايحلك امبـين ظــهر .. مــن هاي لازم ظهرك
حــيلك ماخذه الــتابوت اتنازع چـن تريد اتموت
حقك
ياهو ايلومك ابهاي
امبين فاگد اهواي
يابو فاضل
-----------------
الاخ الچبير امن الله شو .. تلگاه نبـع حنيه
وانتـــه چــبيرك دافـــنه .. وتتـعثر ابطاريه
يالمنــحرم من الضوه .. من تعمه ثق عاديه
ندري الصبر لجل الحسن .. يــرادله امكانيه
حاسر عالترب گاعد تلــطم لطــمة الفـاگد
هايم
يالمتبدي چن ماي
امبين فاگد اهواي
يابو فاضل
-----------------
بــين الــبقـــيع ومــــنزلـــك .. ينحسبن اچم خطوه
ابهاي المسافه اشگد طحت .. چيه بيك ماضل قوه
الماينكـــسر لجـــل الاخـــو .. ماينحـــسب عالخــوه
دمــعـك اذا مـــو للـــحسـن .. چا گـــول المن يسوه
اتواسي دمعة احسينك غـــرگـــانات خديــنك
مدمع
اليبچي وصاح رجواي
مــبين فاگـــــد اهواي
يابو فاضل
______
اتجـــالع اشعــندك ياگمـر .. وي كــل نفـــس تتالم
هوه انته لو خوك الحسن .. گــللنه ياهـــو اتـسمم
تلطم على اعيونك گمت .. وجفنك امن الدگ ورم
وتگول من عگب الحسن .. بــيمن بـعـــد اتشــــيم
حقــك تلطـــم وحافي كشختك بالترب غافي
وسفه
معلعل بيك الف داي
مــبين فاگــد اهواي
يابو فاضل
-----------
عباس ياطــود الــمجــد .. يالماكو ادين اتلوحك
معقوله راجع بس جسد .. چـا وين دافن روحك
بدلالك اشسوه الحسن .. وبانت عليك اجروحك
شتسوي بالطف لوشفت .. فوگ الـثره مذبوحك
يمكن تنــذبح مــرتين من اتشوف صدر احسين
امهشم
امأكد تفگد الراي
امبين فاگد اهواي
يابو فاضل
------------
حيدر تركي الكربلائي
شهادة السيده رقيه
.واسئلكم الدعاء
.
.
من زمان .. ما گـتلك يابويه شلونك
.. ومابستك مابين عيونك
فارگتك من يوم العاشر
اســئل ويگلولي مسافر
من زمان
*
ان چان ماتعرفني ياهــي ورايــد اتناشد عليه
انـه شــريـــان البـــگــلبك انــه يابــويه رقــيه
چان ثلث اسنين عمري ومن عفتني صار ميه
تغيرت مـــن يــوم حطو حــبل يابــويه بـأديه
بالطريق .. تمنيتك حاضر يالغالي
.. حــاديهــم لــوع دلالي
ايگلي طشرنا بالحافر
اسئل ويگلولي مسافر
من زمان
*
بويه من جابـولي راسـك قــررت ابدي الزياره
دنگـت ردت انه ابوسه حتى گلبي يطفى ناره
شفت وجهك يابس اعليه دمه بالعـاشر تجاره
دورت لنــهـــا جبهـــتــك شاجــيه بالحـجاره
ياحرام .. متــغير منــظر سجداتك
.. وبالدم مصبوغه وجناتك
مروتك بويه بيك شصاير
اســئل ويگــلولي مــسافر
من زمان
*
رايده اشكيـــلك يبويه عالضرب والسوط والجر
وعالشماته وعالاذيه وعالشمس والعـطش والحر
بالدرب ابتلي بلــوه وداعــتك لو جـــدمي يعــثر
اتگطع السوط اعله متني چي گلت ياجد يحيدر
من بچيت .. دمعــاتـچ گالــو مــمنوعه
.. يابنت المهشومه اضلوعه
الوادم ليش اعليه اتشامر
اســئل ويگــلولي امسافر
من زمان
*
صارلي اچم يوم بويه ابفي حنانك ليشم ماحس
يالچنت من فيض عطــفك دنيــتي حــنيه تارس
بويه اخــر مره شفــتك چــان ثــغرك حيل يابس
مــن وراها مابــقــالي اوداعــتك بالــماي واهــس
من ضميت .. الدنيه خلافك صارت صحره
.. ودلالي اصــبح عــگبك جمره
شگد هل لخلافك هالناظر
اسئــل ويگــلولي مـسافر
من زمان
*
انـه يومــيه اتانــي گاعــده ابــاب الخـرابه
مثــل المتيــه يبــويـه لاعــمــام اولا كــرابه
من عكب ذاك دلالك گـمت انام اعله الترابه
عمري يم راسك يـبويه ينتهي بلكت عذابه
شكد تنيت .. يم راسك تخلص ايامي
.. وداعت دلالك يالضامي
مابيه من ابـقى الــباچر
اسئل ويگلولي امسافر
من زمان
*
حيدر تركي الكربلائي
للسيده رقيه
.
.
.
شـاءت الاقـــدار .. والـتقـــينه
عالجره والصار .. من حچينه
گتلي اليوجعچ ويــن
گتــلك انـته يحـسين
توجع رقيه
*
اربعه وعشرين يوم وشوگــك بـروحـــي يجر
الثانيه بهـــــجرك احســهـا بثگــــل ايام اليسر
اهوايه محتامه اعـله صـدرك رايده اغفه عمر
بويه مشتاگتــــلك بــگد ماضرب متني الشمر
الألمتـــني اهـواي .. ومنها اعاني
بويه طـاري الماي .. مـــــو اذاني
ومو من گيد اليـدين
گتلـك انتــه يحسين
توجع رقيه
*
گبل ماتغمــض اعيونــي چانــــت ايامــــي حبل
وسوط وصياح وشماته وضـرب واشواك وهـزل
ادعيت يمتـه الرحمــة الله ورحمـتك بويه انتقل
السبي بالنسبه الغيابك وحق ضلـع امـــك ســهل
دمــعة وتبــديت .. عالوطـيه
اعليه من ناديت .. يارقــــيه
ياهو المنه تبچـــين
گــتلك انته يحسين
توجع رقيه
*
اعليه تسأل انه زينه شلونـــك انته ياصبح
اليوجعـنك بالله طــــابن لو بـقه منك جرح
بويه المثـلث مكـــانه طـــــاب لو لا منفتح
ارد اشبگك بس اخافـن الچم امكان الرمح
صـــدرك المطــحون .. مــن الـزمه
شلون اشـمه اشلون .. خاف الچمه
جرحي الغافي بالعـين
گــتلك انـــته يحــسين
توجع رقيه
*
سولفيلي اتگلي بــويه خـاف انتــــــه تـــنفجع
مره منهن عله الناگــــه ذكرتـــك وهـــل الدمع
بالرمح واحد ضربني وكســـر من صدري ضلع
شگد تمنيــتك يبويه حـاضــر بـــذاك الوضــع
ابنيــتك يحــسين .. من ولوها
بالحــبل مرتــيــن .. گـيـــدوها
وگلبي النياشيــــن
گـتلك انته يحسين
توجع رقيه
*
من التقيتك ضمه روحي راح يالوجهك نهر
هنه صح چم يوم لكن يالابو جنــــــهن دهر
يارقيه گتلي بويه شو علــــــــه خـــــدج اثر
چنه خد امي الزجيه وره البــاب من انسطر
ابعطــفك المفگود .. حسستني
من رجعت اردود .. وقبلــتني
جرحي بگد السنين
گتـــلك انته يحسين
توجع رقيه
*
حيدر تركي الكربلائي
هواي اجروح بيه واكبــرهــن رقــيه
واكـــبرهن رقـيه
يارقيه
***
يـــعتگ كل جـرح بـــيه .. وجرحـها اجـديد مايعتگ
من اگول حسـين اتنفـس .. اگولن يـــارقيـــه اشهگ
الطفله السـطـره تذبحـها .. اشحــال البالرمح تنطگ
امورده اخدود البنيات .. وبس خد بنت اخوي ازرگ
چي تبجي اعله ابوها هــــواي يعــــذبوها
ماگـــالو خــطـــيه
رقيه
***
بنات حسين كل وحده .. جـرح اتحسـسه ابروحي
كل وحده بطعم دمـعه .. التطـيح اتهـدم اصروحي
ورقيـــه لان مملـــوحه .. حچــيها ايــفزز اجروحي
ماگــالتلي وين حـسين .. گـــالت ويـــن مذبوحـي
ومن صاحت يبابا جــــيران الخرابه
صاحوا يالسبيه
يارقيه
***
چـانــت چنها جـــوريـه .. گـــبل الـــــعاشر اتذكر
ذبلت بنت اخوي حسين .. مـن گد الضرب والحر
بنـــات الشـــام كاللـها .. وجهچ لــيش شــو اسمر
المسبيه تگـــل الهــــن .. طبــــعن هيــــچ تتــغير
شهر طول سبيها الطفله اشضال بيها
اتغيرت موش هيه
يارقيه
***
ضعن والضعن بس اجروح .. جرح من عدهن اتهزع
وگع والحادي صحـناله .. ويســــوي روحـه مايسمع
افتركـــلي وگالي ارقيه .. اوگـعت بـس الها ماارجـع
سمع وختاض رمـح حسيـن .. نـــبت بالگاع مايطلع
رجع حاديـــنه الها ظربها وحيل تلها
اصرخت لحگي عليه
يارقيه
***
الـنوگ اشــويه واطفالي .. يمـكن فـوگ الثمانين
نص ركبو ونص للشـام .. راحوا بالسبــي ماشين
ورقيه صـاح حاديهــم .. يجب من نوگنه اتنزلين
مشي ترحين بس بالـچ .. مــن گـد الـتعب تبچين
بس يسمع حچيها يجي ويزمخ عليها
ويگلها خارجيه
يارقيه
***
غصن چنها لچـن يابـس .. مامـــــتـروي حـــنيه
ماشبعانه من حضـــنه .. لـــهذا تبچــــــــي ليليه
تصبح ياحسين اتصيح .. وتمــسي اعلــه طاريه
عمر هالـطفله ياوسفه .. بخرابتـــــهم تـــوالـــيه
بشامات المصيبه غفت وسفه غريبه
وافتها المنيه
رقيه
*
حيدر تركي الكربلائي
مقدمة عزاء
.
.
.
زيـنـب ابـگــد مابـچـت لـخـوانـها
شيبت حتى السمه امـن احزانـها
يازينب .. يازينب .. يازينب
_______
مـن كـثـر دمـعـات زينـب عالــوجن
شـيدت بـخـدودهــا بـيـت الــحـزن
مـثـل زيـنــب مانـظــن احــد يــون
كربــلـه مــاطـاحـت امــن الـسـانـها
يازينب .. يازينب .. يازينب
_______
الدنـيه تـصفن لـو عـلـى زينـب تـمر
وكـل حـزنهـا ماوصـل عـشـر الـعشر
الدمـعه من دمعـات عـيـن ام الخدر
اتـظـعـظع الدنـيه وتـــهـز اركــانــها
يازينب .. يازينب .. يازينب
_______
اعيون زيـنب چـانت ابگـد ماتسيل
چــوت ابدمعــاتـها ظــهــر الـهــزيل
وبالاخص من يـنذكر طاري الكفـيل
يـنـفــجر مــن عــينــهــا بــركــانــها
يازينب .. يازينب .. يازينب
_______
الشمر چان ابسوطه يظربها اشكثر
وسود خلـه امتـونـها سـوط الشـمر
اتمـنت العـباس ابـو زنــود الـســمر
حـاظـر ويـنـظــر فــعـل عــدوانــها
يازينب .. يازينب .. يازينب
_______
سولفــت فــوگ الـهــزل ســالـوفه
انـدار راس حســين چـان اتشوفه
اتــگلـه تقــبل بالحــبـل مچـتــوفه
زينـــب الــچــان الخــدر عنــوانـها
يازينب .. يازينب .. يازينب
_______
طالــعه انه اويــاك مـن نـفـس الـعـرگ
واعـدتــنـي وگــتــلــي لا مـانـفــتــرگ
مـن صـحــت ويـنك خيمــنه تحــترگ
مــاشــفـت غــيــر الـــخـيـم دخــانــها
يازينب .. يازينب .. يازينب
_______
الفاگده اخوتها عجيبه اتـشـم هوه
هيـه والمــيـت يحـسبــوهــا ســوه
الـزينـب ابـهـا الـحاله يـنـفع يـادوه
اشـيــنــف وذَبــحـو كــل ولـيــانـها
يازينب .. يازينب .. يازينب
_______
جــرح عـيــنـي اشــما اســده يـنــفتح
خـويـه كـل مـاشــوف راسـك عالرمح
اسـئل الليـل اعــله زيـنــب والصــبـح
واسـئــل ابــدربـك حــبـــل ذرعــانــها
يازينب .. يازينب .. يازينب
_______
الحالي شــفت العدو يبــچي والصديق
اخــتــك الــبــس الــدلال الـهـا يــلـــيق
شـلــون وي ذبـاحك اتخـلص الطــريق
ونـاگـــتي يــاخـويـه بـيــده اعــنـــانها
يازينب .. يازينب .. يازينب
_______
حقـها زينـب تبـقــه تـنـعــه ومـاهــدت
اخيول عشره اتـدوس اخـوها شاهدت
الشمـر مــن شــافـتــه هـيــه اتــأكــدت
حــسيــن مـيــرد وزمـــنـــهـا خــانــهـــا
يازينب .. يازينب .. يازينب
_______
حيدر تركي الكربلائي
يهدا ثوابها الى روح الشهيد خادم الحسين ع
سيدكريم الموسوي
للسبي
.
.
.
ابــاب الساعات .. وگــفن ساعــات
وعالمستورات
تــنظر شمـات
****
مـــاصــارت ولاتنــعقـــل .. ولامرت ابال انسان
اليحدي ابنات المصطفى .. شمر وخوله وسنان
جـابوهن الشام الحزن .. وبيديهن احبال امتان
نســـوان وعــيون الزلم .. كـلـش تأذي النسوان
للميخــجلـون .. وكحات عيون
وسفه يصدون
عالعـــلويــات
****
مرسال اجه الحادي الضــعن .. هز راسه گلهم جيد
يمـــكن رخـــه حبل اليــسر .. رد مـن جـديد ايگيد
من اجنوده جاب اطول رمح .. ونـبته براس السيد
وللـــشـام گــال الــهـم نطــب .. لــمن اهــلها تــعيد
وگــفن حفاي .. وبلايه افيــاي
الرجلين بهاي
شبعن چويات
****
حلــفو اسالـــيب الخبـــث .. بضعن النبي يسووهن
وصـــلو الـشامات الفجــر .. وماقبـــلو ايـدخــلوهن
السوگ الضحه من يزدحم .. بنص زحمته يمشوهن
غــايـتهم عــــيون الزلـــم .. ابلا كافــل يــشوفوهن
ويـــن العبــاس .. عن هاي الناس
صدن عالراس
چيه خجلانات
****
بالشام انفــاس الـحقد .. اعله ال النبي مشحونه
واحــدهم بــگد الغـضب .. تــجــدح شرار عيونه
اهزيل العليه اخت الگــمر .. حدره الرمح يرمونه
ستـر الله فوگاه منحــفظ .. ماگــدرو ايعـــثرونه
اخ امـــن الـــشام .. شگــد بــيها آلام
واخت الضرغام
اشتحمل شوغات
****
للشام طب واحـد هتف .. مــن عنده موته بصفين
الرايد يرد ثــاره يــجي .. ابــاب المديــنه امــتانين
اليطلب علي ثار اعتنـه .. وحجــار هــمه محمـلين
الضربه برقيه من اجت .. فز عالرمح راس حسين
واكــبار ازغــار .. يشمرون احجار
المايطلب ثـــار
يرمي حچايات
****
البالشام كلها اتجمعت .. وتتعاله صوت الضحكات
اسرنه صـاحو وبفرح .. الماشـــايفتـــهن نجـــمات
من انسبه احجاب السمه .. هلهــــلن الشــامـــيات
الايات مــن فوگ الهـزل .. تبچـــي بحراره الايات
بـــيد العدوان .. وبـــلا وليان
اعليهن ماهان
شبعن لچمات
****
حيدر تركي الكربلائي
ليلة الوحشه
.
.
.
صحت يالمــاخذ الحيل وينك
يبعد اخـتك اجــه الليل وينك
حــــاچيـــني يعبــــاس وينك
***
اتــبدت اعيوني بشلـيلي امن الظهر لســه تكت
تدري عگب الاخو خويه ضايعه تـصـــير الاخت
گلــت يفزعلي امــن اصيـحن ياكفــيلي اتسلبت
تالي شفت الغربه فــزعت اله شخصك ماشـفت
وجــو بالخـــيم نـــار وينك
يالمــن الهـوه اتــغــار وينك
تدري اشسوت الناس وينك
***
طشرت روحي بطريق المشــرعة وكـت الظهر
گـــت بلكــت يشــم عطـري كافلــي وبيـه يمر
الشــمر شال ايده علــيه وگـتله لو زلمه انتظر
هــسه ابوفاضل يجــيك وگـالي آيســي الشمر
صدگ ماتـرجع اردود وينك
صدگ گطعوها الزنود وينك
صفيت ابلايه حراس وينك
***
اعذرني مو قصدي اعاتب لا وحقك يالگمر
ولا اريد بكلمــة اجرحــك اني مومثل النهر
حچايه بس اسمعها منـي يمن فرقنه الدهر
خــيمة اخــتك يابوفاضل مابقـى الها اثـــر
يمن غــافـي عالــتراب وينك
يحرسون اختك اجناب وينك
ثنيــتك زحــمه تنـداس وينك
***
غوربت شمس الطفوف وعيني صوب المشرعه
الدللـــتهــا الخـــدرتها اتــانــي لـــسه امــــروعه
بــس تعال وهــــاك اديــه يلـي اديـــك امگطعه
وخــاف زحمه من تشوف اسـياط بيـهن طابعه
اديــه الچــنهن ايات وينك
شبعن خـويه چويات وينك
الناس بلايه احساس وينك
***
شامت اعــله الخيمه عده يالاخــو وگلـبي مرد
صحت وينـــك ياكفيــلي وصاحلي مــاكو احد
لـــو عدل لمـــن ســـلبنه اخيامــكم چــا ماگعد
السانه من سيف الذبحكم يابوفاضل چان احد
ســَمــــعـــوني يـكــــفال وينك
الحچي المامر على البال وينك
واعــــرف بيــك حـساس وينك
***
امروتك ياخويه گلــي انتــه ميـت لو عدل
شهم يالـكـــلك مــحنه تعــوفني لا موسهل
انچـان ماترجعلي احـَـــضر راح اديه للحبل
وهالحچي ادريبـه يوجع على المثلك يانفل
للمــســتـوره مـــيلـوگ وينك
من تنوخذ على النـوگ وينك
وعليه عيون الارجاس وينك
*
حيدر تركي الكربلائي
شوط كربلائي
للاكبر ع
ماج الجيش وتخلخل .. وچن اعصار حاصرهم
بــس ماگـــال يــا الله .. شــيب راس ازغـــرهم
------------
عــــالاكــبــر اســـولـــفـــلـك .. اسمـع زين وتونس
لـــــمــــن گـــــــال يــــــالله .. حـلگ المعركه يبس
من يمشي اعله وجه الگاع..چن عالجيش يتمردس
بعــده ابطــارف الخـيمه
وصارت شــرده بالهــيمه
وصاح الجيش من ضيمه
ادخيل الله ودخيل حسين.. بنفضة ثوبه اسرهم
-------------
بعد يابكرِ ابـــن غانم .. ياسبعين الف جندي
هاي وبعده بالخــيمه .. گلي شلون اذا يبدي
شراح يصير اذا گلهم .. صارم حيدره عندي
علي يذكرونه كلش زين
من صارت حرب صفين
طمــس روسهــم بالطين
العلي لاوالله ماناسين .. يتذكرونه اكثرهم
------------
الاكبرشاب بـس هالشـاب .. رجف قادة العسكر
الوادم گامت امن الخوف .. مدري شبيها تتعثر
واحــد گــال عزرائـــيل .. واحد گال اجه الاكبر
اكبر شارب اتخردل
دخـيلك گام يتوسل
لمــن طــب المــعدل
مال البلبدايه وگام .. يبچي تالي عسكرهم
------------
صارت انـقسام اراء .. واحـــد گال نــتقدم
واحد گال يمعودين .. يشــهد الله نـتـــندم
الاكبر لون واجهتوه .. يوصل للرچاب الدم
صارت ضجه بالميدان
الرئــي الاغــلبيه چـان
خل تتــراجع الفرسان
شايب شارك بصفين .. رأساً گام حذرهم
------------
شايب ثانـــي منــهم گال..الماشايف يروح يشوف
چنت يوم الجمل موجود..علي من عدنه باد صفوف
الطلع من عدهه سالم چان..اعرج لوبدون چفوف
لاتتـورطون اوياه
انصحكم تره بالله
الاكبر حـيدره رباه
الشايب يعرف المضمون .. الهذا السبب خبرهم
------------
شايل غيـــره بعيونه .. لذلك هابــته هالناس
مايحــتاج اشــرحلك .. عمه وقدوته العباس
البلطف چان متوهوس .. مايلام عالوهواس
الراضع من ثدي الكلفات
زلــمه وحــيد بالــوكفات
اگليــله هــاي الحچايات
بالاكبر نعم ياصاح .. بالطف لمن طشرهم
-----------
حيدر تركي الكربلائي