7934
لنشر قصائد مناسبات اهل البيت
ميلاد الحجه
.
.
.
امبارك امبارك .. ياسيدي امبارك
كل عام وانته ابألف خير
يامهدي
_______
گــالــولي لاتفــرح تــره هالفــرحه متفـيدك
مــارايــديــني احــتفل ياســـيدي ابعيـــدك
وجــهك العـيد وگلـبي المـفارگ تره ايريدك
وعيديتي يالمهدي الصدگ لمن ابوس ايدك
لمن تجي اخبارك .. ياسيدي امبارك
كل عام وانته ابألف خير
يامهدي
_______
كـل مـا اهنيـك انـه احـس بالتهنـئه امقصر
والســاني يالمهــدي تــره محـــتار شيـــعبر
عــودي اذا باچــر يبــس لمن تجـي ايخضر
ودلالــي بســمك ســيدي لــو شافـك ايكبر
شغلتني اسرارك .. ياسيدي امبارك
كل عام وانته ابألف خير
يامهدي
_______
وجــهــك الخــير وغــيــره ياســيدي ماعنــدي
اقـرب شخـص انتـه الــي وتعرف شنو العندي
امعيشـتني نظراتك ملك وبهاي احس وحدي
اشتــملك يگــلولي البــشر گـــلتلــهم المـهدي
اتـونس ابـنارك .. ياسيدي امبارك
كل عام وانته ابألف خير
يامهدي
_______
اشـما تكـثر اهمـومي وتـزيد ابفگدك الامي
ماشــوف غيـرك سـيدي يالمــهدي گــدامي
روينــي فـدوه ابشوفتك گلـبي الك ضامي
ايــامي من غيــرك عدم وشتــنــفع ايـامي
غامـرني بنــوارك .. ياسيدي امبارك
كل عام وانته ابألف خير
يامهدي
_______
يمــته تــردلي ســيــدي وبحــظرتـك اركــع
مشــتاگه اذنـي النبـرتك يالمنـتظـر تـســمع
عندي قناعه ابكلشي بـس ابجــيتك اطــمع
ايدك على راسي يـغالي ابيــا وكـت تطــبع
واتحسس اثارك .. ياسيدي امبارك
كل عام وانته ابألف خير
يامهدي
_______
ويــاك عــيد الله صـدگ يتــســمه عـيد الله
اعلــيــك الــذي ماصــله لامــاينحسب صله
الشايف ضـوه وجهـك عـجــيبه عنه يتخله
ابســمة شفاهــك ســيدي جـبــريل يتــسله
وبشراقة انظارك .. ياسيدي امبارك
كل عام وانته ابألف خير
يامهدي
_______
حيدر تركي الكربلائي
مولد الامام الحجه
.
.
.
بهواك اتغنه .. يعـطر الجنه
يـعطر الجنه .. بهواك اتغـنه
يابو صالح
***
مغرمك . سيدي . ودم غرامك يجري بيه
انتظر . عالدرب . صاحب الطــلعه البهيه
وانسئل . ما اجه . يوسف الزهره الزچيه
اتأمل واتوسل ما اندل .. انته ابيا مكان
دليني تدريني اتأذيني .. طعنات الزمان
تـــرد اتمنه .. يعطر الجنه
يعطر الجنه .. بهواك اتغنه
يابو صالح
****
ياضوه . وكل فجر . انتــــظر غرة ضيائك
دنـــيتي . مظـلمه . سيدي بحاجه السنائك
نلتقي . ابيا وكت . يالحبـــيب ابكـــربلائك
ابنوماسك واحساسك وانفاسك .. اترس ريتي
والزهره بالحظره من نظـــره .. تضحك دنيتي
اريد اتهنـــه .. يعطر الجنه
يعطر الجنه .. بهواك اتغنه
يابو صالح
***
همستك . ياعذب . امن الجنان احله رساله
يانـــده . ولو وگع . ايـغازل الجوري وجماله
بسمتك . بســملــه . مـــن لــدن رب الجلاله
ياراقـي بأوراقـــي واحداقي .. كاتــب قصتي
مجنونك وعيونك من دونك .. تصعب حالتي
غرامك چنه .. يعطر الجنه
يعـطر الجنه .. بهواك اتغنه
يابو صالح
****
شوفتك . حسرتي . وادري هـــايه موبعيده
احترگ . من يـــمر . طاري اسمك بالقصيده
الخالقي . انـــدعي . آرنــي الطلعه الرشيده
ياغالي دلالــي وأمــالي .. بيـــك معلــــقه
كلمها وعلمها وارحـــمها .. روحي العاشقه
دليلي وفنه .. يعطر الجنه
يعطر الجنه .. بهواك اتغنه
يابو صالح
****
صورتك . تنـرسم . ويـــن ماشـاهد مناره
اعرفك . كل وكت . راحـتـك بس بالزياره
امروتك . شوفتك . اتجبر الگلبي انكساره
اتحير واتحسر واتنـطر .. كل ماطب صحن
اتأهب واترقب واتعذب .. يا أبـــن الحــسن
اشوكت اتدنه .. يعطر الجنه
يعــطر الجــنه .. بهواك اتغنه
يابو صالح
****
ما امل . موعـدك . منتــظر حــد ماتجيني
عاشگك . وافتخر . مطشر ابدربك سنيني
مو مهم . والاهم . يمته تـــرجـع ياحـنيني
والمــوعد من يبعد ماتخمد .. نيــران الگلب
مشـتعله وموســهله ياقبله .. بعيون اليحب
متى تتـعنه .. يعطر الجنه
يعطر الجنه .. بهواك اتغنه
يابو صالح
*
حيدر تركي الكربلائي
لمولد ابا الفضل ع
.
.
.
طــلع البــدرُ علينا من ثنايا ام البنين
وجب الشكرُ علينا هكذا قال الحسين
-----
شعشع نـــور العبــاس .. مــن علياء الاحساس
والبسمه بوجه حسين .. معكوسه بوجه الناس
شــيال الرايــه الجــاي .. وثلــث انعــام الوفاي
باچــر بالطــف اهنــاك .. بجفوفه ايــذل الـماي
بيــن عيــنيه خفــايا تحكي ان الطف دين
وجب الشكرُ علـينا هكــذا قــال الــحسين
-----
نور وطالع من نــور .. وخدر اخته بيه مسرور
ويم كاروكه الحوراء .. گـصدت لچفوفه اتزور
صد الزينب بالحــال .. وبعيــونه اتحس افعال
وصاحت يابو الحسنين .. امــبين هــذا الكفال
سجدت لله شـــكرا ثم صلت ركعتين
وجب الشكرُ علينا هكذا قال الحسين
-----
جيــش احسين المولود .. اليجـلي الايام السود
عباس انحسبه احساب .. رايــه وچفـين وجود
رايــه ترجف الشجعان .. مخــلوقه الهـل انسان
عــباس اشكــد ماحــار .. بعيــونه تحس بركان
ومن الافراح هـــذه دمعـت للال عين
وجب الشكرُ علينا هكذا قال الحسين
-----
بيـــــه انـــوار الاقــمــار .. وبيــه نفحــات الكرار
سبـــحان الله العبـــاس .. شكـد شايل نور ونار
نور احســين المـكنــون .. بوجه الناس يشوفون
الهذي اربع معـــصومين .. بچف عباس يبوسون
عندما نادى المــنادي ولـد الحصن الحصين
وجب الشكرُ عليــنا هكـــذا قــال الحسين
-----
الكون ابكـــبره وطــاريه .. مـــن شافه اتـــغزل بيه
هالــــــوادم مــاتــــنــلام .. نــور الله امـــن اتسمـيه
امن اعيونه اشكد محبوب .. من زغره امأسر اگلوب
حـــقها الـطف باچـــر لو .. ابــحب الـــعباس اتذوب
من ضيا شمس الكفاله تـســتدل العالمين
وجــب الشــكرُ علـينا هكذا قال الحسين
-----
حساس وهـوه ازغير .. وبحساسه النـــاس اتحير
بحظن امه وتحس بيه .. اكـــبر مـن عمره اچـبير
تشعر بيه زلمه وحــيد .. ايصد عاللامه امن ابعيد
ولـمــن يبچــي العباس .. بســـيف الكــرار ايهـيد
وغــدا بيــن يــديه رايـة الفتح المبين
وجب الشكرُ علينا هكذا قال الحسين
-----
حيدر تركي الكربلائي
هوسات لـ ابي الفضل ع
.
.
.
يالمــچنه يالــمعدل يـساس الساس
يالمتروس غيره امـن الجدم للراس
ياعــباس ماكــو اليـشبــه العـــباس
ها الطين المنه امسوه
خلص يـوم الله السواك
------
السبعين الـف بالطـف انته من طبيت
يتلــولحــن والله ارگــابـــهم خـــليت
عــد عيــناچ زيــنب انـته مـن نـاديت
ها وروس العسكر وصلت
نص للكــوفـه ونـص للشام
حيدر تركي الكربلائي
ميلاد الامام الحسين ع
.
.
.
هــايـم هــايـم .. من زغري بحسين
هــايـم هــايـم .. من زغري بحسين
____________________________
هايم وقصة غرامي . ما اوصفها ابكلامي . ابتدة لحسين امامي
من الاصلاب
حبه من الله سجيه . ومن نفخها الروح بيه . إلي حسيته هويه
اغلى الاحباب
اسمه يجري وي دمائي . وصار معروف انتمائي . كربلائي كربلائي
احلى الالقاب
راسم راسم .. صـــورته بالعــين
هايم هايم .. من زغري بحسين
____________________________
ابروحي حسيته وضميري . من اذكره اشتم عبيري . حسين بس حسين اميري
شلون انساه
يجري بالشريان احسه . تره حقي من اقدسه . ماشفت بالدنيه نفسه
ماكو والله
حبه لاماصح نظيره . وروحي بمحبته اسيره . وين ما ناظري اديره
حسين الگاه
دايم دايم .. مــو مـــره مرتــين
هايم هايم .. من زغري بحسين
____________________________
حقي لو اتجنن اني . ابغيره مايلهج لساني . مثله لا ماشفت ثاني
ابين هالناس
بي عطف هالكون كله . دوم يامحبوبي اگله . عيشتي ابلاياك ذله
يابو الاحساس
روحي ابو اليمه اعتبرته . ابحبه دلالي اختبرته . ياگلب لو ما ذكرته
ابجدمي تنداس
لازم لازم .. وتــَـرجع الــــديـــن
هايم هايم .. من زغري بحسين
____________________________
انه مديون ابحياتي . لـ الذي ساكن ابذاتي . حسين روحي وامنياتي
واحلى الاحلام
صورته ابعيني رسمها . لمَن اشتاگ انه اشمها . حقي بعيوني اضمها
من الايام
غارو وگالولي كافي . نشعر ابحبك خرافي . گلت كون الله يشافي
المثلي ماهام
واهم واهم .. والــيحب حبــين
هايم هايم .. من زغري بحسين
____________________________
أحمد الباري واشكره . دوم بس بحسين اقره . صار بيني اوبينه عشره
بگلبي موجود
حبه اني ماورثته . حسين من الذر عرفته . إلتقيت اوياه وشفته
اوبينه اعهود
الخاطره هالكون اضده . هوه يدري اشگد اوده . روحي والدلال عنده
وانتم اشهود
خاتم خاتم .. بـثيديه الاثنــين
هايم هايم .. من زغري بحسين
____________________________
صورة حسين ابخيالي . ماتفارگ لحظه بالي . تشهد اعليه الليالي
وهاي الاشعار
يمي احسه ابكل دقيقه . مو وهم لابل حقيقه . انتو لو ردتو الوثيقه
ابگلبي اثار
والدليل العندي علمي . حللو اجزاء جسمي . احروفه تلگوهن ابدمي
ماكو اسرار
ناجم ناجم .. هـالعشگ من وين
هايم هايم .. من زغري بحسين
_____________________________
حيدر تركي الكربلائي
ميلاد ابا الفضل
.
.
.
فـرحانه بظـعة حـيدره .. زينب زينب
مـيلاد سـبــع الگـنطـره .. زينب زينب
----------------------
باسـته وگـالت هلــه .. أبراسه عـطـر المــرجله
چنه كافل
امگــمط ابـراية عـلي .. وللــكفاله ايــلوگ الــي
ابو فاضل
چيه لأن وجها شمس .. ابگصِته احروره احس
وما اجامل
جبهــته اتـنگـط وفــه .. والــوفـه بـــيه اكتــفه
ابـلامـقابل
وسنين چانت ناطره .. زينب زينب
ميلاد سبـع الگنـطره .. زينب زينب
----------------------
اتصيح زينب يخوتي .. صرت احس ابهيبتي
چني أميره
ابــمهده من انــه اهــز .. لو ســمع اسمي يــفز
كله غيره
ابچفه مــن انــه اشــم .. اتيـقـنت هــوه شهم
من عبيره
ايناغي لو صوتي سمع .. يمكن ابأذنــه انطبع
وبضميره
امن الفرحه ضلت حايره .. زينب زينب
ميـلاد سبــع الــگنــطــره .. زينب زينب
-----------------
انـي اختـه وافتـخر .. احجابي هوه والخدر
لاخر انـفاس
باچـر ايبـچي الـزلـم .. عنـدي كافـل والــنعم
اســمه عـباس
ابمقدمه صوتي اعتله .. ومثلي فرحت كربله
وشالت الــراس
الرايه تحله بــس الــه .. وعلى چـفه امفصله
راعي الاحساس
وهالليله لجله ساهره .. زينب زينب
ميلاد سبـع الگنــطره .. زينب زينب
----------------------
الكافــل انطـاها وعـد .. وهـوه بـعده بالمــهد
والنعـم بيــه
امن امه راضع معرفه .. ابحضن اخته ماغفه
چيه تحاچيه
حيــن چــفــه باسـتــه .. حيل يـخجل شـافته
من تنـاغـيه
ابمـقتبــل هــذا العــمر .. اتعلــقت بيـه اشكثر
وَفـي تـدريه
اورود اعله مهده ناثره .. زينب زينب
مـيلاد سبــع الگــنطره .. زينب زينب
----------------------
كـَبرت زينب فرح .. وصوتها بسمه صدح
اتحيي ابو الجود
روحي صاحت كافلي .. انـه غيرك ما الي
اعيوني الشهود
هلــه شــيال اللـــوه .. هله يالوجـها ضوه
راعي الزنود
دارنه استبشر الك .. ابگلبي اصـبح منزلك
انته موجود
سجدت الـ الله شاكره .. زينب زينب
ميــلاد سـبع الگـنطـره .. زينب زينب
----------------------
امــه لمــن شـاهــدت .. اخــته بـيه اتـعلقت
فرحت اهواي
هوه حب زينب رضع .. بگلبه هالحب انجمع
وشكـبر هـاي
اتگول أخته هالگمـر .. بالســمه لمــن ظهــر
ضوه دنياي
ابكافــلي يامــرحــبه .. وبيــتنه مــن عـَـتبه
الخدري عنادي
والجـَيته فرحت تـره .. زينب زينب
ابميلاد سبع الگنطره .. زينب زينب
----------------------
حيدر تركي الكربلائي
ابميلاد عباس الحنين
مـبروك يــا ام البنــين
______________
اعتله الصوت اعتله .. هله ومية هله
هله بـراعـي اللواء .. ومــراجل كربله
ابو اليمــه ابتـــشر .. لمن شاف الگمر
يقبل ايده ويگول .. اجه احزام الظهر
يالجايبه حصن الحصين
مبـــروك يـــا ام البنـــين
-------------
الضوه وهوه الضوه .. من اخدوده ارتوه
شكــثر شايل ضـياء .. لعــد راعــي اللوه
نــده زينـــب عـلي .. ويـگلـــها اتـــــدللي
الحلمتي بيه اجاچ .. الكفيـــلج هلــــهلي
وتطش عليچ الياسمي
مــبروك يا ام البنــــين
--------------
السمه واهل السمه .. تــبارك فاطمه
نعم وام الحـسين .. ابگــمرها هايمه
تحــب هـذا الولد .. ابــو فاضل بعد
ابحظن ام البنين .. وللملاگه استعد
وبكــربله عنــده يقين
مـبروك يــا ام البنــين
__
تبــــيـن قـــــصــــته .. الشـجاعه بگصته
العفيفه اويه الحليب .. اعله زينب وصته
تگـــلــه ام الخـــــدر .. تــره اتامرك امـــر
واذا اتـــريد النجـوم .. احـــذرك تعــــتذر
وعن الخدر تدرينه امين
مـــبروك يا ام البــــنيــن
_________
ابحظن امه وقسم .. وفي امبين نعم
بطل يطــلع اكــيد .. الِـگمــاطه ابعلم
اشحلاته لو غــفه .. ينگـــط عاطــفه
ولمن يبچي تكول .. كأنـــه العاصفه
عباس عنده الغيره دين
مـبروك يا ام البـنــــــين
___________
علي وجها انشرح .. وبــبو الغيره فرح
يوصيه بالحسين .. وعلى صدره مسح
علي عـــقد الــوله .. يگـــول اتــأمـــله
الولد هـــذا يصــير .. عظــيم المـــنزله
ويصير خادم للحسين
مبــروك يا ام البنـــين
--------------
حيدر تركي الكربلائي
ذو الساق المرضوض .. اليبچــيلك محــظوظ
والساكن حــزنـك بحـساسه
يدعيله المهدي اويه انفاسه
اليبچيلك محظوظ
-----
انياله الشايلك شوغة حزن عاشور
ولــيله على اخدوده الدمـوع تـزور
المايچــي المصـابك والله مامعذور
المامكسورلك عـالزهــره مامـكسور
اليتبـــدالك عيـــن .. يگر عين ام احسين
المن حزنك صـــار ابيض راسه
يدعيلـه المــهدي اويه انفــاسه
اليبچيلك محظوظ
-----
الزلمه الي بچه بعيــن الزلم يــزغر
وبس انته البچالك ليـش شو يكبر
ياوارث حــزن عاشــــور ابو الاكبر
اليحــزنلك تـــره عـــاديه لو طــَبر
نحنــيلك هامــات .. ياشـــيخ السادات
المن اجلك باع اهله وناسه
يدعيله المهدي اويه انفاسه
اليبچيلك محظوظ
-----
العايشلك جرح مـن الحـزن طافح
ميهــم بالاجــه وميــبالي بالـرايح
والرايد رضاة المــهدي ابــو صالح
وآ مســموم كــون يــكثر الصـايح
الصيحه المن تراد .. ياشمـــعة بغــداد
والجــاعل حــزنك مـقياسه
يدعيله المهدي اويه انفاسه
اليبچيلك محظوظ
-----
الشاهدله جسر وعيونه هلت دم
وتطشــر دليـلــه وحســه مايلتم
هذا بيــه جـــمر من نار الــمخيم
وهنيــاله العلــيــك هــواي يتالم
التدعيله امه بخير .. يحس ابحزنك غير
الدنــگ عالشــــباچ وبــاسه
يدعيله المهدي اويه انفاسه
اليبچيلك محظوظ
-----
ياموسى ابن جعفر دوماً احچيها
انــياله الدمــعته يمـــك يـــبديها
من ابچيك زينب يعـــني ابـچيها
طاري اگيودكم كــل ما امــر بيها
طاري الطف ايعود .. ابذكرك يالمگيود
والـــي مخلــيك بنـــوماسه
يدعيله المهدي اويه انفاسه
اليبچيلك محظوظ
-----
حيدر تركي الكربلائي
تجليبه للامام الكاظم ع
.
.
.
اشما ثگلت اهمومك حـَلها يم بابه
بــس اقـراله آ يحســين ومــصابه
***
الدنيـــا اوياك بالمگــلوبــي اذا تـــفتر
اوصيـــك ابوصيـه وابــــد ماتخـــسر
الباب الحاجه اگصد موسى ابن جعفر
يگظـــيها الـــك وانـــته علــى اعتـابه
***
بس نقي السريره وانــوي هالـــنيه
وحلـــفه بعـــمته زينـــب المسـبيه
عاتبـــنـــي اذا ماگــــال مگـــــظيه
ينطـــيك وابـــــد ماياخـذ احسابه
***
فتـــح گلـــبه گــبل بيبـــانه للوادم
ماينـــطي الخشن ينطيـــهم الناعم
الكرم من الحـسـن متوارثه الكاظم
الكل عنده سواسي الـغربه واحبابه
***
المتعسره قضيته ومالها كـل حل
وخايف ماي وجـها لو وگـع ينذل
خل يگصد الكاظم هيـــه تتـسهل
اشما كبرت زغيره يمـــه الطـلابه
***
ميـــقصر اويــــاك الكـــله حنـــيه
اذا تبــدي الكلام اويـــاه ابلـطميه
روحه وكــل احاسيسه حـسيــنيه
ولبو السجاد تبقه ادموعه سچابه
***
بس حــلفه بابو الســـجاد والشــبان
اتصير ادموع عينه بالصــحن نهـران
الهســه امن الخيم يستنشق الدخان
الله ايســـاعده وانــــفاســه لــــهابه
***
من وجهك الصــوب الكاظميه اتدير
بس انخه ابو الطلبه الكاظم ولتحير
ثــــق وداعــتك والــماتصير اتــصير
والتـــعـــبان يمـــه تنتــــهي اتعـــابه
***
الياهو الچـان مانگصد ابــــد داره
ولانوصل مضيف الطـــافيه نــاره
وادم احنه نمشــي الراعي البشاره
الابوه بالطف امعــزب حتى بثيابه
***
حيدر تركي الكربلائي
حيل ابچن ياعيون .. عالسبي وعن السجون
الرابط ابيناتهن
توجد قيود
_____________
مشكلتنه اويه السلاسل من بعيد
ابيوم گطعو اطهر واشرف وريد
لمن شــدو بالسلاسل ايــد بــيد
اهــنا بدت مــأساتنه ويه الحديد
جامعة زيــن العباد .. وصلت الباب المراد
وفوگ ظرب اسياطهم
توجد قيود
--------------------
اتلاشت امن الظيم عافية الزمان
يوم حطــو قيــدهم بيــد الحنان
اذنــت دمعـــاتنــه وچــان الاذان
يــا امــان الله نــدور عــــالامــان
وين ما ندري نروح .. تمطر اعلينه جروح
الكــَثرت ماساتنه
توجد قيود
________
سلـــسلة سجادنه وصلــت الـشام
وال اميـــه ورثـــوهــــا للـــ لـئام
رجعـــوها وقــيدو بــيهـا الامـــام
في طوامير السجن عاش بضلام
گضه كل ايامه ليل .. اشتاگته شمس الله حيل
اي نعم والشوفته
توجد قيود
_____
الگيـد شامي واصـله مـو مـن العـراق
العلــي السجاد انصنــع بيه لن يساق
ورجــعوه للكــاظم وچــان الـــوثــاق
اثگيل حد مارض نعم من عنده ساق
جسم ابو طلبه نحيل .. وكيدهم كلش ثگيل
المشكله عالگيد هم
توجد قيود
----------
عدنه عاشور الزچــية ام الحسين
وعدنه عاشور ابو اليمه واربعــين
وعدنه عاشوراء بــرض الكاظمين
اليبچي بيهن ينحسب عالمؤمنين
بينه لغيابه عذاب .. يمكن بثكل الغياب
وهاي من نار السجن
توجد قيود
________
اجروح بيـن الكاظميه وكربلاء
يمكن بگــد الكواكـب والـسماء
والله لو خلص عمرنه بس بكاء
مانـوافي وروح ســيد الشهداء
دجله لو نبچي وفرات .. هالعيــون مقصرات
شلون بيدك سيدي
توجد قيود
---------------
حيدر تركي الكربلائي
يوجع ليل الفراگ .. وانه الطولك اشتاگ
الك بـحلامـي امنســافر
اتفـزز اعيــوني الحوافر
عايشه كل عمـري عاشر
ياحسين
*
عگبـك ماهنيــت ابنوم .. يبعـــد العــافيه البيه
ولو ياعافــيه يحســين .. من گـد ماسده اعليه
شنسه ياهي من عدهن .. وهنه الف وتسع ميه
وحق دلالـــل المـثلوم .. الطف يوجعني طاريه
گلبي امن البچي ذاب .. وسئل عني التراب
حــالي حـال البالمــقابر
اتفـزز اعيـوني الحوافر
عايشه كل عمري عاشر
ياحسين
……… ..
عمري خــــلص ابصفــــنه .. من ساعة ظهر عاشور
بـنات افكــــاري يتـــبدن .. يم جســمك دمع منثور
منـــك رايـــح اهــــوايه .. واولهــــن صبــــع مبتور
امطشر وبمبهب اسيوف.. بوكت حتى الهوه منحور
يالچنك هوه الهاب .. طولك كله نشاب
آخ شمســويه العــساكر
اتفزز اعــيوني الحوافر
عايشه كل عمري عاشر
ياحسين
……… .
اتسامر مع اجـــروحي .. وتاخذ سالفتنه الهم
اتطشر واصـــير اهواي .. بگــد ارماد المخيم
من ايهب علّــي حزنك .. يم باب الجزع التم
كلــشي البيك يوجعني .. لذلـك خــويه اتالم
ظل ابجسمي بس صوت .. الباقي ماخذه الموت
بعـــــد مابـــيه واكـــابر
اتفزز اعــيوني الحوافر
عايشه مل عمري عاشر
ياحسين
……… ..
امسي واصبــــح ابغصه .. يلي امصــابك اشكبره
حــزنك بــاب الِـــــبالي .. الصدري يالاخو تعصره
وحق صـدرك يبـــو اليمه .. الماينــــلم بعد عطره
شجره اختك يماي الله .. وعگبك يبست الشجره
يمته ايخلص الغياب .. يامسلوب الثياب
وخوفي من تغفه النواظر
اتفزز اعـــيوني الحــوافر
عايشـه كل عـمـري عاشر
ياحسين
………
اذا مابيك ابـــد جيـه .. وتدريبـــه نفذ صبري
اوياك الموت يجمعني .. حلمــي يابـعد عمري
تره مشتاگه لعيونك .. بكثر مامختنگ صدري
بــيدك يمته ياخويه .. تمسـح دمعتي التجري
يمته اتغمض العين .. وتشوفك يالحسين
الشخصك اشگد ما اناطر
اتفـــزز اعـيـوني الحوافر
عايشه كل عـــمري عاشر
ياحسين
حيدر تركي الكربلائي
وازينبـــــاه وازينب
وازينبـــــاه وازينب
-----------------------
يالملچومـه مـن كلشــي يجــرح المـا يطيب ابدن
الشلتيهن لون خرســات مـو عجـــبـه اذا يحچــن
يالشفتي صـدر عالگـاع حافـر خيـل بـي يطحـن
كفى من گلتي عوفو حسين بمتنـچ سوطهم وذن
وازينبـــــاه وازينب
-----------------------
طلعتي وچانت الدنيه كلـــش عـــايــزه امــروه
يالمطيه الستــر قيمه وبدونچ كلـــشي مايسوه
ياسالـوفـــة العبــــاس اي يـاشــهگــــة الخــــوه
يدري كافلـچ بالسـوط ؟ مـــن بمـتــنـــچ اتلــــوه
وازينبـــــاه وازينب
-----------------------
يبخت حسيــن يالعفـه الشرف كلمه وعليچ تلوگ
ولـــو ياعفـــة الســاده خذوچ امگيده اعلـه النوگ
رخيص بسوگهم كلشي وحيائچ اغله شي بالسوگ
كابرتــي علــي چنــــچ لكــــن داخلــچ محــروگ
وازينبـــــاه وازينب
-----------------------
السفــر يرادلــه رفـگـه وخّـَـير كـون التماشيـــه
الله يساعدچ يـم عــون شلون الشمـر رافگتيــه
الخنجر حطـه بحزامــه ودم حسين بي شفتيــه
المقتل ماخلــص عندچ طــول الدرب حسيتيـه
وازينبـــــاه وازينب
-----------------------
عـن البيـچ مـن نحچــي يرادلنـــه عشــــر اعــوام
سنه عن كربلــه نسـولف وتسعه نسولف عله الشام
الشماتـه عيونهم فطرت عگب ماخلصوهــا صيـام
لمــــن راح ابــو فاضـل شافـــو طولـــچ الظـــلام
وازينبـــــاه وازينب
-----------------------
المثلــچ وسفـــه يازينب بيــــهــا فـــرو البلــدان
يشيلـة فاطمــه الزهــره الصـــار الخــدر عــنوان
ياقبلـــــة ستــــر انتـــي اي ياكعبـــــة النســوان
تحــدي بزينب الغـربــه مايعقلهــــا كـل إنســان
وازينبـــــاه وازينب
-----------------------
حيدر تركي الكربلائي
من اولايه لولايه .. شلونج زينب ابهايه
اول تالي ترحين
ابلا كافل ولا رايه
من اولايه لولايه
__
ابالچ چان لو ماچان .. يحديچ الشمر وسنان
وانتي الجان طولچ محد ايشوفه
المحد شاف ليچ اخيال .. رحتي امچتفه بحبال
وبحلوگ الزلم اصبحتي سالوفه
شامت صاح من ابعيد .. گال اليوم عدنه عيد
لان مسبيه شاهدناچ بالكوفه
فرحانه شجاها الناس .. چيه جايه بلا عباس
وچيه يم الفرات امگطعه اچفوفه
توجع هاي الحچايه .. شلونج زينب ابهايه
اول تالي ترحين
ابلا كافل ولا رايه
من اولايه لولايه
__
رحتي وچان عمرچ سوط .. وبگلبچ بقه بس نوط
وادري الباقيات بكربله انگطعن
من شفتي الشمر فرحان .. ويحز رگبة العطشان
اعيونچ مو دموعچ عالرمل وگعن
بيديچ الحبل مشدود .. وگبالچ گمر ممدود
راسه اعله الرمح واعيونه الچ دمعن
الصعبه والذي اتأذيچ .. ذباح الاخو يحديچ
ابچيتي وبچن حيل النوگ من سمعن
المهيوبه بلا احمايه .. شلونج زينب ابهايه
اول تالي ترحين
ابلا كافل ولا رايه
من اولايه لولايه
__
كلما شافتچ شمات .. چن توه كفيلچ مات
والهالحظه انتي عايشه بصدمه
الله يساعدچ يم عون .. شلتي هالمصاب شلون
وانتي الگبل ماشايفتچ النسمه
الحادي اولايه من ايشوف .. متعمد بنصها ايطوف
حتى ايزيد لچماتچ بعد لچمه
صاح ولم عليچ السوگ .. وانتي داخلچ محروگ
والمثلچ يزينب حقها من يعمه
حچيّ الحادي سلايه .. شلونج زينب ابهايه
اول تالي ترحين
ابلا كافل ولا رايه
من اولايه لولايه
__
الوادم اذتچ ياحيف .. وانتي الجان خدرچ سيف
بيد الكافل وفنه التعناله
فرحو كافلج چيه راح .. والهذا المنادي صاح
خل نحرگ كفيل الحره دالاله
بنت الاسمه حامي الجار .. گالو شمروها احجار
واحد گال وين العايشه بجاله
وين الي اجيتي اوياه .. شو لايسرته ويمناه
ساكت ليش واحنه انظربچ اكباله
ابلا والي اشعجب جايه .. شلونج زينب ابهايه
اول تالي ترحين
ابلا كافل ولا رايه
من اولايه لولايه
__
زينب زحمه من تمشين .. لارايــه ولاچـفين
والوادم وراچ اتصيح مسبيه
اتمنيتي ابو الكلفات .. يشگف عنچ الظربات
ايگلچ كون عد عينچ يعلويه
ايردلچ كون مو بس راس .. سالم ريت ابو النوماس
ويگص راسه اليجيب الخدر طاريه
بس ياحيف راعي الجود .. ماموجود ماموجود
ويخلصچ يزينب من الشاميه
بالشام الاذه اهوايه .. شلونج زينب ابهايه
اول تـالي تـرحين
ابلا كافل ولا رايه
من اولايه لـولايه
__
حيدر تركي الكربلائي
گلبي بكربلاء .. تشهدلي السماء
واتنفس هواء
من صحن الحسين
------
گالولي بسـك بالغـــت .. اشهالحب البـــيه تتغنه
مو عذبتنــه ابهالعــشگ .. شـــو سولف النه عنه
گلتلهم انه اهوه شخص .. هواي احله من الجنه
اشـــما حبه واتـــدنه اله .. العرش الجـليل اتدنه
مو سر وخفاء .. تشهدلي السماء
واتنفس هواء
من صحن الحسين
-----
گالولي حبك بيه نحس .. نبـرة فكر رجعيه
لشوكت تبــقه منطوي .. وعايش ابهالعقليه
گلتلــهم الحـــب للـ لذي .. يـتفايض انسانيه
والگلبه صخره مو بشر .. شمعرفه بالحنيه
والحب بالدماء .. تشهدلي السماء
اتنفس هواء
من صحن الحسين
-------
گالولي بعض امن البشر .. شعندك ابفكرك شارد
واخذتني صفناتي وحرت .. بــين الارد والــمارد
گالولي كل حب ينتهي .. گلت اله حب بس واحد
مايـخلص اولاينــتهي .. يبـــقه بدلــيلـي خــــالد
نوع امن الوفاء .. تشهدلي السماء
اتنفس هواء
من صحن الحسين
------
الله رزقني بمـــعرفه .. ودوم اشكر الله اعليها
نعمه واجتني امن السمه .. وشلون افرط بيها
امحبة ابو اليمه الصـدگ .. والـبـاقي ماسميها
گلمة احــبك بـــس اله .. والـغيره مـا حاچيها
حبيته ابنقاء .. تشهدلي السماء
اتنفس هواء
من صحن الحسين
-------
امحبة ابو اليمه الهوه .. التتــــنفسه هــالـــريه
ومرات اذا عنه ابتعد .. اتضيج الوسيـعه اعليه
ميت احس لو ماشفت .. ضـــي قبـــته الذهبيه
ياناس بس بصحنه احس .. تتـطـــمن الـنفسيه
وما احچي برياء .. تشهدلي السماء
اتنفس هواء
من صحن الحسين
--------
اشتاگه وانه بحظرته .. واشـــواگي ماتــــتوصف
معجونه يمكن طينتي .. ياناس مـــن مــاي الطف
بيه اقره بس ماينختم .. هواي اكبر امن المصحف
گالولي عَرفه وصيحت .. يانــــاس مــايـــــتعرف
وناديت ابنداء .. تشهدلي السماء
اتنفس هواء
من طف الحسين
------
حيدر تركي الكربلائي
مولد الامام الحسين ع
.
.
.
وحدك ابدلالي .. يالغالي .. يالغالي
وحدك ابدلالي .. يالغالي .. يالغالي
يا ابا عبد الله * يا ابا عبد الله * يا ابا عبد الله
---------------------------
مختصر مفيد . شخصك الوحيد . گلبي الك يريد . واعـترفلك اني
إلعشگ فنون . بـاطنـي يـكون . حـَده للجنون . وهالــعشگ جـناني
اعلن الهيام . وهـذا مـو حرام . حبي يـا أمـام . احــچي بي خلاني
ماتفارگ بـالي .. يالغالي .. يالغالي
وحدك ابدلالي .. يالغالي .. يالغالي
ياابا عبد الله * يا ابا عبد الله * يا ابا عبد الله
---------------------------
اعلــن الخـطاب . حبي مو ســراب . جــذره بالـــتراب . مـتصل بالهادي
خَلصــت شـهور . اوصــف الشـعــور . ولو بـعد دهور . ماوصلت امرادي
انته شي عجيب . وحبي الك غريب . والله يالحبيب . انته لا مو عادي
وهالعشگ اوحالي .. يالغالي .. يالغالي
وحــدك ابــدلالـــي .. يالغالي .. يالغالي
يا ابا عبد الله * يا ابا عبد الله * يا ابا عبد الله
---------------------------
ما الـك مــثال . هــذا بالخــيال . وصــفك المحـال . اتحـيرت بوصافك
مثلك انته وين . ماتشوفه عيــن . انته بس حسين . ناظري بس شافك
ما يصح مـثيل . لا ولا قـليــل . ابوصفي ما اطيــل . تكفي بس الطافك
لازلت تــبرالي .. يالغالي .. يالغالي
وحــدك ابــدلالي .. يالغالي .. يالغالي
يا ابا عبد الله * يا ابا عبد الله * يا ابا عبد الله
---------------------------
ما الـك نـظــير . لا ولا يــصير . اتنصبت امـير . وعرشك بنص گلبي
كلي الك سبيل . وهالعرش اشيل . بگلبي يالخليل . اعليه يشهد ربي
كلشي بالوجود . وانـه الك اعـود . ما الك حـدود . انـته دولــة حبي
يا رئيسي الحالي .. يالغالي .. يالغالي
وحــدك ابــدلالـي .. يالغالي .. يالغالي
يا ابا عبد الله * يا ابا عبد الله * يا ابا عبد الله
---------------------------
بيدك المـصير . عبـدك الحقـير . ابحـظرتك اسـير . سـيدي تحـت امرك
خدمـتك مرام . وبيها احس سلام . ويعجز الكلام . عـن رحـابة صدرك
بشنـهو الك اكــيل . والشــكر قـليل . ولـو اكو بديـل . قيـمت بـي قدرك
اتحيرت اقـوالي .. يالغالي .. يالغالي
وحــدك ابــدلالي .. يالغالي .. يالغالي
ياابا عبد الله * يا ابا عبد الله * يا ابا عبد الله
---------------------------
هــايــم بهـــواك . انــته يامــلاك . اولا احــد سواك . يسكن بــنص عيني
كلشي ما اشوف .ابدنيتي كسوف.ولمه بيك اطوف . النور احس يلفيني
بــغيــرك الحــياة . تعــتبر مـمات . وشفــتك النجـات . ســيدي تــدريني
اتـرَجمت افعالي .. يالغالي .. يالغالي
وحــدك ابــدلالي .. يالغالي .. يالغالي
يا ابا عبد الله * يا ابا عبد الله * يا ابا عبد الله
---------------------------
خادم الحسين حيدر تركي الكربلائي
لمولد الامام الحسين ع
.
.
.
اليوم اريد احچيها .. ومــا اجـامـل بـيها
انه مجنون ابا عبد الله
____________
بعيـوني مكتوب العـشگ بعـيوني
وبأسـمي مـن هـاليـوم لـتــنادوني
مجنون ابـو اليمه افـرح اتسموني
وماعندي غيره ابدنيتي وتدروني
ابــدلالي .. بـس غـالي
وعــيونه .. التــبــرالي
الـروح الـه افديها .. ومــا اجـامـل بـيها
انه مجنون ابا عبد الله
____________
مــرات وي روحـي اسـوالـف اني
وحسين مجـنون اعـترف خلاني
دلالي يرفض غــيره واحـد ثـاني
والساني حالف مايعوفه السـاني
بحساسي .. ونــومــاسي
بس هـوه .. اويه انفاسي
دنـيــتي امحــليها .. ومــا اجـامـل بـيها
انه مجنون ابا عبد الله
____________
هواي البشر وحسين بس بدربي
وماشوف واحد غير تارس گلبي
للــباري افــرع وانــدعــي يـاربي
خليــني هــايم انــه دوم بحــبي
نجــيــني .. بحسيني
وبس وياه .. خـلـيني
والــذي ناسـيها .. مــا اجـامـل بـيها
انه مجنون ابا عبد الله
____________
بجنوني غايه وافخر ابهـا الغايه
والحــمد لله انــي واصــل هـايه
بالعــشگ كـل واحد اكـيد ورايه
الغير ابو اليمه ماتلـوگ احچايه
احچاياتـي .. ودعواتي
نـــاذرهــــا .. وبسماتي
بسمـــه مسميها .. ومــا اجـامـل بـيها
انه مجنون ابا عبد الله
____________
حسين المحيط وغيره كلها اوشاله
الفـضل عليه شــلون اعوف افضاله
اشگــد بـــي حــنان وعاطــفه دلاله
ماعـــنده حـــظ المايعــيش ابجـاله
عـنـــوانه .. ابـــيبانه
وغامرني .. بأحسانه
وهذي ما اخفيها .. ومــا اجـامـل بـيها
انه مجنون ابا عبد الله
____________
الوادم امـن الحب الصدگ تتحرج
وعـن حبي ردت المــادرت تـتفرج
مدرسـة عابــس منهــا راح اتخرج
اليـهوه الحسين ابـلايه شك يتوج
والدارس .. من عابس
بهذا الحب .. ايـنافس
والهـوت واليــها .. ومــا اجـامـل بـيها
انه مجنون ابا عبد الله
____________
حيدر تركي الكربلائي
لمولد ابالفضل العباس س
.
.
.
ابـو فاضــل امــامي .. ابـو فاضــل هـيامي
ابو فاضل ابو فاضل ابعثله سلامي
__________
عباس ايعيش اويه انفاسي
ومـن اتســـموني عـبـــاسي
الدنيه متلـمني امن الفرحه
اتمنه اتـجربـون احـساسي
عــباس الـنــور البعــيوني
امـروتكم كـافــي اتلموني
لوهمتو ابحب كافل زينب
مـــتأكــد راح تـعـــذروني
وميــوفي كــلامي .. ابـو فاضـل هيامي
ابو فاضل ابو فاضل ابعثله سلامي
__________
ياتــوفيــقي وياعافيــتي
يمعــليني ورافـع صــيتي
عرفتـني الـوادم عرفـتني
لمــَن وقعـت ابجنــسيتي
اهواك واعرف مــَن اهوه
ياثـروه ومـامـثلك ثــروه
المامكتــشفـينك اعذرهم
حقهم لو گالولي اشدعوه
ومن احچي بغرامي .. ابـو فاضـل هيامي
ابو فاضل ابو فاضل ابعثله سلامي
__________
خل يدري بحبي المايدري
عباس اويه الــدم اليجري
عمـري وأيامـي وســنيـني
وبلــياه مايــســوه عـمري
عن وصفه تعـجز كلـماتي
مالــك اخــرتي ودنــياتي
الــمايقبــل خــلي لايقـبل
انـــه وعــــباس ونــيـاتي
الحبه ابقــه ضــامي .. ابـو فاضـل هيامي
ابو فاضل ابو فاضل ابعثله سلامي
__________
اتوضه امن ايـمـر طـاريه
حــب عــباس امــغزر بيه
عبـاسي وافخــر عبــاسي
ومــيهمــوني العـــلــمانيه
اسم الكافل تــارس عيـني
وخيره اتطشر من چفـيني
الـما حـط عـبـاس ابــدلاله
ياهو السامحله ايحاچيني
والرافــع مــقامي .. ابـو فاضـل هيامي
ابو فاضل ابو فاضل ابعثله سلامي
__________
ورده وجربه اعيوني اتشـوفه
ومن اعطش اروه امن چفوفه
زمـــزم لامــــو زمــــزم اصــفه
مــتيــقـن كـــوثـــر بچــفـــوفه
الحـظــرة عــباس امن اتــعنه
اشعـــر چـــني ابــنص الــجنه
والــطــب ابــجـــنات الـــباري
منهــــا مــايطــــلع يتــــمــــنه
وبالجـــنه التــزامي .. ابـو فاضـل هيامي
ابو فاضل ابو فاضل ابعثله سلامي
__________
خدمة عباس احسن خدمه
نعـمــه والماحــس بالنعــمه
واجــب كلمـــن ماجـــربـها
يم عــباس ايســجل اسمه
فاتــح بيـــبـانه الخــطـاره
ويأمن كلمــن طـب ادياره
الجـاي بطلــبه ومتعـــنيله
ايرد لهله وماخذله ابشاره
ويا احلى الاسامي .. ابـو فاضـل هيامي
ابو فاضل ابو فاضل ابعثله سلامي
__________
حيدر تركي الكربلائي
لمولد الامام الحسين ع
.
.
.
حبيبي الغالي .. حسين
نـبــض دلالـي .. حسين
يعيـش ابـالي .. حسين
ابا عبد الله
____________
غيره ما اعرف أبــد .. امن الزغر منطي عهد .. وقـل هوه الله احــد
يدريني
عنـه لا ما أفــترگ .. يجري بـعروگي العشـگ .. حب ابو اليمـه صدگ
يحييني
ابحبه اني اتشرفت .. مثل شخصه ماشـفت .. چنت ضامـي وعــرفت
يرويني
اي وحق روح القدس .. ابحبه گلبي منترس .. انه بس حسين احس
ينطيني
ويضل يبرالي .. حسين
نـبــض دلالـي .. حسين
يعيـش ابـالي .. حسين
ابا عبد الله
____________
حبه وي روحــي نــمه .. واصبح ابــگد السمه .. اعـليه تشــهد فاطــمه
مولاتي
اسمه في دمي جره .. اقـــسم ابـحــق حــيدره .. انــي دوم اتـــذكــــره
ابسجداتي
ماشفت مــثله وَفــي .. ابعــيني لامــايخــتفي .. حسين اصبح مصحفي
واياتي
ابروحي چن شلته أمل .. وشوگه بالروح اشتعل .. وعرگت ابگد الخجل
كلماتي
ملــك امـــالي .. حسين
نـبــض دلالـي .. حسين
يعيـش ابـالي .. حسين
ابا عبد الله
____________
حسين سوه قيمه الي .. وارد اگــلـــه يالــولي .. اشكرك يابو علي
يعيوني
واجب اعليه الشكر .. اويه الشكر كون اعتذر .. لچن رايدلي عمر
تدروني
انه ما احچي غــزل .. حـبـي بــاقـي لـــلازل .. ويه ابو اليمه اظل
بجنوني
امن امي والله اتعلمت .. هذا الجنون وهمت .. وللحبيب استسلمت
بظنوني
الوحيد اهدالي .. حسين
نـبـــض دلالــي .. حسين
يعيــش ابـالـي .. حسين
ابا عبد الله
____________
نلت اعظم منزله .. من صرت خادم اله .. اتنفست مـن كربله
هالخدمه
نعمته ماتنحسب .. صعبه يحملها الگلب .. اني اتحـمل صعب
هالنــعمه
اشتغل عنده عبد .. وهاي رادلها حـمد .. والله عن فضله تسد
ياكلمه
حبي لو عنه بحت .. انه مجنونه صحت .. انه من فدوه رحت
والأسمه
احسه اگبالي .. حسين
نـبــض دلالـي .. حسين
يعيـش ابـالي .. حسين
ابا عبد الله
____________
ما امــل من مطلبي .. يشهـد الله والنبي .. حسين ديني ومذهبي
وماعوفه
الحمد لله والشكر .. روحــي لحسين الــطهر .. انــي نــاذرها نــذر
معروفه
الغيره احبك ماگلت .. اســمه بعـيونـي شلــت .. والله يــاما رتــلت
بحروفه
نظرته نظرت وحي .. واني من فضله استحي .. افضاله لاماتنمحي
موصوفه
يضل للــتالي .. حسين
نـبــض دلالـي .. حسين
يعيـش ابـالي .. حسين
ابا عبد الله
____________
عطره اشمه بالهوه .. وابقه اسئل بالضـوه .. گلبــي منـه ماروه
محبوبي
روحي اشعر تنعصر .. منــه ماشابع عطـر .. نسـمته كــل مــاتمر
بدروبي
ابحب ابو اليمه طحت .. وين ما اني رحت .. من يوصله صحت
مكتوبي
الحـب الــه يامــكثــره .. حـقه بيــه المــادره . لاتلــومــوني تــره
بسلوبي
وتضل اقوالي .. حسين
نـبــض دلالـي .. حسين
يعيـش ابـالي .. حسين
ابا عبد الله
____________
حيدر تركي الكربلائي
شايل رحمة الله .. اعليك الباري صله
صل الله عليك يا ابا عبد الله
-----------
يانور النور .. ابوجهك آلاء
يابسم الله .. ياســر الــباء
قل هوه يعرف صفاتك واجتباك
نور قدسي من سـنا الباري سناك
ياضوانه انموت تدري ابلا ضواك
والشمس وضحاها .. من عندك ضواها
صل الله عليك يا ابا عبد الله
-----------
جل الخلاق .. وشگد منطيك
ماشـاء الله .. تــارس ايــديك
تستحق يحسين كل هذا العطاء
غبطــتك حــتى الرسل والانبياء
نعــم كــل هــذا جــزاء الكـربلاء
لجلك يابو الاكبر .. جنـــاتا وكــــوثر
صل الله عليك يا ابا عبد الله
-----------
السر اللاهوت .. انته التفسير
انته التسبيح .. وكاف التكبير
ابكــنهك احـتارت يمــولاي العــقول
ولــذلــك حايــر بشخــصك شــگول
يكفي انته ابن الوصي وابن البتول
ابحبك ابتليني .. والحب هذا ديني
صل الله عليك يا ابا عبد الله
-----------
سبحان الله .. ياخير الناس
احلى الاسماء .. انته وعباس
انه احبكم حب نعــم ماله نظير
انــتما نـــعم ولـــيــاً ونـصــــير
گلبي بيــكم هــايم وصاير اسير
كل ركعه بصلاتي .. بسمك بسملاتي
صل الله عليك يا ابا عبد الله
-----------
اهــواك اهــواك .. وكاتلني الشوگ
وگلبي المشتاگ .. بالحب محروگ
حبك امـن الله عطــيه وموكلام
اسئـل الله يزيــدني حب وهيام
حتى اسمي يصير مجنون الامام
وجنونك هويتي .. وعابس مرجعيتي
صل الله عليك يا ابا عبد الله
-----------
ســر الاســـرار .. ربك خلاك
ومخلي الناس .. لازم تهواك
الجاذبيه الحظرتك تجذبني اكيد
ولــذلك اسمــك بــنـص الــــوريد
اي يعيد الله وبــدونك مـاكو عيد
يالحبك سجيه .. اويه الدم يجري بيه
صل الله عليك يا ابا عبد الله
-----------
حيدر تركي الكربلائي
قصيدة گعده
.
.
.
اتعلم يلي اتحب الكاظم
كــلا كــلا قُـــل للـظــالم
واليسكت عن الحق شيطان اخرس
----------
عيــش حرية الكاظـم خلـف قضبان التحـرر
وسقف حيطان المطالب علي بيه حد التدبر
انــته قــرر لاتــخلي الــموكفو وگـدها يقــرر
حر صير ياهذا وكـــلف .. مو عالفلس تزحف زحف
وبخمسه والعشرين الف .. صوتك امــن اتبيعه فكر
ينتخب الـسُـراق ويرجع
ويصيح كله امن المرجع
وطبعاً مايتوفق شيطان اخرس
--------
اخــذ من قصة امامـك واقتبــس منــها الفوائد
ولاتضل خايف وخـانع الخـوف مايصنع مجاهد
الفاسد امن اتشوفه گله بكل صراحه انته فاسد
حاچيه وخل حسك نشط.. مو كافي گله من الخمط
حقــي اريــده امن النفط.. النفط مو مــال ابو واحد
لو نحچي بحقنه ويدرونه
مابخـسو حــقنـه وبـاگونه
والوياهم نسق شيطان اخرس
--------
النعم كلمه ولاتظــن النعـم هالكلمــه ظـعيفه
نعم لو گايل امامك چا انطوه احسن وضيفه
لچن لا وبكــل جـداره گالها بوجــه الخليــفه
كابر لون عشت ابفقـــر .. اليتـــذلل الهــم ينذكر
لاتـمــد ايـــدك للقصـــر .. حتـلو عشت ابصريفه
بالك ماي الوجه اتبـيعه
المايسوه تضطر اتطيعه
المن المبدء منشق شيطان اخرس
-------
بنــي العباس امن امــيه سحـــبو ابسـاط القياده
وگـــالــو البــيـــت الزچــيه لازم تــــرد القــــياده
وطلع فاشوشي حچيهم حچي فارغ على العاده
ولمن جماعتــنه اجو .. نفس الحچي الماضي حچو
وعالكرسي من همه انتچو .. نـســو الله وكل عباده
ايعوفونه اهواي وينسونه
ومن ايرشـحون ايذكرونه
والرتب هالمأزق شيطان اخرس
------
ابچي عالمســموم لكن ثــور ثوره كاظــميه
مثــل ماثارت عقيلــة بني هاشم على اميه
نوحله والطم بـحرگه كل صباح وكل مسيه
وخليك قمــه بالـحزن .. عالگظه عمره بالسجن
عالكاظم انته من تون .. تــفـرح الزهره الزجيه
واتذكر من تهمل دمعه
البـاطل لاتــدنه الربعه
ومن تشوفه تفرق شيطان اخرس
……
حيدر تركي الكربلائي
شهادة الامام الكاظم ع
.
.
.
يــامــن نـور الله نـورك يـنـحــسب
ليش امن احبابك شمسك تنحجب
ياشمس الله كافي
أذتــنــه الــمنــافي
حـزنك بيـنه غافي
يـامـوسى ابـن جـعـفر
______________
خـــد اللـــيالـــي يشـــهد علـــينه
امـن الدمـع مولـح گــد مابچـينه
ويـــنك انــادي يــمـــته تــجـــينه
طــاحت ايـديـنه ابـگـد مادعــينه
الفگدك اتعـالت صـرخات المهج
نــدعـي اللهــم عجـــل بالـــفرج
يمتـه اتـرد يوافي
أذتــنــه الــمنــافي
حـزنك بينـه غافي
يـامـوسى ابـن جـعـفر
______________
بيــنــه الغــيابـــك لـــوعـــة منــــيه
ونـــار انتـــظــارك ظــلـــت ســـريه
نـشــهگ ابهـــجــرك كـــل مغــــربيه
شيـــب الـــهــذي جـــســـر المـــنيه
جســر الــمأســي نـاده ابحــنينه
مــوسى ابـن جعـفر يمـته يجينه
اويانه ايتاني حافي
أذتــنــه الــمـــنــافي
حـزنك بــينه غــافي
يـامـوسى ابـن جـعـفر
______________
الدمـعة افراگـك مستحيـه العـيون
ابسجنك يـغايب واحـدنه مسجون
بالـشـيعه تـدري وشـگــد ينــوحون
شمــسك ضــواها لــو مــايشوفون
هنـياله الشـافك والـگاعـد يــمك
ياعـطر الــجـنه يمــته ونشــتمك
يالعالشيعه خـافي
أذتــنــه الــمنــافي
حـزنك بينه غـافي
يـامـوسى ابـن جـعـفر
______________
مـوتـنــه هـجـرك حــقــنه ومـانــلام
والجـمـــعه ظـلــت تـذبــح بـالايــام
ابلـيل انتـطارك مــشدوده الاحــلام
وبـــكــل دقــيـــقـــه تــــــزداد الالام
العيـشـه بــدونــك يالــغـالي ذله
يمــتــه تــجــيــنه يـــارحمة الله
محد جـمره طافي
أذتــنــه الــمنــافي
حـزنك بـينه غافي
يـامـوسى ابـن جـعـفر
______________
نــاشــدنــه عـــنــك گــالــو تـــأخر
وصـوت المـصــيـبه صــاح وتــأثر
عـالجسر هـذا مــوسى ابــن جعفر
مــن هــــالمــصـــيبـــه الله اكــــبر
شمـسك ضواها ابــزنزانـه غـابت
وبالسـم چـبدتـك يـاوسـفه ذابت
وهذا الهم اظـافي
أذتــنــه الــمنــافي
حـزنك بيـنه غافي
يـامـوسى ابـن جـعـفر
______________
حيدر تركي الكربلائي
مقدمة عزاء
شهادة السيده زينب ع
.
.
.
زيـنـب ابـگــد مابـچـت لـخـوانـها
شيبت حتى السمه امـن احزانـها
يازينب .. يازينب .. يازينب
___________________
مـن كـثـر دمـعـات زينـب عالــوجن
شـيدت بـخـدودهــا بـيـت الــحـزن
مـثـل زيـنــب مانـظــن احــد يــون
كربــلـه مــاطـاحـت امــن الـسـانـها
يازينب .. يازينب .. يازينب
___________________
الدنـيه تـصفن لـو عـلـى زينـب تـمر
وكـل حـزنهـا ماوصـل عـشـر الـعشر
الدمـعه من دمعـات عـيـن ام الخدر
اتـظـعـظع الدنـيه وتـــهـز اركــانــها
يازينب .. يازينب .. يازينب
___________________
اعيون زيـنب چـانت ابگـد ماتسيل
چــوت ابدمعــاتـها ظــهــر الـهــزيل
وبالاخص من يـنذكر طاري الكفـيل
يـنـفــجر مــن عــينــهــا بــركــانــها
يازينب .. يازينب .. يازينب
___________________
الشمر چان ابسوطه يظربها اشكثر
وسود خلـه امتـونـها سـوط الشـمر
اتمـنت العـباس ابـو زنــود الـســمر
حـاظـر ويـنـظــر فــعـل عــدوانــها
يازينب .. يازينب .. يازينب
___________________
سولفــت فــوگ الـهــزل ســالـوفه
انـدار راس حســين چـان اتشوفه
اتــگلـه تقــبل بالحــبـل مچـتــوفه
زينـــب الــچــان الخــدر عنــوانـها
يازينب .. يازينب .. يازينب
___________________
طالــعه انه اويــاك مـن نـفـس الـعـرگ
واعـدتــنـي وگــتــلــي لا مـانـفــتــرگ
مـن صـحــت ويـنك خيمــنه تحــترگ
مــاشــفـت غــيــر الـــخـيـم دخــانــها
يازينب .. يازينب .. يازينب
___________________
الفاگده اخوتها عجيبه اتـشـم هوه
هيـه والمــيـت يحـسبــوهــا ســوه
الـزينـب ابـهـا الـحاله يـنـفع يـادوه
اشـيــنــف وذَبــحـو كــل ولـيــانـها
يازينب .. يازينب .. يازينب
___________________
جــرح عـيــنـي اشــما اســده يـنــفتح
خـويـه كـل مـاشــوف راسـك عالرمح
اسـئل الليـل اعــله زيـنــب والصــبـح
واسـئــل ابــدربـك حــبـــل ذرعــانــها
يازينب .. يازينب .. يازينب
___________________
الحالي شــفت العدو يبــچي والصديق
اخــتــك الــبــس الــدلال الـهـا يــلـــيق
شـلــون وي ذبـاحك اتخـلص الطــريق
ونـاگـــتي يــاخـويـه بـيــده اعــنـــانها
يازينب .. يازينب .. يازينب
___________________
حقـها زينـب تبـقــه تـنـعــه ومـاهــدت
اخيول عشره اتـدوس اخـوها شاهدت
الشمـر مــن شــافـتــه هـيــه اتــأكــدت
حــسيــن مـيــرد وزمـــنـــهـا خــانــهـــا
يازينب .. يازينب .. يازينب
___________________
تمت والحمد لله ١٨ / ٣ / ٢٠١٧
حيدر تركي الكربلائي
يهدا ثوابها الى روح الشهيد خادم الحسين ع
سيدكريم الموسوي
شوط كربلائي
.
.
.
يا اكبر جــرح بعـــيون .. تــاريــخ الانســـانـــــيه
يستر الدنيــا والمثلـــچ .. جريمه تروح مســــبيه
-------------
انتــي اول عـــبايه اتــروح .. فــوگ النوگ مگيوده
وانتي اعظم ستر عالگــاع .. ابزمـان العفه مفگوده
وانتي اول اسيره انشوف ..على حشمتها محسوده
الحراير من يــشوفنچ
يزينب شــو يحسدنچ
كعبه اعله الهزل چنچ
ســـتار الكعبه يازينــــب .. مـــنـچ ماخـــذ اشويه
…………
على الناگه ركبتــــي اجروح .. لا واحـــد ولاعــشره
الزغير البيـــهــن اتــــصــور .. ست اشهر اظن عمره
سافرتي اعله سچت موت .. ويلي اشطولها السفره
چن شجـــره وبلا ســباح
من كل صوب عج ورياح
واخوتـــچ روسهـم برماح
صبـــر ايوب يــم صـــبرچ .. طلـــع لا شي يـعلويه
………… .
من چان السكوت بــروح .. بالديـــون صرتي السان
نطقتي من سكت كلشي ..بوكت بيه كثرة الخرسان
يحسچة حيدر ونعمــين ..البلاغه البيـــچ چن قران
السانــه الرايد ايمده
اگبالچ يجرء اشحده
تنطيه طينـته ابخده
السانچ ابشط امن السيف .. تربيتـــچ حسـيـــــــنيه
………… ..
القصرهم من دخلتـــيله .. چــانو همه منتصرين
سليتي السوالف سيف .. وسكتو سكتت الميتين
والديون راســا صـــار .. چن ساحة حرب صفين
وطب حيدر علي بسيفه
وگــام يلگــــط ابــــكيفه
يعرفوه من يـرد حـــيفه
خلستــــي ايزيد ديـوانه .. ابنبـــــره كــربلائيه
……………
زينب چان وصفچ ماي .. وصـــعبه الـماي يتوصف
اجيتي ومحد ايعرفچ ..وطلعتي امگيده امن الطف
الكل حاجه اكو تعريف .. وبــــس ســـترچ ميتعرف
الشالچ ماي بعـيونه
عليه ظعنچ يمرونه
يبو فاضــل ينادونه
الچانت بيـــك مهـــيوبه .. اديــهـــا بحبـــل مدميه
……… .
شمس واچم گمر شفتي .. فــــوگ الگـاع بعيونچ
الله يسـاعدچ يم عون .. حچي الوادم ايسمعونچ
هدل من السياط الحيل .. اشگد ماشايله امتونچ
يعيــــنچ الله يازيـــنب
النار ابداخـلــــچ تلـهب
الحملتيه لو جبل يتعب
ثگل الگيد وعيــــالچ .. مــنها صرتي محــنيه
-------
حيدر تركي الكربلائي
لشهادة زينب ع
.
.
.
ليــالي زينـــبـيه .. وسوالف عـالسبيه
خلي الظلوع والدموع وقف لم الخدر
_____
الدمعه اذا مو على زينب المن اتبديها
يالــردت تبــچي عليــها كــربله سويها
لـكن انـته مـن تـسولف كـون ماتاذيها
الكلمـه لبـسها عبـايه لـوردت تحچيها
بچي هاي المسيه .. وسوالف عالسبيه
خلي الظلوع والدمـوع وقف لم الخدر
_____
انيـاله كلــمن يلــگه واحـد عالـخدر ينعاله
اليبچي ويموت اعله زينب من الف هنياله
هــذا شمــسوي العــليــهـا محــتــرگ دلاله
ارزقنــي اللـهــم حــرگـه عالحــسـين اوآله
يكون الحرگه بيه .. وسوالف عالسبيه
خلي الظلوع والدموع وقف لم الخدر
_____
من يمر طاري اسمها الصخر تجري اعيونه
شـلون حـال المهدي هسه والله لو تدرونه
صعبه يسمع خدر عـمته العـسكر ايسلبونه
وكـلفه يسـمع مـتن زيــنب صار ازرگ لونه
تجرحه اسياط اميه .. وسوالف عالسبيه
خـلي الظلــوع والـدمـوع وقف لم الخدر
_____
المثــل زيــنب تــره صعــبه تــنــوخذ مگـيوده
اتشــوف ابو فاضل اخــوها مگطـعات ازنوده
الشمــر گــال الــهــا كفــيلچ چــبدته مــمروده
وذاك يم الشاطي اخوچ السهم غافي ابجوده
هوت فوگ الوطيه .. وسوالف عالسبيه
خلي الظلوع والدمـوع وقـف لم الخدر
_____
كـربله وزينـب سـوالف هــيه نفس الجمره
سالــفة جـثه سلــيبه مــوذره اعلــه الغــبره
وحــرمه بـين النار تركض والزلم متحـظره
اتريد بخيول اعوجيه حسين تسحگ صدره
اليحس بالاعوجيه .. وسوالف عالسبيه
خلي الظلـوع والدمـوع وقف لم الخدر
_____
كلــشي يبچــي عالســـبيه ونــار گلـبه تلهب
والــي مامــتعذب الهــا بدنـــيـــته يـــتعذب
الارض تنحب على اسمها والسمه هم تنحب
فــاطمــه ينــزل دمعــها لـــو گلــت يازيـــنب
المدامع فاطميه .. وسوالف عالسبيه
خلي الظلوع والدموع وقف لم الخدر
_____
تمت والحمد لله ١١ / ٣ / ٢٠١٩
حيدر تركي الكربلائي