7934
لنشر قصائد مناسبات اهل البيت
للاربعين
.
.
.
هاج الحنين بروحي .. سولفلي يامذبوحي
احچيلي عن جرح الرمح
وانه احچي عن اجروحي
----------------------------
يالنابت ابـراسك رمـح .. شلونك يبعـد اعيوني
لونك احسه امن التعب .. يشبه امن الحر لوني
متاذي گلي امن الرمح .. لومن حچي الگادوني
بعيونك الذبلانه احس .. نظـرة الـــم لمتـــوني
كل هذا وتحس بيه .. يالمــنترس حــنيه
گلــبك اليه منفتح
وانه احچي عن اجروحي
-----------------
البيه وحقك مو جرح .. واحــد ولاهـــن مـيه
الف وتسع ميــه الذي .. يحــسين صـارن بـيه
بالرايه مأساتي بـدت .. مــن طاحــت الحـنيه
ونختمت ابشام الحزن .. من غفت عين ارقيه
ابنــادم المايحــملـــهن .. طاحن على اختك كلهن
وحدتهن اتگول الملح
وانه احچي عن اجروحي
-----------------
خويه الشفتهن بالدرب .. ماينحچن يالغالي
ياهي الاسولـفها الك .. وياهي التضل ابالي
زينب يبو اليمه تطب .. ديــــوان اول تـالي
وتصور ابنــص الزلم .. حرمـه بلايـــه والي
ثق مقتلك حسيته .. الديون من طبيته
واستوعبتها منذبح
وانه احچي عن اجروحي
-------------------
رمحــك يـخويه بالارض .. لو گعـــدو اينبتــونه
ايذبحوني كل ما ريضو .. راسك امن ايحركونه
چم مره من عدهم وگع .. ياخــويه ويــشـيلونه
يتعـــمدون ابهالـــفعل .. گلب اختك ايحرگونه
شحچيلك وشحچيلك .. ومن ياهي خويه اشكيلك
والصار لاماينصلح
وانه احچي عن اجروحي
-----------------
كلما اســولف عالسبي .. ابصدري الحچي يتكسر
وليش الملامــح يالاخــو .. ابوجهك احس تتغير
بس وحده اسولفها وبعد .. ما احچي يابو الاكبر
خــويه خــذوني للســـبي .. بنــاگه تــگوم وتعـثر
كل ماتهل اعيوني .. ايضربوها ويضربوني
لاليلي ليل اولا صبح
وانه احچي عن اجروحي
_
حيدر تركي الكربلائي
للسبي
شو ضعـــنك ابــلايه محــامل
ويــن الحـــسين وابو فــاضل
هـل لك حـاجه ســـيدي
سهلُ ابن سعد الساعدي
بخدمتكم اني
-----
شلونك سيدي شلونك .. اشعر منخطف لونك
يزين العابدين اوياكم اشــصاير
عمامه ما اكو براسك .. وگوه تسحب انفاسك
حالك حال واحد ساحگه الحافر
نظــرتك ماتســـر .. كأنـك باليـــسر
ثيـــابـك باليــه .. من اسياط الشمر
الحـديد الشــايله .. الجبل مايحمله
ضعنكم بيه احس .. عطر من كربله
لحســين ويـنـه خلــني ارتاح
لتگلي راســـه الفــوگ الرماح
بالحچي من ويـن ابتدي
سهل ابن سعـد الساعدي
بخدمتكم اني
-----
يالمگيد على الناگه .. دموعك تجري حراگه
الشمر ليش بضعنكم صاير الكافل
شو بس العبي برحلك .. يالسجاد وين اهلك
كافل خدر زينـب ويــن ابو فاضل
ظعن اهل الشيم / عجيبه ابلا علم
لذا زينب تصيـح / لحد يهل الرحم
عگب عين الاخـو / يحامـــيها منو
التضل ابلا كفيـل / ميرحمها العدو
وين اليغــار امـــن الهــوه الهاب
شو هسه باخنه تحدي الاجناب
ثـــوب المـــنيه مــرتدي
سهل ابن سعد الساعدي
بخدمتكم اني
---------
الشام بيوم طــبيته .. بيــه چن عيد حسيته
شكو گلت الهم؟ وگالو سبيناها
منو السابين متعــجب .. گالولي خــدر زينب
ابـلا وليــانها مگيـوده جبــناها
شعر راسي وگف / واحس لوني انخطف
صدگ عمتك سبو / العفيــــفه ام الشرف
الحـجاب الزينـــبي / وستــــر بيت النبي
يزيـــن العـــابــدين / عجـــيبــه تنــسبي
امتانينها اتمر ناگة ام عون
حتى عليها احجـار يرمون
امرني اكلم الي ايحــدي
سهل ابن سعد الساعدي
خادمكم اني
--------
الشايل راس ابو اليمه .. اموال انطيه وبالخدمه
حتى عن ضعنكــم هــــوه يتقـــدم
علـــــوياتـــكـــم زحـــمه .. ينـــشافن بــلا رحمه
(خزينا) من گلتلي جفني بوشل دم
العيون امفتحه .. ومتملك مستحه
تصد ابلا حيـــاء .. النساء النـازحه
بنات ام الحسن .. حريمــه ينـسبن
ويجوهن بالسياط .. اذا هنـه بچن
گــدام عيـــنك يــضربوهن
شتسوي ومگيــــد يخوهن
افديك روحي وجسدي
سهل ابن سعد الساعدي
خادمكم انه
----------
محدودب صبح ظهرك .. وتحز الجامعه بنحرك
الدمه من رگبتك بلــل گفـه الناگه
ثـوبي بلـــكت ايــفيدك .. بين الجامعه وجيدك
اجروح وفوگها هالگــيد مو سهله
يبن خيــر العمـل .. فداء الكم سهل
عـــلواه انقــتـل .. من الحب ماقتل
وحق سيد البـشر .. الفده الكم نحر
صبح عالي المقام..على طول الدهر
فـــداكَ نــفســي وعــــــيـــالي
يالـــروس اهلــــك عالعـــوالي
للشام اجيــت ابمـوعدي
سهل ابن سعد الساعدي
بخدمتكم اني
-------
حيدر تركي الكربلائي
للامام السجاد ع
.
.
سبي وحرگ اخيام .. وشماته بالشام
شكثر بيك الام
علي علي
*
خلصت عمرك حداد .. وثوبك امـدمر رماد
تبجي ليل انهار من گد نايباتك
لسه تتذكرها زين .. احرقو اخيام الحسين
من احرگوها شاهدت فرت خواتك
من الخوف .. ابنــيه تشــبه المصحف
من الخوف .. من سوط الشمر تزحف
من الخوف .. الهــا ايســلب اتحـــلف
يجــور الأيـام .. وشـماته بالشام
شكثر بيك الالم
علي علي
*
أي يزين العابـدين .. خلصت عمرك حزين
وقصة احزانك ترى قصه جبيره
شلون اوصفها بكلام .. وانته دافنلك امام
شلون دفنه وانته چفنته بحصيره
شلگيته .. وبـيدك جامع اوصاله
شلگيته .. حسين الوالد اشحاله
شلگيته .. وفــوگ الــرمـله دلاله
ابد ماتنلام .. وشماته بالشام
شكثر بيك الام
علي علي
*بالـــدرب ذاك البعــيد .. وانــته مگيود بحديد
سنسلتهم خلت برگبتك اثار
الوادم الچن عدها عيد .. مدري منك وشتريد
امكبل وگامو يشمرونك بالحجار
عجيبه .. من گاموا يشتمونك
عجيبه .. هــمه من يضربونك
عجيبه .. والدم غرگ امتونك
جرحك ميلتام وشماته بالشام
شكثر بيك الالم
علي علي
*
توجعك حيل العيون .. الوادم امن يشاهدون
على الناگه امچتفه عمتك زينب
لو جبت طاري الكفيل .. بساع دمعته تسيل
تصد على رمحه وتون وحيل تنحب
اسيره .. الماشـايفــها بنــيادم
اسيره .. عيون عليها تتزاحم
اسيره .. زينب وسـفه ياعالم
العقيله تنظام .. وشماته بشام
شكثر بيك الالم
علي علي
*
گلبك شگد بي جروح .. الهالسبب لسه تنوح
الشفته ماشافه بشر يازين العباد
شفت نسوة امچتفات .. اليالي عالناكه تبات
شوفوهن ياوسافه الكل البلاد
مصايب .. مــن گالــو سبيناهن
مصايب .. ذنــي ابلايه ولياهن
مصايب .. الكافل ماهو وياهن
ابضعنكم ايتام .. وشماته بالشام
شكثر بيك الالم
علي علي
*
من بعد ذاك العذاب .. گعدوكم عالتراب
بالخرابه انفرشت ادموع اليتامه
تقره بعيون الزغار .. الم وهموم ومرار
السبي فوگ وجوهم تارك علامه
يونون .. چــيه فگــدو اهالـيهم
يونون .. سوط الحادي ياذيهم
يونون .. للطـــف مـــن يـوديهم
اساره مادام .. وشماته بالشام
شكثر بيك الالم
علي علي
*
حيدر تركي الكربلائي
ياتـرى هالـقـافـله .. شگد مأسي شايله
وكل فرد بيها يصيح
كربله ياكربله
_________
ابقافلة بيـت الرسالــه الوادم الغربه تجر
الچان عباس ايحديها گام يحديها الشمر
مچتــفات ايـــات الله وماخذيــهن لليسر
حسين من الغيره كلسا رمح راسه ينكسر
ومن يطيح اعله التراب .. زينب اتصيح الحجاب
التحچي لتبدي الدموع
الصار خل تتحمله
_________
راحن وراحــت وياهــن بالعــيون الذكريات
الحنه حلم اچفوف رمله البالحبال امگيدات
هــزت الكاروك نعمـه ونــقمه علّي فــاگدات
آي يدمعات الرباب العلى خدها مخضرات
يادللول الرباب .. چوت اخدود التراب
اتلولي عالناگه وتگول
آ ينبلة حرمله
_________
النوگ والحر والصحاري والتعب فوگ الحزن
تبتــلي العـــلويه بلــوه هـــيه لو رادت تـــون
التغفه عالناگه وتطيح ايعوفها عادي الهجن
وزينب الله يعين زينب ابد ماطبگت جفن
وينها اوين المنام .. من عگب عين الامام
تلتفت يسره ويمين
حايره بالعايله
_________
قافلة اهل الســكينه الــغرب تحــديها عجب
وزحمه راعي الحسب من ايأسره الماله نسب
النوگ الــبلايه محامل بالمــشي اتمــوت تعب
ابكربله ماضل محــامل كلشي بالطــف انهب
الماطلع الهن خيال .. راحن ابنص الرجال
هايه توجع كل غيور
سوطه عالنسوه اعتله
_________
فنها اذا عـــلويه صـــاحت خويه اذانه الصبح
اجروح احـــنه والشماته اعيــونهم مثل الملح
التحچي وي كافلها كلمه تنطگ ابچعب الرمح
من عمت عين الزمان شگد وكح وشگد صلف
ماتمر دوم اعله بال .. العفه تنگاد بحبال
والجره الاهل الحسين
ابد ما مانتخيله
_________
_________
حيدر تركي الكربلائي
سبع ايام اتاني .. ياسبع المثاني
اليوم بغيبتـك يحـسين
ينعد خويه سبع اسنين
--------------
بسم الله ادموعي والحمد موت .. برض الغاظريه
من ظهر الهــزيله الچـنها تابـوت .. ارسل لك تحـيه
يماخذ مني كلشي اصرخ بصوت .. مشتاگه السبيه
يالماخذ حياتي .. هاجت ذكرياتي
الحزن العاش وسط العين
ينعد خويه سبع اسنين
------------
شان الفرگه تــذبح گالت الــناس .. وصدگني شفتها
ابزمن ضليت مابيه ذرة احساس .. اختك من عفتها
التــنادي حسين وينه وين عباس .. شمــات اعرفتها
اتمنيتك تجيني .. وتشاهد ونيني
دمعي السال هاليومين
ينعد خويه سبع سنين
----------
مــن بديت عينــي بدو اسـياط .. ياخـــويه عالمـــتون
امن الدلال احس تتگطع انياط .. كل ما اجري العيون
جرح فرگاك بيـه ما اله اخياط .. وادري اعليك ميهون
تمشي اختك غريبه .. الله اشــــمصيبه
تدري بجرح المضيعين
ينعد خويه سبع سنين
----------
تدري يالاخو لــمن يجــي الليل .. بعيـني مايضل ماي
ابچيــلك لحد مايــوگع الحـــيل .. الرايحلي تره اهواي
حنانك عالثره من طشره الخيل .. طشر يالاخو اعضاي
يالخالي مكانك .. محتاجه الحنانك
حچيّ الگال اخيچ وين
ينعد خويه سبع اسنين
--------
حدر اضلوعي احس مشعول چانون .. ابـگد ماگلــبي يلـهب
تدري اشسوه خويه حادي الظعون .. وسط السوگ من طب
صاح وخــله كــــل الــناس يدنــون .. گلهـــم هــــاي زينــــب
جبناها الاميره .. ابلا اخوه اسيره
الوكت ابلا هلي الطيبين
ينعد خويه سبع سنين
----------
يالفوگ الرمح تدري السبي اجروح .. وبعينك تشاهد
من حچي الــشماته مابقــت روح .. بزينب الله شاهد
يالمذبوح خــدري وياك مــذبوح .. عگبك ياهو اناشد
ابالي والله ماچان .. امشي ابلايه وليان
غمج جرحي الك يازين
ينعد خويه سبع اسنين
----------
حيدر تركي الكربلائي
لحن القصيده👇👇👇
https://youtube.com/watch?v=r6hvVeHGtIs&feature=share
للسبي
بضعنهم ماكو رايـه ** يمكـــنهم سبـــــايـه
ياحـاديــهم امــنيـن ؟
گـال اعيال الحسين
سبيناهم
***
نوگ وفــوگ هاي النــوگ ايات
العفه البيهن امخجلة السماوات
خوات حسين والعـباس ياحيف
يگـول اعليـهن المــثلك سبيات
اميرات عفيفات شريفات
يحلفون بسترهن
عزيزات كريمـات حرامات
بحبل انته تجرهن
النساء التحدي بيهن ** ابو فـاضـل ولــيهن
بس لاغمض العين
گال اعيال الحسين
سبيناهم
***
يحادي الضعن المن گاصـــد السوگ
تــره مو نــسوه عــفــة الله عالنـوگ
ستــرهن باقــي محــد يوصله بيوم
رغــم ماشيخـهن بالخـيـل مسحوگ
يخسئون يصدون بالعيون
علـى خدر الجلاله
يحلمون يشوفون ويلاگون
ضعن زينب خياله
خوات حسين كلفه ** تصدهن عين صلفه
حچيــنه بالنساوين
گال اعيال الحسين
سبيناهم
***
يحادي النوگ ذاكه المـن الــراس
شو عرگانه گصته اهواي حساس
اذا بالــضــعن عـــلويه يضـربون
تــرف اشــواربـه يمكــنه عـــباس
عالرمـــاح وميــــرتاح اذا لاح
السوط امتون زينب
الدمع طاح امن الصياح والجراح
زينـب صعبه تنسب
عكب عيون اخوها ** الغــربه تكــفلوها
گتــله ويــن ماشين
گال اعيال الحسين
سبيناهم
***
على اقتاب الجمال امگيد الحجاب
هذنـي ابنــات حيــدر قـــالع البـاب
يحــادي الحبـــل گلهــم لا يجــروه
خاف اتطــيح حرمه اگبال الاجناب
هالحبال ترى اثكال ومتنشال
اشتتحمل اديهن
بلا جال الارجــال يجــمال
الرفق مطلوب بيهن
النسوه ابلا كفاله ** معنــاها ثكـــاله
اسألته بس كلمتين
گال اعيال الحسين
سبيناهم
***
بنات المصطفى وربات الخدور
من ديــره لديــره بيهـن اتــدور
استـقويتو لان واليهــن اهــناك
ضل بكربله عالــغبــره منحــور
عدل ريت تمـنيت أبو البيت
وتشوفك كون عينه
من اسبيت وتعديت وتوليت
ظعن بيت ابو سكينه
تدري بهالنساوين ** مـو مالــت دواوين
حچه اوج بيه نارين
گال اعــيال الحسين
سبيناهم
*
حيدر تركي الكربلائي
للدفن
جيت مــن الغاظريه اعمه ويگودون بيــه
ادفنت اعيوني الاثنين
مــن ادفنــت الحسـين
يعمه
-------
اجيت وشوف ماعـندي .. وحـچايـــاتي تتـــعثر
وعـن اعيوني لتـسئلين .. عفتـهن يم ابو الاكبر
خاف احچـيلچ الشفته .. وشوفچ مثلي يتطشر
عمه الگيت ابوي احسين .. عــاري مسلب اموذر
بجسمه ماضل عضو سالم مگطـعينه بالـصوارم
شبــن بيـــه نــارين
من ادفنت الحسين
يعمه
-------
وحق الــي جــرن بالطـــف .. وحــق دلالچ وصبره
سوالف دفن ابوي احسين .. عالمثلچ احس خطره
بـحر بــس راح احـچــيلچ .. مــن هذا البحر قطره
ظلوع احــسين مــاهـــنه .. الحوافر طاحنه صدره
الصدره مرتـع للـترافه مرضرضينه ياوسافه
اعثرت ابگـــربه مرتين
مـن ادفنــت الحســين
يعمه
-------
احفر بالــترب واشــعر .. بنــص دلالي چـــن احفر
عمـــه امنــين مـاصـدن .. اوصـــال الابـــو انـــظر
چفه الگيته بـُعد امـتار .. بس بالچف نقص خنصر
اعله مود المحبس الجمال .. ابخـنـجر اصبعه يبتر
بالحـصيره اي يـعــمه لملمت اوصال جسمه
عمه ابلايه تچفـين
من ادفنت الحسين
يعمه
--------
ذاك الــطـــول ياعــمه .. مامـــوجود هـــيسته
ابصفه اتوسدت حتى .. اقيسه وريت ماقسته
طوله الگـيته مــتغــير .. الخـيل هواي دايسته
نــيابه عــنـــچ وعنــي .. يعــمه بمنحره بسته
ابگبره حيره شلون اوسده وراس ماموجود عنده
ماتت والله الايدين
من ادفنت الحسين
يعمه
------
اجيتــچ والحـچي الــبـيه .. عشر العشر ماحاچيه
سوالف دفن ابويه احسـين .. حتى الميت اتبچيه
اجروحــچ ماهـــن اگليلات .. ادري المـثلچ اياذيه
الله يـــساعــدچ عــمه .. السبي هم يالله اتحمليه
السبي توجع نايباته النوب فوگاها شماته
وادري اجروحچ الفين
مــن ادفـــنت الحسين
يعمه
--------
حيدر تركي الكربلائي
قصيده گعده للسبي
.
.
.
راحت الدنيا اويه اهلها
من عگـب عيـن الكفلها
زينب ابلا اخو زينب .. ماكو خـَيّر يفزع الها
***
كان يامــاكـان كانــت سـيده تدعى الامـيره
چانـت امن تريد تطلع تطلــع اوياها عشيره
مو خشب محملها حيدر فصله تفصال غيره
يتخدر بضلها الخدر .. شيلتهـا عنوان الستر
تاليها يــندار العمـر .. وتنـوخذ زينب اسيره
الچانــت الجــنـه بكبرها
تستحي تحچي بخدرها
عالهزيله بلايه محمل .. وحايره اتلم بشملها
***
زينب الستر التـــبقه بوكــت بـــي ماكــو شهامه
بت علي لو ماخــدرها عـالشــرف نقــره السلامه
وچـان راس الســمه فــرع لحـد متقــوم القيامه
وصارت ضريبتها السبي .. وحاديها زلــمه اجنبي
شكــراً الى بنـــت الــنبي .. الدين ردتله احترامه
والله لو وياها اخــوها
بالحــچــي ماشامروها
آخ نظرات الشماته .. عله زينــب وشثكلها
***
احجابها رايــة (محمد) وماتطـــيح ابداً الرايه
ضنهــم اشويه العـقيله وبالسبـي طلعت اهوايه
چـــم ولايــه طـبـــبوها ابــلا كفيــل ولا حمايه
اذنت حي اعله الشرف .. والــعالم بكبــره وگف
الوالدها سلطان النجف .. زحمه تنعد عالسبايه
الچان ابو فاضل سماها
شـمر من عگبــها سباها
اوف ياكــلمة ســــبيه .. اتخلبص الزينب غزلها
***
زينــب الــمــحــد لمحـــها زينـــب الحــره الابـيه
الباري لو للــعفه ارســل نبــي چـــان ارسلها هيه
زينـب اول تالي تدخـــل فـي دواويـــن ال اميه
ويديها مشـدوده بحـبل .. لا والله ابــد ماتنعقل
وينك صحت ياباالفضل .. تحـضــر الهه بالرزيه
مدللت عباس وحسين
وينـها اويـن الدواوين
من عگب عين ابوفاضل .. ياهو اليـــنزل حملها
***
چان مــن يــمر ذكــرها ماقـــبل عــشره مــحرم
الناس كــلها تصيح صلى الله علــى زينب وسلم
شــصار ياهالنــاس بلله مــن وره حرگ المــخيم
من طاح اخوها اعله النهر .. مسبيه سماها الدهر
وسفه انسبت اخت الگـمر .. والخـدر ذاكه تهدم
لاعشيرة ولا كرايب
سكــنوها بالخــرايب
تچوي خد السمه زينب .. لمــن الدمـــعه تهلها
*
حيدر تركي الكربلائي
ليلة الوحشى
.
.
.
لا مخـــيم لا محـــامل ** يابوفاضل يابوفاضل
خويه يابـدر العشيره
الليله علويتك اسيره
يابوفاضل
__
بيمن ابـدي .. والسـوالف
بيهن ازغر وحده خويه بگد رقيه
ريتك اتشوف .. الدللتـها
مــن اعــيون الوادم اتـــستر بديه
ياعمود الخيمه عگبك كلشي طاح
الوكت ذاك المحد ايـشـاهدني راح
ذيچ زينب الشــمر بالجــيش صاح
والــعــيـون تــفتــــحت بيـــــبانهه
وبعباتـي النــار تلهب ** وكلها صاحت شفنه زينب
والله يابوالغيره حيره
الليله علويتك اسـيره
يابوفاضل
__
روحي حنت .. وعتنيتك
الجابني شــوگي يخـويه للشريعه
احمي اختك .. مـا اگلـك
شلون تحميني يالچفوفك گطيعه
اطفوف قبل شويه مو ذيچ الطفوف
بطيحة چـفوفك تره شاخت اچفوف
وعالخــدود انطبــعت وريتك تشوف
مـــــن درو زينـــب بـــلا كـــــفـــالها
فوگ الرماد گعدوني ** وبعطركم ذكروني
والمـن النــاظر تديره
الليله علويتك اسيره
يابوفاضل
____
يابوفاضل .. وغيرة الله
الليله وحشه وانه حرمه ابلايه والي
وللشماته .. عيون صلفه
ويــن اروح ومحـد امــن اهلي بقالي
ياضــرانـه البــيك چنـــه محــتــمين
الـخيل من هبــت صفــينه مطشرين
من اعتله شــمر الخنه صدر الحسين
فــزعت اعلـيــنه ركــض جـــيــمانها
متني بالسوط من يضربون ** يابوفاضل شو يضحكون
الناس ذوله ابـلايه غيره
الليلـه علــويتك اسيـره
يابوفاضل
_____
مااعـــاتب .. لا وحــــقك
ضاج صـدري وجيت اسولفلك يرجواي
امتوني ورمت .. من ضربهم
الصادفني الــيوم خـويه كـــلش هـــواي
الجيش ليش بموتتك چن عنده عيد
وصــفـدو ايــدينه خويـــه بالــحديد
باچـــر ايـــسوقـــونه مـــثل الـعــبيد
ويلــي والغـــربه تــشوف اوجوهــنه
يابوفاضل على بختك ** بلا كفاله تمشي اختك
كسرتي كســره چبيره
الليله علـويتك اسيره
يابوفاضل
____
هــــذي اول .. مــره خــويه
اتبات زيــنب اخــتك ابلايــه حمايه
البارحه وين .. اوين هاليوم
اليوم خــويه عيــونهم تـفــتر ورايه
ولو ليله ارجعلي يالگلــبك حــنين
حتى مايضربــني بالســوط اللعين
خويه بالطف صــار مـمنوع الونين
التبـچي گــول تـــزورگن متـنيــنها
كلشي ممنوع حتى الدموع ** تبچي بسكوت العدها مصروع
منو عندي واستشيره
الليله علويتك اسيره
يابوفاضل
____
حيدر تركي الكربلائي
النسخه المعدله يرجى اعتمداها
يـبوفاضل يبـوفاضل
يبوفاضل يعباس
*
الـعفو گلهم سجيتنه واطلقناكم ابمكه
بس بكربلـه هالــيوم ما الكـم ابد فكه
احچي والحچي مشامر .. وينــه الراد يتأمر
وبفــقارك اليلـــصف .. خلي الروس تتطاير
يبوفاضل يبوفاضل يبوفاضل يعباس
***
اذا سبعين الف جندي على الشاطي يخلونه
طــرف اردانــك اليــسره وحقــك مايـحركونه
يحنــظل مايجرعيونك .. توجـع خزرة عيونك
نــص الجيــش لا كله .. موت احمر يسمــونك
يبوفاضل يبوفاضل يبوفاضل يعباس
***
يالمعـتبر يـكل الـكـل يمالك بيدك الانفـــاس
زردوم الجـمع حـشرج من گالو اجه العباس
يمخلي الزلم خرسه .. السابع ظهر ماتنسه
گلهم ذوله اليخذفون .. ملگاكم احس ونسه
يبوفاضل يبوفاضل يبوفاضل يعباس
***
يجبد العاصفه السوده وتطب غفله اعله جومة ريش
عاد اتــصور الموقــف منــو من الجموع ايعيــش
مايوگـــف ابوجهـــك ســد .. مـن اعله الجموع تهد
الاجت تمشي اعله رجليها .. بــتوابيت الاهـله اترد
يبوفاضل يبوفاضل يبوفاضل يعباس
***
الماحســبو حساب الهــاي راويهم شنو الذله
كاســر دمـهم اويه المــاي مـن فقــارك تسله
اگطع سـبحة العسكر .. وكون بظلمه تتطشر
عـساها كـون ماتلــتم .. حتـى احسين يتبشر
يبوفاضل يبوفاضل يبوفاضل يعباس
***
غــــيـــرك أبـــــو راس الــحــار والله مايســـمونه
اليشيل اعـــــيونه لخيـامك انتـــه تشــــلع عيونه
الغيره بداخلك تلــهب .. تــوج الحــومه من تچهب
يـقره الفاتحه الروحه .. التسمعه يطري اسم زينب
يبوفاضل يبوفاضل يبوفاضل يعباس
***
الغــيره البــيك ما الهــا حـــدود ولا الــها حسبه
مو بس گطــره البگصتـــك لايمكن ترس جربه
وفي وماظن وفي مثلك .. لا بعـــدك ولا قبـــلك
يالمنــك فـــلا موجـــود .. الك هالمرجله ولهلك
يبوفاضل يبوفاضل يبوفاضل يعباس
***
حيدر تركي الكربلائي
هواي اجروح بيه واكبــرهــن رقــيه
واكبرهن رقيه
رقيه
*
يـــعتگ كل جـرح بـــيه .. وجرحـها اجـديد مايعتگ
من اگول حسـين اتنفـس .. اگولن يـــارقيـــه اشهگ
الطفله السـطـره تذبحـها .. اشحــال البالرمح تنطگ
امورده اخدود البنيات .. وبس خد بنت اخوي ازرگ
چي تبجي اعله ابوها هــــواي يعــــذبوها
ماگـــالو خطيه
رقيه
*
بنات حسين كل وحده .. جـرح اتحسـسه ابروحي
كل وحده بطعم دمـعه .. التطـيح اتهـدم اصروحي
ورقيـــه لان مملـــوحه .. حچــيهه يــفزز اجروحي
ماگــالتلي وين حــسين .. گـــالت ويـــن مذبوحـي
ومن صاحت يبابا جــــيران الخرابه
صاحوا يسبيه
رقيه
*
چـانــت چنها جـــوريـه .. گــــبل الـــــعاشر اذكر
ذبلت بنت اخوي حسين .. من گد الضرب والحر
بنـــات الشـــام كاللـها .. وجهچ لــيش شــو اسمر
المسبيه تگـــل الهـــن .. طبــــعن هيــــچ تتــغير
شهر طول سبيها الطفله اشضال بيها
اتغيرت موش هيه
رقيه
*
ضعن والضعن بس اجروح .. جرح من عدهن اتهزع
وگع والحادي صحـناله .. ويســــوي روحـه مايسمع
افتركـــلي وگالي ارقيه .. اوگـعت بـس الها ماارجـع
سمع وختاض رمـح حسيـن .. نـــبت بالگاع مايطلع
رجع حادينه الها ظربها وحيل تلها
اصرخت لحگي عليه
رقيه
*
الـنوگ اشــويه واطفالي .. يمـكن فـوگ الثمانين
نص ركبو ونص للشـام .. راحوا بالسبــي ماشين
ورقيه صـاح حاديهــم .. يجب من نوگنه اتنزلين
مشي ترحين بس بالـچ .. مــن گـد الـتعب تبچين
بس يسمع حچيها يجي ويزمخ عليها
ويگلها خارجيه
رقيه
*
غصن جنها لچن يابـس .. مامـــــتـروي حـــنيه
ماشبعانه من حضـــنه .. لـــهذا تبچــــــــي ليليه
تصبح ياحسين اتصيح .. وتمــسي اعلــه طاريه
عمر هالـطفله ياوسفه .. بخرابتـــــهم تـــوالـــيه
بشامات المصيبه غفت وسفه غريبه
وافتها المنيه
رقيه
*
حيدر تركي الكربلائي
للسيده رقيه
.
.
.
شـاءت الاقـــدار .. والـتقـــينه
عالجره والصار .. من حچينه
گتلي اليوجعچ ويــن
گتــلك انـته يحـسين
توجع رقيه
*
اربعه وعشرين يوم وشوگــك بـروحـــي يجر
الثانيه بهـــــجرك احســهـا بثگــــل ايام اليسر
اهوايه محتامه اعـله صـدرك رايده اغفه عمر
بويه مشتاگتــــلك بــگد ماضرب متني الشمر
الألمتـــني اهـواي .. ومنها اعاني
بويه طـاري الماي .. مـــــو اذاني
ومو من گيد اليـدين
گتلـك انتــه يحسين
توجع رقيه
*
گبل ماتغمــض اعيونــي چانــــت ايامــــي حبل
وسوط وصياح وشماته وضـرب واشواك وهـزل
ادعيت يمتـه الرحمــة الله ورحمـتك بويه انتقل
السبي بالنسبه الغيابك وحق ضلـع امـــك ســهل
دمــعة وتبــديت .. عالوطـيه
اعليه من ناديت .. يارقــــيه
ياهو المنه تبچـــين
گــتلك انته يحسين
توجع رقيه
*
اعليه تسأل انه زينه شلونـــك انته ياصبح
اليوجعـنك بالله طــــابن لو بـقه منك جرح
بويه المثـلث مكـــانه طـــــاب لو لا منفتح
ارد اشبگك بس اخافـن الچم امكان الرمح
صـــدرك المطــحون .. مــن الـزمه
شلون اشـمه اشلون .. خاف الچمه
جرحي الغافي بالعـين
گــتلك انـــته يحــسين
توجع رقيه
*
سولفيلي اتگلي بــويه خـاف انتــــــه تـــنفجع
مره منهن عله الناگــــه ذكرتـــك وهـــل الدمع
بالرمح واحد ضربني وكســـر من صدري ضلع
شگد تمنيــتك يبويه حـاضــر بـــذاك الوضــع
ابنيــتك يحــسين .. من ولوها
بالحــبل مرتــيــن .. گـيـــدوها
وگلبي النياشيــــن
گـتلك انته يحسين
توجع رقيه
*
من التقيتك ضمه روحي راح يالوجهك نهر
هنه صح چم يوم لكن يالابو جنــــــهن دهر
يارقيه گتلي بويه شو علــــــــه خـــــدج اثر
چنه خد امي الزجيه وره البــاب من انسطر
ابعطــفك المفگود .. حسستني
من رجعت اردود .. وقبلــتني
جرحي بگد السنين
گتـــلك انته يحسين
توجع رقيه
*
حيدر تركي الكربلائي
للسبي
.
.
.
ابــاب الساعات .. وگــفن ساعــات
وعالمستورات
تــنظر شمـات
****
مـــاصــارت ولاتنــعقـــل .. ولامرت ابال انسان
اليحدي ابنات المصطفى .. شمر وخوله وسنان
جـابوهن الشام الحزن .. وبيديهن احبال امتان
نســـوان وعــيون الزلم .. كـلـش تأذي النسوان
للميخــجلـون .. وكحات عيون
وسفه يصدون
عالعـــلويــات
****
مرسال اجه الحادي الضــعن .. هز راسه گلهم جيد
يمـــكن رخـــه حبل اليــسر .. رد مـن جـديد ايگيد
من اجنوده جاب اطول رمح .. ونـبته براس السيد
وللـــشـام گــال الــهـم نطــب .. لــمن اهــلها تــعيد
وگــفن حفاي .. وبلايه افيــاي
الرجلين بهاي
شبعن چويات
****
حلــفو اسالـــيب الخبـــث .. بضعن النبي يسووهن
وصـــلو الـشامات الفجــر .. وماقبـــلو ايـدخــلوهن
السوگ الضحه من يزدحم .. بنص زحمته يمشوهن
غــايـتهم عــــيون الزلـــم .. ابلا كافــل يــشوفوهن
ويـــن العبــاس .. عن هاي الناس
صدن عالراس
چيه خجلانات
****
بالشام انفــاس الـحقد .. اعله ال النبي مشحونه
واحــدهم بــگد الغـضب .. تــجــدح شرار عيونه
اهزيل العليه اخت الگــمر .. حدره الرمح يرمونه
ستـر الله فوگاه منحــفظ .. ماگــدرو ايعـــثرونه
اخ امـــن الـــشام .. شگــد بــيها آلام
واخت الضرغام
اشتحمل شوغات
****
للشام طب واحـد هتف .. مــن عنده موته بصفين
الرايد يرد ثــاره يــجي .. ابــاب المديــنه امــتانين
اليطلب علي ثار اعتنـه .. وحجــار هــمه محمـلين
الضربه برقيه من اجت .. فز عالرمح راس حسين
واكــبار ازغــار .. يشمرون احجار
المايطلب ثـــار
يرمي حچايات
****
البالشام كلها اتجمعت .. وتتعاله صوت الضحكات
اسرنه صـاحو وبفرح .. الماشـــايفتـــهن نجـــمات
من انسبه احجاب السمه .. هلهــــلن الشــامـــيات
الايات مــن فوگ الهـزل .. تبچـــي بحراره الايات
بـــيد العدوان .. وبـــلا وليان
اعليهن ماهان
شبعن لچمات
****
حيدر تركي الكربلائي
للاربعين
كل خطوه مصحوبه بهله .. حياكم
يـالگاصــديــن الكـــربــله .. حياكم
---------
حي الله اهل الغــانمه .. حـــي الله خـــطار السمه
اليخدمكم بـهذه السفره .. معـــناها يخدم فاطــمه
مـلگاكم العيد بــصـــفر .. يامــن تگصـــدون النــحر
هنـــيالـنه بيــــــكم لان .. فرحـــتو گلـــب المــنتظر
يامن تجسدون العشگ .. عــشاگ ابو اليمه الصدگ
واحدكم بدرب المـشي .. بگـلـــبه المـخــيم يحترگ
اتواسون اجيتو العايله .. حياكم
يالگاصــديــن الكـــربله .. حياكم
------
عطر اليواسي ام الخدر .. نستنشقه اجمل عطر
نفرشله درب الطف ورد .. بيــنـــه لمن هوه يمر
مثل الامـــير انحسسه .. وتاج الـضيافه انلبسه
القدس ابو اليمه يجب .. زايـــره هــم ايـقدسه
من اي مكان واي وطن .. بعيونه ايصير السكن
شغلتنه بالدنيه الــكرم .. علمه عالشغله الحسن
زايـر احســين اندلله .. حياكم
يالگاصدين الكربــله .. حياكم
-------
العايش حياته النيـنوه .. ومن حزن الحسين ارتوه
اتراب اليدوسه بالمشي .. لعـــيونه انـحــــطه دوه
المن داره للطف منـطلق .. وبحسين گلبه ملتسق
هنياله كلمن يـخدمه .. الزاير خدمته احسن رزق
عيون المواكب عالدرب .. مثل الــيتانـيلـــه محب
ملگاكم اشگــــد ماحـــلو .. فرگاكم شگد ماصعب
خدمتكم اشرف منزله .. حياكم
يالگاصــدين الكــربـله .. حياكم
---------
الشايل الرايه ومعتني .. وظهره اعله زينب منحني
انخليه على هام النجم .. كـــان فقــــــيراً ام غـــني
لافـــرق بيــــن عـربي .. او اعـجـــمي او اجــــنبي
كلهم مــلوك ابهالدرب .. مــادام اجــــو لبـــن النبي
ابموطن ابو اليمه العجب .. موطن نعم يسوه التعب
تلـــگه النصــاره بكربله .. وبيهـــم نشم ريحة وهب
شفتوها هاي المساله .. حياكم
يالگاصــدين الكـربله .. حياكم
--------
معنى الحسين وخدمتـه .. تـعرف طعمـها امته
نفخر ابآي دوله النطب .. چـيه منتمين الدولته
دمعتنه دستور الخدم .. من دونه عيـشتنه عدم
العلمنه كل هذا الوفـه .. عبـــاس شــيال العــلم
مانـــترك الخـــدمه ابد .. منطـــين لـلزهرـه وعد
واحدنه من هسه نعم .. الى السنه الجايه استعد
متانين هاي المرحله .. حياكم
يالگاصــدين الكربله .. حياكم
-------
الجايب اطفاله ونسوته .. وتجري اعله خده دمعته
اشگد مانــقدمله نحــس .. ماقمنــه احنه بــخدمته
الگاصد يواسي زينـــبه .. والـــدرب هـــذا تعـــبه
كلمـــن يقــوم بخدمته .. الله يعـــليه مـــرتـــــبه
زايــر ابو الـــيمه الخدم .. الله يـــزيد اعليـــه نعم
من جسم ابو اليمه البذل .. كأنـــما شــــالع ســهم
والحچـــي هـذا اوله .. حياكم
يالگــاصـدين الكربله .. حياكم
------
حيدر تركي الكربلائي
للسبي
راس الگمر يحچي الراس الحسين
زينــب وينــهـــا اويــن الـــدواوين
وَنـو فــــوگ الرماح
ودمع اعيونهم طاح
على زينب
_
مـن فوگ الــرماح وهــاجـت الخوه
والمروه ابألــمــها اتـحاچـــي المروه
زينــب ويــن ذيـــچ ايـامهــا الحلوه
امحدبه امن المأسي وتمشي بالگوه
بنــص العيون .. وحادي الضعون
شكــو وادم شـماته ايــمر عـــليهم
يحچـــي للناس .. ابـــلايه عـباس
جــبناها وبــده امشامر حـچـــيهم
نص يشمرون .. ونص يضحكون
والبـــاقيـــن مــايرحـــم حچـــيهم
ومن قرر الحادي يدخل السوگ
من گـــد مستحاها عـثرة النوگ
من اتعاله الصياح
دمع اعيونهم طاح
على زينب
____
الساده الـچانـو ايحكـمون بالكوفه
هواشم وبگصصهم غــيره معروفه
عرضهم زحمه والله الوادم تشوفه
اول تالي اخـتهم تمـشي مچــتوفه
وادم الـــشـام .. تحسـب ايـام
حتـى ايشاهدوها ابلايه اخوها
ابلايه كفـــال .. والــشمـر گـــال
لــمو احچار حتــى اتگاطــفوها
مـــــايـــردون .. لاتــخـــافــــون
مــو عــدلين اهلــها ومايــجوها
گال وبيـدي بالطــف گاطـــع الروس
وحوافر خيلنه اعله اخوانها اتدوس
اعلــيها اشــر الذباح
ودمع اعيونهم طاح
على زينب
___
صاح الحادي وحچاياته سم بيهن
يشايل روس اهلها الروس دنـيهن
خيشــوفـون اديــها مـــن ندميهن
النـوب اگبــالها هــالروس نرميهن
هــيه شتــصير .. والــمن اتــدير
نظرها والكفلها تشوفه بس راس
مهبــطه الهــام .. وكــــلـــها آلام
والـغــربه عگــب خــوتها حراس
صاحو ابصوت .. فــــزز المــوت
كـفلــنها عــگب عينـــك يعـباس
شامي صاح عندي اطفــال غافين
لتگـــعديهم انتـــي كــافي تـبچين
سكتت حتى يرتاح
ودمع اعيونهم طاح
على زينب
___
زينب بت علي وحامي الحمه وجاره
اسـمها عفـــة الله وعـــرضه واسـراه
مــعقـــوله تطــــب ديــــوان خـــماره
وراس احســين ظـلت ترجـف اكتاره
زحـمه الحجاب .. اهــنانه ينــجاب
يـــم وادم بـــلا غـــيـــره وحـــميه
زينـــب اشـلون .. وياها يحــچون
الغـــربه وبـــدواويـن ال امــــــيه
مــصدر الدين .. واخــت الحسين
وســـف صــاحولهــا يالــخارجيه
الجبرائيل يخجل يحچي بيها
شمــر ياوسفه يتـــامر عــليها
الخدر البالسـمه انلاح
ودمــع اعيونهم طاح
على زينب
_
كلـــش حـار ولــــد المرتضى دمهم
من فوگ الرماح وعرگت اگصصهم
الذبـــح ماهامهم بس السبي همهم
والصــاير بخــتـــهم حــيـــل المهم
عــفـــة الكـون .. مــــن يظـــربون
غيـض الـــروس يظهر عالمـــلامح
صــعبه زينـــب .. والله تنـــســــب
وحچي اهل الشام كلش چان مالح
ماكـــو خـــوان .. ولاكــو ولـــــيان
بالطـــف ظـــلو اهـــناكـــه ذبـــايح
حرمه والدرب متــروس شمات
المن تتـــجه والـــي كــفل مات
كــل البالضـعــن ناح
ودمع اعيونهم طاح
على زينب
-------
حيدر تركي الكربلائي
للاربعين
.
.
.
عطشانه اهـواي .. بـس مـو للـماي
الوجهك يحسين
عطـشانه اهـواي
_________________
صــار اچــم يـوم امفـارگني
وخدي امن المدمع يحرگني
اســئــل عــنــك يـامـاي الله
يـالوجــهـك چـان امــغرگني
محــروگــه ابــدلالي الـخيمه
وگـلــي اســئل عـنك ياغيمه
يـامــاي اعيــوني الشـيــلمك
يـالمــتبدي بحظــن الـهــيمه
اشتاگت عيناي .. بـس مـو للـماي
الوجهك يحسين
عطـشانه اهـواي
_________________
ميته امن الشوگ امخليني
مـن عذبك يمــته اتـرويني
حارگني افــراگـك حارگني
ومحـد ياخــويه ايطـفيني
شمـات اهــواي الـشـافوني
وعنـك كـل ساع ايسئلوني
يابس حسيته امن اغيابك
يابو اليمه السان اعيــوني
ثــق يارجـواي .. بـس مـو للـماي
الوجهك يحسين
عطـشانه اهـواي
_________________
احتاجيتك بــدروب الــغربه
چــتالــك من مـتنـي ايظربه
دورت اعــلــيـك ابأشــيــائي
المــاضلت منهن بــس تــربه
سلبـوهن كـلهــن مــن عنـدي
وضلت بس دمـعاتي ابخدي
اشعر كل دمعه امـن افـراگك
يمـكن يابــو اليــمــه ابگــدي
احچـيلك هاي .. بس مو للماي
الوجهك يحسين
عطشانه اهواي
_________________
بحچايـاتــك جــاي اتــذكر
وافـرك بچفـوفي واتحـسر
من سمعت حسراتي الناگه
شـو گامـت تمشي وتتـعثر
شــوگك موتنــي وتدريني
راح اغـفـه وبلـكت تلفـيني
اول مــاغمــضت اعــيوني
لن سوط ابمـتني ايوعيني
هـمــي وبلـواي .. بـس مـو للـماي
الوجهك يحسين
عطـشانه اهـواي
_________________
اشتاگيــتك ياروحــي وعــمري
وشوگك مدري اشسوه بصدري
اعلــه افــراگـك لا مـامتــعـوده
وكلــش زيــن ابـزيــنب تــدري
ابهجـرك مــدري اشـصاير بــيه
اختــك بخـــلافــــك مــعـــميه
مــن يـوم الشـفــتك عالغـــبـره
اتطــشــر وانـــلـــم يــــومـــيه
ملهوفه اعظاي .. بـس مـو للـماي
الوجهك يحسين
عطـشانه اهـواي
_________________
تعــبنـــي افراگــك تـعــبني
شمـعه وهجــرانـك ذوبــني
احلــم ترجع واگـعـد والـگه
راس گــدامــي ايــعـــذبـني
راسك من ابـچي ايضــمونه
ومن اسكت همه ايطــلعونه
ماكفــاهـم جــرح امــتوني
رادو دلالـــي ايجـــرحــونه
نوحي ومبچاي .. بـس مـو للـماي
الوجهك يحسين
عطـشانه اهـواي
_________________
تمت والحمد لله
حيدر تركي الكربلائ
قصائد الاربعين
.
.
.
حسراتك جبيرات عالراحن سبيات
ساعد الله قلبك يابوصالح
***
اتبده بوجهك المدمع / بگـد مــاي الـــنهر مرتين
الرايحلك شــرف الله / بي ريحة چفوف حسين
چانن حاسرات النوگ / الفــوكاهن اصول الدين
وحدتـهن اذا ونـــت / تجيها سياط مدري منين
عماتـك غريبــات بدنيه كلها شمات
ساعد الله قلبك يابوصالح
***
الــدروب بكــل وكت خرسه / مـن عدلين ولياهن
وحچن من شافن اعله النوگ / اخوه ماكو وياهن
العــــلويات بالـــغربــــه / الحچي اليوجع تلگاهن
خوات حسيــن والعــباس / مسبــيات جـــبناهن
كافلهن لمن مات اخـــذوهن اسيرات
ساعد الله قلبك يابوصالح
***
المحاملهن ضوه العفه / مـشن وبـلا محاملهن
الحادي صــاح متعــمد / شــو ما هـوه كافلهن
اتخذها فرصــه وتـجرء / بكل قـسوه يعاملهن
المكان البي يحس شمات / رغم عنهن ينزلهن
واستار السماوات شگد شافن معانات
ساعد الله قلبك يابوصالح
***
اجروحــك يا ابوصـالـح / الســبي أتصور اكبرهن
حريـــم الله الف وسـفه / الشــمر وسـنان اسرهن
الوحي اليستأذن اعليهن / زجر بالسوط يزجرهن
الماشـــافتــهن النـسوان / اعيون اجناب تنظرهن
يمشن چنهن ايات ويتـــبدن جراحات
ساعد الله قلبك يابوصالح
***
ســـتر عفــة بنــي هاشم / المحد شاف الها خيال
عــــذراً يــا ابـــوصــــالح / شافو طـــولها الانذال
الاديها مخاويه المصحف / حريمه امگيده بحبال
اليـسوه والـــي مايــسـوه / شاهـــدها بـــلا كفال
دمعاتك غزيرات علّي بالعرى اتبات
ساعد الله قلبك يابوصالح
***
گلبك شــايلاته الــنوگ / يعينــك الله يالمــهدي
الناس ادموعها من ماي / وعينــك من دمه تدي
بذنـــك صوتــهن يــدوي / مـــن البضـعن يحدي
وحــده تصـيح يامـــتني / وحده تصيح ياخدي
بــيك هوايه لجــمات من درب الجراحات
ساعد الله قلبك يابوصالح
*
حيدر تركي الكربلائي
قصيدة گعده للسبي
.
.
.
الكل ثوره اعلام صــوته يعتلي
واعلام الحـسين زينب بت علي
نقلــت قضيه
امن الغاظريه
زينب بت علي
---------
صح مشت زينب اسيره مگيده بحبل السياسه
والخذوها ناس غشــمه وابـــد ماعدهم كياسه
تـــاج راس اعلوج اميـه طمست بالوحل راسه
ديــوانــه لمـــن طبــته .. برجلـيها داســت هيبته
الخابص الناس اتعنته .. اوضحت حجمه وقياس
اليصرف ملاييـن لعــلام القــصر
الحــق ابكلمتـــين ايرجعه للصفر
وحرجت اميه
بالــغـاظـــريه
زينب بت علي
----------
فـَـن ســياسة ال امـــيه الــي تبثــه شي مزور
علي ماينــدل القبلــه قيــس مــن هاي وتصور
الشام چان اعلام عدهم نـعم بس اعــلام اعور
والي تصـــعده الكامره .. ليشوف نفسه جوهره
ايبين الفحم من مظهره .. واليكنزه ايكون اغبر
المتشــــيخ اهناك مدري اشچم سنه
بت حامي الدخيل فضـــحت معدنه
بحكمه ورويه
بالـــغاظــريه
زينب بت علي
---------
البهرجة اهـــل الكراسي زينـب اخذوها اسيره
حرمه مكسوره احسـبوها لا اخوان ولا عشيره
وبالحقيـــقه زينـب اول مـــره تتـــعين سفيره
گلــبت موازين النصـر .. والــي سباها منــكسر
اليجــهل تـدابر الامــر .. حنــطته تاكل اشعيره
لو ما بـديــهــا حطو سلسله
چا ماوصـــلنه طـاري كربله
اعلام الســبيه
امن الغاظـريه
زينب بت علي
--------
امن ال اميه البعض وادم اي نعم وصلت العدوه
والــذي مايــسوه عانـــه بحفـــنه دولارات يسوه
ناس بالاعـــلام تــصــعد نـــاس بالاعـــلام تهـوه
والــــي يـــدور عالربح .. بجيــوب متروسه قــبح
عالشاشه لمن ينفضح .. ايجدي يبقه الستر جدوه
وذيول الارجــاس زينب من سبت
ماحسبت احساب ورطه اتورطت
ظـنهم ضحيه
امن الغاظريه
زينب بت علي
---------
مختصر سبي العقيله احسين خططله ابتدبر
وراد من هالفعل هـوه ينسحگ خــشم التكبر
حتى اني وانته وابنـي وابنك انعيش التحرر
وحتى يضل دين النبي
راحت اسيـــره للسـبي
وحاديها زلـمــه اجنبي
هذا كله الصـار بيــهــم بلكي بالــوادم يــغزر
--------
حيدر تركي الكربلائي
للدفن
.
.
يــابنــي اســد .. صـاحب الجسد .. التدفنونه
صدره منطحن .. خوفـــي بالدفن .. تلچـمونه
انتو جيبولي حصيره
وانه انــزله بالـحفيره
يابني اسد
--------------
ادري محتارين جسم حسين بيمن ينجمع
چيه امطشر عالتراب اهنا ظلع وهنا ظلع
اليبچي لينزل دموعه على نحره المنگطع
المنذبح كلـــشي يلچمه حتلو قطرة دمع
اليهــوه عالثره .. المفترض تره .. يتــركونه
بمنحره نغرس .. حافر الفرس .. وتشوفونه
المحنته كلش چبيره
انه انزله بالحفيره
يابني اسد
--------------
يلله خنـــلم جســـم ابويه الي توزع عالثـــره
اوصـاله اخــذتها الحـــوافر كل مكان مطشره
الخيل من سحگت ابويه اهناكه رجعت ليوره
والمكان الخـيل نمشـــي بلكـــي نلگه خنصره
بحرگه وبهظم .. مابقــه عظم .. تره سالم
ماكو اي عضو .. صاحي بالابو .. يهالوادم
لملمو الماله عشيره
وانه انزله بالحفيره
يابني اسد
_______
ابــــين مذبح نحر ابويـــه وبين دفنه خطـــوتين
ابهالمسافه وگـع منــــي جســـم ابـــــــويه مرتين
اونين اسمعه بصوت خافت وگمت ادور عالونين
اتقربتله ولنــــه هذا الـــصوت مـــن نحر الحسين
يمكن انلچم .. موضع السهم .. من احملته
ينزع صــعب .. غافي بالگلب .. ولاشـــفته
العالارض بدو عبيره
انه انزله بالحفيره
يابني اسد
--------------
لمن الحــفار گلـــــي خلصـــت هـسه حفر
روحي احسها گام تطلع والنفس گوه اجر
لملمت كل قوه بيه وحـزمت ظهـري بصبر
مدري چم طيحه طحتها انه يم باب الگبر
بالگبر طحت .. انه من صحت .. يمذبوحي
امنيتي من اون .. هسه اندفن .. بلا روحي
لوعة الوالد چبيره
وانه انزله بالحفيره
يابني اسد
--------------
اليدفن الميـــت يوســد خده كون اعله الترب
بجسم ابويه راس ماكو شلون اوسدنه صعب
ولدي مگطعــين جسمــه وذابل ابگــد الظرب
انه كل ماتچي جســـمه على وجــها ينـــگلب
گلبي باللـــحد .. ويلي مـنمرد .. عـلى الغالي
يوجع الحصل .. والدي وصل .. صفه اگبالي
ناظري المن اديره
وانه انزله بالحفيره
يابني اسد
--------------
حيدر تركي الكربلائي
خدام الحسين النسخه السابقه لهذا القصيده فيها بعض الاخطاء
يرجى اعتماد هذا النسخه ☝☝☝
اكبر معانات .. ستر السماوات .. راحن سبيات
يا أيها العالم
------------
حسين لمن طاح بالطف فوگ التراب
أيهـا الـعالم سبــو قدســية الحـجاب
قناديل الرساله ابــلايه كفال
عالهزل مشـن بيديـهن احبال
عذراً من ابو فاضــل العباس
ذبحتهن ذبح نظرات الرجال
چيف الگمر مات .. ستر السماوات .. راحن سبيات
يا أيها العالم
------------
الشرف والعــفه مشن مگيوده اديهن
اليــسوه والمايـسوه يتــفرج عــليهن
ابكل ديــره العده لمــن يطــبون
خوات حسين جبناهن يصيحون
من گد مسـتحاهن عـرگت النوگ
اعله غيرة الله شمات اليصدون
اتبدت جراحات .. ستر السماوات .. راحن سبيات
يا أيها العالم
------------
ابيا وكــت تنــصان نســوان ال اميه
وتنســـبي الحــوراء وسـكــينه ورقيه
البنات الچان ابوهن حامي للجار
يطلبــوه ثار واخــذو منهــن الثار
العــلويات مــن شافو على النوگ
كل واحد حظن شامرهن احجــار
مطلوب ثارات .. ستر السماوات .. راحن سبيات
يا أيها العالم
------------
ابزمن ماضل مستحه امن الله ونبيه
ولابقــت عــد العرب نخــوه اعــربيه
زينب لا اخو اولا والـــي عـــدها
وبديها اسـياطهن چانت تصدها
ما سامع اسـيره ابكـــل الازمــان
الستر هوه وعظمته يلوذك سدها
ايجر حسره واهات .. ستر السماوات .. راحن سبيات
يا أيها العالم
------------
الچان فوگاهن محامل تــشبه ازنود
ابنسوة العباس هسه تحدي الــجنود
چبـيره الســالفه كلــش چــبيره
مشو وي ناس همه ابلايه غيره
التون منهن مجرد لو طلع صوت
يعــني تبتلــي بــــلوه الاســـيره
بالسكته دمعات .. ستر السماوات .. راحن سبيات
يا أيها العالم
------------
الحـادي بالبــلدان قرر بيهـــن ايــدور
وهنه مثل اخدورهن ماتوجــد اخدور
غرب تتصفح اوجوه النساوين
ولاعــباس وياهن ولا حـــسين
المــحد شافهن من چان عباس
هــسه طببـــوهـــــن للــدواوين
حيف العزيزات .. ستر السماوات .. راحن سبيات
يا أيها العالم
------------
حيدر تركي الكربلائي