7934
لنشر قصائد مناسبات اهل البيت
قصيده گعده للسيده زينب ع
.
.
.
كفيــلي تمنيت كفيــلي
گبل ماتغمض العين .. يجيني وعنده چفين
ابو فاضل كفيلي
______________
دگــت الباب المنــيه ومــوتــتي صــارت قــريبه
والمصيبه بطرگ روحــي حرمه مكسوره وغريبه
ويــن الــگـه الي كـفلني امـنين ابـو فاضل اجيبه
ناديته وينك ياگـــمر .. بخــلافك اشــسوه الـدهر
لمن غفيت اعله النهر .. خويه صار اسمي السليبه
يهالناس تسمعون يهالناس
صحت وين الگمر وين .. يجيني وعنده چفين
ابو فاضل كفيلي
______________
حسين عالعباس شفته انكسر ظهره وعينه تجري
وموعــجيبه عالكــفلني لــون هسه انكــسر ظهري
حــيل مشــتاگه ارد اگــله طـــولت يابــعـد عـمري
الكافل من اعيونه انطفن .. بغيابه وشسوه الزمن
حرمـه وبقـيت ابـلا وطن .. من وگع حماي خدري
يعباس ندهته يعباس
وصحت يالمشرعه منين .. يجيني وعنده چفين
ابو فاضل كفيلي
______________
الموت لاموهين ابــدن وابــد موهينــه المنيه
لچـن من المـوت الاصعب لمن صاحو يالسبيه
اشگد تمنيـت الكـفـلني يجي يـحل احبال اديه
عالناگه مشدوده بحبل .. والحادي قرر يحتفل
بزينب منو السامع قبل .. گــال ويـأشـــر عـليه
اسيره يگلهم اسيره
ردت ليث الميادين .. يجيني وعنده چفين
ابو فاضل كفيلي
______________
سلهــمت للمـــوت عيني والـــذي تانيتــه وينه
خاف مايــندل يجـينــي سهـــم المــثلث بعينه
راح اطش بالباب دمـعي بلكـت ايجيبه حنينه
كفـــالي ارد اتنــفسه .. والزم اديــه واتـلمــسه
اشفافه بعدهي يابسه .. هوه لو رواه احسينيه
وفـــائه يحير وفــــائه
الكلشي وفه لحسين .. يجيني وعنده چفين
ابو فاضل كفيلي
______________
الليله اخر لــيله حلمي ايــمرلي وادريهـــا بعيده
وينكـــم يــهــل المــروه گـــولو للكـــافل اريـــده
ردت بيده ايشيل نعشي ولو ادري نگطعت ايده
يكفيني اشمن منحـــره .. امـــن ايشيلني للمقبره
راح انه امـوتن حــايره .. وعلى زيـنب موجديده
المنيه شفتها المنيه
گبل مايگرب البين .. يجيني وعنده چفين
ابو فاضل كفيلي
--------------------------
حيدر تركي الكربلائي
مولد امير المؤمنين
علي مولا .. علي مولا .. علي مولا
---------
مـتيــم بــيــك ياحيـــدر واريــدك
وفضل تحسبني واحد من عبيدك
انـه التـــايه انــه المحـــتاج ايدك
امـــروتـــك لاتگـــــلي مــا اريـدك
اروحن وين .. يـنور العين
انـه ابليــاك .. صفر ليدين
يبسـم الله / علي
ينـور الله / علي
علي مولا .. علي مولا .. علي مولا
---------
جنوني بــيك ياحيدر جــنوني
وغيرك ماتشوف احـد عيــوني
كـ التــمــار مـــيثم عــيـــروني
وعـــن امحـــبتك ماغـــيروني
الگلـب ناداك .. اعيش اوياك
واحس بالموت .. انـه ابلياك
يحرز الله / علي
يـذكر الله / علي
علي مولا .. علي مولا .. علي مولا
----------
ادگ يوميه بابك واستـجيرك
فقير وانتـه ماتـطرد فقـــيرك
رحمتك واسعه وماكو نظيرك
اسيرك فــدوه لاتعتـق اسيرك
صحت ماريد .. اروح ابــعـيد
يتيم ارجوك .. واشوفك عيد
يعين الله / علي
يسر الله / علي
علي مولا .. علي مولا .. علي مولا
--------
عشت طاريك لحظه لحظه اني
وعن ذكــرك فلا يــغفــل لساني
طــاري الــغيـر اســد منه اذاني
تره يكفــر الخـــله ويـاك ثــاني
علي الاوحد .. علي الامـجد
علي ومثلك .. فلـــم يـــولد
يــــبـاب الله / علي
وحجاب الله / علي
علي مولا .. علي مولا .. علي مولا
----------
بايعتك علــي من واني بالذر
وعشگتك والعشگ بيه تجذر
وگبل ماگول يمـه گلت حيدر
غير انته الــذي سـاكن بالابهر
اموت اعليك .. افكــر بيــك
وحلم عمري .. ابوس ايديك
جنان الله / علي
امـان الله / علي
علي مولا .. علي مولا .. علي مولا
-------
علي وشقــيمة النـــاس التحـــبك
عـــلي وانته يــحبـك حـــيل ربك
الخليفه الصدگ بس انته نحسبك
بدربــك نبقـــه لامنــعـــوف دربك
امير الكـون .. الميقـتنعون
فلا يقدمون .. ولاايأخرون
يـأيــد الله / علي
يسيف الله / علي
علي مولا .. علي مولا .. علي مولا
-------
حيدر تركي الكربلائي
مولد الامير علي ع
.
.
.
ردد الــسـاني .. عـلي قـرآنـي
علي علي يابالحسن علي قراني
---------------
علي بــاء البــسمله الحـاظر ذكـرها
علي جنه وعالارض فاحت عطرها
علي بـيـك الــدنـيه ماكـفه شـعرها
علي ذكـرك حـسنــه واخـذ اجــرها
ابذكرك انــه اتعبدت
الهذا والله اتسيدت
وبالحديـث اتأيدت
والنبي انطاني .. علي قرآني
علي علي يابالحسن علي قراني
---------------
علي بالفـرقان وبـفــاطر لـگيــتـك
علي رتلـتك بـوجـداني وقــريـتك
علي هــذا الكون بعــته وشتريتك
علي والله انسه حياتي لو نسيتك
شلون انسه حيدره
وانتــه دنيه واخره
حبــي محــد فسره
ما الك ثاني .. علي قرآني
علي علي يابالحسن علي قراني
---------------
علي سورة ال عمران اوي مـريم
علي بس بيك العـكل والله تهـيم
علي يالوجهك صحو مايـوم غيم
علي واعـلنها بعـلي انـــي متـــيم
واليــگلي رافضي
ابعلي انه مرتضي
الامر هذا يقـتضي
اعلن ايماني .. علي قرآني
علي علي يابالحسن علي قراني
---------------
علي فاطر علي ياسـين ومحمد
علي بمـحـبتك ايمـانـي تجــسد
علي بالــدلال ماغـيـــرك تـخــلد
علي واحد علي خالد علي اوحد
انته حبي الاولي
انته حبـي الازلي
انته ياحيدر علي
وهذا عنواني .. علي قرآني
علي علي يابالحسن علي قراني
---------------
علي بالفتح وعـلي بسـورة الكوثر
علي ديـني ومذهـبي انتـه يحيدر
علي واسمي عـلوي وبالاسم افخر
علي وي اسـمك اصـيـح الله اكـبر
الارض تشهد والسمه
حــبي وقعــته ابدمه
علي ياحــامي الحمه
وبيه متفاني .. علي قرآني
علي علي يابالحسن علي قراني
---------------
علي سورة هل اتى اتوضح خصاله
علي الله ايعـرفـــه سـبحانـه تعــلى
علي عـلـــمه مـن لـدن رب الجــلاله
علي والـهذا الـســبب اهـوى وصاله
مايهــمـون الحــچو
الرضو والي مارضو
اعليه ادري اتحـملو
امن اعلنت اني .. علي قرآني
علي علي يابالحسن علي قراني
---------------
علي مو سوره علي مصحف غرامي
علي ايــاتــه يــمَـثلــــهــن هــيامــي
علي بيك اعتـرف بـس انتـه امـامي
علي والله الـشوفـتك دلالـي ظـامي
انه شيـــعي منـهـــجي
بحب علي والله التجي
الخــوف يمــي مايجـي
عندي برهاني .. علي قرآني
علي علي يابالحسن علي قراني
---------------
خادم اهل البيت حيدر تركي الكربلائي
مولد امير المؤمنين
.
.
.
روحي وحياتي .. وامنياتي .. يا امير المؤمنين
-----------------------------
يابـسم الله الرحمـان .. ياكلــشـي بــدلالي
حبـيتك والحب ايمان.. يالـبس انتـه ابالي
بيك اقره وانته القران .. ومـاختمك للتالي
ماشايف مثلك انسان .. حيـدر انتـه الغالي
مصدر نجاتي .. وامنياتي .. يا امير المؤمنين
-----------------------------
ياســر الله الـديــان .. يالـســاكن بعـيوني
الايماني انته البرهان .. يالـبيك ايعرفوني
رتلتك باحلى الالـحان .. وبحـبك لامــوني
گالو وشعندك تبيــان .. گلـــتلهـم اقــروني
وكل ذكرياتي .. وامنياتي .. يا امير المؤمنين
-----------------------------
بين الناس انته الميزان .. الحق ابطوله وعرضه
ايبغضونك شـلة رعـيان .. حـيدر ذولـه المرضه
اعيون ايملكون وعمـيان .. للــوالاك اتــرفـضه
واَليتك وانــي الفرحان .. غـصـباً عـالـمايـرضه
الساعة ممـاتي .. وامـنـياتي .. يا امــير المؤمنين
-----------------------------
مجنونك عاشگ ولهان.. اعلـنها ومـو سكته
مـتأكـد لا مـا وهـمان .. حـبيـتك بـس انـته
شفتك بكتابي العنوان.. وغـيرك لا مـاشفته
العافك ياحيدر خسران .وانتـه الي مـاردته
ياحـسناتـي .. وامـنياتي .. يا امــير الـمؤمنين
-----------------------------
ماگول اسمك حيدر كان .. شخصك لا مو ماضي
موجـود بكـل الازمــان .. غـصباً عالمـاراضـي
انصفني الشخصك ضميان .. يامـولاي الـقاضي
حمــداً يـارب المنــان .. انـي بحـيدر حـاضي
شيعـي بصفاتي .. وامـنياتي .. يا امـير المؤمنين
-----------------------------
يـاروح وجـنه وريحـان .. يا آيــات الـــباري
إلأنس اتحبـك والـجان .. هواي بفضلك قاري
وبوصـفك لامـو غلـطان .. من الهادي اخباري
هـواي هواي ايحبك چان .. والحب مو اجباري
حـبك صـلاتي.. وامـنياتي .. يا امـير المؤمنين
-----------------------------
حيدر تركي الكربلائي
النور انطفه .. ودمعة وفه .. للهادي خل نجريها
عاشر جـرح .. بـي ننـجرح .. نتـأذه من نحچيها
آه يامـحـنته
آه يالـوعـتـه
نتـأذه مـن نحچـيها
__________________
آلـم يـوميه نتـنفس .. وجرح فوگ الجرح يظهر
نسمع لوعة العصره .. وصـوت اظـلــوع تتـكسر
وصوره الخيمه محروكه .. بيـها ايسـلب العسكر
بينه الف وتسع مية .. جرح من جسم ابو الاكبر
اجروح الزمن .. ماينحصن .. وماوصلن النهايه
بالهادي ألـم .. جـَرعنه سـم .. وَصــلنه للـمــنايه
آه ياجمــرته
آه يالـوعـتـه
نتـأذه مـن نحچـيها
__________________
يومـه اتخـالط ابـدمنه .. مـو مـــره الــف مره
نشهـگ مــن تــمـر بيــنه .. ريحـة طاري سامره
حرارة سم بني العباس .. جرعنه سمهم ابحره
وجرحنه البي علي الهادي .. مـنه شـلون نتبره
لا مــابـــره .. ونــتذكــره .. بي نلجم يوميه
من ننوجع .. نجري الدمع .. نتــألم الطـاريه
آه ياغـربــته
آه يالـوعـتـه
نتـأذه مـن نحچـيها
__________________
بواچينه العلي الهادي .. منمـلها بـســنه وســنتين
واليوگف دمـع عـيــنه .. بيده ايحــط ملح بالعين
لمـصــيبة ابـو محـمـد .. عرفنه البين واصل البين
الطاغي المعتمد سمه .. چيه بي ريحه من حسين
من سممه .. حتى السمه .. اتـون ونزل دمعها
لجله انحنت .. وتــألمــت .. چنها انكسر ظلعها
آه ياحــالـته
آه يالـوعـتـه
نتـأذه مـن نحچـيها
__________________
الهادي من جرع سمه .. اتجــرعــنه مــأسيه
فرگة جـمرة امصابه .. بـينه اتچــوي يوميه
مــن گــد مابچــيـناله .. بچـتله انجوم الثريه
والنجمه ابعلي الهادي .. حقها اتصير شيعيه
دمـع الـنجــم .. ماينــلــزم .. من ينزل ابغزاره
ايأذي الضوه .. ابخد الهوه .. لمن يمر مساره
آه ياحـسرته
آه يالـوعـتـه
نتـأذه مـن نحچـيها
__________________
نسال عن علي الهادي .. بيـش العســكري شــاله
ابحصيره لو چفن لفه؟ .. وهم امطشره اوصاله؟
ابوه هـم راس ماعنــده .. وهـم ساحگــته خياله؟
سهم هم نابـت ابصدره .. وهـــم مــمـــرود دلاله؟
حافر فرس .. ابصدره انغرس .. لو بس تجرع سمه
وهذا الصعب ..هــم عـالتـــرب .. باقي ثلاثه جسمه
آه يادفنـــته
آه يالـوعـتـه
نتـأذه مـن نحچـيها
__________________
حيدر تركي الكربلائي
ياصاحب الزمان
كل عام وخيامك جمر والعيد عندك غير
خجلان اگلك سيدي كل عام وانته بخير
مولد سيدة النساء فاطمه ع
.
.
.
حبــيبة الســـماء .. فاطمه
ســـيدة الســخاء .. فاطمه
قل عنها ما تشاء .. فاطمه
ام الحسن
--------
حوراء آنســيه .. حـــوريه قدســـيه .. نفـحه آلاهيه
عطر العرش بيها
سبحانه جللها .. ومن نوره كملها .. للهادي ارسلها
ايـــات يتـــلـــيها
لاموعجيبه يابشـر من انته تسمع
لو انزلت على جـبل فاطم تصدع
ليس لها قــريـن .. فاطمه
والطورِ والسنين .. فاطمه
قل عنها ماتشـاء .. فاطمه
ام الحسن
--------
الجنه وما بيها .. ربك امسويها .. الفاطمه وطاريها
بگد مايحبها الله
الكون ومجراته .. والعرش واياته .. تسجد الكلماته
اعلـيها اذا صله
من قالها من حــر جهنم والله يسلم
صل الله علــى فاطمة الزهرا وسلم
نعم هي الخـيار .. فاطمه
في لجج البحار .. فاطمه
قل عنها ماتشاء .. فاطمه
ام الحسن
--------
بارينه دللها .. وعالـــناس فضــلها .. كـل الوجود الها
ورهن الاشارتها
والرفض الفكره .. خسران كل عمره .. المابيع الزهره
ينحرم نظــرتها
والماتصدله ام الحـسن يوم القيامه
لاماتفــيده من يعـــض اصبع ندامه
طوبى لمن يقول .. فاطمه
ريحانـة الرسـول .. فاطمه
قل عنها ماتـشاء .. فاطمه
ام الحسن
--------
جـــلت معـــانيهـا .. نور العرش بــيها .. نلهـــج ابطاريها
اطهر المخــلوقات
الحق نحچي منغالي .. بالصيتها عالي .. البنت النبي انوالي
اشرف الموجودات
لا اســيا ولامــريم اولامــيه مــنهن
الازغر مناقب فاطمه يوصلن فنهن
بوصلة الوجـود .. فاطمه
وسدرة الخلــود .. فاطمه
قل عنها ماتشاء .. فاطمه
ام الحسن
------
البحروفها اتــغنـــه .. يســـتاهل الجــنه .. والــراد يــــتدنه
للهادي خـــل يفرح
ميلادها الزاهر .. بوجه السمه ضاهر .. الاشرف ستر طاهر
بصوت الوفه نصدح
ستر السماوات السبــع جابــــت هدايا
من السمه الكل امرءه احجاب وعبايه
مختصر الجواب .. فاطمه
ايــقونة الحجاب .. فاطمه
قل عنها ما تشاء .. فاطمه
ام الحسن
-------
بيها الكرم معلم .. وبهالسخا نعلم .. تنطــي ولاتهـــتم
والزايد اتزيده
جبريل يگصدها .. حاجاته متردها .. طلباته من عدها
والها يـمد ايده
لو هوه حاجــه يريد مـــن رب البريه
واسطته صدگوني تره الزهره الزچيه
مقامـها عظيــم .. فاطمه
نعم لدى الكـريم .. فاطمه
قل عنها ما تشاء .. فاطمه
ام الحسن
-------
حيدر تركي الكربلائي
بـس المـفارگ حبـيب .. يگضي كل عمره غريب
الغربه تجرح
ومايصـح الـهـا طبيب
____________
الناس لو كلهم يصيرولك گرابه
الـدفن روحـه شيخـفف مصابه
غربه غربه الناس عگب الزهره احسهم غربه غربه
صعبه صعبه انه اعيش ابلايه فاطم صعبه صعبه
ياكل بروحي السكوت .. ريتني بهالحظه اموت
شلون بيه
الصبر انه امنين اجيب
_____________
الدفن حدر الگاع بيده ذكرياته
بالله ياهالناس شتـفيده حياته
رجعه رجعه ادري هوه الراح مابي رجعه رجعه
دمعه دمعه طــشرت عمـري بغيابه دمعه دمعه
دمعتي صاحت تعاي .. الخاطر الله ياهواي
مختنگ حيل
انــه مــن گــد النحـيب
_________________
المامــلوع لايــلـــوم الفــاگـــد اعـــزاز
احچايتي ايحس بيها بس الراح جناز
جرحه جرحه حدر الضلوع اشيضمده جرحه جرحه
وكحه وكحه الدنيه ويه المثلي تصبح وكحه وكحه
مني اخذت كلشي زين .. فاطمه ام گلب الحنين
ياحسافه
العشره هم قسمه ونصيب
______________
الدنيه مو دنيه عگب عين الزچيه
الدنيه احس بيها گبر طابگ عليه
حالي حالي چن رضيع ودفنو امه حالي حالي
غالي غالي الـراح ياهالناس مــني غالي غالي
التبچي من عنده الرجال .. حاله مدري شلون حال
من حزنها
الصار بيــه موعــجيب
________________
الناس اشوف اعيونها اتسولف عليه
هذا معــقوله علــي حــامي الحــميه
ظهري ظهري منحني من المصيبه ظهري ظهري
عمري عمري صار عگب الزهره ميه عمري عمري
صار بيه المايصير .. المحنه سوتني چبير
انحنه ظهري
وبين ابراسي المشيب
_____________
فاطمه يانــاس لمــن شيعتها
انه بالمــقبره روحي ضـيعتها
خطوه خطوه چنت امشي الكبري انه خطوه خطوه
فدوه فدوه صــــحت يافـاطــمه عمـــري فدوه فدوه
عمري من غيرچ سراب .. شلون احطچ بالتراب
ايعينه الله
الدافن ابايده قريب
_________________
حيدر تركي الكربلائي
مولد السيده زينب ع
.
.
.
تستاهل .. الليله نحيي اعيادها
تستاهل .. نــفــرح ابـمــيــلادها
تستاهل .. زينب اخـت العباس
نـفـرح ابميلادها
__________________
زينب / نـور ابنور مــن نــور المــيامين
زينب / زينــب أية الله الـناصره الدين
زينب / إمــكــمـله الرســالات النبـيــين
زينب / الناطق الرسـمي بسم الحسين
تستاهل .. الله هــوه الــرادهـــا
تستاهل .. نــفــرح ابمــيــلادها
تستاهل .. زيـنب اخت العباس
نـفـرح ابميلادها
__________________
نزلت / زينب رحمة الله على هالناس
نزلت / أيـة للــوفه بقــرأن الاحساس
نزلت / حوريه وبعــدها بأول انفـاس
نزلت / تتــنفس عـطـر كافلهــا عباس
تستاهل .. مــوتــو ياحــسادها
تستاهل .. نــفــرح ابمــيــلادها
تستاهل .. زينب اخـت العباس
نـفـرح ابميلادها
__________________
الدنيه / فرحانه بــلا شك تمـــلك اســـباب
الدنيه / اشـجبتــيلي يزيــنب بــعد الغياب
الدنيه / الخاطر فاطمه الزهره ام الاطياب
الدنيه / زينــب لَبسـت للدنـــيه الِحــجاب
تستاهل .. وفَــتحـــــت اورادها
تستاهل .. نــفــرح ابمــيــلادها
تستاهل .. زينب اخـت العباس
نـفـرح ابميلادها
__________________
فرحه / زيــنب بـــت علــي مولدها هاليوم
فرحه / هــاللــيله يشيعي انـــسه الهـــموم
فرحه / ودعي الباري كـون افراحنه اتدوم
فرحه / والي ايلــومـنه مـيهـــمنه خيـــلوم
تستاهل .. الشيعه يبقه انشادها
تستاهل .. نــفــرح ابـمــيــلادها
تستاهل .. زينـب اخت العباس
نـفـرح ابميلادها
__________________
حقها / بزينب هالمسه فرحانه الارواح
حقها / امـلاك السمه تعــلن هــالافراح
حقها / لــو هالليله كثره اهـموم تـنزاح
حقها / حقــها فاطـمه بــزينـبها ترتـاح
تستاهل .. نحـــتفل بــــاولادها
تستاهل .. نــفــرح ابمــيــلادها
تستاهل .. زينب اخـت العباس
نـفـرح ابميلادها
__________________
بهجه / عـمَت هـالارض وي الســماوات
بهجه / مـن زيـنب اجـت نـزلت الايـات
بهجه / الدنيه امن الفرح تقره ابتهالات
بهجه / مـن سابع سمه تـسمع الاصوات
تستاهل .. الارض ابـــعبــادهــا
تستاهل .. نــفــرح ابمــيــلادها
تستاهل .. زينب اخت العباس
نـفـرح ابميلادها
__________________
حيدر تركي الكربلائي
الفاطميه
الامام علي يتكم عند دفن الزهراء
.
.
.
رديت وانـه ابگلبي حسره
والبيـت بـي ريحـة الزهره
امنتذكر .. اتحـسـر .. اتــنطـر
المــوت
__________
السمه احـس طاحت عليه وهدمت بنياني
انــه مــن طبــيت بــيتي ومــحد اتلــگاني
صحت يافاطمـه وينــچ والـصـده حاچاني
تــوَك الزهــره ادفنــتــها گــال لـي وبچاني
انهاريت ماضل حيل بيه
وَنيـت عــالزهـره الزچيه
واتـعـثر .. اتحـسر .. اتنــطر
المــوت
__________
چــنت مــن بيــتي اطـبه اتــرد الــي عافــيتي
هسه احـسن روحــي تطــلع لو دخلـت البيتي
الله وحده هـــوه يـــدري ويعــلم ابوضــعيتي
امنيتي بس الموت هسه اوين احصل امنيتي
اتمنيت يخلص هسه عمري
وياريت يــمها ايصير گبري
وما اگدر .. اتحـسر .. اتنــطر
المــوت
__________
امـن انظـر الوجه الزچـيه فاطمه گدامي
لــو جـبل طـايـح عــليه انـسه كـل آلامي
راحت وراحـت وراهـا فرحـتي واحلامي
عـلي وبـگد رحـمــة الله للـوديعـه ضامي
مديت دمــعاتي عـــلى الباب
وخطيت حزني بوجه التراب
واتطشر .. اتحــسر .. اتنــطر
المــوت
__________
سورة الاحــزان اقــره واشهگ ابهالسوره
انه كل مابيتي اطـبه والگه طافي ابنوره
زهرتي راحت يوسفه اضـلوعها مـكسوره
وبالگبــر حسيـت بيها عالوجـه مسطوره
خليت فوگ اخـدودها ادموع
وناديت بلكي اتطيب الضلوع
اتصور .. اتحسر .. اتنطر
المــوت
__________
لمــن زيــنـب ناشــدتنــي ويــن امـــي رايـــحه
الاعمه شاف دموع عينــي من كــثر ماواضحه
اعليها كلشي گمت اسمعه اوياي يقره الفاتحه
ابكل ركن من بـيتي اسمـع صوت ونه ونايحه
احتاريت زينب شرد اگلها
حسيت هالمحنه اشـثگلها
واتوذر .. اتحسر .. اتنطر
المــوت
__________
تمت والحمد لله
حيدر تركي الكربلائي
نزله ميمر للزهراء
.
.
.
وَزن كلمـتك انــتـه مـن تــحـچـيها
الماتــعـرف الـها بـالـك اتـدهـــديها
لهـل الحــشم تـدفـع حـشم تـالـيها
وابـن أدم ابهـذا اليوم يتحشم اعـله احچايه
وزنــك اعــرفـــه اولايغــــرك صيـــتك
اولا تنــدفع لــو شـــاهــدت حاشــيتك
اشما تعله بيها ايضل نقص شخصيتك
والسُــمعه بحــلوگ الـــناس يمـــعــود امتــچايه
____
خَـلـك رزن انـتــه خـفــيف اشـــمالك
اثگــل اولاتتــشـلـبه عالـــمـــو مــالك
صـدگـني تـوگـع والــنتـيجه اعــمالك
والــزرع بيــده الـعـاگــول يتحــمل الــســلايه
____
انـته المراجل يمـتــه الـك مـعـتازه
وَيــه الــزلـم مـاتــستـحي تــتوازه
يمــسوي سيـفــك للمــشي عكــازه
من تالـي شايـلك سيـف يالسيفك ابـلاغايه
__
مـن تالي صاير عـود عينـك صلفه
المثلك علـى الشجعان ينـعـد كلفه
يالبلـحرب تـرجف رجيـف الـسعفه
ومـن اسمع ابأسمك ليـش اتـذكر السعـفايه
__
لــو ماعــلي بالصــبر چـــان امــوصه
السانك مثل راس (ابن ود) چا گصه
چــا دافنـــك يـم بابـــه بــقرب نـَصه
عندك بخـت يالملـعون يمــنة علـي اموصايه
_
گاصد البيـت الزهـره تحـرگ بــابه
واليـعتدي عالـحرمه هـاي اطـلابه
شيلـه يلبسـونــه العـرب وعـصابه
تتبـره منـه النـسوان إلسـوه هيچ اسوايه
عرش الجلاله امن الجنـيته اتهدم
والـــكـون كـلــه الـحالهـــا يــتــألم
المــثل الزچــيه تنــسـطر يمصخم
لو ماعلي . ايطيح الكون عالطاحت امدمايه
____
تمت والحمد لله ٣٠/ ١/ ٢٠١٨
حيدر تركي الكربلائي
يوجع ليل الفراگ .. وانه الطولك اشتاگ
الك بـحلامـي امنســافر
اتفـزز اعيــوني الحوافر
عايشه كل عمـري عاشر
ياحسين
*
عگبـك ماهنيــت ابنوم .. يبعـــد العــافيه البيه
ولو ياعافــيه يحســين .. من گـد ماسده اعليه
شنسه ياهي من عدهن .. وهنه الف وتسع ميه
وحق دلالـــل المـثلوم .. الطف يوجعني طاريه
گلبي امن البچي ذاب .. وسئل عني التراب
حــالي حـال البالمــقابر
اتفـزز اعيـوني الحوافر
عايشه كل عمري عاشر
ياحسين
……… ..
عمري خــــلص ابصفــــنه .. من ساعة ظهر عاشور
بـنات افكــــاري يتـــبدن .. يم جســمك دمع منثور
منـــك رايـــح اهــــوايه .. واولهــــن صبــــع مبتور
امطشر وبمبهب اسيوف.. بوكت حتى الهوه منحور
يالچنك هوه الهاب .. طولك كله نشاب
آخ شمســويه العــساكر
اتفزز اعــيوني الحوافر
عايشه كل عمري عاشر
ياحسين
……… .
اتسامر مع اجـــروحي .. وتاخذ سالفتنه الهم
اتطشر واصـــير اهواي .. بگــد ارماد المخيم
من ايهب علّــي حزنك .. يم باب الجزع التم
كلــشي البيك يوجعني .. لذلـك خــويه اتالم
ظل ابجسمي بس صوت .. الباقي ماخذه الموت
بعـــــد مابـــيه واكـــابر
اتفزز اعــيوني الحوافر
عايشه مل عمري عاشر
ياحسين
……… ..
امسي واصبــــح ابغصه .. يلي امصــابك اشكبره
حــزنك بــاب الِـــــبالي .. الصدري يالاخو تعصره
وحق صـدرك يبـــو اليمه .. الماينــــلم بعد عطره
شجره اختك يماي الله .. وعگبك يبست الشجره
يمته ايخلص الغياب .. يامسلوب الثياب
وخوفي من تغفه النواظر
اتفزز اعـــيوني الحــوافر
عايشـه كل عـمـري عاشر
ياحسين
………
اذا مابيك ابـــد جيـه .. وتدريبـــه نفذ صبري
اوياك الموت يجمعني .. حلمــي يابـعد عمري
تره مشتاگه لعيونك .. بكثر مامختنگ صدري
بــيدك يمته ياخويه .. تمسـح دمعتي التجري
يمته اتغمض العين .. وتشوفك يالحسين
الشخصك اشگد ما اناطر
اتفـــزز اعـيـوني الحوافر
عايشه كل عـــمري عاشر
ياحسين
حيدر تركي الكربلائي
هوسات لامير المؤمنين ع
علي ومحتار شكتب بيك .. حيل السالفه اتحير
يالــجـــبريل گــــدامــــك .. يطـلـع كلـش ازغير
الناس اتسير اعله الـناس .. وانتـه الربك اتسير
يالربـك فاتحــلك بـابه
------
الناس اصناف ياحيدر .. لكــن انتــه صنـــفك غير
يمسوي للفقره اجيوب .. وتارس حوصلة كل طير
خيـر الوادم اشـــويون .. وانته يفيـض چفك خير
يمشبع الوادم ماعونه
----
يقيسونه علي اويه افلان .. وانه ابنبــي ماقيسه
عيسى وچيه حيه الميت .. الوادم عاجه ابعيسى
علي ولومــات هذا الكون .. يحيـه لمـن ايجـيسه
ويــرد الكون بعافــيته
------
حيدر تركي الكربلائي
الشايل علي بعيونه
الـجنه اله مضـمونه
والناس باچر بالحشر مــتأكد ايحســدونه
--------------------
باچر .. من ايحيـــن ميــعاد القيامه
باچر .. الما واله عـلي يحس بندامه
جبريل يوم الآخره يوگف الوادم بالسره
ويگول للجـنه گبل الخاتم جوازه حيدره
عريــس ويـزفونه
الجنه اله مضمونه
والناس باچر بالحشر مــتأكد يحــسدونه
--------------------
إحذر .. يامـن تبغـــض الـكرار إحذر
إحذر .. باچر عالصراط بخطوه تعثر
يامن تبعت انــته الربع صدگني مابيهم نفع
منهم ولا نستثني احد كلهــم تـره شلع قلع
البايع علي خي عونه
الجـــنه اله مضمــونه
والناس باچر بالحشر متــأكــد يحسدونه
--------------------
افرح .. يامن حب علي عاش بكيانك
افرح .. بالجــنه بـقرب حــيدر مكانك
ولـمن تطــب الجـــنه اشما تطلب وتتمنه
گلهم طلبتي بس على وبشوفته ارد اتهنه
والــمثلك يــدلــونه
الجنه اله مضــمونه
والناس باچر بالحشر متـــأكد يحسدونه
--------------------
ذكره .. بلسان اليحبه صار عاده
ذكره .. گايلها النبي ذكـره عباده
اول عشگ مـــو رابـع بگلبه اليحبه واگع
ياهو اللي قبله تصدق بخاتم هوه وراكع
وبس عاشگه يسمونه
الجنــه اله مــضـمونه
والناس باچر بالحشر متأكد يحسدونه
--------------------
صرخه .. نوصلــها لـعد سابع مجره
صرخه .. كنزنه مو فحم نكنز الدره
الغالي يحب الــغالي وبالــثمن لا مــا نبالي
نحچيها ما مضمونه بس علي احنه نوالي
منوالي واحد دونه
الجنه اله مـضمونه
والناس باچر بالحشر متأكد يحسدونه
--------------------
وحده .. كلـــمته وابـــد ماتـــرهــم اثـــــنين
وحده .. احنه اكثر شخص نهواه ابو حسين
والعـــايش بـوهـــواسه بالطــوفه يضرب راسه
واحدنه من گد العشگ يشــتم علي ويه انفاسه
الروحه بعلي مجنونه
الجنــه الــه مضـمونه
والناس باچر بالشر مــتأكد يحسدونه
--------------------
حيدر تركي الكربلائي
حيدر تركي الكربلائي:
لمولد امير المؤمنين
.
.
.
انـه شـيعي وأفخـر ابشيعيتي
اموقع وباصم علي ابجنسيتي
مولاي علي .. مولاي علي
____
والله ياهالـناس مـو صدفه القضيه
والـدي رافــضي وامـــي رافـضـــيه
دمـي لـو مابـي عـلي حامـي الحميه
انــه والمــيت يحســبونـــي ســـويه
الهالسبب اني اشـعر ابحريتي
اموقع وباصم علي ابجنسيتي
مولاي علي .. مولاي علي
____
انــي مــا اتـــنازل وانــســه قضـــيتي
حيـــدري ولا ما ازل عــن حيدريــــتي
صيـتي واصـل للنجـم معـروف صيتي
على طولي امشي علي الخاتم هويتي
وارفض اليتدخل ابشخصيتي
اموقع وباصـم علي ابجنسيتي
مولاي علي .. مولاي علي
____
رايد احچي وگـولو گـال افلان كلمه
الهــوه الميـمر بالنجف ماريــد اشـمه
النفـس لـو مــابي علــي اعـتبره نقمه
ولـــو تشــمه ريــتـي مشكــولــه ذمه
وابـــــد ماتتـــقبله نفســــيتي
اموقع وباصم علي ابجنسيتي
مولاي علي .. مولاي علي
____
انــه مــن الطين تـكويـني البــدائي
اتــرابي من النجــف وهــذا انتمـائي
المـاي بــي الله العــجــني كـربـــلائي
وصرت شيعي رافضي الحيدر ولائي
بالــدمه كاتــب عـلى ناصيتـي
اموقع وباصم علي ابجنسيتي
مولاي علي .. مولاي علي
____
شيــعي انــه وگـصتي بيـــها عـلامه
وطــول عمري عايـش ابعزه وكرامه
بالحــشر كلــمــن ينــادونه ابـأمــامه
وراسي اشيله بحـيدره يــوم القيامه
ما اخــاف واحلــف ابعــافيتي
اموقع وباصم علي ابجنسيتي
مولاي علي .. مولاي علي
____
مــالي شغــله باليـــلــوم ومـــا ابـــالي
النـجم ربـعي لان امـشي وراسي عالي
الماوصل طولي بـقه ايحاچي ابخيالي
الـــف هنـيالــه الـــذي الحـيـدر يــوالي
ملك انـي ابمذهـبي ومـلكـيتي
اموقع وباصم علي ابجنسيتي
مولاي علي .. مولاي علي
____
حـتلو بالعوز اخـلـص عمـري اني
غـير مـذهب حيدره ماريــد ثاني
خيروني وخـيرهم يزحـف اجاني
ما ابــدل رافضيتي البيـها امـاني
بهاي ماتــسمح الــــي تربيـتي
اموقع وباصم علي ابجنسيتي
مولاي علي .. مولاي علي
____
حيدر تركي الكربلائي
يرب اشهد الي .. اموت اعله علي
امير المؤمنين
______
اميري . ومصيري . ومجيري .. علي العاش بضميري
لگــاني . اعـــاني . احتـواني .. علي بعطفه اشتراني
علــي أشــر عـليــه وگــال اريده
فتحلي ايده واحس الجنه بيده
صرت حــر يـوم ضماني العبيده
العيشه وي علــي عيـشه رغيده
اويه الانفاس الولي .. امــوت اعله علي
امير المؤمنين
---------------------
امامـي . وغـــرامي . وهــيامي .. بعلي يعجز كلامي
شوصفه . وشنصفحه . واعرفه .. جهنم بسمه تطفه
بالــذر وقعـتــله بذنـــي اديه
وعلي وقعلـي رائـسا بالهويه
گتله احسبني اعمه وگود بيه
المهم ياعلي بس ترضه عليه
الحــبيب الاولي .. اموت اعله علي
امير المؤمنين
__________
يجنه . ومحنه . الحملنه .. قليل وشحجي عنه
يماجد . يواحـد . يخــالد .. يمــن بالگلـــب گاعد
ترسني حب علي من جدمي للراس
وگـمت اشتـــم عبــيره ويه الانفاس
المــاهام بعلــي خــــسران يانــــاس
نعــم واستـــاذي ابهالعـــشگ عباس
العلي فدوه هلي .. اموت اعله علي
امير المؤمنين
------------------
صلاتي . ونجثاتي . بحياتي .. علي مولاي اغاتي
بدمــائي . انتــمائي . ولائـــي .. ومن اعدائه برائي
الماعنده علي ماحسـبه صاحب
الصحبه مستحب اوعلي واجب
وابوس ايـده البأيده علي كاتب
انياله الربعه مـــن اهل المواكب
نعـــم ياسائلي .. اموت اعله علي
امير المؤمنين
____________
بكياني . مــعاني . وحياني .. علي المامثله ثاني
يشدني . ويمدي . ويودني .. ومثل ولده يعدني
بعـيونه علـــي الوادم سويه
ماعنــده فرق حامي الحميه
احــمد الله كل صبح ومسيه
الجعلني واحد امن الرافضيه
الگلب بيه ممتلي .. اموت اعله علي
امير المؤمنين
_________
مجيبي . وطبيبي . ونصيبي .. وضوه عيوني وحبيبي
هـــوائي . ودوائي . ورجائي .. ويـضل بســـمه نـــدائي
علي باب الله بــابه ومايـــسده
اليتعـــنـــاه خايــــب مايــــرده
اجيت ابابك اطلب طلبه وحده
الوبا عن شيـعتك ياعــلي ابعده
كوورونه يبو الحسنين ابعده
ونــدائي يعــتلي .. اموت اعله علي
امير المومنين
---------------------
حيدر تركي الكربلائي
شهادة الامام الهادي ع
.
.
.
خلصت عمرك بعيد .. لشوكت تبقه وحيد
لشوكت تبقه وحيد .. خلصت عمرك بعيد
يمـته يالمـهدي تجيـنه انـادي
وتلطم اويانه المصاب الهادي
لشوكت تبقه وحيد
___
كلشي گال . بس تعال . حتى باب الجامع . صاح مدري اشسامع
بس تعال
والله طال . إلـوصال . يـبو صـالح ويـنك . فـدوه فـدوه العينك
إلوصـال
امروتك يالمهدي بس مر بينه
عجــل الله اشــكـثر نـــاديــنه
علي الهادي امصـيبته اتـأذينه
ابمحنته انواسيـك وتـواسـينه
نلطم اعله الهادي كون .. وانــته ويــانه تكون
انــته ويـانه تكــون .. ونلطم اعله الهادي كون
عالاقل حزنـك نشـوفه البادي
وتلطم اويانه المصاب الهادي
لشوكت تبقه وحيد
___
ياسلام . عالامام . ايصيح حتى المنبر . والخشب يتفسر
عالامـــام
مايـنام . امن الهيام . حتى ذب اعگاله . وماكو واحد شاله
امن الهيام
مـرت اچـم فاطميه وعـاشر
وهوه يالمـنتظر ليـك ايناطر
بلكـي بمصاب الامـام العاشر
اليوم انته اتمر عليه لو باچر
وتدخل ولابس سواد .. تلطم اعله ابن الجواد
تلطم اعله ابن الجواد .. تـدخل ولابـس سـواد
ندري فگده اعليك لا موعادي
وتلطم اويانه المصاب الهادي
لشوكت تبقه بعيد
_____
بالحنان . بكل آذان . انشيل احنه اچفوفنه . بلكي انته اتشوفنه
بكل آذان
هالزمان . ابيا مكان . كــــل حسيــنياتــــنه . رددت كلـــماتـــنه
ابيا مكــان
تبچي لغيابك شكو احسينيه
تگول يمته المهدي يلطم بيه
تريد بسم الهادي منـــك جيه
بـيها تحــيي الفاجعــه ليــليه
الهادي لمن سمموه .. ندري گلبك صوبوه
ندري گلبك صوبوه .. الهادي لمن سمموه
انريد نحچيلك على المتمادي
وتلطم اويانه المصاب الهادي
لشوكت تبقه وحيد
___
الانتظار . والله نار . اشگد رفعنه ايدينه . للفرج تدرينه
والله نار
يامنار . البذار . ايصيح حتى الوادي . الموته كلها اتنادي
الـــبذار
الدنـيه كــلها بغيــبتك مذبوحه
اعيون ظلت عالدرب مـشبوحه
اويانه جدك علي يمـته اتنوحه
چي بني العباس خطفت روحه
من تجــينه للعزاء .. تجي وياك السماء
تجي وباك السماء .. من تجــينه للعزاء
مو قليل الـعلـى جــدك سادي
وتلطم اويانه المصاب الهادي
لشوكت تبقه وحيد
___
بالدعاء . وبالرجاء . لشوكت نتوسل . بها الوضع هم تقبل
بالرجاء
هالبكاء . مو رياء . ادموعنه النجريها . انتـه بــس تدريها
مو رياء
والبعد ماينحــمل وانته ادره
نقسم اعليك ابدمـوع الزهره
نحيي ويــاك العزه ابــسامره
يم علي الهادي نجـيم العـبره
اباب سرداب المغيب .. انعزي شخصك يالحبيب
انعزي شخصك يالحبيب .. اباب سرداب المغيب
انجيب ويانه الجـبل والوادي
وتلطم اويانه المصاب الهادي
لشوكت تبقه وحيد
___
حيدر تركي الكربلائي
مولد سيدة النساء
.
.
.
يازهراء .. انـتي شمـسنه الـطالعه
يازهراء .. يارحـمة الله الـواسـعه
يافاطمه
______
رحمه .نعمه . انتي . صرتي . يافـاطمه مـن نـور
ابدع . اجمع . نوره . بصوره . ماموجوده بالحور
سبحان الله / صاحت ارضنه والسمه
سبحان الله / سبحانه خـالق فاطـمه
يازهراء .. باريـنه نـورچ صــانعه
يازهراء .. يارحمــة الله الواسعه
يافاطمه
_______
صحــنه . حــبنه . الفاطـم . لازم . كـلها اتـعرفه هالناس
نكتب . هالحب .اسمه . ورسمه . ابماي الورد والياس
والله والله / يافاطمه وهذا قسم
والله والله / الغـيرچ فلا گلنه نعم
يازهراء .. والــي يـضد انقــاطعه
يازهراء .. يارحـمة الله الـواسـعه
يافاطمه
______
الله . خــله . اســمچ . رســـمچ . بــي قرآن وايات
كوثر . جوهر . ظاهر . طـــاهر . بكتــاب الكرامات
قرأن قرآن / يافاطــمه وكــلچ سوَر
قرآن قرآن / والماقره بشخصچ كفر
يازهراء .. الـباري كتابـچ واضـعه
يازهراء .. يارحـمة الله الـواسـعه
يافاطمه
______
استبرق . اشرق . لامع . ساطع . هذا النــور محلاه
الوالــد . ساجد . ينظر . يشكر . مـن فـرحـــته لله
فرحان فرحان / شايل بديه جنة عدن
فرحان فرحان / من حقه گلبه ماسكن
يازهراء .. وچـفوف رافـع بالدعه
يازهراء .. يارحـمة الله الـواسـعه
يافاطمه
______
الجنه . النــه . نزلت . وصلت . رحـــمة رب الاربـاب
فرحه . نفحه . منجه . بهجـه . بيــها الفرح ما خاب
ويانه فرحان / يافاطـمه روح القــدس
ويانه فرحان / نـور الكواكب والشمس
يازهراء .. انتي الانـوار السـاطعه
يازهراء .. يارحـمة الله الـواسـعه
يافاطمه
______
نفـرح . نصدح . انـور . ازهـر . وجــهچ يم الحسين
واحنه . صحنه . ونقره . زهره . شعشع نور السنين
ماشاء الله / بالجنه لا ما نفـترض
ماشاء الله / والجنه نزلت للأرض
يازهراء .. للخير صـرتي الجامعه
يازهراء .. يارحـمة الله الـواسـعه
يافاطمه
______
تمت والحمد لله
حيدر تركي الكربلائي
لميلاد الزهرء
.
.
.
زهرا يازهراء .. مدد زهرا يازهراء
زهرا يازهراء .. مدد زهرا يازهراء
------
ياباء البسـم الله .. وياســر الاســرار
نعم ياسر الاسرار
المقياس ابحبچ صار .. لوجنه لو نار
ابد لو جــنه لو نار
ياديني / وتدريني / عبد الزهره امسميني
ومو مره / يالزهره / مـــن اعــدائچ اتبـره
وبعناد الاعداء .. مدد زهرا يازهراء
--------
گالولي اتغالي اهواي .. ولا مـــا ابالي
بحچيهم ما ابالي
ابحبي البنت المختار .. الهادي مثالي
بلي الهادي مثالي
من الذر / للمحــشر / هالــحب لامايتــغير
انتي ادره / بهالبذره / الكم باصم بالعشره
يا أم الحوراء .. مدد زهرا يازهراء
--------
حبچ يم الحسنين .. يجري اويه دمي
احس يجري اويه دمي
گالو حچيك ممنون .. گلــت الهم امي
الـــزچـــيه هـــيه امـي
بسماتي / ودمــعاتي / منـــذورات المولاتي
القدسيه / الـــحوريه / ويــا ام الانـــسانيه
ياخير الاسماء .. مدد زهرا يازهراء
--------
مولاتي الكل انســان .. مامـــد اديــه
قسم مامـد اديه
وبس من عندچ جديت .. نظره عليه
ردت نظره عليه
رحميني / وفقيني / ودليني بدرب احسيني
للخدمه / وهالنعمه / وذايـب خليني اباسمه
وبيديچ الايحاء .. مدد زهرا يازهراء
------
يامولاتي اتعرفين .. وتدريني واضح
شخص تدريني واضح
لامن اهــل الاطماع .. واهل المصالح
ولاعندي مصالح
مو منه / امن اتعنه / واخــــدمكــم مو للجـنه
رحماتچ / ومرضـاتچ / اهواي احتاج الدعواتچ
والهذي الاشياء .. مدد زهرا يازهراء
------
خدمتكم يالزهراء .. الى الـباري الوسيله
نعم هيه الوسيله
والوالكم ويطــيح .. محبـــتكم تـــشيله
اذا يوگع تشيله
من يعثر / عالمعبـر / اسم الله ايناديله الكوثر
والشامت / ضل باهت / ومتحير باقي ساكت
وبهذي الاجواء .. مدد زهرا يازهراء
-------
حيدر تركي الكربلائي
مولد الزهراء ع
.
.
.
تسبيحة املاك السمه .. فاطمه فاطمه
والدنـيه بيـها هــايمه .. فاطمه فاطمه
-------------------------
نور السماوات السبع من فيض عصمتها
ماتنـحصي ومـاتنحـسب والله كــرامتها
الله ومحــمد وعـلـي ايـعـرفـون قيمتـها
كل الوجـود الفاطـمه ورهـن الاشـــارتها
اسرار الله .. بالزهراء
انــوار الله .. بالزهراء
اذكـار الله .. بالزهراء
بالعالمه
-------------------------
المايحب بنت المصطفى ماينحسب تعبه
لــو عمـره خلص بالصـلا والصوم بالكـعبه
الماعـرف مــعنـه فاطــمـه لا ماعــرف ربه
صعبه يجي ابيوم الحشر يـم النبي صعبه
واسبـاب الله .. بالزهراء
وكـتــاب الله .. بالزهراء
وحساب الله .. بالزهراء
والحاطمه
-------------------------
هواي ابأحاديثه حچه ومضمون هادينه
اليــتبره مــن ام الحـسن يتـبره من دينه
صحـنه عهـدنه يالنـبي بالـدمه اموقعينه
عاهـدنه بالـذر فـاطمه وفاطـمه تــدرينه
سبحان الله .. بالزهراء
برهــان الله .. بالزهراء
عنـوان الله .. بالزهراء
يا لايمه
-------------------------
كــل الوجــود الها انخــلق مــَنبالغ ابهايه
واليعترض خـل يعترض كل واحد ورايه
بالنســبه النــه فــاطـمه آيــه وتــضل آيه
احچايه حچيناها وبعــد منعيد الحچايه
آيــــــات الله .. بالزهراء
كلـمـــات الله .. بالزهراء
اعجازات الله .. بالزهراء
متوالمه
-------------------------
املاك السمه والبالسمه ايسبحون يوميه
بســم الامـيره فاطـمه الراضـيه المرضيه
شيعيه امـلاك الـسمـه والـحــور شــيعيه
خـل تسمـع وتشـبع قهــر كــل الــوهابيه
ألاء الله .. بالزهراء
ماشاء الله .. بالزهراء
اسماء الله .. بالزهراء
متلازمه
-------------------------
اليجهل قدر بنت النبي هم ينجهل قدره
اشما يعتـذر يــوم الحشر ماينـفعه عذره
ياويلـه يالمـاترضـه عنــه فاطـمه الزهره
هـذا مـؤكد بالحـشــر مــيؤس مـن امره
مـرضـات الله .. بالزهراء
مـــعنـــاة الله .. بالزهراء
احسابات الله .. بالزهراء
الراحمه
-------------------------
تمت والحمد لله في ١٥ / ٣ / ٢٠١٧
حيدر تركي الكربلائي
الليالي الفاطميه
قصيده گــعــده
وتقرء لطــم
.
.
.
يالمنكـسـرلك ضـلع … حقـك اذا تنـفجع
اهمومـك اكبار
ابگبلـك شصار
وشسوه بيك الدمع … يالمنكسرلك ضلع
------------------------
عله ياهي التجري عينك يابو صالح هنه كثره
عالذي كسرو ضلعها وفوگ خدهه اثار سطره
لو على الداست ابصدره اعوجيه خيول عشره
بصدرك يمهدي شنغرس
بسـمار لو حـافر فــرس
ثغــرك امبــلل لــو يبـس
عله حسين اليبـس ثغره
مو عن كبر حَدبت ... چيه لهلك اتعذبت
ابگلبك الام
بكـثر الايام
شتتحمل ابهالوضع … يالمنكسرلك ضلع
------------------------------
ابكثر مامحروگ گلبك من وره باب الزچيه
صارن اضلوعك رماد الصار بمك مو اشويه
النار ما ترحم يمهدي واسأل اعليها السبيه
الشافت خيمها اموجره
وبالنار هــيه امـحاصره
شتسوي يالمهدي المره
وكـل اهـلها عالــوطـيه
ياهو الذي اتفَزعه … وكافلهه عالمشرعه
اتطفي الكبار
مـدري الزغار
محنتهه ما تنجرع … يالمنكسرلك ضلع
--------------------------------------
أبچي يالمكسور ضهرك والبچي لازم تدومه
واليـلومك عالبـواچي الله يالمــهدي اليلومه
السَلبو لمك فدكها حسين هم سلبو اهدومه
الــبالـسهـم چـبـده منــثلم
ضل عاري مسلوب الجسم
عالرمل مـرمـي ابــلا هـدم
والــرمــل غــيـر ارســـومه
بگد ما طعن منترس … مچوي گفاه بالشمس
ضل عالتراب
اغله الاحباب
حقه الگلب منشلع … يالمنكسرلك ضلع
---------------------------------------
يابو صالح عله اهلك حـقك اتزيد النوايح
خلص گلبك عالزچيه لو عله البطف ذبايح
المثلث صاب چبدك لو المحسن هوه رايح
حرمـله مـاعــنـده عقـل
لمـن رمــه نحـر الطــفل
نحـره زغير اشيحـتمل
هالسهم چن بيك طايح
بگلبك يزيد الالم … كل ما سمعت بسهم
تنحني شبيك
چــن يـأذيــك
من حرمله منصدع … يالمنكسرلك ضلع
----------------------------------
الدنيه ماشالت الشلته عفه صبرك يابو صالح
حزن امك بيـك ياكـل عله وجهك صار واضح
يا جرح وتعـيش انـته ابهالزمـان الحيل مالح
بجــروحك اشــــسوه المــلح
عالـــراحت اويـــه الــمنــذبح
چيه تحچي هيه اويه الرمح
بيــها يتــشـمــت الــــذابــــح
بوجهه شماته شكثر ... لمن يطـگها الشمر
زورگ ايــدين
اخت الحسين
عمتك تره تنوجع … يالمنكسرلك ضلع
--------------------
لخادمكم حيدر تركي الكربلائي
الفاطميه
.
.
.
الصبر شـَيع صبر .. ودفن روحه ابگبر
عـنده عـاشـور
وگـلبه مكسور
علـى الزهـره الكـسر
_______
قالع الباب .. يمشي محني .. هاي مامعقوله
هايسـلمان .. هــايـبــو ذر .. اشعجب اتچوله
چـنه فـاگد ضـلع من اضلوعه
اشـبي يـون اونـَـته مسـموعه
علـي يمكن مـو قلـيل امصابه
هـاي اول مـره تجـري ادموعه
المصيبة فاطمه .. بچت حتى السمه
اليبچي معذور
گـلبـه مكــسور
علـى الزهـره الكـسر
_______
شايل الكون .. على چتفه .. وجابه حتى ايدفنه
حيله مهدود .. وعلى هالحال .. عـلي لا مــاشفنه
علـي مـن گـد مـا بچـه وتـدرونه
طاحت اعلـه الگاع حتى اعيونه
هـوه مـثل الزهــره طلـعت روحه
عـلى حــزنه ونـوحـه لـتلـومــونه
لون حيله جبل .. المصيـبتها هـدل
اعله ام البدور
گـلبه مكــسور
علـى الزهـره الكـسر
_______
هذا حيدر .. الجـندل ابطال .. ومـارجــف دلاله
طالع ابليل .. ويمشي حافي .. وشو يجر بذياله
ابـروحه حيدر هـوه شــَيع روحه
دفـن كلشي وبقت بس اجـروحه
مـن يمــر اسـم الـزچــيه ابحيدر
على اجروحه چن تطيح املوحه
واذا هاد الجرح .. يـفز امن الملح
الجرحه مخطور
گـلبــه مكـــسور
علـى الزهـره الكـسر
_______
للــعـــزيــــزه .. بــده يـــحــفر .. گبــر ابنــص گــلبه
ايطش التراب .. على راسه .. وحالته اشگد صعبه
مــن نــزل رايـد يـوسـد الـزهره
ابخدها شاهد أثر چف السـطره
علـي راد ايمــوت ذيــچ الساعه
هوه من حس ابصدرها وكسره
انگطع عنه النفس .. علي وريجه يبس
ابنص الگبور
گـلبه مكسور
علـى الزهـره الكـسر
_______
هال الاحساس .. عالزچيه .. اندفنت ابأحساسه
ولــذالـــــك .. ما نســـاهــا .. عايشه اويه انفاسه
عايشه ابنص صدره ضلت نارها
چــان يتــنفــس آلـــم بســـمارها
الهوه عگب الزهره يـلچم صدره
فاطــمه من يــوم عــافت دارها
علي اتجرع محن .. ابمصاب ام الحسن
حزنه مـذكور
گـلبه مكسور
علـى الزهـره الكـسر
_______
تمت والحمد لله
خادم الزهراء حيدر تركي الكربلائي
ميلاد السيده زينب ع
.
.
.
الأميرة الخـدر .. متحير الشـعر
ابميلادها ابميلادها
زينــب
_____
چان راس السمه امفرع لچن لابد بالسحاب
وزينـب ابيـوم الولاده للـسـمه جـابت حجاب
هــيه مـن گــد ماكـريـمه وزعـت مــنه ثـواب
اتحجبت بحجـاب زينب حتى ايات الكتاب
حجاب ام الستر .. امن الجنه بي عطر
ابميلادها ابميلادها
زينــب
_____
الرايد ايـوصف خدرها وَحـي رايـدله وسـور
( أنــا انـزلـنـاهـا ) عــفـه زيـنب الـكـل الـبـشر
ماتوصفـها القصيده الـشـعر لـو ظـهره انكسر
النبي بس يعرف قدرها وفاطمه وفارس مظر
شعرنا لو يجف .. أبد ماتنوصف
ابميلادها ابميلادها
زينــب
_____
الله كاتـب بيـده زيـنب كـون كـلـنه نـفـتهم
ولو سمعنه احـنه اسـمها انگول الله للاسم
للــعـلم مــحـد قـراهـا هالقـصــيده للــعــلم
والوحـيد الــي عـرفـها ابـو فاضل والنــعم
عرفها ومن عرف .. أميـره للــشـرف
ابميلادها ابميلادها
زينــب
_____
يالله يامـريـم أنـزلـي البيـت فاطـم حـافيه
(واخلعي نعليكي) يمكن هسه زينب غافيه
(أنتي في البيـت المقدس) لاتفـز الصافيه
اقري يمها انجيل عيسى كون بـس ابقافيه
على طور السمه .. هـديه الـفاطمه
ابميلادها ابميلادها
زينــب
_____
لازم اليـذكــر اسمــها كــون يتــبع مــايــلي
ايسمي بسم الزهره امهالو بسم حيدر علي
الكـون كله تحـت امـرها والهـا گـال اتدللي
ابيـوم مـيلاد الاميره الفـرح صـوته يعتلي
الفرح صوته اعتله .. هله ابزينـب هله
ابميلادها ابميلادها
زينــب
_____
امن الفرح هاللـيله حـتى الحور ضلت ساهره
امن السماء اصفوف اجت ابابها ولزمت سره
انشوف زينـب اسمـح الـنه امروتك ياحيدره
حقـك وخـايف علـيها جـوهره وبـت جوهره
يحق لـك يا اسد .. تضمها امن الحسد
ابميلادها ابميلادها
زينــب
_____
حيدر تركي الكربلائي
الدفع باب الولي خل يحسب احساب
خــلــف الـبـاب حـيـدر قــالــع الـبــاب
لــجـل الله ونبـــيه
علي حامي الحميه
تـَقـيـد بــالــوصـيه
قالع الباب
______
النسه نفسه واجه وجاب الجماعه .. ماعنده عقل .. مافكر عدل
بالله امـنــين اجـته هــالشـجــاعه .. چا وينه قبل .. مافكر عدل
اذا هــوه شـجــاع وچــان يـگـــدر
شـو ضم راسه ليش ابـيــوم خيـبر
خلف الله اعله ابو الحسنين حيدر
قلــع باب الحـصــن ســـواه معــبر
علي من چان هوه بأول الجيش
انـته بالاخــير وتـرتجــف لــيش
الرجوله اعظم قضيه
علـي حامي الحــميه
تـَــقيـد بــالــوصـــيه
قالع الباب
_______
اتَصفح وجــه تاريخ الاحزاب .. من ناده ابن ود .. ياهو المستعد
ولا واحد تنفس سكته الاصحاب .عليه محد يرد . ياهو المستعد
والخــنـدق نــعــم تـتــذكــره زيــن
من صاح ابــن ود وين الـزلم وين
جيـش المـسلمين اتـگـول مـيـــتين
بيكم بخت گاعد چان ابو حسين
يالگاصــد البيــت الطاهــره اشـبيك
تسكــت لو انــسولف عــلى ماضيك
مــعــروفه الـهــويه
علي حامي الحميه
تــَقيـد بــالــوصـيه
قالع الباب
______
يالصــدگت روحــك بالله يــَواش .. لالاتــنــدفــع .. انته والربع
ابمكان النبي ياهو الظل بالفراش .. چنتو ابيا وضع .. انته والربع
اصـلاً انــتو ماچــنتو بالاسـلام
ابذاك الوكت اتـعبدون الاصنام
على بـفراش ابن عمه النبي نام
وأبد بسيوف اهلكم چان ماهام
احـذرك يامن احـدودك تعــديت
تره بالبيت حيدر صاحب البيت
وميـــهــم بالمنــيه
علي حامي الحميه
تـَقـيـد بــالــوصـيه
قالع الباب
______
اريد اسئل الجايب قنفذ وجاي .. وين المرجله .. بهاي المسأله
علي لــو گــالك تتــقابل اوياي .. شتجاوب إله .. بهاي المسأله
شــتسـوي اذا الــفــقــار شــفـــته
انطلــعه الحچي لو لا يبقه سكته
الـروه وقــعة أحد گــال ابعهدته
ثلــــث تيام ممشـــه شارد انته
من تالي وكت تـتمــرجل اتــريد
تره ميــلوگلــك روح العب ابعيد
عـــن بيــت الزچيه
علي حامي الحميه
تـَقـيـد بــالــوصـيه
قالع الباب
______
علي لو ما اموصه بالصبر چان .. ميجرؤن ابد .. بس منطي وعد
ابكثر مازعل طَـلع گلـبه دخـان .. گام ورد گعد .. بس منطي وعد
سمـع اصواتـهـم مـن حرگـو الـدار
اعيـونه اتجـادحـت منهـا طـلع نار
سيفه ايــسلـه لــو لا بقــه محــتار
وصبر بأمر ابن عـمه النبي المختار
علي لو ما اموصه بهذا السكوت
ماظلــت زلــم لاظــلــت ابــيوت
يگــلــبها الــوطــيه
علي حامي الحميه
تـَقيـد بــالــوصـيه
قالع الباب
______
تمت والحمد لله
حيدر تركي الكربلائي