11030
لنشر قصائد مناسبات اهل البيت
لشهادة زينب ع
.
.
.
ليــالي زينـــبـيه .. وسوالف عـالسبيه
خلي الظلوع والدموع وقف لم الخدر
_____
الدمعه اذا مو على زينب المن اتبديها
يالــردت تبــچي عليــها كــربله سويها
لـكن انـته مـن تـسولف كـون ماتاذيها
الكلمـه لبـسها عبـايه لـوردت تحچيها
بچي هاي المسيه .. وسوالف عالسبيه
خلي الظلوع والدمـوع وقف لم الخدر
_____
انيـاله كلــمن يلــگه واحـد عالـخدر ينعاله
اليبچي ويموت اعله زينب من الف هنياله
هــذا شمــسوي العــليــهـا محــتــرگ دلاله
ارزقنــي اللـهــم حــرگـه عالحــسـين اوآله
يكون الحرگه بيه .. وسوالف عالسبيه
خلي الظلوع والدموع وقف لم الخدر
_____
من يمر طاري اسمها الصخر تجري اعيونه
شـلون حـال المهدي هسه والله لو تدرونه
صعبه يسمع خدر عـمته العـسكر ايسلبونه
وكـلفه يسـمع مـتن زيــنب صار ازرگ لونه
تجرحه اسياط اميه .. وسوالف عالسبيه
خـلي الظلــوع والـدمـوع وقف لم الخدر
_____
المثــل زيــنب تــره صعــبه تــنــوخذ مگـيوده
اتشــوف ابو فاضل اخــوها مگطـعات ازنوده
الشمــر گــال الــهــا كفــيلچ چــبدته مــمروده
وذاك يم الشاطي اخوچ السهم غافي ابجوده
هوت فوگ الوطيه .. وسوالف عالسبيه
خلي الظلوع والدمـوع وقـف لم الخدر
_____
كـربله وزينـب سـوالف هــيه نفس الجمره
سالــفة جـثه سلــيبه مــوذره اعلــه الغــبره
وحــرمه بـين النار تركض والزلم متحـظره
اتريد بخيول اعوجيه حسين تسحگ صدره
اليحس بالاعوجيه .. وسوالف عالسبيه
خلي الظلـوع والدمـوع وقف لم الخدر
_____
كلــشي يبچــي عالســـبيه ونــار گلـبه تلهب
والــي مامــتعذب الهــا بدنـــيـــته يـــتعذب
الارض تنحب على اسمها والسمه هم تنحب
فــاطمــه ينــزل دمعــها لـــو گلــت يازيـــنب
المدامع فاطميه .. وسوالف عالسبيه
خلي الظلوع والدموع وقف لم الخدر
_____
تمت والحمد لله ١١ / ٣ / ٢٠١٩
حيدر تركي الكربلائي
لامتـكـفي الگـبور .. تدفن حزن عاشور
يزينب يزينب
***
يالمــن حزنچ اونــچ خـجل يعـقوب
يم حيل الرچيچ ويـم صــبر متعوب
لون گلبچ حديد امن الطفوف يذوب
يخت الذي راسـه عالــرمح مـصلوب
شلون ام گلب مكسور .. تــدفن حزن عاشور
يزينب يزينب
***
يالشلتــي المصــيبه الابــد ماتنشال
ثگيله ولوهــت تهــدل امتون اجبال
حزنــچ يعــجز ايــشــيله الـف رجال
خصوصا من ندهتي وما اجه الكفال
صعبه الخيها منحور .. تــدفن حزن عاشور
يزينب يزينب
***
الباب ابمــوتچ انسد بس فتح بيبان
يالمـوتچ قضــيه مـــو كـــلام السان
غفت عيناچ بــس حزنچ بقه سهران
على الضل عالتراب مســلب وعريان
هيه الشافت انحور .. تدفن حزن عاشور
يزينب يزينب
***
كــل الشيعــو جــثـــمانچ ايصـــيحون
دفنــچ مو ســهل يحــظر كــفيلچ كون
يالشفتي المـــصاب الماتــشوفه اعيون
ابراس احسين شفتي الوادم ايهوسون
والدمعاتها اتفور؟ .. تدفن حزن عاشور
يزينب يزينب
***
المثلـچ بيه حزن اهله يدفنوه وين
يمخجله يـزينب دمــعتچ كل عين
اهل الشام بيـــچ اشــسوو وتبچين
هلگد مابچيتي بچــه راس احسين
گلب الگاع مفطور .. تدفن حزن عاشور
يزينب يزينب
***
حيدر تركي الكربلائي
اربيه عـين ام عـون ويلــي اربيه
امتـــانيه خـــوانـها المـــســـــبيه
***
امــتانيه وشـمتانيه وبيـــها جروح
عمت عيني امـن الطبگ لسه تنوح
بيها روح شـــلون زينب بيهـا روح
الشـــافتـــه ينـــرادلـــــه امـكــانيه
***
الشـــافته يـنـرادله حــــيل وعـــزم
ابجسم اخوها اتطش الخيول وتلم
لازلـــم عـــدهـــا وتــرد عنــها الزلم
حايـــره ابهـــالـــموقـــف العــــلويه
***
مـــوقف الــــزلمه فـــلا يتــحمله
نــار خيـــل وزلــم ترســت كربله
اهـــنا شـمر تـندار تلــگه حــرمله
نـــاس وبـــلا ذرة انـــســـانيـــه
***
ذرة انســــانيه ماعــــدهم اكـــيد
أم شـهيد وعـمت واخــت الشهيد
تــنوخذ مســبيه فوگاها اليـــزيد
الحـچـــي يوجــــع اولـــه وتاليه
***
الحـچي يوجع للـــتروح امـيـسره
مـــره وشتـــسوي بـلا والي المره
صاح شامت وين راعــي الگنطره
ابشــاربي مـــوگال زيــــنب هـيه
***
ابشاربي مــوگال چالــيش اعتـــذر
ليش مافز غافــي لـــسه اعله النهر
انسبت اخـته روحو وصلوله الخبر
انتخــت بـس ما گال ابـــد مگضيه
***
انتخـت بس للاسف مــاعدها ولي
بيتــها امــن اخوانهـا اصــبح خلي
دنــت ساعة مـوتها وصاحت علي
وســفه زينب بـــت علــي منـسيه
***
وسف زينـــب تنحـچي الحـچايه
ضـــاله ابـــلا ســــنــد لاتـچـــايه
المـار بيـــها مـــو قلــــيل اهوايه
وطـاري اهـــلهـا ويـــلي ياطاريه
***
حيدر تركي الكربلائي
مقدمة عزاء
شهادة السيده زينب ع
.
.
.
زيـنـب ابـگــد مابـچـت لـخـوانـها
شيبت حتى السمه امـن احزانـها
يازينب .. يازينب .. يازينب
___
مـن كـثـر دمـعـات زينـب عالــوجن
شـيدت بـخـدودهــا بـيـت الــحـزن
مـثـل زيـنــب مانـظــن احــد يــون
كربــلـه مــاطـاحـت امــن الـسـانـها
يازينب .. يازينب .. يازينب
___
الدنـيه تـصفن لـو عـلـى زينـب تـمر
وكـل حـزنهـا ماوصـل عـشـر الـعشر
الدمـعه من دمعـات عـيـن ام الخدر
اتـظـعـظع الدنـيه وتـــهـز اركــانــها
يازينب .. يازينب .. يازينب
___
اعيون زيـنب چـانت ابگـد ماتسيل
چــوت ابدمعــاتـها ظــهــر الـهــزيل
وبالاخص من يـنذكر طاري الكفـيل
يـنـفــجر مــن عــينــهــا بــركــانــها
يازينب .. يازينب .. يازينب
___
الشمر چان ابسوطه يظربها اشكثر
وسود خلـه امتـونـها سـوط الشـمر
اتمـنت العـباس ابـو زنــود الـســمر
حـاظـر ويـنـظــر فــعـل عــدوانــها
يازينب .. يازينب .. يازينب
___
سولفــت فــوگ الـهــزل ســالـوفه
انـدار راس حســين چـان اتشوفه
اتــگلـه تقــبل بالحــبـل مچـتــوفه
زينـــب الــچــان الخــدر عنــوانـها
يازينب .. يازينب .. يازينب
___
طالــعه انه اويــاك مـن نـفـس الـعـرگ
واعـدتــنـي وگــتــلــي لا مـانـفــتــرگ
مـن صـحــت ويـنك خيمــنه تحــترگ
مــاشــفـت غــيــر الـــخـيـم دخــانــها
يازينب .. يازينب .. يازينب
___
الفاگده اخوتها عجيبه اتـشـم هوه
هيـه والمــيـت يحـسبــوهــا ســوه
الـزينـب ابـهـا الـحاله يـنـفع يـادوه
اشـيــنــف وذَبــحـو كــل ولـيــانـها
يازينب .. يازينب .. يازينب
___
جــرح عـيــنـي اشــما اســده يـنــفتح
خـويـه كـل مـاشــوف راسـك عالرمح
اسـئل الليـل اعــله زيـنــب والصــبـح
واسـئــل ابــدربـك حــبـــل ذرعــانــها
يازينب .. يازينب .. يازينب
___
الحالي شــفت العدو يبــچي والصديق
اخــتــك الــبــس الــدلال الـهـا يــلـــيق
شـلــون وي ذبـاحك اتخـلص الطــريق
ونـاگـــتي يــاخـويـه بـيــده اعــنـــانها
يازينب .. يازينب .. يازينب
___
حقـها زينـب تبـقــه تـنـعــه ومـاهــدت
اخيول عشره اتـدوس اخـوها شاهدت
الشمـر مــن شــافـتــه هـيــه اتــأكــدت
حــسيــن مـيــرد وزمـــنـــهـا خــانــهـــا
يازينب .. يازينب .. يازينب
___
حيدر تركي الكربلائي
يهدا ثواب هذه القصيده الى روح الشهيد خادم الحسين ع
سيدكريم الموسوي
ميمر
زينب شرف زينـب صيت
زينب كــيان اهـــل البيت
سمي انته بسم العباس يامن ردت تقراها
--------
يامن ردت اخــت الگمر تطريها
ابماي الفرات احچايتك وضيها
ابشبـاچ ابو فاضـل علگ خليها
مــالك عـلاقــه بالنـــاس
سوي الي يرضي العباس
لتدور اعله الـ(الله) وتهتك ستر بت طه
-----
اترك شكو احچايات ماتتحجب
وعالمفرده المكــشوفه لاتـتقرب
ستر الله زينب بالك اتغث زينب
لاتنـدگ بخدر ام عون
اشرف مره بهذا الكون
راس السمه امفرع چان وچف زينب الغطاها
-------
زيـــنب مـره بــس بالنـــسه ماتنــــقاس
زيــــنب مـــــره لكن تحســـها العــــباس
امن اتگول اسمها حط اديك اعله الراس
اشمــا ترتفــع بالاعلام
يبقه انته اسمك خدام
والـخادم امن المــفروض اغـــلاطــه يـــتلافها
-------
عالـــي قدرها مــاتلوحـه الايــدين
شيلوحه وموقع عليه چف احسين
لا اذن بيه سمــعت ولاشافت عين
الرايد يلـوح النجمات
ماتوصل ايده لو مات
هيچ الله علـــه الحوراء ويــم النجم خلاها
-------
صح انســـبت لــكن سبــيـها مـدروس
رادت تنــور درب بيـــه ضـلمـه الروس
زينب شمس من چان حصره الفانوس
بشمس الظهر لا لتعيل
ميضمها وجه الغـربيل
تنشاف بس تعمي اعيـــون كل واحد الاذاها
-------
من حــچت بالديـــوان چـنــها القـران
حسچه وكـــلام الحـسچه رايـــد اذان
من الخجل غـــط ابــثيـــابه الــديوان
اليحــچي ولـســانــه مـــترين
انطم من حچت اخت احسين
الشاهدهــم ايحس خــرسام وتــورطو وياها
--------
احذر ذليله اتـــگــول طـــبت للـــشام
هيه السبتـــهم ماســبــوهــا الظـــلام
امن المستحه مو خايفه امدنگه الهام
والمستحه البالحوراء
ماخــذته مـن الزهراء
والدها حــماي الجار مـــن الشرف غـــذاها
-------
نتأدب اويــاها وعـليـــنه واجــب
ونخــتار بــس الذي الهــا ايناسب
البنت النبي ياناس احنه انخاطب
وهذا الحچي عن ليطول
نحچــي الكلام الــمعقول
زينب ستر رب الكون ورب الستر سواها
-------
حيدر تركي الكربلائي
https://youtu.be/2UlIKBHmuGo?si=U5nDd9xdkGoxmL1E
Читать полностью…
حزنچ يالعقيله .. ياگبر اليشيله
زينب زينب
________
يزينب گلبچ شگد بيه مواجع
يالشاهدتني بالطف المصارع
حزنچ ويــن يازيــنب يدفنوه
وشـبرين الگبــر واربع اصابع
يالدمعچ مسيله.. ياگبر اليشيله
زينب زينب
________
الحــزنــچ مــو گــبـــر يــراد ديــره
يالمـضــيعه اخــو متــروس غيـره
الله ايساعـــدچ بــس اعلــه عباس
اجيتي اوياه اميره ورحتي اسيره
ردتي اتعدديله .. ياگبر اليشيله
زينب زينب
________
المثــلچ حيـــره زينـب تـندفن وين
ومنو ايدفنچ واخوچ ابلايه چفين
حسيــن شلون اذا رايــد يــواريچ
الرمل خافنه يلچـم خنـصر حسين
والماكو مثيله.. ياگبر اليشيله
زينب زينب
________
ياگــبر اليـشـيل اهمــومچ اثــگال
ابثگل السنسله البچفوف الاطفال
مـــن صاحــو يعـمه بالــدرب ذاك
ثگيله السنسله عمـــه ومتنشال
وياهو التشتكيله.. ياگبر اليشيله
زينب زينب
________
حزنچ بحــر واكــبر مـن البحور
وماسمع بحــر شايلـــته الگـبور
رايـــدلچ گـــبر كـبر الـسماوات
يلله يشيل محنة عشره عاشور
الجرح التنتميله.. ياگبر اليشيله
زينب زينب
________
الــشــام بگلبــچ امخــلف اذيه
خاف اهـــنا يصيــحولچ سبيه
يمكنچ رجعتي البنت الحسين
عــن لاتبقــه وحـــدها رقـــيه
والماصح بديله .. ياگبر اليشيله
زينب زينب
________
حيدر تركي الكربلائي
ميلاد امير المؤمنين
.
.
.
بالكعبه ميلاده .. مـوتو يحساده
يسـتاهل علـي
بالكعبه ميلاده
***
اتقي النـــار ولو فـــي شـــقِ تمره
وطبـــعــك مــومري مــايوم تمره
بــيـت الله لــون فـــد يـــوم تمره
شوف الله اشنطه الحامي الحميه
لون طن تمر تنــطي موش شـــقه
ادروب الــي يضــد حـيدره شــقه
جـدار الكـــعبه متضــيعون شــقه
لـــو الفــــين عــام وتـــســـع ميـه
وماتنمحي امجاده .. موتـــو يحـساده
يســتاهل علي
بالكعبه ميلاده
***
أسمعــني يـجاحـــد ولــــو مره
وعليك ادري الحقيقه حيل مره
ســـويلك علــى بيـــت الله مره
تحــس ابكـــعبـة الله رافـضــيه
گــلبك وي اليحـجـــــون طـوفه
واذا مابيـه علي شيفــيد طـوفه
تدري البيت ليش انفـطر طـوفه
ثگــيل الوصـي والكـعبه رخـيه
وحتى الوحي ناده .. مــوتو يحــساده
يســتاهل علي
بالكعبه ميلاده
***
وحــق الله وسمــاواتــه وبره
علي انبره وعلــينه وجب بره
لا مــو مـن رخصتك گـله بره
الماوالــه علــي أواله ال اميه
بالــعاده عــلي لتــگله مُرَحب
الزرع بالبغض زرعه يكون مرحب
يالجاحد اســئلك عـلى مرحب
ابيــك لــو علـي الخــلاه رميه
صار الحقد عاده .. موتو يحساده
يستاهل علي
***
بــعدنه احــنه هـذولاكه بعدنه
بـعدنه انــدَوخ العـــدنه بعدنه
بعدنه انـرد الــك كل ما بعدنه
علي وننخاك لو طحـنه ابهبيه
علي لو طحنه نتمــسك بدينه
علي اشـــما ننتهي يـمه بدينه
علي الـديـــن وتديـــنه بـدينه
المـاعنده علـــي ماله تــچــيه
حي الله ابو الساده .. موتو يحساده
يستاهل علي
بالكعبه ميلاده
***
علي ابطن امه صوب البيت امه
حيـــره الكعـــبه لو بت اسد امه
هــاي النــاس امـــه وعـــلي امه
علـــي شايل بخــت الله ونــبيه
الكعبه قـــاحـــله بالضـبط كــَـبر
وعلي من صار صيت البيت كـَبر
ابمــيلاده الوحي مـن فـوگ كـبر
وتـطـش حــور الجــنان الواهليه
وفرحانه بعياده .. موتو يحساده
يستاهل علي
بالكعبه ميلاده
***
حيدر تركي الكربلائي
للغدير
علي مولا .. علي مولا .. علي مولا
---------
مـتيــم بــيــك ياحيـــدر واريــدك
وفضل تحسبني واحد من عبيدك
انــه التـــايه انــه المحـــتاج ايدك
امـــروتـــك لاتگـــــلي مــا اريـدك
اروحن وين .. يـنور العين
انـه ابليــاك .. صفر ليدين
يبسـم الله / علي
ينـور الله / علي
علي مولا .. علي مولا .. علي مولا
---------
جنوني بــيك ياحيدر جــنوني
وغيرك ماتشوف احـد عيـوني
كـ التــمــار مـــيثـم عــيــروني
وعـــن امحـــبتك ماغــيـروني
الگلـب ناداك .. اعيش اوياك
واحس بالموت .. انـه ابلياك
يحرز الله / علي
يـذكر الله / علي
علي مولا .. علي مولا .. علي مولا
----------
ادگ يوميه بابك واستـجيرك
فقير وانتـه ماتـطرد فقـــيرك
رحمتك واسعه وماكو نظيرك
اسيرك فــدوه لاتعتـق اسيرك
صحت ماريد .. اروح ابــعـيد
يتيم ارجوك .. واشوفك عيد
يعين الله / علي
يسر الله / علي
علي مولا .. علي مولا .. علي مولا
--------
عشت طاريك لحظه لحظه اني
وعن ذكــرك فلا يــغفــل لساني
طــاري الــغيـر اســد منـه اذاني
تره يكفــر الخـــله ويـاك ثـــاني
علي الاوحد .. علي الامـجد
علي ومثلك .. فلـــم يـــولد
يــــبـاب الله / علي
وحجاب الله / علي
علي مولا .. علي مولا .. علي مولا
----------
بايعتك علــي من واني بالـذر
وعشگتك والعشگ بيه تجـذر
وگبل ماگول يمـه گلت حيدر
غير انته الــذي سـاكن بالابهر
اموت اعليك .. افكــر بيــك
وحلم عمري .. ابوس ايديك
جنان الله / علي
امـان الله / علي
علي مولا .. علي مولا .. علي مولا
-------
علي وشقــيمة النـــاس التحـــبك
عـــلي وانته يــحبـك حـــيل ربك
الخليفه الصدگ بس انته نحسبك
بدربــك نبقـــه لامنــعـــوف دربك
امير الكـون .. الميقـتنعون
فلا يقدمون .. ولاايأخرون
يـأيــد الله / علي
يسيف الله / علي
علي مولا .. علي مولا .. علي مولا
-------
حيدر تركي الكربلائي
الغدير
علي اول عشــگ بـينه
علي وبس علي والينه
علي والدنيــه تــدرينه
نحبه نحبه
***
نحبه ومانحـب غيــره علــناهه
مو من هسه من الذر حچيناهه
وحـق طــه وما انــزل على طه
محبة علي نقــسـم ماتــركناهه
علي ويعـرف اسامينه
علي وبس علي والينه
علي والدنيــه تــدرينه
نحبه نحبه
***
علي نحـبه محــبه موطبيــعيه
عبيده ونفــخر بهـاي العبـوديه
نغالي أي نعــم احــنه بمـعانيه
علي فوق البشر جوه الالوهيه
عــلى اعــناد اليعادينه
علي وبس علي والينه
علي والدنــيه تــدرينه
نحبه نحبه
***
الاشـــكل عالــكلام الســابق نــسأله
علي وبالـــدنيا هذي يابـــشر مـــثله
علي القبلــه بكبـــرها ســوته قبـــله
علي وبس علي وغيره نرفض نقبله
علي ودين الله بس دينه
علي وبــس علـي والـينه
علي والـدنيـــه تـــدرينه
نحبه نحبه
***
اليضدونه بعلي چي بسمه نتغنه
كــلام ويوصـل الهم احنه نـتمنه
اختصاراً للكـلام الينــحـچي عنه
الماعنــده علي مايشــتـم الجــنه
على المـــعبـر يجــزينه
علي وبس علي والينه
علي والدنــيه تــدرينه
نحبه نحبه
***
علي اول عشــگ بگلوب احـبابه
علي مو فقط جدمه نقبل اترابه
علي خيـرالله كـله طــايح ابـابه
علي ســـر الوجود وعلـة أسبابه
علي وچــفه ينجـــينه
علي وبس علي والينه
علي والدنيــه تــدرينه
نحبه نحبه
***
أبو الساده وســبع تنـعام بالساده
عوام وساده كلهم حسبت أولاده
نطانه علــي بــس نطــانه بزياده
مراد الله ويفــوز الياخــذ امراده
نعــــم لازال ينـطـــينه
علي وبس علي والينه
علي والدنيــه تــدرينه
نحبه نحبه
***
حيدر تركي الكربلائي
مولد امير الكون
.
.
.
بس أنته الولي .. اهـواك ياعلي
اهــواك ياعلي .. بس أنته الولي
ــــــــــــــــــــــــــــــــــــــــــــــــــــــــــــــــــــــــــــ
يــشهــد ليـــه ربـي . هذا حبي .عــن قـناعه
والگـــالــو مغـــالـي . ما أبـالي . هذي اشاعه
عن علــــم ودرايــه . هالهدايه . وبأستـطاعه
من صدر امي ماخذ . هالـمأخذ . بالـــرضاعه
حبك من هلي * اهـواك ياعلي
ــــــــــــــــــــــــــــــــــــــــــــــــــــــــــــــــــــــــــــــــ
من زغري هويتك . واحتـويتك . يـا امــامي
تشهد لي يغـالي . هالـليــالــي . اتظل هيامي
ما محتاج اوضح . لو اصـــرح . عـن غـرامي
دلالي تعرفـه . مــا أوصـــفه . فـــي كـــلامي
ابحبك مبتلي * اهـواك ياعلي
ـــــــــــــــــــــــــــــــــــــــــــــــــــــــــــــــــــــــــــــــــ
مثلك ماكو ثاني . اعـرفته اني . في حياتي
شفتك يا أمامـي . فـي صيامي . وبـصلاتي
الدلالي اتخذتك . يالمحبــتك . صـك نجاتي
والبيعه اكتبــتهه . أوقعـــتهه . الحـد مماتي
منو غيرك إلي * اهـواك ياعلي
ـــــــــــــــــــــــــــــــــــــــــــــــــــــــــــــــــــــــــــــــــ
گالو انتـه شــاعر . والمـشاعر . بيـك انيـقه
وحي الشعر اجالك . وانتقالك . من طريقه
ما معـناه كلامــك . في امامك . مو حقيقه
گــلتلهــم ولائــي . في دمائي . هالوثيـــقه
اتحير سائلي * اهـواك ياعلي
ــــــــــــــــــــــــــــــــــــــــــــــــــــــــــــــــــــــــــــــــ
يالساكن عيوني . هـددونــي . چيه عرفتــك
گالولي انسه خلك . وانه اگــلك . ما تـركتـك
يامــالك حيـاتي . وذكرياتي . بروحي شفتك
أية حـُب عظيمه . الحب تديمه . من حملتك
حبُي الاولي * اهـواك ياعلي
ـــــــــــــــــــــــــــــــــــــــــــــــــــــــــــــــــــــــــــــــــ
هالحـــب الكتبته . لـــن عــرفتــه . من محـمد
دلانـي ابمحبــتك . واكتشـــفتك . والله يشـهد
غيرك ما عجــبني . ومــا جذبني . ثغـــري ردد
دلالــي ابغــرامـك . وبهــيامـــك . بـس تــوحد
ومن غيرك خلي * اهـــواك ياعـلي
ــــــــــــــــــــــــــــــــــــــــــــــــــــــــــــــــــــــــــــــ
حيدر تركي الكربلائي
اســتر وجـهي بيميني .. ويسراي
الحادي السوگهم طره .. ويسراي
زينــب ســالفه صارت .. ويسراي
المايســـون شـــي يحچــــون بيه
***
اريد اشتم عطر اهلي .. بلا شام
واريد اتغمض اعيوني .. بلاشام
مــو بفلوس شوفتـها .. بلاش ام
عــــون ولــمـــو الـــوادم عـــــليه
***
هلي اهل الشام من لمو .. شملهم
عـــلّي وعيالي المگاطف .. شملهم
دخـــلنه وساعة السوده .. شملهم
عـــيد ابيـــوم جــــابــــوني سـبيه
***
تــره اخـدودي ابـدمع عـيناي .. صلـيت
واثـــار الـظــرب بـــالصــوط .. صلـيت
عـلـى الـناگـه جلـوس الـيوم .. صلـيت
الحــبل وي كـــل فـــرض يـاكـل بــديه
***
دمـعــي اعـليـك يالكــافـل ..مينشاف
وســهـم شمـاتـك ابعــيني .. مينشاف
(ميه انشاف)
طــولـي الـچـان يـاخويــه .. مينشاف
شــــافـو طـولــي واخــذونـي سـبـيه
***
وحــق البـالحــبل خــويه .. تلو ون
إلــي اليتلــون بالمصحف .. تلو ون
الـسوط بـلـــون دم متنـــي .. تلون
مــــن گـــد الظـــرب يابـــو رقــــيه
***
عگـبك ياگـمر هـاشـم .. تره اسماي
ظلمـه وعـرفو الـوادم .. تره اسمي
زيـنـب كافلــچ گــالــو .. ترس ماي
لـــــو لا رادو ايشــــمتـــــون بــــيه
***
جرحهم مــن علـي بحسـين .. شــافــوه
وگلـبي اشــاف مـن الـشـام .. شافُ أوه
طـولــي الچـان مـاينـشـاف .. شــافــوه
افــَــزع يــــاهـــو والــــكافــــل رمــــيه
***
حيدر تركي الكربلائي
وقد كانت الامنيه الاخيره لها
.
.
.
الرحمة الله من ارحل .. اتمـنه انــدفـن عالــتل
وكل وماتعطش العين
تروي بــشوفة حسين
اتمنه اندفن عالتل
***
وي التــــل الـــي ذكـــره .. وشوغه ونايحه وعبره
امن العشره اجت تركض .. وطحـنت للاخو صدره
مــن ذاك الظــــهر لــــسه .. بگـــلبي واجــــه جمره
شـفت احســين عالغبره .. وشمر گاعد على صدره
الــتــــل هـــذا وبـــلاويه
بـــــدت مـــنـا مأســـــيه
زينــب اسمي فـوگ التل
انزلت صار اسمي مسبيه
لذلــك امـنية عمري .. فوگ التل ردت گبري
وادري اجروحي الالفين
تــروي بــشوفة حـسين
اتمنه اندفن عالتل
***
عالي التل واكـو الاعــله .. وجــه حسين الگباله
اليـــوجـه وجـــه للقــبـــه .. نــعم يــرتــاح دلاله
اريد بصحنه احـــط عـيني .. اهو يبرالي وابراله
وكل ماصار وكت اغــروب .. ابطور الخوه انعاله
وكل ماصد على الحاير
احچيــله علـــى العاشر
واگلــه الصــاير اباختك
لاصــــايـــر ولادايــــــر
حلمــي لمــــن اتوفه .. يصبح مرقدي بصفه
وروحي وتعب السنين
تـروي بشــوفة حسين
اتمنه اندفن عالتل
***
غربه الشام ماتنراد .. ماعـــدنا عــرف بيـــــها
اذكر من دخلناها .. حچي اسمعنه امن اهاليها
بنت احسين بالديوان .. لمـــن صـــار طـاريها
واحـــد گـــال للـثاني .. اذا باعـــوها نـشـريها
اه الشـــام واهـــل الشـــام
سوالفـــهم تگــول اســـهام
اذا انــــي انــدفـن يمــــهم
تـــره كل يـــوم راح انظام
عالهم والله مـابيه .. كل يومين مسبيه
لـــو يـــم المـــيامين
تروي بشوفة حسين
اتمنه اندفن عالتل
***
يلتـــم كـــل جــــرح بـــيه .. وجـرح الشام مايلتم
جــمرة شــوفــة الشـــمات .. اشد من جمر المخيم
على التل لو وصلت اهناك .. اگله بالحچـي المنظم
يــــم بـــوابــة الســـاعـات .. زينــب حيـلها اتهدم
لاعبـــاس ويـايــايه
ولافوگي ترف رايه
وينه الگالچ بحمايه
گالـو هـاي الحچايه
هاي شلون انساها .. مـــن گالو سبيناها
الطـــبت للـــدواوين
تروي بشوفة حسين
***
التـل من انـــدفن فـــوگه .. واشـتم ريحة اخواني
وعنواني اشحلاته ايصير .. بصـف حسين عنواني
وچيه بالشام صـرت ابعيد .. شــمر يـوميه يسباني
وبــكيــفه صبـــح گــــبري .. يـــسد لو يفك بيباني
غـصه وعايشه بصـدري
وســـفه بكــيفهم امــري
عگــب حسـين والعباس
الذبحـهم كافلـه الگـبري
مكتوبه نعــم تتــعب .. ومسبيه تضل زينب
وكل ودهـا يطـــبين
تروي بشوفة حسين
اتمنه اندفن عالتل
***
حيدر تركي الكربلائي
شوط كربلائي
.
.
.
يا اكبر جــرح بعـــيون .. تــاريــخ الانســـانـــــيه
يستر الدنيــا والمثلـــچ .. جريمه تروح مســــبيه
-------------
انتــي اول عـــبايه اتــروح .. فــوگ النوگ مگيوده
وانتي اعظم ستر عالگــاع .. ابزمـان العفه مفگوده
وانتي اول اسيره انشوف ..على حشمتها محسوده
الحراير من يــشوفنچ
يزينب شــو يحسدنچ
كعبه اعله الهزل چنچ
ســـتار الكعبه يازينــــب .. مـــنـچ ماخـــذ اشويه
…………
على الناگه ركبتــــي اجروح .. لا واحـــد ولاعــشره
الزغير البيـــهــن اتــــصــور .. ست اشهر اظن عمره
سافرتي اعله سچت موت .. ويلي اشطولها السفره
چن شجـــره وبلا ســباح
من كل صوب عج ورياح
واخوتـــچ روسهـم برماح
صبـــر ايوب يــم صـــبرچ .. طلـــع لا شي يـعلويه
………… .
من چان السكوت بــروح .. بالديـــون صرتي السان
نطقتي من سكت كلشي ..بوكت بيه كثرة الخرسان
يحسچة حيدر ونعمــين ..البلاغه البيـــچ چن قران
السانــه الرايد ايمده
اگبالچ يجرء اشحده
تنطيه طينـته ابخده
السانچ ابشط امن السيف .. تربيتـــچ حسـيـــــــنيه
………… ..
القصرهم من دخلتـــيله .. چــانو همه منتصرين
سليتي السوالف سيف .. وسكتو سكتت الميتين
والديون راســا صـــار .. چن ساحة حرب صفين
وطب حيدر علي بسيفه
وگــام يلگــــط ابــــكيفه
يعرفوه من يـرد حـــيفه
خلستــــي ايزيد ديـوانه .. ابنبـــــره كــربلائيه
……………
زينب چان وصفچ ماي .. وصـــعبه الـماي يتوصف
اجيتي ومحد ايعرفچ ..وطلعتي امگيده امن الطف
الكل حاجه اكو تعريف .. وبــــس ســـترچ ميتعرف
الشالچ ماي بعـيونه
عليه ظعنچ يمرونه
يبو فاضــل ينادونه
الچانت بيـــك مهـــيوبه .. اديــهـــا بحبـــل مدميه
……… .
شمس واچم گمر شفتي .. فــــوگ الگـاع بعيونچ
الله يسـاعدچ يم عون .. حچي الوادم ايسمعونچ
هدل من السياط الحيل .. اشگد ماشايله امتونچ
يعيــــنچ الله يازيـــنب
النار ابداخـلــــچ تلـهب
الحملتيه لو جبل يتعب
ثگل الگيد وعيــــالچ .. مــنها صرتي محــنيه
-------
حيدر تركي الكربلائي
يوجع ليل الفراگ .. وانه الطولك اشتاگ
الك بـحلامـي امنســافر
اتفـزز اعيــوني الحوافر
عايشه كل عمـري عاشر
ياحسين
*
عگبـك ماهنيــت ابنوم .. يبعـــد العــافيه البيه
ولو ياعافــيه يحســين .. من گـد ماسده اعليه
شنسه ياهي من عدهن .. وهنه الف وتسع ميه
وحق دلالـــل المـثلوم .. الطف يوجعني طاريه
گلبي امن البچي ذاب .. وسئل عني التراب
حــالي حـال البالمــقابر
اتفـزز اعيـوني الحوافر
عايشه كل عمري عاشر
ياحسين
……… ..
عمري خــــلص ابصفــــنه .. من ساعة ظهر عاشور
بـنات افكــــاري يتـــبدن .. يم جســمك دمع منثور
منـــك رايـــح اهــــوايه .. واولهــــن صبــــع مبتور
امطشر وبمبهب اسيوف.. بوكت حتى الهوه منحور
يالچنك هوه الهاب .. طولك كله نشاب
آخ شمســويه العــساكر
اتفزز اعــيوني الحوافر
عايشه كل عمري عاشر
ياحسين
……… .
اتسامر مع اجـــروحي .. وتاخذ سالفتنه الهم
اتطشر واصـــير اهواي .. بگــد ارماد المخيم
من ايهب علّــي حزنك .. يم باب الجزع التم
كلــشي البيك يوجعني .. لذلـك خــويه اتالم
ظل ابجسمي بس صوت .. الباقي ماخذه الموت
بعـــــد مابـــيه واكـــابر
اتفزز اعــيوني الحوافر
عايشه مل عمري عاشر
ياحسين
……… ..
امسي واصبــــح ابغصه .. يلي امصــابك اشكبره
حــزنك بــاب الِـــــبالي .. الصدري يالاخو تعصره
وحق صـدرك يبـــو اليمه .. الماينــــلم بعد عطره
شجره اختك يماي الله .. وعگبك يبست الشجره
يمته ايخلص الغياب .. يامسلوب الثياب
وخوفي من تغفه النواظر
اتفزز اعـــيوني الحــوافر
عايشـه كل عـمـري عاشر
ياحسين
………
اذا مابيك ابـــد جيـه .. وتدريبـــه نفذ صبري
اوياك الموت يجمعني .. حلمــي يابـعد عمري
تره مشتاگه لعيونك .. بكثر مامختنگ صدري
بــيدك يمته ياخويه .. تمسـح دمعتي التجري
يمته اتغمض العين .. وتشوفك يالحسين
الشخصك اشگد ما اناطر
اتفـــزز اعـيـوني الحوافر
عايشه كل عـــمري عاشر
ياحسين
حيدر تركي الكربلائي
شهادة زينب ع
بلكت يجيبه .. صوت المصيبه
من يسمع ام عون
ماتت غريبه
-------
اهــنا يهل الشيـــم والنخــوه والهمه
الباب القبله روحـو وفـزعو ابو اليمه
مو لجـــل الدفـــن گـلـــوله رايــدتك
زينــب رايـــده بس عطــرك اتشــمه
امنــيتي أشتم .. صدره التهشم
وسف للتراب
صاير نصيبه
-------
طشـو بالصحن دلالـــي واشـواگه
وگــلوله اخيتـــك حيــل مـشتاگه
يوم اهدعش اخر مره من شـفتك
انته عالرمــل وانــي علـى النــاگه
جسمك ذبل حيل .. چيه سحگته الخيل
وبيمن تغطيك
اخــتك سلـيبه
-------
يمن رحــتو لبـــو السجــاد انتــو بهاي
وگـبل ما انـتو تحچوله ويجـي عــناي
تره عطشان اخويه وخاف مابيه حيل
امروتكم اويــاكم اخــذو طاســة مـاي
نگطو ابشفافه .. اليبست وسافه
وحالة حبيبي
حاله عجيبه
--------
غيور احسين من فدوه رحت لسمه
وخبر مـوتي غـريبه يمكـن ايهــدمه
گــلوله يجــي ولايحــمل الـتــابوت
تابــوتي اخافـــن خنـصره ايلــچمه
وتهيج الجروح .. والغالي مذبوح
وترد الطــفوف
نيبه اعله نيبه
-------
اخاف احسين من ويــاي يـتـكلم
گصــته البالحجر مهــشومه تتالم
ادري بجــيته للشـــام مــو ســهله
بس بحسين اخويه رايده اتـشيم
گبال السبوني .. يمسح عيوني
وچفوف الحسين
متروسه طيــبه
-------
تمت
حيدر تركي الكربلائي
قصيده گعده للسيده زينب ع
.
.
.
زينب مصيبتها مصيبه
كانــت ومـازالت غريبه
من عگب واليها .. يـوميه سابـيها
كانت ومـازلت غريبه
***
من هذاك الظهر الاكـشر زينب وچـن موش زينب
من جـلالة خـدر اخـوها الخيمه لن فـوگاها تلهب
ابيوم عاشر مـو رمشـها بــل صـبرها بكبره شيب
شافت هذيچ المجزره .. واوصال اخوها امطشره
صح عالمـه لكـن مره .. وبالــنتيـــجه المره تتعب
والتوجع وكلـش ثگيله
عـمت الـساده عالهزيله
الماتو اهاليها .. يوميـه سـابيه
كانت ومازالت غريبه
***
التنـسبي مره بعمرهــا تمــوت مـــن القهـــر هيه
وزيــنب برفعـــة قدرهـا لــيش يـــوميه ســـبيه
ماكفاها اتشوف اخوها اتدوس صدره الاعوجيه
گلب العقيله اشيحتمل .. والشــــافته لامو سهل
نـــار وهزيلـــه والحـبل .. هــاي بـس بالغاضريه
بالســـوگ لــمـــن طبـــبوها
اتصيح الشماته وين اخوها
الغربه تحاچــيها .. يـــوميه سابيــها
***
السبي كل ماگلنه خلص ترجع اعلينه الرزايه
البارحه اللــوع متنها اليوم گــال انه الحمايه
لابـواچـــي لاتــعازي لا لـــطــم لاتـــرف رايه
الگــيد اديــها بالـيـسر .. رد گيد ابأيده الگبر
حرمله وخولي والشمر .. رجـــعونه للبــدايه
عرض الله زينب واخت عباس
يوميـه تـــولي امـــتونها الناس
ويـــن الـــيباريها .. يــوميــه ســابيها
***
حـظره ظــلمـه بغيــر زايــر ال اميــه هـــذا ودها
ليلة الوحــشه لهسه اتعيــش وي زيـنب اشــعدها
الحـرمو الحره امن اهلها اليوم هم حرمــو ولدها
ليل اهدعش صار الصحن .. وضويات گبتها انطفن
زينـب يحــماي الضـعن .. الدنيه صارت كلها ضدها
ابلاوالي ضلت اخت الحسين
بـس لايــدخلــوها الــدواوين
الوادم اتــأذيها .. يومـيه سابيها
***
انريد لهل الشام احنه ابكل صراحه اليوم نسأل
خيركم من چــان فايض غير من ام عون مُنزل
ليش لمن گلتو (ترحل) خـير اهــل الـشام وشل
بــيكم حقــد ماينجلي .. تموتون من كلمة علي
مــن بالمـناير تعــتلي .. ال امـيه شــلون تــقبل
الهذا السبب ضلت وحيده
وصــارت زيــارتـها بــعيده
ام عون تاليــها .. يوميه ســابيها
***
حيدر تركي الكربلائي
مابين شهادة السيده زينب ع وكربلاء المده هي سنه ونصف
.
.
.
مــن الطــف لحــد مــوتي يــدفــاني
سنه ونص وانه ادور ريـحة اخـواني
ودي التقي بيهم
محتــامه عليهم
انه زينب
***
وحــق اعيون كفالي وحق اعيون ابو اليمه
لون ميته ترد روحي عطـر اخوني اذا شمه
اي يـــدفــان/عطر الاخوان/ اخــر مـــره شــميته بالخــيام
چان الحسين/تارس العيـن/گبـل ماينتـرس جسمه بالسهام
واصبح الراي/ حتى من هاي/يحرموني ويحرگوهن الظلام
الشمر عالخيمه اشر وامر اعليها
وحرگوها لان عطـر اخوتي بيها
وچنت اسمع حچيهم
محـتــامــــه عليـــهم
انه زينب
***
الدنيه غربـــه والغربه اتأذي الما اله والي
شـلي ابدنيه مابيــها ضوه العباس كفالي
امن التقي بيه/ارد احاچيه /حچي الخوه الذي مامر على البال
بحرگه واحساس/هايعباس/ اگله اهمـــوم هـجرك كلش اثگال
والسبي اخفيه/ وما اراويه/ اديه البيــها اثــر مـن جر الحبال
طاري متوني اذا اطريه على احساسه
يطــگ جـرح العــمـود الظـــاربه براسه
ابأذيه شلون اجيهم
محتــــامـه عليـــهم
انه زينب
***
چنت لحظه امن افارگهم احس خيمه تشب بيه
عشــت اشلــون هالفتــره سنه ونص ماكو حنيه
عايشه شلون /ونور العيون /شفت خياله بيهم ترسو الغبره
اعليهم اتجول/ ليش الخيول/ عطـر الله تبده وشيلم عطره
واليســـلبون / مايهــابون / شيهابون والغالي انهشم صدره
غنائم صاحو السبعين الف جندي
شتــسوي گلي والعبـاس ماعندي
ولافزعة الاديـهم
محتــامه عـليهم
انه زينب
***
عندي اخــوان يالوادم قليل اشما گلت عنهم
الهوه ممنوع بــيه ايمر المـــامخذ اذن منـهم
حـدر التراب / غله الاحباب / وانه الهسه اشتم الهوه شلون
اخوتي احنان/بالي ماچان/سنه ونص عايشه وهمه يموتون
اشگد تمنيت/ابكربله ريـت/ يم عباس جسمي اهناك مدفون
الزاير من يـجي الوادم يگلوله
هُنا گبـر الكفيل وهُنا المكفوله
وروحه تحييهم
محتامه علـيهم
انه زينب
***
اليوم بفرگة اخواني عليه يمر احس چن عام
واشــواگي تذكــرني مــن طبــيت لهل الشام
ابلايه خوان/ وماكو وليان /والحادي يصيح بصوته ياناس
ياهو ملهوف / ورايد يشوف / جبــناها سبـيه ابلايه عباس
هيچي اشتاگ / ونار الفراگ / تاكــل بيه من الجدم للراس
شوگ افراگ اخوتي بــيه چن نيران
نســانـــي غربتـــي وطـــبة الديوان
يايوم اعتنيهم
محتامه عليهم
انه زينب
---------------
حيدر تركي الكربلائي
ليــش الشام زينــب تــندفن بيها
نـوجه اســئله العـــبـاس واليــها
وازينباه .. وازينباه
------
الحچي ابلهاتنه وداعة احسين اسهام
وخاف نســئلك ونــلچم اجروح الهام
زينـــب بالمـدينه اشــجـــابها للـــشام
وحـــدهـــا اجــت لــو هـمـــه سـابيها
وازينباه .. وازينباه
-------
نــسال والكـــلام ايـــأذي طــاريه
يبــو فاضل علـيك ابـداعة ارقـيه
زيــنب مـره لـو مرتيـــن مســـبيه
مهيـــوبه خــذوهـــا لــو مروعيها
وازينباه .. وازينباه
--------
سؤال ايــحير النــاس ابشــهادتها
شعــدها رايحه للذبــحو اخـــوتها
انوخذت گوه زيــنب لو بـــأرادتها
هـاي الاســـئله ابابـــك انـــبـديها
وازينباه .. وازينباه
---------
يمـكن مثـــل امها ياگمـــر عــدنان
خــاف امن البواچي ملت الجيران
واظن سوولها بالشام بيــت احزان
حتى الناس تخــلص مـن بواچيها
وازينباه .. وازينباه
-------
بــواچـيها تـأجــج عـالظـــلم ثـوره
من تبچي لخوها المنهـشـم صـدره
الوحيده امن البـشر دمعاتها حمره
اتفسر الصخر زيــنب من نواعيها
وازينباه .. وازينباه
--------
تنعــه بالنهــار وتـــنتحـــب باللـيل
يهفت حيلها وتـرجع اتلــم الحــيل
آخ الخيل من تسمع ابطاري الخيل
الصــدر احسيــن هالطـاري يوديها
وازينباه .. وازينباه
-------
اهنا خيمه تشب اهناك طــايح جـود
اهنا صــاح الشـمر عــباس ماموجود
احرگو اخيــامها تركض اجتها اجنود
وجـــت والخيــــم مـحـــد يطـــفيها
وازينباه .. وازينباه
--------
حيدر تركي الكربلائي
قصيده گعده للسيده زينب ع
.
.
.
كفيــلي تمنيت كفيــلي
گبل ماتغمض العين .. يجيني وعنده چفين
ابو فاضل كفيلي
______________
دگــت الباب المنــيه ومــوتــتي صــارت قــريبه
والمصيبه بطرگ روحــي حرمه مكسوره وغريبه
ويــن الــگـه الي كـفلني امـنين ابـو فاضل اجيبه
ناديته وينك ياگـــمر .. بخــلافك اشــسوه الـدهر
لمن غفيت اعله النهر .. خويه صار اسمي السليبه
يهالناس تسمعون يهالناس
صحت وين الگمر وين .. يجيني وعنده چفين
ابو فاضل كفيلي
______________
حسين عالعباس شفته انكسر ظهره وعينه تجري
وموعــجيبه عالكــفلني لــون هسه انكــسر ظهري
حــيل مشــتاگه ارد اگــله طـــولت يابــعـد عـمري
الكافل من اعيونه انطفن .. بغيابه وشسوه الزمن
حرمـه وبقـيت ابـلا وطن .. من وگع حماي خدري
يعباس ندهته يعباس
وصحت يالمشرعه منين .. يجيني وعنده چفين
ابو فاضل كفيلي
______________
الموت لاموهين ابــدن وابــد موهينــه المنيه
لچـن من المـوت الاصعب لمن صاحو يالسبيه
اشگد تمنيـت الكـفـلني يجي يـحل احبال اديه
عالناگه مشدوده بحبل .. والحادي قرر يحتفل
بزينب منو السامع قبل .. گــال ويـأشـــر عـليه
اسيره يگلهم اسيره
ردت ليث الميادين .. يجيني وعنده چفين
ابو فاضل كفيلي
______________
سلهــمت للمـــوت عيني والـــذي تانيتــه وينه
خاف مايــندل يجـينــي سهـــم المــثلث بعينه
راح اطش بالباب دمـعي بلكـت ايجيبه حنينه
كفـــالي ارد اتنــفسه .. والزم اديــه واتـلمــسه
اشفافه بعدهي يابسه .. هوه لو رواه احسينيه
وفـــائه يحير وفــــائه
الكلشي وفه لحسين .. يجيني وعنده چفين
ابو فاضل كفيلي
______________
الليله اخر لــيله حلمي ايــمرلي وادريهـــا بعيده
وينكـــم يــهــل المــروه گـــولو للكـــافل اريـــده
ردت بيده ايشيل نعشي ولو ادري نگطعت ايده
يكفيني اشمن منحـــره .. امـــن ايشيلني للمقبره
راح انه امـوتن حــايره .. وعلى زيـنب موجديده
المنيه شفتها المنيه
گبل مايگرب البين .. يجيني وعنده چفين
ابو فاضل كفيلي
--------------------------
حيدر تركي الكربلائي
هوسات لامير المؤمنين ع
علي ومحتار شكتب بيك .. حيل السالفه اتحير
يالــجـــبريل گــــدامــــك .. يطـلـع كلـش ازغير
الناس اتسير اعله الـناس .. وانتـه الربك اتسير
يالربـك فاتحــلك بـابه
------
الناس اصناف ياحيدر .. لكــن انتــه صنـــفك غير
يمسوي للفقره اجيوب .. وتارس حوصلة كل طير
خيـر الوادم اشـــويون .. وانته يفيـض چفك خير
يمشبع الوادم ماعونه
----
يقيسونه علي اويه افلان .. وانه ابنبــي ماقيسه
عيسى وچيه حيه الميت .. الوادم عاجه ابعيسى
علي ولومــات هذا الكون .. يحيـه لمـن ايجـيسه
ويــرد الكون بعافــيته
------
حيدر تركي الكربلائي
الغدير
.
.
.
يرب اشهد الي .. اموت اعله علي
امير المؤمنين
__
اميري . ومصيري . ومجيري .. علي العاش بضميري
لگــاني . اعـــاني . احتـواني .. علي بعطفه اشتراني
علــي أشــر عـليــه وگــال اريده
فتحلي ايده واحس الجنه بيده
صرت حــر يـوم ضماني العبيده
العيشه وي علــي عيـشه رغيده
اويه الانفاس الولي .. امــوت اعله علي
امير المؤمنين
---------------------
امامـي . وغـــرامي . وهــيامي .. بعلي يعجز كلامي
شوصفه . وشنصفحه . واعرفه .. جهنم بسمه تطفه
بالــذر وقعـتــله بذنـــي اديه
وعلي وقعلـي رائـسا بالهويه
گتله احسبني اعمه وگود بيه
المهم ياعلي بس ترضه عليه
الحــبيب الاولي .. اموت اعله علي
امير المؤمنين
______
يجنه . ومحنه . الحملنه .. قليل وشحجي عنه
يماجد . يواحـد . يخــالد .. يمــن بالگلـــب گاعد
ترسني حب علي من جدمي للراس
وگـمت اشتـــم عبــيره ويه الانفاس
المــاهام بعلــي خــــسران يانــــاس
نعــم واستـــاذي ابهالعـــشگ عباس
العلي فدوه هلي .. اموت اعله علي
امير المؤمنين
------------------
صلاتي . ونجثاتي . بحياتي .. علي مولاي اغاتي
بدمــائي . انتــمائي . ولائـــي .. ومن اعدائه برائي
الماعنده علي ماحسـبه صاحب
الصحبه مستحب اوعلي واجب
وابوس ايـده البأيده علي كاتب
انياله الربعه مـــن اهل المواكب
نعـــم ياسائلي .. اموت اعله علي
امير المؤمنين
____
بكياني . مــعاني . وحياني .. علي المامثله ثاني
يشدني . ويمدي . ويودني .. ومثل ولده يعدني
بعـيونه علـــي الوادم سويه
ماعنــده فرق حامي الحميه
احــمد الله كل صبح ومسيه
الجعلني واحد امن الرافضيه
الگلب بيه ممتلي .. اموت اعله علي
امير المؤمنين
_____
مجيبي . وطبيبي . ونصيبي .. وضوه عيوني وحبيبي
هـــوائي . ودوائي . ورجائي .. ويـضل بســـمه نـــدائي
علي باب الله بــابه ومايـــسده
اليتعـــنـــاه خايــــب مايــــرده
اجيت ابابك اطلب طلبه وحده
الوبا عن شيـعتك ياعــلي ابعده
كوورونه يبو الحسنين ابعده
ونــدائي يعــتلي .. اموت اعله علي
امير المومنين
---------------------
حيدر تركي الكربلائي
مولد امير المؤمنين
.
.
.
روحي وحياتي .. وامنياتي .. يا امير المؤمنين
-----------------------------
يابـسم الله الرحمـان .. ياكلــشـي بــدلالي
حبـيتك والحب ايمان.. يالـبس انتـه ابالي
بيك اقره وانته القران .. ومـاختمك للتالي
ماشايف مثلك انسان .. حيـدر انتـه الغالي
مصدر نجاتي .. وامنياتي .. يا امير المؤمنين
-----------------------------
ياســر الله الـديــان .. يالـســاكن بعـيوني
الايماني انته البرهان .. يالـبيك ايعرفوني
رتلتك باحلى الالـحان .. وبحـبك لامــوني
گالو وشعندك تبيــان .. گلـــتلهـم اقــروني
وكل ذكرياتي .. وامنياتي .. يا امير المؤمنين
-----------------------------
بين الناس انته الميزان .. الحق ابطوله وعرضه
ايبغضونك شـلة رعـيان .. حـيدر ذولـه المرضه
اعيون ايملكون وعمـيان .. للــوالاك اتــرفـضه
واَليتك وانــي الفرحان .. غـصـباً عـالـمايـرضه
الساعة ممـاتي .. وامـنـياتي .. يا امــير المؤمنين
-----------------------------
مجنونك عاشگ ولهان.. اعلـنها ومـو سكته
مـتأكـد لا مـا وهـمان .. حـبيـتك بـس انـته
شفتك بكتابي العنوان.. وغـيرك لا مـاشفته
العافك ياحيدر خسران .وانتـه الي مـاردته
ياحـسناتـي .. وامـنياتي .. يا امــير الـمؤمنين
-----------------------------
ماگول اسمك حيدر كان .. شخصك لا مو ماضي
موجـود بكـل الازمــان .. غـصباً عالمـاراضـي
انصفني الشخصك ضميان .. يامـولاي الـقاضي
حمــداً يـارب المنــان .. انـي بحـيدر حـاضي
شيعـي بصفاتي .. وامـنياتي .. يا امـير المؤمنين
-----------------------------
يـاروح وجـنه وريحـان .. يا آيــات الـــباري
إلأنس اتحبـك والـجان .. هواي بفضلك قاري
وبوصـفك لامـو غلـطان .. من الهادي اخباري
هـواي هواي ايحبك چان .. والحب مو اجباري
حـبك صـلاتي.. وامـنياتي .. يا امـير المؤمنين
-----------------------------
حيدر تركي الكربلائي