Telegram-канал htrshaat - هترشات زولةة سودانيةة 👧💔: Unsorted

هترشات زولةة سودانيةة 👧💔

22 April 2026 20:19

بِمَن يَثِقُ الإِنسانُ فيما يَنوبُهُ
وَمِن أَينَ لِلحُرِّ الكَريمِ صِحابُ

- أبو فراس

هترشات زولةة سودانيةة 👧💔

21 April 2026 23:50

أغلبنا بيسأل نفسه إزاي النبي ﷺ كان بينام رغم انشغاله بالعبادة، والدعوة، وقضاء حوائج ٩ بيوت، والزوجات، والتعليم، والتربية، وقيادة الدولة، والتخطيط، والتنظيم، والقضاء، ورغم كل الحِمل المُرعب دا، كان دايمًا مُبتسم، وطاقته حاضرة، وتركيزه في أعلى مُستوياته، وعُمره ما انهار بدنيًا أو نفسيًا!

إحنا حاليًا -وبكل أسف- بنتعامل مع النوم على إنه فاصل ونواصل، أو تضييع وقت وهروب من الواقع! والنتيجة إن أجيال كتير مُصابة بالاحتراق النفسي، وبنصحى من النوم تعبانين أكتر، وأوقات كتير بنبقى عايزين ننام تاني!

لكن النبي ﷺ في الأصل كان بيتعامل مع النوم على إنه عبادة وتسليم مُطلَق، وقبل ما يغمّض عنيه كان بيسلِّم همومه ومشاكله وحياته لله، وكان بينسلخ تمامًا عن الدنيا، وكان بيقول قبل النوم: (بِاسْمِكَ اللَّهُمَّ أَمُوتُ وَأَحْيَا)، يعني بيتعامل مع النوم على إنه وفاة صُغرى ممكن مايقومش منها، وبيسلِّم رُوحه للي خلقها، فبينام بقلب أبيض ومُطمئِن، ومفيش تفكير مُفرط ولا قلق من بكرة، علشان كدا نومه كان شحن للروح وراحة للجسم مع بعض.

ولو بصينا في دورة نوم النبي، هنلاقي إن النبي ﷺ كان بيطبَّق نظام مُتكامل، والعلم اكتشفه دلوقتي وسمّاه: النوم المُتعدد الأطوار، ودا نظام عبقري بيعمل ريستارت للمُخ والجسم، ومتقسم لـ ٤ مراحل:

١. النبي ﷺ كان بيكره السَّهر بعد العشاء تمامًا، إلا لضرورة أو مصلحة للأُمَّة، وبمجرد ما يصلي العشاء كان بينام فورًا، وبياخد نومة عميقة ورايقة لحد نص الليل، ودا بالظبط الوقت اللي أثبت فيه الطِّب إن الغُدة الصُنوبرية بتفرز فيه أعلى نسبة من هرمون الميلاتونين، ودا الهرمون المسئول عن التعافي الجسدي العميق، وتقوية المناعة، وإصلاح الخلايا التالفة؛ لذلك حبيبنا وقدوتنا كان بياخد الخُلاصة البيولوجية في الليل من أوله.

٢. وفي التُلت الأخير من الليل، الجسم بيكون أخد كفايته من الراحة، والنبي كان بيصحى علشان يصلي قيام الليل والتهجد! وعلميًا.. قطع النوم في الوقت دا بيعمل تنشيط للدورة الدموية وبيمنع السكتات القلبية! ونفسيًا.. الهدوء التام وتفريغ الهموم في السجود، هو اللي كان بيدي طاقة نفسية وروحية جبارة علشان يقدر يواجه بيها أعباء وضغوطات اليوم كله من غير ما ينهار.

٣. ودي معلومة ٩٠٪ مننا مايعرفهاش! بعد ما النبي ﷺ بيخلص قيام الليل في وقت السَّحَر، كان بيضجع على جنبه اليمين وبياخد غفوة قصيرة جدًا! والعلم بيُثبت إن الإنسان لمّا بينام على جنبه اليمين، الرئة الشمال مابتضغطش على القلب، والكبد بيكون مُستقر، فبيحصل سريان مثالي للدم! والنومة الخفيفة دي بتعمل تفريغ للضغط العصبي، وبتفصل العقل بين مجهود الليل العميق، وبين بداية يوم جديد.

ومن اللحظة دي بتبدأ أسرار البركة الربّانية تشتغل! والنبي بيقوم لصلاة الفجر في قمَّة النشاط، وبيبدأ يومه بدري جدًا وبيقول: (اللَّهُمَّ بَارِكْ لِأُمَّتِي فِي بُكُورِهَا)، علشان كدا كان بيقدر يِنجز مهامه، ويِخلَّص مصالحه، ويراعي أُمِّته، ويقضي حوائج بيوته وزوجاته وأولاده.

٤. وفي وسط النهار، والتعب، والحَر، والفرهدة، كان النبي بياخد قيلولة قبل الظهر أو بعده، والقيلولة دي كانت غفوة نوم سريعة علشان يقدر يكمِّل اليوم بنفس الطاقة والنشاط!

لدرجة إن وكالة ناسا الفضائية عملت دراسة على طيارين الرحلات الطويلة، واكتشفت إن قيلولة قصيرة حوالي ٢٦ دقيقة بتعمل سحر رهيب، وبترفع اليقظة جدًا وبتخفض هرمون الكورتيزول المسؤول عن التوتر والإجهاد اللي بيهلِك أعصابنا.

السر العلمي العبقري هنا إنك في الـ ٢٠ أو الـ ٣٠ دقيقة دول، مُخَّك بياخد فوايد النوم الخفيف، وبيعمل ريفريش من غير ما يُدخل في فخ النوم العميق، علشان كدا لو نمت ساعة أو ساعتين مثلاً وظبطت المُنبّه، هتصحى مِقريف ودماغك تقيلة ومِصدّع وحاسس إنك مضروب علقة؛ لأنك ببساطة قطعت دورة النوم العميق في النص! فلو إنت مُجهد جدًا ومحتاج تنام أو عندك مُذاكرة.. الأفضل إنك تنام دورة نوم كاملة، يعني حوالي (٩٠ دقيقة) ساعة ونص، هتصحى فايق ورايق بإذن الله.

فالحمد لله الذي أرسل إلينا محمَّدًا، نبيًا، ومُعلمًا، وطبيبًا، وحبيبًا تطيب بهديه الحياة.

#عبدالرحمن_مهدي