531
كل ما نملكه من فضل مولاتنا فاطمة صلوات الله عليها https://t.me/husseinalialtaqi
لمولاتي رقية (ع)
بـليلة من ليل الخرابة طفلة فزت من ألمها
ترتچف بفراگ ابوها وحيل مرعوبة بحلمها
ندهت الطفلة يعمه ..
وين ابوي اخذيني يمه..
توه لآگيته بمنامي وعيني ما فتحت عسنها
ضمني وبچينه وگتله.. فراگك يبويه شخله
ونيت واعله ونيني .. بچيت حـتـه الهزلـه
يابويه من ذيج الحرب
عيني بوداعك دم تصب
تعبانه مـو مـن الـدرب.. من شوگي الك
يل كاسر بعمري غصن
گلبي بخرابة منسجن
خليني يمك أطمئن .. و اتوسلك
بابا حسين.. بابا حسين
------------------
توه لآگيته وحظنّي بمملكة حظنه احتواني
شگد سوالف ضامتله شفته وتلعثم لساني
شگد هموم محظرتله..
وغير اريـدك ما گلتله..
شگد كرهت الموت بويه لأن يمك ما خذاني
الفارگني عنك غثني .. يابعد حيلي وحزني
ماريد ارد للدنـيـا .. بويه بحنانك ضمني
جرحي الك ينزف وفه
وجرح الگلب شينشفه
حزني بغيابك ماطفه .. طول الدرب
فراگك امغيرلي رسـم
ردتك تجي مو بالحلم
يل فرگتك دون الزلم .. تجرح گلب
------------------
گتله بويه ضعت بعدك وانچفه بهيمة دلالي
الدنيا ما تنجرع صارت دون حنيتك يغالـي
من رحت يابويه عني..
حته اسمي ضاع مني..
ضاع كلشي من ايدي تدري والبگت بيها حبالي
يل جنت ابوي وامي .. لمن رحت من يمي
صاحولي يل مسبية .. وعگبك تغير أسمي
تـدري العزيزة رقيتـك
غيـرو اسمها بروحتـك
ويآذوها لو بس صاحتك .. يابو علي
يالعيشتني ايامي حب
جرحولي گلبي بالدرب
من اسأل اعليك أنضرب .. حيل انولي
-------------------
تلث سنين احنان ليش بـيوم ضيعهن دلالك ؟
من الخيم للشام أدورك والرمح ضيّع خيالك
من الحلم فزيت أريدك ..
واشتياقي الزمت أيدك ..
البلحلم مو انته شفتك وانه اعرفنّه جمالـك !!
فزيت أون مرعوبة .. و أبچي بچي منهوبة
ورجعلي راسك يمي .. مبچه اليتم بي حوبة
وصاحتلي عمتي يابنت
التردينه راسه بالطشت
من نحرك حچايه سمعت .. يا فاطمة
وحظنت راسك بالدمع
وعمري طفه طفيت شمع
والشمعة تطفه من وضع.. نزف الدمه
--------------------
حسين علي التقي
باجر آ يحسين افگد خوتـك
اصفن بعيني يخويه بداعتك
ليلة اوداع وعظيمة فرگتـك
وراح تخلص عشرتك ويايه
آ يحسين ياخويه
----------------
باجر افگد ريحة الزهرة وعلي
وبعـد ما اسمع حجاية ادللـي
تدري وي طلعتك زينب تنولي
من الخيم طلعتي كلفه هوايه
----------------
شنفعه عگبك بعد يحسين الهوه
وبعد عينك يعثر بطولي الضوه
بـاجـر اتفرقنـه خـويـه نيـنـوى
والله يستر من ايامي الجايه
----------------
يل مودع كل عزيزاتك لـچـن
اوداعي كلش يختلف عالودعن
تدري ما فارگتك بطول الزمن
وادري فرگة موت باجر هايه
-----------------
لا تسولفلي اعلـه باجر نفترگ
الليلة قبل خيامي گلبي محترگ
كون ايطول الليل عن صبح الطبگ
فراگك ايخلي الگلب دماية
------------------
كلشي هيّن بس وداعك معضلة
شجاب زينب ويه حيرة كربلا
أنه بجالك جبت عمري مـدللـه
وباجر ايصبّح دلالي حجاية
-------------------
هسه يمي وحسرة باجر شوفتك
خيول أمية تغطي عني جثتك
طرف عينك من تديره لخيمتك
تشوف نـار وتنهب الگصاية
--------------------
خويه باجر شوفتك فوگ الترب
راح تشلع گلبي يا لب الگلب
راح عنك ارتحل خويه غصب
و تنزف اجروحك عالمسناية
--------------------
لأن باجر راح اودعك عالهزل
وچفي منك مستحه يظمه الحبل
شلون اجيلك بعد وجروحك أشل
وتدري ظعني ماخذينه سبايه
اللهم عَجّل لوليك الفرج
وخرجت مولاتي العقيلة (ع) في ذالك الظلام
يا آخر هلـي وروحـي
اجيتك حيرة بجدامي
تره الهيمه خذت حيلي
وجبتلك دمعي ياضامي
وين.. أشوفك والجثث بالحومة مگلوبة
گـوم .. دليني تره أختك حيل متعوبة
حيل.. ماظل بيه والبر أمشي ياصوبة
تگوم وتطيح
بليل أختك گصّدتك وتگوم وتطيح
بين المذابيح
تالي بـجمالك تهـيـت بين المذابيـح
خلف الله عالريح
ودّالي من نحرك عطر خلف الله عالريح
آه ..يبن أمي ياحسين
------------------
خويه شصاير بحالك
ضايع بالحجر رسمك
ذبـحـك مـا يكفيهـم
رجعو سلّبو هـدمـك
ليش.. چاا فوگ الذبح تالي يسلبونك
كون.. على هاي الشمس لازم يغطونك
بخيل.. وره ظيم الطعن رجعو يدوسونك
اكرامه دفنه
ندري كل واحد يموت اكرامه دفنه
والخيل اجنّه
بس اخوي من انذبح والخيل أجنّـه
مابقه منه
كلشي مسلـوب و رسم مابقه منه
-------------------
الولا فد لحظة فارگته
أجيته وتالي معرفته
ما گتله شردت مـنـي
لأن متفطـره شـفـتـه
طاح.. ادري من العطش تعبان ضي عيني
ماي.. زينب گـلـي مـا عـنـدج ترويني
آآخ .. گلته وانه هم عطشانه يحسيني
الماي جاري
ابن امي من عنده انحرم والماي جاري
اسود نهاري
طلب گطرة من العذب واسود نهاري
عطشان عاري
ما شفت قبله منذبح عطشان عاري
-----------------
عفت بالخيمة ايتامك
بضمه ياخويه تتلـوة
گلت لازم أجي لحالك
واجازيك بجزه الخوة
شلون.. حرت يا بوعلي بمخيك حيرة
ليل .. چاا هذا الظعن غيرك منو يجيرة
جيت.. اكلك خوية باجر رايحة ايسيرة
جارحني وضعك
ياخويه من نوم الترب جارحني وضعك
وشلون اسمعك
ملچوم تتگلوب تون وشلون اسمعك
جاية أودعك
باجر نروح اعله الهزل جاية اودعك
----------------
تره صبح السبي گرّب
وما أگدر أظل يمك
رقية تنتظرني ارجع
وانته حيرة شيلمك
راح.. ارجع للخيم بس خويه مجبورة
خوف.. وانه اعله الحرم هالليلة ناطورة
وصار.. أمري بـيـد غيرك وأطلع بشورة
بيد الأجانب
شوري تره بوجه الصبح بيد الأجانب
صرنـة غرايب
خوية عگب فيّك بعد صرنة غـرايـب
سوگ وخرايب
وبالشام ايتانيني تره سوگ وخرايب
-----------------
حسين علي التقي
عطش موت.. صار عبدالله ايتلظه
عطش موت.. والعطش هذا شيفضة
عطش موت.. چفنه ايفتحه ويغمضه .. وأمه گالت
زينب أخذي الطفل بعدي عـنـي
خاف اشوفه يموت أبني بحظني
وغـارت اعيونه وصـفّـار بـخـده
طـفـل بعـده بكلشي ما متهنـي
يمه.. تروه ظنك وآنه عكس ظنونك
يمه.. علـى گـطـرة مـاي ويذبحـونـك
----------------
يمدلول.. أمنيّـتـك بـأيـد عُـودك
يمدلول.. تشرب بدمعك اخدودك
يمدلول.. ماكو حيلة وذبل عودك.. ياوليدي
زينب أحتارت واجت لحسينه
تگـلّـه طفلك ذبل عود سنيـنـه
اطلبله شربة وهلبت ايرحمونه
شالة للحومة وتهل دم عـيـنـه
بويه.. أدري هاي الناس مايروّنك
بويه.. على گطرة ماي ويذبحونك
----------------
خذه وراح.. يطلب من الگوم شربة
خذه وارح.. بس علي محترگ گلبه
خذه وراح.. والسهـام تطلبـه رگـبـة
انذبح بيده وضمّه جوه اعبايّتّه
جابته الحيرة وسكيـنـة تلكتـه
شافته ساكت تلگله بويـه نـام
وگلها لا نامـت النبلة بـرگـبـتـه
خوية.. عمتي وامي بخيمتي يتانونك
خوية .. علـى گطـرة مـاي ويذبحونـك
----------------
يزينب.. أخذي عبدالله دهاني
يزينب.. مات بيدي وحيراني
يرينب.. وأمه بالخيمة تتاني.. وشكللها
تموت لـو شـافـت ابـنـهـا منـذبـح
بي احتارت من عطش ذاك الصبح
صبريّها يـا أم عـون اعـلـه الـولـد
وخبريها يطيح راسه امن الرمح
يمه.. اعبايتي حمرة صفت من لونك
يمه.. عـلـى گطـرة مـاي ويذبحـونـك
----------------
دللول.. طلعت بـ ليل الأعادي
دللول.. يبني در صدري تنادي
دللول.. يـمـه يالمـآخـذ أفادي.. يمه وينك
شلون ذيـچ الساعة ما روّيتك
چف حليبي يبني گوه نطيتك
گلـت أبني زغير شعلي بالحرب
لو أدري بحظني متت خليتك
يمه.. بليل أظلم وين اشوف عيونك
يمه.. علـى گـطـرة مـاي ويذبحـونـك
------------------
حسين علي التقي
ياشِـبه طه الأمـين
بخَلْقَك وخُلْقاً وَ دين
الدنيا بعدك للحسين.. خير مابيها
على الدنيا العفا بعدك بني علي
------------------
بطيحتك عمري انطفه.. يا شبيه المصطفى .. ياروحة
روح ابوك ومهجتة .. بدت يمك كسرته .. وجروحة
وكت من احتار اشوفك وين تاخذني
جنت اشوفن جدي طه بصورتك يبني
جرحك شجدد بگلبي ياهرش گلبي
چـن محمد عالوطيـة شفتك بحزني
يبني بمصابك شأگول
اه يا عين الرسول
ياجرح گلب البتول .. ويا بواچيها
على الدنيا العفه بعدك بني علي
--------------------
كثر ما روحي جنت .. طاح گلبي من طحت .. يانحبي
إلي مايرهم شفه .. وصحت عالدنيا العفه .. من تعبي
طفح حزني وشهگت محد وصل حزني
لمّه للحومة انظرك تستعد يبني
ادري مو أول مصيبة روحتك جانت
لچن أولهن الجاست گلبي مو ظعني
تدري يبني من طحت
الظيم تارسني وصحت
عفا عالدنيا گلت .. شنهي تاليها
على الدنيا العفه بعدك بني علي
--------------------
جيتك وكلي أون .. ورجعاني هالحزن .. بسنيني
بدمعتي يم فاطمة.. وصبت عيون السمه.. ويه عيني
رجّعت حزن الطفولة بأمي والعصرة
ابچي يمك صرت انا واذكر الزهرة
وصحت يمه فاطمة غيثيني يايمه
كلشي أكدر على اوداعه وعلي ماكدره
صحت يمه فاطمة
علي ضلوعه مهشمه
بحزن روحي امغيمه .. وعطش حاديها
على الدنيا العفا بعدك بني علي
----------------------
گلبي ويّاك احتظر .. گـوم يالصاير وذر .. حاچيني
امناشغ بكترك طحت .. افتح عيونك ضعت .. ياعيني
مـو اموادع ابو وابنه من تفاركنـه
چنه روحين بجسد وبكربلا ظعنه
روحي طلعت ياعلي چايمته تگعدلي
بموتتك يامهجتي عمري انكسر غصنه
ياورد وسط الفلة
الحافر بجسمك شلة
دوهنتيني كربله .. من مأسيها
على الدنيا العفا بعدك بني علي
---------------------
حيرة حرت بشيلتك.. شبقه بيه بطيحتك.. ياحيلي
و أمك تموت بألم .. واگفه اباب الخيم.. تربيلي
(إربَـاً اربَـاً) گطعو جسمك يل مدلل
وانا ادري على فراگك يبني مامش حل
بس ترة يوليدي امك تنتظر جيتك
وهية ماتدري بإبنها جروحة ماتنشل
گــوم للخيمة نرد
الشمس ماترحم ورد
والحـوافـر تستعد .. من يصد ليها
على الدنيا العاف بعدك بني علي
--------------------
محمد علي الحلفي
حسين علي التقي
وصية الامام الحسن لمولاي القاسم عليهما السلام
من تشح نصرة سيدك يبني.. يبني
أخذ الوصية واستمع مني.. مني
عزبله بالنفس بطفوفه ياشهم
من عمك الگمر يوليدي أخذ عزم
أخذ الوصية واستمع مني.. مني
------------------
احفظ هالوصيّة يبني وأسمع
لأعمك فدوه لو جسمك تگطّع
وقبل أولاده اريد گبالـه تـفـزع
أخذ سيفي وعيون الباطل أشلع
شما غيرة عندك بالطف ابذلها.. ابذلها
ولو مالت الحومة انته اعدلها.. اعدلها
يابزي ادري بيك للكثرة ماتهم
عزبله بالنفس بطفوفه ياشهم
---------------------
لعمك نصرتك لاتبطي حَيّك
گباله من تتطيح تشيّم ابيّك
و أنثر عالحرم يوليدي فيّك
ويم الحرة طأطأ ويه أخيّك
عمتك بعينك حطها لا تتعب.. تتعب
صيرو خدم يوليدي يم زينب ..زينب
خدر العقيلة أريد ماتوصله الزلم
عزبله بالنفس بطفوفه ياشهم
---------------------
يعم گـلـه الوصية مو رواية
ابوي المجتبى منطيني رآيـة
وسيفة ولآمته ودرعه وعباية
اليوم أعقر جملهم بيدي هاية
هـايـة الوصية گله ياعمي .. عمي
مـلـزوم انفذها وعلى دمي.. دمي
من زغري منيتي وبكربلا الحلم
عزبله بالنفس بطفوفه ياشهم
---------------------
شما عمك يكلك گله خـادم
تذبل مهجتك يوليـدي لازم
بزودك همّتك عزمك يقاسم
ترفع راسي ما بين الهواشم
الغاية ذخرتك بالطف تنصرة.. تنصرة
وراسي ترفعه من تجي الزهرة.. الزهرة
وبنصرتك اريد كون أمي تبتسم
عزبله بالنفس بطفوفه ياشهم
----------------------
ثباتك يبني يم عمـك أريـدة
مثل المجتبى ويه الصميدة
وصولات الجمل چفك يعيدة
ومن روس العده ضيّع البيدة
يوم الحسن ياكونك تعيده.. تعيده
لملمهم وطشهم على البيده.. البيده
للكوفة يولدي ردهم اذا تهم
عزبله بالنفس بطفوفه ياشهم
---------------------
حسين علي التقي
وثب.. فارس الهيجاء
قمر .. قد على العلياء
حمل.. مثل ذو الفقار
أتى.. سـيـدُ البيـداء
اجه بجوده شايل جود اعله متونه
ابو الحمالات الـراهـب ويعرفونه
دخيل السطرة الچتاله امن زنوده
اسد هزبر يجدح غيض من عيونه
يادخيل ابا الفضل غيرة بصارمه
صاعقة سوح الحرايب من السمه
عباس.. أسمه عالارجاس.. يگطع الانفاس.. يا ابا الفضل
سطّار.. چفه يلهب نار.. مثل حاي الجار.. يا ابا الفضل
كـرار .. بالـرگـب كـرار .. ابـد مـو فـرار .. يا ابا الفضل
السلام على حامل اللواء
---------------------
هوَ .. عينُ للزهراء
هوَ .. كافل الحوراء
لـه .. خيرةُ الأسماء
هوَ .. سيداً للـمـاء
صنع موقف وللعالم ايسولف غيرة
وابد محد سواه قبله ولا غيـره
أمير الخوة وشال الخوة بعـينـه
مِلك ماي الشط بيده وبداه حيرة
حس بروة ماي چفه وصاحت شفاه
ابد ما أشرب وحاشه احسين بضماه
ينساه .. والله ما ينساه .. بمهچته خلاه .. يا ابا الفضل
وانطاه.. وفه الخوة انطاه .. ماتعده ضماه .. يا ابا الفضل
مولاه .. چان اله مولاه.. أخي ما سماه.. يا ابا الفضل
------------------------
هـوَ.. رآية الكرار
هـوَ .. هيبة الجبار
ورث .. غيرةُ الحربِ
مـنَ .. قاصم الكفار
ورث نزعة حيدر من يبرز غاضب
علي وحملاته بيوم الطف ايحارب
ابـوه شـاطـر مرحب نصين بسيفه
وشطر عباس الجيش بسيفه الراهب
مثل صدر السفن من تشگ البحـور
هيج شگ الجيش گله بسيفه الغيور
معروف .. من يهد الصفوف.. تنشطر بالخوف.. يا ابا الفضل
ملهوف.. على طگ السيوف .. بغيرته موصوف.. يا ابا الفضل
بچفوف.. حيرت الطفوف ..ماتوصفه احروف.. يا ابا الفضل
----------------------
هـوَ .. الجيش بالكامل
هـوَ .. قـائـداً كـافـل
هـوَ .. صـلـبـاً لـيـن
أبو .. الفضل والفاضل
صلب طبعه وكل الهيبة بطگاته
وترف چفه على زينب و علوياته
لأبو اليمة وجوده جان مثل أمرآية
وصفات الله تجلت ابصفاته و ذاته
من صفات العصمة الله انطاله صفات
(بنفسي أنتَ يا اخي) الشاهد والثبات
مرسوم .. صورة من معصوم.. بالعلم مختوم.. يا ابا الفضل
عنوان .. عـبـد صالح چان .. وصلب بالأيمان.. يا ابا الفضل
لحسين .. نفسه والعينين .. وعسكره الچفين .. يا ابا الفضل
------------------------
حسين علي التقي
گومولي يالطحتو گبالي
محد بقى بظهري الخالي
من غربتي انعى بحالي.. واا غربتاا
ظليت اصدلكم وارجع
لخيامي محد ظل يفزع
عيني تشاهد چم مصرع.. في كربلا
ايا حـيـرتـي مـحـد وصل لـيـهـا
اصيح وچلمتي ياهو اليهم بيها
صحبتي مجزّرة وخيامي عطشانه
صفت روحي الهظم والظيم حاديها
انا لله ظليت انعى روحي
انا لله شيطيب جروحي
انا لله كلش طفح نوحي
انا لله وانا إليه راجعون ياهضمتي
انا لله وانا إليه راجعون ياغربتي
-------------------
مـالـي اناديكـم گعدو
لحسينكم بـس انتبو
لخيامكم گومو وفزعو.. رادت امان
واگف و احشمكم گوة
ماظل تره بحيلي قوة
هسه صفه حسين ابلوة.. والله زمان
گدامي العده تضحك يصحباني
وبخيامي النسه بدموعها اتـانـي
وصلت لحيرة بالگوة اظم دمعي
اصيحن گومو وانه يابس لساني
انا لله چم شدة عليـه
انا لله كلشي ايعيل بيه
انا لله عطشانة رقـيـة
انا لله وانا إليه راجعون ياطفلتي
انا لله وانا إليه راجعون ياغربتي
-------------------
ياجون ياحر عينونـي
ياعم حبيب تسمعوني
يا أنس ليش اتخلوني.. بالطف غريب
يا نافع اسمع واعيتي
ياوهب هب نسمة بريتي
گومولي خلصت عافيتي.. شابع نحيب
طاحت رايتي ولا ظل أخو يـمـي
لا صحبة وهـوه بالكوفة ابن عمي
اجت صـوب الخيـم تدنّه عدوانـي
يسلبوهن تره بس ينسلب هدمي
انا لله هاي الخيل وصلت
انا لله واعله خيامي هدت
انا لله بيه الحيـرة كـبـرت
انا لله وإنا إليه راجعون ياحيرتي
انا لله وإنا إليه راجعون ياغربتي
------------------
ظليت اجي للشط وارجع
مامرتوي وياحيف اسمع
هتكو حريمك ما تفزع.. تحمي الخيام
لو رحت ظل بالي اعليهن
عطشان بس همي ارويهن
نسواني راح اليحميهن.. والله حرام
عطشان وحرت نسواني عطشانه
وما عندي اليجيب الماي بس آنه
اروحن لو احاميهن حرت بأمري
بـس حسيـن هيج احتار بزمانـه
انا لله عطش ماخذ اطفالي
انا لله وجيش العده گبالي
انا لله يبچي الصخر حالي
انا لله وانا إليه راجعون ياوگفتي
انا لله وإنا إليه راجعون ياغربتي
------------------
ساعة واطيحن ياصبحي
المثلـث ايصير بگـلـبـي
وزينب على حالي تربي.. تنادي حسين
عالتله تصعد توميـلـي
بچلمة اخي تهدلي حيلي
وانه ادعي و اهْيه تدعيلي.. والله المعين
اشوفنهن عليهم طاحن خيامـي
ويطلعون الحرم واطفالي گدامي
و اموتن من تصيح ارقية يابويه
والله يعينها لو رضو اعـظـامـي
انا لله من تركض رقية
انا لله وسكينة وصفية
انا لله تطلع چم سبية
انا لله وإنا إليه راجعون بمصيبتي
انا لله وإنا إليه راجعون ياغربتي
----------------
حسين علي التقي
خط الحرايب خطه
وكـل الليوث تغبطه
مسلم وما أدراكَ ما مسلم
----------------
تجيّشو يم بـيـت طوعة گالو تحاصر بعد
دروب ضيگه وهو وحده لاظهر عنده وسند
الهاشمي مادرو لو يغضب ولا يعرف عدد
اجه ليث ابنص قطيع وحته راعيهم لبد
مطرت غضب چفينه
وحومرت للطگ عينه
مسلم وما أدراكَ ما مسلم
----------------
طشهم ومن برز شافو چنّه جيش بصولته
تهيئلهم علي جـاي بـذو الـفـقـار و لآمـتـه
مثل ابو طالب وگفته وحيل حمزة بسطرته
وغيرته منه ابو فاضل ياهو يحمل هـدّتـه
ركضو ركض بالخوفة
صاحو منو البالكوفـة
مسلم وما أدراكِ ما مسلم
------------------
ردهم لقصر الأمارة سوّه بالعسـكـر فلـم
كلها لأبن ازياد شردت صاح خلوني افتهم
الحگ تحاصرنه گـالـو والقـصـر لا ينهـدم
هد علينه زلمة حوك اكبالة ما توگف زلم
الحگ تـره تورطنـه
ماگلت مسلم ضدنه
مسلم وما أدراكَ ما مسلم
------------------
ياأمير الحگنه وصّل روسنه فوگ السطوح
اخذ منه(هدنه)لحظة الجيش ماظلتله روح
صرنه منعد الضحايا من الجثث ماكو وضوح
هذا زلمة من الحسين تريدنه لكربلا نروح؟
مسلم وسوة سواية
بكربلا هـاشـم جاية!!
مسلم وما أدراكَ ما مسلم
-------------------
هذا مسلم هيج وحده شلون ندخل كربله
دروب ضيگه وما گدرنه شلون باجر بالفلة
و آل هاشم كلها جاية وكلهـا زلم امعـدلـة
أبو فاضل لايجينه النهر احنه نوصله اله
بـس مسلـم وتعبّــنـه
شلون الگمر لو گضنه
مسلم وما أدراكَ ما مسلم
--------------------
حسين علي التقي
باليقضه والمنام .. ياخذني شوگ وحنين
بگد دربك الطويل.. مشتــاگـة ام البنين
وادعي انه ياغريب.. سالم ترد ياحسين
مديت..
ايدي بصلاتي ودعيت
سالم تردلي ياريت
لطولك ييمه حنيت
ياكون..
بخدر الحراير ام عون
بخير وعسنها الظعون
ولأرض الوطن تردون
هاجس منامي يمه مر عليه
وتدري گلب الأم يشعر الأذيه
يايمه كون بخير بعده ظعنك
واعله الترايب مامشت رقية
---------------
يجرحني الأنتظار.. وجارحني يوم الرحيل
بُـعـدك عليـه نـار.. ابالي الهواجـس تعـيـل
وبعيوني چن اشوف..بالخيمة نار وعويل
حسيت..
گلبي گرصني وبچيت
چــن اهلـك بلا بيت
گلت متوهمه ياريت
والنار..
مشت بخيامك النار
وعليلك وحده محتار
ويريـد لعمتـه نـغّـار
متوهمه مدري هوه هذا حالك
عطشان وبسيفه الشمر أجـالـك
احلامي صارت بالظعن عجيبة!
بالهيمة اشوفن طش ظعن دلالك
------------------
عطشانتك حسين.. وخاف العذب مايلوح
بـ عبدالله والعيال .. وبشفـتـك بس جروح
من تعطش انته راح .. كل العطاشى تروح
عطشان..
يل جارحلي وجدان
شو بيه العطش حان
بس لا يبني عطشان
مطروح..
خاف بهيمة مطروح
حسيتك ومـذبـوح
طايح كلـك جـروح
حيل اعطشت يابو علي لحنينك
كل خوفي عطشان ارتمه جبينك
طيحه الامام ابنص غرب مصيبة
ولو دونك اخو طايح منو اليعينك
---------------
صار الحلم عذاب.. من بعد كل الأنتظـار
رد ظعنك الغريب.. وبالهزل مالـه وقار
جاي بنسه وعليل.. بلا رآيه يمشي بنهار
ويلاه..
شفته وصحت ويلاه
ظعنك محد اوياه
جاي بلا ولي وجاه
متعوب..
ظعنك حيل متعوب
امبين گاطع ادروب
ومتغيرين فد نوب
ردلي الظعن بس رجعته مصيبة
لا رآيـة عـنـده ولا ولـي عجيبـة
من ماشفت حادي الظعن گمرهم
گلت العله ظهـور الـهـزل غريبـة
------------------
حسين علي التقي
نعي لمولاتي العليلة (ع)
منهد روحة ظعونك وآنه ليلية
أبـرد بالدعـاء وظنوني مچويـة
واليمسّه الهجر تذبـل معـانـيـة
يا سبّاح گلبي ويـاهـوى الـريـة
يـا بـويـة بعد ياعيشـة مـن دونـك
ذبـل لـونـي يغالـي و انشد شلونك
حگها عيوني تعمه امفارگة عيونك
وردة وعودي طگ من شالت ظعونك
اليفارگه شخص غالي يهد حيلة
وأنه بليلة وضواها فارگت عيلـة
شيسد شوغة أبو راح بمداليلــة
وعـايـف طفلته بـعلّتهـا تربيـلـه
عفتونـي بجـرح مايبـره عفتونـي
بچفاكم كلشي يجرح يل چفيتوني
وما گلتو عليلة وذبـلـت اچفـونـي
على هـذا الهجـر چنكـم تموتونـي
رشيت الدمع بوية اعله مگفاكم
عسه ايرد بيكم الدرب الي وداكم
يـل ماشيـن گـلـبـي والله ويـاكـم
جذب أطبگ چفن بالليل وانساكم
شنسه وظل عطركم يجرح انفاسي
وبيتي وحشة صاير ياهلي ناسي
وبيبانه عگبكم تجرح احـسـاسـي
لو هزها الهوى شيب اشتعل راسي
بگت يم حيرتي ام عباس تشكيلي
أذب كل حيلي يمها ودمعتي بليلي
شتحچيلي بچيت وشحچي تبچيلي
ولـو أگللهـا أبـوي اتـگـلـي ياويـلـي
شنهو اخباركـم واخباري هـاي آنـه
عسه بخير الظعن واعزازه واحنانه
وعساها مـخـدرة بخيامه نسوانه
ولا مسّه العطش يابوية عطشانه
على السجاد حگنه لو نون و انوح
لمثل مصابه ياكون الچفن مقروح
ياهو المثله وي عماته مسبي يروح
بگاع الطف دفنله ثمنطعش مذبوح
على السجاد أويلاه.. على السجاد أويلاه
----------
خلي نعيش حزنه العاشه ذاك اليوم
يوم الظل غريب حسين بين الگـوم
سمع واعيته بس ماعنده حيل ايگوم
و ردته لخيامه عمته بـس مهـظـوم
-----------
حگه هم عليل وما يظل بـي حـيـل
وسمع اضلاع ابوه مكسورة چوه الخيل
ويا حال السده بحاله الظهر والليـل
من غارت على خيامه الزلم وصهيل
-----------
فرّن عمه صاح بنبرة بيهـا مصاب
طلـعـن للبـراري لا يـجـي الـسـلاب
حاميچن يعمّه ومن خيمچن غـاب
گصادة الناس جاية تحرگ الأطناب
-----------
يعمه لرگضتچ بالهيمة شد حزام
هاي الناس ماعدها صلة بـ أسلام
ماتعـرف حـرم لا تعتـرف بـ أيتام
ذاكة راس ابوي اعله الرمح ينضام
------------
غـيـر الهيمة مالـچ عـمـه طـريهـا
و عينـچ يـم بنات احسين خليها
و رقيـة بالرگض بأيديـج لزميهـا
اذا عفتـيـهـا ما تبقـى تـراچيـهـا
-------------
وبغـضـاً بعلي هل الناس اينهبونـه
وعلى نـوگ الهزل باجـر يركبـونـه
يعمه وبالحبل تدريـن ايچتفـونـه
أسُارى لمجلس ابن زياد ايودونـه
--------------
سولف لأبو حمزة مصايب الأخبار
يگـلـه يـوم عـاشـر طلّعلنـه أسـرار
شما اصد اعله عماتي الدمع مدرار
و اتذكر رگضهـن بيـن خـيـل ونـار
--------------
ابچيله بچي المفجـوع بـ أولاده
لليصبن عيونـه شما كـلـه بـزادة
يبو حمزة القتل لآل النبي عـادة
لچـن سـامـع مرة مسبية للسـادة
---------------
يبو حمزة اسمعت علوية بين أزلام
يچتفوها بحبل واعله الهزل تنضـام
اليچبي دم على مصايبنه ما ينلام
كلهـا كلفـة بـس الشام آه يـالشـام
اللهم عَجّل لوليك الفرج
ظعن الفواطم فارگ دلاله
وطول العقيلة بين خيالـه
عافت اخوها بيا حالة حاله .. مصيبة
ظعن اليگفلة بدر العشرة
ديرة تبشر بيه اعله ديرة
وسفه العلاوي صارت أسيرة .. غريبة
قبل چـان امانه الگمر يفّرشه
وعطش ظعنه من النهر عَطّشه
اختلف حته مشيه بغرب من مشه.. ويوادم حشه
بشر مو بشر
انگلب عگب ابو فاضل اسم الظعن
اجه فاطمي ومسبـي فـره الـزمـن
فـواطـم عـلـي انچتفن و بالعـلـن .. بنظر ينعـمـن
وسهام النظر
طلعن طلعه بـذاك الظهر
بوجه الهيمة شبعن هطر
مچويـات بحيرة وجمر.. ويلاه ويلاه
بـ لليلة تغيّر اسم الظعـن
مسبي صار بساعة زمـن
بنوگ الهَزلة يتـصـعـدن.. ويلاه ويلاه
-------------------
ياطف هضمها ويوم المصيبة
اشسـوه بگلبها وطلع نحيـبـة
مـا ظلـت الها خيمـة عجيبـة .. العقيلة
خيل وعطش وبخوف العقائل
اوجـوه اليتامـة مثل السنابل
بس هيه ظلت عگب ابوفاضل.. كفيلة
كفيـلـة بعليل ويتـامـى وحـرم
العصر طيّح اعليها سگف الخيم
وكلها تون من عطش لـو ألـم.. ومحد سلم
من العايّلة
اجـه الليل وضيّع عليها الـزغـار
وتـعّـب جدمها الركض بالـنهار
ولا بيها حيل انـچـوت بالـفرار .. بقت بيها نار
ومشت مايّـلة
ااه يا ليل الـحـادي عشـر
شبّع زينب ظـيـم وقـهـر
مضيعة ايتام بوادي الكِدر.. ويلاه ويلاه
الما شافته بلليل اهدعش
بحافر يعني گلبه انفـرش
والباقي ينوح امن العطش.. ويلاه ويلاه
-------------------
اتغرب ظعنها بلليلة وضحاها
لا هـودج ولا بـيـرغ عّـلاهـا
الجايبها اخوها شامي حداها .. أسيرة
وين الكفلها بـدر الـهـواشـم
طـاح وخدرها صبّح غنايم
بالهيمة طلعت كل الفواطم .. حَسيرة
على الهزلة شافن اخو منصرع
يويلي الظعن غـرّب بيـا وضـع
وطلع وسفه صوت الي مامنسع.. بگلب منشلع
هضيمة وقهر
هضيمة العقيلة بلا فَـي مشت
ولا رآيـة فـوگـاهـا مـن انسبت
او چلـمـة سبية عليها انحجـت.. لمن ودّعت
اخو اعله النهر
ومـن راحـت بيديها الحبل
مـا شالتـهـن فـوگ الـهـزل
شلون اوداع ايشيب الطفل.. ويلا ويلاه
ممشه الحادي ماتدري وين
اوداع الخوة وذيچ السنين
فوگ الناگة وصاحت حسين.. ويلاه ويلاه
---------------------
مـن ودعتهم حسرة جبيرة
وحادي ظعنها ماعنده غيرة
والناگة عرجه والحيرة حيرة.. بمشيها
صوب النجف گالو واهيه گالت
الـدنيـا يحيدر ويايه مالـت
يم بيت ابوها وحيطانه ناحت .. عليها
وجرحو صبرها الظعن من عبر
على بيت ابوها وگلبها انكسـر
مر ملگة كوفتها والحـال أمَـر .. وشبعت قهر
بموقف صعب
بنسوة ظعنها العشاير خـذت
ولطمت وجها الغريبة وبچـت
وبنات الرسالة لوحدها بقـت.. بخرايب صفت
تبات برعب
كلها اداعـي بنسوتهـا ليـش
بس ام عون يگودوها جيش
مسكن ماعدها وبـي تعيش.. ويلاه ويلاه
غير الخرابة ما ظل مكان
تـگـعـد بي زينب يا زمـان
بهاي الكوفة بيت الها چان.. ويلاه ويلاه
---------------------
حسين علي التقي
وصية مولاتي فاطمة الزهراء(ع)
الى مولاتي زينب الكبرى (ع)
شمِّيهِ في نحره ، قبِّليهِ في صدره .
بنتاه يازينب .. بنتاه يازينب
-----------------
يمه زينب.. گلبي ينحب.. سمعي يبنيتي
أخذي مني.. هل الوصية .. لو تغربتي
يبنتي الـوصيـة هاي احفـظـيها
وترچية بأذانـج يـمـه علگـيـهـا
هناك بكربلا لو طاحو اخـوانـج
من يبقى الحسين لوحده نفذيها
شمي نحره آخ يانحره
ينطبر يمه ثنعش طبره
وبعد نحره قبلي صدره.. الحافر يكسره
شيلي همه باجر بهمه
گباله جيش وتعطش اخيمه
كل انصاره تموت يايمه.. وينحني هضمه
بنتاه يازينب.. بنتاه يازينب
--------------------
صدره هذا .. الچان يقبله .. سيد الكونين
يمه باجر .. بالحوافر .. ينطحن مرتين
باجر غصة يوگف وحده وينادي
راعـو قربتـي من النبي للهـادي
انسوبنـي انا مَن ما تعرفـونـي ؟
وصدى صوته يرد ياوسفه بالوادي
يعرفونه وهاي المصيبة
وبالسهام الوادم تجيبه
بدمه تالي ينصبغ شيبه.. هاي المصيبة
عالترب محد حفظ گدره
آخ وشموس الفلة تصهره
يصيح ويلاه يمه يازهرة.. الخيم مستعرة
بنتاه يازينب .. بنتاه يازينب
----------------------
بدون اخوته .. يبقى حاير .. وحدچ بصفه
بلا عَمامة .. والـعـمـامـة .. بالترب تصفه
ويازينب تقدميلـه المهر انـتـي
اسندي بالصبر ويطيح لو طحتي
يزينب لـو بـقـى يتلفت لـوحـده
بهاي الحيرة حسبي بكربلا ضعتي
وحـدچ بحاله تعينينه
حاولي بسرعة تودعينه
ولو بقى أكثر تعطيشنه .. وتطلع سكينة
لاتأخرينه على المصرع
حيرة وبنياته لو تطلع
ينكسر برقية من تدمع .. وحـالـه يتفجّع
بنتاه يازينب.. بنتاه يازينب
------------------------
كلشي بالطف .. تالي حيرة .. لو رجع مهره
يمه عالتل .. تشوفينه .. ايطيح عالغبرة
بهل الحاله يزينب مـن تنظريـلـه
ييمه مـن عـذابـه يخلص ادعيله
اذا شفته الشمر صاعد على صدره
رگضـي اعلـه بناتـه ولا ترگضيلـه
بالظليمة من يرد مهره
صعبة يمه طلعتچ بره
وبره خيل وناس منتظره.. تدور العثرة
والمنادي ينادي طلعوهن
كل خيام حسين حرگوهن
وكل بنات الزهرة سلبوهن ..بهيمة رگضوهن
بنتاه يازينب بنتاه يازينب
----------------------
حسين علي التقي
لسان حال مولاي عبدالله الرضيع (ع)
من شفتك وگفت اگبالي حيران
ناديتك تـجـي وتاخذنـي قربـان
لسهم المنية ارفعني
ليش العطش يكتلني
---------------
ما اريـدن هيـج اشوفـك بويه حايـر
هاك نحري وحطه ويه ذيج المنـاحـر
خاف اتحسر علـى هل النصرة بـاجـر
ليش اعيشن باقي عمري بگلب حاسر
يـم منّحـرك وسّدنـي
ليش العطش يكتلني
----------------
العطش ظب حباله يابويه اعله جيدي
فـدوه اخـذنـي السيف مايرهـم بأيـدي
چفك اشگد شال دم ظل بـس وريـدي
حلـمـي بچفوفـك امـوت وهـذا عيـدي
خلي السهم يذبحني
ليش العطش يكتلني
-----------------
بعمر ست اشهر واجتلي وياك فرصة
وبـعـد مـا اريـد اكبر وانعاك غَـصـة
كون عگبك ما يظل هالشوف فـصـة
من وراك العيش بـس للحـزن حصـة
بعـمـري فـلا متهنـي
ليش العطش يكتلني
------------------
عمري كلـه صـار سفـرة ويـه رحـيـلـك
بوية لا مو من عطش جاي اتشكـيـلـك
ردت اسـنـد ظـهـرك الـحـانـي كفـيـلـك
طفل هد حيلي العطش ومواسي حيلك
مابيدي حيلة اعذرني
ليـش العطش يكتلنـي
------------------
بوية نيتي نصرتك ما اريد اجرحك
شفت بعيون أمي گرّب وكت ذبحك
وسولفلّي عني سبي وخيالة تضحك
راسي خله يطيح لـو راسك برمحك
راسك يشيخ ايهمني
ليش العطش يكتلني
-------------------
حسين علي التقي
لسان حال مولاتي ليلى (ع)
علي الاكبر يغالي
يـا عــزي ودلالـي
گارصني كلبي بروحتك من هالوداع
انه اخاف اعله طولك
مـن غـدر الـيـجـولـك
من تبتعد گلبي تره ايگوده الضياع
يايمه گلبي بي حزن،، خافت يون،، ملچومة
بس لا تروح وماترد،، يل مستعد،، للحومة
چني دريت بهل روحة هاي
للـخـيـمة ماترجع يا ضناي
درب العطش ماخذ چم عزيز
وچنك تروح وماتلگه ماي
علي الاكبر ييمه علي الاكبر ييمه
-----------------------------
قـمـر لـيلى يروحي
يبلسم كل جروحي
ظـلـمـة تره كلشي يظل لمن تغيب
يضي تارس الخيمة
روحي دونك يتيمة
متحلّفة گاع الوغى اتخلك سليب
مو تدري نار اموجّره،، بگلبي تره،، يـولـيـدي
بالحومة منتضرك ذبح،، يبوگك رمح،، من ايدي
كـل الـمـشـو مارجعو عجب
الحومة تضملك بس التعب
خوفي جمالك بالدم ايروح
وراسك يشيله رمح الخشب
------------------------------
يـا اعز كـل بنيني
الك ذروة حنيني
ربيتك امكيفة اكبرت تالي تروح
مـو للذبح ذاخرتـك
كلت تكبر واعرسك
تتحنة تالي ياعلي ابدم الجروح
أرباي وذخرتك للكُبُر،، شبر ابنذر،، ربيتك
امنيتي سكتها الذبح،، راس برمح،، تاليتك
ياشمعتي التضويها الخيام
بـفَـيّ گلبي ردتـك يمه تنام
شجابك تنام بعين الشموس
اعليك الحوافر صار ازدحام
-------------------------------
يـمـه موهذا گدرك
بهيمة ينتثر عطرك
ايطيح النده بس عالورد مو بالهجير
يـا زهـرة سنينـي
لموتك تعمه عيني
مـا تـلـتـم وصـايـر وذر يـبـني الأمير
شـيـلـمـه تـاليها الـعـطـر،، مـن ينتثر،، بالهيمة
ياهيل ولمن تنسحگ،، عطرك يطگ،، بالخيمة
بذيج الحوافر لخيامي أجت
عـطـرك وصلنـي يبن البخت
مـنـهـا وعـرفتك صـايـر وذر
شگد الخيول بجسمك مشت
------------------------------
تـالـي بالسبـي شـفـتـك
ابرمحك امفطره شفتك
بس منطفي وجه الگمر مومثله ذاك
بالرمح تالي نومك
ذوبلت كل رسومك
بگصتك حجر باقي أثر تنگط دماك
نـايـم يـويـلـي عالرمح،، وجه الصبح،، معقولة
شيحمل يگلبي جمرتك،، من شوفتك،، مذهولة
دربي بعيد وگدامي اشوف
بس السموم براسك تروف
لو هبت الريح أشهگ وأموت
بس لا تطيح بدلالي خوف
-------------------------------
حسين علي التقي
قطب رحّة الحومة بچفوفه سِكن
مالت و عجّت و فرها چن رسن
مـن عله ظهر المهر سمعو يصيح
(أن تنكروني فأنا نجلُ الحسـن)
أجه يجدح نار سيـفـه
وبـرگبـهـم يـكـر كـيـفـه
توسط ابـنـاء الـبـغـايـا
صال وجال واخذ حيفه
هوَ القاسم .. هوَ القاسم
------------------
طلع فلقة قمر من صوب الخيـم
علـي چـنّـه والـيـلاگي مـا سـلـم
سيفه بالقادة يلم چن ذو الفقـار
هيچي فوگ ارگابهم سيفه ختـم
شهم من بيت ابو طالب
ومثـل حـيـدر بالحرايب
اثنعش عمره و دوهناله
اثنعش صف من الكتايب
-------------------
صال وشد شدة أبن خير العمل
چنه ابو محمد وصال اعله الجمل
سيفه يكرم بالـزلـم وارث ابـوه
صـار ذاك اليـوم بچفوفه الأجـل
من تطب للحرب هاشم
لازم اتـدمـي الـصـوارم
الحسن گالـو رجع لينـه ؟
ما نظنه الحمل قـاسـم
-------------------
بچـفـه عزرائيل ما چنـه حـسـام
ظل على ارگابِ الزلم يقره السلام
واحد وشردت من اچفوفه ألوف
صـار يفريهم فري خصم الكلام
القاسم وسوه عمايل
للحسين ازغر مقاتل
هيج و اتطشر شلمنه
بيش نتلگه ابو فاضل ؟
--------------------
هناك صاح ابن سعد شنهي الجرة
منو الجاب الميمنه اعله المسيرة
گالو ابـن الحسن هـذا البل نـزال
اشحالـكـم گلهـم بسبع الگنطـرة
گلهم القاسم دهاكم
وعالشاطي طشراكم
ننسحب معناها لازم
غير ابو فاضل وراكم
--------------------
حسين علي التقي
عندما رجع مولاي الحسين من مصرع مولاي ابا الفضل
اصبح الحوار بينه وبين مولاتي العقيلة عليهم السلام
راجع بيا حيرة راجع منفضح همك
هاي كسرة خوة بيك وزينب تفهمك
رحت للكافل واجيت بدونه ياخويه
شكثر صافن لعد بيه وبيّن برسمك
من عيونك سهم بعينه
مبين خجلان من سكينه
وجفوفك ترجف فهمتني
طايح عبـاس وجفينـه
عباس عباس.. بعيونك تأشرلي
عباس عباس.. طايح لا تسولفلي
------------------
حيرة صاير لغز كلك مدمعك واضح
بس دموعك تحچي كلشي عالنهر طايح
لخيمته رحت وفهمت شرايد تـسـوي
گـلـت رايح فَي كفيلي والخدر رايح
وجهك ما يتفسـر سره
بس بظهرك لآحت كسره
مايحتاج تطيح الخيمة
زينب تفتهمك بالنظـرة
عباس عباس.. هذا مناشغك گلي
عباس عباس.. طايح لا تسولفلي
-------------------
تمشي مشية شيخ جنك ناهبين أهله
وچنه الضيم الكون كله برگبتك حمله
جيت من الشاطي كلش متضح شيبك
شكسر بيك الطاح گلي بظهرك شخله
مبين ما ظلتلك تچوة
جاي تجر بحيلك گوة
چاا حگک تتعثر خويه
بيك انحل حزام الخوة
عباس عباس.. يزينب ودعت خِلي
عباس عباس.. طايح لا تسولفلي
---------------------
شكثر من مصرع اخوتي للخيم راجع
لچن أول مرة اشوفك جيتني تنازع
ثاري طيحة ابو الراية كلفة بالحومة
وفهمت ليش الاعادي لخدرك يبـاوع
چنهن گربن يابو الشيمة
چتلك والرگضة بهل الهيمة
هسه عرفت بدون الكافل
عمدان اخيامي بلا قيمة
عباس عباس.. عامود الظعن وأهلي
عباس عباس.. طايح لا تسولفلي
---------------------
كربلا ياخويه فرغت هسه مـن كافل
يعني وكت السبي حل وطاح ابوفاضل
جيت من مصرعه مايل وعرفت دربي
راح اطـب للشام باجر والـظـعـن مايل
الماخلتني بحيرة چفوفه
يعرف راح اطلع مچتوفه
وبعد عيونه عيون الوادم
تشبع شوف بسوگ الكوفه
عباس عباس.. برمحك خويه باوعلي
عباس عباس.. طايح لا تسولفلي
--------------------
حسين علي التقي
لسان حال مولاي أبو الفضل بآخر
وداع مع مولاي الحسين عليهما السلام
لا تلتفتلي.. خلي عينك عالخيم
لا تلتفتلي.. واعتذرلي من الحرم
وصل لزينب سلامي
مودعك بالله يضامي .. لا تلتفتلي
-----------------
عوف سهم العين خويه واسمح الدم
وجرح هاي الچربة ما يرهمله بلـسـم
ايعـز عليه ادور ظهـرك بـس الأعـظـم
بـعـد شـيـصـبـرها زيـنـب بـالـمـخـيـم
خويه بموادعنه الله يعينه
لـچـن زينب باقيّة اتانينه
وهاي اول مرة نبطي ثنينه
وگفت تتاني.. واحنه مو يمها سوه
وگفت تتاني.. وجاب شوغتها الهوه
ألها جرح بگلبي دامي
مودعك بالله يضامي .. لا تلتفتلي
------------------
شگد حِچينه دموع والدمعة الأخيرة
چنها گالـت مـو گمـر طايح عشيـرة
طـاح جيشك أدري بالـرآيـة الچبيرة
و راح تتشمت خلگ ما عدها غـيـرة
كسرتك گدامي هدت حيلي
وطيحة الرآية بسبي توميلي
وموتتني من گلت تچيـلـي
ماهن چفوفي.. حته اعدل مشيتك
ماهن چفوفي.. حسرة ظلت شبگتك
صار ظهرك گوس رامي
مودعك بالله يضامي .. لا تلتفتلي
------------------
خويه ادري بگلبك اشكد حن عليه
لچن گلبي باقي يـم سكنـة ورقـيـه
جرحي هين بس عطشهن حيل أذيه
بمستحاي اتركني طـايـح عالوطية
من الرجعة للخيام اعفيني
أدري ببنياتك اتـانـيـنـي
وخاف عندك ماي لاتنطيني
خليني ضامي.. روح لاتـهـتـم بعد
خليني ضامي.. منطي لسكينة وعد
ما اروه وعطشت خيامي
مودعك بالله يضامي .. لا تلتفتلي
------------------
سمعت بالخيمة رباب اتنوم ابـنـهـا
وسولفتله عن جربتي وماي اضنـهـا
من تـرد يـاكـون تـتـعـذرلـي مـنـهـا
سـهـم بـده احلامها وفـرغ حظـنهـا
وسهم هاي الچربه يتراولي
راح يذبحلك رضيعك تالي
يرد مهده وحظن امه خالي
المن تلولي .. من ترد بي منذبح
المن تلولي .. من تشوفه عالرمح
وصل لطفلك غرامي
مودعك بالله يضامي .. لا تلتفتلي
------------------
خويه خلصت والطف بعينك دركته
كلشي مبهم بس بچي السكته فهمته
يعني ساعة نحر نحرك گـرب وكـتـه
الطاح منه احزامه لازم تنسبي أخته
سولفتلي دموعك ابتاليهـا
باجر ام عون الغرب تحديها
عگب چفي تنچتف ايديها
من تلتفتلي.. و اهيه مچتوفه بحبل
من تلتفتلي.. بعد شيوگف الهزل
والحداها حادي شامي
مودعك بالله يضامي .. لا تلتفتلي
-------------------
حسين علي التقي
يا گلبي اتـعلـم الـوفـة
واخذ الثبات اجمل صفة
لو ردت غيرة ومعرفة يم انصار الحسين
--------------------
بكربلا سبعين باب احسين خله گبالك
شوف يا باب التدگه راح يغير حـالـك
ادخل امخيم انصاره واغرف اليحلالك
وهاي اياته العظيمة تنزلت الأمثالـك
يا گلبي هـذا مطلبك
ياهو التدگه ايطـببـك
سهم العشگ خيصوبك يم انصار الحسين
--------------------
ابدي من غيرة حبيب واعرج لتضحيته
بشيبته ويخدم امامه وافـطـن لتاليتـه
واليشيّب بالخدامة حسين يكفـل نيته
روح دگ بابه يگلبي تصير مـن تربيتـه
يا گلبي دگ باب الكهل
من شيخ انصاره انتهل
يتكفلك گـول وفـعـل يم انصار الحسين
-------------------
ولـو ردت بـاب العبودية تعال لجونـه
جون عالم جان ماخذ دور عبد ظعونه
اخذ من اخلاص حبه وصير عبد عيونه
واخذ لون الخدمة منه جون يخبل لونه
يا گلبي و دربك صعب
جون اسمر وابيض گلب
و بابه يغيرك من تطب يم انصار الحسين
--------------------
باوع بعين المواقف تگله عابس خادم
مكتمل ايمان حبه وبـ ابو فاضل هايـم
عاقل بحب الحسين وما انجن وفاهـم
هوا تربيت ابو اليمه وبالأدب لا عـالـم
يا گلبـي اتأسه بالأدب
وبعابس اتشوف العجب
و ابابه اطلب حب وهب يم انصار الحسين
---------------------
حسين بيبانه وسيعة وكون رايد توبة
أگصد لباب رياحي واخذ نيته وثـوبـة
الجعجع بظعن الحسين ومحه كل ذنوبه
مثله روح بنية عدلة وتوبتك محسوبة
يا گلبي قـرر الصدگ
حر ابقى بأهواء العشگ
عـن نيّتـك لا تفـتـرگ يم انصار الحسين
---------------------
حسين علي التقي
علي قرآن ناطق والسماء تشهد
ابكتب الخاصة والعامة اتـقيـد
بعد هم تشهد التوراة والأنجيل
ويشهد كل نبي وكل وصي وكل معبد
وتشهدله الزبور وصحف ابراهيم
وشكو حرف انكتب من طه وتخلد
علي لوما علي جان اندثر الاسلام
وجان اصناهم حد هالوكت تُعبد
علي علم الله علمه وعمد للتوحيد
وبحور العلم عنده مايسدهن سد
علي سر الاله وآية التطهير
ولو لا جان محد كبّر اوحد
محمد منخلق من نور الله وهاي
اشارة لنور حيدر ما يحده الحد
علي شسولفت عنه الكتب والاقلام
بعد ختسولف الآخر بُعد و ازود
ولأن عيده الغدير انحسب اكبر عيد
ولأجل هاليوم هذا كل نبي مهّد
رتبها الله لأجله قبل كل مبعوث
والآلف انبيائه لغايته حشّد
واجه الخاتم وجايبها الوصية وياه
وجبرائل بيها امن فرح غرد
بلّـغ يامحمد شيل أيد الخيـر
استعجل گولها ولا لحظة تتردد
(مـن كُنت انا مولاه علي مـولاه)
صيح بعالي صوتك صيح يا احمد
هذا اعظم حديث ولون ما ينگال
معناها الرسالة منين اجت تنـرد
كمل دينك الجبته بتعب و ارواح
وموضوع الخلافة بعد خل ينسد
علي الاول بكلشي والله ما ثناه
وعلي نفس الرسول ابينهم محد
بعد رابع تريد تخله لو عشريـن
الاول يبقى اول وافهم المقصد
لأجل حب فاطمة مخلوق هذا الكون
ولوما علي كفؤ الزهرة ماكو أحد
مثل ماي الزلال بحبه منعجنين
ويل مايك عكر يالمبغض اتصيد
عيد ابن الحلال وانته مامشمول
وهذا العيد يكشف نطفت العيـد
اللهم ثبتنا على ولاية أمير المؤمنين (ع)
مولاي مسلم ابن عقيل(ع)
مسلم غريب..صحت مابين المله
مسلم غريب.. يهـل گاصد كربلـه
ياحسين امن القصر
سلّمت واسجد شكر
هسه بين اهل الغدر.. مسلم غريب
-------------------
صحت بدموعي يهل مجبل علينة
سـدّر بظعـنـك ورد بـي للمـديـنـة
تـره بينـت نـيّـة الكـوفـة اللعيـنـة
المسه بدينة شو صبح كافر بدينة
كلش عجيب.. ياحسين أمر الخلق
كلش عجيب.. والغدر عدهم رزق
بايعو نـاس الـظـهـر
ونكرو البيعة العصر
هسه بين أهل الغدر.. مسلم غريب
---------------------
تـره يحسـيـن الكتب بينـت حقدها
اليمي موش انصار بس الوياك گدها
تريد نوعية الـزلـم موش بـعـددهـا
ثنعش ألـف كـتـاب سبعينك تـردها
هذا النصيب .. مالي كافل لا سنـد
هذا النصيب.. ومابقه بغربيلي أحد
العدّة طلعت مو كثر
بقى لسبعينك الأمر
هسه بين أهل الغدر.. مسلم غريب
---------------------
بثوب دين الناس متغطي عرفتهـا
بعـد سبعينـك ولا صحبـة شفتـهـا
(لم أرى خيراً من اصحابي) فهمتها
النصرة بدماهم كلت يعني ادركتهـا
جون وحبيب.. لو بجيشي ماطحت
جون وحبيب.. على ذولي اتحسرت
صحبتك اصحاب سر
ولا اجـالـي مـثـل حر
هسه بين اهل الغدر.. مسلم غريب
---------------------
هنانه اليسالم حرب واضح نقيضه
مو طبع چنّه الغدر عدهم فريضه
بذل والاستعباد هل الوادم مريضة
الفاض خيره اعليهم بدم صار فيضه
دمي خضيب.. من بعد ذيج الكتب
دمي خضيب.. بالحبل تالي انسحب
اكتابي يحجيلك عسر
تره طبع الكوفة مر
هسه بين أهل الغدر.. مسلم غريب
----------------------
لـون مـرسـالـي اجـالـك أخـبّـرنّـك
ياحسين الناس متلهفة اعله طعنك
هاي ناس اوحوش ماترحم بظعنك
وتدري سَن سيوفهم شيريد مـنـك
راسك يشيب.. على ولدك من تصد
راسك يشيب.. للـخـيـم لـمـن تـرد
من يمس عبدالله ضر
تخضّب ابدمه شـكـثـر
هسه بين أهل الغدر.. مسلم غريب
---------------------
حسين علي التقي
عندما عاد الظعن الى المدينة
كأني بمولاتي ام البنين (ع)
بأول لقاء مع مولاتي العقيلة (ع)
عذريني اشتبهت وياج مذهولة
صدگ زينب ييمه أنتي معقولة ؟
رحتي وين وهسه وين
شحالج بلايـا الحسـين
-----------------
سألت عنچ.. بين ظعنج.. مـا عـرفــتـچ بـالـبـدايـة
أنتي زينب.. موش زينب.. لاصدگ هاي أنتي هاية
اشصاير بيج وهالگدر متغيرة
شو مكسورة وكلش متحيرة
ليش اعباتج محترگه وحمرة ؟
طولج ذاك اعرفه مبينه گصرانه
من خيالچ عرفتچ تالي حدبانه
حته طولچ ماهو زين
شحالچ بلايا الحسين
-----------------
أحچي يمه.. بگلبي هضمه.. وين خدرج والمهابة
ليش هيجي.. تغيريتي .. بـحـالـج اهـوايـه غرابة
وين أخواج وين أهل العزوة
يأم عون وحالچ يشرح بـلـوة
رحتي بخوة وجيتي بلا خوة
يازينب يفت حته الحجر حالچ
وينه الخذه بأيدج وينه كفالـچ
خاف مگطوع الأدين
شحالچ بلايا الحسين
------------------
شيخ ظعنچ .. وينه عنچ.. الما تعوفينه ويعوفچ
خاف طايح.. وخدره رايح.. سولفيلي عن طفوفچ
أدري احسينج لا متعوفينـه
من زغـرج ماعفتي يـحنينه
وجايه لوحدج يعني مگطعينه؟
من هـذا سكوتـچ ينشلع گلبي !
أحچي والصبر يايمه من ربي
گلبـي بـالله مستعيـن
شحالچ بلايا الحسين
------------------
يمه شحچي.. منين أبدي.. والمصايب كلها صعبة
حسين شفته.. گلبتّه .. الخيل وانه عيوني تـربـة
مـنـيـن أبديلج بمصاب العاشر
شفته ابن امي وحده بلا ناصر
تالي شفته يرض صدره الحافر
شحچيلج بعد عن الگمر وينه
ما ضلت چفوفه يمه لا عينه
مصيبـة يـا أم البنيـن
شحالچ بلايا الحسين
------------------
يمه تالي.. حسين عاري.. ظل ثلاثة بالترابة
وبدفنته .. ماحضرته .. لأن مسجونه بخرابة
راح اعـلـيـلـة ويدور عـونـه
تالـي احسين الغربة يدفنونه
و بوصلـة من قماش ايلمونـه
نعش اشرف بشر ماينرفع تالـي
انكسر ظهر العليل بدفنت الغالي
وكل اخوته مذبحيـن
شحالچ بلايا الحسين
------------------
يمه سمعي.. شلون وضعي.. صعدوني اعله الهزيلة
ناگة عرجة.. وصرنه فرچة.. بسوگ والحيرة ثگيلة
هواي وأكلفهن باب الساعات
والمستورة تذبحها النظرات
وبالشام ايسمونه المتغربات
بعد طبت قصرهم حيل أذتني
ورقية بالخرابة ماتت بحظني
من لگت راس الحنين
شحالچ بلايا الحسين
-----------------
حسين علي التقي
طفلة من ادي شال الصبر
من شالو اهلي لوحدي خلوني
كل لحظه بالفرگة انكـسـر
وبچلمة الله وياج عذبـونـي
حط حيله بعيوني الهجر
وحطيت ظعنك وين يعيوني؟
تذكرني بويه هسه لـو ناسيني
تدري صفه الهم بعدك ايمسيني
كبّرني حزني ومِله باقي سنيني
فراگك علّة علتـه
وكبرتني حسرتـه
وآنه اول بنـاتـك
هجرانك جـرعتـه
طال الهجر لو يگصر بدونك
نفس الوجع ومفارگة عيونك
------------------
بهل العلة و دواي ارتحل
وجان الدوه بس شوفة عيونك
ترجعلي حته أبقى بأمل؟
لو أگطع الضنّـه من اظـعـونـك
مـو علة عگبك لا عـلـل
وكل يوم علة عايشة بدونـك
كل ليلة علة وما تطيب اجراحي
انته بغربتك وانه أظل بنياحي
وبُعدك علية تـدري بـي ذبّاحـي
يل ماشي بظعونك
سوده الدنيا دونـك
شجوني بس دمعتي
وانته الطف شجونك
بين الأمل والهم ردت عونـك
نفس الوجع ومفارگة عيونك
------------------
شعرفني بدروب الفله
وحيل كرهتها بتبعـت آثارك
ومـرت بـأذاني كـربـلا
بهذا الاسم ظل تحترگ دارك
يعني گصدت كرب وبلا !
رسمتلي وادي بي علت نارك
بس لا صحت ياكربلا تعذبيهم
طارييچ ايشل الگلب و ادريهم
بوادييج اتعطشيهم اترگضيهم
يا وادي المصايـب
صدگ أهلي غرايب؟
العطش غير شكلهم
وظعنهم وي الأجانب
ولو راحو اعله الگاع يخلونك
نفس الوجع ومفارگة عيونك
-----------------
أسمج جرحني نينـوى
وحسيت راح اتغريبن أهلي
بداري وعلي ضاگ الهوى
و ريح الحزن من تربتچ هبلي
ويخبرني مذبوح الضوه
وشاع الخبر راس برمح خِلي
يانينوى مـوّتـي كل احـلامـي
وغرابهم خبرني جرح ايامـي
جايبلي گطرة دم نحر للضامي
گطرة دم حچتلي
تگول انذبحو اهلي
وباجر من ظعنهم
سبايا بس تردلي
ترد بس نسه متغربة بظعونك
نفس الوجع ومفارگة عيونك
------------------
حسين علي التقي
باجـر راح ياخذنـي بـرحيلـة
وما يجرحني يدريني عليلـة
أعرف ايصعدني باجر
وأبد مايكسرلي خاطر.. عليلة
----------------
ليلي گلة صافنة احسب بالثواني
من كثر تفكيري نومي ما أجاني
گلت ابوي امخلي بالهودج مكاني
حاسب ويه ارقية نفس الناگة آني
وحالة من صار الصبح كلش دهاني
شفته صعد كل خواتي وما خذاني
بالليل الفرح غطه اعله نومي
ومن صار الصبح ماگلي گومي
واوگفت گدامه اناطر
وأبد مايكسرلي خاطر.. عليلة
----------------
اعرف بحنيته ابوي شگد يحبني
گلت ما معقولة ياخذهم ويخلني
شفت دمعه بعينه وانضك بيه حزني
چنه جاي ايشيل ظعنه وموش ظعني
گلت ايصير گبالة وهوا يفتهمني
وأشرتله وظل يدير بوجها عني
صعدّهن خواتي وحدة وحدة
باوعلي ونزل دمعة اعله خدة
چنّه دمع اوداع كاسر
وأبد مايكسرلي خاطر.. عليلة
-----------------
گلته بويه امتاعي هذا ماتشيلة
صارت بگلبي تره الحيرة ثگيلة
گلي يبنيتي تره السفرة طويلـة
وگتله سهلة افراگك ولا بيه حيلة
عادي اتحمل سبي وسوط وهزيلة
كلشي بس لتعوفني بداري عليلة
كلشي اتحمل وداعت عليلك
بس لتعوفني لوحدي دخيلك
احتمل كل ظيم عاشر
وأبد مايكسرلي خاطر
-----------------
طوّلت لو گصّرت بويه سفرتك
بالثنين أنجرح يالغالي اعله بختك
هم حنينة وهم عليلة تدري بنتك
وميتة لا تحسبني. بس امفارگتـك
طلّعت روحي من الباب بطلعتك
وگلبي گلي ماتـرد بـآخر شبگتك
وصارت علّتي من هاي فرگة
وتخيلت جسمك گرب سحگة
وبرمحهم راس حاير
وأبد مايكسرلي خاطر .. عليلة
------------------
حسين علي التقي