531
كل ما نملكه من فضل مولاتنا فاطمة صلوات الله عليها https://t.me/husseinalialtaqi
جيتك يسگّاي الخيم
طـالب تثبتلي قـدم
تكبر جروحي لكربلا
لو چفك بچفي لـزم
مولاي اريدن طلبتي
خليني أعشگ خدمتي
يا ابا الفضل زدني فضل
وبعمري اظل بحرگتـي
يابو الفضل زدني ،، بالغيرة حصنّي
طهرني يا ساقي ،، ولفطرتي ردنـي
گلبي بألف حيرة،، أكتبله تغـيـيـره
عبدك أجه لبابك،، وبس بابك يجيره
أبا الفضل
متوسلك حاير،، گرّب جرح عاشر،، هبني دمع ناصر
أبا الفضل
من غفلتي شارد ،، جاي بگلب بارد ،، ولخيمتك رايد
يا ساقي كربلاء.. حزمني للعزاء
---------------------------
قاريها أيمانك صـلـب
ياسيدي علمني أحب
أيماني باهت بالعشگ
ضوگني من جودك عذب
من چربتك نَدّي علي
سائل الك مديت أدي
والگطرة من عندك نهر
لا والله هم احسبها رَيّ
ياعين للزهـرة ،، منك ردت گـطـرة
ضايع انه وضامي،، وناديتك بصحرة
غيرة علي نَدي ،، يم بابك امجدي
تدريني مسكينك ،، غيرك ولا عندي
أبا الفضل
لآيذ على اعتابك ،،وشعندي بس بابك ،، بچيني لمصابك
أبا الفضل
خل سهمك بعيني،، حرگة بچي انطيني ،، للزهرة وديني
----------------------------
للعاشر أرزقني همم
قربني دمعة للخيم
دگيته باب امروتك
شد غيرتي يابو الشيم
خليني ابچي وانفجع
وحزني يظل بيه طبع
وما اغيره لحد موتتي
وبالعاشر اكسرلي ظلع
وبگلبي حط حسرة،، لمصيبة الحرة
وكتي البچي رايد،، ما أنسبق نصرة
مولاي كون احظه،، بالنظرة لو لحظه
وتفجعني بالعاشر،، وبـنـاره اتـلـظـه
أبا الفضل
ياسيدي ادخيلك ،، شد حرگتي بحيلك ،، بداعت مداليلك
أبا الفضل
گلبي الحزن عشه ،، بغيثك بعد رشه ،، وخلي الألم نقشه
-----------------------------
خليلي بدموعي صدق
والدمعة من بابك رزق
للخدمة بابك بوصلة
ودگيته بگليبي القلق
بمروتك كون أنكفل
جتفني بحبال الوصل
والحب مصاديقه الدمع
من حزني مارايد أمل
ماريد أظل حاير،، من عاشر لعاشر
خليني يامولاي ،، أبچي بدمع طاهر
رايد أون وانحب،، بالخدمة ما اتعب
شد حيلي يالكافل،، بداعت دمع زينب
أبا الفصل
ارزقني جرح عمره ،، بالغيبة مايبره ،، للدمعته حمرة
أبا الفضل
سويني اله زلمة،، وخل مهجتي يمه ،، وانتظره بالهِمة
-----------------------------
حسين علي التقي
وصول ظعن مولاي الحسين(ع)
حـط بكربـلا ظعـن الـفـواطـم
وينصب بالمخيم گـمـر هـاشـم
شدو الحيل خل نتلگه الحسين
نشـد العـزه ويـه الـخـيـم لازم
خل نگله ياهـلا
نزل ظعنه بكربلا
باللطـم نستقبلـه،، ياحسين
ياهلا بحسين وعياله
باللطم والبچي نبراله
نعزّبه عزوبيه تحلاله
ياهلا بظعنك يبو الأكبر
--------------------
يالگاطع درب من يثرب وجاي
نصبالك مواكب لأهلك فـيـاي
وگفنه بالدرب علگنه رايـات
رسايلنه صدگ تدريها مـولاي
صح وگفنه بس الك
مو انـجعجـع بهـلـك
بالـعـزه نستقـبـلـك،، ياحسين
هلا بظعنك ياولي النعمة
شهرك اعلينه يصب رحمة
الك نتنافس على الخدمة
ياهلا بظعنك يبو الأكبر
--------------------
شهرك جاب كل الخير وياه
رزق دموعنه واللطمة والـ آه
اتجاه الدنيا بس لكربـلا صـار
وصار الكون ينبض وا حسيناه
عـنـدي اكـبـر النِعـم
گلبي لو بيك أنلجم
ومن تعدني يالخدم،، ياحسين
بتوبة الحر سيدي جيتك
كـون تقبلـنـي بحسينيـك
احظر ويه الخدم تعزيتك
ياهلا بظعنك يبو الأكبر
--------------------
لأيـامـك نـعـد ايام و شهور
من العام حرگتنه اعله عاشور
نظل يابو علي عالعهد باقين
الدم بگلوبنه لمصابك ايفور
انطينه للزهرة عهد
ما نعوفك للأبد
حبك ويانه انولد،، ياحسين
راضعيـنـه حـبـك بـفـطـرة
عِشرة نبقى وياك مو عَشرة
عـهـد و أنـطـيـنـاه للـزهـرة
ياهلا بظعنك يبو الأكبر
-------------------
عبيدك سيدي سمينـه خـدام
هل العام ونظل وياك كل عام
كـون اعليـك لحگنـه يـمـولاي
چان نطيح لأجلك چوه الجدام
ماحظرنه لنصرتك
رادنه الله شيعتك
نبقى نحيي مصيبك،، ياحسين
مو رزقنه نطيح گدامك
الله راد نصير خـدامـك
وبالسواد انوشح أيامك
ياهلا بظعنك يبو الأكبر
--------------------
حسين علي التقي
راح اسولف عن الصادق .. وأصغي ليه
الخدمة منه والمصادق .. جعفريه
هـوا باب الخدمة كلها
واحنه ناخذها من اهلها .. جعفريه
------------------
جعفر ومن عِلم باقر
أبن شاهد ألم عاشر .. زين العباد
آية الله اعالبرايـة
أبو عبدالله الآية .. الدگت أوتاد
مرور بسيرته اعرفته زعيم الحوزة الأول
والبوكته اشگد طوائف ! علوم اشگد تُأوّل !
لچنه الصادق الأوحد يجاوب شنهو يُسأل
الثگيلة التصعب اعليهم فقط ابيته تنحل
خمسة والسّتين عمره .. شيخ الأطياف
ودرسه طلاب التحضره .. جانت آلآف
اعلــوم الاكوان بشملها
واحنه ناخذها من اهلها ،، جعفريه
-------------------
طالَـعت سيرته وذاته
وفرزنتها توصياته .. كلها معــنه
بس أهمها آخر حياته
(المُستخِـف) گال بصلاته .. ماهو مـنّــه
وأنه أسال ليش آخرهن وصيه من حچاها
الصلا فضّـلها عن كلشي وترى الباقي وراها
ارجعك ليوره وشوف النبي شگال ونهاها
إذا تُـقبل صلاةُ العَـبدِ يُـقبل ما سواها
من الصادق هاي أشارة .. عن صلاتك
واضحة بنصِّ العِـبارة .. سر نجاتك
سر نجاتك أخشعلها
واحنه ناخذها من اهلها .. جعفريه
-------------------
وبعد من سيرته وعِـلمه
هالرّواية شگد مهمه .. تحچي حبهم
شلون علمنه نحبهم
والغلاة اتبرّة منهم .. شنو گلهم؟
أنتو شر خلق الله كلهم جبتو للباري نضير
انه عبد الله يوادم فهمو هاي من الأخير
لا تغالون بمحبتي ولا تصغرون الـچـبـيـر
شما اجيب بمعجزاتي بحكم أمر الله تصير
والمُـغالي مشرك أصله .. هم نحسبه
كالمجوسي الكفر بالله .. هذا ذنبه
والعبادة لـ الله كلها
واحنه ناخذها من اهلها .. جعفريه
-------------------
بعد من سيرته الخدمـة
شلون اخدم أبو اليمــة .. واحيي أمرة
شلون أرضيها الزچية
مو فقط عَبـرة العزية .. هَــمَّ عِبــرة
وچان همّ خادم الصادق منطي لحسينه عهد
(وبـارٌّ لِـوالِديهِ) وعن شكــو غيبة أبتــعد
الخادم من ايصير خادم ينطي لأسياده وعد
يحچي بالمعروف كون اشما يگوم اشما گعد
ويگطع الشك باليقين .. وهاي هيه
يصير كل وقته حُسين .. غاضريه
وكربله يصْـعَب سهلها
واحنه ناخذها من أهلها.. جعفريه
------------------
وطالعت سيرت غربته
ويلي سمّ الفت چبدته .. خذه أحشائه
سلّب المنصور عمره
والأحفاد اهدمو گبره .. من اعدائه
لچن كل منصور باجر مايظل اسمه ويضيع
من يجي هادم شِركهم بيده يسحل هالقطيع
بعد ما بالكوفة ينصب قاعدة حصنه المنيع
ويطلع من الكوفة جيشه يروح يبنيها البقيع
هناكه احفاد السقيفة .. من يمرهم
يصلب الروس السخيفة.. بچذع كلهم
حـقـنـه گون انطالبلها
واحنه ناخذها من أهلها .. جعفريه
------------------
لكربلاء خلصها مأتم
چان كل عمره محرم .. موش عشرة
مأتمه يگضي بنحيبه
شكثر باچي للغريبة .. وگلبه جمرة
لچن دمعة وعي وفطرة بچاها اعل المخيم
ودمعته الزهرة مرجعها بذكرها اجروحه تلتم
بحرگ داره يهل دمعه اعل باب الزهرة من دم
أصل يوم العذاب أَذّكر ضلعها من تهشم
والحزن لحسيني كله .. أنطاني عنوان
كل جزع مكروه إله .. على العطشان
الدمعة بس لحسين أصلها
و احنه ناخذها من أهلها .. جعغريه
-----------------
حسين علي التقي
لا تهد الماله داعي
أذا تعبرني رحمتك أغرس بلبة ضياعي
آنه شسوه بدون عطفك.. مدلي جفك
و اعرف ايحن لرعيته الگلبه راعي
شگد عيون اعليك يامولاي ركت
بالبواچي اعليك غرگت
ياعطر چم عين محتاجه لثيابه
و ياحنين الدنيا غابة
والشياطين التحيط بگلبي اشرس من ذيابه
تفطرت گيعان روحي وانتظر منك سحابة
وغيثك ايبل عطش عيني
لو مداسك داس گاعي
لا تهد الماله داعي
كلش هوايه عليه بطيف أصد طارف ثيابك
ايمطّر اعليه سحابك
الصحرة ماتنجرع يمته اوصل خضارك
كلشي يجرح بأنتظارك
بـهندس متاني نهارك
وخوفي لا مرسال دمعي ما اجالك
وينتظر لو حرف منك گلبي ساعي
لا تهد الماله داعي
ذنبي بير أظلم واتاني دلو عيونك
وماكو رحّالة تمر بيه ويجونك
آنه مو گد الأنتظار وخوفي باجر لا اخونك
بنظرة منك وانتشلني لبر أمانك
ياعزيز وقافلتنه ارخت عنانك
وبخت لو خليت الصواع بمتاعي
لا تهد الماله داعي
دخيلك مولاي
رايح علي .. كهف اليتامة الليلة
رايح علي .. وجه السمه يوميلة
بشهر النزل بي قرآن
هم ينطبر بي قرآن
ياويلي وكت الآذان.. رايح علي
----------------
شَدها حيازيم الهجر
وبمأزره امجلب العمر .. ونااح الأوز لغيابه
كلشي يندبك ياعلي
صاحت الجنة أقبل إلي.. وعين العرش سچابه
چنه هذا آخر آذان اليطرق البوب
أشهدُ أنَّ وداعك صار مكتوب
(هيَّ الليلة) چنها هاي التدمي الگلوب
والليلة هاي.. المواعدك بيها النبي
والليلة هاي.. باليتم زينب تنسبي
هالليلة جرح الأحزان
الميتم اگلوب احنان
ياويلي وكت الآذان .. رايح علي
----------------
يل گلبك بقيح أمتله
وبگدرك امضيعه الملة.. بالدنيا غربة روحك
غيثك على الوادم نَبِع
ومن زهرتك كسرو ضلع.. يمها تطيب اجروحك
عگب فرگة فاطمة وطه غربتك
بين وآدم ما يعرفون بعظمتك
ياعلي بالدنيا هايه شنهي ضلتك
حالك وصل .. بالبير دمعك ينخفت
حالك وصل.. محد يرد لو سلمت
محد يردلك الأحسان
بالسمه يل عالي الشآن
ياويلي وكت الآذان.. رايح علي
-----------------
دمك على التربة سجد
للدين حته يضل عمد .. وموتك يهز اركانه
انته السراط المستقيم
وانته النبأ ذاك العظيم .. وعلم النبي وبيبانه
للضلالة ما سجد مرة جبينك
بالسجود ابلس جايك يطفي عينك
وفزت كل الفوز هذا انته يقينك
وبسجدتك .. تتجله للرب العلي
وبسجدتك .. يرتفع دينك ياعلي
بالسجدة يارب الايمان
ينحفظ دين الرحمن
ياويلي وكت الآذان .. رايح علي
------------------
ايتامك ابابك تضل
وبطلعتك عدها أمل .. يابو اليتامة تريدك
دمع اليتامة شكد نشد
ولونك من العصابة أشد .. والسم مشه بوريدك
چفك بگد ما مسح روس اليتامة
بكل گلب ياعلي جرحك ظل علامة
محد ايسد حزنك ليوم القيامة
جرحك نزف.. وعيون ايتامك تِرف
جرحك نزف.. يأبو گلب كلش تَرف
للحزن جرحك نيشان
إمچبي الأنس ويه الجان
يا ويلي وكت الآذان .. رايح علي
--------------------
حسين علي التقي
وزادت البنتُ على أمِها
عن الثمنطعش خمسين زادت زينب الحرة
راواها الدهر طشتين عگب الضلع والطبرة
شبيهة أمها زينب بالمصايب
وعليها زادت بنوح الخرايب
مهظومة يازينب .. مهظومة يازينب
-------------------------------
من زغر سنها المصايب بيدت تاخذ بيها
بيوم شافت أمها بالدم والضلع مـآذيـهـا
بعمر خمسة ابهم بدتها واليتم حـاديـهـا
ورثت امصايبها طفلة عمت عيني اعليها
تربت عالمصايب من زغرها
الطفلة بلايا أم يكبر كسرها
وكَسرة فاطمة جرحت صبرها
شافت أمها خلف الباب تُعصر
شـيـضـل بـصـبـرها اللهُ أكـبـر
مهظومة يازينب .. مهظومة يازينب
-------------------------------
بكسرة المحسن وامها وذاع ناعيها الخبر
تهدمت اركان زينب من علي براسه انطبر
و اجت ثالث لچمة ليها شرايد وياها الدهر
ناحت اعالحسن لمن بالطشت چبده انفطر
تبچي أمها وابوها وتالي جاها
خبر سم الحسن گطّع احشاها
لچمة عل الارض طبگت سماها
انتچت فوگ الحسن ونوب مالت
شـافـت چـبـدتـه ويـا ويلي گالـت
مهظومة يازينب .. مهظومة يازينب
-------------------------------
حسين ظل آخر ذخيرة ايسّكن انواعيها
بي تشم ريحة اهلها وبقى ايصبر اعليها
جروحها تشفه بعيونه وبقت تأنس بيها
لـحـد مـا حـطـت رحـالـة بكربلاء تاليها
وگف كدامها بس كلها حسرة
شبگها وشمته وباسته بصدره
وگـالـتـلـه تـره اوصية الزهـرة
وبعد هاي الوصية اصبح أسيرة
وعگبك تالي امشي بلا عشـيـرة
مهظومة يازينب .. مهظومة يازينب
------------------------------
صار ما صار اعله زينب من لفتها كربلا
راح منها اليمه جانت كل عمرها مـدلله
صبت اعليها مصايب منها صارت ناحلة
وتالي أجاها الشام آه يالشام اكبر معضلة
من بعد الخدر ياويلي تالي
بالهيمة صفت من دون والي
شافت بالرمح روس الغوالي
ولحـد آخر عمرها تنعى اخوها
تـصيح حسـيـن حدما جبّلوهـا
مهظومة يازينب .. مهظومة يازينب
--------------------------------
حسين علي التقي
معقولة انتهى كلشي
وبلياكم مشه نعشي
قبل لا ينطبگ رمشي... صحتكم
آخر نظرة لعيوني
ردتكم بيها تلفوني
تچفنوني وتدفنوني... أختكم
يمي ردتكم... ساعة منيتي... ومحتاجة خوة
بشام الهضيمة... زينب وحيدة... يخواني بلوة
وموتي بلاكم... صعبة وغلاكم... گلبي ايتچوة
آخـر لـيـلة يمـي هنا ردتكـم
أحن الكم وتـدرون بأختكـم
أنُس الموت اذا يمي شفتكم
------------------------------
حـيـل الـشـام تعبني
الأجيته بحزني موتني
هناك بكربلا دفني... أمنياتي
الشام لعفّتي عاذل
ياريت الگبر حاصل
بين حسين والكافل... مماتي
العـلـويـة لازم... بيـن الهواشـم... لا مـو غريبـة
شوداني يمهم... الجرعوني سمهم... واللّه مصيبة
راح ابقى اعاني.. لآخر زماني... بگاعه العصيبة
يريت بكربلا موتي اجـالـي
الشام شخله بيه وشبقالـي
هنا بس الثكالة المثل حالي
------------------------------
هذا آخر حچي بگلبي
أحتضاري مارحم تعبي
عيني لكربلا تـربـي... وحنيني
نحيلة وحرت بزماني
منو يوسدلي ذرعاني
بعدما نحضه بخواني... يعيني
بالدنيا حصتي... تبقى غربتي... لحد المنية
زينب غربيـة ... اسمعها لازم... كـل مغربيـة
يسدونه بابي... وابقى بعذابي... هاي الأذية
زايـر كـربـلا مـن يعـتـنـيـنـي
يفـرحني بدموعـه ويبچينـي
اليذب رآية اعله گبري يگر عيني
----------------------------
اليجي من حسين اعرفنه
و اشـتـم بـي عـطـر جنـه
گبري لعطـره يـمـتـنـه... ودموعه
الوگف يم بابي بالحسرة
ادعـيـلـه برضا الزهـرة
وگلبي الزايـر ايكـسـره... برجوعه
كلمن يجيلي... يشفي غليلي... بكثر البواچي
عيوني تراقب... جيت المواكب... سود الخواچي
الجايبلي دمعة... وصوغة لرقية... بيده تراچي
يهضمني الصحن فارغ اذا صار
من دون البواچي بغربتي احتار
اكثر شي تـريـده ام عـون زوار
--------------------------
حسين علي التقي
يحسين هـاي أيامي
واعليك گلبي ضامي.. محتاجة أشوفك
صارت أمنيتي بعيدة
وهذا اللحد مد أيده.. محتاجة أشوفك
وحقك مانسيتك لحظة وحده
رغم شدة توديني اعله شـدة
رغم ذيج المصايب بالي ويّاك
بعده بگلبي جرحك حار بعده
مانسيتك بحرگة خيامي ذكرتك و أنتخيـك
آنه أخيتك حبل بيدي وعالهزيلة ما نسيتك
الليلة وصتلني المنية... ياهو اليسبّل ادية
--------------------------
العاشر خذه كل حيلي
وصار الحزن ترتيلي .. من ودعتكم
مالت الدنيا اويـايـة
هناكة اعله المسناية .. من ودعتكم
حدّب ظهري من ذيج الهزيلة
المصايب مـرت اعليه ثگيلة
من الخيمة للكوفة الى الشام
يا درب السبي لوعة طويلـة
مو قليلة امصايب المرت عليه شگد ثگيلة
مستحـيلـة بـعـد اوصلكم وهاية مو قليلـة
وبعد منكم ماكو جية .. ياهو اليسبّل ادية
--------------------------
بالگلب حسرة چبيرة
يحسين يابو الغيرة .. عنكم بعيدة
وين الزمـن ودانـي
بشام الهظم خلاني .. عنكم بعيدة
عرفت الشام ياخذ روحي تالي
البي چم ذكرى منهن شاب بالي
القصر والسوگ بابه والخرايـب
ارجعتله وذكـرت ذيـج الليالـي
هنا رقية بالخرابة مـن لفـت ليهـا المنيـة
الشام أذية موتاني الأخذ من عندي رقية
گلت وآنه أدفن رقية.. ياهو اليسبّل ادية
---------------------------
هالليلة روحي امناطرة
بكل ذكرى منكم عابرة.. يعزاز روحي
حنت لذيج ايامي
وذكرت عز خيامي.. يعزاز روحي
ابن نادم لو دنه موته يراقب
ويتمنـه يدفنـونـه الـحبـايـب
بس آنه شجيب أهلي البعيدين
العفتهم عل الثرى فوگ الترايب
ياغربتي تكسر الخاطر بدون أهلي دفتني
الفرگة حصتي منهد باب امي وأصيحن ياغربتي
الغربة مكتوبة عليه .. ياهو اليسبّل ادية
----------------------------
حسين علي التقي
ولادة أمير المؤمنين عليه السلام
ياهو غيرك وسط بيت الله انولد.. ياعلي
وهيَ بس الكعبة ترهملك مهد .. ياعلي
صرت قبلة للصلاة وانته الوتد .. ياعلي
الما يصلي اعليك دينه بلا عمد .. ياعلي
الرايد قبلت الله.. علي
كون اعليك صلى.. علي
دونهُ لا تُقبلُ صحيفتي
ياعليٌ ياعليٌ ياعلي
--------------------
شنذكر من أفضالك وكلك فضل... ياعلي
عجزت الأملاك وصفك والرسل.. ياعلي
كافي من ذكرك عبادة نستهل .. ياعلي
ابين الله وخلقه ياحبل الوصل .. ياعلي
يضيع الما يلزمك .. علي
وكلمن يبغض اسمك.. علي
من سعير النارِ كيف يحتمي
ياعليٌ ياعليٌ ياعلي
--------------------
يل امنجي يونس بعمق الـبـحـر .. ياعلي
وعالبلاء أيوب بس بأسمك صبر.. ياعلي
وعرش بلقيس انته رديته بخبر.. ياعلي
وبـفـقـارك طـه عـل الباطل گـدر.. ياعلي
يـا معجزة ربك.. علي
كل نبي شهدلك.. علي
بِكَ عن آدم عفا الربُ الجلي
ياعليٌ ياعليٌ ياعلي
---------------------
بالقيامـة بـيـدك يـصـيـر الأمـر.. ياعلي
يا سراط الله النعبره بالحـشـر .. ياعلي
الما شهدلك بالولاية منين ايمر.. ياعلي
بالجواز الماله ختمك يـنـسـطـر.. ياعلي
وتشـفـع للمـوالـي.. علي
باذن العلي العالي.. علي
حصني يومَ الحشرِ أن تشفع لي
ياعليٌ ياعليٌ ياعلي
----------------------
أنته قرآن الله وترتله الـمُـهـج.. ياعلي
بس اليفسرونـه طه والحُجـج.. ياعلي
والنبي شگد شافك بيوم العرج.. ياعلي
بصوتك الله كلّمه وحيل ابتهج.. ياعلي
هالـگـد مـا يـحـبـك .. علي
عشت بگلبه وحدك.. علي
و أنا أرجو ثلاثاً مطلبي
ياعليٌ ياعليٌ ياعلي
--------------------
حسين علي التقي
جروح أمير المؤمنين على الزهراء
صلوات الله عليهما
يريت الگاع يافاطم خذتني
أزتـچ للـگــبر و آنه شيزتني
على العيشة العفة بعدچ يـزهراء
--------------------------
لا وحـق خـالـق السبعـة واللـي عـلـم بـالـقـلـم
كلشي جنتيلي بحياتي رحتي والكلشي أنهدم
بعد ماكو معنى ليهـا الـدنـيـا مـن عگبـچ عـدم
شـفـت فـوگ الباب دمّـچ وعرفت معنى الألـم
بخدچ دمعتج وگفلتي گلبي
وحقچ فاطمة وتيهت دربي
على العيشة العفة بعدچ يـزهراء
---------------------------
بالمغيسل يالحنينة اشضامة عـنـي شـفـت
وليش جنتي بأيد وحدة تندعين آنه عرفت
مررت أيدي اعله ظلعـچ ريتنـي ولا مـررت
وأثر دملج بالمتون وعين مسطورة لمحت
و هااي العلعلتني ومرمرتني
سواد امتونچ التعبلي متني
على العيشة العفة بعدچ يـزهراء
----------------------------
صبري خلص يا إلهي أنطيني صبرك ياعلي
يا إلهي هاي فاطم و أنتَ تدري شتعني إلي
امصيبة مـا إلها عزاء ولا هضمهـا يـنـجـلـي
ريت لا طالت حياتي اخلافها بعمـري شلي
عـونـك ربـي صـبـرّنـي عليـهـا
مصاب ام الحسن ماكو شبيها
على العيشة العفة بعدچ يـزهراء
----------------------------
كـون مـن آنـه الأچفنچ يـمـچ أنلف بچفن
ريت ما طالت أيامي ولا كبر عمري عسن
الـگـاع صـارت ما تلمني لأن دافنلي وطن
شلون أرد للبيت وألگه زينب تدور ام حسن؟
ريـت اويـاچ مكتـوبـة منيتـي
خـلـة بيتي وحقچ يا أم بيتي
على العيشة العفة بعدچ يـزهراء
----------------------------
أسترجـعـت هاي الوديعة يا محمد بضعتك
وهيَّ تشرحلك الصار اوياها من ضيم أمتك
غمضت عينك وأجوهـا بـنـار داسـو عتبتـك
زهـرتـك مـحـد رعـاهـا و روعـوهـا بغيـتـك
قطعـت گلبك أنسلبت فدكهـا
عبرو حدها والطاغوت طگها
على العيشة العفة بعدچ يـزهراء
---------------------------
حسين علي التقي
مولاتي زينب تشتكي لـ أمير المؤمنين ع
أحظر ياعلي شوف شجّره بينه
يم المشرعة مذبوحه أهـاليـنـه
وخيل الشام بويه غارت اعلينه
حركوها الخيم وبهيمة طشينـه
ألحك ياعلي هدت العياله
حسين اعالترب بويه صفه خده
وعباس الشهم مـنـه اگطعو زنده
چم مصيبة هدت حيلي مو وحده
يالتگضي الشدد زينب تره بشـده
شدّة ياعلي طلعتي بالهيمة
يـابـويـه صـفـو بالـگـاع ولـيـانـي
راحـو للـذبـح واحـد وره الـثـانـي
وين انطي الوجه واحترگ صيواني
صـرت بـلا كـفـالـة ابـيـن عـدوانـي
وين انطي الوجه وانذبحو أخواني
طاحو زلم هاشم والنسه بهـيـمـة
والعـدوان ما خلـولـي أي خـيـمـة
وچم ايتيم عندي بويه و ايتيمـة
تره الطف ياعلي ما ينحمل ظيمه
عالجمر ركضونه حفاي الظهر
كلفة مصيبتي يا ابا الحسن كلفة
عگب اثمنطش حامي الف وسفة
علويـة وجـبـيـرة اركـض بلهـفـة
وتالي اعالـهـزل ياعلي منچتـفـة
وذبّـاح خواني سايگ ناگتي
بناتك ياعلي اعالهزل صعـدوها
والما طالعـة چـم ديـرة فـروها
بخرابة الدللتها تـالـي گعـدوهـا
وتدري بيا درب ياعلـي ودوهـا
للشام ودوها الماعدها أخو
عالتله ناديتك،، خويه أحترگ بيتك
وضيّعني هالصوت
مديت الك شوفي،، صحتك وانه بخوفي
مدلي أيدك وموت
الأخت عادتها حنينة وهم تحن لخوانها
وزينبك حنت لعينك يالعفت صيوانها
عينك انسدت وأميه أنفك الي ديوانها
ما ظل ولي لا ظلي نغّار،، خويه
والهيمة باگت مني الزغار،، خويه
وضيّع دلالي الخيل والنار،، خويه
يابو علي زينب تتانيك،، خويه
-----------------------
شعندي بعد يسوه،، من طاحت الخوة
شخسر بعد كون
كل خوفي لاعوفك،، عيني تحب شوفك
يا فـص العيون
من الخيمة اطلعت گوه بحيل بايد حايرة
بين خيل اطفالي ضاعت وانه عيوني غايرة
و اصعدت للتله ادورك غيرك انه شخاسرة
فدوه الك بخيامي شيصير،، خويه
لأجلك بعد خل زينب تحير،، خويه
بس كون اشوفن طولك بخير،، خويه
------------------------
ماكو ظره بهيمة،، جدمي انچوه بخيمة
بس همّتي اعليك
ما طالعه بعمري،، بس أنجرح صبري
وگلبي اليهم بيك
ما يأخرني الحرگ وخيامي طاحت توه
بدربي خيل وچدمي مچوي بس أجيتك گوه
هاي مو بلوة أحسبتها فراگ وجهك بلوة
جيتك بيا حاله من جيت،، خويه
الخيل سحگتني تمنيت،، خويه
بجيش كامل من تلآگيت،، خويه
---------------------------
جيت بگلب حاير،، أمشي بجدم عاثر
بس كون ألاگيك
شيصير ما اهمله،، لو جسمك اندله
وبدمعي أزگيك
طايحه لعينك سبيه كون اشوفك سـالـم
من سمعت طگت ضلوعك گلت اجيلك لازم
جايبه وشالة عيوني وادري گلبك صايم
لـو مـا تـجـي ألـمـن اتانيك ،، خويه
جيتك اشوف شبيك مابيك ،، خويه
صايم وجايه بدمعي أرويك ،، خويه
---------------------------
ماتت سوه أحلامي،، و راسك الگدامي
أنُس السبي صار
معناها الي موعد،، ويمك أرد و أگعد
ويم گبرك احتار
راسك امنسيني ضيمي وحته حبلي البيدي
بقه شي من جسمك ايماشيني هاا يعضيدي
دام روس أخواني يمي الدم يضل بوريدي
هم زين راسك موش وياك،، خويه
تـعرفنـي ما اعيشن بلياك،، خويه
وخلالي موعد ارجع احذاك،، خويه
----------------------------
حسين علي التقي
يبن أمي وين دوريتك
مشدوها بـال تيهيتك
بس من هواك فرزنيتك
متغير اشلون
صار الظلام واعتنيك
دربي وعر بس أجيتك
خويه بسكوت ودعيتك
عن لا يحسون
عـريـان خـويـه شبيهم ،، عزو عليك الهدم
فوگ الترابة جروحك،، تـتـگـلـب وتنلچـم
عود انه جيت اشكيلك،، هدت علينه الزلم
طـايح ومگلوب وجهك عالتراب
شوفتك ترست گلب زينب عذاب
يا مصاب اشكيلك وانته بمصاب
واا ويلاااه ياكربله
-------------------------
أكعد حسين فرهدونه
مـن الـخـيـام شردونه
مالي كفيل لالي عونه
محتاره بـأيتام
ام الخدر وسـفـه تـالـي
بطولي مشيت لا أبالي
بين الخيام كل عيالي
محروگه الجدام
فرن يخويه عيالك،، طلعوهن امن الخدر
وحده تلوذ بوحده،، ويسحگن اعله الجمر
صار العفاف ابهيمة،، ويركض وراهن زجر
اعذرني خويه والعذر منك قليل
اعليه كل لـمّـت بناتك مستحيـل
على التله گمت أصيحلهن وأميل
----------------------
صوب النهر من ركضنه
لاگتنه خيل طـشـرتنه
بچف الكفيل من عثرنه
صحنه يعباس
صحنه شكثر حشمينه
ظيعو دلال هالظعينه
خيمة ستر ماكو لينه
وتتشمت الناس
عباس خويه ألحگنه،، العياله أجت عآيله
بـالـبـر حريمك صارن ،، وتطشرن بالفله
المستورة شيركضها ،، المرعوبه بين الملا
خويه عوف الماي وألحگ بالظعن
كـل حـرمـنـه بالـفـيـافـي اتشردن
وبـ لسان الغربه اسامينه انحچن
----------------------
خوف ورعب بالظهيرة
لا خـوة ظـل لاعشيرة
وجهي لمن خويه أديرة
وأنتم مطاعين
المنّي يضيع بيش أدوره
من الخيام جدمي جمره
لا بيه حيل لا لي قدره
والزلم صوبين
صارت رماد الخيمة،، والبيها كلشي انّهب
ويه الخيول اتدافع،، فحطانه من التعب
ياكون ألـم اعيالك،، والما لحگته انسلب
هاي اول طلعه الي بعين النهار
صار وكـتـي ضيّگ ابلم الـزغار
الما لحگته بالحوفر يعني صار
----------------------
ليل الظلام جمّعانه
بنص خيمة صار ملتقانه
وجـه الصبح لا لـفـانـه
يبعدنه عنكم
صبح اهدعش ياهضمته
گلبي انخمش من چهبته
خويه الوداع هذا وكته
انودع جثثكم
چم درب بي هالوادي،، يودينه صوب النجف
والحادي مرنه اعليكم،، متعمد ومـا صـدف
حته يحرّگ اگلوبنه،، خويه بجثثكم هتف
حـتـه لا نـنـزل نـودعـكـم عـدل
حيل حيل بسرعة جروها الهزل
وما رفعنه ايدينه لن بيهن حبل
--------------------------
حسين علي التقي
شسويتي بآل المصطفى،، أويلاه يكربلا
اثمنطعش نور ألهم طفه،، أويلاه يكربلا
الـ بدنيا ما ألـهـم شَـبـه،، أويلاه يكربلا
بالترب واحدهم صفه،، أويلاه يكربلا
وضيعتي أطهر قافلة،، أويلاه يكربلا
شـصـار وجـره يانينوى،، أويلاه يكربلا
بـ أهل الهوه ضاگ الهوه،، أويلاه يكربلا
بـ آل الله شح مايچ عجب،، أويلاه يكربلا
وحـتـى طفلهم ما روه،، أويلاه يكربـلا
عَطشّتي شبان العُلا،، أويلاه يكـربلا
شبان حـمـاي الـحـمـه،، أويلاه يكربلا
چم حيد عالگاع أرتمه،، أويلاه يكربلا
من طاح الحسين الظهر،، أويلاه يكربلا
ما طبگت بگاعـچ سمه،، أويلاه يكربلا
بگيعانچ اكبر معضله،، أويلاه يكربلا
ياكـربـلاه وكـل العجب،، أويلاه يكربلا
بگاعچ عزيز الله انسلب،، أويلاه يكربلا
وركضت بگاعچ يا مرة ،، أويلاه يكربلا
وصيوان ياحرة أنـهـب،، أويلاه يكربلا
رَگضّتي چم امـدللـه،، أويلاه يكربلا
عثرت بگاعچ يامرة ،، أويلاه يكربلا
بـت فاطمة المخدّرة،، أويلاه يكربلا
و رقية مچويه الجدم،، أويلاه يكربلا
بگاعچ مشت متحيرة،، أويلاه يكربلا
سلّبتـي كـل عايلـة،، أويلاه يكربلا
الـمـا لمح ظلها طالبـي،، أويلاه يكربلا
شـصعدهـا تل الزينبـي،، أويلاه يكربلا
يـا كـربـلا وما تنعقل،، أويلاه يكربلا
مولاتي زينب تنسبي،، أويلاه يكربلا
وحاديها شمر وحرملة،، أويلاه يكربلا
هذا مو آخر رحيل
لچن هذا آخر رحيل ويه العقيلة
لمن غرّب ظعنه من عاف المدينة
ورّث اجروحه الثگلية
تقاسّمنها ام البنين ويه العليلة
والهجر وحده شحمله
شلون والرايح ظعن ماكو مثيلة
شلون اليفارگ وجه الحسين بالله ينام ليله
شلون علّة..
اموادعه ام الصبر ماتگدر تحمله
بيا صبر حملته طفلة.. وبيها علّة
الشايل اوداعه ثگيل
وهذا لا أول رحيل
لچن هذا أول رحيل يبچّي بيت الله بعظمته
بظهره خله الحجر يبچي بعد شيوصّف غربته
والمناسك تبچي سكته
وعرفه ظل ينعى تَل تصعده أخته
وحِجة صارت عالحجيج آخر خطبته
والبقه مذمومه حجته
والمشة كبرت حسرته
وادم امتيهه الشريعة
ووادم امسلمة لعصمته
وما وفه الا القليل
هذا مو آخر رحيل
لچن هذا آخر رحيل بظعنه رآيه
گالو لكلشي نهاية
بس ظعنهم يمشي ما دامت الدنيا
وكل سنة يگصد منايا
ظعن بالعاشر يموت ويرتحل بأقسه بداية
من تروح ام الظعن وتعوف اخوتها ظحايا
بعد لازم تنجرح بحبال وحجاية (سباية)
وينصدم تالي ظعنها بشام شامت
شاااام ذبّاح العفاف بدون رآية
ومن ترد للوطن تذكر
ذيج طلعتها المهيبة وهسه بتراب العباية
جرح مامنه مثيل
هذا مو آخر رحيل
وَقَد اِنجَلى عَن مَكة وَهوَ اِبنُها 💔
ياگلبي هـايـه نصرتـك .. هظمك بعد جيبة
حيرة شتواسي بدمعتك .. يم راعي المصيبة
واسي الغريب بغربتك .. و أمامك بغَيبة
صاحب زمانك منتحب .. انحب على انحيبة
دمعه ايهل دمه ياكلبي واسي
ولين لغربته ولتصير قاسي
حزنه بكربلا يهد الـرواسـي
صاحب زمانك ياگلب يجرح زمانه
أيامه حسين
مامرة من دمعة نشف ردائا
مخلصهن ايامه بجرح عزائا
الشاهد دمع عينه دمه ودعائا
لأنـدبـنـكَ صباحـاً ومسائـا
لك العزاء يبن الحسن
----------------
ياگلبي هاي منّيتك .. جرحك بعد حده
رحمة وصلت لعبرتك .. لا تبرد وتهده
ويه المغيّـب دمعتك .. بالدم يسح خده
وحسينه مطروح الترب.. باجر يظل وحده
الشاهد ذبّحته وكل الرزيـة
وثلث تيام جده عالوطـيـة
وعماته انسبن بالغاضريـة
وشلون تبرد مهجته المسبية عمته
سالفته حسين
لجدي الغريب انعى بگلب ثكاله
حته الحجر ظل ينحب اعلحاله
عطشان وبسيفه الشمر اجـالـه
وبذبّحته ايدير الطرف عيالة
----------------
صاحب زمانك ياگلب.. شاهد ألم عاشر
مدة غيابه ينتحب.. وشگد بقى امكابر
ينعى الغريب ومغترب.. بليل الدجى مهاجر
ثارات عنده ومنتظر .. باجر وره باجر
ثاراته بطن وجروحه جمرة
وليل بليل صارت ناره كَبره
ثار المحسن وسطرة الزهرة
وضلوعه محنية لأجل ظلع الزچية
ثاراته حسين
ماعنده حل غير الفرج يتاني
والعنده ثـار اتتعبّه الثوانـي
وانه نصرتي ليومه أظل اتاني
ابچي لغربته حسرة چي يعاني
--------------------
ياگلبي كونك تنكسر.. وأبچي بألم حسرة
ويه دمع امامك من تهل.. معناها الك نصرة
ليلية ميفوته العزة .. وينحب مع الزهرة
بعاشور گلبه منفجع.. وچم عاشر بعمرة
ينعى بمأتمه وتبچي الزجية
وفرض عنده تره دمع العزية
وشصير بروحه وي طاري رقية
بسوگ وخرايب والجرح شام الغريبة
وجروحه حسين
ياجدي ابچي دامـت الليـالـي
يجرحنّي بيك ودمعتي سؤالي
چم غالي شفته منذبح يغـالـي
وعالتله اختك صاحتك دلالي
----------------------
هايه جروحه المنتقم.. وجروحه الچبيرة
يبچي لربيبات الخدر.. مـن ظلن بحيرة
عمته المشت ذاك الدرب.. دخلوها يا ديرة؟
ديرة القبل تكره علي.. ودام بلا غيرة
الشام الخله راسه اشتعل شيبة
جرحه الأكلف وشاعل لـهـيـبـة
بخرايب گعدت أم عون الحبيبة
ومهظوم چي عمته بقت ماعدها رآية
وينادي حسين
ياجـدي گلبـي مايكف نحيبة
وثارك يجي يوم وبيديّ اجيبة
وللعالم اشرح مقتل المصيبة
واصيحن يالي ثاراتِ الغريبـة
----------------------
حسين علي التقي
من شبت نار بـداره..طفّها وصورة بفكـرة
بالركضن بين الغاره..وخيمّن صارن جمرة
ونزلت دمعته
لزينب عـمّـتـه
هاي امصيبته
------------------
ابو الكاظم داره من حرگوها
جروح عنده لعمّته لچمـوهـا
وعيلته بالدار مـن روعـوهـا
عينه دمعت للغصب طلعوها
شاف ابنياته يـركضـن ..وتصور ذيج الهيمة
عماته بخيل انصدمن..من طلعن من الخيمة
وهاجت حسرته
لـزينب عـمّـتـه
هـاي امصيبتـه
------------------
وبعباته يطفي ناره المضرمة
وذكـر بين النار جانت فاطمة
صاح ويلاه ياأمان أهل السما
شلون حرگو دراج بلا مرحمة
يا نار الدار شعندج.. بيمن جاي اتذكريني
بأمي الصاحت يافضة.. ضلعي تهشم سنديني
لفاطم حيرته
و زينب عمّتـه
هاي امصيبـه
------------------
داره خمدت نارها وهل عينـه
للـعـلـيـل الـمـا حـصلّـه امعينه
الخيل من هدت على صواوينه
صـاح فـرن عمه طـاح اولينـه
تذكر جده بيا حاله..المعلول وجيش يطلبه
صعدن عالتل عماته..وبخيامه تفرهد غربه
جرحو غيـرتـه
لـزينب عـمـتـه
هـاي امصيبتـه
--------------------
بماي طفه النار وبهاي انلچم
طفّه ناره وماي شربها الحرم
صفن عالماي ولچن حيل انهضم
صاح ويلاه عمي ياراعي العلم
ويلااه يجروح الساقي.. التمنه ايروي خيامه
ومارد من طيحو جوده.. بيا عين يلاگي ايتامه
وهانت بلـوتـه
لـزينب عـمّـتـه
هاي امصيبتـه
-------------------
هانت امصيبته و تذكـر رزيـة
تخيل بنياته چن سكنة ورقية
طفت ناره هنا لچن بالغاضرية
جمر صارت كل خيام الهاشمية
ابنيات احسين گباله.. تصورهن رگضن گوة
واعداء الله يسلبوهن.. وادم ما بيها امروة
وبانت كسرته
لزينـب عمّتـه
هاي امصيبته
--------------------
حسين علي التقي
أستشهاد الامام الصادق (ع)
اللهـم عجـل لوليـك الفـرج
يمته فوگ گبوركم تعله المناير
ويمته يسمع هلا لو جاكم الزاير
يمته ياساداتي واليمته شيفضها
بسما الغرقد ياوكت تلمع قببها
الدنيا يمته وياكم تخلص حربها
لهسه تحچي گبوركم هل من مناصر
يمته غربتكم تفض ويبان حقكم
يمته تقنع هالخلگ واجب فرضكم
والارض والسبعة مخلوقة لأجلكم
وكلشي مخلوق الكم تشوفه النواظر
عبرت شگد چم سنة لهاي المصيبة
شگد اجت فاطمة بالدمعة السچيبة
تصيح ويلاه على الگبور الغريبة
وتجي محنية ضلع مكسورة خاطر
من هوان الدنيا شوفتنه العجايب
اربـع اعـلام الـهـدى گببهم ترايب
بيا بخت وگبوركم مثل الخرايب
ايعين گلبه المن يجيهن بعده صابر
يعين گبله اليجي يشوف گبور أهله
شني صبره و عالحجر دمعه يهلّه
هالمصيبة اعله ابو صالح ماهي سهلة
الشاف حقه اهله سليب وگبله فاير
عينه تهمل وأيده عالقبضة ويشاهد
يرتقب صيحة ظهورة وگلبه ساجد
ينتظر يومه يجي ويبني المراقد
ويرد ثار الضاع حقهن يوم عاشر
#البقيع_مطلب_الشرفاء
اللهم عجل لوليك الفرج
يـكـتلنـه الـمـتـانـة ونـسـد البيبـان
ويفتحها يوم خمسطعش من شعبان
يايوسف الزهرة الأمل بالله وبيك
يـ آخر محمد يجي يرتل الـقـرآن
عالكعبة يمته تسنده ظهرك وتصيح
يالي ثارات المات بالطف عطشان
رد دينكم مغترب يامُحيي الدين
يابن علي كثرة تـراهـا الأوثـان
چاا يمته نتلمّس وجودك مولاي
يانفس مر اعله چم واحد غرگان
حگك لون تزعل چفتك الگلوب
عچل نگلك والفعل لا ما حان
اللذة لقائك كون باچين ادموم
بس العيون الصلفة عرضت نكران
جعفر الصادق رايد يخدمك كون
شنهي عذرنه وما نمدلك ذرعان
كل الضوه يمك ودنيانه غروب
وليهسه نعرض عنك شگد غمان
شما ردنه نوصلك تعثرنه ذنوب
ونرجعلك بدرب العذر والغفران
كون اعله ذكرك نحترگ صرنه بخير
لو همنه بس انهم ألك لاهم چان
حيرتنه چي عفناك وحدك محتار
ماا قابلينه احسانك بأي احسان
اللهم عَجّل لوليك الفرج
مرتني كربلا ... بوكت الأجل
من آنه عازتي ... شوفت أهل
ياموتي شتنتظر
خلصني هالعمر .. قهر
يا كربلا شبقه ... من عيشتي
بذكرياتي جرح ... ما ينـسـي
جرحتني الذاكرة
هالليلة امناطرة .. الگمر
بديرة غرب ماحسبت ياروحي انام
چاا ما طلعتلي بكربلا بحرگ الخيام
مو يم شماته أهلي ردت يلفي الختام.. تالي
تالي موتي صعب
تالي ابين الغرب
تالي يطمني الترب
------------------------
مايحظرني الگمر ... ياحسرتي
يايريت المستقر... بين أخوتي
معقولة بالگبر
اتواره ومايمر .. أخو
معقولة جنازتي ... بلكي حلم
هسه من كربلا ... تگوم الزلم
هسه يجون أظن
و برايتهم چفن .. دفو
معقولة هيجي تندفن أم الدلال؟
ابنادم اذا حل يومه يتمنه الوصال
حنت لأهلها بكربلا رويحة حلال .. روحي
روحي بساعة الأجل
روحي تحن للأهل
روحي وين الكفل
------------------------
مانشفلي الجرح ... هذا الگبر
بتابوتي موسدة ... وهم أنتظر
العافوني بنص حزن
ما حظرو والدفن ... حصل
معقولة جنازتي ... بلايا بچي
لأخوانك ياگلب... ظم الحچي
كلشي انتهى بعد
لا أخو لا ولد... وصل
كلشي انكتب ياگلبي وبشام العذاب
تغمض عيوني ولا أخو يهيل التراب
و بالمغربية هنا بعد ينسدلي باب... غربة
غربة بلايا ضوه
غربة وگلبي أنچوه
غربة يشح الهوه
------------------------
ما اتمنه أظل ... بالشام ابد
كل أهلي بكربلا ... ومالي أحد
حته الهوى يمر
چنه سوط الشمر ... علي
عشت بهظم وأجه.. موتي بهظم
لا ظل أبو ألي .. ولا يمي أم
بوصية مچتفة
گلبي كله وفه ... شبدي
وصّاني أخوي بطفلته الماتت قهر
الماتت على راسه بخرابة وبيها أثر
ويمها اندعيت انه اندفن كون القدر.. يمها
يمها وحشة وهظم
يمها أبقى الها أم
يمها بشام اللطم
--------------------------
حسين علي التقي
يا مالت الله عيوني ذبيلانه
ولوجوهكم يخواني عطشانه
مو زينه زينب يل تنشدوني
خلصانه روحي بتعب خلصانه
لحدمن اتانيكم بالنگاب
يا عزوتي
فوگ السنة ونص اشم عطاب
يا عزوتي
چني خيال وگاضه الباب
يا عزوتي
حظروها التحتضر حظروها
ريحوها من التعب ريحوها
زينب
دخانه لهسه أشم دخانه
بيه آنه من الخيم بيه آنه
زنيب
--------------------------
حسين النوايب غيرت شكلي
وكونك شفتني ياهي تكلي
لو تدري بالله شصاير بحالي
ميتة وبقى بس نفس يصعدلي
زينب قبل لا مو مثلها
يابو علي
العاشر تره غير شكلها
يابو علي
عن السبي محد سألها
يابو علي
ملچومة من السبي ملچومة
كل نومه حلمي الك كل نومه
زينب
بالحومة اليرگض بنص حومة
برسومة شنو ايضل برسومة
زينب
---------------------------
الماله اخو هالعيشة شتفيده
والموت خـرب كل مواعيده
عالتله ردتك تلفي يا موتي
گبري وعلي بالشام ماريده
لو ميته عالتله ارتياحي
مو بالغرب
يم اخوتي يطيبن جراحي
مو بالغرب
بس العرف تفهم نياحي
مو بالغرب
مو شاني الشام ابد مو شاني
سجاني هل الگبر سجاني
زينب
ما واصلة كون اله ما واصلة
ولا داخلة بغربته ولا داخلة
زينب
-------------------------------
شگد المصايب مگدر احچيها
اندفنت وياي وگلبي حاويها
بس چلمة من شماتي غثتني
المرحومة هاية وين أهاليها
سم الحچي كله جرعته
بجنازتي
واحد يگل الثاني سكته
بجناوتي
وين الگمر مو هاي أخته
بجنازتي
موتوني بالحچي موتوني
شيعوني الغربة من شيعوني
زينب
هم حيرة بموتتي هم حيرة
بلا غيرة هل خلگ لا غيرة
زينب
-------------------------------
حسين علي التقي
لك العزاء ياصاحب الزمان
هاي الليالي مصيبة أمك
ثار الضلع صوته يندهك .. يبن الحسن
دم محسن بعتبه تبده
بنار وترب ياويلي خده .. يبن الحسن
أصل العذاب الشفتة بالغيبة .. هـاي المصيبة
بصوت الألم نادتك البضعة
منها اسمعت أدركني يامهدي .. والمدمع ينّدي
من الفاجعة منتظرة كل جمعة
من ساعة الهجمو عليها تعيش بألم الأنتظار
يامدرك الـثـار وتـنـادي يـامهـدي يبني البدار
ومن حمرت الباب ودخانه بعينك بده الأحمرار
يا مُنقِذَ العوالم .. إثأر لضلعِ فاطم
-----------------------------
امصاب البدت منه دموعك
من اغيّابك يتاني رجعوعك.. يبن الحسن
ونت يتامى الزهرة بأذنك
ونتهم المن عدها حـزنـك .. يبن الحسن
دموع الحسين لفاطمة الزهرة.. ومدمع الحرة
خلّف دموع الحمرة بعيونك
امصاب الي ضچلته السمه السبعة.. حق اله تنعه
ومنه تشّيب سيدي چفونك
صورة بجي ايتام الزچية بذهنك توّرث حزن
چتفو علي وقبضة فقاره بصابيعك اتظل سجن
ولليوم تلچمها جـروحـك يـاويـلـي چـلـمـة وإن
-----------------------------
مخفي قبرها أكبر ظلامة
هـاي لـحـزن ثآرك علامة .. يبن الحسن
بظلمة شعجب ليش ادفنوها
ومثل الخلگ ما شيعوها .. يبن الحسن
ما رآعو لبنت النبي حرمة .. وخاتم الأمة
چاا ليش ذيج الأمة ظلموها
حجاب أم حسن كللهم حجابي ..وبابها بابي
دفعو عليها وتالي حرگـوهـا
وثالث سبط سالت مهچته بفعلة نذل ياحرام
بچف الغدر بأبشع جريمة وهالدم يريد أنتقام
ولو ما دماه بالعتبة سالت عبدالله عاش بسلام
------------------------------
يمته تـنـادي يا شهيدة
وثآر الضلع بيدك تعيدة .. يبن الحسن
عالكعبة من ظهرك تسنده
تبيّن منو اعليها تعدّه .. يبن الحسن
وكلمن ظلمها تشيله من گبرة.. تصلبة بالشجرة
وللناس ايبين سيدي شصاير
الخله متون ام الحسن زرگه.. تطلّعه وتحرگه
تبرّد گلبها البل حزن فـايـر
لهسه گلب أمك يمهدي عايش بألم و أنكسار
مضيعة وتدور بالمآتـم ملچومة مدمعها حار
ياربـي بالمهدي أنتقملـي ندبـتـهـا ليل ونـهـار
------------------------------
حسين علي التقي
واا محسنااه واا محسنااه
من رفسو الباب وسگط ،، محسن يويلي من الدفع
نار اعله باب أهله لگه ،، ومن عدها خده منلسع
ثالث سبط من فاطمة ،، وسفه أنطفه نوره اليشع
ست أشهر وطايح غصب ،، ماكمل اشهوره التسع
توه وليد الساعه بس ،، يبچي اعله أمه ومنوجع
چيفن لگه بصدر أمه دم ،، وبخدها أثر سطرة ودمع
شاف أمه طاحت عالأرض ،، واعليها سوط أهل القمع
صوّبه البسمار وهوى ،، و اعلي هوى باب الجذع
طاح اعله وجها بالترب ،، من قبل أخيه المنصرع
لحگته شالته أم الحسن ،، ضمته بس بيا وضع
سندتها فضة من الهظم ،، ذايب جسمها چن شمع
وزينب من الحجرة اطلعت ،، ترگض رگاض المنفجع
ومن هاي ركضتها بدت ،، قصة هظم ما تنگطع
وباجر على سن الرمح ،، من رآس أخوها يرتفع
لو طاحت الخيمة الظهر ،، رگضتها مابين الفَزِع
اللهم بدم المحسن الشهيد
وظلامة أمهِ فاطمة (ص)
عجل لوليك الفرج
يا صاحب الزمان لك العزاء
وين استقر بيك البچي
وين استقر بيك الهظم
يـا ديـرة نـاصـب مأتمك
صدرك اشلونه من اللطم
يالغايب عن العين،، ناصب مأتمك وين
يم بـاب العقيلة،، لو يم باب الحسين
-------------------------
يارضوى ما جالج خبر مانصب يـمـج مأتـمـه
ماخظر بگاعج دمع بـيـا گـاع صار امحـرمـه
بالعشرة يبچي بيا كتر وتحظر عزائه فاطمة ؟
يمكن اذا شاف ام حسن من البچي شوفه أنعمه
يارضوى وين ابن الحسن،، ناصب عزائه
خـلـيـنـه نبچي لغربته،، نـواسـي بكائـه
ضاگت علي يمكن الأرض،، حتى سمائه
عزائك بي معزين؟،، ناصب مأتمك وين
يم بـاب العقيلة ،، لو يم باب الحسين
--------------------------
مايطفه شوگ النه وبعد بمحرم ايزيد الشوگ
حارگنه فگدك سيدي يل گلبك شگد محروگ
حزنك ولا ساعه برد و امطوگك مثل الـطـوگ
بحالك يمولاي شيظل من تسمع بذاك السوگ
شيصير صبرك لو نعه،، الناعي يمولاي
لو صاح عماتك بقن،، ماعدهن افياي
وبسوگ فرجة اتوگفن،، للرايح وجاي
ودخلوهن دواوين،، ناصب مأتمك وين
يم بـاب العقيلة،، لو يم باب الحسـيـن
--------------------------
هـاي الليالـي امصيبتـك والـثـار يلچم گلـبـك
ايبچيك كل ناعي يون والحزن بيش ايطلبك
بالشام غـربـة دمعتـك وبـكـربـلـه اكثر تـعـبـك
من تمشي مابين الخيم چم جمرة تگطع دربك
چـم جمرة لچمتلك جدم،، بالـهـيـمـة مـولاي
من ركضت ام عون الظهر،، هم ظل الك راي
سالفّت حزنك ما تفض،، من تشرب الماي
حزنك داير اسنين ،، نصاب مأتمك وين
يم بـاب العقيلة ،، لـو يـم باب الـحسين
------------------------
هل من معين اعله البچي گايلها وانته تعينه
محد مثل حالك أبـد حـزنـه ابـقـاء اسنينه
يعگوب مو مثلك حِزن ولا نـوح حمرة عـيـنـه
كل منثكل جرحه نشف بس الي جرحه حسينه
الـف وتسعمـيـة جـرح ،، وبگلبـك أشكال
جرح العطش جرح الرمح،، لو جرح الرمال
جرح الحرگ جرح الهزل،، لو جرح الحبال
وأشكال العناوين،، ناصب مأتمك وين
يم بـاب العقيلة،، لو يم باب الحسين
------------------------
ليل ونهار ابمدمعك موطن دمعتك عاشور
هاي الليالي بلوعتك ويه أمك الزهرة تدور
تلطم لطم حرگة وجزع وبگلبك اخيام اتفور
من تشوف فاطم تنحني چيفن ظلعها مكسور
تدريها مكسورة الضلع،، وتدگ على الهام
وثار الضلع ما ينجلي،، رايدله صمصام
يا عـام ثارك ينقضي،، مـولاي يـا عـام
ونگلك ياضوه العين،، ناصب مأتمك وين
يم بـاب العقيلة،، لو يم باب الحسين
--------------------------
حسين علي التقي
الحگلي اصيحن يخويه خيامي احرگوها
ضيعتها صعبة العزيزة التضـيّـع أخـوهـا
اتطشر ظعنّه،، وبهيمة ضعنه،، وبعيـدة الـشـريـعـة
اتعثرني هضمة،، من الگه حرمه،، بصحاري وسيعة
چنه بأمان الگمر رآيتـه تـرفـرف
هسه عبينه خجل بالحومة تنزف
بلا چفه مانندل ولا ديرة نعـرف
غـارة وتـريـد النـهـب بالدرب زلم
يروح ويرد مستحه حيرة بالجدم
بظلمة وطلعنه بخجل طلعة النجم
ويلاه يزينب ويلاه يزينب
-------------------------
لحد عاشر ولا طلعنه بخيمنه حراير
غير الهواشم حشاها تشوف النواظر
لحد عاشر احنه،، نلوج بعطشنه،، بخيمنه بقينه
النـار افزعتنـه،، وهيه اجبرتنـه،، نطفي بعبينه
ويا طلعة الحيرة طلعتنه بالبر
الما تعثر بجمرة بالنظرة تعـثـر
الفازع يسلّب شيعرف أحنه خدّر
الـسَـلاّب مـا يفـتـهـم عـفّـة الـحـرم
اليحرگ گلب طفلة يستسهل الخيم
الينهب تراچي بأذن شمعرفه بالشيم
-----------------------------
بالحيرة تلة اصعدها بهضمتي صحتلك
لو ما تجيني اعالهزلة تجيلك تره أختك
هالگوم اجالي،، وضاعت عيالي،، الأمانة ثگيلة
احبالي تتاني،، تچتف دلالي،، الحگلها العقيلة
حـرمـة وكفـيـلـة بظعن كله يتامة
وچفني التلاگة بذبح ليله شينامة
ولا واحد من اخوتي گلي بسلامة
يحسـيـن تـرضـاهـا صعدوني عالـهـزل
اوداع الغصب تدري بي خويه مو سهل
وچفي التلزمة صفه امشبّگة الـحــبـل
------------------------------
من تالي اعوفك يخويه طريح الترايب
عالناگة اودعك هظيمة وأماشي الأجانب
من تالي اشوفك،، هيج واعوفك،، سليبة ثيابك
بدمك يسابح،، مالك ملامح،، يـويـلـي لعذابك
يبن امي اكبر جرح عريان جسمك
ليش انته مالك چفن غارگ بدمك
اعليك من أذب روحي خافن ألچمك
النظرة الأخيرة وعـلـي تـگـطـع الـگـلـب
شلون امشي وابن امي اعوفنه عالترب
أرد ابقى يـمـك لـچـن مـاخـوذةً غـصـب
------------------------------
حسين علي التقي
مولاتي زينب ع
كلبي طاح،، حيلي راح
لمن هوت خيامي
كلشي مات ،، يا فرات
وظعني بلا محامي
بلايا حيل،، گملت أميل
وانه دليلي ضامي
أخ اعله حالي ما جره بحرمة قبل
مامنسمع صوتي ولا شافولي ظل
مو حالي من حال النسه الماتنكفل
ام الخدر كلفة صرت أصعد هزل
يا حالي من دار الوكت
بظهرية چم غالي فگدت
بالهيمة مجبورة طلعت
بلايا اخوان وين اندار
بالعاشر اه يامحنتي
من احركوها خيمتي
عل التلة كبرت حيرتي
وبين الخيل عندي زغار
على التله أومي بأديه
يخويه شعظمها الرزية
---------------------------
معوزة شوف،، بيه خوف
خوفي على الظعينه
حيلي مال ،، بالرمال
لمن شفت ولينه
گتله گوم،، جانه گوم
خويه تره انولينه
لو الك نفس الحك علي يابو الشيم
متچتفه برآيي وصعدت اعله القمم
دورلي حل يابو علي حليلي انهدم
متطشرة اطفالي وانه بلايه خيم
مذعورة ادور بالفزع
وعيوني غطاها الدمع
خاف بجيدهم اندفع
فشلة اعثر وسط هالناس
ليا طفله اروح ليا طفل
للميت اركض للعدل
مستصعب أمري مو سهل
دخيلك خويه يا عباس
يابو فاضل الحك عليه
يخويه شعظمها الرزية
-----------------------------
وين اروح،، بس جروح
العاشر خذه الأحبه
هايه نار ،، والزعار
شيلمها والله صعبه
بعز نهار ،، طولي صار
وصار الضوه يچهبه
صار الضوه يجرحني من بعد الخدر
اصعب جرح بعد الذبح ركض الظهر
يامن يجيب الليل الي ويگضي العصر
بنيت علي صعبة تره من امشي بيسر
طاح الكفيل و رايته
وطاحت خيامي بطحيته
الأمشي قبل بحمايته
شلون امشي بلا كفّال
ياخويه حاطتني الغرب
وبلا كفالة أمري صعب
درب السبي رايد گلب
وعكبك خويه بيه شضال
الذبحكم صفه يحدي بيه
يخويه شعظمها الرزية
---------------------------
من مشيت،، وشلگيت
من السبي ومصابه
الخطوه يوم،، بالهموم
أحسبها من عذابه
دربي موت ،، والسكوت
بعيني رسم سحابه
وانه عرفت هذا الدرب ما ينتهي
ألا بخرابة وتخلص ايام الـسـبـي
الماعدها أخو لازم يماشيها اجنبي
والشام يقلل قـدر كـلمـن طالبي
تالي بخرابه تحريت
زينب غريبه هنا صرت
چلمه بحلك شامي أنگلت
صاحو هايه اخت عباس
ديرة شماته بلا أخو
وسايگ ظعنّه هم عدو
ياخويه وينك يل كفو
بالديوان بين ارجاس
صفه أسمي تره الخارجية
يخويه شعظمها الرزية
----------------------------
حسين علي التقي
مولاتي الزهراء ص
تنعى مولاي الحسين ع
أبچيك أم شافت ولـد فـوگ الترب گـلـبـه أنمـرد
أبچيك ضامي ومنسلب صابك حجر صابك عمد
أبچيـك مبتـور الصـبـع ذبـاحـك أبـصـدرك گـعـد
مامثلي أم،، مذبوح أبنها شـافـتـه
حرگة لطم،، صدرك حوافر طحنته
بگلبي هظم،، أبني تطيح عمامـتـه
يمه حسين نحرك ليش گطعوه
يمه حسين ثـوبـك ليش سلبوه
يمه حسين طولك ليش داسوه
واا ويلي على ابني المات عطشان
ولعبت على صدره الخيل مـيـدان
--------------------------
عطشان يانبعي العذب ويلي وشفاهك ذابلة
عطشان تحلف بالنبي يابـس لسانـك بالـفـلـة
عطشان والكوثر ملك أمك وابوك الساقي اله
بثالث عمر ،، عفتك جمال ابلا وصف
شنهي الأمر،، وجهك غده مـاينعـرف
بشمس الظهر،، يايمه لونك منخطف
يمه حسين چبدك ليش عطشوه
يمه حسين حِسنك ليش غيروه
يمه حسين ظلعك ليش طحنوه
---------------------------
محتار يل محد الك وحدك تحامي عالحرم
محتار وتروح وترد بين الشريعه والـخـيـم
محتار مكسور الظهر ظهرك حنا راعي العلم
عزوة وأهل،، چانو الـك وتغـربـت
وين الكفل،، بعيالك لـوحـدك حرت
شنهي الحصل،، وتقدم حصانك أخت
يمه حسين طفلك ليش ذبحوه
يمه حسين ظهرك ليش كسروه
يمه حسين الأكبر ليش طشروه
---------------------------
صيوان عامر بي چنت شيخ العشيرة ياشـهـم
صيوان وين أهل البخت ما جاي أصدك مو حلم
صيوان بي زينب بقت تفتر عـلـي غـربـة الـزلـم
وسفة أنچفت،، الدلال من طاح العلم
وزينب بقت،، محتارة بأطفال وحرم
شلون أطلعت،، مذعور وتطفي الخيم
يمه حسين بيتك ليش حرگوه
يمه حسين ظعنك ليش أسروه
يمه حسين خدرك ليش طلعوه
----------------------------
يايمه مهظومة لأن عاري وبقيت ابلا دفن
يايمه مو ذاك النهر ليش الدمه تغسله الأبن
يايمه راسك بالرمح خليت نحرك بالحظن
نمت بترب ،، والذاري يلچملك جرح
شاب الگلب،، يسلبونه ثوب المنذبح
ويه الغرب،، راسك خذاه ذاك الرمح
يمه حسين جسمك ليش عافوه
يمه حسين راسك وين ودوه
يمه حسين ليش برمح شالوه
----------------------------
حسين علي التقي